1亞伯蘭ê bó͘撒萊無kā伊生kiáⁿ；伊有一個女婢名夏甲；是埃及人。A-pek-lân ê bó͘ Sat-lāi bô kā i siⁿ-kiáⁿ; i ū chi̍t ê lú-pī miâ Hā-kah; sī Ai-ki̍p lâng.

2撒萊kā亞伯蘭講，耶和華禁我生kiáⁿ；請你kap我ê女婢同房；kiám-chhái我thang tùi伊得tio̍h gín-á。亞伯蘭聽thàn撒萊ê話。Sat-lāi kā A-pek-lân kóng, Iâ-hô-hoa kìm góa siⁿ-kiáⁿ; chhiáⁿ lí kap góa ê lú-pī tâng-pâng; kiám-chhái góa thang tùi i tit-tio̍h gín-á. A-pek-lân thiaⁿ-thàn Sat-lāi ê ōe.

3Tùi hit-tia̍p，亞伯蘭ê bó͘撒萊將伊ê女婢埃及人夏甲hō͘伊丈夫亞伯蘭做bó͘；hit時亞伯蘭已經tòa迦南十年。Tùi hit-tia̍p A-pek-lân ê bó͘ Sat-lāi chiong i ê lú-pī Ai-ki̍p lâng Hā-kah hō͘ i tiōng-hu A-pek-lân chòe-bó͘; hit-sî A-pek-lân í-keng tòa Ka-lâm cha̍p nî.

4伊kap夏甲同房，夏甲就懷孕；伊知家己有身，就看輕主母。I kap Hā-kah tâng-pâng, Hā-kah chiū hoâi-īn; i chai ka-kī ū-sin, chiū khòaⁿ-khin chú-bú.

5撒萊kā亞伯蘭講，我ê冤枉歸tī你；我將我ê女婢hē tī你ê心懷中；伊看家己有娠，就看輕我；願耶和華tī你我ê中間判斷。Sat-lāi kā A-pek-lân kóng, Góa ê oan-óng kui tī lí; góa chiong góa ê lú-pī hē tī lí ê sim-hoâi-tiong; i khòaⁿ ka-kī ū-sin, chiū khòaⁿ-khin góa; goān Iâ-hô-hoa tī lí góa ê tiong-kan phòaⁿ-toàn.

6亞伯蘭對撒萊講，你ê女婢tī你ê手，你thang隨意款待伊。撒萊苦楚伊，伊就tùi撒萊ê面前逃走。A-pek-lân tùi Sat-lāi kóng, Lí ê lú-pī tī lí ê chhiú, lí thang sûi-ì khoán-thāi i. Sat-lāi khó͘-chhó͘ i, i chiū tùi Sat-lāi ê bīn-chêng tô-cháu.

7耶和華ê使者tú-tio̍h伊tī曠野ê水泉邊；hit-ê水泉tī Su-jíⁿ ê路上。Iâ-hô-hoa ê sù-chiá tú-tio̍h i tī khòng-iá ê chúi-chôaⁿ-piⁿ; hit ê chúi-chôaⁿ tī Su-jíⁿ ê lō͘-chiūⁿ.

8對伊講，撒萊ê女婢夏甲，你tùi tah-lo̍h來？beh tah-lo̍h去？伊講，我tùi我ê主母撒萊ê面前走出來。Tùi i kóng, Sat-lāi ê lú-pī Hā-kah, lí tùi tah-lo̍h lâi? beh tah-lo̍h khì? I kóng, Góa tùi góa ê chú-bú Sat-lāi ê bīn-chêng cháu-chhut-lâi.

9耶和華ê使者對伊講，你tò去你ê主母hia，降服tī伊ê手下。Iâ-hô-hoa ê sù-chiá tùi i kóng, Lí tò-khì lí ê chú-bú hia, hâng-ho̍k tī i ê chhiú-ē.

10耶和華ê使者koh對伊講，我beh hō͘你ê後裔極其chōe，甚至bōe算得。Iâ-hô-hoa ê sù-chiá koh tùi i kóng, Góa beh hō͘ lí ê hō͘-è ke̍k-kî chōe, sīm-chì bōe-sǹg-tit.

11耶和華ê使者koh對伊講，你taⁿ懷孕，beh生一個kiáⁿ，tio̍h kā伊號名以實瑪利，因為耶和華聽見你ê苦情。Iâ-hô-hoa ê sù-chiá koh tùi i kóng, Lí taⁿ hoâi-īn, beh siⁿ chi̍t ê kiáⁿ, tio̍h kā i hō miâ Í-si̍t-má-lī, in-ūi Iâ-hô-hoa thiaⁿ-kìⁿ lí ê khó͘-chêng.

12伊做人beh親像野驢，伊ê手beh攻擊眾人，眾人ê手beh攻擊伊；伊beh khiā起tī眾兄弟ê頭前。I chòe lâng beh chhin-chhiūⁿ iá-lû, i ê chhiú beh kong-kek chèng-lâng, chèng-lâng ê chhiú beh kong-kek i; i beh khiā-khí tī chèng hiaⁿ-tī ê thâu-chêng.

13夏甲就稱hit-ê對伊講話ê耶和華ê名講，你是看見ta̍k項ê上帝；因為講，連tī-chia我亦看見hit-ê看見我ê mah？Hā-kah chiū chheng hit ê tùi i kóng ōe ê Iâ-hô-hoa ê miâ kóng, Lí sī khòaⁿ-kìⁿ ta̍k-hāng ê Siōng-tè; in-ūi kóng, Liân tī-chia góa ia̍h khòaⁿ-kìⁿ hit ê khòaⁿ-kìⁿ góa ê mah?

14所以chit-ê井名叫Pí-jíⁿ-la̍h-hái-lâi，就是Ka-te-su kap Pa-lia̍t ê中間。Só͘-í chit ê chíⁿ miâ-kiò Pí-jíⁿ-la̍h-hái-lâi, chiū-sī Ka-te-su kap Pa-lia̍t ê tiong-kan.

15後來夏甲kā亞伯蘭生一個kiáⁿ；亞伯蘭kā伊ê kiáⁿ號名叫以實瑪利，就是夏甲所生ê。Āu-lâi Hā-kah kā A-pek-lân siⁿ chi̍t ê kiáⁿ; A-pek-lân kā i ê kiáⁿ hō miâ kiò Í-si̍t-má-lī, chiū-sī Hā-kah só͘ siⁿ-ê.

16夏甲kā亞伯蘭生以實瑪利ê時，亞伯蘭八十六歲。Hā-kah kā A-pek-lân siⁿ Í-si̍t-má-lī ê sî, A-pek-lân poeh-cha̍p-la̍k hè.

1亞伯蘭九十九歲ê時，耶和華對亞伯蘭顯現，kā伊講，我是全能ê上帝，你tī我ê面前行做tio̍h完全。A-pek-lân káu-cha̍p-káu hè ê sî, Iâ-hô-hoa tùi A-pek-lân hián-hiān, kā i kóng, Góa sī choân-lêng ê Siōng-tè, lí tī Góa ê bīn-chêng kiâⁿ-chòe tio̍h oân-choân.

2我beh kap你立我ê約，hō͘你ê後裔極其chōe。Góa beh kap lí li̍p Góa ê iok, hō͘ lí ê hō͘-è ke̍k-kî chōe.

3亞伯蘭就仆落tī地裡；上帝koh kap伊講話，講，A-pek-lân chiū phak-lo̍h tī tōe-ni̍h; Siōng-tè koh kap i kóng-ōe, kóng,

4我kap你立我ê約，你beh做chōe-chōe國ê父。Góa kap lí li̍p Góa ê iok, lí beh chòe chōe-chōe kok ê pē.

5Tùi taⁿ以後，你ê名無koh叫做亞伯蘭，是beh叫做亞伯拉罕，因為我已經立你做chōe-chōe 國ê父。Tùi taⁿ í-āu, lí ê miâ bô koh kiò-chòe A-pek-lân, sī beh kiò-chòe A-pek-la̍h-hán, in-ūi Góa í-keng li̍p lí chòe chōe-chōe kok ê pē.

6我beh hō͘你ê後裔極其chōe，國度tùi你來立，君王tùi你來出。Góa beh hō͘ lí ê hō͘-è ke̍k-kî chōe, kok-tō͘ tùi lí lâi li̍p, kun-ông tùi lí lâi chhut.

7我beh kap你，以及你歷代ê後裔，設立我ê約做永遠ê約；是beh做你kap你ê後裔ê上帝。Góa beh kap lí, í-ki̍p lí le̍k-tāi ê hō͘-è, siat-li̍p Góa ê iok chòe éng-oán ê iok; sī beh chòe lí kap lí ê hō͘-è ê Siōng-tè.

8我beh將你現在出外ê地，就是迦南全地，賞賜你kap你ê後裔，做永遠ê業；我亦beh做in ê上帝。Góa beh chiong lí hiān-chāi chhut-gōa ê tōe, chiū-sī Ka-lâm choân-tōe, siúⁿ-sù lí kap lí ê hō͘-è, chòe éng-oán ê gia̍p; Góa ia̍h beh chòe in ê Siōng-tè.

9上帝koh對亞伯拉罕講，你kap你ê後裔tio̍h歷代遵守我ê約。Siōng-tè koh tùi A-pek-la̍h-hán kóng, Lí kap lí ê hō͘-è tio̍h le̍k-tāi chun-siú Góa ê iok.

10Lín中間所有ê ta-po͘-ê，lóng tio̍h受割禮；這就是我kap你以及你ê後裔所立ê約，是lín所tio̍h遵守ê。Lín tiong-kan só͘ ū ê ta-po͘-ê, lóng tio̍h siū kat-lé; che chiū-sī Góa kap lí í-ki̍p lí ê hō͘-è só͘ li̍p ê iok, sī lín só͘ tio̍h chun-siú-ê.

11Lín tio̍h割lín陽物ê皮；這是beh做我kap lín所立ê約ê記號。Lín tio̍h koah lín iông-bu̍t ê phê; che sī beh chòe Góa kap lín só͘ li̍p ê iok ê kì-hō.

12Lín歷代ê ta-po͘-ê，無論家內生ê，á是你ê後裔以外，用銀tùi外面人買ê，已經出世八日，lóng tio̍h受割禮。Lín le̍k-tāi ê ta-po͘-ê, bô-lūn ke-lāi siⁿ-ê, á-sī lí ê hō͘-è í-gōa, ēng gûn tùi gōa-bīn lâng bóe-ê, í-keng chhut-sì poeh-ji̍t, lóng tio̍h siū kat-lé.

13你家內生ê，kap你用銀買ê，lóng的確tio̍h受割禮；án-ni我ê約beh hē tī lín ê身上，做永遠ê約。Lí ke-lāi siⁿ-ê, kap lí ēng gûn bóe-ê, lóng tek-khak tio̍h siū kat-lé; án-ni Góa ê iok beh hē tī lín ê sin-chiūⁿ, chòe éng-oán ê iok.

14無受割禮ê ta-po͘-ê，伊身軀既然無受割禮，是背我ê約；的確tùi百姓ê中間除去。Bô siū kat-lé ê ta-po͘-ê, i sin-khu kì-jiân bô siū kat-lé, sī pōe Góa ê iok; tek-khak tùi peh-sìⁿ ê tiong-kan tû-khì.

15上帝koh對亞伯拉罕講，你ê bó͘撒萊，m̄-thang koh叫伊ê名撒萊；伊ê名beh叫做撒拉。Siōng-tè koh tùi A-pek-la̍h-hán kóng, Lí ê bó͘ Sat-lāi, m̄-thang koh kiò i ê miâ Sat-lāi; i ê miâ beh kiò-chòe Sat-la̍h.

16我beh賜福伊，我亦beh hō͘你tùi伊得tio̍h一個kiáⁿ；我beh賜福伊，伊亦beh做列國ê老母；beh有邦國ê王 tùi伊出。Góa beh sù-hok i, Góa ia̍h beh hō͘ lí tùi i tit-tio̍h chi̍t ê kiáⁿ; Góa beh sù-hok i, i ia̍h beh chòe lia̍t-kok ê lāu-bú; beh ū pang-kok ê ông tùi i chhut.

17亞伯拉罕就仆teh笑，心內講，一百歲ê人iáu能生kiáⁿ mah？撒拉已經九十歲，iáu能生養mah？A-pek-la̍h-hán chiū phak-teh chhiò, sim-lāi kóng, Chi̍t-pah hè ê lâng iáu ōe siⁿ-kiáⁿ mah? Sat-la̍h í-keng káu-cha̍p hè, iáu ōe seng-ióng mah?

18亞伯拉罕對上帝講，但願以實瑪利活tī你ê面前。A-pek-la̍h-hán tùi Siōng-tè kóng, Tān goān Í-si̍t-má-lī oa̍h tī Lí ê bīn-chêng.

19上帝講，m̄是lah，你ê bó͘撒拉beh kā你生一個kiáⁿ，你beh kā伊號名叫以撒；我beh kap伊設立我ê約，做伊ê後裔永遠ê約。Siōng-tè kóng, M̄-sī lah, lí ê bó͘ Sat-la̍h beh kā lí siⁿ chi̍t ê kiáⁿ, lí beh kā i hō-miâ kiò Í-sat; Góa beh kap i siat-li̍p Góa ê iok, chòe i ê hō͘-è éng-oán ê iok.

20論到以實瑪利，我亦聽你求；你看，我已經賜福伊，beh hō͘伊興旺，加添極其chōe。伊beh生十二個族長，我亦beh hō͘伊成做大國。Lūn-kàu Í-si̍t-má-lī, Góa ia̍h thiaⁿ lí kiû; lí khòaⁿ, Góa í-keng sù-hok i, beh hō͘ i heng-ōng, ke-thiⁿ ke̍k-kî chōe. I beh siⁿ cha̍p-jī ê cho̍k-tiúⁿ, Góa ia̍h beh hō͘ i chiâⁿ-chòe tōa-kok.

21到明年 chit時，撒拉beh kā你生以撒；我beh kap伊設立我ê約。Kàu mê-nî chit-sî, Sat-la̍h beh kā lí siⁿ Í-sat; Góa beh kap i siat-li̍p Góa ê iok.

22上帝kap亞伯拉罕講soah，就離開伊上去。Siōng-tè kap A-pek-la̍h-hán kóng soah, chiū lī-khui i chiūⁿ-khì.

23Tú-tú hit日，亞伯拉罕照上帝所kā伊講ê，kā伊ê kiáⁿ以實瑪利，kap亞伯拉罕家內一切ê ta-po͘人，無論tī 家裡生ê，á是用伊ê銀買ê，lóng行割禮。Tú-tú hit-ji̍t, A-pek-la̍h-hán chiàu Siōng-tè só͘ kā i kóng-ê, kā i ê kiáⁿ Í-si̍t-má-lī, kap A-pek-la̍h-hán ke-lāi it-chhè ê ta-po͘-lâng, bô-lūn tī ke-ni̍h siⁿ-ê, á-sī ēng i ê gûn bóe-ê, lóng kiâⁿ kat-lé.

24亞伯拉罕受割禮ê時九十九歲；A-pek-la̍h-hán siū kat-lé ê sî káu-cha̍p-káu hè;

25伊ê kiáⁿ以實瑪利受割禮ê時十三歲。i ê kiáⁿ Í-si̍t-má-lī siū kat-lé ê sî cha̍p-saⁿ hè.

26Tú-tú hit日，亞伯拉罕kap伊ê kiáⁿ以實瑪利同受割禮。Tú-tú hit ji̍t A-pek-la̍h-hán kap i ê kiáⁿ Í-si̍t-má-lī tâng siū kat-lé.

27家內所有ê人，無論tī 家裡生ê，á是用銀tùi外面人買ê，lóng kap伊同受割禮。Ke-lāi só͘-ū ê lâng, bô-lūn tī ke-ni̍h siⁿ-ê, á-sī ēng gûn tùi gōa-bīn lâng bóe-ê, lóng kap i tâng siū kat-lé.

1耶和華tī Bān-lī ê橡樹hia，對亞伯拉罕出現；hit時日當熱；亞伯拉罕坐tī布棚門口；Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî ji̍t tng joa̍h; A-pek-la̍h-hán chē tī pò͘-pîⁿ mn̂g-kháu;

2kia̍h目起來看，看見三人tī對面teh khiā；伊一下看見，就tùi布棚門口，走去迎接in，kia̍h-ba̍k khí-lâi khòaⁿ, khòaⁿ-kìⁿ saⁿ lâng tī tùi-bīn teh khiā; i chi̍t-ē khòaⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in,

3仆tī地裡，講，我ê主，我若tī你ê面前得tio̍h恩典，求你m̄-thang離開奴僕做你去；phak tī tōe-ni̍h, kóng, góa ê chú, góa nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k chòe lí khì;

4容允the̍h淡薄水，hō͘ lín洗腳請歇睏tī樹腳；iông-ún the̍h tām-po̍h chúi, hō͘ lín sóe-kha; chhiáⁿ hioh-khùn tī chhiū-kha;

5我koh the̍h淡薄餅，hō͘ lín點心；然後進前去；因為lín是為tio̍h án-ni，chiah到lín ê奴僕chia。In講，Thang照你ê話去行。góa koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê ōe khì kiâⁿ.

6亞伯拉罕趕緊入布棚，見撒拉講，你緊緊用Saⁿ-sè-a ê麵粉，nóa做餅。A-pek-la̍h-hán kóaⁿ-kín ji̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, nóa chòe piáⁿ.

7亞伯拉罕koh走到牛群ê所在，牽一隻chíⁿ koh好ê牛á來；交hō͘奴僕，伊就趕緊去備辦。A-pek-la̍h-hán koh cháu kàu gû-kûn ê só͘-chāi, khan chi̍t chiah chíⁿ koh hó ê gû-á lâi; kau hō͘ lô͘-po̍k, i chiū kóaⁿ-kín khì pī-pān.

8亞伯拉罕koh the̍h奶油kap 奶，kap所備辦ê牛á來，排tī in ê面前；家己tī樹腳khiā tī in ê身邊；in就食。A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h.

9In kā伊講，你ê bó͘撒拉tī tah-lo̍h？伊講，Tī布棚內。In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi.

10In中間一個講，到期我的確beh koh來你chia；你ê bó͘撒拉beh生一個kiáⁿ。撒拉tī後面，布棚門口，teh聽。In tiong-kan chi̍t-ê kóng, Kàu-kî Góa tek-khak beh koh lâi lí chia; lí ê bó͘ Sat-la̍h beh siⁿ chi̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ.

11亞伯拉罕kap撒拉年歲已經老；撒拉ê月經已經絕。A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng choa̍t.

12撒拉心內笑講，我已經衰lám，我ê主亦老lah；kiám iáu有chit號ê歡喜？Sat-la̍h sim-lāi chhiò kóng, Góa í-keng soe-lám, góa ê chú ia̍h lāu-lah; kiám iáu ū chit-hō ê hoaⁿ-hí?

13耶和華對亞伯拉罕講，撒拉為啥事笑，講，我已經老，果真能生kiáⁿ mah？Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Góa í-keng lāu, kó-chin ōe siⁿ-kiáⁿ mah?

14Kiám耶和華有做bōe來ê事mah？到期，明年 chit時，我beh koh來你chia，撒拉beh生一個kiáⁿ。Kiám Iâ-hô-hoa ū chòe-bōe-lâi ê sū mah? Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chi̍t ê kiáⁿ.

15撒拉驚，m̄認，講，我無笑。hit人講，無影；你實在有笑。Sat-la̍h kiaⁿ, m̄-jīn, kóng, Góa bô chhiò. Hit-lâng kóng, Bô-iáⁿ; lí si̍t-chāi ū chhiò.

16Hiah-ê人就tùi hia起來，ǹg所多瑪去；亞伯拉罕也kap in相kap行，beh送in一站。Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chi̍t-chām.

17耶和華講，我所beh做ê事，kiám thang tùi亞伯拉罕隱khǹg mah？Iâ-hô-hoa kóng, Góa só͘ beh chòe ê sū, kiám thang tùi A-pek-la̍h-hán ún-khǹg mah?

18因為亞伯拉罕的確beh成做強大ê國，地上萬國beh因為伊來得tio̍h福氣。In-ūi A-pek-la̍h-hán tek-khak beh chiâⁿ-chòe kiông-tōa ê kok, tōe-chiūⁿ bān-kok beh in-ūi i lâi tit-tio̍h hok-khì.

19我bat伊，是beh hō͘伊命令伊ê kiáⁿ kap伊ê家眷；hō͘ in長長守耶和華ê道理，秉公行義；致到耶和華指亞伯拉罕所講ê話，lóng歸hō͘ 伊。Góa bat i, sī beh hō͘ i bēng-lēng i ê kiáⁿ kap i ê ke-koàn; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i.

20耶和華講，所多瑪、蛾摩拉hoah-hiàm ê聲真大，in ê罪惡實在重。Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-tōa, in ê chōe-ok si̍t-chāi tāng.

21我taⁿ beh落去，看in所行ê，果然一盡照我所聽ê聲á無；若無án-ni，我亦會知。Góa taⁿ beh lo̍h-khì, khòaⁿ in só͘ kiâⁿ-ê, kó-jiân it-chīn chiàu Góa só͘ thiaⁿ ê siaⁿ á bô; nā bô án-ni, Góa ia̍h ōe chai.

22Hiah-ê人tùi-hia oa̍t-tńg身，ǹg所多瑪去；亞伯拉罕iáu khiā tī耶和華ê面前。Hiah ê lâng tùi-hia oa̍t-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng.

23亞伯拉罕近前來講，好人kap pháiⁿ人，你lóng beh剿滅mah？A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah?

24設使城內有五十個好人，你猶原beh剿滅hit所在mah？無beh為tio̍h城內chí五十個好人，來赦免in mah？Siat-sú siâⁿ-lāi ū gō͘-cha̍p ê hó-lâng, Lí iû-goân beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah?

25願你決斷無án-ni行，將好人kap pháiⁿ人做一下害死；致到好人kap pháiⁿ人相同；願你決斷無án-ni行；審判全地ê主kiám無行公義mah？Goān Lí koat-toàn bô án-ni kiâⁿ, chiong hó-lâng kap pháiⁿ-lâng chòe-chi̍t-ē hāi-sí; tì-kàu hó-lâng kap pháiⁿ-lâng saⁿ-tâng; goān Lí koat-toàn bô án-ni kiâⁿ; sím-phòaⁿ choân-tōe ê Chú kiám bô kiâⁿ kong-gī mah?

26耶和華講，我若tī所多瑪城內tú-tio̍h有五十個好人，我就為tio̍h in ê緣故寬容hit所在。Iâ-hô-hoa kóng, Góa nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Góa chiū ūi-tio̍h in ê iân-kò͘ khoan-iông hit só͘-chāi.

27亞伯拉罕應講，我雖然是火灰土粉，iáu-kú敢對主講話；A-pek-la̍h-hán ìn kóng, Góa sui-jiân sī hé-hu thô͘-hún, iáu-kú káⁿ tùi Chú kóng-ōe;

28設使chiah-ê五十個好人欠五個；你就因為欠五個，剿滅全城mah？伊講，我tī-hia若tú-tio̍h有四十五個，亦無beh剿滅。siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê, châu-bia̍t choân-siâⁿ mah? I kóng, Góa tī-hia nā tú-tio̍h ū sì-cha̍p-gō͘ ê, ia̍h bô beh châu-bia̍t.

29亞伯拉罕koh對伊講，設使tī-hia tú-tio̍h四十個nih？伊講，為tio̍h chiah-ê四十個 ê緣故，我亦無beh做chit-ê事。A-pek-la̍h-hán koh tùi I kóng, Siat-sú tī-hia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Góa ia̍h bô beh chòe chit ê sū.

30伊koh講，求主莫得受氣，我beh koh講；設使tī-hia若tú-tio̍h三十個nih？伊講，我tī-hia若tú-tio̍h有三十個，我亦無beh做chit-ê事。I koh kóng, Kiû Chú bo̍h-tit siū-khì, góa beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Góa tī-hia nā tú-tio̍h ū saⁿ-cha̍p-ê, Góa ia̍h bô beh chòe chit ê sū.

31伊講，我iáu-kú敢對主講；設使tī-hia tú-tio̍h有二十個nih？伊講，為tio̍h chiah-ê二十個 ê緣故，我亦無beh剿滅。I kóng, Góa iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Góa ia̍h bô beh châu-bia̍t.

32伊講，求主莫得受氣，我koh講chit一pái；設使tī-hia tú-tio̍h有十個nih？伊講，為tio̍h chiah-ê十個ê緣故，我亦無beh剿滅。I kóng, Kiû Chú bo̍h-tit siū-khì, góa koh kóng chit chi̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Góa ia̍h bô beh châu-bia̍t.

33耶和華kap亞伯拉罕講明白，就上去。亞伯拉罕亦tò去伊ê所在。Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi.