1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你khiā起tī悖逆ê家中；in有目睭thang看，亦m̄看；有耳孔thang聽，亦m̄聽；因為in是悖逆ê家。Jîn-chú ah, lí khiā-khí tī pōe-ge̍k ê ke-tiong; in ū ba̍k-chiu thang khòaⁿ, ia̍h m̄-khòaⁿ; ū hī-khang thang thiaⁿ, ia̍h m̄-thiaⁿ; in-ūi in sī pōe-ge̍k ê ke.

3所以，人子ah，你tio̍h為家己備辦受遷徙應用ê物件；當頭白日tī in ê目睭前來遷徙；koh tio̍h對你ê所在當in ê目睭前遷徙到別位；in雖bóng是悖逆ê家，kiám-chhái tùi án-ni，會想。Só͘-í, jîn-chú ah, lí tio̍h ūi ka-kī pī-pān siū chhian-sóa èng-iōng ê mi̍h-kiāⁿ; tng-thâu pe̍h-ji̍t tī in ê ba̍k-chiu-chêng lâi chhian-sóa; koh tio̍h tùi lí ê só͘-chāi tng in ê ba̍k-chiu-chêng chhian-sóa kàu pa̍t-ūi; in sui-bóng sī pōe-ge̍k ê ke, kiám-chhái tùi án-ni ōe siūⁿ.

4你tio̍h當頭白日，tī in ê目睭前，帶你ê物出去；親像帶受遷徙應用ê物一樣；到ê-hng，你tio̍h tī in ê目睭前家己出去，親像受掠ê人出去一樣。Lí tio̍h tng-thâu pe̍h-ji̍t, tī in ê ba̍k-chiū-chêng, tòa lí ê mi̍h chhut-khì; chhin-chhiūⁿ tòa siū chhian-sóa èng-iōng ê mi̍h chi̍t-iūⁿ; kàu ê-hng, lí tio̍h tī in ê ba̍k-chiu-chêng ka-kī chhut-khì, chhin-chhiūⁿ siū-lia̍h ê lâng chhut-khì chi̍t-iūⁿ.

5你tio̍h tī in ê面前，tùi牆壁iah孔，tùi hit孔帶物出去。Lí tio̍h tī in ê bīn-chêng, tùi chhiûⁿ-piah iah-khang, tùi hit khang tòa mi̍h chhut-khì.

6到日暗，你tio̍h tī in ê目睭前，背tī肩頭出去；亦tio̍h罩你ê面，到無看見地；因為我用你做以色列家ê兆頭。Kàu ji̍t àm, lí tio̍h tī in ê ba̍k-chiu-chêng, pē tī keng-thâu chhut-khì; ia̍h tio̍h tà lí ê bīn, kàu bô khòaⁿ-kìⁿ tōe; in-ūi Góa ēng lí chòe Í-sek-lia̍t-ke ê tiāu-thâu.

7我就照所吩咐ê去行，當頭白日帶我ê物件出去，親像帶受遷徙應用ê物件；日beh暗，我用手tùi牆iah孔；日已經暗，就當in ê目睭前背tī肩頭帶出去。Góa chiū chiàu só͘ hoan-hù--ê khì kiâⁿ, tng-thâu pe̍h-ji̍t tòa góa ê mi̍h-kiāⁿ chhut-khì, chhin-chhiūⁿ tòa siū chhian-sóa èng-iōng ê mi̍h-kiāⁿ; ji̍t beh àm, góa ēng chhiú tùi chhiûⁿ iah khang; ji̍t í-keng àm, chiū tng in ê ba̍k-chiu-chêng pē tī keng-thâu tòa chhut-khì.

8隔早起，耶和華ê話臨到我講，Kè chá-khí, Iâ-hô-hoa ê ōe lîm-kàu góa kóng,

9人子ah，以色列家，就是悖逆ê家，kiám m̄-bat問你講，你做甚麼ah？Jîn-chú ah, Í-sek-lia̍t-ke, chiū-sī pōe-ge̍k ê ke, kiám m̄-bat mn̄g lí kóng, Lí chòe sím-mi̍h ah?

10你tio̍h應in講，主耶和華án-ni講，chit-ê啟示，關係耶路撒冷ê君王，以及in中間以色列ê全家。Lí tio̍h ìn in kóng, Chú Iâ-hô-hoa án-ni kóng, Chit ê khé-sī, koan-hē Iâ-lō͘-sat-léng ê kun-ông, í-ki̍p in tiong-kan Í-sek-lia̍t ê choân-ke.

11你tio̍h講，我做lín ê兆頭；我怎樣行，in所tú-tio̍h-ê也beh án-ni；in beh受掠受遷徙。Lí tio̍h kóng, Góa chòe lín ê tiāu-thâu; góa cháiⁿ-iūⁿ kiâⁿ, in só͘ tú-tio̍h--ê iā beh án-ni; in beh siū-lia̍h siū chhian-sóa.

12In中間ê君王也beh tī日暗ê時，背物tī肩頭帶出去；in beh tùi牆iah孔，tùi hit孔帶物出去；伊beh蓋伊ê面，因為目睭無看見地。In tiong-kan ê kun-ông iā beh tī ji̍t àm ê sî, pē mi̍h tī keng-thâu tòa chhut--khì; in beh tùi chhiûⁿ iah khang, tùi hit khang tòa mi̍h chhut--khì; i beh khàm i ê bīn, in-ūi ba̍k-chiu bô khòaⁿ-kìⁿ tōe.

13我beh張我ê羅網tī伊ê頂面，伊beh hō͘我ê活tauh tauh-tio̍h；我beh帶伊到巴比倫，Ka-le̍k-tí人ê地；伊雖然死tī-hia，也bōe看見hit-ê地。Góa beh tiuⁿ Góa ê lô-bāng tī i ê téng-bīn, i beh hō͘ Góa ê oa̍h-tauh tauh--tio̍h; Góa beh tòa i kàu Pa-pí-lûn, Ka-le̍k-tí lâng ê tōe; i sui-jiân sí tī-hia, iā bōe khòaⁿ-kìⁿ hit ê tōe.

14周圍一切保護伊ê，kap伊所有ê軍隊，我beh四散in tī四方；也beh拔刀追jip in。Chiu-ûi it-chhè pó-hō͘ i ê, kap i só͘ ū ê kun-tūi, Góa beh sì-sòaⁿ in tī sì-hng; iā beh pu̍ih-to tui-jip in.

15我分散in tī列邦，四散in tī列國ê時，in就知我是耶和華。Góa hun-sòaⁿ in tī lia̍t-pang, sì-sòaⁿ in tī lia̍t-kok ê sî, in chiū chai Góa sī Iâ-hô-hoa.

16總是我beh留in kúi-nā人，脫離刀劍、飢荒、瘟疫，hō͘ in tī所到ê ta̍k國中，講起in可惡ê事；in就知我是耶和華。Chóng-sī Góa beh lâu in kúi-nā lâng, thoat-lī to-kiàm, ki-hng, un-e̍k, hō͘ in tī só͘ kàu ê ta̍k-kok-tiong, kóng-khí in khó-ò͘ⁿ ê sū; in chiū chai Góa sī Iâ-hô-hoa.

17耶和華ê話koh臨到講，Iâ-hô-hoa ê ōe koh lîm-kàu kóng,

18人子ah，你tio̍h ngia̍uh-ngia̍uh-chhoah來食你ê餅，tio̍h驚惶撙節來lim你ê水。Jîn-chú ah, lí tio̍h ngia̍uh-ngia̍uh-chhoah lâi chia̍h lí ê piáⁿ, tio̍h kiaⁿ-hiâⁿ chún-chat lâi lim lí ê chúi.

19你tio̍h對chit-ê地方ê百姓講，主耶和華論耶路撒冷，kap以色列地khiā起ê百姓，án-ni講，In食餅tio̍h撙節，lim水tio̍h gông-ngia̍h，因為in中間khiā起ê眾人所行強暴ê事，chit-ê地beh荒廢失落伊所有ê。Lí tio̍h tùi chit ê tōe-hng ê peh-sìⁿ kóng, Chú Iâ-hô-hoa lūn Iâ-lō͘-sat-léng, kap Í-sek-lia̍t tōe khiā-khí ê peh-sìⁿ, án-ni kóng, In chia̍h piáⁿ tio̍h chún-chat, lim chúi tio̍h gông-ngia̍h, in-ūi in tiong-kan khiā-khí ê chèng-lâng só͘ kiâⁿ kiông-pō ê sū, chit ê tōe beh hong-hòe sit-lo̍h i só͘-ū-ê.

20有人khiā起ê城beh拋荒；地也beh荒廢；lín就知我是耶和華。Ū lâng khiā-khí ê siâⁿ beh pha-hng; tōe iā beh hong-hòe; lín chiū chai Góa sī Iâ-hô-hoa.

21耶和華ê話koh臨到我講，Iâ-hô-hoa ê ōe koh lîm-kàu góa kóng,

22人子ah，tī lín以色列地，怎樣有chit號俗語講，時日延chhiân，異象lóng無應驗ah？Jîn-chú ah, tī lín Í-sek-lia̍t tōe, cháiⁿ-iūⁿ ū chit-hō sio̍k-gú kóng, Sî-ji̍t iân-chhiân, īⁿ-siōng lóng bô èng-giām ah?

23所以你tio̍h kā in講，主耶和華án-ni講，我beh hō͘ chit-ê俗語soah，以色列中無koh用chit-ê做俗語；總是你tio̍h kā in講，時日近lah，ta̍k-ê異象ê應驗也是án-ni。Só͘-í lí tio̍h kā in kóng, Chú Iâ-hô-hoa án-ni kóng, Góa beh hō͘ chit ê sio̍k-gú soah, Í-sek-lia̍t tiong bô koh ēng chit-ê chòe sio̍k-gú; chóng-sī lí tio̍h kā in kóng, Sî-ji̍t kūn--lah, ta̍k ê īⁿ-siōng ê èng-giām iā-sī án-ni.

24以後tī以色列家ê中間，的確無koh有虛假ê異象，順人意ê卜卦。Í-āu tī Í-sek-lia̍t-ke ê tiong-kan, tek-khak bô koh ū hu-ké ê īⁿ-siōng, sūn jîn-ì ê pok-kòa.

25因為我就是耶和華，我beh講，koh我所講ê話，beh應驗，無koh延chhiân；lín chit-ê悖逆ê家ah，我beh tī lín活teh ê日來講，來成伊；這是主耶和華講ê。In-ūi Góa chiū-sī Iâ-hô-hoa, Góa beh kóng, koh Góa só͘ kóng ê ōe, beh èng-giām, bô koh iân-chhiân; lín chit ê pōe-ge̍k ê ke ah, Góa beh tī lín oa̍h-teh ê ji̍t lâi kóng, lâi chiâⁿ--i; che sī Chú Iâ-hô-hoa kóng--ê.

26耶和華ê話koh臨到我講，Iâ-hô-hoa ê ōe koh lîm-kàu góa kóng,

27人子ah，看ah，以色列家ê人講，伊所看見ê異象，是屬tī chōe-chōe日後ê事，所講ê讖語，是指極遠ê時期。Jîn-chú ah, khòaⁿ ah, Í-sek-lia̍t-ke ê lâng kóng, I só͘ khòaⁿ-kìⁿ ê īⁿ-siōng, sī sio̍k tī chōe-chōe ji̍t-āu ê sū, só͘ kóng ê chhàm-gú, sī chí ke̍k-hn̄g ê sî-kî.

28所以你tio̍h對in講，主耶和華án-ni講，我ê話無一句有koh 延chhiân，我所講ê話，的確成伊；這是主耶和華講ê。Só͘-í lí tio̍h tùi in kóng, Chú Iâ-hô-hoa án-ni kóng, Góa ê ōe bô chi̍t-kù ū koh iân-chhiân, Góa só͘ kóng ê ōe, tek-khak chiâⁿ--i; che sī Chú Iâ-hô-hoa kóng--ê.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h宣傳來攻擊以色列中hiah-ê teh宣傳ê先知，kā hiah-ê照伊家己ê心意來宣傳ê講，Lín tio̍h聽耶和華ê話。Jîn-chú ah, lí tio̍h soan-thoân lâi kong-kek Í-sek-lia̍t-tiong hiah-ê teh soan-thoân ê sian-ti, kā hiah-ê chiàu i ka-kī ê sim-ì lâi soan-thoân--ê kóng, Lín tio̍h thiaⁿ Iâ-hô-hoa ê ōe.

3主耶和華án-ni講，Hiah-ê戇ê先知，in有災厄ah，in thàn家己ê心神來行，並無看見一項。Chú Iâ-hô-hoa án-ni kóng, Hiah-ê gōng ê sian-ti, in ū chai-ē ah, in thàn ka-kī ê sim-sîn lâi kiâⁿ, pēng-bô khòaⁿ-kìⁿ chi̍t-hāng.

4以色列ah，你ê先知親像拋荒ê所在ê狐狸。Í-sek-lia̍t ah, lí ê sian-ti chhin-chhiūⁿ pha-hng ê só͘-chāi ê hô͘-lî.

5Lín bē-bat上到破隙ê所在，亦bē-bat為tio̍h以色列家圍一個牆；thang tī耶和華ê日，戰陣khiā-ōe-tiâu。Lín bē-bat chiūⁿ-kàu phòa-khiah ê só͘-chāi, ia̍h bē-bat ūi-tio̍h Í-sek-lia̍t-ke ûi chi̍t ê chhiûⁿ; thang tī Iâ-hô-hoa ê ji̍t, chiàn-tīn khiā-ōe-tiâu.

6In所看見ê是虛假，是白賊ê占卜；in講，這是耶和華講ê，其實耶和華無影差in，in iáu teh ǹg望hit-ê話會應驗。In só͘ khòaⁿ-kìⁿ--ê sī hu-ké, sī pe̍h-chha̍t ê chiam-pok; in kóng, Che sī Iâ-hô-hoa kóng--ê, kî-si̍t Iâ-hô-hoa bô-iáⁿ chhe--in, in iáu teh ǹg-bāng hit ê ōe ōe èng-giām.

7Lín kiám m̄是看見虛假ê異象mah？kiám m̄是講白賊ê占卜mah？lín講，這是耶和華講ê，其實我無差in講。Lín kiám-m̄-sī khòaⁿ-kìⁿ hu-ké ê īⁿ-siōng mah? kiám-m̄-sī kóng pe̍h-chha̍t ê chiam-pok mah? lín kóng, Che sī Iâ-hô-hoa kóng--ê, kî-si̍t Góa bô chhe in kóng.

8所以主耶和華án-ni講，因為lín所講ê是虛假，所看ê是白賊；看ah，因為án-ni我kap lín反對；這是主耶和華講ê。Só͘-í Chú Iâ-hô-hoa án-ni kóng, In-ūi lín só͘ kóng-ê sī hu-ké, só͘ khòaⁿ--ê sī pe̍h-chha̍t; khòaⁿ ah, in-ūi án-ni Góa kap lín hoán-tùi; che sī Chú Iâ-hô-hoa kóng--ê.

9我ê手beh攻擊hiah-ê看見虛假，用白賊占卜ê先知；in的確無屬tī我ê百姓ê會中，無記tī以色列家ê人名簿；亦bōe-thang進入以色列地；lín就知我是主耶和華。Góa ê chhiú beh kong-kek hiah ê khòaⁿ-kìⁿ hu-ké, ēng pe̍h-chha̍t chiam-pok ê sian-ti; in tek-khak bô sio̍k tī Góa ê peh-sìⁿ ê hōe-tiong, bô kì tī Í-sek-lia̍t ke ê lâng-miâ-phō͘; ia̍h bōe thang chìn-ji̍p Í-sek-lia̍t tōe; lín chiū chai Góa sī Chú Iâ-hô-hoa.

10因為in誘惑我ê百姓講，平安，其實無有平安；就是親像人起牆壁，in kā伊筅(chhéng)灰水。In-ūi in iú-he̍k Góa ê peh-sìⁿ kóng, Pêng-an, kî-si̍t bô-ū pêng-an; chiū-sī chhin-chhiūⁿ lâng khí chhiûⁿ-piah, in kā i chhéng he-chúi.

11所以你tio̍h對hiah-ê筅灰水ê人講，牆beh倒壞，beh有漲水ê大雨；大雹ah，lín tio̍h落來，koh beh有大風吹裂伊。Só͘-í lí tio̍h tùi hiah-ê chhéng he-chúi ê lâng kóng, Chhiûⁿ beh tó-hoāi, beh ū tiòng-chúi ê tōa-hō͘; tōa-pha̍uh ah, lín tio̍h lo̍h--lâi, koh beh ū tōa-hong chhe-li̍h--i.

12看ah，牆倒了後，人kiám無beh對lín講，Lín所chhéng ê 灰水，taⁿ tī toh-lo̍h？Khòaⁿ ah, chhiûⁿ tó liáu-āu, lâng kiám bô beh tùi lín kóng, Lín só͘ chhéng ê he-chúi, taⁿ tī toh-lo̍h?

13所以主耶和華án-ni講，我beh tī我ê大受氣，用狂風拆裂伊，tī我ê受氣beh有漲水ê大雨，也tī我ê大受氣beh落大雹來毀滅伊。Só͘-í Chú Iâ-hô-hoa án-ni kóng, Góa beh tī Góa ê tōa siū-khì, ēng kông-hong thiah-li̍h--i, tī Góa ê siū-khì beh ū tiòng-chúi ê tōa-hō͘, iā tī Góa ê tōa siū-khì beh lo̍h tōa-pha̍uh lâi húi-bia̍t--i.

14我beh án-ni拆毀lín筅灰水ê牆，拆到平地；致到牆基露現，牆beh倒壞；lín亦beh滅無tī hit中間；lín就知我是耶和華。Góa beh án-ni thiah-húi lín chhéng he-chúi ê chhiûⁿ, thiah kàu pîⁿ-tōe; tì-kàu chhiûⁿ-ki lō͘-hiān, chhiûⁿ beh tó-hoāi; lín ia̍h beh bia̍t-bô tī hit tiong-kan; lín chiū chai Góa sī Iâ-hô-hoa.

15我beh án-ni成我ê大受氣tī hit-ê牆，kap筅灰水ê人；亦beh對lín講，牆無去lah，筅灰水ê人亦無去lah。Góa beh án-ni chiâⁿ Góa ê tōa siū-khì tī hit ê chhiûⁿ, kap chhéng he-chúi ê lâng; ia̍h beh tùi lín kóng, Chhiûⁿ bô--khì lah, chhéng he-chúi ê lâng ia̍h bô--khì lah.

16這就是以色列ê先知，in kí耶路撒冷來宣傳；為tio̍h伊看見平安ê異象，其實無有平安；這是主耶和華講ê。Che chiū-sī Í-sek-lia̍t ê sian-ti, in kí Iâ-lō͘-sat-léng lâi soan-thoân; ūi-tio̍h i khòaⁿ-kìⁿ pêng-an ê īⁿ-siōng, kî-si̍t bô-ū pêng-an; che sī Chú Iâ-hô-hoa kóng--ê.

17人子ah，你tio̍h面直直ǹg你ê百姓ê婦女，就是照伊ê心意來宣傳ê；Jîn-chú ah, lí tio̍h bīn ti̍t-ti̍t ǹg lí ê peh-sìⁿ ê hū-lú, chiū-sī chiàu i ê sim-ì lâi soan-thoân--ê;

18你tio̍h宣傳來攻擊伊，講，主耶和華án-ni講，Chiah-ê婦女有災厄ah，in kā眾人ê手khiau縫(pâng)靠墊，kā ta̍k等號身裁ê人做罩頭殼ê帕，來搶人ê神魂！總無lín beh搶我ê百姓ê神魂，為利益家己救活神魂mah？lí tio̍h soan-thoân lâi kong-kek--i, kóng, Chú Iâ-hô-hoa án-ni kóng, Chiah ê hū-lú ū chai-ē ah, in kā chèng-lâng ê chhiú-khiau pâng khò-tiām, kā ta̍k téng-hō sin-chhâi ê lâng chòe tà thâu-khak ê phè, lâi chhiúⁿ lâng ê sîn-hûn! chóng-bô lín beh chhiúⁿ Góa ê peh-sìⁿ ê sîn-hûn, ūi lī-ek ka-kī kiù oa̍h sîn-hûn mah?

19Lín為tio̍h kúi-nā把大麥，kúi-nā塊餅，tī我ê百姓中褻瀆我，對我hiah-ê ài聽白賊話ê百姓，來講白賊，害死hiah-ê m̄應該死ê神魂，亦hō͘ m̄應該活ê神魂活。Lín ūi-tio̍h kúi-nā pé tōa-be̍h, kúi-nā tè piáⁿ, tī Góa ê peh-sìⁿ-tiong siat-to̍k Góa, tùi Góa hiah ê ài thiaⁿ pe̍h-chha̍t-ōe ê peh-sìⁿ, lâi kóng pe̍h-chha̍t, hāi-sí hiah-ê m̄ eng-kai sí ê sîn-hûn, ia̍h hō͘ m̄-eng-kai oa̍h ê sîn-hûn oa̍h.

20所以主耶和華án-ni講，看ah，我反對lín ê靠墊，就是lín所用來搶神魂hō͘伊飛去ê；我beh tùi lín ê手拆起來；我beh tháu放hiah-ê神魂，就是lín所搶ê神魂，來hō͘ in飛去ê。Só͘-í Chú Iâ-hô-hoa án-ni kóng, Khòaⁿ ah, Góa hoán-tùi lín ê khò-tiām, chiū-sī lín só͘ ēng lâi chhiúⁿ sîn-hûn hō͘ i pe--khì-ê; Góa beh tùi lín ê chhiú thiah--khí-lâi; Góa beh tháu-pàng hiah ê sîn-hûn, chiū-sī lín só͘ chhiúⁿ ê sîn-hûn, lâi hō͘ in pe--khì ê.

21我亦beh拆裂lín hiah-ê帕，救我ê百姓脫離lín ê手，無koh受搶tī lín ê手內；lín就知我是耶和華。Góa ia̍h beh thiah-li̍h lín hiah ê phè, kiù Góa ê peh-sìⁿ thoat-lī lín ê chhiú, bô koh siū chhiúⁿ tī lín ê chhiú-lāi; lín chiū chai Góa sī Iâ-hô-hoa.

22因為hit號義人，我無hō͘伊傷心，lín用白賊話hō͘伊傷心；koh lín堅固pháiⁿ人ê手，hō͘伊無oa̍t頭離開伊ê pháiⁿ路，來得tio̍h活。In-ūi hit hō gī-lâng, Góa bô hō͘ i siong-sim, lín ēng pe̍h-chha̍t ōe hō͘ i siong-sim; koh lín kian-kò͘ pháiⁿ lâng ê chhiú, hō͘ i bô oa̍t-thâu lī-khui i ê pháiⁿ-lō͘, lâi tit-tio̍h oa̍h.

23所以lín bōe-thang koh看見虛假，亦bōe-thang koh占卜。我beh救我ê百姓脫離lín ê手；lín就知我是耶和華。Só͘-í lín bōe thang koh khòaⁿ-kìⁿ hu-ké, ia̍h bōe thang koh chiam-pok. Góa beh kiù Góa ê peh-sìⁿ thoat-lī lín ê chhiú; lín chiū chai Góa sī Iâ-hô-hoa.

1有kúi-nā ê以色列ê長老來我chia，坐tī我ê面前。Ū kúi-nā ê Í-sek-lia̍t ê tióng-ló lâi góa chia, chē tī góa ê bīn-chêng.

2耶和華ê話就臨到我講，Iâ-hô-hoa ê ōe chiū lîm-kàu góa kóng,

3人子ah，chiah-ê人已經將in ê偶像接納tī in ê心，koh hē致到犯罪ê窒礙tī家己ê面前。我kiám beh hō͘伊問mah？Jîn-chú ah, chiah ê lâng í-keng chiong in ê ngó͘-siōng chiap-la̍p tī in ê sim, koh hē tì-kàu hoān-chōe ê that-gāi tī ka-kī ê bīn-chêng. Góa kiám beh hō͘ i mn̄g mah?

4所以你tio̍h對in講，主耶和華án-ni講，以色列家ê中間見若接納伊ê偶像tī伊ê心內ê人，koh hē致到犯罪窒礙tī伊家己ê面前，koh來就近先知-ê，我耶和華tī伊所求ê事，beh照伊ê chōe-chōe偶像來應答伊；Só͘-í lí tio̍h tùi in kóng, Chú Iâ-hô-hoa án-ni kóng, Í-sek-lia̍t-ke ê tiong-kan kìⁿ-nā chiap-la̍p i ê ngó͘-siōng tī i ê sim-lāi ê lâng, koh hē tì-kàu hoān-chōe that-gāi tī i ka-kī ê bīn-chêng, koh lâi chiū-kūn sian-ti--ê, Góa Iâ-hô-hoa tī i só͘ kiû ê sū, beh chiàu i ê chōe-chōe ngó͘-siōng lâi ìn-tap i;

5致到我thang hō͘以色列家心內家己責備，因為in lóng為tio̍h in ê偶像kap我生疏。tì-kàu Góa thang hō͘ Í-sek-lia̍t-ke sim-lāi ka-kī chek-pī, in-ūi in lóng ūi-tio̍h in ê ngó͘-siōng kap Góa chhiⁿ-so͘.

6所以你tio̍h kā以色列家講，主耶和華án-ni講，Tio̍h回頭，oa̍t-tńg離開lín ê偶像，oa̍t-tńg面，莫得thàn lín一切可惡ê事。Só͘-í lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Tio̍h hôe-thâu, oa̍t-tńg lī-khui lín ê ngó͘-siōng, oa̍t-tńg bīn, bo̍h-tit thàn lín it chhè khó-ò͘ⁿ ê sū.

7因為以色列家ê人，á是tī以色列中寄腳ê出外人，見若kap我隔斷，接納伊ê偶像tī伊ê心內，koh hē致到犯罪ê窒礙tī伊家己ê面前，koh來就近先知，beh為家己ê事來問我ê，我耶和華beh本身應答伊。In-ūi Í-sek-lia̍t-ke ê lâng, á-sī tī Í-sek-lia̍t tiong kià-kha ê chhut-gōa lâng, kìⁿ-nā kap Góa keh-tn̄g, chiap-la̍p i ê ngó͘-siōng tī i ê sim-lāi, koh hē tì-kàu hoān-chōe ê that-gāi tī i ka-kī ê bīn-chêng, koh lâi chiū-kūn sian-ti, beh ūi ka-kī ê sū lâi mn̄g Góa--ê, Góa Iâ-hô-hoa beh pún-sin ìn-tap i.

8我beh ǹg hit號人變面，hō͘伊做人ê鑑戒，做話柄，hō͘人gông-ngia̍h；亦beh tùi我ê百姓中剪除伊；lín就知我是耶和華。Góa beh ǹg hit-hō lâng pìⁿ-bīn, hō͘ i chòe lâng ê kàm-kài, chòe ōe-pìⁿ, hō͘ lâng gông-ngia̍h; ia̍h beh tùi Góa ê peh-sìⁿ-tiong chián-tû i; lín chiū chai Góa sī Iâ-hô-hoa.

9先知若迷惑來講一句話，就是我耶和華迷惑hit-ê先知；我亦beh伸手攻擊伊；將伊tùi我ê百姓以色列中除滅。Sian-ti nā bê-he̍k lâi kóng chi̍t kù ōe, chiū-sī Góa Iâ-hô-hoa bê-he̍k hit ê sian-ti; Góa ia̍h beh chhun-chhiú kong-kek i; chiong i tùi Góa ê peh-sìⁿ Í-sek-lia̍t-tiong tû-bia̍t.

10In beh擔當家己ê罪過，先知ê罪過，kap求-問伊ê人ê罪過，lóng是一樣。In beh tam-tng ka-kī ê chōe-kòa, sian-ti ê chōe-kòa, kap kiû-mn̄g i ê lâng ê chōe-kòa, lóng sī chi̍t-iūⁿ.

11Thang hō͘以色列家無koh行迷路離開我，無koh因為ta̍k樣ê罪過phah lâ-sâm家己；獨獨beh做我ê百姓，我做in ê上帝；這是主耶和華講ê。Thang hō͘ Í-sek-lia̍t-ke bô koh kiâⁿ bê-lō͘ lī-khui Góa, bô koh in-ūi ta̍k-iūⁿ ê chōe-kòa phah lâ-sâm ka-kī; to̍k-to̍k beh chòe Góa ê peh-sìⁿ, Góa chòe in ê Siōng-tè; che sī Chú Iâ-hô-hoa kóng--ê.

12耶和華ê話臨到我講，Iâ-hô-hoa ê ōe lîm-kàu góa kóng,

13人子ah，若有國tùi in ê悖逆來得罪我，我亦伸手攻擊伊，斷絕伊所óa靠ê米糧，hō͘飢荒臨到伊，tùi in中間剪除人kap cheng-siⁿ，Jîn-chú ah, nā ū kok tùi in ê pōe-ge̍k lâi tek-chōe Góa, Góa ia̍h chhun-chhiú kong-kek i, toān-choa̍t i só͘ óa-khò ê bí-niû, hō͘ ki-hng lîm-kàu i, tùi in tiong-kan chián-tû lâng kap cheng-siⁿ,

14其中雖然有挪亞、但以理、約伯，chit三人；in只有會因為in ê義來救家己ê性命nā-tiāⁿ；這是主耶和華講ê。kî-tiong sui-jiân ū Ná-a, Tān-í-lí, Iok-pek, chí saⁿ-lâng; in chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ; che sī Chú Iâ-hô-hoa kóng--ê.

15我若hō͘惡獸經過hit-ê地來損壞，hō͘ hit所在荒廢；因為chiah-ê獸ê緣故，致到無人tùi hia經過，Góa nā hō͘ ok-siù keng-kè hit ê tōe lâi sún-hoāi, hō͘ hit só͘-chāi hong-hòe; in-ūi chiah ê siù ê iân-kò͘, tì-kàu bô lâng tùi hia keng-kè,

16雖然有chit三人tī in中間，主耶和華講，我kí我ê永活來chiù-chōa，in bōe救in ê kiáⁿ cha-bó͘-kiáⁿ，只有in本身得tio̍h救nā-tiāⁿ，地方猶原荒廢。sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ, tōe-hng iû-goân hong-hòe.

17Á是我hō͘刀劍臨到hit-ê地方講，刀劍ah，你tio̍h經過hit-ê地方，致到我tùi in中間剪除人kap cheng-siⁿ，Á-sī Góa hō͘ to-kiàm lîm-kàu hit ê tōe-hng kóng, To-kiàm ah, lí tio̍h keng-kè hit ê tōe-hng, tì-kàu Góa tùi in tiong-kan chián-tû lâng kap cheng-siⁿ,

18雖然有chit三人tī in中間，主耶和華講，我kí我ê永活來chiù-chōa，in bōe救in ê kiáⁿ cha-bó͘-kiáⁿ，只有in本身得tio̍h救nā-tiāⁿ。sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ.

19Á是我hō͘瘟疫流行hit-ê地方，hō͘我piàⁿ出滅命ê大受氣tī in ê頂面，thang tùi in中間剪除人kap cheng-siⁿ，Á-sī Góa hō͘ un-e̍k liû-hêng hit ê tōe-hng, hō͘ Góa piàⁿ-chhut bia̍t miā ê tōa siū-khì tī in ê téng-bīn, thang tùi in tiong-kan chián-tû lâng kap cheng-siⁿ,

20雖然有挪亞、但以理、約伯tī in中間，主耶和華講，我指我ê永活來chiù-chōa，in bōe救in ê kiáⁿ cha-bó͘-kiáⁿ，只有會因為in ê義來救家己ê性命nā-tiāⁿ。sui-jiân ū Ná-a, Tān-í-lí, Iok-pek tī in tiong-kan, Chú Iâ-hô-hoa kóng, Góa chí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ.

21主耶和華án-ni講，何況我將我四項ê大災厄，就是刀劍、飢荒、惡獸、瘟疫，降落tī耶路撒冷，tùi hit中間剪除人kap cheng-siⁿ，kiám m̄是koh-khah bōe救得mah？Chú Iâ-hô-hoa án-ni kóng, Hô-hòng Góa chiong Góa sì-hāng ê tōa chai-ē, chiū-sī to-kiàm, ki-hng, ok-siù, un-e̍k, kàng-lo̍h tī Iâ-lō͘-sat-léng, tùi hit tiong-kan chián-tû lâng kap cheng-siⁿ, kiám-m̄-sī koh-khah bōe kiù--tit mah?

22看ah，beh有所chhun ê人留teh，就是受掠出來ê kiáⁿ cha-bó͘-kiáⁿ，看ah，in beh出來到lín chia，lín beh看in ê所行所做，就lín論到我所降落tī耶路撒冷ê災厄，就是我一切降落tī in頂面ê，beh得tio̍h安慰。Khòaⁿ ah, beh ū só͘ chhun ê lâng lâu-teh, chiū-sī siū lia̍h--chhut-lâi ê kiáⁿ cha-bó͘-kiáⁿ, khòaⁿ ah, in beh chhut-lâi kàu lín chia, lín beh khòaⁿ in ê só͘ kiâⁿ só͘ chòe, chiū lín lūn-kàu Góa só͘ kàng-lo̍h tī Iâ-lō͘-sat-léng ê chai-ē, chiū-sī Góa it-chhè kàng-lo̍h tī in téng-bīn ê, beh tit-tio̍h an-ùi.

23Lín看in所行所做ê，beh受安慰；就知我tī耶路撒冷所行ê，m̄是無緣故；這是主耶和華講ê。Lín khòaⁿ in só͘ kiâⁿ só͘ chòe--ê, beh siū an-ùi; chiū chai Góa tī Iâ-lō͘-sat-léng só͘ kiâⁿ--ê, m̄-sī bô iân-kò͘; che sī Chú Iâ-hô-hoa kóng--ê.