1Chiah-ê tāi-chì以後，上帝試亞伯拉罕，叫伊講，亞伯拉罕；伊應講，我tī-chia。Chiah ê tāi-chì í-āu, Siōng-tè chhì A-pek-la̍h-hán, kiò i kóng, A-pek-la̍h-hán; i ìn kóng, Góa tī-chia.

2上帝講，你帶你ê kiáⁿ，就是你獨生ê kiáⁿ，你所疼ê以撒，去Mô͘-lī-a ê地，我所beh指示你ê山；tī-hia將伊獻做燒祭。Siōng-tè kóng, Lí tòa lí ê kiáⁿ, chiū-sī lí to̍k-siⁿ ê kiáⁿ, lí só͘ thiàⁿ ê Í-sat, khì Mô͘-lī-a ê tōe, Góa só͘ beh chí-sī lí ê soaⁿ; tī-hia chiong i hiàn-chòe sio-chè.

3亞伯拉罕透早起來，備辦驢，帶伊ê兩個少年人，kap伊ê kiáⁿ以撒；亦破燒祭ê柴；就起身去上帝所指示伊ê地。A-pek-la̍h-hán thàu-chá khí-lâi, pī-pān lû, tòa i ê nn̄g ê siàu-liân lâng, kap i ê kiáⁿ Í-sat; ia̍h phòa sio-chè ê chhâ; chiū khí-sin khì Siōng-tè só͘ chí-sī i ê tōe.

4到第三日，亞伯拉罕kia̍h目遠遠看hit-ê所在。Kàu tē-saⁿ ji̍t, A-pek-la̍h-hán kia̍h-ba̍k hn̄g-hn̄g khòaⁿ hit ê só͘-chāi.

5亞伯拉罕對伊ê少年人講，Lín kap驢tiàm chia thèng候，我kap gín-á去hia敬拜，就tò來lín chia。A-pek-la̍h-hán tùi i ê siàu-liân lâng kóng, Lín kap lû tiàm chia thèng-hāu, góa kap gín-á khì hia kèng-pài, chiū tò-lâi lín chia.

6亞伯拉罕將燒祭ê柴hē tī伊ê kiáⁿ以撒ê身上，家己ê手kia̍h火kap刀；tùi hit-tia̍p兩人相kap行。A-pek-la̍h-hán chiong sio-chè ê chhâ hē tī i ê kiáⁿ Í-sat ê sin-chiūⁿ, ka-kī ê chhiú kia̍h hé kap to; tùi hit-tia̍p nn̄g-lâng saⁿ-kap kiâⁿ.

7以撒kā伊ê老父亞伯拉罕講，父ah；伊講，我ê kiáⁿ，我tī-chia。伊講，你看，火kap柴lóng有；總是燒祭ê羊á tī tah-lo̍h？Í-sat kā i ê lāu-pē A-pek-la̍h-hán kóng, Pē ah; i kóng, Góa ê kiáⁿ, góa tī-chia. I kóng, Lí khòaⁿ, hé kap chhâ lóng ū; chóng-sī sio-chè ê iûⁿ-á tī tah-lo̍h?

8亞伯拉罕講，我ê kiáⁿ，上帝beh家己備辦燒祭ê羊á；tùi hit-tia̍p兩人相kap行。A-pek-la̍h-hán kóng, Góa ê kiáⁿ, Siōng-tè beh ka-kī pī-pān sio-chè ê iûⁿ-á; tùi hit-tia̍p nn̄g-lâng saⁿ-kap kiâⁿ.

9In到上帝指示伊ê所在；亞伯拉罕tī-hia起壇，將柴排好，縛伊ê kiáⁿ以撒，hē tī 壇裡ê柴頂。In kàu Siōng-tè chí-sī i ê só͘-chāi; A-pek-la̍h-hán tī-hia khí tôaⁿ, chiong chhâ pâi-hó, pa̍k i ê kiáⁿ Í-sat, hē tī tôaⁿ-ni̍h ê chhâ-téng.

10亞伯拉罕就伸手kia̍h刀，beh thâi伊ê kiáⁿ。A-pek-la̍h-hán chiū chhun-chhiú kia̍h-to, beh thâi i ê kiáⁿ.

11耶和華ê使者對天叫伊講，亞伯拉罕，亞伯拉罕；伊應講，我tī-chia。Iâ-hô-hoa ê sù-chiá tùi thiⁿ kiò i kóng, A-pek-la̍h-hán, A-pek-la̍h-hán; i ìn kóng, Góa tī-chia.

12使者講，你m̄-thang tī chit-ê gín-á ê身上下手，亦m̄-thang對伊怎樣做；因為我taⁿ知你是敬畏上帝，亦無將你ê kiáⁿ，就是你獨生ê，留teh，m̄-hō͘我。Sù-chiá kóng, Lí m̄-thang tī chit ê gín-á ê sin-chiūⁿ hē-chhiú, ia̍h m̄-thang tùi i cháiⁿ-iūⁿ chòe; in-ūi góa taⁿ chai lí sī kèng-ùi Siōng-tè, ia̍h bô chiong lí ê kiáⁿ, chiū-sī lí to̍k-siⁿ-ê, lâu-teh, m̄-hō͘ góa.

13亞伯拉罕kia̍h目看，看見後面有一隻羊káng，角纏tī kui抱ê樹á；亞伯拉罕就去掠hit隻羊káng來，獻做燒祭，來替伊ê kiáⁿ。A-pek-la̍h-hán kia̍h-ba̍k khòaⁿ, khòaⁿ-kìⁿ āu-bīn ū chi̍t chiah iûⁿ-káng, kak tîⁿ tī kui-phō ê chhiū-á; A-pek-la̍h-hán chiū khì lia̍h hit chiah iûⁿ-káng lâi, hiàn chòe sio-chè, lâi thòe i ê kiáⁿ.

14亞伯拉罕名hit-ê所在叫耶和華以勒；到今á日人iáu teh講，Tī耶和華ê山beh備辦。A-pek-la̍h-hán miâ hit ê só͘-chāi kiò Iâ-hô-hoa-í-le̍k; kàu kin-á-ji̍t lâng iáu teh kóng, Tī Iâ-hô-hoa ê soaⁿ beh pī-pān.

15耶和華ê使者第二pái對天叫亞伯拉罕講，Iâ-hô-hoa ê sù-chiá tē-jī pái tùi thiⁿ kiò A-pek-la̍h-hán kóng,

16耶和華講，你已經行chit-ê事，無留你ê kiáⁿ，就是你獨生ê kiáⁿ，我就kí家己chiù-chōa講，Iâ-hô-hoa kóng, Lí í-keng kiâⁿ chit ê sū, bô lâu lí ê kiáⁿ, chiū-sī lí to̍k-siⁿ ê kiáⁿ, Góa chiū kí ka-kī chiù-chōa kóng,

17我賜福beh賜福你，加添beh加添你ê後裔，親像天頂ê 星，海邊ê沙；你ê後裔beh得tio̍h chiah-ê對敵ê關隘。Góa sù-hok beh sù-hok lí, ke-thiⁿ beh ke-thiⁿ lí ê hō͘-è, chhin-chhiūⁿ thiⁿ-téng ê chhiⁿ, hái-piⁿ ê soa; lí ê hō͘-è beh tit-tio̍h chiah ê tùi-te̍k ê koan-ài.

18Koh地上萬邦beh因為你ê後裔得tio̍h福氣；因為你聽thàn我ê話。Koh tōe-chiūⁿ bān-pang beh in-ūi lí ê hō͘-è tit-tio̍h hok-khì; in-ūi lí thiaⁿ-thàn Góa ê ōe.

19Tùi hit-tia̍p，亞伯拉罕tò來伊hiah-ê少年人hia；in就相kap起身去別是巴。亞伯拉罕就tiàm-tī別是巴。Tùi hit-tia̍p A-pek-la̍h-hán tò-lâi i hiah ê siàu-liân lâng hia; in chiū saⁿ-kap khí-sin khì Pia̍t-sī-pa. A-pek-la̍h-hán chiū tiàm tī Pia̍t-sī-pa.

20Chiah-ê tāi-chì了後，有人kā亞伯拉罕講，Bi̍t-ka kā你ê小弟Ná-ho̍k生kiáⁿ；Chiah ê tāi-chì liáu-āu, ū lâng kā A-pek-la̍h-hán kóng, Bi̍t-ka kā lí ê sió-tī Ná-ho̍k siⁿ-kiáⁿ;

21大ê O͘-su，小弟Pò͘-su，kap A-lân ê老父，Ki-bó͘-lī；tōa-ê O͘-su, sió-tī Pò͘-su, kap A-lân ê lāu-pē, Ki-bó͘-lī;

22kap Ki-siat、Hap-só、Pit-ta̍t、Ek-la̍h、Pí-thó͘-lī，(Pí-thó͘-lī生利百加)kap Ki-siat, Hap-só, Pit-ta̍t, Ek-la̍h, Pí-thó͘-lī, (Pí-thó͘-lī siⁿ Lī-pek-ka)

23Chit八人lóng是Bi̍t-ka kā亞伯拉罕ê小弟Ná-ho̍k生ê。Chí poeh-lâng lóng sī Bi̍t-ka kā A-pek-la̍h-hán ê sió-tī Ná-ho̍k siⁿ-ê.

24Ná-ho̍k ê細姨，名Liû-má，生Thê-pat、Ka-hâm、Tha-hat、kap Má-ka。Ná-ho̍k ê sòe-î, miâ Liû-má, siⁿ Thê-pat, Ka-hâm, Tha-hat, kap Má-ka.

1撒拉享壽一百二十七歲；這是撒拉一生ê年歲。Sat-la̍h hióng-siū chi̍t-pah jī-cha̍p-chhit hè; che sī Sat-la̍h it-seng ê nî-hè.

2撒拉死tī迦南地ê Ki-lia̍t-a-pa，就是Hi-pek-lûn；亞伯拉罕來，為tio̍h撒拉哀傷啼哭。Sat-la̍h sí tī Ka-lâm tōe ê Ki-lia̍t-a-pa, chiū-sī Hi-pek-lûn; A-pek-la̍h-hán lâi, ūi-tio̍h Sat-la̍h ai-siong thî-khàu.

3後來亞伯拉罕tùi死人ê面前起來，kā Hek人講，Āu-lâi A-pek-la̍h-hán tùi sí-lâng ê bīn-chêng khí-lâi, kā Hek-lâng kóng,

4我tī lín中間是寄居ê出外人；求lín tī-chia hō͘我一個所在做塚地，thang埋葬我ê死人，hō͘我無koh看見伊。Góa tī lín tiong-kan sī kià-ku ê chhut-gōa lâng; kiû lín tī-chia hō͘ góa chi̍t ê só͘-chāi chòe thióng-tōe, thang bâi-chòng góa ê sí-lâng, hō͘ góa bô koh khòaⁿ-kìⁿ i.

5Hek人應亞伯拉罕，kā伊講，Hek-lâng ìn A-pek-la̍h-hán, kā i kóng,

6我ê主，請聽；你tī阮中間做上帝ê bo̍k-pek；chhut-chāi你tī阮ê塚地內揀第一好ê，來埋葬你ê死人；阮無一人m̄容允你tī伊ê塚地lāi埋葬你ê死人。Góa ê chú, chhiáⁿ thiaⁿ; lí tī goán tiong-kan chòe Siōng-tè ê bo̍k-pek; chhut-chāi lí tī goán ê thióng-tōe-lāi kéng tē-it-hó-ê, lâi bâi-chòng lí ê sí-lâng; goán bô chi̍t-lâng m̄ iông-ún lí tī i ê thióng-tōe-lāi bâi-chòng lí ê sí-lâng.

7亞伯拉罕起來，對hit所在ê人，就是Hek族，àⁿ腰。A-pek-la̍h-hán khí-lâi, tùi hit só͘-chāi ê lâng, chiū-sī Hek-cho̍k, àⁿ-io.

8對in講，Lín若有意思beh hō͘我埋葬我ê死人，hō͘我無koh看見伊，就請聽我，替我求Só-hat ê kiáⁿ Í-hut-lûn，Tùi in kóng, Lín nā ū ì-sù beh hō͘ góa bâi-chòng góa ê sí-lâng, hō͘ góa bô koh khòaⁿ-kìⁿ i, chiū chhiáⁿ thiaⁿ góa, thòe góa kiû Só-hat ê kiáⁿ Í-hut-lûn,

9將伊ê田頭Be̍k-pí-la̍h ê穴hō͘我；伊thang照足額ê價數賣hō͘我；hō͘我tī lín中間有業thang做墓地。chiong i ê chhân-thâu Be̍k-pí-la̍h ê hia̍t hō͘ góa; i thang chiàu chiok-gia̍h ê kè-sò͘ bōe hō͘ góa; hō͘ góa tī lín tiong-kan ū gia̍p thang chòe bōng-tōe.

10當時Í-hut-lûn坐tī Hek人ê中間；tùi hit-tia̍p Hek人Í-hut-lûn tī一切入伊ê城門ê Hek人ê面前，應亞伯拉罕，講，Tng-sî Í-hut-lûn chē tī Hek-lâng ê tiong-kan; tùi hit-tia̍p Hek-lâng Í-hut-lûn tī it-chhè ji̍p i ê siâⁿ-mn̂g ê Hek-lâng ê bīn-chêng, ìn A-pek-la̍h-hán, kóng,

11m̄免，我ê主聽我；我beh送你hit坵田，連hit內面ê穴亦hō͘你；tī我同族ê人ê面前，我hō͘你，thang埋葬你ê死人。M̄-bián, góa ê Chú thiaⁿ góa; góa beh sàng lí hit khu chhân, liân hit lāi-bīn ê hia̍t ia̍h hō͘ lí; tī góa tâng-cho̍k ê lâng ê bīn-chêng, góa hō͘ lí, thang bâi-chòng lí ê sí-lâng.

12亞伯拉罕就tī hit所在ê百姓ê面前àⁿ腰；A-pek-la̍h-hán chiū tī hit só͘-chāi ê peh-sìⁿ ê bīn-chêng àⁿ-io;

13tī hit所在百姓ê面前，對Í-hut-lûn講，你若肯，請聽我；我beh將田ê價錢hō͘你，你tio̍h收；hō͘我thang tī-hia埋葬我ê死人。tī hit só͘-chāi peh-sìⁿ ê bīn-chêng, tùi Í-hut-lûn kóng, Lí nā khéng, chhiáⁿ thiaⁿ góa; góa beh chiong chhân ê kè-chîⁿ hō͘ lí, lí tio̍h siu; hō͘ góa thang tī-hia bâi-chòng góa ê sí-lâng.

14Í-hut-lûn應亞伯拉罕講，Í-hut-lûn ìn A-pek-la̍h-hán kóng,

15我ê主，請聽我；田值得銀四百sià-khek-le̍k，tī你我ê中間，beh算甚麼？做你埋葬你ê死人。Góa ê chú, chhiáⁿ thiaⁿ góa; chhân ta̍t-tit gûn sì-pah sià-khek-le̍k, tī lí góa ê tiong-kan, beh sǹg sím-mi̍h? chòe lí bâi-chòng lí ê sí-lâng.

16亞伯拉罕聽Í-hut-lûn ê話，照伊tī Hek人ê面前所講ê，將買賣通用ê銀，秤(phêng)四百sià-khek-le̍k hō͘ Í-hut-lûn。A-pek-la̍h-hán thiaⁿ Í-hut-lûn ê ōe, chiàu i tī Hek-lâng ê bīn-chêng só͘ kóng-ê, chiong bóe-bōe thong-ēng ê gûn, phêng sì-pah sià-khek-le̍k hō͘ Í-hut-lûn.

17Tùi hit-tia̍p， Í-hut-lûn ê田，tī Be̍k-pí-la̍h，Bān-lī ê頭前；hit khu田kap hí內面ê穴，kap田內以及四圍一切ê樹木，Tùi hit-tia̍p Í-hut-lûn ê chhân, tī Be̍k-pí-la̍h, Bān-lī ê thâu-chêng; hit khu chhân kap hit lāi-bīn ê hia̍t, kap chhân-lāi í-ki̍p sì-ûi it-chhè ê chhiū-ba̍k,

18tī Hek族人kap一切入伊ê城門ê人ê面前，lóng定tio̍h歸hō͘亞伯拉罕做業。tī Hek-cho̍k lâng kap it-chhè ji̍p i ê siâⁿ-mn̂g ê lâng ê bīn-chêng, lóng tiāⁿ-tio̍h kui hō͘ A-pek-la̍h-hán chòe gia̍p.

19後內亞伯拉罕將伊ê bó͘撒拉埋葬tī迦南地Bān-lī頭前ê be̍k-pí-la̍h 田裡ê穴；Bān-lī就是Hi-pek-lûn。Āu-lâi A-pek-la̍h-hán chiong i ê bó͘ Sat-la̍h bâi-chòng tī Ka-lâm tōe Bān-lī thâu-chêng ê Be̍k-pí-la̍h chhân-ni̍h ê hia̍t; Bān-lī chiū-sī Hi-pek-lûn.

20Tùi án-ni, hitkhu chhân kap 田裡ê穴，tùi Hek人定tio̍h歸hō͘亞伯拉罕做業，來做墓地。Tùi án-ni hit khu chhân kap chhân-ni̍h ê hia̍t, tùi Hek-lâng tiāⁿ-tio̍h kui hō͘ A-pek-la̍h-hán chòe gia̍p, lâi chòe bōng-tōe.

1亞伯拉罕歲壽長，年老；耶和華tī一切ê事lóng賜福hō͘亞伯拉罕。A-pek-la̍h-hán hè-siū tn̂g, nî-lāu; Iâ-hô-hoa tī it-chhè ê sū lóng sù-hok hō͘ A-pek-la̍h-hán.

2亞伯拉罕對伊家內管理全業ê老奴僕講，請將你ê手hē tī我ê大腿下，A-pek-la̍h-hán tùi i ke-lāi koán-lí choân-gia̍p ê lāu lô͘-po̍k kóng, Chhiáⁿ chiong lí ê chhiú hē tī góa ê tōa-thúi-ē,

3我beh kah你kí耶和華，就是天ê上帝，地ê上帝，來chiù-chōa，我khiā起迦南人ê中間，你m̄-thang kā我ê kiáⁿ娶in ê cha-bó͘-kiáⁿ做bó͘。góa beh kah lí kí Iâ-hô-hoa, chiū-sī thiⁿ ê Siōng-tè, tōe ê Siōng-tè, lâi chiù-chōa, góa khiā-khí Ka-lâm lâng ê tiong-kan, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘.

4你tio̍h去我ê本地本族，kā我ê kiáⁿ以撒娶一個bó͘。Lí tio̍h khì góa ê pún-tōe pún-cho̍k, kā góa ê kiáⁿ Í-sat chhōa chi̍t ê bó͘.

5奴僕應伊講，設使cha-bó͘-gín-á m̄肯tè我來chit所在，我就tio̍h將你ê kiáⁿ帶tò去你所tùi hia出來ê地mah？Lô͘-po̍k ìn i kóng, Siat-sú cha-bó͘-gín-á m̄-khéng tè góa lâi chit só͘-chāi, góa chiū tio̍h chiong lí ê kiáⁿ tòa tò-khì lí só͘ tùi hia chhut-lâi ê tōe mah?

6亞伯拉罕kā伊講，你tio̍h謹慎，m̄-thang chhōa我ê kiáⁿ tò去hia；A-pek-la̍h-hán kā i kóng, Lí tio̍h kín-sīn, m̄-thang chhōa góa ê kiáⁿ tò-khì hia;

7天ê上帝，耶和華，bat chhōa我離開老父ê家，kap本族ê地，對我講話，亦對我chiù-chōa講，我beh將chit-ê地賞賜你ê後裔；伊beh差伊ê使者tī你ê面前；你就thang tùi hia kā我ê kiáⁿ娶一個bó͘。thiⁿ ê Siōng-tè, Iâ-hô-hoa, bat chhōa góa lī-khui lāu-pē ê ke, kap pún-cho̍k ê tōe, tùi góa kóng-ōe, ia̍h tùi góa chiù-chōa kóng, Góa beh chiong chit ê tōe siúⁿ-sù lí ê hō͘-è; I beh chhe I ê sù-chiá tī lí ê bīn-chêng; lí chiū thang tùi hia kā góa ê kiáⁿ chhōa chi̍t ê bó͘.

8設使cha-bó͘-gín-á m̄肯tè你來，我kah你chiù ê chōa就kap你無干涉；獨獨m̄-thang帶我ê kiáⁿ tò去hia。Siat-sú cha-bó͘-gín-á m̄-khéng tè lí lâi, góa kah lí chiù ê chōa chiū kap lí bô kan-sia̍p; to̍k-to̍k m̄-thang tòa góa ê kiáⁿ tò-khì hia.

9奴僕就將伊ê手hē tī主人亞伯拉罕ê大腿下；為tio̍h chit-ê事對伊chiù-chōa。Lô͘-po̍k chiū chiong i ê chhiú hē tī chú-lâng A-pek-la̍h-hán ê tōa-thúi-ē; ūi-tio̍h chit ê sū tùi i chiù-chōa.

10Hit-ê奴僕tùi伊主人ê駱駝中，取十隻駱駝，續帶伊主人ta̍k樣ê財寶；起身去Bí-só͘-pho-tāi-bí，到Ná-ho̍k ê城。Hit ê lô͘-po̍k tùi i chú-lâng ê lo̍k-tô-tiong, chhú cha̍p-chiah lo̍k-tô, sòa tòa i chú-lâng ta̍k-iūⁿ ê châi-pó; khí-sin khì Bí-só͘-pho-tāi-bí, kàu Ná-ho̍k ê siâⁿ.

11日beh暗，眾cha-bó͘-gín-á出來chhiūⁿ水；伊就hō͘駱駝跪tī城外ê井邊。Ji̍t beh àm, chèng cha-bó͘-gín-á chhut-lâi chhiūⁿ chúi; i chiū hō͘ lo̍k-tô kūi tī siâⁿ-gōa ê chíⁿ-piⁿ.

12伊講，我ê主人亞伯拉罕ê上帝耶和華ah，求你施恩hō͘我ê主人亞伯拉罕，hō͘我今á日有好遭遇。I kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, kiû Lí si-un hō͘ góa ê chú-lâng A-pek-la̍h-hán, hō͘ góa kin-á-ji̍t ū hó cho-gū.

13我taⁿ khiā tī井邊，城內人ê cha-bó͘-gín-á teh出來chhiūⁿ水；Góa taⁿ khiā tī chíⁿ-piⁿ, siâⁿ-lāi lâng ê cha-bó͘-gín-á teh chhut-lâi chhiūⁿ chúi;

14我beh對一個cha-bó͘-gín-á講，請放落你ê水瓶，hō͘我lim水；伊若講，請lim，我亦beh hō͘你ê駱駝lim；願hit-ê cha-bó͘-gín-á是你所定tio̍h hō͘你ê奴僕以撒做bó͘；án-ni，我就知你施恩hō͘我ê主人。góa beh tùi chi̍t ê cha-bó͘-gín-á kóng, Chhiáⁿ pàng-lo̍h lí ê chúi-pân, hō͘ góa lim chúi; i nā kóng, Chhiáⁿ lim, góa ia̍h beh hō͘ lí ê lo̍k-tô lim; goān hit ê cha-bó͘-gín-á sī Lí só͘ tiāⁿ-tio̍h hō͘ lí ê lô͘-po̍k Í-sat chòe-bó͘; án-ni, góa chiū chai Lí si-un hō͘ góa ê chú-lâng.

15話iáu講未soah，利百加肩頭背水瓶出來，伊是Pí-thó͘-lī生ê；Pí-thó͘-lī是亞伯拉罕ê小弟Ná-ho̍k ê bó͘ Bi̍t-ka ê kiáⁿ。Ōe iáu kóng bē soah, Lī-pek-ka keng-thâu pē chúi-pân chhut-lâi, i sī Pí-thó͘-lī siⁿ-ê; Pí-thó͘-lī sī A-pek-la̍h-hán ê sió-tī Ná-ho̍k ê bó͘ Bi̍t-ka ê kiáⁿ.

16Hit-ê cha-bó͘-gín-á面貌極其súi，iáu是在室女，亦未bat有人親近伊；伊落去井邊，chhiūⁿ滿伊ê瓶就起來。Hit ê cha-bó͘-gín-á bīn-māu ke̍k-kî súi, iáu sī chāi-sek-lú, ia̍h bē-bat ū lâng chhin-kūn i; i lo̍h-khì chíⁿ-piⁿ, chhiūⁿ-móa i ê pân chiū khí-lâi.

17奴僕走進前迎接伊講，求你將瓶內ê水淡薄á我lim。Lô͘-po̍k cháu chìn-chêng ngiâ-chih i kóng, Kiû lí chiong pân-lāi ê chúi tām-po̍h-á góa lim.

18Cha-bó͘-gín-á講，我ê主，請lim；就趕緊放水瓶落來，掛tī手裡，hō͘伊lim。Cha-bó͘-gín-á kóng, Góa ê chú, chhiáⁿ lim; chiū kóaⁿ-kín pàng chúi-pân lo̍h-lâi, khòa tī chhiú-ni̍h, hō͘ i lim.

19Hō͘伊lim明白，koh講，我亦beh kā你ê駱駝chhiūⁿ水，hō͘ in lim夠額。Hō͘ i lim bêng-pe̍k, koh kóng, Góa ia̍h beh kā lí ê lo̍k-tô chhiūⁿ chúi, hō͘ in lim kàu-gia̍h.

20伊就趕緊將瓶內ê水piàⁿ tī槽裡；koh走到井裡chhiūⁿ水就kā伊所有ê駱駝chhiūⁿ。I chiū kóaⁿ-kín chiong pân-lāi ê chúi piàⁿ tī chô-ni̍h; koh cháu kàu chíⁿ-ni̍h chhiūⁿ chúi chiū kā i só͘ ū ê lo̍k-tô chhiūⁿ.

21Hit-ê人注目看伊，恬恬無講話，ài知耶和華賞賜伊順序ê路á無。Hit ê lâng chù-ba̍k khòaⁿ-i, tiām-tiām bô kóng-ōe, ài chai Iâ-hô-hoa siúⁿ-sù i sūn-sū ê lō͘ á-bô.

22駱駝lim明白，hit人就the̍h一個金環，重半sià-khek-le̍k，兩個金手環，重十sià-khek-le̍k hō͘ hit-ê cha-bó͘-gín-á；Lo̍k-tô lim bêng-pe̍k, hit-lâng chiū the̍h chi̍t ê kim-khoân, tāng pòaⁿ sià-khek-le̍k, nn̄g ê kim chhiú-khoân, tāng cha̍p sià-khek-le̍k hō͘ hit ê cha-bó͘-gín-á;

23講，你是是誰 ê cha-bó͘-kiáⁿ？請kā我講；lín老父ê家，有所在thang hō͘阮歇á無？kóng, Lí sī chī-chūi ê cha-bó͘-kiáⁿ? chhiáⁿ kā góa kóng; lín lāu-pē ê ke, ū só͘-chāi thang hō͘ goán hioh á-bô?

24伊就kā伊講，我是Bi̍t-ka tùi Ná-ho̍k所生ê kiáⁿ，Pí-thó͘-lī ê cha-bó͘-kiáⁿ。I chiū kā i kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī ê cha-bó͘-kiáⁿ.

25伊koh對伊講，阮有草料米糧充足；亦有所在thang歇。I koh tùi i kóng, Goán ū chháu-liāu bí-niû chhiong-chiok; ia̍h ū só͘-chāi thang hioh.

26Hit人就àⁿ頭敬拜耶和華，講，Hit-lâng chiū àⁿ-thâu kèng-pài Iâ-hô-hoa, kóng,

27Tio̍h o-ló我ê主亞伯拉罕ê上帝耶和華；伊用慈愛誠實款待我ê主人，lóng無停止；論到我，耶和華tī路上引chhōa我到我ê主人兄弟ê家。Tio̍h o-ló góa ê chú A-pek-la̍h-hán ê Siōng-tè Iâ-hô-hoa; I ēng chû-ài sêng-si̍t khoán-thāi góa ê chú-lâng, lóng bô thêng-chí; lūn-kàu góa, Iâ-hô-hoa tī lō͘-chiūⁿ ín-chhōa góa kàu góa ê chú-lâng hiaⁿ-tī ê ke.

28Cha-bó͘-gín-á走tò去，照chiah-ê話kā in老母thong家ê人講。Cha-bó͘-gín-á cháu tò-khì, chiàu chiah ê ōe kā in lāu-bú thong-ke ê lâng kóng.

29利百加有一個兄，名叫拉班，伊出去井邊，就近hit-人。Lī-pek-ka ū chi̍t ê hiaⁿ, miâ kiò La̍h-pan, i chhut-khì chíⁿ-piⁿ, chiū-kūn hit-lâng.

30伊看見hit-ê環，koh看見手環tī in小妹ê手，mā聽見in小妹利百加ê話，講hit人對我講án-ni，án-ni。伊就去hit人hia，看見hit人iáu khiā tī駱駝邊，óa近水井。I khòaⁿ-kìⁿ hit ê khoân, koh khòaⁿ-kìⁿ chhiú-khoân tī in sió-bē ê chhiú; ia̍h thiaⁿ-kìⁿ in sió-bē Lī-pek-ka ê ōe, kóng, Hit-lâng tùi góa kóng án-ni, án-ni; i chiū khì hit-lâng hia, khòaⁿ-kìⁿ hit-lâng iáu khiā tī lo̍k-tô piⁿ, óa-kūn chúi-chíⁿ.

31就kā伊講：「你chit-ê得tio̍h耶和華上帝賜福ê，請入來，啥事khiā tī外面？我已經備辦厝，kah駱駝ê所在。Chiū kā i kóng, Lí chit ê tit-tio̍h Iâ-hô-hoa sù-hok-ê, chhiáⁿ ji̍p-lâi, siáⁿ-sū khiā tī gōa-bīn? Góa í-keng pī-pān chhù, kap lo̍k-tô ê só͘-chāi.

32Hit人就入去伊ê厝，伊就tháu駱駝所載ê，koh用糧草飼駱駝，捧水hō͘ hit人kah跟tè ê人洗腳。Hit-lâng chiū ji̍p i ê chhù, i chiū tháu lo̍k-tô só͘ chài-ê, koh ēng chháu-liāu bí-niû chhī lo̍k-tô; phâng chúi hō͘ hit-lâng í-ki̍p kun-tè ê lâng sóe kha.

33Koh kā食物排tī伊ê面前，hō͘伊食。總是伊講：「我無beh食，thèng候我講明我ê使命」。拉班講：「請你講。」Chiong chia̍h-mi̍h pâi tī i ê bīn-chêng, hō͘ i chia̍h; chóng-sī i kóng, Góa bô beh chia̍h, thèng-hāu góa kóng-bêng góa ê sù-bēng. La̍h-pan kóng, Chhiáⁿ lí kóng.

34伊就講：「我是亞伯拉罕ê奴僕。I chiū kóng, Góa sī A-pek-la̍h-hán ê lô͘-po̍k.

35上帝大大賜福tī我ê主人，hō͘伊興旺，koh hō͘伊羊、牛、銀、金、奴僕、女婢、駱駝kah驢。Iâ-hô-hoa tōa-tōa sù-hok tī góa ê chú-lâng, hō͘ i heng-ōng, koh hō͘ i iûⁿ, gû, gûn, kim, lô͘-po̍k, lú-pī, lo̍k-tô kap lû.

36我ê主人ê bó͘撒拉，年老ê時，kā我ê主人生一個kiáⁿ，我ê主人mā kā一切所有ê hō͘ chit-ê kiáⁿ。Góa ê chú-lâng ê bó͘ Sat-la̍h, nî-lāu ê sî, kā góa ê chú-lâng siⁿ chi̍t ê kiáⁿ; góa ê chú-lâng ia̍h chiong it-chhè só͘-ū-ê hō͘ chit ê kiáⁿ.

37我ê主人kah我chiù-chōa講：我khiā起tī迦南人ê地，你m̄-thang kā我ê kiáⁿ娶in ê cha-bó͘-kiáⁿ做bó͘。Góa ê chú-lâng kah góa chiù-chōa kóng, Góa khiā-khí Ka-lâm lâng ê tōe, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘.

38你tio̍h去我ê老父ê家，我本族hia，kā我ê kiáⁿ娶一個bó͘。Lí tio̍h khì góa ê lāu-pē ê ke, góa pún-cho̍k hia, kā góa ê kiáⁿ chhōa chi̍t ê bó͘.

39我對我ê主人講：驚了cha-bó͘-gín-á m̄肯tè我來。Góa tùi góa ê chú-lâng kóng, Kiaⁿ-liáu cha-bó͘-gín-á m̄-khéng tè góa lâi.

40伊就kā我講：我所服事ê耶和華beh差伊ê使者kap你相kap去，hō͘你順序ê路，你就thang tùi我ê宗族，我ê父ê家，kā我ê kiáⁿ娶一個bó͘。I chiū kā góa kóng, Góa só͘ ho̍k-sāi ê Iâ-hô-hoa beh chhe I ê sù-chiá kap lí saⁿ-kap khì, hō͘ lí sūn-sū ê lō͘, lí chiū thang tùi góa ê chong-cho̍k, góa ê pē ê ke, kā góa ê kiáⁿ chhōa chi̍t ê bó͘;

41獨獨ài你到我ê本族hia，我kah你所chiù ê chōa，就kah你無干涉；in若m̄ hō͘你，我kah你chiù ê chōa，mā kah你無干涉。』to̍k-to̍k ài lí kàu góa pún-cho̍k hia, góa kah lí só͘ chiù ê chōa, chiū kap lí bô kan-sia̍p; in nā m̄ hō͘ lí, góa kah lí chiù ê chōa, ia̍h kap lí bô kan-sia̍p.

42今á日我到井邊，講：我ê主人亞伯拉罕ê上帝耶和華ah，你若hō͘我所行ê路順序；Kin-á-ji̍t góa kàu chíⁿ-piⁿ, kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, Lí nā hō͘ góa só͘ kiâⁿ ê lō͘ sūn-sū;

43我taⁿ khiā tī水井邊，對一個出來chhiūⁿ水ê cha-bó͘-gín-á講，請你將你瓶裡ê水淡薄hō͘我lim；góa taⁿ khiā tī chúi-chíⁿ-piⁿ, tùi chi̍t ê chhut-lâi chhiūⁿ chúi ê cha-bó͘-gín-á kóng, Chhiáⁿ lí chiong lí pân-ni̍h ê chúi tām-po̍h hō͘ góa lim;

44伊若講，做你lim，我亦beh kā你ê駱駝chhiūⁿ水；願hit-ê cha-bó͘-gín-á做耶和華所定tio̍h hō͘我ê主人ê kiáⁿ做bó͘-ê。i nā kóng, Chòe lí lim, góa ia̍h beh kā lí ê lo̍k-tô chhiūⁿ chúi; goān hit ê cha-bó͘-gín-á chòe Iâ-hô-hoa só͘ tiāⁿ-tio̍h hō͘ góa ê chú-lâng ê kiáⁿ chòe bó͘-ê.

45我心內ê話iáu講未了，利百加就出來，肩頭頂背水瓶；落去井邊chhiūⁿ水；我就kā伊講，請你hō͘我lim。Góa sim-lāi ê ōe iáu kóng bē liáu, Lī-pek-ka chiū chhut-lâi, keng-thâu-téng pē chúi-pân; lo̍h-khì chíⁿ-piⁿ chhiūⁿ chúi; góa chiū kā i kóng, Chhiáⁿ lí hō͘ góa lim.

46伊就趕緊tùi肩頭頂放落水瓶，講，請lim，我亦hō͘你ê駱駝lim；我就lim，伊亦hō͘我ê駱駝lim。I chiū kóaⁿ-kín tùi keng-thâu-téng pàng-lo̍h chúi-pân, kóng, Chhiáⁿ lim, góa ia̍h hō͘ lí ê lo̍k-tô lim; góa chiū lim, i ia̍h hō͘ góa ê lo̍k-tô lim.

47我koh問伊講，你是是誰 ê cha-bó͘-kiáⁿ？伊應講，我是Bi̍t-ka tùi Ná-ho̍k所生ê kiáⁿ，Pí-thó͘-lī，ê cha-bó͘-kiáⁿ；我就將環掛tī伊ê鼻，手環掛tī伊ê手。Góa koh mn̄g i kóng, Lí sī chī-chūi ê cha-bó͘-kiáⁿ? I ìn kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī, ê cha-bó͘-kiáⁿ; góa chiū chiong khoân kòa tī i ê phīⁿ, chhiú-khoân kòa tī i ê chhiú.

48我就àⁿ頭拜耶和華，o-ló我ê主亞伯拉罕ê上帝耶和華；因為伊chhōa我行tú好ê路，hō͘我得tio̍h我ê主ê小弟ê cha-bó͘孫來hō͘伊ê kiáⁿ。Góa chiū àⁿ-thâu pài Iâ-hô-hoa, o-ló góa ê chú A-pek-la̍h-hán ê Siōng-tè Iâ-hô-hoa; in-ūi I chhōa góa kiâⁿ tú-hó ê lō͘, hō͘ góa tit-tio̍h góa ê chú ê sió-tī ê cha-bó͘-sun lâi hō͘ i ê kiáⁿ.

49Taⁿ lín若beh用慈愛誠實款待我ê主人，就kā我講；若m̄，亦kā我講；hō͘我好thang ǹg左á是ǹg右。Taⁿ lín nā beh ēng chû-ài sêng-si̍t khoán-thāi góa ê chú-lâng, chiū kā góa kóng; nā m̄, ia̍h kā góa kóng; hō͘ góa hó thang ǹg-chó á-sī ǹg-iū.

50拉班kap Pí-thó͘-lī應講，Tāi-chì出tī耶和華，阮bōe能對你講好á pháiⁿ。La̍h-pan kap Pí-thó͘-lī ìn kóng, Tāi-chì chhut tī Iâ-hô-hoa, goán bōe-ōe tùi lí kóng hó á pháiⁿ.

51你看，利百加tī你ê面前，thang將伊chhōa去，hō͘你ê主人ê kiáⁿ做bó͘，照耶和華所講。Lí khòaⁿ, Lī-pek-ka tī lí ê bīn-chêng, thang chiong i chhōa-khì, hō͘ lí ê chú-lâng ê kiáⁿ chòe bó͘, chiàu Iâ-hô-hoa só͘ kóng.

52亞伯拉罕ê奴僕聽見in chiah-ê話，就ǹg耶和華仆tī地裡。A-pek-la̍h-hán ê lô͘-po̍k thiaⁿ-kìⁿ in chiah ê ōe, chiū ǹg Iâ-hô-hoa phak tī tōe-ni̍h.

53Hit-tia̍p，奴僕the̍h出銀器金器kap衣服送利百加；koh將寶物送伊ê兄kap伊ê老母。Hit-tia̍p lô͘-po̍k the̍h-chhut gûn-khì kim-khì kap i-ho̍k sàng Lī-pek-ka; koh chiong pó-mi̍h sàng i ê hiaⁿ kap i ê lāu-bú.

54奴僕kap tè伊ê人lim食歇暝；透早起來，就講，請差我tò去我ê主人hia。Lô͘-po̍k kap tè i ê lâng lim-chia̍h hioh-mî; thàu-chá khí-lâi, chiū kóng, Chhiáⁿ chhe góa tò-khì góa ê chú-lâng hia.

55利百加ê兄kap伊ê老母講，容允cha-bó͘-gín-á kap阮tiàm幾日，siāng少十日，然後伊thang去。Lī-pek-ka ê hiaⁿ kap i ê lāu-bú kóng, Iông-ún cha-bó͘-gín-á kap goán tiàm kúi-ji̍t, siāng-chió cha̍p-ji̍t, jiân-āu i thang khì.

56伊對in講，M̄-thang阻擋我，耶和華已經hō͘我順序ê路；請差我去，hō͘我tò去我ê主人hia。I tùi in kóng, M̄-thang chó͘-tòng góa, Iâ-hô-hoa í-keng hō͘ góa sūn-sū ê lō͘; chhiáⁿ chhe góa khì, hō͘ góa tò-khì góa ê chú-lâng hia.

57In講，阮叫cha-bó͘-gín-á來，探伊ê話意。In kóng, Goán kiò cha-bó͘-gín-á lâi, thàm i ê ōe-ì.

58就叫利百加來，問伊講，你beh kap chit人去mah？伊講，我beh去。Chiū kiò Lī-pek-ka lâi, mn̄g i kóng, Lí beh kap chit-lâng khì mah? i kóng, Góa beh khì.

59In就差小妹利百加，kap伊ê奶母，kap亞伯拉罕ê奴僕，以及tè伊ê人去。In chiū chhe sió-bē Lī-pek-ka, kap i ê leng-bú, kap A-pek-la̍h-hán ê lô͘-po̍k, í-ki̍p tè i ê lâng khì.

60In就kā利百加祝福，對伊講，阮小妹ah，願你做千萬人ê老母，願你ê後裔得tio̍h對敵ê關隘。In chiū kā Lī-pek-ka chiok-hok, tùi i kóng, Goán sió-bē ah, goān lí chòe chheng-bān lâng ê lāu-bú, goān lí ê hō͘-è tit-tio̍h tùi-te̍k ê koan-ài.

61利百加kap伊ê女婢起來騎駱駝，tè hit-ê人；奴僕就chhōa利百加去。Lī-pek-ka kap i ê lú-pī khí-lâi khiâ lo̍k-tô, tè hit ê lâng; lô͘-po̍k chiū chhōa Lī-pek-ka khì.

62以撒khiā起tī南地，hit時tùi Pí-jíⁿ-la̍h海來ê路來。Í-sat khiā-khí tī Lâm-tōe, hit-sî tùi Pí-jíⁿ-la̍h-hái-lâi ê lō͘ lâi.

63日beh暗，以撒出來tī田裡，靜靜teh想，kia̍h目一下看，看見駱駝來。Ji̍t beh àm, Í-sat chhut-lâi tī chhân-ni̍h, chēng-chēng teh siūⁿ, kia̍h-ba̍k chi̍t-ē khòaⁿ, khòaⁿ-kìⁿ lo̍k-tô lâi.

64利百加看見以撒，就tùi駱駝落來。Lī-pek-ka khòaⁿ-kìⁿ Í-sat, chiū tùi lo̍k-tô lo̍h-lâi.

65問hit-ê奴僕講，Tī田裡行來迎接咱ê是是誰？奴僕講，是我ê主人。利百加就the̍h帕家己罩。Mn̄g hit ê lô͘-po̍k kóng, Tī chhân-ni̍h kiâⁿ-lâi ngiâ-chih lán-ê sī chī-chūi? Lô͘-po̍k kóng, Sī góa ê chú-lâng. Lī-pek-ka chiū the̍h phè ka-kī tà.

66奴僕將所做一切ê事，kā以撒講。Lô͘-po̍k chiong só͘ chòe it-chhè ê sū, kā Í-sat kóng.

67以撒就牽利百加入伊ê老母撒拉ê布棚，娶伊做bó͘；koh真疼伊。以撒tùi老母死後，到chit-tia̍p chiah得tio̍h安慰。Í-sat chiū khan Lī-pek-ka ji̍p i ê lāu-bú Sat-la̍h ê pò͘-pîⁿ, chhōa i chòe bó͘; koh chin thiàⁿ i. Í-sat tùi lāu-bú sí-āu, kàu chit-tia̍p chiah tit-tio̍h an-ùi.