1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h面ǹg A-bûn族，宣傳攻擊in，講，Lín tio̍h聽主耶和華ê話；Jîn-chú ah, lí tio̍h bīn ǹg A-bûn cho̍k, soan-thoân kong-kek in, kóng, Lín tio̍h thiaⁿ Chú Iâ-hô-hoa ê ōe;

3主耶和華án-ni講，我ê聖所受phah lâ-sâm，以色列地tú-tio̍h拋荒，猶大家hō͘人掠；hit時你因為chiah-ê事，用話攻擊in講，呼哉！Chú Iâ-hô-hoa án-ni kóng, Góa ê sèng-só͘ siū phah lâ-sâm, Í-sek-lia̍t tōe tú-tio̍h pha-hng, Iû-tāi-ke hō͘ lâng lia̍h; hit-sî lí in-ūi chiah ê sū, ēng ōe kong-kek in kóng, Hō͘--chāi!

4看ah，所以我beh將你交hō͘東方ê人做業；in beh tī你ê所在紮營khiā起，食你ê果子，lim你ê leng。Khòaⁿ ah, só͘-í Góa beh chiong lí kau hō͘ tang-hng ê lâng chòe-gia̍p; in beh tī lí ê só͘-chāi chat-iâⁿ khiā-khí, chia̍h lí ê ké-chí, lim lí ê leng.

5我beh hō͘ La̍h-pa做駱駝ê寮，hō͘ A-bûn族ê地做羊群倒ê所在；lín就知我是耶和華。Góa beh hō͘ La̍h-pa chòe lo̍k-tô ê tiâu, hō͘ A-bûn cho̍k ê tōe chòe iûⁿ-kûn tó ê só͘-chāi; lín chiū chai Góa sī Iâ-hô-hoa.

6主耶和華án-ni講，因為你搭手頓腳，滿心藐視，ǹg以色列地歡喜；Chú Iâ-hô-hoa án-ni kóng, In-ūi lí tah-chhiú tǹg-kha, móa-sim biáu-sī, ǹg Í-sek-lia̍t tōe hoaⁿ-hí;

7看ah，所以我伸我ê手攻擊你，將你交hō͘列國搶去；我beh tùi列邦中剪除你，hō͘你tī萬國中敗無；我beh除滅你；你就知我是耶和華。khòaⁿ ah, só͘-í Góa chhun Góa ê chhiú kong-kek lí, chiong lí kau hō͘ lia̍t-kok chhiúⁿ--khì; Góa beh tùi lia̍t-pang-tiong chián-tû lí, hō͘ lí tī bān-kok-tiong pāi-bô; Góa beh tû-bia̍t lí; lí chiū chai Góa sī Iâ-hô-hoa.

8主耶和華án-ni講，因為Mô͘-ap kap Se-jíⁿ有teh講，看ah，猶大家kap眾國無各樣；Chú Iâ-hô-hoa án-ni kóng, In-ūi Mô͘-ap kap Se-jíⁿ ū teh kóng, Khòaⁿ ah, Iû-tāi-ke kap chèng-kok bô koh-iūⁿ;

9看ah，因為án-ni，我beh開 Mô͘-ap ê邊界tùi chiah-ê城，tùi伊邊界chiah-ê城，做伊本國ê榮光ê，就是Pek-iâ-se-boa̍t，Pa-le̍k-bián，Ki-lia̍t-têng，khòaⁿ ah, in-ūi án-ni, Góa beh khui Mô͘-ap ê pian-kài tùi chiah ê siâⁿ, tùi i pian-kài chiah ê siâⁿ, chòe i pún-kok ê êng-kng--ê, chiū-sī Pek-iâ-se-boa̍t, Pa-le̍k-bián, Ki-lia̍t-têng,

10Hō͘伊kap A-bûn族lóng交tī東方ê百姓做業，hō͘ A-bûn族無koh受記念tī列邦中。hō͘ i kap A-bûn cho̍k lóng kau tī tang-hng ê peh-sìⁿ chòe-gia̍p, hō͘ A-bûn cho̍k bô koh siū kì-liām tī lia̍t-pang-tiong.

11我也beh審判Mô͘-ap；in就知我是耶和華。Góa iā beh sím-phòaⁿ Mô͘-ap; in chiū chai Góa sī Iâ-hô-hoa.

12主耶和華án-ni講，因為Í-tong ê所行，就是攻擊猶大家來報仇，tùi in ê報仇來犯重罪；Chú Iâ-hô-hoa án-ni kóng, In-ūi Í-tong ê só͘-kiâⁿ, chiū-sī kong-kek Iû-tāi-ke lâi pò-siû, tùi in ê pò-siû lâi hoān tāng-chōe;

13所以主耶和華án-ni講，我beh伸我ê手攻擊Í-tong，剪除in hia ê人kap cheng-siⁿ；hō͘伊拋荒tùi Thê-bān；到Tí-tàn人lóng死tī刀下。só͘-í Chú Iâ-hô-hoa án-ni kóng, Góa beh chhun Góa ê chhiú kong-kek Í-tong, chián-tû in hia ê lâng kap cheng-siⁿ; hō͘ i pha-hng tùi Thê-bān; kàu Tí-tàn lâng lóng sí tī to-ē.

14Koh我beh用我ê百姓以色列ê手，來報我ê仇讎tī Í-tong；in beh照我ê受氣，照我ê大受氣，來行tī Í-tong；就in beh知我ê報仇；這是主耶和華講ê。Koh Góa beh ēng Góa ê peh-sìⁿ Í-sek-lia̍t ê chhiú, lâi pò Góa ê kiû-siû tī Í-tong; in beh chiàu Góa ê siū-khì, chiàu Góa ê tōa siū-khì, lâi kiâⁿ tī Í-tong; chiū in beh chai Góa ê pò-siû; che sī Chú Iâ-hô-hoa kóng--ê.

15主耶和華án-ni講，因為腓利士人行報仇，存心藐視來報仇，結死怨 beh剿滅in；Chú Iâ-hô-hoa án-ni kóng, In-ūi Hui-lī-sū lâng kiâⁿ pò-siû, chûn-sim biáu-sī lâi pò-siû, kiat sí-oàn beh châu-bia̍t--in;

16所以主耶和華án-ni講，看ah，我beh伸我ê手攻擊腓利士人；我beh剪除Ki-thê人，滅無沿海所chhun ê百姓。só͘-í Chú Iâ-hô-hoa án-ni kóng, Khòaⁿ ah, Góa beh chhun Góa ê chhiú kong-kek Hui-lī-sū lâng; Góa beh chián-tû Ki-thê lâng, bia̍t-bô iân-hái só͘ chhun ê peh-sìⁿ.

17我beh用大受氣ê責罰，tùi in行大ê報仇；我tùi in報仇ê時，in就知我是耶和華。Góa beh ēng tōa siū-khì ê chek-hoa̍t, tùi in kiâⁿ tōa ê pò-siû; Góa tùi in pò-siû ê sî, in chiū chai Góa sī Iâ-hô-hoa.

1第十一年，月ê初一，耶和華ê話臨到我講，Tē cha̍p-it nî, ge̍h ê chhoe-it, Iâ-hô-hoa ê ōe lîm-kàu góa kóng,

2人子ah，因為Chhui-lô ǹg耶路撒冷講，呼哉！hit-ê做列邦ê門ê，已經破，taⁿ歸向我；伊已經拋荒，我beh豐盛。Jîn-chú ah, in-ūi Chhui-lô ǹg Iâ-lō͘-sat-léng kóng, Hō͘--chāi! hit-ê chòe lia̍t-pang ê mn̂g--ê, í-keng phòa, taⁿ kui-ǹg góa; i í-keng pha-hng, góa beh hong-sēng.

3所以主耶和華án-ni講，Chhui-lô ah，看ah，我kap你做對敵，我亦beh hō͘ chōe-chōe國起來攻擊你，親像海hō͘伊ê湧giâ起來一樣。Só͘-í Chú Iâ-hô-hoa án-ni kóng, Chhui-lô ah, khòaⁿ ah, Góa kap lí chòe tùi-te̍k, Góa ia̍h beh hō͘ chōe-chōe kok khí-lâi kong-kek lí, chhin-chhiūⁿ hái hō͘ i ê éng giâ--khí-lâi chi̍t-iūⁿ.

4In beh毀壞Chhui-lô ê城牆，拆伊ê守更樓；我亦beh khau伊ê土粉，hō͘伊成做光kō-kō ê石磐。In beh húi-hoāi Chhui-lô ê siâⁿ-chhiûⁿ, thiah i ê chiú-kiⁿ-lâu; Góa ia̍h beh khau i ê thô͘-hún, hō͘ i chiâⁿ-chòe kng-kō-kō ê chio̍h-pôaⁿ.

5伊beh tī海中做曝網ê所在，亦beh成做列國所搶ê物；因為我有講伊；這是主耶和華講ê。I beh tī hái-tiong chòe pha̍k-bāng ê só͘-chāi, ia̍h beh chiâⁿ-chòe lia̍t-kok só͘ chhiúⁿ ê mi̍h; in-ūi Góa ū kóng--i; che sī Chú Iâ-hô-hoa kóng--ê.

6屬tī Chhui-lô hiah-ê城ê百姓，beh hō͘刀劍thâi死；in就知我是耶和華。Sio̍k tī Chhui-lô hiah ê siâⁿ ê peh-sìⁿ, beh hō͘ to-kiàm thâi-sí; in chiū chai Góa sī Iâ-hô-hoa.

7因為主耶和華án-ni講，看ah，我beh hō͘列王ê王，就是巴比倫王Nî-pò͘-kah-nî-sat，tùi北方chhōa馬、車、馬兵、軍隊，kap chōe-chōe百姓，來攻擊Chhui-lô。In-ūi Chú Iâ-hô-hoa án-ni kóng, Khòaⁿ ah, Góa beh hō͘ lia̍t-ông ê ông, chiū-sī Pa-pí-lûn ông Nî-pò͘-kah-nî-sat, tùi pak-hng chhōa bé, chhia, bé-peng, kun-tūi, kap chōe-chōe peh-sìⁿ, lâi kong-kek Chhui-lô.

8伊beh用刀劍thâi死屬tī你hiah-ê城ê百姓，亦beh紮營攻擊你，起土堆攻擊你，kōaⁿ籐攻擊你。I beh ēng to-kiàm thâi-sí sio̍k tī lí hiah ê siâⁿ ê peh-sìⁿ, ia̍h beh chat-iâⁿ kong-kek lí, khí thô͘-tui kong-kek lí, kōaⁿ-tîn kong-kek lí.

9伊beh 安設摃城ê鎚，攻破你ê城牆，用斧頭拆毀你ê守更樓。I beh an-siat kòng-siâⁿ ê thûi, kong-phòa lí ê siâⁿ-chhiûⁿ, ēng pó͘-thâu thiah-húi lí ê chiú-kiⁿ-lâu.

10因為伊ê馬真chōe，土粉遮蓋你；伊入你ê城門，親像人入有破隙ê城，hit時因為騎馬ê，kap運糧車，戰車ê聲，你ê城beh振動。In-ūi i ê bé chin-chōe, thô͘-hún jia-khàm lí; i ji̍p lí ê siâⁿ-mn̂g, chhin-chhiūⁿ lâng ji̍p ū phòa-khiah ê siâⁿ, hit-sî in-ūi khiâ-bé--ê, kap ūn-niû-chhia, chiàn-chhia ê siaⁿ, lí ê siâⁿ beh tín-tāng.

11伊ê馬蹄beh thún踏你一切ê街路；伊beh用刀thâi死你ê百姓，你堅固ê柱beh倒tī土腳。I ê bé-tôe beh thún-ta̍h lí it-chhè ê ke-lō͘; i beh ēng to thâi-sí lí ê peh-sìⁿ, lí kian-kò͘ ê thiāu beh tó tī thô͘-kha.

12伊beh搶你ê財寶，kap你ê貨物，毀你ê城牆，拆你súi ê厝，koh將你chiah-ê石，chiah-ê柴，chiah-ê土，lóng hiat tī水中。I beh chhiúⁿ lí ê châi-pó, kap lí ê hè-mi̍h, húi lí ê siâⁿ-chhiûⁿ, thiah lí súi ê chhù, koh chiong lí chiah ê chio̍h, chiah ê chhâ, chiah ê thô͘, lóng hiat tī chúi-tiong.

13我beh hō͘你唱歌ê聲lóng soah，你彈琴ê聲無koh聽見。Góa beh hō͘ lí chhiùⁿ-koa ê siaⁿ lóng soah, lí tôaⁿ-khîm ê siaⁿ bô koh thiaⁿ-kìⁿ.

14我beh hō͘你成做光kō-kō ê石磐，做曝網ê所在；你無koh受起造，因為我耶和華講伊。這是主耶和華講ê。Góa beh hō͘ lí chiaⁿ-chòe kng-kō-kō ê chio̍h-pôaⁿ, chòe pha̍k-bāng ê só͘-chāi; lí bô koh siū khí-chō, in-ūi Góa Iâ-hô-hoa kóng--i. Che sī Chú Iâ-hô-hoa kóng--ê.

15主耶和華對Chhui-lô án-ni講，Tī你中間有大大thâi人ê事，受傷ê人哀哀chhan ê時，因為你倒壞ê聲，海嶼kiám無lóng振動mah？Chú Iâ-hô-hoa tùi Chhui-lô án-ni kóng, Tī lí tiong-kan ū tōa-tōa thâi-lâng ê sū, siū-siong ê lâng ai-ai-chhan ê sî, in-ūi lí tó-hoāi ê siaⁿ, hái-sū kiám bô lóng tín-tāng mah?

16Hit時海邊hiah-ê君王，beh對伊ê王位落來，除去伊ê禮服，thǹg去súi衫，穿ngia̍uh-ngia̍uh-chhoah，坐tī土腳，時時刻刻teh tiō，為tio̍h你gông-ngia̍h。Hit-sî hái-piⁿ hiah ê kun-ông, beh tùi i ê ông-ūi lo̍h--lâi, tû-khì i ê lé-ho̍k, thǹg--khì súi saⁿ, chhēng ngia̍uh-ngia̍uh-chhoah, chē tī thô͘-kha, sî-sî khek-khek teh tiō, ūi-tio̍h lí gông-ngia̍h.

17In beh為你做哀歌，對你講，你chit-ê有名聲ê城，平素是行船ê人所khiā起，tī海面做堅固ê；平日伊kap khiā起ê百姓，hō͘一切tiàm tī-hia ê人無m̄驚惶，taⁿ怎樣滅無ah！In beh ūi lí chòe ai-ko, tùi lí kóng, Lí chit ê ū miâ-siaⁿ ê siâⁿ, pêng-sò͘ sī kiâⁿ-chûn ê lâng só͘ khiā-khí, tī hái-bīn chòe kian-kò͘--ê; pêng-ji̍t i kap khiā-khí ê peh-sìⁿ, hō͘ it-chhè tiàm tī-hia ê lâng bô m̄ kiaⁿ-hiâⁿ, taⁿ cháiⁿ-iūⁿ bia̍t-bô ah!

18Taⁿ tī你chit-ê倒壞ê日，眾海嶼beh ngia̍uh-ngia̍uh-chhoah；海中chiah-ê海嶼看見你無去，就lóng驚惶。Taⁿ tī lí chit ê tó-hoāi ê ji̍t, chèng hái-sū beh ngia̍uh-ngia̍uh-chhoah; hái-tiong chiah ê hái-sū khòaⁿ-kìⁿ lí bô--khì, chiū lóng kiaⁿ-hiâⁿ.

19因為主耶和華án-ni講，我hō͘你做拋荒ê城，親像hō͘ hiah-ê無人khiā起ê城；koh hō͘深淵pôaⁿ過你，大水蓋密你。In-ūi Chú Iâ-hô-hoa án-ni kóng, Góa hō͘ lí chòe pha-hng ê siâⁿ, chhin-chhiūⁿ hō͘ hiah ê bô lâng khiā-khí ê siâⁿ; koh hō͘ chhim-ian pôaⁿ-kè lí, tōa-chúi khàm-ba̍t lí.

20Hit時我hō͘你kap hiah-ê落陰府ê相kap落去，到古早人hia；hō͘你tiàm tī地下深ê所在，tùi古早拋荒ê所在，kap hiah-ê落陰府ê人tī-teh，無koh有人khiā起tī-hia，tī活人ê地無koh有榮光。Hit-sî Góa hō͘ lí kap hiah ê lo̍h im-hú--ê saⁿ-kap lo̍h--khì, kàu kó͘-chá lâng hia; hō͘ lí tiàm tī tōe-ē chhim ê só͘-chāi, tùi kó͘-chá pha-hng ê só͘-chāi, kap hiah ê lo̍h im-hú ê lâng tī-teh, bô koh ū lâng khiā-khí tī-hia, tī oa̍h-lâng ê tōe bô koh ū êng-kng.

21我beh hō͘你做thang驚ê，無koh留tī世間；雖然人chhē你，亦永永chhē-bōe-tio̍h；這是主耶和華講ê。Góa beh hō͘ lí chòe thang kiaⁿ--ê, bô koh lâu tī sè-kan; sui-jiân lâng chhē lí, ia̍h éng-éng chhē-bōe-tio̍h; che sī Chú Iâ-hô-hoa kóng--ê.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，tio̍h為 Chhui-lô做哀歌，Jîn-chú ah, tio̍h ūi Chhui-lô chòe ai-ko,

3Kā Chhui-lô講，你khiā起海口，kap列國眾海嶼買賣做seng-lí；主耶和華án-ni講： Chhui-lô ah，你bat講，我是完全súi-ê。kā Chhui-lô kóng, Lí khiā-khí hái-kháu, kap lia̍t-kok chèng hái-sū bóe-bōe chòe seng-lí; Chú Iâ-hô-hoa án-ni kóng: Chhui-lô ah, lí bat kóng, Góa sī oân-choân súi--ê.

4你ê境界tī海中；起造你ê，hō͘你ê súi完全。Lí ê kéng-kài tī hái-tiong; khí-chō lí ê, hō͘ lí ê súi oân-choân.

5In用Sī-nî-jíⁿ ê松樹做你一切ê枋，用黎巴嫩ê柏香樹做你ê船桅。In ēng Sī-nî-jíⁿ ê chhêng-chhiū chòe lí it-chhè ê pang, ēng Lī-pa-lùn ê pek-hiuⁿ-chhiū chòe lí ê chûn-ûi.

6用Pa-san ê橡樹做你ê槳，用Ki-thê海嶼ê黃楊柴，入象牙做你坐ê枋。Ēng Pa-san ê siōng-chhiū chòe lí ê chiúⁿ, ēng Ki-thê hái-sū ê n̂g-iông-chhâ, ji̍p chhiūⁿ-gê chòe lí chē ê pang.

7用埃及繡花ê幼苧布做你ê帆，做你ê旗；用以利沙海嶼藍色紫色ê 布，做你ê涼棚。Ēng Ai-ki̍p siù-hoe ê iù-tōe-pò͘ chòe lí ê phâng, chòe lí ê kî; ēng Í-lī-sa hái-sū lâm-sek chí-sek ê pò͘, chòe lí ê liâng-pîⁿ.

8Se-tùn kap A-hoat khiā起ê百姓，做你ê划槳ê；你中間gâu ê人做你ê hōaⁿ舵ê。Se-tùn kap A-hoat khiā-khí ê peh-sìⁿ, chòe lí ê kò-chiúⁿ--ê; lí tiong-kan gâu ê lâng chòe lí ê hōaⁿ-tōa--ê.

9Ka-pa-le̍k老練ê kap gâu ê人，lóng tī lín中間做補船孔ê；一切過海ê船隻，kap in ê水手，lóng tī你中間經營seng-lí ê事。Ka-pa-le̍k láu-liān--ê kap gâu ê lâng, lóng tī lín tiong-kan chòe pó͘ chûn-khang--ê; it-chhè kè-hái ê chûn-chiah, kap in ê chúi-siú, lóng tī lí tiong-kan keng-êng seng-lí ê sū.

10波斯、路得、Hut ê人，tī你軍營中做戰士；in tī你ê中間掛藤牌kap頭盔，顯明你ê súi。Pho-su, Lō͘-tek, Hut ê lâng, tī lí kun-iâⁿ-tiong chòe chiàn-sū; in tī lí ê tiong-kan kùi tîn-pâi kap thâu-khoe, hián-bêng lí ê súi.

11A-hoat人kap你ê軍隊，lóng tī你四圍ê牆頂；你ê守更樓亦有勇士，in掛in ê藤牌tī你四圍ê牆壁，成全你ê súi。A-hoat lâng kap lí ê kun-tūi, lóng tī lí sì-ûi ê chhiûⁿ-téng; lí ê chiú-kiⁿ-lâu ia̍h ū ióng-sū, in kùi in ê tîn-pâi tī lí sì-ûi ê chhiûⁿ-piah, sêng-choân lí ê súi.

12Tha-si人因為ta̍k樣ê財物充足，就做你ê客商；帶銀、鐵、錫、鉛，來換你ê貨物。Tha-si lâng in-ūi ta̍k-iūⁿ ê châi-bu̍t chhiong-chiok, chiū chòe lí ê kheh-siong; tòa gûn, thih, siah, iân, lâi ōaⁿ lí ê hè-mi̍h.

13Ngá-oân人、Thó͘-pa人、Bí-siat人，lóng kap你kau-koan；in用人口kap銅器，來換你ê貨物。Ngá-oân lâng, Thó͘-pa lâng, Bí-siat lâng, lóng kap lí kau-koan; in ēng jîn-kháu kap tâng-khì, lâi ōaⁿ lí ê hè-mi̍h.

14To-ka-má族用馬，kap戰馬，kap騾，來換你ê貨物。To-ka-má cho̍k ēng bé, kap chiàn-bé, kap lô, lâi ōaⁿ lí ê hè-mi̍h.

15Tí-tàn人kap你kau-koan；chōe-chōe海嶼做你ê 下盤seng-lí；in帶象牙、烏木柴，kap你交換。Tí-tàn lâng kap lí kau-koan; chōe-chōe hái-sū chòe lí ê ē-pôaⁿ seng-lí; in tòa chhiūⁿ-gê, o͘-ba̍k-chhâ, kap lí kau-ōaⁿ.

16A-lân人因為你ê製造充足，就做你ê客商；in用綠寶石、紫色ê 布、繡花ê物、幼苧布、珊瑚、紅寶石，來換你ê貨物。A-lân lâng in-ūi lí ê chè-chō chhiong-chiok, chiū chòe lí ê kheh-siong; in ēng le̍k-pó-chio̍h, chí-sek ê pò͘, siù-hoe ê mi̍h, iù-tōe-pò͘, sian-hô, âng-pó-chio̍h, lâi ōaⁿ lí ê hè-mi̍h.

17猶大kap以色列地ê人，lóng kap你kau-koan；in用Bí-le̍k ê麥、餅、蜜、油、乳香，來換你ê貨物。Iû-tāi kap Í-sek-lia̍t tōe ê lâng, lóng kap lí kau-koan; in ēng Bí-le̍k ê be̍h, piáⁿ, bi̍t, iû, jú-hiuⁿ, lâi ōaⁿ lí ê hè-mi̍h.

18大馬色人因為你ê製造充足，koh因為ta̍k樣ê財物充足；就帶Hek-pún ê酒，kap白羊毛，kap你kau-koan。Tāi-má-sek lâng in-ūi lí ê chè-chō chhiong-chiok, koh in-ūi ta̍k-iūⁿ ê châi-bu̍t chhiong-chiok; chiū tòa Hek-pún ê chiú, kap pe̍h iûⁿ-mn̂g, kap lí kau-koan.

19Ui-tàn人kap Ngá-oân人，帶線kap光ê鐵、肉桂、菖蒲，tī你ê街市，換你ê貨物。Ui-tàn lâng kap Ngá-oân lâng, tòa sòaⁿ kap kng ê thih, jio̍k-kùi, chhiong-pô͘, tī lí ê koe-chhī, ōaⁿ lí ê hè-mi̍h.

20Tí-tàn人用súi ê馬鞍敷kap你kau-koan。Tí-tàn lâng ēng súi ê bé-oaⁿ-chū kap lí kau-koan.

21阿拉伯人kap Ki-ta̍t一切ê領袖，lóng做你ê下盤seng-lí；用羊羔、公ê綿羊、山羊，kap你kau-koan。A-la̍h-pek lâng kap Ki-ta̍t it-chhè ê léng-siù, lóng chòe lí ê ē-pôaⁿ seng-lí; ēng iûⁿ-ko, kang ê mî-iûⁿ, soaⁿ-iûⁿ, kap lí kau-koan.

22Sī-pa kap La̍h-má ê seng-lí人kap你kau-koan；in用ta̍k類siōng好ê香料，ta̍k類ê寶石kap黃金來換你ê貨物。Sī-pa kap La̍h-má ê seng-lí lâng kap lí kau-koan; in ēng ta̍k-lūi siōng-hó ê hiuⁿ-liāu, ta̍k-lūi ê pó-chio̍h kap n̂g-kim lâi ōaⁿ lí ê hè-mi̍h.

23哈蘭、Kan-nî、I-tiân人、Sī-pa ê seng-lí人，亞述人，Ki-boat人kap你kau-koan。Hap-lân, Kan-nî, I-tiân lâng, Sī-pa ê seng-lí lâng, A-su̍t lâng, Ki-boat lâng kap lí kau-koan.

24Chiah-ê seng-lí人用真好ê貨物，藍色繡花ê布，裝kui包；koh有súi ê衣服，裝tī柏香柴ê箱á內，用索縛伊，kap你kau-koan。Chiah ê seng-lí lâng ēng chin-hó ê hè-mi̍h, lâm-sek siù-hoe ê pò͘, chng kui-pau; koh ū súi ê i-ho̍k, chng tī pek-hiuⁿ-chhâ ê siuⁿ-á-lāi, ēng soh pa̍k-i, kap lí kau-koan.

25Tha-si ê船隻tàu kui-pang，kā你載貨；你就tī海中富有，極其榮光。Tha-si ê chûn-chiah tàu kui-pang, kā lí chài-hè; lí chiū tī hái-tiong pù-ū, ke̍k-kî êng-kng.

26你ê划槳ê，已經划你到大水ê所在；東風tī海中kā你摃破。Lí ê kò-chiúⁿ--ê, í-keng kò lí kàu tōa-chúi ê só͘-chāi; tang-hong tī hái-tiong kā lí kòng-phòa.

27你ê錢財，你ê物件，你ê貨品，你ê水手，你ê hōaⁿ舵ê，你ê塞船孔ê，你ê經營seng-lí-ê，以及你中間ê戰士，kap你中間ê眾人，tī你敗壞ê日，lóng beh沉tī海中。Lí ê chîⁿ-châi, lí ê mi̍h-kiāⁿ, lí ê hè-phín, lí ê chúi-siú, lí ê hōaⁿ-tōa--ê, lí ê that chûn-khang--ê, lí ê keng-êng seng-lí--ê, í-ki̍p lí tiong-kan ê chiàn-sū, kap lí tiong-kan ê chèng-lâng, tī lí pāi-hoāi ê ji̍t, lóng beh tîm tī hái-tiong.

28你hōaⁿ舵ê喉叫ê聲一下hoah，郊野lóng beh振動。Lí hōaⁿ-tōa--ê âu-kiò ê siaⁿ chi̍t-ē hoah, kau-iá lóng beh tín-tāng.

29見若划槳ê，kap水手，kap一切過海hōaⁿ舵ê，lóng beh離開船上岸。Kìⁿ-nā kò-chiúⁿ-ê, kap chúi-siú, kap it-chhè kè-hái hōaⁿ-tōa--ê, lóng beh lī-khui chûn chiūⁿ-hōaⁿ.

30In beh為你開聲大哭，sám土粉tī頭殼，kō tī火灰中。In beh ūi lí khui-siaⁿ tōa-khàu, sám thô͘-hún tī thâu-khak, kō tī hé-hu-tiong.

31Koh為tio̍h你來剃光頭，用麻布hâ腰，痛心啼哭，極其悲哀。Koh ūi-tio̍h lí lâi thì kng-thâu, ēng môa-pò͘ hâ-io, thòng-sim thî-khàu, ke̍k-kî pi-ai.

32In哀傷ê時，為tio̍h你做哀歌，啼哭你；講，有甚麼城親像Chhui-lô，親像伊tī海中成做靜悽悽ê ah？In ai-siong ê sî, ūi-tio̍h lí chòe ai-ko, thî-khàu lí; kóng, Ū sím-mi̍h siâⁿ chhin-chhiūⁿ Chhui-lô, chhin-chhiūⁿ i tī hái-tiong chiâⁿ-chòe chēng chhiⁿ-chhiⁿ--ê ah?

33你ê貨物tùi海面上山，就hō͘ chōe-chōe百姓充足；你用chōe-chōe錢財貨物，hō͘地上ê君王好額。Lí ê hè-mi̍h tùi hái-bīn chiūⁿ-soaⁿ, chiū hō͘ chōe-chōe peh-sìⁿ chhiong-chiok; lí ēng chōe-chōe chîⁿ-châi hè-mi̍h, hō͘ tōe-chiūⁿ ê kun-ông hó-gia̍h.

34你tī深水中hō͘海湧挵破ê時，你ê貨物，kap你中間一切ê眾人，就lóng沉落去。Lí tī chhim-chúi-tiong hō͘ hái-éng lòng-phòa ê sî, lí ê hè-mi̍h, kap lí tiong-kan it-chhè ê chèng-lâng, chiū lóng tîm--lo̍h-khì.

35海嶼khiā起ê百姓，為tio̍h你gông-ngia̍h；in ê君王lóng真驚，面帶憂容。Hái-sū khiā-khí ê peh-sìⁿ, ūi-tio̍h lí gông-ngia̍h; in ê kun-ông lóng chin kiaⁿ, bīn tài-iu-iông.

36列國ê seng-lí人，lóng beh出譏刺ê聲；你hō͘人thang驚，你無thang koh tī-teh直到永遠。Lia̍t-kok ê seng-lí lâng, lóng beh chhut ki-chhì ê siaⁿ; lí hō͘ lâng thang kiaⁿ, lí bô thang koh tī-teh ti̍t-kàu éng-oán.