1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你beh審問，審問hō͘人流血ê城mah？tio̍h hō͘伊知伊一切可惡ê事。Jîn-chú ah, lí beh sím-mn̄g, sím-mn̄g hō͘ lâng lâu huih ê siâⁿ mah? tio̍h hō͘ i chai i it-chhè khó-ò͘ⁿ ê sū.

3你tio̍h講，主耶和華án-ni講，chit-ê城，有流人ê血tī hit內面，hō͘伊ê日子到；koh妝偶像phah lâ-sâm家己，陷害家己。Lí tio̍h kóng, Chú Iâ-hô-hoa án-ni kóng, Chit ê siâⁿ, ū lâu lâng ê huih tī hit lāi-bīn, hō͘ i ê ji̍t-chí kàu; koh chng ngó͘-siōng phah lâ-sâm ka-kī, hām-hāi ka-kī.

4因為你hō͘人流血，就有罪；你妝偶像是phah lâ-sâm家己；就你hō͘你ê日近，你已經到你ê年；所以我hō͘你受列國ê凌辱，列邦ê恥笑。In-ūi lí hō͘ lâng lâu huih, chiū ū chōe; lí chng ngó͘-siōng sī phah lâ-sâm ka-kī; chiū lí hō͘ lí ê ji̍t kūn, lí í-keng kàu lí ê nî; só͘-í Góa hō͘ lí siū lia̍t-kok ê lêng-jio̍k, lia̍t-pang ê thí-chhiò.

5你chit-ê臭名chōe-chōe擾亂ê城ah！hiah-ê離開你近，離開你遠ê，lóng beh恥笑你。Lí chit-ê chhàu-miâ chōe-chōe jiáu-loān ê siâⁿ ah! hiah-ê lī-khui lí kūn, lī-khui lí hn̄g--ê, lóng beh thí-chhiò lí.

6看ah，以色列ê首領，ta̍k-ê逞伊氣力，tī你中間流人ê血。Khòaⁿ ah, Í-sek-lia̍t ê siú-léng, ta̍k-ê théng i khùi-la̍t, tī lí tiong-kan lâu lâng ê huih.

7Tī你中間有侮慢父母；tī你中間有壓制出外人；tī你中間有虧負孤兒寡婦ê。Tī lí tiong-kan ū bú-bān pē-bú; tī lí tiong-kan ū ap-chè chhut-gōa lâng; tī lí tiong-kan ū khui-hū ko͘-jî kóaⁿ-hū--ê.

8你看輕我ê聖物，犯tio̍h我ê安歇日。Lí khòaⁿ-khin Góa ê sèng-mi̍h, hoān-tio̍h Góa ê an-hioh-ji̍t.

9Tī lín中間有譭謗人，beh hō͘人流血ê；tī lín中間有tī山頂食祭物，tī lín中間有行淫亂。Tī lín tiong-kan ū húi-pòng lâng, beh hō͘ lâng lâu huih--ê; tī lín tiong-kan ū tī soaⁿ-téng chia̍h chè-mi̍h, tī lín tiong-kan ū kiâⁿ îm-loān.

10Tī lín中間有露現老父ê下體；tī lín中間有凌辱月經無清氣ê婦人人ê。Tī lín tiong-kan ū lō͘-hiān lāu-pē ê ē-thé; tī lín tiong-kan ū lêng-jio̍k ge̍h-keng bô chheng-khì ê hū-jîn-lâng--ê.

11有人kap厝邊ê bó͘行可惡ê事；也有人淫伊ê新婦來phah lâ-sâm伊；tī lín中間亦有人凌辱伊ê姊妹，就是伊ê老父ê cha-bó͘-kiáⁿ。Ū lâng kap chhù-piⁿ ê bó͘ kiâⁿ khó-ò͘ⁿ ê sū; iā ū lâng îm i ê sim-pū lâi phah lâ-sâm--i; tī lín tiong-kan ia̍h ū lâng lêng-jio̍k i ê chí-bē, chiū-sī i ê lāu-pē ê cha-bó͘-kiáⁿ.

12Tī lín中間有受pò͘賂，來流人ê血，你亦有the̍h利錢，討利息；你因為貪心，勒索厝邊，得tio̍h財利；竟然bōe記得我；這是主耶和華講ê。Tī lín tiong-kan ū siū pò͘-lō͘, lâi lâu lâng ê huih, lí ia̍h ū the̍h lāi-chîⁿ, thó lī-sek; lí in-ūi tham-sim, le̍k-sek chhù-piⁿ, tit-tio̍h châi-lī; kéng-jiân bōe-kì-tit Góa; che sī Chú Iâ-hô-hoa kóng--ê.

13看ah，我因為你所得不義ê錢，kap你中間所流ê血，我就phah手。Khòaⁿ ah, Góa in-ūi lí só͘ tit put-gī ê chîⁿ, kap lí tiong-kan só͘ lâu ê huih, Góa chiū phah-chhiú.

14到我辦你ê日，你ê心iáu ōe忍受mah？你ê手iáu ōe有力mah？我耶和華講chit-ê話，就beh照án-ni行。Kàu Góa pān lí ê ji̍t, lí ê sim iáu ōe jím-siū mah? lí ê chhiú iáu ōe ū la̍t mah? Góa Iâ-hô-hoa kóng chit ê ōe, chiū beh chiàu án-ni kiâⁿ.

15我beh分散你tī列國，四散你tī列邦；我beh除你中間ê污穢。Góa beh hun-sòaⁿ lí tī lia̍t-kok, sì-sòaⁿ lí tī lia̍t-pang; Góa beh tû lí tiong-kan ê ù-òe.

16你beh tī列國人ê面前，因為家己所行ê，受褻瀆；你就知我是耶和華。Lí beh tī lia̍t-kok lâng ê bīn-chêng, in-ūi ka-kī só͘ kiâⁿ--ê, siū siat-to̍k; lí chiū chai Góa sī Iâ-hô-hoa.

17耶和華ê話臨到我講，Iâ-hô-hoa ê ōe lîm-kàu góa kóng,

18人子ah，以色列家在我看是渣滓；in lóng是火爐中ê銅，錫，鐵，鉛；是銀ê渣滓。Jîn-chú ah, Í-sek-lia̍t-ke chāi Góa khòaⁿ sī che-tái; in lóng sī hé-lô͘-tiong ê tâng, siah, thih, iân; sī gûn ê che-tái.

19所以主耶和華án-ni講，因為lín lóng成做渣滓；看ah，我beh聚集lín tī耶路撒冷ê中間。Só͘-í Chú Iâ-hô-hoa án-ni kóng, In-ūi lín lóng chiâⁿ-chòe che-tái; khòaⁿ ah, Góa beh chū-chi̍p lín tī Iâ-lō͘-sat-léng ê tiong-kan.

20人怎樣將銀，銅，鐵，鉛，錫，聚集tī火爐中；牽火hō͘伊熔；án-ni我亦beh用我ê受氣，kap大受氣，聚集lín，hē lín tī-hia，來熔化lín。Lâng cháiⁿ-iūⁿ chiong gûn, tâng, thih, iân, siah, chū-chi̍p tī hé-lô͘-tiong; khan-hé hō͘ i iûⁿ; án-ni Góa ia̍h beh ēng Góa ê siū-khì, kap tōa siū-khì, chū-chi̍p lín, hē lín tī-hia, lâi iûⁿ-hòa lín.

21我beh聚集lín，用我大受氣ê火pûn lín，lín就tī hit中間熔化。Góa beh chū-chi̍p lín, ēng Góa tōa siū-khì ê hé pûn lín, lín chiū tī hit tiong-kan iûⁿ-hòa.

22銀怎樣熔tī火爐中，lín亦beh án-ni熔tī hit中間；lín就知我耶和華piàⁿ出我ê大受氣tī lín ê頂面。Gûn cháiⁿ-iūⁿ iûⁿ tī hé-lô͘-tiong, lín ia̍h beh án-ni iûⁿ tī hit tiong-kan; lín chiū chai Góa Iâ-hô-hoa piàⁿ-chhut Góa ê tōa siū-khì tī lín ê téng-bīn.

23耶和華ê話臨到我講，Iâ-hô-hoa ê ōe lîm-kàu góa kóng,

24人子ah，你tio̍h對chit-ê地講，你是bē得tio̍h清氣ê地，tī大受氣ê日，亦無落雨tī你hia。Jîn-chú ah, lí tio̍h tùi chit ê tōe kóng, Lí sī bē tit-tio̍h chheng-khì ê tōe, tī tōa siū-khì ê ji̍t, ia̍h bô lo̍h-hō͘ tī lí hia.

25伊中間ê先知lóng結黨，親像hm̄-hm̄哮ê獅，抓tio̍h所搶ê物，in吞食人ê神魂，搶人ê貨財寶物；hō͘ in ê中間ê守寡人koh khah-chōe。I tiong-kan ê sian-ti lóng kiat-tóng, chhin-chhiūⁿ hm̄-hm̄-háu ê sai, jiàu-tio̍h só͘ chhiúⁿ ê mi̍h, in thun-chia̍h lâng ê sîn-hûn, chhiúⁿ lâng ê hè-châi pó-mi̍h; hō͘ in ê tiong-kan ê chiú-kóaⁿ-lâng koh khah-chōe.

26伊ê祭司解斜我ê律法，褻瀆我ê聖所，無分別聖ê kap粗俗ê，亦無hō͘人分別無清氣ê，kap清氣ê；koh掩目睭m̄看我chiah-ê安歇日，我亦tī in中間受褻瀆。I ê chè-si kóe-chhoa̍h Góa ê lu̍t-hoat, siat-to̍k Góa ê sèng-só͘, bô hun-piat sèng-ê kap chho͘-sio̍k-ê, ia̍h bô hō͘ lâng hun-piat bô chheng-khì--ê, kap chheng-khì--ê; koh ng ba̍k-chiu m̄ khòaⁿ Góa chiah ê an-hioh-ji̍t, Góa ia̍h tī in tiong-kan siū siat-to̍k.

27伊ê貴族親像豺狼，抓tio̍h所搶ê物，thâi人流血，傷害人ê性命，ài得tio̍h不義ê錢。I ê kùi-cho̍k chhin-chhiūⁿ chhâi-lông, jiàu-tio̍h só͘ chhiúⁿ ê mi̍h, thâi lâng lâu huih, siong-hāi lâng ê sìⁿ-miā, ài tit-tio̍h put-gī ê chîⁿ.

28伊ê先知親像用灰水kā in筅白，看虛假ê異象，用白賊kā in占卜，講，主耶和華án-ni講，其實耶和華無影講。I ê sian-ti chhin-chhiūⁿ ēng he-chúi kā in chhéng-pe̍h, khòaⁿ hu-ké ê īⁿ-siōng, ēng pe̍h-chha̍t kā in chiam-pok, kóng, Chú Iâ-hô-hoa án-ni kóng, kî-si̍t Iâ-hô-hoa bô-iáⁿ kóng.

29國內ê百姓一味行壓制慣練搶人；虧負sòng-hiong困苦ê，無情理欺壓出外人。Kok-lāi ê peh-sìⁿ it-bī kiâⁿ ap-chè koàn-liān chhiúⁿ lâng; khui-hū sòng-hiong khùn-khó͘--ê, bô chêng-lí khi-ap chhut-gōa lâng.

30我tī in中間chhē看有一人thang來圍牆，tī我ê面前為tio̍h chit-ê國khiā tī破隙ê所在，hō͘我無剿滅伊；總是chhē無一個。Góa tī in tiong-kan chhē-khòaⁿ ū chi̍t-lâng thang lâi ûi-chhiûⁿ, tī Góa ê bīn-chêng ūi-tio̍h chit ê kok khiā tī phòa-khiah ê só͘-chāi, hō͘ góa bô châu-bia̍t i; chóng-sī chhē bô chi̍t-ê.

31所以我用我ê痛恨piàⁿ tī in ê頂面，用我大受氣ê火滅in；照in所行ê，報應tī in ê頭殼頂；這是主耶和華講ê。Só͘-í Góa ēng Góa ê thòng-hūn piàⁿ tī in ê téng-bīn, ēng Góa tōa siū-khì ê hé bia̍t--in; chiàu in só͘ kiâⁿ--ê, pò-èng tī in ê thâu-khak-téng; che sī Chú Iâ-hô-hoa kóng--ê.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，有兩個婦人人，是siâng一個老母生ê。Jîn-chú ah, ū nn̄g ê hū-jîn-lâng, sī siâng chi̍t ê lāu-bú siⁿ--ê.

3In tī埃及行淫，就是tī少年ê時行淫；tī-hia in ê奶hō͘人teh，koh tī-hia人ni̍h伊在室女ê奶頭。In tī Ai-ki̍p kiâⁿ-îm, chiū-sī tī siàu-liân ê sî kiâⁿ-îm; tī-hia in ê ni hō͘ lâng teh, koh tī-hia lâng ni̍h i chāi-sek-lú ê ni-thâu.

4In ê名，大姊名A-hô-la̍h，小妹名A-hô-lī-pa；in lóng嫁hō͘我，生kiáⁿ cha-bó͘-kiáⁿ；論到in ê名，A-hô-la̍h就是撒馬利亞，A-hô-lī-pa就是耶路撒冷。In ê miâ, tōa-chí miâ A-hô-la̍h, sió-bē miâ A-hô-lī-pa; in lóng kè hō͘ Góa, siⁿ kiáⁿ cha-bó͘-kiáⁿ; lūn-kàu in ê miâ, A-hô-la̍h chiū-sī Sat-má-lī-a, A-hô-lī-pa chiū-sī Iâ-lō͘-sat-léng.

5A-hô-la̍h嫁hō͘我了後，就行淫亂，戀愛伊 相好ê人，就是伊ê隔壁國亞述人。A-hô-la̍h kè hō͘ Góa liáu-āu, chiū kiâⁿ îm-loān, loân-ài i siong-hó ê lâng, chiū-sī i ê keh-piah kok A-su̍t lâng.

6In穿藍色ê衫，做省長，做官員，lóng是可愛ê少年人，騎馬ê勇士。In chhēng lâm-sek ê saⁿ, chòe séng-tiúⁿ, chòe koaⁿ-oân, lóng sī khó-ài ê siàu-liân lâng, khiâ-bé ê ióng-sū.

7伊就kap in行淫，就是kap伊所中意ê亞述人；見若伊所戀愛ê，就用in一切ê偶像來phah lâ-sâm家己。I chiū kap in kiâⁿ-îm, chiū-sī kap i só͘ tèng-ì ê A-su̍t lâng; kìⁿ-nā i só͘ loân-ài--ê, chiū ēng in it-chhè ê ngó͘-siōng lâi phah lâ-sâm ka-kī.

8伊亦無放sak伊tī埃及慣練行ê淫亂；因為伊iáu少年ê時，就有人kap伊相kap睏；ni̍h伊在室女ê奶，koh流出伊淫亂ê事tī-hia。I ia̍h bô pàng-sak i tī Ai-ki̍p koàn-liān kiâⁿ ê îm-loān; in-ūi i iáu siàu-liân ê sî, chiū ū lâng kap i saⁿ-kap khùn; ni̍h i chāi-sek-lú ê ni, koh lâu-chhut i îm-loān ê sū tī-hia.

9因為án-ni，我將伊交tī伊相好ê人ê手，就是伊所戀愛ê亞述人ê手。In-ūi án-ni, Góa chiong i kau tī i siong-hó ê lâng ê chhiú, chiū-sī i só͘ loân-ài ê A-su̍t lâng ê chhiú.

10In就露現伊ê下體，用刀thâi伊，掠伊ê kiáⁿ cha-bó͘-kiáⁿ，hō͘伊tī婦人人中留臭名；因為in對伊行審判。In chiū lō͘-hiān i ê ē-thé, ēng to thâi--i, lia̍h i ê kiáⁿ cha-bó͘-kiáⁿ, hō͘ i tī hū-jîn-lâng tiong lâu chhàu miâ; in-ūi in tùi i kiâⁿ sím-phòaⁿ.

11伊ê小妹A-hô-lī-pa看見án-ni，就比伊koh khah放縱淫慾；行淫亂，比伊ê大姊khah傷重。I ê sió-bē A-hô-lī-pa khòaⁿ-kìⁿ án-ni, chiū pí i koh khah hòng-chhiòng îm-io̍k; kiâⁿ îm-loān, pí i ê tōa-chí khah siong-tiōng.

12伊戀愛隔壁國ê亞述人，就是穿極súi ê衣服，做省長，做官員；騎馬ê勇士，lóng是可愛ê少年人。I loân-ài keh-piah kok ê A-su̍t lâng, chiū-sī chhēng ke̍k-súi ê i-ho̍k, chòe séng-tiúⁿ, chòe koaⁿ-oân; khiâ-bé ê ióng-sū, lóng sī khó-ài ê siàu-liân lâng.

13我看見伊受phah lâ-sâm，姊妹á兩個行siâng路。Góa khòaⁿ-kìⁿ i siū phah lâ-sâm, chí-bē-á nn̄g-ê kiâⁿ siâng-lō͘.

14伊亦加添伊ê淫行，因為伊看見人ê像位tī壁裡，就是用朱紅色所畫Ka-le̍k-tí人ê像。I ia̍h ke-thiⁿ i ê îm-hēng, in-ūi i khòaⁿ-kìⁿ lâng ê siōng ūi tī piah--nih, chiū-sī ēng chu-âng-sek só͘ ūi Ka-le̍k-tí lâng ê siōng.

15腰hâ帶，頭殼包彩色ê根垂落來；看了親像軍長，照巴比倫人ê形象；in ê本所在就是Ka-le̍k-tí。Io hâ tòa, thâu-khak pau chhái-sek ê kun sûi-lo̍h--lâi; khòaⁿ-liáu chhin-chhiūⁿ kun-tiúⁿ, chiàu Pa-pí-lûn lâng ê hêng-siōng; in ê pún só͘-chāi chiū-sī Ka-le̍k-tí.

16伊一下看見，就戀愛in；差使者去Ka-le̍k-tí hia，見in。I chi̍t-ē khòaⁿ-kìⁿ, chiū loân-ài in; chhe sù-chiá khì Ka-le̍k-tí hia, kìⁿ in.

17巴比倫人就來，kap伊上愛情ê眠床，行淫，phah lâ-sâm伊。伊受phah lâ-sâm以後，心就kap in冷淡。Pa-pí-lûn lâng chiū lâi, kap i chiūⁿ ài-chêng ê bîn-chhn̂g, kiâⁿ îm, phah lâ-sâm i. I siū phah lâ-sâm í-āu, sim chiū kap in léng-tām.

18Án-ni，伊露現伊ê淫行，koh露現伊ê下體，我ê心就kap伊冷淡，親像前kap伊ê大姊冷淡一樣。Án-ni, i lō͘-hiān i ê îm-hēng, koh lō͘-hiān i ê ē-thé, Góa ê sim chiū kap i léng-tām, chhin-chhiūⁿ chêng kap i ê tōa-chí léng-tām chi̍t-iūⁿ.

19伊iáu-kú koh-khah淫行，記得伊少年tī埃及地，行淫亂ê日；I iáu-kú koh-khah îm-hēng, kì-tit i siàu-liân tī Ai-ki̍p tōe, kiâⁿ îm-loān ê ji̍t;

20戀愛伊相好ê人，身體勇，精足，親像驢，親像馬。loân-ài i siong-hó ê lâng, sin-thé ióng, cheng chiok, chhin-chhiūⁿ lû, chhin-chhiūⁿ bé.

21Án-ni你就記得你少年ê時ê淫行；hit時埃及人teh你ê奶，憶tio̍h你少年ê奶。Án-ni lí chiū kì-tit lí siàu-liân ê sî ê îm-hēng; hit-sî Ai-ki̍p lâng teh lí ê ni, it-tio̍h lí siàu-liân ê ni.

22A-hô-lī-pa ah，主耶和華所以án-ni講，看ah，我beh激動你chiah-ê相好ê，來攻擊你，就是你ê心所冷淡ê，我beh hō͘伊四圍來攻擊你。A-hô-lī-pa ah, Chú Iâ-hô-hoa só͘-í án-ni kóng, Khòaⁿ ah, Góa beh kek-tōng lí chiah ê siong-hó-ê, lâi kong-kek lí, chiū-sī lí ê sim só͘ léng-tām--ê, Góa beh hō͘ i sì-ûi lâi kong-kek lí.

23就是巴比倫人，Ka-le̍k-tí眾人，kap Pí-kat，Su-a，Ko-a，chiah-ê族。亞述ê眾人kap in來，省長，官員，軍長，有名聲ê，騎馬ê，lóng是可愛ê少年人。Chiū-sī Pa-pí-lûn lâng, Ka-le̍k-tí chèng lâng, kap Pí-kat, Su-a, Ko-a, chiah ê cho̍k. A-su̍t ê chèng-lâng kap in lâi, séng-tiúⁿ, koaⁿ-oân, kun-tiúⁿ, ū miâ-siaⁿ--ê, khiâ-bé ê, lóng sī khó-ài ê siàu-liân lâng.

24In beh帶軍器、戰車、運糧ê車，chhōa大隊ê眾人來攻擊你；in giâ大牌小牌、頭盔、排陣tī你ê四圍攻擊你；我beh將審判ê事交代in，in beh用in ê律法審判你。In beh tòa kun-khì, chiàn-chhia, ūn-niû ê chhia, chhōa tōa-tūi ê chèng-lâng lâi kong-kek lí; in giâ tōa-pâi sió-pâi, thâu-khoe, pâi-tīn tī lí ê sì-ûi kong-kek lí; Góa beh chiong sím-phòaⁿ ê sū kau-tài in, in beh ēng in ê lu̍t-hoat sím-phòaⁿ lí.

25我beh用我ê妒忌攻擊你；in beh用大受氣辦你；in beh割你ê鼻kap耳á；你所chhun ê人，beh倒tī刀下；in beh掠你ê kiáⁿ cha-bó͘-kiáⁿ；koh你所留ê beh hō͘火燒lio去。Góa beh ēng Góa ê tò͘-khī kong-kek lí; in beh ēng tōa siū-khì pān lí; in beh koah lí ê phīⁿ kap hī-á; lí só͘ chhun ê lâng, beh tó tī to-ē; in beh lia̍h lí ê kiáⁿ cha-bó͘-kiáⁿ; koh lí só͘-lâu--ê beh hō͘ hé sio-lio--khì.

26In beh剝你ê衣服，搶你súi ê寶物。In beh pak lí ê i-ho̍k, chhiúⁿ lí súi ê pó-mi̍h.

27Án-ni，我beh hō͘你ê淫行，kap你tī埃及地慣練行ê淫亂lóng soah；hō͘你無koh kia̍h目看in，亦無koh記念埃及。Án-ni, Góa beh hō͘ lí ê îm-hēng, kap lí tī Ai-ki̍p tōe koàn-liān kiâⁿ ê îm-loān lóng soah; hō͘ lí bô koh kia̍h-ba̍k khòaⁿ--in, ia̍h bô koh kì-liām Ai-ki̍p.

28因為主耶和華án-ni講，看ah，我beh將你交tī你所怨恨ê人ê手，就是你ê心kap in冷淡ê人ê手。In-ūi Chú Iâ-hô-hoa án-ni kóng, Khòaⁿ ah, Góa beh chiong lí kau tī lí só͘ oàn-hūn ê lâng ê chhiú, chiū-sī lí ê sim kap in léng-tām ê lâng ê chhiú.

29In beh怨恨來辨理，搶the̍h你一切勞碌來得tio̍h-ê；chhun你一個赤身露體；你淫亂ê下體，連你ê淫行，kap你ê淫亂，lóng beh露現。In beh oàn-hūn lâi pān--lí, chhiúⁿ-the̍h lí it-chhè lô-lo̍k lâi tit-tio̍h--ê; chhun lí chi̍t-ê chhiah-sin lō͘-thé; lí îm-loān ê ē-thé, liân lí ê îm-hēng, kap lí ê îm-loān, lóng beh lō͘-hiān.

30你會tú-tio̍h hiah-ê tāi-chì，因為你tè外邦人來行淫；koh因為你tùi in chiah-ê偶像來bak lâ-sâm。Lí ōe tú-tio̍h hiah ê tāi-chì, in-ūi lí tè gōa-pang lâng lâi kiâⁿ-îm; koh in-ūi lí tùi in chiah ê ngó͘-siōng lâi bak lâ-sâm.

31你有行你ê大姊ê路，所以我beh將伊ê杯交tī你ê手。Lí ū kiâⁿ lí ê tōa-chí ê lō͘, só͘-í Góa beh chiong i ê poe kau tī lí ê chhiú.

32主耶和華án-ni講，你beh lim你ê大姊所lim ê杯；hit-ê杯深koh闊，tóe真chōe；你就beh hō͘人恥笑譏刺。Chú Iâ-hô-hoa án-ni kóng, Lí beh lim lí ê tōa-chí só͘ lim ê poe; hit ê poe chhim koh khoah, tóe chin-chōe; lí chiū beh hō͘ lâng thí-chhiò ki-chhì.

33你beh大酒醉，大憂苦；lim lín大姊撒馬利亞ê杯；就是hō͘人gông-ngia̍h悽慘ê杯。Lí beh tōa chiú-chùi, tōa iu-khó͘; lim lín tōa-chí Sat-má-lī-a ê poe; chiū-sī hō͘ lâng gông-ngia̍h chhiⁿ-chhám ê poe.

34你beh lim chit-ê杯，lim到乾乾；koh kā破杯ê帕，拆裂家己ê奶；因為chit-ê事我bat講伊；這是主耶和華講ê。Lí beh lim chit ê poe, lim kàu ta-ta; koh kā phòa-poe ê phè, thiah-li̍h ka-kī ê ni; in-ūi chit ê sū Góa bat kóng--i; che sī Chú Iâ-hô-hoa kóng--ê.

35所以主耶和華án-ni講，因為你bōe記得我，將我hiat tī你ê ka-chiah後，taⁿ你tio̍h擔當你ê淫亂kap你放縱私慾ê罪。Só͘-í Chú Iâ-hô-hoa án-ni kóng, In-ūi lí bōe-kì-tit Góa, chiong Góa hiat tī lí ê ka-chiah-āu, taⁿ lí tio̍h tam-tng lí ê îm-loān kap lí hòng-chhiòng su-io̍k ê chōe.

36耶和華koh對我講，人子ah，你beh審問A-hô-la̍h kap A-hô-lī-pa mah？tio̍h指出in所行可惡ê事。Iâ-hô-hoa koh tùi góa kóng, Jîn-chú ah, lí beh sím-mn̄g A-hô-la̍h kap A-hô-lī-pa mah? tio̍h chí-chhut in só͘ kiâⁿ khó-ò͘ⁿ ê sū.

37In行淫，亦有血tī伊ê手，koh kap偶像行淫，亦hō͘ in tùi我所生ê kiáⁿ經過火，hō͘ in吞食。In kiâⁿ-îm, ia̍h ū huih tī i ê chhiú, koh kap ngó͘-siōng kiâⁿ-îm, ia̍h hō͘ in tùi Góa só͘ siⁿ ê kiáⁿ keng-kè hé, hō͘ in thun-chia̍h.

38Chit-ê以外in iáu有對我án-ni行，就是siâng日phah lâ-sâm我ê聖所，干犯我chiah-ê安歇日。Chit ê í-gōa in iáu ū tùi Góa án-ni kiâⁿ, chiū-sī siâng-ji̍t phah lâ-sâm Góa ê sèng-só͘, kan-hoān Góa chiah ê an-hioh-ji̍t.

39In thâi kiáⁿ獻hō͘偶像，當hit日koh入我ê聖所，來phah lâ-sâm伊；看ah，in tī我ê厝內án-ni行。In thâi kiáⁿ hiàn hō͘ ngó͘-siōng, tng hit-ji̍t koh ji̍p Góa ê sèng-só͘, lâi phah lâ-sâm--i; khòaⁿ ah, in tī Góa ê chhù-lāi án-ni kiâⁿ.

40Koh lín差使者去請遠遠ê人；使者到in hia ê時，看ah，in就來；你為tio̍h in洗身軀，畫目眉，用首飾家己裝飾；Koh lín chhe sù-chiá khì chhiáⁿ hn̄g-hn̄g ê lâng; sù-chiá kàu in hia ê sî, khòaⁿ ah, in chiū lâi; lí ūi-tio̍h in sóe sin-khu, ūi ba̍k-bâi, ēng chhiú-sek ka-kī chng-thāⁿ;

41坐tī súi ê眠床，床前chhāi一塊桌，將我ê香料，我ê香油排tī hit頂面。chē tī súi ê bîn-chhn̂g, chhn̂g-chêng chhāi chi̍t tè toh, chiong Góa ê hiuⁿ-liāu, Góa ê hiuⁿ-iû pâi tī hit téng-bīn.

42Kap伊tī-hia-ê，有kui陣ê人，安逸歡喜ê聲，亦有粗俗人kap酒漢，tùi曠野相kap來，將手環掛tī in兩個ê手，將súi帽戴tī in ê頭殼。Kap i tī-hia--ê, ū kui-tīn ê lâng, an-ia̍t hoaⁿ-hí ê siaⁿ, ia̍h ū chho͘-sio̍k lâng kap chiú-hàn, tùi khòng-iá saⁿ-kap lâi, chiong chhiú-khoân kòa tī in nn̄g-ê ê chhiú, chiong súi bō tì tī in ê thâu-khak.

43我論到chit-ê老ê淫婦，有講，現在人iáu beh kap伊行淫，伊亦beh kap人行淫。Góa lūn-kàu chit ê lāu ê îm-hū, ū kóng, Hiān-chāi lâng iáu beh kap i kiâⁿ îm, i ia̍h beh kap lâng kiâⁿ-îm.

44人入去就近伊，親像就近娼妓；án-ni in就近兩個淫婦，A-hô-la̍h kap A-hô-lī-pa。Lâng ji̍p-khì chiū-kūn i, chhin-chhiūⁿ chiū-kūn chhiong-ki; án-ni in chiū-kūn nn̄g ê îm-hū, A-hô-la̍h kap A-hô-lī-pa.

45Beh有義人照審判淫婦ê例，kap流人ê血ê婦人人ê例，來審判in；因為in是淫婦，亦有血tī伊ê手。Beh ū gī-lâng chiàu sím-phòaⁿ îm-hū ê lē, kap lâu lâng ê huih ê hū-jîn-lâng ê lē, lâi sím-phòaⁿ in; in-ūi in sī îm-hū, ia̍h ū huih tī i ê chhiú.

46主耶和華án-ni講，我beh chhōa chōe-chōe人來攻擊in，hō͘ in受hiat來hiat去，tú-tio̍h搶奪。Chú Iâ-hô-hoa án-ni kóng, Góa beh chhōa chōe-chōe lâng lâi kong-kek in, hō͘ in siū hiat-lâi hiat-khì, tú-tio̍h chhiúⁿ-toa̍t.

47Hiah-ê人beh用石頭tìm死in，用刀劍thâi死in；koh thâi死in ê kiáⁿ cha-bó͘-kiáⁿ，用火燒in ê厝宅。Hiah ê lâng beh ēng chio̍h-thâu tìm-sí in, ēng to-kiàm thâi-sí in; koh thâi-sí in ê kiáⁿ cha-bó͘-kiáⁿ, ēng hé sio in ê chhù-the̍h.

48Án-ni，我beh hō͘境內無koh有淫行，thang hō͘一切ê婦人人受警戒，無學lín ê淫行。Án-ni, Góa beh hō͘ kéng-lāi bô koh ū îm-hēng, thang hō͘ it-chhè ê hū-jîn-lâng siū kéng-kài, bô o̍h lín ê îm-hēng.

49人beh照lín ê淫行報應lín；lín也beh擔當chiah-ê拜偶像ê罪；lín就會知我是耶和華。Lâng beh chiàu lín ê îm-hēng pò-èng lín; lín iā beh tam-tng chiah-ê pài ngó͘-siōng ê chōe; lín chiū ōe chai Góa sī Iâ-hô-hoa.

1第九年十月初十日，耶和華ê話koh臨到我，講，Tē káu-nî cha̍p-ge̍h chhoe-cha̍p ji̍t, Iâ-hô-hoa ê ōe koh lîm-kàu góa, kóng,

2人子ah，今á日tú-tú是巴比倫王就近耶路撒冷ê日，你tio̍h將今á日記伊ê名。Jîn-chú ah, kin-á-ji̍t tú-tú sī Pa-pí-lûn ông chiū-kūn Iâ-lō͘-sat-léng ê ji̍t, lí tio̍h chiong kin-á-ji̍t kì i ê miâ.

3Tio̍h對chit-ê悖逆ê家設譬喻，講，主耶和華án-ni講，將鼎chhāi tī火裡；已經chhāi好，就piàⁿ水tī內面，Tio̍h tùi chit ê pōe-ge̍k ê ke siat phì-jū, kóng, Chú Iâ-hô-hoa án-ni kóng, Chiong tiáⁿ chhāi tī hé--nih; í-keng chhāi hó, chiū piàⁿ chúi tī lāi-bīn,

4將肉塊，就是一切肥súi ê肉塊，前腿後腿，lóng拾hē tī內面；揀好ê骨疊hō͘伊滿。chiong bah-tè, chiū-sī it-chhè pûi-súi ê bah-tè, chêng-thúi āu-thúi, lóng khioh hē tī lāi-bīn; kéng hó ê kut thia̍p hō͘ i móa.

5取羊群中第一好ê，將柴疊tī鼎下，hō͘鼎滾chhiāng-chhiāng[chhiâng-chhiâng]，thang將骨kûn tī hit內面。Chhú iûⁿ-kûn-tiong tē-it hó--ê, chiong chhâ thia̍p tī tiáⁿ-ē, hō͘ tiáⁿ kún chhiāng-chhiāng[chhiâng-chhiâng], thang chiong kut kûn tī hí lāi-bīn.

6主耶和華án-ni講，有災厄ah，chit-ê hō͘人流血ê城，就是生sian ê鼎，伊ê sian iáu未除去，tio̍h將肉塊tùi hit中間一塊一塊the̍h出來；無kā伊liam-khau。Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, chiū-sī siⁿ sian ê tiáⁿ, i ê sian iáu-bē tû--khì, tio̍h chiong bah-tè tùi hit tiong-kan chi̍t-tè chi̍t-tè the̍h-chhut-lâi; bô kā i liam-khau.

7城中有受thâi ê人ê血，piàⁿ tī光光ê石磐頂，無piàⁿ tī地裡，thang用土蓋。Siâⁿ-tiong ū siū-thâi ê lâng ê huih, piàⁿ tī kng-kng ê chio̍h-pôaⁿ-téng, bô piàⁿ tī tōe--nih, thang ēng thô͘ khàm.

8Chit-ê城內所流ê血，piàⁿ tī光光ê石磐頂，無thang遮蓋，是我hō͘伊án-ni；為tio̍h beh激大受氣，行報應。Chit ê siâⁿ-lāi só͘ lâu ê huih, piàⁿ tī kng-kng ê chio̍h-pôaⁿ-téng, bô thang jia-khàm, sī Góa hō͘ i án-ni; ūi-tio̍h beh kek tōa siū-khì, kiâⁿ pò-èng.

9所以主耶和華án-ni講，有災厄ah，chit-ê hō͘人流血ê城，我亦beh疊大堆ê火柴。Só͘-í Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, Góa ia̍h beh thia̍p tōa-tui ê hé-chhâ.

10添柴hō͘火真燄，將肉kûn爛，將湯熬khó，hō͘骨hu-lu去。Thiⁿ-chhâ hō͘ hé chin iām, chiong bah kûn nōa, chiong thng ngâu khó, hō͘ kut hu-lu--khì.

11將鼎，piàⁿ空，chhāi tī teh to̍h ê炭頂，hō͘鼎pek熱，hō͘銅燒紅，熔其中ê污穢，除hit頂面ê sian。Chiong tiáⁿ, piàⁿ khang, chhāi tī teh to̍h ê thòaⁿ-téng, hō͘ tiáⁿ pek-jia̍t, hō͘ tâng sio âng, iûⁿ kî-tiong ê ù-òe, tû hit téng-bīn ê sian.

12伊tio̍h磨厭倦，總是所生大大ê sian，猶原無lak；伊ê sian就爁tī火裡，亦bōe除去。I tio̍h-bôa ià-siān, chóng-sī só͘ siⁿ tōa-tōa ê sian, iû-goân bô lak; i ê sian chiū nā tī hé--nih, ia̍h bōe tû-khì.

13Tī你ê污穢中有淫行，我bat清氣你，你iáu-kú無清氣；所以你ê污穢bōe koh得tio̍h清氣，到我對你發出ê大受氣soah。Tī lí ê ù-òe tiong ū îm-hēng, Góa bat chheng-khì lí, lí iáu-kú bô chheng-khì; só͘-í lí ê ù-òe bōe koh tit-tio̍h chheng-khì, kàu Góa tùi lí hoat-chhut ê tōa siū-khì soah.

14我耶和華bat講伊；hit-ê事的確成，我也beh行伊，的確無反覆，的確無憐憫，亦無退悔；人beh照你ê舉動，照你ê行做審判你；這是主耶和華講ê。Góa Iâ-hô-hoa bat kóng--i; hit ê sū tek-khak chiâⁿ, Góa iā beh kiâⁿ--i, tek-khak bô hoán-hok, tek-khak bô lîn-bín, ia̍h bô thè-hóe; lâng beh chiàu lí ê kú-tōng, chiàu lí ê kiâⁿ-chòe sím-phòaⁿ lí; che sī Chú Iâ-hô-hoa kóng--ê.

15耶和華ê話koh臨到我講，Iâ-hô-hoa ê ōe koh lîm-kàu góa kóng,

16人子ah，看ah，我beh將你ê目睭所意愛ê忽然取去；總是你m̄-thang悲哀啼哭，亦m̄-thang流目屎。Jîn-chú ah, khòaⁿ ah, Góa beh chiong lí ê ba̍k-chiu só͘ ì-ài--ê hut-jiân chhú--khì; chóng-sī lí m̄-thang pi-ai thî-khàu, ia̍h m̄-thang lâu ba̍k-sái.

17獨獨thang暗靜吐氣，m̄-thang出聲，m̄-thang辨理喪事，頭殼猶原tio̍h包頭巾，腳猶原tio̍h穿鞋，m̄-thang掩你ê嘴唇，也m̄-thang食弔喪ê餅。To̍k-to̍k thang àm-chīⁿ thó͘-khùi, m̄-thang chhut-siaⁿ, m̄-thang pān-lí song-sū, thâu-khak iû-goân tio̍h pau thâu-kun, kha iû-goân tio̍h chhēng-ôe, m̄-thang ng lí ê chhùi-tûn, iā m̄-thang chia̍h tiàu-song ê piáⁿ.

18Tùi án-ni，我將chit-ê事早起時kā百姓講；ê-hng我ê bó͘就死；隔早起，我就thàn命令來行。Tùi án-ni, góa chiong chit ê sū chá-khí-sî kā peh-sìⁿ kóng; ê-hng góa ê bó͘ chiū sí; keh chá-khí, góa chiū thàn bēng-lēng lâi kiâⁿ.

19百姓問我講，你án-ni做，kap阮有甚麼干涉？你thái-thó無kā阮講？Peh-sìⁿ mn̄g góa kóng, Lí án-ni chòe, kap goán ū sím-mi̍h kan-sia̍p? lí thái-thó bô kā goán kóng?

20我應in講，耶和華ê話臨到我講，Góa ìn in kóng, Iâ-hô-hoa ê ōe lîm-kàu góa kóng,

21你tio̍h kā以色列家講，主耶和華án-ni講，看ah，我beh phah lâ-sâm我ê聖所，就是lín ê勢力所誇口，lín ê目睭所意愛，lín ê心所疼惜ê；koh lín所留tī-hia ê kiáⁿ cha-bó͘-kiáⁿ beh倒tī刀下。Lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Khòaⁿ ah, Góa beh phah lâ-sâm Góa ê sèng-só͘, chiū-sī lín ê sè-le̍k só͘ khoa-kháu, lín ê ba̍k-chiu só͘ ì-ài, lín ê sim só͘ thiàⁿ-sioh--ê; koh lín só͘ lâu tī-hia ê kiáⁿ cha-bó͘-kiáⁿ beh tó tī to-ē.

22Hit時，lín beh照我所行ê來行，無掩lín ê嘴唇，亦無食弔喪ê餅。Hit-sî, lín beh chiàu góa só͘ kiâⁿ--ê lâi kiâⁿ, bô ng lín ê chhùi-tûn, ia̍h bô chia̍h tiàu-song ê piáⁿ.

23Lín ê頭殼猶原包頭巾，腳beh穿鞋，無悲哀，無啼哭；lín beh tī lín ê罪惡中消滅，相對面吐氣。Lín ê thâu-khak iû-goân pau thâu-kun, kha beh chhēng ôe, bô pi-ai, bô thî-khàu; lín beh tī lín ê chōe-ok tiong siau-bia̍t, saⁿ tùi-bīn thó͘-khùi.

24以西結beh án-ni做lín ê兆頭，凡若伊所行ê，lín亦beh án-ni行，chit-ê tāi-chì若到，lín就知我是耶和華。Í-se-kiat beh án-ni chòe lín ê tiāu-thâu, hoān-nā i só͘ kiâⁿ--ê, lín ia̍h beh án-ni kiâⁿ, chit ê tāi-chì nā kàu, lín chiū chai Góa sī Iâ-hô-hoa.

25人子ah，當我除去in所óa靠ê，kap in所歡喜ê榮光，in ê目睭所意愛ê，in ê心所疼惜ê，就是in ê kiáⁿ兒，Jîn-chú ah, tng Góa tû-khì in só͘ óa-khò ê, kap in só͘ hoaⁿ-hí ê êng-kng, in ê ba̍k-chiu só͘ ì-ài--ê, in ê sim só͘ thiàⁿ-sioh--ê, chiū-sī in ê kiáⁿ-jî,

26Hit日得tio̍h脫離ê人kiám無來你chia，hō͘你親耳聽見chit-ê事mah？hit-ji̍t tit-tio̍h thoat-lī ê lâng kiám bô lâi lí chia, hō͘ lí chhin-hī thiaⁿ-kìⁿ chit ê sū mah?

27當hit日，你ê嘴就開，你就kap得tio̍h脫離ê人講話，無koh啞口；你beh án-ni做in ê兆頭；in就知我是耶和華。Tng hit-ji̍t, lí ê chhùi chiū khui, lí chiū kap tit-tio̍h thoat-lī ê lâng kóng-ōe, bô koh é-káu; lí beh án-ni chòe in ê tiāu-thâu; in chiū chai Góa sī Iâ-hô-hoa.