1A-ta̍t-siat-se王坐位ê時，kap我tùi巴比倫上來ê人，in ê族長，kap in ê世系，記tī下面。A-ta̍t-siat-se ông chē-ūi ê sî, kap góa tùi Pa-pí-lûn chiūⁿ-lâi ê lâng, in ê cho̍k-tiúⁿ, kap in ê sè-hē, kì tī ē-bīn.

2屬Hui-nî-hap ê後裔有Kek-sūn，屬Í-tha-má ê後裔有但以理，屬大衛ê後裔有Hap-tu̍t。Sio̍k Hui-nî-hap ê hō͘-è ū Kek-sūn, sio̍k Í-tha-má ê hō͘-è ū Tān-í-lí, sio̍k Tāi-pi̍t ê hō͘-è ū Hap-tu̍t.

3屬Pa-lio̍k ê後裔，就是Sī-ka-nî ê後裔，有撒迦利亞；kap伊ê，照世系來算，有ta-po͘丁一百五十人。Sio̍k Pa-lio̍k ê hō͘-è, chiū-sī Sī-ka-nî ê hō͘-è, ū Sat-ka-lī-a; kap i ê, chiàu sè-hē lâi sǹg, ū ta-po͘-teng chi̍t-pah gō͘-cha̍p lâng.

4屬Pa-hap-mô͘-ap ê後裔有Se-la̍h-hi-ngá ê kiáⁿ Í-lī-iok-nái；kap伊ê，有ta-po͘丁兩百人。Sio̍k Pa-hap-mô͘-ap ê hō͘-è ū Se-la̍h-hi-ngá ê kiáⁿ Í-lī-iok-nái; kap i ê, ū ta-po͘-teng nn̄g-pah lâng.

5屬Sī-ka-nî ê後裔有Ngá-hap-sek ê kiáⁿ；kap伊ê，有ta-po͘丁三百人。Sio̍k Sī-ka-nî ê hō͘-è ū Ngá-hap-sek ê kiáⁿ; kap i ê, ū ta-po͘-teng saⁿ-pah lâng.

6屬A-teng ê後裔，有約拿單ê kiáⁿ Í-pia̍t；kap伊ê，有ta-po͘丁五十人。Sio̍k A-teng ê hō͘-è, ū Iok-ná-tan ê kiáⁿ Í-pia̍t; kap i ê, ū ta-po͘-teng gō͘-cha̍p lâng.

7屬Í-lân ê後裔，有A-tha-lī-ngá ê kiáⁿ，Iâ-su-a；kap伊ê，有ta-po͘丁七十人。Sio̍k Í-lân ê hō͘-è, ū A-tha-lī-ngá ê kiáⁿ, Iâ-su-a; kap i ê, ū ta-po͘-teng chhit-cha̍p lâng.

8屬Sī-hoat-thê-ngá ê後裔，有Bí-ka-le̍k ê kiáⁿ Se-pa-tē-ngá；kap伊ê，有ta-po͘丁八十人。Sio̍k Sī-hoat-thê-ngá ê hō͘-è, ū Bí-ka-le̍k ê kiáⁿ Se-pa-tē-ngá; kap i ê, ū ta-po͘-teng poeh-cha̍p lâng.

9屬Iok-ap ê後裔，有Iâ-iat ê kiáⁿ Gô-pa-tí-a；kap伊ê，有ta-po͘丁兩百一十八人。Sio̍k Iok-ap ê hō͘-è, ū Iâ-iat ê kiáⁿ Gô-pa-tí-a; kap i ê, ū ta-po͘-teng nn̄g-pah it-cha̍p-poeh lâng.

10屬Sī-lô-bi̍t ê後裔，有Iok-sè-húi ê kiáⁿ；kap伊ê，有ta-po͘丁一百六十人。Sio̍k Sī-lô-bi̍t ê hō͘-è, ū Iok-sè-húi ê kiáⁿ; kap i ê, ū ta-po͘-teng chi̍t-pah la̍k-cha̍p lâng.

11屬Pí-pài ê後裔，有Pí-pài ê kiáⁿ撒迦利亞；kap伊ê，有ta-po͘丁二十八人。Sio̍k Pí-pài ê hō͘-è, ū Pí-pài ê kiáⁿ Sat-ka-lī-a; kap i ê, ū ta-po͘-teng jī-cha̍p-poeh lâng.

12屬Ap-kah ê後裔，有Hap-ka-thán ê kiáⁿ，Iok-hap-lân；kap伊ê，有ta-po͘丁一百一十人。Sio̍k Ap-kah ê hō͘-è, ū Hap-ka-thán ê kiáⁿ, Iok-hap-lân; kap i ê, ū ta-po͘-teng chi̍t-pah it-cha̍p lâng.

13屬A-to-nî-kâne後裔，就是路尾ê，in ê名是Í-lī-hoat-lia̍t、Iâ-lī，Sī-má-ngá；kap in ê，有ta-po͘丁六十人。Sio̍k A-to-nî-kan ê hō͘-è, chiū-sī lō͘-bé-ê, in ê miâ sī Í-lī-hoat-lia̍t, Iâ-lī, Sī-má-ngá; kap in ê, ū ta-po͘-teng la̍k-cha̍p lâng.

14屬Pí-kek-óa-i ê後裔，有O͘-thài，kap Sat-pò͘；kap in ê，有ta-po͘丁七十人。Sio̍k Pí-kek-óa-i ê hō͘-è, ū O͘-thài, kap Sat-pò͘; kap in ê, ū ta-po͘-teng chhit-cha̍p lâng.

15我招集chiah-ê人tī流入A-hap-óa ê河邊；阮tī-hia tòa tī布棚三日；我查看百姓kap祭司，看無利未人tī-hia。Góa chio-chi̍p chiah ê lâng tī lâu-ji̍p A-hap-óa ê hô-piⁿ; goán tī-hia tòa tī pò͘-pîⁿ saⁿ-ji̍t; góa chhâ-khòaⁿ peh-sìⁿ kap chè-si, khòaⁿ bô Lī-bī lâng tī-hia.

16我差人召hiah-ê頭人，就是Í-lī-í-siā、A-lia̍t、Sī-má-ngá、Í-lī-ná-tan、Ngá-li̍p、Í-lī-ná-tan、Ná-tan，撒迦利亞、Bí-su-lân；koh召教員Iok-ngá-li̍p kap Í-lī-ná-tan。Góa chhe lâng tiàu hiah ê thâu-lâng, chiū-sī Í-lī-í-siā, A-lia̍t, Sī-má-ngá, Í-lī-ná-tan, Ngá-li̍p, Í-lī-ná-tan, Ná-tan, Sat-ka-lī-a, Bí-su-lân; koh tiàu kàu-oân Iok-ngá-li̍p kap Í-lī-ná-tan.

17我差in去Ka-se-húi-ngá ê所在，見hit-ê頭人E̍k-to，koh kā in講，in tī Ka-se-húi-ngá ê所在tio̍h tùi E̍k-to kap伊ê兄弟Nî-thê-lêng講甚麼話，kah in為咱上帝ê殿帶差用ê人來。Góa chhe in khì Ka-se-húi-ngá ê só͘-chāi, kìⁿ hit ê thâu-lâng E̍k-to, koh kā in kóng, in tī Κa-se-húi-ngá ê só͘-chāi tio̍h tùi E̍k-to kap i ê hiaⁿ-tī Nî-thê-lêng kóng sím-mi̍h ōe, kah in ūi lán Siōng-tè ê tiān tòa chhe-ēng ê lâng lâi.

18得tio̍h咱ê上帝施恩ê手幫贊阮，in tī以色列ê曾孫，利未ê孫，Boa̍t-lī ê後裔中，帶一個通達ê人來；koh有Sī-lī-pí kap伊hiah-ê kiáⁿ，kap伊ê兄弟，共十八人。Tit-tio̍h lán ê Siōng-tè si-un ê chhiú pang-chān goán, in tī Í-sek-lia̍t ê cheng-sun, Lī-bī ê sun, Boa̍t-lī ê hō͘-è tiong, tòa chi̍t-ê thong-ta̍t ê lâng lâi; koh ū Sī-lī-pí kap i hiah ê kiáⁿ, kap i ê hiaⁿ-tī, kiōng cha̍p-poeh lâng.

19Koh有Hap-sa-pí-ngá；kap伊ê，有Bí-la̍h-lī ê後裔，Iâ-su-a，kap伊ê兄弟，kap in ê kiáⁿ，共二十人。Koh ū Hap-sa-pí-ngá; kap i ê, ū Bí-la̍h-lī ê hō͘-è, Iâ-su-a, kap i ê hiaⁿ-tī, kap in ê kiáⁿ, kiōng jī-cha̍p lâng.

20Koh帶Nî-thê-lêng人來，就是前大衛kap chiah-ê首領所派做利未人ê差用ê，共兩百二十ê Nî-thê-lêng；in ê名lóng有登記。Koh tòa Nî-thê-lêng lâng lâi, chiū-sī chêng Tāi-pi̍t kap chiah ê siú-léng só͘ phài-chòe Lī-bī lâng ê chhe-ēng-ê, kiōng nn̄g-pah jī-cha̍p ê Nî-thê-lêng; in ê miâ lóng ū teng-kì.

21Hit時阮tī A-hap-óa ê河邊宣布禁食，thang hō͘阮tī咱ê上帝ê面前家己謙卑，求伊hō͘阮kap阮ê gín-ná，kap一切所有ê，lóng得tio̍h平坦ê路。Hit-sî goán tī A-hap-óa ê hô-piⁿ soan-pò͘ kìm-chia̍h, thang hō͘ goán tī lán ê Siōng-tè ê bīn-chêng ka-kī khiam-pi, kiû I hō͘ goán kap goán ê gín-ná, kap it-chhè só͘-ū-ê, lóng tit-tio̍h pîⁿ-tháⁿ ê lō͘.

22因為求王撥一隊步兵馬兵，幫贊阮tī路裡抵擋對敵，我掠做見笑；因為阮bat對王講，阮ê上帝ê手保護一切求伊ê人；獨獨伊ê能力kap受氣，攻擊一切棄sak伊ê人。In-ūi kiû ông poah chi̍t-tūi pō͘-peng bé-peng, pang-chān goán tī lō͘--nih tí-tng tùi-te̍k, góa lia̍h-chòe kiàn-siàu; in-ūi goán bat tùi ông kóng, Goán ê Siōng-tè ê chhiú pó-hō͘ it-chhè kiû I ê lâng; to̍k-to̍k I ê lêng-le̍k kap siū-khì, kong-kek it-chhè khì-sak I ê lâng.

23所以阮為tio̍h án-ni禁食，求阮ê上帝；伊就聽阮。Só͘-í goán ūi-tio̍h án-ni kìm-chia̍h, kiû goán ê Siōng-tè; I chiū thiaⁿ goán.

24Tùi án-ni，我分派祭司ê頭人十二個，就是Sī-lī-pí、Hap-sa-pí-ngá，kap in ê兄弟十人。Tùi án-ni góa hun-phài chè-si ê thâu-lâng cha̍p-jī-ê, chiū-sī Sī-lī-pí, Hap-sa-pí-ngá, kap in ê hiaⁿ-tī cha̍p-lâng.

25我就將咱上帝殿ê禮物，就是金銀kap hiah-ê器具，是王kap伊ê謀士，伊ê首領，kap tī-hia ê以色列眾人所獻ê，lóng秤(phêng)來交付in。Góa chiū chiong lán Siōng-tè tiān ê lé-mi̍h , chiū-sī kim gûn kap hiah ê khì-kū, sī ông kap i ê bô͘-sū, i ê siú-léng, kap tī-hia ê Í-sek-lia̍t chèng-lâng só͘ hiàn-ê, lóng phêng lâi kau-hù in.

26我就秤來交tī in ê手，有銀六百[+五十]tha-liân-tek，銀器重一百tha-liân-tek；金一百tha-liân-tek；Góa chiū phêng lâi kau tī in ê chhiú, ū gûn la̍k-pah[+gō͘-cha̍p] tha-liân-tek, gûn-khì tāng chi̍t-pah tha-liân-tek; kim chi̍t-pah tha-liân-tek;

27金碗二十塊，重一千ta̍t-lī-khek；金nà-nà好ê銅器兩塊，寶貴親像金。kim-óaⁿ jī-cha̍p tè, tāng chi̍t-chheng ta̍t-lī-khek; kim-nà-nà hó ê tâng-khì nn̄g-tè, pó-kùi chhin-chhiūⁿ kim.

28我對in講，Lín做聖歸耶和華，chiah-ê器具也是聖，hiah-ê金銀是甘心獻hō͘耶和華lín列祖ê上帝ê。Góa tùi in kóng, Lín chòe-sèng kui Iâ-hô-hoa, chiah ê khì-kū iā sī sèng, hiah ê kim-gûn sī kam-sim hiàn hō͘ Iâ-hô-hoa lín lia̍t-chó͘ ê Siōng-tè--ê.

29Lín tio̍h謹慎顧守，直到lín tī耶路撒冷耶和華殿ê房內，tī祭司ê頭人kap利未人，以及以色列hiah-ê族長ê面前秤伊。Lín tio̍h kín-sīn kò͘-siú, ti̍t-kàu lín tī Iâ-lō͘-sat-léng Iâ-hô-hoa tiān ê pâng-lāi, tī chè-si ê thâu-lâng kap Lī-bī lâng, í-ki̍p Í-sek-lia̍t hiah ê cho̍k-tiúⁿ ê bīn-chêng phêng i.

30Tùi án-ni，祭司利未人收金銀kap器具，照in ê輕重，beh帶到耶路撒冷咱上帝ê殿。Tùi án-ni chè-si Lī-bī lâng siu kim-gûn kap khì-kū, chiàu in ê khin-tāng, beh tòa kàu Iâ-lō͘-sat-léng lán Siōng-tè ê tiān.

31正月十二日，阮離開A-hap-óa ê河邊，beh去耶路撒冷；咱ê上帝ê手保護阮，救阮脫離對敵，kap埋伏tī路裡ê人ê手。Chiaⁿ ge̍h cha̍p-jī ji̍t, goán lī-khui A-hap-óa ê hô-piⁿ, beh khì Iâ-lō͘-sat-léng; lán ê Siōng-tè ê chhiú pó-hō͘ goán, kiù goán thoat-lī tùi-te̍k, kap bâi-ho̍k tī lō͘--nih ê lâng ê chhiú.

32阮到耶路撒冷，tiàm hia三日。Goán kàu Iâ-lō͘-sat-léng, tiàm hia saⁿ-ji̍t.

33到第四日，tī咱上帝ê殿，秤hiah-ê金銀kap器具，交tī祭司O͘-lī-a ê kiáⁿ Bí-lī-boa̍t ê手；kap伊ê，有Hui-nî-hap ê kiáⁿ Í-lī-a-sat；koh kap in ê，有利未人Iâ-su-a ê kiáⁿ Iok-sat-poa̍t，kap Pin-lōe ê kiáⁿ Lô-a-tí。Kàu tē-sì ji̍t, tī lán Siōng-tè ê tiān, phêng hiah ê kim gûn kap khì-kū, kau tī chè-si O͘-lī-a ê kiáⁿ Bí-lī-boa̍t ê chhiú; kap i ê, ū Hui-nî-hap ê kiáⁿ Í-lī-a-sat; koh kap in ê, ū Lī-bī lâng Iâ-su-a ê kiáⁿ Iok-sat-poa̍t, kap Pin-lōe ê kiáⁿ Lô-a-tí.

34一切照in ê數額，照in ê輕重交伊；當時也記in ê輕重。It-chhè chiàu in ê siàu-gia̍h, chiàu in ê khin-tāng kau i; tng-sî iā kì in ê khin-tāng.

35受掠ê人tùi受掠ê中間tò來ê，獻燒祭hō͘以色列ê上帝，就是為以色列眾人獻牛káng十二隻，綿羊káng九十六隻，綿羊á 七十七隻；koh獻山羊káng十二隻做贖罪ê祭。Chiah-ê lóng是做燒祭獻hō͘耶和華ê。Siū-lia̍h ê lâng tùi siū-lia̍h ê tiong-kan tò-lâi ê, hiàn sio-chè hō͘ Í-sek-lia̍t ê Siōng-tè, chiū-sī ūi Í-sek-lia̍t chèng-lâng hiàn gû-káng cha̍p-jī chiah, mî-iûⁿ-káng káu-cha̍p-la̍k chiah, mî-iûⁿ-á chhit-cha̍p-chhit chiah; koh hiàn soaⁿ-iûⁿ-káng cha̍p-jī chiah chòe sio̍k-chōe ê chè. Chiah-ê lóng sī chòe sio-chè hiàn-hō͘ Iâ-hô-hoa ê.

36In將王ê諭旨交hō͘王ê人臣，kap tī河外hiah-ê總督；in就幫贊百姓kap上帝ê殿。In chiong ông ê jū-chí kau hō͘ ông ê jîn-sîn, kap tī Hô-gōa hiah ê chóng-tok; in chiū pang-chān peh-sìⁿ kap Siōng-tè ê tiān.

1Chiah-ê tāi-chì已經做明白，chiah-ê首領來見我，講，以色列百姓kap祭司，kap利未人，無家己分別離開chiah-ê所在ê百姓，thàn in可惡ê事，就是thàn迦南人、Hek人、Pí-lī-sé人、Iâ-pò͘-su人、A-bûn人、Mô͘-ap人、埃及人、A-mô͘-lī人ê事。Chiah ê tāi-chì í-keng chòe bêng-pe̍k, chiah ê siú-léng lâi kìⁿ góa, kóng, Í-sek-lia̍t peh-sìⁿ kap chè-si, kap Lī-bī lâng, bô ka-kī hun-piat lī-khui chiah ê só͘-chāi ê peh-sìⁿ, thàn in khó-ò͘ⁿ ê sū, chiū-sī thàn Ka-lâm lâng, Hek-lâng, Pí-lī-sé lâng, Iâ-pò͘-su lâng, A-bûn lâng, Mô͘-ap lâng, Ai-ki̍p lâng, A-mô͘-lī lâng ê sū.

2因為in為家己kap in ê kiáⁿ，娶in ê cha-bó͘-kiáⁿ做bó͘，致到聖ê後裔kap hit所在ê百姓chham-chhap；koh首領kap in ê官長做in ê罪魁。In-ūi in ūi ka-kī kap in ê kiáⁿ, chhōa in ê cha-bó͘-kiáⁿ chòe bó͘, tì-kàu sèng ê hō͘-è kap hit só͘-chāi ê peh-sìⁿ chham-chhap; koh siú-léng kap in ê koaⁿ-tiúⁿ chòe in ê chōe-khoe.

3我一下聽見chit-ê事，就拆裂我ê衫kap袍，chhoah我ê頭毛kap嘴鬚，gông-ngia̍h teh坐。Góa chi̍t-ē thiaⁿ-kìⁿ chit ê sū, chiū thiah-li̍h góa ê saⁿ kap phàu, chhoah góa ê thâu-mn̂g kap chhùi-chhiu, gông-ngia̍h teh chē.

4見若為以色列上帝ê話來ngia̍uh-ngia̍uh-chhoah-ê，lóng聚集到我chia，因為受掠tò來ê人所犯ê罪；我就gông-ngia̍h teh坐，到獻ê-hng祭ê時。Kìⁿ-nā ūi Í-sek-lia̍t Siōng-tè ê ōe lâi ngia̍uh-ngia̍uh-chhoah--ê, lóng chū-chi̍p kàu góa chia, in-ūi siū-lia̍h tò-lâi ê lâng só͘ hoān ê chōe; góa chiū gông-ngia̍h teh chē, kàu hiàn ê-hng-chè ê sî.

5獻ê-hng祭ê時，我tùi我ê鬱悶起來，衫袍拆裂，雙腳跪落去，ǹg耶和華我ê上帝kia̍h-起手，講，Hiàn ê-hng-chè ê sî, góa tùi góa ê ut-būn khí-lâi, saⁿ phàu thiah-li̍h, siang-kha kūi--lo̍h-khì, ǹg Iâ-hô-hoa góa ê Siōng-tè kia̍h-khí chhiú, kóng,

6我ê上帝ah，我見笑漏氣，m̄敢kia̍h頭ǹg我ê上帝你，因為阮ê罪淹過頭殼，阮ê罪惡抵天。Góa ê Siōng-tè ah, góa kiàn-siàu làu-khùi, m̄-káⁿ kia̍h-thâu ǹg góa ê Siōng-tè Lí, in-ūi goán ê chōe im-kè thâu-khak, goán ê chōe-ok tú-thiⁿ.

7Tùi阮列祖ê日到今á日，阮ê罪惡真重；為tio̍h阮ê罪過，阮kap阮ê列王，祭司，lóng交tī外邦列王ê手，受刀劍，受虜掠，受搶劫，面見笑，親像今á日ê款。Tùi goán lia̍t-chó͘ ê ji̍t kàu kin-á-ji̍t, goán ê chōe-ok chin-tāng; ūi-tio̍h goán ê chōe-kòa, goán kap goán ê lia̍t-ông, chè-si, lóng kau tī gōa-pang lia̍t-ông ê chhiú, siū to-kiàm, siū ló͘-lia̍h, siū chhiúⁿ-kiap, bīn kiàn-siàu, chhin-chhiūⁿ kin-á-ji̍t ê khoán.

8Taⁿ得tio̍h耶和華阮ê上帝暫且施恩hō͘阮，kā阮留chiah-ê逃脫ê人，hō͘阮親像得tio̍h鐵釘釘tī伊聖ê所在，hō͘阮ê上帝thang照光阮ê目睭，hō͘阮tī奴隸中lî-á koh活。Taⁿ tit-tio̍h Iâ-hô-hoa goán ê Siōng-tè chiām-chhiáⁿ si-un hō͘ goán, kā goán lâu chiah ê tô-thoat ê lâng, hō͘ goán chhin-chhiūⁿ tit-tio̍h thih-teng tèng tī I sèng ê só͘-chāi, hō͘ goán ê Siōng-tè thang chiò-kng goán ê ba̍k-chiu, hō͘ goán tī lô͘-lē-tiong lî-á koh-oa̍h.

9因為阮是奴隸，總是tī奴隸中，阮ê上帝無棄sak阮；koh hō͘阮tī波斯列王ê面前得tio̍h恩典，hō͘阮koh活，能koh起阮上帝ê殿，修理hiah-ê毀壞ê所在，hō͘阮tī猶大kap耶路撒冷得tio̍h有牆壁。In-ūi goán sī lô͘-lē, chóng-sī tī lô͘-lē tiong, goán ê Siōng-tè bô khì-sak goán; koh hō͘ goán tī Pho-su lia̍t-ông ê bīn-chêng tit-tio̍h un-tián, hō͘ goán koh-oa̍h, ōe koh khí goán Siōng-tè ê tiān, siu-lí hiah ê húi-hoāi ê só͘-chāi, hō͘ goán tī Iû-tāi kap Iâ-lō͘-sat-léng tit-tio̍h ū chhiûⁿ-piah.

10阮ê上帝ah，既然án-ni，阮iáu有甚麼話thang講ah？ 因為阮已經棄sak你ê命令，Goán ê Siōng-tè ah, kì-jiân án-ni, goán iáu ū sím-mi̍h ōe thang kóng ah? In-ūi goán í-keng khì-sak Lí ê bēng-lēng,

11就是你託你ê奴僕chiah-ê先知所命令ê講，Lín所去beh承接做業ê地是污穢ê地，為tio̍h hiah-ê國ê百姓ê污穢，kap in可惡ê事；因為in hō͘全地tùi chit邊到hit邊，滿滿lâ-sâm。chiū-sī Lí thok Lí ê lô͘-po̍k chiah ê sian-ti só͘ bēng-lēng-ê kóng, Lín só͘ khì beh sêng-chiap chòe-gia̍p ê tōe sī ù-òe ê tōe, ūi-tio̍h hiah ê kok ê peh-sìⁿ ê ù-òe, kap in khó-ò͘ⁿ ê sū; in-ūi in hō͘ choân-tōe tùi chit-piⁿ kàu hit-piⁿ, móa-móa lâ-sâm.

12所以m̄-thang將lín ê cha-bó͘-kiáⁿ嫁in ê kiáⁿ，也m̄-thang kā lín ê kiáⁿ娶in ê cha-bó͘-kiáⁿ，永永m̄-thang kā in圖謀平安，kap in ê利益；án-ni lín就thang強盛，食chit所在ê好物，續留hō͘ lín ê kiáⁿ孫永遠做業。Só͘-í m̄-thang chiong lín ê cha-bó͘-kiáⁿ kè in ê kiáⁿ, iā m̄-thang kā lín ê kiáⁿ chhōa in ê cha-bó͘-kiáⁿ, éng-éng m̄-thang kā in tô͘-bô͘ pêng-an, kap in ê lī-ek; án-ni lín chiū thang kiông-sēng, chia̍h chit só͘-chāi ê hó-mi̍h, sòa lâu hō͘ lín ê kiáⁿ-sun éng-oán chòe-gia̍p.

13阮因為阮ê pháiⁿ所行，kap阮ê重罪，已經tú-tio̍h這一切ê事，阮ê上帝ah，你刑罰阮，khah輕阮ê罪所應該得tio̍h-ê；koh kā阮留chiah-ê脫離ê人；Goán in-ūi goán ê pháiⁿ só͘-kiâⁿ, kap goán ê tāng-chōe, í-keng tú-tio̍h che it-chhè ê sū, goán ê Siōng-tè ah, Lí hêng-hoa̍t goán, khah-khin goán ê chōe só͘ eng-kai tit-tio̍h--ê; koh kā goán lâu chiah ê thoat-lī ê lâng;

14阮kiám thang koh悖逆你ê命令，kap行可惡ê事ê百姓結親mah？若án-ni，你kiám無beh受氣阮，到滅無阮，致到無一個留teh，無一個逃脫mah？goán kiám thang koh pōe-ge̍k Lí ê bēng-lēng, kap kiâⁿ khó-ò͘ⁿ ê sū ê peh-sìⁿ kiat-chhin mah? nā án-ni, Lí kiám bô beh siū-khì goán, kàu bia̍t-bô goán, tì-kàu bô chi̍t-ê lâu-teh, bô chi̍t-ê tô-thoat mah?

15耶和華以色列ê上帝ah，你是公義，阮chiah-ê留teh ê人chiah得tio̍h逃脫，親像今á日。看ah，阮tī你ê面前有罪惡；因為án-ni無人tī你ê面前khiā能tiâu。Iâ-hô-hoa Í-sek-lia̍t ê Siōng-tè ah, Lí sī kong-gī, goán chiah ê lâu-teh ê lâng chiah tit-tio̍h tô-thoat, chhin-chhiūⁿ kin-á-ji̍t. Khòaⁿ ah, goán tī Lí ê bīn-chêng ū chōe-ok; in-ūi án-ni bô lâng tī Lí ê bīn-chêng khiā ōe tiâu.

1以斯拉祈禱、認罪、啼哭，仆tī上帝殿前ê時，有tùi以色列中來ê男女gín-ná聚集伊hia，成大會。百姓哭到真慘。Í-su-la̍h kî-tó, jīn-chōe, thî-khàu, phak tī Siōng-tè tiān-chêng ê sî, ū tùi Í-sek-lia̍t tiong lâi ê lâm-lú gín-ná chū-chi̍p i hia, chiâⁿ tōa-hōe. Peh-sìⁿ khàu kàu chin-chhám.

2屬Í-lân ê後裔，Iâ-iat ê kiáⁿ，Sī-ka-nî，應以斯拉講，阮tī chit-ê所在ê百姓中娶外邦人ê cha-bó͘-kiáⁿ做bó͘，干犯咱ê上帝；總是以色列人tī chit-ê事iáu-kú有thang ǹg望。Sio̍k Í-lân ê hō͘-è, Iâ-iat ê kiáⁿ, Sī-ka-nî, ìn Í-su-la̍h kóng, Goán tī chit ê só͘-chāi ê peh-sìⁿ tiong chhōa gōa-pang lâng ê cha-bó͘-kiáⁿ chòe-bó͘, kan-hoān lán ê Siōng-tè; chóng-sī Í-sek-lia̍t lâng tī chit ê sū iáu-kú ū thang ǹg-bāng.

3Taⁿ tio̍h kap咱ê上帝立約，將chiah-ê bó͘ kap in所生ê，lóng hō͘ in出去，照我ê主kap hiah-ê因為上帝ê命令ngia̍uh-ngia̍uh-chhoah ê人所議定ê，照律法來行；Taⁿ tio̍h kap lán ê Siōng-tè li̍p-iok, chiong chiah ê bó͘ kap in só͘-siⁿ-ê, lóng hō͘ in chhut-khì, chiàu góa ê chú kap hiah-ê in-ūi Siōng-tè ê bēng-lēng ngia̍uh-ngia̍uh-chhoah ê lâng só͘ gī-tiāⁿ-ê, chiàu lu̍t-hoat lâi kiâⁿ;

4你起來，因為chit-ê事是你所應該辦ê；阮beh幫贊你，你tio̍h好膽來做伊。lí khí-lâi, in-ūi chit ê sū sī lí só͘ eng-kai pān-ê; goán beh pang-chān lí, lí tio̍h hó-táⁿ lâi chòe i.

5以斯拉就起來，hō͘祭司hiah-ê頭人，kap利未人，kap以色列眾人chiù-chōa，beh照chit-ê話去行；in就chiù-chōa。Í-su-la̍h chiū khí-lâi, hō͘ chè-si hiah ê thâu-lâng, kap Lī-bī lâng, kap Í-sek-lia̍t chèng-lâng chiù-chōa, beh chiàu chit ê ōe khì kiâⁿ; in chiū chiù-chōa.

6以斯拉就tùi上帝ê殿前起來，入Í-lī-a-si̍t ê kiáⁿ Iok-hap-lân ê厝，到hia無食餅，無lim水；因為伊為tio̍h受掠tò來ê人所犯ê罪，來悲傷。Í-su-la̍h chiū tùi Siōng-tè ê tiān-chêng khí-lâi, ji̍p Í-lī-a-si̍t ê kiáⁿ Iok-hap-lân ê chhù, kàu hia bô chia̍h piáⁿ, bô lim chúi; in-ūi i ūi-tio̍h siū-lia̍h tò-lâi ê lâng só͘ hoān ê chōe, lâi pi-siong.

7In宣布tī遍猶大kap耶路撒冷受掠tò來ê人，kah in lóng聚集tī耶路撒冷。In soan-pò͘ tī piàn Iû-tāi kap Iâ-lō͘-sat-léng siū-lia̍h tò-lâi ê lâng, kah in lóng chū-chi̍p tī Iâ-lō͘-sat-léng.

8見若無thàn hiah-ê首領kap長老所議定，三日內無來ê，就beh抄伊所有ê業，beh激伊出受掠tò來ê人ê會。Kìⁿ-nā bô thàn hiah ê siú-léng kap tiúⁿ-ló só͘ gī-tiāⁿ, saⁿ-ji̍t-lāi bô-lâi--ê, chiū beh chhau i só͘ ū ê gia̍p, beh kek i chhut siū-lia̍h tò-lâi ê lâng ê hōe.

9Tùi án-ni，猶大kap便雅憫眾人三日內lóng聚集tī耶路撒冷；hit日是九月二十日；眾人lóng坐tī上帝殿前寬闊ê所在；因為chit-ê事，koh因為落大雨，就ngia̍uh-ngia̍uh-chhoah。Tùi án-ni Iû-tāi kap Piān-ngá-bín chèng-lâng saⁿ-ji̍t-lāi lóng chū-chi̍p tī Iâ-lō͘-sat-léng; hit-ji̍t sī káu-ge̍h jī-cha̍p ji̍t; chèng-lâng lóng chē tī Siōng-tè tiān-chêng khoan-khoah ê só͘-chāi; in-ūi chit ê sū, koh in-ūi lo̍h tōa-hō͘, chiū ngia̍uh-ngia̍uh-chhoah.

10祭司以斯拉起來，kā in講，Lín有罪，lín娶外邦ê cha-bó͘-kiáⁿ做bó͘，加添以色列人ê罪。Chè-si Í-su-la̍h khí-lâi, kā in kóng, Lín ū chōe, lín chhōa gōa-pang ê cha-bó͘-kiáⁿ chòe bó͘, ke-thiⁿ Í-sek-lia̍t lâng ê chōe.

11Taⁿ tio̍h ǹg耶和華，lín列祖ê上帝，認罪，行伊所歡喜ê，家己分別離開chiah-ê國ê百姓，kap外邦ê cha-bó͘-kiáⁿ。Taⁿ tio̍h ǹg Iâ-hô-hoa, lín lia̍t-chó͘ ê Siōng-tè, jīn-chōe, kiâⁿ I só͘ hoaⁿ-hí-ê, ka-kī hun-piat lī-khui chiah ê kok ê peh-sìⁿ, kap gōa-pang ê cha-bó͘-kiáⁿ.

12會眾lóng大聲應講，照你所講關係阮ê，阮beh行伊。Hōe-chiòng lóng tōa-siaⁿ ìn kóng, Chiàu lí só͘ kóng koan-hē goán-ê, goán beh kiâⁿ i.

13總是百姓真chōe，koh tú-tio̍h大雨ê時，阮bōe會khiā tī外面，這也m̄是一日兩日ê事，因為阮tī chit-ê事有大大犯罪。Chóng-sī peh-sìⁿ chin-chōe, koh tú-tio̍h tōa-hō͘ ê sî, goán bōe-ōe khiā tī gōa-bīn, che iā m̄-sī chi̍t-ji̍t nn̄g-ji̍t ê sū, in-ūi goán tī chit ê sū ū tōa-tōa hoān-chōe.

14Taⁿ tio̍h為全會設立咱ê首領，見若咱ê城中娶外邦ê cha-bó͘-kiáⁿ-ê，tio̍h照定tio̍h ê期來；hit-ê城ê長老士師tio̍h kap in來；直到咱ê上帝為tio̍h chit-ê事ê受氣收倒tńg。Taⁿ tio̍h ūi choân-hōe siat-li̍p lán ê siú-léng, kìⁿ-nā lán ê siâⁿ-tiong chhōa gōa-pang ê cha-bó͘-kiáⁿ--ê, tio̍h chiàu tiāⁿ-tio̍h ê kî lâi; hit ê siâⁿ ê tiúⁿ-ló sū-su tio̍h kap in lâi; ti̍t-kàu lán ê Siōng-tè ūi-tio̍h chit ê sū ê siū-khì siu tò-tńg.

15獨獨A-sat-hek ê kiáⁿ約拿單，Te̍k-óa ê kiáⁿ Ngá-hap-siā，反對chit-ê事；koh有Bí-su-lân，kap利未人Sa-pí-thài贊成in。To̍k-to̍k A-sat-hek ê kiáⁿ Iok-ná-tan, Te̍k-óa ê kiáⁿ Ngá-hap-siā, hoán-tùi chit ê sū; koh ū Bí-su-lân, kap Lī-bī lâng Sa-pí-thài chàn-sêng in.

16受掠tò來ê人án-ni行。祭司以斯拉kap族長kúi-nā人，照in ê宗族，lóng照in ê名受派；tī十月初一日in相kap坐，查察chit-ê事。Siū-lia̍h tò-lâi ê lâng án-ni kiâⁿ. Chè-si Í-su-la̍h kap cho̍k-tiúⁿ kúi-nā lâng, chiàu in ê chong-cho̍k, lóng chiàu in ê miâ siū-phài; tī cha̍p-ge̍h chhoe-it ji̍t in saⁿ-kap chē, cha-chhat chit ê sū.

17到正月初一，見若娶外邦ê cha-bó͘-kiáⁿ-ê chiah明白hit-ê事。Kàu chiaⁿ-ge̍h chhoe-it, kìⁿ-nā chhōa gōa-pang ê cha-bó͘-kiáⁿ--ê chiah bêng-pe̍k hit ê sū.

18Tī祭司kiáⁿ孫中查出娶外邦ê cha-bó͘-kiáⁿ ê，就是Iok-sat-tap ê kiáⁿ Iâ-su-a ê家，kap伊ê兄弟Má-se-ngá、Í-lī-í-siā、Ngá-li̍p、Ki-tāi-lī。Tī chè-si kiáⁿ-sun-tiong chhâ-chhut chhōa gōa-pang ê cha-bó͘-kiáⁿ ê, chiū-sī Iok-sat-tap ê kiáⁿ Iâ-su-a ê ke, kap i ê hiaⁿ-tī Má-se-ngá, Í-lī-í-siā, Ngá-li̍p, Ki-tāi-lī.

19In就牽手結盟beh離in ê bó͘，因為犯罪；就獻羊群中一隻綿羊káng，來贖罪。In chiū khan-chhiú kiat-bêng beh lî in ê bó͘, in-ūi hoān-chōe; chiū hiàn iûⁿ-kûn-tiong chi̍t chiah mî-iûⁿ-káng, lâi sio̍k-chōe.

20Im-be̍k ê kiáⁿ孫中，有Hap-ná-nî、Se-pa-tē-ngá。Im-be̍k ê kiáⁿ-sun-tiong, ū Hap-ná-nî, Se-pa-tē-ngá.

21Hap-lîm ê kiáⁿ孫中，有Má-se-ngá、Í-lī-ngá、Sī-má-ngá、Iâ-iat、O͘-se-ngá。Hap-lîm ê kiáⁿ-sun-tiong, ū Má-se-ngá, Í-lī-ngá, Sī-má-ngá, Iâ-iat, O͘-se-ngá.

22Pa-si-hō͘-jíⁿ ê kiáⁿ孫中，有Í-lī-iok-nái、Má-se-ngá、以實瑪利、Ná-thán-gia̍p、Iok-sat-poa̍t、Í-lī-a-sat。Pa-si-hō͘-jíⁿ ê kiáⁿ-sun-tiong, ū Í-lī-iok-nái, Má-se-ngá, Í-si̍t-má-lī, Ná-thán-gia̍p, Iok-sat-poa̍t, Í-lī-a-sat.

23利未人中，有Iok-sat-poa̍t、Sī-múi、Ki-la̍h-ngá、Ki-la̍h-ngá就是Ki-lī-tha；koh有Pí-tha-hi-ngá、猶大、Í-lī-í-siā。Lī-bī lâng tiong, ū Iok-sat-poa̍t, Sī-múi, Ki-la̍h-ngá, Ki-la̍h-ngá chiū-sī Ki-lī-tha; koh ū Pí-tha-hi-ngá, Iû-tāi, Í-lī-í-siā.

24唱歌ê人ê中間，有Í-lī-a-si̍t。顧門ê人ê中間有Sa-liông、Thê-liân、O͘-lī。Chhiùⁿ-koa ê lâng ê tiong-kan, ū Í-lī-a-si̍t. Kò͘-mn̂g ê lâng ê tiong-kan ū Sa-liông, Thê-liân, O͘-lī.

25以色列人Pa-lio̍k ê kiáⁿ孫中，有La̍h-bí、Iâ-se-ngá、Má-ki-ngá、Bí-ngá-bîn、Í-lī-a-sat、Má-ki-ngá、Pí-ná-ngá。Í-sek-lia̍t lâng Pa-lio̍k ê kiáⁿ-sun tiong, ū La̍h-bí, Iâ-se-ngá, Má-ki-ngá, Bí-ngá-bîn, Í-lī-a-sat, Má-ki-ngá, Pí-ná-ngá.

26Í-lân ê kiáⁿ孫中，有Má-tha-nî、撒迦利亞、Iâ-iat、Ap-tí、Iâ-lī-boa̍t、Í-lī-ngá。Í-lân ê kiáⁿ-sun tiong, ū Má-tha-nî, Sat-ka-lī-a, Iâ-iat, Ap-tí, Iâ-lī-boa̍t, Í-lī-ngá.

27Sat-thó͘ ê kiáⁿ孫中，有Í-lī-iok-nái、Í-lī-a-si̍t、Má-tha-nî、Iâ-lī-boa̍t、Sat-poa̍t、A-se-sat。Sat-thó͘ ê kiáⁿ-sun tiong, ū Í-lī-iok-nái, Í-lī-a-si̍t, Má-tha-nî, Iâ-lī-boa̍t, Sat-poa̍t, A-se-sat.

28Bí-pài ê kiáⁿ孫中，有Iok-hap-lân、Hap-ná-nî-ngá、Sat-pài、A-le̍k。Bí-pài ê kiáⁿ-sun tiong, ū Iok-hap-lân, Hap-ná-nî-ngá, Sat-pài, A-le̍k.

29Pa-nî ê kiáⁿ孫中，有Bí-su-lân、Má-lo̍k、A-tāi-ngá、Ngá-su̍t、Sī-ap、Iâ-lī-boa̍t。Pa-nî ê kiáⁿ-sun tiong, ū Bí-su-lân, Má-lo̍k, A-tāi-ngá, Ngá-su̍t, Sī-ap, Iâ-lī-boa̍t.

30Pa-hap-mô͘-ap ê kiáⁿ孫中，有A-tí-ná、Ki-la̍h、Pí-ná-ngá、Má-se-ngá、Má-tha-nî、Pí-sat-lia̍t、Pin-lōe、Má-ná-se。Pa-hap-mô͘-ap ê kiáⁿ-sun tiong, ū A-tí-ná, Ki-la̍h, Pí-ná-ngá, Má-se-ngá, Má-tha-nî, Pí-sat-lia̍t, Pin-lōe, Má-ná-se.

31Hap-lîm ê kiáⁿ孫中，有Í-lī-í-siā、I-si-ngá、Má-ki-ngá、Sī-má-ngá、西門；Hap-lîm ê kiáⁿ-sun tiong, ū Í-lī-í-siā, I-si-ngá, Má-ki-ngá, Sī-má-ngá, Se-biān;

32便雅憫、Má-lo̍k、Sī-má-lī-ngá。Piān-ngá-bín, Má-lo̍k, Sī-má-lī-ngá.

33Hap-sūn ê kiáⁿ孫中，有Má-te̍k-nái、Má-ta̍t-tha、Sat-poa̍t、Í-lī-hoat-lia̍t、Iâ-lī-mái、Má-ná-se、Sī-múi。Hap-sūn ê kiáⁿ-sun tiong, ū Má-te̍k-nái, Má-ta̍t-tha, Sat-poa̍t, Í-lī-hoat-lia̍t, Iâ-lī-mái, Má-ná-se, Sī-múi.

34Pa-nî ê kiáⁿ孫中，有馬大、Àm-lân、O͘-ek；Pa-nî ê kiáⁿ-sun tiong, ū Má-tāi, Àm-lân, O͘-ek;

35Pí-ná-ngá、Pí-tí-ngá、Ki-lo̍k；Pí-ná-ngá, Pí-tí-ngá, Ki-lo̍k;

36Óa-nî-ngá、Bí-lī-boa̍t、Í-lī-ao-si̍t；Óa-nî-ngá, Bí-lī-boa̍t, Í-lī-a-si̍t;

37Má-tha-nî、Má-te̍k-nái、Ngá-sò；Má-tha-nî, Má-te̍k-nái, Ngá-sò;

38Pa-nî、Pin-lōe、Sī-múi；Pa-nî, Pin-lōe, Sī-múi;

39Sī-lī-bí-ngá、Ná-tan、A-tāi-ngá；Sī-lī-bí-ngá, Ná-tan, A-tāi-ngá;

40Má-ná-tí-pài、Sa-sài、Sa-nāi；Má-ná-tí-pài, Sa-sài, Sa-nāi;

41A-sat-lī、Sī-lī-bí-ngá、Sī-má-lī-ngá；A-sat-lī, Sī-lī-bí-ngá, Sī-má-lī-ngá;

42Sa-liông、A-má-lī-ngá、約瑟。Sa-liông, A-má-lī-ngá, Iok-sek.

43Nî-pho ê kiáⁿ孫中，有Iâ-lī、Má-tha-thê-ngá、Sat-poa̍t、Se-pí-ná、Ngá-tāi、約珥、Pí-ná-ngá。Nî-pho ê kiáⁿ-sun tiong, ū Iâ-lī, Má-tha-thê-ngá, Sat-poa̍t, Se-pí-ná, Ngá-tāi, Iok-jíⁿ, Pí-ná-ngá.

44Chiah-ê人lóng娶外邦人ê cha-bó͘-kiáⁿ做bó͘；其中也有人tùi chiah-ê cha-bó͘-kiáⁿ生kiáⁿ兒。Chiah ê lâng lóng chhōa gōa-pang lâng ê cha-bó͘-kiáⁿ chòe-bó͘; kî-tiong iā ū lâng tùi chiah ê cha-bó͘-kiáⁿ siⁿ kiáⁿ-jî.