1挪亞ê kiáⁿ閃、含、雅弗ê世系記tī下底：大水以後，in有生kiáⁿ。Ná-a ê kiáⁿ Siám, Hâm, Ngá-hut ê sè-hē kì tī ē-tóe. Tōa-chúi í-āu, in ū siⁿ kiáⁿ.

2雅弗ê kiáⁿ；Khó-bia̍t、Má-kok、Má-tāi、Ngá-oân、Thó͘-pat、Bí-siat、Thé-la̍h。Ngá-hut ê kiáⁿ; Khó-bia̍t, Má-kok, Má-tāi, Ngá-oân, Thó͘-pat, Bí-siat, Thé-la̍h.

3Khó-bia̍t ê kiáⁿ：A-si̍t-ki-ná、Lī-hoat、Tô-ka-má。Khó-bia̍t ê kiáⁿ; A-si̍t-ki-ná, Lī-hoat, Tô-ka-má.

4Ngá-oân ê kiáⁿ：Í-lī-sa、Tāi-sit、Ki-tí人、To-tan人。Ngá-oân ê kiáⁿ; Í-lī-sa, Tāi-sit, Ki-tí lâng, To-tan lâng.

5Chiah-ê人ê後裔，將ta̍k國ê地土、海嶼，分開khiā起，各照伊ê腔口，照in ê宗族，照in ê邦國。Chiah ê lâng ê hō͘-è, chiong ta̍k-kok ê tōe-thó͘, hái-sū, pun-khui khiā-khí, kok chiàu i ê khiuⁿ-kháu, chiàu in ê chong-cho̍k, chiàu in ê pang-kok.

6含ê kiáⁿ：Kó͘-si̍t，Be̍k-se-im，Hut、Ka-lâm。Hâm ê kiáⁿ; Kó͘-si̍t, Be̍k-se-im, Hut, Ka-lâm.

7Kó͘-si̍t ê kiáⁿ：Se-pa、Hap-hui-la̍h、Sat-hut-tha、La̍h-má、Sat-hut-thê-ka。La̍h-má ê kiáⁿ：Sī-pa、Tí-tàn。Kó͘-si̍t ê kiáⁿ; Se-pa, Hap-hui-la̍h, Sat-hut-tha, La̍h-má, Sat-hut-thê-ka. La̍h-má ê kiáⁿ; Sī-pa, Tí-tàn.

8Kó͘-si̍t亦生Lêng-lio̍k，伊做世上英雄ê起頭。Kó͘-si̍t ia̍h siⁿ Lêng-lio̍k; i chòe sè-chiūⁿ eng-hiông ê khí-thâu.

9伊tī耶和華ê面前是一個英雄phah獵ê；所以人講，親像Lêng-lio̍k tī耶和華ê面前，是一個英雄phah獵ê。I tī Iâ-hô-hoa ê bīn-chêng sī chi̍t ê eng-hiông phah-la̍h-ê; só͘-í lâng kóng, Chhin-chhiūⁿ Lêng-lio̍k tī Iâ-hô-hoa ê bīn-chêng, sī chi̍t ê eng-hiông phah-la̍h-ê.

10伊ê國ê起頭，就是Pa-pia̍t、Í-le̍k、A-kah、Kah-nî，tī Sī-ná ê地。I ê kok ê khí-thâu, chiū-sī Pa-pia̍t, Í-le̍k, A-kah, Kah-nî, tī Sī-ná ê tōe.

11伊tùi-hia出來，去亞述，起造尼尼微、Lí-hô-pek-i-ní、Ka-la̍h，I tùi-hia chhut-lâi, khì A-su̍t, khí-chō Nî-nî-bî, Lí-hô-pek-i-ní, Ka-la̍h,

12以及尼尼微Ka-la̍h中間ê Lī-sián；這就是hit-ê大城。í-ki̍p Nî-nî-bî Ka-la̍h tiong-kan ê Lī-sián; che chiū-sī hit ê tōa-siâⁿ.

13Be̍k-se人生Lō͘-teng人、A-ná-bí人、Lī-hap人、Ná-hut-thó͘人；Be̍k-se lâng siⁿ Lō͘-teng lâng, A-ná-bí lâng, Lī-hap lâng, Ná-hut-thó͘ lâng;

14Phàⁿ-su-ló͘人、Ka-su-ló͘人(tùi in出腓利士人) 、Ka-hui-thok人。Phàⁿ-su-ló͘ lâng, Ka-su-ló͘ lâng, (tùi in chhut Hui-lī-sū lâng), Ka-hui-thok lâng.

15迦南生大kiáⁿ Se-tùn kap Hek；Ka-lâm siⁿ tōa-kiáⁿ Se-tùn kap Hek;

16以及Iâ-pò͘-su人、A-mô͘-lī人、Kek-ka-sat人；í-ki̍p Iâ-pò͘-su lâng, A-mô͘-lī lâng, Kek-ka-sat lâng;

17Hi-bí人、A-ki人、Se-nî人；Hi-bí lâng, A-ki lâng, Se-nî lâng;

18A-óa-tí人、Sé-má-lí人，Hap-boa̍t人；後來迦南chiah-ê族分散。A-óa-tí lâng, Sé-má-lí lâng, Hap-boa̍t lâng; āu-lâi Ka-lâm chiah ê cho̍k hun-sòaⁿ.

19迦南ê境界是tùi Se-tùn ǹg Ki-la̍h-ní ê路，到Ka-sat；koh ǹg所多瑪、蛾摩拉、Ap-má、Sé-phian ê路，到La̍h-sa。Ka-lâm ê kéng-kài sī tùi Se-tùn ǹg Ki-la̍h-ní ê lō͘, kàu Ka-sat; koh ǹg Só͘-to-má, Gô-mô͘-la̍h, Ap-má, Sé-phian ê lō͘, kàu La̍h-sa.

20這就是含ê後裔，各照in ê宗族，in ê腔口，tī in ê地土，in ê邦國。Che chiū-sī Hâm ê hō͘-è, kok chiàu in ê chong-cho̍k, in ê khiuⁿ-kháu, tī in ê tōe-thó͘, in ê pang-kok.

21雅弗ê兄閃，做Hi-pek全族ê祖，亦生kiáⁿ。Ngá-hut ê hiaⁿ Siám, chòe Hi-pek choân-cho̍k ê chó͘, ia̍h siⁿ-kiáⁿ.

22閃ê kiáⁿ：Í-lân、A-su̍t、A-hoat-sat、Lō͘-tek、A-lân。Siám ê kiáⁿ; Í-lân, A-su̍t, A-hoat-sat, Lō͘-tek, A-lân.

23A-lân ê kiáⁿ：O͘-su、Hō͘-le̍k、Ki-thiap，Má-si。A-lân ê kiáⁿ; O͘-su, Hō͘-le̍k, Ki-thiap, Má-si.

24A-hoat-sat生Sa-la̍h；Sa-la̍h生Hi-pek。A-hoat-sat siⁿ Sa-la̍h; Sa-la̍h siⁿ Hi-pek.

25Hi-pek生兩個kiáⁿ；一個名叫Hoat-le̍k，因為tī伊hit時地就分界；Hoat-le̍k ê小弟名叫Iok-tan。Hi-pek siⁿ nn̄g ê kiáⁿ; chi̍t-ê miâ-kiò Hoat-le̍k, in-ūi tī i hit-sî tōe chiū hun-kài; Hoat-le̍k ê sió-tī miâ-kiò Iok-tan.

26Iok-tan生A-mô͘-tap、Sa-lia̍t、Hap-sat-má-hui、Iâ-la̍h；Iok-tan siⁿ A-mô͘-tap, Sa-lia̍t, Hap-sat-má-hui, Iâ-la̍h;

27Hap-to-lân、O͘-sat、Tek-la̍h；Hap-to-lân, O͘-sat, Tek-la̍h;

28Gô-pa-lō͘、A-pí-má-lī、Sī-pa；Gô-pa-lō͘, A-pí-má-lī, Sī-pa;

29O-húi、Hap-hui-la̍h、Iok-pa；chiah-ê lóng是Iok-tan ê kiáⁿ。O-húi, Hap-hui-la̍h, Iok-pa; chiah-ê lóng sī Iok-tan ê kiáⁿ.

30In所khiā起ê地方是tùi Bí-sa到Se-hoat東勢ê山。In só͘ khiā-khí ê tōe-hng sī tùi Bí-sa kàu Se-hoat tang-sì ê soaⁿ.

31這就是閃ê kiaⁿ孫，各照in ê宗族，in ê腔口，tī in ê土地，照in ê邦國。Che chiū-sī Siám ê kiáⁿ-sun, kok chiàu in ê chong-cho̍k, in ê khiuⁿ-kháu, tī in ê thó͘-tōe, chiàu in ê pang-kok.

32Chiah-ê lóng是挪亞ê kiáⁿ ê宗族，各照in ê世系，in ê邦國；大水以後，in tī地上分做邦國。Chiah-ê lóng sī Ná-a ê kiáⁿ ê chong-cho̍k, kok chiàu in ê sè-hē, in ê pang-kok; tōa-chúi í-āu, in tī tōe-chiūⁿ pun-chòe pang-kok.

1Hit時天下ê口音、言語，lóng一樣。Hit-sî thiⁿ-ē ê kháu-im, giân-gú, lóng chi̍t-iūⁿ.

2In徙去東勢ê時chūn，tī Sī-ná地tú-tio̍h一片ê平洋，就tòa tī-hia。In sóa-khì tang-sì ê sî-chūn, tī Sī-ná tōe tú-tio̍h chi̍t-phiàn ê pîⁿ-iûⁿ, chiū tòa tī-hia.

3In大家參詳講，來ah，咱tio̍h做磚，燒hō͘伊熟。In有磚thang替石，koh有石油thang替灰土。In tāi-ke chham-siông kóng, Lâi ah, lán tio̍h chòe chng, sio hō͘ i se̍k. In ū chng thang thòe chio̍h, koh ū chio̍h-iû thang thòe he-thô͘.

4Koh講，來ah，咱tio̍h起城kap塔，塔頂抵天，為咱立一個名，免得咱四散tī全地。Koh kóng, Lâi ah, lán tio̍h khí siâⁿ kap thah, thah-téng tú-thiⁿ, ūi lán li̍p chi̍t ê miâ, bián-tit lán sì-sòaⁿ tī choân-tōe.

5耶和華降臨，beh看世間人所起ê城kap塔。Iâ-hô-hoa kàng-lîm, beh khòaⁿ sè-kan lâng só͘ khí ê siâⁿ kap thah.

6耶和華講，看ah，chiah-ê百姓lóng合一，言語亦一樣；現今已經起手做chit-ê事；以後in所beh做ê，無一項能禁止。Iâ-hô-hoa kóng, Khòaⁿ ah, chiah ê peh-sìⁿ lóng ha̍p-it, giân-gú ia̍h chi̍t-iūⁿ; hiān-kim í-keng khí-chhiú chòe chit ê sū; í-āu in só͘ beh chòe ê, bô chi̍t-hāng ōe kìm-chí.

7來ah，咱落來去，tī-hia phah亂in ê口音，hō͘ in ê言語大家bōe相通。Lâi ah, lán lo̍h-lâi-khì, tī-hia phah-loān in ê kháu-im, hō͘ in ê giân-gú tāi-ke bōe siong-thong.

8Tùi án-ni，耶和華hō͘ in tùi-hia四散tī全地；in就停工，無起hit-ê城。Tùi án-ni, Iâ-hô-hoa hō͘ in tùi-hia sì-sòaⁿ tī choân-tōe; in chiū thêng-kang, bô khí hit ê siâⁿ.

9所以hit-ê城名叫巴別，因為耶和華tī-hia phah亂天下ê言語；耶和華hō͘人tùi-hia四散tī全地上。Só͘-í hit ê siâⁿ miâ-kiò Pa-pia̍t, in-ūi Iâ-hô-hoa tī-hia phah-loān thiⁿ-ē ê giân-gú; Iâ-hô-hoa hō͘ lâng tùi-hia sì-sòaⁿ tī choân-tōe-chiūⁿ.

10閃ê世系記tī下底：閃一百歲，大水以後兩年生A-hoat-sat。Siám ê sè-hē kì tī ē-tóe. Siám chi̍t-pah hè, tōa-chúi í-āu nn̄g-nî siⁿ A-hoat-sat.

11閃生A-hoat-sat了後，iáu活五百年，koh有生kiáⁿ cha-bó͘-kiáⁿ。Siám siⁿ A-hoat-sat liáu-āu, iáu oa̍h gō͘-pah nî, koh ū siⁿ kiáⁿ cha-bó͘-kiáⁿ.

12A-hoat-sat三十五歲生Sa-la̍h。A-hoat-sat saⁿ-cha̍p gō͘ hè siⁿ Sa-la̍h.

13A-hoat-sat生Sa-la̍h了後，iáu活四百連三年，koh有生kiáⁿ cha-bó͘-kiáⁿ。A-hoat-sat siⁿ Sa-la̍h liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ.

14Sa-la̍h三十歲生Hi-pek。Sa-la̍h saⁿ-cha̍p hè siⁿ Hi-pek.

15Sa-la̍h生Hi-pek了後，iáu活四百連三年，koh有生kiáⁿ cha-bó͘-kiáⁿ。Sa-la̍h siⁿ Hi-pek liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ.

16Hi-pek三十四歲生Hoat-le̍k。Hi-pek saⁿ-cha̍p-sì hè siⁿ Hoat-le̍k .

17Hi-pek生Hoat-le̍k了後，iáu活四百三十年，koh有生kiáⁿ cha-bó͘-kiáⁿ。Hi-pek siⁿ Hoat-le̍k liáu-āu, iáu oa̍h sì-pah saⁿ-cha̍p nî, koh ū siⁿ kiáⁿ cha-bó͘-kiáⁿ.

18Hoat-le̍k三十歲生La̍h-ngô͘。Hoat-le̍k saⁿ-cha̍p hè siⁿ La̍h-ngô͘.

19Hoat-le̍k生La̍h-ngô͘了後，iáu活兩百連九年，koh有生kiáⁿ cha-bó͘-kiáⁿ。Hoat-le̍k siⁿ La̍h-ngô͘ liáu-āu, iáu oa̍h nn̄g-pah liân káu nî, koh ū siⁿ kiáⁿ cha-bó͘-kiáⁿ.

20La̍h-ngô͘三十二歲生Se-lo̍k。La̍h-ngô͘ saⁿ-cha̍p jī hè siⁿ Se-lo̍k.

21La̍h-ngô͘生Se-lo̍k了後，iáu活兩百連七年，koh有生kiáⁿ cha-bó͘-kiáⁿ。La̍h-ngô͘ siⁿ Se-lo̍k liáu-āu, iáu oa̍h nn̄g-pah liân chhit nî, koh ū siⁿ kiáⁿ cha-bó͘-kiáⁿ.

22Se-lo̍k三十歲生Ná-ho̍k。Se-lo̍k saⁿ-cha̍p hè siⁿ Ná-ho̍k.

23Se-lo̍k生Ná-ho̍k了後，iáu活兩百年，koh有生kiáⁿ cha-bó͘-kiáⁿ。Se-lo̍k siⁿ Ná-ho̍k liáu-āu, iáu oa̍h nn̄g-pah nî, koh ū siⁿ kiáⁿ cha-bó͘-kiáⁿ.

24Ná-ho̍k二十九歲生Tha-la̍h。Ná-ho̍k jī-cha̍p káu hè siⁿ Tha-la̍h.

25Ná-ho̍k生Tha-la̍h了後，iáu活一百十九年，koh有生kiáⁿ cha-bó͘-kiáⁿ。Ná-ho̍k siⁿ Tha-la̍h liáu-āu, iáu oa̍h chi̍t-pah cha̍p-káu nî, koh ū siⁿ kiáⁿ cha-bó͘-kiáⁿ.

26Tha-la̍h七十歲生亞伯蘭、Ná-ho̍k、哈蘭。Tha-la̍h chhit-cha̍p hè siⁿ A-pek-lân, Ná-ho̍k, Hap-lân.

27Tha-la̍h ê世系記tī下底：Tha-la̍h生亞伯蘭、Ná-ho̍k、哈蘭；哈蘭生羅得。Tha-la̍h ê sè-hē kì tī ē-tóe. Tha-la̍h siⁿ A-pek-lân, Ná-ho̍k, Hap-lân; Hap-lân siⁿ Lô-tek.

28哈蘭死tī伊ê老父Tha-la̍h ê面前，tī伊ê本地Ka-le̍k-tí ê Jíⁿ城。Hap-lân sí tī i ê lāu-pē Tha-la̍h ê bīn-chêng, tī i ê pún-tōe Ka-le̍k-tí ê Jíⁿ siâⁿ.

29亞伯蘭、Ná-ho̍k，各有娶bó͘。亞伯蘭ê bó͘名叫撒萊；Ná-ho̍k ê bó͘名叫Bi̍t-ka，是哈蘭ê cha-bó͘-kiáⁿ；哈蘭是Bi̍t-ka ê老父，亦是Í-sū-ka ê老父。A-pek-lân, Ná-ho̍k, kok ū chhōa-bó͘. A-pek-lân ê bó͘ miâ kiò Sat-lāi; Ná-ho̍k ê bó͘ miâ-kiò Bi̍t-ka, sī Hap-lân ê cha-bó͘-kiáⁿ; Hap-lân sī Bi̍t-ka ê lāu-pē, ia̍h sī Í-sū-ka ê lāu-pē.

30撒萊無懷孕，無kiáⁿ。Sat-lāi bô hoâi-īn, bô kiáⁿ.

31Tha-la̍h chhōa伊ê kiáⁿ亞伯蘭，kap伊ê孫羅得，就是哈蘭ê kiáⁿ，以及伊ê新婦撒萊，就是伊ê kiáⁿ亞伯蘭ê bó͘，in相kap出Ka-le̍k-tí ê Jíⁿ城；beh去迦南地；in到哈蘭就tòa tī-hia。Tha-la̍h chhōa i ê kiáⁿ A-pek-lân, kap i ê sun Lô-tek, chiū-sī Hap-lân ê kiáⁿ, í-ki̍p i ê sim-pū Sat-lāi, chiū-sī i ê kiáⁿ A-pek-lân ê bó͘, in saⁿ-kap chhut Ka-le̍k-tí ê Jíⁿ siâⁿ; beh khì Ka-lâm tōe; in kàu Hap-lân chiū tòa tī-hia.

32Tha-la̍h享壽兩百連五歲；Tha-la̍h死tī哈蘭。Tha-la̍h hióng-siū nn̄g-pah liân gō͘ hè; Tha-la̍h sí tī Hap-lân.

1耶和華對亞伯蘭講，你tio̍h離開本地、本族，老父ê家，去我所beh指示你ê地。Iâ-hô-hoa tùi A-pek-lân kóng, Lí tio̍h lī-khui pún-tōe, pún-cho̍k, lāu-pē ê ke, khì Góa só͘ beh chí-sī lí ê tōe.

2我beh hō͘你成做大國，我beh賜福你，hō͘你ê名做大，你亦beh hō͘人得tio̍h福氣；Góa beh hō͘ lí chiâⁿ-chòe tōa-kok, Góa beh sù-hok lí, hō͘ lí ê miâ chòe tōa, lí ia̍h beh hō͘ lâng tit-tio̍h hok-khì;

3祝福你ê，我beh賜福hō͘ in；咒詛你ê，我beh責罰伊；地上萬族beh因為你得tio̍h福氣。chiok-hok lí-ê, Góa beh sù-hok hō͘ in; chiù-chó͘ lí-ê, Góa beh chek-hoa̍t i; tōe-chiūⁿ bān-cho̍k beh in-ūi lí tit-tio̍h hok-khì.

4亞伯蘭照耶和華吩咐ê話，就去；羅得亦kap伊去。亞伯蘭出哈蘭ê時七十五歲。A-pek-lân chiàu Iâ-hô-hoa hoan-hù ê ōe, chiū khì; Lô-tek ia̍h kap i khì. A-pek-lân chhut Hap-lân ê sî chhit-cha̍p-gō͘ hè.

5亞伯蘭帶伊ê bó͘撒萊，kap伊ê姪á羅得；以及in tī哈蘭所積聚ê財物，所得tio̍h ê人額；in就出去，beh去迦南地；in就到迦南地。A-pek-lân tòa i ê bó͘ Sat-lāi, kap i ê ti̍t-á Lô-tek; í-ki̍p in tī Hap-lân só͘ chek-chū ê châi-bu̍t, só͘ tit-tio̍h ê lâng-gia̍h; in chiū chhut-khì, beh khì Ka-lâm tōe; in chiū kàu Ka-lâm tōe.

6亞伯蘭經過hit-ê地，到tī示劍ê所在，到Mô͘-lí ê橡樹；hit時迦南族iáu teh tòa。A-pek-lân keng-kè hit ê tōe, kàu tī Sī-kiàm ê só͘-chāi, kàu Mô͘-lí ê siōng-chhiū; hit-sî Ka-lâm cho̍k iáu teh tòa.

7耶和華對亞伯蘭出現講，我beh將chit-ê地方賞賜你ê後裔；伊就tī-hia為tio̍h tùi伊出現ê耶和華起一座壇。Iâ-hô-hoa tùi A-pek-lân chhut-hiān kóng, Góa beh chiong chit ê tōe-hng siúⁿ-sù lí ê hō͘-è; i chiū tī-hia ūi-tio̍h tùi i chhut-hiān ê Iâ-hô-hoa khí chi̍t chō tôaⁿ.

8Tùi hia伊徙到Pek-te̍k-lī東勢ê山，搭布棚；西勢是Pek-te̍k-lī，東勢是Ai；tī-hia為tio̍h耶和華起一座壇，求叫耶和華ê名。Tùi hia i sóa kàu Pek-te̍k-lī tang-sì ê soaⁿ, tah pò͘-pîⁿ; sai-sì sī Pek-te̍k-lī, tang-sì sī Ai; tī-hia ūi-tio̍h Iâ-hô-hoa khí chi̍t chō tôaⁿ, kiû-kiò Iâ-hô-hoa ê miâ.

9亞伯蘭漸漸徙去南勢ê地。A-pek-lân chiām-chiām sóa-khì lâm-sì ê tōe.

10Hit-ê地tú-tio̍h飢荒，亞伯蘭落去埃及，beh tī-hia暫時khiā起；因為hit-ê地飢荒真大。Hit ê tōe tú-tio̍h ki-hng, A-pek-lân lo̍h-khì Ai-ki̍p, beh tī-hia chiām-sî khiā-khí; in-ūi hit ê tōe ki-hng chin tōa.

11將近入埃及，就對伊ê bó͘撒萊講，我知你是面貌好看ê婦人人；Chiong-kūn ji̍p Ai-ki̍p, chiū tùi i ê bó͘ Sat-lāi kóng, Góa chai lí sī bīn-māu hó-khòaⁿ ê hū-jîn-lâng;

12埃及人看見你ê時beh講，Chit-ê是伊ê bó͘，in beh thâi死我，來留你活teh。Ai-ki̍p lâng khòaⁿ-kìⁿ lí ê sî beh kóng, Chit-ê sī i ê bó͘, in beh thâi-sí góa, lâi lâu lí oa̍h-teh.

13求你tio̍h講，你是我ê小妹，hō͘我因為你得tio̍h平安；我ê性命亦對你來得tio̍h活。Kiû lí tio̍h kóng, lí sī góa ê sió-bē, hō͘ góa in-ūi lí tit-tio̍h pêng-an; góa ê sìⁿ-miā ia̍h tùi lí lâi tit-tio̍h oa̍h.

14亞伯蘭到埃及ê時，埃及人看見hit-ê婦人人極其súi。A-pek-lân kàu Ai-ki̍p ê sî, Ai-ki̍p lâng khòaⁿ-kìⁿ hit ê hū-jîn-lâng ke̍k-kî súi.

15法老ê人臣看見伊，就對法老o-ló伊；hit-ê婦人人就hō͘人tòa伊入法老ê王宮。Hoat-ló ê jîn-sîn khòaⁿ-kìⁿ i, chiū tùi Hoat-ló o-ló i; hit ê hū-jîn-lâng chiū hō͘ lâng tòa i ji̍p Hoat-ló ê ông-kiong.

16法老因為chit-ê婦人人就好款待亞伯蘭；亞伯蘭就得tio̍h羊、牛、公ê驢、奴僕、女婢、母ê驢，以及駱駝。Hoat-ló in-ūi chit ê hū-jîn-lâng chiū hó khoán-thāi A-pek-lân; A-pek-lân chiū tit-tio̍h iûⁿ, gû, kang ê lû, lô͘-po̍k, lú-pī, bú ê lû, í-ki̍p lo̍k-tô.

17耶和華因為亞伯蘭ê bó͘撒萊ê緣故，降大災禍tī法老kap伊全家。Iâ-hô-hoa in-ūi A-pek-lân ê bó͘ Sat-lāi ê iân-kò͘, kàng tōa chai-ē tī Hoat-ló kap i choân-ke.

18法老就叫亞伯蘭來講，你對我所做ê是甚麼事？啥事無kā我講伊是你ê bó͘？Hoat-ló chiū kiò A-pek-lân lâi kóng, Lí tùi góa só͘-chòe-ê sī sím-mi̍h sū? siáⁿ-sū bô kā góa kóng i sī lí ê bó͘?

19啥事稱伊做小妹？致到我將伊娶來做我ê bó͘；taⁿ你ê bó͘ tī-chia，thang chhōa伊，做你去。Siáⁿ-sū chheng i chòe sió-bē? tì-kàu góa chiong i chhōa lâi chòe góa ê bó͘; taⁿ lí ê bó͘ tī-chia, thang chhōa i, chòe lí khì.

20Tùi hit-tia̍p法老為tio̍h伊來吩咐人；in就將伊kap伊ê bó͘ kap伊所有ê，lóng送伊去。Tùi hit-tia̍p Hoat-ló ūi-tio̍h i lâi hoan-hù lâng; in chiū chiong i kap i ê bó͘ kap i só͘-ū-ê, lóng sàng i khì.