1過十四年，我kap巴拿巴koh上耶路撒冷，也chhōa提多saⁿ-kap去。Kè cha̍p-sì nî góa kap Pa-ná-pa koh chiūⁿ Iâ-lō͘-sat-léng, iā chhōa Thê-to saⁿ-kap khì.

2我是奉啟示chiah上去；koh將我tī外邦所傳ê福音對in排列，是另外tùi有名望ê人排列，免我現今á是以前所行ê歸tī空空。Góa sī hōng khé-sī chiah chiūⁿ khì; koh chiong góa tī gōa-pang só͘ thoân ê hok-im tùi in pâi-lia̍t, sī lēng-gōa tùi ū bêng-bōng ê lâng pâi-lia̍t, bián góa hiān-kim á-sī í-chêng só͘ kiâⁿ ê kui tī khang-khang.

3Kap我去ê提多，是希利尼人，也無hō͘人勉強伊受割禮。Kap góa khì ê Thê-to, sī Hi-lī-nî lâng, iā bô hō͘ lâng bián-kióng i siū kat-lé.

4是為tio̍h有暗靜引進來假ê兄弟，in暗靜入來偷看阮tiàm-tī基督耶穌所有ê自由，beh hō͘阮成做奴僕。Sī ūi-tio̍h ū àm-chīⁿ ín-chìn lâi ké ê hiaⁿ-tī, in àm-chīⁿ ji̍p lâi thau-khòaⁿ goán tiàm-tī Ki-tok Iâ-so͘ só͘ ū ê chū-iû, beh hō͘ goán chiâⁿ-chòe lô͘-po̍k.

5阮未bat一時降服來讓in，是beh hō͘福音ê真理長長存tī lín中間。Goán bē bat chi̍t sî hâng-ho̍k lâi niū in, sī beh hō͘ hok-im ê chin-lí tn̂g-tn̂g chûn tī lín tiong-kan.

6對ti7hiah-ê號做有名望ê人，(無論in前是甚麼等號ê人，tī我無ch活；上帝無用外貌取人) ，究竟hiah-ê有名望ê人tī我無加添甚麼。Tùi tī hiah ê hō chòe ū bêng-bōng ê lâng, (bô lūn in chêng sī sím-mi̍h téng-hō ê lâng, tī góa bô choa̍h; Siōng-tè bô ēng gōa-māu chhú lâng), kiù-kèng hiah ê ū bêng-bōng ê lâng tī góa bô ke-thiⁿ sím-mi̍h.

7反tńg是án-ni，in看見主託重我傳福音hō͘未受割禮ê，親像託重彼得傳福音hō͘已經受割禮ê，Hoán-tńg sī án-ni, in khòaⁿ-kìⁿ Chú thok-tiōng góa thoân hok-im hō͘ bē siū kat-lé ê, chhin-chhiūⁿ thok-tiōng Pí-tek thoân hok-im hō͘ í-keng siū kat-lé ê,

8(因為出力行tī彼得，hō͘伊做受割禮ê ê使徒，也出力行tī我，hō͘我做外邦ê使徒) ，(in-ūi chhut-la̍t kiâⁿ tī Pí-tek, hō͘ i chòe siū kat-lé ê ê sù-tô͘, iā chhut-la̍t kiâⁿ tī góa, hō͘ góa chòe gōa-pang ê sù-tô͘),

9koh知所賞賜我ê恩典，就雅各、磯法、約翰，人看做柱石ê，chhun chiàⁿ手kap我chham巴拿巴相交陪，hō͘阮去就近外邦人，也in去就近受割禮ê；koh chai só͘ siúⁿ-sù góa ê un-tián, chiū Ngá-kok, Ki-hoat, Iok-hān, lâng khòaⁿ chòe thiāu-chio̍h ê, chhun chiàⁿ chhiú kap góa chham Pa-ná-pa saⁿ kau-pôe, hō͘ goán khì chiū-kūn gōa-pang lâng, iā in khì chiū-kūn siū kat-lé ê;

10獨獨ài阮siàu念sòng-hiong人；這也是我本致意teh行ê。to̍k-to̍k ài goán siàu-liām sòng-hiong lâng; che iā sī góa pún tì-ì teh kiâⁿ ê.

11但是磯法到安提阿ê時，我當面抵敵伊，是伊有犯罪。Nā-sī Ki-hoat kàu An-thê-o ê sî, góa tng-bīn tí-te̍k i, sī i ū hoān-chōe.

12因為有kúi-nā人tùi雅各hia來，猶未到ê時，伊kap外邦人saⁿ-kap食；in已經到，伊驚受割禮ê人，就退開來家己分別。In-ūi ū kúi-nā lâng tùi Ngá-kok hia lâi, iáu-bē kàu ê sî, i kap gōa-pang lâng saⁿ-kap chia̍h; in í-keng kàu, i kiaⁿ siū kat-lé ê lâng, chiū thè-khui lâi ka-kī hun-piat.

13其餘ê猶太人也kap伊裝做，致到連巴拿巴也tùi in ê裝做受引誘。Kî-û ê Iû-thài lâng iā kap i chng-chòe, tì-kàu liân Pa-ná-pa iā tùi in ê chng-chòe siū ín-iú.

14總是我看見in無照直行來thàn福音ê真理，就tī眾人ê面前kā磯法講，你是猶太人，做人既然親像外邦人，無親像猶太人，啥事teh勉強外邦人學猶太人ah？Chóng-sī góa khòaⁿ-kìⁿ in bô chiàu-ti̍t kiâⁿ lâi thàn hok-im ê chin-lí, chiū tī chèng lâng ê bīn-chêng kā Ki-hoat kóng, Lí sī Iû-thài lâng, chòe-lâng kì-jiân chhin-chhiūⁿ gōa-pang lâng, bô chhin-chhiūⁿ Iû-thài lâng, siáⁿ-sū teh bián-kióng gōa-pang lâng o̍h Iû-thài lâng ah?

15咱出世做猶太人，m̄是外邦ê罪人。Lán chhut-sì chòe Iû-thài lâng, m̄ sī gōa-pang ê chōe-jîn.

16既然知人得tio̍h稱做義，m̄是tùi thàn律法，獨獨tùi信耶穌基督，咱也有信靠基督耶穌，hō͘咱tùi信基督得tio̍h稱做義，m̄是tùi thàn律法，因為tùi thàn律法無人能得tio̍h稱做義。Kì-jiân chai lâng tit-tio̍h chheng-chòe-gī m̄ sī tùi thàn lu̍t-hoat, to̍k-to̍k tùi sìn Iâ-so͘ Ki-tok, lán iā ū sìn-khò Ki-tok Iâ-so͘, hō͘ lán tùi sìn Ki-tok tit-tio̍h chheng-chòe-gī, m̄ sī tùi thàn lu̍t-hoat, in-ūi tùi thàn lu̍t-hoat bô lâng ōe tit-tio̍h chheng-chòe-gī.

17Taⁿ設使咱teh求tī基督得tio̍h稱做義，也家己iáu-kú顯出做有罪ê人，án-ni基督是罪惡ê差用mah？斷斷m̄是；Taⁿ siat-sú lán teh kiû tī Ki-tok tit-tio̍h chheng-chòe-gī, iā ka-kī iáu-kú hián-chhut chòe ū chōe ê lâng, án-ni Ki-tok sī chōe-ok ê chhe-ēng mah? Toàn-toàn m̄ sī;

18因為我若koh起我前所廢ê，就是表明家己做犯法ê人。in-ūi góa nā koh khí góa chêng só͘ húi ê, chiū-sī piáu-bêng ka-kī chòe hoān-hoat ê lâng.

19因為我tùi律法，就ǹg律法已經死，beh hō͘我ǹg上帝來活。In-ūi góa tùi lu̍t-hoat, chiū ǹg lu̍t-hoat í-keng sí, beh hō͘ góa ǹg Siōng-tè lâi oa̍h.

20我bat kap基督同釘十字架；我iáu-kú teh活，m̄是猶原我，就是基督tiàm-tī我teh活；koh我現今tī肉體所有ê活，是在tī信上帝ê Kiáⁿ來活，伊bat疼我，替我獻家己。Góa bat kap Ki-tok tâng tèng si̍p-jī-kè; góa iáu-kú teh oa̍h, m̄ sī iû-goân góa, chiū-sī Ki-tok tiàm-tī góa teh oa̍h; koh góa hiān-kim tī jio̍k-thé só͘ ū ê oa̍h, sī chāi-tī sìn Siōng-tè ê Kiáⁿ lâi oa̍h, I bat thiàⁿ góa, thòe góa hiàn ka-kī.

21我無廢無上帝ê恩典；因為tùi律法若會得tio̍h義，就基督無因端來死。Góa bô hòe-bô Siōng-tè ê un-tián; in-ūi tùi lu̍t-hoat nā ōe tit-tio̍h gī, chiū Ki-tok bô in-toaⁿ lâi sí.

1戇ê加拉太人ah，耶穌基督釘十字架已經形容真明tī lín ê目睭前，taⁿ lín hō͘ 是誰迷去ah？Gōng ê Ka-lia̍p-thài lâng ah, Iâ-so͘ Ki-tok tèng si̍p-jī-kè í-keng hêng-iông chin bêng tī lín ê ba̍k-chiu chêng, taⁿ lín hō͘ chī-chūi bê-khì ah?

2我kan-ta問lín一項，Lín前受tio̍h聖神是tùi thàn律法來行，á是tùi聽來信ah？Góa kan-ta mn̄g lín chi̍t hāng, Lín chêng siū-tio̍h Sèng Sîn sī tùi thàn lu̍t-hoat lâi kiâⁿ, á-sī tùi thiaⁿ lâi sìn ah?

3Lín到chiah戇ah？Lín既然tī聖神做起頭，taⁿ就tī肉體chhiâⁿ尾mah？Lín kàu chiah gōng ah? Lín kì-jiân tī Sèng Sîn chòe khí-thâu, taⁿ chiū tī jio̍k-thé chhiâⁿ-bé mah?

4Lín受hiah-chōe項ê艱苦kiám空空mah？總無真正空空ah。Lín siū hiah chōe hāng ê kan-khó͘ kiám khang-khang mah? Chóng bô chin-chiàⁿ khang-khang ah.

5Hit-ê賞賜lín聖神，koh出力行chiah-ê權能tī lín中間ê，是tùi lín thàn律法來行，á是tùi lín聽來信ah？Hit ê siúⁿ-sù lín Sèng Sîn, koh chhut-la̍t kiâⁿ chiah ê koân-lêng tī lín tiong-kan ê, sī tùi lín thàn lu̍t-hoat lâi kiâⁿ, á-sī tùi lín thiaⁿ lâi sìn ah?

6親像亞伯拉罕信上帝，就kā伊算做義。Chhin-chhiūⁿ A-pek-la̍h-hán sìn Siōng-tè, chiū kā i sǹg chòe gī.

7所以lín tio̍h知，見若信ê人就是亞伯拉罕ê kiaⁿ孫。Só͘-í lín tio̍h chai kìⁿ-nā sìn ê lâng chiū-sī A-pek-la̍h-hán ê kiáⁿ-sun.

8聖經事先看出上帝beh hō͘外邦人tùi信稱做義，就事先傳福音hō͘亞伯拉罕講，萬邦beh對你得tio̍h福氣。Sèng-keng tāi-seng khòaⁿ-chhut Siōng-tè beh hō͘ gōa-pang lâng tùi sìn chheng-chòe-gī, chiū tāi-seng thoân hok-im hō͘ A-pek-la̍h-hán kóng, Bān pang beh tùi lí tit-tio̍h hok-khì.

9可見見若信ê人kap有信ê亞伯拉罕同得tio̍h福氣。Khó-kiàn kìⁿ-nā sìn ê lâng kap ū sìn ê A-pek-la̍h-hán tâng tit-tio̍h hok-khì.

10見若靠本身行律法ê lóng受咒詛；因為有記載講，見若無長長照律法ê冊lóng總所記載來行伊ê，tio̍h受咒詛。Kìⁿ-nā khò pún-sin kiâⁿ lu̍t-hoat ê lóng siū chiù-chó͘; in-ūi ū kì-chài kóng, Kìⁿ-nā bô tn̂g-tn̂g chiàu lu̍t-hoat ê chheh lóng-chóng só͘ kì-chài lâi kiâⁿ i ê, tio̍h siū chiù-chó͘.

11Taⁿ靠律法無人tī上帝ê面前稱做義是明，因為，義ê人beh tùi信來活。Taⁿ khò lu̍t-hoat bô lâng tī Siōng-tè ê bīn-chêng chheng-chòe-gī sī bêng, in-ūi, Gī ê lâng beh tùi sìn lâi oa̍h.

12但是律法m̄是tùi信，獨獨，行chiah-ê ê，beh tùi chiah-ê來活。Nā-sī lu̍t-hoat m̄ sī tùi sìn, to̍k-to̍k, Kiâⁿ chiah-ê ê, beh tùi chiah-ê lâi oa̍h.

13基督已經贖回咱脫離律法ê咒詛，因為伊為tio̍h咱成做咒詛，因為有記載講，見若召tī柴裡ê受咒詛；Ki-tok í-keng sio̍k-hôe lán thoat-lī lu̍t-hoat ê chiù-chó͘, in-ūi I ūi-tio̍h lán chiâⁿ-chòe chiù-chó͘, in-ūi ū kì-chài kóng, Kìⁿ-nā tiàu tī chhâ-ni̍h ê siū chiù-chó͘;

14beh hō͘亞伯拉罕ê福氣，tùi基督耶穌，續到tī外邦，hō͘咱tùi信得tio̍h所應允ê聖神。beh hō͘ A-pek-la̍h-hán ê hok-khì, tùi Ki-tok Iâ-so͘, sòa kàu tī gōa-pang, hō͘ lán tùi sìn tit-tio̍h só͘ èng-ún ê Sèng Sîn.

15兄弟ah，我照人ê tāi-chì來講：雖然是人ê約，若已經定tio̍h，就無人kā伊廢無á是加添。Hiaⁿ-tī ah, góa chiàu lâng ê tāi-chì lâi kóng: sui-jiân sī lâng ê iok, nā í-keng tiāⁿ-tio̍h, chiū bô lâng kā i hòe-bô á-sī ke-thiⁿ.

16Taⁿ chiah-ê應允是對亞伯拉罕以及伊ê後裔講。伊無講，以及你chiah-ê後裔，親像指chōe-chōe人；是講，以及你ê後裔，親像指一人，就是基督。Taⁿ chiah ê èng-ún sī tùi A-pek-la̍h-hán í-ki̍p i ê hō͘-è kóng. I bô kóng, Í-ki̍p lí chiah ê hō͘-è, chhin-chhiūⁿ chí chōe-chōe lâng; sī kóng, Í-ki̍p lí ê hō͘-è, chhin-chhiūⁿ chí chi̍t lâng, chiū-sī Ki-tok.

17Taⁿ我講，上帝所事先定tio̍h ê約，m̄是hit-ê四百三十年後ê律法所能kā伊廢無，致到所應允ê歸tī空空。Taⁿ góa kóng, Siōng-tè só͘ tāi-seng tiāⁿ-tio̍h ê iok, m̄ sī hit ê sì-pah saⁿ-cha̍p nî āu ê lu̍t-hoat só͘ ōe kā i hòe-bô, tì-kàu só͘ èng-ún ê kui tī khang-khang.

18因為承接家業，但是tùi律法，就無tùi應允；總是上帝恩賜亞伯拉罕是照應允。In-ūi sêng-chiap ke-gia̍p, nā sī tùi lu̍t-hoat, chiū bô tùi èng-ún; chóng-sī Siōng-tè un-sù A-pek-la̍h-hán sī chiàu èng-ún.

19Án-ni律法是怎樣？是為tio̍h chiah-ê過失來加設，thèng候hit-ê得tio̍h應允ê後裔到；也是tùi天使，經過中保ê手，來設。Án-ni lu̍t-hoat sī cháiⁿ-iūⁿ? sī ūi-tio̍h chiah ê kè-sit lâi ke-siat, thèng-hāu hit ê tit-tio̍h èng-ún ê hō͘-è kàu; iā sī tùi thiⁿ-sài, keng-kè tiong-pó ê chhiú, lâi siat.

20Taⁿ中保m̄是做一個ê中保，但是上帝是一個。Taⁿ tiong-pó m̄ sī chòe chi̍t-ê ê tiong-pó, nā-sī Siōng-tè sī chi̍t-ê.

21Án-ni律法kap上帝ê應允對逆mah？斷斷m̄是。因為若bat傳一個律法能hō͘人活ê，就義實在是tùi律法。Án-ni lu̍t-hoat kap Siōng-tè ê èng-ún tùi-ke̍h mah? Toàn-toàn m̄ sī. In-ūi nā bat thoân chi̍t ê lu̍t-hoat ōe hō͘ lâng oa̍h ê, chiū gī si̍t-chāi sī tùi lu̍t-hoat.

22總是聖經已經將萬人圍tī罪惡內，beh hō͘所應允ê，thang tùi信耶穌基督，來賞賜hiah-ê信ê人。Chóng-sī sèng-keng í-keng chiong bān lâng ûi tī chōe-ok lāi, beh hō͘ só͘ èng-ún ê, thang tùi sìn Iâ-so͘ Ki-tok, lâi siúⁿ-sù hiah ê sìn ê lâng.

23總是chit-ê信未到ê事先，咱受顧守tī律法下，圍teh來thèng候beh顯明ê信。Chóng-sī chit ê sìn bē kàu ê tāi-seng, lán siū kò͘-siú tī lu̍t-hoat ē, ûi-teh lâi thèng-hāu beh hián-bêng ê sìn.

24Án-ni律法是做管顧gín-ná ê，chhōa咱到基督，hō͘咱tùi信來稱做義。Án-ni lu̍t-hoat sī chòe koán-kò͘ gín-ná ê, chhōa lán kàu Ki-tok, hō͘ lán tùi sìn lâi chheng-chòe-gī.

25但是信已經到，就無koh降服tī管顧gín-ná ê。Nā-sī sìn í-keng kàu, chiū bô koh hâng-ho̍k tī koán-kò͘ gín-ná ê.

26因為lín tùi信靠基督耶穌，lóng做上帝ê kiáⁿ。In-ūi lín tùi sìn-khò Ki-tok Iâ-so͘, lóng chòe Siōng-tè ê kiáⁿ.

27因為lín見若受洗禮來入tī基督ê，是bat穿基督。In-ūi lín kìⁿ-nā siū sóe-lé lâi ji̍p tī Ki-tok ê, sī bat chhēng Ki-tok.

28無有猶太á是希利尼，奴僕á是自由ê，ta-po͘人婦人人ê分別；因為lín tī基督耶穌lóng是一個。Bô ū Iû-thài á-sī Hi-lī-nî, lô͘-po̍k á-sī chū-iû ê, ta-po͘-lâng hū-jîn-lâng ê hun-piat; in-ūi lín tī Ki-tok Iâ-so͘ lóng sī chi̍t-ê.

29Lín若屬基督就做亞伯拉罕ê後裔，照應允來做後嗣。Lín nā sio̍k Ki-tok chiū chòe A-pek-la̍h-hán ê hō͘-è, chiàu èng-ún lâi chòe hō͘-sû.

1Taⁿ我講後嗣，雖然是全業ê主，iáu做gín-ná ê時，kap奴僕無各樣；Taⁿ góa kóng hō͘-sû sui-jiân sī choân-gia̍p ê chú, iáu chòe gín-ná ê sî, kap lô͘-po̍k bô koh-iūⁿ;

2就是降服監督ê kap管家ê，thèng候老父所限定ê期到。chiū-sī hâng-ho̍k kàm-tok ê kap koán-ke ê, thèng-hāu lāu-pē só͘ hān-tiāⁿ ê kî kàu.

3親像án-ni，咱做gín-ná ê時，也做奴僕，降服chit世間ê小學。Chhin-chhiūⁿ án-ni, lán chòe gín-ná ê sî, iā chòe lô͘-po̍k, hâng-ho̍k chit sè-kan ê siáu-ha̍k.

4但是到hit-ê時已經滿，上帝差伊ê kiáⁿ，tùi婦人人來出世，Nā-sī kàu hit ê sî í-keng móa, Siōng-tè chhe I ê kiáⁿ, tùi hū-jîn-lâng lâi chhut-sì,

5出世tī律法下，來贖回律法下ê人，hō͘咱受設立做kiáⁿ。chhut-sì tī lu̍t-hoat ē, lâi sio̍k-hôe lu̍t-hoat ē ê lâng, hō͘ lán siū siat-li̍p chòe kiáⁿ.

6為tio̍h lín是做kiáⁿ，上帝差伊ê kiáⁿ ê神入咱ê心，喉叫講，阿爸，父ah。Ūi-tio̍h lín sī chòe kiáⁿ, Siōng-tè chhe I ê Kiáⁿ ê Sîn ji̍p lán ê sim, âu-kiò kóng, Á-pà, Pē ah.

7親像án-ni，你 m̄是猶原做奴僕，就是做kiáⁿ；既然做kiáⁿ，就tùi上帝來做後嗣。Chhin-chhiūⁿ án-ni, lí m̄ sī iû-goân chòe lô͘-po̍k, chiū-sī chòe kiáⁿ; kì-jiân chòe kiáⁿ, chiū tùi Siōng-tè lâi chòe hō͘-sû.

8總是當時lín m̄-bat上帝，做hiah-ê生成m̄是上帝ê ê奴僕。Chóng-sī tong sî lín m̄ bat Siōng-tè, chòe hiah ê seng-sêng m̄ sī siōng-tè ê ê lô͘-po̍k.

9但是taⁿ已經bat上帝，khah好tio̍h講hō͘上帝所bat，怎樣倒tńg koh ǹg hiah-ê軟chiáⁿ空空ê小學，就是lín所ài koh重再做in ê奴僕ê ah？Nā-sī taⁿ í-keng bat Siōng-tè, khah hó tio̍h kóng hō͘ Siōng-tè só͘ bat, cháiⁿ-iūⁿ tò-tńg koh ǹg hiah ê nńg-chiáⁿ khang-khang ê siáu-ha̍k, chiū-sī lín só͘ ài koh têng-chài chòe in ê lô͘-po̍k ê ah?

10Lín致意守日、月、節、年。Lín tì-ì siú ji̍t, ge̍h, choeh, nî.

11我替lín真驚，驚了我所為tio̍h lín tio̍h磨ê會空空。Góa thòe lín chin kiaⁿ, kiaⁿ-liáu góa só͘ ūi-tio̍h lín tio̍h-bôa ê ōe khang-khang.

12兄弟ah，我求lín tio̍h親像我，因為我也親像lín。Hiaⁿ-tī ah, góa kiû lín tio̍h chhin-chhiūⁿ góa, in-ūi góa iā chhin-chhiūⁿ lín.

13Lín lóng未bat刻虧我；lín知我頭一pái傳福音hō͘ lín，是因為肉體ê軟弱。Lín lóng bē bat khek-khui góa; lín chai góa thâu chi̍t pái thoân hok-im hō͘ lín, sī in-ūi jio̍k-thé ê loán-jio̍k.

14Hit-tia̍p為tio̍h我ê肉體lín有受試，iáu-kú無看輕，也無厭賤；是接納我親像上帝ê天使；也親像基督耶穌一樣。Hit tia̍p ūi-tio̍h góa ê jio̍k-thé lín ū siū chhì, iáu-kú bô khòaⁿ-khin, iā bô iàm-chiān; sī chiap-la̍p góa chhin-chhiūⁿ Siōng-tè ê thiⁿ-sài; iā chhin-chhiūⁿ Ki-tok Iâ-so͘ chi̍t iūⁿ.

15Lín當時所歡喜ê福氣tī tá-lo̍h？因為我干證lín，設使能做得，lín就iah lín ê目睭hō͘我。Lín tong sî só͘ hoaⁿ-hí ê hok-khì tī tá-lo̍h? in-ūi góa kan-chèng lín, siat-sú ōe chòe-tit, lín chiū iah lín ê ba̍k-chiu hō͘ góa.

16Taⁿ我用真實kā lín講，是成做lín ê仇讎mah？Taⁿ góa ēng chin-si̍t kā lín kóng, sī chiâⁿ-chòe lín ê kiû-siû mah?

17In kap lín親熱，m̄是好意，是ài隔斷lín，hō͘ lín kap in親熱。In kap lín chhin-jia̍t, m̄ sī hó ì, sī ài keh-tn̄g lín, hō͘ lín kap in chhin-jia̍t.

18獨獨tī好事來常常hō͘人kap lín親熱ê，是好；m̄-nā我kap lín tī-teh ê時tio̍h án-ni。To̍k-to̍k tī hó sū lâi siông-siông hō͘ lâng kap lín chhin-jia̍t ê, sī hó; m̄ nā góa kap lín tī-teh ê sî tio̍h án-ni.

19我ê細kiáⁿ ah，我為lín koh受生產ê艱苦，到基督ê形狀成tī lín ê心；Góa ê sòe-kiáⁿ ah, góa ūi lín koh siū seng-sán ê kan-khó͘, kàu Ki-tok ê hêng-chōng chiâⁿ tī lín ê sim;

20我ài chit-tia̍p kap lín tī-teh，來換我ê聲；因為我為tio̍h lín躊躇。góa ài chit tia̍p kap lín tī-teh, lâi ōaⁿ góa ê siaⁿ; in-ūi góa ūi-tio̍h lín tiû-tû.

21Lín ài降服律法ê，tio̍h kā我講，lín kiám無聽見律法mah？Lín ài hâng-ho̍k lu̍t-hoat ê, tio̍h kā góa kóng, lín kiám bô thiaⁿ-kìⁿ lu̍t-hoat mah?

22因為有記載講，亞伯拉罕有兩個kiáⁿ，一個是女婢生ê，一個是自由ê生ê。In-ūi ū kì-chài kóng, A-pek-la̍h-hán ū nn̄g ê kiáⁿ, chi̍t-ê sī lú-pī siⁿ ê, chi̍t-ê sī chū-iû ê siⁿ ê.

23但是hit-ê tùi女婢ê，是照肉體來生；hit-ê tùi自由ê，是tùi應允來生。Nā-sī hit ê tùi lú-pī ê, sī chiàu jio̍k-thé lâi siⁿ; hit ê tùi chū-iû ê, sī tùi èng-ún lâi siⁿ.

24Chiah-ê lóng有譬喻tī-teh；因為hit兩個婦人人是做兩個約；一個出tī西奈山，所生ê做奴僕，就是夏甲。Chiah ê lóng ū phì-jū tī-teh; in-ūi hit nn̄g ê hū-jîn-lâng sī chòe nn̄g ê iok; chi̍t-ê chhut tī Se-nái soaⁿ, só͘ siⁿ ê chòe lô͘-po̍k, chiū-sī Hā-kah.

25Chit-ê夏甲是阿拉伯ê西奈山，koh kap現今ê耶路撒冷siāng類，因為伊kap伊chiah-ê kiáⁿ做奴僕。Chit ê Hā-kah sī A-lat-pek ê Se-nái soaⁿ, koh kap hiān-kim ê Iâ-lō͘-sat-léng siāng lūi, in-ūi i kap i chiah ê kiáⁿ chòe lô͘-po̍k.

26獨獨tī頂面ê耶路撒冷是自由，是咱ê老母。To̍k-to̍k tī téng-bīn ê Iâ-lō͘-sat-léng sī chū-iû, sī lán ê lāu-bú.

27因為有記載，講， 你無懷孕，無生kiáⁿ ê，tio̍h歡喜； 無有生產ê艱苦ê，tio̍h出大聲來叫； 因為家己tòa ê婦人人，比有丈夫ê，伊ê kiáⁿ iáu khah-chōe ê。In-ūi ū kì-chài, kóng, Lí bô hoâi-īn, bô siⁿ kiáⁿ ê, tio̍h hoaⁿ-hí; Bô ū seng-sán ê kan-khó͘ ê, tio̍h chhut tōa siaⁿ lâi kiò; In-ūi ka-kī tòa ê hū-jîn-lâng, pí ū tiōng-hu ê, i ê kiáⁿ iáu khah chōe ê.

28兄弟ah，咱親像以撒做應允ê kiáⁿ。Hiaⁿ-tī ah, lán chhin-chhiūⁿ Í-sat chòe èng-ún ê kiáⁿ.

29但是親像當時照肉體來生ê khún-tio̍k照神來生ê，chit-tia̍p也是án-ni。Nā-sī chhin-chhiūⁿ tong-sî chiàu jio̍k-thé lâi siⁿ ê khún-tio̍k chiàu Sîn lâi siⁿ ê, chit tia̍p iā sī án-ni.

30M̄-kú聖經講怎樣？Tio̍h趕出女婢kap伊ê kiáⁿ，因為女婢ê kiáⁿ決斷bōe-thang kap自由ê ê kiáⁿ同承接業。M̄ kú sèng-keng kóng cháiⁿ-iūⁿ? Tio̍h kóaⁿ-chhut lú-pī kap i ê kiáⁿ, in-ūi lú-pī ê kiáⁿ koat-toàn bōe thang kap chū-iû ê ê kiáⁿ tâng sêng-chiap gia̍p.

31兄弟ah，án-ni咱m̄是女婢ê kiáⁿ，是自由ê ê kiáⁿ。Hiaⁿ-tī ah, án-ni lán m̄ sī lú-pī ê kiáⁿ, sī chū-iû ê ê kiáⁿ.