1Tē六年六月初五，我坐tī我ê厝內，猶大chiah-ê長老坐tī我ê面前；tī-hia主耶和華ê手到tī我ê身上。Tē la̍k-nî la̍k-ge̍h chhoe-gō͘, góa chē tī góa ê chhù-lāi, Iû-tāi chiah ê tióng-ló chē tī góa ê bīn-chêng; tī-hia Chú Iâ-hô-hoa ê chhiú kàu tī góa ê sin-chiūⁿ.

2我觀看，看見有形象親像火ê款式；tùi祂ê腰以下ê款式有火，tùi祂ê腰以上ê光光ê款式，親像琥珀 ê色緻。Góa koan-khòaⁿ, khòaⁿ-kìⁿ ū hêng-siōng chhin-chhiūⁿ hé ê khoán-sit; tùi i ê io í-ē ê khoán-sit ū hé, tùi i ê io í-chiūⁿ ê kng-kng ê khoán-sit, chhin-chhiūⁿ hó͘-phek ê sek-tì.

3祂伸出親像一支手ê款，khiú-tiâu我一股ê頭毛；神就將我舉起到天kap地ê中間，tī上帝ê異象中帶我到耶路撒冷，ǹg北內院ê門口；tī-hia有妒忌ê偶像ê座位，就是激動妒忌ê。I chhun chhut chhin-chhiūⁿ chi̍t ki chhiú ê khoán, khiú-tiâu góa chi̍t-kó͘ ê thâu-mn̂g; sîn chiū chiong góa kú-khí kàu thiⁿ kap tōe ê tiong-kan, tī Siōng-tè ê īⁿ-siōng-tiong tòa góa kàu Iâ-lō͘-sat-léng, ǹg pak lāi-īⁿ ê mn̂g-kháu; tī-hia ū tò͘-khī ê ngó͘-siōng ê chō-ūi, chiū-sī kek-tōng tò͘-khī-ê.

4看ah，tī-hia有以色列上帝ê榮光，款式kap我tī平洋所看見ê一樣。Khòaⁿ ah, tī-hia ū Í-sek-lia̍t Siōng-tè ê êng-kng, khoán-sit kap góa tī pîⁿ-iûⁿ só͘ khòaⁿ-kìⁿ--ê chi̍t-iūⁿ.

5伊對我講，人子ah，你kia̍h目ǹg北方ê路觀看；我就kia̍h目ǹg北方ê路觀看；看ah，tī祭壇門ê北勢，tī門口有一個激動妒忌ê偶像。I tùi góa kóng, Jîn-chú ah, lí kia̍h-ba̍k ǹg pak-hng ê lō͘ koan-khòaⁿ; góa chiū kia̍h-ba̍k ǹg pak-hng ê lō͘ koan-khòaⁿ; khòaⁿ ah, tī chè-tôaⁿ mn̂g ê pak--sì, tī mn̂g-kháu ū chi̍t-ê kek-tōng tò͘-khī ê ngó͘-siōng.

6祂koh對我講，人子ah，你看見in所做ê mah？就是以色列家tī-chia所行大可惡ê事，hō͘我離開我ê聖所遠遠？總是你beh koh看，iáu有koh-khah大可惡ê事。I koh tùi góa kóng, Jîn-chú ah, lí khòaⁿ-kìⁿ in só͘ chòe--ê mah? chiū-sī Í-sek-lia̍t ke tī-chia só͘ kiâⁿ tōa khó-ò͘ⁿ ê sū, hō͘ Góa lī-khui Góa ê sèng-só͘ hn̄g-hn̄g? chóng-sī lí beh koh khòaⁿ, iáu ū koh-khah tōa khó-ò͘ⁿ ê sū.

7祂chhōa我到院ê門；我觀看，看見牆壁有一孔。I chhōa góa kàu īⁿ ê mn̂g; góa koan-khòaⁿ, khòaⁿ-kìⁿ chhiûⁿ-piah ū chi̍t-khang.

8祂對我講，人子ah，你tio̍h iah牆；我一下iah牆，看見有一個門。I tùi góa kóng, Jîn-chú ah, lí tio̍h iah chhiûⁿ; góa chi̍t-ē iah chhiûⁿ, khòaⁿ-kìⁿ ū chi̍t ê mn̂g.

9祂kā我講，你入去，看in tī chit內面所行可惡ê pháiⁿ-tāi。I kā góa kóng, Lí ji̍p-khì, khòaⁿ in tī chí lāi-bīn só͘ kiâⁿ khó-ò͘ⁿ ê pháiⁿ-tāi.

10我就入去看；看ah，tī四面ê牆壁，畫ta̍k號會sô ê物，kap可惡ê走獸，kap以色列家一切ê偶像。Góa chiū ji̍p-khì khòaⁿ; khòaⁿ ah, tī sì-bīn ê chhiûⁿ-piah, ūi ta̍k-hō ōe sô ê mi̍h, kap khó-ò͘ⁿ ê cháu-siù, kap Í-sek-lia̍t ke it-chhè ê ngó͘-siōng.

11Tī chiah-ê像ê面前，有以色列家七十個長老khiā-teh，Sa-hoan ê kiáⁿ Ngá-sat-nî-a也khiā tī in中間；ta̍k人手the̍h香爐，香煙ê芳味chhèng上高。Tī chiah ê siōng ê bīn-chêng, ū Í-sek-lia̍t ke chhit-cha̍p ê tióng-ló khiā-teh, Sa-hoan ê kiáⁿ Ngá-sat-nî-a iā khiā tī in tiong-kan; ta̍k-lâng chhiú the̍h hiuⁿ-lô͘, hiuⁿ-ian ê phang-bī chhèng chiūⁿ-koâiⁿ.

12祂對我講，人子ah，以色列家ê長老，tī暗中，tī in ta̍k人畫像ê房á內所行ê，你看見無？因為in講，耶和華無看見阮，耶和華已經離開chit-ê地。I tùi góa kóng, Jîn-chú ah, Í-sek-lia̍t ke ê tióng-ló, tī àm-tiong, tī in ta̍k-lâng ūi-siōng ê pâng-á-lāi só͘ kiâⁿ--ê, lí khòaⁿ-kìⁿ bô? in-ūi in kóng, Iâ-hô-hoa bô khòaⁿ-kìⁿ goán, Iâ-hô-hoa í-keng lī-khui chit ê tōe.

13祂koh對我講，你beh koh看見in所行，iáu有koh-khah大可惡ê事。I koh tùi góa kóng, Lí beh koh khòaⁿ-kìⁿ in só͘ kiâⁿ, iáu ū koh-khah tōa khó-ò͘ⁿ ê sū.

14祂chhōa我到耶和華ê厝，ǹg北ê門口；看ah，tī-hia有婦女坐teh，為tio̍h Tah-bô͘-su啼哭。I chhōa góa kàu Iâ-hô-hoa ê chhù, ǹg pak ê mn̂g-kháu; khòaⁿ ah, tī-hia ū hū-lú chē--teh, ūi-tio̍h Tah-bô͘-su thî-khàu.

15祂對我講，人子ah，你看見無？你iáu beh看見比這koh-khah可惡ê事。I tùi góa kóng, Jîn-chú ah, lí khòaⁿ-kìⁿ bô? lí iáu beh khòaⁿ-kìⁿ pí che koh-khah khó-ò͘ⁿ ê sū.

16祂koh chhōa我到耶和華厝ê內院；看ah，tī耶和華ê殿門，léng廊kap祭壇ê中間，約略有二十五人，ka-chiah ǹg耶和華ê殿，面ǹg東；in也ǹg東拜日頭。I koh chhōa góa kàu Iâ-hô-hoa chhù ê lāi-īⁿ; khòaⁿ ah, tī Iâ-hô-hoa ê tiān-mn̂g, léng-lông kap chè-tôaⁿ ê tiong-kan, iok-lio̍k ū jī-cha̍p-gō͘ lâng, ka-chiah ǹg Iâ-hô-hoa ê tiān, bīn ǹg-tang; in iā ǹg-tang pài ji̍t-thâu.

17伊對我講，人子ah，你有看見無？猶大家tī-chia行chit-ê可惡ê事，iáu算做小khóa mah？in tī chit-ê所在遍行強暴，再三激我ê受氣；看ah，in kia̍h樹枝hē tī伊ê鼻前。I tùi góa kóng, Jîn-chú ah, lí ū khòaⁿ-kìⁿ bô? Iû-tāi ke tī-chia kiâⁿ chit ê khó-ò͘ⁿ ê sū, iáu sǹg-chòe sió-khóa mah? in tī chit ê só͘-chāi piàn-kiâⁿ kiông-pō, chài-saⁿ kek Góa ê siū-khì; khòaⁿ ah, in kia̍h chhiū-ki hē tī i ê phīⁿ-chêng.

18因為án-ni，我亦beh行我ê大受氣；我ê目睭無beh疼惜in，我也無beh可憐in；in雖然ǹg我ê耳孔中大聲求叫，我猶原m̄聽。In-ūi án-ni, Góa ia̍h beh kiâⁿ Góa ê tōa siū-khì; Góa ê ba̍k-chiu bô beh thiàⁿ-sioh in, Góa iā bô beh khó-lîn in; in sui-jiân ǹg Góa ê hī-khang-tiong tōa-siaⁿ kiû-kiò, Góa iû-goân m̄-thiaⁿ.

1祂ǹg我ê耳孔中，大聲叫講，Tio̍h叫hiah-ê管chit-ê城ê人來，ta̍k人ê手tio̍h kia̍h滅性命ê ke-si。I ǹg góa ê hī-khang-tiong, tōa-siaⁿ kiò kóng, Tio̍h kiò hiah ê koán chit ê siâⁿ ê lâng lâi, ta̍k-lâng ê chhiú tio̍h kia̍h bia̍t sìⁿ-miā ê ke-si.

2忽然有六個人tùi ǹg北頂ê門hit條路來，ta̍k人手kia̍h thâi人ê ke-si；內中有一人穿幼苧衫，腰裡掛(kùi)墨壺；in入去，khiā tī銅壇ê邊頭。Hut-jiân ū la̍k ê lâng tùi ǹg-pak téng ê mn̂g hit tiâu lō͘ lâi, ta̍k-lâng chhiú kia̍h thâi-lâng ê ke-si; lāi-tiong ū chi̍t-lâng chhēng iù-tōe-saⁿ, io--nih kùi ba̍k-ô͘; in ji̍p-khì, khiā tī tâng-tôaⁿ ê piⁿ-thâu.

3以色列上帝ê榮光，本tī ki-lō͘兵ê頂面；taⁿ tùi hia上去，徙到殿ê戶碇，祂叫hit-ê穿幼苧衫，腰裡kùi 墨壺 ê人來。Í-sek-lia̍t Siōng-tè ê êng-kng, pún tī ki-lō͘-peng ê téng-bīn; taⁿ tùi hia chiūⁿ--khì, sóa kàu tiān ê hō͘-tēng, I kiò hit ê chhēng iù-tōe-saⁿ, io--nih kùi ba̍k-ô͘ ê lâng lâi.

4耶和華對伊講，遍行tī城內，就是遍行耶路撒冷ê中間；見若為tio̍h城內所行一切可惡ê事，來吐氣pûn-hāiⁿ ê人，就做記號tī伊ê頭額。Iâ-hô-hoa tùi i kóng, Piàn-kiâⁿ tī siâⁿ-lāi, chiū-sī piàn-kiâⁿ Iâ-lō͘-sat-léng ê tiong-kan; kìⁿ-nā ūi-tio̍h siâⁿ-lāi só͘ kiâⁿ it-chhè khó-ò͘ⁿ ê sū, lâi thó͘-khùi pûn-hāiⁿ ê lâng, chiū chòe kì-hō tī i ê thâu-hia̍h.

5我ê耳孔中聽見祂對其餘ê人講，Tio̍h tè伊遍行thong城，來thâi死人；lín ê目睭莫得疼惜，lín亦莫得可憐in。Góa ê hī-khang-tiong thiaⁿ-kìⁿ I tùi kî-û ê lâng kóng, Tio̍h tè i piàn-kiâⁿ thong-siâⁿ, lâi thâi-sí lâng; lín ê ba̍k-chiu bo̍h-tit thiàⁿ-sioh, lín ia̍h bo̍h-tit khó-lîn in.

6Tio̍h一盡thâi死老人、少年人、在室女、嬰á、婦人人；亦tio̍h tùi我ê聖所thâi起；獨獨見若有記號ê，莫得近óa伊。Tùi án-ni，in就tùi殿前ê長老thâi起。Tio̍h it-chīn thâi-sí lāu-lâng, siàu-liân lâng, chāi-sek-lú, eⁿ-á, hū-jîn-lâng; ia̍h tio̍h tùi Góa ê sèng-só͘ thâi-khí; to̍k-to̍k kìⁿ-nā ū kì-hō--ê, bo̍h-tit kūn-óa i. Tùi án-ni, in chiū tùi tiān-chêng ê tióng-ló thâi-khí.

7伊對in講，Tio̍h phah lâ-sâm chit間殿，hō͘院內充滿受thâi ê人；lín tio̍h出去。In就出去，tī城內thâi死人。I tùi in kóng, Tio̍h phah lâ-sâm chit keng tiān, hō͘ īⁿ-lāi chhiong-móa siū-thâi ê lâng; lín tio̍h chhut-khì. In chiū chhut-khì, tī siâⁿ-lāi thâi-sí lâng.

8In去thâi人ê時，chhun我tī-hia；我就仆tī地裡，叫講，Hāiⁿ ah，主耶和華ah，你將大受氣piàⁿ tī耶路撒冷，kiám是beh將以色列人一盡滅無mah？In khì thâi lâng ê sî, chhun góa tī-hia; góa chiū phak tī tōe--nih, kiò kóng, Hāiⁿ ah, Chú Iâ-hô-hoa ah, Lí chiong tōa siū-khì piàⁿ tī Iâ-lō͘-sat-léng, kiám sī beh chiong Í-sek-lia̍t lâng it-chīn bia̍t-bô mah?

9祂就對我講，以色列家kap猶大家ê罪過極其重；遍地有流血ê事，滿城有冤枉；因為in講，耶和華已經離開chit-ê地，耶和華無teh看。I chiū tùi góa kóng, Í-sek-lia̍t-ke kap Iû-tāi-ke ê chōe-kòa ke̍k-kî tāng; piàn-tōe ū lâu-huih ê sū, móa-siâⁿ ū oan-óng; in-ūi in kóng, Iâ-hô-hoa í-keng lī-khui chit ê tōe, Iâ-hô-hoa bô teh khòaⁿ.

10所以我ê目睭無beh疼惜，我亦無beh可憐in；beh照in所行ê，報應tī in ê頭殼頂。Só͘-í Góa ê bâk-chiu bô beh thiàⁿ-sioh, Góa ia̍h bô beh khó-lîn in; beh chiàu in só͘ kiâⁿ--ê, pò-èng tī in ê thâu-khak-téng.

11看ah，hit-ê穿幼苧衫，腰裡掛墨壺 ê人，將chit-ê事回覆講，我已經照祢所吩咐ê行lah。Khòaⁿ ah, hit ê chhēng iù-tōe-saⁿ, io--nih kùi ba̍k-ô͘ ê lâng, chiong chit ê sū hê-hok kóng, Góa í-keng chiàu Lí só͘ hoan-hù--ê kiâⁿ lah.

1我觀看，看見ki-lō͘兵頭殼頂穹蒼ê中間，親像藍色ê寶石，親像寶座ê形象ê款式。Góa koan-khòaⁿ, khòaⁿ-kìⁿ ki-lō͘-peng thâu-khak-téng kiong-chhong ê tiong-kan, chhin-chhiūⁿ lâm-sek ê pó-chio̍h, chhin-chhiūⁿ pó-chō ê hêng-siōng ê khoán-sit.

2伊tùi hit-ê穿幼苧衫ê人講，你入去，tī轉旋ê輪ê中間，ki-lō͘兵以下，tùi ki-lō͘兵ê中間the̍h to̍h ê火炭，滿兩手，掖tī城頂。我就親目看見伊入去。I tùi hit ê chhēng iù-tōe-saⁿ ê lâng kóng, Lí ji̍p-khì, tī tńg-se̍h ê lûn ê tiong-kan, ki-lō͘-peng í-ē, tùi ki-lō͘-peng ê tiong-kan the̍h to̍h ê hé-thòaⁿ, móa nn̄g chhiú, iā tī siâⁿ-téng. Góa chiū chhin-ba̍k khòaⁿ-kìⁿ i ji̍p-khì.

3Hit人入去ê時，ki-lō͘兵khiā tī殿ê chiàⁿ-pêng，雲充滿內院。Hit-lâng ji̍p-khì ê sî, ki-lō͘-peng khiā tī tiān ê chiàⁿ-pêng, hûn chhiong-móa lāi-īⁿ.

4耶和華ê榮光tùi ki-lō͘兵hia上去，停tī殿ê戶碇ê頂面；殿有雲滿滿；hit-ê院亦hō͘耶和華榮光ê燦爛充滿。Iâ-hô-hoa ê êng-kng tùi ki-lō͘-peng hia chiūⁿ--khì, thêng tī tiān ê hō͘-tēng ê téng-bīn; tiān ū hûn móa-móa; hit ê īⁿ ia̍h hō͘ Iâ-hô-hoa êng-kng ê chhàn-lān chhiong-móa.

5Ki-lō͘兵ê翼ê聲聽到外院，親像全能ê上帝講話ê聲。Ki-lō͘-peng ê si̍t ê siaⁿ thiaⁿ kàu gōa-īⁿ, chhin-chhiūⁿ choân-lêng ê Siōng-tè kóng-ōe ê siaⁿ.

6伊吩咐hit-ê穿幼苧衫ê人講，Tio̍h tùi轉旋ê輪ê中間，ki-lō͘兵ê中間，取火；hit時伊就入去，khiā tī一個輪ê邊頭。I hoan-hù hit ê chhēng iù-tōe-saⁿ ê lâng kóng, Tio̍h tùi tńg-se̍h ê lûn ê tiong-kan, ki-lō͘-peng ê tiong-kan, chhú hé; hit-sî i chiū ji̍p-khì, khiā tī chi̍t ê lûn ê piⁿ-thâu.

7有一個ki-lō͘兵tùi ki-lō͘兵中伸伊ê手，到ki-lō͘兵中間ê火，the̍h kóa起來，hē tī穿幼苧衫ê人ê兩支手；hit人kā伊the̍h來，就出去。Ū chi̍t ê ki-lō͘-peng tùi ki-lō͘-peng tiong chhun i ê chhiú, kàu ki-lō͘-peng tiong-kan ê hé, the̍h kóa khí-lâi, hē tī chhēng iù-tōe-saⁿ ê lâng ê nn̄g ki chhiú; hit-lâng kā i the̍h--lâi, chiū chhut-khì.

8Tī ki-lō͘兵ê翼下，有顯出人ê手ê款。Tī ki-lō͘-peng ê si̍t-ē, ū hián-chhut lâng ê chhiú ê khoán.

9我koh觀看，看見ki-lō͘兵ê邊頭四個輪；chit-ê ki-lō͘兵ê邊頭有一個輪，hit-ê枝lō͘兵ê邊頭也有一個輪；輪 ê款式親像黃ê玉ê色緻。Góa koh koan-khòaⁿ, khòaⁿ-kìⁿ ki-lō͘-peng ê piⁿ--thâu sì ê lûn; chit ê ki-lō͘-peng ê piⁿ--thâu ū chi̍t ê lûn, hit ê ki-lō͘-peng ê piⁿ--thâu iā ū chi̍t ê lûn; lûn ê khoán-sit chhin-chhiūⁿ n̂g ê ge̍k ê sek-tì.

10論到in ê款式，四個lóng siâng一樣ê形狀，親像輪中有輪。Lūn-kàu in ê khoán-sit, sì-ê lóng siâng chi̍t-iūⁿ ê hêng-chōng, chhin-chhiūⁿ lûn-tiong ū lûn.

11行ê時，四面lóng會行得，行ê時m̄免oa̍t，頭ǹg甚麼所在，in就tè伊行；行ê時m̄免oa̍t。Kiâⁿ ê sî, sì-bīn lóng ōe kiâⁿ--tit, kiâⁿ ê sî m̄-bián oa̍t, thâu ǹg sím-mi̍h só͘-chāi, in chiū tè i kiâⁿ; kiâⁿ ê sî m̄-bián oa̍t.

12In thong身軀，in ê ka-chiah，in ê手，in ê翼，kap輪，四圍有目睭滿滿；就是in四個所有ê輪。In thong sin-khu, in ê ka-chiah, in ê chhiú, in ê si̍t, kap lûn, sì-ûi ū ba̍k-chiu móa-móa; chiū-sī in sì-ê só͘ ū ê lûn.

13論到chiah-ê輪，我耳孔中聽見講，轉旋ê。Lūn-kàu chiah ê lûn, góa hī-khang-tiong thiaⁿ-kìⁿ kóng, Tńg-se̍h--ê.

14Tāk-ê有四個面，頭一個面是ki-lō͘兵ê面，第二ê面是人ê面，第三ê面是獅ê面，第四ê面是鷹ê面。Tāk-ê ū sì ê bīn, thâu chi̍t ê bīn sī ki-lō͘-peng ê bīn, tē-jī ê bīn sī lâng ê bīn, tē-saⁿ ê bīn sī sai ê bīn, tē-sì ê bīn sī eng ê bīn.

15Ki-lō͘兵lóng上去；這是我tī Ka-pa-ló͘河邊所bat看見ê活物。Ki-lō͘-peng lóng chiūⁿ--khì; che sī góa tī Ka-pa-ló͘ hô-piⁿ só͘ bat khòaⁿ-kìⁿ ê oa̍h-mi̍h.

16Ki-lō͘兵行，輪亦tī邊頭行；ki-lō͘兵thí開翼 tùi地上去，輪也無oa̍t-tńg離開in ê身邊。Ki-lō͘-peng kiâⁿ, lûn ia̍h tī piⁿ--thâu kiâⁿ; ki-lō͘-peng thí-khui si̍t tùi tōe chiūⁿ--khì, lûn iā bô oa̍t-tńg lī-khui in ê sin-piⁿ.

17Hiah-ê停，chiah-ê也停；hiah-ê上去，chiah-ê亦相kap上去；因為活物ê神tī in ê內面。Hiah-ê thêng, chiah-ê iā thêng; hiah-ê chiūⁿ--khì, chiah-ê ia̍h saⁿ-kap chiūⁿ--khì; in-ūi oa̍h-mi̍h ê sîn tī in ê lāi-bīn.

18耶和華ê榮光tùi殿ê戶碇頂出去，停tī ki-lō͘兵ê頂面。Iâ-hô-hoa ê êng-kng tùi tiān ê hō͘-tēng-téng chhut-khì, thêng tī ki-lō͘-peng ê téng-bīn.

19Ki-lō͘兵出去ê時就thí開翼，tī我ê目睭前tùi地上去，輪亦tī in ê身邊；停tī耶和華ê厝東門ê門釦，tī in ê頂面，有以色列上帝ê榮光。Ki-lō͘-peng chhut-khì ê sî chiū thí-khui si̍t, tī góa ê ba̍k-chiu-chêng tùi tōe chiūⁿ--khì, lûn ia̍h tī in ê sin-piⁿ; thêng tī Iâ-hô-hoa ê chhù tang-mn̂g ê mn̂g-khàu, tī in ê téng-bīn, ū Í-sek-lia̍t Siōng-tè ê êng-kng.

20這是我前tī Ka-pa-ló͘河邊所看見以色列上帝ê下面ê活物；我知in是ki-lō͘兵。Che sī góa chêng tī Ka-pa-ló͘ hô-piⁿ só͘ khòaⁿ-kìⁿ Í-sek-lia̍t Siōng-tè ê ē-bīn ê oa̍h-mi̍h; góa chai in sī ki-lō͘-peng.

21Ta̍k-ê有四個面，ta̍k-ê有四個翼；in ê翼下有人ê手ê形象。Ta̍k-ê ū sì ê bīn, ta̍k-ê ū sì ê si̍t; in ê si̍t-ē ū lâng ê chhiú ê hêng-siōng.

22論到in ê面ê形象，就是我前tī Ka-pa-ló͘河邊所看見ê面；in ê款式，in ê身體，lóng án-ni；lóng ta̍k-ê直直行去。Lūn-kàu in ê bīn ê hêng-siōng, chiū-sī góa chêng tī Ka-pa-ló͘ hô-piⁿ só͘ khòaⁿ-kìⁿ ê bīn; in ê khoán-sit, in ê sin-thé, lóng án-ni; lóng ta̍k-ê ti̍t-ti̍t kiâⁿ--khì.