1猶大、便雅憫ê對敵聽見hiah-ê受掠tò來ê人，為以色列ê上帝耶和華起殿，Iû-tāi Piān-ngá-bín ê tùi-te̍k thiaⁿ-kìⁿ hiah ê siū-lia̍h tò-lâi ê lâng, ūi Í-sek-lia̍t ê Siōng-tè Iâ-hô-hoa khí tiān,

2就來見Só͘-lô-pa-pek，kap族中ê老大，kā in講，請准阮kap lín相kap起，因為阮chhē lín ê上帝，kap lín一樣；tùi亞述王Í-sat-hap-tùn帶阮上chit-ê地以來，阮常常獻祭hō͘上帝。chiū lâi kìⁿ Só͘-lô-pa-pek, kap cho̍k-tiong ê lāu-tōa, kā in kóng, Chhiáⁿ chún goán kap lín saⁿ-kap khí, in-ūi goán chhē lín ê Siōng-tè, kap lín chi̍t-iūⁿ; tùi A-su̍t ông Í-sat-hap-tùn tòa goán chiūⁿ chit ê tōe í-lâi, goán siông-siông hiàn-chè hō͘ Siōng-tè.

3總是Só͘-lô-pa-pek、Iâ-su-a，kap其餘以色列族中ê老大，kā in講，阮beh起阮ê上帝ê殿，lín無份；阮家己beh為耶和華以色列ê上帝協力起造；是照波斯王Kó͘-lia̍t王所命令阮ê。Chóng-sī Só͘-lô-pa-pek, Iâ-su-a, kap kî-û Í-sek-lia̍t cho̍k-tiong ê lāu-tōa, kā in kóng, Goán beh khí goán ê Siōng-tè ê tiān, lín bô hūn; goán ka-kī beh ūi Iâ-hô-hoa Í-sek-lia̍t ê Siōng-tè hia̍p-le̍k khí-chō; sī chiàu Pho-su ông Kó͘-lia̍t ông só͘ bēng-lēng goán ê.

4Tùi án-ni，hit所在ê百姓hō͘猶大人手軟落去；tī in起造ê時攪擾in。Tùi án-ni, hit só͘-chāi ê peh-sìⁿ hō͘ Iû-tāi lâng chhiú nńg--lo̍h-khì; tī in khí-chō ê sî kiáu-jiáu in.

5Tùi波斯王Kó͘-lia̍t ê年間，到波斯王Tāi-lī-o͘坐位ê時，chhiàⁿ議士，阻止in，beh敗壞in ê計畫。Tùi Pho-su ông Kó͘-lia̍t ê nî-kan, kàu Pho-su ông Tāi-lī-o͘ chē-ūi ê sî, chhiàⁿ gī-sū, chó͘-chí in, beh pāi-hoāi in ê kè-e̍k.

6Tī A-hap-sûi-ló͘做王坐位ê起頭，對敵寫奏章告猶大kap耶路撒冷khiā起ê百姓。Tī A-hap-sûi-ló͘ chòe ông chē-ūi ê khí-thâu, tùi-te̍k siá chàu-chiuⁿ kò Iû-tāi kap Iâ-lō͘-sat-léng khiā-khí ê peh-sìⁿ.

7Koh tī A-ta̍t-siat-se ê年間，Pí-si-lân、Bí-te̍k-lī-ta̍t、Tha-pia̍t，kap in ê黨，上表奏波斯王A-ta̍t-siat-se；chit-ê表是用A-lân ê文字寫ê，翻譯A-lân ê腔口。Koh tī A-ta̍t-siat-se ê nî-kan, Pí-si-lân, Bí-te̍k-lī-ta̍t, Tha-pia̍t, kap in ê tóng, chiūⁿ pió chàu Pho-su ông A-ta̍t-siat-se; chit ê pió sī ēng A-lân ê bûn-jī siá ê, hoan-e̍k A-lân ê khiuⁿ-kháu.

8總督Lī-hông，書記Sin-sòe，beh告耶路撒冷人，也上表奏A-ta̍t-siat-se王；hit-ê表親像án-ni。Chóng-tok Lī-hông, su-kì Sin-sòe, beh kò Iâ-lō͘-sat-léng lâng, iā chiūⁿ-pió chàu A-ta̍t-siat-se ông; hit ê pió chhin-chhiūⁿ án-ni.

9總督Lī-hông，書記Sin-sòe，kap其餘ê同伴，Tí-ná人、A-hoat-sat-thê-ka人、Tha-pì-la̍h人、A-hoat-sat人、A-ki-ōe人、巴比倫人、Su-san-ka人、Tí-hâi人、Í-lân人、Chóng-tok Lī-hông, su-kì Sin-sòe, kap kî-û ê tâng-phōaⁿ, Tí-ná lâng, A-hoat-sat-thê-ka lâng, Tha-pì-la̍h lâng, A-hoat-sat lâng, A-ki-ōe lâng, Pa-pí-lûn lâng, Su-san-ka lâng, Tí-hâi lâng, Í-lân lâng,

10kap大尊貴ê O-su-ná-pa所遷徙其餘ê百姓安置tī撒馬利亞ê城，kap大河外其餘ê百姓，lóng寫；云云。kap tōa chun-kùi ê O-su-ná-pa só͘ chhian-sóa kî-û ê peh-sìⁿ an-tì tī Sat-má-lī-a ê siâⁿ, kap Tōa-hô-gōa kî-û ê peh-sìⁿ, lóng siá; ûn-ûn.

11Hit-ê奏A-ta̍t-siat-se王表章ê抄稿記tī下面：你ê奴僕河外chiah-ê人，云云。Hit ê chàu A-ta̍t-siat-se ông pió-chiuⁿ ê chhau-kó kì tī ē-bīn: Lí ê lô͘-po̍k Hô-gōa chiah ê lâng, ûn-ûn.

12王tio̍h知tùi你hia來到阮chia ê猶大人，已經到耶路撒冷，koh起chit-ê反叛koh pháiⁿ ê城，已經起城牆，hē地基。Ông tio̍h chai tùi lí hia lâi kàu goán chia ê Iû-tāi lâng, í-keng kàu Iâ-lō͘-sat-léng, koh khí chit ê hoán-poān koh pháiⁿ ê siâⁿ, í-keng khí siâⁿ-chhiûⁿ, hē tōe-ki.

13Taⁿ王tio̍h知，in若起chit-ê城，城牆起好，就進貢，捐稅、錢糧，in lóng m̄納；到尾王beh受損失。Taⁿ ông tio̍h chai, in nā khí chit ê siâⁿ, siâⁿ-chhiûⁿ khí hó, chiū chìn-kòng, koan-sè, chîⁿ-niû, in lóng m̄-la̍p; kàu-bé ông beh siū sún-sit.

14因為阮食王宮ê鹽，m̄應該看王受虧損，所以上表奏王。In-ūi goán chia̍h ông-kiong ê iâm, m̄ eng-kai khòaⁿ ông siū khui-sún, só͘-í chiūⁿ-pió chàu ông.

15請查考列祖ê記錄，tī記錄能chhē-tio̍h，就知一個城是反叛ê城，做列王kap ta̍k省ê害；tùi早以來，hit中間常常有反叛ê事；chit-ê城受毀壞就是tùi chit-ê緣故。Chhiáⁿ chhâ-khó lia̍t-chó͘ ê kì-lio̍k, tī kì-lio̍k ōe chhē-tio̍h, chiū chai chi̍t ê siâⁿ sī hoán-poān ê siâⁿ, chòe lia̍t-ông kap ta̍k-séng ê hāi; tùi chá í-lâi, hit tiong-kan siông-siông ū hoán-poān ê sū; chit ê siâⁿ siū húi-hoāi chiū-sī tùi chit ê iân-kò͘.

16阮謹慎奏王知，chit-ê城若koh起造，城牆起好，Tùi án-ni，河外ê地你就無份。Goán kín-sīn chàu ông chai, chit ê siâⁿ nā koh khí-chō, siâⁿ-chhiûⁿ khí-hó, tùi án-ni Hô-gōa ê tōe lí chiū bô hūn.

17Hit時王就出諭旨hō͘總督Lī-hông，書記Sin-sòe，kap in其餘ê同伴，就是khiā起tī撒馬利亞，kap河外其餘ê人，講，願lín平安，云云。Hit-sî ông chiū chhut jū-chí hō͘ chóng-tok Lī-hông, su-kì Sin-sòe, kap in kî-û ê tâng-phōaⁿ, chiū-sī khiā-khí tī Sat-má-lī-a, kap Hô-gōa kî-û ê lâng, kóng, Goān lín pêng-an, ûn-ûn.

18Lín所上hō͘阮ê表，已經明明讀tī我ê面前。Lín só͘ chiūⁿ hō͘ goán ê pió, í-keng bêng-bêng tha̍k tī góa ê bīn-chêng.

19我已經出命令，查考了就知chit-ê城tùi早以來真正背叛列王，其中常常有謀反悖逆ê事。Góa í-keng chhut bēng-lēng, chhâ-khó-liáu chiū chai chit ê siâⁿ tùi chá í-lâi chin-chiàⁿ pōe-poān lia̍t-ông, kî-tiong siông-siông ū bô͘-hoán pōe-ge̍k ê sū.

20從前耶路撒冷歷來有大君王統轄河外全地；進貢、捐稅、錢糧 lóng納hō͘ in。Chiông-chêng Iâ-lō͘-sat-léng le̍k-lâi ū tōa kun-ông thóng-hat Hô-gōa choân-tōe; chìn-kòng, koan-sè, chîⁿ-niû lóng la̍p hō͘ in.

21Taⁿ lín tio̍h發命令hō͘ hiah-ê人停工，無起chit-ê城，thèng候我降旨，Taⁿ lín tio̍h hoat bēng-lēng hō͘ hiah ê lâng thêng-kang, bô khí chit ê siâⁿ, thèng-hāu góa kàng-chí,

22lín tio̍h謹慎，m̄-thang 延chhiân；啥事容允chit-ê害khah重，致到列王受虧損ah？lín tio̍h kín-sīn, m̄-thang iân-chhiân; siáⁿ-sū iông-ún chit ê hāi khah-tāng, tì-kàu lia̍t-ông siū khui-sún ah?

23A-ta̍t-siat-se王ê上諭讀tī Lī-hông，kap書記Sin-sòe，kap in ê同伴ê面前，in就趕緊去耶路撒冷見猶大人，用勢力強迫in停工。A-ta̍t-siat-se ông ê siōng-jū tha̍k tī Lī-hông, kap su-kì Sin-sòe, kap in ê tâng-phōaⁿ ê bīn-chêng, in chiū kóaⁿ-kín khì Iâ-lō͘-sat-léng kìⁿ Iû-tāi lâng, ēng sè-le̍k kiông-pek in thêng-kang.

24Tùi án-ni，耶路撒冷上帝殿ê工程就停止。停到波斯王Tāi-lī-o͘坐位ê第二年。Tùi án-ni Iâ-lō͘-sat-léng Siōng-tè tiān ê kang-tiâⁿ chiū thêng-chí. Thêng kàu Pho-su ông Tāi-lī-o͘ chē-ūi ê tē-jī nî.

1Hit時有先知人，就是先知Hap-kai，kap E̍k-to ê孫撒迦利亞，奉以色列上帝ê名，對猶大kap耶路撒冷ê猶大人傳先知ê話hō͘ in。Hit-sî ū sian-ti lâng, chiū-sī sian-ti Hap-kai, kap E̍k-to ê sun Sat-ka-lī-a, hōng Í-sek-lia̍t Siōng-tè ê miâ, tùi Iû-tāi kap Iâ-lō͘-sat-léng ê Iû-tāi lâng thoân sian-ti ê ōe hō͘ in.

2Tùi án-ni，Sat-la̍h-thiat ê kiáⁿ Só͘-lô-pa-pek，kap Iok-sat-tap ê kiáⁿ Iâ-su-a，lóng起來動工起造上帝ê殿tī耶路撒冷；有上帝ê先知kap in tī-hia，幫贊in。Tùi án-ni Sat-la̍h-thiat ê kiáⁿ Só͘-lô-pa-pek, kap Iok-sat-tap ê kiáⁿ Iâ-su-a, lóng khí-lâi tāng-kang khí-chō Siōng-tè ê tiān tī Iâ-lō͘-sat-léng; ū Siōng-tè ê sian-ti kap in tī-hia, pang-chān in.

3當時河外ê總督Ta̍t-nái，kap Sī-tha-pho-su-nái，kap in ê同伴，來問講，Chī-chūi出令 hō͘ lín起chit-ê殿，chhiâⁿ chit-ê牆ah？Tng-sî Hô-gōa ê chóng-tok Ta̍t-nái, kap Sī-tha-pho-su-nái, kap in ê tâng-phōaⁿ, lâi mn̄g kóng, Chī-chūi chhut lēng hō͘ lín khí chit ê tiān, chhiâⁿ chit ê chhiûⁿ ah?

4阮就án-ni kā in講，起chit間殿ê人叫甚麼名？Goán chiū án-ni kā in kóng, Khí chit keng tiān ê lâng kiò sím-mi̍h miâ?

5上帝ê目睭看顧猶大ê長老，hiah-ê人無hō͘ in停工，thèng候chit-ê tāi-chì到Tāi-lī-o͘，得tio̍h文書來回覆chit-ê事。Siōng-tè ê ba̍k-chiu khòaⁿ-kò͘ Iû-tāi ê tiúⁿ-ló, hiah ê lâng bô hō͘ in thêng-kang, thèng-hāu chit ê tāi-chì kàu Tāi-lī-o͘, tit-tio̍h bûn-su lâi hê-hok chit ê sū.

6河外ê總督Ta̍t-nái，kap Sī-tha-pho-su-nái，kap伊ê同伴，就是tiàm-tī河外ê A-hoat-sat-ka人，奏Tāi-lī-o͘王ê 表章記tī下底。Hô-gōa ê chóng-tok Ta̍t-nái, kap Sī-tha-pho-su-nái, kap i ê tâng-phōaⁿ, chiū-sī tiàm-tī Hô-gōa ê A-hoat-sat-ka lâng, chàu Tāi-lī-o͘ ông ê pió-chiuⁿ kì tī ē-tóe.

7In奏王ê 表章內有講，願Tāi-lī-o͘王萬事平安。In chàu ông ê pió-chiuⁿ-lāi ū kóng, Goān Tāi-lī-o͘ ông bān-sū pêng-an.

8王tio̍h知，阮去猶大省，到至大上帝ê殿，chit-ê殿是用大塊石起造ê，楹á插入牆內，做工真緊，in ê所做興通。Ông tio̍h chai, goán khì Iû-tāi séng, kàu chì-tōa Siōng-tè ê tiān, chit ê tiān sī ēng tōa tè chio̍h khí-chō--ê, îⁿ-á chhah-ji̍p chhiûⁿ-lāi, chòe-kang chin-kín, in ê só͘ chòe heng-thong.

9Hit時阮問hiah-ê長老，kā in講，Chī-chūi出令hō͘ lín起chit-ê殿，chhiâⁿ chit-ê牆ah？Hit-sî goán mn̄g hiah ê tiúⁿ-ló, kā in kóng, Chī-chūi chhut-lēng hō͘ lín khí chit ê tiān, chhiâⁿ chit ê chhiûⁿ ah?

10Koh問in ê名，beh記in ê首領ê名，thang奏hō͘王知。Koh mn̄g in ê miâ, beh kì in ê siú-léng ê miâ, thang chàu hō͘ ông chai.

11In án-ni 應阮講，阮是天地ê上帝ê奴僕，koh再起chōe-chōe年前所起ê殿，就是以色列ê一位大君王所起所chhiâⁿ ê。In án-ni ìn goán kóng, Goán sī thiⁿ tōe ê Siōng-tè ê lô͘-po̍k, koh-chài khí chōe-chōe nî chêng só͘ khí ê tiān, chiū-sī Í-sek-lia̍t ê chi̍t-ūi tōa kun-ông só͘ khí só͘ chhiâⁿ ê.

12獨獨因為阮ê列祖惹天頂ê上帝ê受氣，伊將in交tī Ka-le̍k-tí人，巴比倫王Nî-pò͘-kah-nî-sat ê手；王就拆毀chit間殿，掠百姓到巴比倫。To̍k-to̍k in-ūi goán ê lia̍t-chó͘ jiá thiⁿ-téng ê Siōng-tè ê siū-khì, I chiong in kau tī Ka-le̍k-tí lâng, Pa-pí-lûn ông Nî-pò͘-kah-nî-sat ê chhiú; ông chiū thiah-húi chit keng tiān, lia̍h peh-sìⁿ kàu Pa-pí-lûn.

13當巴比倫王Kó͘-lia̍t元年，Kó͘-lia̍t王出令tio̍h起chit間上帝ê殿。Tng Pa-pí-lûn ông Kó͘-lia̍t goân--nî, Kó͘-lia̍t ông chhut-lēng tio̍h khí chit keng Siōng-tè ê tiān.

14上帝殿內金銀ê器具，就是Nî-pò͘-kah-nî-sat tùi耶路撒冷ê殿內the̍h出來，帶去hē tī巴比倫ê廟ê，Kó͘-lia̍t王tùi巴比倫ê廟內the̍h出來交hō͘伊所設立ê總督，名叫Siat-pa-sat；Siōng-tè tiān-lāi kim gûn ê khì-kū, chiū-sī Nî-pò͘-kah-nî-sat tùi Iâ-lō͘-sat-léng ê tiān-lāi the̍h-chhut--lâi, tòa khì hē tī Pa-pí-lûn ê biō--ê, Kó͘-lia̍t ông tùi Pa-pí-lûn ê biō-lāi the̍h-chhut-lâi kau-hō͘ i só͘ siat-li̍p ê chóng-tok, miâ kiò Siat-pa-sat;

15kā伊講，Tio̍h帶chiah-ê器具去hē tī耶路撒冷ê殿，也tio̍h起上帝ê殿tī伊ê原位。kā i kóng, Tio̍h tòa chiah ê khì-kū khì hē tī Iâ-lō͘-sat-léng ê tiān, iā tio̍h khí Siōng-tè ê tiān tī i ê goân-ūi.

16Tùi án-ni，chit-ê Siat-pa-sat來hē耶路撒冷上帝殿ê地基；chit間殿tùi hit時到taⁿ起iáu未好。Tùi án-ni chit ê Siat-pa-sat lâi hē Iâ-lō͘-sat-léng Siōng-tè tiān ê tōe-ki; chit keng tiān tùi hit-sî kàu taⁿ khí iáu-bē hó.

17Taⁿ王若掠做好，請查考王tī巴比倫ê國庫，看Kó͘-lia̍t王果然有降詔tī耶路撒冷起上帝chit間殿á無。請王tī chit-ê事降旨來指示阮。Taⁿ ông nā lia̍h-chòe hó, chhiáⁿ chhâ-khó ông tī Pa-pí-lûn ê kok-khò͘, khòaⁿ Kó͘-lia̍t ông kó-jiân ū kàng-chiàu tī Iâ-lō͘-sat-léng khí Siōng-tè chit keng tiān á-bô. Chhiáⁿ ông tī chit ê sū kàng-chí lâi chí-sī goán.

1Tùi án-ni，Tāi-lī-o͘王出令，人就去chhē典冊ê府庫，就是tī巴比倫khǹg寶物ê所在。Tùi án-ni Tāi-lī-o͘ ông chhut-lēng, lâng chiū khì chhē tián-chheh ê hú-khò͘, chiū-sī tī Pa-pí-lûn khǹg pó-mi̍h ê só͘-chāi.

2Tī A-má-tha，馬大省 ê宮內，chhē-tio̍h一本，hit內面記載講，Tī A-má-tha, Má-tāi séng ê kiong-lāi, chhē-tio̍h chi̍t-pún, hí(**hit) lāi-bīn kì-chài kóng,

3Kó͘-lia̍t王元年，Kó͘-lia̍t王出令，論tī耶路撒冷上帝ê殿，講，Tio̍h起chit間殿做獻祭ê所在，hē伊ê地基堅固，殿高六十肘，闊六十肘；Kó͘-lia̍t ông goân--nî, Kó͘-lia̍t ông chhut-lēng, lūn tī Iâ-lō͘-sat-léng Siōng-tè ê tiān, kóng, Tio̍h khí chit keng tiān chòe hiàn-chè ê só͘-chāi, hē i ê tōe-ki kian-kò͘, tiān koâiⁿ la̍k-cha̍p tiú, khoah la̍k-cha̍p tiú;

4用大石三ûn，新ê柴一ûn；經費tio̍h開王家ê。ēng tōa-chio̍h saⁿ-ûn, sin ê chhâ chi̍t-ûn; keng-hùi tio̍h khai ông-ke ê.

5Koh上帝殿內金銀ê器具，就是Nî-pò͘-kah-nî-sat tùi耶路撒冷ê殿內the̍h出來帶去巴比倫ê，tio̍h koh還伊，帶到耶路撒冷ê殿；各照原位hē tī上帝ê殿。Koh Siōng-tè tiān-lāi kim gûn ê khì-kū, chiū-sī Nî-pò͘-kah-nî-sat tùi Iâ-lō͘-sat-léng ê tiān-lāi the̍h-chhut--lâi tòa khì Pa-pí-lûn ê, tio̍h koh hêng i, tòa kàu Iâ-lō͘-sat-léng ê tiān; kok chiàu goân-ūi hē tī Siōng-tè ê tiān.

6Taⁿ tī河外ê總督Ta̍t-nái，kap Sī-tha-pho-su-nái kap lín ê同伴，就是tiàm-tī河外ê A-hoat-sat-ka人，lín tio̍h離開in；Taⁿ tī Hô-gōa ê chóng-tok Ta̍t-nái, kap Sī-tha-pho-su-nái kap lín ê tâng-phōaⁿ, chiū-sī tiàm-tī Hô-gōa ê A-hoat-sat-ka lâng, lín tio̍h lī-khui in;

7m̄-thang阻止起上帝殿ê工，chhut-chāi猶大ê總督，kap猶大ê長老，tī原位起上帝chit間殿。m̄-thang chó͘-chí khí Siōng-tè tiān ê kang, chhut-chāi Iû-tāi ê chóng-tok, kap Iû-tāi ê tiúⁿ-ló, tī goân-ūi khí Siōng-tè chit keng tiān.

8我koh降旨lín tio̍h怎樣行tī猶大ê長老，幫贊in起chit間上帝ê殿，就是tio̍h tùi河外ê餉稅中抽出王ê銀項，緊hō͘ hiah-ê人做經費，免得耽擱。Góa koh kàng-chí lín tio̍h cháiⁿ-iūⁿ kiâⁿ tī Iû-tāi ê tiúⁿ-ló, pang-chān in khí chit-keng Siōng-tè ê tiān, chiū-sī tio̍h tùi Hô-gōa ê hiòng-sè-tiong thiu-chhut ông ê gûn-hāng, kín hō͘ hiah ê lâng chòe keng-hùi, bián-tit tam-koh.

9In所tio̍h用ê牛káng-á、綿羊káng、綿羊á，做燒祭獻hō͘天頂ê上帝，以及小麥、鹽、酒、油，lóng照耶路撒冷ê祭司所講ê，ta̍k日hō͘伊，m̄-thang失誤；In só͘ tio̍h ēng ê gû-káng-á, mî-iûⁿ-káng, mî-iûⁿ-á, chòe sio-chè hiàn-hō͘ thiⁿ-téng ê Siōng-tè, í-ki̍p sió-be̍h, iâm, chiú, iû, lóng chiàu Iâ-lō͘-sat-léng ê chè-si só͘ kóng ê, ta̍k-ji̍t hō͘ i, m̄-thang sit-gō͘;

10thang hō͘ in獻芳芳ê祭祀hō͘天頂ê上帝；koh為王kap王hiah-ê kiáⁿ ê活命來祈禱。thang hō͘ in hiàn phang-phang ê chè-sū hō͘ thiⁿ-téng ê Siōng-tè; koh ūi ông kap ông hiah ê kiáⁿ ê oa̍h-miā lâi kî-tó.

11我koh降旨，若有人改換chit-ê命令，就beh tùi對伊ê厝拆一支楹á，來舉起hit人吊伊tī hit頂面，hō͘伊ê厝為tio̍h án-ni做廁池。Góa koh kàng-chí, nā ū lâng kóe-ōaⁿ chit ê bēng-lēng, chiū beh tùi i ê chhù thiah chi̍t-ki îⁿ-á, lâi kú-khí hit-lâng tiàu i tī hit téng-bīn, hō͘ i ê chhù ūi-tio̍h án-ni chòe chhè-tî.

12若有王kap百姓起手改換chit-ê命令，毀壞tī耶路撒冷chit間上帝ê殿，願安置伊ê名tī-hia ê上帝滅無in。我Tāi-lī-o͘出chit-ê命令，tio̍h緊緊行伊。Nā ū ông kap peh-sìⁿ khí-chhiú kóe-ōaⁿ chit ê bēng-lēng, húi-hoāi tī Iâ-lō͘-sat-léng chit keng Siōng-tè ê tiān, goān an-tì I ê miâ tī-hia ê Siōng-tè bia̍t-bô in. Góa Tāi-lī-o͘ chhut chit ê bēng-lēng, tio̍h kín-kín kiâⁿ i.

13Tùi án-ni，河外ê總督Ta̍t-nái，kap Sī-tha-pho-su-nái，kap in ê同伴，因為Tāi-lī-o͘王所出ê令，就緊緊行伊。Tùi án-ni Hô-gōa ê chóng-tok Ta̍t-nái, kap Sī-tha-pho-su-nái, kap in ê tâng-phōaⁿ, in-ūi Tāi-lī-o͘ ông só͘ chhut ê lēng, chiū kín-kín kiâⁿ i.

14猶大ê長老因為先知Hap-kai kap E̍k-to ê孫撒迦利亞ê先知話，就起造來興通。In遵thàn以色列上帝ê命令，kap Kó͘-lia̍t、Tāi-lī-o͘，kap波斯王A-ta̍t-siat-se ê上諭，起造完工。Iû-tāi ê tiúⁿ-ló in-ūi sian-ti Hap-kai kap E̍k-to ê sun Sat-ka-lī-a ê sian-ti ōe, chiū khí-chō lâi heng-thong. In chun-thàn Í-sek-lia̍t Siōng-tè ê bēng-lēng, kap Kó͘-lia̍t, Tāi-lī-o͘, kap Pho-su ông A-ta̍t-siat-se ê siōng-jū, khí-chō oân-kang.

15當 Tāi-lī-o͘王坐位第六年，A-ta̍t月初三日，chit-ê殿就起好。Tng Tāi-lī-o͘ ông chē-ūi tē-la̍k nî, A-ta̍t ge̍h chhoe-saⁿ ji̍t, chit ê tiān chiū khí hó.

16以色列人，祭司，kap利未人，kap其餘受掠tò來ê人，lóng歡歡喜喜行奉獻上帝殿ê禮。Í-sek-lia̍t lâng, chè-si, kap Lī-bī lâng, kap kî-û siū-lia̍h tò-lâi ê lâng, lóng hoaⁿ-hoaⁿ hí-hí kiâⁿ hōng-hiàn Siōng-tè tiān ê lé.

17行奉獻上帝殿ê禮，就獻牛káng一百隻，綿羊káng兩百隻，綿羊á四百隻。Koh照以色列支派ê數額，獻山羊káng十二隻；為以色列眾人做贖罪祭。Kiâⁿ hōng-hiàn Siōng-tè tiān ê lé, chiū hiàn gû-káng chi̍t-pah chiah, mî-iûⁿ-káng nn̄g-pah chiah, mî-iûⁿ-á sì-pah chiah. Koh chiàu Í-sek-lia̍t chi-phài ê siàu-gia̍h, hiàn soaⁿ-iûⁿ-káng cha̍p-jī chiah; ūi Í-sek-lia̍t chèng-lâng chòe sio̍k-chōe-chè.

18就派祭司照伊ê班列，利未人照伊ê次序，服事tiàm tī耶路撒冷ê上帝，是照摩西ê冊所記ê。Chiū phài chè-si chiàu i ê pan-lia̍t, Lī-bī lâng chiàu i ê chhù-sū, ho̍k-sāi tiàm tī Iâ-lō͘-sat-léng ê Siōng-tè, sī chiàu Mô͘-se ê chheh só͘ kì ê.

19正月十四日，受掠tò來ê百姓守pôaⁿ過節。Chiaⁿ-ge̍h cha̍p-sì ji̍t, siū-lia̍h tò-lâi ê peh-sìⁿ siú pôaⁿ-kè-choeh.

20祭司kap利未人相同清氣家己；in lóng清氣；koh為tio̍h受掠tò來ê人，kap in ê兄弟hiah-ê祭司，也為家己thâi pôaⁿ過節ê羊á。Chè-si kap Lī-bī lâng saⁿ-tâng chheng-khì ka-kī; in lóng chheng-khì; koh ūi-tio̍h siū-lia̍h tò-lâi ê lâng, kap in ê hiaⁿ-tī hiah ê chè-si, iā ūi ka-kī thâi pôaⁿ-kè-choeh ê iûⁿ-á.

21Tùi受掠tò來ê以色列人，kap家己分別離開chit所在外邦人ê污穢，來歸óa in，來chhē耶和華以色列ê上帝ê，lóng食伊；Tùi siū-lia̍h tò-lâi ê Í-sek-lia̍t lâng, kap ka-kī hun-piat lī-khui chit só͘-chāi gōa-pang lâng ê ù-òe, lâi kui-óa in, lâi chhē Iâ-hô-hoa Í-sek-lia̍t ê Siōng-tè ê, lóng chia̍h i;

22歡歡喜喜守除酵節七日久；因為耶和華hō͘ in歡喜，koh hō͘亞述王ê心oa̍t-tńg ǹg in，來堅固in ê手，做上帝殿ê工，就是以色列ê上帝。hoaⁿ-hoaⁿ hí-hí siú tû-kàⁿ-choeh chhit-ji̍t kú; in-ūi Iâ-hô-hoa hō͘ in hoaⁿ-hí, koh hō͘ A-su̍t ông ê sim oa̍t-tńg ǹg in, lâi kian-kò͘ in ê chhiú, chòe Siōng-tè tiān ê kang, chiū-sī Í-sek-lia̍t ê Siōng-tè.