1伊就對我講，人子ah，tio̍h食你所得tio̍h ê；tio̍h食hit卷冊，也tio̍h去對以色列家講話。I chiū tùi góa kóng, Jîn-chú ah, tio̍h chia̍h lí só͘ tit-tio̍h ê; tio̍h chia̍h hit kńg chheh, iā tio̍h khì tùi Í-sek-lia̍t ke kóng-ōe.

2Tùi án-ni，我開嘴，伊就hō͘我食hit卷。Tùi án-ni góa khui-chhùi, I chiū hō͘ góa chia̍h hit-kńg.

3Koh對我講，人子ah，將chit卷，我所hō͘你ê，tio̍h食tī你ê腹肚，充滿你ê長。我就食伊；嘴內知伊ê甜親像蜜。Koh tùi góa kóng, Jîn-chú ah, chiong chit-kńg, Góa só͘ hō͘ lí ê, tio̍h chia̍h tī lí ê pak-tó͘, chhiong-móa lí ê tn̂g. Góa chiū chia̍h i; chhùi-lāi chai i ê tiⁿ chhin-chhiūⁿ bi̍t.

4伊對我講，人子ah，起來就近以色列ê家，也用我ê話kā in講。I tùi góa kóng, Jîn-chú ah, khí-lâi chiū-kūn Í-sek-lia̍t ê ke, iā ēng Góa ê ōe kā in kóng.

5因為你奉差m̄是去hit-ê講話深奧，言語oh得聽ê百姓hia，就是去以色列家；In-ūi lí hōng-chhe m̄-sī khì hit ê kóng-ōe chhim-ò, giân-gú oh--tit thiaⁿ ê peh-sìⁿ hia, chiū-sī khì Í-sek-lia̍t ke;

6m̄是去hiah-ê講話深奧，言語oh得聽ê chōe-chōe國，in ê話你bōe曉得聽。m̄-sī khì hiah ê kóng-ōe chhim-ò, giân-gú oh--tit thiaⁿ ê chōe-chōe kok, in ê ōe lí bōe hiáu-tit thiaⁿ.

7我若差你去in hia，in的確聽你。總是以色列家m̄肯聽你，因為m̄肯聽我；因為以色列全家是頭額tēng，心硬ê人。Góa nā chhe lí khì in hia, in tek-khak thiaⁿ lí. Chóng-sī Í-sek-lia̍t ke m̄-khéng thiaⁿ lí, in-ūi m̄-khéng thiaⁿ Góa; in-ūi Í-sek-lia̍t choân-ke sī thâu-hia̍h tēng, sim ngī ê lâng.

8看ah，我hō͘你ê面硬，抵敵in ê面；hō͘你ê頭額tēng，抵敵in ê頭額。Khòaⁿ ah, Góa hō͘ lí ê bīn ngī, tí-te̍k in ê bīn; hō͘ lí ê thâu-hia̍h tēng, tí-te̍k in ê thâu-hia̍h.

9我hō͘你ê頭額親像鑽石，比火石khah-tēng；in雖然是悖逆ê家，你莫得驚in，也莫得因為in ê面貌來驚惶。Góa hō͘ lí ê thâu-hia̍h chhin-chhiūⁿ soān-chio̍h, pí hé-chio̍h khah-tēng; in sui-jiân sī pōe-ge̍k ê ke, lí bo̍h-tit kiaⁿ in, iā bo̍h-tit in-ūi in ê bīn-māu lâi kiaⁿ-hiâⁿ.

10伊koh對我講，人子ah，我對你所講一切ê話，你tio̍h用心承受，用耳孔聽。I koh tùi góa kóng, Jîn-chú ah, Góa tùi lí só͘ kóng it-chhè ê ōe, lí tio̍h ēng sim sêng-siū, ēng hī-khang thiaⁿ.

11你tio̍h去就近本國受掠ê百姓hia；in kiám-chhái聽，kiám-chhái m̄聽；你tio̍h對in講話，kā in講，這是主耶和華án-ni講。Lí tio̍h khì chiū-kūn pún-kok siū-lia̍h ê peh-sìⁿ hia; in kiám-chhái thiaⁿ, kiám-chhái m̄-thiaⁿ; lí tio̍h tùi in kóng-ōe, kā in kóng, Che sī Chú Iâ-hô-hoa án-ni kóng.

12Hit時神舉起我，我就聽見tī我ê ka-chiah後有大振動hū-hū哮ê聲，講，耶和華ê榮光tùi伊ê所在顯出，應該得tio̍h o-ló。Hit-sî sîn kú-khí góa, góa chiū thiaⁿ-kìⁿ tī góa ê ka-chiah-āu ū tōa tín-tāng hū-hū-háu ê siaⁿ, kóng, Iâ-hô-hoa ê êng-kng tùi I ê só͘-chāi hián-chhut, eng-kai tit-tio̍h o-ló.

13我也聽見hiah-ê活物ê翼相kha̍p-tio̍h ê聲，kap in ê身邊輪ê聲，就是大振動hū-hū哮ê聲。Góa iā thiaⁿ-kìⁿ hiah ê oa̍h-mi̍h ê si̍t saⁿ-kha̍p-tio̍h ê siaⁿ, kap in ê sin-piⁿ lûn ê siaⁿ, chiū-sī tōa tín-tāng hū-hū-háu ê siaⁿ.

14Tùi án-ni，神舉起我，帶我去；我去真艱苦，心神激烈；耶和華ê手tī我身上真有力。Tùi án-ni sîn kú-khí góa, tòa góa khì; góa khì chin kan-khó͘, sim-sîn kek-lia̍t; Iâ-hô-hoa ê chhiú tī góa sin-chiūⁿ chin ū la̍t.

15我就到The-le̍k-a-pit，tiàm tī Ka-pa-ló͘河邊受掠ê人hit位，到in所khiā起ê所在；tī in中間坐七日久，tiàm hia真gông-ngia̍h。Góa chiū kàu The-le̍k-a-pit, tiàm tī Ka-pa-ló͘ hô-piⁿ siū-lia̍h ê lâng hit-ūi, kàu in só͘ khiā-khí ê só͘-chāi; tī in tiong-kan chē chhit-ji̍t kú, tiàm hia chin gông-ngia̍h.

16過七日耶和華ê話臨到我，講，Kè chhit-ji̍t Iâ-hô-hoa ê ōe lîm-kàu góa, kóng,

17人子ah，我設立你做以色列家守望ê人；所以你tio̍h聽我ê嘴所講ê，替我警戒in。Jîn-chú ah, Góa siat-li̍p lí chòe Í-sek-lia̍t ke siú-bāng ê lâng; só͘-í lí tio̍h thiaⁿ Góa ê chhùi só͘-kóng--ê, thòe Góa kéng-kài in.

18我對pháiⁿ人講，你的確會死；若你無警戒伊，無用話警戒pháiⁿ人hō͘伊離開伊ê pháiⁿ路，來救伊ê性命；就hit-ê pháiⁿ人beh死tī伊ê罪；總是我beh對你ê手討伊ê性命。Góa tùi pháiⁿ-lâng kóng, Lí tek-khak ōe sí; nā lí bô kéng-kài i, bô ēng ōe kéng-kài pháiⁿ-lâng hō͘ i lī-khui i ê pháiⁿ-lō͘, lâi kiù i ê sìⁿ-miā; chiū hit ê pháiⁿ-lâng beh sí tī i ê chōe; chóng-sī Góa beh tùi lí ê chhiú thó i ê sìⁿ-miā.

19設使你警戒pháiⁿ人，也伊無oa̍t-tńg離開伊ê pháiⁿ所行kap伊ê pháiⁿ路，就伊beh死tī伊ê罪；總是你有救你家己ê性命。Siat-sú lí kéng-kài pháiⁿ-lâng, iā i bô oa̍t-tńg lī-khui i ê pháiⁿ só͘-kiâⁿ kap i ê pháiⁿ-lō͘, chiū i beh sí tī i ê chōe; chóng-sī lí ū kiù lí ka-kī ê sìⁿ-miā.

20Koh設使有義人oa̍t-tńg離開伊ê義來犯罪，我也hē窒礙tī伊ê面前，就伊beh死；因為你無警戒伊，就伊beh死tī伊ê罪，koh伊所有行ê義無koh得tio̍h記念；總是我beh對你ê手討伊ê性命。Koh siat-sú ū gī-lâng oa̍t-tńg lī-khui i ê gī lâi hoān-chōe, Góa iā hē that-gāi tī i ê bīn-chêng, chiū i beh sí; in-ūi lí bô kéng-kài i, chiū i beh sí tī i ê chōe, koh i só͘ ū kiâⁿ ê gī bô koh tit-tio̍h kì-liām; chóng-sī Góa beh tùi lí ê chhiú thó i ê sìⁿ-miā.

21總是你若警戒義人，hō͘義人無犯罪，伊若真正無犯罪，就的確得tio̍h活，因為伊有受警戒；你亦救家己ê性命。Chóng-sī lí nā kéng-kài gī-lâng, hō͘ gī-lâng bô hoān-chōe, i nā chin-chiàⁿ bô hoān-chōe, chiū tek-khak tit-tio̍h oa̍h, in-ūi i ū siū kéng-kài; lí ia̍h kiù ka-kī ê sìⁿ-miā.

22耶和華ê手tī-hia hē tī我ê身上；伊對我講，你起來，去平洋，我beh tī-hia kap你講話。Iâ-hô-hoa ê chhiú tī-hia hē tī góa ê sin-chiūⁿ; I tùi góa kóng, Lí khí-lâi, khì pîⁿ-iûⁿ, Góa beh tī-hia kap lí kóng-ōe.

23Tùi án-ni，我起來，出去到平洋；看ah，耶和華ê榮光khiā tī-hia，親像我tī Ka-pa-ló͘河邊所看見ê榮光一樣；我就仆tī地裡。Tùi án-ni, góa khí-lâi, chhut-khì kàu pîⁿ-iûⁿ; khòaⁿ ah, Iâ-hô-hoa ê êng-kng khiā tī-hia, chhin-chhiūⁿ góa tī Ka-pa-ló͘ hô-piⁿ só͘ khòaⁿ-kìⁿ ê êng-kng chi̍t-iūⁿ; góa chiū phak tī tōe--nih.

24神就入我ê內面，hō͘我khiā起來；伊kap我講話；對我講，去ah，你tio̍h家己關tī厝內。Sîn chiū ji̍p góa ê lāi-bīn, hō͘ góa khiā--khí-lâi; I kap góa kóng-ōe; tùi góa kóng, Khì ah, lí tio̍h ka-kī koaiⁿ tī chhù-lāi.

25人子ah，人beh用索hē tī你ê身軀，kā你綑縛；致到你bōe出去來行tī in中間。Jîn-chú ah, lâng beh ēng soh hē tī lí ê sin-khu, kā lí khún-pa̍k; tì-kàu lí bōe chhut-khì lâi kiâⁿ tī in tiong-kan.

26我beh hō͘你ê舌連tī你ê chiūⁿ-kiuⁿ，致到你啞口，bōe會做責備in ê人；因為in是悖逆ê家。Góa beh hō͘ lí ê chi̍h liâm tī lí ê chiūⁿ-kiuⁿ, tì-kàu lí é-káu, bōe ōe chòe chek-pī in ê lâng; in-ūi in sī pōe-ge̍k ê ke.

27獨獨到我kap你講話ê時，我beh開你ê嘴，你就對in講，主耶和華án-ni講，Ài聽ê聽，m̄聽ê kù伊m̄聽；因為in是悖逆ê家。To̍k-to̍k kàu Góa kap lí kóng-ōe ê sî, Góa beh khui lí ê chhùi, lí chiū tùi in kóng, Chú Iâ-hô-hoa án-ni kóng, Ài thiaⁿ--ê thiaⁿ, m̄ thiaⁿ--ê kù i m̄-thiaⁿ; in-ūi in sī pōe-ge̍k ê ke.

1人子ah，你tio̍h the̍h一塊磚，hē tī你ê面前；畫耶路撒冷城tī hit頂面。Jîn-chú ah, lí tio̍h the̍h chi̍t tè chng, hē tī lí ê bīn-chêng; ūi Iâ-lō͘-sat-léng siâⁿ tī hí téng-bīn.

2Koh圍困攻擊伊，起土堆攻擊伊，tī四圍安設大槌攻擊伊。Koh ûi-khùn kong-kek--i, khí thô͘-tui kong-kek--i, tī sì-ûi an-siat tōa-thûi kong-kek--i.

3Koh tio̍h the̍h鐵板，hē tī你kap城ê中間，準做鐵牆；你ê面定定ǹg伊，就城受圍困，你beh圍困伊。這thang做兆頭tī以色列家。Koh tio̍h the̍h thih-pán, hē tī lí kap siâⁿ ê tiong-kan, chún-chòe thih-chhiûⁿ; lí ê bīn tiāⁿ-tiāⁿ ǹg--i, chiū siâⁿ siū ûi-khùn, lí beh ûi-khùn i. Che thang chòe tiāu-thâu tī Í-sek-lia̍t ke.

4你tio̍h khi tò-pêng倒teh，擔當以色列家ê罪；照你khi tò-pêng倒teh ê日jōa-chōe，你擔當in ê罪也是án-ni。Lí tio̍h khi tò-pêng tó-teh, tam-tng Í-sek-lia̍t ke ê chōe; chiàu lí khi tò-pêng tó--teh ê ji̍t jōa-chōe, lí tam-tng in ê chōe iā sī án-ni.

5我將in犯罪ê年hō͘你用日ê數額來抵伊，就是三百九十日；你照án-ni擔當以色列家ê罪過。Góa chiong in hoān-chōe ê nî hō͘ lí ēng ji̍t ê siàu-gia̍h lâi tí--i, chiū-sī saⁿ-pah káu-cha̍p ji̍t; lí chiàu án-ni tam-tng Í-sek-lia̍t ke ê chōe-kòa.

6你已經滿chiah-ê日，tio̍h koh khi chiàⁿ-pêng倒teh，擔當猶大家ê罪過，我kā你限四十日，一日抵一年。Lí í-keng móa chiah ê ji̍t, tio̍h koh khi chiàⁿ-pêng tó-teh, tam-tng Iû-tāi ke ê chōe-kòa, Góa kā lí hān sì-cha̍p ji̍t, chi̍t-ji̍t tí chi̍t-nî.

7所以你ê面tio̍h定定ǹg受圍困ê耶路撒冷，手骨le̍k theh-theh，宣傳來攻擊伊。Só͘-í lí ê bīn tio̍h tiāⁿ-tiāⁿ ǹg siū ûi-khùn ê Iâ-lō͘-sat-léng, chhiú-kut le̍k theh-theh, soan-thoân lâi kong-kek--i.

8看ah，我beh用索hē tī你ê身上；致到你bōe能翻過pêng，到你圍困城ê日滿。Khòaⁿ ah, Góa beh ēng soh hē tī lí ê sin-chiūⁿ; tì-kàu lí bōe-ōe hoan kè-pêng, kàu lí ûi-khùn siâⁿ ê ji̍t móa.

9你tio̍h the̍h小麥、大麥、豆á、紅豆、黍á，kap粗麥，貯tī一個器具內；為tio̍h本身用伊來做餅，照你倒thán-khi ê日ê數額，就是三百九十日，你tio̍h食伊。Lí tio̍h the̍h sió-be̍h, tōa-be̍h, tāu-á, âng-tāu, sóe-á, kap chho͘-be̍h, tóe tī chi̍t ê khì-kū-lāi; ūi-tio̍h pún-sin ēng--i lâi chòe-piáⁿ, chiàu lí tó thán-khi ê ji̍t ê siàu-gia̍h, chiū-sī saⁿ-pah káu-cha̍p ji̍t, lí tio̍h chia̍h--i.

10你所食ê植物，tio̍h照秤重，ta̍k日食二十sià-khek-le̍k，照時來食。Lí só͘ chia̍h ê si̍t-bu̍t, tio̍h chiàu chhìn-tāng, ta̍k-ji̍t chia̍h jī-cha̍p sià-khek-le̍k, chiàu-sî lâi chia̍h.

11你lim水亦tio̍h照量，ta̍k日一him ê 六份一；照時來lim。Lí lim chúi ia̍h tio̍h chiàu niû, ta̍k-ji̍t chi̍t-him ê la̍k-hūn-chi̍t; chiàu-sî lâi lim.

12你食chit-ê餅，親像食大麥餅一樣；tio̍h用人所放ê糞，pek伊tī眾人ê目睭前。Lí chia̍h chit ê piáⁿ, chhin-chhiūⁿ chia̍h tōa-be̍h-piáⁿ chi̍t-iūⁿ; tio̍h ēng lâng só͘ pàng ê pùn, pek--i tī chèng-lâng ê ba̍k-chiu-chêng.

13耶和華講，以色列人tī我所趕in到ê列國中，亦的確án-ni食無清氣ê餅。Iâ-hô-hoa kóng, Í-sek-lia̍t lâng tī Góa só͘ kóaⁿ in kàu ê lia̍t-kok-tiong, ia̍h tek-khak án-ni chia̍h bô chheng-khì ê piáⁿ.

14我講，Ai ah，主耶和華ah，我平素bē-bat bak-tio̍h lâ-sâm，tùi細漢到taⁿ，bē-bat食家己死ê，á是hō͘野獸拆裂ê；hit-ê可惡ê肉，亦bē-bat入我ê嘴。Góa kóng, Ai ah, Chú Iâ-hô-hoa ah, góa pêng-sò͘ bē-bat bak-tio̍h lâ-sâm, tùi sòe-hàn kàu-taⁿ, bē-bat chia̍h ka-kī sí--ê, á-sī hō͘ iá-siù thiah-li̍h--ê; hit ê khó-ò͘ⁿ ê bah, ia̍h bē-bat ji̍p góa ê chhùi.

15Tùi án-ni，祂對我講，看ah，我hō͘你用牛屎來替人ê糞；你tio̍h將你ê餅pek tī hit頂面。Tùi án-ni I tùi góa kóng, Khòaⁿ ah, Góa hō͘ lí ēng gû-sái lâi thòe lâng ê pùn; lí tio̍h chiong lí ê piáⁿ pek tī hit téng-bīn.

16祂koh對我講，人子ah，看ah，我beh tī耶路撒冷斷絕in所óa靠ê米糧；in食餅tio̍h照秤，撙節來食；lim水亦tio̍h照量，gông-ngia̍h來lim。I koh tùi góa kóng, Jîn-chú ah, khòaⁿ ah, Góa beh tī Iâ-lō͘-sat-léng toān-choa̍t in só͘ óa-khò ê bí-niû; in chia̍h-piáⁿ tio̍h chiàu chhìn, chún-chat lâi chia̍h; lim chúi ia̍h tio̍h chiàu niû, gông-ngia̍h lâi lim.

17Hō͘ in欠缺餅kap水，相kap gông-ngia̍h，koh tī in ê罪過來消滅。Hō͘ in khiàm-kheh piáⁿ kap chúi, saⁿ-kap gông-ngia̍h, koh tī in ê chōe-kòa lâi siau-bia̍t.

1人子ah，你tio̍h kia̍h一支利劍，做你ê剃頭刀，來剃你ê頭毛kap你ê嘴鬚；然後用厘戥戥伊ê 重輕，來分伊。Jîn-chú ah, lí tio̍h kia̍h chi̍t ki lāi-kiàm, chòe lí ê thì-thâu-to, lâi thì lí ê thâu-mn̂g kap lí ê chhùi-chhiu; jiân-āu ēng lî-téng téng i ê tāng-khin, lâi pun i.

2圍困城ê日已經滿，你tio̍h將三份ê一份tī城內用火燒伊；將三份ê一份tī伊ê四圍用刀phah伊；將三份ê一份掖散hō͘風吹去；我亦beh拔刀追jip伊。Ûi-khùn siâⁿ ê ji̍t í-keng móa, lí tio̍h chiong saⁿ-hūn ê chi̍t-hūn tī siâⁿ-lāi ēng hé sio--i; chiong saⁿ-hūn ê chi̍t-hūn tī i ê sì-ûi ēng to phah--i; chiong saⁿ-hūn ê chi̍t-hūn iā-sòaⁿ hō͘ hong chhe--khì; Góa ia̍h beh pu̍ih to tui-jip--i.

3你tio̍h tùi hit中間the̍h kúi-nā支，縛tī你ê衫á裾。Lí tio̍h tùi hí tiong-kan the̍h kúi-nā ki, pa̍k tī lí ê saⁿ-á-ku.

4Koh tùi hit中間the̍h淡薄á，hiat tī火中，用火燒伊；tùi hia beh有火出，到tī以色列全家。Koh tùi hí tiong-kan the̍h tām-po̍h-á, hiat tī hé-tiong, ēng hé sio--i; tùi hia beh ū hé chhut, kàu tī Í-sek-lia̍t choân-ke.

5主耶和華án-ni講，這是耶路撒冷；我beh安置伊tī列邦中，列國tī伊ê四圍。Chú Iâ-hô-hoa án-ni kóng, Che sī Iâ-lō͘-sat-léng; Góa beh an-tì i tī lia̍t-pang-tiong, lia̍t-kok tī i ê sì-ûi.

6伊行pháiⁿ違逆我ê法度，比列邦khah傷重；干犯我ê律例比四圍ê列國khah慘；因為伊棄sak我ê法度，我ê律例in亦無遵thàn。I kiâⁿ pháiⁿ ûi-ke̍h Góa ê hoat-tō͘, pí lia̍t-pang khah siong-tiōng; kan-hoān Góa ê lu̍t-lē pí sì-ûi ê lia̍t-kok khah-chhám; in-ūi i khì-sak Góa ê hoat-tō͘, Góa ê lu̍t-lē in ia̍h bô chun-thàn.

7所以主耶和華án-ni講： 因為lín擾亂比lín四圍ê列邦khah傷重，無遵thàn我ê律例，無執守我ê法度，亦m̄-thàn lín四圍列國ê法度。Só͘-í Chú Iâ-hô-hoa án-ni kóng: In-ūi lín jiáu-loān pí lín sì-ûi ê lia̍t-pang khah siong-tiōng, bô chun-thàn Góa ê lu̍t-lē, bô chip-siú Góa ê hoat-tō͘, ia̍h m̄-thàn lín sì-ûi lia̍t-kok ê hoat-tō͘.

8所以主耶和華án-ni講：看ah，我beh攻擊你，我beh tī lín中間審判lín，hō͘列國親目看見。Só͘-í Chú Iâ-hô-hoa án-ni kóng: Khòaⁿ ah, Góa beh kong-kek lí, Góa beh tī lín tiong-kan sím-phòaⁿ lín, hō͘ lia̍t-kok chhin-ba̍k khòaⁿ-kìⁿ.

9Koh因為一切可惡ê事，我beh tī你中間行我所bē-bat行，以後亦無koh án-ni行ê。Koh in-ūi it-chhè khó-ò͘ⁿ ê sū, Góa beh tī lí tiong-kan kiâⁿ Góa só͘ bē-bat kiâⁿ, í-āu ia̍h bô koh án-ni kiâⁿ--ê.

10因為án-ni，tī你ê中間，老父beh thâi kiáⁿ來食，kiáⁿ亦beh thâi老父來食；我beh tī lín中間審判lín。我beh將你所chhun ê眾人，lóng四散in tī四方。In-ūi án-ni, tī lí ê tiong-kan, lāu-pē beh thâi kiáⁿ lâi chia̍h, kiáⁿ ia̍h beh thâi lāu-pē lâi chia̍h; Góa beh tī lín tiong-kan sím-phòaⁿ lín. Góa beh chiong lí só͘ chhun ê chèng-lâng, lóng sì-sòaⁿ in tī sì-hng.

11因為án-ni，主耶和華講，我kí我ê永活來chiù-chōa，為tio̍h你用一切可惡ê物，thang厭賤ê事，phah lâ-sâm我ê聖所，我也beh減少你ê人額；我ê目睭無beh疼惜你，我亦無beh憐憫你。In-ūi án-ni, Chú Iâ-hô-hoa kóng, Góa kí Góa ê éng-oa̍h lâi chiù-chōa, ūi-tio̍h lí ēng it-chhè khó-ò͘ⁿ ê mi̍h, thang iàm-chiān ê sū, phah lâ-sâm Góa ê sèng-só͘, Góa iā beh kiám-chió lí ê lâng-gia̍h; Góa ê ba̍k-chiu bô beh thiàⁿ-sioh lí, Góa ia̍h bô beh lîn-bín lí.

12你三份ê一份beh tùi瘟疫來死，亦tùi飢荒來消滅tī lín中間；三份ê一份beh tī你ê四圍倒tī刀下；三份ê一份我beh四散in tī hiah-ê風；亦beh拔刀追jip in。Lí saⁿ-hūn ê chi̍t-hūn beh tùi un-e̍k lâi sí, ia̍h tùi ki-hng lâi siau-bia̍t tī lín tiong-kan; saⁿ-hūn ê chi̍t-hūn beh tī lí ê sì-ûi tó tī to-ē; saⁿ-hūn ê chi̍t-hūn Góa beh sì-sòaⁿ in tī hiah ê hong; ia̍h beh pu̍ih-to tui-jip in.

13親像án-ni，我ê受氣得tio̍h成，我大受氣in ê beh soah，我就受安慰；koh我大受氣in-ê已經成，就in thang知我耶和華是熱心來講ê。Chhin-chhiūⁿ án-ni, Góa ê siū-khì tit-tio̍h chiâⁿ, Góa tōa siū-khì in ê beh soah, Góa chiū siū an-ùi; koh Góa tōa siū-khì in ê í-keng chiâⁿ, chiū in thang chai Góa Iâ-hô-hoa sī jia̍t-sim lâi kóng--ê.

14我beh hō͘你做冷靜，做凌辱，tī你四圍ê列邦中；hō͘經過ê人親目看見。Góa beh hō͘ lí chòe léng-chēng, chòe lêng-jio̍k, tī lí sì-ûi ê lia̍t-pang-tiong; hō͘ keng-kè ê lâng chhin-ba̍k khòaⁿ-kìⁿ.

15Án-ni，我beh用受氣，kap大受氣，kap嚴嚴ê責備，tī你ê中間審判你；hit時你就tī四圍ê列邦中，成做thang凌辱，thang譏刺，thang鑑戒，thang gông-ngia̍h；這是我耶和華講ê。Án-ni, Góa beh ēng siū-khì, kap tōa siū-khì, kap giâm-giâm ê chek-pī, tī lí ê tiong-kan sím-phòaⁿ lí; hit-sî lí chiū tī sì-ûi ê lia̍t-pang-tiong, chiâⁿ-chòe thang lêng-jio̍k, thang ki-chhì, thang kàm-kài, thang gông-ngia̍h; che sī Góa Iâ-hô-hoa kóng--ê.

16Hit時我用飢荒能剿滅人ê pháiⁿ箭射in；就是我所射來剿滅lín-ê；我亦beh加添lín ê飢荒，斷絕lín所óa靠ê米糧。Hit-sî Góa ēng ki-hng ōe châu-bia̍t lâng ê pháiⁿ-chìⁿ siā in; chiū-sī Góa só͘ siā lâi châu-bia̍t lín--ê; Góa ia̍h beh ke-thiⁿ lín ê ki-hng, toān-choa̍t lín só͘ óa-khò ê bí-niû.

17Koh beh飢荒惡獸到lín hia，in beh hō͘ lín ê kiáⁿ死了了；koh瘟疫kap thâi人ê事亦beh流行tī lín hia；我亦beh hō͘刀劍臨到lín；這是我耶和華講ê。Koh beh ki-hng ok-siù kàu lín hia, in beh hō͘ lín ê kiáⁿ sí-liáu-liáu; koh un-e̍k kap thâi lâng ê sū ia̍h beh liû-hêng tī lín hia; Góa ia̍h beh hō͘ to-kiàm lîm-kàu lín; che sī Góa Iâ-hô-hoa kóng--ê.