1戇ê加拉太人ah，耶穌基督釘十字架已經形容真明tī lín ê目睭前，taⁿ lín hō͘ 是誰迷去ah？Gōng ê Ka-lia̍p-thài lâng ah, Iâ-so͘ Ki-tok tèng si̍p-jī-kè í-keng hêng-iông chin bêng tī lín ê ba̍k-chiu chêng, taⁿ lín hō͘ chī-chūi bê-khì ah?

2我kan-ta問lín一項，Lín前受tio̍h聖神是tùi thàn律法來行，á是tùi聽來信ah？Góa kan-ta mn̄g lín chi̍t hāng, Lín chêng siū-tio̍h Sèng Sîn sī tùi thàn lu̍t-hoat lâi kiâⁿ, á-sī tùi thiaⁿ lâi sìn ah?

3Lín到chiah戇ah？Lín既然tī聖神做起頭，taⁿ就tī肉體chhiâⁿ尾mah？Lín kàu chiah gōng ah? Lín kì-jiân tī Sèng Sîn chòe khí-thâu, taⁿ chiū tī jio̍k-thé chhiâⁿ-bé mah?

4Lín受hiah-chōe項ê艱苦kiám空空mah？總無真正空空ah。Lín siū hiah chōe hāng ê kan-khó͘ kiám khang-khang mah? Chóng bô chin-chiàⁿ khang-khang ah.

5Hit-ê賞賜lín聖神，koh出力行chiah-ê權能tī lín中間ê，是tùi lín thàn律法來行，á是tùi lín聽來信ah？Hit ê siúⁿ-sù lín Sèng Sîn, koh chhut-la̍t kiâⁿ chiah ê koân-lêng tī lín tiong-kan ê, sī tùi lín thàn lu̍t-hoat lâi kiâⁿ, á-sī tùi lín thiaⁿ lâi sìn ah?

6親像亞伯拉罕信上帝，就kā伊算做義。Chhin-chhiūⁿ A-pek-la̍h-hán sìn Siōng-tè, chiū kā i sǹg chòe gī.

7所以lín tio̍h知，見若信ê人就是亞伯拉罕ê kiaⁿ孫。Só͘-í lín tio̍h chai kìⁿ-nā sìn ê lâng chiū-sī A-pek-la̍h-hán ê kiáⁿ-sun.

8聖經事先看出上帝beh hō͘外邦人tùi信稱做義，就事先傳福音hō͘亞伯拉罕講，萬邦beh對你得tio̍h福氣。Sèng-keng tāi-seng khòaⁿ-chhut Siōng-tè beh hō͘ gōa-pang lâng tùi sìn chheng-chòe-gī, chiū tāi-seng thoân hok-im hō͘ A-pek-la̍h-hán kóng, Bān pang beh tùi lí tit-tio̍h hok-khì.

9可見見若信ê人kap有信ê亞伯拉罕同得tio̍h福氣。Khó-kiàn kìⁿ-nā sìn ê lâng kap ū sìn ê A-pek-la̍h-hán tâng tit-tio̍h hok-khì.

10見若靠本身行律法ê lóng受咒詛；因為有記載講，見若無長長照律法ê冊lóng總所記載來行伊ê，tio̍h受咒詛。Kìⁿ-nā khò pún-sin kiâⁿ lu̍t-hoat ê lóng siū chiù-chó͘; in-ūi ū kì-chài kóng, Kìⁿ-nā bô tn̂g-tn̂g chiàu lu̍t-hoat ê chheh lóng-chóng só͘ kì-chài lâi kiâⁿ i ê, tio̍h siū chiù-chó͘.

11Taⁿ靠律法無人tī上帝ê面前稱做義是明，因為，義ê人beh tùi信來活。Taⁿ khò lu̍t-hoat bô lâng tī Siōng-tè ê bīn-chêng chheng-chòe-gī sī bêng, in-ūi, Gī ê lâng beh tùi sìn lâi oa̍h.

12但是律法m̄是tùi信，獨獨，行chiah-ê ê，beh tùi chiah-ê來活。Nā-sī lu̍t-hoat m̄ sī tùi sìn, to̍k-to̍k, Kiâⁿ chiah-ê ê, beh tùi chiah-ê lâi oa̍h.

13基督已經贖回咱脫離律法ê咒詛，因為伊為tio̍h咱成做咒詛，因為有記載講，見若召tī柴裡ê受咒詛；Ki-tok í-keng sio̍k-hôe lán thoat-lī lu̍t-hoat ê chiù-chó͘, in-ūi I ūi-tio̍h lán chiâⁿ-chòe chiù-chó͘, in-ūi ū kì-chài kóng, Kìⁿ-nā tiàu tī chhâ-ni̍h ê siū chiù-chó͘;

14beh hō͘亞伯拉罕ê福氣，tùi基督耶穌，續到tī外邦，hō͘咱tùi信得tio̍h所應允ê聖神。beh hō͘ A-pek-la̍h-hán ê hok-khì, tùi Ki-tok Iâ-so͘, sòa kàu tī gōa-pang, hō͘ lán tùi sìn tit-tio̍h só͘ èng-ún ê Sèng Sîn.

15兄弟ah，我照人ê tāi-chì來講：雖然是人ê約，若已經定tio̍h，就無人kā伊廢無á是加添。Hiaⁿ-tī ah, góa chiàu lâng ê tāi-chì lâi kóng: sui-jiân sī lâng ê iok, nā í-keng tiāⁿ-tio̍h, chiū bô lâng kā i hòe-bô á-sī ke-thiⁿ.

16Taⁿ chiah-ê應允是對亞伯拉罕以及伊ê後裔講。伊無講，以及你chiah-ê後裔，親像指chōe-chōe人；是講，以及你ê後裔，親像指一人，就是基督。Taⁿ chiah ê èng-ún sī tùi A-pek-la̍h-hán í-ki̍p i ê hō͘-è kóng. I bô kóng, Í-ki̍p lí chiah ê hō͘-è, chhin-chhiūⁿ chí chōe-chōe lâng; sī kóng, Í-ki̍p lí ê hō͘-è, chhin-chhiūⁿ chí chi̍t lâng, chiū-sī Ki-tok.

17Taⁿ我講，上帝所事先定tio̍h ê約，m̄是hit-ê四百三十年後ê律法所能kā伊廢無，致到所應允ê歸tī空空。Taⁿ góa kóng, Siōng-tè só͘ tāi-seng tiāⁿ-tio̍h ê iok, m̄ sī hit ê sì-pah saⁿ-cha̍p nî āu ê lu̍t-hoat só͘ ōe kā i hòe-bô, tì-kàu só͘ èng-ún ê kui tī khang-khang.

18因為承接家業，但是tùi律法，就無tùi應允；總是上帝恩賜亞伯拉罕是照應允。In-ūi sêng-chiap ke-gia̍p, nā sī tùi lu̍t-hoat, chiū bô tùi èng-ún; chóng-sī Siōng-tè un-sù A-pek-la̍h-hán sī chiàu èng-ún.

19Án-ni律法是怎樣？是為tio̍h chiah-ê過失來加設，thèng候hit-ê得tio̍h應允ê後裔到；也是tùi天使，經過中保ê手，來設。Án-ni lu̍t-hoat sī cháiⁿ-iūⁿ? sī ūi-tio̍h chiah ê kè-sit lâi ke-siat, thèng-hāu hit ê tit-tio̍h èng-ún ê hō͘-è kàu; iā sī tùi thiⁿ-sài, keng-kè tiong-pó ê chhiú, lâi siat.

20Taⁿ中保m̄是做一個ê中保，但是上帝是一個。Taⁿ tiong-pó m̄ sī chòe chi̍t-ê ê tiong-pó, nā-sī Siōng-tè sī chi̍t-ê.

21Án-ni律法kap上帝ê應允對逆mah？斷斷m̄是。因為若bat傳一個律法能hō͘人活ê，就義實在是tùi律法。Án-ni lu̍t-hoat kap Siōng-tè ê èng-ún tùi-ke̍h mah? Toàn-toàn m̄ sī. In-ūi nā bat thoân chi̍t ê lu̍t-hoat ōe hō͘ lâng oa̍h ê, chiū gī si̍t-chāi sī tùi lu̍t-hoat.

22總是聖經已經將萬人圍tī罪惡內，beh hō͘所應允ê，thang tùi信耶穌基督，來賞賜hiah-ê信ê人。Chóng-sī sèng-keng í-keng chiong bān lâng ûi tī chōe-ok lāi, beh hō͘ só͘ èng-ún ê, thang tùi sìn Iâ-so͘ Ki-tok, lâi siúⁿ-sù hiah ê sìn ê lâng.

23總是chit-ê信未到ê事先，咱受顧守tī律法下，圍teh來thèng候beh顯明ê信。Chóng-sī chit ê sìn bē kàu ê tāi-seng, lán siū kò͘-siú tī lu̍t-hoat ē, ûi-teh lâi thèng-hāu beh hián-bêng ê sìn.

24Án-ni律法是做管顧gín-ná ê，chhōa咱到基督，hō͘咱tùi信來稱做義。Án-ni lu̍t-hoat sī chòe koán-kò͘ gín-ná ê, chhōa lán kàu Ki-tok, hō͘ lán tùi sìn lâi chheng-chòe-gī.

25但是信已經到，就無koh降服tī管顧gín-ná ê。Nā-sī sìn í-keng kàu, chiū bô koh hâng-ho̍k tī koán-kò͘ gín-ná ê.

26因為lín tùi信靠基督耶穌，lóng做上帝ê kiáⁿ。In-ūi lín tùi sìn-khò Ki-tok Iâ-so͘, lóng chòe Siōng-tè ê kiáⁿ.

27因為lín見若受洗禮來入tī基督ê，是bat穿基督。In-ūi lín kìⁿ-nā siū sóe-lé lâi ji̍p tī Ki-tok ê, sī bat chhēng Ki-tok.

28無有猶太á是希利尼，奴僕á是自由ê，ta-po͘人婦人人ê分別；因為lín tī基督耶穌lóng是一個。Bô ū Iû-thài á-sī Hi-lī-nî, lô͘-po̍k á-sī chū-iû ê, ta-po͘-lâng hū-jîn-lâng ê hun-piat; in-ūi lín tī Ki-tok Iâ-so͘ lóng sī chi̍t-ê.

29Lín若屬基督就做亞伯拉罕ê後裔，照應允來做後嗣。Lín nā sio̍k Ki-tok chiū chòe A-pek-la̍h-hán ê hō͘-è, chiàu èng-ún lâi chòe hō͘-sû.

1Taⁿ我講後嗣，雖然是全業ê主，iáu做gín-ná ê時，kap奴僕無各樣；Taⁿ góa kóng hō͘-sû sui-jiân sī choân-gia̍p ê chú, iáu chòe gín-ná ê sî, kap lô͘-po̍k bô koh-iūⁿ;

2就是降服監督ê kap管家ê，thèng候老父所限定ê期到。chiū-sī hâng-ho̍k kàm-tok ê kap koán-ke ê, thèng-hāu lāu-pē só͘ hān-tiāⁿ ê kî kàu.

3親像án-ni，咱做gín-ná ê時，也做奴僕，降服chit世間ê小學。Chhin-chhiūⁿ án-ni, lán chòe gín-ná ê sî, iā chòe lô͘-po̍k, hâng-ho̍k chit sè-kan ê siáu-ha̍k.

4但是到hit-ê時已經滿，上帝差伊ê kiáⁿ，tùi婦人人來出世，Nā-sī kàu hit ê sî í-keng móa, Siōng-tè chhe I ê kiáⁿ, tùi hū-jîn-lâng lâi chhut-sì,

5出世tī律法下，來贖回律法下ê人，hō͘咱受設立做kiáⁿ。chhut-sì tī lu̍t-hoat ē, lâi sio̍k-hôe lu̍t-hoat ē ê lâng, hō͘ lán siū siat-li̍p chòe kiáⁿ.

6為tio̍h lín是做kiáⁿ，上帝差伊ê kiáⁿ ê神入咱ê心，喉叫講，阿爸，父ah。Ūi-tio̍h lín sī chòe kiáⁿ, Siōng-tè chhe I ê Kiáⁿ ê Sîn ji̍p lán ê sim, âu-kiò kóng, Á-pà, Pē ah.

7親像án-ni，你 m̄是猶原做奴僕，就是做kiáⁿ；既然做kiáⁿ，就tùi上帝來做後嗣。Chhin-chhiūⁿ án-ni, lí m̄ sī iû-goân chòe lô͘-po̍k, chiū-sī chòe kiáⁿ; kì-jiân chòe kiáⁿ, chiū tùi Siōng-tè lâi chòe hō͘-sû.

8總是當時lín m̄-bat上帝，做hiah-ê生成m̄是上帝ê ê奴僕。Chóng-sī tong sî lín m̄ bat Siōng-tè, chòe hiah ê seng-sêng m̄ sī siōng-tè ê ê lô͘-po̍k.

9但是taⁿ已經bat上帝，khah好tio̍h講hō͘上帝所bat，怎樣倒tńg koh ǹg hiah-ê軟chiáⁿ空空ê小學，就是lín所ài koh重再做in ê奴僕ê ah？Nā-sī taⁿ í-keng bat Siōng-tè, khah hó tio̍h kóng hō͘ Siōng-tè só͘ bat, cháiⁿ-iūⁿ tò-tńg koh ǹg hiah ê nńg-chiáⁿ khang-khang ê siáu-ha̍k, chiū-sī lín só͘ ài koh têng-chài chòe in ê lô͘-po̍k ê ah?

10Lín致意守日、月、節、年。Lín tì-ì siú ji̍t, ge̍h, choeh, nî.

11我替lín真驚，驚了我所為tio̍h lín tio̍h磨ê會空空。Góa thòe lín chin kiaⁿ, kiaⁿ-liáu góa só͘ ūi-tio̍h lín tio̍h-bôa ê ōe khang-khang.

12兄弟ah，我求lín tio̍h親像我，因為我也親像lín。Hiaⁿ-tī ah, góa kiû lín tio̍h chhin-chhiūⁿ góa, in-ūi góa iā chhin-chhiūⁿ lín.

13Lín lóng未bat刻虧我；lín知我頭一pái傳福音hō͘ lín，是因為肉體ê軟弱。Lín lóng bē bat khek-khui góa; lín chai góa thâu chi̍t pái thoân hok-im hō͘ lín, sī in-ūi jio̍k-thé ê loán-jio̍k.

14Hit-tia̍p為tio̍h我ê肉體lín有受試，iáu-kú無看輕，也無厭賤；是接納我親像上帝ê天使；也親像基督耶穌一樣。Hit tia̍p ūi-tio̍h góa ê jio̍k-thé lín ū siū chhì, iáu-kú bô khòaⁿ-khin, iā bô iàm-chiān; sī chiap-la̍p góa chhin-chhiūⁿ Siōng-tè ê thiⁿ-sài; iā chhin-chhiūⁿ Ki-tok Iâ-so͘ chi̍t iūⁿ.

15Lín當時所歡喜ê福氣tī tá-lo̍h？因為我干證lín，設使能做得，lín就iah lín ê目睭hō͘我。Lín tong sî só͘ hoaⁿ-hí ê hok-khì tī tá-lo̍h? in-ūi góa kan-chèng lín, siat-sú ōe chòe-tit, lín chiū iah lín ê ba̍k-chiu hō͘ góa.

16Taⁿ我用真實kā lín講，是成做lín ê仇讎mah？Taⁿ góa ēng chin-si̍t kā lín kóng, sī chiâⁿ-chòe lín ê kiû-siû mah?

17In kap lín親熱，m̄是好意，是ài隔斷lín，hō͘ lín kap in親熱。In kap lín chhin-jia̍t, m̄ sī hó ì, sī ài keh-tn̄g lín, hō͘ lín kap in chhin-jia̍t.

18獨獨tī好事來常常hō͘人kap lín親熱ê，是好；m̄-nā我kap lín tī-teh ê時tio̍h án-ni。To̍k-to̍k tī hó sū lâi siông-siông hō͘ lâng kap lín chhin-jia̍t ê, sī hó; m̄ nā góa kap lín tī-teh ê sî tio̍h án-ni.

19我ê細kiáⁿ ah，我為lín koh受生產ê艱苦，到基督ê形狀成tī lín ê心；Góa ê sòe-kiáⁿ ah, góa ūi lín koh siū seng-sán ê kan-khó͘, kàu Ki-tok ê hêng-chōng chiâⁿ tī lín ê sim;

20我ài chit-tia̍p kap lín tī-teh，來換我ê聲；因為我為tio̍h lín躊躇。góa ài chit tia̍p kap lín tī-teh, lâi ōaⁿ góa ê siaⁿ; in-ūi góa ūi-tio̍h lín tiû-tû.

21Lín ài降服律法ê，tio̍h kā我講，lín kiám無聽見律法mah？Lín ài hâng-ho̍k lu̍t-hoat ê, tio̍h kā góa kóng, lín kiám bô thiaⁿ-kìⁿ lu̍t-hoat mah?

22因為有記載講，亞伯拉罕有兩個kiáⁿ，一個是女婢生ê，一個是自由ê生ê。In-ūi ū kì-chài kóng, A-pek-la̍h-hán ū nn̄g ê kiáⁿ, chi̍t-ê sī lú-pī siⁿ ê, chi̍t-ê sī chū-iû ê siⁿ ê.

23但是hit-ê tùi女婢ê，是照肉體來生；hit-ê tùi自由ê，是tùi應允來生。Nā-sī hit ê tùi lú-pī ê, sī chiàu jio̍k-thé lâi siⁿ; hit ê tùi chū-iû ê, sī tùi èng-ún lâi siⁿ.

24Chiah-ê lóng有譬喻tī-teh；因為hit兩個婦人人是做兩個約；一個出tī西奈山，所生ê做奴僕，就是夏甲。Chiah ê lóng ū phì-jū tī-teh; in-ūi hit nn̄g ê hū-jîn-lâng sī chòe nn̄g ê iok; chi̍t-ê chhut tī Se-nái soaⁿ, só͘ siⁿ ê chòe lô͘-po̍k, chiū-sī Hā-kah.

25Chit-ê夏甲是阿拉伯ê西奈山，koh kap現今ê耶路撒冷siāng類，因為伊kap伊chiah-ê kiáⁿ做奴僕。Chit ê Hā-kah sī A-lat-pek ê Se-nái soaⁿ, koh kap hiān-kim ê Iâ-lō͘-sat-léng siāng lūi, in-ūi i kap i chiah ê kiáⁿ chòe lô͘-po̍k.

26獨獨tī頂面ê耶路撒冷是自由，是咱ê老母。To̍k-to̍k tī téng-bīn ê Iâ-lō͘-sat-léng sī chū-iû, sī lán ê lāu-bú.

27因為有記載，講， 你無懷孕，無生kiáⁿ ê，tio̍h歡喜； 無有生產ê艱苦ê，tio̍h出大聲來叫； 因為家己tòa ê婦人人，比有丈夫ê，伊ê kiáⁿ iáu khah-chōe ê。In-ūi ū kì-chài, kóng, Lí bô hoâi-īn, bô siⁿ kiáⁿ ê, tio̍h hoaⁿ-hí; Bô ū seng-sán ê kan-khó͘ ê, tio̍h chhut tōa siaⁿ lâi kiò; In-ūi ka-kī tòa ê hū-jîn-lâng, pí ū tiōng-hu ê, i ê kiáⁿ iáu khah chōe ê.

28兄弟ah，咱親像以撒做應允ê kiáⁿ。Hiaⁿ-tī ah, lán chhin-chhiūⁿ Í-sat chòe èng-ún ê kiáⁿ.

29但是親像當時照肉體來生ê khún-tio̍k照神來生ê，chit-tia̍p也是án-ni。Nā-sī chhin-chhiūⁿ tong-sî chiàu jio̍k-thé lâi siⁿ ê khún-tio̍k chiàu Sîn lâi siⁿ ê, chit tia̍p iā sī án-ni.

30M̄-kú聖經講怎樣？Tio̍h趕出女婢kap伊ê kiáⁿ，因為女婢ê kiáⁿ決斷bōe-thang kap自由ê ê kiáⁿ同承接業。M̄ kú sèng-keng kóng cháiⁿ-iūⁿ? Tio̍h kóaⁿ-chhut lú-pī kap i ê kiáⁿ, in-ūi lú-pī ê kiáⁿ koat-toàn bōe thang kap chū-iû ê ê kiáⁿ tâng sêng-chiap gia̍p.

31兄弟ah，án-ni咱m̄是女婢ê kiáⁿ，是自由ê ê kiáⁿ。Hiaⁿ-tī ah, án-ni lán m̄ sī lú-pī ê kiáⁿ, sī chū-iû ê ê kiáⁿ.

1基督tháu放咱做自由，所以lín tio̍h khiā在，莫得koh掛tio̍h hit-ê做奴僕ê擔。Ki-tok tháu-pàng lán chòe chū-iû, só͘-í lín tio̍h khiā-chāi, bo̍h-tit koh kòa-tio̍h hit ê chòe lô͘-po̍k ê taⁿ.

2我保羅kā lín講，lín若受割禮，就基督無利益tī lín。Góa Pó-lô kā lín kóng, lín nā siū kat-lé, chiū Ki-tok bô lī-ek tī lín.

3我koh再對ta̍k-ê受割禮ê人證明，伊tio̍h行齊全ê律法，親像欠債tio̍h還。Góa koh-chài tùi ta̍k ê siū kat-lé ê lâng chèng-bêng, i tio̍h kiâⁿ chiâu-chn̂g ê lu̍t-hoat, chhin-chhiūⁿ khiàm-chè tio̍h hêng.

4Lín ài tùi律法稱做義ê，是已經kap基督絕斷，已經tùi恩典ê位lut落去。Lín ài tùi lu̍t-hoat chheng-chòe-gī ê, sī í-keng kap Ki-tok choa̍t-tn̄g, í-keng tùi un-tián ê ūi lut-lo̍h-khì.

5因為咱óa靠神，tùi信teh thèng候所ǹg望ê義。In-ūi lán óa-khò Sîn, tùi sìn teh thèng-hāu só͘ ǹg-bāng ê gī.

6因為tiàm-tī基督耶穌受割禮，á無受割禮，lóng無功效，獨獨信，tùi仁愛來行ê，chiah有功效。In-ūi tiàm-tī Ki-tok Iâ-so͘ siū kat-lé, á bô siū kat-lé, lóng bô kong-hāu, to̍k-to̍k sìn, tùi jîn-ài lâi kiâⁿ ê, chiah ū kong-hāu.

7Lín前是gâu走；是誰阻擋lín，致到lín無thàn真理ah？Lín chêng sī gâu cháu; chī-chūi chó͘-tòng lín tì-kàu lín bô thàn chin-lí ah?

8Hit號ê苦勸m̄是tùi召lín ê出。Hit hō ê khó͘-khǹg m̄ sī tùi tiàu lín ê chhut.

9淡薄ê酵能發kui-sn̂g。Tām-po̍h ê kàⁿ ōe hoat kui-sn̂g.

10我tiàm-tī主深信，lín不致有別樣ê心志；獨獨攪擾lín ê，無論是甚麼人，伊beh受擬罪。Góa tiàm-tī Chú chhim sìn, lín put-tì ū pa̍t iūⁿ ê sim-chì; to̍k-to̍k kiáu-jiáu lín ê, bô lūn sī sím-mi̍h lâng, i beh siū gí chōe.

11兄弟ah，我若iáu teh傳割禮，啥事iáu-kú受khún-tio̍k ah？Án-ni十字架ê做塞礙，已經廢無ah。Hiaⁿ-tī ah, góa nā iáu teh thoân kat-lé, siáⁿ-sū iáu-kú siū khún-tio̍k ah? Án-ni si̍p-jī-kè ê chòe that-gāi, í-keng hòe-bô ah.

12願hiah-ê phah亂lín ê將家己割斷。Goān hiah ê phah-loān lín ê chiong ka-kī koah-tn̄g.

13兄弟ah，lín受召是來得tio̍h自由；獨獨莫得用自由做肉體ê機關，是tio̍h tùi仁愛相服事。Hiaⁿ-tī ah, lín siū tiàu sī lâi tit-tio̍h chū-iû; to̍k-to̍k bo̍h-tit ēng chū-iû chòe jio̍k-thé ê ki-koan, sī tio̍h tùi jîn-ài saⁿ ho̍k-sāi.

14因為全律法包含tī一句，就是講，疼厝邊親像家己。In-ūi choân lu̍t-hoat pau-hâm tī chi̍t kù, chiū-sī kóng, Thiàⁿ chhù-piⁿ chhin-chhiūⁿ ka-kī.

15設使lín相吞咬，驚了會相滅無；lín tio̍h謹慎。Siat-sú lín saⁿ thun-kā, kiaⁿ-liáu ōe saⁿ bia̍t-bô; lín tio̍h kín-sīn.

16Taⁿ我講，lín tio̍h照神來行，就無成肉體ê私慾。Taⁿ góa kóng, lín tio̍h chiàu Sîn lâi kiâⁿ, chiū bô chiâⁿ jio̍k-thé ê su-io̍k.

17因為肉體ài攻擊神，神ài攻擊肉體；兩個相對敵，hō͘ lín無行所ài行ê。In-ūi jio̍k-thé ài kong-kek Sîn, Sîn ài kong-kek jio̍k-thé; nn̄g-ê saⁿ tùi-te̍k, hō͘ lín bô kiâⁿ só͘ ài kiâⁿ ê.

18獨獨lín若hō͘聖神所引chhōa，就無tī律法下。To̍k-to̍k lín nā hō͘ Sèng Sîn só͘ ín-chhōa, chiū bô tī lu̍t-hoat-ē.

19Taⁿ肉體ê品行有露現，親像姦淫、污穢、邪癖、Taⁿ jio̍k-thé ê phín-hēng ū lō͘-hiān, chhin-chhiūⁿ kan-îm, ù-òe, siâ-phiah,

20拜偶像、邪術、結冤仇、相爭、怨恨、受氣、結黨、分pêng、異端、pài ngó͘-siōng, siâ-su̍t, kiat oan-siû, saⁿ-chiⁿ, oàn-hūn, siū-khì, kiat-tóng, hun-pêng, īⁿ-toan,

21怨妒、酒醉、放蕩，以及親像chit號ê；我前bat事先講，taⁿ也事先kā lín講，見若常常行án-ni ê，將來無承接上帝ê國。oàn-tò͘, chiú chùi, hòng-tōng, í-ki̍p chhin-chhiūⁿ chit hō ê; góa chêng bat tāi-seng kóng, taⁿ iā tāi-seng kā lín kóng, kìⁿ-nā siông-siông kiâⁿ án-ni ê, chiong-lâi bô sêng-chiap Siōng-tè ê kok.

22但是聖神ê果子就是仁愛、歡喜、和平、Nā-sī Sèng Sîn ê ké-chí chiū-sī jîn-ài, hoaⁿ-hí, hô-pêng,

23吞忍、慈悲、善良、忠信、溫柔、撙節；親像chit號，無有律法禁伊。thun-lún, chû-pi, siān-liông, tiong-sìn, un-jiû, chún-chat; chhin-chhiūⁿ chit hō, bô ū lu̍t-hoat kìm i.

24Koh屬基督耶穌ê人bat將肉體，kap伊ê前伊ê慾，釘tī十字架。Koh sio̍k Ki-tok Iâ-so͘ ê lâng bat chiong jio̍k-thé, kap i ê chêng i ê io̍k, tèng tī si̍p-jī-kè.

25咱若照神來活，tio̍h照神來行。Lán nā chiàu Sîn lâi oa̍h, tio̍h chiàu Sîn lâi kiâⁿ.

26莫得對重空空ê榮光，相激氣，相怨妒。Bo̍h-tit tùi-tiōng khang-khang ê êng-kng, saⁿ kek-khì, saⁿ oàn-tò͘.