1當三十年，四月初五，我tī Ka-pa-ló͘ ê河邊，受掠ê人ê中間；hit時天開，我看見上帝ê異象。Tng saⁿ-cha̍p--nî, sì-ge̍h chhoe-gō͘, góa tī Ka-pa-ló͘ ê hô-piⁿ, siū-lia̍h ê lâng ê tiong-kan; hit-sî thiⁿ khui, góa khòaⁿ-kìⁿ Siōng-tè ê īⁿ-siōng.

2Tī hit月ê初五，就是Iok-ngá-kun王受掠ê第五年，Tī hit-ge̍h ê chhoe-gō͘, chiū-sī Iok-ngá-kun ông siū-lia̍h ê tē-gō͘ nî,

3Tī Ka-le̍k-tí人ê地，Ka-pa-ló͘ ê河邊，耶和華ê話tiâu-tî臨到Pò͘-se ê kiáⁿ，祭司以西結；tī-hia耶和華ê手hē tī伊ê身上。tī Ka-le̍k-tí lâng ê tōe, Ka-pa-ló͘ ê hô-piⁿ, Iâ-hô-hoa ê ōe tiâu-tî lîm-kàu Pò͘-se ê kiáⁿ, chè-si Í-se-kiat; tī-hia Iâ-hô-hoa ê chhiú hē tī i ê sin-chiūⁿ.

4我看見，你看，有狂風tùi北方來，有大片雲，有燄燄sih ê火，伊ê周圍有光，tùi hit中間ê火內發出親像琥珀ê色緻。Góa khòaⁿ-kìⁿ, lí khòaⁿ, ū kông-hong tùi pak-hng lâi, ū tōa phiàn hûn, ū iām-iām-sih ê hé, i ê chiu-ûi ū kng, tùi hit tiong-kan ê hé-lāi hoat-chhut chhin-chhiūⁿ hó͘-phek ê sek-tì.

5Koh tùi hit中間出現四個活物ê形象。In ê款式是án-ni；有人ê形象。Koh tùi hit tiong-kan chhut-hiān sì ê oa̍h-mi̍h ê hêng-siōng. In ê khoán-sit sī án-ni; ū lâng ê hêng-siōng.

6Ta̍k-ê有四個面，ta̍k-ê有四支翼。Ta̍k-ê ū sì ê bīn, ta̍k-ê ū sì ki si̍t.

7In ê腳是直直，腳跡底親像牛á ê腳蹄；lóng燦爛親像磨光ê銅ê刺chhiah) 目。In ê kha sī ti̍t-ti̍t, kha-jiah-tóe chhin-chhiūⁿ gû-á ê kha-tôe; lóng chhàn-lān chhin-chhiūⁿ bôa-kng ê tâng ê chhiah-ba̍k.

8Tī in四面ê翼下koh有人ê手，chit-ê四個活物ê面kap 翼就是án-ni；Tī in sì-bīn ê si̍t-ē koh ū lâng ê chhiú, chit ê sì ê oa̍h-mi̍h-ê bīn kap si̍t chiū-sī án-ni;

9in ê翼lóng相連接；行ê時，身軀m̄免oa̍t，lóng直直進前去。in ê si̍t lóng saⁿ-liân-chiap; kiâⁿ ê sî, seng-khu m̄-bián oa̍t, lóng ti̍t-ti̍t chìn-chêng khì.

10論到in ê面ê形象，in有人ê面；in四個tī chiàⁿ-pêng有獅ê面，in四個tī tò-pêng有牛ê面；in四個也有鷹鳥ê面。Lūn-kàu in ê bīn ê hêng-siōng, in ū lâng ê bīn; in sì-ê tī chiàⁿ-pêng ū sai ê bīn, in sì-ê tī tò-pêng ū gû ê bīn; in sì-ê iā ū eng-chiáu ê bīn.

11In ê面是án-ni；in ê翼tùi頂面thí開；chit-ê hit-ê兩個翼相連，koh有兩個翼蓋身軀。In ê bīn sī án-ni; in ê si̍t tùi téng-bīn thí-khui; chit-ê hit-ê nn̄g ê si̍t saⁿ-liân, koh ū nn̄g ê si̍t khàm seng-khu.

12In ta̍k-ê直直行進前；神beh去toh-lo̍h，in就去hia；行ê時，身軀m̄免oa̍t。In ta̍k-ê ti̍t-ti̍t kiâⁿ chìn-chêng; sîn beh khì toh-lo̍h, in chiū khì hia; kiâⁿ ê sî, seng-khu m̄-bián oa̍t.

13論到活物ê款式，in ê形象親像to̍h ê火炭，koh親像火把ê形象，起起落落tī活物ê中間；火真光，tùi火中發出sih-nà。Lūn-kàu oa̍h-mi̍h ê khoán-sit, in ê hêng-siōng chhin-chhiūⁿ to̍h ê hé-thòaⁿ, koh chhin-chhiūⁿ hé-pé ê hêng-siōng, khí-khí lo̍h-lo̍h tī oa̍h-mi̍h ê tiong-kan; hé chin kng, tùi hé-tiong hoat-chhut sih-nà.

14Hiah-ê活物走去走來，親像sih-nà teh sih。Hiah ê oa̍h-mi̍h cháu-khì cháu-lâi, chhin-chhiūⁿ sih-nà teh sih.

15我teh看活物ê時，看ah，有車輪tī地上，tī活物ê邊á，照伊ê四面。Góa teh khòaⁿ oa̍h-mi̍h ê sî, khòaⁿ ah, ū chhia-lûn tī tōe-chiūⁿ, tī oa̍h-mi̍h ê piⁿ-á, chiàu i ê sì-bīn.

16車輪kap in ê做法ê款式親像黃ê玉ê色緻；四個輪(lûn)ê形象siāng一款；in ê款式kap做法是親像輪中有輪。Chhia-lûn kap in ê chòe-hoat ê khoán-sit chhin-chhiūⁿ n̂g ê ge̍k ê sek-tì; sì ê lûn ê hêng-siōng siāng chi̍t-khoán; in ê khoán-sit kap chòe-hoat sī chhin-chhiūⁿ lûn-tiong ū lûn.

17輪行ê時，四面lóng能行得；行ê時m̄免oa̍t。Lûn kiâⁿ ê sî, sì-bīn lóng ōe kiâⁿ--tit; kiâⁿ ê sî m̄-bián oa̍t.

18論到車輪ê環是真高thang驚；四個輪ê環有目睭滿滿。Lūn-kàu chhia-lûn ê khoân sī chin-koâiⁿ thang kiaⁿ; sì ê lûn ê khoân ū ba̍k-chiu móa-móa.

19活物行ê時，輪也tī in ê身邊teh行；活物舉起離開地ê時，輪也舉起。Oa̍h-mi̍h kiâⁿ ê sî, lûn iā tī in ê sin-piⁿ teh kiâⁿ; oa̍h-mi̍h kú-khí lī-khui tōe ê sî, lûn iā kú-khí.

20神所beh去ê所在，in也去；神若去tī-hia，輪也tī in ê身邊舉起；因為活物ê神tī輪ê內面。Sîn só͘ beh khì ê só͘-chāi, in iā khì; sîn nā khì tī-hia, lûn iā tī in ê sin-piⁿ kú-khí; in-ūi oa̍h-mi̍h ê sîn tī lûn ê lāi-bīn.

21Hiah-ê若行，chiah-ê也行，hiah-ê若停，chiah-ê也停；hiah-ê若舉起離開地ê時，輪也tī in ê身邊舉起；因為活物ê神tī輪ê內面。Hiah-ê nā kiâⁿ, chiah-ê iā kiâⁿ, hiah-ê nā thêng, chiah-ê iā thêng; hiah-ê nā kú-khí lī-khui tōe ê sî, lûn iā tī in ê sin-piⁿ kú-khí; in-ūi oa̍h-mi̍h ê sîn tī lûn ê lāi-bīn.

22活物ê頭殼ê頂面有穹蒼ê形象，看了親像thang驚ê水晶ê色緻，鋪tī in ê頭殼ê頂面。Oa̍h-mi̍h ê thâu-khak ê téng-bīn ū kiong-chhong ê hêng-siōng, khòaⁿ-liáu chhin-chhiūⁿ thang-kiaⁿ ê chúi-chiⁿ ê sek-tì, pho͘ tī in ê thâu-khak ê téng-bīn.

23Tī穹蒼ê下面in ê翼thí直直，大家相對；koh有兩支翼蓋伊ê身軀ê chit-pêng，也koh有兩支翼蓋伊ê身軀ê hit-pêng。Tī kiong-chhong ê ē-bīn in ê si̍t thí ti̍t-ti̍t, tāi-ke saⁿ-tùi; koh ū nn̄g ki si̍t khàm i ê seng-khu ê chit-pêng, iā koh ū nn̄g ki si̍t khàm i ê seng-khu ê hit-pêng.

24In行ê時，我聽見in ê翼ê聲，親像chōe-chōe水ê聲，親像全能ê ê聲，有hōa-hōa嚷ê聲，親像軍隊ê聲；in停ê時，翼就放落來。In kiâⁿ ê sî, góa thiaⁿ-kìⁿ in ê si̍t ê siaⁿ, chhin-chhiūⁿ chōe-chōe chúi ê siaⁿ, chhin-chhiūⁿ Choân-lêng--ê ê siaⁿ, ū hōa-hōa-jióng ê siaⁿ, chhin-chhiūⁿ kun-tūi ê siaⁿ; in thêng ê sî, si̍t chiū pàng--lo̍h-lâi.

25Tī in頭殼頂穹蒼ê頂面有聲；in停ê時，翼就放落來。Tī in thâu-khak-téng kiong-chhong ê téng-bīn ū siaⁿ; in thêng ê sî, si̍t chiū pàng--lo̍h-lâi.

26Tī in頭殼頂穹蒼ê頂面有寶座ê形象，親像藍色ê寶石；tī寶座形象ê頂面有形象親像人ê款式。Tī in thâu-khak-téng kiong-chhong ê téng-bīn ū pó-chō ê hêng-siōng, chhin-chhiūⁿ lâm-sek ê pó-chio̍h; tī pó-chō hêng-siōng ê téng-bīn ū hêng-siōng chhin-chhiūⁿ lâng ê khoán-sit.

27我看tùi對伊ê腰ê形象ê頂面有琥珀 ê色緻，tī伊ê內面周圍有火ê形象；也看見tùi伊ê腰ê形象ê下面有親像火ê形象周圍真光。Góa khòaⁿ-kìⁿ tùi i ê io ê hêng-siōng ê téng-bīn ū hó͘-phek ê sek-tì, tī i ê lāi-bīn chiu-ûi ū hé ê hêng-siōng; iā khòaⁿ-kìⁿ tùi i ê io ê hêng-siōng ê ē-bīn ū chhin-chhiūⁿ hé ê hêng-siōng chiū-ûi chin-kng.

28Tī落雨ê日雲中虹ê形象怎樣，周圍ê光ê形象也是án-ni。我一下看見，就仆tī地裡；koh聽見一位講話ê ê聲。Tī lo̍h-hō͘ ê ji̍t hûn-tiong khēng ê hêng-siōng cháiⁿ-iūⁿ, chiu-ûi ê kng ê hêng-siōng iā sī án-ni. Góa chi̍t-ē khòaⁿ-kìⁿ, chiū phak tī tōe--nih; koh thiaⁿ-kìⁿ chi̍t-ūi kóng-ōe--ê ê siaⁿ.

1伊對我講，人子ah，你起來khiā，我beh kap你講話。I tùi góa kóng, Jîn-chú ah, lí khí-lâi khiā, Góa beh kap lí kóng-ōe.

2伊對我講話ê時，神就入我ê內面，hō͘我khiā起來；我就聽見hit位對我講話ê ê聲。I tùi góa kóng-ōe ê sî, sîn chiū ji̍p góa ê lāi-bīn, hō͘ góa khiā--khí-lâi; góa chiū thiaⁿ-kìⁿ hit-ūi tùi góa kóng-ōe--ê ê siaⁿ.

3伊對我講，人子ah，我差你去到以色列族，到悖逆ê邦國，in是悖逆我ê；in kap in ê列祖違逆我，直到今á日。I tùi góa kóng, Jîn-chú ah, Góa chhe lí khì kàu Í-sek-lia̍t cho̍k, kàu pōe-ge̍k ê pang-kok, in sī pōe-ge̍k Góa ê; in kap in ê lia̍t-chó͘ ûi-ke̍h Góa, ti̍t-kàu kin-á-ji̍t.

4Chiah-ê kiáⁿ面皮厚，心硬；我差你去in hia；你tio̍h對in講，主耶和華án-ni講。Chiah ê kiáⁿ bīn-phê kāu, sim ngī; Góa chhe lí khì in hia; lí tio̍h tùi in kóng, Chú Iâ-hô-hoa án-ni kóng.

5In kiám-chhái聽，kiám-chhái m̄聽，(因為in是悖逆ê家) ，beh知tī in中間的確bat有先知。In kiám-chhái thiaⁿ, kiám-chhái m̄-thiaⁿ, (in-ūi in sī pōe-ge̍k ê ke), beh chai tī in tiong-kan tek-khak bat ū sian-ti.

6人子ah，雖然有草刺蒺藜tī你hia，koh你tiàm tī蠍á蟲ê中間，lóng莫得驚in，也莫得驚in ê話；in雖然是悖逆ê家，iáu-kú莫得驚in ê話，也莫得因為in ê面貌來驚惶。Jîn-chú ah, sui-jiân ū chháu-chhì chi̍t-lê tī lí hia, koh lí tiàm tī giat-á-thâng ê tiong-kan, lóng bo̍h-tit kiaⁿ in, iā bo̍h-tit kiaⁿ in ê ōe; in sui-jiân sī pōe-ge̍k ê ke, iáu-kú bo̍h-tit kiaⁿ in ê ōe, iā bo̍h-tit in-ūi in ê bīn-māu lâi kiaⁿ-hiâⁿ.

7In kiám-chhái聽，kiám-chhái m̄聽，你做你將我ê話kā in講；因為in是極其悖逆ê。In kiám-chhái thiaⁿ, kiám-chhái m̄-thiaⁿ, lí chòe lí chiong Góa ê ōe kā in kóng; in-ūi in sī ke̍k-kî pōe-ge̍k ê.

8人子ah，你tio̍h聽我對你所講ê話；你m̄-thang悖逆，親像hit-ê悖逆ê家；你tio̍h開嘴，食我所hō͘你ê。Jîn-chú ah, lí tio̍h thiaⁿ Góa tùi lí só͘ kóng ê ōe; lí m̄-thang pōe-ge̍k, chhin-chhiūⁿ hit ê pōe-ge̍k ê ke; lí tio̍h khui-chhùi, chia̍h Góa só͘ hō͘ lí ê.

9Hit時我看，看ah，有一支手伸ǹg我chia來；看ah，手內有一卷冊；Hit-sî góa khòaⁿ, khòaⁿ ah, ū chi̍t ki chhiú chhun ǹg góa chia lâi; khòaⁿ ah, chhiú-lāi ū chi̍t kńg chheh;

10伊將hit本掀開tī我ê面前；內外lóng有寫字；hit頂面所寫ê有哀傷，吐氣，災厄ê話。I chiong hit pún hian-khui tī góa ê bīn-chêng; lāi-gōa lóng ū siá-jī; hí téng-bīn só͘ siá-ê ū ai-siong, thó͘-khùi, chai-ē ê ōe.

1伊就對我講，人子ah，tio̍h食你所得tio̍h ê；tio̍h食hit卷冊，也tio̍h去對以色列家講話。I chiū tùi góa kóng, Jîn-chú ah, tio̍h chia̍h lí só͘ tit-tio̍h ê; tio̍h chia̍h hit kńg chheh, iā tio̍h khì tùi Í-sek-lia̍t ke kóng-ōe.

2Tùi án-ni，我開嘴，伊就hō͘我食hit卷。Tùi án-ni góa khui-chhùi, I chiū hō͘ góa chia̍h hit-kńg.

3Koh對我講，人子ah，將chit卷，我所hō͘你ê，tio̍h食tī你ê腹肚，充滿你ê長。我就食伊；嘴內知伊ê甜親像蜜。Koh tùi góa kóng, Jîn-chú ah, chiong chit-kńg, Góa só͘ hō͘ lí ê, tio̍h chia̍h tī lí ê pak-tó͘, chhiong-móa lí ê tn̂g. Góa chiū chia̍h i; chhùi-lāi chai i ê tiⁿ chhin-chhiūⁿ bi̍t.

4伊對我講，人子ah，起來就近以色列ê家，也用我ê話kā in講。I tùi góa kóng, Jîn-chú ah, khí-lâi chiū-kūn Í-sek-lia̍t ê ke, iā ēng Góa ê ōe kā in kóng.

5因為你奉差m̄是去hit-ê講話深奧，言語oh得聽ê百姓hia，就是去以色列家；In-ūi lí hōng-chhe m̄-sī khì hit ê kóng-ōe chhim-ò, giân-gú oh--tit thiaⁿ ê peh-sìⁿ hia, chiū-sī khì Í-sek-lia̍t ke;

6m̄是去hiah-ê講話深奧，言語oh得聽ê chōe-chōe國，in ê話你bōe曉得聽。m̄-sī khì hiah ê kóng-ōe chhim-ò, giân-gú oh--tit thiaⁿ ê chōe-chōe kok, in ê ōe lí bōe hiáu-tit thiaⁿ.

7我若差你去in hia，in的確聽你。總是以色列家m̄肯聽你，因為m̄肯聽我；因為以色列全家是頭額tēng，心硬ê人。Góa nā chhe lí khì in hia, in tek-khak thiaⁿ lí. Chóng-sī Í-sek-lia̍t ke m̄-khéng thiaⁿ lí, in-ūi m̄-khéng thiaⁿ Góa; in-ūi Í-sek-lia̍t choân-ke sī thâu-hia̍h tēng, sim ngī ê lâng.

8看ah，我hō͘你ê面硬，抵敵in ê面；hō͘你ê頭額tēng，抵敵in ê頭額。Khòaⁿ ah, Góa hō͘ lí ê bīn ngī, tí-te̍k in ê bīn; hō͘ lí ê thâu-hia̍h tēng, tí-te̍k in ê thâu-hia̍h.

9我hō͘你ê頭額親像鑽石，比火石khah-tēng；in雖然是悖逆ê家，你莫得驚in，也莫得因為in ê面貌來驚惶。Góa hō͘ lí ê thâu-hia̍h chhin-chhiūⁿ soān-chio̍h, pí hé-chio̍h khah-tēng; in sui-jiân sī pōe-ge̍k ê ke, lí bo̍h-tit kiaⁿ in, iā bo̍h-tit in-ūi in ê bīn-māu lâi kiaⁿ-hiâⁿ.

10伊koh對我講，人子ah，我對你所講一切ê話，你tio̍h用心承受，用耳孔聽。I koh tùi góa kóng, Jîn-chú ah, Góa tùi lí só͘ kóng it-chhè ê ōe, lí tio̍h ēng sim sêng-siū, ēng hī-khang thiaⁿ.

11你tio̍h去就近本國受掠ê百姓hia；in kiám-chhái聽，kiám-chhái m̄聽；你tio̍h對in講話，kā in講，這是主耶和華án-ni講。Lí tio̍h khì chiū-kūn pún-kok siū-lia̍h ê peh-sìⁿ hia; in kiám-chhái thiaⁿ, kiám-chhái m̄-thiaⁿ; lí tio̍h tùi in kóng-ōe, kā in kóng, Che sī Chú Iâ-hô-hoa án-ni kóng.

12Hit時神舉起我，我就聽見tī我ê ka-chiah後有大振動hū-hū哮ê聲，講，耶和華ê榮光tùi伊ê所在顯出，應該得tio̍h o-ló。Hit-sî sîn kú-khí góa, góa chiū thiaⁿ-kìⁿ tī góa ê ka-chiah-āu ū tōa tín-tāng hū-hū-háu ê siaⁿ, kóng, Iâ-hô-hoa ê êng-kng tùi I ê só͘-chāi hián-chhut, eng-kai tit-tio̍h o-ló.

13我也聽見hiah-ê活物ê翼相kha̍p-tio̍h ê聲，kap in ê身邊輪ê聲，就是大振動hū-hū哮ê聲。Góa iā thiaⁿ-kìⁿ hiah ê oa̍h-mi̍h ê si̍t saⁿ-kha̍p-tio̍h ê siaⁿ, kap in ê sin-piⁿ lûn ê siaⁿ, chiū-sī tōa tín-tāng hū-hū-háu ê siaⁿ.

14Tùi án-ni，神舉起我，帶我去；我去真艱苦，心神激烈；耶和華ê手tī我身上真有力。Tùi án-ni sîn kú-khí góa, tòa góa khì; góa khì chin kan-khó͘, sim-sîn kek-lia̍t; Iâ-hô-hoa ê chhiú tī góa sin-chiūⁿ chin ū la̍t.

15我就到The-le̍k-a-pit，tiàm tī Ka-pa-ló͘河邊受掠ê人hit位，到in所khiā起ê所在；tī in中間坐七日久，tiàm hia真gông-ngia̍h。Góa chiū kàu The-le̍k-a-pit, tiàm tī Ka-pa-ló͘ hô-piⁿ siū-lia̍h ê lâng hit-ūi, kàu in só͘ khiā-khí ê só͘-chāi; tī in tiong-kan chē chhit-ji̍t kú, tiàm hia chin gông-ngia̍h.

16過七日耶和華ê話臨到我，講，Kè chhit-ji̍t Iâ-hô-hoa ê ōe lîm-kàu góa, kóng,

17人子ah，我設立你做以色列家守望ê人；所以你tio̍h聽我ê嘴所講ê，替我警戒in。Jîn-chú ah, Góa siat-li̍p lí chòe Í-sek-lia̍t ke siú-bāng ê lâng; só͘-í lí tio̍h thiaⁿ Góa ê chhùi só͘-kóng--ê, thòe Góa kéng-kài in.

18我對pháiⁿ人講，你的確會死；若你無警戒伊，無用話警戒pháiⁿ人hō͘伊離開伊ê pháiⁿ路，來救伊ê性命；就hit-ê pháiⁿ人beh死tī伊ê罪；總是我beh對你ê手討伊ê性命。Góa tùi pháiⁿ-lâng kóng, Lí tek-khak ōe sí; nā lí bô kéng-kài i, bô ēng ōe kéng-kài pháiⁿ-lâng hō͘ i lī-khui i ê pháiⁿ-lō͘, lâi kiù i ê sìⁿ-miā; chiū hit ê pháiⁿ-lâng beh sí tī i ê chōe; chóng-sī Góa beh tùi lí ê chhiú thó i ê sìⁿ-miā.

19設使你警戒pháiⁿ人，也伊無oa̍t-tńg離開伊ê pháiⁿ所行kap伊ê pháiⁿ路，就伊beh死tī伊ê罪；總是你有救你家己ê性命。Siat-sú lí kéng-kài pháiⁿ-lâng, iā i bô oa̍t-tńg lī-khui i ê pháiⁿ só͘-kiâⁿ kap i ê pháiⁿ-lō͘, chiū i beh sí tī i ê chōe; chóng-sī lí ū kiù lí ka-kī ê sìⁿ-miā.

20Koh設使有義人oa̍t-tńg離開伊ê義來犯罪，我也hē窒礙tī伊ê面前，就伊beh死；因為你無警戒伊，就伊beh死tī伊ê罪，koh伊所有行ê義無koh得tio̍h記念；總是我beh對你ê手討伊ê性命。Koh siat-sú ū gī-lâng oa̍t-tńg lī-khui i ê gī lâi hoān-chōe, Góa iā hē that-gāi tī i ê bīn-chêng, chiū i beh sí; in-ūi lí bô kéng-kài i, chiū i beh sí tī i ê chōe, koh i só͘ ū kiâⁿ ê gī bô koh tit-tio̍h kì-liām; chóng-sī Góa beh tùi lí ê chhiú thó i ê sìⁿ-miā.

21總是你若警戒義人，hō͘義人無犯罪，伊若真正無犯罪，就的確得tio̍h活，因為伊有受警戒；你亦救家己ê性命。Chóng-sī lí nā kéng-kài gī-lâng, hō͘ gī-lâng bô hoān-chōe, i nā chin-chiàⁿ bô hoān-chōe, chiū tek-khak tit-tio̍h oa̍h, in-ūi i ū siū kéng-kài; lí ia̍h kiù ka-kī ê sìⁿ-miā.

22耶和華ê手tī-hia hē tī我ê身上；伊對我講，你起來，去平洋，我beh tī-hia kap你講話。Iâ-hô-hoa ê chhiú tī-hia hē tī góa ê sin-chiūⁿ; I tùi góa kóng, Lí khí-lâi, khì pîⁿ-iûⁿ, Góa beh tī-hia kap lí kóng-ōe.

23Tùi án-ni，我起來，出去到平洋；看ah，耶和華ê榮光khiā tī-hia，親像我tī Ka-pa-ló͘河邊所看見ê榮光一樣；我就仆tī地裡。Tùi án-ni, góa khí-lâi, chhut-khì kàu pîⁿ-iûⁿ; khòaⁿ ah, Iâ-hô-hoa ê êng-kng khiā tī-hia, chhin-chhiūⁿ góa tī Ka-pa-ló͘ hô-piⁿ só͘ khòaⁿ-kìⁿ ê êng-kng chi̍t-iūⁿ; góa chiū phak tī tōe--nih.

24神就入我ê內面，hō͘我khiā起來；伊kap我講話；對我講，去ah，你tio̍h家己關tī厝內。Sîn chiū ji̍p góa ê lāi-bīn, hō͘ góa khiā--khí-lâi; I kap góa kóng-ōe; tùi góa kóng, Khì ah, lí tio̍h ka-kī koaiⁿ tī chhù-lāi.

25人子ah，人beh用索hē tī你ê身軀，kā你綑縛；致到你bōe出去來行tī in中間。Jîn-chú ah, lâng beh ēng soh hē tī lí ê sin-khu, kā lí khún-pa̍k; tì-kàu lí bōe chhut-khì lâi kiâⁿ tī in tiong-kan.

26我beh hō͘你ê舌連tī你ê chiūⁿ-kiuⁿ，致到你啞口，bōe會做責備in ê人；因為in是悖逆ê家。Góa beh hō͘ lí ê chi̍h liâm tī lí ê chiūⁿ-kiuⁿ, tì-kàu lí é-káu, bōe ōe chòe chek-pī in ê lâng; in-ūi in sī pōe-ge̍k ê ke.

27獨獨到我kap你講話ê時，我beh開你ê嘴，你就對in講，主耶和華án-ni講，Ài聽ê聽，m̄聽ê kù伊m̄聽；因為in是悖逆ê家。To̍k-to̍k kàu Góa kap lí kóng-ōe ê sî, Góa beh khui lí ê chhùi, lí chiū tùi in kóng, Chú Iâ-hô-hoa án-ni kóng, Ài thiaⁿ--ê thiaⁿ, m̄ thiaⁿ--ê kù i m̄-thiaⁿ; in-ūi in sī pōe-ge̍k ê ke.