1亞伯拉罕歲壽長，年老；耶和華tī一切ê事lóng賜福hō͘亞伯拉罕。A-pek-la̍h-hán hè-siū tn̂g, nî-lāu; Iâ-hô-hoa tī it-chhè ê sū lóng sù-hok hō͘ A-pek-la̍h-hán.

2亞伯拉罕對伊家內管理全業ê老奴僕講，請將你ê手hē tī我ê大腿下，A-pek-la̍h-hán tùi i ke-lāi koán-lí choân-gia̍p ê lāu lô͘-po̍k kóng, Chhiáⁿ chiong lí ê chhiú hē tī góa ê tōa-thúi-ē,

3我beh kah你kí耶和華，就是天ê上帝，地ê上帝，來chiù-chōa，我khiā起迦南人ê中間，你m̄-thang kā我ê kiáⁿ娶in ê cha-bó͘-kiáⁿ做bó͘。góa beh kah lí kí Iâ-hô-hoa, chiū-sī thiⁿ ê Siōng-tè, tōe ê Siōng-tè, lâi chiù-chōa, góa khiā-khí Ka-lâm lâng ê tiong-kan, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘.

4你tio̍h去我ê本地本族，kā我ê kiáⁿ以撒娶一個bó͘。Lí tio̍h khì góa ê pún-tōe pún-cho̍k, kā góa ê kiáⁿ Í-sat chhōa chi̍t ê bó͘.

5奴僕應伊講，設使cha-bó͘-gín-á m̄肯tè我來chit所在，我就tio̍h將你ê kiáⁿ帶tò去你所tùi hia出來ê地mah？Lô͘-po̍k ìn i kóng, Siat-sú cha-bó͘-gín-á m̄-khéng tè góa lâi chit só͘-chāi, góa chiū tio̍h chiong lí ê kiáⁿ tòa tò-khì lí só͘ tùi hia chhut-lâi ê tōe mah?

6亞伯拉罕kā伊講，你tio̍h謹慎，m̄-thang chhōa我ê kiáⁿ tò去hia；A-pek-la̍h-hán kā i kóng, Lí tio̍h kín-sīn, m̄-thang chhōa góa ê kiáⁿ tò-khì hia;

7天ê上帝，耶和華，bat chhōa我離開老父ê家，kap本族ê地，對我講話，亦對我chiù-chōa講，我beh將chit-ê地賞賜你ê後裔；伊beh差伊ê使者tī你ê面前；你就thang tùi hia kā我ê kiáⁿ娶一個bó͘。thiⁿ ê Siōng-tè, Iâ-hô-hoa, bat chhōa góa lī-khui lāu-pē ê ke, kap pún-cho̍k ê tōe, tùi góa kóng-ōe, ia̍h tùi góa chiù-chōa kóng, Góa beh chiong chit ê tōe siúⁿ-sù lí ê hō͘-è; I beh chhe I ê sù-chiá tī lí ê bīn-chêng; lí chiū thang tùi hia kā góa ê kiáⁿ chhōa chi̍t ê bó͘.

8設使cha-bó͘-gín-á m̄肯tè你來，我kah你chiù ê chōa就kap你無干涉；獨獨m̄-thang帶我ê kiáⁿ tò去hia。Siat-sú cha-bó͘-gín-á m̄-khéng tè lí lâi, góa kah lí chiù ê chōa chiū kap lí bô kan-sia̍p; to̍k-to̍k m̄-thang tòa góa ê kiáⁿ tò-khì hia.

9奴僕就將伊ê手hē tī主人亞伯拉罕ê大腿下；為tio̍h chit-ê事對伊chiù-chōa。Lô͘-po̍k chiū chiong i ê chhiú hē tī chú-lâng A-pek-la̍h-hán ê tōa-thúi-ē; ūi-tio̍h chit ê sū tùi i chiù-chōa.

10Hit-ê奴僕tùi伊主人ê駱駝中，取十隻駱駝，續帶伊主人ta̍k樣ê財寶；起身去Bí-só͘-pho-tāi-bí，到Ná-ho̍k ê城。Hit ê lô͘-po̍k tùi i chú-lâng ê lo̍k-tô-tiong, chhú cha̍p-chiah lo̍k-tô, sòa tòa i chú-lâng ta̍k-iūⁿ ê châi-pó; khí-sin khì Bí-só͘-pho-tāi-bí, kàu Ná-ho̍k ê siâⁿ.

11日beh暗，眾cha-bó͘-gín-á出來chhiūⁿ水；伊就hō͘駱駝跪tī城外ê井邊。Ji̍t beh àm, chèng cha-bó͘-gín-á chhut-lâi chhiūⁿ chúi; i chiū hō͘ lo̍k-tô kūi tī siâⁿ-gōa ê chíⁿ-piⁿ.

12伊講，我ê主人亞伯拉罕ê上帝耶和華ah，求你施恩hō͘我ê主人亞伯拉罕，hō͘我今á日有好遭遇。I kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, kiû Lí si-un hō͘ góa ê chú-lâng A-pek-la̍h-hán, hō͘ góa kin-á-ji̍t ū hó cho-gū.

13我taⁿ khiā tī井邊，城內人ê cha-bó͘-gín-á teh出來chhiūⁿ水；Góa taⁿ khiā tī chíⁿ-piⁿ, siâⁿ-lāi lâng ê cha-bó͘-gín-á teh chhut-lâi chhiūⁿ chúi;

14我beh對一個cha-bó͘-gín-á講，請放落你ê水瓶，hō͘我lim水；伊若講，請lim，我亦beh hō͘你ê駱駝lim；願hit-ê cha-bó͘-gín-á是你所定tio̍h hō͘你ê奴僕以撒做bó͘；án-ni，我就知你施恩hō͘我ê主人。góa beh tùi chi̍t ê cha-bó͘-gín-á kóng, Chhiáⁿ pàng-lo̍h lí ê chúi-pân, hō͘ góa lim chúi; i nā kóng, Chhiáⁿ lim, góa ia̍h beh hō͘ lí ê lo̍k-tô lim; goān hit ê cha-bó͘-gín-á sī Lí só͘ tiāⁿ-tio̍h hō͘ lí ê lô͘-po̍k Í-sat chòe-bó͘; án-ni, góa chiū chai Lí si-un hō͘ góa ê chú-lâng.

15話iáu講未soah，利百加肩頭背水瓶出來，伊是Pí-thó͘-lī生ê；Pí-thó͘-lī是亞伯拉罕ê小弟Ná-ho̍k ê bó͘ Bi̍t-ka ê kiáⁿ。Ōe iáu kóng bē soah, Lī-pek-ka keng-thâu pē chúi-pân chhut-lâi, i sī Pí-thó͘-lī siⁿ-ê; Pí-thó͘-lī sī A-pek-la̍h-hán ê sió-tī Ná-ho̍k ê bó͘ Bi̍t-ka ê kiáⁿ.

16Hit-ê cha-bó͘-gín-á面貌極其súi，iáu是在室女，亦未bat有人親近伊；伊落去井邊，chhiūⁿ滿伊ê瓶就起來。Hit ê cha-bó͘-gín-á bīn-māu ke̍k-kî súi, iáu sī chāi-sek-lú, ia̍h bē-bat ū lâng chhin-kūn i; i lo̍h-khì chíⁿ-piⁿ, chhiūⁿ-móa i ê pân chiū khí-lâi.

17奴僕走進前迎接伊講，求你將瓶內ê水淡薄á我lim。Lô͘-po̍k cháu chìn-chêng ngiâ-chih i kóng, Kiû lí chiong pân-lāi ê chúi tām-po̍h-á góa lim.

18Cha-bó͘-gín-á講，我ê主，請lim；就趕緊放水瓶落來，掛tī手裡，hō͘伊lim。Cha-bó͘-gín-á kóng, Góa ê chú, chhiáⁿ lim; chiū kóaⁿ-kín pàng chúi-pân lo̍h-lâi, khòa tī chhiú-ni̍h, hō͘ i lim.

19Hō͘伊lim明白，koh講，我亦beh kā你ê駱駝chhiūⁿ水，hō͘ in lim夠額。Hō͘ i lim bêng-pe̍k, koh kóng, Góa ia̍h beh kā lí ê lo̍k-tô chhiūⁿ chúi, hō͘ in lim kàu-gia̍h.

20伊就趕緊將瓶內ê水piàⁿ tī槽裡；koh走到井裡chhiūⁿ水就kā伊所有ê駱駝chhiūⁿ。I chiū kóaⁿ-kín chiong pân-lāi ê chúi piàⁿ tī chô-ni̍h; koh cháu kàu chíⁿ-ni̍h chhiūⁿ chúi chiū kā i só͘ ū ê lo̍k-tô chhiūⁿ.

21Hit-ê人注目看伊，恬恬無講話，ài知耶和華賞賜伊順序ê路á無。Hit ê lâng chù-ba̍k khòaⁿ-i, tiām-tiām bô kóng-ōe, ài chai Iâ-hô-hoa siúⁿ-sù i sūn-sū ê lō͘ á-bô.

22駱駝lim明白，hit人就the̍h一個金環，重半sià-khek-le̍k，兩個金手環，重十sià-khek-le̍k hō͘ hit-ê cha-bó͘-gín-á；Lo̍k-tô lim bêng-pe̍k, hit-lâng chiū the̍h chi̍t ê kim-khoân, tāng pòaⁿ sià-khek-le̍k, nn̄g ê kim chhiú-khoân, tāng cha̍p sià-khek-le̍k hō͘ hit ê cha-bó͘-gín-á;

23講，你是是誰 ê cha-bó͘-kiáⁿ？請kā我講；lín老父ê家，有所在thang hō͘阮歇á無？kóng, Lí sī chī-chūi ê cha-bó͘-kiáⁿ? chhiáⁿ kā góa kóng; lín lāu-pē ê ke, ū só͘-chāi thang hō͘ goán hioh á-bô?

24伊就kā伊講，我是Bi̍t-ka tùi Ná-ho̍k所生ê kiáⁿ，Pí-thó͘-lī ê cha-bó͘-kiáⁿ。I chiū kā i kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī ê cha-bó͘-kiáⁿ.

25伊koh對伊講，阮有草料米糧充足；亦有所在thang歇。I koh tùi i kóng, Goán ū chháu-liāu bí-niû chhiong-chiok; ia̍h ū só͘-chāi thang hioh.

26Hit人就àⁿ頭敬拜耶和華，講，Hit-lâng chiū àⁿ-thâu kèng-pài Iâ-hô-hoa, kóng,

27Tio̍h o-ló我ê主亞伯拉罕ê上帝耶和華；伊用慈愛誠實款待我ê主人，lóng無停止；論到我，耶和華tī路上引chhōa我到我ê主人兄弟ê家。Tio̍h o-ló góa ê chú A-pek-la̍h-hán ê Siōng-tè Iâ-hô-hoa; I ēng chû-ài sêng-si̍t khoán-thāi góa ê chú-lâng, lóng bô thêng-chí; lūn-kàu góa, Iâ-hô-hoa tī lō͘-chiūⁿ ín-chhōa góa kàu góa ê chú-lâng hiaⁿ-tī ê ke.

28Cha-bó͘-gín-á走tò去，照chiah-ê話kā in老母thong家ê人講。Cha-bó͘-gín-á cháu tò-khì, chiàu chiah ê ōe kā in lāu-bú thong-ke ê lâng kóng.

29利百加有一個兄，名叫拉班，伊出去井邊，就近hit-人。Lī-pek-ka ū chi̍t ê hiaⁿ, miâ kiò La̍h-pan, i chhut-khì chíⁿ-piⁿ, chiū-kūn hit-lâng.

30伊看見hit-ê環，koh看見手環tī in小妹ê手，mā聽見in小妹利百加ê話，講hit人對我講án-ni，án-ni。伊就去hit人hia，看見hit人iáu khiā tī駱駝邊，óa近水井。I khòaⁿ-kìⁿ hit ê khoân, koh khòaⁿ-kìⁿ chhiú-khoân tī in sió-bē ê chhiú; ia̍h thiaⁿ-kìⁿ in sió-bē Lī-pek-ka ê ōe, kóng, Hit-lâng tùi góa kóng án-ni, án-ni; i chiū khì hit-lâng hia, khòaⁿ-kìⁿ hit-lâng iáu khiā tī lo̍k-tô piⁿ, óa-kūn chúi-chíⁿ.

31就kā伊講：「你chit-ê得tio̍h耶和華上帝賜福ê，請入來，啥事khiā tī外面？我已經備辦厝，kah駱駝ê所在。Chiū kā i kóng, Lí chit ê tit-tio̍h Iâ-hô-hoa sù-hok-ê, chhiáⁿ ji̍p-lâi, siáⁿ-sū khiā tī gōa-bīn? Góa í-keng pī-pān chhù, kap lo̍k-tô ê só͘-chāi.

32Hit人就入去伊ê厝，伊就tháu駱駝所載ê，koh用糧草飼駱駝，捧水hō͘ hit人kah跟tè ê人洗腳。Hit-lâng chiū ji̍p i ê chhù, i chiū tháu lo̍k-tô só͘ chài-ê, koh ēng chháu-liāu bí-niû chhī lo̍k-tô; phâng chúi hō͘ hit-lâng í-ki̍p kun-tè ê lâng sóe kha.

33Koh kā食物排tī伊ê面前，hō͘伊食。總是伊講：「我無beh食，thèng候我講明我ê使命」。拉班講：「請你講。」Chiong chia̍h-mi̍h pâi tī i ê bīn-chêng, hō͘ i chia̍h; chóng-sī i kóng, Góa bô beh chia̍h, thèng-hāu góa kóng-bêng góa ê sù-bēng. La̍h-pan kóng, Chhiáⁿ lí kóng.

34伊就講：「我是亞伯拉罕ê奴僕。I chiū kóng, Góa sī A-pek-la̍h-hán ê lô͘-po̍k.

35上帝大大賜福tī我ê主人，hō͘伊興旺，koh hō͘伊羊、牛、銀、金、奴僕、女婢、駱駝kah驢。Iâ-hô-hoa tōa-tōa sù-hok tī góa ê chú-lâng, hō͘ i heng-ōng, koh hō͘ i iûⁿ, gû, gûn, kim, lô͘-po̍k, lú-pī, lo̍k-tô kap lû.

36我ê主人ê bó͘撒拉，年老ê時，kā我ê主人生一個kiáⁿ，我ê主人mā kā一切所有ê hō͘ chit-ê kiáⁿ。Góa ê chú-lâng ê bó͘ Sat-la̍h, nî-lāu ê sî, kā góa ê chú-lâng siⁿ chi̍t ê kiáⁿ; góa ê chú-lâng ia̍h chiong it-chhè só͘-ū-ê hō͘ chit ê kiáⁿ.

37我ê主人kah我chiù-chōa講：我khiā起tī迦南人ê地，你m̄-thang kā我ê kiáⁿ娶in ê cha-bó͘-kiáⁿ做bó͘。Góa ê chú-lâng kah góa chiù-chōa kóng, Góa khiā-khí Ka-lâm lâng ê tōe, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘.

38你tio̍h去我ê老父ê家，我本族hia，kā我ê kiáⁿ娶一個bó͘。Lí tio̍h khì góa ê lāu-pē ê ke, góa pún-cho̍k hia, kā góa ê kiáⁿ chhōa chi̍t ê bó͘.

39我對我ê主人講：驚了cha-bó͘-gín-á m̄肯tè我來。Góa tùi góa ê chú-lâng kóng, Kiaⁿ-liáu cha-bó͘-gín-á m̄-khéng tè góa lâi.

40伊就kā我講：我所服事ê耶和華beh差伊ê使者kap你相kap去，hō͘你順序ê路，你就thang tùi我ê宗族，我ê父ê家，kā我ê kiáⁿ娶一個bó͘。I chiū kā góa kóng, Góa só͘ ho̍k-sāi ê Iâ-hô-hoa beh chhe I ê sù-chiá kap lí saⁿ-kap khì, hō͘ lí sūn-sū ê lō͘, lí chiū thang tùi góa ê chong-cho̍k, góa ê pē ê ke, kā góa ê kiáⁿ chhōa chi̍t ê bó͘;

41獨獨ài你到我ê本族hia，我kah你所chiù ê chōa，就kah你無干涉；in若m̄ hō͘你，我kah你chiù ê chōa，mā kah你無干涉。』to̍k-to̍k ài lí kàu góa pún-cho̍k hia, góa kah lí só͘ chiù ê chōa, chiū kap lí bô kan-sia̍p; in nā m̄ hō͘ lí, góa kah lí chiù ê chōa, ia̍h kap lí bô kan-sia̍p.

42今á日我到井邊，講：我ê主人亞伯拉罕ê上帝耶和華ah，你若hō͘我所行ê路順序；Kin-á-ji̍t góa kàu chíⁿ-piⁿ, kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, Lí nā hō͘ góa só͘ kiâⁿ ê lō͘ sūn-sū;

43我taⁿ khiā tī水井邊，對一個出來chhiūⁿ水ê cha-bó͘-gín-á講，請你將你瓶裡ê水淡薄hō͘我lim；góa taⁿ khiā tī chúi-chíⁿ-piⁿ, tùi chi̍t ê chhut-lâi chhiūⁿ chúi ê cha-bó͘-gín-á kóng, Chhiáⁿ lí chiong lí pân-ni̍h ê chúi tām-po̍h hō͘ góa lim;

44伊若講，做你lim，我亦beh kā你ê駱駝chhiūⁿ水；願hit-ê cha-bó͘-gín-á做耶和華所定tio̍h hō͘我ê主人ê kiáⁿ做bó͘-ê。i nā kóng, Chòe lí lim, góa ia̍h beh kā lí ê lo̍k-tô chhiūⁿ chúi; goān hit ê cha-bó͘-gín-á chòe Iâ-hô-hoa só͘ tiāⁿ-tio̍h hō͘ góa ê chú-lâng ê kiáⁿ chòe bó͘-ê.

45我心內ê話iáu講未了，利百加就出來，肩頭頂背水瓶；落去井邊chhiūⁿ水；我就kā伊講，請你hō͘我lim。Góa sim-lāi ê ōe iáu kóng bē liáu, Lī-pek-ka chiū chhut-lâi, keng-thâu-téng pē chúi-pân; lo̍h-khì chíⁿ-piⁿ chhiūⁿ chúi; góa chiū kā i kóng, Chhiáⁿ lí hō͘ góa lim.

46伊就趕緊tùi肩頭頂放落水瓶，講，請lim，我亦hō͘你ê駱駝lim；我就lim，伊亦hō͘我ê駱駝lim。I chiū kóaⁿ-kín tùi keng-thâu-téng pàng-lo̍h chúi-pân, kóng, Chhiáⁿ lim, góa ia̍h hō͘ lí ê lo̍k-tô lim; góa chiū lim, i ia̍h hō͘ góa ê lo̍k-tô lim.

47我koh問伊講，你是是誰 ê cha-bó͘-kiáⁿ？伊應講，我是Bi̍t-ka tùi Ná-ho̍k所生ê kiáⁿ，Pí-thó͘-lī，ê cha-bó͘-kiáⁿ；我就將環掛tī伊ê鼻，手環掛tī伊ê手。Góa koh mn̄g i kóng, Lí sī chī-chūi ê cha-bó͘-kiáⁿ? I ìn kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī, ê cha-bó͘-kiáⁿ; góa chiū chiong khoân kòa tī i ê phīⁿ, chhiú-khoân kòa tī i ê chhiú.

48我就àⁿ頭拜耶和華，o-ló我ê主亞伯拉罕ê上帝耶和華；因為伊chhōa我行tú好ê路，hō͘我得tio̍h我ê主ê小弟ê cha-bó͘孫來hō͘伊ê kiáⁿ。Góa chiū àⁿ-thâu pài Iâ-hô-hoa, o-ló góa ê chú A-pek-la̍h-hán ê Siōng-tè Iâ-hô-hoa; in-ūi I chhōa góa kiâⁿ tú-hó ê lō͘, hō͘ góa tit-tio̍h góa ê chú ê sió-tī ê cha-bó͘-sun lâi hō͘ i ê kiáⁿ.

49Taⁿ lín若beh用慈愛誠實款待我ê主人，就kā我講；若m̄，亦kā我講；hō͘我好thang ǹg左á是ǹg右。Taⁿ lín nā beh ēng chû-ài sêng-si̍t khoán-thāi góa ê chú-lâng, chiū kā góa kóng; nā m̄, ia̍h kā góa kóng; hō͘ góa hó thang ǹg-chó á-sī ǹg-iū.

50拉班kap Pí-thó͘-lī應講，Tāi-chì出tī耶和華，阮bōe能對你講好á pháiⁿ。La̍h-pan kap Pí-thó͘-lī ìn kóng, Tāi-chì chhut tī Iâ-hô-hoa, goán bōe-ōe tùi lí kóng hó á pháiⁿ.

51你看，利百加tī你ê面前，thang將伊chhōa去，hō͘你ê主人ê kiáⁿ做bó͘，照耶和華所講。Lí khòaⁿ, Lī-pek-ka tī lí ê bīn-chêng, thang chiong i chhōa-khì, hō͘ lí ê chú-lâng ê kiáⁿ chòe bó͘, chiàu Iâ-hô-hoa só͘ kóng.

52亞伯拉罕ê奴僕聽見in chiah-ê話，就ǹg耶和華仆tī地裡。A-pek-la̍h-hán ê lô͘-po̍k thiaⁿ-kìⁿ in chiah ê ōe, chiū ǹg Iâ-hô-hoa phak tī tōe-ni̍h.

53Hit-tia̍p，奴僕the̍h出銀器金器kap衣服送利百加；koh將寶物送伊ê兄kap伊ê老母。Hit-tia̍p lô͘-po̍k the̍h-chhut gûn-khì kim-khì kap i-ho̍k sàng Lī-pek-ka; koh chiong pó-mi̍h sàng i ê hiaⁿ kap i ê lāu-bú.

54奴僕kap tè伊ê人lim食歇暝；透早起來，就講，請差我tò去我ê主人hia。Lô͘-po̍k kap tè i ê lâng lim-chia̍h hioh-mî; thàu-chá khí-lâi, chiū kóng, Chhiáⁿ chhe góa tò-khì góa ê chú-lâng hia.

55利百加ê兄kap伊ê老母講，容允cha-bó͘-gín-á kap阮tiàm幾日，siāng少十日，然後伊thang去。Lī-pek-ka ê hiaⁿ kap i ê lāu-bú kóng, Iông-ún cha-bó͘-gín-á kap goán tiàm kúi-ji̍t, siāng-chió cha̍p-ji̍t, jiân-āu i thang khì.

56伊對in講，M̄-thang阻擋我，耶和華已經hō͘我順序ê路；請差我去，hō͘我tò去我ê主人hia。I tùi in kóng, M̄-thang chó͘-tòng góa, Iâ-hô-hoa í-keng hō͘ góa sūn-sū ê lō͘; chhiáⁿ chhe góa khì, hō͘ góa tò-khì góa ê chú-lâng hia.

57In講，阮叫cha-bó͘-gín-á來，探伊ê話意。In kóng, Goán kiò cha-bó͘-gín-á lâi, thàm i ê ōe-ì.

58就叫利百加來，問伊講，你beh kap chit人去mah？伊講，我beh去。Chiū kiò Lī-pek-ka lâi, mn̄g i kóng, Lí beh kap chit-lâng khì mah? i kóng, Góa beh khì.

59In就差小妹利百加，kap伊ê奶母，kap亞伯拉罕ê奴僕，以及tè伊ê人去。In chiū chhe sió-bē Lī-pek-ka, kap i ê leng-bú, kap A-pek-la̍h-hán ê lô͘-po̍k, í-ki̍p tè i ê lâng khì.

60In就kā利百加祝福，對伊講，阮小妹ah，願你做千萬人ê老母，願你ê後裔得tio̍h對敵ê關隘。In chiū kā Lī-pek-ka chiok-hok, tùi i kóng, Goán sió-bē ah, goān lí chòe chheng-bān lâng ê lāu-bú, goān lí ê hō͘-è tit-tio̍h tùi-te̍k ê koan-ài.

61利百加kap伊ê女婢起來騎駱駝，tè hit-ê人；奴僕就chhōa利百加去。Lī-pek-ka kap i ê lú-pī khí-lâi khiâ lo̍k-tô, tè hit ê lâng; lô͘-po̍k chiū chhōa Lī-pek-ka khì.

62以撒khiā起tī南地，hit時tùi Pí-jíⁿ-la̍h海來ê路來。Í-sat khiā-khí tī Lâm-tōe, hit-sî tùi Pí-jíⁿ-la̍h-hái-lâi ê lō͘ lâi.

63日beh暗，以撒出來tī田裡，靜靜teh想，kia̍h目一下看，看見駱駝來。Ji̍t beh àm, Í-sat chhut-lâi tī chhân-ni̍h, chēng-chēng teh siūⁿ, kia̍h-ba̍k chi̍t-ē khòaⁿ, khòaⁿ-kìⁿ lo̍k-tô lâi.

64利百加看見以撒，就tùi駱駝落來。Lī-pek-ka khòaⁿ-kìⁿ Í-sat, chiū tùi lo̍k-tô lo̍h-lâi.

65問hit-ê奴僕講，Tī田裡行來迎接咱ê是是誰？奴僕講，是我ê主人。利百加就the̍h帕家己罩。Mn̄g hit ê lô͘-po̍k kóng, Tī chhân-ni̍h kiâⁿ-lâi ngiâ-chih lán-ê sī chī-chūi? Lô͘-po̍k kóng, Sī góa ê chú-lâng. Lī-pek-ka chiū the̍h phè ka-kī tà.

66奴僕將所做一切ê事，kā以撒講。Lô͘-po̍k chiong só͘ chòe it-chhè ê sū, kā Í-sat kóng.

67以撒就牽利百加入伊ê老母撒拉ê布棚，娶伊做bó͘；koh真疼伊。以撒tùi老母死後，到chit-tia̍p chiah得tio̍h安慰。Í-sat chiū khan Lī-pek-ka ji̍p i ê lāu-bú Sat-la̍h ê pò͘-pîⁿ, chhōa i chòe bó͘; koh chin thiàⁿ i. Í-sat tùi lāu-bú sí-āu, kàu chit-tia̍p chiah tit-tio̍h an-ùi.

1亞伯拉罕koh娶一個bó͘，名叫Ki-thó͘-la̍h。A-pek-la̍h-hán koh chhōa chi̍t ê bó͘, miâ kiò Ki-thó͘-la̍h.

2Ki-thó͘-la̍h kā伊生Sim-lân、Iok-san、Bí-tàn、米甸、I-si-pa、Su-a。Ki-thó͘-la̍h kā i siⁿ Sim-lân, Iok-san, Bí-tàn, Bí-tiân, I-si-pa, Su-a.

3Iok-san生Sī-pa kap Tí-tàn。Tí-tàn ê kiaⁿ孫是A-su-lī族、Lī-to͘-sī族，kap Lī-o͘-bí族。Iok-san siⁿ Sī-pa kap Tí-tàn. Tí-tàn ê kiáⁿ-sun sī A-su-lī cho̍k, Lī-to͘-sī cho̍k, kap Lī-o͘-bí cho̍k.

4米甸ê kiáⁿ是Í-hoat、Í-hut、Hap-lo̍k、A-pí-tāi、Í-le̍k-tāi；chiah-ê lóng是Ki-thó͘-la̍h ê kiáⁿ。Bí-tiân ê kiáⁿ sī Í-hoat, Í-hut, Hap-lo̍k, A-pí-tāi, Í-le̍k-tāi; chiah-ê lóng sī Ki-thó͘-la̍h ê kiáⁿ.

5亞伯拉罕將一切所有ê hō͘以撒。A-pek-la̍h-hán chiong it-chhè só͘-ū-ê hō͘ Í-sat.

6亞伯拉罕將財物分hō͘伊chiah-ê細姨ê kiáⁿ；thàn伊本身iáu活ê時，差in離開伊ê kiáⁿ以撒去東勢，到東pêng ê地。A-pek-la̍h-hán chiong châi-bu̍t pun hō͘ i chiah ê sòe-î ê kiáⁿ; thàn i pún-sin iáu oa̍h ê sî, chhe in lī-khui i ê kiáⁿ Í-sat khì tang-sì, kàu tang-pêng ê tōe.

7亞伯拉罕一生ê年日是一百七十五歲。A-pek-la̍h-hán it-seng ê nî-ji̍t sī chi̍t-pah chhit-cha̍p gō͘ hè.

8亞伯拉罕食長歲壽，成做老人，年歲滿足，斷氣死，tò祖。A-pek-la̍h-hán chia̍h tn̂g hè-siū, chiâⁿ-chòe lāu-lâng, nî-hè móa-chiok, tn̄g-khùi sí, tò-chó͘.

9伊ê kiáⁿ以撒、以實瑪利，將伊埋葬tī Be̍k-pí-la̍h ê穴；chit-ê穴tī Bān-lī ê頭前，Hek人Só-hat ê kiáⁿ Í-hut-lûn ê田中，I ê kiáⁿ Í-sat, Í-si̍t-má-lī, chiong i bâi-chòng tī Be̍k-pí-la̍h ê hia̍t; chit ê hia̍t tī Bān-lī ê thâu-chêng, Hek-lâng Só-hat ê kiáⁿ Í-hut-lûn ê chhân-tiong,

10就是亞伯拉罕tùi Hek人所買hit坵田。亞伯拉罕kap伊ê bó͘撒拉lóng埋葬tī-hia。chiū-sī A-pek-la̍h-hán tùi Hek-lâng só͘ bóe hit khu chhân. A-pek-la̍h-hán kap i ê bó͘ Sat-la̍h lóng bâi-chòng tī-hia.

11亞伯拉罕死了後，上帝賜福hō͘伊ê kiáⁿ以撒；以撒óa近Pí-jíⁿ-la̍h海來khiā起。A-pek-la̍h-hán sí liáu-āu, Siōng-tè sù-hok hō͘ i ê kiáⁿ Í-sat; Í-sat óa-kūn Pí-jíⁿ-la̍h-hái-lâi khiā-khí.

12亞伯拉罕ê kiáⁿ以實瑪利ê世系，記tī下底：以實瑪利就是撒拉ê女婢埃及人夏甲tùi亞伯拉罕所生ê。A-pek-la̍h-hán ê kiáⁿ Í-si̍t-má-lī ê sè-hē, kì tī ē-tóe: Í-si̍t-má-lī chiū-sī Sat-la̍h ê lú-pī Ai-ki̍p lâng Hā-kah tùi A-pek-la̍h-hán só͘ siⁿ-ê.

13以實瑪利chiah-ê kiáⁿ ê名，照伊ê名字世系，親像下底：以實瑪利ê大kiáⁿ Nî-pâi-iok；koh有Ki-ta̍t、A-tek-pia̍t、Bí-pí-sam；Í-si̍t-má-lī chiah ê kiáⁿ ê miâ, chiàu i ê miâ-jī sè-hē, chhin-chhiūⁿ ē-tóe: Í-si̍t-má-lī ê tōa-kiáⁿ Nî-pâi-iok; koh ū Ki-ta̍t, A-tek-pia̍t, Bí-pí-sam;

14Bí-si-má、Tō͘-má、Má-sat；Bí-si-má, Tō͘-má, Má-sat;

15Hap-tāi、Thê-má、I-tu̍t、Ná-hui-si、Ki-tí-má；Hap-tāi, Thê-má, I-tu̍t, Ná-hui-si, Ki-tí-má;

16chiah-ê就是以實瑪利ê kiáⁿ ê名；照in ê鄉村營寨，做十二族ê族長。chiah-ê chiū-sī Í-si̍t-má-lī ê kiáⁿ ê miâ; chiàu in ê hiuⁿ-chhng iâⁿ-chē, chòe cha̍p-jī cho̍k ê cho̍k-tiúⁿ.

17以實瑪利一生歲壽，一百三十七；氣斷死就tò祖。Í-si̍t-má-lī it-seng hè-siū, chi̍t-pah saⁿ-cha̍p chhit; khùi-tn̄g sí chiū tò-chó͘.

18伊ê kiaⁿ孫tòa tī Hap-hui-la̍h到埃及頭前ê Su-jíⁿ，beh去亞述ê路；khiā起tī伊眾兄弟ê頭前。I ê kiáⁿ-sun tòa tī Hap-hui-la̍h kàu Ai-ki̍p thâu-chêng ê Su-jíⁿ, beh khì A-su̍t ê lō͘; khiā-khí tī i chèng hiaⁿ-tī ê thâu-chêng.

19亞伯拉罕ê kiáⁿ以撒ê世系，記tī下底：亞伯拉罕生以撒；A-pek-la̍h-hán ê kiáⁿ Í-sat ê sè-hē, kì tī ē-tóe: A-pek-la̍h-hán siⁿ Í-sat;

20以撒娶利百加做bó͘ ê時，tú-á四十歲。伊是Pa-tàn-a-lân地ê A-lân人Pí-thó͘-lī ê cha-bó͘-kiáⁿ，A-lân人拉班ê小妹。Í-sat chhōa Lī-pek-ka chòe bó͘ ê sî, tú-á sì-cha̍p hè. I sī Pa-tàn-a-lân tōe ê A-lân lâng Pí-thó͘-lī ê cha-bó͘-kiáⁿ, A-lân lâng La̍h-pan ê sió-bē.

21以撒因為伊ê bó͘無生kiáⁿ，替伊祈求耶和華；耶和華允准伊所求；伊ê bó͘利百加就懷孕。Í-sat in-ūi i ê bó͘ bô siⁿ-kiáⁿ, thòe i kî-kiû Iâ-hô-hoa; Iâ-hô-hoa ún-chún i só͘ kiû; i ê bó͘ Lī-pek-ka chiū hoâi-īn.

22Gín-á tī伊ê腹內相khoeh；伊就講，若是chit款，我mih-sái án-ni？就去問耶和華。Gín-á tī i ê pak-lāi saⁿ-khoeh; i chiū kóng, Nā sī chit-khoán, góa mih-sái án-ni? Chiū khì mn̄g Iâ-hô-hoa.

23耶和華kā伊講，兩國tī你腹內，兩族beh對你ê身軀出；chit族beh khah強hit族；序大ê beh服事序細ê。Iâ-hô-hoa kā i kóng, Nn̄g-kok tī lí pak-lāi, nn̄g-cho̍k beh tùi lí ê sin-khu chhut; chit-cho̍k beh khah-kiông hit-cho̍k; sī-tōa-ê beh ho̍k-sāi sī-sòe-ê.

24生產ê日期到，果然腹內是雙生ê。Seng-sán ê ji̍t-kî kàu, kó-jiân pak-lāi sī siang-siⁿ-ê.

25頭一個出來ê，身體紅紅，thong身軀親像皮á衫；就kā伊號名做以掃。Thâu-chi̍t-ê chhut-lâi-ê, sin-thé âng-âng, thong sin-khu chhin-chhiūⁿ phê-á-saⁿ; chiū kā i hō-miâ chòe Í-sò.

26tè後伊ê小弟koh出來，伊ê手擒以掃ê腳後tiⁿ；就kā伊號名叫雅各。兩個kiáⁿ出世ê時，以撒tú-á六十歲。Tè-āu i ê sió-tī koh chhut-lâi, i ê chhiú khîⁿ Í-sò ê kha-āu-tiⁿ; chiū kā i hō-miâ kiò Ngá-kok. Nn̄g ê kiáⁿ chhut-sì ê sî, Í-sat tú-á la̍k-cha̍p hè.

27兩個gín-á漸漸大；以掃gâu phah獵，常常tī山野；雅各做人恬靜，常常tòa布棚內。Nn̄g ê gín-á chiām-chiām tōa; Í-sò gâu phah-la̍h, siông-siông tī soaⁿ-iá; Ngá-kok chòe-lâng thiâm-chēng, siông-siông tòa pò͘-pîⁿ-lāi.

28以撒疼以掃，因為常常食伊ê野味。利百加疼雅各。Í-sat thiàⁿ Í-sò, in-ūi siông-siông chia̍h i ê iá-bī. Lī-pek-ka thiàⁿ Ngá-kok.

29有一日雅各煮湯，以掃tùi山野tò來，厭倦到極。Ū chi̍t ji̍t Ngá-kok chú-thng, Í-sò tùi soaⁿ-iá tò-lâi, ià-siān kàu-ke̍k.

30以掃對雅各講，我真厭倦，求你用chit-ê紅ê湯hō͘我食；因為án-ni以掃亦名叫以東。Í-sò tùi Ngá-kok kóng, Góa chin ià-siān, kiû lí ēng chit ê âng ê thng hō͘ góa chia̍h; in-ūi án-ni Í-sò ia̍h miâ kiò Í-tong.

31雅各講，你今á日用大kiáⁿ ê名份賣hō͘我。Ngá-kok kóng, Lí kin-á-ji̍t ēng tōa-kiáⁿ ê bêng-hūn bōe hō͘ góa.

32以掃講，我to beh死lah；chit-ê大kiáⁿ ê名份，對tī我有啥利益？Í-sò kóng, Góa to beh sí lah; chit ê tōa-kiáⁿ ê bêng-hūn, tùi tī góa ū siáⁿ lī-ek?

33雅各講，今á日你tio̍h對我chiù-chōa。伊就對伊chiù-chōa，將大kiáⁿ ê名份賣hō͘雅各。Ngá-kok kóng, Kin-á-ji̍t lí tio̍h tùi góa chiù-chōa. I chiū tùi i chiù-chōa, chiong tōa-kiáⁿ ê bêng-hūn bōe hō͘ Ngá-kok.

34雅各就將餅kap紅豆湯hō͘以掃；伊就lim食，起來做伊去；這就是以掃看輕大kiáⁿ ê名份。Ngá-kok chiū chiong piáⁿ kap âng-tāu-thng hō͘ Í-sò; i chiū lim-chia̍h, khí-lâi chòe i khì; che chiū-sī Í-sò khòaⁿ-khin tōa-kiáⁿ ê bêng-hūn.

1亞伯拉罕ê時，頭一pái飢荒以後，hit所在koh有飢荒。以撒就去Ki-la̍h-jíⁿ，到腓利士ê王A-pí-bí-le̍k hia。A-pek-la̍h-hán ê sî, thâu-chi̍t-pái ki-hng í-āu, hit só͘-chāi koh ū ki-hng. Í-sat chiū khì Ki-la̍h-jíⁿ, kàu Hui-lī-sū ê ông A-pí-bí-le̍k hia.

2耶和華對伊出現講，你m̄-thang落去埃及，tio̍h tòa tī我所指示你ê地。Iâ-hô-hoa tùi i chhut-hiān kóng, Lí m̄-thang lo̍h-khì Ai-ki̍p, tio̍h tòa tī Góa só͘ chí-sī lí ê tōe.

3你寄居tī chit-ê地，我beh kap你tī-teh，賜福你；因為我beh將chiah-ê地lóng hō͘你，kap你ê後裔；我beh堅固我對你ê父亞伯拉罕所chiù ê chōa。Lí kià-ku tī chit ê tōe, Góa beh kap lí tī-teh, sù-hok lí; in-ūi Góa beh chiong chiah ê tōe lóng hō͘ lí, kap lí ê hō͘-è; Góa beh kian-kò͘ Góa tùi lí ê pē A-pek-la̍h-hán só͘ chiù ê chōa.

4我beh加添你ê後裔，親像天裡ê 星hiah-chōe；koh beh將chiah-ê地lóng hō͘你ê後裔；koh地上萬國beh因為你ê後裔得tio̍h福氣。Góa beh ke-thiⁿ lí ê hō͘-è, chhin-chhiūⁿ thiⁿ-ni̍h ê chhiⁿ hiah-chōe; koh beh chiong chiah ê tōe lóng hō͘ lí ê hō͘-è; koh tōe-chiūⁿ bān-kok beh in-ūi lí ê hō͘-è tit-tio̍h hok-khì.

5是因為亞伯拉罕聽我ê話，守我ê吩咐，我ê命令，我ê律例，我ê法度。Sī in-ūi A-pek-la̍h-hán thiaⁿ Góa ê ōe, siú Góa ê hoan-hù, Góa ê bēng-lēng, Góa ê lu̍t-lē, góa ê hoat-tō͘.

6以撒khiā起Ki-la̍h-jíⁿ。Í-sat khiā-khí Ki-la̍h-jíⁿ .

7Hit所在ê人問到伊ê bó͘；伊就講，伊是我ê小妹；m̄敢講，是我ê bó͘；心內想，驚了hit所在ê人為tio̍h利百加ê緣故thâi我；因為伊面貌真súi。Hit só͘-chāi ê lâng mn̄g kàu i ê bó͘; i chiū kóng, I sī góa ê sió-bē; m̄-káⁿ kóng, Sī góa ê bó͘; sim-lāi siūⁿ, Kiaⁿ-liáu hit só͘-chāi ê lâng ūi-tio̍h Lī-pek-ka ê iân-kò͘ thâi góa; in-ūi i bīn-māu chin súi.

8伊tī-hia已經久，腓利士王，A-pí-bí-le̍k，tùi窗á看；看見以撒kap伊ê bó͘利百加teh kún笑。I tī-hia í-keng kú, Hui-lī-sū ông, A-pí-bí-le̍k, tùi thang-á khòaⁿ; khòaⁿ-kìⁿ Í-sat kap i ê bó͘ Lī-pek-ka teh kún-chhiò.

9A-pí-bí-le̍k叫以撒來，kā伊講，伊實在是你ê bó͘；你啥事講，伊是我ê小妹？以撒講，我心內想，驚了我為tio̍h伊來死。A-pí-bí-le̍k kiò Í-sat lâi, kā i kóng, I si̍t-chāi sī lí ê bó͘; lí siáⁿ-sū kóng, I sī góa ê sió-bē? Í-sat kóng, Góa sim-lāi siūⁿ, kiaⁿ-liáu góa ūi-tio̍h i lâi sí.

10A-pí-bí-le̍k講，你對阮所做ê是甚麼事？百姓ê中間，險險有人kap你ê bó͘相kap睏；你就hō͘阮陷落罪。A-pí-bí-le̍k kóng, Lí tùi goán só͘-chòe-ê sī sím-mi̍h sū? peh-sìⁿ ê tiong-kan, hiám-hiám ū lâng kap lí ê bó͘ saⁿ-kap khùn; lí chiū hō͘ goán hām-lo̍h chōe.

11Tùi hit-tia̍p，A-pí-bí-le̍k就吩咐眾百姓講，凡若kha̍p-tio̍h chit人kap伊ê bó͘-ê，定tio̍h beh hō͘伊死。Tùi hit-tia̍p A-pí-bí-le̍k chiū hoan-hù chèng peh-sìⁿ kóng, Hoān-nā kha̍p-tio̍h chit-lâng kap i ê bó͘-ê, tiāⁿ-tio̍h beh hō͘ i sí.

12以撒tī hit所在種作，hit年得tio̍h百倍；耶和華賜伊福氣。Í-sat tī hit só͘-chāi chèng-choh, hit-nî tit-tio̍h pah-pē; Iâ-hô-hoa sù i hok-khì.

13伊就成做大，ná久ná大，到成做大富戶。I chiū chiâⁿ-chòe tōa, ná-kú ná-tōa, kàu chiâⁿ-chòe tōa hù-hō͘.

14伊有羊群牛群，亦有chōe-chōe奴僕；腓利士人就怨妒伊。I ū iûⁿ-kûn gû-kûn, ia̍h ū chōe-chōe lô͘-po̍k; Hui-lī-sū lâng chiū oàn-tò͘ i.

15當伊ê老父亞伯拉罕tī-teh ê日，伊ê老父ê奴僕所開ê井，腓利士人lóng kā伊塞去，用土thūn滿。Tng i ê lāu-pē A-pek-la̍h-hán tī-teh ê ji̍t, i ê lāu-pē ê lô͘-po̍k só͘ khui ê chíⁿ, Hui-lī-sū lâng lóng kā i that-khì, ēng thô͘ thūn-móa.

16A-pí-bí-le̍k kā以撒講，你tio̍h離開阮去，因為你比阮嶄然khah強盛。A-pí-bí-le̍k kā Í-sat kóng, Lí tio̍h lī-khui goán khì, in-ūi lí pí goán chám-jiân khah kiông-sēng.

17以撒就離開hia，tī Ki-la̍h-jíⁿ ê山谷搭布棚，tiàm hia khiā起。Í-sat chiū lī-khui hia, tī Ki-la̍h-jíⁿ ê soaⁿ-kok tah pò͘-pîⁿ, tiàm hia khiā-khí.

18當伊ê老父亞伯拉罕tī-teh ê日，所開hiah-ê水井，到亞伯拉罕死後，hō͘腓利士人thūn去；以撒重再kā伊開；猶原照in老父所號ê名來名hiah-ê井。Tng i ê lāu-pē A-pek-la̍h-hán tī-teh ê ji̍t, só͘ khui hiah ê chúi-chíⁿ, kàu A-pek-la̍h-hán sí-āu, hō͘ Hui-lī-sū lâng thūn-khì; Í-sat têng-chài kā i khui; iû-goân chiàu in lāu-pē só͘ hō ê miâ lâi miâ hiah ê chíⁿ.

19以撒ê奴僕tī山谷teh掘，tú-tio̍h一個活水ê井。Í-sat ê lô͘-po̍k tī soaⁿ-kok teh ku̍t, tú-tio̍h chi̍t ê oa̍h-chúi ê chíⁿ.

20Ki-la̍h-jíⁿ ê牧者kap以撒ê牧者相爭，講，Chit-ê水是阮ê。以撒就號hit-ê井ê名叫Ai-sek；因為in kap伊相爭。Ki-la̍h-jíⁿ ê bo̍k-chiá kap Í-sat ê bo̍k-chiá saⁿ-chiⁿ, kóng, Chit ê chúi sī goán-ê. Í-sat chiū hō hit ê chíⁿ ê miâ kiò Ai-sek; in-ūi in kap i saⁿ-chiⁿ.

21In koh 開一個井，為chit-ê井koh相爭；就叫伊ê名Se-thê-ná。In koh khui chi̍t ê chíⁿ, ūi chit ê chíⁿ koh saⁿ-chiⁿ; chiū kiò i ê miâ Se-thê-ná.

22離開hia koh 開一個井；in無為chit-ê井koh相爭；就kā伊號名Lī-hô-pek；是講，耶和華taⁿ hō͘阮開闊ê地；阮beh tī chit-ê地興旺。Lī-khui hia koh khui chi̍t ê chíⁿ; in bô ūi chit ê chíⁿ koh saⁿ-chiⁿ; chiū kā i hō miâ Lī-hô-pek; sī kóng, Iâ-hô-hoa taⁿ hō͘ goán khui-khoah ê tōe; goán beh tī chit ê tōe heng-ōng.

23以撒tùi hia上去別是巴。Í-sat tùi hia chiūⁿ-khì Pia̍t-sī-pa.

24Hit暝耶和華對伊出現講，我是你ê老父亞伯拉罕ê上帝，m̄免驚；因為我kap你tī-teh，beh賜福你，hō͘你ê後裔興旺，lóng是為tio̍h我ê奴僕亞伯拉罕ê緣故。Hit-mî Iâ-hô-hoa tùi i chhut-hiān kóng, Góa sī lí ê lāu-pē A-pek-la̍h-hán ê Siōng-tè, m̄-bián kiaⁿ; in-ūi Góa kap lí tī-teh, beh sù-hok lí, hō͘ lí ê hō͘-è heng-ōng, lóng sī ūi-tio̍h Góa ê lô͘-po̍k A-pek-la̍h-hán ê iân-kò͘.

25伊就tī-hia起一座壇，求叫耶和華ê名，tī-hia搭伊ê布棚。以撒ê奴僕就tī-hia開一個井。I chiū tī-hia khí chi̍t chō tôaⁿ, kiû-kiò Iâ-hô-hoa ê miâ, tī-hia tah i ê pò͘-pîⁿ. Í-sat ê lô͘-po̍k chiū tī-hia khui chi̍t ê chíⁿ.

26A-pí-bí-le̍k kap伊ê朋友A-hō͘-sat以及伊ê軍長Hui-kok，tùi Ki-la̍h-jíⁿ來見伊。A-pí-bí-le̍k kap i ê pêng-iú A-hō͘-sat í-ki̍p i ê kun-tiúⁿ Hui-kok, tùi Ki-la̍h-jíⁿ lâi kìⁿ-i.

27以撒對in講，Lín既然怨恨我，kah我離開lín；taⁿ啥事來我chia？Í-sat tùi in kóng, Lín kì-jiân oàn-hūn góa, kah góa lī-khui lín; taⁿ siáⁿ-sū lâi góa chia?

28In講，阮明明看見耶和華kap你tī-teh，m̄值tio̍h咱中間你阮chiù-chōa，hō͘阮kap你立約；In kóng, Goán bêng-bêng khòaⁿ-kìⁿ Iâ-hô-hoa kap lí tī-teh, m̄-ta̍t-tio̍h lán tiong-kan lí goán chiù-chōa, hō͘ goán kap lí li̍p-iok;

29你無害阮，親像阮未bat kha̍p-tio̍h你，獨獨好款待你，送你安然tò去；taⁿ你是耶和華賜福ê。lí bô hāi goán, chhin-chhiūⁿ goán bē-bat kha̍p-tio̍h lí, to̍k-to̍k hó khoán-thāi lí, sàng lí an-jiân tò-khì; taⁿ lí sī Iâ-hô-hoa sù-hok-ê.

30以撒就為in設筵席，in就食就lim。Í-sat chiū ūi in siat iân-sia̍h, in chiū chia̍h chiū lim.

31透早起來，大家chiù-chōa；以撒送in起身，in就安然離開伊去。Thàu-chá khí-lâi, tāi-ke chiù-chōa; Í-sat sàng in khí-sin, in chiū an-jiân lī-khui i khì.

32Siâng hit日，以撒ê奴僕來，將in開井ê事通知伊；講，阮得tio̍h水lah。Siâng hit-ji̍t, Í-sat ê lô͘-po̍k lâi, chiong in khui-chíⁿ ê sū thong-ti i; kóng, Goán tit-tio̍h chúi lah.

33伊就叫hit-ê井ê名叫Sī-pa；所以到今á日hit-ê城ê名叫做別是巴。I chiū kiò hit ê chíⁿ ê miâ kiò Sī-pa; só͘-í kàu kin-á-ji̍t hit ê siâⁿ ê miâ kiò-chòe Pia̍t-sī-pa.

34以掃四十歲ê時，娶Hek人Pí-lī ê cha-bó͘-kiáⁿ Iû-tek，kap Hek人Í-lûn ê cha-bó͘-kiáⁿ Pa-si̍t-boat做bó͘。Í-sò sì-cha̍p hè ê sî, chhōa Hek-lâng Pí-lī ê cha-bó͘-kiáⁿ Iû-tek, kap Hek-lâng Í-lûn ê cha-bó͘-kiáⁿ Pa-si̍t-boat chòe bó͘.

35Chit兩個婦人人常常hō͘以撒kap利百加心內大憂悶。Chit nn̄g ê hū-jîn-lâng siông-siông hō͘ Í-sat kap Lī-pek-ka sim-lāi tōa iu-būn.