1以撒年老，目睭花bōe看見，就叫伊ê大kiáⁿ以掃來，kā伊講，我ê kiáⁿ ah；伊應講，我tī-chia。Í-sat nî-lāu, ba̍k-chiu hoe bōe khòaⁿ-kìⁿ, chiū kiò i ê tōa-kiáⁿ Í-sò lâi, kā i kóng, Góa ê kiáⁿ ah; i ìn kóng, Góa tī-chia.

2講，我taⁿ老lah，m̄知tah-lo̍h一日beh死。Kóng, Góa taⁿ lāu lah, m̄-chai tah-lo̍h chi̍t-ji̍t beh sí.

3Taⁿ kia̍h你ê ke-si，就是箭袋kap弓，去山裡，kā我phah獵，Taⁿ kia̍h lí ê ke-si, chiū-sī chìⁿ-tē kap keng, khì soaⁿ-ni̍h, kā góa phah-la̍h,

4照我所合意ê，煮hō͘伊好滋味，捧來hō͘我，我thang食；hō͘我tī未死ê事先kā你祝福。chiàu góa só͘ kah-ì ê, chú hō͘ i hó chu-bī, phâng-lâi hō͘ góa, góa thang chia̍h; hō͘ góa tī bē sí ê tāi-seng kā lí chiok-hok.

5以撒kā伊ê kiáⁿ以掃講話ê時，利百加聽見。以掃去山裡beh phah獵，thang帶tò來。Í-sat kā i ê kiáⁿ Í-sò kóng-ōe ê sî, Lī-pek-ka thiaⁿ-kìⁿ. Í-sò khì soaⁿ-ni̍h beh phah-la̍h, thang tòa tò-lâi.

6利百加就對伊ê kiáⁿ雅各講，你看，我聽見lín老父kā你ê兄以掃講，Lī-pek-ka chiū tùi i ê kiáⁿ Ngá-kok kóng, Lí khòaⁿ, góa thiaⁿ-kìⁿ lín lāu-pē kā lí ê hiaⁿ Í-sò kóng,

7你將野獸kā我帶來，kā我煮hō͘伊好滋味，hō͘我食；我beh tī未死ê事先，tī耶和華ê面前kā你祝福。Lí chiong iá-siù kā góa tòa-lâi, kā góa chú hō͘ i hó chu-bī, hō͘ góa chia̍h; góa beh tī bē sí ê tāi-seng, tī Iâ-hô-hoa ê bīn-chêng kā lí chiok-hok.

8Taⁿ我ê kiáⁿ，你tio̍h聽我ê話，照我所吩咐你ê。Taⁿ góa ê kiáⁿ, lí tio̍h thiaⁿ góa ê ōe, chiàu góa só͘ hoan-hù lí-ê.

9你去羊群hia，kā我掠兩隻肥ê山羊á來；我beh kā你ê老父煮好ê味素，照伊所合意ê。Lí khì iûⁿ-kûn hia, kā góa lia̍h nn̄g chiah pûi ê soaⁿ-iûⁿ-á lâi; góa beh kā lí ê lāu-pē chú hó ê bī-sò͘, chiàu i só͘ kah-ì-ê.

10你捧去lín老父hia，hō͘伊食；hō͘伊tī未死ê事先kā你祝福。Lí phâng-khì lín lāu-pē hia, hō͘ i chia̍h; hō͘ i tī bē sí ê tāi-seng kā lí chiok-hok.

11雅各對伊ê老母利百加講，M̄-kú我ê兄以掃身軀有毛，我是光滑。Ngá-kok tùi i ê lāu-bú Lī-pek-ka kóng, M̄-kú góa ê hiaⁿ Í-sò sin-khu ū mn̂g, góa sī kng-ku̍t.

12設使我ê老父摸tio̍h我，beh看我做欺騙人ê，我就招咒詛；無得tio̍h祝福。Siat-sú góa ê lāu-pē bong-tio̍h góa, beh khòaⁿ góa chòe khi-phiàn lâng-ê, góa chiū chio chiù-chó͘; bô tit-tio̍h chiok-hok.

13伊ê老母講，我ê kiáⁿ ah，你招ê咒詛歸tī我；做你聽我ê話，去掠來hō͘我。I ê lāu-bú kóng, Góa ê kiáⁿ ah, lí chio ê chiù-chó͘ kui tī góa; chòe lí thiaⁿ góa ê ōe, khì lia̍h lâi hō͘ góa.

14伊就去掠來hō͘伊ê老母；老母就煮好ê滋味，照老父所合意ê。I chiū khì lia̍h lâi hō͘ i ê lāu-bú; lāu-bú chiū chú hó ê chu-bī, chiàu lāu-pē só͘ kah-ì-ê.

15利百加koh hiaⁿh大kiáⁿ以掃收tī伊家內ê súi衫，kā伊ê細kiáⁿ雅各穿。Lī-pek-ka koh hiaⁿh tōa-kiáⁿ Í-sò siu tī i ke-lāi ê súi-saⁿ, kā i ê sòe-kiáⁿ Ngá-kok chhēng.

16Koh用山羊á皮包雅各ê手，kap伊頷頸光滑ê位。Koh ēng soaⁿ-iûⁿ-á phê pau Ngá-kok ê chhiú, kap i ām-kún kng-ku̍t ê ūi.

17就將所煮ê好滋味kap餅，hē tī伊ê kiáⁿ雅各ê手。Chiū chiong só͘ chú ê hó chu-bī kap piáⁿ, hē tī i ê kiáⁿ Ngá-kok ê chhiú.

18雅各到in老父hia，講，我ê父ah；伊講，我tī-chia；我ê kiáⁿ，你是是誰？Ngá-kok kàu in lāu-pē hia, kóng, Góa ê pē ah; i kóng, Góa tī-chia; góa ê kiáⁿ, lí sī chī-chūi?

19雅各對伊ê老父講，我是你ê大kiáⁿ以掃；我已經照你所吩咐我ê去行；請你起來坐，食我所phah-tio̍h-ê，好thang kā我祝福。Ngá-kok tùi i ê lāu-pē kóng, Góa sī lí ê tōa-kiáⁿ Í-sò; góa í-keng chiàu lí só͘ hoan-hù góa-ê khì kiâⁿ; chhiáⁿ lí khí-lâi chē, chia̍h góa só͘ phah-tio̍h-ê, hó thang kā góa chiok-hok.

20以撒對伊ê kiáⁿ講，我ê kiáⁿ，你怎樣chiah快得tio̍h？伊講，因為你ê上帝耶和華hō͘我好遭遇來得tio̍h。Í-sat tùi i ê kiáⁿ kóng, Góa ê kiáⁿ, lí cháiⁿ-iūⁿ chiah khoài tit-tio̍h? I kóng, In-ūi lí ê Siōng-tè Iâ-hô-hoa hō͘ góa hó cho-gū lâi tit-tio̍h.

21以撒kā雅各講，我ê kiáⁿ ah，你近óa來，我beh摸你，看你真正是我ê kiáⁿ以掃，á m̄是。Í-sat kā Ngá-kok kóng, Góa ê kiáⁿ ah, lí kūn-óa-lâi, góa beh bong lí, khòaⁿ lí chin-chiàⁿ sī góa ê kiáⁿ Í-sò, á m̄-sī.

22雅各就óa近伊ê老父以撒；伊就摸伊講，聲，是雅各ê聲；手，是以掃ê手。Ngá-kok chiū óa-kūn i ê lāu-pē Í-sat; i chiū bong i kóng, Siaⁿ, sī Ngá-kok ê siaⁿ; chhiú, sī Í-sò ê chhiú.

23以撒分別bōe明，因為伊ê手有毛，親像伊ê兄以掃ê手；就kā伊祝福。Í-sat hun-piat bōe bêng, in-ūi i ê chhiú ū mn̂g, chhin-chhiūⁿ i ê hiaⁿ Í-sò ê chhiú; chiū kā i chiok-hok.

24Koh講，你真正是我ê kiáⁿ以掃mah？伊講，我是。Koh kóng, Lí chin-chiàⁿ sī góa ê kiáⁿ Í-sò mah? I kóng, Góa sī.

25以撒講，捧來hō͘我，我beh食我ê kiáⁿ所得tio̍h ê野味，好thang kā你祝福。就捧hō͘伊，伊就食；亦捧酒hō͘伊，伊就lim。Í-sat kóng, Phâng-lâi hō͘ góa, góa beh chia̍h góa ê kiáⁿ só͘ tit-tio̍h ê iá-bī, hó thang kā lí chiok-hok. Chiū phâng hō͘ i, i chiū chia̍h; ia̍h phâng chiú hō͘ i, i chiū lim.

26伊ê老父以撒對伊講，我ê kiáⁿ，進前來chim我。I ê lāu-pē Í-sat tùi i kóng, Góa ê kiáⁿ, chìn-chêng lâi chim góa.

27伊就進前，chim伊ê老父；伊ê老父phīⁿ-tio̍h伊ê衫ê芳味，就kā伊祝福講： 我ê kiáⁿ ê芳味， 親像耶和華賜福ê田ê芳味；I chiū chìn-chêng, chim i ê lāu-pē; i ê lāu-pē phīⁿ-tio̍h i ê saⁿ ê phang-bī, chiū kā i chiok-hok kóng: Góa ê kiáⁿ ê phang-bī, Chhin-chhiūⁿ Iâ-hô-hoa sù-hok ê chhân ê phang-bī;

28願上帝賞賜你天頂ê甘露； 世上ê肥地， 五穀kap新ê酒真chōe；Goān Siōng-tè siúⁿ-sù lí thiⁿ-téng ê kam-lō͘; Sè-chiūⁿ ê pûi-tōe, Gō͘-kak kap sin ê chiú chin-chōe;

29眾百姓服事你， 列國跪拜你， 你做你兄弟ê主， 你ê老母ê kiáⁿ跪拜你； 咒詛你ê受咒詛， 祝福你ê得tio̍h福氣。Chèng peh-sìⁿ ho̍k-sāi lí, Lia̍t-kok kūi-pài lí, Lí chòe lí hiaⁿ-tī ê chú, Lí ê lāu-bú ê kiáⁿ kūi-pài lí; Chiù-chó͘ lí-ê siū chiù-chó͘, Chiok-hok lí-ê tit-tio̍h hok-khì.

30以撒kā雅各祝福明白，雅各tú-tú tùi伊ê老父以撒hia出來，伊ê兄以掃phah獵tò來。Í-sat kā Ngá-kok chiok-hok bêng-pe̍k, Ngá-kok tú-tú tùi i ê lāu-pē Í-sat hia chhut-lâi, i ê hiaⁿ Í-sò phah-la̍h tò-lâi.

31伊亦煮好ê味素，捧來hō͘伊ê老父，講，我ê父ah，請起來食kiáⁿ所phah-tio̍h-ê，好thang kā我祝福。I ia̍h chú hó ê bī-sò͘, phâng-lâi hō͘ i ê lāu-pē, kóng, Góa ê pē ah, chhiáⁿ khí-lâi chia̍h kiáⁿ só͘ phah-tio̍h-ê, hó thang kā góa chiok-hok.

32伊ê老父以撒kā伊講，你是是誰？伊講，我是你ê kiáⁿ，就是你ê大kiáⁿ，以掃。I ê lāu-pē Í-sat kā i kóng, Lí sī chī-chūi? I kóng, Góa sī lí ê kiáⁿ, chiū-sī lí ê tōa-kiáⁿ, Í-sò.

33以撒大驚，ngia̍uh-ngia̍uh-chhoah，講，He是是誰，你未來ê事先，捧伊所phah-tio̍h-ê來hō͘我；我食伊，kā伊祝福？伊的確beh得tio̍h福氣。Í-sat tōa-kiaⁿ, ngia̍uh-ngia̍uh-chhoah, kóng, He sī chī-chūi, lí bē lâi ê tāi-seng, phâng i só͘ phah-tio̍h-ê lâi hō͘ góa; góa chia̍h i, kā i chiok-hok? i tek-khak beh tit-tio̍h hok-khì.

34以掃聽見老父ê話，開聲叫苦大哭；對伊ê老父講，我ê父ah，我，你亦tio̍h kā我祝福。Í-sò thiaⁿ-kìⁿ lāu-pē ê ōe, khui-siaⁿ kiò-khó͘ tōa-khàu; tùi i ê lāu-pē kóng, Góa ê pē ah, góa, lí ia̍h tio̍h kā góa chiok-hok.

35以撒講，你ê小弟用詭計來，搶你ê福份。Í-sat kóng, Lí ê sió-tī ēng khúi-kè lâi, chhiúⁿ lí ê hok-hūn.

36以掃講，伊名做雅各，kiám無真合mah？伊欺騙我兩pái；前搶我大kiáⁿ ê名份；你看，taⁿ伊koh搶我ê福份。Koh講，Kiám無留一個thang kā我祝福mah？Í-sò kóng, I miâ-chòe Ngá-kok, kiám bô chin ha̍p mah? i khi-phiàn góa nn̄g-pái; chêng chhiúⁿ góa tōa-kiáⁿ ê bêng-hūn; lí khòaⁿ, taⁿ i koh chhiúⁿ góa ê hok-hūn. Koh kóng, Kiám bô lâu chi̍t-ê thang kā góa chiok-hok mah?

37以撒應以掃講，我已經立伊做你ê主，亦將伊ê眾兄弟hō͘伊做奴僕；亦用五穀新酒養飼伊；我ê kiáⁿ ah，taⁿ我iáu能kā你做甚麼？Í-sat ìn Í-sò kóng, Góa í-keng li̍p i chòe lí ê chú, ia̍h chiong i ê chèng hiaⁿ-tī hō͘ i chòe lô͘-po̍k; ia̍h ēng gō͘-kak sin-chiú iúⁿ-chhī i; góa ê kiáⁿ ah, taⁿ góa iáu ōe kā lí chòe sím-mi̍h?

38以掃kā伊ê老父講，父ah，你ê祝福kiám只有一pái mah？我ê父ah，我，你亦tio̍h kā我祝福。Í-sò kā i ê lāu-pē kóng, Pē ah, lí ê chiok-hok kiám chí-ū chi̍t-pái mah? Góa ê pē ah, góa, lí ia̍h tio̍h kā góa chiok-hok.

39以掃開聲啼哭。伊ê老父以撒應伊，講： 你所khiā起ê，beh有世上ê肥地， 亦有天頂ê甘露；Í-sò khui-siaⁿ thî-khàu. I ê lāu-pē Í-sat ìn i, kóng: Lí só͘ khiā-khí-ê, beh ū sè-chiūⁿ ê pûi-tōe, Ia̍h ū thiⁿ-téng ê kam-lō͘;

40你beh óa靠刀劍度活，koh beh服事你ê小弟； 到你奮興ê時， Beh對你ê頷頸滾開伊ê牛擔。Lí beh óa-khò to-kiàm tō͘-oa̍h, koh beh ho̍k-sāi lí ê sió-tī; Kàu lí hùn-heng ê sî, Beh tùi lí ê ām-kún kùn-khui i ê gû-taⁿ.

41以掃因為伊ê老父kā雅各祝福氣，就怨恨雅各；心內講，為老父teng-iu ê時近lah；到hit時，我beh thâi死我ê小弟雅各。Í-sò in-ūi i ê lāu-pē kā Ngá-kok chiok hok-khì, chiū oàn-hūn Ngá-kok; sim-lāi kóng, Ūi lāu-pē teng-iu ê sî kūn-lah; kàu hit-sî, góa beh thâi-sí góa ê sió-tī Ngá-kok.

42有人將伊ê大kiáⁿ以掃ê話kā利百加講；伊就差人去叫伊ê細kiáⁿ雅各來，kā伊講，你ê兄以掃beh thâi你，來消伊ê恨氣。Ū lâng chiong i ê tōa-kiáⁿ Í-sò ê ōe kā Lī-pek-ka kóng; i chiū chhe lâng khì kiò i ê sòe-kiáⁿ Ngá-kok lâi, kā i kóng, Lí ê hiaⁿ Í-sò beh thâi lí, lâi siau i ê hūn-khì.

43Taⁿ我ê kiáⁿ，你tio̍h聽我ê話；起來，走去哈蘭，我ê兄拉班hia；Taⁿ góa ê kiáⁿ, lí tio̍h thiaⁿ góa ê ōe; khí-lâi, cháu khì Hap-lân, góa ê hiaⁿ La̍h-pan hia;

44kap伊tiàm幾日，thèng候你ê兄受氣消。kap i tiàm kúi-ji̍t, thèng-hāu lí ê hiaⁿ siū-khì siau.

45到你ê兄受氣soah，bōe記得你對伊所做ê事，hit時我就差人chhōa你tùi hia tò來。我啥事一日失落lín兩人？Kàu lí ê hiaⁿ siū-khì soah, bōe kì-tit lí tùi i só͘ chòe ê sū, hit-sî góa chiū chhe lâng chhōa lí tùi hia tò-lâi. Góa siáⁿ-sū chi̍t-ji̍t sit-lo̍h lín nn̄g-lâng?

46利百加kā以撒講，我因為chiah-ê Hek人ê cha-bó͘-kiáⁿ，連性命都 m̄-ài。設使雅各也娶chit所在ê cha-bó͘-kiáⁿ做bó͘，親像Hek人ê cha-bó͘-kiáⁿ hit款，我活有啥路用？Lī-pek-ka kā Í-sat kóng, Góa in-ūi chiah ê Hek-lâng ê cha-bó͘-kiáⁿ, liân sìⁿ-miā to m̄-ài. Siat-sú Ngá-kok iā chhōa chit só͘-chāi ê cha-bó͘-kiáⁿ chòe bó͘, chhin-chhiūⁿ Hek-lâng ê cha-bó͘-kiáⁿ hit-khoán, góa oa̍h ū siáⁿ lō͘-ēng?

1以撒叫雅各來，kā伊祝福，亦吩咐伊講，你m̄-thang娶迦南ê cha-bó͘-gín-á做bó͘。Í-sat kiò Ngá-kok lâi, kā i chiok-hok, ia̍h hoan-hù i kóng, Lí m̄-thang chhōa Ka-lâm ê cha-bó͘-gín-á chòe bó͘.

2你起來，去Pa-tàn-a-lân，到你ê外公Pí-thó͘-lī ê家；tī你ê母舅拉班cha-bó͘-kiáⁿ ê中間，娶一個做bó͘。Lí khí-lâi, khì Pa-tàn-a-lân, kàu lí ê gōa-kong Pí-thó͘-lī ê ke; tī lí ê bú-kū La̍h-pan cha-bó͘-kiáⁿ ê tiong-kan, chhōa chi̍t-ê chòe bó͘.

3願全能ê上帝賜福你，hō͘你生湠真chōe，成做chōe-chōe族。Goān choân-lêng ê Siōng-tè sù-hok lí, hō͘ lí siⁿ-thòaⁿ chin-chōe, chiâⁿ-chòe chōe-chōe cho̍k.

4Koh將所應允亞伯拉罕ê福氣hō͘你，kap你ê後裔；hō͘你承接你所寄居ê地，就是上帝所hō͘亞伯拉罕ê。Koh chiong só͘ èng-ún A-pek-la̍h-hán ê hok-khì hō͘ lí, kap lí ê hō͘-è; hō͘ lí sêng-chiap lí só͘-kià-ku ê tōe, chiū-sī Siōng-tè só͘ hō͘ A-pek-la̍h-hán-ê.

5以撒差雅各去；伊就去Pa-tàn-a-lân；到A-lân人Pí-thó͘-lī ê kiáⁿ拉班hia；伊是雅各以掃ê母舅。Í-sat chhe Ngá-kok khì; i chiū khì Pa-tàn-a-lân; kàu A-lân lâng Pí-thó͘-lī ê kiáⁿ La̍h-pan hia; i sī Ngá-kok Í-sò ê bú-kū.

6以掃看見以撒kā雅各祝福，koh差伊去Pa-tàn-a-lân，beh tùi hia娶bó͘；亦看見祝福伊ê時，吩咐伊講，M̄-thang娶迦南ê cha-bó͘-gín-á做bó͘；Í-sò khòaⁿ-kìⁿ Í-sat kā Ngá-kok chiok-hok, koh chhe i khì Pa-tàn-a-lân, beh tùi hia chhōa-bó͘; ia̍h khòaⁿ-kìⁿ chiok-hok i ê sî, hoan-hù i kóng, M̄-thang chhōa Ka-lâm ê cha-bó͘-gín-á chòe bó͘;

7koh看見雅各聽父母ê話，去Pa-tàn-a-lân；koh khòaⁿ-kìⁿ Ngá-kok thiaⁿ pē-bú ê ōe, khì Pa-tàn-a-lân;

8以掃就知迦南ê cha-bó͘-gín-á，伊ê老父以撒m̄中意；Í-sò chiū chai Ka-lâm ê cha-bó͘-gín-á, i ê lāu-pē Í-sat m̄-tèng-ì;

9以掃就去以實瑪利hia，tī伊hiah-ê bó͘以外，koh娶Má-hap-la̍h做bó͘；伊是亞伯拉罕ê kiáⁿ以實瑪利ê cha-bó͘-kiáⁿ，Nî-pâi-iok ê小妹。Í-sò chiū khì Í-si̍t-má-lī hia, tī i hiah ê bó͘ í-gōa, koh chhōa Má-hap-la̍h chòe-bó͘; i sī A-pek-la̍h-hán ê kiáⁿ Í-si̍t-má-lī ê cha-bó͘-kiáⁿ, Nî-pâi-iok ê sió-bē.

10雅各離開別是巴，ǹg哈蘭去。Ngá-kok lī-khui Pia̍t-sī-pa, ǹg Hap-lân khì.

11到一所在，因為日落，就tī-hia歇暝；tùi hiah-ê石頭ê中間，the̍h一塊做枕頭，tī-hia睏。Kàu chi̍t só͘-chāi, in-ūi ji̍t lo̍h, chiū tī-hia hioh-mî; tùi hiah ê chio̍h-thâu ê tiong-kan, the̍h chi̍t-tè chòe chím-thâu, tī-hia khùn.

12夢見有梯khiā tī地裡，梯頂抵天；有上帝ê使者tī梯裡teh上落。Bāng-kìⁿ ū thui khiā tī tōe-ni̍h, thui-téng tú-thiⁿ; ū Siōng-tè ê sù-chiá tī thui-ni̍h teh chiūⁿ-lo̍h.

13耶和華khiā tī梯頂，講，我是耶和華你ê祖亞伯拉罕ê上帝，亦是以撒ê上帝。我beh將你現在所睏ê地賞賜你，kap你ê後裔。Iâ-hô-hoa khiā tī thui-téng, kóng, Góa sī Iâ-hô-hoa lí ê chó͘ A-pek-la̍h-hán ê Siōng-tè, ia̍h sī Í-sat ê Siōng-tè. Góa beh chiong lí hiān-chāi só͘ khùn ê tōe siúⁿ-sù lí, kap lí ê hō͘-è.

14你ê後裔beh親像地上ê土沙；你beh tùi東西南北來發展；地上萬族beh因為你kap你ê後裔得tio̍h福氣。Lí ê hō͘-è beh chhin-chhiūⁿ tōe-chiūⁿ ê thô͘-soa; lí beh tùi tang, sai, lâm, pak lâi hoat-tián; tōe-chiūⁿ bān-cho̍k beh in-ūi lí kap lí ê hō͘-è tit-tio̍h hok-khì.

15我亦kap你tī-teh，你無論去tah-lo̍h，我beh保護你；亦beh chhōa你tò來chit所在，lóng無放sak你，到我成對你所講ê。Góa ia̍h kap lí tī-teh, lí bô-lūn khì tah-lo̍h, Góa beh pó-hō͘ lí; ia̍h beh chhōa lí tò-lâi chit só͘-chāi, lóng bô pàng-sak lí, kàu Góa chiâⁿ tùi lí só͘ kóng-ê.

16雅各睏醒講，耶和華真正tī-chia，我竟然m̄知。Ngá-kok khùn-chhíⁿ kóng, Iâ-hô-hoa chin-chiàⁿ tī-chia, góa kéng-jiân m̄-chai.

17就驚講，Chit所在到chiah thang 驚！m̄是別項，這是上帝ê厝，這是天ê門。Chiū kiaⁿ kóng, Chit só͘-chāi kàu chiah thang kiaⁿ! m̄-sī pa̍t-hāng, che sī Siōng-tè ê chhù, che sī thiⁿ ê mn̂g.

18雅各早早起來，將伊做枕頭ê石khiā做柱；倒油tī頂面。Ngá-kok chá-chá khí-lâi, chiong i chòe chím-thâu ê chio̍h khiā chòe thiāu; tò iû tī téng-bīn.

19就名hit所在叫Pek-te̍k-lī，chit-ê城本名Lō͘-su。Chiū miâ hit só͘-chāi kiò Pek-te̍k-lī, chit ê siâⁿ pún miâ Lō͘-su.

20雅各下願講，上帝若kap我tī-teh，tī我所行ê路保護我，koh hō͘我有物thang食，有衫thang穿，Ngá-kok hē-goān kóng, Siōng-tè nā kap góa tī-teh, tī góa só͘ kiâⁿ ê lō͘ pó-hō͘ góa, koh hō͘ góa ū mi̍h thang chia̍h, ū saⁿ thang chhēng,

21hō͘我安然tò來我ê父ê厝，就耶和華的確做我ê上帝。hō͘ góa an-jiân tò-lâi góa ê pē ê chhù, chiū Iâ-hô-hoa tek-khak chòe góa ê Siōng-tè.

22我所khiā做柱ê石beh做上帝ê厝；見若你所賞賜我ê，我beh將十份ê一份獻hō͘你。Góa só͘ khiā chòe thiāu ê chio̍h beh chòe Siōng-tè ê chhù; kìⁿ-nā Lí só͘ siúⁿ-sù góa ê, góa beh chiong cha̍p-hūn ê chi̍t-hūn hiàn hō͘ Lí.

1雅各起身，到東方ê人ê地；Ngá-kok khí-sin, kàu tang-hng ê lâng ê tōe;

2看見田裡有一口井，有三陣羊倒tī井邊，因為人hō͘羊群lim，lóng是用hit-ê井ê水；井嘴用大石蓋。khòaⁿ-kìⁿ chhân-ni̍h ū chi̍t kháu chíⁿ, ū saⁿ tīn iûⁿ tó tī chíⁿ-piⁿ, in-ūi lâng hō͘ iûⁿ-kûn lim, lóng sī ēng hit ê chíⁿ ê chúi; chíⁿ-chhùi ēng tōa chio̍h khàm.

3平時羊群聚集tī-hia，人就將石頭徙離井嘴，hō͘羊lim水；chiah koh將石頭徙到原位。Pêng-sî iûⁿ-kûn chū-chi̍p tī-hia, lâng chiū chiong chio̍h-thâu sóa lī chíⁿ-chhùi, hō͘ iûⁿ lim chúi; chiah koh chiong chio̍h-thâu sóa kàu goân-ūi.

4雅各對in講，兄弟ah，tùi tah-lo̍h來？in講，阮tùi哈蘭來。Ngá-kok tùi in kóng, Hiaⁿ-tī ah, tùi tah-lo̍h lâi? in kóng, Goán tùi Hap-lân lâi.

5問in講，拿福ê孫拉班，lín bat伊mah？Mn̄g in kóng, Ná-hok ê sun La̍h-pan, lín bat i mah?

6講，Bat伊。Koh對in講，伊平安mah？講，平安。你看，伊ê cha-bó͘-kiáⁿ拉結chhōa伊ê羊群teh來。kóng, Bat-i. Koh tùi in kóng, I pêng-an mah? kóng, Pêng-an. Lí khòaⁿ, i ê cha-bó͘-kiáⁿ La̍h-kiat chhōa i ê iûⁿ-kûn teh lâi.

7講，日iáu高，cheng-siⁿ聚集ê時未到，m̄值tio̍h hō͘羊lim水，koh去飼。Kóng, Ji̍t iáu koâiⁿ, cheng-siⁿ chū-chi̍p ê sî bē kàu, m̄-ta̍t-tio̍h hō͘ iûⁿ lim chúi, koh khì chhī.

8In講，阮bōe會，tio̍h thèng候chōe-chōe陣lóng聚集，人徙石離開井嘴，chiah thang hō͘羊lim。In kóng, Goán bōe-ōe, tio̍h thèng-hāu chōe-chōe tīn lóng chū-chi̍p, lâng sóa chio̍h lī-khui chíⁿ-chhùi, chiah thang hō͘ iûⁿ lim.

9雅各teh kap in講話ê時，拉結chhōa in老父ê羊來；因為是伊teh顧。Ngá-kok teh kap in kóng-ōe ê sî, La̍h-kiat chhōa in lāu-pē ê iûⁿ lâi; in-ūi sī i teh kò͘.

10雅各看見母舅拉班ê cha-bó͘-kiáⁿ拉結，kap母舅拉班ê羊群，就進前將石徙離井嘴，hō͘ in母舅拉班ê羊群lim。Ngá-kok khòaⁿ-kìⁿ bú-kū La̍h-pan ê cha-bó͘-kiáⁿ La̍h-kiat, kap bú-kū La̍h-pan ê iûⁿ-kûn, chiū chìn-chêng chiong chio̍h sóa lī chíⁿ-chhùi, hō͘ in bú-kū La̍h-pan ê iûⁿ-kûn lim.

11雅各kā拉結chim嘴，開聲哭。Ngá-kok kā La̍h-kiat chim-chhùi, khui-siaⁿ khàu.

12雅各koh kā拉結講伊是in老父ê外甥，是利百加ê kiáⁿ；拉結就走去kā in老父講。Ngá-kok koh kā La̍h-kiat kóng i sī in lāu-pē ê gōe-seng, sī Lī-pek-ka ê kiáⁿ; La̍h-kiat chiū cháu-khì kā in lāu-pē kóng.

13拉班聽見外甥雅各ê消息，就走去迎接伊，抱伊，kap伊chim嘴；chhōa伊到in tau；雅各將一切ê事情kā拉班講。La̍h-pan thiaⁿ-kìⁿ gōe-seng Ngá-kok ê siau-sit, chiū cháu-khì ngiâ-chih-i, phō-i, kap i chim-chhùi; chhōa i kàu in tau; Ngá-kok chiong it-chhè ê sū-chêng kā La̍h-pan kóng.

14拉班kā雅各講，你實在是我ê骨肉。伊就kap伊tòa一月日。La̍h-pan kā Ngá-kok kóng, Lí si̍t-chāi sī góa ê kut-jio̍k. I chiū kap i tòa chi̍t-ge̍h-ji̍t.

15拉班kā雅各講，你雖然是我ê親戚，kiám thang白白做我ê工；請kā我講，你beh甚麼工錢。La̍h-pan kā Ngá-kok kóng, Lí sui-jiân sī góa ê chhin-chhek, kiám thang pe̍h-pe̍h chòe góa ê kang; chhiáⁿ kā góa kóng, lí beh sím-mi̍h kang-chîⁿ.

16拉班有兩個cha-bó͘-kiáⁿ，大ê名叫利亞，細ê名叫拉結。La̍h-pan ū nn̄g ê cha-bó͘-kiáⁿ, tōa-ê miâ-kiò Lī-a, sòe-ê miâ-kiò La̍h-kiat.

17利亞目睭khah輸，拉結生做好看。Lī-a ba̍k-chiu khah-su, La̍h-kiat siⁿ-chòe hó-khòaⁿ.

18雅各疼拉結，就講，我願為tio̍h你細ê cha-bó͘-kiáⁿ拉結，kā你做工七年。Ngá-kok thiàⁿ La̍h-kiat, chiū kóng, Góa goān ūi-tio̍h lí sòe ê cha-bó͘-kiáⁿ La̍h-kiat, kā lí chòe-kang chhit-nî.

19拉班講，將伊嫁hō͘你，khah好hō͘別人；你kap我tòa。La̍h-pan kóng, Chiong i kè hō͘ lí, khah-hó hō͘ pa̍t-lâng; lí kap góa tòa.

20雅各就為tio̍h拉結kā伊做工七年；因為深疼伊，看做kúi-nā日。Ngá-kok chiū ūi-tio̍h La̍h-kiat kā i chòe kang chhit-nî; in-ūi chhim-thiàⁿ i, khòaⁿ-chòe kúi-nā ji̍t.

21雅各對拉班講，日期已經滿，求你將我ê bó͘ hō͘我，我thang kap伊同房。Ngá-kok tùi La̍h-pan kóng, Ji̍t-kî í-keng móa, kiû lí chiong góa ê bó͘ hō͘ góa, góa thang kap i tâng-pâng.

22拉班聚集hit所在ê眾人，辦筵席請in。La̍h-pan chū-chi̍p hit só͘-chāi ê chèng-lâng, pān iân-sia̍h chhiáⁿ in.

23到日暗，拉班將伊ê cha-bó͘-kiáⁿ利亞，送來hō͘伊；雅各就kap伊同房。Kàu ji̍t àm, La̍h-pan chiong i ê cha-bó͘-kiáⁿ Lī-a, sàng lâi hō͘ i; Ngá-kok chiū kap i tâng-pâng.

24拉班將伊ê女婢Sek-phàⁿ hō͘伊ê cha-bó͘-kiáⁿ利亞做女婢。La̍h-pan chiong i ê lú-pī Sek-phàⁿ hō͘ i ê cha-bó͘-kiáⁿ Lī-a chòe lú-pī.

25到天光，一下看見是利亞，就對拉班講，你kā我做ê，是甚麼？我kā你做工，kiám-m̄是為tio̍h拉結mah？你啥事騙我？Kàu thiⁿ-kng, chi̍t-ē khòaⁿ-kìⁿ sī Lī-a, chiū tùi La̍h-pan kóng, Lí kā góa chòe-ê, sī sím-mi̍h? Góa kā lí chòe-kang, kiám-m̄-sī ūi-tio̍h La̍h-kiat mah? lí siáⁿ-sū phiàn góa?

26拉班講，未嫁大ê事先嫁細ê，tī阮chia無人án-ni做。La̍h-pan kóng, Bē kè tōa-ê tāi-seng kè sòe-ê, tī goán chia bô lâng án-ni chòe.

27你kap chit-ê tio̍h滿七日；阮就將hit-ê亦嫁hō͘你；你為tio̍h伊koh kā我做工七年。Lí kap chit-ê tio̍h móa chhit-ji̍t; goán chiū chiong hit-ê ia̍h kè hō͘ lí; lí ūi-tio̍h i koh kā góa chòe kang chhit-nî.

28雅各就照án-ni行；kap chit-ê滿七日；伊就將伊ê cha-bó͘-kiáⁿ，拉結，hō͘伊做bó͘。Ngá-kok chiū chiàu án-ni kiâⁿ; kap chit-ê móa chhit-ji̍t; i chiū chiong i ê cha-bó͘-kiáⁿ, La̍h-kiat, hō͘ i chòe-bó͘.

29拉班將伊ê女婢Phek-la̍h，hō͘伊ê cha-bó͘-kiáⁿ拉結做女婢。La̍h-pan chiong i ê lú-pī Phek-la̍h, hō͘ i ê cha-bó͘-kiáⁿ La̍h-kiat chòe lú-pī.

30雅各亦kap拉結同房，koh疼拉結贏過利亞；就koh kā拉班做工七年。Ngá-kok ia̍h kap La̍h-kiat tâng-pâng, koh thiàⁿ La̍h-kiat iâⁿ-kè Lī-a; chiū koh kā La̍h-pan chòe-kang chhit-nî.

31耶和華看利亞無得寵，就hō͘伊懷孕；獨獨拉結無。Iâ-hô-hoa khòaⁿ Lī-a bô tek-thióng, chiū hō͘ i hoâi-īn; to̍k-to̍k La̍h-kiat bô.

32利亞懷孕生kiáⁿ，就kā伊號名Liû-piān；因為講，耶和華看見我ê苦情；taⁿ我ê丈夫beh疼我。Lī-a hoâi-īn siⁿ-kiáⁿ, chiū kā i hō-miâ Liû-piān; in-ūi kóng, Iâ-hô-hoa khòaⁿ-kìⁿ góa ê khó͘-chêng; taⁿ góa ê tiōng-hu beh thiàⁿ góa.

33伊koh懷孕生kiáⁿ；講，耶和華聽見我無得寵，所以koh hō͘我chit-ê kiáⁿ；就kā伊號名西門。I koh hoâi-īn siⁿ kiáⁿ; kóng, Iâ-hô-hoa thiaⁿ-kìⁿ góa bô tek-thióng, só͘-í koh hō͘ góa chit ê kiáⁿ; chiū kā i hō-miâ Se-biān.

34Koh懷孕生kiáⁿ，講，我kā丈夫生三個kiáⁿ，伊beh kap我結聯；名叫利未。Koh hoâi-īn siⁿ kiáⁿ, kóng, Góa kā tiōng-hu siⁿ saⁿ ê kiáⁿ, i beh kap góa kiat-liân; miâ kiò Lī-bī.

35Koh懷孕生kiáⁿ；講，Chit下我beh o-ló耶和華；所以叫伊ê名猶大；就停無koh生。Koh hoâi-īn siⁿ kiáⁿ; kóng, Chit-ē góa beh o-ló Iâ-hô-hoa; só͘-í kiò i ê miâ Iû-tāi; chiū thêng bô koh siⁿ.