1當波斯王Kó͘-lia̍t元年，因為beh應驗耶和華託耶利米所講ê話，耶和華就激動波斯王Kó͘-lia̍t ê心，hō͘伊宣布tī thong國，koh寫伊，講，Tng Pho-su ông Kó͘-lia̍t goân--nî, in-ūi beh èng-giām Iâ-hô-hoa thok Iâ-lī-bí só͘ kóng ê ōe, Iâ-hô-hoa chiū kek-tōng Pho-su ông Kó͘-lia̍t ê sim, hō͘ i soan-pò͘ tī thong-kok, koh siá i, kóng,

2波斯王Kó͘-lia̍t án-ni講，天頂ê上帝耶和華將天下ê萬國賞賜我，koh命令我tī猶大ê耶路撒冷kā伊起殿。Pho-su ông Kó͘-lia̍t án-ni kóng, Thiⁿ-téng ê Siōng-tè Iâ-hô-hoa chiong thiⁿ-ē ê bān-kok siúⁿ-sù góa, koh bēng-lēng góa tī Iû-tāi ê Iâ-lō͘-sat-léng kā I khí tiān.

3Lín中間見若做伊ê百姓ê，thang上去猶大ê耶路撒冷，tī耶路撒冷koh起耶和華以色列上帝ê殿；願伊ê上帝kap伊tī-teh；伊真正是上帝。Lín tiong-kan kìⁿ-nā chòe I ê peh-sìⁿ--ê, thang chiūⁿ-khì Iû-tāi ê Iâ-lō͘-sat-léng, tī Iâ-lō͘-sat-léng koh khí Iâ-hô-hoa Í-sek-lia̍t Siōng-tè ê tiān; goān i ê Siōng-tè kap i tī-teh; I chin-chiàⁿ sī Siōng-tè.

4見所chhun ê人，無論寄腳tī甚麼所在，hit所在ê人tio̍h用金銀、財物、cheng-siⁿ，幫贊伊；另外也tio̍h為耶路撒冷上帝ê殿，甘心獻禮物。Kìⁿ só͘ chhun ê lâng, bô-lūn kià-kha tī sím-mi̍h só͘-chāi, hit só͘-chāi ê lâng tio̍h ēng kim gûn, châi-bu̍t, cheng-siⁿ, pang-chān i; lēng-gōa iā tio̍h ūi Iâ-lō͘-sat-léng Siōng-tè ê tiān, kam-sim hiàn lé-mi̍h.

5Tùi án-ni，猶大kap便雅憫ê族長、祭司、利未人，見若hō͘上帝激動伊ê心ê，lóng起來，beh上去耶路撒冷，起耶和華ê殿。Tùi án-ni Iû-tāi kap Piān-ngá-bín ê cho̍k-tiúⁿ, chè-si, Lī-bī lâng, kìⁿ-nā hō͘ Siōng-tè kek-tōng i ê sim ê, lóng khí-lâi, beh chiūⁿ-khì Iâ-lō͘-sat-léng, khí Iâ-hô-hoa ê tiān.

6In四圍ê人就用銀器，用金、財物、cheng-siⁿ、寶貝，補助in；另外koh有甘心獻ê禮物。In sì-ûi ê lâng chiū ēng gûn-khì, ēng kim, châi-bu̍t, cheng-siⁿ, pó-pòe, pó͘-chō͘ in; lēng-gōa koh ū kam-sim hiàn ê lé-mi̍h.

7Kó͘-lia̍t王也將耶和華殿內ê器具the̍h出來，就是前Nî-pò͘-kah-nî-sat tùi耶路撒冷搬來，hē tī伊hiah-ê上帝ê廟ê。Kó͘-lia̍t ông iā chiong Iâ-hô-hoa tiān-lāi ê khì-kū the̍h--chhut-lâi, chiū-sī chêng Nî-pò͘-kah-nî-sat tùi Iâ-lō͘-sat-léng poaⁿ--lâi, hē tī i hiah ê siōng-tè ê biō ê.

8Chiah-ê器具波斯王Kó͘-lia̍t託管庫房ê Bí-thê-lī-ta̍t the̍h出來，點算伊，交hō͘猶大ê首領Siat-pa-sat。Chiah ê khì-kū Pho-su ông Kó͘-lia̍t thok koán khò͘-pâng ê Bí-thê-lī-ta̍t the̍h--chhut-lâi, tiám-sǹg i, kau-hō͘ Iû-tāi ê siú-léng Siat-pa-sat.

9In ê數額記tī下面；金盤三十塊，銀盤一千塊，刀二十九支，In ê siàu-gia̍h kì tī ē-bīn; kim-pôaⁿ saⁿ-cha̍p tè, gûn-pôaⁿ chi̍t-chheng tè, to jī-cha̍p-káu ki,

10金碗三十塊，銀碗第二pān-ê四百一十塊，別樣ê器具一千件；金銀ê器具共五千四百件；kim-óaⁿ saⁿ-cha̍p tè, gûn-óaⁿ tē-jī-pān-ê sì-pah it-cha̍p tè, pa̍t-iūⁿ ê khì-kū chi̍t-chheng kiāⁿ; kim gûn ê khì-kū kiōng gō͘-chheng sì-pah kiāⁿ;

11帶受掠ê人tùi巴比倫上到耶路撒冷ê時，Siat-pa-sat將chiah-ê lóng帶上去。tòa siū-lia̍h ê lâng tùi Pa-pí-lûn chiūⁿ-kàu Iâ-lō͘-sat-léng ê sî, Siat-pa-sat chiong chiah-ê lóng tòa chiūⁿ khì.

1前巴比倫王Nî-pò͘-kah-nî-sat掠到巴比倫ê，猶大省百姓中有人tùi受掠到ê所在tò來耶路撒冷kap猶大，ta̍k人tò去伊ê城；Chêng Pa-pí-lûn ông Nî-pò͘-kah-nî-sat lia̍h kàu Pa-pí-lûn ê, Iû-tāi séng peh-sìⁿ-tiong ū lâng tùi siū-lia̍h kàu ê só͘-chāi tò-lâi Iâ-lō͘-sat-léng kap Iû-tāi, ta̍k-lâng tò-khì i ê siâⁿ;

2就是kap Só͘-lô-pa-pek、Iâ-su-a、Nî-hi-bí、Se-lāi-ngá、Lī-lai5nga2、Boa̍t-tí-kái、Pit-san、Bí-su-poa̍t、Pí-kek-óa-i、Lī-hông、Pa-ná，相kap tò來ê。 以色列百姓ê人額記tī下底。chiū-sī kap Só͘-lô-pa-pek, Iâ-su-a, Nî-hi-bí, Se-lāi-ngá, Lī-lâi-ngá, Boa̍t-tí-kái, Pit-san, Bí-su-poa̍t, Pí-kek-óa-i, Lī-hông, Pa-ná, saⁿ-kap tò--lâi-ê. Í-sek-lia̍t peh-sìⁿ ê lâng-gia̍h kì tī ē-tóe.

3Pa-lio̍k ê後裔，兩千一百七十二人。Pa-lio̍k ê hō͘-è, nn̄g-chheng chi̍t-pah chhit-cha̍p-jī lâng.

4Sī-hoat-thê-ngá ê後裔，三百七十二人。Sī-hoat-thê-ngá ê hō͘-è, saⁿ-pah chhit-cha̍p-jī lâng.

5A-la̍h ê後裔，七百七十五人。A-la̍h ê hō͘-è, chhit-pah chhit-cha̍p-gō͘ lâng.

6Pa-hap-mô͘-ap ê後裔，就是Iâ-su-a kap Iok-ap ê後裔，兩千八百一十二人。Pa-hap-mô͘-ap ê hō͘-è, chiū-sī Iâ-su-a kap Iok-ap ê hō͘-è, nn̄g-chheng poeh-pah it-cha̍p-jī lâng.

7Í-lân ê後裔，一千兩百五十四人。Í-lân ê hō͘-è, chi̍t-chheng nn̄g-pah gō͘-cha̍p-sì lâng.

8Sat-thó͘ ê後裔，九百四十五人。Sat-thó͘ ê hō͘-è, káu-pah sì-cha̍p-gō͘ lâng.

9Sat-kái ê後裔，七百六十人。Sat-kái ê hō͘-è, chhit-pah la̍k-cha̍p lâng.

10Pa-nî ê後裔，六百四十二人。Pa-nî ê hō͘-è, la̍k-pah sì-cha̍p-jī lâng.

11Pí-pài ê後裔，六百二十三人。Pí-pài ê hō͘-è, la̍k-pah jī-cha̍p-saⁿ lâng.

12Ap-kah ê後裔，一千兩百二十二人。Ap-kah ê hō͘-è, chi̍t-chheng nn̄g-pah jī-cha̍p-jī lâng.

13A-to-nî-kan ê後裔，六百六十六人。A-to-nî-kan ê hō͘-è, la̍k-pah la̍k-cha̍p-la̍k lâng.

14Pí-kek-óa-i ê後裔，兩千連五十六人。Pí-kek-óa-i ê hō͘-è, nn̄g-chheng liân gō͘-cha̍p-la̍k lâng.

15A-teng ê後裔，四百五十四人。A-teng ê hō͘-è, sì-pah gō͘-cha̍p-sì lâng.

16A-te̍k ê後裔，屬Hi-se-ka ê，九十八人。A-te̍k ê hō͘-è, sio̍k Hi-se-ka ê, káu-cha̍p-poeh lâng.

17Pí-sài ê後裔三百二十三人。Pí-sài ê hō͘-è saⁿ-pah jī-cha̍p-saⁿ lâng.

18Iok-la̍h ê後裔，一百一十二人。Iok-la̍h ê hō͘-è, chi̍t-pah it-cha̍p-jī lâng.

19Hap-sūn ê後裔，兩百二十三人。Hap-sūn ê hō͘-è, nn̄g-pah jī-cha̍p-saⁿ lâng.

20Kiat-pa-jíⁿ人，九十五個。Kiat-pa-jíⁿ lâng, káu-cha̍p-gō͘ ê.

21伯利恆人，一百二十三個。Pek-lī-hêng lâng, chi̍t-pah jī-cha̍p-saⁿ ê.

22Nî-tô-hoat人，五十六個。Nî-tô-hoat lâng, gō͘-cha̍p-la̍k ê.

23A-ná-tu̍t人，一百二十八個。A-ná-tu̍t lâng, chi̍t-pah jī-cha̍p poeh ê.

24A-su-má-hut人，四十二個。A-su-má-hut lâng, sì-cha̍p-jī ê.

25Ki-lia̍t-iâ-lîm人，Ki-hui-la̍h人，Pí-lio̍k人，共七百四十三個。Ki-lia̍t-iâ-lîm lâng, Ki-hui-la̍h lâng, Pí-lio̍k lâng, kiōng chhit-pah sì-cha̍p-saⁿ ê.

26La̍h-má人，Ka-pa人，共六百二十一個。La̍h-má lâng, Ka-pa lâng, kiōng la̍k-pah jī-cha̍p-it ê.

27Be̍k-má人，一百二十二個。Be̍k-má lâng, chi̍t-pah jī-cha̍p-jī ê.

28Pek-te̍k-lī人，Ai ê人，共兩百二十三個。Pek-te̍k-lī lâng, Ai ê lâng, kiōng nn̄g-pah jī-cha̍p-saⁿ ê.

29Nî-pho人，五十二個。Nî-pho lâng, gō͘-cha̍p-jī ê.

30Boa̍t-pit人，一百五十六個。Boa̍t-pit lâng, chi̍t-pah gō͘-cha̍p-la̍k ê.

31別ê Í-lân ê後裔，一千兩百五十四人。Pa̍t ê Í-lân ê hō͘-è, chi̍t-chheng nn̄g-pah gō͘-cha̍p-sì lâng.

32Hap-lîm ê後裔，三百二十人。Hap-lîm ê hō͘-è, saⁿ-pah jī-cha̍p lâng.

33羅得人、Hap-tē人、O-lô人，共七百二十五個。Lô-tek lâng, Hap-tē lâng, O-lô lâng, kiōng chhit-pah jī-cha̍p-gō͘ ê.

34耶利哥人，三百四十五個，Iâ-lī-ko lâng, saⁿ-pah sì-cha̍p-gō͘ ê,

35Se-ná人，三千六百三十個。Se-ná lâng, saⁿ-chheng la̍k-pah saⁿ-cha̍p ê.

36祭司，Iâ-su-a ê家，Iâ-tāi-ngá ê後裔，九百七十三人。Chè-si, Iâ-su-a ê ke, Iâ-tāi-ngá ê hō͘-è, káu-pah chhit-cha̍p-saⁿ lâng.

37Im-be̍k ê後裔，一千連五十二人。Im-be̍k ê hō͘-è, chi̍t-chheng liân gō͘-cha̍p-jī lâng.

38Pa-si-hō͘-jíⁿ ê後裔，一千兩百四十七人。Pa-si-hō͘-jíⁿ ê hō͘-è, chi̍t-chheng nn̄g-pah sì-cha̍p-chhit lâng.

39Hap-lîm ê後裔，一千連一十七人。Hap-lîm ê hō͘-è, chi̍t-chheng liân it-cha̍p-chhit lâng.

40利未人Hô-ta̍t-ui-ngá ê後裔，就是Iâ-su-a kap Kah-bia̍t ê後裔，七十四人。Lī-bī lâng Hô-ta̍t-ui-ngá ê hō͘-è, chiū-sī Iâ-su-a kap Kah-bia̍t ê hō͘-è, chhit-cha̍p-sì lâng.

41唱歌ê，A-sat ê後裔，一百二十八人。Chhiùⁿ-koa--ê, A-sat ê hō͘-è, chi̍t-pah jī-cha̍p-poeh lâng.

42顧門ê，Sa-liông ê後裔，A-te̍k ê後裔，Ta̍t-bûn ê後裔，A-kok ê後裔，Hap-tí-tāi ê後裔，Sok-pài ê後裔，共一百三十九人。Kò͘-mn̂g-ê, Sa-liông ê hō͘-è, A-te̍k ê hō͘-è, Ta̍t-bûn ê hō͘-è, A-kok ê hō͘-è, Hap-tí-tāi ê hō͘-è, Sok-pài ê hō͘-è, kiōng chi̍t-pah saⁿ-cha̍p-káu lâng.

43Nî-thê-lêng；Se-hap ê後裔，Hap-so͘-pa ê後裔，Tap-pa-gô ê後裔；Nî-thê-lêng; Se-hap ê hō͘-è, Hap-so͘-pa ê hō͘-è, Tap-pa-gô ê hō͘-è;

44Ki-lio̍k ê後裔，Se-a ê後裔，Pa-tùn ê後裔；Ki-lio̍k ê hō͘-è, Se-a ê hō͘-è, Pa-tùn ê hō͘-è;

45Lī-pa-ná ê後裔，Hap-ka-pa ê後裔，A-kok ê後裔；Lī-pa-ná ê hō͘-è, Hap-ka-pa ê hō͘-è, A-kok ê hō͘-è;

46Hap-kah ê後裔，Sat-mái ê後裔，哈蘭ê後裔；Hap-kah ê hō͘-è, Sat-mái ê hō͘-è, Hap-lân ê hō͘-è;

47Kiat-tek ê後裔，Ka-hap ê後裔，Lī-a-ngá ê後裔；Kiat-tek ê hō͘-è, Ka-hap ê hō͘-è, Lī-a-ngá ê hō͘-è;

48Lī-sìn ê後裔，Nî-ko-tāi ê後裔，Ka-sàn ê後裔；Lī-sìn ê hō͘-è, Nî-ko-tāi ê hō͘-è, Ka-sàn ê hō͘-è;

49O͘-sat ê後裔，Pa-se-a ê後裔，Pí-sài ê後裔；O͘-sat ê hō͘-è, Pa-se-a ê hō͘-è, Pí-sài ê hō͘-è;

50Ap-ná ê後裔，Bí-o͘-lêng ê後裔，Nî-phó͘-sim ê後裔；Ap-ná ê hō͘-è, Bí-o͘-lêng ê hō͘-è, Nî-phó͘-sim ê hō͘-è;

51Pa-pok ê後裔，Hap-kó͘-pa ê後裔，Hap-hu̍t ê後裔；Pa-pok ê hō͘-è, Hap-kó͘-pa ê hō͘-è, Hap-hu̍t ê hō͘-è;

52Pa-sé-lu̍t ê後裔，Bí-hi-tāi ê後裔，Hap-sa ê後裔；Pa-sé-lu̍t ê hō͘-è, Bí-hi-tāi ê hō͘-è, Hap-sa ê hō͘-è;

53Pa-kho ê後裔，Se-se-la̍h ê後裔，Tap-má ê後裔；Pa-kho ê hō͘-è, Se-se-la̍h ê hō͘-è, Tap-má ê hō͘-è;

54Nî-sè-a ê後裔，Hap-thê-hoat ê後裔。Nî-sè-a ê hō͘-è, Hap-thê-hoat ê hō͘-è.

55所羅門ê奴僕ê後裔，就是Só-thài ê後裔，Só-húi-lia̍t ê後裔，Pí-lō͘-tāi ê後裔；Só͘-lô-bûn ê lô͘-po̍k ê hō͘-è, chiū-sī Só-thài ê hō͘-è, Só-húi-lia̍t ê hō͘-è, Pí-lō͘-tāi ê hō͘-è;

56Ngá-la̍h ê後裔，Ta̍t-khun ê後裔，Kiat-tek ê後裔；Ngá-la̍h ê hō͘-è, Ta̍t-khun ê hō͘-è, Kiat-tek ê hō͘-è;

57Sī-hoat-thê-ngá ê後裔，Hap-t歲 ê後裔，Po-hek-lia̍t-hap-su-pa-im ê後裔，A-bí ê後裔；Sī-hoat-thê-ngá ê hō͘-è, Hap-thè ê hō͘-è, Po-hek-lia̍t-hap-su-pa-im ê hō͘-è, A-bí ê hō͘-è;

58Nî-thê-lêng，kap所羅門奴僕ê後裔，共三百九十二人。Nî-thê-lêng, kap Só͘-lô-bûn lô͘-po̍k ê hō͘-è, kiōng saⁿ-pah káu-cha̍p-jī lâng.

59Tùi Te̍k-bí-la̍h、Te̍k-hap-sat、Ki-lio̍k、Ap-tàn、Im-be̍k上來ê，bōe能證明in ê宗族世系真正是以色列人á m̄是；Tùi Te̍k-bí-la̍h, Te̍k-hap-sat, Ki-lio̍k, Ap-tàn, Im-be̍k chiūⁿ-lâi--ê, bōe-ōe chèng-bêng in ê chong-cho̍k sè-hē chin-chiàⁿ sī Í-sek-lia̍t lâng á m̄-sī;

60in是Tē-lâi-ngá ê後裔，To-pí-ngá ê後裔，Nî-ko-tāi ê後裔，共六百五十二人。in sī Tē-lâi-ngá ê hō͘-è, To-pí-ngá ê hō͘-è, Nî-ko-tāi ê hō͘-è, kiōng la̍k-pah gō͘-cha̍p-jī lâng.

61祭司ê後裔中，有Hap-pa-ngá ê後裔，Hap-ko-su ê後裔，Pa-se-lâi ê後裔；Pa-se-lâi娶Ki-lia̍t人Pa-se-lâi ê cha-bó͘-kiáⁿ做bó͘；所以用in ê名來稱伊。Chè-si ê hō͘-è tiong, ū Hap-pa-ngá ê hō͘-è, Hap-ko-su ê hō͘-è, Pa-se-lâi ê hō͘-è; Pa-se-lâi chhōa Ki-lia̍t lâng Pa-se-lâi ê cha-bó͘-kiáⁿ chòe bó͘; só͘-í ēng in ê miâ lâi chheng i.

62Chiah-ê家，tī族譜中chhē in ê世系，也chhē無，所以算做無清氣，m̄准in 當祭司ê職。Chiah ê ke, tī cho̍k-phó͘-tiong chhē in ê sè-hē, iā chhē-bô, só͘-í sǹg-chòe bô chheng-khì, m̄-chún in tng chè-si ê chit.

63總督kā in講，m̄-thang食至聖ê物，thèng候有O͘-lêng kap Thó͘-bêng ê祭司起來。Chóng-to̍k kā in kóng, m̄-thang chia̍h chì-sèng ê mi̍h, thèng-hāu ū O͘-lêng kap Thó͘-bêng ê chè-si khí-lâi.

64會眾共有四萬兩千三百六十人。Hōe-chiòng kiōng ū sì-bān nn̄g-chheng saⁿ-pah la̍k-cha̍p lâng.

65以外iáu有in ê奴僕女婢，七千三百三十七人；男女唱歌ê，有兩百人。Í-gōa iáu ū in ê lô͘-po̍k lú-pī, chhit-chheng saⁿ-pah saⁿ-cha̍p-chhit lâng; lâm-lú chhiùⁿ-koa--ê, ū nn̄g-pah lâng.

66In ê馬，七百三十六隻；in ê騾，兩百四十五隻；In ê bé, chhit-pah saⁿ-cha̍p-la̍k chiah; in ê lô, nn̄g-pah sì-cha̍p-gō͘ chiah;

67in ê駱駝，四百三十五隻；驢，六千一百二十隻。in ê lo̍k-tô, sì-pah saⁿ-cha̍p-gō͘ chiah; lû, la̍k-chheng chi̍t-pah jī-cha̍p chiah.

68In到耶和華ê殿tī耶路撒冷ê時，有族長kúi-nā人，為tio̍h上帝ê殿，甘心來獻，beh koh起殿tī伊ê所在。In kàu Iâ-hô-hoa ê tiān tī Iâ-lō͘-sat-léng ê sî, ū cho̍k-tiúⁿ kúi-nā lâng, ūi-tio̍h Siōng-tè ê tiān, kam-sim lâi hiàn, beh koh khí tiān tī i ê só͘-chāi.

69In照力量tôe入工程ê府庫，金六萬一千ta̍t-lī-khek；銀五千bî-ná；kap祭司ê禮服一百領。In chiàu le̍k-liōng tôe-ji̍p kang-tiâⁿ ê hú-khò͘, kim la̍k-bān chi̍t-chheng ta̍t-lī-khek; gûn gō͘-chheng bî-ná; kap chè-si ê lé-ho̍k chi̍t-pah niá.

70Tùi án-ni，祭司kap利未人，百姓中一部分ê人，kap唱歌ê，顧門ê，Nî-thê-lêng，kok khiā起in ê城；以色列眾人也khiā起in hiah-ê城。Tùi án-ni chè-si kap Lī-bī lâng, peh-sìⁿ-tiong chi̍t-pō͘-hūn ê lâng, kap chhiùⁿ-koa--ê, kò͘-mn̂g--ê, Nî-thê-lêng, kok khiā-khí in ê siâⁿ; Í-sek-lia̍t chèng-lâng iā khiā-khí in hiah ê siâⁿ.

1到第七月，以色列人已經khiā起in hiah-ê城，hit時百姓親像一人聚集tī耶路撒冷。Kàu tē-chhit ge̍h, Í-sek-lia̍t lâng í-keng khiā-khí in hiah ê siâⁿ, hit-sî peh-sìⁿ chhin-chhiūⁿ chi̍t-lâng chū-chi̍p tī Iâ-lō͘-sat-léng.

2Iok-sat-tap ê kiáⁿ Iâ-su-a，kap伊ê兄弟hiah-ê祭司，kap Sat-la̍h-thiat ê kiáⁿ Só͘-lô-pa-pek，kap伊ê兄弟，lóng起來起以色列上帝ê壇，thang獻燒祭tī hit頂面，照上帝ê奴僕摩西律法ê冊所記載ê。Iok-sat-tap ê kiáⁿ Iâ-su-a, kap i ê hiaⁿ-tī hiah ê chè-si, kap Sat-la̍h-thiat ê kiáⁿ Só͘-lô-pa-pek, kap i ê hiaⁿ-tī, lóng khí-lâi khí Í-sek-lia̍t Siōng-tè ê tôaⁿ, thang hiàn sio-chè tī hí(**hit) téng-bīn, chiàu Siōng-tè ê lô͘-po̍k Mô͘-se lu̍t-hoat ê chheh só͘ kì-chài ê.

3In起壇tī Pún-kū ê位，因為驚hiah-ê國ê百姓；koh tī hit頂面獻燒祭hō͘耶和華，就是早起ê-hng ê燒祭。In khí-tôaⁿ tī pún-kū ê ūi, in-ūi kiaⁿ hiah ê kok ê peh-sìⁿ; koh tī hí(**hit) téng-bīn hiàn sio-chè hō͘ Iâ-hô-hoa, chiū-sī chá-khí ê-hng ê sio-chè.

4也守搭寮á節，照所記載ê；koh獻ta̍k日ê燒祭，照in ê數額，照定tio̍h ê例，親像ta̍k日所應該tio̍h ê。Iā siú tah-liâu-á choeh, chiàu só͘ kì-chài ê; koh hiàn ta̍k-ji̍t ê sio-chè, chiàu in ê siàu-gia̍h, chiàu tiāⁿ-tio̍h ê lē, chhin-chhiūⁿ ta̍k-ji̍t só͘ eng-kai-tio̍h ê.

5然後獻照常ê燒祭，kap每月初一ê祭，以及耶和華分別做聖ê節期ê祭；koh獻ta̍k人甘心歡喜獻ê祭hō͘耶和華。Jiân-āu hiàn chiàu-siông ê sio-chè, kap múi-ge̍h chhoe-it ê chè, í-ki̍p Iâ-hô-hoa hun-piat chòe-sèng ê choeh-kî ê chè; koh hiàn ta̍k-lâng kam-sim hoaⁿ-hí hiàn ê chè hō͘ Iâ-hô-hoa.

6Tùi七月初一起，in獻燒祭hō͘耶和華。總是耶和華殿ê地基，iáu未hē。Tùi chhit-ge̍h chhoe-it khí, in hiàn sio-chè hō͘ Iâ-hô-hoa. Chóng-sī Iâ-hô-hoa tiān ê tōe-ki, iáu-bē hē.

7In koh用銀hō͘石匠、木匠；用lim食ê物，kap油，hō͘ Se-tùn人、Chhui-lô人，hō͘ in將柏香樹tùi黎巴嫩運到海到Iok-phàⁿ；是照波斯王Kó͘-lia̍t所允准ê。In koh ēng gûn hō͘ chio̍h-chhiūⁿ, ba̍k-chhiūⁿ; ēng lim-chia̍h ê mi̍h, kap iû, hō͘ Se-tùn lâng, Chhui-lô lâng, hō͘ in chiong pek-hiuⁿ-chhiū tùi Lī-pa-lùn ūn kàu hái kàu Iok-phàⁿ; sī chiàu Pho-su ông Kó͘-lia̍t só͘ ún-chún--ê.

8In到耶路撒冷上帝ê殿hia，第二年二月，Sat-la̍h-thiat ê kiáⁿ Só͘-lô-pa-pek，Iok-sat-tap ê kiáⁿ Iâ-su-a，kap其餘ê兄弟，就是祭司，kap利未人，kap一切tùi受掠ê中間tò來耶路撒冷ê人，lóng起手，派利未人，tùi二十歲以上，督工起耶和華ê殿。In kàu Iâ-lō͘-sat-léng Siōng-tè ê tiān hia, tē-jī nî jī-ge̍h, Sat-la̍h-thiat ê kiáⁿ Só͘-lô-pa-pek, Iok-sat-tap ê kiáⁿ Iâ-su-a, kap kî-û ê hiaⁿ-tī, chiū-sī chè-si, kap Lī-bī lâng, kap it-chhè tùi siū-lia̍h ê tiong-kan tò-lâi Iâ-lō͘-sat-léng ê lâng, lóng khí-chhiú, phài Lī-bī lâng, tùi jī-cha̍p hè í-chiūⁿ, tok-kang khí Iâ-hô-hoa ê tiān.

9Tùi án-ni，Iâ-su-a，kap伊ê kiáⁿ kap兄弟，Kah-bia̍t kap伊ê kiáⁿ，猶大ê kiáⁿ孫，kap Hi-ná-ta̍t ê kiáⁿ，kap in ê kiáⁿ，in ê兄弟利未人，lóng起來，督理hiah-ê tī上帝ê殿做工ê人。Tùi án-ni Iâ-su-a, kap i ê kiáⁿ kap hiaⁿ-tī, Kah-bia̍t kap i ê kiáⁿ, Iû-tāi ê kiáⁿ-sun, kap Hi-ná-ta̍t ê kiáⁿ, kap in ê kiáⁿ, in ê hiaⁿ-tī Lī-bī lâng, lóng khí-lâi, tok-lí hiah ê tī Siōng-tè ê tiān chòe-kang ê lâng.

10起厝師傅hē耶和華殿ê地基ê時，祭司穿禮服kia̍h號頭。A-sat ê kiáⁿ孫利未人the̍h鐃鈸，lóng khiā-teh beh o-ló耶和華，照以色列王大衛所定tio̍h ê例。Khí-chhù sai-hū hē Iâ-hô-hoa tiān ê tōe-ki ê sî, chè-si chhēng lé-ho̍k kia̍h hō-thâu. A-sat ê kiáⁿ-sun Lī-bī lâng the̍h lâ-poa̍h, lóng khiā-teh beh o-ló Iâ-hô-hoa, chiàu Í-sek-lia̍t ông Tāi-pi̍t só͘ tiāⁿ-tio̍h ê lē.

11In有ê唱有ê和，o-ló感謝耶和華，講，因為伊是好，伊永遠施慈愛hō͘以色列。In o-ló耶和華ê時，眾百姓大聲hoah，因為耶和華殿ê地基已經hē-teh。In ū-ê chhiùⁿ ū-ê hô, o-ló kám-siā Iâ-hô-hoa, kóng, In-ūi I sī hó, I éng-oán si chû-ài hō͘ Í-sek-lia̍t. In o-ló Iâ-hô-hoa ê sî, chèng peh-sìⁿ tōa-siaⁿ hoah, in-ūi Iâ-hô-hoa tiān ê tōe-ki í-keng hē-teh.

12總是有chōe-chōe祭司，利未人，族中ê老大，就是bat看見前ê殿hiah-ê老人，taⁿ親目看見hē chit間殿ê地基，就大聲啼哭；也chōe-chōe人為tio̍h歡喜大聲hoah。Chóng-sī ū chōe-chōe chè-si, Lī-bī lâng, cho̍k-tiong ê lāu-tōa, chiū-sī bat khòaⁿ-kìⁿ chêng ê tiān hiah ê lāu-lâng, taⁿ chhin-ba̍k khòaⁿ-kìⁿ hē chit keng tiān ê tōe-ki, chiū tōa-siaⁿ thî-khàu; iā chōe-chōe lâng ūi-tio̍h hoaⁿ-hí tōa-siaⁿ hoah.

13致到百姓bōe能分別歡喜hoah ê聲kap百姓啼哭ê聲；因為百姓大聲hoah ê聲hō͘ hit-ê聲聽到真遠。Tì-kàu peh-sìⁿ bōe-ōe hun-piat hoaⁿ-hí hoah ê siaⁿ kap peh-sìⁿ thî-khàu ê siaⁿ; in-ūi peh-sìⁿ tōa-siaⁿ hoah ê siaⁿ hō͘ hit ê siaⁿ thiaⁿ kàu chin-hn̄g.