1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h面ǹg Se-jíⁿ山，宣傳來攻擊伊。Jîn-chú ah, lí tio̍h bīn ǹg Se-jíⁿ soaⁿ, soan-thoân lâi kong-kek i.

3對伊講，主耶和華án-ni講，看ah，Se-jíⁿ山ah，我kap你做對敵，我beh伸手攻擊你；hō͘你冷靜，thang hō͘人gông-ngia̍h。Tùi i kóng, Chú Iâ-hô-hoa án-ni kóng, Khòaⁿ ah, Se-jíⁿ soaⁿ ah, Góa kap lí chòe tùi-te̍k, Góa beh chhun-chhiú kong-kek lí; hō͘ lí léng-chēng, thang hō͘ lâng gông-ngia̍h.

4我beh hō͘你chiah-ê城變做拋荒，hō͘你冷靜；你就知我是耶和華。Góa beh hō͘ lí chiah ê siâⁿ pìⁿ-chòe pha-hng, hō͘ lí léng-chēng; lí chiū chai Góa sī Iâ-hô-hoa.

5因為你khǹg永遠ê怨恨；tī以色列族tú-tio̍h災厄，罪過結局ê時，你將in交hō͘刀劍ê勢力。In-ūi lí khǹg éng-oán ê oàn-hūn; tī Í-sek-lia̍t cho̍k tú-tio̍h chai-ē, chōe-kòa kiat-kio̍k ê sî, lí chiong in kau hō͘ to-kiàm ê sè-le̍k.

6所以主耶和華án-ni講，我指我ê永活來chiù-chōa，我的確hō͘你tú-tio̍h流血ê報應；罪的確追趕你；你已經無怨恨thâi人流血，所以chit-ê罪的確追jip你。Só͘-í Chú Iâ-hô-hoa án-ni kóng, Góa chí Góa ê éng-oa̍h lâi chiù-chōa, Góa tek-khak hō͘ lí tú-tio̍h lâu-huih ê pò-èng; chōe tek-khak tui-kóaⁿ lí; lí í-keng bô oàn-hūn thâi lâng lâu huih, só͘-í chit ê chōe tek-khak tui-jip lí.

7我beh hō͘ Se-jíⁿ山拋荒冷靜；tùi-hia往來ê人我beh剪除伊。Góa beh hō͘ Se-jíⁿ-soaⁿ pha-hng léng-chēng; tùi-hia óng-lâi ê lâng Góa beh chián-tû i.

8我beh hō͘伊hiah-ê山，受thâi ê人滿滿；hō͘刀劍thâi死ê beh倒tī你ê小山，kap山谷，kap一切ê坑溝。Góa beh hō͘ i hiah ê soaⁿ, siū thâi ê lâng móa-móa; hō͘ to-kiàm thâi-sí--ê beh tó tī lí ê sió-soaⁿ, kap soaⁿ-kok, kap it-chhè ê khiⁿ-kau.

9我beh hō͘你永遠拋荒，你chiah-ê城的確無人khiā起；就lín的確知我是耶和華。Góa beh hō͘ lí éng-oán pha-hng, lí chiah ê siâⁿ tek-khak bô lâng khiā-khí; chiū lín tek-khak chai Góa sī Iâ-hô-hoa.

10因為lín講，Chit兩國兩個地方，lóng beh歸我，阮beh得tio̍h；其實耶和華tī-hia。In-ūi lín kóng, Chí nn̄g-kok nn̄g ê tōe-hng, lóng beh kui góa, goán beh tit-tio̍h; kî-si̍t Iâ-hô-hoa tī-hia.

11所以主耶和華án-ni講，我kí我ê永活來chiù-chōa；我beh照你ê受氣，kap照你為tio̍h怨恨來行tī in ê怨妒，款待你；就我審判你ê時beh顯明家己tī in中間。Só͘-í Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa; Góa beh chiàu lí ê siū-khì, kap chiàu lí ūi-tio̍h oàn-hūn lâi kiâⁿ tī in ê oàn-tò͘, khoán-thāi lí; chiū Góa sím-phòaⁿ lí ê sî beh hián-bêng ka-kī tī in tiong-kan.

12你就知我耶和華已經聽見你攻擊以色列chiah-ê山所講ê謗瀆，是講，拋荒lah，in已經交tī阮，hō͘阮thang吞伊。Lí chiū chai Góa Iâ-hô-hoa í-keng thiaⁿ-kìⁿ lí kong-kek Í-sek-lia̍t chiah ê soaⁿ só͘ kóng ê pòng-to̍k, sī kóng, Pha-hng lah, in í-keng kau tī goán, hō͘ goán thang thun i.

13Koh lín用嘴ǹg我來家己誇口；加添lín chiah-ê話來攻擊我；我聽見lah。Koh lín ēng chhùi ǹg Góa lâi ka-kī khoa-kháu; ke-thiⁿ lín chiah ê ōe lâi kong-kek Góa; Góa thiaⁿ-kìⁿ lah.

14主耶和華án-ni講，當全地歡喜ê時，我beh hō͘你拋荒。Chú Iâ-hô-hoa án-ni kóng, Tng choân-tōe hoaⁿ-hí ê sî, Góa beh hō͘ lí pha-hng.

15你因為以色列家ê基業拋荒，來歡喜；我也beh án-ni款待你；Se-jíⁿ山ah，你beh拋荒，以及Í-tong全地也án-ni；in就知我是耶和華。Lí in-ūi Í-sek-lia̍t-ke ê ki-gia̍p pha-hng, lâi hoaⁿ-hí; Góa iā beh án-ni khoán-thāi lí; Se-jíⁿ soaⁿ ah, lí beh pha-hng, í-ki̍p Í-tong choân-tōe iā án-ni; in chiū chai Góa sī Iâ-hô-hoa.

1人子ah，你tio̍h對以色列chiah-ê山來宣傳，講，以色列chiah-ê山ah，tio̍h聽耶和華ê話。Jîn-chú ah, lí tio̍h tùi Í-sek-lia̍t chiah ê soaⁿ lâi soan-thoân, kóng, Í-sek-lia̍t chiah ê soaⁿ ah, tio̍h thiaⁿ Iâ-hô-hoa ê ōe.

2主耶和華án-ni講，因為對敵攻擊你講，Hō͘-chāi，古早高ê所在lóng hō͘阮做業lah。Chú Iâ-hô-hoa án-ni kóng, In-ūi tùi-te̍k kong-kek lí kóng, Hō͘--chāi, kó͘-chá koâiⁿ ê só͘-chāi lóng hō͘ goán chòe-gia̍p lah.

3所以你tio̍h宣傳講，主耶和華án-ni講，因為in hō͘你拋荒，tī四圍吞咬你；beh hō͘你歸tī所chhun ê外邦人做業；也hō͘厚口舌ê人議論你，hō͘眾百姓譭謗你；Só͘-í lí tio̍h soan-thoân kóng, Chú Iâ-hô-hoa án-ni kóng, In-ūi in hō͘ lí pha-hng, tī sì-ûi thun-kā lí; beh hō͘ lí kui tī só͘ chhun ê gōa-pang-lâng chòe gia̍p; iā hō͘ kāu-kháu-sia̍t ê lâng gī-lūn lí, hō͘ chèng peh-sìⁿ húi-pòng lí;

4所以以色列chiah-ê山ah，tio̍h聽主耶和華ê話：主耶和華tùi chiah-ê山，chiah-ê領，chiah-ê坑溝，chiah-ê山谷，chiah-ê拋荒ê所在，受棄sak ê城，hō͘四圍所chhun ê外邦人搶劫譏刺ê，án-ni講；só͘-í Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe: Chú Iâ-hô-hoa tùi chiah ê soaⁿ, chiah ê niá, chiah ê khiⁿ-kau, chiah ê soaⁿ-kok, chiah ê pha-hng ê só͘-chāi, siū khì-sak ê siâⁿ, hō͘ sì-ûi só͘ chhun ê gōa-pang-lâng chhiúⁿ-kiap ki-chhì--ê, án-ni kóng;

5所以主耶和華án-ni講，我實在tī熱熱ê怨妒，用話責備列邦所chhun-ê以及Í-tong ê全地；因為in分派我ê地做家己ê業；滿心歡喜，神魂藐視；ài趕逐伊ê百姓，來搶劫伊。só͘-í Chú Iâ-hô-hoa án-ni kóng, Góa si̍t-chāi tī jia̍t-jia̍t ê oàn-tò͘, ēng ōe chek-pī lia̍t-pang só͘ chhun--ê í-ki̍p Í-tong ê choân-tōe; in-ūi in hun-phài Góa ê tōe chòe ka-kī ê gia̍p; móa-sim hoaⁿ-hí, sîn-hûn biáu-sī; ài kóaⁿ-tio̍k i ê peh-sìⁿ, lâi chhiúⁿ-kiap--i.

6所以你tio̍h論以色列地來宣傳；tùi伊chiah-ê山，chiah-ê領，chiah-ê坑溝，chiah-ê山谷講，主耶和華án-ni講，看ah，我tī我ê怨妒，kap我ê大受氣來講，因為你已經受異邦人ê凌辱；Só͘-í lí tio̍h lūn Í-sek-lia̍t tōe lâi soan-thoân; tùi i chiah ê soaⁿ, chiah ê niá, chiah ê khiⁿ-kau, chiah ê soaⁿ-kok kóng, Chú Iâ-hô-hoa án-ni kóng, Khòaⁿ ah, Góa tī góa ê oàn-tò͘, kap Góa ê tōa siū-khì lâi kóng, in-ūi lí í-keng siū īⁿ-pang lâng ê lêng-jio̍k;

7所以主耶和華án-ni講，我舉起我ê手，講，Tī lín四圍ê異邦人，in實在beh受in ê凌辱。só͘-í Chú Iâ-hô-hoa án-ni kóng, Góa kú-khí Góa ê chhiú, kóng, Tī lín sì-ûi ê īⁿ-pang lâng, in si̍t-chāi beh siū in ê lêng-jio̍k.

8獨獨lín以色列chiah-ê山ah，lín的確發出lín ê枝椏，koh beh結果子hō͘我ê百姓以色列；因為in近近beh到lah。To̍k-to̍k lín Í-sek-lia̍t chiah ê soaⁿ ah, lín tek-khak hoat-chhut lín ê ki-oāiⁿ, koh beh kiat ké-chí hō͘ Góa ê peh-sìⁿ Í-sek-lia̍t; in-ūi in kūn-kūn beh kàu lah.

9看ah，我是為lín ê，我beh oa̍t-tńg ǹg lín，就lín beh hō͘人種作。Khòaⁿ ah, Góa sī ūi lín ê, góa beh oa̍t-tńg ǹg lín, chiū lín beh hō͘ lâng chèng-choh.

10我koh beh加添人tī lín ê頂面，就是以色列家家戶戶，一切lóng án-ni；就伊chiah-ê城beh有人khiā起；拋荒ê所在得tio̍h起造。Góa koh beh ke-thiⁿ lâng tī lín ê téng-bīn, chiū-sī Í-sek-lia̍t ke-ke hō͘-hō͘, it-chhè lóng án-ni; chiū i chiah ê siâⁿ beh ū lâng khiā-khí; pha-hng ê só͘-chāi tit-tio̍h khí-chō.

11我也beh加添人kap cheng-siⁿ tī lín ê頂面；in beh生湠真chōe；我beh hō͘ lín照舊有人khiā起；koh beh好款待lín，贏過起頭ê時；lín就知我是耶和華。Góa iā beh ke-thiⁿ lâng kap cheng-siⁿ tī lín ê téng-bīn; in beh siⁿ-thòaⁿ chin-chōe; Góa beh hō͘ lín chiàu-kū ū lâng khiā-khí; koh beh hó khoán-thāi lín, iâⁿ-kè khí-thâu ê sî; lín chiū chai Góa sī Iâ-hô-hoa.

12我beh hō͘人行tī lín ê頂面，就是我ê百姓以色列；in beh得tio̍h你，你beh做in ê業；你也無koh hō͘ in絕嗣。Góa beh hō͘ lâng kiâⁿ tī lín ê téng-bīn, chiū-sī Góa ê peh-sìⁿ Í-sek-lia̍t; in beh tit-tio̍h lí, lí beh chòe in ê gia̍p; lí iā bô koh hō͘ in choa̍t-sû.

13主耶和華án-ni講，因為人對lín講，你是吞食人ê，koh hō͘百姓絕嗣；Chú Iâ-hô-hoa án-ni kóng, In-ūi lâng tùi lín kóng, Lí sī thun-chia̍h lâng--ê, koh hō͘ peh-sìⁿ choa̍t-sû;

14所以主耶和華án-ni講，你無beh koh吞食人，亦無beh koh hō͘你ê國民絕-sû。só͘-í Chú Iâ-hô-hoa án-ni kóng, Lí bô beh koh thun-chia̍h lâng, ia̍h bô beh koh hō͘ lí ê kok-bîn choa̍t-sû.

15我無beh hō͘你koh聽見外邦人ê凌辱，你也無koh受萬百姓ê譭謗，你也無koh hō͘你ê國民tio̍h-tak；這是主耶和華講ê。Góa bô beh hō͘ lí koh thiaⁿ-kìⁿ gōa-pang lâng ê lêng-jio̍k, lí iā bô koh siū bān peh-sìⁿ ê húi-pòng, lí iā bô koh hō͘ lí ê kok-bîn tio̍h-tak; che sī Chú Iâ-hô-hoa kóng--ê.

16耶和華ê話koh臨到我講，Iâ-hô-hoa ê ōe koh lîm-kàu góa kóng,

17人子ah，以色列家，khiā起tī本所在ê時，用in ê所行所做，phah lâ-sâm伊；in ê所行tī我ê面前是親像婦人人經期到ê lâ-sâm。Jîn-chú ah, Í-sek-lia̍t-ke, khiā-khí tī pún só͘-chāi ê sî, ēng in ê só͘-kiâⁿ só͘-chòe, phah lâ-sâm--i; in ê só͘-kiâⁿ tī Góa ê bīn-chêng sī chhin-chhiūⁿ hū-jîn-lâng keng-kî kàu ê lâ-sâm.

18因為in tī hit-ê所在流人ê血，koh因為in用偶像phah lâ-sâm伊；所以我piàⁿ出我ê受氣tī伊ê頂面。In-ūi in tī hit ê só͘-chāi lâu lâng ê huih, koh in-ūi in ēng ngó͘-siōng phah lâ-sâm--i; só͘-í Góa piàⁿ-chhut Góa ê siū-khì tī i ê téng-bīn.

19我分散in tī列國，in就四散tī列邦中；我就照in ê所行，in ê所做來審判in。Góa hun-sòaⁿ in tī lia̍t-kok, in chiū sì-sòaⁿ tī lia̍t-pang-tiong; Góa chiū chiàu in ê só͘-kiâⁿ, in ê só͘-chòe lâi sím-phòaⁿ--in.

20In去到in所到ê外邦人hia，褻瀆我ê聖名；因為人指in來講，這是耶和華ê百姓，tùi伊ê地出來ê。In khì kàu in só͘ kàu ê gōa-pang lâng hia, siat-to̍k Góa ê sèng-miâ; in-ūi lâng chí in lâi kóng, Che sī Iâ-hô-hoa ê peh-sìⁿ, tùi I ê tōe chhut-lâi--ê.

21總是我保惜我ê聖名；就是以色列家，tī in所到ê列國中，所褻瀆ê。Chóng-sī Góa pó-sioh Góa ê sèng-miâ; chiū-sī Í-sek-lia̍t-ke, tī in só͘ kàu ê lia̍t-kok-tiong, só͘ siat-to̍k--ê.

22所以你tio̍h對以色列家講，主耶和華án-ni講，以色列家ah，我行chit-ê，m̄是為tio̍h lín ê緣故，就是為tio̍h我ê聖名ê緣故；就是lín行到ê列國中所褻瀆ê。Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Í-sek-lia̍t-ke ah, Góa kiâⁿ chit-ê, m̄-sī ūi-tio̍h lín ê iân-kò͘, chiū-sī ūi-tio̍h Góa ê sèng-miâ ê iân-kò͘; chiū-sī lín kiâⁿ-kàu ê lia̍t-kok-tiong só͘ siat-to̍k--ê.

23我ê大名受褻瀆tī異邦中，就是lín所褻瀆tī in中間ê；我beh hō͘伊做聖；koh我對lín顯明家己做聖tī in ê目睭前；就異邦人beh知我是耶和華；這是主耶和華所講ê。Góa ê tōa-miâ siū siat-to̍k tī īⁿ-pang-tiong, chiū-sī lín só͘ siat-to̍k tī in tiong-kan--ê; Góa beh hō͘ i chòe-sèng; koh Góa tùi lín hián-bêng ka-kī chòe-sèng tī in ê ba̍k-chiu-chêng; chiū īⁿ-pang-lâng beh chai Góa sī Iâ-hô-hoa; che sī Chú Iâ-hô-hoa só͘ kóng--ê.

24我beh帶lín出列邦，tùi列國中聚集lín，chhōa lín入lín ê本所在。Góa beh tòa lín chhut lia̍t-pang, tùi lia̍t-kok-tiong chū-chi̍p lín, chhōa lín ji̍p lín ê pún só͘-chāi.

25我也beh用清ê水hiù lín，lín就清氣；我beh洗清lín，除去lín一切ê lâ-sâm，kap lín一切ê偶像。Góa iā beh ēng chheng ê chúi hiù lín, lín chiū chheng-khì; Góa beh sóe-chheng lín, tû-khì lín it-chhè ê lâ-sâm, kap lín it-chhè ê ngó͘-siōng.

26我beh用新ê心賞賜lín；也beh用新ê神hē tī lín ê內面；koh beh tùi lín ê肉體中除去親像石ê心，賞賜lín親像肉ê心。Góa beh ēng sin ê sim siúⁿ-sù lín; iā beh ēng sin ê sîn hē tī lín ê lāi-bīn; koh beh tùi lín ê jio̍k-thé-tiong tû-khì chhin-chhiūⁿ chio̍h ê sim, siúⁿ-sù lín chhin-chhiūⁿ bah ê sim.

27我beh將我ê神hē tī lín ê內面，hō͘ lín順thàn我ê律例，守我ê法度來行伊。Góa beh chiong Góa ê sîn hē tī lín ê lāi-bīn, hō͘ lín sūn-thàn Góa ê lu̍t-lē, siú Góa ê hoat-tō͘ lâi kiâⁿ--i.

28Lín beh khiā起tī我所賞賜lín ê列祖ê地；lín beh做我ê百姓，我beh做lín ê上帝。Lín beh khiā-khí tī Góa só͘ siúⁿ-sù lín ê lia̍t-chó͘ ê tōe; lín beh chòe Góa ê peh-sìⁿ, Góa beh chòe lín ê Siōng-tè.

29我beh救lín脫離lín一切ê污穢；也beh叫五穀hō͘伊豐盛，無hō͘ lín tú-tio̍h飢荒。Góa beh kiù lín thoat-lī lín it-chhè ê ù-òe; iā beh kiò ngó͘-kok hō͘ i hong-sēng, bô hō͘ lín tú-tio̍h ki-hng.

30我beh加添樹木ê果子，以及田園ê土產；hō͘ lín無koh因為飢荒受外邦人ê凌辱。Góa beh ke-thiⁿ chhiū-ba̍k ê ké-chí, í-ki̍p chhân-hn̂g ê thó͘-sán; hō͘ lín bô koh in-ūi ki-hng siū gōa-pang-lâng ê lêng-jio̍k.

31Hit時lín beh記得lín ê pháiⁿ所行，kap lín m̄好ê所做；就因為lín ê罪過，kap可惡ê事，tī家己ê面前來厭賤家己。Hit-sî lín beh kì-tit lín ê pháiⁿ só͘-kiâⁿ, kap lín m̄-hó ê só͘-chòe; chiū in-ūi lín ê chōe-kòa, kap khó-ò͘ⁿ ê sū, tī ka-kī ê bīn-chêng lâi iàm-chiān ka-kī.

32主耶和華講，Lín tio̍h知我án-ni行m̄是為tio̍h lín ê緣故；以色列家ah，lín tio̍h為家己ê所行，來漏氣見笑。Chú Iâ-hô-hoa kóng, Lín tio̍h chai Góa án-ni kiâⁿ m̄-sī ūi-tio̍h lín ê iân-kò͘; Í-sek-lia̍t-ke ah, lín tio̍h ūi ka-kī ê só͘-kiâⁿ, lâi làu-khùi kiàn-siàu.

33主耶和華án-ni講，我洗清lín，除去lín一切罪過ê日，beh hō͘ lín ê城有人khiā起，拋荒ê所在得tio̍h起造。Chú Iâ-hô-hoa án-ni kóng, Góa sóe-chheng lín, tû-khì lín it-chhè chōe-kòa ê ji̍t, beh hō͘ lín ê siâⁿ ū lâng khiā-khí, pha-hng ê só͘-chāi tit-tio̍h khí-chō.

34前過路ê人看做荒廢ê地，taⁿ chit-ê荒廢ê地koh有人種作。Chêng kè-lō͘ ê lâng khòaⁿ-chòe hong-hòe ê tōe, taⁿ chit ê hong-hòe ê tōe koh ū lâng chèng-choh.

35人beh講，前做荒廢ê地，taⁿ親像伊甸ê園；chit-ê荒廢，冷靜，毀壞ê城，taⁿ 起真堅固，有人khiā起。Lâng beh kóng, Chêng chòe hong-hòe ê tōe, taⁿ chhin-chhiūⁿ Ai-tiân ê hn̂g; chit ê hong-hòe, léng-chēng, húi-hoāi ê siâⁿ, taⁿ khí chin kian-kò͘, ū lâng khiā-khí.

36Hit時tī lín四圍所chhun ê外邦人，beh知我耶和華起造hiah-ê倒壞ê所在，栽培荒廢ê地；我耶和華已經講伊，的確成伊。Hit-sî tī lín sì-ûi só͘ chhun ê gōa-pang-lâng, beh chai Góa Iâ-hô-hoa khí-chō hiah ê tó-hoāi ê só͘-chāi, chai-pôe hong-hòe ê tōe; Góa Iâ-hô-hoa í-keng kóng--i, tek-khak chiâⁿ--i.

37主耶和華án-ni講，我beh hō͘以色列家為tio̍h chit-ê事求我，致到我kā in成；我beh加添in ê人額，親像羊群。Chú Iâ-hô-hoa án-ni kóng, Góa beh hō͘ Í-sek-lia̍t-ke ūi-tio̍h chit ê sū kiû Góa, tì-kàu Góa kā in chiâⁿ; Góa beh ke-thiⁿ in ê lâng-gia̍h, chhin-chhiūⁿ iûⁿ-kûn.

38親像獻祭ê羊群，就是親像耶路撒冷守節ê時ê羊群；án-ni，chiah-ê拋荒ê城，的確有kui群人滿滿；in就知我是耶和華。Chhin-chhiūⁿ hiàn-chè ê iûⁿ-kûn, chiū-sī chhin-chhiūⁿ Iâ-lō͘-sat-léng siú-choeh ê sî ê iûⁿ-kûn; án-ni, chiah ê pha-hng ê siâⁿ, tek-khak ū kui-kûn lâng móa-móa; in chiū chai Góa sī Iâ-hô-hoa.

1耶和華ê手hē tī我ê身上，耶和華用祂ê神chhōa我出去，hē我tī山谷中；hit-ê山谷有骨頭滿滿。Iâ-hô-hoa ê chhiú hē tī góa ê sin-chiūⁿ, Iâ-hô-hoa ēng I ê sîn chhōa góa chhut-khì, hē góa tī soaⁿ-kok-tiong; hit ê soaⁿ-kok ū kut-thâu móa-móa.

2祂hō͘我tùi骨頭ê四圍經過；看ah，tī山谷ê面上有骨頭真chōe，看ah，in真枯焦。I hō͘ góa tùi kut-thâu ê sì-ûi keng-kè; khòaⁿ ah, tī soaⁿ-kok ê bīn-chiūⁿ ū kut-thâu chin-chōe, khòaⁿ ah, in chin ko͘-tâ.

3祂對我講，人子ah，chiah-ê骨ōe活bōe？我應講，主耶和華ah，祢知伊。I tùi góa kóng, Jîn-chú ah, chiah ê kut ōe oa̍h bōe? Góa ìn kóng, Chú Iâ-hô-hoa ah, Lí chai--i.

4祂koh對我講，你tio̍h tùi chiah-ê骨宣傳，來kā in講，Lín枯焦ê骨ah，tio̍h聽耶和華ê話。I koh tùi góa kóng, Lí tio̍h tùi chiah ê kut soan-thoân, lâi kā in kóng, Lín ko͘-tâ ê kut ah, tio̍h thiaⁿ Iâ-hô-hoa ê ōe.

5主耶和華kā chiah-ê骨án-ni講，看ah，我beh hō͘活氣入lín ê內面，lín就beh活。Chú Iâ-hô-hoa kā chiah ê kut án-ni kóng, Khòaⁿ ah, Góa beh hō͘ oa̍h-khì ji̍p lín ê lāi-bīn, lín chiū beh oa̍h.

6我beh hō͘ lín ê頂面有筋，koh hō͘ lín有肉，koh用皮kā lín包，用活氣入tī lín，lín就會活；lín就知我是耶和華。Góa beh hō͘ lín ê téng-bīn ū kun, koh hō͘ lín ū bah, koh ēng phê kā lín pau, ēng oa̍h-khì ji̍p tī lín, lín chiū ōe oa̍h; lín chiū chai Góa sī Iâ-hô-hoa.

7Tùi án-ni，我thàn命令來宣傳；當我teh宣傳ê時，有聲，忽然地動，chiah-ê骨相連合，ta̍k支歸伊ê本位。Tùi án-ni, góa thàn bēng-lēng lâi soan-thoân; tng góa teh soan-thoân ê sî, ū siaⁿ, hut-jiân tōe-tāng, chiah ê kut saⁿ liân-ha̍p, ta̍k-ki kui i ê pún-ūi.

8我看伊，看見骨ê頂面有筋，也有肉，koh有皮包tī伊ê頂面；總是內面無活氣。Góa khòaⁿ i, khòaⁿ-kìⁿ kut ê téng-bīn ū kun, iā ū bah, koh ū phê pau tī i ê téng-bīn; chóng-sī lāi-bīn bô oa̍h-khì.

9伊就對我講，你tio̍h ǹg風來宣傳；人子ah，tio̍h宣傳，來對風講，主耶和華án-ni講，活氣ah，tùi hiah-ê風來，pûn tī chiah ê 受thâi-ê，hō͘ in能活。I chiū tùi góa kóng, Lí tio̍h ǹg hong lâi soan-thoân; jîn-chú ah, tio̍h soan-thoân, lâi tùi hong kóng, Chú Iâ-hô-hoa án-ni kóng, Oa̍h-khì ah, tùi hiah ê hong lâi, pûn tī chiah ê siū-thâi--ê, hō͘ in ōe oa̍h.

10Tùi án-ni，我照伊所命令我ê來宣傳；活氣就來，入tī in；in就活，起來khiā，成做極大ê軍隊。Tùi án-ni, góa chiàu I só͘ bēng-lēng góa--ê lâi soan-thoân; oa̍h-khì chiū lâi, ji̍p tī in; in chiū oa̍h, khí--lâi khiā, chiâⁿ-chòe ke̍k-tōa ê kun-tūi.

11祂就kā我講，人子ah，chiah-ê骨就是以色列ê全家；看ah，in講，阮ê骨lóng枯焦，阮ê ǹg望lóng失落；阮一盡剿滅。I chiū kā góa kóng, Jîn-chú ah, chiah ê kut chiū-sī Í-sek-lia̍t ê choân-ke; khòaⁿ ah, in kóng, Goán ê kut lóng ko͘-tâ, goán ê ǹg-bāng lóng sit-lo̍h; goán it-chīn châu-bia̍t.

12所以你tio̍h宣傳，來對in講，主耶和華án-ni講，我ê百姓ah，看ah，我beh開 lín ê墓，hō͘ lín tùi lín ê墓起來，chhōa lín入以色列地。Só͘-í lí tio̍h soan-thoân, lâi tùi in kóng, Chú Iâ-hô-hoa án-ni kóng, Góa ê peh-sìⁿ ah, khòaⁿ ah, Góa beh khui lín ê bōng, hō͘ lín tùi lín ê bōng khí--lâi, chhōa lín ji̍p Í-sek-lia̍t tōe.

13我ê百姓ah，我開lín ê墓，hō͘ lín tùi lín ê墓起來，lín就知我是耶和華。Góa ê peh-sìⁿ ah, Góa khui lín ê bōng, hō͘ lín tùi lín ê bōng khí--lâi, lín chiū chai Góa sī Iâ-hô-hoa.

14我beh將我ê神hē tī lín ê內面，lín就beh活；我安置lín tī本所在，lín就知我耶和華án-ni講，也án-ni成；這是耶和華講ê。Góa beh chiong Góa ê sîn hē tī lín ê lāi-bīn, lín chiū beh oa̍h; Góa an-tì lín tī pún só͘-chāi, lín chiū chai Góa Iâ-hô-hoa án-ni kóng, iā án-ni chiâⁿ; che sī Iâ-hô-hoa kóng--ê.

15耶和華ê話koh臨到我講，Iâ-hô-hoa ê ōe koh lîm-kàu góa kóng,

16人子ah，你tio̍h the̍h一塊柴板，tī伊ê頂面寫，為猶大kap伊ê同伴以色列族；koh the̍h一塊柴板，tī伊ê頂面寫，為tio̍h約瑟、Í-hoat-liân，kap伊ê同伴以色列全家ê柴板。Jîn-chú ah, lí tio̍h the̍h chi̍t-tè chhâ-pán, tī i ê téng-bīn siá, Ūi Iû-tāi kap i ê tâng-phōaⁿ Í-sek-lia̍t cho̍k; koh the̍h chi̍t tè chhâ-pán, tī i ê téng-bīn siá, Ūi-tio̍h Iok-sek, Í-hoat-liân, kap i ê tâng-phōaⁿ Í-sek-lia̍t choân-ke ê chhâ-pán.

17你tio̍h hō͘ in相óa，連做一塊柴板；就tī你ê手中beh成做一塊。Lí tio̍h hō͘ in saⁿ-óa, liân chòe chi̍t-tè chhâ-pán; chiū tī lí ê chhiú-tiong beh chiâⁿ-chòe chi̍t-tè.

18設使你ê百姓問你講，你做chit-ê甚麼意思，你m̄指示阮mah？Siat-sú lí ê peh-sìⁿ mn̄g lí kóng, Lí chòe chit-ê sím-mi̍h ì-sù, lí m̄ chí-sī goán mah?

19你就tio̍h對in講，主耶和華án-ni講，看ah，我beh the̍h Í-hoat-liân ê手所kia̍h約瑟ê柴板，kap伊ê同伴以色列chiah-ê支派；我beh hē伊 óa tī猶大ê柴板，hō͘伊成做一塊ê柴板，就伊beh成做一塊tī我ê手。lí chiū tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh the̍h Í-hoat-liân ê chhiú só͘ kia̍h Iok-sek ê chhâ-pán, kap i ê tâng-phōaⁿ Í-sek-lia̍t chiah ê chi-phài; Góa beh hē--i óa tī Iû-tāi ê chhâ-pán, hō͘ i chiâⁿ-chòe chi̍t-tè ê chhâ-pán, chiū i beh chiâⁿ-chòe chi̍t-tè tī Góa ê chhiú.

20你所寫hí兩塊柴板，tio̍h tī in ê目睭前，kia̍h tī你ê手。Lí só͘ siá hí nn̄g tè chhâ-pán, tio̍h tī in ê ba̍k-chiu-chêng, kia̍h tī lí ê chhiú.

21你tio̍h對in講，主耶和華án-ni講，看ah，我beh取以色列族tùi in所到ê ta̍k國出來；koh tùi四圍聚集in，chhōa in tò來本所在。Lí tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh chhú Í-sek-lia̍t cho̍k tùi in só͘ kàu ê ta̍k-kok chhut--lâi; koh tùi sì-ûi chū-chi̍p in, chhōa in tò-lâi pún só͘-chāi.

22我beh hō͘ in tī hit-ê地，tī以色列ê山，合-做一百姓；有一個王做in眾人ê王；in無koh做兩pêng ê百姓，也無koh分做兩-國。Góa beh hō͘ in tī hit ê tōe, tī Í-sek-lia̍t ê soaⁿ, ha̍p-chòe chi̍t peh-sìⁿ; ū chi̍t ê ông chòe in chèng-lâng ê ông; in bô koh chòe nn̄g-pêng ê peh-sìⁿ, iā bô koh pun-chòe nn̄g-kok.

23也無koh因為偶像，kap可惡ê物，以及一切ê罪過，phah lâ-sâm本身；我beh救in出in一切khiā起ê所在，就是in犯罪hia；我beh清氣in；án-ni，in beh做我ê百姓；我beh做in ê上帝。Iā bô koh in-ūi ngó͘-siōng, kap khó-ò͘ⁿ ê mi̍h, í-ki̍p it-chhè ê chōe-kòa, phah lâ-sâm pún-sin; Góa beh kiù in chhut in it-chhè khiā-khí ê só͘-chāi, chiū-sī in hoān-chōe hia; Góa beh chheng-khì in; án-ni, in beh chòe Góa ê peh-sìⁿ; Góa beh chòe in ê Siōng-tè.

24我ê奴僕大衛beh做in ê王；in lóng beh歸tī一個牧者；in beh順thàn我ê法度，守我ê律例來行。Góa ê lô͘-po̍k Tāi-pi̍t beh chòe in ê ông; in lóng beh kui tī chi̍t ê bo̍k-chiá; in beh sūn-thàn Góa ê hoat-tō͘, siú Góa ê lu̍t-lē lâi kiâⁿ.

25In beh khiā起tī我賞賜我ê奴僕雅各ê地；就是lín ê列祖所khiā起ê；in kap in ê kiáⁿ孫，以及kiáⁿ-kiáⁿ孫孫，lóng永遠khiā起tī-hia。我ê奴僕大衛beh做in ê人君，直到永遠。In beh khiā-khí tī Góa siúⁿ-sù Góa ê lô͘-po̍k Ngá-kok ê tōe; chiū-sī lín ê lia̍t-chó͘ só͘ khiā-khí--ê; in kap in ê kiáⁿ-sun, í-ki̍p kiáⁿ-kiáⁿ sun-sun, lóng éng-oán khiā-khí tī-hia. Góa ê lô͘-po̍k Tāi-pi̍t beh chòe in ê jîn-kun, ti̍t-kàu éng-oán.

26Koh我beh kap in立平安ê約，kap in做永遠ê約；我也beh 建設in，hō͘ in ê人額加添，koh tī in ê中間設立我ê聖所直到永遠。Koh Góa beh kap in li̍p pêng-an ê iok, kap in chòe éng-oán ê iok; Góa iā beh kiàn-siat in, hō͘ in ê lâng-gia̍h ke-thiⁿ, koh tī in ê tiong-kan siat-li̍p Góa ê sèng-só͘ ti̍t-kàu éng-oán.

27我khiā起ê所在beh tī in中間；我beh做in ê上帝，in beh做我ê百姓。Góa khiā-khí ê só͘-chāi beh tī in tiong-kan; Góa beh chòe in ê Siōng-tè, in beh chòe Góa ê peh-sìⁿ.

28我ê聖所tī in中間，直到永遠；外邦人就beh知我是耶和華，hō͘以色列成做聖ê。Góa ê sèng-só͘ tī in tiong-kan, ti̍t-kàu éng-oán; gōa-pang-lâng chiū beh chai Góa sī Iâ-hô-hoa, hō͘ Í-sek-lia̍t chiâⁿ-chòe sèng-ê.