1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，tio̍h為 Chhui-lô做哀歌，Jîn-chú ah, tio̍h ūi Chhui-lô chòe ai-ko,

3Kā Chhui-lô講，你khiā起海口，kap列國眾海嶼買賣做seng-lí；主耶和華án-ni講： Chhui-lô ah，你bat講，我是完全súi-ê。kā Chhui-lô kóng, Lí khiā-khí hái-kháu, kap lia̍t-kok chèng hái-sū bóe-bōe chòe seng-lí; Chú Iâ-hô-hoa án-ni kóng: Chhui-lô ah, lí bat kóng, Góa sī oân-choân súi--ê.

4你ê境界tī海中；起造你ê，hō͘你ê súi完全。Lí ê kéng-kài tī hái-tiong; khí-chō lí ê, hō͘ lí ê súi oân-choân.

5In用Sī-nî-jíⁿ ê松樹做你一切ê枋，用黎巴嫩ê柏香樹做你ê船桅。In ēng Sī-nî-jíⁿ ê chhêng-chhiū chòe lí it-chhè ê pang, ēng Lī-pa-lùn ê pek-hiuⁿ-chhiū chòe lí ê chûn-ûi.

6用Pa-san ê橡樹做你ê槳，用Ki-thê海嶼ê黃楊柴，入象牙做你坐ê枋。Ēng Pa-san ê siōng-chhiū chòe lí ê chiúⁿ, ēng Ki-thê hái-sū ê n̂g-iông-chhâ, ji̍p chhiūⁿ-gê chòe lí chē ê pang.

7用埃及繡花ê幼苧布做你ê帆，做你ê旗；用以利沙海嶼藍色紫色ê 布，做你ê涼棚。Ēng Ai-ki̍p siù-hoe ê iù-tōe-pò͘ chòe lí ê phâng, chòe lí ê kî; ēng Í-lī-sa hái-sū lâm-sek chí-sek ê pò͘, chòe lí ê liâng-pîⁿ.

8Se-tùn kap A-hoat khiā起ê百姓，做你ê划槳ê；你中間gâu ê人做你ê hōaⁿ舵ê。Se-tùn kap A-hoat khiā-khí ê peh-sìⁿ, chòe lí ê kò-chiúⁿ--ê; lí tiong-kan gâu ê lâng chòe lí ê hōaⁿ-tōa--ê.

9Ka-pa-le̍k老練ê kap gâu ê人，lóng tī lín中間做補船孔ê；一切過海ê船隻，kap in ê水手，lóng tī你中間經營seng-lí ê事。Ka-pa-le̍k láu-liān--ê kap gâu ê lâng, lóng tī lín tiong-kan chòe pó͘ chûn-khang--ê; it-chhè kè-hái ê chûn-chiah, kap in ê chúi-siú, lóng tī lí tiong-kan keng-êng seng-lí ê sū.

10波斯、路得、Hut ê人，tī你軍營中做戰士；in tī你ê中間掛藤牌kap頭盔，顯明你ê súi。Pho-su, Lō͘-tek, Hut ê lâng, tī lí kun-iâⁿ-tiong chòe chiàn-sū; in tī lí ê tiong-kan kùi tîn-pâi kap thâu-khoe, hián-bêng lí ê súi.

11A-hoat人kap你ê軍隊，lóng tī你四圍ê牆頂；你ê守更樓亦有勇士，in掛in ê藤牌tī你四圍ê牆壁，成全你ê súi。A-hoat lâng kap lí ê kun-tūi, lóng tī lí sì-ûi ê chhiûⁿ-téng; lí ê chiú-kiⁿ-lâu ia̍h ū ióng-sū, in kùi in ê tîn-pâi tī lí sì-ûi ê chhiûⁿ-piah, sêng-choân lí ê súi.

12Tha-si人因為ta̍k樣ê財物充足，就做你ê客商；帶銀、鐵、錫、鉛，來換你ê貨物。Tha-si lâng in-ūi ta̍k-iūⁿ ê châi-bu̍t chhiong-chiok, chiū chòe lí ê kheh-siong; tòa gûn, thih, siah, iân, lâi ōaⁿ lí ê hè-mi̍h.

13Ngá-oân人、Thó͘-pa人、Bí-siat人，lóng kap你kau-koan；in用人口kap銅器，來換你ê貨物。Ngá-oân lâng, Thó͘-pa lâng, Bí-siat lâng, lóng kap lí kau-koan; in ēng jîn-kháu kap tâng-khì, lâi ōaⁿ lí ê hè-mi̍h.

14To-ka-má族用馬，kap戰馬，kap騾，來換你ê貨物。To-ka-má cho̍k ēng bé, kap chiàn-bé, kap lô, lâi ōaⁿ lí ê hè-mi̍h.

15Tí-tàn人kap你kau-koan；chōe-chōe海嶼做你ê 下盤seng-lí；in帶象牙、烏木柴，kap你交換。Tí-tàn lâng kap lí kau-koan; chōe-chōe hái-sū chòe lí ê ē-pôaⁿ seng-lí; in tòa chhiūⁿ-gê, o͘-ba̍k-chhâ, kap lí kau-ōaⁿ.

16A-lân人因為你ê製造充足，就做你ê客商；in用綠寶石、紫色ê 布、繡花ê物、幼苧布、珊瑚、紅寶石，來換你ê貨物。A-lân lâng in-ūi lí ê chè-chō chhiong-chiok, chiū chòe lí ê kheh-siong; in ēng le̍k-pó-chio̍h, chí-sek ê pò͘, siù-hoe ê mi̍h, iù-tōe-pò͘, sian-hô, âng-pó-chio̍h, lâi ōaⁿ lí ê hè-mi̍h.

17猶大kap以色列地ê人，lóng kap你kau-koan；in用Bí-le̍k ê麥、餅、蜜、油、乳香，來換你ê貨物。Iû-tāi kap Í-sek-lia̍t tōe ê lâng, lóng kap lí kau-koan; in ēng Bí-le̍k ê be̍h, piáⁿ, bi̍t, iû, jú-hiuⁿ, lâi ōaⁿ lí ê hè-mi̍h.

18大馬色人因為你ê製造充足，koh因為ta̍k樣ê財物充足；就帶Hek-pún ê酒，kap白羊毛，kap你kau-koan。Tāi-má-sek lâng in-ūi lí ê chè-chō chhiong-chiok, koh in-ūi ta̍k-iūⁿ ê châi-bu̍t chhiong-chiok; chiū tòa Hek-pún ê chiú, kap pe̍h iûⁿ-mn̂g, kap lí kau-koan.

19Ui-tàn人kap Ngá-oân人，帶線kap光ê鐵、肉桂、菖蒲，tī你ê街市，換你ê貨物。Ui-tàn lâng kap Ngá-oân lâng, tòa sòaⁿ kap kng ê thih, jio̍k-kùi, chhiong-pô͘, tī lí ê koe-chhī, ōaⁿ lí ê hè-mi̍h.

20Tí-tàn人用súi ê馬鞍敷kap你kau-koan。Tí-tàn lâng ēng súi ê bé-oaⁿ-chū kap lí kau-koan.

21阿拉伯人kap Ki-ta̍t一切ê領袖，lóng做你ê下盤seng-lí；用羊羔、公ê綿羊、山羊，kap你kau-koan。A-la̍h-pek lâng kap Ki-ta̍t it-chhè ê léng-siù, lóng chòe lí ê ē-pôaⁿ seng-lí; ēng iûⁿ-ko, kang ê mî-iûⁿ, soaⁿ-iûⁿ, kap lí kau-koan.

22Sī-pa kap La̍h-má ê seng-lí人kap你kau-koan；in用ta̍k類siōng好ê香料，ta̍k類ê寶石kap黃金來換你ê貨物。Sī-pa kap La̍h-má ê seng-lí lâng kap lí kau-koan; in ēng ta̍k-lūi siōng-hó ê hiuⁿ-liāu, ta̍k-lūi ê pó-chio̍h kap n̂g-kim lâi ōaⁿ lí ê hè-mi̍h.

23哈蘭、Kan-nî、I-tiân人、Sī-pa ê seng-lí人，亞述人，Ki-boat人kap你kau-koan。Hap-lân, Kan-nî, I-tiân lâng, Sī-pa ê seng-lí lâng, A-su̍t lâng, Ki-boat lâng kap lí kau-koan.

24Chiah-ê seng-lí人用真好ê貨物，藍色繡花ê布，裝kui包；koh有súi ê衣服，裝tī柏香柴ê箱á內，用索縛伊，kap你kau-koan。Chiah ê seng-lí lâng ēng chin-hó ê hè-mi̍h, lâm-sek siù-hoe ê pò͘, chng kui-pau; koh ū súi ê i-ho̍k, chng tī pek-hiuⁿ-chhâ ê siuⁿ-á-lāi, ēng soh pa̍k-i, kap lí kau-koan.

25Tha-si ê船隻tàu kui-pang，kā你載貨；你就tī海中富有，極其榮光。Tha-si ê chûn-chiah tàu kui-pang, kā lí chài-hè; lí chiū tī hái-tiong pù-ū, ke̍k-kî êng-kng.

26你ê划槳ê，已經划你到大水ê所在；東風tī海中kā你摃破。Lí ê kò-chiúⁿ--ê, í-keng kò lí kàu tōa-chúi ê só͘-chāi; tang-hong tī hái-tiong kā lí kòng-phòa.

27你ê錢財，你ê物件，你ê貨品，你ê水手，你ê hōaⁿ舵ê，你ê塞船孔ê，你ê經營seng-lí-ê，以及你中間ê戰士，kap你中間ê眾人，tī你敗壞ê日，lóng beh沉tī海中。Lí ê chîⁿ-châi, lí ê mi̍h-kiāⁿ, lí ê hè-phín, lí ê chúi-siú, lí ê hōaⁿ-tōa--ê, lí ê that chûn-khang--ê, lí ê keng-êng seng-lí--ê, í-ki̍p lí tiong-kan ê chiàn-sū, kap lí tiong-kan ê chèng-lâng, tī lí pāi-hoāi ê ji̍t, lóng beh tîm tī hái-tiong.

28你hōaⁿ舵ê喉叫ê聲一下hoah，郊野lóng beh振動。Lí hōaⁿ-tōa--ê âu-kiò ê siaⁿ chi̍t-ē hoah, kau-iá lóng beh tín-tāng.

29見若划槳ê，kap水手，kap一切過海hōaⁿ舵ê，lóng beh離開船上岸。Kìⁿ-nā kò-chiúⁿ-ê, kap chúi-siú, kap it-chhè kè-hái hōaⁿ-tōa--ê, lóng beh lī-khui chûn chiūⁿ-hōaⁿ.

30In beh為你開聲大哭，sám土粉tī頭殼，kō tī火灰中。In beh ūi lí khui-siaⁿ tōa-khàu, sám thô͘-hún tī thâu-khak, kō tī hé-hu-tiong.

31Koh為tio̍h你來剃光頭，用麻布hâ腰，痛心啼哭，極其悲哀。Koh ūi-tio̍h lí lâi thì kng-thâu, ēng môa-pò͘ hâ-io, thòng-sim thî-khàu, ke̍k-kî pi-ai.

32In哀傷ê時，為tio̍h你做哀歌，啼哭你；講，有甚麼城親像Chhui-lô，親像伊tī海中成做靜悽悽ê ah？In ai-siong ê sî, ūi-tio̍h lí chòe ai-ko, thî-khàu lí; kóng, Ū sím-mi̍h siâⁿ chhin-chhiūⁿ Chhui-lô, chhin-chhiūⁿ i tī hái-tiong chiâⁿ-chòe chēng chhiⁿ-chhiⁿ--ê ah?

33你ê貨物tùi海面上山，就hō͘ chōe-chōe百姓充足；你用chōe-chōe錢財貨物，hō͘地上ê君王好額。Lí ê hè-mi̍h tùi hái-bīn chiūⁿ-soaⁿ, chiū hō͘ chōe-chōe peh-sìⁿ chhiong-chiok; lí ēng chōe-chōe chîⁿ-châi hè-mi̍h, hō͘ tōe-chiūⁿ ê kun-ông hó-gia̍h.

34你tī深水中hō͘海湧挵破ê時，你ê貨物，kap你中間一切ê眾人，就lóng沉落去。Lí tī chhim-chúi-tiong hō͘ hái-éng lòng-phòa ê sî, lí ê hè-mi̍h, kap lí tiong-kan it-chhè ê chèng-lâng, chiū lóng tîm--lo̍h-khì.

35海嶼khiā起ê百姓，為tio̍h你gông-ngia̍h；in ê君王lóng真驚，面帶憂容。Hái-sū khiā-khí ê peh-sìⁿ, ūi-tio̍h lí gông-ngia̍h; in ê kun-ông lóng chin kiaⁿ, bīn tài-iu-iông.

36列國ê seng-lí人，lóng beh出譏刺ê聲；你hō͘人thang驚，你無thang koh tī-teh直到永遠。Lia̍t-kok ê seng-lí lâng, lóng beh chhut ki-chhì ê siaⁿ; lí hō͘ lâng thang kiaⁿ, lí bô thang koh tī-teh ti̍t-kàu éng-oán.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，你tio̍h對Chhui-lô ê君王講，主耶和華án-ni講：因為你心內驕傲，你亦講，我是一個上帝，我tī海中坐上帝ê位；你雖然存心家己掠做是上帝，其實你是人，m̄是上帝。Jîn-chú ah, lí tio̍h tùi Chhui-lô ê kun-ông kóng, Chú Iâ-hô-hoa án-ni kóng: In-ūi lí sim-lāi kiau-ngō͘, lí ia̍h kóng, Góa sī chi̍t ê siōng-tè, góa tī hái-tiong chē Siōng-tè ê ūi; lí sui-jiân chûn-sim ka-kī lia̍h-chòe sī Siōng-tè, kî-si̍t lí sī lâng, m̄-sī Siōng-tè.

3看ah，你比但以理khah有智慧，無一項祕密ê事對你隱密。Khòaⁿ ah, lí pí Tān-í-lí khah ū tì-hūi, bô chi̍t-hāng pì-bi̍t ê sū tùi lí ún-ba̍t.

4你óa靠家己ê智慧聰明，得tio̍h財寶，得tio̍h金銀，收tī你ê庫房。Lí óa-khò ka-kī ê tì-hūi chhang-miâ, tit-tio̍h châi-pó, tit-tio̍h kim-gûn, siu tī lí ê khò͘-pâng.

5你óa靠家己ê大智慧kap seng-lí，加添你ê好額；亦你ê心為tio̍h你ê好額來驕傲。Lí óa-khò ka-kī ê tōa tì-hūi kap seng-lí, ke-thiⁿ lí ê hó-gia̍h; ia̍h lí ê sim ūi-tio̍h lí ê hó-gia̍h lâi kiau-ngō͘.

6所以主耶和華án-ni講，因為你存心，家己掠做是上帝，Só͘-í Chú Iâ-hô-hoa án-ni kóng, In-ūi lí chûn-sim, ka-kī lia̍h-chòe sī Siōng-tè,

7看ah，所以我beh帶外邦人，就是列國中強暴ê人，來你chia；in beh拔刀攻擊你tùi智慧所得tio̍h ê好物；phah lâ-sâm你ê榮光。khòaⁿ ah, só͘-í Góa beh tòa gōa-pang lâng, chiū-sī lia̍t-kok-tiong kiông-pō ê lâng, lâi lí chia; in beh pu̍ih-to kong-kek lí tùi tì-hūi só͘ tit-tio̍h ê hó-mi̍h; phah lâ-sâm lí ê êng-kng.

8In beh hō͘你落深坑；你beh死tī海中，親像受thâi ê人ê死一樣。In beh hō͘ lí lo̍h chhim-khiⁿ; lí beh sí tī hái-tiong, chhin-chhiūⁿ siū-thâi ê lâng ê sí chi̍t-iūⁿ.

9Tī thâi你ê人ê面前，你iáu未講，我是上帝mah？其實你tī thâi死你ê人ê手，不過是人，m̄是上帝。Tī thâi lí ê lâng ê bīn-chêng, lí iáu-bē kóng, Góa sī Siōng-tè mah? kî-si̍t lí tī thâi-sí lí ê lâng ê chhiú, put-kò sī lâng, m̄-sī Siōng-tè.

10你beh死，tī外國人ê手中，親像bē受割禮ê人ê死一樣，因為我有講伊；這是主耶和華所講ê。Lí beh sí, tī gōa-kok lâng ê chhiú-tiong, chhin-chhiūⁿ bē siū kat-lé ê lâng ê sí chi̍t-iūⁿ, in-ūi Góa ū kóng i; che sī Chú Iâ-hô-hoa só͘ kóng-ê.

11耶和華ê話臨到我講，Iâ-hô-hoa ê ōe lîm-kàu góa kóng,

12人子ah，你tio̍h kā Chhui-lô王做哀歌，對伊講，主耶和華án-ni講，你無所m̄齊備，智慧充足，完全súi。Jîn-chú ah, lí tio̍h kā Chhui-lô ông chòe ai-ko, tùi i kóng, Chú Iâ-hô-hoa án-ni kóng, Lí bô só͘ m̄ chiâu-pī, tì-hūi chhiong-chiok, oân-choân súi.

13你bat tī伊甸上帝ê園內，用ta̍k樣ê寶石做你ê裝飾，就是紅寶石、黃玉，kap金剛石，青玉、紅瑪瑙，kap碧玉，藍玉、綠寶石，kap赤玉，kap黃金；koh你鼓kap簫，tī你hia製造，當你受造ê日，就lóng齊備。Lí bat tī Ai-tiân Siōng-tè ê hn̂g-lāi, ēng ta̍k-iūⁿ ê pó-chio̍h chòe lí ê chng-thāⁿ, chiū-sī âng-pó-chio̍h, n̂g-ge̍k, kap kim-kong-chio̍h, chhiⁿ-ge̍k, âng-bé-ló, kap phek-ge̍k, lâm-ge̍k, le̍k-pó-chio̍h, kap chhiah-ge̍k, kap n̂g-kim; koh lí kó͘ kap siau, tī lí hia chè-chō, tng lí siū-chō ê ji̍t, chiū lóng chiâu-pī.

14你是hit ê受抹油遮蓋ê ki-lō͘兵；我安置你tī上帝ê聖山；你往來tī出火ê石ê中間。Lí sī hit ê siū boah-iû jia-khàm ê ki-lō͘-peng; Góa an-tì lí tī Siōng-tè ê sèng-soaⁿ; lí óng-lâi tī chhut-hé ê chio̍h ê tiong-kan.

15你tùi受造ê日所行lóng完全，直到chhē-tio̍h不義tī你ê中間。Lí tùi siū-chō ê ji̍t só͘ kiâⁿ lóng oân-choân, ti̍t-kàu chhē-tio̍h put-gī tī lí ê tiong-kan.

16因為你seng-lí真大，人就用強暴充滿tī你ê中間，致到你犯罪；因為án-ni，我看你親像污穢，就tùi上帝ê山趕逐你；遮蓋ê ki-lō͘兵ah，我已經將你tùi出火ê石ê中間除滅。In-ūi lí seng-lí chin-tōa, lâng chiū ēng kiông-pō chhiong-móa tī lí ê tiong-kan, tì-kàu lí hoān-chōe; in-ūi án-ni, Góa khòaⁿ lí chhin-chhiūⁿ ù-òe, chiū tùi Siōng-tè ê soaⁿ kóaⁿ-tio̍k lí; jia-khàm ê ki-lō͘-peng ah, Góa í-keng chiong lí tùi chhut-hé ê chio̍h ê tiong-kan tû-bia̍t.

17你因為súi，心中驕傲；koh因為你ê榮光敗壞你ê智慧；我已經chhia倒你tī地裡，hō͘你倒tī君王ê面前，hō͘ in看見。Lí in-ūi súi, sim-tiong kiau-ngō͘; koh in-ūi lí ê êng-kng pāi-hoāi lí ê tì-hūi; Góa í-keng chhia-tó lí tī tōe--nih, hō͘ lí tó tī kun-ông ê bīn-chêng, hō͘ in khòaⁿ-kìⁿ.

18你因為罪過真chōe，做seng-lí無公道；你phah lâ-sâm你hiah-ê聖所；所以我hō͘火對你中間出，來燒滅你；hō͘你tī所有看見ê人ê目睭前，變做地上ê火灰。Lí in-ūi chōe-kòa chin-chōe, chòe seng-lí bô kong-tō; lí phah lâ-sâm lí hiah ê sèng-só͘; só͘-í Góa hō͘ hé tùi lí tiong-kan chhut, lâi sio-bia̍t lí; hō͘ lí tī só͘ ū khòaⁿ-kìⁿ ê lâng ê ba̍k-chiu-chêng, piàn-chòe tōe-chiūⁿ ê hé-hu.

19眾百姓ê中間，見若bat你ê人，lóng beh為tio̍h你來gông-ngia̍h；你hō͘人thang驚，永遠無thang koh tī-teh。Chèng peh-sìⁿ ê tiong-kan, kìⁿ-nā bat lí ê lâng, lóng beh ūi-tio̍h lí lâi gông-ngia̍h; lí hō͘ lâng thang kiaⁿ, éng-oán bô thang koh tī-teh.

20耶和華ê話臨到我講，Iâ-hô-hoa ê ōe lîm-kàu góa kóng,

21人子ah，你ê面tio̍h ǹg Se-tùn，對伊宣傳，講，Jîn-chú ah, lí ê bīn tio̍h ǹg Se-tùn, tùi i soan-thoân, kóng,

22主耶和華án-ni講，Se-tùn ah，看ah，我kap你做對敵，我的確tī你中間得tio̍h榮光；我tī伊中間行審判，顯明我做聖ê時，in就知我是耶和華。Chú Iâ-hô-hoa án-ni kóng, Se-tùn ah, khòaⁿ ah, Góa kap lí chòe tùi-te̍k, Góa tek-khak tī lí tiong-kan tit-tio̍h êng-kng; Góa tī i tiong-kan kiâⁿ sím-phòaⁿ, hián-bêng Góa chòe-sèng ê sî, in chiū chai Góa sī Iâ-hô-hoa.

23我亦beh hō͘瘟疫kap流血ê事入伊ê街路，tio̍h傷ê倒tī伊ê中間，四圍有刀劍攻擊伊；in就知我是耶和華。Góa ia̍h beh hō͘ un-e̍k kap lâu-huih ê sū ji̍p i ê ke-lō͘, tio̍h-siong--ê tó tī i ê tiong-kan, sì-ûi ū to-kiàm kong-kek i; in chiū chai Góa sī Iâ-hô-hoa.

24四圍平素看輕以色列家ê人，以後無koh ng3in做鑿人ê刺，hō͘人艱苦ê草刺；in就知我是主耶和華。Sì-ûi pêng-sò͘ khòaⁿ-khin Í-sek-lia̍t-ke ê lâng, í-āu bô koh ǹg in chòe chha̍k lâng ê chhì, hō͘ lâng kan-khó͘ ê chháu-chhì; in chiū chai Góa sī Chú Iâ-hô-hoa.

25主耶和華án-ni講，我聚集以色列家，tùi所四散去ê百姓中，對in顯明我做聖，tī列國人ê目睭前；hit時in beh khiā起tī本所在，就是我所賞賜我ê奴僕雅各ê地。Chú Iâ-hô-hoa án-ni kóng, Góa chū-chi̍p Í-sek-lia̍t-ke, tùi só͘ sì-sòaⁿ--khì ê peh-sìⁿ-tiong, tùi in hián-bêng Góa chòe-sèng, tī lia̍t-kok lâng ê ba̍k-chiu-chêng; hit-sî in beh khiā-khí tī pún só͘-chāi, chiū-sī Góa só͘ siúⁿ-sù Góa ê lô͘-po̍k Ngá-kok ê tōe.

26In beh安然khiā起tī hí中間；我已經行審判tī四圍看輕in ê人，hit時in beh起厝，栽種葡萄園，安然khiā起；in就知我是耶和華，in ê上帝。In beh an-jiân khiā-khí tī hí tiong-kan; Góa í-keng kiâⁿ sím-phòaⁿ tī sì-ûi khòaⁿ-khin in ê lâng, hit-sî in beh khí chhù, chai-chèng phû-tô-hn̂g, an-jiân khiā-khí; in chiū chai Góa sī Iâ-hô-hoa, in ê Siōng-tè.

1第十年，十月十二，耶和華ê話臨到我講，Tē cha̍p--nî, cha̍p-ge̍h cha̍p-jī, Iâ-hô-hoa ê ōe lîm-kàu góa kóng,

2人子ah，你ê面tio̍h ǹg埃及王法老，宣傳來攻擊伊，以及埃及全地。Jîn-chú ah, lí ê bīn tio̍h ǹg Ai-ki̍p ông Hoat-ló, soan-thoân lâi kong-kek i, í-ki̍p Ai-ki̍p choân-tōe.

3你tio̍h傳講，主耶和華án-ni講，看ah，埃及王法老ah，我做你ê對敵；你就是大鱷魚，倒tī家己ê江河中；你bat講，我ê河是我ê，我為家己來造ê。Lí tio̍h thoân kóng, Chú Iâ-hô-hoa án-ni kóng, Khòaⁿ ah, Ai-ki̍p ông Hoat-ló ah, Góa chòe lí ê tùi-te̍k; lí chiū-sī tōa go̍k-hî, tó tī ka-kī ê kang-hô tiong; lí bat kóng, Góa ê hô sī góa-ê, góa ūi ka-kī lâi chō--ê.

4我beh用勾勾tiâu你ê牙槽；koh hō͘你江河中ê魚kha̍h-tiâu tī你ê鱗；我beh將你kap所kha̍h-tiâu tī你ê鱗ê魚，tùi江河中拖出來。Góa beh ēng kau kau-tiâu lí ê gê-chô; koh hō͘ lí kang-hô-tiong ê hî kha̍h-tiâu tī lí ê lân; Góa beh chiong lí kap só͘ kha̍h-tiâu tī lí ê lân ê hî, tùi kang-hô tiong thoa chhut-lâi.

5我beh將你kap你江河中ê魚lóng hiat tī曠野；你beh倒tī田裡，無拾做堆，無收拾；我將你hō͘地上ê野獸，空中ê飛鳥做食物。Góa beh chiong lí kap lí kang-hô-tiong ê hî lóng hiat tī khòng-iá; lí beh tó tī chhân--nih, bô khioh chòe-tui, bô siu-si̍p; Góa chiong lí hō͘ tōe-chiūⁿ ê iá-siù, khong-tiong ê pe-chiáu chòe chia̍h-mi̍h.

6埃及khiā起ê百姓lóng beh知我就是耶和華，因為in tùi以色列家，bat做蘆葦ê柺á。Ai-ki̍p khiā-khí ê peh-sìⁿ lóng beh chai Góa chiū-sī Iâ-hô-hoa, in-ūi in tùi Í-sek-lia̍t-ke, bat chòe lô͘-úi ê koáiⁿ-á.

7In用手kia̍h你，你pit-khui，傷tio̍h in ê肩頭，in óa你，你折去，siâm-tio̍h in ê腰。In ēng chhiú kia̍h lí, lí pit-khui, siong-tio̍h in ê keng-thâu, in óa--lí, lí chi̍h-khì, siâm-tio̍h in ê io.

8所以主耶和華án-ni講，看ah，我beh hō͘刀劍臨到你；tùi lín中間剪除人kap cheng-siⁿ。Só͘-í Chú Iâ-hô-hoa án-ni kóng, Khòaⁿ ah, Góa beh hō͘ to-kiàm lîm-kàu lí; tùi lín tiong-kan chián-tû lâng kap cheng-siⁿ.

9埃及地beh荒廢，冷靜；in就知我是耶和華；因為伊家己講，chit-ê河是我ê，是我造ê。Ai-ki̍p tōe beh hong-hòe, léng-chēng; in chiū chai Góa sī Iâ-hô-hoa; in-ūi i ka-kī kóng, Chit ê hô sī góa-ê, sī góa chō--ê.

10看ah，我kap你以及你ê江河做對敵；hō͘埃及地tùi Sek-hut-nî ê塔，直到Kó͘-si̍t ê交界全然荒廢冷靜。Khòaⁿ ah, Góa kap lí í-ki̍p lí ê kang-hô chòe tùi-te̍k; hō͘ Ai-ki̍p tōe tùi Sek-hut-nî ê thah, ti̍t-kàu Kó͘-si̍t ê kau-kài choân-jiân hong-hòe léng-chēng.

11人ê腳無tùi hia過，獸ê腳也無tùi hia過；歷過四十年久，無人khiā起。Lâng ê kha bô tùi hia kè, siù ê kha iā bô tùi hia kè; le̍k-kè sì-cha̍p-nî kú, bô lâng khiā-khí.

12我beh hō͘埃及地tī冷靜ê地成做冷靜；伊ê城tī荒廢ê城中變做荒廢，歷過四十年，我也beh將埃及人分散tī列國，四散tī列邦。Góa beh hō͘ Ai-ki̍p tōe tī léng-chēng ê tōe chiâⁿ-chòe léng-chēng; i ê siâⁿ tī hong-hòe ê siâⁿ tiong pìⁿ-chòe hong-hòe, le̍k-kè sì-cha̍p-nî, Góa iā beh chiong Ai-ki̍p lâng hun-sòaⁿ tī lia̍t-kok, sì-sòaⁿ tī lia̍t-pang.

13主耶和華án-ni講，滿四十年，我beh招集埃及人，tùi in所四散去ê列國來；Chú Iâ-hô-hoa án-ni kóng, Móa sì-cha̍p-nî, Góa beh chio-chi̍p Ai-ki̍p lâng, tùi in só͘ sì-sòaⁿ--khì ê lia̍t-kok lâi;

14我beh hō͘埃及受掠ê tò來，hō͘ in tò來in ê本地Pa-thek-lô；tī-hia beh成做微細ê國。Góa beh hō͘ Ai-ki̍p siū-lia̍h--ê tò-lâi, hō͘ in tò-lâi in ê pún-tōe Pa-thek-lô; tī-hia beh chiâⁿ-chòe bî-sòe ê kok.

15Beh做列國中第一微細ê，亦無koh自高tī列國ê頂面；我beh減少in，致到in無管轄列國。Beh chòe lia̍t-kok-tiong tē-it bî-sòe--ê, ia̍h bô koh chū-ko tī lia̍t-kok ê téng-bīn; Góa beh kiám-chió in, tì-kàu in bô koán-hat lia̍t-kok.

16伊的確無koh做以色列家所óa靠ê，所oa̍t頭來仰望ê，免得我記得in ê罪；in就知我是主耶和華。I tek-khak bô koh chòe Í-sek-lia̍t-ke só͘ óa-khò--ê, só͘ oa̍t-thâu lâi gióng-bōng-ê, bián-tit Góa kì-tit in ê chōe; in chiū chai Góa sī Chú Iâ-hô-hoa.

17二十七年，正月初一，耶和華ê話臨到我講，Jī-cha̍p-chhit nî, chiaⁿ-ge̍h chhoe-it, Iâ-hô-hoa ê ōe lîm-kàu góa kóng,

18人子ah，巴比倫王，Nî-pò͘-kah-nî-sat，hō͘伊ê軍兵大大tio̍h磨，攻擊Chhui-lô；致到ta̍k-ê頭殼無毛，肩頭liù皮；總是伊kap伊ê軍兵，對tī Chhui-lô，lóng無得tio̍h工錢，來報答伊大大tio̍h磨ê攻擊。Jîn-chú ah, Pa-pí-lûn ông, Nî-pò͘-kah-nî-sat, hō͘ i ê kun-peng tōa-tōa tio̍h-bôa, kong-kek Chhui-lô; tì-kàu ta̍k-ê thâu-khak bô mn̂g, keng-thâu liù-phê; chóng-sī i kap i ê kun-peng, tùi tī Chhui-lô, lóng bô tit-tio̍h kang-chîⁿ, lâi pò-tap i tōa-tōa tio̍h-bôa ê kong-kek.

19所以主耶和華án-ni講，看ah，我beh將埃及地賞賜巴比倫王Nî-pò͘-kah-nî-sat，伊beh掠伊ê眾百姓，搶伊所搶ê物，劫伊所劫ê物，這就thang做伊ê軍兵ê工錢。Só͘-í Chú Iâ-hô-hoa án-ni kóng, Khòaⁿ ah, Góa beh chiong Ai-ki̍p tōe siúⁿ-sù Pa-pí-lûn ông Nî-pò͘-kah-nî-sat, i beh lia̍h i ê chèng peh-sìⁿ, chhiúⁿ i só͘ chhiúⁿ ê mi̍h, kiap i só͘ kiap ê mi̍h, che chiū thang chòe i ê kun-peng ê kang-chîⁿ.

20我將埃及地hō͘伊，報答伊所tio̍h磨ê；因為in替我做工；這是主耶和華講ê。Góa chiong Ai-ki̍p tōe hō͘ i, pò-tap i só͘ tio̍h-bôa--ê; in-ūi in thòe Góa chòe-kang; che sī Chú Iâ-hô-hoa kóng-ê.

21當hit日，我beh hō͘一支角，為tio̍h以色列家發出；koh beh hō͘你開嘴tī in中間；in就知我是耶和華。Tng hit-ji̍t, Góa beh hō͘ chi̍t ki kak, ūi-tio̍h Í-sek-lia̍t ke hoat-chhut; koh beh hō͘ lí khui-chhùi tī in tiong-kan; in chiū chai Góa sī Iâ-hô-hoa.