1第七年，五月初十，有以色列ê長老kúi-nā人，來beh問耶和華，坐tī我ê面前。Tē chhit--nî, gō͘-ge̍h chhoe-cha̍p, ū Í-sek-lia̍t ê tióng-ló kúi-nā lâng, lâi beh mn̄g Iâ-hô-hoa, chē tī góa ê bīn-chêng.

2耶和華ê話臨到我講，Iâ-hô-hoa ê ōe lîm-kàu góa kóng,

3人子ah，你tio̍h對以色列ê長老講，kā伊講，主耶和華án-ni講，Lín來是beh問我mah？主耶和華講，我指我ê永活來chiù-chōa，我m̄ hō͘你問。Jîn-chú ah, lí tio̍h tùi Í-sek-lia̍t ê tióng-ló kóng, kā i kóng, Chú Iâ-hô-hoa án-ni kóng, Lín lâi sī beh mn̄g Góa mah? Chú Iâ-hô-hoa kóng, Góa chí Góa ê éng-oa̍h lâi chiù-chōa, Góa m̄ hō͘ lí mn̄g.

4人子ah，你beh審問in，審問in mah？你tio̍h hō͘ in知in ê列祖hiah-ê可惡ê事；Jîn-chú ah, lí beh sím-mn̄g in, sím-mn̄g in mah? lí tio̍h hō͘ in chai in ê lia̍t-chó͘ hiah ê khó-ò͘ⁿ ê sū;

5對in講，主耶和華án-ni講，當我揀以色列ê日，ǹg雅各家ê後裔，kia̍h起我ê手，tī埃及地hō͘ in bat我，tùi in kia̍h起我ê手，講，我是耶和華，lín ê上帝。tùi in kóng, Chú Iâ-hô-hoa án-ni kóng, Tng Góa kéng Í-sek-lia̍t ê ji̍t, ǹg Ngá-kok ke ê hō͘-è, kia̍h-khí Góa ê chhiú, tī Ai-ki̍p tōe hō͘ in bat Góa, tùi in kia̍h-khí Góa ê chhiú, kóng, Góa sī Iâ-hô-hoa, lín ê Siōng-tè.

6Hit日我對in kia̍h起手，beh chhōa in出埃及地，到我為tio̍h in所講，流奶kap蜜ê地；hit-ê地tī萬國中是khah有榮光ê。Hit-ji̍t Góa tùi in kia̍h-khí chhiú, beh chhōa in chhut Ai-ki̍p tōe, kàu Góa ūi-tio̍h in só͘ kóng, lâu ni kap bi̍t ê tōe; hit ê tōe tī bān-kok-tiong sī khah ū êng-kng--ê.

7我對in講，Lín ta̍k人tio̍h棄sak目睭所歡喜hiah-ê可惡ê tāi；m̄-thang因為埃及ê偶像phah lâ-sâm家己；我是耶和華，lín ê上帝。Góa tùi in kóng, Lín ta̍k-lâng tio̍h khì-sak ba̍k-chiu só͘ hoaⁿ-hí hiah ê khó-ò͘ⁿ ê tāi; m̄-thang in-ūi Ai-ki̍p ê ngó͘-siōng phah lâ-sâm ka-kī; Góa sī Iâ-hô-hoa, lín ê Siōng-tè.

8總是in悖逆我，m̄肯聽我，m̄放sak in ta̍k人目睭所歡喜hiah-ê可惡ê tāi，m̄離開埃及ê偶像；我就講，我beh將我ê大受氣piàⁿ tī in ê頂面，tī埃及地對in一盡成我ê受氣。Chóng-sī in pōe-ge̍k Góa, m̄-khéng thiaⁿ Góa, m̄ pàng-sak in ta̍k-lâng ba̍k-chiu só͘ hoaⁿ-hí hiah ê khó-ò͘ⁿ ê tāi, m̄ lī-khui Ai-ki̍p ê ngó͘-siōng; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī Ai-ki̍p tōe tùi in it-chīn chiâⁿ Góa ê siū-khì.

9獨獨我因為我ê名ê緣故行tāi-chì，免得我ê名tī in所khiā起列邦中ê面前受褻瀆；我chhōa in出埃及地，tī列邦中ê目睭前hō͘ in bat我。To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ tī in só͘ khiā-khí lia̍t-pang-tiong ê bīn-chêng siū siat-to̍k; Góa chhōa in chhut Ai-ki̍p tōe, tī lia̍t-pang-tiong ê ba̍k-chiu-chêng hō͘ in bat Góa.

10Án-ni，我就hō͘ in出埃及地，chhōa in到曠野。Án-ni, Góa chiū hō͘ in chhut Ai-ki̍p tōe, chhōa in kàu khòng-iá.

11將我ê律例賞賜in，將我ê法度指示in；就是人若行伊beh對伊來得tio̍h活ê。Chiong Góa ê lu̍t-lē siúⁿ-sù in, chiong Góa ê hoat-tō͘ chí-sī in; chiū-sī lâng nā kiâⁿ--i beh tùi i lâi tit-tio̍h oa̍h--ê.

12Koh我用我ê安歇日賞賜in，thang tī我kap in ê中間做證據；hō͘ in知我耶和華是hō͘ in成做聖ê。Koh Góa ēng Góa ê an-hioh-ji̍t siúⁿ-sù in, thang tī Góa kap in ê tiong-kan chòe chèng-kù; hō͘ in chai Góa Iâ-hô-hoa sī hō͘ in chiâⁿ-chòe sèng--ê.

13總是以色列家tī曠野悖逆我，無順thàn我ê律例，棄sak我ê法度，(就是人若行伊，beh對伊來得tio̍h活ê) ，大大犯tio̍h我ê安歇日：我就講，beh tī曠野將我ê大受氣piàⁿ tī in ê頂面，滅無in。Chóng-sī Í-sek-lia̍t-ke tī khòng-iá pōe-ge̍k Góa, bô sūn-thàn Góa ê lu̍t-lē, khì-sak Góa ê hoat-tō͘, (chiū-sī lâng nā kiâⁿ--i, beh tùi i lâi tit-tio̍h oa̍h--ê), tōa-tōa hoān-tio̍h Góa ê an-hioh-ji̍t: Góa chiū kóng, beh tī khòng-iá chiong Góa ê tōa siū-khì piàⁿ tī in ê téng-bīn, bia̍t-bô in.

14獨獨我因為我ê名ê緣故行tāi-chì，免得我ê名受褻瀆tī列邦人ê目睭前，就是hiah-ê看見我chhōa in出埃及ê列邦。To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-ki̍p ê lia̍t-pang.

15Koh我tī曠野對in kia̍h起我ê手，講，我無beh chhōa in入我所賞賜in 流奶 kap蜜ê地，hit-ê地tī萬國中khah有榮光ê。Koh Góa tī khòng-iá tùi in kia̍h-khí Góa ê chhiú, kóng, Góa bô beh chhōa in ji̍p Góa só͘ siúⁿ-sù in lâu ni kap bi̍t ê tōe, hit ê tōe tī bān-kok-tiong khah ū êng-kng--ê.

16因為in厭賤我ê法度，無順thàn我ê律例，犯tio̍h我ê安歇日，in ê心意向in ê偶像。In-ūi in iàm-chiān Góa ê hoat-tō͘, bô sūn-thàn Góa ê lu̍t-lē, hoān-tio̍h Góa ê an-hioh-ji̍t, in ê sim ì-hiòng in ê ngó͘-siōng.

17雖然án-ni，我ê目睭iáu-kú是惜in，無毀滅in，無tī曠野kā in滅了了。Sui-jiân án-ni, Góa ê ba̍k-chiū iáu-kú sī sioh in, bô húi-bia̍t in, bô tī khòng-iá kā in bia̍t liáu-liáu.

18我tī曠野對in ê kiáⁿ兒講，莫得thàn lín老父ê律例，莫得守in ê法度，亦莫得因為in ê偶像phah lâ-sām家己。Góa tī khòng-iá tùi in ê kiáⁿ-jî kóng, Bo̍h-tit thàn lín lāu-pē ê lu̍t-lē, bo̍h-tit siú in ê hoat-tō͘, ia̍h bo̍h-tit in-ūi in ê ngó͘-siōng phah lâ-sām ka-kī.

19我是耶和華lín ê上帝，lín tio̍h順thàn我ê律例，守我ê法度來行伊。Góa sī Iâ-hô-hoa lín ê Siōng-tè, lín tio̍h sūn-thàn Góa ê lu̍t-lē, siú Góa ê hoat-tō͘ lâi kiâⁿ--i.

20Koh用我chiah-ê安歇日做聖；chiah-ê日tī我kap lín ê中間做證據，hō͘ lín知我是耶和華lín ê上帝。Koh ēng Góa chiah ê an-hioh-ji̍t chòe-sèng; chiah ê ji̍t tī Góa kap lín ê tiong-kan chòe chèng-kù, hō͘ lín chai Góa sī Iâ-hô-hoa lín ê Siōng-tè.

21獨獨in ê kiáⁿ兒悖逆我，無順thàn我ê律例，亦無守我ê法度來行伊，(就是人若行伊，beh對伊來得tio̍h活ê) ；in犯tio̍h我ê安歇日；我就講，我beh將我ê大受氣piàⁿ tī in ê頂面，tī曠野一盡成我ê受氣攻擊伊。To̍k-to̍k in ê kiáⁿ-jî pōe-ge̍k Góa, bô sūn-thàn Góa ê lu̍t-lē, ia̍h bô siú Góa ê hoat-tō͘ lâi kiâⁿ--i, (chiū-sī lâng nā kiâⁿ--i, beh tùi i lâi tit-tio̍h oa̍h--ê); in hoān-tio̍h Góa ê an-hioh-ji̍t; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī khòng-iá it-chīn chiâⁿ Góa ê siū-khì kong-kek i.

22雖然án-ni，我iáu-kú kiu我ê手，為tio̍h我ê名ê緣故行tāi-chì，免得我ê名受褻瀆tī列邦人ê目睭前，就是hiah-ê看見我chhōa in出埃及ê列邦。Sui-jiân án-ni, Góa iáu-kú kiu Góa ê chhiú, ūi-tio̍h Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-ki̍p ê lia̍t-pang.

23Koh我tī曠野，對in kia̍h起我ê手，講beh分散in tī列國，四散in tī列邦。Koh Góa tī khoàn-iá, tùi in kia̍h-khí Góa ê chhiú, kóng beh hun-sòaⁿ in tī lia̍t-kok, sì-sòaⁿ in tī lia̍t-pang.

24因為in無thàn我ê法度，厭賤我ê律例，犯tio̍h我ê安歇日，目睭意向in老父ê偶像。In-ūi in bô thàn Góa ê hoat-tō͘, iàm-chiān Góa ê lu̍t-lē, hoān-tio̍h Góa ê an-hioh-ji̍t, ba̍k-chiu ì-hiòng in lāu-pē ê ngó͘-siōng.

25Koh我用m̄好ê律例，kap bōe能對伊來得tio̍h活ê法度，hō͘-in。Koh Góa ēng m̄-hó ê lu̍t-lē, kap bōe-ōe tùi i lâi tit-tio̍h oa̍h ê hoat-tō͘, hō͘--in.

26In用一切ê頭chiūⁿ-kiáⁿ經過火；我就tī in ê祭祀kā in phah lâ-sâm，hō͘ in荒廢；hō͘ in知我是耶和華。In ēng it-chhè ê thâu-chiūⁿ-kiáⁿ keng-kè hé; Góa chiū tī in ê chè-sū kā in phah lâ-sâm, hō͘ in hong-hòe; hō͘ in chai Góa sī Iâ-hô-hoa.

27人子ah，你tio̍h對以色列家講話，kā in講，主耶和華án-ni講，Lín ê列祖得罪我，用án-ni褻瀆我。Jîn-chú ah, lí tio̍h tùi Í-sek-lia̍t-ke kóng ōe, kā in kóng, Chú Iâ-hô-hoa án-ni kóng, Lín ê lia̍t-chó͘ tek-chōe Góa, ēng án-ni siat-to̍k Góa.

28因為我chhōa in到我kia̍h起手beh賞賜in ê地；in看見ta̍k-ê高山，ta̍k叢ām ê樹；就tī-hia獻in hiah-ê祭祀，獻激我受氣ê禮物，亦tī-hia燒芳芳ê牲禮，kap灌奠。In-ūi Góa chhōa in kàu Góa kia̍h-khí chhiú beh siúⁿ-sù in ê tōe; in khòaⁿ-kìⁿ ta̍k ê koâiⁿ-soaⁿ, ta̍k-châng ām ê chhiū; chiū tī-hia hiàn in hiah ê chè-sū, hiàn kek Góa siū-khì ê lé-mi̍h, ia̍h tī-hia sio phang-phang ê seng-lé, kap koàn-tiān.

29我就對in講，Lín所上hit-ê高位是甚麼？伊ê名叫做Pa-bâ，直到今á日。Góa chiū tùi in kóng, Lín só͘ chiūⁿ hit ê koâiⁿ-ūi sī sím-mi̍h? i ê miâ kiò-chòe Pa-bâ, ti̍t-kàu kin-á-ji̍t.

30所以你tio̍h對以色列家講，主耶和華án-ni講，Lín猶原照lín列祖所行ê，phah lâ-sâm家己mah？猶原thàn in可惡ê事行淫mah？Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Lín iû-goân chiàu lín lia̍t-chó͘ só͘ kiâⁿ-ê, phah lâ-sâm ka-kī mah? iû-goân thàn in khó-ò͘ⁿ ê sū kiâⁿ-îm mah?

31Lín獻禮物，hō͘ lín ê kiáⁿ經過火ê時，猶原將一切ê偶像phah lâ-sâm家己，到今á日mah？以色列家ah，我kiám beh hō͘ lín問mah？主耶和華講，我kí我ê永活來chiù-chōa，我的確m̄ hō͘你問。Lín hiàn lé-mi̍h, hō͘ lín ê kiáⁿ keng-kè hé ê sî, iû-goân chiong it-chhè ê ngó͘-siōng phah lâ-sâm ka-kī, kàu kin-á-ji̍t mah? Í-sek-lia̍t-ke ah, Góa kiám beh hō͘ lín mn̄g mah? Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa tek-khak m̄ hō͘ lí mn̄g.

32Lín講，阮beh親像外邦人，親像列國ê宗族，去服事柴ê，石ê；lín發起chit號心意，斷斷bōe成。Lín kóng, Goán beh chhin-chhiūⁿ gōa-pang lâng, chhin-chhiūⁿ lia̍t-kok ê chong-cho̍k, khì ho̍k-sāi chhâ-ê, chio̍h-ê; lín hoat-khí chit-hō sim-ì, toàn-toàn bōe chiâⁿ.

33主耶和華講，我kí我ê永活來chiù-chōa，我beh用大權能ê手，kap伸出ê手骨，kap piàⁿ出ê大受氣做lín ê王。Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa beh ēng tōa koân-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì chòe lín ê ông.

34我beh用大權能ê手，kap伸出ê手骨，kap piàⁿ出ê大受氣tùi列邦中chhōa lín出，亦tùi lín四散去hiah-ê國聚集lín。Góa beh ēng tōa koân-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì tùi lia̍t-pang-tiong chhōa lín chhut, ia̍h tùi lín sì-sòaⁿ-khì hiah ê kok chū-chi̍p lín.

35我beh chhōa lín到外邦人ê曠野，tī-hia當面審問lín。Góa beh chhōa lín kàu gōa-pang lâng ê khòng-iá, tī-hia tng-bīn sím-mn̄g lín.

36我àn怎樣tī埃及地ê曠野審問lín ê列祖，亦beh án-ni審問lín；這是主耶和華講ê。Góa àn-cháiⁿ-iūⁿ tī Ai-ki̍p tōe ê khòng-iá sím-mn̄g lín ê lia̍t-chó͘, ia̍h beh án-ni sím-mn̄g lín; che sī Chú Iâ-hô-hoa kóng--ê.

37我beh hō͘ lín經過柺á下，亦beh hō͘ lín受約ê拘束。Góa beh hō͘ lín keng-kè koáiⁿ-á-ē, ia̍h beh hō͘ lín siū iok ê khu-sok.

38我beh tùi lín中間一盡除hiah-ê悖逆kap得罪我ê人；chhōa in出in寄腳ê地方，總是in bōe得入以色列地；lín就知我是耶和華。Góa beh tùi lín tiong-kan it-chīn tû hiah ê pōe-ge̍k kap tek-chōe Góa ê lâng; chhōa in chhut in kià-kha ê tōe-hng, chóng-sī in bōe-tit ji̍p Í-sek-lia̍t tōe; lín chiū chai Góa sī Iâ-hô-hoa.

39以色列家ah，論到lín，主耶和華án-ni講，去ah，ta̍k人服事伊ê偶像，獨獨後來的確beh聽我，無koh用禮物kap偶像褻瀆我ê聖名。Í-sek-lia̍t-ke ah, lūn-kàu lín, Chú Iâ-hô-hoa án-ni kóng, Khì ah, ta̍k-lâng ho̍k-sāi i ê ngó͘-siōng, to̍k-to̍k āu-lâi tek-khak beh thiaⁿ Góa, bô koh ēng lé-mi̍h kap ngó͘-siōng siat-to̍k Góa ê sèng-miâ.

40主耶和華講，Tī我ê聖山，就是以色列高ê山，tī-hia以色列全家ê眾人，beh tī hit-ê地服事我，tī-hia我beh接納lín，tī-hia我beh kā lín討禮物，kap lín起頭熟ê土產，以及lín一切ê聖物。Chú Iâ-hô-hoa kóng, Tī Góa ê sèng-soaⁿ, chiū-sī Í-sek-lia̍t koâiⁿ ê soaⁿ, tī-hia Í-sek-lia̍t choân-ke ê chèng-lâng, beh tī hit ê tōe ho̍k-sāi Góa, tī-hia Góa beh chiap-la̍p lín, tī-hia Góa beh kā lín thó lé-mi̍h, kap lín khí-thâu-se̍k ê thó͘-sán, í-ki̍p lín it-chhè ê sèng-mi̍h.

41我tùi chiah-ê百姓中chhōa lín出，tùi lín四散去ê列國中聚集lín；hit時我beh接納lín親像芳香；我beh tī lín得tio̍h顯明做聖，hō͘外邦人看見。Góa tùi chiah ê peh-sìⁿ-tiong chhōa lín chhut, tùi lín sì-sòaⁿ--khì ê lia̍t-kok-tiong chū-chi̍p lín; hit-sî Góa beh chiap-la̍p lín chhin-chhiūⁿ phang-hiuⁿ; Góa beh tī lín tit-tio̍h hián-bêng chòe-sèng, hō͘ gōa-pang lâng khòaⁿ-kìⁿ.

42我chhōa lín入以色列地，就是我kia̍h起我ê手，講beh賞賜lín列祖ê地，hit時lín就知我是耶和華。Góa chhōa lín ji̍p Í-sek-lia̍t tōe, chiū-sī Góa kia̍h-khí Góa ê chhiú, kóng beh siúⁿ-sù lín lia̍t-chó͘ ê tōe, hit-sî lín chiū chai Góa sī Iâ-hô-hoa.

43Tī-hia lín beh記得lín ê所行所做，就是lín tùi hiah-ê來phah lâ-sâm lín家己ê；koh beh 因為lín所行一切ê pháiⁿ，來家己厭惡。Tī-hia lín beh kì-tit lín ê só͘-kiâⁿ só͘ chòe, chiū-sī lín tùi hiah-ê lâi phah lâ-sâm lín ka-kī--ê; koh beh in-ūi lín só͘ kiâⁿ it-chhè ê pháiⁿ, lâi ka-kī iàm-ò͘ⁿ.

44主耶和華講，以色列家ah，我為tio̍h我ê名ê緣故，無照lín ê pháiⁿ所行，kap lín ê腐敗ê所做款待lín；lín就知我是耶和華。Chú Iâ-hô-hoa kóng, Í-sek-lia̍t-ke ah, Góa ūi-tio̍h Góa ê miâ ê iân-kò͘, bô chiàu lín ê pháiⁿ só͘-kiâⁿ, kap lín ê hú-pāi ê só͘-chòe khoán-thāi lín; lín chiū chai Góa sī Iâ-hô-hoa.

45耶和華ê話臨到我講，Iâ-hô-hoa ê ōe lîm-kàu Góa kóng,

46人子ah，你ê面tio̍h ǹg南方，ǹg南方piàⁿ出話，攻擊南方田野ê樹林來宣傳。Jîn-chú ah, lí ê bīn tio̍h ǹg lâm-hng, ǹg lâm-hng piàⁿ-chhut ōe, kong-kek lâm-hng chhân-iá ê chhiū-nâ lâi soan-thoân.

47Tùi南方ê樹林講，Tio̍h聽耶和華ê話；主耶和華án-ni講，看ah，我beh tī你中間起火，燒你中間一切青翠ê樹，kap枯焦ê樹；猛烈ê火燄，的確無熄；tùi南到北，ta̍k面lóng受燒。Tùi lâm-hng ê chhiū-nâ kóng, Tio̍h thiaⁿ Iâ-hô-hoa ê ōe; Chú Iâ-hô-hoa án-ni kóng, Khòaⁿ ah, Góa beh tī lí tiong kan khí hé, sio lí tiong-kan it-chhè chhiⁿ-chhùi ê chhiū, kap ko͘-tâ ê chhiū; béng-lia̍t ê hé-iām, tek-khak bô sit; tùi lâm kàu pak, ta̍k-bīn lóng siū sio.

48凡若有血氣ê，lóng beh知起火ê，是我耶和華。Hoān-nā ū hiat-khì--ê, lóng beh chai khí-hé--ê, sī Góa Iâ-hô-hoa.

49Tùi án-ni，我講，Hāiⁿ ah，主耶和華ah，人lóng議論我講，伊kiám m̄是teh講譬喻？Tùi án-ni góa kóng, Hāiⁿ ah, Chú Iâ-hô-hoa ah, lâng lóng gī-lūn góa kóng, I kiám m̄-sī teh kóng phì-jū?

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h面ǹg耶路撒冷，ǹg hiah-ê聖所piàⁿ出話攻擊以色列地來宣傳。Jîn-chú ah, lí tio̍h bīn ǹg Iâ-lō͘-sat-léng, ǹg hiah ê sèng-só͘ piàⁿ-chhut ōe kong-kek Í-sek-lia̍t tōe lâi soan-thoân.

3對以色列地講，耶和華án-ni講，看ah，我beh抵敵你，亦beh拔我ê刀出伊ê鞘；tùi你ê中間剪除義人pháiⁿ人。Tùi Í-sek-lia̍t tōe kóng, Iâ-hô-hoa án-ni kóng, Khòaⁿ ah, Góa beh tí-te̍k lí, ia̍h beh pu̍ih Góa ê to chhut i ê siù; tùi lí ê tiong-kan chián-tû gī-lâng pháiⁿ-lâng.

4我既然beh對你中間剪除義人kap pháiⁿ人，所以我ê刀beh出伊ê鞘，tùi南到北，攻擊一切有血氣ê。Góa kì-jiân beh tùi lí tiong-kan chián-tû gī-lâng kap pháiⁿ-lâng, só͘-í Góa ê to beh chhut i ê siù, tùi lâm kàu pak, kong-kek it-chhè ū hiat-khì-ê.

5一切有血氣ê就知我耶和華已經拔刀出伊ê鞘，的確無koh收入。It-chhè ū hiat-khì-ê chiū chai Góa Iâ-hô-hoa í-keng pu̍ih to chhut i ê siù, tek-khak bô koh siu-ji̍p.

6人子ah，你tio̍h吐氣，腰骨折，痛苦；吐氣tī in ê面前。Jîn-chú ah, lí tio̍h thó͘-khùi, io-kut chi̍h, thòng-khó͘; thó͘-khùi tī in ê bīn-chêng.

7In問你講，你啥事吐氣？你就tio̍h講，因為有風聲tāi-chì beh來，人ê心lóng beh消溶，手lóng酸軟，精神衰敗，腳頭u軟弱親像水；看ah，chit-ê事teh來，的確會成；這是主耶和華講ê。In mn̄g lí kóng, Lí siáⁿ-sū thó͘-khùi? lí chiū tio̍h kóng, In-ūi ū hong-siaⁿ tāi-chì beh lâi, lâng ê sim lóng beh siau-iûⁿ, chhiú lóng sng-nńg, cheng-sîn soe-pāi, kha-thâu-u loán-jio̍k chhin-chhiūⁿ chúi; khòaⁿ ah, chit ê sū teh lâi, tek-khak ōe chiâⁿ; che sī Chú Iâ-hô-hoa kóng--ê.

8耶和華ê話臨到我講，Iâ-hô-hoa ê ōe lîm-kàu góa kóng,

9人子ah，你tio̍h宣傳講，耶和華án-ni講，你tio̍h講，有刀，有刀，是磨利lù光 ê。Jîn-chú ah, lí tio̍h soan-thoân kóng, Iâ-hô-hoa án-ni kóng, Lí tio̍h kóng, Ū to, ū to, sī bôa-lāi lù-kng ê.

10磨利是beh thâi人，lù光是beh親像sih-nà；咱kiám thang歡喜mah？我ê kiáⁿ ê柺á藐視眾樹木。Bôa-lāi sī beh thâi lâng, lù-kng sī beh chhin-chhiūⁿ sih-nà; lán kiám thang hoaⁿ-hí mah? Góa ê kiáⁿ ê koáiⁿ-á biáu-sī chèng chhiū-ba̍k.

11Chit支刀已經交hō͘人lù光，thang hō͘人ê手kia̍h伊；伊已經磨利lù光，thang交tī thâi人ê ê手。Chit ki to í-keng kau hō͘ lâng lù-kng, thang hō͘ lâng ê chhiú kia̍h--i; i í-keng bôa-lāi lù-kng, thang kau tī thâi-lâng--ê ê chhiú.

12人子ah，你tio̍h hoah，喉叫；因為chit-ê臨到我ê百姓，kap以色列一切ê貴族；in kap我ê百姓lóng交tī刀下，所以你tio̍h搭大腿。Jîn-chú ah, lí tio̍h hoah, âu-kiò; in-ūi chit ê lîm-kàu Góa ê peh-sìⁿ, kap Í-sek-lia̍t it-chhè ê kùi-cho̍k; in kap Góa ê peh-sìⁿ lóng kau tī to-ē, só͘-í lí tio̍h tah tōa-thúi.

13有試驗ê事；若hit-ê藐視ê柺á歸tī無，beh àn怎樣ah？這是主耶和華講ê。Ū chhì-giām ê sū; nā hit ê biáu-sī ê koáiⁿ-á kui tī bô, beh àn-cháiⁿ-iūⁿ ah? che sī Chú Iâ-hô-hoa kóng--ê.

14人子ah，你tio̍h tah手宣傳，chit支刀tio̍h三pái加倍，就是hō͘人tio̍h重傷ê刀，亦是hō͘大人tio̍h重傷ê刀，入tī密房ê。Jîn-chú ah, lí tio̍h tah chhiú soan-thoân, chit ki to tio̍h saⁿ-pái ka-pē, chiū-sī hō͘ lâng tio̍h tāng-siong ê to, ia̍h sī hō͘ tāi-jîn tio̍h tāng-siong ê to, ji̍p tī ba̍t-pâng--ê.

15我備辦hō͘人驚ê刀，攻擊in一切ê城門；hō͘ in ê心消溶，加添in跋倒ê事；hāiⁿ ah，chit支刀chhòng到親像sih-nà，磨到真利，beh thâi死人。Góa pī-pān hō͘ lâng kiaⁿ ê to, kong-kek in it-chhè ê siâⁿ-mn̂g; hō͘ in ê sim siau-iûⁿ, ke-thiⁿ in poa̍h-tó ê sū; hāiⁿ ah, chit ki to chhòng kàu chhin-chhiūⁿ sih-nà, bôa kàu chin-lāi, beh thâi-sí lâng.

16你tio̍h合óa，ǹg chiàⁿ-pêng；排陣，ǹg tò-pêng；chhut-chāi你ê面ǹg toh-lo̍h，就ǹg hia。Lí tio̍h ha̍p-óa, ǹg chiàⁿ-pêng; pâi-tīn, ǹg tò-pêng; chhut-chāi lí ê bīn ǹg toh-lo̍h, chiū ǹg hia.

17我亦beh搭手，亦beh hō͘我ê大受氣soah；這是我耶和華講ê。Góa ia̍h beh tah-chhiú, ia̍h beh hō͘ Góa ê tōa siū-khì soah; che sī Góa Iâ-hô-hoa kóng--ê.

18耶和華ê話koh臨到我講，Iâ-hô-hoa ê ōe koh lîm-kàu góa kóng,

19人子ah，你tio̍h為tio̍h本身設兩條路，thang hō͘巴比倫王ê刀劍tùi hia來；chit兩條路tio̍h tùi一所在分出；koh tio̍h畫一支手，畫tī透到城ê路頭。Jîn-chú ah, lí tio̍h ūi-tio̍h pún-sin siat nn̄g tiâu lō͘, thang hō͘ Pa-pí-lûn ông ê to-kiàm tùi hia lâi; chí nn̄g tiâu lō͘ tio̍h tùi chi̍t só͘-chāi pun-chhut; koh tio̍h ūi chi̍t ki chhiú, ūi tī thàu-kàu siâⁿ ê lō͘-thâu.

20你tio̍h設一條路，hō͘刀來到A-bûn人ê La̍h-pa，也thang到猶大堅固ê城耶路撒冷。Lí tio̍h siat chi̍t tiâu lō͘, hō͘ to lâi kàu A-bûn lâng ê La̍h-pa, iā thang kàu Iû-tāi kian-kò͘ ê siâⁿ Iâ-lō͘-sat-léng.

21因為巴比倫王khiā tī 雙叉路hia，tī兩條路頭beh占卜，伊ê搖箭；問偶像，驗牲禮ê官。In-ūi Pa-pí-lûn ông khiā tī siang-chhe lō͘ hia, tī nn̄g tiâu lō͘-thâu beh chiam-pok, i ê iô chìⁿ; mn̄g ngó͘-siōng, giām seng-lé ê koaⁿ.

22Tī伊ê chiàⁿ手，有占卜去耶路撒冷ê箭；設羊頭錘，開嘴hoah thâi，大聲喉叫，設羊頭錘，攻擊城門，起土堆，造台。Tī i ê chiàⁿ-chhiú, ū chiam-pok khì Iâ-lō͘-sat-léng ê chìⁿ; siat iûⁿ-thâu-thûi, khui-chhùi hoah thâi, tōa-siaⁿ âu-kiò, siat iûⁿ-thâu-khûi, kong-kek siâⁿ-mn̂g, khí thô͘-tui, chō-tâi.

23Hiah-ê bat對in chiù-chōa ê人看伊做假ê占卜；總是伊beh hō͘人記得in ê pháiⁿ，致到in眾人受掠。Hiah ê bat tùi in chiù-chōa ê lâng khòaⁿ i chòe ké ê chiam-pok; chóng-sī i beh hō͘ lâng kì-tit in ê pháiⁿ, tì-kàu in chèng-lâng siū-lia̍h.

24所以主耶和華án-ni講，因為lín ê過失露現，hō͘ lín ê罪過tú-tio̍h記得，致到lín ê罪惡tī lín ê行做lóng顯出；koh 因為lín受記得，beh hō͘人ê手所掠。Só͘-í Chú Iâ-hô-hoa án-ni kóng, In-ūi lín ê kè-sit lō͘-hiān, hō͘ lín ê chōe-kòa tú-tio̍h kì-tit, tì-kàu lín ê chōe-ok tī lín ê kiâⁿ-chòe lóng hián-chhut; koh in-ūi lín siū kì-tit, beh hō͘ lâng ê chhiú só͘ lia̍h.

25你chit ê受重傷行pháiⁿ ê以色列王ah，你ê罪惡灌滿，你ê日子到lah。Lí chit ê siū tāng-siong kiâⁿ-pháiⁿ ê Í-sek-lia̍t ông ah, lí ê chōe-ok koàn-móa, lí ê ji̍t-chí kàu lah.

26主耶和華án-ni講，Tio̍h除去王帽，liù冕旒，無koh有chit號景況；taⁿ beh hō͘低ê 升高，高ê降低。Chú Iâ-hô-hoa án-ni kóng, Tio̍h tû-khì ông-bō, liù bián-liû, bô koh ū chit hō kéng-hóng; taⁿ beh hō͘ kē--ê seng koâiⁿ, koâiⁿ-ê kàng-kē.

27我beh chhia倒，chhia倒，chhia倒伊；無koh有chit-ê，thèng候應該得tio̍h-ê到，我就hō͘伊。Góa beh chhia-tó, chhia-tó, chhia-tó--i; bô koh ū chit-ê, thèng-hāu eng-kai tit-tio̍h--ê kàu, Góa chiū hō͘--i.

28人子ah，你tio̍h宣傳講，主耶和華論到A-bûn人，kap in ê侮慢，有án-ni講；你tio̍h講，有刀，有拔出ê刀，已經lù光，beh thâi死人；hō͘伊親像sih-nà beh吞滅人。Jîn-chú ah, lí tio̍h soan-thoân kóng, Chú Iâ-hô-hoa lūn-kàu A-bûn lâng, kap in ê bú-bān, ū án-ni kóng; lí tio̍h kóng, Ū to, ū pu̍ih-chhut ê to, í-keng lù-kng, beh thâi-sí lâng; hō͘ i chhin-chhiūⁿ sih-nà beh thun-bia̍t lâng.

29人為tio̍h你看虛假ê異象，行白賊ê占卜；將你hē tī受重傷pháiⁿ人ê頷頸；in ê罪惡灌滿，in ê日子到lah。Lâng ūi-tio̍h lí khòaⁿ hu-ké ê īⁿ-siōng, kiâⁿ pe̍h-chha̍t ê chiam-pok; chiong lí hē tī siū tāng-siong pháiⁿ-lâng ê ām-kún; in ê chōe-ok koàn-móa, in ê ji̍t-chí kàu lah.

30Hō͘刀入鞘，我beh tī你受造ê位，生長ê地，審判你。Hō͘ to ji̍p siù, Góa beh tī lí siū-chō ê ūi, seng-tióng ê tōe, sím-phòaⁿ lí.

31我beh將我ê痛恨piàⁿ tī你ê身上，將我大受氣ê火pûn tī你；交你tī殘忍gâu thâi人ê ê手。Góa beh chiong Góa ê thòng-hūn piàⁿ tī lí ê sin-chiūⁿ, chiong Góa tōa siū-khì ê hé pûn tī lí; kau lí tī chân-jím gâu thâi-lâng--ê ê chhiú.

32你beh做hiâⁿ火ê柴，你ê血beh流tī chit-ê地方，你無koh得tio̍h記念；因為這是我耶和華講ê。Lí beh chòe hiâⁿ-hé ê chhâ, lí ê huih beh lâu tī chit ê tōe-hng, lí bô koh tit-tio̍h kì-liām; in-ūi che sī Góa Iâ-hô-hoa kóng--ê.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你beh審問，審問hō͘人流血ê城mah？tio̍h hō͘伊知伊一切可惡ê事。Jîn-chú ah, lí beh sím-mn̄g, sím-mn̄g hō͘ lâng lâu huih ê siâⁿ mah? tio̍h hō͘ i chai i it-chhè khó-ò͘ⁿ ê sū.

3你tio̍h講，主耶和華án-ni講，chit-ê城，有流人ê血tī hit內面，hō͘伊ê日子到；koh妝偶像phah lâ-sâm家己，陷害家己。Lí tio̍h kóng, Chú Iâ-hô-hoa án-ni kóng, Chit ê siâⁿ, ū lâu lâng ê huih tī hit lāi-bīn, hō͘ i ê ji̍t-chí kàu; koh chng ngó͘-siōng phah lâ-sâm ka-kī, hām-hāi ka-kī.

4因為你hō͘人流血，就有罪；你妝偶像是phah lâ-sâm家己；就你hō͘你ê日近，你已經到你ê年；所以我hō͘你受列國ê凌辱，列邦ê恥笑。In-ūi lí hō͘ lâng lâu huih, chiū ū chōe; lí chng ngó͘-siōng sī phah lâ-sâm ka-kī; chiū lí hō͘ lí ê ji̍t kūn, lí í-keng kàu lí ê nî; só͘-í Góa hō͘ lí siū lia̍t-kok ê lêng-jio̍k, lia̍t-pang ê thí-chhiò.

5你chit-ê臭名chōe-chōe擾亂ê城ah！hiah-ê離開你近，離開你遠ê，lóng beh恥笑你。Lí chit-ê chhàu-miâ chōe-chōe jiáu-loān ê siâⁿ ah! hiah-ê lī-khui lí kūn, lī-khui lí hn̄g--ê, lóng beh thí-chhiò lí.

6看ah，以色列ê首領，ta̍k-ê逞伊氣力，tī你中間流人ê血。Khòaⁿ ah, Í-sek-lia̍t ê siú-léng, ta̍k-ê théng i khùi-la̍t, tī lí tiong-kan lâu lâng ê huih.

7Tī你中間有侮慢父母；tī你中間有壓制出外人；tī你中間有虧負孤兒寡婦ê。Tī lí tiong-kan ū bú-bān pē-bú; tī lí tiong-kan ū ap-chè chhut-gōa lâng; tī lí tiong-kan ū khui-hū ko͘-jî kóaⁿ-hū--ê.

8你看輕我ê聖物，犯tio̍h我ê安歇日。Lí khòaⁿ-khin Góa ê sèng-mi̍h, hoān-tio̍h Góa ê an-hioh-ji̍t.

9Tī lín中間有譭謗人，beh hō͘人流血ê；tī lín中間有tī山頂食祭物，tī lín中間有行淫亂。Tī lín tiong-kan ū húi-pòng lâng, beh hō͘ lâng lâu huih--ê; tī lín tiong-kan ū tī soaⁿ-téng chia̍h chè-mi̍h, tī lín tiong-kan ū kiâⁿ îm-loān.

10Tī lín中間有露現老父ê下體；tī lín中間有凌辱月經無清氣ê婦人人ê。Tī lín tiong-kan ū lō͘-hiān lāu-pē ê ē-thé; tī lín tiong-kan ū lêng-jio̍k ge̍h-keng bô chheng-khì ê hū-jîn-lâng--ê.

11有人kap厝邊ê bó͘行可惡ê事；也有人淫伊ê新婦來phah lâ-sâm伊；tī lín中間亦有人凌辱伊ê姊妹，就是伊ê老父ê cha-bó͘-kiáⁿ。Ū lâng kap chhù-piⁿ ê bó͘ kiâⁿ khó-ò͘ⁿ ê sū; iā ū lâng îm i ê sim-pū lâi phah lâ-sâm--i; tī lín tiong-kan ia̍h ū lâng lêng-jio̍k i ê chí-bē, chiū-sī i ê lāu-pē ê cha-bó͘-kiáⁿ.

12Tī lín中間有受pò͘賂，來流人ê血，你亦有the̍h利錢，討利息；你因為貪心，勒索厝邊，得tio̍h財利；竟然bōe記得我；這是主耶和華講ê。Tī lín tiong-kan ū siū pò͘-lō͘, lâi lâu lâng ê huih, lí ia̍h ū the̍h lāi-chîⁿ, thó lī-sek; lí in-ūi tham-sim, le̍k-sek chhù-piⁿ, tit-tio̍h châi-lī; kéng-jiân bōe-kì-tit Góa; che sī Chú Iâ-hô-hoa kóng--ê.

13看ah，我因為你所得不義ê錢，kap你中間所流ê血，我就phah手。Khòaⁿ ah, Góa in-ūi lí só͘ tit put-gī ê chîⁿ, kap lí tiong-kan só͘ lâu ê huih, Góa chiū phah-chhiú.

14到我辦你ê日，你ê心iáu ōe忍受mah？你ê手iáu ōe有力mah？我耶和華講chit-ê話，就beh照án-ni行。Kàu Góa pān lí ê ji̍t, lí ê sim iáu ōe jím-siū mah? lí ê chhiú iáu ōe ū la̍t mah? Góa Iâ-hô-hoa kóng chit ê ōe, chiū beh chiàu án-ni kiâⁿ.

15我beh分散你tī列國，四散你tī列邦；我beh除你中間ê污穢。Góa beh hun-sòaⁿ lí tī lia̍t-kok, sì-sòaⁿ lí tī lia̍t-pang; Góa beh tû lí tiong-kan ê ù-òe.

16你beh tī列國人ê面前，因為家己所行ê，受褻瀆；你就知我是耶和華。Lí beh tī lia̍t-kok lâng ê bīn-chêng, in-ūi ka-kī só͘ kiâⁿ--ê, siū siat-to̍k; lí chiū chai Góa sī Iâ-hô-hoa.

17耶和華ê話臨到我講，Iâ-hô-hoa ê ōe lîm-kàu góa kóng,

18人子ah，以色列家在我看是渣滓；in lóng是火爐中ê銅，錫，鐵，鉛；是銀ê渣滓。Jîn-chú ah, Í-sek-lia̍t-ke chāi Góa khòaⁿ sī che-tái; in lóng sī hé-lô͘-tiong ê tâng, siah, thih, iân; sī gûn ê che-tái.

19所以主耶和華án-ni講，因為lín lóng成做渣滓；看ah，我beh聚集lín tī耶路撒冷ê中間。Só͘-í Chú Iâ-hô-hoa án-ni kóng, In-ūi lín lóng chiâⁿ-chòe che-tái; khòaⁿ ah, Góa beh chū-chi̍p lín tī Iâ-lō͘-sat-léng ê tiong-kan.

20人怎樣將銀，銅，鐵，鉛，錫，聚集tī火爐中；牽火hō͘伊熔；án-ni我亦beh用我ê受氣，kap大受氣，聚集lín，hē lín tī-hia，來熔化lín。Lâng cháiⁿ-iūⁿ chiong gûn, tâng, thih, iân, siah, chū-chi̍p tī hé-lô͘-tiong; khan-hé hō͘ i iûⁿ; án-ni Góa ia̍h beh ēng Góa ê siū-khì, kap tōa siū-khì, chū-chi̍p lín, hē lín tī-hia, lâi iûⁿ-hòa lín.

21我beh聚集lín，用我大受氣ê火pûn lín，lín就tī hit中間熔化。Góa beh chū-chi̍p lín, ēng Góa tōa siū-khì ê hé pûn lín, lín chiū tī hit tiong-kan iûⁿ-hòa.

22銀怎樣熔tī火爐中，lín亦beh án-ni熔tī hit中間；lín就知我耶和華piàⁿ出我ê大受氣tī lín ê頂面。Gûn cháiⁿ-iūⁿ iûⁿ tī hé-lô͘-tiong, lín ia̍h beh án-ni iûⁿ tī hit tiong-kan; lín chiū chai Góa Iâ-hô-hoa piàⁿ-chhut Góa ê tōa siū-khì tī lín ê téng-bīn.

23耶和華ê話臨到我講，Iâ-hô-hoa ê ōe lîm-kàu góa kóng,

24人子ah，你tio̍h對chit-ê地講，你是bē得tio̍h清氣ê地，tī大受氣ê日，亦無落雨tī你hia。Jîn-chú ah, lí tio̍h tùi chit ê tōe kóng, Lí sī bē tit-tio̍h chheng-khì ê tōe, tī tōa siū-khì ê ji̍t, ia̍h bô lo̍h-hō͘ tī lí hia.

25伊中間ê先知lóng結黨，親像hm̄-hm̄哮ê獅，抓tio̍h所搶ê物，in吞食人ê神魂，搶人ê貨財寶物；hō͘ in ê中間ê守寡人koh khah-chōe。I tiong-kan ê sian-ti lóng kiat-tóng, chhin-chhiūⁿ hm̄-hm̄-háu ê sai, jiàu-tio̍h só͘ chhiúⁿ ê mi̍h, in thun-chia̍h lâng ê sîn-hûn, chhiúⁿ lâng ê hè-châi pó-mi̍h; hō͘ in ê tiong-kan ê chiú-kóaⁿ-lâng koh khah-chōe.

26伊ê祭司解斜我ê律法，褻瀆我ê聖所，無分別聖ê kap粗俗ê，亦無hō͘人分別無清氣ê，kap清氣ê；koh掩目睭m̄看我chiah-ê安歇日，我亦tī in中間受褻瀆。I ê chè-si kóe-chhoa̍h Góa ê lu̍t-hoat, siat-to̍k Góa ê sèng-só͘, bô hun-piat sèng-ê kap chho͘-sio̍k-ê, ia̍h bô hō͘ lâng hun-piat bô chheng-khì--ê, kap chheng-khì--ê; koh ng ba̍k-chiu m̄ khòaⁿ Góa chiah ê an-hioh-ji̍t, Góa ia̍h tī in tiong-kan siū siat-to̍k.

27伊ê貴族親像豺狼，抓tio̍h所搶ê物，thâi人流血，傷害人ê性命，ài得tio̍h不義ê錢。I ê kùi-cho̍k chhin-chhiūⁿ chhâi-lông, jiàu-tio̍h só͘ chhiúⁿ ê mi̍h, thâi lâng lâu huih, siong-hāi lâng ê sìⁿ-miā, ài tit-tio̍h put-gī ê chîⁿ.

28伊ê先知親像用灰水kā in筅白，看虛假ê異象，用白賊kā in占卜，講，主耶和華án-ni講，其實耶和華無影講。I ê sian-ti chhin-chhiūⁿ ēng he-chúi kā in chhéng-pe̍h, khòaⁿ hu-ké ê īⁿ-siōng, ēng pe̍h-chha̍t kā in chiam-pok, kóng, Chú Iâ-hô-hoa án-ni kóng, kî-si̍t Iâ-hô-hoa bô-iáⁿ kóng.

29國內ê百姓一味行壓制慣練搶人；虧負sòng-hiong困苦ê，無情理欺壓出外人。Kok-lāi ê peh-sìⁿ it-bī kiâⁿ ap-chè koàn-liān chhiúⁿ lâng; khui-hū sòng-hiong khùn-khó͘--ê, bô chêng-lí khi-ap chhut-gōa lâng.

30我tī in中間chhē看有一人thang來圍牆，tī我ê面前為tio̍h chit-ê國khiā tī破隙ê所在，hō͘我無剿滅伊；總是chhē無一個。Góa tī in tiong-kan chhē-khòaⁿ ū chi̍t-lâng thang lâi ûi-chhiûⁿ, tī Góa ê bīn-chêng ūi-tio̍h chit ê kok khiā tī phòa-khiah ê só͘-chāi, hō͘ góa bô châu-bia̍t i; chóng-sī chhē bô chi̍t-ê.

31所以我用我ê痛恨piàⁿ tī in ê頂面，用我大受氣ê火滅in；照in所行ê，報應tī in ê頭殼頂；這是主耶和華講ê。Só͘-í Góa ēng Góa ê thòng-hūn piàⁿ tī in ê téng-bīn, ēng Góa tōa siū-khì ê hé bia̍t--in; chiàu in só͘ kiâⁿ--ê, pò-èng tī in ê thâu-khak-téng; che sī Chú Iâ-hô-hoa kóng--ê.