1天地kap祂一切所有ê已經做完。Thiⁿ tōe kap I it-chhè só͘-ū-ê í-keng chòe-oân.

2Tī第七日，上帝完祂所造ê工；就tī第七日歇祂一切所造ê工。Tī tē-chhit ji̍t, Siōng-tè oân I só͘ chō ê kang; chiū tī tē-chhit ji̍t hioh I it-chhè só͘ chō ê kang.

3上帝賜福tī第七日，定做聖日；因為tī chit日上帝停祂一切創造ê工，就安歇。Siōng-tè sù-hok tī tē-chhit ji̍t, tēng chòe sèng-ji̍t; in-ūi tī chit-ji̍t Siōng-tè thêng I it-chhè chhòng-chō ê kang, chiū an-hioh.

4天地創造ê來歷，tī耶和華上帝造地kap天ê日，親像下底。Thiⁿ tōe chhòng-chō ê lâi-le̍k, tī Iâ-hô-hoa Siōng-tè chō tōe kap thiⁿ ê ji̍t, chhin-chhiūⁿ ē-tóe.

5山野一切ê草木未有tī地裡；山野一切ê菜蔬未有發；因為耶和華上帝無落雨tī地裡，也無人thang種作hit-ê土地。Soaⁿ-iá it-chhè ê chháu-ba̍k bē ū tī tōe-ni̍h; soaⁿ-iá it-chhè ê chhài-soe bē ū hoat; in-ūi Iâ-hô-hoa Siōng-tè bô lo̍h-hō͘ tī tōe-ni̍h, iā bô lâng thang chèng-choh hit ê thó͘-tōe.

6總是有霧tùi地起，潤澤遍地面。Chóng-sī ū bū tùi tōe khí, lūn-te̍k piàn tōe-bīn.

7耶和華上帝用地上ê土粉chhiau做人，pûn活ê氣入伊ê鼻孔；人就成做活ê靈魂。Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn oa̍h ê khì ji̍p i ê phīⁿ-khang; lâng chiū chiâⁿ-chòe oa̍h ê lêng-hûn.

8耶和華上帝tī東方，tī伊甸，種一個園；將所造ê人hē tī-hia。Iâ-hô-hoa Siōng-tè tī tang-hng, tī Ai-tiân, chèng chi̍t ê hn̂g; chiong só͘ chō ê lâng hē tī-hia.

9耶和華上帝hō͘ ta̍k樣ê樹tùi地裡發起來，好看也好食；tī園ê中間koh有活命ê樹，kap分別好pháiⁿ ê樹。Iâ-hô-hoa Siōng-tè hō͘ ta̍k-iūⁿ ê chhiū tùi tōe-ni̍h hoat-khí-lâi, hó-khòaⁿ iā hó-chia̍h; tī hn̂g ê tiong-kan koh ū oa̍h-miā ê chhiū, kap hun-piat hó-pháiⁿ ê chhiū.

10伊甸有河流出來灌ak hit-ê園；tùi-hia分開做四條。Ai-tiân ū hô lâu-chhut lâi koàn-ak hit ê hn̂g; tùi-hia hun-khui chòe sì-tiâu.

11頭一條名叫Pí-sùn；就是se̍h流tī Hap-hui-la̍h全地ê；tī-hia有出金；Thâu-chi̍t-tiâu miâ-kiò Pí-sùn; chiū-sī se̍h-lâu tī Hap-hui-la̍h choân-tōe-ê; tī-hia ū chhut kim;

12hit位ê金是真好；亦出珍珠、碧玉。hit-ūi ê kim sī chin-hó; ia̍h chhut chin-chu phek-ge̍k.

13第二條名叫Ki-hùn，就是se̍h流tī Kó͘-si̍t全地ê。Tē-jī-tiâu miâ kiò Ki-hùn, chiū-sī se̍h-lâu tī Kó͘-si̍t choân-tōe-ê.

14第三條名叫Hi-tí-kiat，就是流tī亞述ê東勢ê。第四條就是Pek-lat。Tē-saⁿ-tiâu miâ-kiò Hi-tí-kiat, chiū-sī lâu tī A-su̍t ê tang-sì-ê. Tē-sì-tiâu chiū-sī Pek-lat.

15耶和華上帝將hit-ê人hē tī伊甸園，來種作顧守。Iâ-hô-hoa Siōng-tè chiong hit ê lâng hē tī Ai-tiân hn̂g, lâi chèng-choh kò͘-siú.

16耶和華上帝吩咐hit-ê人講，園內ta̍k號樹ê果子，thang隨意來食。Iâ-hô-hoa Siōng-tè hoan-hù hit ê lâng kóng, Hn̂g-lāi ta̍k-hō chhiū ê ké-chí, thang sûi-ì lâi chia̍h.

17總是分別好pháiⁿ ê樹，伊ê果子m̄-thang食；因為食ê日你的確死。Chóng-sī hun-piat hó-pháiⁿ ê chhiū, i ê ké-chí m̄-thang chia̍h; in-ūi chia̍h ê ji̍t lí tek-khak sí.

18耶和華上帝講，人單身家己tòa m̄好；我beh kā伊造一個幫贊ê，來匹配伊。Iâ-hô-hoa Siōng-tè kóng, Lâng toaⁿ-sin ka-kī tòa m̄-hó; Góa beh kā i chō chi̍t ê pang-chān-ê, lâi phit-phòe i.

19耶和華上帝用土做山野ta̍k樣ê走獸，以及空中ta̍k樣ê飛鳥；chhōa到hit人ê面前，看伊beh稱in甚麼名；見若伊所稱ta̍k樣活物ê，就做hit-ê物ê名。Iâ-hô-hoa Siōng-tè ēng thô͘ chòe soaⁿ-iá ta̍k-iūⁿ ê cháu-siù, í-ki̍p khong-tiong ta̍k-iūⁿ ê pe-chiáu; chhōa kàu hit-lâng ê bīn-chêng, khòaⁿ i beh chheng in sím-mi̍h miâ; kìⁿ-nā i só͘ chheng ta̍k-iūⁿ oa̍h-mi̍h-ê, chiū chòe hit ê mi̍h ê miâ.

20Hit-ê人就kā一切ê cheng-siⁿ，kap空中ê飛鳥，kap山野一切ê走獸lóng號名；總是chhē無一個thang做hit人ê幫贊，來匹配伊。Hit ê lâng chiū kā it-chhè ê cheng-siⁿ, kap khong-tiong ê pe-chiáu, kap soaⁿ-iá it-chhè ê cháu-siù lóng hō miâ; chóng-sī chhē bô chi̍t-ê thang chòe hit lâng ê pang-chān, lâi phit-phòe i.

21耶和華上帝hō͘ hit-ê人睏重眠，伊就睏；就the̍h伊ê hia̍p骨一支，包密伊ê肉。Iâ-hô-hoa Siōng-tè hō͘ hit ê lâng khùn tāng-bîn, i chiū khùn; chiū the̍h i ê hia̍p-kut chi̍t-ki, pau-ba̍t i ê bah.

22耶和華上帝就將tùi hit人所the̍h出ê hia̍p骨，造成一個cha-bó͘人，chhōa來就近hit人。Iâ-hô-hoa Siōng-tè chiū chiong tùi hit-lâng só͘ the̍h-chhut ê hia̍p-kut, chō-chiâⁿ chi̍t ê cha-bó͘-lâng, chhōa lâi chiū-kūn hit-lâng.

23Hit人講，Taⁿ chit-ê是我骨內ê骨，肉內ê肉；beh稱做cha-bó͘人，因為伊是tùi ta-po͘人the̍h出。Hit-lâng kóng, Taⁿ chit-ê sī góa kut-lāi ê kut, bah-lāi ê bah; beh chheng-chòe cha-bó͘-lâng, in-ūi i sī tùi ta-po͘-lâng the̍h-chhut.

24所以人beh離開伊ê父母，結聯伊ê bó͘，in就成做一體。Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chi̍t-thé.

25Ang-bó͘兩人平平thǹg-pak-theh，也無見笑。Ang-bó͘ nn̄g-lâng pîⁿ-pîⁿ thǹg-pak-theh, iā bô kiàn-siàu.

1耶和華上帝所造山野一切ê活物，蛇是比in khah狡譎。蛇tùi婦人人講，上帝kiám有影講，園內一切ê樹，lín lóng m̄-thang食mah？Iâ-hô-hoa Siōng-tè só͘ chō soaⁿ-iá it-chhè ê oa̍h-mi̍h, chôa sī pí in khah káu-khiat. Chôa tùi hū-jîn-lâng kóng, Siōng-tè kiám ū-iáⁿ kóng, Hn̂g-lāi it-chhè ê chhiū, lín lóng m̄-thang chia̍h mah?

2婦人人對蛇講，園內樹裡ê果子阮thang食；Hū-jîn-lâng tùi chôa kóng, Hn̂g-lāi chhiū-ni̍h ê ké-chí goán thang chia̍h;

3只有園中央hit叢樹ê果子上帝bat講，Lín m̄-thang食伊，亦m̄-thang摸，驚了會死。chí-ū hn̂g tiong-ng hit châng chhiū ê ké-chí Siōng-tè bat kóng, Lín m̄-thang chia̍h-i, ia̍h m̄-thang bong, kiaⁿ-liáu ōe sí.

4蛇對婦人人講，Lín無的確會死。Chôa tùi hū-jîn-lâng kóng, Lín bô tek-khak ōe sí.

5因為上帝知lín食ê日，lín ê目睭就會開，lín beh親像上帝，能分別好pháiⁿ。In-ūi Siōng-tè chai lín chia̍h ê ji̍t, lín ê ba̍k-chiu chiū ōe khui, lín beh chhin-chhiūⁿ Siōng-tè, ōe hun-piat hó-pháiⁿ.

6婦人人看hit叢樹，好食亦合(kah)目；koh hit叢樹是thang欣慕，hō͘人有智慧；就挽伊ê果子食伊，續hō͘伊ê丈夫，伊亦食伊。Hū-jîn-lâng khòaⁿ hit châng chhiū, hó-chia̍h ia̍h kah-ba̍k; koh hit châng chhiū sī thang him-bō͘, hō͘ lâng ū tì-hūi; chiū bán i ê ké-chí chia̍h i, sòa hō͘ i ê tiōng-hu, i ia̍h chia̍h i.

7In兩人ê目睭就開，chiah知in是thǹg-pak-theh；就pín無花果葉，為家己做裙。In nn̄g-lâng ê ba̍k-chiu chiū khui, chiah chai in sī thǹg-pak-theh; chiū pín bû-hoa-kó hio̍h, ūi ka-kī chòe kûn.

8日涼冷 ê時，耶和華上帝行遊tī園內；in聽見伊ê聲，hit人kap伊ê婦人人就bih tī園內ê樹中，來閃避耶和華上帝ê面。Ji̍t liâng-léng ê sî, Iâ-hô-hoa Siōng-tè kiâⁿ-iû tī hn̂g-lāi; in thiaⁿ-kìⁿ I ê siaⁿ, hit-lâng kap i ê hū-jîn-lâng chiū bih tī hn̂g-lāi ê chhiū-tiong, lâi siám-pī Iâ-hô-hoa Siōng-tè ê bīn.

9耶和華上帝叫hit人，對伊講，你tī tah-lo̍h？Iâ-hô-hoa Siōng-tè kiò hit-lâng, tùi i kóng, Lí tī tah-lo̍h?

10伊就講，我聽見你ê聲tī園內，我就驚，因為我thǹg-pak-theh；就家己bih。I chiū kóng, Góa thiaⁿ-kìⁿ Lí ê siaⁿ tī hn̂g-lāi, góa chiū kiaⁿ, in-ūi góa thǹg-pak-theh; chiū ka-kī bih.

11講，Chī-chūi kā你講，你thǹg-pak-theh？我吩咐你m̄-thang食hit叢樹，你食伊mah？Kóng, Chī-chūi kā lí kóng, lí thǹg-pak-theh? Góa hoan-hù lí m̄-thang chia̍h hit châng chhiū, lí chia̍h i mah?

12hit人講，你所hō͘我做伴ê婦人人，伊用hit叢樹ê果子hō͘我，我就食伊。Hit-lâng kóng, Lí só͘ hō͘ góa chòe-phōaⁿ ê hū-jîn-lâng, i ēng hit châng chhiū ê ké-chí hō͘ góa, góa chiū chia̍h i.

13耶和華上帝對婦人人講，你所做是甚麼事？婦人人講，蛇引誘我，我就食。Iâ-hô-hoa Siōng-tè tùi hū-jîn-lâng kóng, Lí só͘ chòe sī sím-mi̍h sū? Hū-jîn-lâng kóng, Chôa ín-iú góa, góa chiū chia̍h.

14耶和華上帝對蛇講，你已經做chit-ê，所以你受咒詛，比一切ê cheng-siⁿ，kap山野一切ê走獸，khah重；你beh用腹肚行，一生食土粉。Iâ-hô-hoa Siōng-tè tùi chôa kóng, Lí í-keng chòe chit-ê, só͘-í lí siū chiù-chó͘, pí it-chhè ê cheng-siⁿ, kap soaⁿ-iá it-chhè ê cháu-siù, khah-tāng; lí beh ēng pak-tó͘ kiâⁿ, it-seng chia̍h thô͘-hún.

15我beh hō͘你kap婦人人結冤仇，你ê後裔kap伊ê後裔亦結冤仇；伊beh傷你ê頭殼，你beh傷伊ê腳後tiⁿ。Góa beh hō͘ lí kap hū-jîn-lâng kiat oan-siû, lí ê hō͘-è kap i ê hō͘-è ia̍h kiat oan-siû; i beh siong lí ê thâu-khak, lí beh siong i ê kha-āu-tiⁿ.

16Koh對婦人人講，我的確大大加添你懷孕ê艱苦；你beh艱苦生kiáⁿ；你beh戀慕你ê丈夫，伊beh管轄你。Koh tùi hū-jîn-lâng kóng, Góa tek-khak tōa-tōa ke-thiⁿ lí hoâi-īn ê kan-khó͘; lí beh kan-khó͘ siⁿ-kiáⁿ; lí beh loân-bō͘ lí ê tiōng-hu, i beh koán-hat lí.

17也對亞當講，你已經聽thàn你ê婦人人ê話，來食我所吩咐你講，你m̄-thang食伊ê；所以土地因為你ê緣故受咒詛；你一世人勞苦，chiah tùi伊得tio̍h食。Iā tùi A-tong kóng, Lí í-keng thiaⁿ-thàn lí ê hū-jîn-lâng ê ōe, lâi chia̍h Góa só͘ hoan-hù lí kóng, Lí m̄-thang chia̍h-i ê; só͘-í thó͘-tōe in-ūi lí ê iân-kò͘ siū chiù-chó͘; lí chi̍t-sì-lâng lô-khó͘, chiah tùi i tit-tio̍h chia̍h.

18土地beh為tio̍h你發刺phè kap蒺藜；你也beh食園裡ê菜蔬。Thó͘-tōe beh ūi-tio̍h lí hoat chhì-phè kap che̍k-lê; lí iā beh chia̍h hn̂g-ni̍h ê chhài-soe.

19你beh汗流滿面chiah thang得tio̍h食，到你歸土；因為你是tùi土the̍h出來；你本是土粉，也beh歸tī土粉。Lí beh kōaⁿ-lâu móa-bīn chiah thang tit-tio̍h chia̍h, kàu lí kui thó͘; in-ūi lí sī tùi thô͘ the̍h-chhut-lâi; lí pún sī thô͘-hún, iā beh kui tī thô͘-hún.

20hit人kā伊ê bó͘號名，叫夏娃；因為伊做眾人ê老母。Hit-lâng kā i ê bó͘ hō miâ, kiò Hā-oa; in-ūi i chòe chèng-lâng ê lāu-bú.

21耶和華上帝為tio̍h hit人kap伊ê bó͘用皮做衣服，hō͘ in穿。Iâ-hô-hoa Siōng-tè ūi-tio̍h hit-lâng kap i ê bó͘ ēng phê chòe i-ho̍k, hō͘ in chhēng.

22耶和華上帝講，看ah，chit人已經kap咱相親像，能分別好pháiⁿ；taⁿ驚了伊伸手koh tùi活命樹挽，來食，就活到永遠；Iâ-hô-hoa Siōng-tè kóng, Khòaⁿ ah, chit-lâng í-keng kap lán saⁿ chhin-chhiūⁿ, ōe hun-piat hó-pháiⁿ; taⁿ kiaⁿ-liáu i chhun-chhiú koh tùi oa̍h-miā chhiū bán, lâi chia̍h, chiū oa̍h kàu éng-oán;

23所以耶和華上帝kah伊出伊甸園，來種作hit-ê土，就是伊所tùi伊出ê。só͘-í Iâ-hô-hoa Siōng-tè kah i chhut Ai-tiân hn̂g, lâi chèng-choh hit ê thô͘, chiū-sī i só͘ tùi i chhut ê.

24所以趕hit-ê人出；也tī伊甸園ê東勢安置Ki-lō͘兵kap四面轉旋發火燄ê劍，來防守活命樹ê路。Só͘-í kóaⁿ hit ê lâng chhut; iā tī Ai-tiân hn̂g ê tang-sì an-tì Ki-lō͘-peng kap sì-bīn tńg-se̍h hoat hé-iām ê kiàm, lâi hông-siú oa̍h-miā chhiū ê lō͘.

1Hit人kap伊ê bó͘夏娃同房；夏娃就懷孕生該隱，講，我tùi耶和華庇佑得tio̍h kiáⁿ。Hit-lâng kap i ê bó͘ Hā-oa tâng-pâng; Hā-oa chiū hoâi-īn siⁿ Kai-ún, kóng, Góa tùi Iâ-hô-hoa pì-iū tit-tio̍h kiáⁿ.

2Koh生伊ê小弟亞伯。亞伯是顧羊ê，該隱是作田ê。Koh siⁿ i ê sió-tī A-pek. A-pek sī kò͘-iûⁿ-ê, Kai-ún sī choh-chhân-ê.

3到日後，該隱將土產做禮物獻hō͘耶和華。Kàu ji̍t-āu, Kai-ún chiong thó͘-sán chòe lé-mi̍h hiàn hō͘ Iâ-hô-hoa.

4亞伯也將羊群中頭chiūⁿ生ê羊kap伊ê油the̍h來獻。耶和華眷顧亞伯kap伊ê禮物；A-pek iā chiong iûⁿ-kûn-tiong thâu-chiūⁿ-siⁿ ê iûⁿ kap i ê iû the̍h-lâi hiàn. Iâ-hô-hoa koàn-kò͘ A-pek kap i ê lé-mi̍h;

5總是無眷顧該隱kap伊ê禮物。該隱就大受氣，變面。chóng-sī bô koàn-kò͘ Kai-ún kap i ê lé-mi̍h. Kai-ún chiū tōa siū-khì, pìⁿ-bīn.

6耶和華對該隱講，你啥事受氣？你啥事變面？Iâ-hô-hoa tùi Kai-ún kóng, Lí siáⁿ-sū siū-khì? lí siáⁿ-sū pìⁿ-bīn?

7你若行好，kiám無得tio̍h監納？若無行好，罪孽埋伏tī門口；伊beh戀慕你，你beh管轄伊。Lí nā kiâⁿ-hó, kiám bô tit-tio̍h kàm-la̍p? nā bô kiâⁿ-hó, chōe-gia̍t bâi-ho̍k tī mn̂g-kháu; i beh loân-bō͘ lí, lí beh koán-hat i.

8該隱kā伊ê小弟講。以後in tī山裡ê時，該隱攻擊伊ê小弟亞伯，kā伊thâi死。Kai-ún kā i ê sió-tī kóng. Í-āu in tī soaⁿ-ni̍h ê sî, Kai-ún kong-kek i ê sió-tī A-pek, kā i thâi-sí.

9耶和華對該隱講，你ê小弟亞伯tī tah-lo̍h？伊講，m̄知；我kiám是顧守我ê小弟ê mah？Iâ-hô-hoa tùi Kai-ún kóng, Lí ê sió-tī A-pek tī tah-lo̍h? I kóng, M̄-chai; góa kiám-sī kò͘-siú góa ê sió-tī-ê mah?

10伊講，你有做甚麼？Lín小弟ê血ê聲tùi地裡喉叫我。I kóng, Lí ū chòe sím-mi̍h? Lín sió-tī ê huih ê siaⁿ tùi tōe-ni̍h âu-kiò Góa.

11地有開嘴對你ê手來接受lín小弟ê血，taⁿ你tùi chit-ê地受咒詛。Tōe ū khui-chhùi tùi lí ê chhiú lâi chiap-siū lín sió-tī ê huih, taⁿ lí tùi chit ê tōe siū chiù-chó͘.

12你種作，地無beh出土產hō͘你；你beh四界走，漂流地上。Lí chèng-choh, tōe bô beh chhut thó͘-sán hō͘ lí; lí beh sì-kòe cháu, phiau-liû tōe-chiūⁿ.

13該隱對耶和華講，我ê刑罰太重，過頭tī我所能當ê。Kai-ún tùi Iâ-hô-hoa kóng, Góa ê hêng-hoa̍t thài-tāng, kè-thâu tī góa só͘ ōe-tng-ê.

14你今á日趕我離開chit-ê地面，無thang tòa tī你ê面前；我四界走漂流地上；見若tú-tio̍h我ê beh thâi死我。Lí kin-á-ji̍t kóaⁿ góa lī-khui chit ê tōe-bīn, bô thang tòa tī Lí ê bīn-chêng; góa sì-kòe cháu phiau-liû tōe-chiūⁿ; kìⁿ-nā tú-tio̍h góa ê beh thâi-sí góa.

15耶和華對伊講，因為án-ni，見若thâi死該隱ê，beh受七倍ê報應。耶和華就kā該隱立一個記號，免得tú-tio̍h伊ê thâi死伊。Iâ-hô-hoa tùi i kóng, In-ūi án-ni, kìⁿ-nā thâi-sí Kai-ún ê, beh siū chhit-pē ê pò-èng. Iâ-hô-hoa chiū kā Kai-ún li̍p chi̍t ê kì-hō, bián-tit tú-tio̍h i ê thâi-sí i.

16該隱就離開耶和華ê面前，去tī伊甸ê東勢，羅得ê地，khiā起。Kai-ún chiū lī-khui Iâ-hô-hoa ê bīn-chêng, khì tī Ai-tiân ê tang-sì, Lô-tek ê tōe, khiā-khí.

17該隱kap伊ê bó͘同房；伊ê bó͘懷孕生以諾；該隱起城，就照伊ê kiáⁿ ê名稱hit-ê城ê名做以諾。Kai-ún kap i ê bó͘ tâng-pâng; i ê bó͘ hoâi-īn siⁿ Í-lo̍k; Kai-ún khí siâⁿ, chiū chiàu i ê kiáⁿ ê miâ chheng hit ê siâⁿ ê miâ chòe Í-lo̍k.

18以諾生Í-ná；Í-ná生Bí-hō͘-ngá-lī；Bí-hō͘-ngá-lī生Má-thó͘-sat-lī；Má-thó͘-sat-lī生La̍h-be̍k。Í-lo̍k siⁿ Í-ná; Í-ná siⁿ Bí-hō͘-ngá-lī; Bí-hō͘-ngá-lī siⁿ Má-thó͘-sat-lī; Má-thó͘-sat-lī siⁿ La̍h-be̍k.

19La̍h-be̍k chhōa兩個bó͘；一個名A-tāi，一個名Sé-la̍h。La̍h-be̍k chhōa nn̄g ê bó͘; chi̍t-ê miâ A-tāi, chi̍t-ê miâ Sé-la̍h.

20A-tāi生Ngá-pat；伊做khiā起布棚飼cheng-siⁿ ê人ê祖。A-tāi siⁿ Ngá-pat; i chòe khiā-khí pò͘-pîⁿ chhī cheng-siⁿ ê lâng ê chó͘.

21伊ê小弟名Iû-pat；伊是做一切彈琴pûn簫ê人ê祖。I ê sió-tī miâ Iû-pat; i sī chòe it-chhè tôaⁿ-khîm pûn-siau ê lâng ê chó͘.

22Sé-la̍h也生Thó͘-pat-kai-ún；伊就是製造ta̍k樣銅鐵利器ê；Thó͘-pat-kai-ún ê姊妹就是Ná-má。Sé-la̍h iā siⁿ Thó͘-pat-kai-ún; i chiū-sī chè-chō ta̍k-iūⁿ tâng thih lāi-khì ê; Thó͘-pat-kai-ún ê chí-bē chiū-sī Ná-má.

23La̍h-be̍k對伊兩個bó͘講： A-tāi kap Sé-la̍h ah，tio̍h聽我ê聲， La̍h-be̍k ê bó͘ ah，tio̍h致意聽我ê話； 人傷我，我thâi伊， 少年人害我，我thâi伊。La̍h-be̍k tùi i nn̄g ê bó͘ kóng: A-tāi kap Sé-la̍h ah, tio̍h thiaⁿ góa ê siaⁿ, La̍h-be̍k ê bó͘ ah, tio̍h tì-ì thiaⁿ góa ê ōe; Lâng siong góa, góa thâi i, Siàu-liân lâng hāi góa, góa thâi i.

24該隱ê伸冤若是七倍， 就La̍h-be̍k ê伸冤的確七十七倍。Kai-ún ê sin-oan nā sī chhit-pē, Chiū La̍h-be̍k ê sin-oan tek-khak chhit-cha̍p-chhit pē.

25亞當koh kap伊ê bó͘同房；伊ê bó͘生kiáⁿ，表名叫Siat；是講，上帝koh kā我設立一個kiáⁿ來替亞伯，因為該隱kā伊thâi死。A-tong koh kap i ê bó͘ tâng-pâng; i ê bó͘ siⁿ-kiáⁿ, piáu-miâ kiò Siat; sī kóng, Siōng-tè koh kā góa siat-li̍p chi̍t ê kiáⁿ lâi thòe A-pek, in-ūi Kai-ún kā i thâi-sí.

26Siat也生kiáⁿ，表名Í-lô-sū；hit時人chiah起頭求叫耶和華ê名。Siat iā siⁿ-kiáⁿ, piáu-miâ Í-lô-sū; hit-sî lâng chiah khí-thâu kiû-kiò Iâ-hô-hoa ê miâ.