1人子ah，你tio̍h kia̍h一支利劍，做你ê剃頭刀，來剃你ê頭毛kap你ê嘴鬚；然後用厘戥戥伊ê 重輕，來分伊。Jîn-chú ah, lí tio̍h kia̍h chi̍t ki lāi-kiàm, chòe lí ê thì-thâu-to, lâi thì lí ê thâu-mn̂g kap lí ê chhùi-chhiu; jiân-āu ēng lî-téng téng i ê tāng-khin, lâi pun i.

2圍困城ê日已經滿，你tio̍h將三份ê一份tī城內用火燒伊；將三份ê一份tī伊ê四圍用刀phah伊；將三份ê一份掖散hō͘風吹去；我亦beh拔刀追jip伊。Ûi-khùn siâⁿ ê ji̍t í-keng móa, lí tio̍h chiong saⁿ-hūn ê chi̍t-hūn tī siâⁿ-lāi ēng hé sio--i; chiong saⁿ-hūn ê chi̍t-hūn tī i ê sì-ûi ēng to phah--i; chiong saⁿ-hūn ê chi̍t-hūn iā-sòaⁿ hō͘ hong chhe--khì; Góa ia̍h beh pu̍ih to tui-jip--i.

3你tio̍h tùi hit中間the̍h kúi-nā支，縛tī你ê衫á裾。Lí tio̍h tùi hí tiong-kan the̍h kúi-nā ki, pa̍k tī lí ê saⁿ-á-ku.

4Koh tùi hit中間the̍h淡薄á，hiat tī火中，用火燒伊；tùi hia beh有火出，到tī以色列全家。Koh tùi hí tiong-kan the̍h tām-po̍h-á, hiat tī hé-tiong, ēng hé sio--i; tùi hia beh ū hé chhut, kàu tī Í-sek-lia̍t choân-ke.

5主耶和華án-ni講，這是耶路撒冷；我beh安置伊tī列邦中，列國tī伊ê四圍。Chú Iâ-hô-hoa án-ni kóng, Che sī Iâ-lō͘-sat-léng; Góa beh an-tì i tī lia̍t-pang-tiong, lia̍t-kok tī i ê sì-ûi.

6伊行pháiⁿ違逆我ê法度，比列邦khah傷重；干犯我ê律例比四圍ê列國khah慘；因為伊棄sak我ê法度，我ê律例in亦無遵thàn。I kiâⁿ pháiⁿ ûi-ke̍h Góa ê hoat-tō͘, pí lia̍t-pang khah siong-tiōng; kan-hoān Góa ê lu̍t-lē pí sì-ûi ê lia̍t-kok khah-chhám; in-ūi i khì-sak Góa ê hoat-tō͘, Góa ê lu̍t-lē in ia̍h bô chun-thàn.

7所以主耶和華án-ni講： 因為lín擾亂比lín四圍ê列邦khah傷重，無遵thàn我ê律例，無執守我ê法度，亦m̄-thàn lín四圍列國ê法度。Só͘-í Chú Iâ-hô-hoa án-ni kóng: In-ūi lín jiáu-loān pí lín sì-ûi ê lia̍t-pang khah siong-tiōng, bô chun-thàn Góa ê lu̍t-lē, bô chip-siú Góa ê hoat-tō͘, ia̍h m̄-thàn lín sì-ûi lia̍t-kok ê hoat-tō͘.

8所以主耶和華án-ni講：看ah，我beh攻擊你，我beh tī lín中間審判lín，hō͘列國親目看見。Só͘-í Chú Iâ-hô-hoa án-ni kóng: Khòaⁿ ah, Góa beh kong-kek lí, Góa beh tī lín tiong-kan sím-phòaⁿ lín, hō͘ lia̍t-kok chhin-ba̍k khòaⁿ-kìⁿ.

9Koh因為一切可惡ê事，我beh tī你中間行我所bē-bat行，以後亦無koh án-ni行ê。Koh in-ūi it-chhè khó-ò͘ⁿ ê sū, Góa beh tī lí tiong-kan kiâⁿ Góa só͘ bē-bat kiâⁿ, í-āu ia̍h bô koh án-ni kiâⁿ--ê.

10因為án-ni，tī你ê中間，老父beh thâi kiáⁿ來食，kiáⁿ亦beh thâi老父來食；我beh tī lín中間審判lín。我beh將你所chhun ê眾人，lóng四散in tī四方。In-ūi án-ni, tī lí ê tiong-kan, lāu-pē beh thâi kiáⁿ lâi chia̍h, kiáⁿ ia̍h beh thâi lāu-pē lâi chia̍h; Góa beh tī lín tiong-kan sím-phòaⁿ lín. Góa beh chiong lí só͘ chhun ê chèng-lâng, lóng sì-sòaⁿ in tī sì-hng.

11因為án-ni，主耶和華講，我kí我ê永活來chiù-chōa，為tio̍h你用一切可惡ê物，thang厭賤ê事，phah lâ-sâm我ê聖所，我也beh減少你ê人額；我ê目睭無beh疼惜你，我亦無beh憐憫你。In-ūi án-ni, Chú Iâ-hô-hoa kóng, Góa kí Góa ê éng-oa̍h lâi chiù-chōa, ūi-tio̍h lí ēng it-chhè khó-ò͘ⁿ ê mi̍h, thang iàm-chiān ê sū, phah lâ-sâm Góa ê sèng-só͘, Góa iā beh kiám-chió lí ê lâng-gia̍h; Góa ê ba̍k-chiu bô beh thiàⁿ-sioh lí, Góa ia̍h bô beh lîn-bín lí.

12你三份ê一份beh tùi瘟疫來死，亦tùi飢荒來消滅tī lín中間；三份ê一份beh tī你ê四圍倒tī刀下；三份ê一份我beh四散in tī hiah-ê風；亦beh拔刀追jip in。Lí saⁿ-hūn ê chi̍t-hūn beh tùi un-e̍k lâi sí, ia̍h tùi ki-hng lâi siau-bia̍t tī lín tiong-kan; saⁿ-hūn ê chi̍t-hūn beh tī lí ê sì-ûi tó tī to-ē; saⁿ-hūn ê chi̍t-hūn Góa beh sì-sòaⁿ in tī hiah ê hong; ia̍h beh pu̍ih-to tui-jip in.

13親像án-ni，我ê受氣得tio̍h成，我大受氣in ê beh soah，我就受安慰；koh我大受氣in-ê已經成，就in thang知我耶和華是熱心來講ê。Chhin-chhiūⁿ án-ni, Góa ê siū-khì tit-tio̍h chiâⁿ, Góa tōa siū-khì in ê beh soah, Góa chiū siū an-ùi; koh Góa tōa siū-khì in ê í-keng chiâⁿ, chiū in thang chai Góa Iâ-hô-hoa sī jia̍t-sim lâi kóng--ê.

14我beh hō͘你做冷靜，做凌辱，tī你四圍ê列邦中；hō͘經過ê人親目看見。Góa beh hō͘ lí chòe léng-chēng, chòe lêng-jio̍k, tī lí sì-ûi ê lia̍t-pang-tiong; hō͘ keng-kè ê lâng chhin-ba̍k khòaⁿ-kìⁿ.

15Án-ni，我beh用受氣，kap大受氣，kap嚴嚴ê責備，tī你ê中間審判你；hit時你就tī四圍ê列邦中，成做thang凌辱，thang譏刺，thang鑑戒，thang gông-ngia̍h；這是我耶和華講ê。Án-ni, Góa beh ēng siū-khì, kap tōa siū-khì, kap giâm-giâm ê chek-pī, tī lí ê tiong-kan sím-phòaⁿ lí; hit-sî lí chiū tī sì-ûi ê lia̍t-pang-tiong, chiâⁿ-chòe thang lêng-jio̍k, thang ki-chhì, thang kàm-kài, thang gông-ngia̍h; che sī Góa Iâ-hô-hoa kóng--ê.

16Hit時我用飢荒能剿滅人ê pháiⁿ箭射in；就是我所射來剿滅lín-ê；我亦beh加添lín ê飢荒，斷絕lín所óa靠ê米糧。Hit-sî Góa ēng ki-hng ōe châu-bia̍t lâng ê pháiⁿ-chìⁿ siā in; chiū-sī Góa só͘ siā lâi châu-bia̍t lín--ê; Góa ia̍h beh ke-thiⁿ lín ê ki-hng, toān-choa̍t lín só͘ óa-khò ê bí-niû.

17Koh beh飢荒惡獸到lín hia，in beh hō͘ lín ê kiáⁿ死了了；koh瘟疫kap thâi人ê事亦beh流行tī lín hia；我亦beh hō͘刀劍臨到lín；這是我耶和華講ê。Koh beh ki-hng ok-siù kàu lín hia, in beh hō͘ lín ê kiáⁿ sí-liáu-liáu; koh un-e̍k kap thâi lâng ê sū ia̍h beh liû-hêng tī lín hia; Góa ia̍h beh hō͘ to-kiàm lîm-kàu lín; che sī Góa Iâ-hô-hoa kóng--ê.

1耶和華ê話臨到我講，Iâ-hô-hoa ê ōe lîm-kàu góa kóng,

2人子ah，你tio̍h面ǹg以色列chiah-ê山，來對伊宣傳，講，以色列chiah-ê山ah，tio̍h聽主耶和華ê話；Jîn-chú ah, lí tio̍h bīn ǹg Í-sek-lia̍t chiah ê soaⁿ, lâi tùi i soan-thoân, kóng, Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe;

3主耶和華tùi大山、小山、水溝、山谷，án-ni講，看ah，我，我beh用刀劍臨到lín，亦beh毀滅lín ê山頭壇。Chú Iâ-hô-hoa tùi tōa-soaⁿ, sió-soaⁿ, chúi-kau, soaⁿ-kok, án-ni kóng, Khòaⁿ ah, Góa, Góa beh ēng to-kiàm lîm-kàu lín, ia̍h beh húi-bia̍t lín ê soaⁿ-thâu-tôaⁿ.

4Lín ê祭壇的確荒廢，lín ê日頭ê柱beh tú-tio̍h phah碎；我beh hō͘ lín受thâi ê人倒tī lín偶像ê面前。Lín ê chè-tôaⁿ tek-khak hong-hòe, lín ê ji̍t-thâu ê thiāu beh tú-tio̍h phah-chhùi; Góa beh hō͘ lín siū-thâi ê lâng tó tī lín ngó͘-siōng ê bīn-chêng.

5我亦beh將以色列族ê身屍hē tī in ê偶像ê面前；將lín ê骨頭四界hiat tī lín ê壇ê四圍。Góa ia̍h beh chiong Í-sek-lia̍t cho̍k ê sin-si hē tī in ê ngó͘-siōng ê bīn-chêng; chiong lín ê kut-thâu sì-kòe hiat tī lín ê tôaⁿ ê sì-ûi.

6Tī lín一切khiā起ê所在，城beh拋荒，山頭壇beh荒廢；hō͘ lín ê祭壇拋荒荒廢，lín ê偶像phah碎滅無，lín ê日頭ê柱beh剉落，lín ê所做lóng廢無。Tī lín it-chhè khiā-khí ê só͘-chāi, siâⁿ beh pha-hng, soaⁿ-thâu-tôaⁿ beh hong-hòe; hō͘ lín ê chè-tôaⁿ pha-hng hong-hòe, lín ê ngó͘-siōng phah-chhùi bia̍t-bô, lín ê ji̍t-thâu ê thiāu beh chhò-lo̍h, lín ê só͘-chòe lóng hòe-bô.

7受thâi ê人beh倒tī lín中間；就lín beh知我是耶和華。Siū-thâi ê lâng beh tó tī lín tiong-kan; chiū lín beh chai Góa sī Iâ-hô-hoa.

8Lín四散tī列國ê時，我beh tī列邦中所chhun ê人hō͘伊脫離刀劍。Lín sì-sòaⁿ tī lia̍t-kok ê sî, Góa beh tī lia̍t-pang-tiong só͘ chhun ê lâng hō͘ i thoat-lī to-kiàm.

9Lín中間得tio̍h脫離ê人，beh tī in受掠去ê列國中記念我；因為我beh毀壞in淫亂離開我ê心，以及in戀愛偶像ê目睭；in beh為tio̍h所行ê pháiⁿ可惡ê事，來家己怨恨。Lín tiong-kan tit-tio̍h thoat-lī ê lâng, beh tī in siū lia̍h-khì ê lia̍t-kok-tiong kì-liām Góa; in-ūi Góa beh húi-hoāi in îm-loān lī-khui Góa ê sim, í-ki̍p in loân-ài ngó͘-siōng ê ba̍k-chiu; in beh ūi-tio̍h só͘ kiâⁿ ê pháiⁿ khó-ò͘ⁿ ê sū, lâi ka-kī oàn-hūn.

10In beh知我是耶和華；我講beh降災厄hō͘ in，m̄是空空ê話。In beh chai Góa sī Iâ-hô-hoa; Góa kóng beh kàng chai-ē hō͘ in, m̄-sī khang-khang ê ōe.

11主耶和華án-ni講，你tio̍h phah手頓腳，講，慘ah，以色列家行這一切可惡ê pháiⁿ-tāi；in beh tùi刀劍，tùi飢荒，tùi瘟疫來死。Chú Iâ-hô-hoa án-ni kóng, Lí tio̍h phah-chhiú tǹg-kha, kóng, Chhám ah, Í-sek-lia̍t-ke kiâⁿ che it-chhè khó-ò͘ⁿ ê pháiⁿ-tāi; in beh tùi to-kiàm, tùi ki-hng, tùi un-e̍k lâi sí.

12Tiàm tī遠ê人beh tùi瘟疫來死；tiàm tī近ê人beh tùi刀劍來死；留teh受圍困ê人beh tùi飢荒來死；án-ni我beh一盡成我ê受氣tī in。Tiàm tī hn̄g ê lâng beh tùi un-e̍k lâi sí; tiàm tī kūn ê lâng beh tùi to-kiàm lâi sí; lâu--teh siū ûi-khùn ê lâng beh tùi ki-hng lâi sí; án-ni Góa beh it-chīn chiâⁿ Góa ê siū-khì tī in.

13In受thâi ê人倒tī in祭壇四圍ê偶像中，就是ta̍k-ê高山，ta̍k-ê山頂，ta̍k-ê青樹ê樹腳，ta̍k-ê ām-ām ê橡樹腳，就是in獻芳芳ê祭祀hō͘一切偶像ê地方；hit時lín就知我是耶和華。In siū-thâi ê lâng tó tī in chè-tôaⁿ sì-ûi ê ngó͘-siōng-tiong, chiū-sī ta̍k ê koâiⁿ-soaⁿ, ta̍k ê soaⁿ-téng, ta̍k ê chhiⁿ-chhiū ê chhiū-kha, ta̍k ê ām-ām ê siōng-chhiū-kha, chiū-sī in hiàn phang-phang ê chè-sū hō͘ it-chhè ngó͘-siōng ê tōe-hng; hit-sî lín chiū chai Góa sī Iâ-hô-hoa.

14我beh伸我ê手攻擊in，hō͘ in khiā起ê所在拋荒冷靜，tùi曠野到Tē-pek-la̍h-tha；in就知我是耶和華。Góa beh chhun Góa ê chhiú kong-kek in, hō͘ in khiā-khí ê só͘-chāi pha-hng léng-chēng, tùi khòng-iá kàu Tē-pek-la̍h-tha; in chiū chai Góa sī Iâ-hô-hoa.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2人子ah，主耶和華對以色列地án-ni講，結局到lah！chit-ê地ê四境，結局到lah。Jîn-chú ah, Chú Iâ-hô-hoa tùi Í-sek-lia̍t tōe án-ni kóng, Kiat-kio̍k kàu lah! chit ê tōe ê sì-kéng, kiat-kio̍k kàu lah.

3Taⁿ你ê結局已經到lah，我beh hō͘我ê受氣到tī你，亦beh照你ê所行審判你；照你一切可惡ê事報應你；Taⁿ lí ê kiat-kio̍k í-keng kàu lah, Góa beh hō͘ Góa ê siū-khì kàu tī lí, ia̍h beh chiàu lí ê só͘-kiâⁿ sím-phòaⁿ lí; chiàu lí it-chhè khó-ò͘ⁿ ê sū pò-èng lí;

4我ê目睭無beh保惜你，我亦無beh可憐你；是beh照你ê所行報應你，你可惡ê事beh歸tī你中間；lín就知我是耶和華。Góa ê ba̍k-chiu bô beh pó-sioh lí, Góa ia̍h bô beh khó-lîn lí; sī beh chiàu lí ê só͘-kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai Góa sī Iâ-hô-hoa.

5主耶和華án-ni講：有災厄，非常ê災厄；看ah，beh到lah。Chú Iâ-hô-hoa án-ni kóng: Ū chai-ē, hui-siông ê chai-ē; khòaⁿ ah, beh kàu lah.

6結局到lah，結局到lah，起來攻擊你；看ah，到lah。Kiat-kio̍k kàu lah, kiat-kio̍k kàu lah, khí-lâi kong-kek lí; khòaⁿ ah, kàu lah.

7境內khiā起ê百姓ah，所定tio̍h ê災厄beh臨到你；時期到lah，日子近lah，就是hōa-hōa嚷，m̄是山頂歡喜ê聲ê日。Kéng-lāi khiā-khí ê peh-sìⁿ ah, só͘ tiāⁿ-tio̍h ê chai-ē beh lîm-kàu lí; sî-kî kàu lah, ji̍t-chí kūn lah, chiū-sī hōa-hōa-jióng, m̄-sī soaⁿ-téng hoaⁿ-hí ê siaⁿ ê ji̍t.

8我beh緊緊piàⁿ出我ê大受氣tī你；koh一盡成我ê受氣tī你，照你ê所行審判你，照你一切可惡ê事報應你。Góa beh kín-kín piàⁿ-chhut Góa ê tōa siū-khì tī lí; koh it-chīn chiâⁿ Góa ê siū-khì tī lí, chiàu lí ê só͘-kiâⁿ sím-phòaⁿ lí, chiàu lí it-chhè khó-ò͘ⁿ ê sū pò-èng lí.

9我ê目睭無beh保惜你，我亦無beh可憐你，beh照你ê所行報應你，你可惡ê事beh歸tī你中間；lín就知phah-lín-ê是我耶和華。Góa ê ba̍k-chiu bô beh pó-sioh lí, Góa ia̍h bô beh khó-lîn lí, beh chiàu lí ê só͘ kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai phah-lín--ê sī Góa Iâ-hô-hoa.

10看ah，看ah，日子已經到lah；所定tio̍h ê災厄已經發出；柺á已經開花，驕傲已經puh芽。Khòaⁿ ah, khòaⁿ ah, ji̍t-chí í-keng kàu lah; só͘ tiāⁿ-tio̍h ê chai-ē í-keng hoat-chhut; koáiⁿ-á í-keng khui-hoe, kiau-ngō͘ í-keng puh-gê.

11強暴興起，成做刑罰pháiⁿ ê柺á；in無去，in眾人亦無去，in ê財寶也無去；in中間無人得tio̍h尊貴。Kiông-pō heng-khí, chiâⁿ-chòe hêng-hoa̍t pháiⁿ ê koáiⁿ-á; in bô--khì, in chèng-lâng ia̍h bô--khì, in ê châi-pó iā bô--khì; in tiong-kan bô lâng tit-tio̍h chun-kùi.

12時期到lah，日子近lah；買ê人莫得歡喜，賣ê人莫得煩惱；因為大受氣已經到tī in眾人。Sî-kî kàu lah, ji̍t-chí kūn lah; bóe ê lâng bo̍h-tit hoaⁿ-hí, bōe ê lâng bo̍h-tit hoân-ló; in-ūi tōa siū-khì í-keng kàu tī in chèng-lâng.

13賣ê in雖然iáu活teh，也bōe倒tńg到伊所賣ê；因為chit-ê異象關係in眾人，lóng bōe倒tńg來；亦無人會對伊ê pháiⁿ所行來堅固伊ê活命。Bōe--ê in sui-jiân iáu oa̍h--teh, iā bōe tò-tńg kàu i só͘ bōe--ê; in-ūi chit ê īⁿ-siōng koan-hē in chèng-lâng, lóng bōe tò-tńg-lâi; ia̍h bô lâng ōe tùi i ê pháiⁿ só͘-kiâⁿ lâi kian-kò͘ i ê oa̍h-miā.

14In已經pûn哨角，備辦齊備；總是無人出去交戰；因為我ê大受氣臨到in眾人。In í-keng pûn sàu-kak, pī-pān chiâu-pī; chóng-sī bô lâng chhut-khì kau-chiàn; in-ūi Góa ê tōa siū-khì lîm-kàu in chèng-lâng.

15Tī外面有刀劍，tī內面有瘟疫，有飢荒；tī田野ê beh tùi刀劍來死，tī城內ê，飢荒kap瘟疫beh吞滅伊。Tī gōa-bīn ū to-kiàm, tī lāi-bīn ū un-e̍k, ū ki-hng; tī chhân-iá--ê beh tùi to-kiàm lâi sí, tī siâⁿ-lāi--ê, ki-hng kap un-e̍k beh thun-bia̍t--i.

16其中脫離ê beh脫離；ta̍k人因為伊ê罪過，tī山裡出悲哀ê聲，親像山谷中ê ka-chui。Kî-tiong thoat-lī--ê beh thoat-lī; ta̍k-lâng in-ūi i ê chōe-kòa, tī soaⁿ--nih chhut pi-ai ê siaⁿ, chhin-chhiūⁿ soaⁿ-kok-tiong ê ka-chui.

17手lóng酸，腳頭u軟親像水。Chhiú lóng sng, kha-thâu-u nńg chhin-chhiūⁿ chúi.

18Beh用麻布hâ腰，驚惶beh遮蓋伊，ta̍k人面見笑，頭殼無半支毛。Beh ēng môa-pò͘ hâ-io, kiaⁿ-hiâⁿ beh jia-khàm i, ta̍k-lâng bīn kiàn-siàu, thâu-khak bô pòaⁿ-ki mn̂g.

19In beh hiat in ê銀tī街路，看金親像污穢ê物；當耶和華受氣ê日，in ê金銀bōe能救in，bōe能hō͘ in ê心知足，亦bōe能hō͘ in ê腹肚飽；因為這有絆倒tī罪惡中。In beh hiat in ê gûn tī ke-lō͘, khòaⁿ kim chhin-chhiūⁿ ù-òe ê mi̍h; tng Iâ-hô-hoa siū-khì ê ji̍t, in ê kim-gûn bōe-ōe kiù in, bōe-ōe hō͘ in ê sim ti-chiok, ia̍h bōe-ōe hō͘ in ê pak-tó͘ pá; in-ūi che ū pòaⁿ-tó in tī chōe-ok tiong.

20論到伊裝飾ê súi，是伊hō͘伊得tio̍h威風；in就用伊來裝thang怨恨ê物，thang厭賤ê偶像；所以我hō͘ in看親像污穢ê物。Lūn-kàu i chng-thāⁿ ê súi, sī I hō͘ i tit-tio̍h ui-hong; in chiū ēng--i lâi chng thang oàn-hūn ê mi̍h, thang iàm-chiān ê ngó͘-siōng; só͘-í Góa hō͘ in khòaⁿ chhin-chhiūⁿ ù-òe ê mi̍h.

21我beh將伊交tī外邦人ê手，做伊所搶ê物；交付地上ê pháiⁿ人，做賊贓；in亦beh phah lâ-sâm伊。Góa beh chiong i kau tī gōa-pang lâng ê chhiú, chòe i só͘ chhiúⁿ ê mi̍h; kau-hù tōe-chiūⁿ ê pháiⁿ-lâng, chòe chha̍t-chng; in ia̍h beh phah lâ-sâm i.

22我beh oa̍t-tńg我ê面無看in；in beh phah lâ-sâm我機密ê所在；強猛ê賊也beh入去phah lâ-sâm。Góa beh oa̍t-tńg Góa ê bīn bô khòaⁿ--in; in beh phah lâ-sâm Góa ki-bi̍t ê só͘-chāi; kiông-béng ê chha̍t iā beh ji̍p-khì phah lâ-sâm.

23Tio̍h造鐵鏈，因為chit所在滿滿流血ê罪，城內充滿強暴ê事。Tio̍h chō thih-liān, in-ūi chit só͘-chāi móa-móa lâu-huih ê chōe, siâⁿ-lāi chhiong-móa kiông-pō ê sū.

24我beh hō͘外邦第一pháiⁿ-ê來霸佔in ê厝宅；我beh hō͘強暴ê人ê驕傲soah；in ê聖所phah lâ-sâm。Góa beh hō͘ gōa-pang tē-it pháiⁿ--ê lâi pà-chiàm in ê chhù-the̍h; Góa beh hō͘ kiông-pō ê lâng ê kiau-ngō͘ soah; in ê sèng-só͘ phah lâ-sâm.

25毀滅近lah；in beh求平安，亦bōe得tio̍h。Húi-bia̍t kūn lah; in beh kiû pêng-an, ia̍h bōe tit-tio̍h.

26Beh有災厄加添災厄，風聲續接風聲；in beh tùi先知求異象；總是祭司ê律法，長老ê計畫，lóng beh斷絕。Beh ū chai-ē ke-thiⁿ chai-ē, hong-siaⁿ sòa-chiap hong-siaⁿ; in beh tùi sian-ti kiû īⁿ-siōng; chóng-sī chè-si ê lu̍t-hoat, tióng-ló ê kè-e̍k, lóng beh toān-choa̍t.

27國王beh悲哀，王親beh冷靜，百姓ê手ngia̍uh-ngia̍uh-chhoah。我beh照in ê所行款待in，照in應該受ê審判，來審判in；in就知我是耶和華。Kok-ông beh pi-ai, ông-chhin beh léng-chēng, peh-sìⁿ ê chhiú ngia̍uh-ngia̍uh-chhoah. Góa beh chiàu in ê só͘-kiâⁿ khoán-thāi in, chiàu in eng-kai siū ê sím-phòaⁿ, lâi sím-phòaⁿ in; in chiū chai Góa sī Iâ-hô-hoa.