1耶和華tī Bān-lī ê橡樹hia，對亞伯拉罕出現；hit時日當熱；亞伯拉罕坐tī布棚門口；Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî ji̍t tng joa̍h; A-pek-la̍h-hán chē tī pò͘-pîⁿ mn̂g-kháu;

2kia̍h目起來看，看見三人tī對面teh khiā；伊一下看見，就tùi布棚門口，走去迎接in，kia̍h-ba̍k khí-lâi khòaⁿ, khòaⁿ-kìⁿ saⁿ lâng tī tùi-bīn teh khiā; i chi̍t-ē khòaⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in,

3仆tī地裡，講，我ê主，我若tī你ê面前得tio̍h恩典，求你m̄-thang離開奴僕做你去；phak tī tōe-ni̍h, kóng, góa ê chú, góa nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k chòe lí khì;

4容允the̍h淡薄水，hō͘ lín洗腳請歇睏tī樹腳；iông-ún the̍h tām-po̍h chúi, hō͘ lín sóe-kha; chhiáⁿ hioh-khùn tī chhiū-kha;

5我koh the̍h淡薄餅，hō͘ lín點心；然後進前去；因為lín是為tio̍h án-ni，chiah到lín ê奴僕chia。In講，Thang照你ê話去行。góa koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê ōe khì kiâⁿ.

6亞伯拉罕趕緊入布棚，見撒拉講，你緊緊用Saⁿ-sè-a ê麵粉，nóa做餅。A-pek-la̍h-hán kóaⁿ-kín ji̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, nóa chòe piáⁿ.

7亞伯拉罕koh走到牛群ê所在，牽一隻chíⁿ koh好ê牛á來；交hō͘奴僕，伊就趕緊去備辦。A-pek-la̍h-hán koh cháu kàu gû-kûn ê só͘-chāi, khan chi̍t chiah chíⁿ koh hó ê gû-á lâi; kau hō͘ lô͘-po̍k, i chiū kóaⁿ-kín khì pī-pān.

8亞伯拉罕koh the̍h奶油kap 奶，kap所備辦ê牛á來，排tī in ê面前；家己tī樹腳khiā tī in ê身邊；in就食。A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h.

9In kā伊講，你ê bó͘撒拉tī tah-lo̍h？伊講，Tī布棚內。In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi.

10In中間一個講，到期我的確beh koh來你chia；你ê bó͘撒拉beh生一個kiáⁿ。撒拉tī後面，布棚門口，teh聽。In tiong-kan chi̍t-ê kóng, Kàu-kî Góa tek-khak beh koh lâi lí chia; lí ê bó͘ Sat-la̍h beh siⁿ chi̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ.

11亞伯拉罕kap撒拉年歲已經老；撒拉ê月經已經絕。A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng choa̍t.

12撒拉心內笑講，我已經衰lám，我ê主亦老lah；kiám iáu有chit號ê歡喜？Sat-la̍h sim-lāi chhiò kóng, Góa í-keng soe-lám, góa ê chú ia̍h lāu-lah; kiám iáu ū chit-hō ê hoaⁿ-hí?

13耶和華對亞伯拉罕講，撒拉為啥事笑，講，我已經老，果真能生kiáⁿ mah？Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Góa í-keng lāu, kó-chin ōe siⁿ-kiáⁿ mah?

14Kiám耶和華有做bōe來ê事mah？到期，明年 chit時，我beh koh來你chia，撒拉beh生一個kiáⁿ。Kiám Iâ-hô-hoa ū chòe-bōe-lâi ê sū mah? Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chi̍t ê kiáⁿ.

15撒拉驚，m̄認，講，我無笑。hit人講，無影；你實在有笑。Sat-la̍h kiaⁿ, m̄-jīn, kóng, Góa bô chhiò. Hit-lâng kóng, Bô-iáⁿ; lí si̍t-chāi ū chhiò.

16Hiah-ê人就tùi hia起來，ǹg所多瑪去；亞伯拉罕也kap in相kap行，beh送in一站。Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chi̍t-chām.

17耶和華講，我所beh做ê事，kiám thang tùi亞伯拉罕隱khǹg mah？Iâ-hô-hoa kóng, Góa só͘ beh chòe ê sū, kiám thang tùi A-pek-la̍h-hán ún-khǹg mah?

18因為亞伯拉罕的確beh成做強大ê國，地上萬國beh因為伊來得tio̍h福氣。In-ūi A-pek-la̍h-hán tek-khak beh chiâⁿ-chòe kiông-tōa ê kok, tōe-chiūⁿ bān-kok beh in-ūi i lâi tit-tio̍h hok-khì.

19我bat伊，是beh hō͘伊命令伊ê kiáⁿ kap伊ê家眷；hō͘ in長長守耶和華ê道理，秉公行義；致到耶和華指亞伯拉罕所講ê話，lóng歸hō͘ 伊。Góa bat i, sī beh hō͘ i bēng-lēng i ê kiáⁿ kap i ê ke-koàn; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i.

20耶和華講，所多瑪、蛾摩拉hoah-hiàm ê聲真大，in ê罪惡實在重。Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-tōa, in ê chōe-ok si̍t-chāi tāng.

21我taⁿ beh落去，看in所行ê，果然一盡照我所聽ê聲á無；若無án-ni，我亦會知。Góa taⁿ beh lo̍h-khì, khòaⁿ in só͘ kiâⁿ-ê, kó-jiân it-chīn chiàu Góa só͘ thiaⁿ ê siaⁿ á bô; nā bô án-ni, Góa ia̍h ōe chai.

22Hiah-ê人tùi-hia oa̍t-tńg身，ǹg所多瑪去；亞伯拉罕iáu khiā tī耶和華ê面前。Hiah ê lâng tùi-hia oa̍t-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng.

23亞伯拉罕近前來講，好人kap pháiⁿ人，你lóng beh剿滅mah？A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah?

24設使城內有五十個好人，你猶原beh剿滅hit所在mah？無beh為tio̍h城內chí五十個好人，來赦免in mah？Siat-sú siâⁿ-lāi ū gō͘-cha̍p ê hó-lâng, Lí iû-goân beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah?

25願你決斷無án-ni行，將好人kap pháiⁿ人做一下害死；致到好人kap pháiⁿ人相同；願你決斷無án-ni行；審判全地ê主kiám無行公義mah？Goān Lí koat-toàn bô án-ni kiâⁿ, chiong hó-lâng kap pháiⁿ-lâng chòe-chi̍t-ē hāi-sí; tì-kàu hó-lâng kap pháiⁿ-lâng saⁿ-tâng; goān Lí koat-toàn bô án-ni kiâⁿ; sím-phòaⁿ choân-tōe ê Chú kiám bô kiâⁿ kong-gī mah?

26耶和華講，我若tī所多瑪城內tú-tio̍h有五十個好人，我就為tio̍h in ê緣故寬容hit所在。Iâ-hô-hoa kóng, Góa nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Góa chiū ūi-tio̍h in ê iân-kò͘ khoan-iông hit só͘-chāi.

27亞伯拉罕應講，我雖然是火灰土粉，iáu-kú敢對主講話；A-pek-la̍h-hán ìn kóng, Góa sui-jiân sī hé-hu thô͘-hún, iáu-kú káⁿ tùi Chú kóng-ōe;

28設使chiah-ê五十個好人欠五個；你就因為欠五個，剿滅全城mah？伊講，我tī-hia若tú-tio̍h有四十五個，亦無beh剿滅。siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê, châu-bia̍t choân-siâⁿ mah? I kóng, Góa tī-hia nā tú-tio̍h ū sì-cha̍p-gō͘ ê, ia̍h bô beh châu-bia̍t.

29亞伯拉罕koh對伊講，設使tī-hia tú-tio̍h四十個nih？伊講，為tio̍h chiah-ê四十個 ê緣故，我亦無beh做chit-ê事。A-pek-la̍h-hán koh tùi I kóng, Siat-sú tī-hia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Góa ia̍h bô beh chòe chit ê sū.

30伊koh講，求主莫得受氣，我beh koh講；設使tī-hia若tú-tio̍h三十個nih？伊講，我tī-hia若tú-tio̍h有三十個，我亦無beh做chit-ê事。I koh kóng, Kiû Chú bo̍h-tit siū-khì, góa beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Góa tī-hia nā tú-tio̍h ū saⁿ-cha̍p-ê, Góa ia̍h bô beh chòe chit ê sū.

31伊講，我iáu-kú敢對主講；設使tī-hia tú-tio̍h有二十個nih？伊講，為tio̍h chiah-ê二十個 ê緣故，我亦無beh剿滅。I kóng, Góa iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Góa ia̍h bô beh châu-bia̍t.

32伊講，求主莫得受氣，我koh講chit一pái；設使tī-hia tú-tio̍h有十個nih？伊講，為tio̍h chiah-ê十個ê緣故，我亦無beh剿滅。I kóng, Kiû Chú bo̍h-tit siū-khì, góa koh kóng chit chi̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Góa ia̍h bô beh châu-bia̍t.

33耶和華kap亞伯拉罕講明白，就上去。亞伯拉罕亦tò去伊ê所在。Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi.

1日暗，hit兩個使者到所多瑪；羅得坐tī所多瑪城門裡；羅得看見in，就起來迎接in；鞠躬面ǹg地，Ji̍t-àm, hit nn̄g ê sù-chiá kàu Só͘-to-má; Lô-tek chē tī Só͘-to-má siâⁿ-mn̂g-ni̍h; Lô-tek khòaⁿ-kìⁿ in, chiū khí-lâi ngiâ-chih in; kiok-kiong bīn ǹg tōe,

2講，我ê主ah，請oa̍t來奴僕ê厝歇暝洗腳，明á早起起來，行lín ê路。In講，m̄免；阮beh tī大街面過暝。kóng, Góa ê chú ah, chhiáⁿ oa̍t lâi lô͘-po̍k ê chhù hioh-mî, sóe-kha; bîn-á-chá-khí khí-lâi, kiâⁿ lín ê lō͘. In kóng, M̄-bián; goán beh tī tōa koe-bīn kè-mî.

3羅得切切請in；in chiah oa̍t-tńg腳，oat入伊ê厝；羅得為in備辦筵席，pek無酵餅；in就食。Lô-tek chhiat-chhiat chhiáⁿ in; in chiah oa̍t-tńg-kha, oat-ji̍p i ê chhù; Lô-tek ūi in pī-pān iân-sia̍h, pek bû-kàⁿ-piáⁿ; in chiū chia̍h.

4Iniáu未去睏，城內ê人，就是所多瑪人，tùi少年到老，四面來圍伊ê厝；In iáu-bē khì khùn, siâⁿ-lāi ê lâng, chiū-sī Só͘-to-má lâng, tùi siàu-liân kàu lāu, sì-bīn lâi ûi i ê chhù;

5叫羅得講，今暗到你chia ê人tī tah-lo̍h？hō͘ in出來，照阮所ài做。kiò Lô-tek kóng, Kin-àm kàu lí chia ê lâng tī tah-lo̍h? hō͘ in chhut-lâi, chiàu goán só͘ ài chòe.

6羅得出去到門外眾人hia，就將門關teh；Lô-tek chhut-khì kàu mn̂g-gōa, chèng-lâng hia, chiū chiong mn̂g koaiⁿ-teh;

7講，兄弟ah，請lín莫得做chit號pháiⁿ；kóng, Hiaⁿ-tī ah, chhiáⁿ lín bo̍h-tit chòe chit-hō pháiⁿ;

8你看，我有兩個cha-bó͘-kiáⁿ，iáu是在室女；容允我chhōa出來，chhut-chāi lín所ài來行；獨獨chit兩人，已經到我ê厝，m̄-thang對in做甚麼。lí khòaⁿ, góa ū nn̄g ê cha-bó͘-kiáⁿ, iáu sī chāi-sek-lú; iông-ún góa chhōa-chhut-lâi, chhut-chāi lín só͘ ài lâi kiâⁿ; to̍k-to̍k chit nn̄g-lâng, í-keng kàu góa ê chhù, m̄-thang tùi in chòe sím-mi̍h.

9眾人講，你退去。Koh講，Chit人寄居tī-chia，續beh管轄阮mah？taⁿ阮beh害你比害in khah傷重。就oe-khoeh羅得，進前beh攻破伊ê門。Chèng-lâng kóng, Lí thè-khì. Koh kóng, Chit-lâng kià-ku tī-chia, sòa beh koán-hat goán mah? taⁿ goán beh hāi lí pí hāi in khah siong-tiōng. Chiū oe-khoeh Lô-tek, chìn-chêng beh kong-phòa i ê mn̂g.

10總是hit兩人伸手，牽羅得入厝，將門關去。Chóng-sī hit nn̄g-lâng chhun-chhiú, khan Lô-tek ji̍p chhù, chiong mn̂g koaiⁿ-khì.

11Koh hō͘門外ê人，tùi細到大，目睭ian-n̄g，lóng bōe看見；chhē到倦chhē無門。Koh hō͘ mn̂g-gōa ê lâng, tùi sòe kàu tōa, ba̍k-chiu ian-n̄g, lóng bōe khòaⁿ-kìⁿ; chhē kàu siān chhē bô mn̂g.

12Hit兩人對羅得講，你tī-chia iáu有甚麼人？或是kiáⁿ婿，或是kiáⁿ，或是cha-bó͘-kiáⁿ，以及城內一切屬你ê人；你tio̍h hō͘ in lóng出chit所在。Hit nn̄g-lâng tùi Lô-tek kóng, Lí tī-chia iáu ū sím-mi̍h lâng? he̍k-sī kiáⁿ-sài, he̍k-sī kiáⁿ, he̍k-sī cha-bó͘-kiáⁿ, í-ki̍p siâⁿ-lāi it-chhè sio̍k lí ê lâng; lí tio̍h hō͘ in lóng chhut chit só͘-chāi.

13因為阮beh剿滅chit-ê所在，是為tio̍h in hoah-hiàm ê聲tī耶和華ê面前真大；耶和華差阮來beh剿滅伊。In-ūi goán beh châu-bia̍t chit ê só͘-chāi, sī ūi-tio̍h in hoah-hiàm ê siaⁿ tī Iâ-hô-hoa ê bīn-chêng chin-tōa; Iâ-hô-hoa chhe goán lâi beh châu-bia̍t-i.

14羅得出去，對娶伊ê cha-bó͘-kiáⁿ ê kiáⁿ婿講，Lín起來，離開chia；因為耶和華beh滅無chit-ê城；伊ê kiáⁿ婿掠做伊是講笑。Lô-tek chhut-khì, tùi chhōa i ê cha-bó͘-kiáⁿ ê kiáⁿ-sài kóng, Lín khí-lâi, lī-khui chia; in-ūi Iâ-hô-hoa beh bia̍t-bô chit ê siâⁿ; i ê kiáⁿ-sài lia̍h-chòe i sī kóng-chhiò.

15天光使者催逼羅得講，起來，chhōa你ê bó͘，以及你tī-chia兩個cha-bó͘-kiáⁿ去；驚了kap chit-ê城ê罪惡相kap受滅無。Thiⁿ-kng sù-chiá chhui-pek Lô-tek kóng, Khí-lâi, chhōa lí ê bó͘, í-ki̍p lí tī-chia nn̄g ê cha-bó͘-kiáⁿ khì; kiaⁿ-liáu kap chit ê siâⁿ ê chōe-ok saⁿ-kap siū bia̍t-bô.

16羅得延chhiân；hit兩人，因為耶和華憐憫羅得，就牽伊ê手，kap伊ê bó͘ ê手，kap伊兩個cha-bó͘-kiáⁿ ê手，將伊chhōa出，安置tī城外。Lô-tek iân-chhiân; hit nn̄g-lâng, in-ūi Iâ-hô-hoa lîn-bín Lô-tek, chiū khan i ê chhiú, kap i ê bó͘ ê chhiú, kap i nn̄g ê cha-bó͘-kiáⁿ ê chhiú, chiong i chhōa-chhut, an-tì tī siâⁿ-gōa.

17Chhōa in出去了，講，你tio̍h逃命，m̄-thang oa̍t頭看，亦m̄-thang tòa tī平洋；tio̍h走去山裡，驚了受滅無。Chhōa in chhut-khì liáu, kóng, Lí tio̍h tô-miā, m̄-thang oa̍t-thâu khòaⁿ, ia̍h m̄-thang tòa tī Pîⁿ-iûⁿ; tio̍h cháu-khì soaⁿ-ni̍h, kiaⁿ-liáu siū bia̍t-bô.

18羅得對in講，我ê主ah，m̄-thang án-ni。Lô-tek tùi in kóng, Góa ê Chú ah, m̄-thang án-ni.

19你看，你ê奴僕已經得tio̍h恩典tī你ê面前，你亦對我顯出極大ê仁慈，救我ê性命；我bōe會走到山裡，驚了chit-ê災禍到tī我，我就死。Lí khòaⁿ, lí ê lô͘-po̍k í-keng tit-tio̍h un-tián tī lí ê bīn-chêng, lí ia̍h tùi góa hián-chhut ke̍k-tōa ê jîn-chû, kiù góa ê sìⁿ-miā; góa bōe-ōe cháu kàu soaⁿ-ni̍h, kiaⁿ-liáu chit ê chai-ē kàu tī góa, góa chiū sí.

20你看，chit-ê城近近thang逃走，亦是細；請容允我逃閃tī-hia，來保全我ê活命；chit-ê城kiám m̄是細ê mah？Lí khòaⁿ, chit ê siâⁿ kūn-kūn thang tô-cháu, ia̍h sī sòe; chhiáⁿ iông-ún góa tô-siám tī-hia, lâi pó-choân góa ê oa̍h-miā; chit ê siâⁿ kiám m̄-sī sòe-ê mah?

21伊對伊講，Chit-ê tāi-chì，我亦允准你；你所講ê城，我無beh chhia倒。I tùi i kóng, Chit ê tāi-chì, góa ia̍h ún-chún lí; lí só͘ kóng ê siâⁿ, góa bô beh chhia-tó.

22你tio̍h緊緊走去hia；因為你iáu未到hia，我bōe會做甚麼。因為án-ni hit-ê城名叫Só-jíⁿ。Lí tio̍h kín-kín cháu-khì hia; in-ūi lí iáu-bē kàu hia, góa bōe-ōe chòe sím-mi̍h. In-ūi án-ni hit ê siâⁿ miâ-kiò Só-jíⁿ.

23羅得到Só-jíⁿ，日已經出。Lô-tek kàu Só-jíⁿ, ji̍t í-keng chhut.

24Hit時耶和華將琉磺kap火，tùi天頂，tùi耶和華hia，降落tī所多瑪kap蛾摩拉。Hit sî Iâ-hô-hoa chiong jiû-n̂g kap hé, tùi thiⁿ-téng, tùi Iâ-hô-hoa hia, kàng-lo̍h tī Só͘-to-má kap Gô-mô͘-la̍h.

25將hiah-ê城，以及全平洋，kap城內所有ê百姓，連地面上生長ê，lóng毀壞。Chiong hiah ê siâⁿ, í-ki̍p choân pîⁿ-iûⁿ, kap siâⁿ-lāi só͘-ū ê peh-sìⁿ, liân tōe-bīn-chiūⁿ seng-tióng-ê, lóng húi-hoāi.

26羅得ê bó͘ tī後面，一下oa̍t頭看，就變做一支鹽柱。Lô-tek ê bó͘ tī āu-bīn, chi̍t-ē oa̍t-thâu khòaⁿ, chiū pìⁿ-chòe chi̍t ki iâm-thiāu.

27亞伯拉罕透早起來，到伊前日khiā tī耶和華面前hit位；A-pek-la̍h-hán thàu-chá khí-lâi, kàu i chêng-ji̍t khiā tī Iâ-hô-hoa bīn-chêng hit-ūi;

28ǹg所多瑪、蛾摩拉，kap平洋ê全地來看；看見hit所在火煙chhèng高，親像火爐ê煙。ǹg Só͘-to-má Gô-mô͘-la̍h, kap Pîⁿ-iûⁿ ê choân-tōe lâi khòaⁿ; khòaⁿ-kìⁿ hit só͘-chāi hé-ian chhèng-koâiⁿ, chhin-chhiūⁿ hé-lô͘ ê ian.

29當上帝剿滅平洋chiah-ê城ê時，上帝siàu念亞伯拉罕；tú-tú tī chhia倒羅得所khiā起ê城ê時，就kah羅得tùi chhia倒ê中間出去。Tng Siōng-tè châu-bia̍t Pîⁿ-iûⁿ chiah ê siâⁿ ê sî, Siōng-tè siàu-liām A-pek-la̍h-hán; tú-tú tī chhia-tó Lô-tek só͘ khiā-khí ê siâⁿ ê sî, chiū kah Lô-tek tùi chhia-tó ê tiong-kan chhut-khì.

30羅得tiàm-tī Só-jíⁿ驚惶；就kap伊兩個cha-bó͘-kiáⁿ tùi Só-jíⁿ上去tiàm-tī山裡；伊kap兩個cha-bó͘-kiáⁿ tiàm-tī一個洞內。Lô-tek tiàm tī Só-jíⁿ kiaⁿ-hiâⁿ; chiū kap i nn̄g ê cha-bó͘-kiáⁿ tùi Só-jíⁿ chiūⁿ-khì tiàm tī soaⁿ-ni̍h; i kap nn̄g ê cha-bó͘-kiáⁿ tiàm tī chi̍t ê tōng-lāi.

31大cha-bó͘-kiáⁿ 對細cha-bó͘-kiáⁿ講，咱ê老父老lah，地上koh無人kap咱做匹配，來照人道。Tōa cha-bó͘-kiáⁿ tùi sòe cha-bó͘-kiáⁿ kóng, Lán ê lāu-pē lāu-lah, tōe-chiūⁿ koh bô lâng kap lán chòe phit-phòe, lâi chiàu jîn-tō.

32來lah，thang hō͘老父lim酒，kap伊相kap睏；án-ni咱好thang tùi伊留存後裔。Lâi-lah, thang hō͘ lāu-pē lim chiú, kap i saⁿ-kap khùn; án-ni lán hó thang tùi i liû-chûn hō͘-è.

33Hit暝in hō͘老父lim酒；大cha-bó͘-kiáⁿ就入去kap老父相kap睏；伊甚麼時去睏，甚麼時起來，老父lóng m̄知。Hit-mî in hō͘ lāu-pē lim chiú; tōa cha-bó͘-kiáⁿ chiū ji̍p-khì kap lāu-pē saⁿ-kap khùn; i sím-mi̍h sî khì khùn, sím-mi̍h sî khí-lâi, lāu-pē lóng m̄-chai.

34過日大cha-bó͘-kiáⁿ kā細cha-bó͘-kiáⁿ講，我昨暝kap老父相kap睏；今暗咱koh hō͘伊lim酒，你thang入去kap伊相kap睏。Án-ni，咱好thang tùi老父留存後裔。Kè-ji̍t tōa cha-bó͘-kiáⁿ kā sòe cha-bó͘-kiáⁿ kóng, Góa chā-mî kap lāu-pē saⁿ-kap khùn; kin-àm lán koh hō͘ i lim chiú, lí thang ji̍p-khì kap i saⁿ-kap khùn. Án-ni, lán hó thang tùi lāu-pē liû-chûn hō͘-è.

35Hit暝in koh hō͘老父lim酒，細cha-bó͘-kiáⁿ起來去kap伊睏；伊甚麼時去睏，甚麼時起來，老父亦lóng m̄知。Hit-mî in koh hō͘ lāu-pē lim chiú, sòe cha-bó͘-kiáⁿ khí-lâi khì kap i khùn; i sím-mi̍h sî khì khùn, sím-mi̍h sî khí-lâi, lāu-pē ia̍h lóng m̄-chai.

36Án-ni羅得兩個cha-bó͘-kiáⁿ lóng tùi in老父來懷孕。Án-ni Lô-tek nn̄g ê cha-bó͘-kiáⁿ lóng tùi in lāu-pē lâi hoâi-īn.

37大ê生kiáⁿ，叫伊ê名Mô͘-ap，就是現今Mô͘-ap人ê祖。Tōa-ê siⁿ kiáⁿ, kiò i ê miâ Mô͘-ap, chiū-sī hiān-kim Mô͘-ap lâng ê chó͘.

38細ê亦生kiáⁿ，叫伊ê名Piān-á-bí，就是現今A-bûn人ê祖。Sòe-ê ia̍h siⁿ-kiáⁿ, kiò i ê miâ Piān-á-bí, chiū-sī hiān-kim A-bûn lâng ê chó͘.

1亞伯拉罕tùi-hia暫暫ǹg南方徙去；tòa tī Ka-te-su kap Su-jíⁿ ê中間，寄居tī Ki-la̍h-jíⁿ。A-pek-la̍h-hán tùi-hia chām-chām ǹg lâm-hng sóa-khì; tòa tī Ka-te-su kap Su-jíⁿ ê tiong-kan, kià-ku tī Ki-la̍h-jíⁿ.

2亞伯拉罕講到伊ê bó͘撒拉，就講，是我ê小妹；Ki-la̍h-jíⁿ王A-pí-bí-le̍k差人將撒拉chhōa去。A-pek-la̍h-hán kóng kàu i ê bó͘ Sat-la̍h, chiū kóng, Sī góa ê sió-bē; Ki-la̍h-jíⁿ ông A-pí-bí-le̍k chhe lâng chiong Sat-la̍h chhōa-khì.

3暝時，眠夢中，上帝來kā A-pí-bí-le̍k講，你是該死ê人，因為你所chhōa hit-ê婦人人是人ê bó͘。Mî-sî, bîn-bāng-tiong, Siōng-tè lâi kā A-pí-bí-le̍k kóng, Lí sī kai sí ê lâng, in-ūi lí só͘ chhōa hit ê hū-jîn-lâng sī lâng ê bó͘.

4A-pí-bí-le̍k iáu未親近伊，就講，主ah，行義ê百姓，你亦beh滅伊mah？A-pí-bí-le̍k iáu-bē chhin-kūn i, chiū kóng, Chú ah, kiâⁿ-gī ê peh-sìⁿ, Lí ia̍h beh bia̍t i mah?

5Hit人kiám m̄是本身對我講，伊是我ê小妹mah？就婦人人亦本身講，伊是我ê兄；我做chit-ê事，是心端正，手清氣。Hit-lâng kiám m̄-sī pún-sin tùi góa kóng, I sī góa ê sió-bē mah? Chiū hū-jîn-lâng ia̍h pún-sin kóng, I sī góa ê hiaⁿ; góa chòe chit ê sū, sī sim toan-chèng, chhiú chheng-khì.

6上帝tī夢中對伊講，我本知你做chit-ê事，是心中端正；我chiah阻擋你，免得你得罪我；所以我無容允你摸tio̍h伊。Siōng-tè tī bāng-tiong tùi i kóng, Góa pún chai lí chòe chit ê sū, sī sim-tiong toan-chèng; Góa chiah chó͘-tòng lí, bián-tit lí tek-chōe Góa; só͘-í Góa bô iông-ún lí bong-tio̍h i.

7Taⁿ你tio̍h將chit人ê bó͘還伊，因為伊是先知；伊beh替你祈禱，你chiah會活；你若m̄還伊，你tio̍h知，你kap你所有ê人lóng得beh死。Taⁿ lí tio̍h chiong chit lâng ê bó͘ hêng-i, in-ūi i sī sian-ti; i beh thòe lí kî-tó, lí chiah ōe oa̍h; lí nā m̄ hêng-i, lí tio̍h chai, lí kap lí só͘ ū ê lâng lóng tit-beh sí.

8A-pí-bí-le̍k透早起來，叫眾奴僕來，將chiah-ê tāi-chì lóng講hō͘ in聽；hiah-ê人lóng真驚。A-pí-bí-le̍k thàu-chá khí-lâi, kiò chèng lô͘-po̍k lâi, chiong chiah ê tāi-chì lóng kóng hō͘ in thiaⁿ; hiah ê lâng lóng chin kiaⁿ.

9A-pí-bí-le̍k叫亞伯拉罕來，對伊講，你對阮所行ê是甚麼事？我有甚麼得罪你，你竟然hō͘我kap我國內ê人陷落重罪？你對我行m̄應該行ê事。A-pí-bí-le̍k kiò A-pek-la̍h-hán lâi, tùi i kóng, Lí tùi goán só͘ kiâⁿ-ê sī sím-mi̍h sū? góa ū sím-mi̍h tek-chōe lí, lí kéng-jiân hō͘ góa kap góa kok-lāi ê lâng hām-lo̍h tāng-chōe? lí tùi góa kiâⁿ m̄ eng-kai kiâⁿ ê sū.

10A-pí-bí-le̍k koh對亞伯拉罕講，你看見甚麼，chiah做chit-ê事？A-pí-bí-le̍k koh tùi A-pek-la̍h-hán kóng, Lí khòaⁿ-kìⁿ sím-mi̍h, chiah chòe chit ê sū?

11亞伯拉罕講，我phah算chit所在ê人lóng無驚上帝；in beh為tio̍h我ê bó͘ ê緣故thâi死我。A-pek-la̍h-hán kóng, Góa phah-sǹg chit só͘-chāi ê lâng lóng bô kiaⁿ Siōng-tè; in beh ūi-tio̍h góa ê bó͘ ê iân-kò͘ thâi-sí góa.

12Koh伊亦實在是我ê小妹，siâng父koh母，後來做我ê bó͘。Koh i ia̍h si̍t-chāi sī góa ê sió-bē, siâng-pē koh-bú, āu-lâi chòe góa ê bó͘.

13當上帝kah我離開老父ê家，四界行ê時，我kā伊講，將來咱所到ê所在，請你稱我講，伊是我ê兄；這就是你款待我ê恩。Tng Siōng-tè kah góa lī-khui lāu-pē ê ke, sì-kòe kiâⁿ ê sî, góa kā i kóng, chiong-lâi lán só͘ kàu ê só͘-chāi, chhiáⁿ lí chheng góa kóng, I sī góa ê hiaⁿ; che chiū-sī lí khoán-thāi góa ê un.

14A-pí-bí-le̍k將羊、牛、奴僕、女婢，hō͘亞伯拉罕；koh將伊ê bó͘撒拉還伊。A-pí-bí-le̍k chiong iûⁿ, gû, lô͘-po̍k, lú-pī, hō͘ A-pek-la̍h-hán; koh chiong i ê bó͘ Sat-la̍h hêng-i.

15A-pí-bí-le̍k koh講，你看，我ê地lóng tī你ê面前，你thang隨意khiā起。A-pí-bí-le̍k koh kóng, Lí khòaⁿ, góa ê tōe lóng tī lí ê bīn-chêng, lí thang sûi-ì khiā-khí.

16Koh kā撒拉講，我hō͘你ê兄一千銀，kā你對全家做遮目睭ê；taⁿ你tī一切lóng無不是。Koh kā Sat-la̍h kóng, Góa hō͘ lí ê hiaⁿ chi̍t chheng gûn, kā lí tùi choân-ke chòe jia ba̍k-chiu-ê; taⁿ lí tī it-chhè lóng bô put-sī.

17亞伯拉罕祈禱上帝；上帝就醫好A-pí-bí-le̍k kap伊ê bó͘ kap女婢，in就能生kiáⁿ。A-pek-la̍h-hán kî-tó Siōng-tè; Siōng-tè chiū i-hó A-pí-bí-le̍k kap i ê bó͘ kap lú-pī, in chiū ōe siⁿ kiáⁿ.

18因為耶和華為tio̍h亞伯拉罕ê bó͘撒拉ê緣故，已經hō͘ A-pí-bí-le̍k家內ê婦人人bōe會生kiáⁿ。In-ūi Iâ-hô-hoa ūi-tio̍h A-pek-la̍h-hán ê bó͘ Sat-la̍h ê iân-kò͘, í-keng hō͘ A-pí-bí-le̍k ke-lāi ê hū-jîn-lâng bōe-ōe siⁿ-kiáⁿ.