1伊koh帶我倒tńg到聖所ê外面ǹg東ê門；hit-ê門關teh。I koh tòa góa tò-tńg kàu sèng-só͘ ê gōa-bīn ǹg-tang ê mn̂g; hit ê mn̂g koaiⁿ--teh.

2耶和華kā我講，chit-ê門，的確tio̍h關，m̄-thang開；無論甚麼人m̄-thang tùi hia入，因為耶和華，以色列ê上帝，已經tùi hia入；所以tio̍h長長關teh。Iâ-hô-hoa kā góa kóng, Chit ê mn̂g, tek-khak tio̍h koaiⁿ, m̄-thang khui; bô-lūn sím-mi̍h lâng m̄-thang tùi hia ji̍p, in-ūi Iâ-hô-hoa, Í-sek-lia̍t ê Siōng-tè, í-keng tùi hia ji̍p; só͘-í tio̍h tn̂g-tn̂g koaiⁿ--teh.

3論到人君，因為伊是人君，thang坐tī hit內面，tī耶和華ê面前食餅；伊tio̍h tùi chit-ê門ê廊入，也tio̍h tùi hia出。Lūn-kàu jîn-kun, in-ūi i sī jîn-kun, thang chē tī hit lāi-bīn, tī Iâ-hô-hoa ê bīn-chêng chia̍h piáⁿ; i tio̍h tùi chit ê mn̂g ê lông ji̍p, iā tio̍h tùi-hia chhut.

4伊koh帶我tùi北門到殿 ê頭前；我就看，看見耶和華ê榮光充滿耶和華ê殿；我就仆落地。I koh tòa góa tùi pak-mn̂g kàu tiān ê thâu-chêng; góa chiū khòaⁿ, khòaⁿ-kìⁿ Iâ-hô-hoa ê êng-kng chhiong-móa Iâ-hô-hoa ê tiān; góa chiū phak-lo̍h tōe.

5耶和華kā我講，人子ah，我對你所講起耶和華殿內一切ê禮儀法度你tio̍h注意，用目睭看，用耳孔聽，也tio̍h注意殿堂入ê所在，kap聖所一切出去ê所在。Iâ-hô-hoa kā góa kóng, Jîn-chú ah, Góa tùi lí só͘ kóng-khí Iâ-hô-hoa tiān-lāi it-chhè ê lé-gî hoat-tō͘ lí tio̍h chù-ì, ēng ba̍k-chiu khòaⁿ, ēng hī-khang thiaⁿ, iā tio̍h chù-ì tiān-tn̂g ji̍p ê só͘-chāi, kap sèng-só͘ it-chhè chhut-khì ê só͘-chāi.

6你也tio̍h對hiah-ê悖逆ê，對以色列家，講，主耶和華án-ni講，以色列家ah，lín行一切可惡ê事tio̍h掠做夠額；Lí iā tio̍h tùi hiah ê pōe-ge̍k-ê, tùi Í-sek-lia̍t-ke, kóng, Chú Iâ-hô-hoa án-ni kóng, Í-sek-lia̍t-ke ah, lín kiâⁿ it-chhè khó-ò͘ⁿ ê sū tio̍h lia̍h-chòe kàu-gia̍h;

7lín獻我ê餅kap油kap血ê時，lín chhōa hiah-ê心無受割禮，身軀也無受割禮ê外邦人入我ê聖所，來phah lâ-sâm我ê殿，koh背我ê約，加添lín一切可惡ê事。lín hiàn Góa ê piáⁿ kap iû kap huih ê sî, lín chhōa hiah ê sim bô siū kat-lé, seng-khu iā bô siū kat-lé ê gōa-pang lâng ji̍p Góa ê sèng-só͘, lâi phah lâ-sâm Góa ê tiān, koh pōe Góa ê iok, ke-thiⁿ lín it-chhè khó-ò͘ⁿ ê sū.

8Lín也無盡忠tī顧守我聖物ê職份；是為tio̍h lín本身派別人tī我ê聖所顧守我交代lín ê職份。Lín iā bô chīn-tiong tī kò͘-siú Góa sèng-mi̍h ê chit-hūn; sī ūi-tio̍h lín pún-sin phài pa̍t-lâng tī Góa ê sèng-só͘ kò͘-siú Góa kau-tài lín ê chit-hūn.

9主耶和華án-ni講，以色列族中ê外邦人，就是心無受割禮，身軀無受割禮ê外邦人，lóng m̄-thang入我ê聖所。Chú Iâ-hô-hoa án-ni kóng, Í-sek-lia̍t cho̍k-tiong ê gōa-pang lâng, chiū-sī sim bô siū kat-lé, seng-khu bô siū kat-lé ê gōa-pang lâng, lóng m̄-thang ji̍p Góa ê sèng-só͘.

10當以色列行迷路ê時，有利未人離開我遠遠，就是行迷路離開我去tè in ê偶像；in tio̍h擔當in ê罪過。Tng Í-sek-lia̍t kiâⁿ bê-lō͘ ê sî, ū Lī-bī lâng lī-khui Góa hn̄g-hn̄g, chiū-sī kiâⁿ bê-lō͘ lī-khui Góa khì tè in ê ngó͘-siōng; in tio̍h tam-tng in ê chōe-kòa.

11總是in beh tī我ê聖所做差用，管理殿堂ê門，tī殿內做差用；為tio̍h百姓thâi燒祭kap祭祀ê cheng-siⁿ，beh khiā tī in ê面前來服事in。Chóng-sī in beh tī Góa ê sèng-só͘ chòe chhe-ēng, koán-lí tiān-tn̂g ê mn̂g, tī tiān-lāi chòe chhe-ēng; ūi-tio̍h peh-sìⁿ thâi sio-chè kap chè-sū ê cheng-siⁿ, beh khiā tī in ê bīn-chêng lâi ho̍k-sāi in.

12既然tī in ê偶像ê面前做百姓ê差用，koh做窒礙hō͘以色列家陷落罪過；所以我kia̍h起手攻擊in，in beh擔當in ê罪過；這是主耶和華講ê。Kì-jiân tī in ê ngó͘-siōng ê bīn-chêng chòe peh-sìⁿ ê chhe-ēng, koh chòe that-gāi hō͘ Í-sek-lia̍t-ke hām-lo̍h chōe-kòa; só͘-í Góa kia̍h-khí chhiú kong-kek in, in beh tam-tng in ê chōe-kòa; che sī Chú Iâ-hô-hoa kóng--ê.

13In bōe-thang親近我，tùi我行祭司ê職份，也m̄-thang親近我一件聖物，就是至聖ê物；in beh擔當in ê見笑kap in所行可惡ê事。In bōe thang chhin-kūn Góa, tùi Góa kiâⁿ chè-si ê chit-hūn, iā m̄-thang chhin-kūn Góa chi̍t-kiāⁿ sèng-mi̍h, chiū-sī chì-sèng ê mi̍h; in beh tam-tng in ê kiàn-siàu kap in só͘ kiâⁿ khó-ò͘ⁿ ê sū.

14總是我beh hō͘ in擔當顧守殿 ê職份，辨理其中一切ê事，kap hit內面所tio̍h做ê工。Chóng-sī Góa beh hō͘ in tam-tng kò͘-siú tiān ê chit-hūn, pān-lí kî-tiong it-chhè ê sū, kap hit lāi-bīn só͘ tio̍h chòe ê kang.

15以色列族行迷路離開我ê時，祭司利未人，Sat-tok ê kiáⁿ孫，猶原顧守我ê聖所，in beh親近我，服事我，koh khiā tī我ê面前，用油kap血獻hō͘我；這是主耶和華講ê。Í-sek-lia̍t cho̍k kiâⁿ bê-lō͘ lī-khui Góa ê sî, chè-si Lī-bī lâng, Sat-tok ê kiáⁿ-sun, iû-goân kò͘-siú Góa ê sèng-só͘, in beh chhin-kūn Góa, ho̍k-sāi Góa, koh khiā tī Góa ê bīn-chêng, ēng iû kap huih hiàn hō͘ Góa; che sī Chú Iâ-hô-hoa kóng--ê.

16In beh入我ê聖所，就近我ê桌，服事我，守我所交代in做ê。In beh ji̍p Góa ê sèng-só͘, chiū-kūn Góa ê toh, ho̍k-sāi Góa, siú Góa só͘ kau-tài in chòe--ê.

17In入內院ê門ê時tio̍h穿幼苧衫；in tī內院ê門kap tī殿內行職份ê時，lóng m̄-thang穿羊毛ê衣服。In ji̍p lāi-īⁿ ê mn̂g ê sî tio̍h chhēng iù-tōe-saⁿ; in tī lāi-īⁿ ê mn̂g kap tī tiān-lāi kiâⁿ chit-hūn ê sî, lóng m̄-thang chhēng iûⁿ-mn̂g ê i-ho̍k.

18In ê頭殼頂tio̍h tì幼苧布ê帽，腳腿tio̍h穿幼苧布ê 褲；hit-ê話流汗ê lóng m̄-thang穿。In ê thâu-khak-téng tio̍h tì iù-tōe-pò͘ ê bō, kha-thúi tio̍h chhēng iù-tōe-pò͘ ê khò͘; hit ê ōe lâu-kōaⁿ-ê lóng m̄-thang chhēng.

19In出去到外院，就是到外院ê百姓hia，tio̍h thǹg行職份ê衣服hē tī聖ê房間，穿別號ê衣服，免得用in ê衫hō͘百姓成聖。In chhut-khì kàu gōa-īⁿ, chiū-sī kàu gōa-īⁿ ê peh-sìⁿ hia, tio̍h thǹg kiâⁿ chit-hūn ê i-ho̍k hē tī sèng ê pâng-keng, chhēng pa̍t-hō ê i-ho̍k, bián-tit ēng in ê saⁿ hō͘ peh-sìⁿ chiâⁿ-sèng.

20In m̄-thang剃頭，也m̄-thang hō͘頭毛hoat長長；獨獨tio̍h chián頭毛。In m̄-thang thì-thâu, iā m̄-thang hō͘ thâu-mn̂g hoat tn̂g-tn̂g; to̍k-to̍k tio̍h chián thâu-mn̂g.

21祭司入內院ê時lóng m̄-thang lim酒。Chè-si ji̍p lāi-īⁿ ê sî lóng m̄-thang lim-chiú.

22也m̄-thang娶寡婦kap受離出ê婦人人做bó͘；獨獨tio̍h chhōa以色列族中ê在室女á是祭司ê寡婦。Iā m̄-thang chhōa kóaⁿ-hū kap siū lî-chhut ê hū-jîn-lâng chòe-bó͘; to̍k-to̍k tio̍h chhōa Í-sek-lia̍t cho̍k-tiong ê chāi-sek-lú á-sī chè-si ê kóaⁿ-hū.

23In tio̍h hō͘我ê百姓知聖ê kap平常-ê ê cheng差,koh hō͘ in分別無清氣ê kap清氣ê。In tio̍h hō͘ Góa ê peh-sìⁿ chai sèng-ê kap pêng-siông-ê ê cheng-chha; koh hō͘ in hun-piat bô chheng-khì-ê kap chheng-khì-ê.

24有相告ê事in tio̍h khiā-teh判斷，tio̍h照我ê判斷來判斷；tī我一切ê節期tio̍h守我chiah-ê法度律例；也tio̍h守我chiah-ê安歇日做聖。Ū saⁿ-kò ê sū in tio̍h khiā-teh phòaⁿ-toàn, tio̍h chiàu Góa ê phòaⁿ-toàn lâi phòaⁿ-toàn; tī Góa it-chhè ê choeh-kî tio̍h siú Góa chiah ê hoat-tō͘ lu̍t-lē; iā tio̍h siú Góa chiah ê an-hioh-ji̍t chòe-sèng.

25In m̄-thang近óa死人，phah lâ-sâm家己；獨獨thang為tio̍h老父、老母、kiáⁿ、cha-bó͘-kiáⁿ、兄弟，kap iáu未出嫁ê姊妹phah lâ-sâm家己。In m̄-thang kūn-óa sí-lâng, phah lâ-sâm ka-kī; to̍k-to̍k thang ūi-tio̍h lāu-pē, lâu-bú, kiáⁿ, cha-bó͘-kiáⁿ, hiaⁿ-tī, kap iáu-bē chhut-kè ê chì-bē phah lâ-sâm ka-kī.

26伊已經清氣了後，tio̍h kā伊koh算七日。I í-keng chheng-khì liáu-āu, tio̍h kā i koh sǹg chhit-ji̍t.

27當伊入聖所到內院ê日，beh tī聖所服事，tio̍h為本身獻贖罪祭；這是主耶和華講ê。Tng i ji̍p sèng-só͘ kàu lāi-īⁿ ê ji̍t, beh tī sèng-só͘ ho̍k-sāi, tio̍h ūi pún-sin hiàn sio̍k-chōe-chè; che sī Chú Iâ-hô-hoa kóng--ê.

28In的確有產業，我是in ê產業；m̄-thang tī以色列中hō͘ in基業，我是in ê基業。In tek-khak ū sán-gia̍p, Góa sī in ê sán-gia̍p; m̄-thang tī Í-sek-lia̍t-tiong hō͘ in ki-gia̍p, Góa sī in ê ki-gia̍p.

29素祭、贖罪祭、補過失祭，in lóng thang食伊；以色列中所獻一切ê物lóng歸tī in。Sò͘-chè, sio̍k-chōe-chè, pó͘-kè-sit-chè, in lóng thang chia̍h i; Í-sek-lia̍t tiong só͘ hiàn it-chhè ê mi̍h lóng kui tī in.

30見若起頭熟 ê物ê第一ê，kap一切禮物中ê禮物，lóng歸tī祭司；lín也tio̍h用起頭出ê麥粉hō͘祭司，thang hō͘福氣臨到你ê家。Kìⁿ-nā khí-thâu-se̍k ê mi̍h ê tē-it ê, kap it-chhè lé-mi̍h-tiong ê lé-mi̍h, lóng kui tī chè-si; lín iā tio̍h ēng khí-thâu chhut ê be̍h-hún hō͘ chè-si, thang hō͘ hok-khì lîm-kàu lí ê ke.

31無論鳥á是獸，見若家己死ê，á是受peh拆ê，祭司lóng m̄-thang食。Bô-lūn chiáu á-sī siù, kìⁿ-nā ka-kī sí--ê, á-sī siū peh-thiah--ê, chè-si lóng m̄-thang chia̍h.

1Lín liam-khau分地做業，tio̍h獻一份hō͘耶和華來做聖，長兩萬五千篙尺，闊一萬篙尺；伊ê界ê四圍lóng做聖。Lín liam-khau pun tōe chòe-gia̍p, tio̍h hiàn chi̍t-hūn hō͘ Iâ-hô-hoa lâi chòe-sèng, tn̂g nn̄g-bān gō͘-chheng ko-chhioh, khoah chi̍t-bān ko-chhioh; i ê kài ê sì-ûi lóng chòe-sèng.

2其中分別一段做聖所，長五百，闊五百，伊ê款式四方；四圍koh五十肘做郊野ê地。Kî-tiong hun-piat chi̍t-tōaⁿ chòe sèng-só͘, tn̂g gō͘-pah, khoah gō͘-pah, i ê khoán-sit sù-hong; sì-ûi koh gō͘-cha̍p tiú chòe kau-iá ê tōe.

3Tī所量ê ê中間你tio̍h量，長兩萬五千，闊一萬；hit中間有聖所，就是至聖ê。Tī só͘ niû-ê ê tiong-kan lí tio̍h niû, tn̂g nn̄g-bān gō͘-chheng, khoah chi̍t-bān; hit tiong-kan ū sèng-só͘, chiū-sī chì-sèng--ê.

4這是全地一份ê聖地；tio̍h歸tī祭司，就是做聖所ê差用，近óa來服事耶和華ê；chit-ê地thang做in起厝ê所在，kap聖所ê聖地。Che sī choân-tōe chi̍t-hūn ê sèng-tōe; tio̍h kui tī chè-si, chiū-sī chòe sèng-só͘ ê chhe-ēng, kūn-óa lâi ho̍k-sāi Iâ-hô-hoa ê; chit ê tōe thang chòe in khí-chhù ê só͘-chāi, kap sèng-só͘ ê sèng-tōe.

5又koh一份，長兩萬五千，闊一萬，tio̍h歸tī殿內做差用ê利未人，做in ê業，二十間房。Iū-koh chi̍t-hūn, tn̂g nn̄g-bān gō͘-chheng, khoah chi̍t-bān, tio̍h kui tī tiān-lāi chòe chhe-ēng ê Lī-bī lâng, chòe in ê gia̍p, jī-cha̍p keng pâng.

6Lín tio̍h分派做城ê業，闊五千，長兩萬五千，kap所獻ê聖地相排；這是beh做以色列全家ê路用。Lín tio̍h hun-phài chòe siâⁿ ê gia̍p, khoah gō͘-chheng, tn̂g nn̄g-bān gō͘-chheng, kap só͘ hiàn ê sèng-tōe saⁿ-pâi; che sī beh chòe Í-sek-lia̍t choân-ke ê lō͘-ēng.

7見若歸tī人君ê是tī所獻ê聖地以及城ê業chit-pêng hit-pêng，tī所獻聖地ê頭前kap城ê業ê頭前，tùi西方ǹg西，tùi東方ǹg東；伊ê長tio̍h kap in ê一支派ê份額相同，tùi西界到東界。Kìⁿ-nā kui tī jîn-kun--ê sī tī só͘ hiàn ê sèng-tōe í-ki̍p siâⁿ ê gia̍p chit-pêng hit-pêng, tī só͘ hiàn sèng-tōe ê thâu-chêng kap siâⁿ ê gia̍p ê thâu-chêng, tùi sai-hng ǹg-sai, tùi tang-hng ǹg-tang; i ê tn̂g tio̍h kap in ê chi̍t chi-phài ê hūn-gia̍h saⁿ-tâng, tùi sai-kài kàu tang-kài.

8Tī以色列ê境內人君beh得tio̍h chit-ê做基業；後來我chiah-ê人君無koh欺壓我ê百姓；beh用地hō͘以色列家照in ê支派。Tī Í-sek-lia̍t ê kéng-lāi jîn-kun beh tit-tio̍h chit-ê chòe ki-gia̍p; āu-lâi Góa chiah ê jîn-kun bô koh khi-ap Góa ê peh-sìⁿ; beh ēng tōe hō͘ Í-sek-lia̍t-ke chiàu in ê chi-phài.

9主耶和華án-ni講：以色列chiah-ê人君ah，lín taⁿ夠額lah；tio̍h除去強暴kap搶劫ê事，秉公行義；無koh霸佔百姓ê業；這是主耶和華講ê。Chú Iâ-hô-hoa án-ni kóng: Í-sek-lia̍t chiah ê jîn-kun ah, lín taⁿ kàu-gia̍h--lah; tio̍h tû--khì kiông-pō kap chhiúⁿ-kiap ê sū, péng-kong kiâⁿ-gī; bô koh pà-chiàm peh-sìⁿ ê gia̍p; che sī Chú Iâ-hô-hoa kóng--ê.

10Lín tio̍h用公道ê天秤，公道ê i-hoat，公道ê pà-tek。Lín tio̍h ēng kong-tō ê thian-phêng, kong-tō ê i-hoat, kong-tō ê pà-tek.

11I-hoat kap pà-tek tio̍h平大，hō͘ pà-tek thang tóe hō-mûi-ní十份ê一份，i-hoat也thang tóe hō-mûi-ní十份ê一份；lóng用hō-mûi-ní做標準。I-hoat kap pà-tek tio̍h pîⁿ-tōa, hō͘ pà-tek thang tóe hō-mûi-ní cha̍p-hūn ê chi̍t-hūn, i-hoat iā thang tóe hō-mûi-ní cha̍p-hūn ê chi̍t-hūn; lóng ēng hō-mûi-ní chòe phiau-chún.

12Sià-khek-le̍k tio̍h做二十kùi-la̍h；二十ê sià-khek-le̍k，二十五ê sià-khek-le̍k，十五ê sià-khek-le̍k是做lín ê bí-ná。Sià-khek-le̍k tio̍h chòe jī-cha̍p kùi-la̍h; jī-cha̍p ê sià-khek-le̍k, jī-cha̍p-gō͘ ê sià-khek-le̍k, cha̍p-gō͘ ê sià-khek-le̍k sī chòe lín ê bí-ná.

13Lín所應該獻ê禮物tio̍h án-ni；小麥一hō-mûi-ní tio̍h獻i-hoat六份ê一份，大麥一hō-mûi-ní tio̍h獻i-hoat六份ê一份；Lín só͘ eng-kai hiàn ê lé-mi̍h tio̍h án-ni; sió-be̍h chi̍t hō-mûi-ní tio̍h hiàn i-hoat la̍k-hūn ê chi̍t-hūn, tōa-be̍h chi̍t hō-mûi-ní tio̍h hiàn i-hoat la̍k-hūn ê chi̍t-hūn;

14論到油ê定例，tùi油ê pà-tek，就是tùi一kho-ní，就是十個pà-tek，koh是一hō-mûi-ní，獻一pà-tek十份ê一份；因為十pà-tek，就是一hō-mûi-ní；lūn-kàu iû ê tēng-lē, tùi iû ê pà-tek, chiū-sī tùi chi̍t kho-ní, chiū-sī cha̍p ê pà-tek, koh sī chi̍t hō-mûi-ní, hiàn chi̍t pà-tek cha̍p-hūn ê chi̍t-hūn; in-ūi cha̍p pà-tek, chiū-sī chi̍t hō-mûi-ní;

15Tùi以色列肥ê草場tī羊群中每兩百隻羊tio̍h獻一隻羊羔，做素祭、燒祭、謝恩祭，替in贖罪；這就是主耶和華講ê。tùi Í-sek-lia̍t pûi ê chháu-tiûⁿ tī iûⁿ-kûn-tiong múi nn̄g-pah chiah iûⁿ tio̍h hiàn chi̍t chiah iûⁿ-ko, chòe sò͘-chè, sio-chè, siā-un-chè, thòe in sio̍k-chōe; che chiū-sī Chú Iâ-hô-hoa kóng--ê.

16境內ê眾百姓lóng tio̍h用chit-ê禮物獻hō͘以色列ê人君。Kéng-lāi ê chèng peh-sìⁿ lóng tio̍h ēng chit ê lé-mi̍h hiàn hō͘ Í-sek-lia̍t ê jîn-kun.

17人君ê本份tī節期，ta̍k月ê初一，ta̍k-pái安歇日kap以色列家中所定tio̍h ê節期tio̍h獻燒祭、素祭、灌奠祭；伊tio̍h備辦贖罪祭、素祭、燒祭，kap平安祭，為tio̍h以色列家贖罪。Jîn-kun ê pún-hūn tī choeh-kî, ta̍k-ge̍h ê chhoe-it, ta̍k-pái an-hioh-ji̍t kap Í-sek-lia̍t ke-tiong só͘ tiāⁿ-tio̍h ê choeh-kî tio̍h hiàn sio-chè, sò͘-chè, koàn-tiān-chè; i tio̍h pī-pān sio̍k-chōe-chè, sò͘-chè, sio-chè, kap pêng-an-chè, ūi-tio̍h Í-sek-lia̍t-ke sio̍k-chōe.

18主耶和華án-ni講，Tī正月初一lín tio̍h取無瑕疵ê牛káng，來清氣聖所。Chú Iâ-hô-hoa án-ni kóng, Tī chiaⁿ-ge̍h chhoe-it lín tio̍h chhú bô hâ-chhû ê gû-káng, lâi chheng-khì sèng-só͘.

19祭司tio̍h將贖罪祭ê血抹tī殿ê門khiā，kap壇khat ê四角，kap內院ê門khiā。Chè-si tio̍h chiong sio̍k-chōe-chè ê huih boah tī tiān ê mn̂g-khiā, kap tôaⁿ-khat ê sì-kak, kap lāi-īⁿ ê mn̂g-khiā.

20Hit月ê初七也tio̍h án-ni做為tio̍h錯誤犯罪ê，kap愚戇來患tio̍h-ê，來為tio̍h殿贖罪。Hit-ge̍h ê chhoe chhit iā tio̍h án-ni chòe ūi-tio̍h chhò-gō͘ hoān-chōe-ê, kap gû-gōng lâi hoān-tio̍h--ê, lâi ūi-tio̍h tiān sio̍k-chōe.

21正月十四，lín tio̍h守pôaⁿ過節，守chit-ê節七日；tio̍h食無酵ê餅。Chiaⁿ-ge̍h cha̍p-sì, lín tio̍h siú pôaⁿ-kè-choeh, siú chit ê choeh chhit-ji̍t; tio̍h chia̍h bô-kàⁿ ê piáⁿ.

22Hit日人君tio̍h為tio̍h家己kap國內ê眾百姓備辦一隻公ê牛做贖罪祭。Hit-ji̍t jîn-kun tio̍h ūi-tio̍h ka-kī kap kok-lāi ê chèng peh-sìⁿ pī-pān chi̍t chiah kang ê gû chòe sio̍k-chōe-chè.

23當節期ê七日伊tio̍h備辦燒祭獻hō͘耶和華，連連七日，ta̍k日tio̍h用七隻牛káng kap七隻綿羊káng，lóng無瑕疵ê；ta̍k日也tio̍h備辦一隻山羊káng做贖罪祭。Tng choeh-kî ê chhit-ji̍t i tio̍h pī-pān sio-chè hiàn hō͘ Iâ-hô-hoa, liân-liân chhit-ji̍t, ta̍k-ji̍t tio̍h ēng chhit-chiah gû-káng kap chhit chiah mî-iûⁿ-káng, lóng bô hâ-chhû--ê; ta̍k-ji̍t iā tio̍h pī-pān chi̍t chiah soaⁿ-iûⁿ-káng chòe sio̍k-chōe-chè.

24伊也tio̍h備辦素祭，一隻牛káng一個i-hoat，一隻綿羊káng一個i-hoat，每i-hoat tio̍h油一him。I iā tio̍h pī-pān sò͘-chè, chi̍t chiah gû-káng chi̍t ê i-hoat, chi̍t chiah mî-iûⁿ-káng chi̍t ê i-hoat, múi i-hoat tio̍h iû chi̍t-him.

25七月十五；守節ê時七日久伊tio̍h án-ni做；照贖罪祭，照燒祭，照素祭，也tio̍h照iû。Chhit-ge̍h cha̍p-gō͘; siú choeh ê sî chhit-ji̍t kú i tio̍h án-ni chòe; chiàu sio̍k-chōe-chè, chiàu sio-chè, chiàu sò͘-chè, iā tio̍h chiàu iû.

1主耶和華án-ni講：內院ǹg東ê門tī做工ê六日內的確tio̍h關；獨獨tī安歇日tio̍h開，月ê初一也tio̍h開。Chú Iâ-hô-hoa án-ni kóng: Lāi-īⁿ ǹg-tang ê mn̂g tī chòe-kang ê la̍k-ji̍t-lāi tek-khak tio̍h koaiⁿ; to̍k-to̍k tī an-hioh-ji̍t tio̍h khui, ge̍h ê chhoe-it iā tio̍h khui.

2人君tio̍h tùi chit-ê門ê廊tùi外面入，khiā tī門khiā邊；祭司tio̍h備辦伊ê燒祭kap伊ê謝恩祭，伊tio̍h tī門碇hit tah敬拜；然後出去，chit-ê門到ê-hng時m̄-thang關。Jîn-kun tio̍h tùi chit ê mn̂g ê lông tùi gōa-bīn ji̍p, khiā tī mn̂g-khiā-piⁿ; chè-si tio̍h pī-pān i ê sio-chè kap i ê siā-un-chè, i tio̍h tī mn̂g-tēng hit tah kèng-pài; jiân-āu chhut-khì, chit ê mn̂g kàu ê-hng-sî m̄-thang koaiⁿ.

3Tī chiah-ê安歇日，kap月ê初一，國內ê百姓tio̍h tī chit-ê門口敬拜tī耶和華ê面前。Tī chiah ê an-hioh-ji̍t, kap ge̍h ê chhoe-it, kok-lāi ê peh-sìⁿ tio̍h tī chit ê mn̂g-kháu kèng-pài tī Iâ-hô-hoa ê bīn-chêng.

4人君tī安歇日所tio̍h獻hō͘耶和華ê燒祭，tio̍h無瑕疵ê羊羔六隻，無瑕疵ê綿羊káng一隻；Jîn-kun tī an-hioh-ji̍t só͘ tio̍h hiàn hō͘ Iâ-hô-hoa ê sio-chè, tio̍h bô hâ-chhû ê iûⁿ-ko la̍k-chiah, bô hâ-chhû ê mî-iûⁿ-káng chi̍t-chiah;

5伊ê素祭為tio̍h hit隻綿羊káng tio̍h一個i-hoat，為tio̍h hiah-ê羊羔ê素祭是照伊ê力量一個i-hoat配油一him。i ê sò͘-chè ūi-tio̍h hit chiah mî-iûⁿ-káng tio̍h chi̍t ê i-hoat, ūi-tio̍h hiah ê iûⁿ-ko ê sò͘-chè sī chiàu i ê le̍k-liōng chi̍t ê i-hoat phòe iû chi̍t him.

6當月ê初一tio̍h獻無瑕疵ê牛káng一隻，羊羔六隻，綿羊káng一隻；lóng tio̍h無瑕疵ê。Tng ge̍h ê chhoe-it tio̍h hiàn bô hâ-chhû ê gû-káng chi̍t-chiah, iûⁿ-ko la̍k-chiah, mî-iûⁿ-káng chi̍t-chiah; lóng tio̍h bô hâ-chhû--ê.

7伊也tio̍h備辦素祭，為tio̍h牛káng獻一個i-hoat，為tio̍h綿羊káng獻一個i-hoat，為tio̍h hiah-ê羊羔就照伊ê力量一個i-hoat配油一him。I iā tio̍h pī-pān sò͘-chè, ūi-tio̍h gû-káng hiàn chi̍t ê i-hoat, ūi-tio̍h mî-iûⁿ-káng hiàn chi̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng chi̍t ê i-hoat phòe iû chi̍t-him.

8人君入來ê時，tio̍h tùi chit-ê門ê廊入，也tio̍h tùi chit-ê路出。Jîn-kun ji̍p-lâi ê sî, tio̍h tùi chit ê mn̂g ê lông ji̍p, iā tio̍h tùi chit ê lō͘ chhut.

9Tī ta̍k-ê節期，國內ê百姓朝見耶和華ê時，tùi北門入來敬拜-ê tio̍h tùi南門出去；tùi南門入來ê tio̍h tùi北門出去；m̄-thang tùi所入ê門oa̍t倒tńg，tio̍h直直進前出去。Tī ta̍k ê choeh-kî, kok-lāi ê peh-sìⁿ tiâu-kìⁿ Iâ-hô-hoa ê sî, tùi pak-mn̂g ji̍p-lâi kèng-pài-ê tio̍h tùi lâm-mn̂g chhut-khì; tùi lâm-mn̂g ji̍p-lâi-ê tio̍h tùi pak-mn̂g chhut-khì; m̄-thang tùi só͘ ji̍p ê mn̂g oa̍t-tò-tńg, tio̍h ti̍t-ti̍t chìn-chêng chhut-khì.

10百姓入去ê時，人君也tio̍h tī in ê中間入去；百姓出去，人君也tio̍h kap in出去。Peh-sìⁿ ji̍p-khì ê sî, jîn-kun iā tio̍h tī in ê tiong-kan ji̍p-khì; peh-sìⁿ chhut-khì, jîn-kun iā tio̍h kap in chhut-khì.

11Tī節期kap tāi-hōe ê時，素祭tio̍h為tio̍h一隻牛káng獻一個i-hoat，為tio̍h一隻綿羊káng獻一個i-hoat，為tio̍h hiah-ê羊羔就照伊ê力量，一個i-hoat配油一him。Tī choeh-kî kap tāi-hōe ê sî, sò͘-chè tio̍h ūi-tio̍h chi̍t-chiah gû-káng hiàn chi̍t ê i-hoat, ūi-tio̍h chi̍t-chiah mî-iûⁿ-káng hiàn chi̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng, chi̍t ê i-hoat phòe iû chi̍t-him.

12人君若備辦甘心ê祭，燒祭á是謝恩祭做甘心ê祭，獻hō͘耶和華，tio̍h有人kā伊開ǹg東ê門，伊tio̍h備辦伊ê燒祭kap伊ê謝恩祭親像tī安歇日所做一樣；然後伊tio̍h出去；出去了tio̍h有人kā伊關門。Jîn-kun nā pī-pān kam-sim ê chè, sio-chè á-sī siā-un-chè chòe kam-sim ê chè, hiàn hō͘ Iâ-hô-hoa, tio̍h ū lâng kā i khui ǹg-tang ê mn̂g, i tio̍h pī-pān i ê sio-chè kap i ê siā-un-chè chhin-chhiūⁿ tī an-hioh-ji̍t só͘ chòe chi̍t-iūⁿ; jiân-āu i tio̍h chhut-khì; chhut-khì-liáu tio̍h ū lâng kā i koaiⁿ-mn̂g.

13Ta̍k日你tio̍h備辦無瑕疵，bē滿年ê羊羔一隻，做燒祭獻hō͘耶和華；ta̍k早起tio̍h備辦伊。Ta̍k-ji̍t lí tio̍h pī-pān bô hâ-chhû, bē móa-nî ê iûⁿ-ko chi̍t-chiah, chòe sio-chè hiàn hō͘ Iâ-hô-hoa; ta̍k chá-khí tio̍h pī-pān i.

14Ta̍k早起也tio̍h備辦相kap獻ê素祭，一i-hoat六份ê一份，kap一him油三份ê一份chhiau和麵粉；chit-ê素祭tio̍h常常獻hō͘耶和華，做永遠定tio̍h ê例。Ta̍k chá-khí iā tio̍h pī-pān saⁿ-kap hiàn ê sò͘-chè, chi̍t i-hoat la̍k-hūn ê chi̍t-hūn, kap chi̍t him iû saⁿ-hūn ê chi̍t-hūn chhiau-hô mī-hún; chit ê sò͘-chè tio̍h siông-siông hiàn hō͘ Iâ-hô-hoa, chòe éng-oán tiāⁿ-tio̍h ê lē.

15Ta̍k早起in tio̍h án-ni備辦羊羔，素祭，kap油，做常常獻ê燒祭。Ta̍k chá-khí in tio̍h án-ni pī-pān iûⁿ-ko, sò͘-chè, kap iû, chòe siông-siông hiàn ê sio-chè.

16主耶和華án-ni講：人君若將產業hō͘伊ê kiáⁿ ê一個，就是做伊ê業，歸tī伊hiah-ê kiáⁿ，是in承接做業ê。Chú Iâ-hô-hoa án-ni kóng: Jîn-kun nā chiong sán-gia̍p hō͘ i ê kiáⁿ ê chi̍t-ê, chiū-sī chòe i ê gia̍p, kui tī i hiah ê kiáⁿ, sī in sêng-chiap chòe gia̍p--ê.

17總是伊若將伊ê產業ê一份hō͘伊ê人臣ê一個，是做人臣ê到自由ê年，hit時猶原歸tī人君；論到伊ê產業tio̍h留hō͘伊hiah-ê kiáⁿ。Chóng-sī i nā chiong i ê sán-gia̍p ê chi̍t-hūn hō͘ i ê jîn-sîn ê chi̍t-ê, sī chòe jîn-sîn-ê kàu chū-iû ê nî, hit-sî iû-goân kui tī jîn-kun; lūn-kàu i ê sán-gia̍p tio̍h lâu hō͘ i hiah ê kiáⁿ.

18人君m̄-thang搶奪百姓ê產業，來趕in離開in所承接ê；伊tio̍h tùi家己ê業中將產業hō͘伊ê kiáⁿ；免得我ê百姓四散，ta̍k人離開伊所承接ê。Jîn-kun m̄-thang chhiúⁿ-toa̍t peh-sìⁿ ê sán-gia̍p, lâi kóaⁿ in lī-khui in só͘ sêng-chiap-ê; i tio̍h tùi ka-kī ê gia̍p-tiong chiong sán-gia̍p hō͘ i ê kiáⁿ; bián-tit Góa ê peh-sìⁿ sì-sòaⁿ, ta̍k-lâng lī-khui i só͘ sêng-chiap--ê.

19伊就chhōa我tùi門邊ê路入來到祭司ǹg北hiah-ê聖ê房間；看ah，後面西勢有一所在。I chiū chhōa góa tùi mn̂g-piⁿ ê lō͘ ji̍p-lâi kàu chè-si ǹg pak hiah ê sèng ê pâng-keng; khòaⁿ ah, āu-bīn sai-sì ū chi̍t só͘-chāi.

20伊就kā我講，這是祭司煮補過失祭kap贖罪祭，以及pek素祭ê所在；免得帶到外院，hō͘百姓成做聖。I chiū kā góa kóng, Che sī chè-si chú pó͘-kè-sit-chè kap sio̍k-chōe-chè, í-ki̍p pek sò͘-chè ê só͘-chāi; bián-tit tòa-kàu gōa-īⁿ, hō͘ peh-sìⁿ chiâⁿ-chòe sèng.

21伊koh chhōa我出去到外院，hō͘我經過院四個角頭；看ah，tī hit-ê院ta̍k-ê角頭各有一個院。I koh chhōa góa chhut-khì kàu gōa-īⁿ, hō͘ góa keng-kè īⁿ sì ê kak-thâu; khòaⁿ ah, tī hit ê īⁿ ta̍k ê kak-thâu kok ū chi̍t ê īⁿ.

22Tī院ê四角頭有院，四面有牆圍teh；ta̍k-ê院，長四十肘，闊三十；四個角頭ê院，in ê寸尺lóng一樣。Tī īⁿ ê sì kak-thâu ū īⁿ, sì-bīn ū chhiûⁿ ûi-teh; ta̍k ê īⁿ, tn̂g sì-cha̍p tiú, khoah saⁿ-cha̍p; sì ê kak-thâu ê īⁿ, in ê chhùn-chhioh lóng chi̍t-iūⁿ.

23四個院ê周圍有起一列，伊ê下面lóng有煮物ê所在。Sì ê īⁿ ê chiu-ûi ū khí chi̍t-lia̍t, i ê ē-bīn lóng ū chú-mi̍h ê só͘-chāi.

24伊kā我講，Chiah-ê就是煮物ê灶kha；殿內chiah-ê做差用ê tī-chia煮百姓ê祭祀。I kā góa kóng, Chiah-ê chiū-sī chú-mi̍h ê chàu-kha; tiān-lāi chiah-ê chòe chhe-ēng--ê tī-chia chú peh-sìⁿ ê chè-sū.