1神就舉起我，帶我到耶和華ê厝，ǹg東ê東門；看ah，tī門ê門口，有二十五人；我看見in中間有百姓ê貴族，Ap-sok ê kiáⁿ Ngá-sat-nî，kap Pí-ná-ngá ê kiáⁿ Pí-la̍h-thê。Sîn chiū kú-khí góa, tòa góa kàu Iâ-hô-hoa ê chhù, ǹg-tang ê tang-mn̂g; khòaⁿ ah, tī mn̂g ê mn̂g-kháu, ū jī-cha̍p-gō͘ lâng; góa khòaⁿ-kìⁿ in tiong-kan ū peh-sìⁿ ê kùi-cho̍k, Ap-sok ê kiáⁿ Ngá-sat-nî, kap Pí-ná-ngá ê kiáⁿ Pí-la̍h-thê.

2伊kā我講，人子ah，這就是圖謀罪惡ê人，提倡pháiⁿ-tāi tī chit-ê城內。I kā góa kóng, Jîn-chú ah, che chiū-sī tô͘-bô͘ chōe-ok ê lâng, thê-chhiòng pháiⁿ-tāi tī chit ê siâⁿ-lāi.

3In講，起厝ê期iáu未到，chit-ê城是鼎，阮是hit內面ê肉。In kóng, Khí-chhù ê kî iáu-bē kàu, chit ê siâⁿ sī tiáⁿ, goán sī hit lāi-bīn ê bah.

4人子ah，因為án-ni，你tio̍h宣傳；tio̍h宣傳來攻擊in。Jîn-chú ah, in-ūi án-ni, lí tio̍h soan-thoân; tio̍h soan-thoân lâi kong-kek in.

5耶和華ê神臨到我，對我講，你tio̍h講，耶和華án-ni講，以色列家ah，lín講án-ni，lín ê心所想，我知lah。Iâ-hô-hoa ê sîn lîm-kàu góa, tùi góa kóng, Lí tio̍h kóng, Iâ-hô-hoa án-ni kóng, Í-sek-lia̍t-ke ah, lín kóng án-ni, lín ê sim só͘ siūⁿ, Góa chai lah.

6Lín tī chit-ê城內thâi死chōe-chōe人，hō͘身屍滿街路。Lín tī chit ê siâⁿ-lāi thâi-sí chōe-chōe lâng, hō͘ sin-si móa ke-lō͘.

7所以主耶和華án-ni講，Lín所hē tī chit-ê城內ê死人就是肉；chit-ê城就是鼎；總是lín beh tùi hit中間受帶出去。Só͘-í Chú Iâ-hô-hoa án-ni kóng, Lín só͘ hē tī chit ê siâⁿ-lāi ê sí-lâng chiū-sī bah; chit ê siâⁿ chiū-sī tiáⁿ; chóng-sī lín beh tùi hit tiong-kan siū tòa-chhut--khì.

8Lín驚刀劍，我beh hō͘刀劍臨到lín；這是主耶和華講ê。Lín kiaⁿ to-kiàm, Góa beh hō͘ to-kiàm lîm-kàu lín; che sī Chú Iâ-hô-hoa kóng--ê.

9我beh tùi hit中間chhōa lín出去，交tī外邦人ê手；koh beh tī lín中間行審判。Góa beh tùi hit tiong-kan chhōa lín chhut-khì, kau tī gōa-pang lâng ê chhiú; koh beh tī lín tiong-kan kiâⁿ sím-phòaⁿ.

10Lín beh倒tī刀下，我beh tī以色列ê交界審判lín；lín就知我是耶和華。Lín beh tó tī to-ē, Góa beh tī Í-sek-lia̍t ê kau-kài sím-phòaⁿ lín; lín chiū chai Góa sī Iâ-hô-hoa.

11Chit-ê城無beh做lín ê鼎，lín亦無beh做hit中間ê肉；我beh tī以色列ê交界審判lín。Chit ê siâⁿ bô beh chòe lín ê tiáⁿ, lín ia̍h bô beh chòe hit tiong-kan ê bah; Góa beh tī Í-sek-lia̍t ê kau-kài sím-phòaⁿ lín.

12Lín就知我是耶和華，因為lín無行我ê律例，亦無順thàn我ê法度；就是thàn lín四圍列國ê法度。Lín chiū chai Góa sī Iâ-hô-hoa, in-ūi lín bô kiâⁿ Góa ê lu̍t-lē, ia̍h bô sūn-thàn Góa ê hoat-tō͘; chiū-sī thàn lín sì-ûi lia̍t-kok ê hoat-tō͘.

13我tú-á teh宣傳ê時，Pí-ná-ngá ê kiáⁿ Pí-la̍h-thê死去。我就仆tī地裡，大聲叫講，Hāiⁿ ah！主耶和華ah，祢beh將以色列ê人一盡剿滅mah？Góa tú-á teh soan-thoân ê sî, Pí-ná-ngá ê kiáⁿ Pí-la̍h-thê sí--khì. Góa chiū phak tī tōe--nih, tōa-siaⁿ kiò kóng, Hāiⁿ ah! Chú Iâ-hô-hoa ah, Lí beh chiong Í-sek-lia̍t ê lâng it-chīn châu-bia̍t mah?

14耶和華ê話臨到我講，Iâ-hô-hoa ê ōe lîm-kàu góa kóng,

15人子ah，耶路撒冷khiā起ê百姓，對你ê兄弟，就是你ê兄弟，你ê親人，kap以色列全家，就是對眾人講，Lín tio̍h離開耶和華，因為chit-ê地是hō͘阮做業ê。Jîn-chú ah, Iâ-lō͘-sat-léng khiā-khí ê peh-sìⁿ, tùi lí ê hiaⁿ-tī, chiū-sī lí ê hiaⁿ-tī, lí ê chhin-lâng, kap Í-sek-lia̍t choân-ke, chiū-sī tùi chèng-lâng kóng, Lín tio̍h lī-khui Iâ-hô-hoa, in-ūi chit ê tōe sī hō͘ goán chòe-gia̍p--ê.

16所以你tio̍h講，主耶和華án-ni講，我雖然遷徙in遠遠，tī列邦中，四散in tī列國中，我iáu beh tī in所到ê國，暫時做in ê聖所。Só͘-í lí tio̍h kóng, Chú Iâ-hô-hoa án-ni kóng, Góa sui-jiân chhian-sóa in hn̄g-hn̄g, tī lia̍t-pang-tiong, sì-sòaⁿ in tī lia̍t-kok-tiong, Góa iáu beh tī in só͘ kàu ê kok, chiām-sî chòe in ê sèng-só͘.

17所以你tio̍h講，主耶和華án-ni講，我beh tùi chiah-ê百姓中招集lín，亦beh tùi lín四散到ê列國中聚集lín，koh beh將以色列地賞賜lín。Só͘-í lí tio̍h kóng, Chú Iâ-hô-hoa án-ni kóng, Góa beh tùi chiah ê peh-sìⁿ-tiong chio-chi̍p lín, ia̍h beh tùi lín sì-sòaⁿ kàu ê lia̍t-kok-tiong chū-chi̍p lín, koh beh chiong Í-sek-lia̍t tōe siúⁿ-sù lín.

18In beh到hia，亦beh tùi in中間除去一切可惡thang怨恨ê物。In beh kàu hia, ia̍h beh tùi in tiong-kan tû-khì it-chhè khó-ò͘ⁿ thang oàn-hūn ê mi̍h.

19我beh hō͘ in專一ê心，亦beh將新ê神hē tī lín ê內面；koh beh tùi in ê肉體中除去hit號親像石ê心，賞賜in hit號親像肉ê心。Góa beh hō͘ in choan-it ê sim, ia̍h beh chiong sin ê sîn hē tī lín ê lāi-bīn; koh beh tùi in ê jio̍k-thé-tiong tû-khì hit-hō chhin-chhiūⁿ chio̍h ê sim, siúⁿ-sù in hit-hō chhin-chhiūⁿ bah ê sim.

20Hō͘ in順thàn我ê律例，遵守我ê法度來行伊；in做我ê百姓，我亦beh做in ê上帝。Hō͘ in sūn-thàn Góa ê lu̍t-lē, chun-siú Góa ê hoat-tō͘ lâi kiâⁿ--i; in chòe Góa ê peh-sìⁿ, Góa ia̍h beh chòe in ê Siōng-tè.

21總是心thàn可惡thang厭賤ê ê心hit號人，我beh照in所行ê報應tī in ê頭殼頂；這是主耶和華講ê。Chóng-sī sim thàn khó-ò͘ⁿ thang iàm-chiān--ê ê sim hit-hō lâng, Góa beh chiàu in só͘ kiâⁿ--ê pò-èng tī in ê thâu-khak-téng; che sī Chú Iâ-hô-hoa kóng--ê.

22Hit時ki-lō͘兵thí開in ê翼，hiah-ê輪亦tī in ê邊頭；tī in ê頂面有以色列上帝ê榮光。Hit-sî ki-lō͘-peng thí-khui in ê si̍t, hiah ê lûn ia̍h tī in ê piⁿ-thâu; tī in ê téng-bīn ū Í-sek-lia̍t Siōng-tè ê êng-kng.

23耶和華ê榮光tùi城中上去，歇tī城外東勢ê山。Iâ-hô-hoa ê êng-kng tùi siâⁿ-tiong chiūⁿ--khì, hioh tī siâⁿ-gōa tang--sì ê soaⁿ.

24神舉起我，tī異象中tùi上帝ê神帶我到Ka-le̍k-tí受掠ê人hia；我所看見ê異象，就離開我上去。Sîn kú-khí góa, tī īⁿ-siōng-tiong tùi Siōng-tè ê sîn tòa góa kàu Ka-le̍k-tí siū-lia̍h ê lâng hia; góa só͘ khòaⁿ-kìⁿ ê īⁿ-siōng, chiū lī-khui góa chiūⁿ--khì.

25我就將耶和華所指示我一切ê事，lóng講hō͘受掠ê人聽。Góa chiū chiong Iâ-hô-hoa só͘ chí-sī góa it-chhè ê sū, lóng kóng hō͘ siū-lia̍h ê lâng thiaⁿ.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你khiā起tī悖逆ê家中；in有目睭thang看，亦m̄看；有耳孔thang聽，亦m̄聽；因為in是悖逆ê家。Jîn-chú ah, lí khiā-khí tī pōe-ge̍k ê ke-tiong; in ū ba̍k-chiu thang khòaⁿ, ia̍h m̄-khòaⁿ; ū hī-khang thang thiaⁿ, ia̍h m̄-thiaⁿ; in-ūi in sī pōe-ge̍k ê ke.

3所以，人子ah，你tio̍h為家己備辦受遷徙應用ê物件；當頭白日tī in ê目睭前來遷徙；koh tio̍h對你ê所在當in ê目睭前遷徙到別位；in雖bóng是悖逆ê家，kiám-chhái tùi án-ni，會想。Só͘-í, jîn-chú ah, lí tio̍h ūi ka-kī pī-pān siū chhian-sóa èng-iōng ê mi̍h-kiāⁿ; tng-thâu pe̍h-ji̍t tī in ê ba̍k-chiu-chêng lâi chhian-sóa; koh tio̍h tùi lí ê só͘-chāi tng in ê ba̍k-chiu-chêng chhian-sóa kàu pa̍t-ūi; in sui-bóng sī pōe-ge̍k ê ke, kiám-chhái tùi án-ni ōe siūⁿ.

4你tio̍h當頭白日，tī in ê目睭前，帶你ê物出去；親像帶受遷徙應用ê物一樣；到ê-hng，你tio̍h tī in ê目睭前家己出去，親像受掠ê人出去一樣。Lí tio̍h tng-thâu pe̍h-ji̍t, tī in ê ba̍k-chiū-chêng, tòa lí ê mi̍h chhut-khì; chhin-chhiūⁿ tòa siū chhian-sóa èng-iōng ê mi̍h chi̍t-iūⁿ; kàu ê-hng, lí tio̍h tī in ê ba̍k-chiu-chêng ka-kī chhut-khì, chhin-chhiūⁿ siū-lia̍h ê lâng chhut-khì chi̍t-iūⁿ.

5你tio̍h tī in ê面前，tùi牆壁iah孔，tùi hit孔帶物出去。Lí tio̍h tī in ê bīn-chêng, tùi chhiûⁿ-piah iah-khang, tùi hit khang tòa mi̍h chhut-khì.

6到日暗，你tio̍h tī in ê目睭前，背tī肩頭出去；亦tio̍h罩你ê面，到無看見地；因為我用你做以色列家ê兆頭。Kàu ji̍t àm, lí tio̍h tī in ê ba̍k-chiu-chêng, pē tī keng-thâu chhut-khì; ia̍h tio̍h tà lí ê bīn, kàu bô khòaⁿ-kìⁿ tōe; in-ūi Góa ēng lí chòe Í-sek-lia̍t-ke ê tiāu-thâu.

7我就照所吩咐ê去行，當頭白日帶我ê物件出去，親像帶受遷徙應用ê物件；日beh暗，我用手tùi牆iah孔；日已經暗，就當in ê目睭前背tī肩頭帶出去。Góa chiū chiàu só͘ hoan-hù--ê khì kiâⁿ, tng-thâu pe̍h-ji̍t tòa góa ê mi̍h-kiāⁿ chhut-khì, chhin-chhiūⁿ tòa siū chhian-sóa èng-iōng ê mi̍h-kiāⁿ; ji̍t beh àm, góa ēng chhiú tùi chhiûⁿ iah khang; ji̍t í-keng àm, chiū tng in ê ba̍k-chiu-chêng pē tī keng-thâu tòa chhut-khì.

8隔早起，耶和華ê話臨到我講，Kè chá-khí, Iâ-hô-hoa ê ōe lîm-kàu góa kóng,

9人子ah，以色列家，就是悖逆ê家，kiám m̄-bat問你講，你做甚麼ah？Jîn-chú ah, Í-sek-lia̍t-ke, chiū-sī pōe-ge̍k ê ke, kiám m̄-bat mn̄g lí kóng, Lí chòe sím-mi̍h ah?

10你tio̍h應in講，主耶和華án-ni講，chit-ê啟示，關係耶路撒冷ê君王，以及in中間以色列ê全家。Lí tio̍h ìn in kóng, Chú Iâ-hô-hoa án-ni kóng, Chit ê khé-sī, koan-hē Iâ-lō͘-sat-léng ê kun-ông, í-ki̍p in tiong-kan Í-sek-lia̍t ê choân-ke.

11你tio̍h講，我做lín ê兆頭；我怎樣行，in所tú-tio̍h-ê也beh án-ni；in beh受掠受遷徙。Lí tio̍h kóng, Góa chòe lín ê tiāu-thâu; góa cháiⁿ-iūⁿ kiâⁿ, in só͘ tú-tio̍h--ê iā beh án-ni; in beh siū-lia̍h siū chhian-sóa.

12In中間ê君王也beh tī日暗ê時，背物tī肩頭帶出去；in beh tùi牆iah孔，tùi hit孔帶物出去；伊beh蓋伊ê面，因為目睭無看見地。In tiong-kan ê kun-ông iā beh tī ji̍t àm ê sî, pē mi̍h tī keng-thâu tòa chhut--khì; in beh tùi chhiûⁿ iah khang, tùi hit khang tòa mi̍h chhut--khì; i beh khàm i ê bīn, in-ūi ba̍k-chiu bô khòaⁿ-kìⁿ tōe.

13我beh張我ê羅網tī伊ê頂面，伊beh hō͘我ê活tauh tauh-tio̍h；我beh帶伊到巴比倫，Ka-le̍k-tí人ê地；伊雖然死tī-hia，也bōe看見hit-ê地。Góa beh tiuⁿ Góa ê lô-bāng tī i ê téng-bīn, i beh hō͘ Góa ê oa̍h-tauh tauh--tio̍h; Góa beh tòa i kàu Pa-pí-lûn, Ka-le̍k-tí lâng ê tōe; i sui-jiân sí tī-hia, iā bōe khòaⁿ-kìⁿ hit ê tōe.

14周圍一切保護伊ê，kap伊所有ê軍隊，我beh四散in tī四方；也beh拔刀追jip in。Chiu-ûi it-chhè pó-hō͘ i ê, kap i só͘ ū ê kun-tūi, Góa beh sì-sòaⁿ in tī sì-hng; iā beh pu̍ih-to tui-jip in.

15我分散in tī列邦，四散in tī列國ê時，in就知我是耶和華。Góa hun-sòaⁿ in tī lia̍t-pang, sì-sòaⁿ in tī lia̍t-kok ê sî, in chiū chai Góa sī Iâ-hô-hoa.

16總是我beh留in kúi-nā人，脫離刀劍、飢荒、瘟疫，hō͘ in tī所到ê ta̍k國中，講起in可惡ê事；in就知我是耶和華。Chóng-sī Góa beh lâu in kúi-nā lâng, thoat-lī to-kiàm, ki-hng, un-e̍k, hō͘ in tī só͘ kàu ê ta̍k-kok-tiong, kóng-khí in khó-ò͘ⁿ ê sū; in chiū chai Góa sī Iâ-hô-hoa.

17耶和華ê話koh臨到講，Iâ-hô-hoa ê ōe koh lîm-kàu kóng,

18人子ah，你tio̍h ngia̍uh-ngia̍uh-chhoah來食你ê餅，tio̍h驚惶撙節來lim你ê水。Jîn-chú ah, lí tio̍h ngia̍uh-ngia̍uh-chhoah lâi chia̍h lí ê piáⁿ, tio̍h kiaⁿ-hiâⁿ chún-chat lâi lim lí ê chúi.

19你tio̍h對chit-ê地方ê百姓講，主耶和華論耶路撒冷，kap以色列地khiā起ê百姓，án-ni講，In食餅tio̍h撙節，lim水tio̍h gông-ngia̍h，因為in中間khiā起ê眾人所行強暴ê事，chit-ê地beh荒廢失落伊所有ê。Lí tio̍h tùi chit ê tōe-hng ê peh-sìⁿ kóng, Chú Iâ-hô-hoa lūn Iâ-lō͘-sat-léng, kap Í-sek-lia̍t tōe khiā-khí ê peh-sìⁿ, án-ni kóng, In chia̍h piáⁿ tio̍h chún-chat, lim chúi tio̍h gông-ngia̍h, in-ūi in tiong-kan khiā-khí ê chèng-lâng só͘ kiâⁿ kiông-pō ê sū, chit ê tōe beh hong-hòe sit-lo̍h i só͘-ū-ê.

20有人khiā起ê城beh拋荒；地也beh荒廢；lín就知我是耶和華。Ū lâng khiā-khí ê siâⁿ beh pha-hng; tōe iā beh hong-hòe; lín chiū chai Góa sī Iâ-hô-hoa.

21耶和華ê話koh臨到我講，Iâ-hô-hoa ê ōe koh lîm-kàu góa kóng,

22人子ah，tī lín以色列地，怎樣有chit號俗語講，時日延chhiân，異象lóng無應驗ah？Jîn-chú ah, tī lín Í-sek-lia̍t tōe, cháiⁿ-iūⁿ ū chit-hō sio̍k-gú kóng, Sî-ji̍t iân-chhiân, īⁿ-siōng lóng bô èng-giām ah?

23所以你tio̍h kā in講，主耶和華án-ni講，我beh hō͘ chit-ê俗語soah，以色列中無koh用chit-ê做俗語；總是你tio̍h kā in講，時日近lah，ta̍k-ê異象ê應驗也是án-ni。Só͘-í lí tio̍h kā in kóng, Chú Iâ-hô-hoa án-ni kóng, Góa beh hō͘ chit ê sio̍k-gú soah, Í-sek-lia̍t tiong bô koh ēng chit-ê chòe sio̍k-gú; chóng-sī lí tio̍h kā in kóng, Sî-ji̍t kūn--lah, ta̍k ê īⁿ-siōng ê èng-giām iā-sī án-ni.

24以後tī以色列家ê中間，的確無koh有虛假ê異象，順人意ê卜卦。Í-āu tī Í-sek-lia̍t-ke ê tiong-kan, tek-khak bô koh ū hu-ké ê īⁿ-siōng, sūn jîn-ì ê pok-kòa.

25因為我就是耶和華，我beh講，koh我所講ê話，beh應驗，無koh延chhiân；lín chit-ê悖逆ê家ah，我beh tī lín活teh ê日來講，來成伊；這是主耶和華講ê。In-ūi Góa chiū-sī Iâ-hô-hoa, Góa beh kóng, koh Góa só͘ kóng ê ōe, beh èng-giām, bô koh iân-chhiân; lín chit ê pōe-ge̍k ê ke ah, Góa beh tī lín oa̍h-teh ê ji̍t lâi kóng, lâi chiâⁿ--i; che sī Chú Iâ-hô-hoa kóng--ê.

26耶和華ê話koh臨到我講，Iâ-hô-hoa ê ōe koh lîm-kàu góa kóng,

27人子ah，看ah，以色列家ê人講，伊所看見ê異象，是屬tī chōe-chōe日後ê事，所講ê讖語，是指極遠ê時期。Jîn-chú ah, khòaⁿ ah, Í-sek-lia̍t-ke ê lâng kóng, I só͘ khòaⁿ-kìⁿ ê īⁿ-siōng, sī sio̍k tī chōe-chōe ji̍t-āu ê sū, só͘ kóng ê chhàm-gú, sī chí ke̍k-hn̄g ê sî-kî.

28所以你tio̍h對in講，主耶和華án-ni講，我ê話無一句有koh 延chhiân，我所講ê話，的確成伊；這是主耶和華講ê。Só͘-í lí tio̍h tùi in kóng, Chú Iâ-hô-hoa án-ni kóng, Góa ê ōe bô chi̍t-kù ū koh iân-chhiân, Góa só͘ kóng ê ōe, tek-khak chiâⁿ--i; che sī Chú Iâ-hô-hoa kóng--ê.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h宣傳來攻擊以色列中hiah-ê teh宣傳ê先知，kā hiah-ê照伊家己ê心意來宣傳ê講，Lín tio̍h聽耶和華ê話。Jîn-chú ah, lí tio̍h soan-thoân lâi kong-kek Í-sek-lia̍t-tiong hiah-ê teh soan-thoân ê sian-ti, kā hiah-ê chiàu i ka-kī ê sim-ì lâi soan-thoân--ê kóng, Lín tio̍h thiaⁿ Iâ-hô-hoa ê ōe.

3主耶和華án-ni講，Hiah-ê戇ê先知，in有災厄ah，in thàn家己ê心神來行，並無看見一項。Chú Iâ-hô-hoa án-ni kóng, Hiah-ê gōng ê sian-ti, in ū chai-ē ah, in thàn ka-kī ê sim-sîn lâi kiâⁿ, pēng-bô khòaⁿ-kìⁿ chi̍t-hāng.

4以色列ah，你ê先知親像拋荒ê所在ê狐狸。Í-sek-lia̍t ah, lí ê sian-ti chhin-chhiūⁿ pha-hng ê só͘-chāi ê hô͘-lî.

5Lín bē-bat上到破隙ê所在，亦bē-bat為tio̍h以色列家圍一個牆；thang tī耶和華ê日，戰陣khiā-ōe-tiâu。Lín bē-bat chiūⁿ-kàu phòa-khiah ê só͘-chāi, ia̍h bē-bat ūi-tio̍h Í-sek-lia̍t-ke ûi chi̍t ê chhiûⁿ; thang tī Iâ-hô-hoa ê ji̍t, chiàn-tīn khiā-ōe-tiâu.

6In所看見ê是虛假，是白賊ê占卜；in講，這是耶和華講ê，其實耶和華無影差in，in iáu teh ǹg望hit-ê話會應驗。In só͘ khòaⁿ-kìⁿ--ê sī hu-ké, sī pe̍h-chha̍t ê chiam-pok; in kóng, Che sī Iâ-hô-hoa kóng--ê, kî-si̍t Iâ-hô-hoa bô-iáⁿ chhe--in, in iáu teh ǹg-bāng hit ê ōe ōe èng-giām.

7Lín kiám m̄是看見虛假ê異象mah？kiám m̄是講白賊ê占卜mah？lín講，這是耶和華講ê，其實我無差in講。Lín kiám-m̄-sī khòaⁿ-kìⁿ hu-ké ê īⁿ-siōng mah? kiám-m̄-sī kóng pe̍h-chha̍t ê chiam-pok mah? lín kóng, Che sī Iâ-hô-hoa kóng--ê, kî-si̍t Góa bô chhe in kóng.

8所以主耶和華án-ni講，因為lín所講ê是虛假，所看ê是白賊；看ah，因為án-ni我kap lín反對；這是主耶和華講ê。Só͘-í Chú Iâ-hô-hoa án-ni kóng, In-ūi lín só͘ kóng-ê sī hu-ké, só͘ khòaⁿ--ê sī pe̍h-chha̍t; khòaⁿ ah, in-ūi án-ni Góa kap lín hoán-tùi; che sī Chú Iâ-hô-hoa kóng--ê.

9我ê手beh攻擊hiah-ê看見虛假，用白賊占卜ê先知；in的確無屬tī我ê百姓ê會中，無記tī以色列家ê人名簿；亦bōe-thang進入以色列地；lín就知我是主耶和華。Góa ê chhiú beh kong-kek hiah ê khòaⁿ-kìⁿ hu-ké, ēng pe̍h-chha̍t chiam-pok ê sian-ti; in tek-khak bô sio̍k tī Góa ê peh-sìⁿ ê hōe-tiong, bô kì tī Í-sek-lia̍t ke ê lâng-miâ-phō͘; ia̍h bōe thang chìn-ji̍p Í-sek-lia̍t tōe; lín chiū chai Góa sī Chú Iâ-hô-hoa.

10因為in誘惑我ê百姓講，平安，其實無有平安；就是親像人起牆壁，in kā伊筅(chhéng)灰水。In-ūi in iú-he̍k Góa ê peh-sìⁿ kóng, Pêng-an, kî-si̍t bô-ū pêng-an; chiū-sī chhin-chhiūⁿ lâng khí chhiûⁿ-piah, in kā i chhéng he-chúi.

11所以你tio̍h對hiah-ê筅灰水ê人講，牆beh倒壞，beh有漲水ê大雨；大雹ah，lín tio̍h落來，koh beh有大風吹裂伊。Só͘-í lí tio̍h tùi hiah-ê chhéng he-chúi ê lâng kóng, Chhiûⁿ beh tó-hoāi, beh ū tiòng-chúi ê tōa-hō͘; tōa-pha̍uh ah, lín tio̍h lo̍h--lâi, koh beh ū tōa-hong chhe-li̍h--i.

12看ah，牆倒了後，人kiám無beh對lín講，Lín所chhéng ê 灰水，taⁿ tī toh-lo̍h？Khòaⁿ ah, chhiûⁿ tó liáu-āu, lâng kiám bô beh tùi lín kóng, Lín só͘ chhéng ê he-chúi, taⁿ tī toh-lo̍h?

13所以主耶和華án-ni講，我beh tī我ê大受氣，用狂風拆裂伊，tī我ê受氣beh有漲水ê大雨，也tī我ê大受氣beh落大雹來毀滅伊。Só͘-í Chú Iâ-hô-hoa án-ni kóng, Góa beh tī Góa ê tōa siū-khì, ēng kông-hong thiah-li̍h--i, tī Góa ê siū-khì beh ū tiòng-chúi ê tōa-hō͘, iā tī Góa ê tōa siū-khì beh lo̍h tōa-pha̍uh lâi húi-bia̍t--i.

14我beh án-ni拆毀lín筅灰水ê牆，拆到平地；致到牆基露現，牆beh倒壞；lín亦beh滅無tī hit中間；lín就知我是耶和華。Góa beh án-ni thiah-húi lín chhéng he-chúi ê chhiûⁿ, thiah kàu pîⁿ-tōe; tì-kàu chhiûⁿ-ki lō͘-hiān, chhiûⁿ beh tó-hoāi; lín ia̍h beh bia̍t-bô tī hit tiong-kan; lín chiū chai Góa sī Iâ-hô-hoa.

15我beh án-ni成我ê大受氣tī hit-ê牆，kap筅灰水ê人；亦beh對lín講，牆無去lah，筅灰水ê人亦無去lah。Góa beh án-ni chiâⁿ Góa ê tōa siū-khì tī hit ê chhiûⁿ, kap chhéng he-chúi ê lâng; ia̍h beh tùi lín kóng, Chhiûⁿ bô--khì lah, chhéng he-chúi ê lâng ia̍h bô--khì lah.

16這就是以色列ê先知，in kí耶路撒冷來宣傳；為tio̍h伊看見平安ê異象，其實無有平安；這是主耶和華講ê。Che chiū-sī Í-sek-lia̍t ê sian-ti, in kí Iâ-lō͘-sat-léng lâi soan-thoân; ūi-tio̍h i khòaⁿ-kìⁿ pêng-an ê īⁿ-siōng, kî-si̍t bô-ū pêng-an; che sī Chú Iâ-hô-hoa kóng--ê.

17人子ah，你tio̍h面直直ǹg你ê百姓ê婦女，就是照伊ê心意來宣傳ê；Jîn-chú ah, lí tio̍h bīn ti̍t-ti̍t ǹg lí ê peh-sìⁿ ê hū-lú, chiū-sī chiàu i ê sim-ì lâi soan-thoân--ê;

18你tio̍h宣傳來攻擊伊，講，主耶和華án-ni講，Chiah-ê婦女有災厄ah，in kā眾人ê手khiau縫(pâng)靠墊，kā ta̍k等號身裁ê人做罩頭殼ê帕，來搶人ê神魂！總無lín beh搶我ê百姓ê神魂，為利益家己救活神魂mah？lí tio̍h soan-thoân lâi kong-kek--i, kóng, Chú Iâ-hô-hoa án-ni kóng, Chiah ê hū-lú ū chai-ē ah, in kā chèng-lâng ê chhiú-khiau pâng khò-tiām, kā ta̍k téng-hō sin-chhâi ê lâng chòe tà thâu-khak ê phè, lâi chhiúⁿ lâng ê sîn-hûn! chóng-bô lín beh chhiúⁿ Góa ê peh-sìⁿ ê sîn-hûn, ūi lī-ek ka-kī kiù oa̍h sîn-hûn mah?

19Lín為tio̍h kúi-nā把大麥，kúi-nā塊餅，tī我ê百姓中褻瀆我，對我hiah-ê ài聽白賊話ê百姓，來講白賊，害死hiah-ê m̄應該死ê神魂，亦hō͘ m̄應該活ê神魂活。Lín ūi-tio̍h kúi-nā pé tōa-be̍h, kúi-nā tè piáⁿ, tī Góa ê peh-sìⁿ-tiong siat-to̍k Góa, tùi Góa hiah ê ài thiaⁿ pe̍h-chha̍t-ōe ê peh-sìⁿ, lâi kóng pe̍h-chha̍t, hāi-sí hiah-ê m̄ eng-kai sí ê sîn-hûn, ia̍h hō͘ m̄-eng-kai oa̍h ê sîn-hûn oa̍h.

20所以主耶和華án-ni講，看ah，我反對lín ê靠墊，就是lín所用來搶神魂hō͘伊飛去ê；我beh tùi lín ê手拆起來；我beh tháu放hiah-ê神魂，就是lín所搶ê神魂，來hō͘ in飛去ê。Só͘-í Chú Iâ-hô-hoa án-ni kóng, Khòaⁿ ah, Góa hoán-tùi lín ê khò-tiām, chiū-sī lín só͘ ēng lâi chhiúⁿ sîn-hûn hō͘ i pe--khì-ê; Góa beh tùi lín ê chhiú thiah--khí-lâi; Góa beh tháu-pàng hiah ê sîn-hûn, chiū-sī lín só͘ chhiúⁿ ê sîn-hûn, lâi hō͘ in pe--khì ê.

21我亦beh拆裂lín hiah-ê帕，救我ê百姓脫離lín ê手，無koh受搶tī lín ê手內；lín就知我是耶和華。Góa ia̍h beh thiah-li̍h lín hiah ê phè, kiù Góa ê peh-sìⁿ thoat-lī lín ê chhiú, bô koh siū chhiúⁿ tī lín ê chhiú-lāi; lín chiū chai Góa sī Iâ-hô-hoa.

22因為hit號義人，我無hō͘伊傷心，lín用白賊話hō͘伊傷心；koh lín堅固pháiⁿ人ê手，hō͘伊無oa̍t頭離開伊ê pháiⁿ路，來得tio̍h活。In-ūi hit hō gī-lâng, Góa bô hō͘ i siong-sim, lín ēng pe̍h-chha̍t ōe hō͘ i siong-sim; koh lín kian-kò͘ pháiⁿ lâng ê chhiú, hō͘ i bô oa̍t-thâu lī-khui i ê pháiⁿ-lō͘, lâi tit-tio̍h oa̍h.

23所以lín bōe-thang koh看見虛假，亦bōe-thang koh占卜。我beh救我ê百姓脫離lín ê手；lín就知我是耶和華。Só͘-í lín bōe thang koh khòaⁿ-kìⁿ hu-ké, ia̍h bōe thang koh chiam-pok. Góa beh kiù Góa ê peh-sìⁿ thoat-lī lín ê chhiú; lín chiū chai Góa sī Iâ-hô-hoa.