1保羅做使徒(m̄是出tī人，也m̄是tùi人，就是tùi耶穌基督kap hō͘伊tùi死人中koh活ê父上帝)Pó-lô chòe sù-tô͘ (m̄ sī chhut tī lâng, iā m̄ sī tùi lâng, chiū-sī tùi Iâ-so͘ Ki-tok kap hō͘ I tùi sí-lâng tiong koh-oa̍h ê Pē Siōng-tè )

2taⁿ kap同tī-teh ê眾兄弟，phoe寄hō͘加拉太chiah-ê教會：taⁿ kap tâng tī-teh ê chèng hiaⁿ-tī phoe kià hō͘ Ka-lia̍p-thài chiah ê kàu-hōe:

3願lín tùi父上帝kap咱ê主耶穌基督得tio̍h恩典平安；goān lín tùi Pē Siōng-tè kap lán ê Chú Iâ-so͘ Ki-tok tit-tio̍h un-tián pêng-an;

4伊為tio̍h咱ê罪獻家己，beh救咱出現今pháiⁿ ê世代，就是照咱ê父上帝ê旨意；I ūi-tio̍h lán ê chōe hiàn ka-kī, beh kiù lán chhut hiān-kim pháiⁿ ê sè-tāi, chiū-sī chiàu lán ê Pē Siōng-tè ê chí-ì;

5願榮光歸伊到代代。À-bēng。goān êng-kng kui I kàu tāi-tāi. À-bēng.

6前tī基督ê恩召lín ê，lín離開伊到chiah緊，去thàn別樣ê福音，是我所奇怪；Chêng tī Ki-tok ê un tiàu lín ê, lín lī-khui I kàu chiah kín, khì thàn pa̍t iūⁿ ê hok-im, sī góa só͘ kî-koài;

7hit-ê別ê m̄是福音，不過有人攪擾lín，ài phah亂基督ê福音nā-tiāⁿ。hit ê pa̍t-ê m̄ sī hok-im, put-kò ū lâng kiáu-jiáu lín, ài phah-loān Ki-tok ê hok-im nā-tiāⁿ.

8Taⁿ設使阮，á是tùi天來ê天使傳福音hō͘ lín，各樣tī阮所bat傳hō͘ lín ê，伊tio̍h受咒詛。Taⁿ siat-sú goán, á-sī tùi thiⁿ lâi ê thiⁿ-sài thoân hok-im hō͘ lín, koh-iūⁿ tī goán só͘ bat thoân hō͘ lín ê, i tio̍h siū chiù-chó͘.

9親像阮前bat講ê，taⁿ我koh講伊，若有人傳福音hō͘ lín，各樣tī lín所bat受ê，伊tio̍h受咒詛。Chhin-chhiūⁿ goán chêng bat kóng ê, taⁿ góa koh kóng i, nā ū lâng thoân hok-im hō͘ lín, koh-iūⁿ tī lín só͘ bat siū ê, i tio̍h siū chiù-chó͘.

10我taⁿ是teh對人諂媚mah？ á是對上帝ah？Á是我teh求hō͘人歡喜ah？我若iáu-kú ài hō͘人歡喜，就m̄是基督ê奴僕。Góa taⁿ sī teh tùi lâng thiám-mī mah? Á-sī tùi Siōng-tè ah? Á-sī góa teh kiû hō͘ lâng hoaⁿ-hí ah? Góa nā iáu-kú ài hō͘ lâng hoaⁿ-hí, chiū m̄ sī Ki-tok ê lô͘-po̍k.

11兄弟ah，我報lín知論我平素所傳ê福音，hit-ê m̄是照人ê意思。Hiaⁿ-tī ah, góa pò lín chai lūn góa pêng-sò͘ só͘ thoân ê hok-im, hit-ê m̄ sī chiàu lâng ê ì-sù.

12因為我未bat tùi人受tio̍h，也無受人教示，是tùi耶穌基督ê啟示。In-ūi góa bē bat tùi lâng siū-tio̍h, iā bô siū lâng kà-sī, sī tùi Iâ-so͘ Ki-tok ê khé-sī.

13Lín bat聽見我前tī猶太到所行做ê，就是khún-tio̍k上帝ê教會真thiám，來陷害伊。Lín bat thiaⁿ-kìⁿ góa chêng tī Iû-thài kàu só͘ kiâⁿ-chòe ê, chiū-sī khún-tio̍k Siōng-tè ê kàu-hōe chin thiám, lâi hām-hāi i.

14Koh我tī猶太到比本族同輩ê chōe-chōe人khah進步，為tio̍h我祖宗ê遺傳koh-khah熱心。Koh góa tī Iû-thài kàu pí pún-cho̍k tâng-pòe ê chōe-chōe lâng khah chìn-pō͘, ūi-tio̍h góa chó͘-chong ê ûi-thoân koh khah jia̍t-sim.

15但是tùi阮老母ê胎分別我，用伊ê恩典召我ê上帝，Nā-sī tùi goán lāu-bú ê thai hun-piat góa, ēng I ê un-tián tiàu góa ê Siōng-tè,

16既然歡喜將伊ê Kiáⁿ顯明tī我，beh hō͘我宣傳伊tī外邦，我就無kap人參詳，kì-jiân hoaⁿ-hí chiong I ê Kiáⁿ hián-bêng tī góa, beh hō͘ góa soan-thoân I tī gōa-pang, góa chiū bô kap lâng chham-siông,

17也無上耶路撒冷就近hiah-ê事先我做使徒ê；獨獨去阿拉伯，koh 倒tńg來大馬色。iā bô chiūⁿ Iâ-lō͘-sat-léng chiū-kūn hiah ê tāi-seng góa chòe sù-tô͘ ê; to̍k-to̍k khì A-lat-pek, koh tò-tńg-lâi Tāi-má-sek.

18三年後，我上耶路撒冷，去探磯法，kap伊tòa十五日。Saⁿ nî āu góa chiūⁿ Iâ-lō͘-sat-léng, khì thàm Ki-hoat, kap i tòa cha̍p-gō͘ ji̍t.

19其餘ê使徒，除去主ê兄弟雅各以外，我lóng無見tio̍h。Kî-û ê sù-tô͘, tû-khì Chú ê hiaⁿ-tī Ngá-kok í-gōa, góa lóng bô kìⁿ-tio̍h.

20Taⁿ我所寫hō͘ lín ê，我tī上帝ê面前無白賊。Taⁿ góa só͘ siá hō͘ lín ê, góa tī Siōng-tè ê bīn-chêng bô pe̍h-chha̍t.

21後來我到敘利亞kap Ki-lī-ka ê地方。Āu-lâi góa kàu Sū-lī-a kap Ki-lī-ka ê tōe-hng.

22Hit時屬猶太地tiàm-tī基督chiah-ê教會，iáu-kú m̄-bat我ê面；in kan-ta聽見講，Hit sî sio̍k Iû-thài tōe tiàm-tī Ki-tok chiah ê kàu-hōe, iáu-kú m̄ bat góa ê bīn; in kan-ta thiaⁿ-kìⁿ kóng,

23前khún-tio̍k咱ê，taⁿ傳伊平素所陷害ê教；Chêng khún-tio̍k lán ê, taⁿ thoân i pêng-sò͘ só͘ hām-hāi ê kàu;

24就因為我歸榮光上帝。chiū in-ūi góa kui êng-kng Siōng-tè.

1過十四年，我kap巴拿巴koh上耶路撒冷，也chhōa提多saⁿ-kap去。Kè cha̍p-sì nî góa kap Pa-ná-pa koh chiūⁿ Iâ-lō͘-sat-léng, iā chhōa Thê-to saⁿ-kap khì.

2我是奉啟示chiah上去；koh將我tī外邦所傳ê福音對in排列，是另外tùi有名望ê人排列，免我現今á是以前所行ê歸tī空空。Góa sī hōng khé-sī chiah chiūⁿ khì; koh chiong góa tī gōa-pang só͘ thoân ê hok-im tùi in pâi-lia̍t, sī lēng-gōa tùi ū bêng-bōng ê lâng pâi-lia̍t, bián góa hiān-kim á-sī í-chêng só͘ kiâⁿ ê kui tī khang-khang.

3Kap我去ê提多，是希利尼人，也無hō͘人勉強伊受割禮。Kap góa khì ê Thê-to, sī Hi-lī-nî lâng, iā bô hō͘ lâng bián-kióng i siū kat-lé.

4是為tio̍h有暗靜引進來假ê兄弟，in暗靜入來偷看阮tiàm-tī基督耶穌所有ê自由，beh hō͘阮成做奴僕。Sī ūi-tio̍h ū àm-chīⁿ ín-chìn lâi ké ê hiaⁿ-tī, in àm-chīⁿ ji̍p lâi thau-khòaⁿ goán tiàm-tī Ki-tok Iâ-so͘ só͘ ū ê chū-iû, beh hō͘ goán chiâⁿ-chòe lô͘-po̍k.

5阮未bat一時降服來讓in，是beh hō͘福音ê真理長長存tī lín中間。Goán bē bat chi̍t sî hâng-ho̍k lâi niū in, sī beh hō͘ hok-im ê chin-lí tn̂g-tn̂g chûn tī lín tiong-kan.

6對ti7hiah-ê號做有名望ê人，(無論in前是甚麼等號ê人，tī我無ch活；上帝無用外貌取人) ，究竟hiah-ê有名望ê人tī我無加添甚麼。Tùi tī hiah ê hō chòe ū bêng-bōng ê lâng, (bô lūn in chêng sī sím-mi̍h téng-hō ê lâng, tī góa bô choa̍h; Siōng-tè bô ēng gōa-māu chhú lâng), kiù-kèng hiah ê ū bêng-bōng ê lâng tī góa bô ke-thiⁿ sím-mi̍h.

7反tńg是án-ni，in看見主託重我傳福音hō͘未受割禮ê，親像託重彼得傳福音hō͘已經受割禮ê，Hoán-tńg sī án-ni, in khòaⁿ-kìⁿ Chú thok-tiōng góa thoân hok-im hō͘ bē siū kat-lé ê, chhin-chhiūⁿ thok-tiōng Pí-tek thoân hok-im hō͘ í-keng siū kat-lé ê,

8(因為出力行tī彼得，hō͘伊做受割禮ê ê使徒，也出力行tī我，hō͘我做外邦ê使徒) ，(in-ūi chhut-la̍t kiâⁿ tī Pí-tek, hō͘ i chòe siū kat-lé ê ê sù-tô͘, iā chhut-la̍t kiâⁿ tī góa, hō͘ góa chòe gōa-pang ê sù-tô͘),

9koh知所賞賜我ê恩典，就雅各、磯法、約翰，人看做柱石ê，chhun chiàⁿ手kap我chham巴拿巴相交陪，hō͘阮去就近外邦人，也in去就近受割禮ê；koh chai só͘ siúⁿ-sù góa ê un-tián, chiū Ngá-kok, Ki-hoat, Iok-hān, lâng khòaⁿ chòe thiāu-chio̍h ê, chhun chiàⁿ chhiú kap góa chham Pa-ná-pa saⁿ kau-pôe, hō͘ goán khì chiū-kūn gōa-pang lâng, iā in khì chiū-kūn siū kat-lé ê;

10獨獨ài阮siàu念sòng-hiong人；這也是我本致意teh行ê。to̍k-to̍k ài goán siàu-liām sòng-hiong lâng; che iā sī góa pún tì-ì teh kiâⁿ ê.

11但是磯法到安提阿ê時，我當面抵敵伊，是伊有犯罪。Nā-sī Ki-hoat kàu An-thê-o ê sî, góa tng-bīn tí-te̍k i, sī i ū hoān-chōe.

12因為有kúi-nā人tùi雅各hia來，猶未到ê時，伊kap外邦人saⁿ-kap食；in已經到，伊驚受割禮ê人，就退開來家己分別。In-ūi ū kúi-nā lâng tùi Ngá-kok hia lâi, iáu-bē kàu ê sî, i kap gōa-pang lâng saⁿ-kap chia̍h; in í-keng kàu, i kiaⁿ siū kat-lé ê lâng, chiū thè-khui lâi ka-kī hun-piat.

13其餘ê猶太人也kap伊裝做，致到連巴拿巴也tùi in ê裝做受引誘。Kî-û ê Iû-thài lâng iā kap i chng-chòe, tì-kàu liân Pa-ná-pa iā tùi in ê chng-chòe siū ín-iú.

14總是我看見in無照直行來thàn福音ê真理，就tī眾人ê面前kā磯法講，你是猶太人，做人既然親像外邦人，無親像猶太人，啥事teh勉強外邦人學猶太人ah？Chóng-sī góa khòaⁿ-kìⁿ in bô chiàu-ti̍t kiâⁿ lâi thàn hok-im ê chin-lí, chiū tī chèng lâng ê bīn-chêng kā Ki-hoat kóng, Lí sī Iû-thài lâng, chòe-lâng kì-jiân chhin-chhiūⁿ gōa-pang lâng, bô chhin-chhiūⁿ Iû-thài lâng, siáⁿ-sū teh bián-kióng gōa-pang lâng o̍h Iû-thài lâng ah?

15咱出世做猶太人，m̄是外邦ê罪人。Lán chhut-sì chòe Iû-thài lâng, m̄ sī gōa-pang ê chōe-jîn.

16既然知人得tio̍h稱做義，m̄是tùi thàn律法，獨獨tùi信耶穌基督，咱也有信靠基督耶穌，hō͘咱tùi信基督得tio̍h稱做義，m̄是tùi thàn律法，因為tùi thàn律法無人能得tio̍h稱做義。Kì-jiân chai lâng tit-tio̍h chheng-chòe-gī m̄ sī tùi thàn lu̍t-hoat, to̍k-to̍k tùi sìn Iâ-so͘ Ki-tok, lán iā ū sìn-khò Ki-tok Iâ-so͘, hō͘ lán tùi sìn Ki-tok tit-tio̍h chheng-chòe-gī, m̄ sī tùi thàn lu̍t-hoat, in-ūi tùi thàn lu̍t-hoat bô lâng ōe tit-tio̍h chheng-chòe-gī.

17Taⁿ設使咱teh求tī基督得tio̍h稱做義，也家己iáu-kú顯出做有罪ê人，án-ni基督是罪惡ê差用mah？斷斷m̄是；Taⁿ siat-sú lán teh kiû tī Ki-tok tit-tio̍h chheng-chòe-gī, iā ka-kī iáu-kú hián-chhut chòe ū chōe ê lâng, án-ni Ki-tok sī chōe-ok ê chhe-ēng mah? Toàn-toàn m̄ sī;

18因為我若koh起我前所廢ê，就是表明家己做犯法ê人。in-ūi góa nā koh khí góa chêng só͘ húi ê, chiū-sī piáu-bêng ka-kī chòe hoān-hoat ê lâng.

19因為我tùi律法，就ǹg律法已經死，beh hō͘我ǹg上帝來活。In-ūi góa tùi lu̍t-hoat, chiū ǹg lu̍t-hoat í-keng sí, beh hō͘ góa ǹg Siōng-tè lâi oa̍h.

20我bat kap基督同釘十字架；我iáu-kú teh活，m̄是猶原我，就是基督tiàm-tī我teh活；koh我現今tī肉體所有ê活，是在tī信上帝ê Kiáⁿ來活，伊bat疼我，替我獻家己。Góa bat kap Ki-tok tâng tèng si̍p-jī-kè; góa iáu-kú teh oa̍h, m̄ sī iû-goân góa, chiū-sī Ki-tok tiàm-tī góa teh oa̍h; koh góa hiān-kim tī jio̍k-thé só͘ ū ê oa̍h, sī chāi-tī sìn Siōng-tè ê Kiáⁿ lâi oa̍h, I bat thiàⁿ góa, thòe góa hiàn ka-kī.

21我無廢無上帝ê恩典；因為tùi律法若會得tio̍h義，就基督無因端來死。Góa bô hòe-bô Siōng-tè ê un-tián; in-ūi tùi lu̍t-hoat nā ōe tit-tio̍h gī, chiū Ki-tok bô in-toaⁿ lâi sí.

1戇ê加拉太人ah，耶穌基督釘十字架已經形容真明tī lín ê目睭前，taⁿ lín hō͘ 是誰迷去ah？Gōng ê Ka-lia̍p-thài lâng ah, Iâ-so͘ Ki-tok tèng si̍p-jī-kè í-keng hêng-iông chin bêng tī lín ê ba̍k-chiu chêng, taⁿ lín hō͘ chī-chūi bê-khì ah?

2我kan-ta問lín一項，Lín前受tio̍h聖神是tùi thàn律法來行，á是tùi聽來信ah？Góa kan-ta mn̄g lín chi̍t hāng, Lín chêng siū-tio̍h Sèng Sîn sī tùi thàn lu̍t-hoat lâi kiâⁿ, á-sī tùi thiaⁿ lâi sìn ah?

3Lín到chiah戇ah？Lín既然tī聖神做起頭，taⁿ就tī肉體chhiâⁿ尾mah？Lín kàu chiah gōng ah? Lín kì-jiân tī Sèng Sîn chòe khí-thâu, taⁿ chiū tī jio̍k-thé chhiâⁿ-bé mah?

4Lín受hiah-chōe項ê艱苦kiám空空mah？總無真正空空ah。Lín siū hiah chōe hāng ê kan-khó͘ kiám khang-khang mah? Chóng bô chin-chiàⁿ khang-khang ah.

5Hit-ê賞賜lín聖神，koh出力行chiah-ê權能tī lín中間ê，是tùi lín thàn律法來行，á是tùi lín聽來信ah？Hit ê siúⁿ-sù lín Sèng Sîn, koh chhut-la̍t kiâⁿ chiah ê koân-lêng tī lín tiong-kan ê, sī tùi lín thàn lu̍t-hoat lâi kiâⁿ, á-sī tùi lín thiaⁿ lâi sìn ah?

6親像亞伯拉罕信上帝，就kā伊算做義。Chhin-chhiūⁿ A-pek-la̍h-hán sìn Siōng-tè, chiū kā i sǹg chòe gī.

7所以lín tio̍h知，見若信ê人就是亞伯拉罕ê kiaⁿ孫。Só͘-í lín tio̍h chai kìⁿ-nā sìn ê lâng chiū-sī A-pek-la̍h-hán ê kiáⁿ-sun.

8聖經事先看出上帝beh hō͘外邦人tùi信稱做義，就事先傳福音hō͘亞伯拉罕講，萬邦beh對你得tio̍h福氣。Sèng-keng tāi-seng khòaⁿ-chhut Siōng-tè beh hō͘ gōa-pang lâng tùi sìn chheng-chòe-gī, chiū tāi-seng thoân hok-im hō͘ A-pek-la̍h-hán kóng, Bān pang beh tùi lí tit-tio̍h hok-khì.

9可見見若信ê人kap有信ê亞伯拉罕同得tio̍h福氣。Khó-kiàn kìⁿ-nā sìn ê lâng kap ū sìn ê A-pek-la̍h-hán tâng tit-tio̍h hok-khì.

10見若靠本身行律法ê lóng受咒詛；因為有記載講，見若無長長照律法ê冊lóng總所記載來行伊ê，tio̍h受咒詛。Kìⁿ-nā khò pún-sin kiâⁿ lu̍t-hoat ê lóng siū chiù-chó͘; in-ūi ū kì-chài kóng, Kìⁿ-nā bô tn̂g-tn̂g chiàu lu̍t-hoat ê chheh lóng-chóng só͘ kì-chài lâi kiâⁿ i ê, tio̍h siū chiù-chó͘.

11Taⁿ靠律法無人tī上帝ê面前稱做義是明，因為，義ê人beh tùi信來活。Taⁿ khò lu̍t-hoat bô lâng tī Siōng-tè ê bīn-chêng chheng-chòe-gī sī bêng, in-ūi, Gī ê lâng beh tùi sìn lâi oa̍h.

12但是律法m̄是tùi信，獨獨，行chiah-ê ê，beh tùi chiah-ê來活。Nā-sī lu̍t-hoat m̄ sī tùi sìn, to̍k-to̍k, Kiâⁿ chiah-ê ê, beh tùi chiah-ê lâi oa̍h.

13基督已經贖回咱脫離律法ê咒詛，因為伊為tio̍h咱成做咒詛，因為有記載講，見若召tī柴裡ê受咒詛；Ki-tok í-keng sio̍k-hôe lán thoat-lī lu̍t-hoat ê chiù-chó͘, in-ūi I ūi-tio̍h lán chiâⁿ-chòe chiù-chó͘, in-ūi ū kì-chài kóng, Kìⁿ-nā tiàu tī chhâ-ni̍h ê siū chiù-chó͘;

14beh hō͘亞伯拉罕ê福氣，tùi基督耶穌，續到tī外邦，hō͘咱tùi信得tio̍h所應允ê聖神。beh hō͘ A-pek-la̍h-hán ê hok-khì, tùi Ki-tok Iâ-so͘, sòa kàu tī gōa-pang, hō͘ lán tùi sìn tit-tio̍h só͘ èng-ún ê Sèng Sîn.

15兄弟ah，我照人ê tāi-chì來講：雖然是人ê約，若已經定tio̍h，就無人kā伊廢無á是加添。Hiaⁿ-tī ah, góa chiàu lâng ê tāi-chì lâi kóng: sui-jiân sī lâng ê iok, nā í-keng tiāⁿ-tio̍h, chiū bô lâng kā i hòe-bô á-sī ke-thiⁿ.

16Taⁿ chiah-ê應允是對亞伯拉罕以及伊ê後裔講。伊無講，以及你chiah-ê後裔，親像指chōe-chōe人；是講，以及你ê後裔，親像指一人，就是基督。Taⁿ chiah ê èng-ún sī tùi A-pek-la̍h-hán í-ki̍p i ê hō͘-è kóng. I bô kóng, Í-ki̍p lí chiah ê hō͘-è, chhin-chhiūⁿ chí chōe-chōe lâng; sī kóng, Í-ki̍p lí ê hō͘-è, chhin-chhiūⁿ chí chi̍t lâng, chiū-sī Ki-tok.

17Taⁿ我講，上帝所事先定tio̍h ê約，m̄是hit-ê四百三十年後ê律法所能kā伊廢無，致到所應允ê歸tī空空。Taⁿ góa kóng, Siōng-tè só͘ tāi-seng tiāⁿ-tio̍h ê iok, m̄ sī hit ê sì-pah saⁿ-cha̍p nî āu ê lu̍t-hoat só͘ ōe kā i hòe-bô, tì-kàu só͘ èng-ún ê kui tī khang-khang.

18因為承接家業，但是tùi律法，就無tùi應允；總是上帝恩賜亞伯拉罕是照應允。In-ūi sêng-chiap ke-gia̍p, nā sī tùi lu̍t-hoat, chiū bô tùi èng-ún; chóng-sī Siōng-tè un-sù A-pek-la̍h-hán sī chiàu èng-ún.

19Án-ni律法是怎樣？是為tio̍h chiah-ê過失來加設，thèng候hit-ê得tio̍h應允ê後裔到；也是tùi天使，經過中保ê手，來設。Án-ni lu̍t-hoat sī cháiⁿ-iūⁿ? sī ūi-tio̍h chiah ê kè-sit lâi ke-siat, thèng-hāu hit ê tit-tio̍h èng-ún ê hō͘-è kàu; iā sī tùi thiⁿ-sài, keng-kè tiong-pó ê chhiú, lâi siat.

20Taⁿ中保m̄是做一個ê中保，但是上帝是一個。Taⁿ tiong-pó m̄ sī chòe chi̍t-ê ê tiong-pó, nā-sī Siōng-tè sī chi̍t-ê.

21Án-ni律法kap上帝ê應允對逆mah？斷斷m̄是。因為若bat傳一個律法能hō͘人活ê，就義實在是tùi律法。Án-ni lu̍t-hoat kap Siōng-tè ê èng-ún tùi-ke̍h mah? Toàn-toàn m̄ sī. In-ūi nā bat thoân chi̍t ê lu̍t-hoat ōe hō͘ lâng oa̍h ê, chiū gī si̍t-chāi sī tùi lu̍t-hoat.

22總是聖經已經將萬人圍tī罪惡內，beh hō͘所應允ê，thang tùi信耶穌基督，來賞賜hiah-ê信ê人。Chóng-sī sèng-keng í-keng chiong bān lâng ûi tī chōe-ok lāi, beh hō͘ só͘ èng-ún ê, thang tùi sìn Iâ-so͘ Ki-tok, lâi siúⁿ-sù hiah ê sìn ê lâng.

23總是chit-ê信未到ê事先，咱受顧守tī律法下，圍teh來thèng候beh顯明ê信。Chóng-sī chit ê sìn bē kàu ê tāi-seng, lán siū kò͘-siú tī lu̍t-hoat ē, ûi-teh lâi thèng-hāu beh hián-bêng ê sìn.

24Án-ni律法是做管顧gín-ná ê，chhōa咱到基督，hō͘咱tùi信來稱做義。Án-ni lu̍t-hoat sī chòe koán-kò͘ gín-ná ê, chhōa lán kàu Ki-tok, hō͘ lán tùi sìn lâi chheng-chòe-gī.

25但是信已經到，就無koh降服tī管顧gín-ná ê。Nā-sī sìn í-keng kàu, chiū bô koh hâng-ho̍k tī koán-kò͘ gín-ná ê.

26因為lín tùi信靠基督耶穌，lóng做上帝ê kiáⁿ。In-ūi lín tùi sìn-khò Ki-tok Iâ-so͘, lóng chòe Siōng-tè ê kiáⁿ.

27因為lín見若受洗禮來入tī基督ê，是bat穿基督。In-ūi lín kìⁿ-nā siū sóe-lé lâi ji̍p tī Ki-tok ê, sī bat chhēng Ki-tok.

28無有猶太á是希利尼，奴僕á是自由ê，ta-po͘人婦人人ê分別；因為lín tī基督耶穌lóng是一個。Bô ū Iû-thài á-sī Hi-lī-nî, lô͘-po̍k á-sī chū-iû ê, ta-po͘-lâng hū-jîn-lâng ê hun-piat; in-ūi lín tī Ki-tok Iâ-so͘ lóng sī chi̍t-ê.

29Lín若屬基督就做亞伯拉罕ê後裔，照應允來做後嗣。Lín nā sio̍k Ki-tok chiū chòe A-pek-la̍h-hán ê hō͘-è, chiàu èng-ún lâi chòe hō͘-sû.