1十二年，十二月，初一，耶和華ê話臨到我講，Cha̍p-jī--nî, cha̍p-jī-ge̍h, chhoe-it, Iâ-hô-hoa ê ōe lîm-kàu góa kóng,

2人子ah，你tio̍h為埃及王法老做哀歌，kā伊講，從前你tī列國中，親像勇ê獅；taⁿ你是親像海中ê鱷魚；你chông出你ê江河，用腳振動chiah-ê水，致到江河ê水變濁。Jîn-chú ah, lí tio̍h ūi Ai-ki̍p ông Hoat-ló chòe ai-ko, kā i kóng, Chiông-chêng lí tī lia̍t-kok-tiong, chhin-chhiūⁿ ióng ê sai; taⁿ lí sī chhin-chhiūⁿ hái-tiong ê go̍k-hî; lí chông-chhut lí ê kang-hô, ēng kha tín-tāng chiah ê chúi, tì-kàu kang-hô ê chúi pìⁿ-lô.

3主耶和華án-ni講，我beh用chōe-chōe國 ê百姓，將我ê 網拋tī你ê頂面，in beh用我ê網，kā你拖出來。Chú Iâ-hô-hoa án-ni kóng, Góa beh ēng chōe-chōe kok ê peh-sìⁿ, chiong Góa ê bāng pha tī lí ê téng-bīn, in beh ēng Góa ê bāng, kā lí thoa--chhut-lâi.

4我beh hiat你tī地裡，放下tī田野，hō͘空中ê飛鳥lóng歇tī你ê頂面；hō͘遍地ê野獸食你到飽。Góa beh hiat lí tī tōe--nih, pàng-hē tī chhân-iá, hō͘ khong-tiong ê pe-chiáu lóng hioh tī lí ê téng-bīn; hō͘ piàn-tōe ê iá-siù chia̍h lí kàu pá.

5我beh將你ê肉hiat tī山裡，用你高大ê身屍thūn滿山谷。Góa beh chiong lí ê bah hiat tī soaⁿ-nih, ēng lí koâiⁿ-tōa ê sin-si thūn-móa soaⁿ-kok.

6我koh beh用你ê血，灌ak你所泅ê地；淹到chiah-ê山；河溝beh對你來充滿。Góa koh beh ēng lí ê huih, koàn-ak lí só͘ siû ê tōe; im-kàu chiah ê soaⁿ; hô-kau beh tùi lí lâi chhiong-móa.

7我phah滅你ê時，beh遮蓋chiah-ê天，hō͘眾星烏暗；用密雲遮掩日頭，月亦無發出光。Góa phah-bia̍t lí ê sî, beh jia-khàm chiah ê thiⁿ, hō͘ chèng chhiⁿ o͘-àm; ēng ba̍t-hûn jia-iám ji̍t-thâu, ge̍h ia̍h bô hoat-chhut kng.

8我beh hō͘天ê光tī你ê頂面lóng烏暗；koh hō͘你ê地烏暗；這是主耶和華講ê。Góa beh hō͘ thiⁿ ê kng tī lí ê téng-bīn lóng o͘-àm; koh hō͘ lí ê tōe o͘-àm; che sī Chú Iâ-hô-hoa kóng--ê.

9我hō͘你敗無ê風聲到你所m̄-bat ê ta̍k國，hit時我beh hō͘ chōe-chōe百姓ê心煩惱。Góa hō͘ lí pāi-bô ê hong-siaⁿ kàu lí só͘ m̄-bat ê ta̍k-kok, hit-sî Góa beh hō͘ chōe-chōe peh-sìⁿ ê sim hoân-ló.

10我tī in ê面前舞我ê劍ê時，我beh hō͘ chōe-chōe國 ê百姓為tio̍h你gông-ngia̍h，君王亦beh為tio̍h你大驚惶；tī你tó落去ê日，in ta̍k人為家己ê性命ngia̍uh-ngia̍uh-chhoah。Góa tī in ê bīn-chêng bú Góa ê kiàm ê sî, Góa beh hō͘ chōe-chōe kok ê peh-sìⁿ ūi-tio̍h lí gông-ngia̍h, kun-ông ia̍h beh ūi-tio̍h lí tōa kiaⁿ-hiâⁿ; tī lí tó--lo̍h-khì ê ji̍t, in ta̍k-lâng ūi ka-kī ê sìⁿ-miā ngia̍uh-ngia̍uh-chhoah.

11因為主耶和華án-ni講，巴比倫王ê刀beh臨到你。In-ūi Chú Iâ-hô-hoa án-ni kóng, Pa-pí-lûn ông ê to beh lîm-kàu lí.

12我beh用勇士ê刀hō͘你ê chōe-chōe人倒落去。chiah-ê勇士lóng是列國中強暴ê；in beh hō͘埃及ê驕傲歸tī無，埃及ê眾百姓beh受剿滅。Góa beh ēng ióng-sū ê to hō͘ lí ê chōe-chōe lâng tó--lo̍h-khì. Chiah ê ióng-sū lóng sī lia̍t-kok-tiong kiông-pō--ê; in beh hō͘ Ai-ki̍p ê kiau-ngō͘ kui tī bô, Ai-ki̍p ê chèng peh-sìⁿ beh siū châu-bia̍t.

13我beh tùi埃及chōe-chōe水邊除滅所有ê走獸，人ê腳無koh phah濁chit-ê水，獸ê蹄亦無koh踏伊。Góa beh tùi Ai-ki̍p chōe-chōe chúi-piⁿ tû-bia̍t só͘ ū ê cháu-siù, lâng ê kha bô koh phah-lô chit ê chúi, siù ê tôe ia̍h bô koh ta̍h--i.

14Hit時我beh hō͘ in ê水坐清，hō͘ in ê河流親像油；這是主耶和華講ê。Hit-sî Góa beh hō͘ in ê chúi chē-chheng, hō͘ in ê hô lâu chhin-chhiūⁿ iû; che sī Chú Iâ-hô-hoa kóng--ê.

15我hō͘埃及地荒廢冷靜，chit-ê地絕無從前所充滿ê；koh我攻擊其中一切khiā起ê百姓；hit時in就知我是耶和華。Góa hō͘ Ai-ki̍p tōe hong-hòe léng-chēng, chit ê tōe choa̍t-bô chiông-chêng só͘ chhiong-móa--ê; koh Góa kong-kek kî-tiong it-chhè khiā-khí ê peh-sìⁿ; hit-sî in chiū chai Góa sī Iâ-hô-hoa.

16Chit-ê是哀歌，人beh用chit-ê來哀哭；列國chiah-ê cha-bó͘-gín-á beh用án-ni來哀哭；in為tio̍h埃及kap伊ê眾百姓，亦beh用chit-ê來哀哭；這是主耶和華講ê。Chit-ê sī ai-ko, lâng beh ēng chit-ê lâi ai-khàu; lia̍t-kok chiah ê cha-bó͘-gín-á beh ēng án-ni lâi ai-khàu; in ūi-tio̍h Ai-ki̍p kap i ê chèng peh-sìⁿ, ia̍h beh ēng chit-ê lâi ai-khàu; che sī Chú Iâ-hô-hoa kóng--ê.

17十二年，十二月十五，耶和華ê話臨到我講，Cha̍p-jī--nî, cha̍p-jī ge̍h cha̍p-gō͘, Iâ-hô-hoa ê ōe lîm-kàu góa kóng,

18人子ah，你tio̍h因為埃及ê眾人哀哭；koh tio̍h將埃及kap有名聲ê國chiah-ê cha-bó͘-gín-á，kap落坑ê人，做一下hiat落地下深ê所在。Jîn-chú ah, lí tio̍h in-ūi Ai-ki̍p ê chèng-lâng ai-khàu; koh tio̍h chiong Ai-ki̍p kap ū miâ-siaⁿ ê kok chiah ê cha-bó͘-gín-á, kap lo̍h-khiⁿ ê lâng, chòe chi̍t-ē hiat-lo̍h tōe-ē chhim ê só͘-chāi.

19你ê súi贏過是誰 ah？你tio̍h落去，kap無受割禮ê人相kap倒teh。Lí ê súi iâⁿ-kè chī-chūi ah? lí tio̍h lo̍h-khì, kap bô siū kat-lé ê lâng saⁿ-kap tó--teh.

20In beh倒tī hō͘刀thâi ê人ê中間，伊受交付tī刀劍，tio̍h將伊kap伊ê眾人拖去。In beh tó tī hō͘ to thâi ê lâng ê tiong-kan, i siū kau-hù tī to-kiàm, tio̍h chiong i kap i ê chèng-lâng thoa--khì.

21強猛ê勇士beh tī陰間對伊kap幫贊伊ê講話；in是無受割禮，受刀thâi ê人；已經落去，倒teh無振動。Kiông-béng ê ióng-sū beh tī im-kan tùi i kap pang-chān i--ê kóng-ōe; in sī bô siū kat-lé, siū to thâi ê lâng; í-keng lo̍h--khì, tó-teh bô tín-tāng.

22亞述kap伊ê眾百姓，lóng tī-hia；伊ê墓tī伊ê四圍；in lóng是受thâi，倒tī刀下ê。A-su̍t kap i ê chèng peh-sìⁿ, lóng tī-hia; i ê bōng tī i ê sì-ûi; in lóng sī siū-thâi, tó tī to-ē--ê.

23In ê墓tī坑中極深ê所在，伊ê眾百姓tī伊ê墓ê四周圍，lóng是受thâi倒tī刀下ê；in bat tī活人ê地hō͘人驚惶。In ê bōng tī khiⁿ-tiong ke̍k-chhim ê só͘-chāi, i ê chèng peh-sìⁿ tī i ê bōng ê sì-chiu-ûi, lóng sī siū-thâi tó tī to-ē--ê; in bat tī oa̍h-lâng ê tōe hō͘ lâng kiaⁿ-hiâⁿ.

24Í-lân亦tī-hia，伊ê眾百姓tī伊ê墓ê四圍，lóng是受thâi，倒tī刀下，無受割禮落去地下深ê所在ê；in bat tī活人ê地hō͘人驚惶，koh kap落坑ê人相kap擔當凌辱。Í-lân ia̍h tī-hia, i ê chèng peh-sìⁿ tī i ê bōng ê sì-ûi, lóng-sī siū-thâi, tó tī to-ē, bô siū kat-lé lo̍h-khì tōe-ē chhim ê só͘-chāi--ê; in bat tī oa̍h-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k.

25In kā伊kap伊ê眾百姓，tī受thâi ê人ê中間，安眠床；in ê墓tī伊ê四周圍；in lóng是無受割禮，受刀thâi-ê；in bat tī活人ê地hō͘人驚惶，koh kap落坑ê人相kap擔當凌辱；伊已經hē tī受thâi ê人ê中間。In kā i kap i ê chèng peh-sìⁿ, tī siū-thâi ê lâng ê tiong-kan, an bîn-chhn̂g; in ê bōng tī i ê sì-chiu-ûi; in lóng sī bô siū kat-lé, siū to thâi--ê; in bat tī oa̍h-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k; i í-keng hē tī siū-thâi ê lâng ê tiong-kan.

26Bí-siat、Thó͘-pa，kap伊ê眾百姓，lóng tī-hia；伊ê墓lóng tī伊ê四圍，in lóng是無受割禮，hō͘刀thâi-ê；in bat tī活人ê地，hō͘人驚惶。Bí-siat, Thó͘-pa, kap i ê chèng peh-sìⁿ, lóng tī-hia; i ê bōng lóng tī i ê sì-ûi, in lóng sī bô siū kat-lé, hō͘ to thâi--ê; in bat tī oa̍h-lâng ê tōe, hō͘ lâng kiaⁿ-hiâⁿ.

27In bōe得tio̍h kap hiah-ê無受割禮倒teh ê勇士，相kap倒teh；chiah-ê勇士帶ke-si落陰間；頭殼睏tī刀劍，骨頭頂有in ê罪惡；in bat tī活人ê地hō͘勇士驚惶。In bōe tit-tio̍h kap hiah ê bô siū kat-lé tó-teh ê ióng-sū, saⁿ-kap tó-teh; chiah ê ióng-sū tòa ke-si lo̍h im-kan; thâu-khak khùn tī to-kiàm, kut-thâu-téng ū in ê chōe-ok; in bat tī oa̍h-lâng ê tōe hō͘ ióng-sū kiaⁿ-hiâⁿ.

28你beh敗壞tī無受割禮ê人ê中間，kap hiah-ê受刀thâi ê人相kap倒teh。Lí beh pāi-hoāi tī bô siū kat-lé ê lâng ê tiong-kan, kap hiah-ê siū to thâi ê lâng saⁿ-kap tó-teh.

29Í-tong亦tī-hia，伊hiah-ê國王kap一切ê首領，雖然有勢力，猶原hē tī受thâi ê人ê中間；in beh kap無受割禮ê，以及落坑ê人相kap倒teh。Í-tong ia̍h tī-hia, i hiah ê kok-ông kap it-chhè ê siú-léng, sui-jiân ū sè-le̍k, iû-goân hē tī siū-thâi ê lâng ê tiong-kan; in beh kap bô siū kat-lé--ê, í-ki̍p lo̍h-khiⁿ ê lâng saⁿ-kap tó-teh.

30Tī-hia有北方眾王ê kiáⁿ，kap一切Se-tùn人，lóng kap受thâi ê人落去；in雖然有勢力，hō͘人驚惶，猶原受見笑；in無受割禮，kap受刀thâi-ê相kap倒teh，kap落坑ê人相kap擔當凌辱。Tī-hia ū pak-hng chèng-ông ê kiáⁿ, kap it-chhè Se-tùn lâng, lóng kap siū-thâi ê lâng lo̍h-khì; in sui-jiân ū sè-le̍k, hō͘ lâng kiaⁿ-hiâⁿ, iû-goân siū kiàn-siàu; in bô siū kat-lé, kap siū to thâi--ê saⁿ-kap tó-teh, kap lo̍h-khiⁿ ê lâng saⁿ-kap tam-tng lêng-jio̍k.

31法老kap伊ê軍兵lóng hō͘刀thâi死；法老看見，為tio̍h伊hiah-ê眾人就受安慰；這是主耶和華講ê。Hoat-ló kap i ê kun-peng lóng hō͘ to thâi--sí; Hoat-ló khòaⁿ-kìⁿ, ūi-tio̍h i hiah ê chèng-lâng chiū siū an-ùi; che sī Chú Iâ-hô-hoa kóng--ê.

32我hō͘伊tī活人ê地，做thang驚惶；法老kap伊ê眾人，beh kap受刀thâi ê人相kap hē tī無受割禮ê人ê中間；這是主耶和華講ê。Góa hō͘ i tī oa̍h-lâng ê tōe, chòe thang kiaⁿ-hiâⁿ; Hoat-ló kap i ê chèng-lâng, beh kap siū to thâi ê lâng saⁿ-kap hē tī bô siū kat-lé ê lâng ê tiong-kan; che sī Chú Iâ-hô-hoa kóng--ê.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h對本國ê百姓講話，kā in講，我hō͘刀劍臨到一國ê時，hí一國ê百姓tùi in中間揀一人，設立伊做守望ê；Jîn-chú ah, lí tio̍h tùi pún-kok ê peh-sìⁿ kóng-ōe, kā in kóng, Góa hō͘ to-kiàm lîm-kàu chi̍t-kok ê sî, hí chi̍t-kok ê peh-sìⁿ tùi in tiong-kan kéng chi̍t-lâng, siat-li̍p i chòe siú-bāng ê;

3伊看見刀劍臨到hit所在，若pûn哨角警戒眾百姓；i khòaⁿ-kìⁿ to-kiàm lîm-kàu hit só͘-chāi, nā pûn sàu-kak kéng-kài chèng peh-sìⁿ;

4見若聽見哨角ê聲，無受警戒ê，刀劍若來剿滅伊，伊ê罪beh歸tī伊ê頭殼頂。kìⁿ-nā thiaⁿ-kìⁿ sàu-kak ê siaⁿ, bô siū kéng-kài--ê, to-kiàm nā lâi châu-bia̍t i, i ê chōe beh kui tī i ê thâu-khak-téng.

5伊聽見哨角ê聲，無受警戒，伊ê罪beh歸tī伊本身；伊若受警戒，就會救家己ê性命。I thiaⁿ-kìⁿ sàu-kak ê siaⁿ, bô siū kéng-kài, i ê chōe beh kui tī i pún-sin; i nā siū kéng-kài, chiū ōe kiù ka-kī ê sìⁿ-miā.

6設使守望ê人看見刀劍到，無pûn哨角，致到百姓無受警戒，刀劍來thâi死in中間ê一人，hit-ê人雖然死tī伊ê罪，總是我beh tùi守望ê人討伊失落性命ê罪。Siat-sú siú-bāng ê lâng khòaⁿ-kìⁿ to-kiàm kàu, bô pûn sàu-kak, tì-kàu peh-sìⁿ bô siū kéng-kài, to-kiàm lâi thâi-sí in tiong-kan ê chi̍t-lâng, hit ê lâng sui-jiân sí tī i ê chōe, chóng-sī Góa beh tùi siú-bāng ê lâng thó i sit-lo̍h sìⁿ-miā ê chōe.

7人子ah，我án-ni設立你做以色列家守望ê人，所以你tio̍h聽我嘴內所講ê話，替我警戒in。Jîn-chú ah, Góa án-ni siat-li̍p lí chòe Í-sek-lia̍t-ke siú-bāng ê lâng, só͘-í lí tio̍h thiaⁿ Góa chhùi-lāi só͘ kóng ê ōe, thòe Góa kéng-kài in.

8我對pháiⁿ人講，pháiⁿ人ah，你的確會死；你若無開嘴警戒pháiⁿ人，hō͘伊離開所行ê路；chit-ê pháiⁿ人beh死tī伊ê罪，總是我beh對你討伊失落性命ê罪。Góa tùi pháiⁿ-lâng kóng, Pháiⁿ-lâng ah, lí tek-khak ōe sí; lí nā bô khui-chhùi kéng-kài pháiⁿ-lâng, hō͘ i lī-khui só͘ kiâⁿ ê lō͘; chit ê pháiⁿ-lâng beh sí tī i ê chōe, chóng-sī Góa beh tùi lí thó i sit-lo̍h sìⁿ-miā ê chōe.

9設使你警戒pháiⁿ人oa̍t-tńg離開所行ê路；伊猶原m̄ oa̍t-tńg離開，伊beh死tī伊ê罪，你就會救你ê活命。Siat-sú lí kéng-kài pháiⁿ-lâng oa̍t-tńg lī-khui só͘ kiâⁿ ê lō͘; i iû-goân m̄ oa̍t-tńg lī-khui, i beh sí tī i ê chōe, lí chiū ōe kiù lí ê oa̍h-miā.

10人子ah，你tio̍h對以色列家講，Lín常常án-ni講，阮ê過失阮ê罪惡，tī阮ê身上；阮是因為án-ni漸漸消無，thái-thó ōe活ah？Jîn-chú ah, lí tio̍h tùi Í-sek-lia̍t-ke kóng, Lín siông-siông án-ni kóng, Goán ê kè-sit goán ê chōe-ok, tī goán ê sin-chiūⁿ; goán sī in-ūi án-ni chiām-chiām siau-bô, thái-thó ōe oa̍h ah?

11你tio̍h對in講，主耶和華講，我kí我ê永活來chiù-chōa，我斷斷無歡喜pháiⁿ人死無，獨獨歡喜pháiⁿ人oa̍t-tńg離開所行ê路來活；以色列家ah，lín tio̍h oa̍t倒tńg，離開pháiⁿ路，lín啥事beh處死ah？Lí tio̍h tùi in kóng, Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa toàn-toàn bô hoaⁿ-hí pháiⁿ-lâng sí-bô, to̍k-to̍k hoaⁿ-hí pháiⁿ-lâng oa̍t-tńg lī-khui só͘ kiâⁿ ê lō͘ lâi oa̍h; Í-sek-lia̍t-ke ah, lín tio̍h oa̍t-tò-tńg, lī-khui pháiⁿ-lō͘, lín siáⁿ-sū beh chhú-sí ah?

12人子ah，你tio̍h對你ê百姓講，義人ê義，tī伊犯罪ê日bōe能救伊；論到pháiⁿ人ê pháiⁿ，tī伊oa̍t-tńg離開伊ê pháiⁿ所行ê日，亦bōe會hō͘伊跋倒；義人tī犯罪ê日，也bōe能因為伊ê義來得tio̍h活。Jîn-chú ah, lí tio̍h tùi lí ê peh-sìⁿ kóng, Gī-lâng ê gī, tī i hoān-chōe ê ji̍t bōe-ōe kiù i; lūn-kàu pháiⁿ-lâng ê pháiⁿ, tī i oa̍t-tńg lī-khui i ê pháiⁿ só͘ kiâⁿ ê ji̍t, ia̍h bōe-ōe hō͘ i poa̍h-tó; gī-lâng tī hoān-chōe ê ji̍t, iā bōe-ōe in-ūi i ê gī lâi tit-tio̍h oa̍h.

13我對義人講，伊的確活；伊若óa靠伊ê義來行pháiⁿ，就伊所行ê義，lóng無得tio̍h記念；伊beh因為所行ê pháiⁿ來死。Góa tùi gī-lâng kóng, i tek-khak oa̍h; i nā óa-khò i ê gī lâi kiâⁿ-pháiⁿ, chiū i só͘-kiâⁿ ê gī, lóng bô tit-tio̍h kì-liām; i beh in-ūi só͘ kiâⁿ ê pháiⁿ lâi sí.

14Koh，我對pháiⁿ人講，你的確死，伊若oa̍t-tńg離開伊ê罪，行正直kap合理ê事；Koh, Góa tùi pháiⁿ-lâng kóng, Lí tek-khak sí, i nā oa̍t-tńg lī-khui i ê chōe, kiâⁿ chèng-ti̍t kap ha̍p-lí ê sū;

15Koh還人ê 當頭kap所搶人ê物，遵thàn活命ê律例，無koh做pháiⁿ，伊的確活，無致到死。koh hêng lâng ê tǹg-thâu kap só͘ chhiúⁿ lâng ê mi̍h, chun-thàn oa̍h-miā ê lu̍t-lē, bô koh chòe pháiⁿ, i tek-khak oa̍h, bô tì-kàu sí.

16伊所犯一切ê罪，無koh kā伊記得；伊行正直kap合理ê事，的確ōe活。I só͘ hoān it-chhè ê chōe, bô koh kā i kì-tit; i kiâⁿ chèng-ti̍t kap ha̍p-lí ê sū, tek-khak ōe oa̍h.

17你ê百姓iáu teh講，主ê路無公平，其實是in ê路無公平。Lí ê peh-sìⁿ iáu teh kóng, Chú ê lō͘ bô kong-pêng, kî-si̍t sī in ê lō͘ bô kong-pêng.

18義人oa̍t-tńg離開伊ê義，來行pháiⁿ；就beh因為án-ni來死。Gī-lâng oa̍t-tńg lī-khui i ê gī, lâi kiâⁿ-pháiⁿ; chiū beh in-ūi án-ni lâi sí.

19Pháiⁿ人oa̍t-tńg離開伊ê pháiⁿ，行正直kap合理ê事；就beh因為án-ni來活。Pháiⁿ-lâng oa̍t-tńg lī-khui i ê pháiⁿ, kiâⁿ chèng-ti̍t kap ha̍p-lí ê sū; chiū beh in-ūi án-ni lâi oa̍h.

20Lín iáu teh講，主ê路無公平；以色列家ah，我beh照lín ta̍k人所行ê，審判lín。Lín iáu teh kóng, Chú ê lō͘ bô kong-pêng; Í-sek-lia̍t-ke ah, Góa beh chiàu lín ta̍k-lâng só͘-kiâⁿ--ê, sím-phòaⁿ lín.

21阮受掠ê了後十二年，十月初五，有一人tùi耶路撒冷逃走到我chia；講，城已經攻破。Goán siū lia̍h ê liáu-āu cha̍p-jī-nî, cha̍p-ge̍h chhoe-gō͘, ū chi̍t-lâng tùi Iâ-lō͘-sat-léng tô-cháu kàu góa chia; kóng, Siâⁿ í-keng kong-phòa.

22逃走ê人iáu未到，前一日ê ê-hng，耶和華ê手hē tī我ê身上；開我ê嘴；到隔早起，hit人來到我chia；我ê嘴就開，無koh啞口。Tô-cháu ê lâng iáu-bē kàu, chêng chi̍t-ji̍t ê ê-hng, Iâ-hô-hoa ê chhiú hē tī góa ê sin-chiūⁿ; khui góa ê chhùi; kàu keh chá-khí, hit lâng lâi kàu góa chia; góa ê chhùi chiū khui, bô koh é-káu.

23耶和華ê話臨到我講，Iâ-hô-hoa ê ōe lîm-kàu góa kóng,

24人子ah，tiàm tī以色列荒廢ê地ê人teh講，亞伯拉罕獨獨一人，有得tio̍h chit-ê地做業；咱人額真chōe，chit-ê地是hō͘咱做業ê。Jîn-chú ah, tiàm tī Í-sek-lia̍t hong-hòe ê tōe ê lâng teh kóng, A-pek-la̍h-hán to̍k-to̍k chi̍t-lâng, ū tit-tio̍h chit ê tōe chòe-gia̍p; lán lâng-gia̍h chin-chōe, chit ê tōe sī hō͘ lán chòe-gia̍p--ê.

25所以你tio̍h kā in講，主耶和華án-ni講，Lín食iáu有血ê肉，koh kia̍h起lín ê目睭，仰望lín ê偶像；koh thâi人流血，lín iáu ōe得tio̍h chit-ê地做業mah？Só͘-í lí tio̍h kā in kóng, Chú Iâ-hô-hoa án-ni kóng, Lín chia̍h iáu ū huih ê bah, koh kia̍h-khí lín ê ba̍k-chiu, gióng-bōng lín ê ngó͘-siōng; koh thâi-lâng lâu-huih, lín iáu ōe tit-tio̍h chit ê tōe chòe-gia̍p mah?

26Lín óa靠lín ê刀劍，行可惡ê事；人人phah lâ-sâm厝邊ê bó͘；lín iáu ōe得tio̍h chit-ê地做業mah？Lín óa-khò lín ê to-kiàm, kiâⁿ khó-ò͘ⁿ ê sū; lâng-lâng phah lâ-sâm chhù-piⁿ ê bó͘; lín iáu ōe tit-tio̍h chit ê tōe chòe-gia̍p mah?

27你tio̍h對in án-ni講，主耶和華án-ni講，我kí我ê永活來chiù-chōa；tī拋荒ê所在-ê，beh倒tī刀下，tī田野ê中間-ê，我beh交in hō͘野獸吞食；tī衛所kap洞內ê，beh死tī瘟疫。Lí tio̍h tùi in án-ni kóng, Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa; tī pha-hng ê só͘-chāi--ê, beh tó tī to-ē, tī chhân-iá ê tiong-kan--ê, Góa beh kau in hō͘ iá-siù thun-chia̍h; tī ōe-só͘ kap tōng-lāi--ê, beh sí tī un-e̍k.

28我beh hō͘ chit-ê地冷靜，hō͘人gông-ngia̍h；伊因為勢力ê驕傲也beh soah；以色列chiah-ê山lóng beh冷靜，無人經過。Góa beh hō͘ chit ê tōe léng-chēng, hō͘ lâng gông-ngia̍h; i in-ūi sè-le̍k ê kiau-ngō͘ iā beh soah; Í-sek-lia̍t chiah ê soaⁿ lóng beh léng-chēng, bô lâng keng-kè.

29我因為in所行一切可惡ê事，hō͘地拋荒；致到人gông-ngia̍h；hit時in就知我是耶和華。Góa in-ūi in só͘ kiâⁿ it-chhè khó-ò͘ⁿ ê sū, hō͘ tōe pha-hng; tì-kàu lâng gông-ngia̍h; hit-sî in chiū chai Góa sī Iâ-hô-hoa.

30人子ah，你ê百姓tī厝邊，tī厝門口，談論你；兄弟對兄弟相kap講，來ah，來聽，聽看耶和華ê話是講甚麼。Jîn-chú ah, Lí ê peh-sìⁿ tī chhù-piⁿ, tī chhù mn̂g-kháu, tâm-lūn lí; hiaⁿ-tī tùi hiaⁿ-tī saⁿ-kap kóng, Lâi ah, lâi thiaⁿ, thiaⁿ-khòaⁿ Iâ-hô-hoa ê ōe sī kóng sím-mi̍h.

31In來你chia，親像百姓來聚會；坐tī你ê面前，親像是我ê百姓；in聽你ê話，亦無去行；因為in ê嘴顯出chōe-chōe親愛，總是心是teh jip入錢。In lâi lí chia, chhin-chhiūⁿ peh-sìⁿ lâi chū-hōe; chē tī lí ê bīn-chêng, chhin-chhiūⁿ sī Góa ê peh-sìⁿ; in thiaⁿ lí ê ōe, ia̍h bô khì-kiâⁿ; in-ūi in ê chhùi hián-chhut chōe-chōe chhin-ài, chóng-sī sim sī teh jip chîⁿ.

32看ah，in看你親像gâu作樂，好聲音ê人所唱ê雅歌；in聽你ê話也無去行。Khòaⁿ ah, in khòaⁿ lí chhin-chhiūⁿ gâu chok-ga̍k, hó siaⁿ-im ê lâng só͘ chhiùⁿ ê ngá-ko; in thiaⁿ lí ê ōe iā bô khì kiâⁿ.

33看ah，所講ê話緊緊beh成；到成ê時，in就知bat有先知tī in中間。Khòaⁿ ah, só͘ kóng ê ōe kín-kín beh chiâⁿ; kàu chiâⁿ ê sî, in chiū chai bat ū sian-ti tī in tiong-kan.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h宣傳攻擊以色列chiah-ê牧者；你tio̍h宣傳來對in講，主耶和華對chiah-ê牧者án-ni講，災厄ah，以色列chiah-ê牧者，因為in養飼家己；牧者kiám m̄應該養飼羊群mah？Jîn-chú ah, lí tio̍h soan-thoân kong-kek Í-sek-lia̍t chiah ê bo̍k-chiá; lí tio̍h soan-thoân lâi tùi in kóng, Chú Iâ-hô-hoa tùi chiah ê bo̍k-chiá án-ni kóng, Chai-ē ah, Í-sek-lia̍t chiah ê bo̍k-chiá, in-ūi in iúⁿ-chhī ka-kī; bo̍k-chiá kiám m̄ eng-kai iúⁿ-chhī iûⁿ-kûn mah?

3Lín食伊ê油，穿伊ê毛，thâi伊ê肥ê，也無養飼羊群。Lín chia̍h i ê iû, chhēng i ê mn̂g, thâi i ê pûi--ê, iā bô iúⁿ-chhī iûⁿ-kûn.

4軟弱ê，lín無顧hō͘伊勇；破病ê，lín無kā伊醫治；受傷ê，lín無kā伊包；受趕逐ê，lín無chhōa伊tò來，失落ê，lín無chhē伊；獨獨用強暴，嚴嚴ê管轄。Loán-jio̍k--ê, lín bô kò͘ hō͘ i ióng; phòa-pīⁿ--ê, lín bô kā i i-tī; siū-siong--ê, lín bô kā i pau; siū kóaⁿ-tio̍k--ê, lín bô chhōa i tò--lâi, sit-lo̍h--ê, lín bô chhē--i; to̍k-to̍k ēng kiông-pō, giâm-giâm ê koán-hat.

5因為無牧者，羊就四散；已經四散，就做一切野獸ê食物。In-ūi bô bo̍k-chiá, iûⁿ chiū sì-sòaⁿ; í-keng sì-sòaⁿ, chiū chòe it-chhè iá-siù ê chia̍h-mi̍h.

6我ê羊四界行tī chiah-ê山裡，tī ta̍k-ê高ê山頂，四散tī全地，無人去追，無人去chhē。Góa ê iûⁿ sì-kòe kiâⁿ tī chiah ê soaⁿ--nih, tī ta̍k-ê koâiⁿ ê soaⁿ-téng, sì-sòaⁿ tī choân-tōe, bô lâng khì tui, bô lâng khì chhē.

7所以lín chiah-ê牧者tio̍h聽耶和華ê話。Só͘-í lín chiah ê bo̍k-chiá tio̍h thiaⁿ Iâ-hô-hoa ê ōe.

8主耶和華講，我kí我ê永活來chiù-chōa，我ê羊因為無牧者，就成做受搶ê物，羊也做一切野獸ê食物；也我ê牧者無chhē我ê羊；chiah-ê牧者因為in養飼家己，無養飼我ê羊；Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa ê iûⁿ in-ūi bô bo̍k-chiá, chiū chiâⁿ-chòe siū-chhiúⁿ ê mi̍h, iûⁿ iā chòe it-chhè iá-siù ê chia̍h-mi̍h; iā Góa ê bo̍k-chiá bô chhē Góa ê iûⁿ; chiah ê bo̍k-chiá in-ūi in iúⁿ-chhī ka-kī, bô iúⁿ-chhī Góa ê iûⁿ;

9所以lín chiah-ê牧者tio̍h聽耶和華ê話；só͘-í lín chiah ê bo̍k-chiá tio̍h thiaⁿ Iâ-hô-hoa ê ōe;

10主耶和華án-ni講，我kap牧者做對敵，beh tùi in ê手追討我ê羊，hō͘ in無koh養飼羊群；牧者也無koh養飼家己；我beh救我ê羊脫離in ê嘴，無koh做in ê食物。Chú Iâ-hô-hoa án-ni kóng, Góa kap bo̍k-chiá chòe tùi-te̍k, beh tùi in ê chhiú tui-thó Góa ê iûⁿ, hō͘ in bô koh iúⁿ-chhī iûⁿ-kûn; bo̍k-chiá iā bô koh iúⁿ-chhī ka-kī; Góa beh kiù Góa ê iûⁿ thoat-lī in ê chhùi, bô koh chòe in ê chia̍h-mi̍h.

11因為主耶和華án-ni講，看ah，我beh本身chhē我ê羊，來chhē-tio̍h伊。In-ūi Chú Iâ-hô-hoa án-ni kóng, Khòaⁿ ah, Góa beh pún-sin chhē Góa ê iûⁿ, lâi chhē-tio̍h--i.

12牧者tī羊群四散ê日，怎樣chhē伊ê羊，我也beh親像án-ni chhē我ê羊；chiah-ê羊tī密雲烏暗ê日，四散到ta̍k所在，我beh tùi-hia救in tò來。Bo̍k-chiá tī iûⁿ-kûn sì-sòaⁿ ê ji̍t, cháiⁿ-iūⁿ chhē i ê iûⁿ, Góa iā beh chhin-chhiūⁿ án-ni chhē Góa ê iûⁿ; chiah ê iûⁿ tī ba̍t-hûn o͘-àm ê ji̍t, sì-sòaⁿ kàu ta̍k só͘-chāi, Góa beh tùi-hia kiù in tò--lâi.

13我beh tùi列國中chhōa in出，tùi ta̍k國ê內面聚集in，chhōa in tò來in ê本所在；也beh tī以色列山chiah-ê溪邊，境內一切thang khiā起ê所在，來養飼in。Góa beh tùi lia̍t-kok-tiong chhōa in chhut, tùi ta̍k-kok ê lāi-bīn chū-chi̍p in, chhōa in tò-lâi in ê pún só͘-chāi; iā beh tī Í-sek-lia̍t soaⁿ chiah ê khoe-piⁿ, kéng-lāi it-chhè thang khiā-khí ê só͘-chāi, lâi iúⁿ-chhī in.

14我beh tī好好ê草場養飼in，in ê羊寮beh tī以色列高位ê山；in beh tī好好ê羊寮內倒teh睏，也tī以色列山肥súi ê草場食草。Góa beh tī hó-hó ê chháu-tiûⁿ iúⁿ-chhī in, in ê iûⁿ-tiâu beh tī Í-sek-lia̍t koâiⁿ-ūi ê soaⁿ; in beh tī hó-hó ê iûⁿ-tiâu-lāi tó-teh-khùn, iā tī Í-sek-lia̍t soaⁿ pûi-súi ê chháu-tiûⁿ chia̍h-chháu.

15主耶和華講，我beh本身養飼我ê羊，hō͘ in倒teh睏。Chú Iâ-hô-hoa kóng, Góa beh pún-sin iúⁿ-chhī Góa ê iûⁿ, hō͘ in tó-teh-khùn.

16失落ê我beh chhē伊；受趕逐ê，我beh chhōa伊tò來；受傷ê我beh包伊；破病ê，我beh醫治伊；獨獨肥ê，勇ê，我beh除滅伊，也beh秉公養飼in。Sit-lo̍h--ê Góa beh chhē i; siū kóaⁿ-tio̍k--ê, Góa beh chhōa i tò-lâi; siū-siong--ê Góa beh pau--i; phòa-pīⁿ--ê, Góa beh i-tī i; to̍k-to̍k pûi--ê, ióng--ê, Góa beh tû-bia̍t--i, iā beh péng-kong iúⁿ-chhī in.

17我ê羊群ah，論到lín，主耶和華án-ni講，我beh tī羊kap羊ê中間，公ê綿羊kap公ê山羊ê中間，行判斷。Góa ê iûⁿ-kûn ah, lūn-kàu lín, Chú Iâ-hô-hoa án-ni kóng, Góa beh tī iûⁿ kap iûⁿ ê tiong-kan, kang ê mî-iûⁿ kap kang ê soaⁿ-iûⁿ ê tiong-kan, kiâⁿ phòaⁿ-toàn.

18你tī好好ê草場食草，iáu掠做小khóa事mah？chhun ê草lín竟然用腳thún踏伊？lín lim清ê水；chhun-ê lín竟然用腳phah濁伊？Lí tī hó-hó ê chháu-tiûⁿ chia̍h-chháu, iáu lia̍h-chòe sió-khóa sū mah? chhun ê chháu lín kéng-jiân ēng kha thún-ta̍h--i? lín lim chheng ê chúi; chhun--ê lín kéng-jiân ēng kha phah-lô--i?

19論到我ê羊是食lín用腳踏ê，lim lín用腳phah濁ê。Lūn-kàu Góa ê iûⁿ sī chia̍h lín ēng kha ta̍h--ê, lim lín ēng kha phah-lô--ê.

20所以主耶和華對in án-ni講，看ah，我本身tī肥ê羊kap瘦ê羊ê中間，行判斷。Só͘-í Chú Iâ-hô-hoa tùi in án-ni kóng, Khòaⁿ ah, Góa pún-sin tī pûi ê iûⁿ kap sán ê iûⁿ ê tiong-kan, kiâⁿ phòaⁿ-toàn.

21因為lín用身軀，用肩頭khoeh-in，用lín ê角觸破病ê，致到hō͘ in四散tī外面。In-ūi lín ēng sin-khu, ēng keng-thâu khoeh--in, ēng lín ê kak tak phòa-pīⁿ--ê, tì-kàu hō͘ in sì-sòaⁿ tī gōa-bīn.

22所以我beh拯救我ê羊群，無koh做受搶ê物；我亦beh tī羊kap羊ê中間行判斷。Só͘-í Góa beh chín-kiù Góa ê iûⁿ-kûn, bô koh chòe siū chhiúⁿ ê mi̍h; Góa ia̍h beh tī iûⁿ kap iûⁿ ê tiong-kan kiâⁿ phòaⁿ-toàn.

23我beh設立一個牧者，照顧in，伊beh養飼in；就是我ê奴僕大衛；伊beh養飼in，做in ê牧者。Góa beh siat-li̍p chi̍t ê bo̍k-chiá, chiàu-kò͘ in, i beh iúⁿ-chhī in; chiū-sī Góa ê lô͘-po̍k Tāi-pi̍t; i beh iúⁿ-chhī in, chòe in ê bo̍k-chiá.

24我耶和華beh做in ê上帝；我ê奴僕大衛beh tī in ê中間做首領；這是我耶和華講ê。Góa Iâ-hô-hoa beh chòe in ê Siōng-tè; Góa ê lô͘-po̍k Tāi-pi̍t beh tī in ê tiong-kan chòe siú-léng; che sī Góa Iâ-hô-hoa kóng--ê.

25我beh kap in立平安ê約，hō͘惡獸tùi境內斷絕；in就beh安然khiā起tī曠野，睏tī樹林內。Góa beh kap in li̍p pêng-an ê iok, hō͘ ok-siù tùi kéng-lāi toān-choa̍t; in chiū beh an-jiân khiā-khí tī khòng-iá, khùn tī chhiū-nâ-lāi.

26我beh hō͘ in kap我ê山四圍ê所在成做福氣ê源頭；我亦beh照時落雨，beh有施福氣ê大雨。Góa beh hō͘ in kap Góa ê soaⁿ sì-ûi ê só͘-chāi chiâⁿ-chòe hok-khì ê goân-thâu; Góa ia̍h beh chiàu-sî lo̍h-hō͘, beh ū si hok-khì ê tōa-hō͘.

27田野ê樹beh結果子；地也beh出產；in beh安然khiā起tī本所在；我at折in所背ê擔，救in脫離hit-ê掠in做奴才ê人ê手；hit時in就知我是耶和華。Chhân-iá ê chhiū beh kiat ké-chí; tōe iā beh chhut-sán; in beh an-jiân khiā-khí tī pún só͘-chāi; Góa at-chi̍h in só͘ pē ê taⁿ, kiù in thoat-lī hit ê lia̍h in chòe lô͘-châi ê lâng ê chhiú; hit-sî in chiū chai Góa sī Iâ-hô-hoa.

28In無koh做外邦人所搶ê物，地上ê野獸也無koh吞食in；是beh安然khiā起，無人hō͘ in驚惶。In bô koh chòe gōa-pang lâng só͘ chhiúⁿ ê mi̍h, tōe-chiūⁿ ê iá-siù iā bô koh thun-chia̍h in; sī beh an-jiân khiā-khí, bô lâng hō͘ in kiaⁿ-hiâⁿ.

29我beh kā in興起一個出名栽種ê所在；in tī境內，無koh hō͘飢荒所滅；也無koh受tio̍h外邦人ê凌辱。Góa beh kā in heng-khí chi̍t ê chhut-miâ chai-chèng ê só͘-chāi; in tī kéng-lāi, bô koh hō͘ ki-hng só͘ bia̍t; iā bô koh siū-tio̍h gōa-pang-lâng ê lêng-jio̍k.

30In beh知我耶和華in ê上帝，是kap in tī-teh；也知in以色列家是我ê百姓；這是主耶和華講ê。In beh chai Góa Iâ-hô-hoa in ê Siōng-tè, sī kap in tī-teh; iā chai in Í-sek-lia̍t-ke sī Góa ê peh-sìⁿ; che sī Chú Iâ-hô-hoa kóng--ê.

31Lín是我ê羊，是我草場ê羊；lín是人；我也是lín ê上帝；這是主耶和華講ê。Lín sī Góa ê iûⁿ, sī Góa chháu-tiûⁿ ê iûⁿ; lín sī lâng; Góa iā sī lín ê Siōng-tè; che sī Chú Iâ-hô-hoa kóng--ê.