1日暗，hit兩個使者到所多瑪；羅得坐tī所多瑪城門裡；羅得看見in，就起來迎接in；鞠躬面ǹg地，Ji̍t-àm, hit nn̄g ê sù-chiá kàu Só͘-to-má; Lô-tek chē tī Só͘-to-má siâⁿ-mn̂g-ni̍h; Lô-tek khòaⁿ-kìⁿ in, chiū khí-lâi ngiâ-chih in; kiok-kiong bīn ǹg tōe,

2講，我ê主ah，請oa̍t來奴僕ê厝歇暝洗腳，明á早起起來，行lín ê路。In講，m̄免；阮beh tī大街面過暝。kóng, Góa ê chú ah, chhiáⁿ oa̍t lâi lô͘-po̍k ê chhù hioh-mî, sóe-kha; bîn-á-chá-khí khí-lâi, kiâⁿ lín ê lō͘. In kóng, M̄-bián; goán beh tī tōa koe-bīn kè-mî.

3羅得切切請in；in chiah oa̍t-tńg腳，oat入伊ê厝；羅得為in備辦筵席，pek無酵餅；in就食。Lô-tek chhiat-chhiat chhiáⁿ in; in chiah oa̍t-tńg-kha, oat-ji̍p i ê chhù; Lô-tek ūi in pī-pān iân-sia̍h, pek bû-kàⁿ-piáⁿ; in chiū chia̍h.

4Iniáu未去睏，城內ê人，就是所多瑪人，tùi少年到老，四面來圍伊ê厝；In iáu-bē khì khùn, siâⁿ-lāi ê lâng, chiū-sī Só͘-to-má lâng, tùi siàu-liân kàu lāu, sì-bīn lâi ûi i ê chhù;

5叫羅得講，今暗到你chia ê人tī tah-lo̍h？hō͘ in出來，照阮所ài做。kiò Lô-tek kóng, Kin-àm kàu lí chia ê lâng tī tah-lo̍h? hō͘ in chhut-lâi, chiàu goán só͘ ài chòe.

6羅得出去到門外眾人hia，就將門關teh；Lô-tek chhut-khì kàu mn̂g-gōa, chèng-lâng hia, chiū chiong mn̂g koaiⁿ-teh;

7講，兄弟ah，請lín莫得做chit號pháiⁿ；kóng, Hiaⁿ-tī ah, chhiáⁿ lín bo̍h-tit chòe chit-hō pháiⁿ;

8你看，我有兩個cha-bó͘-kiáⁿ，iáu是在室女；容允我chhōa出來，chhut-chāi lín所ài來行；獨獨chit兩人，已經到我ê厝，m̄-thang對in做甚麼。lí khòaⁿ, góa ū nn̄g ê cha-bó͘-kiáⁿ, iáu sī chāi-sek-lú; iông-ún góa chhōa-chhut-lâi, chhut-chāi lín só͘ ài lâi kiâⁿ; to̍k-to̍k chit nn̄g-lâng, í-keng kàu góa ê chhù, m̄-thang tùi in chòe sím-mi̍h.

9眾人講，你退去。Koh講，Chit人寄居tī-chia，續beh管轄阮mah？taⁿ阮beh害你比害in khah傷重。就oe-khoeh羅得，進前beh攻破伊ê門。Chèng-lâng kóng, Lí thè-khì. Koh kóng, Chit-lâng kià-ku tī-chia, sòa beh koán-hat goán mah? taⁿ goán beh hāi lí pí hāi in khah siong-tiōng. Chiū oe-khoeh Lô-tek, chìn-chêng beh kong-phòa i ê mn̂g.

10總是hit兩人伸手，牽羅得入厝，將門關去。Chóng-sī hit nn̄g-lâng chhun-chhiú, khan Lô-tek ji̍p chhù, chiong mn̂g koaiⁿ-khì.

11Koh hō͘門外ê人，tùi細到大，目睭ian-n̄g，lóng bōe看見；chhē到倦chhē無門。Koh hō͘ mn̂g-gōa ê lâng, tùi sòe kàu tōa, ba̍k-chiu ian-n̄g, lóng bōe khòaⁿ-kìⁿ; chhē kàu siān chhē bô mn̂g.

12Hit兩人對羅得講，你tī-chia iáu有甚麼人？或是kiáⁿ婿，或是kiáⁿ，或是cha-bó͘-kiáⁿ，以及城內一切屬你ê人；你tio̍h hō͘ in lóng出chit所在。Hit nn̄g-lâng tùi Lô-tek kóng, Lí tī-chia iáu ū sím-mi̍h lâng? he̍k-sī kiáⁿ-sài, he̍k-sī kiáⁿ, he̍k-sī cha-bó͘-kiáⁿ, í-ki̍p siâⁿ-lāi it-chhè sio̍k lí ê lâng; lí tio̍h hō͘ in lóng chhut chit só͘-chāi.

13因為阮beh剿滅chit-ê所在，是為tio̍h in hoah-hiàm ê聲tī耶和華ê面前真大；耶和華差阮來beh剿滅伊。In-ūi goán beh châu-bia̍t chit ê só͘-chāi, sī ūi-tio̍h in hoah-hiàm ê siaⁿ tī Iâ-hô-hoa ê bīn-chêng chin-tōa; Iâ-hô-hoa chhe goán lâi beh châu-bia̍t-i.

14羅得出去，對娶伊ê cha-bó͘-kiáⁿ ê kiáⁿ婿講，Lín起來，離開chia；因為耶和華beh滅無chit-ê城；伊ê kiáⁿ婿掠做伊是講笑。Lô-tek chhut-khì, tùi chhōa i ê cha-bó͘-kiáⁿ ê kiáⁿ-sài kóng, Lín khí-lâi, lī-khui chia; in-ūi Iâ-hô-hoa beh bia̍t-bô chit ê siâⁿ; i ê kiáⁿ-sài lia̍h-chòe i sī kóng-chhiò.

15天光使者催逼羅得講，起來，chhōa你ê bó͘，以及你tī-chia兩個cha-bó͘-kiáⁿ去；驚了kap chit-ê城ê罪惡相kap受滅無。Thiⁿ-kng sù-chiá chhui-pek Lô-tek kóng, Khí-lâi, chhōa lí ê bó͘, í-ki̍p lí tī-chia nn̄g ê cha-bó͘-kiáⁿ khì; kiaⁿ-liáu kap chit ê siâⁿ ê chōe-ok saⁿ-kap siū bia̍t-bô.

16羅得延chhiân；hit兩人，因為耶和華憐憫羅得，就牽伊ê手，kap伊ê bó͘ ê手，kap伊兩個cha-bó͘-kiáⁿ ê手，將伊chhōa出，安置tī城外。Lô-tek iân-chhiân; hit nn̄g-lâng, in-ūi Iâ-hô-hoa lîn-bín Lô-tek, chiū khan i ê chhiú, kap i ê bó͘ ê chhiú, kap i nn̄g ê cha-bó͘-kiáⁿ ê chhiú, chiong i chhōa-chhut, an-tì tī siâⁿ-gōa.

17Chhōa in出去了，講，你tio̍h逃命，m̄-thang oa̍t頭看，亦m̄-thang tòa tī平洋；tio̍h走去山裡，驚了受滅無。Chhōa in chhut-khì liáu, kóng, Lí tio̍h tô-miā, m̄-thang oa̍t-thâu khòaⁿ, ia̍h m̄-thang tòa tī Pîⁿ-iûⁿ; tio̍h cháu-khì soaⁿ-ni̍h, kiaⁿ-liáu siū bia̍t-bô.

18羅得對in講，我ê主ah，m̄-thang án-ni。Lô-tek tùi in kóng, Góa ê Chú ah, m̄-thang án-ni.

19你看，你ê奴僕已經得tio̍h恩典tī你ê面前，你亦對我顯出極大ê仁慈，救我ê性命；我bōe會走到山裡，驚了chit-ê災禍到tī我，我就死。Lí khòaⁿ, lí ê lô͘-po̍k í-keng tit-tio̍h un-tián tī lí ê bīn-chêng, lí ia̍h tùi góa hián-chhut ke̍k-tōa ê jîn-chû, kiù góa ê sìⁿ-miā; góa bōe-ōe cháu kàu soaⁿ-ni̍h, kiaⁿ-liáu chit ê chai-ē kàu tī góa, góa chiū sí.

20你看，chit-ê城近近thang逃走，亦是細；請容允我逃閃tī-hia，來保全我ê活命；chit-ê城kiám m̄是細ê mah？Lí khòaⁿ, chit ê siâⁿ kūn-kūn thang tô-cháu, ia̍h sī sòe; chhiáⁿ iông-ún góa tô-siám tī-hia, lâi pó-choân góa ê oa̍h-miā; chit ê siâⁿ kiám m̄-sī sòe-ê mah?

21伊對伊講，Chit-ê tāi-chì，我亦允准你；你所講ê城，我無beh chhia倒。I tùi i kóng, Chit ê tāi-chì, góa ia̍h ún-chún lí; lí só͘ kóng ê siâⁿ, góa bô beh chhia-tó.

22你tio̍h緊緊走去hia；因為你iáu未到hia，我bōe會做甚麼。因為án-ni hit-ê城名叫Só-jíⁿ。Lí tio̍h kín-kín cháu-khì hia; in-ūi lí iáu-bē kàu hia, góa bōe-ōe chòe sím-mi̍h. In-ūi án-ni hit ê siâⁿ miâ-kiò Só-jíⁿ.

23羅得到Só-jíⁿ，日已經出。Lô-tek kàu Só-jíⁿ, ji̍t í-keng chhut.

24Hit時耶和華將琉磺kap火，tùi天頂，tùi耶和華hia，降落tī所多瑪kap蛾摩拉。Hit sî Iâ-hô-hoa chiong jiû-n̂g kap hé, tùi thiⁿ-téng, tùi Iâ-hô-hoa hia, kàng-lo̍h tī Só͘-to-má kap Gô-mô͘-la̍h.

25將hiah-ê城，以及全平洋，kap城內所有ê百姓，連地面上生長ê，lóng毀壞。Chiong hiah ê siâⁿ, í-ki̍p choân pîⁿ-iûⁿ, kap siâⁿ-lāi só͘-ū ê peh-sìⁿ, liân tōe-bīn-chiūⁿ seng-tióng-ê, lóng húi-hoāi.

26羅得ê bó͘ tī後面，一下oa̍t頭看，就變做一支鹽柱。Lô-tek ê bó͘ tī āu-bīn, chi̍t-ē oa̍t-thâu khòaⁿ, chiū pìⁿ-chòe chi̍t ki iâm-thiāu.

27亞伯拉罕透早起來，到伊前日khiā tī耶和華面前hit位；A-pek-la̍h-hán thàu-chá khí-lâi, kàu i chêng-ji̍t khiā tī Iâ-hô-hoa bīn-chêng hit-ūi;

28ǹg所多瑪、蛾摩拉，kap平洋ê全地來看；看見hit所在火煙chhèng高，親像火爐ê煙。ǹg Só͘-to-má Gô-mô͘-la̍h, kap Pîⁿ-iûⁿ ê choân-tōe lâi khòaⁿ; khòaⁿ-kìⁿ hit só͘-chāi hé-ian chhèng-koâiⁿ, chhin-chhiūⁿ hé-lô͘ ê ian.

29當上帝剿滅平洋chiah-ê城ê時，上帝siàu念亞伯拉罕；tú-tú tī chhia倒羅得所khiā起ê城ê時，就kah羅得tùi chhia倒ê中間出去。Tng Siōng-tè châu-bia̍t Pîⁿ-iûⁿ chiah ê siâⁿ ê sî, Siōng-tè siàu-liām A-pek-la̍h-hán; tú-tú tī chhia-tó Lô-tek só͘ khiā-khí ê siâⁿ ê sî, chiū kah Lô-tek tùi chhia-tó ê tiong-kan chhut-khì.

30羅得tiàm-tī Só-jíⁿ驚惶；就kap伊兩個cha-bó͘-kiáⁿ tùi Só-jíⁿ上去tiàm-tī山裡；伊kap兩個cha-bó͘-kiáⁿ tiàm-tī一個洞內。Lô-tek tiàm tī Só-jíⁿ kiaⁿ-hiâⁿ; chiū kap i nn̄g ê cha-bó͘-kiáⁿ tùi Só-jíⁿ chiūⁿ-khì tiàm tī soaⁿ-ni̍h; i kap nn̄g ê cha-bó͘-kiáⁿ tiàm tī chi̍t ê tōng-lāi.

31大cha-bó͘-kiáⁿ 對細cha-bó͘-kiáⁿ講，咱ê老父老lah，地上koh無人kap咱做匹配，來照人道。Tōa cha-bó͘-kiáⁿ tùi sòe cha-bó͘-kiáⁿ kóng, Lán ê lāu-pē lāu-lah, tōe-chiūⁿ koh bô lâng kap lán chòe phit-phòe, lâi chiàu jîn-tō.

32來lah，thang hō͘老父lim酒，kap伊相kap睏；án-ni咱好thang tùi伊留存後裔。Lâi-lah, thang hō͘ lāu-pē lim chiú, kap i saⁿ-kap khùn; án-ni lán hó thang tùi i liû-chûn hō͘-è.

33Hit暝in hō͘老父lim酒；大cha-bó͘-kiáⁿ就入去kap老父相kap睏；伊甚麼時去睏，甚麼時起來，老父lóng m̄知。Hit-mî in hō͘ lāu-pē lim chiú; tōa cha-bó͘-kiáⁿ chiū ji̍p-khì kap lāu-pē saⁿ-kap khùn; i sím-mi̍h sî khì khùn, sím-mi̍h sî khí-lâi, lāu-pē lóng m̄-chai.

34過日大cha-bó͘-kiáⁿ kā細cha-bó͘-kiáⁿ講，我昨暝kap老父相kap睏；今暗咱koh hō͘伊lim酒，你thang入去kap伊相kap睏。Án-ni，咱好thang tùi老父留存後裔。Kè-ji̍t tōa cha-bó͘-kiáⁿ kā sòe cha-bó͘-kiáⁿ kóng, Góa chā-mî kap lāu-pē saⁿ-kap khùn; kin-àm lán koh hō͘ i lim chiú, lí thang ji̍p-khì kap i saⁿ-kap khùn. Án-ni, lán hó thang tùi lāu-pē liû-chûn hō͘-è.

35Hit暝in koh hō͘老父lim酒，細cha-bó͘-kiáⁿ起來去kap伊睏；伊甚麼時去睏，甚麼時起來，老父亦lóng m̄知。Hit-mî in koh hō͘ lāu-pē lim chiú, sòe cha-bó͘-kiáⁿ khí-lâi khì kap i khùn; i sím-mi̍h sî khì khùn, sím-mi̍h sî khí-lâi, lāu-pē ia̍h lóng m̄-chai.

36Án-ni羅得兩個cha-bó͘-kiáⁿ lóng tùi in老父來懷孕。Án-ni Lô-tek nn̄g ê cha-bó͘-kiáⁿ lóng tùi in lāu-pē lâi hoâi-īn.

37大ê生kiáⁿ，叫伊ê名Mô͘-ap，就是現今Mô͘-ap人ê祖。Tōa-ê siⁿ kiáⁿ, kiò i ê miâ Mô͘-ap, chiū-sī hiān-kim Mô͘-ap lâng ê chó͘.

38細ê亦生kiáⁿ，叫伊ê名Piān-á-bí，就是現今A-bûn人ê祖。Sòe-ê ia̍h siⁿ-kiáⁿ, kiò i ê miâ Piān-á-bí, chiū-sī hiān-kim A-bûn lâng ê chó͘.

1亞伯拉罕tùi-hia暫暫ǹg南方徙去；tòa tī Ka-te-su kap Su-jíⁿ ê中間，寄居tī Ki-la̍h-jíⁿ。A-pek-la̍h-hán tùi-hia chām-chām ǹg lâm-hng sóa-khì; tòa tī Ka-te-su kap Su-jíⁿ ê tiong-kan, kià-ku tī Ki-la̍h-jíⁿ.

2亞伯拉罕講到伊ê bó͘撒拉，就講，是我ê小妹；Ki-la̍h-jíⁿ王A-pí-bí-le̍k差人將撒拉chhōa去。A-pek-la̍h-hán kóng kàu i ê bó͘ Sat-la̍h, chiū kóng, Sī góa ê sió-bē; Ki-la̍h-jíⁿ ông A-pí-bí-le̍k chhe lâng chiong Sat-la̍h chhōa-khì.

3暝時，眠夢中，上帝來kā A-pí-bí-le̍k講，你是該死ê人，因為你所chhōa hit-ê婦人人是人ê bó͘。Mî-sî, bîn-bāng-tiong, Siōng-tè lâi kā A-pí-bí-le̍k kóng, Lí sī kai sí ê lâng, in-ūi lí só͘ chhōa hit ê hū-jîn-lâng sī lâng ê bó͘.

4A-pí-bí-le̍k iáu未親近伊，就講，主ah，行義ê百姓，你亦beh滅伊mah？A-pí-bí-le̍k iáu-bē chhin-kūn i, chiū kóng, Chú ah, kiâⁿ-gī ê peh-sìⁿ, Lí ia̍h beh bia̍t i mah?

5Hit人kiám m̄是本身對我講，伊是我ê小妹mah？就婦人人亦本身講，伊是我ê兄；我做chit-ê事，是心端正，手清氣。Hit-lâng kiám m̄-sī pún-sin tùi góa kóng, I sī góa ê sió-bē mah? Chiū hū-jîn-lâng ia̍h pún-sin kóng, I sī góa ê hiaⁿ; góa chòe chit ê sū, sī sim toan-chèng, chhiú chheng-khì.

6上帝tī夢中對伊講，我本知你做chit-ê事，是心中端正；我chiah阻擋你，免得你得罪我；所以我無容允你摸tio̍h伊。Siōng-tè tī bāng-tiong tùi i kóng, Góa pún chai lí chòe chit ê sū, sī sim-tiong toan-chèng; Góa chiah chó͘-tòng lí, bián-tit lí tek-chōe Góa; só͘-í Góa bô iông-ún lí bong-tio̍h i.

7Taⁿ你tio̍h將chit人ê bó͘還伊，因為伊是先知；伊beh替你祈禱，你chiah會活；你若m̄還伊，你tio̍h知，你kap你所有ê人lóng得beh死。Taⁿ lí tio̍h chiong chit lâng ê bó͘ hêng-i, in-ūi i sī sian-ti; i beh thòe lí kî-tó, lí chiah ōe oa̍h; lí nā m̄ hêng-i, lí tio̍h chai, lí kap lí só͘ ū ê lâng lóng tit-beh sí.

8A-pí-bí-le̍k透早起來，叫眾奴僕來，將chiah-ê tāi-chì lóng講hō͘ in聽；hiah-ê人lóng真驚。A-pí-bí-le̍k thàu-chá khí-lâi, kiò chèng lô͘-po̍k lâi, chiong chiah ê tāi-chì lóng kóng hō͘ in thiaⁿ; hiah ê lâng lóng chin kiaⁿ.

9A-pí-bí-le̍k叫亞伯拉罕來，對伊講，你對阮所行ê是甚麼事？我有甚麼得罪你，你竟然hō͘我kap我國內ê人陷落重罪？你對我行m̄應該行ê事。A-pí-bí-le̍k kiò A-pek-la̍h-hán lâi, tùi i kóng, Lí tùi goán só͘ kiâⁿ-ê sī sím-mi̍h sū? góa ū sím-mi̍h tek-chōe lí, lí kéng-jiân hō͘ góa kap góa kok-lāi ê lâng hām-lo̍h tāng-chōe? lí tùi góa kiâⁿ m̄ eng-kai kiâⁿ ê sū.

10A-pí-bí-le̍k koh對亞伯拉罕講，你看見甚麼，chiah做chit-ê事？A-pí-bí-le̍k koh tùi A-pek-la̍h-hán kóng, Lí khòaⁿ-kìⁿ sím-mi̍h, chiah chòe chit ê sū?

11亞伯拉罕講，我phah算chit所在ê人lóng無驚上帝；in beh為tio̍h我ê bó͘ ê緣故thâi死我。A-pek-la̍h-hán kóng, Góa phah-sǹg chit só͘-chāi ê lâng lóng bô kiaⁿ Siōng-tè; in beh ūi-tio̍h góa ê bó͘ ê iân-kò͘ thâi-sí góa.

12Koh伊亦實在是我ê小妹，siâng父koh母，後來做我ê bó͘。Koh i ia̍h si̍t-chāi sī góa ê sió-bē, siâng-pē koh-bú, āu-lâi chòe góa ê bó͘.

13當上帝kah我離開老父ê家，四界行ê時，我kā伊講，將來咱所到ê所在，請你稱我講，伊是我ê兄；這就是你款待我ê恩。Tng Siōng-tè kah góa lī-khui lāu-pē ê ke, sì-kòe kiâⁿ ê sî, góa kā i kóng, chiong-lâi lán só͘ kàu ê só͘-chāi, chhiáⁿ lí chheng góa kóng, I sī góa ê hiaⁿ; che chiū-sī lí khoán-thāi góa ê un.

14A-pí-bí-le̍k將羊、牛、奴僕、女婢，hō͘亞伯拉罕；koh將伊ê bó͘撒拉還伊。A-pí-bí-le̍k chiong iûⁿ, gû, lô͘-po̍k, lú-pī, hō͘ A-pek-la̍h-hán; koh chiong i ê bó͘ Sat-la̍h hêng-i.

15A-pí-bí-le̍k koh講，你看，我ê地lóng tī你ê面前，你thang隨意khiā起。A-pí-bí-le̍k koh kóng, Lí khòaⁿ, góa ê tōe lóng tī lí ê bīn-chêng, lí thang sûi-ì khiā-khí.

16Koh kā撒拉講，我hō͘你ê兄一千銀，kā你對全家做遮目睭ê；taⁿ你tī一切lóng無不是。Koh kā Sat-la̍h kóng, Góa hō͘ lí ê hiaⁿ chi̍t chheng gûn, kā lí tùi choân-ke chòe jia ba̍k-chiu-ê; taⁿ lí tī it-chhè lóng bô put-sī.

17亞伯拉罕祈禱上帝；上帝就醫好A-pí-bí-le̍k kap伊ê bó͘ kap女婢，in就能生kiáⁿ。A-pek-la̍h-hán kî-tó Siōng-tè; Siōng-tè chiū i-hó A-pí-bí-le̍k kap i ê bó͘ kap lú-pī, in chiū ōe siⁿ kiáⁿ.

18因為耶和華為tio̍h亞伯拉罕ê bó͘撒拉ê緣故，已經hō͘ A-pí-bí-le̍k家內ê婦人人bōe會生kiáⁿ。In-ūi Iâ-hô-hoa ūi-tio̍h A-pek-la̍h-hán ê bó͘ Sat-la̍h ê iân-kò͘, í-keng hō͘ A-pí-bí-le̍k ke-lāi ê hū-jîn-lâng bōe-ōe siⁿ-kiáⁿ.

1耶和華照伊前ê話眷顧撒拉；tùi án-ni耶和華照伊所講ê kā撒拉做成。Iâ-hô-hoa chiàu I chêng ê ōe koàn-kò͘ Sat-la̍h; tùi án-ni Iâ-hô-hoa chiàu I só͘ kóng-ê kā Sat-la̍h chòe-chiâⁿ.

2亞伯拉罕年老ê時，撒拉懷孕；到上帝對伊講ê日期，就kā伊生一個kiáⁿ。A-pek-la̍h-hán nî-lāu ê sî, Sat-la̍h hoâi-īn; kàu Siōng-tè tùi i kóng ê ji̍t-kî, chiū kā i siⁿ chi̍t ê kiáⁿ.

3亞伯拉罕kā撒拉所生ê kiáⁿ，號名叫以撒。A-pek-la̍h-hán kā Sat-la̍h só͘ siⁿ ê kiáⁿ, hō miâ kiò Í-sat.

4以撒出世八日，亞伯拉罕照上帝所吩咐ê，kā伊ê kiáⁿ行割禮。Í-sat chhut-sì poeh-ji̍t, A-pek-la̍h-hán chiàu Siōng-tè só͘ hoan-hù-ê, kā i ê kiáⁿ kiâⁿ kat-lé.

5伊ê kiáⁿ以撒出世ê時，亞伯拉罕一百歲。I ê kiáⁿ Í-sat chhut-sì ê sî, A-pek-la̍h-hán chi̍t-pah hè.

6撒拉講，上帝hō͘我歡喜笑；見若聽見ê，beh kap我同歡喜笑。Sat-la̍h kóng, Siōng-tè hō͘ góa hoaⁿ-hí chhiò; kìⁿ-nā thiaⁿ-kìⁿ-ê, beh kap góa tâng hoaⁿ-hí chhiò.

7Koh講，Chī-chūi能事先kā亞伯拉罕講，撒拉beh hō͘嬰á suh奶？因為tī伊年老ê時，我kā伊生一個kiáⁿ。Koh kóng, Chī-chūi ōe tāi-seng kā A-pek-la̍h-hán kóng, Sat-la̍h beh hō͘ eⁿ-á suh-leng? in-ūi tī i nî-lāu ê sî, góa kā i siⁿ chi̍t ê kiáⁿ.

8Gín-á漸漸大，就斷奶；以撒斷奶ê日，亞伯拉罕排設大筵席。Gín-á chiām-chiām tōa, chiū tn̄g-leng; Í-sat tn̄g-leng ê ji̍t, A-pek-la̍h-hán pâi-siat tōa iân-sia̍h.

9當時埃及人夏甲kā亞伯拉罕所生ê kiáⁿ teh冷笑，hō͘撒拉看見；Tng-sî Ai-ki̍p lâng Hā-kah kā A-pek-la̍h-hán só͘ siⁿ ê kiáⁿ teh léng-chhiò, hō͘ Sat-la̍h khòaⁿ-kìⁿ;

10就對亞伯拉罕講，Tio̍h趕出chit-ê女婢kap伊ê kiáⁿ；因為女婢ê kiáⁿ bōe-thang kap我ê kiáⁿ以撒同做後嗣。chiū tùi A-pek-la̍h-hán kóng, Tio̍h kóaⁿ-chhut chit ê lú-pī kap i ê kiáⁿ; in-ūi lú-pī ê kiáⁿ bōe-thang kap góa ê kiáⁿ Í-sat tâng chòe hō͘-sû.

11亞伯拉罕因為伊ê kiáⁿ ê緣故不止憂悶。A-pek-la̍h-hán in-ūi i ê kiáⁿ ê iân-kò͘ put-chí iu-būn.

12上帝kā亞伯拉罕講，你m̄-thang為tio̍h chit-ê gín-á以及你ê女婢憂悶；見若撒拉對你講ê，你lóng tio̍h聽；因為tùi以撒生ê，chiah beh稱做你ê後裔。Siōng-tè kā A-pek-la̍h-hán kóng, Lí m̄-thang ūi-tio̍h chit ê gín-á í-ki̍p lí ê lú-pī iu-būn; kìⁿ-nā Sat-la̍h tùi lí kóng ê, lí lóng tio̍h thiaⁿ; in-ūi tùi Í-sat siⁿ-ê, chiah beh chheng-chòe lí ê hō͘-è.

13論到女婢ê kiáⁿ，我亦beh hō͘伊成做一國，因為伊亦是你生ê。Lūn-kàu lú-pī ê kiáⁿ, Góa ia̍h beh hō͘ i chiâⁿ-chòe chi̍t-kok, in-ūi i ia̍h sī lí siⁿ-ê.

14亞伯拉罕早早起來，the̍h餅kap一皮袋ê水hō͘夏甲；hē tī伊ê肩頭頂；連gín-á續kah伊去；伊就去，到別是巴ê曠野就行無路。A-pek-la̍h-hán chá-chá khí-lâi, the̍h piáⁿ kap chi̍t phê-tē ê chúi hō͘ Hā-kah; hē tī i ê keng-thâu-téng; liân gín-á sòa kah i khì; i chiū khì, kàu Pia̍t-sī-pa ê khòng-iá chiū kiâⁿ bô lō͘.

15皮袋內ê水用了，夏甲就將gín-á放tī細叢樹腳。Phê-tē lāi ê chúi ēng-liáu, Hā-kah chiū chiong gín-á pàng tī sòe châng chhiū kha.

16本身行開，約略射(cho̍h)一支箭ê遠，相對面teh坐；講，我不忍看gín-á死；就相對面坐，出聲大啼哭。Pún-sin kiâⁿ-khui, iok-lio̍k cho̍h chi̍t ki chìⁿ ê hn̄g, saⁿ-tùi-bīn teh chē; kóng, Góa put-jím khòaⁿ gín-á sí; chiū saⁿ-tùi-bīn chē, chhut-siaⁿ tōa thî-khàu.

17上帝聽見gín-á ê聲；上帝ê使者tùi天裡叫夏甲講，夏甲，你有甚麼tāi-chì？m̄免驚；上帝已經聽見gín-á tī-hia ê聲。Siōng-tè thiaⁿ-kìⁿ gín-á ê siaⁿ; Siōng-tè ê sù-chiá tùi thiⁿ-ni̍h kiò Hā-kah kóng, Hā-kah, lí ū sím-mi̍h tāi-chì? m̄-bián kiaⁿ; Siōng-tè í-keng thiaⁿ-kìⁿ gín-á tī-hia ê siaⁿ.

18起來，亦hō͘ gín-á起來，牽tī你ê手；我beh hō͘伊成做大國。Khí-lâi, ia̍h hō͘ gín-á khí-lâi, khan tī lí ê chhiú; Góa beh hō͘ i chiâⁿ-chòe tōa-kok.

19上帝開伊ê目睭，伊就看見水井；就將皮袋去入水到滿滿，續hō͘ gín-á lim。Siōng-tè khui i ê ba̍k-chiu, i chiū khòaⁿ-kìⁿ chúi-chíⁿ; chiū chiong phê-tē khì ji̍p-chúi kàu móa-móa, sòa hō͘ gín-á lim.

20上帝kap gín-á tī-teh，伊就漸漸大；tiàm-tī曠野，成做射箭ê人。Siōng-tè kap gín-á tī-teh, i chiū chiām-chiām tōa; tiàm tī khòng-iá, chiâⁿ-chòe siā-chìⁿ ê lâng.

21伊khiā起tī Pa-lân ê曠野；伊ê老母tùi埃及地kā伊chhōa一個bó͘。I khiā-khí tī Pa-lân ê khòng-iá; i ê lāu-bú tùi Ai-ki̍p tōe kā i chhōa chi̍t ê bó͘.

22當hit時A-pí-bí-le̍k，kap伊ê軍長Hui-kok，對亞伯拉罕講，見若你所行ê事，上帝kap你tī-teh。Tng hit-sî A-pí-bí-le̍k, kap i ê kun-tiúⁿ Hui-kok, tùi A-pek-la̍h-hán kóng, Kìⁿ-nā lí só͘ kiâⁿ ê sū, Siōng-tè kap lí tī-teh.

23Taⁿ你tī-chia tio̍h kí上帝kap我chiù-chōa，m̄-thang欺負我，kap我ê kiáⁿ，以及我ê孫；我àn怎樣好款待你，你亦tio̍h照án-ni款待我，以及你所寄居ê地方。Taⁿ lí tī-chia tio̍h kí Siōng-tè kap góa chiù-chōa, m̄-thang khi-hū góa, kap góa ê kiáⁿ, í-ki̍p góa ê sun; góa àn-cháiⁿ-iūⁿ hó khoán-thāi lí, lí ia̍h tio̍h chiàu án-ni khoán-thāi góa, í-ki̍p lí só͘ kià-ku ê tōe-hng.

24亞伯拉罕講，我beh chiù-chōa。A-pek-la̍h-hán kóng, Góa beh chiù-chōa.

25前A-pí-bí-le̍k ê奴僕霸佔一口水井，亞伯拉罕為chit-ê事嫌A-pí-bí-le̍k。Chêng A-pí-bí-le̍k ê lô͘-po̍k pà-chiàm chi̍t kháu chúi-chíⁿ, A-pek-la̍h-hán ūi chit ê sū hiâm A-pí-bí-le̍k.

26A-pí-bí-le̍k講，Chī-chūi做chit-ê tāi-chì，我m̄知；你亦未有kā我講，到今á日我chiah聽見。A-pí-bí-le̍k kóng, Chī-chūi chòe chit ê tāi-chì, góa m̄-chai; lí ia̍h bē ū kā góa kóng, kàu kin-á-ji̍t góa chiah thiaⁿ-kìⁿ.

27亞伯拉罕將羊kap牛hō͘ A-pí-bí-le̍k；兩人就相kap立約。A-pek-la̍h-hán chiong iûⁿ kap gû hō͘ A-pí-bí-le̍k; nn̄g-lâng chiū saⁿ-kap li̍p-iok.

28亞伯拉罕將七隻母ê羊羔另外放tī一所在。A-pek-la̍h-hán chiong chhit chiah bú ê iûⁿ-ko lēng-gōa pàng tī chi̍t só͘-chāi.

29A-pí-bí-le̍k問亞伯拉罕講，你將七隻母ê羊羔另外放tī一所在，是甚麼意思？A-pí-bí-le̍k mn̄g A-pek-la̍h-hán kóng, Lí chiong chhit chiah bú ê iûⁿ-ko lēng-gōa pàng tī chi̍t só͘-chāi, sī sím-mi̍h ì-sù?

30應講，你tio̍h tùi我ê手收chit七隻母ê羊羔，做我開chit口井ê證據。Ìn kóng, Lí tio̍h tùi góa ê chhiú siu chí chhit chiah bú ê iûⁿ-ko, chòe góa khui chit kháu chíⁿ ê chèng-kù.

31所以名hit所在叫別是巴，因為in兩人tī-hia有chiù-chōa。Só͘-í miâ hit só͘-chāi kiò Pia̍t-sī-pa, in-ūi in nn̄g-lâng tī-hia ū chiù-chōa.

32In tī別是巴立約；A-pí-bí-le̍k就kap伊ê軍長Hui-kok起身tò去腓利士地。In tī Pia̍t-sī-pa li̍p-iok; A-pí-bí-le̍k chiū kap i ê kun-tiúⁿ Hui-kok khí-sin tò-khì Hui-lī-sū tōe.

33亞伯拉罕tī別是巴栽一叢垂絲柳樹；koh tī-hia求叫耶和華永永tī-teh上帝ê名。A-pek-la̍h-hán tī Pia̍t-sī-pa chai chi̍t châng sûi-si-liú chhiū; koh tī-hia kiû-kiò Iâ-hô-hoa éng-éng tī-teh Siōng-tè ê miâ.

34亞伯拉罕tī腓利士人ê地寄居chōe-chōe日。A-pek-la̍h-hán tī Hui-lī-sū lâng ê tōe kià-ku chōe-chōe ji̍t.