1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你tio̍h hō͘耶路撒冷知伊hiah-ê可惡ê事，Jîn-chú ah, lí tio̍h hō͘ Iâ-lō͘-sat-léng chai i hiah ê khó-ò͘ⁿ ê sū,

3講，主耶和華對耶路撒冷án-ni講，你ê本源，你ê出世，是tī迦南地；A-mô͘-lī人是你ê老父，你ê老母是Hek人。kóng, Chú Iâ-hô-hoa tùi Iâ-lō͘-sat-léng án-ni kóng, Lí ê pún-goân, lí ê chhut-sì, sī tī Ka-lâm tōe; A-mô͘-lī lâng sī lí ê lāu-pē, lí ê lāu-bú sī Hek-lâng.

4論到你出世ê景況，當你出世ê日無kā你tńg臍；也無用水kā你洗hō͘你清氣；lóng無kā你sám鹽，亦無用布kā你包。Lūn-kàu lí chhut-sì ê kéng-hóng, tng lí chhut-sì ê ji̍t bô kā lí tńg-châi; iā bô ēng chúi kā lí sóe hō͘ lí chheng-khì; lóng bô kā lí sám iâm, ia̍h bô ēng pò͘ kā lí pau.

5無人看顧你，kā你做chiah-ê事，憐憫你；你出世ê日hiat tī田野，是因為你hō͘人厭惡。Bô lâng khòaⁿ-kò͘ lí, kā lí chòe chiah ê sū, lîn-bín lí; lí chhut-sì ê ji̍t hiat tī chhân-iá, sī in-ūi lí hō͘ lâng iàm-ò͘ⁿ.

6我tùi你hia過，看見你kō tī你ê血內，就對你講，你雖然tī你ê血中，iáu-kú thang活；我實在對你講，你雖然tī你ê血中，iáu-kú thang活。Góa tùi lí hia kè, khòaⁿ-kìⁿ lí kō tī lí ê huih-lāi, chiū tùi lí kóng, Lí sui-jiân tī lí ê huih-tiong, iáu-kú thang oa̍h; Góa si̍t-chāi tùi lí kóng, Lí sui-jiân tī lí ê huih-tiong, iáu-kú thang oa̍h.

7我hō͘你長成，親像田裡所發生ê，koh你漸漸成做大人，面貌清秀，奶胖(phòng)，頭毛長；總是你猶原赤身露體。Góa hō͘ lí tióng-sêng, chhin-chhiūⁿ chhân--nih só͘ hoat-siⁿ--ê, koh lí chiām-chiām chiâⁿ-chòe tōa-lâng, bīn-māu chheng-siù, lin phòng, thâu-mn̂g tn̂g; chóng-sī lí iû-goân chhiah-sin lō͘-thé.

8我tùi你hia過，看見你；看ah，hit時是你興起愛情ê時；我就用衫á裾蓋你，遮你ê thǹg-theh-theh；koh對你chiù-chōa，kap你結約；你就屬tī我；這是主耶和華講ê。Góa tùi lí hia kè, khòaⁿ-kìⁿ lí; khòaⁿ ah, hit-sî sī lí heng-khí ài-chêng ê sî; Góa chiū ēng saⁿ-á-ku khàm lí, jia lí ê thǹg-theh-theh; koh tùi lí chiù-chōa, kap lí kiat-iok; lí chiū sio̍k tī Góa; che sī Chú Iâ-hô-hoa kóng--ê.

9Hit時我用水洗你，洗清氣你身體ê血，koh用油抹你。Hit-sî Góa ēng chúi sóe lí, sóe chheng-khì lí sin-thé ê huih, koh ēng iû boah lí.

10我hō͘你穿繡花ê衫，亦hō͘你穿海狗皮ê鞋，亦用幼苧布hō͘你hâ腰；koh用綢緞做衫hō͘你moa。Góa hō͘ lí chhēng siù-hoe ê saⁿ, ia̍h hō͘ lí chhēng hái-káu phê ê ôe, ia̍h ēng iù-tōe-pò͘ hō͘ lí hâ-io; koh ēng tiû-toān chòe-saⁿ hō͘ lí moa.

11我用裝飾ê物裝飾你；用手環掛tī你ê手，用金鍊á掛tī你ê頷頸。Góa ēng chng-thāⁿ ê mi̍h chng-thāⁿ lí; ēng chhiú-khoân kòa tī lí ê chhiú, ēng kim-liān-á kòa tī lí ê ām-kún.

12我亦用鐶khòa tī你ê鼻；用耳鉤掛tī你ê耳á，用súi ê帽戴tī你ê頭殼。Góa ia̍h ēng khoân khòa tī lí ê phīⁿ; ēng hī-kau kòa tī lí ê hī-á, ēng súi ê bō tì tī lí ê thâu-khak.

13Án-ni，你就有金銀ê裝飾；所穿ê是幼苧布，kap 綢緞，kap繡花ê衫；所食ê是幼幼ê麵，蜂ê蜜，kap油；你亦極其súi，發達到王后ê尊貴。Án-ni, lí chiū ū kim-gûn ê chng-thāⁿ; só͘ chhēng--ê sī iù-tōe-pò͘, kap tiû-toān, kap siù-hoe ê saⁿ; só͘ chia̍h-ê sī iù-iù ê mī, phang ê bi̍t, kap iû; lí ia̍h ke̍k-kî súi, hoat-ta̍t kàu ông-hō͘ ê chun-kùi.

14你súi ê名聲傳tī列國中；是對你ê súi完全，因為我有用我ê榮光hō͘你；這是主耶和華講ê。Lí súi ê miâ-siaⁿ thoân tī lia̍t-kok-tiong; sī tùi lí ê súi oân-choân, in-ūi Góa ū ēng Góa ê êng-kng hō͘ lí; che sī Chú Iâ-hô-hoa kóng--ê.

15獨獨你óa靠家己ê súi，koh因為你ê名聲，就行淫亂；你放縱淫慾，hō͘過路人chhut-chāi伊ê意思來行。To̍k-to̍k lí óa-khò ka-kī ê súi, koh in-ūi lí ê miâ-siaⁿ, chiū kiâⁿ îm-loān; lí hòng-chhiòng îm-io̍k, hō͘ kè-lō͘ lâng chhut-chāi i ê ì-sù lâi kiâⁿ.

16Koh用你ê衫，裝飾高ê所在，五色lóng齊備；tī hit頂面行淫亂；chit號事無beh來，亦無koh有。Koh ēng lí ê saⁿ, chng-thāⁿ koâiⁿ ê só͘-chāi, ngó͘-sek lóng chiâu-pī; tī hit téng-bīn kiâⁿ îm-loān; chit hō sū bô beh lâi, ia̍h bô koh ū.

17你亦取我所hō͘你金銀súi ê寶器；為tio̍h家己做人ê像，kap伊行淫。Lí ia̍h chhú Góa só͘ hō͘ lí kim-gûn súi ê pó-khì; ūi-tio̍h ka-kī chòe lâng ê siōng, kap i kiâⁿ-îm.

18Koh用你繡花ê衫kā伊moa，亦用我ê膏油，我ê香料，排tī伊ê面前。Koh ēng lí siù-hoe ê saⁿ kā i moa, ia̍h ēng Góa ê ko-iû, Góa ê hiuⁿ-liāu, pâi tī i ê bīn-chêng.

19Koh我所賞賜你ê食物、幼麵，kap油kap蜜，我所用來養飼你ê，你就用伊，排tī in ê面前，來做芳味，實在有án-ni；這是主耶和華講ê。Koh Góa só͘ siúⁿ-sù lí ê chia̍h-mi̍h, iù-mī, kap iû kap bi̍t, Góa só͘ ēng lâi iúⁿ-chhī lí--ê, lí chiū ēng--i, pâi tī in ê bīn-chêng, lâi chòe phang-bī, si̍t-chāi ū án-ni; che sī Chú Iâ-hô-hoa kóng--ê.

20Koh你用你ê kiáⁿ，你ê cha-bó͘-kiáⁿ，就是你所kā我生ê，來獻hō͘ in食；你行chiah-ê淫亂，kiám是小khóa事？Koh lí ēng lí ê kiáⁿ , lí ê cha-bó͘-kiáⁿ, chiū-sī lí só͘ kā Góa siⁿ--ê, lâi hiàn hō͘ in chia̍h; lí kiâⁿ chiah ê îm-loān, kiám sī sió-khóa sū?

21你竟然koh thâi死我chiah-ê kiáⁿ來交付伊，hō͘ in經過火來歸tī伊？lí kéng-jiân koh thâi-sí Góa chiah ê kiáⁿ lâi kau-hù i, hō͘ in keng-kè hé lâi kui tī i?

22你行chiah-ê一切可惡kap淫亂ê事lóng無想tio̍h你細漢赤身露體，kō tī你血中ê日。Lí kiâⁿ chiah-ê it-chhè khó-ò͘ⁿ kap îm-loān ê sū lóng bô siūⁿ-tio̍h lí sòe-hàn chhiah-sin lō͘-thé, kō tī lí huih-tiong ê ji̍t.

23主耶和華講，你有災厄ah，有災厄ah；Chú Iâ-hô-hoa kóng, Lí ū chai-ē ah, ū chai-ē ah;

24你行這一切pháiⁿ-tāi以後，koh為家己起花樓，tī ta̍k條街路起高台。lí kiâⁿ che it-chhè pháiⁿ-tāi í-āu, koh ūi ka-kī khí hoe-lâu, tī ta̍k tiâu ke-lō͘ khí koâiⁿ-tâi.

25你tī一切街路口起高台，hō͘你ê súi變做可惡ê；koh kap一切過路ê chōe-chōe行淫亂。Lí tī it-chhè ke-lō͘-kháu khí koâiⁿ-tâi, hō͘ lí ê súi piàn chòe khó-ò͘ⁿ--ê; koh kap it-chhè kè-lō͘--ê chōe-chōe kiâⁿ îm-loān.

26你亦kap你隔壁國，放縱情慾ê埃及人行淫，加添你ê淫亂，惹我受氣。Lí ia̍h kap lí keh-piah kok, hòng-chhiòng chêng-io̍k ê Ai-ki̍p lâng kiâⁿ-îm, ke-thiⁿ lí ê îm-loān, jiá Góa siū-khì.

27看ah，我伸出我ê手攻擊你；減少你應用ê物；koh將你交hō͘怨恨你ê腓利士hiah-ê cha-bó͘-gín-á，hō͘ in chhut-chāi意思款待你；in看見你行pháiⁿ，來見笑。Khòaⁿ ah, Góa chhun-chhut Góa ê chhiú kong-kek lí; kiám-chió lí èng-iōng ê mi̍h; koh chiong lí kau hō͘ oàn-hūn lí ê Hui-lī-sū hiah ê cha-bó͘-gín-á, hō͘ in chhut-chāi ì-sù khoán-thāi lí; in khòaⁿ-kìⁿ lí kiâⁿ pháiⁿ, lâi kiàn-siàu.

28你因為好色不知足，koh kap亞述人行淫；kap in行淫了後，猶原無滿意。Lí in-ūi hò͘ⁿ-sek put-ti-chiok, koh kap A-su̍t lâng kiâⁿ-îm; kap in kiâⁿ-îm liáu-āu, iû-goân bô móa-ì.

29你koh tī迦南地到Ka-le̍k-tí行chōe-chōe淫亂，iáu-kú無滿意。Lí koh tī Ka-lâm tōe kàu Ka-le̍k-tí kiâⁿ chōe-chōe îm-loān, iáu-kú bô móa-ì.

30主耶和華講，你行這一切ê事，是霸性淫婦ê所行，可見你ê心是jōa軟弱。Chú Iâ-hô-hoa kóng, Lí kiâⁿ che it-chhè ê sū, sī pà-sèng îm-hū ê só͘ kiâⁿ, khó-kiàn lí ê sim sī jōa loán-jio̍k.

31因為你tī一切街路口起花樓，tī ta̍k條街路起高台；因為你無親像別ê娼妓，m̄-ti̍h錢。In-ūi lí tī it-chhè ke-lō͘-kháu khí hoe-lâu, tī ta̍k tiâu ke-lō͘ khí koâiⁿ-tâi; in-ūi lí bô chhin-chhiūⁿ pa̍t ê chhiong-ki, m̄-ti̍h chîⁿ.

32Gōa！你chit-ê行淫ê bó͘ ah，beh ti̍h別人來替丈夫！Gōa! Lí chit ê kiâⁿ-îm ê bó͘ ah, beh ti̍h pa̍t-lâng lâi thòe tiōng-hu!

33人是用物送娼妓，你反tńg用物送你相好ê人，請in tùi四圍來kap你行淫。Lâng sī ēng mi̍h sàng chhiong-ki, lí hoán-tńg ēng mi̍h sàng lí siong-hó ê lâng, chhiáⁿ in tùi sì-ûi lâi kap lí kiâⁿ-îm.

34你ê行淫kap別ê婦人人對反；因為m̄是人chhē你行淫，是你用物送人，m̄是人送你；所以你kap別ê婦人人對反。Lí ê kiâⁿ-îm kap pa̍t ê hū-jîn-lâng tùi-hoán; in-ūi m̄-sī lâng chhē lí kiâⁿ-îm, sī lí ēng mi̍h sàng lâng, m̄-sī lâng sàng lí; só͘-í lí kap pa̍t-ê hū-jîn-lâng tùi-hoán.

35因為án-ni，你chit-ê娼妓ah，tio̍h聽耶和華ê話；In-ūi án-ni, lí chit ê chhiong-ki ah, tio̍h thiaⁿ Iâ-hô-hoa ê ōe;

36主耶和華án-ni講，因為你piàⁿ出你ê污穢；你kap你所相好ê thǹg-theh-theh行淫；koh因為你所拜一切可惡ê偶像，koh為tio̍h所流你chiah-ê kiáⁿ ê血，就是你所獻hō͘ in ê；Chú Iâ-hô-hoa án-ni kóng, In-ūi lí piàⁿ-chhut lí ê ù-òe; lí kap lí só͘ siong-hó--ê thǹg-theh-theh kiâⁿ-îm; koh in-ūi lí só͘ pài it-chhè khó-ò͘ⁿ ê ngó͘-siōng, koh ūi-tio̍h só͘ lâu lí chiah ê kiáⁿ ê huih, chiū-sī lí só͘ hiàn hō͘ in--ê;

37看ah，因為án-ni，我beh聚集你一切相好ê，就是你bat kap伊宴樂ê，kap你一切所疼ê，你一切所怨恨ê，我beh tùi四圍聚集來攻擊你，亦beh tùi in露出你ê thǹg-theh，hō͘ in看你ê thǹg-theh。khòaⁿ ah, in-ūi án-ni, Góa beh chū-chi̍p lí it-chhè siong-hó--ê, chiū-sī lí bat kap i iàn-lo̍k--ê, kap lí it-chhè só͘ thiàⁿ--ê, lí it-chhè só͘ oàn-hūn-ê, Góa beh tùi sì-ûi chū-chi̍p lâi kong-kek lí, ia̍h beh tùi in lō͘-chhut lí ê thǹg-theh, hō͘ in khòaⁿ lí ê thǹg-theh.

38我亦beh審判你，親像審判行淫kap thâi人ê婦人人一樣；我beh用大受氣妒忌，hō͘你流血。Góa ia̍h beh sím-phòaⁿ lí, chhin-chhiūⁿ sím-phòaⁿ kiâⁿ-îm kap thâi-lâng ê hū-jîn-lâng chi̍t-iūⁿ; Góa beh ēng tōa siū-khì tò͘-khī, hō͘ lí lâu-huih.

39我koh beh將你交tī in ê手，in beh拆毀你ê 花樓，毀壞你ê高台，thǹg你ê衫，搶你súi ê寶器；留你赤身露體。Góa koh beh chiong lí kau tī in ê chhiú, in beh thiah-húi lí ê hoe-lâu, húi-hoāi lí ê koâiⁿ-tâi, thǹg lí ê saⁿ, chhiúⁿ lí súi ê pó-khì; lâu lí chhiah-sin lō͘-thé.

40In也beh chhōa chōe-chōe人起來攻擊你，用石頭tìm死你，用刀劍鑿透你。In iā beh chhōa chōe-chōe lâng khí--lâi kong-kek lí, ēng chio̍h-thâu tìm-sí lí, ēng to-kiàm chha̍k-thàu lí.

41用火燒你ê厝宅，tī chōe-chōe婦人人ê面前審判你；我的確hō͘你無koh行淫，亦無koh送人物。Ēng hé sio lí ê chhù-the̍h, tī chōe-chōe hū-jîn-lâng ê bīn-chêng sím-phòaⁿ lí; Góa tek-khak hō͘ lí bô koh kiâⁿ-îm, ia̍h bô koh sàng lâng mi̍h.

42Án-ni，我ǹg你ê大受氣beh soah，我ê妒忌亦beh離開你；我beh安靜無koh受氣。Án-ni, Góa ǹg lí ê tōa siū-khì beh soah, Góa ê tò͘-khī ia̍h beh lī-khui lí; Góa beh an-chēng bô koh siū-khì.

43因為你bōe記得你細漢ê日，tī這一切ê事來激我；所以我beh照你所行ê，報應tī你ê頭殼頂；hō͘你無koh行淫，加添tī你一切可惡ê事；這是主耶和華講ê。In-ūi lí bōe-kì-tit lí sòe-hàn ê ji̍t, tī che it-chhè ê sū lâi kek Góa; só͘-í Góa beh chiàu lí só͘ kiâⁿ--ê, pò-èng tī lí ê thâu-khak-téng; hō͘ lí bô koh kiâⁿ-îm, ke-thiⁿ tī lí it-chhè khó-ò͘ⁿ ê sū; che sī Chú Iâ-hô-hoa kóng--ê.

44看ah，見若講俗語ê，beh用俗語體thak你，講，老母án-ni，cha-bó͘-kiáⁿ也是án-ni。Khòaⁿ ah, kìⁿ-nā kóng sio̍k-gú--ê, beh ēng sio̍k-gú thóe-thak lí, kóng, Lāu-bú án-ni, cha-bó͘-kiáⁿ iā sī án-ni.

45你真正是lín老母ê cha-bó͘-kiáⁿ，厭賤伊ê丈夫kap kiáⁿ兒；你真正是lín姊妹ê姊妹，厭賤in ê丈夫kap kiáⁿ兒；lín老母是Hek人，lín老父是A-mô͘-lī人。Lí chin-chiàⁿ sī lín lāu-bú ê cha-bó͘-kiáⁿ, iàm-chiān i ê tiōng-hu kap kiáⁿ-jî; lí chin-chiàⁿ sī lín chí-bē ê chí-bē, iàm-chiān in ê tiōng-hu kap kiáⁿ-jî; lín lāu-bú sī Hek lâng, lín lāu-pē sī A-mô͘-lī lâng.

46你ê大姊是撒馬利亞，伊kap伊ê眾cha-bó͘-kiáⁿ tiàm tī你ê tò-pêng；你ê小妹是所多瑪，伊kap伊ê眾cha-bó͘-kiáⁿ tiàm tī你ê chiàⁿ-pêng。Lí ê tōa-chí sī Sat-má-lī-a, i kap i ê chèng cha-bó͘-kiáⁿ tiàm tī lí ê tò-pêng; lí ê sió-bē sī Só͘-to-má, i kap i ê chèng cha-bó͘-kiáⁿ tiàm tī lí ê chiàⁿ-pêng.

47你無學in ê所行，亦無照in可惡ê事去做；你掠做小khóa事，你一切所行ê，比in khah臭。Lí bô o̍h in ê só͘-kiâⁿ, ia̍h bô chiàu in khó-ò͘ⁿ ê sū khì chòe; lí lia̍h chòe sió-khóa sū, lí it-chhè só͘-kiâⁿ-ê, pí in khah-chhàu.

48主耶和華講，我kí我ê永活來chiù-chōa；你ê小妹所多瑪，kap伊眾cha-bó͘-kiáⁿ，未有行你kap你眾cha-bó͘-kiáⁿ所行ê事。Chú Iâ-hô-hoa kóng, Góa kí Góa ê éng-oa̍h lâi chiù-chōa; lí ê sió-bē Só͘-to-má, kap i chèng cha-bó͘-kiáⁿ, bē ū kiâⁿ lí kap lí chèng cha-bó͘-kiáⁿ só͘ kiâⁿ ê sū.

49看ah，你ê小妹所多瑪ê罪是chit款；伊kap伊ê眾cha-bó͘-kiáⁿ，心志驕傲，米糧飽足，享受安逸；lóng無扶助困苦kap sòng-hiong人ê手。Khòaⁿ ah, lí ê sió-bē Só͘-to-má ê chōe sī chit-khoán; i kap i ê chèng cha-bó͘-kiáⁿ, sim-chì kiau-ngō͘, bí-niû pá-chiok, hióng-siū an-ia̍t; lóng bô hû-chō͘ khùn-khó͘ kap sòng-hiong lâng ê chhiú.

50In自高，tī我ê面前行可惡ê事，我看了就將in除去。In chū-ko, tī Góa ê bīn-chêng kiâⁿ khó-ò͘ⁿ ê sū, Góa khòaⁿ-liáu chiū chiong in tû--khì.

51撒馬利亞所犯ê罪無你ê一半；你加添可惡ê事比in khah-chōe，koh tùi你所行一切可惡ê事，hō͘你ê姊妹顯明是義。Sat-má-lī-a só͘ hoān ê chōe bô lí ê chi̍t-pòaⁿ; lí ke-thiⁿ khó-ò͘ⁿ ê sū pí in khah-chōe, koh tùi lí só͘ kiâⁿ it-chhè khó-ò͘ⁿ ê sū, hō͘ lí ê chí-bē hián-bêng sī gī.

52你既然斷定你ê姊妹做義，就tio̍h擔當你家己ê凌辱；因為你所犯ê罪比in khah可惡，in就比你khah義；你已經hō͘你ê姊妹顯明是義，你就tio̍h見笑，擔當家己ê凌辱。Lí kì-jiân toàn-tēng lí ê chí-bē chòe-gī, chiū tio̍h tam-tng lí ka-kī ê lêng-jio̍k; in-ūi lí só͘ hoān ê chōe pí in khah khó-ò͘ⁿ, in chiū pí lí khah gī; lí í-keng hō͘ lí ê chí-bē hián-bêng sī gī, lí chiū tio̍h kiàn-siàu, tam-tng ka-kī ê lêng-jio̍k.

53我beh hō͘ in受掠ê倒tńg來；就是hō͘所多瑪kap伊ê眾cha-bó͘-kiáⁿ受掠ê，撒馬利亞kap伊ê眾cha-bó͘-kiáⁿ受掠ê，以及in中間lín受掠ê，lóng倒tńg來。Góa beh hō͘ in siū-lia̍h-ê tò-tńg--lâi; chiū-sī hō͘ Só͘-to-má kap i ê chèng cha-bó͘-kiáⁿ siū-lia̍h-ê, Sat-má-lī-a kap i ê chèng cha-bó͘-kiáⁿ siū-lia̍h--ê, í-ki̍p in tiong-kan lín siū-lia̍h--ê, lóng tò-tńg--lâi.

54Thang hō͘你擔當家己ê凌辱，koh對你一切所行hō͘ in得tio̍h安慰ê，來見笑。Thang hō͘ lí tam-tng ka-kī ê lêng-jio̍k, koh tùi lí it-chhè só͘ kiâⁿ hō͘ in tit-tio̍h an-ùi--ê, lâi kiàn-siàu.

55你ê姊妹所多瑪，kap伊ê眾cha-bó͘-kiáⁿ，beh tò來原位；撒馬利亞，kap伊ê眾cha-bó͘-kiáⁿ，beh tò來原位；你，kap你ê眾cha-bó͘-kiáⁿ ，亦beh tò來原位。Lí ê chí-bē Só͘-to-má, kap i ê chèng cha-bó͘-kiáⁿ, beh tò-lâi goân-ūi; Sat-má-lī-a, kap i ê chèng chá-bó͘-kiáⁿ, beh tò-lâi goân-ūi; lí, kap lí ê chèng cha-bó͘-kiáⁿ , ia̍h beh tò-lâi goân-ūi.

56當你驕傲ê日，你ê嘴無講起你ê小妹所多瑪，Tng lí kiau-ngō͘ ê ji̍t, lí ê chhùi bô kóng-khí lí ê sió-bē Só͘-to-má,

57Hit時你ê pháiⁿ iáu未發現，A-lân chiah-ê cha-bó͘-kiáⁿ，連伊四圍ê人，iáu未凌辱你；腓利士chiah ê cha-bó͘-kiáⁿ，平素tī四圍藐視你ê，伊也未有凌辱你。hit-sî lí ê pháiⁿ iáu-bē hoat-hiān, A-lân chiah ê cha-bó͘-kiáⁿ, liân i sì-ûi ê lâng, iáu-bē lêng-jio̍k lí; Hui-lī-sū chiah 5 cha-bó͘-kiáⁿ, pêng-sò͘ tī sì-ûi biáu-sī lí--ê, i iā bē ū lêng-jio̍k lí.

58耶和華講，你好淫kap可惡ê事，你已經擔當lah。Iâ-hô-hoa kóng, Lí hò͘ⁿ-îm kap khó-ò͘ⁿ ê sū, lí í-keng tam-tng lah.

59因為主耶和華án-ni講，你背約看輕chiù-chōa，我beh照你所行來款待你。In-ūi Chú Iâ-hô-hoa án-ni kóng, Lí pōe-iok khòaⁿ-khin chiù-chōa, Góa beh chiàu lí só͘ kiâⁿ lâi khoán-thāi lí.

60總是我beh追念我tī你少年ê時，kap你所立ê約；亦beh kap你設立永遠ê約。Chóng-sī Góa beh tui-liām Góa tī lí siàu-liân ê sî, kap lí só͘ li̍p ê iok; ia̍h beh kap lí siat-li̍p éng-oán ê iok.

61當你接納你ê姊妹，就是你ê大姊kap你ê小妹ê時，你beh記得你所行ê來見笑；我亦beh將in hō͘你做cha-bó͘-kiáⁿ，獨獨m̄是對你ê約。Tng lí chiap-la̍p lí ê chí-bē, chiū-sī lí ê tōa-chí kap lí ê sió-bē ê sî, lí beh kì-tit lí só͘ kiâⁿ--ê lâi kiàn-siàu; Góa ia̍h beh chiong in hō͘ lí chòe cha-bó͘-kiáⁿ, to̍k-to̍k m̄-sī tùi lí ê iok.

62我beh kap你設立我ê約，你就知我是耶和華；Góa beh kap lí siat-li̍p Góa ê iok, lí chiū chai Góa sī Iâ-hô-hoa;

63到我赦免你一切所做ê時，你記得就見笑；koh因為你ê凌辱，就無koh開嘴；這是主耶和華講ê。kàu Góa sià-bián lí it-chhè só͘ chòe ê sî, lí kì-tit chiū kiàn-siàu; koh in-ūi lí ê lêng-jio̍k, chiū bô koh khui-chhùi; che sī Chú Iâ-hô-hoa kóng--ê.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h對以色列家出猜，設譬喻；Jîn-chú ah, lí tio̍h tùi Í-sek-lia̍t ke chhut-chhai, siat phì-jū;

3講，主耶和華án-ni講，有一隻大鷹，翼股大，翼尾長，毛草cha̍t，有五彩色，飛到黎巴嫩，取柏香樹中枝ê枝尾。kóng, Chú Iâ-hô-hoa án-ni kóng, Ū chi̍t chiah tōa eng, si̍t-kó͘ tōa, si̍t-bé tn̂g, mn̂g-chháu cha̍t, ū ngó͘-chhái-sek, pe kàu Lī-pa-lùn, chhú pek-hiuⁿ-chhiū tiong-ki ê ki-bé.

4At折伊盡尾溜chíⁿ ê枝，kâⁿ到seng-lí場，hē tī買賣ê人ê城。At-chi̍h i chīn bé-liu chíⁿ ê ki, kâⁿ kàu seng-lí-tiûⁿ, hē tī bóe-bōe ê lâng ê siâⁿ.

5Koh取hit所在ê種，栽tī肥地，插tī chōe-chōe水ê邊頭，親像栽柳樹。Koh chhú hit só͘-chāi ê chéng, chai tī pûi-tōe, chhah tī chōe-chōe chúi ê piⁿ-thâu, chhin-chhiūⁿ chai liú-chhiū.

6就漸漸大叢，成做拋藤低低ê葡萄樹；伊ê枝轉ǹg hit隻鷹，根tī伊ê下面；Tùi án-ni，成做葡萄樹，生枝發藤。Chiū chiām-chiām tōa-châng, chiâⁿ-chòe pha-tîn kē-kē ê phû-tô-chhiū; i ê ki choán ǹg hit chiah eng, kun tī i ê ē-bīn; tùi án-ni chiâⁿ-chòe phû-tô-chhiū, siⁿ ki hoat tîn.

7Koh有一隻大鷹，翼大，毛cha̍t，看ah，chit-ê葡萄樹tùi栽種ê所在彎伊ê根ǹg伊，發伊ê枝ǹg伊，ǹg望伊灌ak。Koh ū chi̍t chiah tōa eng, si̍t tōa, mn̂g cha̍t, khòaⁿ ah, chit ê phû-tô-chhiū tùi chai-chèng ê só͘-chāi oan i ê kun ǹg i, hoat i ê ki ǹg i, ǹg-bāng i koàn-ak.

8伊栽tī肥地，chōe-chōe水ê邊頭，thang發枝結果子，成做好ê葡萄樹。I chai tī pûi-tōe, chōe-chōe chúi ê piⁿ-thâu, thang hoat-ki kiat ké-chí, chiâⁿ-chòe hó ê phû-tô-chhiū.

9你tio̍h講，主耶和華án-ni講，chit-ê葡萄樹kiám會發ām？鷹kiám bōe拔伊ê根，除伊ê果子，hō͘伊枯焦mah？hō͘伊幼ê葉lóng枯焦，也m̄免用大力kap chōe-chōe人拔出伊ê根。Lí tio̍h kóng, Chú Iâ-hô-hoa án-ni kóng, Chit ê phû-tô-chhiū kiám ōe hoat-ām? eng kiám bōe pu̍ih i ê kun, tû i ê ké-chí, hō͘ i ko͘-tâ mah? hō͘ i iù ê hio̍h lóng ko͘-tâ, iā m̄-bián ēng tōa-la̍t kap chōe-chōe lâng pu̍ih-chhut i ê kun.

10伊已經栽種，kiám會發ām mah？東風一下吹伊，kiám bōe lóng枯焦mah？beh tī伊發生ê所在枯焦。I í-keng chai-chèng, kiám ōe hoat-ām mah? tang-hong chi̍t-ē chhe--i, kiám bōe lóng ko͘-tâ mah? beh tī i hoat-siⁿ ê só͘-chāi ko͘-tâ.

11耶和華ê話koh臨到我講，Iâ-hô-hoa ê ōe koh lîm-kàu góa kóng,

12你tio̍h kā hit-ê悖逆ê家講，Lín kiám m̄知chiah-ê是甚麼意思mah？你tio̍h kā in講，巴比倫王到耶路撒冷，掠伊ê君王kap貴族，帶到伊巴比倫hia。Lí tio̍h kā hit ê pōe-ge̍k ê ke kóng, Lín kiám m̄-chai chiah-ê sī sím-mi̍h ì-sù mah? Lí tio̍h kā in kóng, Pa-pí-lûn ông kàu Iâ-lō͘-sat-léng, lia̍h i ê kun-ông kap kùi-cho̍k, tòa kàu i Pa-pí-lûn hia.

13Tùi王親ê中間，揀一人，kap伊立約，kah伊chiù-chōa；koh掠國內有勢力ê人；Tùi ông-chhin ê tiong-kan, kéng chi̍t-lâng, kap i li̍p-iok, kah i chiù-chōa; koh lia̍h kok-lāi ū sè-le̍k ê lâng;

14Beh hō͘國卑微bōe能自強，獨獨守盟約，就得tio̍h保存。beh hō͘ kok pi-bî bōe-ōe chū-kiông, to̍k-to̍k siú bêng-iok, chiū tit-tio̍h pó-chûn.

15總是伊背叛；差使者去埃及，ài in hō͘伊馬kap chōe-chōe兵；伊kiám會興通mah？行chit號事ê人，kiám會逃脫mah？kiám有背約，iáu走能lī mah？Chóng-sī i pōe-poān; chhe sù-chiá khì Ai-ki̍p, ài in hō͘ i bé kap chōe-chōe peng; i kiám ōe heng-thong mah? kiâⁿ chit hō sū ê lâng, kiám ōe tô-thoat mah? kiám ū pōe-iok, iáu cháu ōe lī mah?

16主耶和華講，我kí家己ê永活來chiù-chōa，巴比倫王設立伊做王，伊竟然藐視chiù-chōa ê話，背所立ê約；因為án-ni，伊的確死tī巴比倫王所tiàm ê所在。Chú Iâ-hô-hoa kóng, Góa kí ka-kī ê éng-oa̍h lâi chiù-chōa, Pa-pí-lûn ông siat-li̍p i chòe-ông, i kéng-jiân biáu-sī chiù-chōa ê ōe, pōe só͘ li̍p ê iok; in-ūi án-ni, i tek-khak sí tī Pa-pí-lûn ông só͘ tiàm ê só͘-chāi.

17當in 起土堆，造台，beh滅無chōe-chōe人ê時，法老chhōa大隊兵，kap chōe-chōe人來；也bōe tī交戰中幫贊伊。Tng in khí thô͘-tui, chō tâi, beh bia̍t-bô chōe-chōe lâng ê sî, Hoat-ló chhōa tōa tūi peng, kap chōe-chōe lâng lâi; iā bōe tī kau-chiàn-tiong pang-chān i.

18伊背約來藐視chiù-chōa，看ah，伊已經投降，iáu-kú做出chiah-ê一切ê事，伊的確bōe能逃脫。I pōe-iok lâi biáu-sī chiù-chōa, khòaⁿ ah, i í-keng tâu-hâng, iáu-kú chòe-chhut chiah-ê it-chhè ê sū, i tek-khak bōe-ōe tô-thoat.

19所以主耶和華án-ni講，我kí我ê永活來chiù-chōa，伊已經看輕指我所chiù ê chōa，悖謬指我所立ê約；我beh將chit-ê罪歸tī伊ê頭殼。Só͘-í Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa, i í-keng khòaⁿ-khin chí Góa só͘ chiù ê chōa, pōe-biū chí Góa só͘ li̍p ê iok; Góa beh chiong chit ê chōe kui tī i ê thâu-khak.

20我beh用我ê網拋tī伊ê身上，伊beh hō͘我ê活tauh tauh-tio̍h；我beh帶伊到巴比倫，亦beh tī-hia審問伊干犯我ê罪。Góa beh ēng Góa ê bāng pha tī i ê sin-chiūⁿ, i beh hō͘ Góa ê oa̍h-tauh tauh--tio̍h; Góa beh tòa i kàu Pa-pí-lûn, ia̍h beh tī-hia sím-mn̄g i kan-hoān Góa ê chōe.

21伊ê軍隊中逃走ê，lóng beh倒tī刀下；所chhun-ê，亦beh四散tī四方；lín就知講chit-ê話ê，是我耶和華。I ê kun-tūi-tiong tô-cháu--ê, lóng beh tó tī to-ē; só͘ chhun--ê, ia̍h beh sì-sòaⁿ tī sì-hng; lín chiū chai kóng chit ê ōe--ê, sī Góa Iâ-hô-hoa.

22主耶和華án-ni講，我亦beh取柏香樹中枝高ê尾溜，來栽伊；亦beh對伊chíⁿ ê枝 ê尾溜，at折伊軟ê枝；栽tī高高ê山。Chú Iâ-hô-hoa án-ni kóng, Góa ia̍h beh chhú pek-hiuⁿ-chhiū tiong-ki koâiⁿ ê bé-liu, lâi chai--i; ia̍h beh tùi i chíⁿ ê ki ê bé-liu, at-chi̍h i nńg ê ki; chai tī koâiⁿ-koâiⁿ ê soaⁿ.

23我beh栽伊tī以色列高地ê山，伊就開枝結子，成做好ê柏香樹；各樣ê飛鳥beh歇tī伊ê下面，歇tī伊ê枝ê蔭影下。Góa beh chai i tī Í-sek-lia̍t koâiⁿ-tōe ê soaⁿ, i chiū khui-ki kiat-chí, chiâⁿ-chòe hó ê pek-hiuⁿ-chhiū; kok-iūⁿ ê pe-chiáu beh hioh tī i ê ē-bīn, hioh tī i ê ki ê ìm-ńg-ē.

24田野ê樹木lóng beh知我耶和華hō͘高ê樹降低，低ê樹升高，青翠ê樹枯焦，枯焦ê樹茂盛；我耶和華án-ni講伊，也成伊。Chhân-iá ê chhiū-ba̍k lóng beh chai Góa Iâ-hô-hoa hō͘ koâiⁿ ê chhiū kàng-kē, kē ê chhiū seng koâiⁿ, chhiⁿ-chhùi ê chhiū ko͘-tâ, ko͘-tâ ê chhiū bō͘-sēng; Góa Iâ-hô-hoa án-ni kóng i, iā chiâⁿ i.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2Lín tī以色列地啥事用chit-ê俗語講，老父食酸ê葡萄，kiáⁿ ê嘴齒酸軟？Lín tī Í-sek-lia̍t tōe siáⁿ-sū ēng chit ê sio̍k-gú kóng, Lāu-pē chia̍h sng ê phû-tô, kiáⁿ ê chhùi-khí sng-nńg?

3主耶和華講，我kí我ê永活chiù-chōa講，Lín tī以色列中無因由thang koh用chit-ê俗語。Chú Iâ-hô-hoa kóng, Góa kí Góa ê éng-oa̍h chiù-chōa kóng, Lín tī Í-sek-lia̍t-tiong bô in-iû thang koh ēng chit ê sio̍k-gú.

4看ah，lóng總ê神魂是屬tī我；親像老父ê神魂屬tī我，kiáⁿ ê神魂也是án-ni；犯罪ê神魂，伊beh死。Khòaⁿ ah, lóng-chóng ê sîn-hûn sī sio̍k tī Góa; chhin-chhiūⁿ lāu-pē ê sîn-hûn sio̍k tī Góa, kiáⁿ ê sîn-hûn iā sī án-ni; hoān-chōe ê sîn-hûn, i beh sí.

5人若公義，行公平kap義理，Lâng nā kong-gī, kiâⁿ kong-pêng kap gī-lí,

6Bē-bat上山頂食祭物，bē-bat仰望以色列家ê偶像，bē-bat phah lâ-sâm厝邊ê bó͘，bē-bat親近經期內ê婦人人；bē-bat chiūⁿ soaⁿ-téng chia̍h chè-mi̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘, bē-bat chhin-kūn keng-kî-lāi ê hū-jîn-lâng;

7Bē-bat虧負人，是將欠債ê人ê當頭還伊，bē-bat強搶人ê物，是用食物hō͘ iau ê人食，用衣裳hō͘ thǹg-theh ê人穿，bē-bat khui-hū lâng, sī chiong khiàm-chè ê lâng ê tǹg-thâu hêng i, bē-bat kiông-chhiúⁿ lâng ê mi̍h, sī ēng chia̍h-mi̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng,

8Bē-bat kā借錢ê人討利息，也無the̍h利錢，kiu手無做pháiⁿ，tī兩pêng ê人ê中間照公道判決，bē-bat kā chioh-chîⁿ ê lâng thó lī-sek, iā bô the̍h lāi-chîⁿ, kiu-chhiú bô chòe-pháiⁿ, tī lióng-pêng ê lâng ê tiong-kan chiàu kong-tō phòaⁿ-koat,

9順thàn我ê律例，執守我ê法度，照誠實行tāi-chì，這是義人，的確得tio̍h活；這是主耶和華講ê。sūn-thàn Góa ê lu̍t-lē, chip-siú Góa ê hoat-tō͘, chiàu sêng-si̍t kiâⁿ tāi-chì, che sī gī-lâng, tek-khak tit-tio̍h oa̍h; che sī Chú Iâ-hô-hoa kóng--ê.

10設使伊生一個kiáⁿ，做強盜，做thâi人ê，á是行hiah-ê pháiⁿ ê一項，無行頂面所講ê好，Siat-sú i siⁿ chi̍t ê kiáⁿ, chòe kiông-tō, chòe thâi-lâng-ê, á-sī kiâⁿ hiah ê pháiⁿ ê chi̍t-hāng, bô kiâⁿ téng-bīn só͘ kóng ê hó,

11反tńg上山頂食祭物，koh phah lâ-sâm厝邊ê bó͘，hoán-tńg chiūⁿ soaⁿ-téng chia̍h chè-mi̍h, koh phah lâ-sâm chhù-piⁿ ê bó͘,

12虧負困苦kap sòng-hiong ê人，強搶人ê物，bē-bat用當頭還人，仰望偶像，行可惡ê事，khui-hū khùn-khó͘ kap sòng-hiong ê lâng, kiông-chhiúⁿ lâng ê mi̍h, bē-bat ēng tǹg-thâu hêng--lâng, gióng-bōng ngó͘-siōng, kiâⁿ khó-ò͘ⁿ ê sū,

13Kā借錢ê人討利息，the̍h利錢；chit-ê人kiám會活mah？伊的確bōe活；伊行hiah-ê一切可惡ê事的確tio̍h死；伊ê罪beh歸tī伊。kā chioh-chîⁿ ê lâng thó lī-sek, the̍h lāi-chîⁿ; chit ê lâng kiám ōe oa̍h mah? i tek-khak bōe oa̍h; i kiâⁿ hiah ê it-chhè khó-ò͘ⁿ ê sū tek-khak tio̍h sí; i ê chōe beh kui tī i.

14看ah，設使伊生一個kiáⁿ，看見老父所行一切ê罪，就驚惶，無án-ni去行；Khòaⁿ ah, siat-sú i siⁿ chi̍t ê kiáⁿ, khòaⁿ-kìⁿ lāu-pē só͘ kiâⁿ it-chhè ê chōe, chiū kiaⁿ-hiâⁿ, bô án-ni khì kiâⁿ;

15Bē-bat上山食祭物，bē-bat仰望以色列家ê偶像，bē-bat phah lâ-sâm厝邊ê bó͘；bē-bat chiūⁿ-soaⁿ chia̍h chè-mi̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘;

16Bē-bat虧負人，bē-bat the̍h人ê 當頭，bē-bat 強搶人ê物，是用食物hō͘ iau ê人食，用衣裳hō͘ thǹg-theh ê人穿，bē-bat khui-hū lâng, bē-bat the̍h lâng ê tǹg-thâu, bē-bat kiông-chhiúⁿ lâng ê mi̍h, sī ēng chia̍h-mi̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng,

17Kiu手無害sòng-hiong人，無討利錢，無the̍h利息，伊順thàn我ê法度，執守我ê律例，伊就無因為老父ê罪過來死無，的確能活。kiu-chhiú bô hāi sòng-hiong lâng, bô thó lāi-chîⁿ, bô the̍h lī-sek, i sūn-thàn Góa ê hoat-tō͘, chip-siú Góa ê lu̍t-lē, i chiū bô in-ūi lāu-pē ê chōe-kòa lâi sí-bô, tek-khak ōe oa̍h.

18論到伊ê老父，因為伊欺負人真傷重，強搶兄弟，tī本族中行m̄好；看ah，伊beh 因為家己ê罪來死。Lūn-kàu i ê lāu-pē, in-ūi i khi-hū lâng chin siong-tiōng, kiông-chhiúⁿ hiaⁿ-tī, tī pún-cho̍k-tiong kiâⁿ m̄-hó; khòaⁿ ah, i beh in-ūi ka-kī ê chōe lâi sí.

19Lín iáu teh講，Kiáⁿ怎樣無擔當老父ê罪？Kiáⁿ若行正直，kap合理ê事，守我一切ê律例來行伊；伊的確會活。Lín iáu teh kóng, Kiáⁿ cháiⁿ-iūⁿ bô tam-tng lāu-pē ê chōe? Kiáⁿ nā kiâⁿ chèng-ti̍t, kap ha̍p-lí ê sū, siú Góa it-chhè ê lu̍t-lē lâi kiâⁿ--i; i tek-khak ōe oa̍h.

20犯罪ê神魂，伊beh死；kiáⁿ的確無擔當老父ê罪，老父也無擔當kiáⁿ ê罪；義人ê義beh歸tī伊家己；pháiⁿ人ê pháiⁿ，也beh歸tī伊家己。Hoān-chōe ê sîn-hûn, i beh sí; kiáⁿ tek-khak bô tam-tng lāu-pē ê chōe, lāu-pē iā bô tam-tng kiáⁿ ê chōe; gī-lâng ê gī beh kui tī i ka-kī; pháiⁿ-lâng ê pháiⁿ, iā beh kui tī i ka-kī.

21Pháiⁿ人若回頭離開所做一切ê罪惡，執守我一切ê律例，行正直kap合理ê事，伊的確會活，bōe死。Pháiⁿ-lâng nā hôe-thâu lī-khui só͘ chòe it-chhè ê chōe-ok, chip-siú Góa it-chhè ê lu̍t-lē, kiâⁿ chèng-ti̍t kap ha̍p-lí ê sū, i tek-khak ōe oa̍h, bōe sí.

22伊所犯一切ê罪過無koh kā伊記得；tī所行ê義，伊beh活。I só͘ hoān it-chhè ê chōe-kòa bô koh kā i kì-tit; tī só͘ kiâⁿ ê gī, i beh oa̍h.

23主耶和華講，pháiⁿ人死無，kiám是我所歡喜mah？我kiám m̄是歡喜伊回頭，離開伊所行ê路，來得tio̍h活mah？Chú Iâ-hô-hoa kóng, Pháiⁿ-lâng sí-bô, kiám sī Góa só͘ hoaⁿ-hí mah? Góa kiám-m̄-sī hoaⁿ-hí i hôe-thâu, lī-khui i só͘ kiâⁿ ê lō͘, lâi tit-tio̍h oa̍h mah?

24總是義人若oa̍t頭，離開伊ê義，來犯罪，照pháiⁿ人所行一切可惡ê事，來行；伊kiám會活mah？伊所行一切ê義，lóng無koh受記念，伊beh tī所犯ê罪，所行ê pháiⁿ，死tī hit中間。Chóng-sī gī-lâng nā oa̍t-thâu, lī-khui i ê gī, lâi hoān-chōe, chiàu pháiⁿ-lâng só͘ kiâⁿ it-chhè khó-ò͘ⁿ ê sū, lâi kiâⁿ; i kiám ōe oa̍h mah? i só͘ kiâⁿ it-chhè ê gī, lóng bô koh siū kì-liām, i beh tī só͘ hoān ê chōe, só͘ kiâⁿ ê pháiⁿ, sí tī hit tiong-kan.

25Lín iáu teh講，主ê路無公平；以色列家ah，lín tio̍h聽；我ê路kiám無公平mah？kiám m̄是lín ê路無公平mah？Lín iáu teh kóng, Chú ê lō͘ bô kong-pêng; Í-sek-lia̍t-ke ah, lín tio̍h thiaⁿ; Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah?

26義人若oa̍t頭離開伊ê義，來行罪惡，致到為tio̍h án-ni來死；伊就因為所行ê罪惡來死。Gī-lâng nā oa̍t-thâu lī-khui i ê gī, lâi kiâⁿ chōe-ok, tì-kàu ūi-tio̍h án-ni lâi sí; i chiū in-ūi só͘ kiâⁿ ê chōe-ok lâi sí.

27Koh pháiⁿ人若回頭，離開伊所行ê pháiⁿ，來行正直kap合理ê事；伊beh hō͘伊ê神魂得tio̍h活。Koh pháiⁿ-lâng nā hôe-thâu, lī-khui i só͘ kiâⁿ ê pháiⁿ, lâi kiâⁿ chèng-ti̍t kap ha̍p-lí ê sū; i beh hō͘ i ê sîn-hûn tit-tio̍h oa̍h.

28因為伊有想，回頭離開伊所犯一切ê罪過；伊的確活無死。In-ūi i ū siūⁿ, hôe-thâu lī-khui i só͘ hoān it-chhè ê chōe-kòa; i tek-khak oa̍h bô sí.

29以色列家iáu teh講，主ê路無公平；以色列家ah，我ê路kiám無公平mah？kiám m̄是lín ê路無公平mah？Í-sek-lia̍t-ke iáu teh kóng, Chú ê lō͘ bô kong-pêng; Í-sek-lia̍t-ke ah, Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah?

30所以主耶和華講，以色列家ah，我beh照lín ta̍k人所行ê審判lín；lín tio̍h回頭，離開所犯一切ê罪過；án-ni，罪過bōe會hō͘ lín敗無。Só͘-í Chú Iâ-hô-hoa kóng, Í-sek-lia̍t-ke ah, Góa beh chiàu lín ta̍k-lâng só͘ kiâⁿ--ê sím-phòaⁿ lín; lín tio̍h hôe-thâu, lī-khui só͘ hoān it-chhè ê chōe-kòa; án-ni, chōe-kòa bōe-ōe hō͘ lín pāi-bô.

31Lín tio̍h將所犯一切ê罪過hiat-ka̍k離開lín；為家己成一個新ê心，kap新ê神；以色列家ah，lín mih-sái tio̍h死？Lín tio̍h chiong só͘ hoān it-chhè ê chōe-kòa hiat-ka̍k lī-khui lín; ūi ka-kī chiâⁿ chi̍t ê sin ê sim, kap sin ê sîn; Í-sek-lia̍t-ke ah, lín mih-sái tio̍h sí?

32主耶和華講，人ê死，我無歡喜伊ê死；所以lín tio̍h回頭，來得tio̍h活。Chú Iâ-hô-hoa kóng, Lâng ê sí, Góa bô hoaⁿ-hí i ê sí; só͘-í lín tio̍h hôe-thâu, lâi tit-tio̍h oa̍h.