1Tùi án-ni，Tāi-lī-o͘王出令，人就去chhē典冊ê府庫，就是tī巴比倫khǹg寶物ê所在。Tùi án-ni Tāi-lī-o͘ ông chhut-lēng, lâng chiū khì chhē tián-chheh ê hú-khò͘, chiū-sī tī Pa-pí-lûn khǹg pó-mi̍h ê só͘-chāi.

2Tī A-má-tha，馬大省 ê宮內，chhē-tio̍h一本，hit內面記載講，Tī A-má-tha, Má-tāi séng ê kiong-lāi, chhē-tio̍h chi̍t-pún, hí(**hit) lāi-bīn kì-chài kóng,

3Kó͘-lia̍t王元年，Kó͘-lia̍t王出令，論tī耶路撒冷上帝ê殿，講，Tio̍h起chit間殿做獻祭ê所在，hē伊ê地基堅固，殿高六十肘，闊六十肘；Kó͘-lia̍t ông goân--nî, Kó͘-lia̍t ông chhut-lēng, lūn tī Iâ-lō͘-sat-léng Siōng-tè ê tiān, kóng, Tio̍h khí chit keng tiān chòe hiàn-chè ê só͘-chāi, hē i ê tōe-ki kian-kò͘, tiān koâiⁿ la̍k-cha̍p tiú, khoah la̍k-cha̍p tiú;

4用大石三ûn，新ê柴一ûn；經費tio̍h開王家ê。ēng tōa-chio̍h saⁿ-ûn, sin ê chhâ chi̍t-ûn; keng-hùi tio̍h khai ông-ke ê.

5Koh上帝殿內金銀ê器具，就是Nî-pò͘-kah-nî-sat tùi耶路撒冷ê殿內the̍h出來帶去巴比倫ê，tio̍h koh還伊，帶到耶路撒冷ê殿；各照原位hē tī上帝ê殿。Koh Siōng-tè tiān-lāi kim gûn ê khì-kū, chiū-sī Nî-pò͘-kah-nî-sat tùi Iâ-lō͘-sat-léng ê tiān-lāi the̍h-chhut--lâi tòa khì Pa-pí-lûn ê, tio̍h koh hêng i, tòa kàu Iâ-lō͘-sat-léng ê tiān; kok chiàu goân-ūi hē tī Siōng-tè ê tiān.

6Taⁿ tī河外ê總督Ta̍t-nái，kap Sī-tha-pho-su-nái kap lín ê同伴，就是tiàm-tī河外ê A-hoat-sat-ka人，lín tio̍h離開in；Taⁿ tī Hô-gōa ê chóng-tok Ta̍t-nái, kap Sī-tha-pho-su-nái kap lín ê tâng-phōaⁿ, chiū-sī tiàm-tī Hô-gōa ê A-hoat-sat-ka lâng, lín tio̍h lī-khui in;

7m̄-thang阻止起上帝殿ê工，chhut-chāi猶大ê總督，kap猶大ê長老，tī原位起上帝chit間殿。m̄-thang chó͘-chí khí Siōng-tè tiān ê kang, chhut-chāi Iû-tāi ê chóng-tok, kap Iû-tāi ê tiúⁿ-ló, tī goân-ūi khí Siōng-tè chit keng tiān.

8我koh降旨lín tio̍h怎樣行tī猶大ê長老，幫贊in起chit間上帝ê殿，就是tio̍h tùi河外ê餉稅中抽出王ê銀項，緊hō͘ hiah-ê人做經費，免得耽擱。Góa koh kàng-chí lín tio̍h cháiⁿ-iūⁿ kiâⁿ tī Iû-tāi ê tiúⁿ-ló, pang-chān in khí chit-keng Siōng-tè ê tiān, chiū-sī tio̍h tùi Hô-gōa ê hiòng-sè-tiong thiu-chhut ông ê gûn-hāng, kín hō͘ hiah ê lâng chòe keng-hùi, bián-tit tam-koh.

9In所tio̍h用ê牛káng-á、綿羊káng、綿羊á，做燒祭獻hō͘天頂ê上帝，以及小麥、鹽、酒、油，lóng照耶路撒冷ê祭司所講ê，ta̍k日hō͘伊，m̄-thang失誤；In só͘ tio̍h ēng ê gû-káng-á, mî-iûⁿ-káng, mî-iûⁿ-á, chòe sio-chè hiàn-hō͘ thiⁿ-téng ê Siōng-tè, í-ki̍p sió-be̍h, iâm, chiú, iû, lóng chiàu Iâ-lō͘-sat-léng ê chè-si só͘ kóng ê, ta̍k-ji̍t hō͘ i, m̄-thang sit-gō͘;

10thang hō͘ in獻芳芳ê祭祀hō͘天頂ê上帝；koh為王kap王hiah-ê kiáⁿ ê活命來祈禱。thang hō͘ in hiàn phang-phang ê chè-sū hō͘ thiⁿ-téng ê Siōng-tè; koh ūi ông kap ông hiah ê kiáⁿ ê oa̍h-miā lâi kî-tó.

11我koh降旨，若有人改換chit-ê命令，就beh tùi對伊ê厝拆一支楹á，來舉起hit人吊伊tī hit頂面，hō͘伊ê厝為tio̍h án-ni做廁池。Góa koh kàng-chí, nā ū lâng kóe-ōaⁿ chit ê bēng-lēng, chiū beh tùi i ê chhù thiah chi̍t-ki îⁿ-á, lâi kú-khí hit-lâng tiàu i tī hit téng-bīn, hō͘ i ê chhù ūi-tio̍h án-ni chòe chhè-tî.

12若有王kap百姓起手改換chit-ê命令，毀壞tī耶路撒冷chit間上帝ê殿，願安置伊ê名tī-hia ê上帝滅無in。我Tāi-lī-o͘出chit-ê命令，tio̍h緊緊行伊。Nā ū ông kap peh-sìⁿ khí-chhiú kóe-ōaⁿ chit ê bēng-lēng, húi-hoāi tī Iâ-lō͘-sat-léng chit keng Siōng-tè ê tiān, goān an-tì I ê miâ tī-hia ê Siōng-tè bia̍t-bô in. Góa Tāi-lī-o͘ chhut chit ê bēng-lēng, tio̍h kín-kín kiâⁿ i.

13Tùi án-ni，河外ê總督Ta̍t-nái，kap Sī-tha-pho-su-nái，kap in ê同伴，因為Tāi-lī-o͘王所出ê令，就緊緊行伊。Tùi án-ni Hô-gōa ê chóng-tok Ta̍t-nái, kap Sī-tha-pho-su-nái, kap in ê tâng-phōaⁿ, in-ūi Tāi-lī-o͘ ông só͘ chhut ê lēng, chiū kín-kín kiâⁿ i.

14猶大ê長老因為先知Hap-kai kap E̍k-to ê孫撒迦利亞ê先知話，就起造來興通。In遵thàn以色列上帝ê命令，kap Kó͘-lia̍t、Tāi-lī-o͘，kap波斯王A-ta̍t-siat-se ê上諭，起造完工。Iû-tāi ê tiúⁿ-ló in-ūi sian-ti Hap-kai kap E̍k-to ê sun Sat-ka-lī-a ê sian-ti ōe, chiū khí-chō lâi heng-thong. In chun-thàn Í-sek-lia̍t Siōng-tè ê bēng-lēng, kap Kó͘-lia̍t, Tāi-lī-o͘, kap Pho-su ông A-ta̍t-siat-se ê siōng-jū, khí-chō oân-kang.

15當 Tāi-lī-o͘王坐位第六年，A-ta̍t月初三日，chit-ê殿就起好。Tng Tāi-lī-o͘ ông chē-ūi tē-la̍k nî, A-ta̍t ge̍h chhoe-saⁿ ji̍t, chit ê tiān chiū khí hó.

16以色列人，祭司，kap利未人，kap其餘受掠tò來ê人，lóng歡歡喜喜行奉獻上帝殿ê禮。Í-sek-lia̍t lâng, chè-si, kap Lī-bī lâng, kap kî-û siū-lia̍h tò-lâi ê lâng, lóng hoaⁿ-hoaⁿ hí-hí kiâⁿ hōng-hiàn Siōng-tè tiān ê lé.

17行奉獻上帝殿ê禮，就獻牛káng一百隻，綿羊káng兩百隻，綿羊á四百隻。Koh照以色列支派ê數額，獻山羊káng十二隻；為以色列眾人做贖罪祭。Kiâⁿ hōng-hiàn Siōng-tè tiān ê lé, chiū hiàn gû-káng chi̍t-pah chiah, mî-iûⁿ-káng nn̄g-pah chiah, mî-iûⁿ-á sì-pah chiah. Koh chiàu Í-sek-lia̍t chi-phài ê siàu-gia̍h, hiàn soaⁿ-iûⁿ-káng cha̍p-jī chiah; ūi Í-sek-lia̍t chèng-lâng chòe sio̍k-chōe-chè.

18就派祭司照伊ê班列，利未人照伊ê次序，服事tiàm tī耶路撒冷ê上帝，是照摩西ê冊所記ê。Chiū phài chè-si chiàu i ê pan-lia̍t, Lī-bī lâng chiàu i ê chhù-sū, ho̍k-sāi tiàm tī Iâ-lō͘-sat-léng ê Siōng-tè, sī chiàu Mô͘-se ê chheh só͘ kì ê.

19正月十四日，受掠tò來ê百姓守pôaⁿ過節。Chiaⁿ-ge̍h cha̍p-sì ji̍t, siū-lia̍h tò-lâi ê peh-sìⁿ siú pôaⁿ-kè-choeh.

20祭司kap利未人相同清氣家己；in lóng清氣；koh為tio̍h受掠tò來ê人，kap in ê兄弟hiah-ê祭司，也為家己thâi pôaⁿ過節ê羊á。Chè-si kap Lī-bī lâng saⁿ-tâng chheng-khì ka-kī; in lóng chheng-khì; koh ūi-tio̍h siū-lia̍h tò-lâi ê lâng, kap in ê hiaⁿ-tī hiah ê chè-si, iā ūi ka-kī thâi pôaⁿ-kè-choeh ê iûⁿ-á.

21Tùi受掠tò來ê以色列人，kap家己分別離開chit所在外邦人ê污穢，來歸óa in，來chhē耶和華以色列ê上帝ê，lóng食伊；Tùi siū-lia̍h tò-lâi ê Í-sek-lia̍t lâng, kap ka-kī hun-piat lī-khui chit só͘-chāi gōa-pang lâng ê ù-òe, lâi kui-óa in, lâi chhē Iâ-hô-hoa Í-sek-lia̍t ê Siōng-tè ê, lóng chia̍h i;

22歡歡喜喜守除酵節七日久；因為耶和華hō͘ in歡喜，koh hō͘亞述王ê心oa̍t-tńg ǹg in，來堅固in ê手，做上帝殿ê工，就是以色列ê上帝。hoaⁿ-hoaⁿ hí-hí siú tû-kàⁿ-choeh chhit-ji̍t kú; in-ūi Iâ-hô-hoa hō͘ in hoaⁿ-hí, koh hō͘ A-su̍t ông ê sim oa̍t-tńg ǹg in, lâi kian-kò͘ in ê chhiú, chòe Siōng-tè tiān ê kang, chiū-sī Í-sek-lia̍t ê Siōng-tè.

1Chiah-ê事以後，tī波斯王A-ta̍t-siat-se坐位ê時，有一個以斯拉，伊是Se-lâi-ngá ê kiáⁿ，Se-lâi-ngá是A-sat-lī-ngá ê kiáⁿ，A-sat-lī-ngá是Hi-le̍k-ka ê kiáⁿ；Chiah ê sū í-āu, tī Pho-su ông A-ta̍t-siat-se chē-ūi ê sî, ū chi̍t ê Í-su-la̍h, i sī Se-lâi-ngá ê kiáⁿ, Se-lâi-ngá sī A-sat-lī-ngá ê kiáⁿ, A-sat-lī-ngá sī Hi-le̍k-ka ê kiáⁿ;

2Hi-le̍k-ka是Sa-liong5e5 kiáⁿ，Sa-liông是Sat-tok ê kiáⁿ，Sat-tok是A-hi-tu̍t ê kiáⁿ；Hi-le̍k-ka sī Sa-liông ê kiáⁿ, Sa-liông sī Sat-tok ê kiáⁿ, Sat-tok sī A-hi-tu̍t ê kiáⁿ;

3A-hi-tu̍t是A-má-lī-ngá ê kiáⁿ，A-má-lī-ngá是A-sat-lī-ngá ê kiáⁿ，A-sat-lī-ngá是Bí-la̍h-iok ê kiáⁿ；A-hi-tu̍t sī A-má-lī-ngá ê kiáⁿ, A-má-lī-ngá sī A-sat-lī-ngá ê kiáⁿ, A-sat-lī-ngá sī Bí-la̍h-iok ê kiáⁿ;

4Bí-la̍h-iok是Se-la̍h-hi-ngá ê kiáⁿ，Se-la̍h-hi-ngá是O͘-se ê kiáⁿ，O͘-se是Pò͘-ki ê kiáⁿ；Bí-la̍h-iok sī Se-la̍h-hi-ngá ê kiáⁿ, Se-la̍h-hi-ngá sī O͘-se ê kiáⁿ, O͘-se sī Pò͘-ki ê kiáⁿ;

5Pò͘-ki是A-pí-su ê kiáⁿ，A-pí-su是Hui-nî-hap ê kiáⁿ，Hui-nî-hap是Í-lī-a-sat ê kiáⁿ，Í-lī-a-sat是祭司頭亞倫ê kiáⁿ。Pò͘-ki sī A-pí-su ê kiáⁿ, A-pí-su sī Hui-nî-hap ê kiáⁿ, Hui-nî-hap sī Í-lī-a-sat ê kiáⁿ, Í-lī-a-sat sī chè-si-thâu A-lûn ê kiáⁿ.

6Chit-ê以斯拉tùi巴比倫上來，tùi-tī耶和華以色列ê上帝賞賜摩西ê律法，伊是敏捷ê經學士。王准伊一切所求ê，是照耶和華伊ê上帝ê手幫贊伊ê。Chit ê Í-su-la̍h tùi Pa-pí-lûn chiūⁿ-lâi, tùi-tī Iâ-hô-hoa Í-sek-lia̍t ê Siōng-tè siúⁿ-sù Mô͘-se ê lu̍t-hoat i sī bín-chia̍t ê keng-ha̍k-sū. Ông chún i it-chhè só͘-kiû-ê, sī chiàu Iâ-hô-hoa i ê Siōng-tè ê chhiú pang-chān i ê.

7A-ta̍t-siat-se王第七年，以色列人，祭司、利未人、唱歌ê、顧門ê，Nî-thê-lêng，各有kúi-nā人上耶路撒冷。A-ta̍t-siat-se ông tē-chhit nî, Í-sek-lia̍t lâng, chè-si, Lī-bī lâng, chhiùⁿ-koa--ê, kò͘-mn̂g--ê, Nî-thê-lêng, kok ū kúi-nā lâng chiūⁿ Iâ-lō͘-sat-léng.

8王第七年五月，以斯拉到耶路撒冷；Ông tē-chhit nî gō͘-ge̍h, Í-su-la̍h kàu Iâ-lō͘-sat-léng;

9正月初一日，伊tùi巴比倫起身，五月初一日就到耶路撒冷，因為伊ê上帝施恩ê手幫贊伊。chiaⁿ-ge̍h chhoe-it ji̍t, i tùi Pa-pí-lûn khí-sin, gō͘-ge̍h chhoe-it ji̍t chiū kàu Iâ-lō͘-sat-léng, in-ūi i ê Siōng-tè si-un ê chhiú pang-chān i.

10因為以斯拉已經決意beh講究耶和華ê律法來行伊，koh將律例法度來教示以色列人。In-ūi Í-su-la̍h í-keng koat-ì beh káng-kiù Iâ-hô-hoa ê lu̍t-hoat lâi kiâⁿ i, koh chiong lu̍t-lē hoat-tō͘ lâi kà-sī Í-sek-lia̍t lâng.

11祭司以斯拉是經學士，是通達耶和華誡命ê話，kap伊所賞賜以色列ê律例ê經學士。A-ta̍t-siat-se王賜伊諭旨，hit-ê文記tī下底，講，Chè-si Í-su-la̍h sī keng-ha̍k-sū, sī thong-ta̍t Iâ-hô-hoa kài-bēng ê ōe, kap I só͘ siúⁿ-sù Í-sek-lia̍t ê lu̍t-lē ê keng-ha̍k-sū. A-ta̍t-siat-se ông sù i jū-chí, hit ê bûn kì tī ē-tóe, kóng,

12列王ê王A-ta̍t-siat-se寄hō͘祭司以斯拉，通達天頂上帝ê律法ê經學士，完全ê，云云。Lia̍t-ông ê ông A-ta̍t-siat-se kià hō͘ chè-si Í-su-la̍h, thong-ta̍t thiⁿ-téng Siōng-tè ê lu̍t-hoat ê keng-ha̍k-sū, oân-choân--ê, ûn-ûn.

13Tiàm tī我ê國內ê以色列人，祭司、利未人，見若甘願上去耶路撒冷ê，我降旨hō͘ in kap你去；Tiàm tī góa ê kok-lāi ê Í-sek-lia̍t lâng, chè-si, Lī-bī lâng, kìⁿ-nā kam-goān chiūⁿ-khì Iâ-lō͘-sat-léng--ê, góa kàng-chí hō͘ in kap lí khì;

14你既然是王kap伊七個謀士所差ê，照你手內上帝ê律法查察猶大kap耶路撒冷；lí kì-jiân sī ông kap i chhit ê bô͘-sū só͘ chhe ê, chiàu lí chhiú-lāi Siōng-tè ê lu̍t-hoat cha-chhat Iû-tāi kap Iâ-lō͘-sat-léng;

15koh帶王kap伊ê謀士所歡喜獻ê金銀，beh hō͘以色列ê上帝，就是tòa tī耶路撒冷ê；koh tòa ông kap i ê bô͘-sū só͘ hoaⁿ-hí hiàn ê kim-gûn, beh hō͘ Í-sek-lia̍t ê Siōng-tè, chiū-sī tòa tī Iâ-lō͘-sat-léng ê;

16也帶你tī巴比倫全省見所得tio̍h ê金銀，kap百姓祭司所歡喜獻ê禮物，就是in為tio̍h耶路撒冷in上帝ê殿所歡喜獻ê。iā tòa lí tī Pa-pí-lûn choân-séng kìⁿ só͘ tit-tio̍h ê kim-gûn, kap peh-sìⁿ chè-si só͘ hoaⁿ-hí hiàn ê lé-mi̍h, chiū-sī in ūi-tio̍h Iâ-lō͘-sat-léng in Siōng-tè ê tiān só͘ hoaⁿ-hí hiàn ê.

17所以你tio̍h致意用chiah-ê金銀買牛káng-á、綿羊káng、綿羊á，kap in ê素祭，in ê灌奠，獻tī耶路撒冷lín上帝殿ê壇。Só͘-í lí tio̍h tì-ì ēng chiah ê kim-gûn bóe gû-káng-á, mî-iûⁿ-káng, mî-iûⁿ-á, kap in ê sò͘-chè, in ê koàn-tiān, hiàn tī Iâ-lō͘-sat-léng lín Siōng-tè tiān ê tôaⁿ.

18所chhun ê金銀，你kap你ê兄弟看做好ê，就án-ni用伊，lóng tio̍h照lín上帝ê旨意。Só͘ chhun ê kim-gûn, lí kap lí ê hiaⁿ-tī khòaⁿ-chòe hó ê, chiū án-ni ēng i, lóng tio̍h chiàu lín Siōng-tè ê chí-ì.

19所交代你ê器具，做你ê上帝殿內ê路用ê，你tio̍h交tī耶路撒冷ê上帝ê面前。Só͘ kau-tài lí ê khì-kū, chòe lí ê Siōng-tè tiān-lāi ê lō͘-ēng--ê, lí tio̍h kau tī Iâ-lō͘-sat-léng ê Siōng-tè ê bīn-chêng.

20Lín上帝ê殿若iáu有欠用甚麼，你所應該tio̍h用ê，你thang tùi王ê府庫the̍h伊。Lín Siōng-tè ê tiān nā iáu ū khiàm-ēng sím-mi̍h, lí só͘ eng-kai tio̍h ēng-ê, lí thang tùi ông ê hú-khò͘ the̍h i.

21我A-ta̍t-siat-se王本身koh降詔hō͘河外一切管府庫ê官，講，通達天頂上帝ê律法ê經學士，祭司以斯拉，無論tùi lín討甚麼，lín tio̍h致意行伊；Góa A-ta̍t-siat-se ông pún-sin koh kàng-chiàu hō͘ Hô-gōa it-chhè koán hú-khò͘ ê koaⁿ, kóng, Thong-ta̍t thiⁿ-téng Siōng-tè ê lu̍t-hoat ê keng-ha̍k-sū, chè-si Í-su-la̍h, bô-lūn tùi lín thó sím-mi̍h, lín tio̍h tì-ì kiâⁿ i;

22供給伊銀到一百tha-liân-tek；麥，到一百ko-jíⁿ；酒，到一百pà-te̍k；油到一百pà-te̍k；鹽無限額。kiong-kip i gûn kàu chi̍t-pah tha-liân-tek; be̍h, kàu chi̍t-pah ko-jíⁿ; chiú, kàu chi̍t-pah pà-te̍k; iû kàu chi̍t-pah pà-te̍k; iâm bô hān-gia̍h.

23見若天頂ê上帝所命令ê，tio̍h為tio̍h天頂ê上帝ê殿chim-chiok做伊；啥事hō͘受氣臨到王，以及王ê kiáⁿ ê國ah？Kìⁿ-nā thiⁿ-téng ê Siōng-tè só͘ bēng-lēng ê, tio̍h ūi-tio̍h thiⁿ-téng ê Siōng-tè ê tiān chim-chiok chòe i; siáⁿ-sū hō͘ siū-khì lîm-kàu ông, í-ki̍p ông ê kiáⁿ ê kok ah?

24我koh命令lín，見若祭司、利未人、唱歌ê、顧門ê，kap Nî-thê-lêng，kap tī上帝ê殿做差用ê人，m̄-thang收in ê進貢、捐稅、錢糧。Góa koh bēng-lēng lín, kìⁿ-nā chè-si, Lī-bī lâng, chhiùⁿ-koa--ê, kò͘-mn̂g--ê, kap Nî-thê-lêng, kap tī Siōng-tè ê tiān chòe chhe-ēng ê lâng, m̄-thang siu in ê chìn-kòng, koan-sè, chîⁿ-niû.

25以斯拉ah，照你ê上帝賞賜你ê智慧，設立士師、審判官，治理河外ê百姓，就是一切bat你ê上帝律法ê；hiah-ê bē-bat-ê，lín tio̍h教示伊。Í-su-la̍h ah, chiàu lí ê Siōng-tè siúⁿ-sù lí ê tì-hūi, siat-li̍p sū-su, sím-phòaⁿ-koaⁿ, tī-lí Hô-gōa ê peh-sìⁿ, chiū-sī it-chhè bat lí ê Siōng-tè lu̍t-hoat ê; hiah-ê bē-bat--ê, lín tio̍h kà-sī i.

26見若無beh thàn你ê上帝ê律法，kap王ê律法，就tio̍h小心定伊ê罪，或是hō͘伊死，或是充軍，或是抄家，或是關監。Kìⁿ-nā bô beh thàn lí ê Siōng-tè ê lu̍t-hoat, kap ông ê lu̍t-hoat, chiū tio̍h sió-sim tēng i ê chōe, he̍k-sī hō͘ i sí, he̍k-sī chhiong-kun, he̍k-sī chhau-ke, he̍k-sī koaiⁿ-kaⁿ.

27O-ló咱列祖ê上帝耶和華，因為伊hē chit-ê意思tī王ê心，加添榮光tī耶路撒冷耶和華ê殿；O-ló lán lia̍t-chó͘ ê Siōng-tè Iâ-hô-hoa, in-ūi I hē chit ê ì-sù tī ông ê sim, ke-thiⁿ êng-kng tī Iâ-lō͘-sat-léng Iâ-hô-hoa ê tiān;

28koh hō͘我tī王，kap伊ê議士，kap王一切有權勢ê首領ê面前，得tio̍h恩典。耶和華我ê上帝ê手幫贊我，我就勇敢；聚集以色列hiah-ê頭人，kap我上來。koh hō͘ góa tī ông, kap i ê gī-sū, kap ông it-chhè ū koân-sè ê siú-léng ê bīn-chêng, tit-tio̍h un-tián. Iâ-hô-hoa góa ê Siōng-tè ê chhiú pang-chān góa, góa chiū ióng-kám; chū-chi̍p Í-sek-lia̍t hiah ê thâu-lâng, kap góa chiūⁿ-lâi.

1A-ta̍t-siat-se王坐位ê時，kap我tùi巴比倫上來ê人，in ê族長，kap in ê世系，記tī下面。A-ta̍t-siat-se ông chē-ūi ê sî, kap góa tùi Pa-pí-lûn chiūⁿ-lâi ê lâng, in ê cho̍k-tiúⁿ, kap in ê sè-hē, kì tī ē-bīn.

2屬Hui-nî-hap ê後裔有Kek-sūn，屬Í-tha-má ê後裔有但以理，屬大衛ê後裔有Hap-tu̍t。Sio̍k Hui-nî-hap ê hō͘-è ū Kek-sūn, sio̍k Í-tha-má ê hō͘-è ū Tān-í-lí, sio̍k Tāi-pi̍t ê hō͘-è ū Hap-tu̍t.

3屬Pa-lio̍k ê後裔，就是Sī-ka-nî ê後裔，有撒迦利亞；kap伊ê，照世系來算，有ta-po͘丁一百五十人。Sio̍k Pa-lio̍k ê hō͘-è, chiū-sī Sī-ka-nî ê hō͘-è, ū Sat-ka-lī-a; kap i ê, chiàu sè-hē lâi sǹg, ū ta-po͘-teng chi̍t-pah gō͘-cha̍p lâng.

4屬Pa-hap-mô͘-ap ê後裔有Se-la̍h-hi-ngá ê kiáⁿ Í-lī-iok-nái；kap伊ê，有ta-po͘丁兩百人。Sio̍k Pa-hap-mô͘-ap ê hō͘-è ū Se-la̍h-hi-ngá ê kiáⁿ Í-lī-iok-nái; kap i ê, ū ta-po͘-teng nn̄g-pah lâng.

5屬Sī-ka-nî ê後裔有Ngá-hap-sek ê kiáⁿ；kap伊ê，有ta-po͘丁三百人。Sio̍k Sī-ka-nî ê hō͘-è ū Ngá-hap-sek ê kiáⁿ; kap i ê, ū ta-po͘-teng saⁿ-pah lâng.

6屬A-teng ê後裔，有約拿單ê kiáⁿ Í-pia̍t；kap伊ê，有ta-po͘丁五十人。Sio̍k A-teng ê hō͘-è, ū Iok-ná-tan ê kiáⁿ Í-pia̍t; kap i ê, ū ta-po͘-teng gō͘-cha̍p lâng.

7屬Í-lân ê後裔，有A-tha-lī-ngá ê kiáⁿ，Iâ-su-a；kap伊ê，有ta-po͘丁七十人。Sio̍k Í-lân ê hō͘-è, ū A-tha-lī-ngá ê kiáⁿ, Iâ-su-a; kap i ê, ū ta-po͘-teng chhit-cha̍p lâng.

8屬Sī-hoat-thê-ngá ê後裔，有Bí-ka-le̍k ê kiáⁿ Se-pa-tē-ngá；kap伊ê，有ta-po͘丁八十人。Sio̍k Sī-hoat-thê-ngá ê hō͘-è, ū Bí-ka-le̍k ê kiáⁿ Se-pa-tē-ngá; kap i ê, ū ta-po͘-teng poeh-cha̍p lâng.

9屬Iok-ap ê後裔，有Iâ-iat ê kiáⁿ Gô-pa-tí-a；kap伊ê，有ta-po͘丁兩百一十八人。Sio̍k Iok-ap ê hō͘-è, ū Iâ-iat ê kiáⁿ Gô-pa-tí-a; kap i ê, ū ta-po͘-teng nn̄g-pah it-cha̍p-poeh lâng.

10屬Sī-lô-bi̍t ê後裔，有Iok-sè-húi ê kiáⁿ；kap伊ê，有ta-po͘丁一百六十人。Sio̍k Sī-lô-bi̍t ê hō͘-è, ū Iok-sè-húi ê kiáⁿ; kap i ê, ū ta-po͘-teng chi̍t-pah la̍k-cha̍p lâng.

11屬Pí-pài ê後裔，有Pí-pài ê kiáⁿ撒迦利亞；kap伊ê，有ta-po͘丁二十八人。Sio̍k Pí-pài ê hō͘-è, ū Pí-pài ê kiáⁿ Sat-ka-lī-a; kap i ê, ū ta-po͘-teng jī-cha̍p-poeh lâng.

12屬Ap-kah ê後裔，有Hap-ka-thán ê kiáⁿ，Iok-hap-lân；kap伊ê，有ta-po͘丁一百一十人。Sio̍k Ap-kah ê hō͘-è, ū Hap-ka-thán ê kiáⁿ, Iok-hap-lân; kap i ê, ū ta-po͘-teng chi̍t-pah it-cha̍p lâng.

13屬A-to-nî-kâne後裔，就是路尾ê，in ê名是Í-lī-hoat-lia̍t、Iâ-lī，Sī-má-ngá；kap in ê，有ta-po͘丁六十人。Sio̍k A-to-nî-kan ê hō͘-è, chiū-sī lō͘-bé-ê, in ê miâ sī Í-lī-hoat-lia̍t, Iâ-lī, Sī-má-ngá; kap in ê, ū ta-po͘-teng la̍k-cha̍p lâng.

14屬Pí-kek-óa-i ê後裔，有O͘-thài，kap Sat-pò͘；kap in ê，有ta-po͘丁七十人。Sio̍k Pí-kek-óa-i ê hō͘-è, ū O͘-thài, kap Sat-pò͘; kap in ê, ū ta-po͘-teng chhit-cha̍p lâng.

15我招集chiah-ê人tī流入A-hap-óa ê河邊；阮tī-hia tòa tī布棚三日；我查看百姓kap祭司，看無利未人tī-hia。Góa chio-chi̍p chiah ê lâng tī lâu-ji̍p A-hap-óa ê hô-piⁿ; goán tī-hia tòa tī pò͘-pîⁿ saⁿ-ji̍t; góa chhâ-khòaⁿ peh-sìⁿ kap chè-si, khòaⁿ bô Lī-bī lâng tī-hia.

16我差人召hiah-ê頭人，就是Í-lī-í-siā、A-lia̍t、Sī-má-ngá、Í-lī-ná-tan、Ngá-li̍p、Í-lī-ná-tan、Ná-tan，撒迦利亞、Bí-su-lân；koh召教員Iok-ngá-li̍p kap Í-lī-ná-tan。Góa chhe lâng tiàu hiah ê thâu-lâng, chiū-sī Í-lī-í-siā, A-lia̍t, Sī-má-ngá, Í-lī-ná-tan, Ngá-li̍p, Í-lī-ná-tan, Ná-tan, Sat-ka-lī-a, Bí-su-lân; koh tiàu kàu-oân Iok-ngá-li̍p kap Í-lī-ná-tan.

17我差in去Ka-se-húi-ngá ê所在，見hit-ê頭人E̍k-to，koh kā in講，in tī Ka-se-húi-ngá ê所在tio̍h tùi E̍k-to kap伊ê兄弟Nî-thê-lêng講甚麼話，kah in為咱上帝ê殿帶差用ê人來。Góa chhe in khì Ka-se-húi-ngá ê só͘-chāi, kìⁿ hit ê thâu-lâng E̍k-to, koh kā in kóng, in tī Κa-se-húi-ngá ê só͘-chāi tio̍h tùi E̍k-to kap i ê hiaⁿ-tī Nî-thê-lêng kóng sím-mi̍h ōe, kah in ūi lán Siōng-tè ê tiān tòa chhe-ēng ê lâng lâi.

18得tio̍h咱ê上帝施恩ê手幫贊阮，in tī以色列ê曾孫，利未ê孫，Boa̍t-lī ê後裔中，帶一個通達ê人來；koh有Sī-lī-pí kap伊hiah-ê kiáⁿ，kap伊ê兄弟，共十八人。Tit-tio̍h lán ê Siōng-tè si-un ê chhiú pang-chān goán, in tī Í-sek-lia̍t ê cheng-sun, Lī-bī ê sun, Boa̍t-lī ê hō͘-è tiong, tòa chi̍t-ê thong-ta̍t ê lâng lâi; koh ū Sī-lī-pí kap i hiah ê kiáⁿ, kap i ê hiaⁿ-tī, kiōng cha̍p-poeh lâng.

19Koh有Hap-sa-pí-ngá；kap伊ê，有Bí-la̍h-lī ê後裔，Iâ-su-a，kap伊ê兄弟，kap in ê kiáⁿ，共二十人。Koh ū Hap-sa-pí-ngá; kap i ê, ū Bí-la̍h-lī ê hō͘-è, Iâ-su-a, kap i ê hiaⁿ-tī, kap in ê kiáⁿ, kiōng jī-cha̍p lâng.

20Koh帶Nî-thê-lêng人來，就是前大衛kap chiah-ê首領所派做利未人ê差用ê，共兩百二十ê Nî-thê-lêng；in ê名lóng有登記。Koh tòa Nî-thê-lêng lâng lâi, chiū-sī chêng Tāi-pi̍t kap chiah ê siú-léng só͘ phài-chòe Lī-bī lâng ê chhe-ēng-ê, kiōng nn̄g-pah jī-cha̍p ê Nî-thê-lêng; in ê miâ lóng ū teng-kì.

21Hit時阮tī A-hap-óa ê河邊宣布禁食，thang hō͘阮tī咱ê上帝ê面前家己謙卑，求伊hō͘阮kap阮ê gín-ná，kap一切所有ê，lóng得tio̍h平坦ê路。Hit-sî goán tī A-hap-óa ê hô-piⁿ soan-pò͘ kìm-chia̍h, thang hō͘ goán tī lán ê Siōng-tè ê bīn-chêng ka-kī khiam-pi, kiû I hō͘ goán kap goán ê gín-ná, kap it-chhè só͘-ū-ê, lóng tit-tio̍h pîⁿ-tháⁿ ê lō͘.

22因為求王撥一隊步兵馬兵，幫贊阮tī路裡抵擋對敵，我掠做見笑；因為阮bat對王講，阮ê上帝ê手保護一切求伊ê人；獨獨伊ê能力kap受氣，攻擊一切棄sak伊ê人。In-ūi kiû ông poah chi̍t-tūi pō͘-peng bé-peng, pang-chān goán tī lō͘--nih tí-tng tùi-te̍k, góa lia̍h-chòe kiàn-siàu; in-ūi goán bat tùi ông kóng, Goán ê Siōng-tè ê chhiú pó-hō͘ it-chhè kiû I ê lâng; to̍k-to̍k I ê lêng-le̍k kap siū-khì, kong-kek it-chhè khì-sak I ê lâng.

23所以阮為tio̍h án-ni禁食，求阮ê上帝；伊就聽阮。Só͘-í goán ūi-tio̍h án-ni kìm-chia̍h, kiû goán ê Siōng-tè; I chiū thiaⁿ goán.

24Tùi án-ni，我分派祭司ê頭人十二個，就是Sī-lī-pí、Hap-sa-pí-ngá，kap in ê兄弟十人。Tùi án-ni góa hun-phài chè-si ê thâu-lâng cha̍p-jī-ê, chiū-sī Sī-lī-pí, Hap-sa-pí-ngá, kap in ê hiaⁿ-tī cha̍p-lâng.

25我就將咱上帝殿ê禮物，就是金銀kap hiah-ê器具，是王kap伊ê謀士，伊ê首領，kap tī-hia ê以色列眾人所獻ê，lóng秤(phêng)來交付in。Góa chiū chiong lán Siōng-tè tiān ê lé-mi̍h , chiū-sī kim gûn kap hiah ê khì-kū, sī ông kap i ê bô͘-sū, i ê siú-léng, kap tī-hia ê Í-sek-lia̍t chèng-lâng só͘ hiàn-ê, lóng phêng lâi kau-hù in.

26我就秤來交tī in ê手，有銀六百[+五十]tha-liân-tek，銀器重一百tha-liân-tek；金一百tha-liân-tek；Góa chiū phêng lâi kau tī in ê chhiú, ū gûn la̍k-pah[+gō͘-cha̍p] tha-liân-tek, gûn-khì tāng chi̍t-pah tha-liân-tek; kim chi̍t-pah tha-liân-tek;

27金碗二十塊，重一千ta̍t-lī-khek；金nà-nà好ê銅器兩塊，寶貴親像金。kim-óaⁿ jī-cha̍p tè, tāng chi̍t-chheng ta̍t-lī-khek; kim-nà-nà hó ê tâng-khì nn̄g-tè, pó-kùi chhin-chhiūⁿ kim.

28我對in講，Lín做聖歸耶和華，chiah-ê器具也是聖，hiah-ê金銀是甘心獻hō͘耶和華lín列祖ê上帝ê。Góa tùi in kóng, Lín chòe-sèng kui Iâ-hô-hoa, chiah ê khì-kū iā sī sèng, hiah ê kim-gûn sī kam-sim hiàn hō͘ Iâ-hô-hoa lín lia̍t-chó͘ ê Siōng-tè--ê.

29Lín tio̍h謹慎顧守，直到lín tī耶路撒冷耶和華殿ê房內，tī祭司ê頭人kap利未人，以及以色列hiah-ê族長ê面前秤伊。Lín tio̍h kín-sīn kò͘-siú, ti̍t-kàu lín tī Iâ-lō͘-sat-léng Iâ-hô-hoa tiān ê pâng-lāi, tī chè-si ê thâu-lâng kap Lī-bī lâng, í-ki̍p Í-sek-lia̍t hiah ê cho̍k-tiúⁿ ê bīn-chêng phêng i.

30Tùi án-ni，祭司利未人收金銀kap器具，照in ê輕重，beh帶到耶路撒冷咱上帝ê殿。Tùi án-ni chè-si Lī-bī lâng siu kim-gûn kap khì-kū, chiàu in ê khin-tāng, beh tòa kàu Iâ-lō͘-sat-léng lán Siōng-tè ê tiān.

31正月十二日，阮離開A-hap-óa ê河邊，beh去耶路撒冷；咱ê上帝ê手保護阮，救阮脫離對敵，kap埋伏tī路裡ê人ê手。Chiaⁿ ge̍h cha̍p-jī ji̍t, goán lī-khui A-hap-óa ê hô-piⁿ, beh khì Iâ-lō͘-sat-léng; lán ê Siōng-tè ê chhiú pó-hō͘ goán, kiù goán thoat-lī tùi-te̍k, kap bâi-ho̍k tī lō͘--nih ê lâng ê chhiú.

32阮到耶路撒冷，tiàm hia三日。Goán kàu Iâ-lō͘-sat-léng, tiàm hia saⁿ-ji̍t.

33到第四日，tī咱上帝ê殿，秤hiah-ê金銀kap器具，交tī祭司O͘-lī-a ê kiáⁿ Bí-lī-boa̍t ê手；kap伊ê，有Hui-nî-hap ê kiáⁿ Í-lī-a-sat；koh kap in ê，有利未人Iâ-su-a ê kiáⁿ Iok-sat-poa̍t，kap Pin-lōe ê kiáⁿ Lô-a-tí。Kàu tē-sì ji̍t, tī lán Siōng-tè ê tiān, phêng hiah ê kim gûn kap khì-kū, kau tī chè-si O͘-lī-a ê kiáⁿ Bí-lī-boa̍t ê chhiú; kap i ê, ū Hui-nî-hap ê kiáⁿ Í-lī-a-sat; koh kap in ê, ū Lī-bī lâng Iâ-su-a ê kiáⁿ Iok-sat-poa̍t, kap Pin-lōe ê kiáⁿ Lô-a-tí.

34一切照in ê數額，照in ê輕重交伊；當時也記in ê輕重。It-chhè chiàu in ê siàu-gia̍h, chiàu in ê khin-tāng kau i; tng-sî iā kì in ê khin-tāng.

35受掠ê人tùi受掠ê中間tò來ê，獻燒祭hō͘以色列ê上帝，就是為以色列眾人獻牛káng十二隻，綿羊káng九十六隻，綿羊á 七十七隻；koh獻山羊káng十二隻做贖罪ê祭。Chiah-ê lóng是做燒祭獻hō͘耶和華ê。Siū-lia̍h ê lâng tùi siū-lia̍h ê tiong-kan tò-lâi ê, hiàn sio-chè hō͘ Í-sek-lia̍t ê Siōng-tè, chiū-sī ūi Í-sek-lia̍t chèng-lâng hiàn gû-káng cha̍p-jī chiah, mî-iûⁿ-káng káu-cha̍p-la̍k chiah, mî-iûⁿ-á chhit-cha̍p-chhit chiah; koh hiàn soaⁿ-iûⁿ-káng cha̍p-jī chiah chòe sio̍k-chōe ê chè. Chiah-ê lóng sī chòe sio-chè hiàn-hō͘ Iâ-hô-hoa ê.

36In將王ê諭旨交hō͘王ê人臣，kap tī河外hiah-ê總督；in就幫贊百姓kap上帝ê殿。In chiong ông ê jū-chí kau hō͘ ông ê jîn-sîn, kap tī Hô-gōa hiah ê chóng-tok; in chiū pang-chān peh-sìⁿ kap Siōng-tè ê tiān.