1上帝賜福挪亞，kap伊ê kiáⁿ，亦對in講，Lín tio̍h生湠chōe-chōe，充滿地上。Siōng-tè sù-hok Ná-a, kap i ê kiáⁿ, ia̍h tùi in kóng, Lín tio̍h siⁿ-thòaⁿ chōe-chōe, chhiong-móa tōe-chiūⁿ.

2見若地上ê走獸，kap天裡ê鳥，lóng beh驚lín畏lín；連地上一切ê蟲thōa，kap海裡一切ê魚，lóng交付lín ê手。Kìⁿ-nā tōe-chiūⁿ ê cháu-siù, kap thiⁿ-ni̍h ê chiáu, lóng beh kiaⁿ lín ùi lín; liân tōe-chiūⁿ it-chhè ê thâng-thōa, kap hái-ni̍h it-chhè ê hî, lóng kau-hù lín ê chhiú.

3見若活ê動物lóng做lín ê食物；chiah-ê一切我lóng hō͘ lín，親像hō͘ lín菜蔬一樣。Kìⁿ-nā oa̍h ê tōng-bu̍t lóng chòe lín ê chia̍h-mi̍h; chiah-ê it-chhè Góa lóng hō͘ lín, chhin-chhiūⁿ hō͘ lín chhài-soe chi̍t-iūⁿ.

4獨獨有活命ê肉，就是有kâⁿ血ê，lín m̄-thang食。To̍k-to̍k ū oa̍h-miā ê bah, chiū-sī ū kâⁿ-huih-ê, lín m̄-thang chia̍h.

5流lín ê血，就是流lín活命ê血ê罪，我beh討伊；我beh對各樣走獸討，亦beh對人ê手，以及ta̍k人兄弟ê手，來討人ê活命。Lâu lín ê huih, chiū-sī lâu lín oa̍h-miā ê huih ê chōe, Góa beh thó-i; Góa beh tùi kok-iūⁿ cháu-siù thó, ia̍h beh tùi lâng ê chhiú, í-ki̍p ta̍k-lâng hiaⁿ-tī ê chhiú, lâi thó lâng ê oa̍h-miā.

6見若hō͘人流血ê，人也beh hō͘伊流血；因為上帝造人，是親像伊家己ê像。Kìⁿ-nā hō͘ lâng lâu huih-ê, lâng iā beh hō͘ i lâu-huih; in-ūi Siōng-tè chō lâng, sī chhin-chhiūⁿ I ka-kī ê siōng.

7Lín tio̍h生湠chōe-chōe，tī地面上tio̍h興旺，加添真chōe。Lín tio̍h siⁿ-thòaⁿ chōe-chōe, tī tōe-bīn-chiūⁿ tio̍h heng-ōng, ke-thiⁿ chin-chōe.

8上帝kā挪亞kap伊ê kiáⁿ講，Siōng-tè kā Ná-a kap i ê kiáⁿ kóng,

9我，我kap lín以及lín ê後裔立我ê約；Góa, Góa kap lín í-ki̍p lín ê hō͘-è li̍p Góa ê iok;

10亦kap hiah-ê kap lín tī-teh一切ê活物，就是kap lín tī-teh ê飛鳥、cheng-siⁿ，一切走獸；見若tùi大船出來地上一切ê走獸立約。ia̍h kap hiah ê kap lín tī-teh it-chhè ê oa̍h-mi̍h, chiū-sī kap lín tī-teh ê pe-chiáu, cheng-siⁿ, it-chhè cháu-siù; kìⁿ-nā tùi tōa-chûn chhut-lâi tōe-chiūⁿ it-chhè ê cháu-siù li̍p-iok.

11我kap lín立我ê約；見有肉體ê，無koh hō͘大水滅無，亦無koh有大水毀壞土地。Góa kap lín li̍p Góa ê iok; kìⁿ ū jio̍k-thé ê, bô koh hō͘ tōa-chúi bia̍t-bô, ia̍h bô koh ū tōa-chúi húi-hoāi thó͘-tōe.

12上帝講，我kap lín亦kap hiah-ê kap lín tī-teh ta̍k樣ê活物所立永世代ê約，是有記號。Siōng-tè kóng, Góa kap lín ia̍h kap hiah-ê kap lín tī-teh ta̍k-iūⁿ ê oa̍h-mi̍h só͘ li̍p éng sè-tāi ê iok, sī ū kì-hō.

13我將我ê虹hē tī雲裡，thang做我kap地立約ê記號。Góa chiong Góa ê khēng hē tī hûn-ni̍h, thang chòe Góa kap tōe li̍p iok ê kì-hō.

14以後我hō͘雲起遮地ê時，beh有虹出現tī雲裡。Í-āu Góa hō͘ hûn khí jia tōe ê sî, beh ū khēng chhut-hiān tī hûn-ni̍h.

15我就記念我kap lín以及ta̍k樣有肉體ê活物所立ê約，水無koh氾濫損壞一切有肉體ê物。Góa chiū kì-liām Góa kap lín í-ki̍p ta̍k-iūⁿ ū jio̍k-thé ê oa̍h-mi̍h só͘ li̍p ê iok, chúi bô koh hoàn-lām sún-hoāi it-chhè ū jio̍k-thé ê mi̍h.

16虹beh出現tī雲裡，我beh看伊，hō͘我記念上帝kap地上ta̍k樣有肉體ê活物所立永遠ê約。Khēng beh chhut-hiān tī hûn-ni̍h, Góa beh khòaⁿ-i, hō͘ Góa kì-liām Siōng-tè kap tōe-chiūⁿ ta̍k-iūⁿ ū jio̍k-thé ê oa̍h-mi̍h só͘ li̍p éng-oán ê iok.

17上帝對挪亞講，這就是我kap地上一切有肉體ê物所立ê約ê記號。Siōng-tè tùi Ná-a kóng, Che chiū-sī Góa kap tōe-chiūⁿ it-chhè ū jio̍k-thé ê mi̍h só͘ li̍p ê iok ê kì-hō.

18挪亞ê kiáⁿ，出大船ê，就是閃，含，雅弗；含是迦南ê老父。Ná-a ê kiáⁿ, chhut tōa-chûn-ê, chiū-sī Siám, Hâm, Ngá-hut; Hâm sī Ka-lâm ê lāu-pē.

19Chí三個是挪亞ê kiáⁿ；tùi in遍滿全地。Chí saⁿ-ê sī Ná-a ê kiáⁿ; tùi in piàn-móa choân-tōe.

20挪亞起手做農夫，栽種葡萄園；Ná-a khí-chhiú chòe lông-hu, chai-chèng phû-tô-hn̂g;

21lim hit-ê酒來醉，tī布棚內thǹg-theh-theh。lim hit ê chiú lâi chùi, tī pò͘-pîⁿ-lāi thǹg-pak-theh.

22迦南ê老父，含，看in老父thǹg-theh，去外面kā in兩個兄弟講。Ka-lâm ê lāu-pē, Hâm, khòaⁿ in lāu-pē thǹg-theh, khì gōa-bīn kā in nn̄g ê hiaⁿ-tī kóng.

23閃kap雅弗the̍h一領衫，掛tī in ê肩頭；倒退行來jia老父ê thǹg-theh；in ê面ǹg出，無看去老父ê thǹg-theh。Siám kap Ngá-hut the̍h chi̍t niá saⁿ, khòa tī in ê keng-thâu; tò-thè kiâⁿ lâi jia lāu-pē ê thǹg-theh; in ê bīn ǹg-chhut, bô khòaⁿ-khì lāu-pē ê thǹg-theh.

24挪亞酒醉醒，chiah知第二kiáⁿ ê所做。Ná-a chiú-chùi chhíⁿ, chiah chai tē jī-kiáⁿ ê só͘-chòe.

25就講， 迦南tio̍h受咒詛； 伊beh做伊ê兄弟奴僕ê奴僕。Koh講，Chiū kóng, Ka-lâm tio̍h siū chiù-chó͘; I beh chòe i ê hiaⁿ-tī lô͘-po̍k ê lô͘-po̍k.Koh kóng,

26Tio̍h o-ló耶和華，閃ê上帝； 迦南做閃ê奴僕。Tio̍h o-ló Iâ-hô-hoa, Siám ê Siōng-tè; Ka-lâm chòe Siám ê lô͘-po̍k.

27願上帝hō͘雅弗發展， Hō͘伊tòa tī閃ê布棚； 迦南亦做伊ê奴僕。Goān Siōng-tè hō͘ Ngá-hut hoat-tián, Hō͘ i tòa tī Siám ê pò͘-pîⁿ; Ka-lâm ia̍h chòe i ê lô͘-po̍k.

28大水了後挪亞iáu活三百五十年。Tōa-chúi liáu-āu Ná-a iáu oa̍h saⁿ-pah gō͘-cha̍p nî.

29挪亞計共享壽九百五十歲，chiah死。Ná-a kè-kiōng hióng-siū káu-pah gō͘-cha̍p hè, chiah sí.

1挪亞ê kiáⁿ閃、含、雅弗ê世系記tī下底：大水以後，in有生kiáⁿ。Ná-a ê kiáⁿ Siám, Hâm, Ngá-hut ê sè-hē kì tī ē-tóe. Tōa-chúi í-āu, in ū siⁿ kiáⁿ.

2雅弗ê kiáⁿ；Khó-bia̍t、Má-kok、Má-tāi、Ngá-oân、Thó͘-pat、Bí-siat、Thé-la̍h。Ngá-hut ê kiáⁿ; Khó-bia̍t, Má-kok, Má-tāi, Ngá-oân, Thó͘-pat, Bí-siat, Thé-la̍h.

3Khó-bia̍t ê kiáⁿ：A-si̍t-ki-ná、Lī-hoat、Tô-ka-má。Khó-bia̍t ê kiáⁿ; A-si̍t-ki-ná, Lī-hoat, Tô-ka-má.

4Ngá-oân ê kiáⁿ：Í-lī-sa、Tāi-sit、Ki-tí人、To-tan人。Ngá-oân ê kiáⁿ; Í-lī-sa, Tāi-sit, Ki-tí lâng, To-tan lâng.

5Chiah-ê人ê後裔，將ta̍k國ê地土、海嶼，分開khiā起，各照伊ê腔口，照in ê宗族，照in ê邦國。Chiah ê lâng ê hō͘-è, chiong ta̍k-kok ê tōe-thó͘, hái-sū, pun-khui khiā-khí, kok chiàu i ê khiuⁿ-kháu, chiàu in ê chong-cho̍k, chiàu in ê pang-kok.

6含ê kiáⁿ：Kó͘-si̍t，Be̍k-se-im，Hut、Ka-lâm。Hâm ê kiáⁿ; Kó͘-si̍t, Be̍k-se-im, Hut, Ka-lâm.

7Kó͘-si̍t ê kiáⁿ：Se-pa、Hap-hui-la̍h、Sat-hut-tha、La̍h-má、Sat-hut-thê-ka。La̍h-má ê kiáⁿ：Sī-pa、Tí-tàn。Kó͘-si̍t ê kiáⁿ; Se-pa, Hap-hui-la̍h, Sat-hut-tha, La̍h-má, Sat-hut-thê-ka. La̍h-má ê kiáⁿ; Sī-pa, Tí-tàn.

8Kó͘-si̍t亦生Lêng-lio̍k，伊做世上英雄ê起頭。Kó͘-si̍t ia̍h siⁿ Lêng-lio̍k; i chòe sè-chiūⁿ eng-hiông ê khí-thâu.

9伊tī耶和華ê面前是一個英雄phah獵ê；所以人講，親像Lêng-lio̍k tī耶和華ê面前，是一個英雄phah獵ê。I tī Iâ-hô-hoa ê bīn-chêng sī chi̍t ê eng-hiông phah-la̍h-ê; só͘-í lâng kóng, Chhin-chhiūⁿ Lêng-lio̍k tī Iâ-hô-hoa ê bīn-chêng, sī chi̍t ê eng-hiông phah-la̍h-ê.

10伊ê國ê起頭，就是Pa-pia̍t、Í-le̍k、A-kah、Kah-nî，tī Sī-ná ê地。I ê kok ê khí-thâu, chiū-sī Pa-pia̍t, Í-le̍k, A-kah, Kah-nî, tī Sī-ná ê tōe.

11伊tùi-hia出來，去亞述，起造尼尼微、Lí-hô-pek-i-ní、Ka-la̍h，I tùi-hia chhut-lâi, khì A-su̍t, khí-chō Nî-nî-bî, Lí-hô-pek-i-ní, Ka-la̍h,

12以及尼尼微Ka-la̍h中間ê Lī-sián；這就是hit-ê大城。í-ki̍p Nî-nî-bî Ka-la̍h tiong-kan ê Lī-sián; che chiū-sī hit ê tōa-siâⁿ.

13Be̍k-se人生Lō͘-teng人、A-ná-bí人、Lī-hap人、Ná-hut-thó͘人；Be̍k-se lâng siⁿ Lō͘-teng lâng, A-ná-bí lâng, Lī-hap lâng, Ná-hut-thó͘ lâng;

14Phàⁿ-su-ló͘人、Ka-su-ló͘人(tùi in出腓利士人) 、Ka-hui-thok人。Phàⁿ-su-ló͘ lâng, Ka-su-ló͘ lâng, (tùi in chhut Hui-lī-sū lâng), Ka-hui-thok lâng.

15迦南生大kiáⁿ Se-tùn kap Hek；Ka-lâm siⁿ tōa-kiáⁿ Se-tùn kap Hek;

16以及Iâ-pò͘-su人、A-mô͘-lī人、Kek-ka-sat人；í-ki̍p Iâ-pò͘-su lâng, A-mô͘-lī lâng, Kek-ka-sat lâng;

17Hi-bí人、A-ki人、Se-nî人；Hi-bí lâng, A-ki lâng, Se-nî lâng;

18A-óa-tí人、Sé-má-lí人，Hap-boa̍t人；後來迦南chiah-ê族分散。A-óa-tí lâng, Sé-má-lí lâng, Hap-boa̍t lâng; āu-lâi Ka-lâm chiah ê cho̍k hun-sòaⁿ.

19迦南ê境界是tùi Se-tùn ǹg Ki-la̍h-ní ê路，到Ka-sat；koh ǹg所多瑪、蛾摩拉、Ap-má、Sé-phian ê路，到La̍h-sa。Ka-lâm ê kéng-kài sī tùi Se-tùn ǹg Ki-la̍h-ní ê lō͘, kàu Ka-sat; koh ǹg Só͘-to-má, Gô-mô͘-la̍h, Ap-má, Sé-phian ê lō͘, kàu La̍h-sa.

20這就是含ê後裔，各照in ê宗族，in ê腔口，tī in ê地土，in ê邦國。Che chiū-sī Hâm ê hō͘-è, kok chiàu in ê chong-cho̍k, in ê khiuⁿ-kháu, tī in ê tōe-thó͘, in ê pang-kok.

21雅弗ê兄閃，做Hi-pek全族ê祖，亦生kiáⁿ。Ngá-hut ê hiaⁿ Siám, chòe Hi-pek choân-cho̍k ê chó͘, ia̍h siⁿ-kiáⁿ.

22閃ê kiáⁿ：Í-lân、A-su̍t、A-hoat-sat、Lō͘-tek、A-lân。Siám ê kiáⁿ; Í-lân, A-su̍t, A-hoat-sat, Lō͘-tek, A-lân.

23A-lân ê kiáⁿ：O͘-su、Hō͘-le̍k、Ki-thiap，Má-si。A-lân ê kiáⁿ; O͘-su, Hō͘-le̍k, Ki-thiap, Má-si.

24A-hoat-sat生Sa-la̍h；Sa-la̍h生Hi-pek。A-hoat-sat siⁿ Sa-la̍h; Sa-la̍h siⁿ Hi-pek.

25Hi-pek生兩個kiáⁿ；一個名叫Hoat-le̍k，因為tī伊hit時地就分界；Hoat-le̍k ê小弟名叫Iok-tan。Hi-pek siⁿ nn̄g ê kiáⁿ; chi̍t-ê miâ-kiò Hoat-le̍k, in-ūi tī i hit-sî tōe chiū hun-kài; Hoat-le̍k ê sió-tī miâ-kiò Iok-tan.

26Iok-tan生A-mô͘-tap、Sa-lia̍t、Hap-sat-má-hui、Iâ-la̍h；Iok-tan siⁿ A-mô͘-tap, Sa-lia̍t, Hap-sat-má-hui, Iâ-la̍h;

27Hap-to-lân、O͘-sat、Tek-la̍h；Hap-to-lân, O͘-sat, Tek-la̍h;

28Gô-pa-lō͘、A-pí-má-lī、Sī-pa；Gô-pa-lō͘, A-pí-má-lī, Sī-pa;

29O-húi、Hap-hui-la̍h、Iok-pa；chiah-ê lóng是Iok-tan ê kiáⁿ。O-húi, Hap-hui-la̍h, Iok-pa; chiah-ê lóng sī Iok-tan ê kiáⁿ.

30In所khiā起ê地方是tùi Bí-sa到Se-hoat東勢ê山。In só͘ khiā-khí ê tōe-hng sī tùi Bí-sa kàu Se-hoat tang-sì ê soaⁿ.

31這就是閃ê kiaⁿ孫，各照in ê宗族，in ê腔口，tī in ê土地，照in ê邦國。Che chiū-sī Siám ê kiáⁿ-sun, kok chiàu in ê chong-cho̍k, in ê khiuⁿ-kháu, tī in ê thó͘-tōe, chiàu in ê pang-kok.

32Chiah-ê lóng是挪亞ê kiáⁿ ê宗族，各照in ê世系，in ê邦國；大水以後，in tī地上分做邦國。Chiah-ê lóng sī Ná-a ê kiáⁿ ê chong-cho̍k, kok chiàu in ê sè-hē, in ê pang-kok; tōa-chúi í-āu, in tī tōe-chiūⁿ pun-chòe pang-kok.

1Hit時天下ê口音、言語，lóng一樣。Hit-sî thiⁿ-ē ê kháu-im, giân-gú, lóng chi̍t-iūⁿ.

2In徙去東勢ê時chūn，tī Sī-ná地tú-tio̍h一片ê平洋，就tòa tī-hia。In sóa-khì tang-sì ê sî-chūn, tī Sī-ná tōe tú-tio̍h chi̍t-phiàn ê pîⁿ-iûⁿ, chiū tòa tī-hia.

3In大家參詳講，來ah，咱tio̍h做磚，燒hō͘伊熟。In有磚thang替石，koh有石油thang替灰土。In tāi-ke chham-siông kóng, Lâi ah, lán tio̍h chòe chng, sio hō͘ i se̍k. In ū chng thang thòe chio̍h, koh ū chio̍h-iû thang thòe he-thô͘.

4Koh講，來ah，咱tio̍h起城kap塔，塔頂抵天，為咱立一個名，免得咱四散tī全地。Koh kóng, Lâi ah, lán tio̍h khí siâⁿ kap thah, thah-téng tú-thiⁿ, ūi lán li̍p chi̍t ê miâ, bián-tit lán sì-sòaⁿ tī choân-tōe.

5耶和華降臨，beh看世間人所起ê城kap塔。Iâ-hô-hoa kàng-lîm, beh khòaⁿ sè-kan lâng só͘ khí ê siâⁿ kap thah.

6耶和華講，看ah，chiah-ê百姓lóng合一，言語亦一樣；現今已經起手做chit-ê事；以後in所beh做ê，無一項能禁止。Iâ-hô-hoa kóng, Khòaⁿ ah, chiah ê peh-sìⁿ lóng ha̍p-it, giân-gú ia̍h chi̍t-iūⁿ; hiān-kim í-keng khí-chhiú chòe chit ê sū; í-āu in só͘ beh chòe ê, bô chi̍t-hāng ōe kìm-chí.

7來ah，咱落來去，tī-hia phah亂in ê口音，hō͘ in ê言語大家bōe相通。Lâi ah, lán lo̍h-lâi-khì, tī-hia phah-loān in ê kháu-im, hō͘ in ê giân-gú tāi-ke bōe siong-thong.

8Tùi án-ni，耶和華hō͘ in tùi-hia四散tī全地；in就停工，無起hit-ê城。Tùi án-ni, Iâ-hô-hoa hō͘ in tùi-hia sì-sòaⁿ tī choân-tōe; in chiū thêng-kang, bô khí hit ê siâⁿ.

9所以hit-ê城名叫巴別，因為耶和華tī-hia phah亂天下ê言語；耶和華hō͘人tùi-hia四散tī全地上。Só͘-í hit ê siâⁿ miâ-kiò Pa-pia̍t, in-ūi Iâ-hô-hoa tī-hia phah-loān thiⁿ-ē ê giân-gú; Iâ-hô-hoa hō͘ lâng tùi-hia sì-sòaⁿ tī choân-tōe-chiūⁿ.

10閃ê世系記tī下底：閃一百歲，大水以後兩年生A-hoat-sat。Siám ê sè-hē kì tī ē-tóe. Siám chi̍t-pah hè, tōa-chúi í-āu nn̄g-nî siⁿ A-hoat-sat.

11閃生A-hoat-sat了後，iáu活五百年，koh有生kiáⁿ cha-bó͘-kiáⁿ。Siám siⁿ A-hoat-sat liáu-āu, iáu oa̍h gō͘-pah nî, koh ū siⁿ kiáⁿ cha-bó͘-kiáⁿ.

12A-hoat-sat三十五歲生Sa-la̍h。A-hoat-sat saⁿ-cha̍p gō͘ hè siⁿ Sa-la̍h.

13A-hoat-sat生Sa-la̍h了後，iáu活四百連三年，koh有生kiáⁿ cha-bó͘-kiáⁿ。A-hoat-sat siⁿ Sa-la̍h liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ.

14Sa-la̍h三十歲生Hi-pek。Sa-la̍h saⁿ-cha̍p hè siⁿ Hi-pek.

15Sa-la̍h生Hi-pek了後，iáu活四百連三年，koh有生kiáⁿ cha-bó͘-kiáⁿ。Sa-la̍h siⁿ Hi-pek liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ.

16Hi-pek三十四歲生Hoat-le̍k。Hi-pek saⁿ-cha̍p-sì hè siⁿ Hoat-le̍k .

17Hi-pek生Hoat-le̍k了後，iáu活四百三十年，koh有生kiáⁿ cha-bó͘-kiáⁿ。Hi-pek siⁿ Hoat-le̍k liáu-āu, iáu oa̍h sì-pah saⁿ-cha̍p nî, koh ū siⁿ kiáⁿ cha-bó͘-kiáⁿ.

18Hoat-le̍k三十歲生La̍h-ngô͘。Hoat-le̍k saⁿ-cha̍p hè siⁿ La̍h-ngô͘.

19Hoat-le̍k生La̍h-ngô͘了後，iáu活兩百連九年，koh有生kiáⁿ cha-bó͘-kiáⁿ。Hoat-le̍k siⁿ La̍h-ngô͘ liáu-āu, iáu oa̍h nn̄g-pah liân káu nî, koh ū siⁿ kiáⁿ cha-bó͘-kiáⁿ.

20La̍h-ngô͘三十二歲生Se-lo̍k。La̍h-ngô͘ saⁿ-cha̍p jī hè siⁿ Se-lo̍k.

21La̍h-ngô͘生Se-lo̍k了後，iáu活兩百連七年，koh有生kiáⁿ cha-bó͘-kiáⁿ。La̍h-ngô͘ siⁿ Se-lo̍k liáu-āu, iáu oa̍h nn̄g-pah liân chhit nî, koh ū siⁿ kiáⁿ cha-bó͘-kiáⁿ.

22Se-lo̍k三十歲生Ná-ho̍k。Se-lo̍k saⁿ-cha̍p hè siⁿ Ná-ho̍k.

23Se-lo̍k生Ná-ho̍k了後，iáu活兩百年，koh有生kiáⁿ cha-bó͘-kiáⁿ。Se-lo̍k siⁿ Ná-ho̍k liáu-āu, iáu oa̍h nn̄g-pah nî, koh ū siⁿ kiáⁿ cha-bó͘-kiáⁿ.

24Ná-ho̍k二十九歲生Tha-la̍h。Ná-ho̍k jī-cha̍p káu hè siⁿ Tha-la̍h.

25Ná-ho̍k生Tha-la̍h了後，iáu活一百十九年，koh有生kiáⁿ cha-bó͘-kiáⁿ。Ná-ho̍k siⁿ Tha-la̍h liáu-āu, iáu oa̍h chi̍t-pah cha̍p-káu nî, koh ū siⁿ kiáⁿ cha-bó͘-kiáⁿ.

26Tha-la̍h七十歲生亞伯蘭、Ná-ho̍k、哈蘭。Tha-la̍h chhit-cha̍p hè siⁿ A-pek-lân, Ná-ho̍k, Hap-lân.

27Tha-la̍h ê世系記tī下底：Tha-la̍h生亞伯蘭、Ná-ho̍k、哈蘭；哈蘭生羅得。Tha-la̍h ê sè-hē kì tī ē-tóe. Tha-la̍h siⁿ A-pek-lân, Ná-ho̍k, Hap-lân; Hap-lân siⁿ Lô-tek.

28哈蘭死tī伊ê老父Tha-la̍h ê面前，tī伊ê本地Ka-le̍k-tí ê Jíⁿ城。Hap-lân sí tī i ê lāu-pē Tha-la̍h ê bīn-chêng, tī i ê pún-tōe Ka-le̍k-tí ê Jíⁿ siâⁿ.

29亞伯蘭、Ná-ho̍k，各有娶bó͘。亞伯蘭ê bó͘名叫撒萊；Ná-ho̍k ê bó͘名叫Bi̍t-ka，是哈蘭ê cha-bó͘-kiáⁿ；哈蘭是Bi̍t-ka ê老父，亦是Í-sū-ka ê老父。A-pek-lân, Ná-ho̍k, kok ū chhōa-bó͘. A-pek-lân ê bó͘ miâ kiò Sat-lāi; Ná-ho̍k ê bó͘ miâ-kiò Bi̍t-ka, sī Hap-lân ê cha-bó͘-kiáⁿ; Hap-lân sī Bi̍t-ka ê lāu-pē, ia̍h sī Í-sū-ka ê lāu-pē.

30撒萊無懷孕，無kiáⁿ。Sat-lāi bô hoâi-īn, bô kiáⁿ.

31Tha-la̍h chhōa伊ê kiáⁿ亞伯蘭，kap伊ê孫羅得，就是哈蘭ê kiáⁿ，以及伊ê新婦撒萊，就是伊ê kiáⁿ亞伯蘭ê bó͘，in相kap出Ka-le̍k-tí ê Jíⁿ城；beh去迦南地；in到哈蘭就tòa tī-hia。Tha-la̍h chhōa i ê kiáⁿ A-pek-lân, kap i ê sun Lô-tek, chiū-sī Hap-lân ê kiáⁿ, í-ki̍p i ê sim-pū Sat-lāi, chiū-sī i ê kiáⁿ A-pek-lân ê bó͘, in saⁿ-kap chhut Ka-le̍k-tí ê Jíⁿ siâⁿ; beh khì Ka-lâm tōe; in kàu Hap-lân chiū tòa tī-hia.

32Tha-la̍h享壽兩百連五歲；Tha-la̍h死tī哈蘭。Tha-la̍h hióng-siū nn̄g-pah liân gō͘ hè; Tha-la̍h sí tī Hap-lân.