1拉結看本身無kā雅各生kiáⁿ，就怨妒伊ê大姊；對雅各講，你tio̍h kiáⁿ hō͘我；若無，我beh死。La̍h-kiat khòaⁿ pún-sin bô kā Ngá-kok siⁿ kiáⁿ, chiū oàn-tò͘ i ê tōa-chí; tùi Ngá-kok kóng, Lí tio̍h kiáⁿ hō͘ góa; nā bô, góa beh sí.

2雅各受氣拉結；講，hō͘你無生ê，是上帝；我kiám是替伊mah？Ngá-kok siū-khì La̍h-kiat; kóng, Hō͘ lí bô siⁿ-ê, sī Siōng-tè; góa kiám sī thòe I mah?

3拉結講，你看我ê女婢Phek-la̍h tī-chia；你去kap伊同房，hō͘伊生kiáⁿ抱tī我ê腳頭u；我也就thang tùi伊得tio̍h kiáⁿ。La̍h-kiat kóng, Lí khòaⁿ góa ê lú-pī Phek-la̍h tī-chia; lí khì kap i tâng-pâng, hō͘ i siⁿ kiáⁿ phō tī góa ê kha-thâu-u; góa iā chiū thang tùi i tit-tio̍h kiáⁿ.

4拉結就將伊ê女婢Phek-la̍h hō͘伊做bó͘；雅各就kap伊同房。La̍h-kiat chiū chiong i ê lú-pī Phek-la̍h hō͘ i chòe-bó͘; Ngá-kok chiū kap i tâng-pâng.

5Phek-la̍h懷孕，kā雅各生一個kiáⁿ。Phek-la̍h hoâi-īn, kā Ngá-kok siⁿ chi̍t ê kiáⁿ.

6拉結講，上帝kā我判斷，亦聽我ê聲，hō͘我有kiáⁿ；所以叫伊ê名做Tàn。La̍h-kiat kóng, Siōng-tè kā góa phòaⁿ-toàn, ia̍h thiaⁿ góa ê siaⁿ, hō͘ góa ū kiáⁿ; só͘-í kiò i ê miâ chòe Tàn.

7拉結ê女婢Phek-la̍h koh懷孕，kā雅各生第二ê kiáⁿ；La̍h-kiat ê lú-pī Phek-la̍h koh hoâi-īn, kā Ngá-kok siⁿ tē-jī ê kiáⁿ;

8拉結講，我kap我ê大姊非常ê相爭，亦得tio̍h khah贏；就叫伊ê名做Ná-hut-tha-lī。La̍h-kiat kóng, Góa kap góa ê tōa-chí hui-siông ê saⁿ-chiⁿ, ia̍h tit-tio̍h khah-iâⁿ; chiū kiò i ê miâ chòe Ná-hut-tha-lī.

9利亞看本身停歇無生，就將伊ê女婢，Sek-phàⁿ，hō͘雅各做bó͘。Lī-a khòaⁿ pún-sin thêng-hioh bô siⁿ, chiū chiong i ê lú-pī, Sek-phàⁿ, hō͘ Ngá-kok chòe bó͘.

10利亞ê女婢Sek-phàⁿ kā雅各生kiáⁿ。Lī-a ê lú-pī Sek-phàⁿ kā Ngá-kok siⁿ kiáⁿ.

11利亞講，佳哉！就叫伊ê名做Ka-tek。Lī-a kóng, Kai-chài! chiū kiò i ê miâ chòe Ka-tek.

12利亞ê女婢，Sek-phàⁿ，koh kā雅各生第二ê kiáⁿ。Lī-a ê lú-pī, Sek-phàⁿ, koh kā Ngá-kok siⁿ tē-jī ê kiáⁿ.

13利亞講，我有福氣！chiah-ê cha-bó͘-gín-á lóng beh稱我有福氣；就叫伊ê名做A-siat。Lī-a kóng, Góa ū hok-khì! chiah ê cha-bó͘-gín-á lóng beh chheng góa ū hok-khì; chiū kiò i ê miâ chòe A-siat.

14割麥ê時，Liû-piān去田裡，得tio̍h hong-ka，the̍h來hō͘伊ê老母利亞。拉結對利亞講，請將你ê kiáⁿ ê hong-ka hō͘我。Koah-be̍h ê sî, Liû-piān khì chhân-ni̍h, tit-tio̍h hong-ka, the̍h-lâi hō͘ i ê lāu-bú Lī-a. La̍h-kiat tùi Lī-a kóng, Chhiáⁿ chiong lí ê kiáⁿ ê hong-ka hō͘ góa.

15利亞對伊講，你搶奪我ê丈夫，kiám是小khóa事；你koh搶奪我ê kiáⁿ ê hong-ka mah？拉結講，為tio̍h你ê kiáⁿ ê hong-ka，所以今暝伊thang kap你相kap睏。Lī-a tùi i kóng, Lí chhiúⁿ-toa̍t góa ê tiōng-hu, kiám-sī sió-khóa sū; lí koh chhiúⁿ-toa̍t góa ê kiáⁿ ê hong-ka mah? La̍h-kiat kóng, Ūi-tio̍h lí ê kiáⁿ ê hong-ka, só͘-í kin-mî i thang kap lí saⁿ-kap khùn.

16到暗，雅各tùi 田裡 tò來；利亞出去迎接伊，講，你tio̍h kap我相kap睏；因為我實在用我ê kiáⁿ ê hong-ka倩你。Hit暝伊就kap伊相kap睏。Kàu àm, Ngá-kok tùi chhân-ni̍h tò-lâi; Lī-a chhut-khì ngiâ-chih i, kóng, Lí tio̍h kap góa saⁿ-kap khùn; in-ūi góa si̍t-chāi ēng góa ê kiáⁿ ê hong-ka chhiàⁿ lí. Hit-mî i chiū kap i saⁿ-kap khùn.

17上帝允准利亞，伊就懷孕，kā雅各生第五個kiáⁿ。Siōng-tè ún-chún Lī-a, i chiū hoâi-īn, kā Ngá-kok siⁿ tē-gō͘ ê kiáⁿ.

18利亞講，上帝hō͘我工錢，因為我將女婢hō͘我ê丈夫；tùi án-ni kā伊號名Í-sat-ka。Lī-a kóng, Siōng-tè hō͘ góa kang-chîⁿ, in-ūi góa chiong lú-pī hō͘ góa ê tiōng-hu; tùi án-ni kā i hō-miâ Í-sat-ka.

19利亞koh懷孕，kā雅各生第六ê kiáⁿ。Lī-a koh hoâi-īn, kā Ngá-kok siⁿ tē-la̍k ê kiáⁿ.

20利亞講，上帝賞賜我好ê賞賜；我ê丈夫beh kap我tòa，因為我kā伊生六個kiáⁿ；tùi án-ni kā伊號名Se-pò͘-lûn。Lī-a kóng, Siōng-tè siúⁿ-sù góa hó ê siúⁿ-sù; góa ê tiōng-hu beh kap góa tòa, in-ūi góa kā i siⁿ la̍k ê kiáⁿ; tùi án-ni kā i hō-miâ Se-pò͘-lûn.

21後來生一個cha-bó͘-kiáⁿ，kā伊號名叫Tí-ná。Āu-lâi siⁿ chi̍t ê cha-bó͘-kiáⁿ, kā i hō-miâ kiò Tí-ná.

22上帝siàu念拉結，上帝允准伊，hō͘伊能生kiáⁿ。Siōng-tè siàu-liām La̍h-kiat, Siōng-tè ún-chún i, hō͘ i ōe siⁿ kiáⁿ.

23伊就懷孕生kiáⁿ；講，上帝除去我ê見笑；I chiū hoâi-īn siⁿ kiáⁿ; kóng, Siōng-tè tû-khì góa ê kiàn-siàu;

24就kā伊號名約瑟，講，願耶和華koh加添我一個kiáⁿ。chiū kā i hō-miâ Iok-sek, kóng, Goān Iâ-hô-hoa koh ke-thiⁿ góa chi̍t ê kiáⁿ.

25拉結生約瑟了後，雅各對拉班講，請差我去，hō͘我tò去我ê本所在，本地；La̍h-kiat siⁿ Iok-sek liáu-āu, Ngá-kok tùi La̍h-pan kóng, Chhiáⁿ chhe góa khì, hō͘ góa tò-khì góa ê pún só͘-chāi, pún-tōe;

26請你將我服事你所得tio̍h ê bó͘-kiáⁿ hō͘我，容允我去；我怎樣服事你，你lóng知。chhiáⁿ lí chiong góa ho̍k-sāi lí só͘ tit-tio̍h ê bó͘-kiáⁿ hō͘ góa, iông-ún góa khì; góa cháiⁿ-iūⁿ ho̍k-sāi lí, lí lóng chai.

27拉班kā伊講，我若tī你ê面前得tio̍h恩典，請你kap我tòa；因為我深知耶和華賜我福氣，是為tio̍h你ê緣故。La̍h-pan kā i kóng, Góa nā tī lí ê bīn-chêng tit-tio̍h un-tián, chhiáⁿ lí kap góa tòa; in-ūi góa chhim-chai Iâ-hô-hoa sù góa hok-khì, sī ūi-tio̍h lí ê iân-kò͘.

28Koh kā伊講，請你定tio̍h你ê工錢，我就hō͘你。Koh kā i kóng, Chhiáⁿ lí tiāⁿ-tio̍h lí ê kang-chîⁿ, góa chiū hō͘ lí.

29雅各kā伊講，我服事你怎樣，你ê cheng-siⁿ tī我ê手頭怎樣，是你所知。Ngá-kok kā i kóng, Góa ho̍k-sāi lí cháiⁿ-iūⁿ, lí ê cheng-siⁿ tī góa ê chhiú-thâu cháiⁿ-iūⁿ, sī lí só͘ chai.

30我未來ê事先，你所有ê真少，taⁿ就大發達；耶和華用福氣tè我ê腳來hō͘你；taⁿ我beh甚麼時為我ê家建置產業？Góa bē lâi ê tāi-seng, lí só͘-ū-ê chin-chió, taⁿ chiū tōa hoat-ta̍t; Iâ-hô-hoa ēng hok-khì tè góa ê kha lâi hō͘ lí; taⁿ góa beh sím-mi̍h sî ūi góa ê ke kiàn-tì sán-gia̍p?

31拉班講，我tio̍h hō͘你甚麼？雅各講，你亦m̄免hō͘我甚麼；有一項事，你若應承，就我猶原飼你ê羊群來顧守。La̍h-pan kóng, Góa tio̍h hō͘ lí sím-mi̍h? Ngá-kok kóng, Lí ia̍h m̄-bián hō͘ góa sím-mi̍h; ū chi̍t-hāng sū, lí nā èng-sêng, chiū góa iû-goân chhī lí ê iûⁿ-kûn lâi kò͘-siú.

32今á日我beh遍巡你ê羊群，將綿羊中見有點ê，有斑ê，kap烏色ê，以及山羊中見有斑ê，有點ê，lóng撥出；將來chit款ê做我ê工錢。Kin-á-ji̍t góa beh piàn-sûn lí ê iûⁿ-kûn, chiong mî-iûⁿ-tiong kìⁿ-ū tiám-ê, ū pan-ê, kap o͘-sek-ê, í-ki̍p soaⁿ-iûⁿ-tiong kìⁿ-ū pan-ê, ū tiám-ê, lóng poah-chhut; chiong-lâi chit-khoán-ê chòe góa ê kang-chîⁿ.

33以後你來看我ê工錢，hit中間若山羊無點無斑ê，綿羊無烏色ê，就算是我偷ê；用án-ni來證明我ê公道。Í-āu lí lâi khòaⁿ góa ê kang-chîⁿ, hit tiong-kan nā soaⁿ-iûⁿ bô tiám bô pan-ê, mî-iûⁿ bô o͘-sek-ê, chiū sǹg sī góa thau-ê; ēng án-ni lâi chèng-bêng góa ê kong-tō.

34拉班講，好，我願照你ê話行。La̍h-pan kóng, Hó, góa goān chiàu lí ê ōe kiâⁿ.

35當hit日，就將有痕有斑ê山羊káng，有點有斑，間(kàiⁿ)白ê山羊母，以及烏色ê綿羊，lóng撥出來交hō͘伊hiah-ê kiáⁿ。Tng hit-ji̍t, chiū chiong ū hûn ū pan ê soaⁿ-iûⁿ-káng, ū tiám ū pan, kàiⁿ pe̍h ê soaⁿ-iûⁿ-bú, í-ki̍p o͘-sek ê mî-iûⁿ, lóng poah-chhut lâi kau hō͘ i hiah ê kiáⁿ.

36伊hō͘家己kap雅各相離有三日ê路站；雅各就顧拉班其餘ê羊。I hō͘ ka-kī kap Ngá-kok saⁿ-lī ū saⁿ-ji̍t ê lō͘-chām; Ngá-kok chiū kò͘ La̍h-pan kî-û ê iûⁿ.

37雅各the̍h青ê楊樹、杏樹、楓樹，軟ê枝，將皮剝成白痕，hō͘枝內白ê露出。Ngá-kok the̍h chhiⁿ ê iông-chhiū, hēng-chhiū, png-chhiū, nńg ê ki, chiong phê pak chiâⁿ pe̍h-hûn, hō͘ ki-lāi pe̍h-ê lō͘-chhut.

38將剝皮ê枝，插tī羊lim水ê水溝kap水槽，hō͘伊kap羊相對；羊來lim ê時，公母交合；Chiong pak-phê ê ki, chhah tī iûⁿ lim-chúi ê chúi-kau kap chúi-chô, hō͘ i kap iûⁿ saⁿ-tùi; iûⁿ lâi lim ê sî, kang-bú kau-ha̍p;

39羊tī枝ê對面交合，就生有痕ê，有點ê，有斑ê。iûⁿ tī ki ê tùi-bīn kau-ha̍p, chiū siⁿ ū-hûn-ê, ū-tiám-ê, ū-pan-ê.

40雅各將羊á撥出，hō͘拉班ê羊kap chiah-ê有痕kap烏色ê羊相對；將家己ê羊另外放tī一所在，無hō͘伊kap拉班ê羊chham-chhap。Ngá-kok chiong iûⁿ-á poah-chhut, hō͘ La̍h-pan ê iûⁿ kap chiah ê ū-hûn kap o͘-sek ê iûⁿ saⁿ-tùi; chiong ka-kī ê iûⁿ lēng-gōa pàng tī chi̍t só͘-chāi, bô hō͘ i kap La̍h-pan ê iûⁿ chham-chhap.

41Tú-tio̍h羊群中勇壯ê交合ê時，雅各就用樹枝插tī水溝內；hō͘羊tī樹枝ê對面交合。Tú-tio̍h iûⁿ-kûn-tiong ióng-chòng-ê kau-ha̍p ê sî, Ngá-kok chiū ēng chhiū-ki chhah tī chúi-kau-lāi; hō͘ iûⁿ tī chhiū-ki ê tùi-bīn kau-ha̍p.

42Tú-tio̍h羊群ê瘦ê，就無插樹枝；tùi án-ni瘦ê歸拉班，勇壯ê歸雅各。Tú-tio̍h iûⁿ-kûn ê sán-ê, chiū bô chhah chhiū-ki; tùi án-ni sán-ê kui La̍h-pan, ióng-chòng-ê kui Ngá-kok.

43Tùi án-ni伊大發達，得tio̍h chōe-chōe羊群、女婢、奴僕、駱駝kap驢。Tùi án-ni i tōa hoat-ta̍t, tit-tio̍h chōe-chōe iûⁿ-kûn, lú-pī, lô͘-po̍k, lo̍k-tô, kap lû.

1雅各聽見拉班眾kiáⁿ有話講，咱老父所有ê，雅各lóng搶去，koh對咱ê老父得tio̍h chit-ê一切ê榮光。Ngá-kok thiaⁿ-kìⁿ La̍h-pan chèng-kiáⁿ ū ōe kóng, Lán lāu-pē só͘-ū-ê, Ngá-kok lóng chhiúⁿ-khì, koh tùi lán ê lāu-pē tit-tio̍h chit-ê it-chhè ê êng-kng.

2雅各看見拉班見tio̍h伊，無親像從前ê面色。Ngá-kok khòaⁿ-kìⁿ La̍h-pan kìⁿ-tio̍h i, bô chhin-chhiūⁿ chiông-chêng ê bīn-sek.

3耶和華對雅各講，你tio̍h tò去你ê父公ê地，到你ê親族hia；我beh kap你tī-teh。Iâ-hô-hoa tùi Ngá-kok kóng, Lí tio̍h tò-khì lí ê pē-kong ê tōe, kàu lí ê chhin-cho̍k hia; Góa beh kap lí tī-teh.

4雅各差人叫拉結kap利亞到山野，到羊群hia；Ngá-kok chhe lâng kiò La̍h-kiat kap Lī-a kàu soaⁿ-iá, kàu iûⁿ-kûn hia;

5對in講，我看見lín老父見tio̍h我，無親像從前ê面色；總是我ê父ê上帝時常kap我tī-teh。tùi in kóng, Góa khòaⁿ-kìⁿ lín lāu-pē kìⁿ-tio̍h góa, bô chhin-chhiūⁿ chiông-chêng ê bīn-sek; chóng-sī góa ê pē ê Siōng-tè sî-siông kap góa tī-teh.

6Lín亦知我盡我ê力做lín老父ê工。Lín ia̍h chai góa chīn góa ê la̍t chòe lín lāu-pē ê kang.

7Lín老父騙我，十pái改換我ê工錢；總是上帝無容允伊害我。Lín lāu-pē phiàn góa, cha̍p-pái kóe-ōaⁿ góa ê kang-chîⁿ; chóng-sī Siōng-tè bô iông-ún i hāi góa.

8伊若講，有點ê歸你做工錢，就羊群所生ê lóng有點；伊若講，有痕ê歸你做工錢，就羊群所生ê lóng有痕。I nā kóng, Ū-tiám-ê kui lí chòe kang-chîⁿ, chiū iûⁿ-kûn só͘ siⁿ-ê lóng ū-tiám; i nā kóng, Ū-hûn-ê kui lí chòe kang-chîⁿ, chiū iûⁿ-kûn só͘ siⁿ-ê lóng ū-hûn.

9Án-ni上帝將lín老父ê cheng-siⁿ搶來hō͘我。Án-ni Siōng-tè chiong lín lāu-pē ê cheng-siⁿ chhiúⁿ-lâi hō͘ góa.

10羊交合ê時，我夢中kia̍h目一下看，看見phah羊母ê羊káng，lóng是有痕ê，有點ê，有花斑ê；Iûⁿ kau-ha̍p ê sî, góa bāng-tiong kia̍h-ba̍k chi̍t-ē khòaⁿ, khòaⁿ-kìⁿ phah iûⁿ-bú ê iûⁿ-káng, lóng sī ū-hûn-ê, ū-tiám-ê, ū hoe-pan-ê;

11上帝ê使者tī hit夢中叫我講，雅各；我講，我tī chia。Siōng-tè ê sù-chiá tī hit bāng-tiong kiò góa kóng, Ngá-kok; góa kóng, Góa tī chia.

12伊講，你kia̍h目看，phah羊母ê羊káng，lóng是有痕ê，有點ê，有花斑ê；凡若拉班對你所做ê，我lóng看見。I kóng, Lí kia̍h-ba̍k khòaⁿ, phah iûⁿ-bú ê iûⁿ-káng, lóng sī ū-hûn-ê, ū-tiám-ê, ū hoe-pan-ê; hoān-nā La̍h-pan tùi lí só͘ chòe-ê, Góa lóng khòaⁿ-kìⁿ.

13我是Pek-te̍k-lī ê上帝，你tī-hia bat用油抹柱，對我下願。Taⁿ你tio̍h起來，離開chit所在，tò去本地。Góa sī Pek-te̍k-lī ê Siōng-tè, lí tī-hia bat ēng iû boah thiāu, tùi Góa hē-goān. Taⁿ lí tio̍h khí-lâi, lī-khui chit só͘-chāi, tò-khì pún-tōe.

14拉結kap利亞應伊講，Tī阮老父ê家，kiám iáu有阮thang得ê家伙kap產業mah？La̍h-kiat kap Lī-a ìn i kóng, Tī goán lāu-pē ê ke, kiám iáu ū goán thang tit ê ke-hé kap sán-gia̍p mah?

15阮kiám-m̄是hō͘伊看做外人mah？因為伊賣阮，吞食阮ê價錢；Goán kiám-m̄-sī hō͘ i khòaⁿ-chòe gōa-lâng mah? in-ūi i bōe goán, thun-chia̍h goán ê kè-chîⁿ;

16上帝tùi阮老父搶出一切ê財物，hiah-ê就是阮kap阮kiáⁿ ê。Taⁿ見若上帝所對你講ê，做你去行。Siōng-tè tùi goán lāu-pē chhiúⁿ-chhut it-chhè ê châi-bu̍t, hiah-ê chiū-sī goán kap goán kiáⁿ ê. Taⁿ kìⁿ-nā Siōng-tè só͘ tùi lí kóng-ê, chòe lí khì kiâⁿ.

17雅各就起來，hō͘伊ê kiáⁿ kap bó͘ lóng騎駱駝。Ngá-kok chiū khí-lâi, hō͘ i ê kiáⁿ kap bó͘ lóng khiâ lo̍k-tô.

18Koh帶一切ê cheng-siⁿ，kap所積聚ê財物，所得tio̍h ê cheng-siⁿ，是tī Pa-tàn-a-lân所得tio̍h-ê；beh去迦南地，去伊ê老父以撒hia。Koh tòa it-chhè ê cheng-siⁿ, kap só͘ chek-chū ê châi-bu̍t, só͘ tit-tio̍h ê cheng-siⁿ, sī tī Pa-tàn-a-lân só͘ tit-tio̍h-ê; beh khì Ka-lâm tōe, khì i ê lāu-pē Í-sat hia.

19Hit時拉班去剪羊毛；拉結偷the̍h in老父家內ê偶像。Hit-sî La̍h-pan khì chián iûⁿ-mn̂g; La̍h-kiat thau-the̍h in lāu-pē ke-lāi ê ngó͘-siōng.

20雅各背A-lân人拉班，偷走去，無kā伊講。Ngá-kok pōe A-lân lâng La̍h-pan, thau-cháu khì, bô kā i kóng.

21就帶一切所有ê逃走；伊起身過hit-ê河，ǹg Ki-lia̍t山去。Chiū tòa it-chhè só͘-ū-ê tô-cháu; i khí-sin kè hit ê Hô, ǹg Ki-lia̍t soaⁿ khì.

22到第三日，有人kā拉班講，雅各走去lah。Kàu tē-saⁿ ji̍t, ū lâng kā La̍h-pan kóng, Ngá-kok cháu-khì lah.

23伊就chhōa伊ê兄弟相kap去追jip；歷過七日ê路站，到Ki-lia̍t山 chiah jip-tio̍h。I chiū chhōa i ê hiaⁿ-tī saⁿ-kap khì tui-jip; le̍k-kè chhit-ji̍t ê lō͘-chām, kàu Ki-lia̍t soaⁿ chiah jip-tio̍h.

24暝時眠夢中，上帝到A-lân人拉班hia；kā伊講，你tio̍h小心，m̄-thang kap雅各講好講pháiⁿ。Mî-sî bîn-bāng-tiong, Siōng-tè kàu A-lân lâng La̍h-pan hia; kā i kóng, Lí tio̍h sió-sim, m̄-thang kap Ngá-kok kóng-hó kóng-pháiⁿ.

25拉班追tio̍h雅各，雅各tī hit-ê山已經搭布棚；拉班kap伊ê眾兄弟，亦tī Ki-lia̍t山搭布棚。La̍h-pan tui-tio̍h Ngá-kok, Ngá-kok tī hit ê soaⁿ í-keng tah pò͘-pîⁿ; La̍h-pan kap i ê chèng hiaⁿ-tī, ia̍h tī Ki-lia̍t soaⁿ tah pò͘-pîⁿ.

26拉班kā雅各講，你所做是甚麼事，你啥事背我，將我chiah-ê cha-bó͘-kiáⁿ chhōa去，親像用刀劍搶掠一樣？La̍h-pan kā Ngá-kok kóng, Lí só͘ chòe sī sím-mi̍h sū, lí siáⁿ-sū pōe góa, chiong góa chiah ê cha-bó͘-kiáⁿ chhōa-khì, chhin-chhiūⁿ ēng to-kiàm chhiúⁿ-lia̍h chi̍t-iūⁿ?

27你啥事暗靜走，偷走亦無kā我講；hō͘我thang用歡喜、唱歌、phah鼓、彈琴，送你tò去？Lí siáⁿ-sū àm-chīⁿ cháu, thau-cháu ia̍h bô kā góa kóng; hō͘ góa thang ēng hoaⁿ-hí, chhiùⁿ-koa, phah-kó͘, tôaⁿ-khîm, sàng lí tò-khì?

28Koh無容允我kap外孫，cha-bó͘-kiáⁿ chim嘴？你taⁿ所行是真戇。Koh bô iông-ún góa kap gōa-sun, cha-bó͘-kiáⁿ chim-chhùi? lí taⁿ só͘ kiâⁿ sī chin gōng.

29我ê手本有力thang害lín；獨獨lín老父ê上帝昨暝kā我講，你tio̍h小心，m̄-thang kap雅各講好講pháiⁿ。Góa ê chhiú pún ū la̍t thang hāi lín; to̍k-to̍k lín lāu-pē ê Siōng-tè chā-mî kā góa kóng, Lí tio̍h sió-sim, m̄-thang kap Ngá-kok kóng-hó kóng-pháiⁿ.

30Taⁿ你雖然戀慕你ê老父ê家，不得不tio̍h去，啥事偷the̍h我ê神明？Taⁿ lí sui-jiân loân-bō͘ lí ê lāu-pē ê ke, put-tek-put tio̍h khì, siáⁿ-sū thau-the̍h góa ê sîn-bêng?

31雅各應拉班講，因為我驚，心內想，講，驚了你將你ê cha-bó͘-kiáⁿ tùi我搶去。Ngá-kok ìn La̍h-pan kóng, In-ūi góa kiaⁿ, sim-lāi siūⁿ, kóng, Kiaⁿ-liáu lí chiong lí ê cha-bó͘-kiáⁿ tùi góa chhiúⁿ-khì.

32論到你ê神明，你tùi甚麼人chhiau-tio̍h，伊就tio̍h死；當咱眾兄弟ê面前，你認看，tī我chia有甚麼物是你ê，thang the̍h去。因為雅各m̄知拉結有偷the̍h in。Lūn-kàu lí ê sîn-bêng, lí tùi sím-mi̍h lâng chhiau-tio̍h, i chiū tio̍h sí; tng lán chèng hiaⁿ-tī ê bīn-chêng, lí jīn-khòaⁿ, tī góa chia ū sím-mi̍h mi̍h sī lí-ê, thang the̍h-khì. In-ūi Ngá-kok m̄-chai La̍h-kiat ū thau-the̍h-in.

33拉班就入雅各ê布棚，利亞ê布棚，kap兩個女婢ê布棚，lóng chhiau無；就tùi利亞ê布棚出來，入拉結ê布棚。La̍h-pan chiū ji̍p Ngá-kok ê pò͘-pîⁿ, Lī-a ê pò͘-pîⁿ, kap nn̄g ê lú-pī ê pò͘-pîⁿ, lóng chhiau-bô; chiū tùi Lī-a ê pò͘-pîⁿ chhut-lâi, ji̍p La̍h-kiat ê pò͘-pîⁿ.

34拉結已經將偶像khǹg tī駱駝ê鞍下，來坐tī hit頂面。拉班tī伊ê布棚內四界摸，lóng chhiau無。La̍h-kiat í-keng chiong ngó͘-siōng khǹg tī lo̍k-tô ê oaⁿ-ē, lâi chē tī hit téng-bīn. La̍h-pan tī i ê pò͘-pîⁿ-lāi sì-kòe bong, lóng chhiau-bô.

35拉結對伊ê老父講，經期tú-á 到，bōe會起來tī你ê面前；求我ê主莫得受氣。拉班四界chhē偶像，chhiau lóng無。La̍h-kiat tùi i ê lāu-pē kóng, Keng-kî tú-á kàu, bōe-ōe khí-lâi tī lí ê bīn-chêng; kiû góa ê chú bo̍h-tit siū-khì. La̍h-pan sì-kòe chhē ngó͘-siōng, chhiau lóng bô.

36雅各就受氣，kap拉班計較；對拉班講，我有犯tio̍h甚麼過失，有甚麼罪惡，你竟然jip我chiah緊？Ngá-kok chiū siū-khì, kap La̍h-pan kè-kàu; tùi La̍h-pan kóng, Góa ū hoān-tio̍h sím-mi̍h kè-sit, ū sím-mi̍h chōe-ok, lí kéng-jiân jip góa chiah-kín?

37你遍摸我一切ê ke-si，有chhiau-tio̍h lín tau甚麼ke-si出來？thang hē tī你我ê兄弟ê面前；hō͘ in tī咱兩人ê中間判斷。Lí piàn-bong góa it-chhè ê ke-si, ū chhiau-tio̍h lín tau sím-mi̍h ke-si chhut lâi? thang hē tī lí góa ê hiaⁿ-tī ê bīn-chêng; hō͘ in tī lán nn̄g-lâng ê tiong-kan phòaⁿ-toàn.

38我kap你tòa chit二十年，你ê綿羊母、山羊母m̄-bat有落胎；你羊群中ê羊káng，我未bat食伊。Góa kap lí tòa chit jī-cha̍p nî, lí ê mî-iûⁿ-bú, soaⁿ-iûⁿ-bú m̄-bat ū làu-the; lí iûⁿ-kûn-tiong ê iûⁿ-káng, góa bē-bat chia̍h-i.

39Hō͘野獸相害ê，我無帶來hō͘你；我本身罪額；無論日時受偷，暝時受偷，你lóng對我討賠。Hō͘ iá-siù siong-hāi-ê, góa bô tòa-lâi hō͘ lí; góa pún-sin chē-gia̍h; bô lūn ji̍t-sî siū-thau, mî-sî siū-thau, lí lóng tùi góa thó-pê.

40我日時hō͘日曝，暝時hō͘霜凍，lóng bōe顧得睏，我常常是án-ni。Góa ji̍t-sî hō͘ ji̍t pha̍k, mî-sî hō͘ sng tàng, lóng bōe-kò͘-tit khùn, góa siông-siông sī án-ni.

41我chit二十年tī你ê家，為tio̍h你兩個cha-bó͘-kiáⁿ，kā你做工十四年；為tio̍h你ê羊群六年；你十pái改換我ê工錢。Góa chit jī-cha̍p-nî tī lí ê ke, ūi-tio̍h lí nn̄g ê cha-bó͘-kiáⁿ, kā lí chòe-kang cha̍p-sì nî; ūi-tio̍h lí ê iûⁿ-kûn la̍k nî; lí cha̍p-pái kóe-ōaⁿ góa ê kang-chîⁿ.

42若m̄是有我ê父ê上帝，就是亞伯拉罕ê上帝，koh是以撒所驚畏ê，kap我tī-teh；你taⁿ穩當hō͘我空手去。上帝看見我ê苦情，kap我ê勞碌，chiah tī昨暝責備你。Nā m̄-sī ū góa ê pē ê Siōng-tè, chiū-sī A-pek-la̍h-hán ê Siōng-tè, koh sī Í-sat só͘ kiaⁿ-ùi-ê, kap góa tī-teh; lí taⁿ ún-tàng hō͘ góa khang-chhiú khì. Siōng-tè khòaⁿ-kìⁿ góa ê khó͘-chêng, kap góa ê lô-lo̍k, chiah tī chā-mî chek-pī lí.

43拉班應雅各講，Chiah-ê cha-bó͘-kiáⁿ是我ê cha-bó͘-kiáⁿ；chiah-ê gín-á是我ê gín-á；chiah-ê羊群亦是我ê羊群；凡若你所看見ê，lóng是我ê；我ê cha-bó͘-kiáⁿ，kap in所生ê gín-á；今á日我會kā in做甚麼？La̍h-pan ìn Ngá-kok kóng, Chiah ê cha-bó͘-kiáⁿ sī góa ê cha-bó͘-kiáⁿ; chiah ê gín-á sī góa ê gín-á; chiah ê iûⁿ-kûn ia̍h sī góa ê iûⁿ-kûn; hoān-nā lí só͘ khòaⁿ-kìⁿ-ê, lóng sī góa ê; góa ê cha-bó͘-kiáⁿ, kap in só͘ siⁿ ê gín-á; kin-á-ji̍t góa ōe kā in chòe sím-mi̍h?

44Taⁿ來，咱兩人thang來立約，tī你我ê中間做證據。Taⁿ lâi, lán nn̄g-lâng thang lâi li̍p-iok, tī lí góa ê tiong-kan chòe chèng-kù.

45雅各取石，khiā做柱。Ngá-kok chhú chio̍h, khiā chòe thiāu.

46雅各對chiah-ê兄弟講，Lín tio̍h拾石頭；in就將石頭拾來疊kui堆；大家就tī hit堆ê邊á食。Ngá-kok tùi chiah ê hiaⁿ-tī kóng, Lín tio̍h khioh chio̍h-thâu; in chiū chiong chio̍h-thâu khioh lâi thia̍p kui-tui; tāi-ke chiū tī hit tui ê piⁿ-á chia̍h.

47拉班名伊叫I-ka-ní-sat-khap-tō͘-tha；雅各名伊叫Ka-lūi-tek。La̍h-pan miâ i kiò I-ka-ní-sat-khap-tō͘-tha; Ngá-kok miâ i kiò Ka-lūi-tek.

48拉班講，今á日chit-ê石堆做你我中間ê證據。因為án-ni，名伊叫Ka-lūi-tek；La̍h-pan kóng, Kin-á-ji̍t chit ê chio̍h-tui chòe lí góa tiong-kan ê chèng-kù. In-ūi án-ni, miâ i kiò Ka-lūi-tek;

49也叫做Bí-su-pa；就是講，咱大家離別以後，願耶和華tī你我ê中間鑑察。iā kiò-chòe Bí-su-pa; chiū-sī kóng, Lán tāi-ke lī-pia̍t í-āu, goān Iâ-hô-hoa tī lí góa ê tiong-kan kàm-chhat.

50你若苦楚我ê cha-bó͘-kiáⁿ，koh tī我ê cha-bó͘-kiáⁿ以外另外娶bó͘，雖然無人kap咱tī-teh，有上帝tī你我ê中間做干證。Lí nā khó͘-chhó͘ góa ê cha-bó͘-kiáⁿ, koh tī góa ê cha-bó͘-kiáⁿ í-gōa lēng-gōa chhōa-bó͘, sui-jiân bô lâng kap lán tī-teh, ū Siōng-tè tī lí góa ê tiong-kan chòe kan-chèng.

51拉班koh對雅各講，你看chit堆石，你看chit支柱；就是我所hē tī你我ê中間ê。La̍h-pan koh tùi Ngá-kok kóng, Lí khòaⁿ chit tui chio̍h, lí khòaⁿ chit ki thiāu; chiū-sī góa só͘ hē tī lí góa ê tiong-kan-ê.

52Chit堆石做干證，chit支柱做干證；我無beh 過 chit堆石去害你，你也m̄-thang過 chit支石kap柱，來害我。Chit tui chio̍h chòe kan-chèng, chit ki thiāu chòe kan-chèng; góa bô beh kè chit tui chio̍h khì hāi lí, lí iā m̄-thang kè chit tui chio̍h kap thiāu, lâi hāi góa.

53願亞伯拉罕ê上帝，Ná-ho̍k ê上帝，in老父ê上帝，tī你我ê中間判斷。雅各就kí in老父以撒所驚畏ê上帝來chiù-chōa。Goān A-pek-la̍h-hán ê Siōng-tè, Ná-ho̍k ê Siōng-tè, in lāu-pē ê Siōng-tè, tī lí góa ê tiong-kan phòaⁿ-toàn. Ngá-kok chiū kí in lāu-pē Í-sat só͘ kiaⁿ-ùi ê Siōng-tè lâi chiù-chōa.

54雅各tī山裡獻祭，請伊hiah-ê兄弟來食；in食了，就tī山裡歇暝。Ngá-kok tī soaⁿ-ni̍h hiàn-chè, chhiáⁿ i hiah ê hiaⁿ-tī lâi chia̍h; in chia̍h-liáu, chiū tī soaⁿ-ni̍h hioh-mî.

55拉班透早起來，kap伊ê外孫，kap伊ê cha-bó͘-kiáⁿ chim嘴，kā in祝福；就起身tò去家己ê所在。La̍h-pan thàu-chá khí-lâi, kap i ê gōa-sun, kap i ê cha-bó͘-kiáⁿ chim-chhùi, kā in chiok-hok; chiū khí-sin tò-khì ka-kī ê só͘-chāi.

1雅各koh行伊ê路，上帝ê使者tú-tio̍h伊。Ngá-kok koh kiâⁿ i ê lō͘, Siōng-tè ê sù-chiá tú-tio̍h i.

2雅各看見in，就講，這是上帝ê軍隊；所以名hit所在叫Má-khap-liām。Ngá-kok khòaⁿ-kìⁿ in, chiū kóng, Che sī Siōng-tè ê kun-tūi; só͘-í miâ hit só͘-chāi kiò Má-khap-liām.

3雅各差人事先去Se-jíⁿ ê地，Í-tong ê田，見伊ê兄以掃。Ngá-kok chhe lâng tāi-seng khì Se-jíⁿ ê tōe, Í-tong ê chhân, kìⁿ i ê hiaⁿ Í-sò.

4吩咐in講，Lín kā我ê主以掃講，你ê奴僕雅各án-ni講，我tī拉班hia寄居，tòa到今á日。Hoan-hù in kóng, Lín kā góa ê chú Í-sò kóng, Lí ê lô͘-po̍k Ngá-kok án-ni kóng, Góa tī La̍h-pan hia kià-ku, tòa kàu kin-á-ji̍t.

5我有牛、驢、羊群、奴僕、女婢；taⁿ差人來報我ê主，ài得tī你ê面前得tio̍h恩典。góa ū gû, lû, iûⁿ-kûn, lô͘-po̍k, lú-pī; taⁿ chhe lâng lâi pò góa ê chú, ài tit tī lí ê bīn-chêng tit-tio̍h un-tián.

6所差ê人tò來雅各hia講，阮到你ê兄以掃hia，伊tú-tú teh來beh迎接你；koh有四百人kap伊來。Só͘ chhe ê lâng tò-lâi Ngá-kok hia kóng, Goán kàu lí ê hiaⁿ Í-sò hia, i tú-tú teh lâi beh ngiâ-chih lí; koh ū sì-pah lâng kap i lâi.

7雅各大驚koh擘腹；將hiah-ê kap伊相kap tī-teh ê人，kap羊群、牛群、駱駝，分做兩隊；Ngá-kok tōa kiaⁿ koh peh-pak; chiong hiah-ê kap i saⁿ-kap tī-teh ê lâng, kap iûⁿ-kûn, gû-kûn, lo̍k-tô, pun chòe nn̄g tūi;

8講，以掃若來攻擊chit隊，chhun-ê hit隊iáu thang逃走。kóng, Í-sò nā lâi kong-kek chit-tūi, chhun-ê hit-tūi iáu thang tô-cháu.

9雅各koh講，我ê祖，亞伯拉罕ê上帝，我ê父以撒ê上帝，耶和華ah，你bat對我講，tò去你ê本地本族，我beh好款待你。Ngá-kok koh kóng, Góa ê chó͘, A-pek-la̍h-hán ê Siōng-tè, góa ê pē Í-sat ê Siōng-tè, Iâ-hô-hoa ah, Lí bat tùi góa kóng, Tò-khì lí ê pún-tōe pún-cho̍k, Góa beh hó khoán-thāi lí.

10你對你ê奴僕所施一切ê慈愛kap一切ê誠實，就至微細ê我也bōe堪得得tio̍h；我前kia̍h我ê柺á，過chit-ê約旦河；taⁿ我已經成做兩隊。Lí tùi lí ê lô͘-po̍k só͘ si it-chhè ê chû-ài kap it-chhè ê sêng-si̍t, chiū chì-bî-sòe ê góa iā bōe kham-tit tit-tio̍h; góa chêng kia̍h góa ê koáiⁿ-á, kè chit ê Iok-tàn hô; taⁿ góa í-keng chiâⁿ-chòe nn̄g-tūi.

11求你救我脫離我ê兄以掃ê手；因為我驚伊，驚了伊來thâi死我kap in 母kiáⁿ。Kiû Lí kiù góa thoat-lī góa ê hiaⁿ Í-sò ê chhiú; in-ūi góa kiaⁿ i, kiaⁿ-liáu i lâi thâi-sí góa kap in bú-kiáⁿ.

12你也bat講，我的確beh好款待你；hō͘你ê後裔親像海邊ê沙，chōe到bōe算得。Lí iā bat kóng, Góa tek-khak beh hó khoán-thāi lí; hō͘ lí ê hō͘-è chhin-chhiūⁿ hái-piⁿ ê soa, chōe kàu bōe-sǹg-tit.

13Hit暝雅各歇tī-hia；就tī伊所有ê物ê內面，揀出禮物，beh送伊ê兄以掃；Hit-mî Ngá-kok hioh tī-hia; chiū tī i só͘ ū ê mi̍h ê lāi-bīn, kéng-chhut lé-mi̍h, beh sàng i ê hiaⁿ Í-sò;

14山羊母兩百隻，山羊公二十隻，綿羊母兩百隻，綿羊公二十隻；soaⁿ-iûⁿ-bú nn̄g-pah chiah, soaⁿ-iûⁿ-kang jī-cha̍p chiah, mî-iûⁿ-bú nn̄g-pah chiah, mî-iûⁿ-kang jī-cha̍p chiah;

15駱駝母kap食奶ê kiáⁿ三十隻，牛母四十隻，牛káng十隻，驢母二十隻，驢kiáⁿ十隻。lo̍k-tô-bú kap chia̍h-ni ê kiáⁿ saⁿ-cha̍p chiah, gû-bú sì-cha̍p chiah, gû-káng cha̍p chiah, lû-bú jī-cha̍p chiah, lû-kiáⁿ cha̍p-chiah.

16各樣另外一群，交代奴僕；kā奴僕講，Lín事先我去，hō͘ ta̍k群有相離。Kok-iūⁿ lēng-gōa chi̍t-kûn, kau-tài lô͘-po̍k; kā lô͘-po̍k kóng, Lín tāi-seng góa khì, hō͘ ta̍k-kûn ū saⁿ-lī.

17Koh吩咐做頭ê，講，我ê兄以掃tú-tio̍h你ê時，若問你講，你是甚麼人ê？beh去tah-lo̍h？你頭前hiah-ê 是誰 ê？Koh hoan-hù chòe-thâu-ê, kóng, Góa ê hiaⁿ Í-sò tú-tio̍h lí ê sî, nā mn̄g lí kóng, Lí sī sím-mi̍h lâng ê? beh khì tah-lo̍h? lí thâu-chêng hiah-ê chī-chūi ê?

18你tio̍h講，是你ê奴僕雅各ê；是beh送我ê主以掃ê禮物；現在伊本身亦tī阮ê後面。lí tio̍h kóng, Sī lí ê lô͘-po̍k Ngá-kok ê; sī beh sàng góa ê chú Í-sò ê lé-mi̍h; hiān-chāi i pún-sin ia̍h tī goán ê āu-bīn.

19Koh吩咐第二第三，kap一切趕kui群cheng-siⁿ ê人，講，Lín tú-tio̍h以掃ê時，亦tio̍h照án-ni kā伊講。Koh hoan-hù tē-jī tē-saⁿ, kap it-chhè kóaⁿ kui-kûn cheng-siⁿ ê lâng, kóng, Lín tú-tio̍h Í-sò ê sî, ia̍h tio̍h chiàu án-ni kā i kóng.

20Koh lín亦tio̍h講，你ê奴僕雅各tī阮ê後面。因為雅各家己phah算講，我用tī我頭前去ê禮物來改伊ê恨；然後我見tio̍h伊ê面，kiám-chhái伊接納我。Koh lín ia̍h tio̍h kóng, Lí ê lô͘-po̍k Ngá-kok tī goán ê āu-bīn. In-ūi Ngá-kok ka-kī phah-sǹg kóng, Góa ēng tī góa thâu-chêng khì ê lé-mi̍h lâi kóe i ê hūn; jiân-āu góa kìⁿ-tio̍h i ê bīn, kiám-chhái i chiap-la̍p góa.

21Tùi án-ni，禮物先行；hit暝雅各歇tī隊中。Tùi án-ni, lé-mi̍h seng kiâⁿ; hit-mî Ngá-kok hioh tī tūi-tiong.

22伊暝時起來，chhōa伊兩個bó͘，兩個女婢，kap十一個kiáⁿ，lóng 過Ngá-po̍k ê渡頭。I mî-sî khí-lâi, chhōa i nn̄g ê bó͘, nn̄g ê lú-pī, kap cha̍p-it ê kiáⁿ, lóng kè Ngá-po̍k ê tō͘-thâu.

23事先hō͘ in過溪；凡所有ê亦hō͘ in過。Tāi-seng hō͘ in kè-khoe; hoān só͘-ū-ê ia̍h hō͘ in kè.

24只有chhun雅各家己tī-teh；有一人來kap伊相ián，到tī天phú光。Chí-ū chhun Ngá-kok ka-kī tī-teh; ū chi̍t-lâng lâi kap i saⁿ-ián, kàu tī thiⁿ-phú-kng.

25Hit人看bōe贏伊；就siàn雅各ê大腿臼；相ián ê時，雅各ê大腿臼choa̍h-tio̍h。Hit-lâng khòaⁿ bōe iâⁿ-i; chiū siàn Ngá-kok ê tōa-thúi-khū; saⁿ-ián ê sî, Ngá-kok ê tōa-thúi-khū choa̍h-tio̍h.

26Hit人講，天beh光lah，tio̍h放我去。雅各講，你若無kā我祝福，m̄放你去。Hit-lâng kóng, Thiⁿ beh kng lah, tio̍h pàng góa khì. Ngá-kok kóng, Lí nā bô kā góa chiok-hok, m̄ pàng lí khì.

27Hit人講，你名做甚麼？伊講，我名做雅各。Hit-lâng kóng, Lí miâ chòe sím-mi̍h? i kóng, Góa miâ chòe Ngá-kok.

28Hit人講，你ê名無beh koh叫雅各，beh叫做以色列；因為你kap上帝kap人鬥輸贏，lóng得tio̍h khah贏。Hit-lâng kóng, Lí ê miâ bô beh koh kiò Ngá-kok, beh kiò-chòe Í-sek-lia̍t; in-ūi lí kap Siōng-tè kap lâng tàu su-iâⁿ, lóng tit-tio̍h khah-iâⁿ.

29雅各問伊講，請將你ê名kā我講。Hit人應講，Mih-sái問我ê名？就tī-hia kā伊祝福。Ngá-kok mn̄g i kóng, Chhiáⁿ chiong lí ê miâ kā góa kóng. Hit lâng ìn kóng, Mih-sái mn̄g góa ê miâ? chiū tī-hia kā i chiok-hok.

30雅各名hit所在叫Piān-í-lī，因為講，我當頭對面見tio̍h上帝，我ê性命iáu得tio̍h保全。Ngá-kok miâ Hit só͘-chāi kiò Piān-í-lī, in-ūi kóng, Góa tng-thâu tùi-bīn kìⁿ-tio̍h Siōng-tè, góa ê sìⁿ-miā iáu tit-tio̍h pó-choân.

31日tú-á出，雅各經過Piān-í-lī；伊ê大腿已經pái。Ji̍t tú-á chhut, Ngá-kok keng-kè Piān-í-lī; i ê tōa-thúi í-keng pái.

32所以chiah-ê以色列人無食大腿頭ê筋，到tī今á日；因為hit人siàn雅各腿臼ê大筋。Só͘-í chiah ê Í-sek-lia̍t lâng bô chia̍h tōa-thúi-thâu ê kun, kàu tī kin-á-ji̍t; in-ūi hit-lâng siàn Ngá-kok thúi-khū ê tōa-kun.