1耶和華對亞伯蘭講，你tio̍h離開本地、本族，老父ê家，去我所beh指示你ê地。Iâ-hô-hoa tùi A-pek-lân kóng, Lí tio̍h lī-khui pún-tōe, pún-cho̍k, lāu-pē ê ke, khì Góa só͘ beh chí-sī lí ê tōe.

2我beh hō͘你成做大國，我beh賜福你，hō͘你ê名做大，你亦beh hō͘人得tio̍h福氣；Góa beh hō͘ lí chiâⁿ-chòe tōa-kok, Góa beh sù-hok lí, hō͘ lí ê miâ chòe tōa, lí ia̍h beh hō͘ lâng tit-tio̍h hok-khì;

3祝福你ê，我beh賜福hō͘ in；咒詛你ê，我beh責罰伊；地上萬族beh因為你得tio̍h福氣。chiok-hok lí-ê, Góa beh sù-hok hō͘ in; chiù-chó͘ lí-ê, Góa beh chek-hoa̍t i; tōe-chiūⁿ bān-cho̍k beh in-ūi lí tit-tio̍h hok-khì.

4亞伯蘭照耶和華吩咐ê話，就去；羅得亦kap伊去。亞伯蘭出哈蘭ê時七十五歲。A-pek-lân chiàu Iâ-hô-hoa hoan-hù ê ōe, chiū khì; Lô-tek ia̍h kap i khì. A-pek-lân chhut Hap-lân ê sî chhit-cha̍p-gō͘ hè.

5亞伯蘭帶伊ê bó͘撒萊，kap伊ê姪á羅得；以及in tī哈蘭所積聚ê財物，所得tio̍h ê人額；in就出去，beh去迦南地；in就到迦南地。A-pek-lân tòa i ê bó͘ Sat-lāi, kap i ê ti̍t-á Lô-tek; í-ki̍p in tī Hap-lân só͘ chek-chū ê châi-bu̍t, só͘ tit-tio̍h ê lâng-gia̍h; in chiū chhut-khì, beh khì Ka-lâm tōe; in chiū kàu Ka-lâm tōe.

6亞伯蘭經過hit-ê地，到tī示劍ê所在，到Mô͘-lí ê橡樹；hit時迦南族iáu teh tòa。A-pek-lân keng-kè hit ê tōe, kàu tī Sī-kiàm ê só͘-chāi, kàu Mô͘-lí ê siōng-chhiū; hit-sî Ka-lâm cho̍k iáu teh tòa.

7耶和華對亞伯蘭出現講，我beh將chit-ê地方賞賜你ê後裔；伊就tī-hia為tio̍h tùi伊出現ê耶和華起一座壇。Iâ-hô-hoa tùi A-pek-lân chhut-hiān kóng, Góa beh chiong chit ê tōe-hng siúⁿ-sù lí ê hō͘-è; i chiū tī-hia ūi-tio̍h tùi i chhut-hiān ê Iâ-hô-hoa khí chi̍t chō tôaⁿ.

8Tùi hia伊徙到Pek-te̍k-lī東勢ê山，搭布棚；西勢是Pek-te̍k-lī，東勢是Ai；tī-hia為tio̍h耶和華起一座壇，求叫耶和華ê名。Tùi hia i sóa kàu Pek-te̍k-lī tang-sì ê soaⁿ, tah pò͘-pîⁿ; sai-sì sī Pek-te̍k-lī, tang-sì sī Ai; tī-hia ūi-tio̍h Iâ-hô-hoa khí chi̍t chō tôaⁿ, kiû-kiò Iâ-hô-hoa ê miâ.

9亞伯蘭漸漸徙去南勢ê地。A-pek-lân chiām-chiām sóa-khì lâm-sì ê tōe.

10Hit-ê地tú-tio̍h飢荒，亞伯蘭落去埃及，beh tī-hia暫時khiā起；因為hit-ê地飢荒真大。Hit ê tōe tú-tio̍h ki-hng, A-pek-lân lo̍h-khì Ai-ki̍p, beh tī-hia chiām-sî khiā-khí; in-ūi hit ê tōe ki-hng chin tōa.

11將近入埃及，就對伊ê bó͘撒萊講，我知你是面貌好看ê婦人人；Chiong-kūn ji̍p Ai-ki̍p, chiū tùi i ê bó͘ Sat-lāi kóng, Góa chai lí sī bīn-māu hó-khòaⁿ ê hū-jîn-lâng;

12埃及人看見你ê時beh講，Chit-ê是伊ê bó͘，in beh thâi死我，來留你活teh。Ai-ki̍p lâng khòaⁿ-kìⁿ lí ê sî beh kóng, Chit-ê sī i ê bó͘, in beh thâi-sí góa, lâi lâu lí oa̍h-teh.

13求你tio̍h講，你是我ê小妹，hō͘我因為你得tio̍h平安；我ê性命亦對你來得tio̍h活。Kiû lí tio̍h kóng, lí sī góa ê sió-bē, hō͘ góa in-ūi lí tit-tio̍h pêng-an; góa ê sìⁿ-miā ia̍h tùi lí lâi tit-tio̍h oa̍h.

14亞伯蘭到埃及ê時，埃及人看見hit-ê婦人人極其súi。A-pek-lân kàu Ai-ki̍p ê sî, Ai-ki̍p lâng khòaⁿ-kìⁿ hit ê hū-jîn-lâng ke̍k-kî súi.

15法老ê人臣看見伊，就對法老o-ló伊；hit-ê婦人人就hō͘人tòa伊入法老ê王宮。Hoat-ló ê jîn-sîn khòaⁿ-kìⁿ i, chiū tùi Hoat-ló o-ló i; hit ê hū-jîn-lâng chiū hō͘ lâng tòa i ji̍p Hoat-ló ê ông-kiong.

16法老因為chit-ê婦人人就好款待亞伯蘭；亞伯蘭就得tio̍h羊、牛、公ê驢、奴僕、女婢、母ê驢，以及駱駝。Hoat-ló in-ūi chit ê hū-jîn-lâng chiū hó khoán-thāi A-pek-lân; A-pek-lân chiū tit-tio̍h iûⁿ, gû, kang ê lû, lô͘-po̍k, lú-pī, bú ê lû, í-ki̍p lo̍k-tô.

17耶和華因為亞伯蘭ê bó͘撒萊ê緣故，降大災禍tī法老kap伊全家。Iâ-hô-hoa in-ūi A-pek-lân ê bó͘ Sat-lāi ê iân-kò͘, kàng tōa chai-ē tī Hoat-ló kap i choân-ke.

18法老就叫亞伯蘭來講，你對我所做ê是甚麼事？啥事無kā我講伊是你ê bó͘？Hoat-ló chiū kiò A-pek-lân lâi kóng, Lí tùi góa só͘-chòe-ê sī sím-mi̍h sū? siáⁿ-sū bô kā góa kóng i sī lí ê bó͘?

19啥事稱伊做小妹？致到我將伊娶來做我ê bó͘；taⁿ你ê bó͘ tī-chia，thang chhōa伊，做你去。Siáⁿ-sū chheng i chòe sió-bē? tì-kàu góa chiong i chhōa lâi chòe góa ê bó͘; taⁿ lí ê bó͘ tī-chia, thang chhōa i, chòe lí khì.

20Tùi hit-tia̍p法老為tio̍h伊來吩咐人；in就將伊kap伊ê bó͘ kap伊所有ê，lóng送伊去。Tùi hit-tia̍p Hoat-ló ūi-tio̍h i lâi hoan-hù lâng; in chiū chiong i kap i ê bó͘ kap i só͘-ū-ê, lóng sàng i khì.

1亞伯蘭tùi埃及上去，伊kap伊ê bó͘ kap伊所有ê，連羅得，lóng去南地。A-pek-lân tùi Ai-ki̍p chiūⁿ-khì, i kap i ê bó͘ kap i só͘-ū-ê, liân Lô-tek, lóng khì Lâm-tōe.

2亞伯蘭ê牛、銀、金真chōe。A-pek-lân ê gû, gûn, kim chin-chōe.

3伊tùi南地漸漸去Pek-te̍k-lī，到Pek-te̍k-lī kap Ai ê中間，早前搭布棚ê所在；I tùi Lâm-tōe chiām-chiām khì Pek-te̍k-lī, kàu Pek-te̍k-lī kap Ai ê tiong-kan, chá-chêng tah pò͘-pîⁿ ê só͘-chāi;

4到伊起頭起壇ê所在；亞伯蘭tī-hia求叫耶和華ê名。kàu i khí-thâu khí tôaⁿ ê só͘-chāi; A-pek-lân tī-hia kiû-kiò Iâ-hô-hoa ê miâ.

5Kap亞伯蘭同行ê羅得亦有羊群、牛群、布棚。Kap A-pek-lân tâng kiâⁿ ê Lô-tek ia̍h ū iûⁿ-kûn, gû-kûn, pò͘-pîⁿ.

6Hit-ê地就bōe容允得in相kap khiā；因為in ê財物chōe，in chiah bōe會相kap khiā。Hit ê tōe chiū bōe iông-ún-tit in saⁿ-kap khiā; in-ūi in ê châi-bu̍t chōe, in chiah bōe-ōe saⁿ-kap khiā.

7亞伯蘭ê牧者kap羅得ê牧者相爭；當時迦南人kap Pí-lī-sé人tī hit-ê地khiā起。A-pek-lân ê bo̍k-chiá kap Lô-tek ê bo̍k-chiá saⁿ-chiⁿ; tng-sî Ka-lâm lâng kap Pí-lī-sé lâng tī hit ê tōe khiā-khí.

8亞伯蘭kā羅得講，你我m̄-thang冤家，你ê牧者kap我ê牧者亦m̄-thang冤家；因為咱是骨肉ê 親。A-pek-lân kā Lô-tek kóng, Lí góa m̄-thang oan-ke, lí ê bo̍k-chiá kap góa ê bo̍k-chiá ia̍h m̄-thang oan-ke; in-ūi lán sī kut-jio̍k ê chhin.

9全地kiám無tī你ê目睭前mah？請你離開我；你tò-pêng，我就chiàⁿ-pêng；你chiàⁿ-pêng，我就tò-pêng。Choân-tōe kiám bô tī lí ê ba̍k-chiu-chêng mah? chhiáⁿ lí lī-khui góa; lí tò-pêng, góa chiū chiàⁿ-pêng; lí chiàⁿ-pêng, góa chiū tò-pêng.

10羅得kia̍h目看約旦河一遍ê平洋，直到Só-jíⁿ ê路，lóng真潤澤；hit-ê地tī耶和華未滅所多瑪蛾摩拉以前，親像耶和華ê園，亦親像埃及ê地。Lô-tek kia̍h-ba̍k khòaⁿ Iok-tàn hô it-phiàn ê Pîⁿ-iûⁿ, ti̍t-kàu Só-jíⁿ ê lō͘, lóng chin lūn-te̍k; hit ê tōe tī Iâ-hô-hoa bē bia̍t Só͘-to-má Gô-mô͘-la̍h í-chêng, chhin-chhiūⁿ Iâ-hô-hoa ê hn̂g, ia̍h chhin-chhiūⁿ Ai-ki̍p ê tōe.

11Tùi án-ni羅得揀約旦河一遍ê平洋，遷徙去東勢；in就大家分開。Tùi án-ni Lô-tek kéng Iok-tàn hô it-phiàn ê Pîⁿ-iûⁿ, chhian-sóa khì tang-sì; in chiū tāi-ke pun-khui.

12亞伯蘭khiā起迦南地，羅得khiā起平洋chiah-ê城；徙伊ê布棚到所多瑪。A-pek-lân khiā-khí Ka-lâm tōe, Lô-tek khiā-khí Pîⁿ-iûⁿ chiah ê siâⁿ; sóa i ê pò͘-pîⁿ kàu Só͘-to-má.

13所多瑪人極pháiⁿ，大大得罪耶和華。Só͘-to-má lâng ke̍k-pháiⁿ, tōa-tōa tek-chōe Iâ-hô-hoa.

14羅得離別了後，耶和華對亞伯蘭講，你kia̍h目，tùi你所tiàm ê所在，ǹg東西南北來看；Lô-tek lī-pia̍t liáu-āu, Iâ-hô-hoa tùi A-pek-lân kóng, Lí kia̍h-ba̍k, tùi lí só͘ tiàm ê só͘-chāi, ǹg tang sai lâm pak lâi khòaⁿ;

15因為你所看見一切ê地，我lóng beh hō͘你，kap你ê後裔，直到永遠。in-ūi lí só͘ khòaⁿ-kìⁿ it-chhè ê tōe, Góa lóng beh hō͘ lí, kap lí ê hō͘-è, ti̍t-kàu éng-oán.

16我亦beh hō͘你ê後裔親像地上ê土砂；人若能算地上ê土砂，chiah能算你ê後裔。Góa ia̍h beh hō͘ lí ê hō͘-è chhin-chhiūⁿ tōe-chiūⁿ ê thô͘-soa; lâng nā ōe sǹg tōe-chiūⁿ ê thô͘-soa, chiah ōe sǹg lí ê hō͘-è.

17你起來遍行chit-ê地ê橫直，因為我beh將chit-ê地hō͘你。Lí khí-lâi piàn-kiâⁿ chit ê tōe ê hoâiⁿ-ti̍t, in-ūi Góa beh chiong chit ê tōe hō͘ lí.

18亞伯蘭就搬徙布棚到Hi-pek-lûn，óa Bān-lī hiah-ê橡樹khiā起；tī-hia為耶和華起一座壇。A-pek-lân chiū poaⁿ-sóa pò͘-pîⁿ kàu Hi-pek-lûn, óa Bān-lī hiah ê siōng-chhiū khiā-khí; tī-hia ūi Iâ-hô-hoa khí chi̍t chō tôaⁿ.

1當Àm-la̍h-hui做Sī-ná王，A-lio̍k做Í-la̍h-sat王，Ki-tāi-ló-má做Í-lân王，Thê-ta̍t做Ko-ìn王 ê時，Tng Àm-la̍h-hui chòe Sī-ná ông, A-lio̍k chòe Í-la̍h-sat ông, Ki-tāi-ló-má chòe Í-lân ông, Thê-ta̍t chòe Ko-ìn ông ê sî,

2in來攻擊所多瑪王Pí-la̍h，蛾摩拉王Pí-sa，Ap-má王Sī-la̍p，Sé-phian王Sī-bí-pia̍t，以及Pí-la̍h王(Pí-la̍h就是Só-jíⁿ)in lâi kong-kek Só͘-to-má ông Pí-la̍h, Gô-mô͘-la̍h ông Pí-sa, Ap-má ông Sī-la̍p, Sé-phian ông Sī-bí-pia̍t, í-ki̍p Pí-la̍h ông (Pí-la̍h chiū-sī Só-jíⁿ)

3In lóng聚會tī Se-têng ê山谷；Se-têng山谷就是鹽海。In lóng chū-hōe tī Se-têng ê soaⁿ-kok; Se-têng soaⁿ-kok chiū-sī Iâm-hái.

4In服事Ki-tāi-ló-má十二年久；到十三年背叛。In ho̍k-sāi Ki-tāi-ló-má cha̍p-jī nî kú; kàu cha̍p-saⁿ-nî pōe-poān.

5十四年，Ki-tāi-ló-má，kap同會盟chiah-ê王，lóng來，tī A-te̍k-lu̍t-ka-lêng thâi贏Lí-hoa̍t-im人，tī Hâm So͘-se人，tī Sa-bî-ki-lia̍t-têng Í-bí人，Cha̍p-sì-nî Ki-tāi-ló-má, kap tâng hōe-bêng chiah ê ông, lóng lâi, tī A-te̍k-lu̍t-ka-lêng thâi-iâⁿ Lí-hoa̍t-im lâng, tī Hâm So͘-se lâng, tī Sa-bî-ki-lia̍t-têng Í-bí lâng,

6tī Hô-lī人ê Se-jíⁿ山Hô-lī人，到近tī曠野ê Í-le̍k-pa-lân。tī Hô-lī lâng ê Se-jíⁿ soaⁿ Hô-lī lâng, kàu kūn tī khòng-iá ê Í-le̍k-pa-lân.

7In 倒tńg到An-bi̍t-pa，就是Ka-te-su，攻擊A-má-le̍k全地，kap khiā起tī Hap-sé-sūn-tha-má ê A-mô͘-lī人。In tò-tńg kàu An-bi̍t-pa, chiū-sī Ka-te-su, kong-kek A-má-le̍k choân-tōe, kap khiā-khí tī Hap-sé-sūn-tha-má ê A-mô͘-lī lâng.

8Tùi hit-tia̍p所多瑪王、蛾摩拉王、Ap-má王、Sé-phian王、Pí-la̍h 王，(Pí-la̍h就是Só-jíⁿ) ，lóng出來tī Se-têng ê山谷排陣，kap in交戰；Tùi hit-tia̍p Só͘-to-má ông, Gô-mô͘-la̍h ông, Ap-má ông, Sé-phian ông, Pí-la̍h ông, (Pí-la̍h chiū-sī Só-jíⁿ), lóng chhut-lâi tī Se-têng ê soaⁿ-kok pâi-tīn, kap in kau-chiàn;

9就是kap Í-lân王 Ki-tāi-ló-má，Ko-ìn王 Thê-ta̍t，Sī-ná王Àm-la̍h-hui，Í-la̍h-sat王A-lio̍k交戰；四個王對敵五個王。chiū-sī kap Í-lân ông Ki-tāi-ló-má, Ko-ìn ông Thê-ta̍t, Sī-ná ông Àm-la̍h-hui, Í-la̍h-sat ông A-lio̍k kau-chiàn; sì ê ông tùi-te̍k gō͘ ê ông.

10Se-têng山谷lóng是石油坑；所多瑪、蛾摩拉chiah-ê王逃走，跋(撥8) tī-hia；其餘ê走上山。Se-têng soaⁿ-kok lóng sī chio̍h-iû khiⁿ; Só͘-to-má Gô-mô͘-la̍h chiah ê ông tô-cháu, poa̍h tī-hia; kî-û-ê cháu chiūⁿ-soaⁿ.

11In就將所多瑪、蛾摩拉ê財物，以及in ê乾糧lóng搶，做in去。In chiū chiong Só͘-to-má Gô-mô͘-la̍h ê châi-bu̍t, í-ki̍p in ê kan-niû lóng chhiúⁿ, chòe in khì.

12Koh將亞伯蘭ê姪羅得，kap伊ê財物搶去；hit時羅得tòa tī所多瑪。Koh chiong A-pek-lân ê ti̍t Lô-tek, kap i ê châi-bu̍t chhiúⁿ-khì; hit-sî Lô-tek tòa tī Só͘-to-má.

13有一個逃走ê人來kā希伯來人亞伯蘭講；hit時亞伯蘭khiā起tī A-mô͘-lī人Bān-lī ê橡樹hit所在，Bān-lī kap Í-si̍t-kok kap A-nái lóng是兄弟，有kap亞伯蘭聯盟。Ū chi̍t ê tô-cháu ê lâng lâi kā Hi-pek-lâi lâng A-pek-lân kóng; hit-sî A-pek-lân khiā-khí tī A-mô͘-lī lâng Bān-lī ê siōng-chhiū hit só͘-chāi, Bān-lī kap Í-si̍t-kok kap A-nái lóng sī hiaⁿ-tī, ū kap A-pek-lân liân-bêng.

14亞伯蘭聽見伊ê姪hō͘人掠去，就chhōa生養tī伊ê家裡精練ê壯丁，三百十八人，追jip到Tàn。A-pek-lân thiaⁿ-kìⁿ i ê ti̍t hō͘ lâng lia̍h-khì, chiū chhōa seng-ióng tī i ê ke-ni̍h cheng-liān ê chòng-teng, saⁿ-pah cha̍p-poeh lâng, tui-jip kàu Tàn.

15伊kap伊ê奴僕透暝分隊，攻擊in；tui到大馬色tò-pêng ê Hô-pa。I kap i ê lô͘-po̍k thàu-mî pun-tūi, kong-kek-in; tui kàu Tāi-má-sek tò-pêng ê Hô-pa.

16將一切ê財物搶倒tńg，連伊ê姪á羅得kap伊ê財物，以及婦女百姓，亦lóng搶倒tńg。Chiong it-chhè ê châi-bu̍t chhiúⁿ tò-tńg, liân i ê ti̍t-á Lô-tek kap i ê châi-bu̍t, í-ki̍p hū-lú peh-sìⁿ, ia̍h lóng chhiúⁿ tò-tńg.

17亞伯蘭thâi贏Ki-tāi-ló-má，以及kap伊做陣chiah-ê王，tò來ê時，所多瑪王出來，到Sa-bí ê山谷，迎接伊；Sa-bí ê山谷就是王ê山谷。A-pek-lân thâi-iâⁿ Ki-tāi-ló-má, í-ki̍p kap i chòe-tīn chiah ê ông, tò-lâi ê sî, Só͘-to-má ông chhut-lâi, kàu Sa-bí ê soaⁿ-kok, ngiâ-chih i; Sa-bí ê soaⁿ-kok chiū-sī Ông ê soaⁿ-kok.

18亦有Sat-léng王 Be̍k-ki-sé-tek帶餅kap酒出來；伊是至koân[ê]上帝ê祭司；Ia̍h ū Sat-léng ông Be̍k-ki-sé-tek tòa piáⁿ kap chiú chhut-lâi; i sī Chì-koâiⁿ[ê] Siōng-tè ê chè-si;

19祝福伊講，願天地ê主，至koânê上帝賜福亞伯蘭。chiok-hok i kóng, Goān thiⁿ-tōe ê Chú, Chì-koâiⁿ ê Siōng-tè sù-hok A-pek-lân.

20至koânê上帝將對敵交tī你ê手，應該o-ló伊。亞伯蘭將lóng總所得tio̍h-ê，十份the̍h一份hō͘ 伊。Chì-koâiⁿ ê Siōng-tè chiong tùi-te̍k kau tī lí ê chhiú, eng-kai o-ló I. A-pek-lân chiong lóng-chóng só͘ tit-tio̍h-ê, cha̍p-hūn the̍h chi̍t-hūn hō͘ i.

21所多瑪王 kā亞伯蘭講，將人歸我；物lóng hō͘你。Só͘-to-má ông kā A-pek-lân kóng, Chiong lâng kui góa; mi̍h lóng hō͘ lí.

22亞伯蘭kā所多瑪王講，我有kí天地ê主至koânê上帝耶和華來chiù-chōa，A-pek-lân kā Só͘-to-má ông kóng, Góa ū kí thiⁿ-tōe ê Chú Chì-koâiⁿ ê Siōng-tè Iâ-hô-hoa lâi chiù-chōa,

23凡若你ê物，就一條線、一條鞋帶，我lóng m̄-the̍h，免得你講，我hō͘亞伯蘭好額；hoān-nā lí ê mi̍h, chiū chi̍t tiâu sòaⁿ chi̍t tiâu ôe-tòa, góa lóng m̄-the̍h, bián-tit lí kóng, Góa hō͘ A-pek-lân hó-gia̍h;

24只有少年人所食ê，以及kap我同行ê人A-nái、Í-si̍t-kok、Bān-lī，所應得ê份額，thang chhut-chāi in the̍h。chí-ū siàu-liân lâng só͘ chia̍h ê, í-ki̍p kap góa tâng-kiâⁿ ê lâng A-nái, Í-si̍t-kok, Bān-lī, só͘ èng-tit ê hūn-gia̍h, thang chhut-chāi in the̍h.