1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h面ǹg Má-kok地ê Ko-激，就是Lô-si，Bí-siat，Thó͘-pa ê人君，宣傳來攻擊伊，講，Jîn-chú ah, lí tio̍h bīn ǹg Má-kok tōe ê Ko-kek, chiū-sī Lô-si, Bí-siat, Thó͘-pa ê jîn-kun, soan-thoân lâi kong-kek i, kóng,

3主耶和華án-ni講，Lô-si，Bí-siat，Thó͘-pa ê人君，Ko-激ah，看ah，我做你ê對敵；Chú Iâ-hô-hoa án-ni kóng, Lô-si, Bí-siat, Thó͘-pa ê jîn-kun, Ko-kek ah, khòaⁿ ah, Góa chòe lí ê tùi-te̍k;

4我beh hō͘你oa̍t-tńg，用kau kau你ê牙槽，將你kap你ê軍兵，bé-phit，馬兵，tòa出來，lóng穿真súi ê戰甲，成做大ê軍隊，giâ大小ê藤牌，ta̍k-ê枝a̍h刀劍；Góa beh hō͘ lí oa̍t-tńg, ēng kau kau lí ê gê-chô, chiong lí kap lí ê kun-peng, bé-phit, bé-peng, tòa--chhut-lâi, lóng chhēng chin súi ê chiàn-kah, chiâⁿ-chòe tōa ê kun-tūi, giâ tōa-sió ê tîn-pâi, ta̍k-ê kia̍h to-kiàm;

5波斯人，Kó͘-si̍t人kap Hut人kap in來，ta̍k-ê giâ藤牌tì頭盔；Pho-su-lâng, Kó͘-si̍t-lâng kap Hut-lâng kap in lâi, ta̍k-ê giâ tîn-pâi tì thâu-khoe;

6Ko-滅kap伊ê軍隊；北方極頭ê Tô-ka-má-族kap伊ê軍隊；koh有chōe-chōe百姓kap你做陣。Ko-bia̍t kap i ê kun-tūi; pak-hng ke̍k-thâu ê Tô-ka-má-cho̍k kap i ê kun-tūi; koh ū chōe-chōe peh-sìⁿ kap lí chòe-tīn.

7你tio̍h家己備辦，你kap聚集tī你hia ê軍隊lóng tio̍h備辦，你tio̍h做in ê goân-sòe。Lí tio̍h ka-kī pī-pān, lí kap chū-chi̍p tī lí hia ê kun-tūi lóng tio̍h pī-pān, lí tio̍h chòe in ê goân-sòe.

8Chōe-chōe日後你beh受辨理；到路尾ê年你beh來到脫離刀劍，tùi列國收回ê地，到以色列久久拋荒ê山；總是i已經tùi列國中帶出，in lóng beh安然khiā起。Chōe-chōe ji̍t āu lí beh siū pān-lí; kàu lō͘-bé ê nî lí beh lâi kàu thoat-lī to-kiàm, tùi lia̍t-kok siu-hôe ê tōe, kàu Í-sek-lia̍t kú-kú pha-hng ê soaⁿ; chóng-sī i í-keng tùi lia̍t-kok-tiong tòa-chhut, in lóng beh an-jiân khiā-khí.

9你kap你ê軍隊，以及kap你相kap來chōe-chōe國 ê百姓，lóng beh上來親像狂風來，你beh親像hûn遮蓋地。Lí kap lí ê kun-tūi, í-ki̍p kap lí saⁿ-kap lâi chōe-chōe kok ê peh-sìⁿ, lóng beh chiūⁿ-lâi chhin-chhiūⁿ kông-hong lâi, lí beh chhin-chhiūⁿ hûn jia-khàm tōe.

10主耶和華án-ni講，到hit日beh有意思興起tī你ê心，你beh圖謀pháiⁿ ê計謀；Chú Iâ-hô-hoa án-ni kóng, Kàu hit-ji̍t beh ū ì-sù heng-khí tī lí ê sim, lí beh tô͘-bô͘ pháiⁿ ê kè-bô͘;

11講，我beh上到鄉社ê地，到靜靜安然khiā起ê百姓hia，in所khiā起ê lóng無城牆，也無門無chhòaⁿ；kóng, Góa beh chiūⁿ-kàu hiuⁿ-siā ê tōe, kàu chēng-chēng an-jiân khiā-khí ê peh-sìⁿ hia, in só͘ khiā-khí-ê lóng bô siâⁿ-chhiûⁿ, iā bô mn̂g bô chhòaⁿ;

12Thang搶所beh搶-ê，kiap所beh kiap-ê，oa̍t-tńg你ê手，攻擊hiah-ê前拋荒taⁿ有人khiā起ê地，以及hit-ê khiā起世界ê中心-點，tùi列國聚集，得tio̍h cheng-siⁿ貨財ê百姓。thang chhiúⁿ só͘ beh chhiúⁿ--ê, kiap só͘ beh kiap--ê, oa̍t-tńg lí ê chhiú, kong-kek hiah ê chêng pha-hng taⁿ ū lâng khiā-khí ê tōe, í-ki̍p hit ê khiā-khí sè-kài ê tiong-sim-tiám, tùi lia̍t-kok chū-chi̍p, tit-tio̍h cheng-siⁿ hè-châi ê peh-sìⁿ.

13Si-pa人，Tí-tàn人，Tha-si ê seng-lí人，kap in中間勇ê獅，lóng beh對你講，你來是beh搶所搶-ê mah？你聚集你ê軍隊是beh kiap所kiap-ê mah？beh the̍h金銀，tòa cheng-siⁿ貨財去mah？Beh大大搶所搶-ê mah？Si-pa lâng, Tí-tàn lâng, Tha-si ê seng-lí lâng, kap in tiong-kan ióng ê sai, lóng beh tùi lí kóng, Lí lâi sī beh chhiúⁿ só͘-chhiúⁿ--ê mah? lí chū-chi̍p lí ê kun-tūi sī beh kiap só͘ kiap--ê mah? beh the̍h kim-gûn, tòa cheng-siⁿ hè-châi khì mah? Beh tōa-tōa chhiúⁿ só͘ chhiúⁿ-ê mah?

14人子ah，你tio̍h因為án-ni宣傳，tùi Ko-激講，主耶和華án-ni講，當我ê百姓以色列安然khiā起ê日，你kiám無得tio̍h知mah？Jîn-chú ah, lí tio̍h in-ūi án-ni soan-thoân, tùi Ko-kek kóng, Chú Iâ-hô-hoa án-ni kóng, Tng Góa ê peh-sìⁿ Í-sek-lia̍t an-jiân khiā-khí ê ji̍t, lí kiám bô tit-tio̍h chai mah?

15你beh對你ê本所在，tùi北方ê極頭來，你kap chōe-chōe國 ê百姓相kap來，lóng是騎馬，最大-陣，chōe-chōe ê軍隊。Lí beh tùi lí ê pún só͘-chāi, tùi pak-hng ê ke̍k-thâu lâi, lí kap chōe-chōe kok ê peh-sìⁿ saⁿ-kap lâi, lóng sī khiâ-bé, chòe tōa-tīn, chōe-chōe ê kun-tūi.

16你beh上來攻擊我ê百姓以色列，親像密雲遮蓋地；tī路尾ê日我beh chhōa你來攻擊我ê地，Ko-激ah，到我tī列邦ê面前，tī你ê身上顯明做聖ê時，thang hō͘ in bat我。Lí beh chiūⁿ-lâi kong-kek Góa ê peh-sìⁿ Í-sek-lia̍t, chhin-chhiūⁿ ba̍t-hûn jia-khàm tōe; tī lō͘-bé ê ji̍t Góa beh chhōa lí lâi kong-kek Góa ê tōe, Ko-kek ah, kàu Góa tī lia̍t-pang ê bīn-chêng, tī lí ê sin-chiūⁿ hián-bêng chòe-sèng ê sî, thang hō͘ in bat Góa.

17主耶和華án-ni講，我tī早時，用我ê奴僕，以色列ê先知，所講ê，就是你mah？當hiah-ê日in歷年讖語我beh chhōa你來攻擊in。Chú Iâ-hô-hoa án-ni kóng, Góa tī chá-sî, ēng Góa ê lô͘-po̍k, Í-sek-lia̍t ê sian-ti, só͘ kóng--ê, chiū-sī lí mah? tng hiah ê ji̍t in le̍k-nî chhàm-gú Góa beh chhōa lí lâi kong-kek in.

18主耶和華講，Ko-激上來攻擊以色列地ê日，我ê受氣beh tùi我ê鼻孔出。Chú Iâ-hô-hoa kóng, Ko-kek chiūⁿ--lâi kong-kek Í-sek-lia̍t tōe ê ji̍t, Góa ê siū-khì beh tùi Góa ê phīⁿ-khang chhut.

19因為我怨妒kap大受氣親像火，就講，hit日tī以色列地的確有大振動；In-ūi Góa oàn-tò͘ kap tōa siū-khì chhin-chhiūⁿ hé, chiū kóng, Hit-ji̍t tī Í-sek-lia̍t tōe tek-khak ū tōa tín-tāng;

20甚至海中ê魚，空中ê飛鳥，田野ê鞘，以及地上一切teh sô ê蟲thōa，kap地面上ê眾人，tī我ê面前lóng beh振動，山嶺beh崩裂，山崁beh倒壞，牆壁lóng beh倒落去。sīm-chì hái-tiong ê hî, khong-tiong ê pe-chiáu, chhân-iá ê siù, í-ki̍p tōe-chiūⁿ it-chhè teh sô ê thâng-thōa, kap tōe-bīn-chiūⁿ ê chèng-lâng, tī Góa ê bīn-chêng lóng beh tín-tāng, soaⁿ-niá beh pang-li̍h, soaⁿ-khàm beh tó-hoāi, chhiûⁿ-piah lóng beh tó--lo̍h-khì.

21主耶和華講，我beh命令我chiah-ê山發出刀劍來攻擊Ko-激；ta̍k人beh用伊ê刀劍thâi伊ê兄弟。Chú Iâ-hô-hoa kóng, Góa beh bēng-lēng Góa chiah ê soaⁿ hoat-chhut to-kiàm lâi kong-kek Ko-kek; ta̍k-lâng beh ēng i ê to-kiàm thâi i ê hiaⁿ-tī.

22我beh用瘟疫kap流血來辦i；我也beh用大雨，大雹，kap火，kap琉磺，降落hō͘伊kap伊ê軍隊，以及kap伊ê眾百姓。Góa beh ēng un-e̍k kap lâu-huih lâi pān i; Góa iā beh ēng tōa-hō͘, tōa-pha̍uh, kap hé, kap jiû-n̂g, kàng-lo̍h hō͘ i kap i ê kun-tūi, í-ki̍p kap i ê chèng peh-sìⁿ.

23我beh顯明家己最大，顯明家己做聖，也beh顯現tī chōe-chōe國人ê面前；in就知我就是耶和華。Góa beh hián-bêng ka-kī chòe tōa, hián-bêng ka-kī chòe-sèng, iā beh hián-hiān tī chōe-chōe kok lâng ê bīn-chêng; in chiū chai Góa chiū-sī Iâ-hô-hoa.

1人子ah，你tio̍h ǹg Ko-kek來宣傳攻擊伊講，主耶和華án-ni講，Lô-si、Bí-siat、Thó͘-pa ê人君，Ko-kek ah，我kap你做對敵；Jîn-chú ah, lí tio̍h ǹg Ko-kek lâi soan-thoân kong-kek i kóng, Chú Iâ-hô-hoa án-ni kóng, Lô-si, Bí-siat, Thó͘-pa ê jîn-kun, Ko-kek ah, Góa kap lí chòe tùi-te̍k;

2我beh hō͘你oa̍t-tńg，beh chhōa你進前，hō͘你tùi北方ê極頭來，帶你到以色列ê山；Góa beh hō͘ lí oa̍t-tńg, beh chhōa lí chìn-chêng, hō͘ lí tùi pak-hng ê ke̍k-thâu lâi, tòa lí kàu Í-sek-lia̍t ê soaⁿ;

3我beh對你ê tò手phah ka-la̍uh你ê弓，對你ê chiàⁿ手phah-lak你ê箭。Góa beh tùi lí ê tò-chhiú phah ka-la̍uh lí ê keng, tùi lí ê chiàⁿ-chhiú phah-lak lí ê chìⁿ.

4你kap你ê軍隊以及kap你來ê列國人beh倒tī以色列ê山；我beh將你hō͘ ta̍k樣ê鷹鳥kap田野ê野獸做食物。Lí kap lí ê kun-tūi í-ki̍p kap lí lâi ê lia̍t-kok lâng beh tó tī Í-sek-lia̍t ê soaⁿ; Góa beh chiong lí hō͘ ta̍k-iūⁿ ê eng-chiáu kap chhân-iá ê iá-siù chòe chia̍h-mi̍h.

5你beh倒tī田野；因為我bat講伊；這是主耶和華講ê。Lí beh tó tī chhân-iá; in-ūi Góa bat kóng--i; che sī Chú Iâ-hô-hoa kóng--ê.

6我也beh降落火tī Má-kok kap海嶼安然khiā起ê人ê身上；in就知我就是耶和華。Góa iā beh kàng-lo̍h hé tī Má-kok kap hái-sū an-jiân khiā-khí ê lâng ê sin-chiūⁿ; in chiū chai Góa chiū-sī Iâ-hô-hoa.

7我beh tī我ê百姓以色列中顯出我ê聖名，也無容允我ê聖名koh受褻瀆；列國人就知我就是耶和華，以色列中ê聖ê。Góa beh tī Góa ê peh-sìⁿ Í-sek-lia̍t tiong hián-chhut Góa ê sèng-miâ, iā bô iông-ún Góa ê sèng-miâ koh siū siat-to̍k; lia̍t-kok lâng chiū chai Góa chiū-sī Iâ-hô-hoa, Í-sek-lia̍t tiong ê Sèng--ê.

8主耶和華講，看ah，tāi-chì來-lah也beh成伊；這是我所講ê日。Chú Iâ-hô-hoa kóng, Khòaⁿ ah, tāi-chì lâi--lah iā beh chiâⁿ i; che sī Góa só͘ kóng ê ji̍t.

9Khiā起以色列城ê人beh出去，起火燒伊ê ke-si，就是大細ê藤牌、弓箭、槌á kap鎗，lóng beh用in來hiâⁿ火歷過七年久；Khiā-khí Í-sek-lia̍t siâⁿ ê lâng beh chhut--khì, khí-hé sio i ê ke-si, chiū-sī tōa-sòe ê tîn-pâi, keng-chìⁿ, thûi-á kap chhiuⁿ, lóng beh ēng in lâi hiâⁿ-hé le̍k-kè chhit-nî kú;

10甚至in無beh tùi田野拾柴，也無beh tùi樹林剉樹；因為in beh用ke-si hiâⁿ火；koh beh搶hiah-ê搶in ê人，劫hiah-ê劫in ê人；這就是主耶和華講ê。sīm-chì in bô beh tùi chhân-iá khioh-chhâ, iā bô beh tùi chhiū-nâ chhò-chhiū; in-ūi in beh ēng ke-si hiâⁿ-hé; koh beh chhiúⁿ hiah ê chhiúⁿ in ê lâng, kiap hiah ê kiap in ê lâng; che chiū-sī Chú Iâ-hô-hoa kóng--ê.

11當hit日我beh將以色列地，海ê東勢，人所經過ê山谷，賞賜Ko-kek做塚地阻擋經過ê人ê路；tī-hia人beh埋葬Ko-kek kap伊ê眾人；beh清hit所在做Hap-bûn-ko-kek ê山谷。Tng hit-ji̍t góa beh chiong Í-sek-lia̍t tōe, hái ê tang--sì, lâng só͘ keng-kè ê soaⁿ-kok, siúⁿ-sù Ko-kek chòe thióng-tōe chó͘-tòng keng-kè ê lâng ê lō͘; tī-hia lâng beh bâi-chòng Ko-kek kap i ê chèng-lâng; beh chheng hit só͘-chāi chòe Hap-bûn-ko-kek ê soaⁿ-kok.

12以色列家beh埋葬in歷過七月日ê久，hō͘ hit-ê地清氣。Í-sek-lia̍t-ke beh bâi-chòng in le̍k-kè chhit-ge̍h ji̍t ê kú, hō͘ hit ê tōe chheng-khì.

13Thong國ê百姓beh埋葬in；當我得tio̍h榮光ê日，chit-ê事beh hō͘ in得tio̍h名聲；這是主耶和華講ê。Thong-kok ê peh-sìⁿ beh bâi-chòng in; tng Góa tit-tio̍h êng-kng ê ji̍t, chit ê sū beh hō͘ in tit-tio̍h miâ-siaⁿ; che sī Chú Iâ-hô-hoa kóng--ê.

14In beh派人常常巡查遍地；kap經過ê人相kap葬hiah-ê chhun tī地裡ê身屍，thang清氣hit-ê地方；到七月日滿，in beh koh四界chhē。In beh phài lâng siông-siông sûn-cha piàn-tōe; kap keng-kè ê lâng saⁿ-kap chòng hiah ê chhun tī tōe--nih ê sin-si, thang chheng-khì hit ê tōe-hng; kàu chhit-ge̍h ji̍t móa, in beh koh sì-kòe chhē.

15Sûn-cha遍地ê人beh經過；若有人看見人ê骨骸，就tī-hia立一個記號，thèng候埋葬ê人埋葬伊tī Hap-bûn-ko-激ê山谷。Sûn-cha piàn tōe ê lâng beh keng-kè; nā ū lâng khòaⁿ-kìⁿ lâng ê kut-hâi, chiū tī-hia li̍p chi̍t ê kì-hō, thèng-hāu bâi-chòng ê lâng bâi-chòng i tī Hap-bûn-ko-kek ê soaⁿ-kok.

16也beh有一個城，名叫Hap-bûn-ná。In beh án-ni清氣hit-ê地。Iā beh ū chi̍t ê siâⁿ, miâ kiò Hap-bûn-ná. In beh án-ni chheng-khì hit ê tōe.

17人子ah，主耶和華án-ni講，你tio̍h對ta̍k樣ê飛鳥以及田野ê野獸講，Lín tio̍h聚集做陣來；tio̍h tùi四方聚集到我為tio̍h lín所獻ê祭，就是以色列山ê大祭，hō͘ lín thang食肉lim血。Jîn-chú ah, Chú Iâ-hô-hoa án-ni kóng, Lí tio̍h tùi ta̍k-iūⁿ ê pe-chiáu í-ki̍p chhân-iá ê iá-siù kóng, Lín tio̍h chū-chi̍p chòe-tīn lâi; tio̍h tùi sì-hng chū-chi̍p kàu Góa ūi-tio̍h lín só͘ hiàn ê chè, chiū-sī Í-sek-lia̍t soaⁿ ê tōa-chè, hō͘ lín thang chia̍h-bah lim-huih.

18Lín beh食勇士ê肉，lim地上首領ê血，公ê綿羊，羊á，公ê山羊，公ê牛，lóng是Pa-san肥ê cheng-siⁿ。Lín beh chia̍h ióng-sū ê bah, lim tōe-chiūⁿ siú-léng ê huih, kang ê mî-iûⁿ, iûⁿ-á, kang ê soaⁿ-iûⁿ, kang ê gû, lóng sī Pa-san pûi ê cheng-siⁿ.

19Lín食我為tio̍h lín所獻ê祭，beh食iû到飽，lim血到醉。Lín chia̍h Góa ūi-tio̍h lín só͘ hiàn ê chè, beh chia̍h iû kàu pá, lim-huih kàu chùi.

20Lín beh tī我ê桌食馬匹kap坐車ê，kap勇士kap一切ê戰士到飽飽；這是主耶和華講ê。Lín beh tī Góa ê toh chia̍h bé-phit kap chē-chhia-ê, kap ióng-sū kap it-chhè ê chiàn-sū kàu pá-pá; che sī Chú Iâ-hô-hoa kóng--ê.

21我beh顯明我ê榮光tī列國中，列國也beh看見我所行ê審判，kap我所hē tī in身上ê手。Góa beh hián-bêng Góa ê êng-kng tī lia̍t-kok-tiong, lia̍t-kok iā beh khòaⁿ-kìⁿ Góa só͘ kiâⁿ ê sím-phòaⁿ, kap Góa só͘ hē tī in sin-chiūⁿ ê chhiú.

22Án-ni tùi hit日以後以色列家beh知我是耶和華in ê上帝。Án-ni tùi hit-ji̍t í-āu Í-sek-lia̍t-ke beh chai Góa sī Iâ-hô-hoa in ê Siōng-tè.

23列國也beh知以色列家受掠是因為in ê罪過；in得罪我，我對in掩我ê面；將in交tī in ê對敵ê手；in就lóng倒tī刀下。Lia̍t-kok iā beh chai Í-sek-lia̍t-ke siū-lia̍h sī in-ūi in ê chōe-kòa; in tek-chōe Góa, Góa tùi in ng Góa ê bīn; chiong in kau tī in ê tùi-te̍k ê chhiú; in chiū lóng tó tī to-ē.

24我照in ê污穢照in ê過失款待in；對in掩我ê面。Góa chiàu in ê ù-òe chiàu in ê kè-sit khoán-thāi in; tùi in ng Góa ê bīn.

25所以主耶和華án-ni講，我beh hō͘雅各受掠ê人tò來；也beh憐憫以色列全家；Só͘-í Chú Iâ-hô-hoa án-ni kóng, Góa beh hō͘ Ngá-kok siū-lia̍h ê lâng tò--lâi; iā beh lîn-bín Í-sek-lia̍t choân-ke;

26也beh為tio̍h我ê聖名熱心。iā beh ūi-tio̍h Góa ê sèng-miâ jia̍t-sim.

27In tī本所在安然khiā起，無人hō͘ in驚，tī我將in tùi列國中chhōa tò來，tùi對敵ê地聚集來，我tī列國ê面前，tī in身上顯明做聖ê時，in beh擔當in ê見笑kap in干犯我一切ê罪。In tī pún só͘-chāi an-jiân khiā-khí, bô lâng hō͘ in kiaⁿ, tī Góa chiong in tùi lia̍t-kok-tiong chhōa tò--lâi, tùi tùi-te̍k ê tōe chū-chi̍p lâi, Góa tī lia̍t-kok ê bīn-chêng, tī in sin-chiūⁿ hián-bêng chòe-sèng ê sî, in beh tam-tng in ê kiàn-siàu kap in kan-hoān Góa it-chhè ê chōe.

28我hō͘ in受掠tī列邦，koh聚集in tò來本所在，無留一人tī-hia，in就知我是in ê上帝耶和華。Góa hō͘ in siū-lia̍h tī lia̍t-pang, koh chū-chi̍p in tò--lâi pún só͘-chāi, bô lâu chi̍t-lâng tī-hia, in chiū chai Góa sī in ê Siōng-tè Iâ-hô-hoa.

29我也無koh對in掩我ê面；因為我已經將我ê神降落tī以色列家；這是主耶和華講ê。Góa iā bô koh tùi in ng Góa ê bīn; in-ūi Góa í-keng chiong Góa ê sîn kàng-lo̍h tī Í-sek-lia̍t-ke; che sī Chú Iâ-hô-hoa kóng--ê.

1阮受掠ê二十五年，tī年頭，月ê初十日城破了後第十四年，tú-tú hit日耶和華ê手hē tī我ê身上，chhōa我到hia。Goán siū-lia̍h ê jī-cha̍p-gō͘ nî, tī nî-thâu, ge̍h ê chhoe-cha̍p ji̍t siâⁿ phòa liáu-āu tē cha̍p-sì nî, tú-tú hit-ji̍t Iâ-hô-hoa ê chhiú hē tī góa ê sin-chiūⁿ, chhōa góa kàu hia.

2Tī上帝異象中帶我到以色列地，安置我tī真高ê山，山頂ê南pêng有親像起造ê城。Tī Siōng-tè īⁿ-siōng-tiong tòa góa kàu Í-sek-lia̍t tōe, an-tì góa tī chin-koâiⁿ ê soaⁿ, soaⁿ-téng ê lâm-pêng ū chhin-chhiūⁿ khí-chō ê siâⁿ.

3伊chhōa我到hia；看ah，有一人，款式親像銅ê款式，手the̍h 麻索，kap測量ê篙尺，khiā tī門口。I chhōa góa kàu hia; khòaⁿ ah, ū chi̍t-lâng, khoán-sit chhin-chhiūⁿ tâng ê khoán-sit, chhiú the̍h môa-soh, kap chhek-liông ê ko-chhioh, khiā tī mn̂g-kháu.

4Hit-ê人對我講，人子ah，見我所hō͘你看ê，你tio̍h用你ê目睭看，用你ê耳孔聽，也tio̍h用你ê心記tiâu；因為你受帶來chia tiâu-tî為tio̍h beh hō͘你看chiah-ê事；見你所看見ê，你lóng tio̍h kā以色列家講。Hit ê lâng tùi góa kóng, Jîn-chú ah, kìⁿ góa só͘ hō͘ lí khòaⁿ--ê, lí tio̍h ēng lí ê ba̍k-chiu khòaⁿ, ēng lí ê hī-khang thiaⁿ, iā tio̍h ēng lí ê sim kì-tiâu; in-ūi lí siū tòa lâi chia tiâu-tî ūi-tio̍h beh hō͘ lí khòaⁿ chiah ê sū; kìⁿ lí só͘ khòaⁿ-kìⁿ--ê, lí lóng tio̍h kā Í-sek-lia̍t-ke kóng.

5看ah，厝ê外面四圍有牆，hit人ê手the̍h測量ê篙尺，長六肘，每-肘是一肘koh一巴掌；伊就量牆厚一篙尺，高一篙尺。Khòaⁿ ah, chhù ê gōa-bīn sì-ûi ū chhiûⁿ, hit lâng ê chhiú the̍h chhek-liông ê ko-chhioh, tn̂g la̍k tiú, múi-tiú sī chi̍t-tiú koh chi̍t pa-chiúⁿ; i chiū niû chhiûⁿ kāu chi̍t ko-chhioh, koâiⁿ chi̍t ko-chhioh.

6伊就到ǹg東ê門，上伊ê崎á；量門ê戶碇，闊一篙尺；koh一個戶碇，闊也一篙尺。I chiū kàu ǹg tang ê mn̂g, chiūⁿ i ê kiā-á; niû mn̂g ê hō͘-tēng, khoah chi̍t ko-chhioh; koh chi̍t ê hō͘-tēng, khoah iā chi̍t ko-chhioh.

7Koh侍衛房，ta̍k間長一篙尺，闊一篙尺；相離五肘；門ê戶碇，就是óa近ǹg厝ê門ê léng廊，闊一篙尺。Koh sī-ōe-pâng, ta̍k-keng tn̂g chi̍t ko-chhioh, khoah chi̍t ko-chhioh; saⁿ-lī gō͘ tiú; mn̂g ê hō͘-tēng, chiū-sī óa-kūn ǹg-chhù ê mn̂g ê léng-lông, khoah chi̍t ko-chhioh.

8伊也量ǹg厝ê門ê léng廊，闊一篙尺。I iā niû ǹg chhù ê mn̂g ê léng-lông, khoah chi̍t ko-chhioh.

9Koh量門ê廊，闊八肘；伊ê柱兩肘；hit-ê門ê léng廊是ǹg-厝。Koh niû mn̂g ê lông, khoah poeh-tiú; i ê thiāu nn̄g tiú; hit ê mn̂g ê léng-lông sī ǹg-chhù.

10東勢ê門有侍衛房，chit-pâng三間，hit-pâng三間，lóng同一樣ê寸尺；chit-pêng ê柱kap hit pêng ê柱也是一樣ê寸尺。Tang--sì ê mn̂g ū sī-ōe-pâng, chit-pêng saⁿ-keng, hit-pêng saⁿ-keng, lóng tâng-chi̍t-iūⁿ ê chhùn-chhioh; chit-pêng ê thiāu kap hit pêng ê thiāu iā sī chi̍t-iūⁿ ê chhùn-chhioh.

11伊量門口，闊十肘，門ê長十三肘。I niû mn̂g-kháu, khoah cha̍p tiú, mn̂g ê tn̂g cha̍p-saⁿ tiú.

12侍衛房頭前ê界，chit-pêng一肘，hit-pêng也有界，一肘；侍衛房chit-pêng六肘，hit-pêng六肘。Sī-ōe-pâng thâu-chêng ê kài, chit-pêng chi̍t-tiú, hit-pêng iā ū kài, chi̍t-tiú; sī-ōe-pâng chit-pêng la̍k-tiú, hit-pêng la̍k-tiú.

13Koh量門tùi chit-ê侍衛房ê厝頂到hit-ê侍衛房ê厝頂，闊二十五肘；門kap門相對。Koh niû mn̂g tùi chit ê sī-ōe-pâng ê chhù-téng kàu hit ê sī-ōe-pâng ê chhù-téng, khoah jī-cha̍p-gō͘ tiú; mn̂g kap mn̂g saⁿ-tùi.

14Koh做hiah-ê柱六十肘；有院用柱做界，tī門ê四圍。Koh chòe hiah ê thiāu la̍k-cha̍p tiú; ū īⁿ ēng thiāu chòe-kài, tī mn̂g ê sì-ûi.

15Tùi入門ê頭前到內面門ê léng廊ê頭前，共五十肘。Tùi ji̍p-mn̂g ê thâu-chêng kàu lāi-bīn mn̂g ê léng-lông ê thâu-chêng, kiōng gō͘-cha̍p tiú.

16Chiah-ê侍衛房kap門內四圍ê柱，以及in ê léng廊，lóng有關密ê窗；koh四圍有窗ǹg內面；ta̍k支柱ê頂面有棕樹。Chiah ê sī-ōe-pâng kap mn̂g-lāi sì-ûi ê thiāu, í-ki̍p in ê léng-lông, lóng ū koaiⁿ-ba̍t ê thang; koh sì-ûi ū thang ǹg lāi-bīn; ta̍k ki thiāu ê téng-bīn ū chang-chhiū.

17伊chhōa我入外院；看ah，有房間，koh tī院ê四圍有舖石ê地；舖石地ê頂面有房三十間。I chhōa góa ji̍p gōa-īⁿ; khòaⁿ ah, ū pâng-keng, koh tī īⁿ ê sì-ûi ū pho͘-chio̍h ê tōe; pho͘-chio̍h tōe ê téng-bīn ū pâng saⁿ-cha̍p keng.

18舖石ê地是tī hiah-ê門ê身邊，kap hiah-ê門平長；這是下面舖石ê地。Pho͘-chio̍h ê tōe sī tī hiah ê mn̂g ê sin-piⁿ, kap hiah ê mn̂g pîⁿ-tn̂g; che sī ē-bīn pho͘-chio̍h ê tōe.

19伊tùi下面門ê頭前量到內院頭前ê外面，闊一百肘；東面北面lóng是án-ni。I tùi ē-bīn mn̂g ê thâu-chêng niû kàu lāi-īⁿ thâu-chêng ê gōa-bīn, khoah chi̍t-pah tiú; tang-bīn pak-bīn lóng sī án-ni.

20外院ǹg北ê門，伊量伊ê長闊。Gōa-īⁿ ǹg pak ê mn̂g, i niû i ê tn̂g khoah.

21伊ê侍衛房chit-pêng三間，hit-pêng三間；伊ê柱，伊ê léng廊，lóng照頭一個門ê辦；長五十肘，闊二十五肘。I ê sī-ōe-pâng chit-pêng saⁿ-keng, hit-pêng saⁿ-keng; i ê thiāu, i ê léng-lông, lóng chiàu thâu chi̍t ê mn̂g ê pān; tn̂g gō͘-cha̍p tiú, khoah jī-cha̍p-gō͘ tiú.

22伊ê窗伊ê léng廊kap伊ê棕樹，lóng是照ǹg東ê門；人tùi七層ê崎á上到hia；頭前有hiah-ê廊。I ê thang i ê léng-lông kap i ê chang-chhiū, lóng sī chiàu ǹg-tang ê mn̂g; lâng tùi chhit-chàn ê kiā-á chiūⁿ kàu hia; thâu-chêng ū hiah ê lông.

23內院有門kap東勢ê門北勢ê門相對；伊tùi門到門量伊，一百肘。Lāi-īⁿ ū mn̂g kap tang--sì ê mn̂g pak--sì ê mn̂g saⁿ-tùi; i tùi mn̂g kàu mn̂g niû--i, chi̍t-pah tiú.

24伊chhōa我ǹg南勢去；看ah，有門ǹg南；koh照前ê寸尺量伊ê柱kap伊ê léng廊。I chhōa góa ǹg lâm--sì khì; khòaⁿ ah, ū mn̂g ǹg-lâm; koh chiàu chêng ê chhùn-chhioh niû i ê thiāu kap i ê léng-lông.

25伊ê內面kap伊ê léng廊四圍lóng有窗，kap前所量ê窗同一樣；長五十肘，闊二十五肘。I ê lāi-bīn kap i ê léng-lông sì-ûi lóng ū thang, kap chêng só͘ niû ê thang tâng chi̍t-iūⁿ; tn̂g gō͘-cha̍p tiú, khoah jī-cha̍p-gō͘ tiú.

26有七層崎á thang上到hia；頭前有hiah-ê léng廊；柱頂有棕樹，chit-pêng一叢，hit-pêng一叢。Ū chhit-chàn kiā-á thang chiūⁿ kàu hia; thâu-chêng ū hiah ê léng-lông; thiāu-téng ū chang-chhiū, chit-pêng chi̍t-châng, hit-pêng chi̍t-châng.

27內院有門ǹg南；tùi門到門伊ǹg南量伊一百肘。Lāi-īⁿ ū mn̂g ǹg-lâm; tùi mn̂g kàu mn̂g i ǹg-lâm niû-i chi̍t-pah tiú.

28伊chhōa我tùi南門到內院；就照前ê寸尺量南門；I chhōa góa tùi lâm-mn̂g kàu lāi-īⁿ; chiū chiàu chêng ê chhùn-chhioh niû lâm-mn̂g;

29伊ê房，伊ê柱，伊ê léng廊，lóng照前ê寸尺；伊ê內面kap伊léng廊四圍lóng有窗；長五十肘，闊二十五肘。i ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn kap i léng-lông sì-ûi lóng ū thang; tn̂g gō͘-cha̍p tiú, khoah jī-cha̍p-gō͘ tiú.

30周圍有léng廊，長二十五肘，闊五肘。Chiu-ûi ū léng-lông, tn̂g jī-cha̍p-gō͘ tiú, khoah gō͘-tiú.

31伊ê lông ǹg外院，柱頂有棕樹，chiūⁿ八-chàn崎á到hia。I ê lông ǹg gōa-īⁿ, thiāu-téng ū chang-chhiū, chiūⁿ poeh-chàn kiā-á kàu hia.

32伊chhōa我到內院，ǹg東；伊量hit-ê門，照前ê寸尺。I chhōa góa kàu lāi-īⁿ, ǹg tang; i niû hit ê mn̂g, chiàu chêng ê chhùn-chhioh.

33伊ê房，伊ê柱，伊ê léng廊，lóng照前ê寸尺；伊ê內面，kap伊léng廊四圍lóng有窗，長五十肘，闊二十五肘。I ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn, kap i léng-lông sì-ûi lóng ū thang, tn̂g gō͘-cha̍p tiú, khoah jī-cha̍p-gō͘ tiú.

34伊ê廊ǹg外院，柱頂tī chit-pêng， hit-pêng有棕樹；上八層崎á到hia。I ê lông ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia.

35伊koh chhōa我到北門，量伊照前ê寸尺。I koh chhōa góa kàu pak-mn̂g, niû--i chiàu chêng ê chhùn-chhioh.

36Koh量伊ê房，伊ê柱，伊ê léng廊；內面四圍lóng有窗，伊ê長五十肘，闊二十五肘。Koh niû i ê pâng, i ê thiāu, i ê léng-lông; lāi-bīn sì-ûi lóng ū thang, i ê tn̂g gō͘-cha̍p tiú, khoah jī-cha̍p-gō͘ tiú.

37伊ê柱ǹg外院，柱頂tī chit-pêng，hit-pêng有棕樹；上八層崎á到hia。I ê thiāu ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia.

38門ê柱邊有房，kap伊ê門；tī-hia洗燒祭ê牲禮；Mn̂g ê thiāu-piⁿ ū pâng, kap i ê mn̂g; tī-hia sóe sio-chè ê seng-lé;

39Tī門廊ê內面，chit-pêng有兩塊桌，hit pêng有兩塊桌；tī hit頂面thang來thâi燒祭，贖罪祭，補過失ê祭ê牲禮。tī mn̂g-lông ê lāi-bīn, chit-pêng ū nn̄g tè toh, hit pêng ū nn̄g tè toh; tī hit téng-bīn thang lâi thâi sio-chè, sio̍k-chōe chè, pó͘-kè-sit ê chè ê seng-lé.

40上到ǹg北ê門口，chit-pêng ê外面有兩塊桌，門廊hit pêng也有兩塊桌。Chiūⁿ kàu ǹg pak ê mn̂g-kháu, chit-pêng ê gōa-bīn ū nn̄g tè toh, mn̂g-lông hit pêng iā ū nn̄g tè toh.

41Tī門邊chit-pêng有四塊桌，hit-pêng有四塊桌，共八塊tī hit頂面thâi牲禮。Tī mn̂g-piⁿ chit-pêng ū sì-tè toh, hit-pêng ū sì-tè toh, kiōng poeh tè; tī hit téng-bīn thâi seng-lé.

42為tio̍h燒祭ê路用ê四塊桌，是石phah-ê，長肘半，闊肘-半，高一-肘；thâi燒祭kap chiah-ê祭，所用ê器具hē tī hit頂面。Ūi-tio̍h sio-chè ê lō͘-ēng ê sì tè toh, sī chio̍h phah--ê, tn̂g tiú-pòaⁿ, khoah tiú-pòaⁿ, koâiⁿ chi̍t-tiú; thâi sio-chè kap chiah ê chè, só͘ ēng ê khì-kū hē tī hit téng-bīn.

43有溝，闊一巴掌，釘tiâu tī內面ê四圍；桌頂有祭肉。Ū kau, khoah chi̍t pa-chiúⁿ, tèng-tiâu tī lāi-bīn ê sì-ûi; toh-téng ū chè-bah.

44內門ê外面，北門邊ê內院，有房間；為tio̍h唱歌ê人來設；hiah-ê房間ǹg南，東門-邊也有一間ǹg北。Lāi-mn̂g ê gōa-bīn, pak-mn̂g-piⁿ ê lāi-īⁿ, ū pâng-keng; ūi-tio̍h chhiùⁿ-koa ê lâng lâi siat; hiah ê pâng-keng ǹg-lâm, tang-mn̂g-piⁿ iā ū chi̍t-keng ǹg-pak.

45伊kā我講，Chit間ǹg南ê房是hō͘擔當顧厝ê祭司用。I kā góa kóng, Chit-keng ǹg-lâm ê pâng sī hō͘ tam-tng kò͘-chhù ê chè-si ēng.

46Hit間ǹg北ê房是hō͘擔當顧壇ê祭司用；chiah-ê是利未族中Sat-tok ê kiáⁿ孫，就近耶和華來服事ê。Hit-keng ǹg-pak ê pâng sī hō͘ tam-tng kò͘-tôaⁿ ê chè-si ēng; chiah-ê sī Lī-bī cho̍k-tiong Sat-tok ê kiáⁿ-sun, chiū-kūn Iâ-hô-hoa lâi ho̍k-sāi--ê.

47伊koh量hit-ê院，長一百肘，闊一百肘；是四方ê；壇是tī厝前。I koh niû hit ê īⁿ, tn̂g chi̍t-pah tiú, khoah chi̍t-pah tiú; sī sù-hong--ê; tôaⁿ sī tī chhù-chêng.

48伊chhōa我到厝前ê léng廊，niû léng廊ê ta̍k支柱，chit-pêng五肘，hit-pêng五肘。門ê闊，chit-pêng三肘，hit-pêng三肘。I chhōa góa kàu chhù-chêng ê léng-lông, niû léng-lông ê ta̍k ki thiāu, chit-pêng gō͘ tiú, hit-pêng gō͘ tiú. Mn̂g ê khoah, chit-pêng saⁿ tiú, hit-pêng saⁿ tiú.

49Léng廊長二十肘，闊十一肘；有人peh上ê崎á；hiah-ê柱邊，koh有細支柱；chit-pêng一支，hit-pêng一支。Léng-lông tn̂g jī-cha̍p tiú, khoah cha̍p-it tiú; ū lâng peh-chiūⁿ ê kiā-á; hiah ê thiāu-piⁿ, koh ū sòe-ki thiāu; chit-pêng chi̍t ki, hit-pêng chi̍t-ki.