1源起頭上帝創造天kap地。Goân-khí-thâu Siōng-tè chhòng-chō thiⁿ kap tōe.

2地是空空渾沌；深淵ê面上烏暗；上帝ê神運動tī水面。Tōe sī khang-khang hūn-tūn; chhim-ian ê bīn-chiūⁿ o͘-àm; Siōng-tè ê Sîn ūn-tōng tī chúi-bīn.

3上帝講，Tio̍h有光，就有光。Siōng-tè kóng, Tio̍h ū kng, chiū ū kng.

4上帝看光，是好；上帝將光暗分開。Siōng-tè khòaⁿ kng, sī hó; Siōng-tè chiong kng àm pun-khui.

5上帝叫hit-ê光做日，叫暗做暝。有ê-hng有早起，是頭一日。：Siōng-tè kiò hit ê kng chòe Ji̍t, kiò àm chòe Mî. Ū ê-hng ū chá-khí, sī thâu chi̍t-ji̍t.

6上帝講，Chiah-ê水ê中間tio̍h有穹蒼，將水kap水分開。Siōng-tè kóng, Chiah ê chúi ê tiong-kan tio̍h ū kiong-chhong, chiong chúi kap chúi pun-khui.

7上帝就造穹蒼，來分開穹蒼下ê水kap穹蒼頂ê水；就有án-ni。Siōng-tè chiū chō kiong-chhong, lâi hun-khui kiong-chhong-ē ê chúi kap kiong-chhong-téng ê chúi; chiū ū án-ni.

8上帝叫穹蒼做天。有ê-hng有早起，是第二日。Siōng-tè kiò kiong-chhong chòe Thiⁿ. Ū ê-hng ū chá-khí, sī tē-jī ji̍t.

9上帝講，天下chiah-ê水tio̍h聚集到一所在，乾地tio̍h出現；就有án-ni。Siōng-tè kóng, Thiⁿ-ē chiah ê chúi tio̍h chū-chi̍p kàu chi̍t só͘-chāi, ta-tōe tio̍h chhut-hiān; chiū ū án-ni.

10上帝叫乾地做地；叫聚集ê水做海；上帝看伊是好。Siōng-tè kiò ta-tōe chòe Tōe; kiò chū-chi̍p ê chúi chòe Hái; Siōng-tè khòaⁿ-i sī hó.

11上帝講，地tio̍h發草，以及結子ê菜蔬，kap照類生果子ê樹，hit內面有伊ê chí，tī地上；就有án-ni。Siōng-tè kóng, Tōe tio̍h hoat-chháu, í-ki̍p kiat-chí ê chhài-soe, kap chiàu-lūi siⁿ ké-chí ê chhiū, hit lāi-bīn ū i ê chí, tī tōe-chiūⁿ; chiū ū án-ni.

12地就發草，kap照類結chí ê菜蔬，kap照類生果子ê樹，內面有伊ê chí；上帝看伊是好。Tōe chiū hoat-chháu, kap chiàu-lūi kiat-chí ê chhài-soe, kap chiàu-lūi siⁿ ké-chí ê chhiū, lāi-bīn ū i ê chí; Siōng-tè khòaⁿ-i sī hó.

13有ê-hng有早起，是第三日。Ū ê-hng ū chá-khí, sī tē-saⁿ ji̍t.

14上帝講，天裡ê穹蒼tio̍h有發光ê體，來分別日暝；也thang做兆頭，四季，日，年；Siōng-tè kóng, Thiⁿ-ni̍h ê kiong-chhong tio̍h ū hoat-kng ê thé, lâi hun-piat ji̍t-mî; iā thang chòe tiāu-thâu, sù-kùi, ji̍t, nî;

15亦hō͘ in做光體tī天ê穹蒼，照光tī地上；就有án-ni。ia̍h hō͘ in chòe kng-thé tī thiⁿ ê kiong-chhong, chiò-kng tī tōe-chiūⁿ; chiū ū án-ni.

16上帝就造大ê光體兩個；大ê光體來管日時，細ê光體來管暝時；也造星辰。Siōng-tè chiū chō tōa ê kng-thé nn̄g-ê; tōa ê kng-thé lâi koán ji̍t-sî, sòe ê kng-thé lâi koán mî-sî; iā chō chhiⁿ-sîn.

17上帝hē in tī天裡ê穹蒼，hō͘ in照光tī地裡；Siōng-tè hē in tī thiⁿ-ni̍h ê kiong-chhong, hō͘ in chiò kng tī tōe-ni̍h;

18也beh管有日暝，分別光暗。上帝看伊是好。iā beh koán ū ji̍t mî, hun-piat kng àm. Siōng-tè khòaⁿ-i sī hó.

19有ê-hng有早起，是第四日。Ū ê-hng ū chá-khí, sī tē-sì ji̍t.

20上帝講，水tio̍h生湠chōe-chōe有活命ê動物；鳥飛tī地ê頂面，天裡ê穹蒼。Siōng-tè kóng, Chúi tio̍h siⁿ-thòaⁿ chōe-chōe ū oa̍h-miā ê tōng-bu̍t; chiáu pe tī tōe ê téng-bīn, thiⁿ-ni̍h ê kiong-chhong.

21上帝就創造海裡ê大魚，以及水所生chōe-chōe有活命ê動物，各照伊ê類，koh創造ta̍k樣ê飛鳥，照伊ê類；上帝看伊是好。Siōng-tè chiū chhòng-chō hái-ni̍h ê tōa-hî, í-ki̍p chúi só͘ siⁿ chōe-chōe ū oa̍h-miā ê tōng-bu̍t, kok chiàu i ê lūi, koh chhòng-chō ta̍k-iūⁿ ê pe-chiáu, chiàu i ê lūi; Siōng-tè khòaⁿ-i sī hó.

22上帝賜福in，講，Tio̍h生湠加添真chōe，充滿tī海裡ê水，也hō͘鳥隻生湠chōe-chōe tī地裡。Siōng-tè sù-hok in, kóng, Tio̍h siⁿ-thòaⁿ ke-thiⁿ chin-chōe, chhiong-móa tī hái-ni̍h ê chúi, iā hō͘ chiáu-chiah siⁿ-thòaⁿ chōe-chōe tī tōe-ni̍h.

23有ê-hng有早起，是第五日。Ū ê-hng ū chá-khí, sī tē-gō͘ ji̍t.

24上帝講，地tio̍h生有活命ê動物，照伊ê類，cheng-siⁿ，蟲thōa，地上ê走獸，照伊ê類；就有án-ni。Siōng-tè kóng, Tōe tio̍h siⁿ ū oa̍h-miā ê tōng-bu̍t, chiàu i ê lūi, cheng-siⁿ, thâng-thōa, tōe-chiūⁿ ê cháu-siù, chiàu i ê lūi; chiū ū án-ni.

25上帝就造地上ê走獸照伊ê類，cheng-siⁿ照伊ê類，地上一切ê蟲thōa照伊ê類；上帝看伊是好。Siōng-tè chiū chō tōe-chiūⁿ ê cháu-siù chiàu i ê lūi, cheng-siⁿ chiàu i ê lūi, tōe-chiūⁿ it-chhè ê thâng-thōa chiàu i ê lūi; Siōng-tè khòaⁿ-i sī hó.

26上帝講，咱tio̍h造人親像咱ê像，照咱ê款；hō͘ in管理海裡ê魚，天裡ê鳥，kap cheng-siⁿ，kap全地，以及地上teh sô ê蟲thōa。Siōng-tè kóng, Lán tio̍h chō lâng chhin-chhiūⁿ lán ê siōng, chiàu lán ê khoán; hō͘ in koán-lí hái-ni̍h ê hî, thiⁿ-ni̍h ê chiáu, kap cheng-siⁿ, kap choân-tōe, í-ki̍p tōe-chiūⁿ teh sô ê thâng-thōa.

27上帝就創造人親像伊家己ê像，照上帝ê像創造伊；創造in男ê女ê。Siōng-tè chiū chhòng-chō lâng chhin-chhiūⁿ I ka-kī ê siōng, chiàu Siōng-tè ê siōng chhòng-chō i; chhòng-chō in lâm-ê lú-ê.

28上帝賜福in；上帝koh對in講，Tio̍h生湠真chōe，充滿tī地上，來khah贏伊；也tio̍h治理海裡ê魚，天裡ê鳥，kap地上一切所振動ê活物。Siōng-tè sù-hok in; Siōng-tè koh tùi in kóng, Tio̍h siⁿ-thòaⁿ chin-chōe, chhiong-móa tī tōe-chiūⁿ, lâi khah-iâⁿ i; iā tio̍h tī-lí hái-ni̍h ê hî, thiⁿ-ni̍h ê chiáu, kap tōe-chiūⁿ it-chhè só͘ tín-tāng ê oa̍h-mi̍h.

29上帝講，我有hō͘ lín遍地上一切結chí ê菜蔬，koh一切ê樹，其中有結子ê樹ê果子；lóng hō͘ lín做食物。Siōng-tè kóng, Góa ū hō͘ lín piàn tōe-chiūⁿ it-chhè kiat-chí ê chhài-soe, koh it-chhè ê chhiū, kî-tiong ū kiat-chí ê chhiū ê ké-chí; lóng hō͘ lín chòe chia̍h-mi̍h.

30論到地上一切ê走獸，天中一切ê鳥，kap地上一切會振動有活命ê物，我將一切青草hō͘ in做食物；就有án-ni。Lūn-kàu tōe-chiūⁿ it-chhè ê cháu-siù, thiⁿ-tiong it-chhè ê chiáu, kap tōe-chiūⁿ it-chhè ōe tín-tāng ū oa̍h-miā ê mi̍h, Góa chiong it-chhè chhiⁿ-chháu hō͘ in chòe chia̍h-mi̍h; chiū ū án-ni.

31上帝看伊一切所造ê，看ah，真好。有ê-hng有早起，是第六日。Siōng-tè khòaⁿ I it-chhè só͘ chō-ê, khòaⁿ ah, chin-hó. Ū ê-hng ū chá-khí, sī tē-la̍k ji̍t.

1天地kap祂一切所有ê已經做完。Thiⁿ tōe kap I it-chhè só͘-ū-ê í-keng chòe-oân.

2Tī第七日，上帝完祂所造ê工；就tī第七日歇祂一切所造ê工。Tī tē-chhit ji̍t, Siōng-tè oân I só͘ chō ê kang; chiū tī tē-chhit ji̍t hioh I it-chhè só͘ chō ê kang.

3上帝賜福tī第七日，定做聖日；因為tī chit日上帝停祂一切創造ê工，就安歇。Siōng-tè sù-hok tī tē-chhit ji̍t, tēng chòe sèng-ji̍t; in-ūi tī chit-ji̍t Siōng-tè thêng I it-chhè chhòng-chō ê kang, chiū an-hioh.

4天地創造ê來歷，tī耶和華上帝造地kap天ê日，親像下底。Thiⁿ tōe chhòng-chō ê lâi-le̍k, tī Iâ-hô-hoa Siōng-tè chō tōe kap thiⁿ ê ji̍t, chhin-chhiūⁿ ē-tóe.

5山野一切ê草木未有tī地裡；山野一切ê菜蔬未有發；因為耶和華上帝無落雨tī地裡，也無人thang種作hit-ê土地。Soaⁿ-iá it-chhè ê chháu-ba̍k bē ū tī tōe-ni̍h; soaⁿ-iá it-chhè ê chhài-soe bē ū hoat; in-ūi Iâ-hô-hoa Siōng-tè bô lo̍h-hō͘ tī tōe-ni̍h, iā bô lâng thang chèng-choh hit ê thó͘-tōe.

6總是有霧tùi地起，潤澤遍地面。Chóng-sī ū bū tùi tōe khí, lūn-te̍k piàn tōe-bīn.

7耶和華上帝用地上ê土粉chhiau做人，pûn活ê氣入伊ê鼻孔；人就成做活ê靈魂。Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn oa̍h ê khì ji̍p i ê phīⁿ-khang; lâng chiū chiâⁿ-chòe oa̍h ê lêng-hûn.

8耶和華上帝tī東方，tī伊甸，種一個園；將所造ê人hē tī-hia。Iâ-hô-hoa Siōng-tè tī tang-hng, tī Ai-tiân, chèng chi̍t ê hn̂g; chiong só͘ chō ê lâng hē tī-hia.

9耶和華上帝hō͘ ta̍k樣ê樹tùi地裡發起來，好看也好食；tī園ê中間koh有活命ê樹，kap分別好pháiⁿ ê樹。Iâ-hô-hoa Siōng-tè hō͘ ta̍k-iūⁿ ê chhiū tùi tōe-ni̍h hoat-khí-lâi, hó-khòaⁿ iā hó-chia̍h; tī hn̂g ê tiong-kan koh ū oa̍h-miā ê chhiū, kap hun-piat hó-pháiⁿ ê chhiū.

10伊甸有河流出來灌ak hit-ê園；tùi-hia分開做四條。Ai-tiân ū hô lâu-chhut lâi koàn-ak hit ê hn̂g; tùi-hia hun-khui chòe sì-tiâu.

11頭一條名叫Pí-sùn；就是se̍h流tī Hap-hui-la̍h全地ê；tī-hia有出金；Thâu-chi̍t-tiâu miâ-kiò Pí-sùn; chiū-sī se̍h-lâu tī Hap-hui-la̍h choân-tōe-ê; tī-hia ū chhut kim;

12hit位ê金是真好；亦出珍珠、碧玉。hit-ūi ê kim sī chin-hó; ia̍h chhut chin-chu phek-ge̍k.

13第二條名叫Ki-hùn，就是se̍h流tī Kó͘-si̍t全地ê。Tē-jī-tiâu miâ kiò Ki-hùn, chiū-sī se̍h-lâu tī Kó͘-si̍t choân-tōe-ê.

14第三條名叫Hi-tí-kiat，就是流tī亞述ê東勢ê。第四條就是Pek-lat。Tē-saⁿ-tiâu miâ-kiò Hi-tí-kiat, chiū-sī lâu tī A-su̍t ê tang-sì-ê. Tē-sì-tiâu chiū-sī Pek-lat.

15耶和華上帝將hit-ê人hē tī伊甸園，來種作顧守。Iâ-hô-hoa Siōng-tè chiong hit ê lâng hē tī Ai-tiân hn̂g, lâi chèng-choh kò͘-siú.

16耶和華上帝吩咐hit-ê人講，園內ta̍k號樹ê果子，thang隨意來食。Iâ-hô-hoa Siōng-tè hoan-hù hit ê lâng kóng, Hn̂g-lāi ta̍k-hō chhiū ê ké-chí, thang sûi-ì lâi chia̍h.

17總是分別好pháiⁿ ê樹，伊ê果子m̄-thang食；因為食ê日你的確死。Chóng-sī hun-piat hó-pháiⁿ ê chhiū, i ê ké-chí m̄-thang chia̍h; in-ūi chia̍h ê ji̍t lí tek-khak sí.

18耶和華上帝講，人單身家己tòa m̄好；我beh kā伊造一個幫贊ê，來匹配伊。Iâ-hô-hoa Siōng-tè kóng, Lâng toaⁿ-sin ka-kī tòa m̄-hó; Góa beh kā i chō chi̍t ê pang-chān-ê, lâi phit-phòe i.

19耶和華上帝用土做山野ta̍k樣ê走獸，以及空中ta̍k樣ê飛鳥；chhōa到hit人ê面前，看伊beh稱in甚麼名；見若伊所稱ta̍k樣活物ê，就做hit-ê物ê名。Iâ-hô-hoa Siōng-tè ēng thô͘ chòe soaⁿ-iá ta̍k-iūⁿ ê cháu-siù, í-ki̍p khong-tiong ta̍k-iūⁿ ê pe-chiáu; chhōa kàu hit-lâng ê bīn-chêng, khòaⁿ i beh chheng in sím-mi̍h miâ; kìⁿ-nā i só͘ chheng ta̍k-iūⁿ oa̍h-mi̍h-ê, chiū chòe hit ê mi̍h ê miâ.

20Hit-ê人就kā一切ê cheng-siⁿ，kap空中ê飛鳥，kap山野一切ê走獸lóng號名；總是chhē無一個thang做hit人ê幫贊，來匹配伊。Hit ê lâng chiū kā it-chhè ê cheng-siⁿ, kap khong-tiong ê pe-chiáu, kap soaⁿ-iá it-chhè ê cháu-siù lóng hō miâ; chóng-sī chhē bô chi̍t-ê thang chòe hit lâng ê pang-chān, lâi phit-phòe i.

21耶和華上帝hō͘ hit-ê人睏重眠，伊就睏；就the̍h伊ê hia̍p骨一支，包密伊ê肉。Iâ-hô-hoa Siōng-tè hō͘ hit ê lâng khùn tāng-bîn, i chiū khùn; chiū the̍h i ê hia̍p-kut chi̍t-ki, pau-ba̍t i ê bah.

22耶和華上帝就將tùi hit人所the̍h出ê hia̍p骨，造成一個cha-bó͘人，chhōa來就近hit人。Iâ-hô-hoa Siōng-tè chiū chiong tùi hit-lâng só͘ the̍h-chhut ê hia̍p-kut, chō-chiâⁿ chi̍t ê cha-bó͘-lâng, chhōa lâi chiū-kūn hit-lâng.

23Hit人講，Taⁿ chit-ê是我骨內ê骨，肉內ê肉；beh稱做cha-bó͘人，因為伊是tùi ta-po͘人the̍h出。Hit-lâng kóng, Taⁿ chit-ê sī góa kut-lāi ê kut, bah-lāi ê bah; beh chheng-chòe cha-bó͘-lâng, in-ūi i sī tùi ta-po͘-lâng the̍h-chhut.

24所以人beh離開伊ê父母，結聯伊ê bó͘，in就成做一體。Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chi̍t-thé.

25Ang-bó͘兩人平平thǹg-pak-theh，也無見笑。Ang-bó͘ nn̄g-lâng pîⁿ-pîⁿ thǹg-pak-theh, iā bô kiàn-siàu.

1耶和華上帝所造山野一切ê活物，蛇是比in khah狡譎。蛇tùi婦人人講，上帝kiám有影講，園內一切ê樹，lín lóng m̄-thang食mah？Iâ-hô-hoa Siōng-tè só͘ chō soaⁿ-iá it-chhè ê oa̍h-mi̍h, chôa sī pí in khah káu-khiat. Chôa tùi hū-jîn-lâng kóng, Siōng-tè kiám ū-iáⁿ kóng, Hn̂g-lāi it-chhè ê chhiū, lín lóng m̄-thang chia̍h mah?

2婦人人對蛇講，園內樹裡ê果子阮thang食；Hū-jîn-lâng tùi chôa kóng, Hn̂g-lāi chhiū-ni̍h ê ké-chí goán thang chia̍h;

3只有園中央hit叢樹ê果子上帝bat講，Lín m̄-thang食伊，亦m̄-thang摸，驚了會死。chí-ū hn̂g tiong-ng hit châng chhiū ê ké-chí Siōng-tè bat kóng, Lín m̄-thang chia̍h-i, ia̍h m̄-thang bong, kiaⁿ-liáu ōe sí.

4蛇對婦人人講，Lín無的確會死。Chôa tùi hū-jîn-lâng kóng, Lín bô tek-khak ōe sí.

5因為上帝知lín食ê日，lín ê目睭就會開，lín beh親像上帝，能分別好pháiⁿ。In-ūi Siōng-tè chai lín chia̍h ê ji̍t, lín ê ba̍k-chiu chiū ōe khui, lín beh chhin-chhiūⁿ Siōng-tè, ōe hun-piat hó-pháiⁿ.

6婦人人看hit叢樹，好食亦合(kah)目；koh hit叢樹是thang欣慕，hō͘人有智慧；就挽伊ê果子食伊，續hō͘伊ê丈夫，伊亦食伊。Hū-jîn-lâng khòaⁿ hit châng chhiū, hó-chia̍h ia̍h kah-ba̍k; koh hit châng chhiū sī thang him-bō͘, hō͘ lâng ū tì-hūi; chiū bán i ê ké-chí chia̍h i, sòa hō͘ i ê tiōng-hu, i ia̍h chia̍h i.

7In兩人ê目睭就開，chiah知in是thǹg-pak-theh；就pín無花果葉，為家己做裙。In nn̄g-lâng ê ba̍k-chiu chiū khui, chiah chai in sī thǹg-pak-theh; chiū pín bû-hoa-kó hio̍h, ūi ka-kī chòe kûn.

8日涼冷 ê時，耶和華上帝行遊tī園內；in聽見伊ê聲，hit人kap伊ê婦人人就bih tī園內ê樹中，來閃避耶和華上帝ê面。Ji̍t liâng-léng ê sî, Iâ-hô-hoa Siōng-tè kiâⁿ-iû tī hn̂g-lāi; in thiaⁿ-kìⁿ I ê siaⁿ, hit-lâng kap i ê hū-jîn-lâng chiū bih tī hn̂g-lāi ê chhiū-tiong, lâi siám-pī Iâ-hô-hoa Siōng-tè ê bīn.

9耶和華上帝叫hit人，對伊講，你tī tah-lo̍h？Iâ-hô-hoa Siōng-tè kiò hit-lâng, tùi i kóng, Lí tī tah-lo̍h?

10伊就講，我聽見你ê聲tī園內，我就驚，因為我thǹg-pak-theh；就家己bih。I chiū kóng, Góa thiaⁿ-kìⁿ Lí ê siaⁿ tī hn̂g-lāi, góa chiū kiaⁿ, in-ūi góa thǹg-pak-theh; chiū ka-kī bih.

11講，Chī-chūi kā你講，你thǹg-pak-theh？我吩咐你m̄-thang食hit叢樹，你食伊mah？Kóng, Chī-chūi kā lí kóng, lí thǹg-pak-theh? Góa hoan-hù lí m̄-thang chia̍h hit châng chhiū, lí chia̍h i mah?

12hit人講，你所hō͘我做伴ê婦人人，伊用hit叢樹ê果子hō͘我，我就食伊。Hit-lâng kóng, Lí só͘ hō͘ góa chòe-phōaⁿ ê hū-jîn-lâng, i ēng hit châng chhiū ê ké-chí hō͘ góa, góa chiū chia̍h i.

13耶和華上帝對婦人人講，你所做是甚麼事？婦人人講，蛇引誘我，我就食。Iâ-hô-hoa Siōng-tè tùi hū-jîn-lâng kóng, Lí só͘ chòe sī sím-mi̍h sū? Hū-jîn-lâng kóng, Chôa ín-iú góa, góa chiū chia̍h.

14耶和華上帝對蛇講，你已經做chit-ê，所以你受咒詛，比一切ê cheng-siⁿ，kap山野一切ê走獸，khah重；你beh用腹肚行，一生食土粉。Iâ-hô-hoa Siōng-tè tùi chôa kóng, Lí í-keng chòe chit-ê, só͘-í lí siū chiù-chó͘, pí it-chhè ê cheng-siⁿ, kap soaⁿ-iá it-chhè ê cháu-siù, khah-tāng; lí beh ēng pak-tó͘ kiâⁿ, it-seng chia̍h thô͘-hún.

15我beh hō͘你kap婦人人結冤仇，你ê後裔kap伊ê後裔亦結冤仇；伊beh傷你ê頭殼，你beh傷伊ê腳後tiⁿ。Góa beh hō͘ lí kap hū-jîn-lâng kiat oan-siû, lí ê hō͘-è kap i ê hō͘-è ia̍h kiat oan-siû; i beh siong lí ê thâu-khak, lí beh siong i ê kha-āu-tiⁿ.

16Koh對婦人人講，我的確大大加添你懷孕ê艱苦；你beh艱苦生kiáⁿ；你beh戀慕你ê丈夫，伊beh管轄你。Koh tùi hū-jîn-lâng kóng, Góa tek-khak tōa-tōa ke-thiⁿ lí hoâi-īn ê kan-khó͘; lí beh kan-khó͘ siⁿ-kiáⁿ; lí beh loân-bō͘ lí ê tiōng-hu, i beh koán-hat lí.

17也對亞當講，你已經聽thàn你ê婦人人ê話，來食我所吩咐你講，你m̄-thang食伊ê；所以土地因為你ê緣故受咒詛；你一世人勞苦，chiah tùi伊得tio̍h食。Iā tùi A-tong kóng, Lí í-keng thiaⁿ-thàn lí ê hū-jîn-lâng ê ōe, lâi chia̍h Góa só͘ hoan-hù lí kóng, Lí m̄-thang chia̍h-i ê; só͘-í thó͘-tōe in-ūi lí ê iân-kò͘ siū chiù-chó͘; lí chi̍t-sì-lâng lô-khó͘, chiah tùi i tit-tio̍h chia̍h.

18土地beh為tio̍h你發刺phè kap蒺藜；你也beh食園裡ê菜蔬。Thó͘-tōe beh ūi-tio̍h lí hoat chhì-phè kap che̍k-lê; lí iā beh chia̍h hn̂g-ni̍h ê chhài-soe.

19你beh汗流滿面chiah thang得tio̍h食，到你歸土；因為你是tùi土the̍h出來；你本是土粉，也beh歸tī土粉。Lí beh kōaⁿ-lâu móa-bīn chiah thang tit-tio̍h chia̍h, kàu lí kui thó͘; in-ūi lí sī tùi thô͘ the̍h-chhut-lâi; lí pún sī thô͘-hún, iā beh kui tī thô͘-hún.

20hit人kā伊ê bó͘號名，叫夏娃；因為伊做眾人ê老母。Hit-lâng kā i ê bó͘ hō miâ, kiò Hā-oa; in-ūi i chòe chèng-lâng ê lāu-bú.

21耶和華上帝為tio̍h hit人kap伊ê bó͘用皮做衣服，hō͘ in穿。Iâ-hô-hoa Siōng-tè ūi-tio̍h hit-lâng kap i ê bó͘ ēng phê chòe i-ho̍k, hō͘ in chhēng.

22耶和華上帝講，看ah，chit人已經kap咱相親像，能分別好pháiⁿ；taⁿ驚了伊伸手koh tùi活命樹挽，來食，就活到永遠；Iâ-hô-hoa Siōng-tè kóng, Khòaⁿ ah, chit-lâng í-keng kap lán saⁿ chhin-chhiūⁿ, ōe hun-piat hó-pháiⁿ; taⁿ kiaⁿ-liáu i chhun-chhiú koh tùi oa̍h-miā chhiū bán, lâi chia̍h, chiū oa̍h kàu éng-oán;

23所以耶和華上帝kah伊出伊甸園，來種作hit-ê土，就是伊所tùi伊出ê。só͘-í Iâ-hô-hoa Siōng-tè kah i chhut Ai-tiân hn̂g, lâi chèng-choh hit ê thô͘, chiū-sī i só͘ tùi i chhut ê.

24所以趕hit-ê人出；也tī伊甸園ê東勢安置Ki-lō͘兵kap四面轉旋發火燄ê劍，來防守活命樹ê路。Só͘-í kóaⁿ hit ê lâng chhut; iā tī Ai-tiân hn̂g ê tang-sì an-tì Ki-lō͘-peng kap sì-bīn tńg-se̍h hoat hé-iām ê kiàm, lâi hông-siú oa̍h-miā chhiū ê lō͘.