1雅各koh行伊ê路，上帝ê使者tú-tio̍h伊。Ngá-kok koh kiâⁿ i ê lō͘, Siōng-tè ê sù-chiá tú-tio̍h i.

2雅各看見in，就講，這是上帝ê軍隊；所以名hit所在叫Má-khap-liām。Ngá-kok khòaⁿ-kìⁿ in, chiū kóng, Che sī Siōng-tè ê kun-tūi; só͘-í miâ hit só͘-chāi kiò Má-khap-liām.

3雅各差人事先去Se-jíⁿ ê地，Í-tong ê田，見伊ê兄以掃。Ngá-kok chhe lâng tāi-seng khì Se-jíⁿ ê tōe, Í-tong ê chhân, kìⁿ i ê hiaⁿ Í-sò.

4吩咐in講，Lín kā我ê主以掃講，你ê奴僕雅各án-ni講，我tī拉班hia寄居，tòa到今á日。Hoan-hù in kóng, Lín kā góa ê chú Í-sò kóng, Lí ê lô͘-po̍k Ngá-kok án-ni kóng, Góa tī La̍h-pan hia kià-ku, tòa kàu kin-á-ji̍t.

5我有牛、驢、羊群、奴僕、女婢；taⁿ差人來報我ê主，ài得tī你ê面前得tio̍h恩典。góa ū gû, lû, iûⁿ-kûn, lô͘-po̍k, lú-pī; taⁿ chhe lâng lâi pò góa ê chú, ài tit tī lí ê bīn-chêng tit-tio̍h un-tián.

6所差ê人tò來雅各hia講，阮到你ê兄以掃hia，伊tú-tú teh來beh迎接你；koh有四百人kap伊來。Só͘ chhe ê lâng tò-lâi Ngá-kok hia kóng, Goán kàu lí ê hiaⁿ Í-sò hia, i tú-tú teh lâi beh ngiâ-chih lí; koh ū sì-pah lâng kap i lâi.

7雅各大驚koh擘腹；將hiah-ê kap伊相kap tī-teh ê人，kap羊群、牛群、駱駝，分做兩隊；Ngá-kok tōa kiaⁿ koh peh-pak; chiong hiah-ê kap i saⁿ-kap tī-teh ê lâng, kap iûⁿ-kûn, gû-kûn, lo̍k-tô, pun chòe nn̄g tūi;

8講，以掃若來攻擊chit隊，chhun-ê hit隊iáu thang逃走。kóng, Í-sò nā lâi kong-kek chit-tūi, chhun-ê hit-tūi iáu thang tô-cháu.

9雅各koh講，我ê祖，亞伯拉罕ê上帝，我ê父以撒ê上帝，耶和華ah，你bat對我講，tò去你ê本地本族，我beh好款待你。Ngá-kok koh kóng, Góa ê chó͘, A-pek-la̍h-hán ê Siōng-tè, góa ê pē Í-sat ê Siōng-tè, Iâ-hô-hoa ah, Lí bat tùi góa kóng, Tò-khì lí ê pún-tōe pún-cho̍k, Góa beh hó khoán-thāi lí.

10你對你ê奴僕所施一切ê慈愛kap一切ê誠實，就至微細ê我也bōe堪得得tio̍h；我前kia̍h我ê柺á，過chit-ê約旦河；taⁿ我已經成做兩隊。Lí tùi lí ê lô͘-po̍k só͘ si it-chhè ê chû-ài kap it-chhè ê sêng-si̍t, chiū chì-bî-sòe ê góa iā bōe kham-tit tit-tio̍h; góa chêng kia̍h góa ê koáiⁿ-á, kè chit ê Iok-tàn hô; taⁿ góa í-keng chiâⁿ-chòe nn̄g-tūi.

11求你救我脫離我ê兄以掃ê手；因為我驚伊，驚了伊來thâi死我kap in 母kiáⁿ。Kiû Lí kiù góa thoat-lī góa ê hiaⁿ Í-sò ê chhiú; in-ūi góa kiaⁿ i, kiaⁿ-liáu i lâi thâi-sí góa kap in bú-kiáⁿ.

12你也bat講，我的確beh好款待你；hō͘你ê後裔親像海邊ê沙，chōe到bōe算得。Lí iā bat kóng, Góa tek-khak beh hó khoán-thāi lí; hō͘ lí ê hō͘-è chhin-chhiūⁿ hái-piⁿ ê soa, chōe kàu bōe-sǹg-tit.

13Hit暝雅各歇tī-hia；就tī伊所有ê物ê內面，揀出禮物，beh送伊ê兄以掃；Hit-mî Ngá-kok hioh tī-hia; chiū tī i só͘ ū ê mi̍h ê lāi-bīn, kéng-chhut lé-mi̍h, beh sàng i ê hiaⁿ Í-sò;

14山羊母兩百隻，山羊公二十隻，綿羊母兩百隻，綿羊公二十隻；soaⁿ-iûⁿ-bú nn̄g-pah chiah, soaⁿ-iûⁿ-kang jī-cha̍p chiah, mî-iûⁿ-bú nn̄g-pah chiah, mî-iûⁿ-kang jī-cha̍p chiah;

15駱駝母kap食奶ê kiáⁿ三十隻，牛母四十隻，牛káng十隻，驢母二十隻，驢kiáⁿ十隻。lo̍k-tô-bú kap chia̍h-ni ê kiáⁿ saⁿ-cha̍p chiah, gû-bú sì-cha̍p chiah, gû-káng cha̍p chiah, lû-bú jī-cha̍p chiah, lû-kiáⁿ cha̍p-chiah.

16各樣另外一群，交代奴僕；kā奴僕講，Lín事先我去，hō͘ ta̍k群有相離。Kok-iūⁿ lēng-gōa chi̍t-kûn, kau-tài lô͘-po̍k; kā lô͘-po̍k kóng, Lín tāi-seng góa khì, hō͘ ta̍k-kûn ū saⁿ-lī.

17Koh吩咐做頭ê，講，我ê兄以掃tú-tio̍h你ê時，若問你講，你是甚麼人ê？beh去tah-lo̍h？你頭前hiah-ê 是誰 ê？Koh hoan-hù chòe-thâu-ê, kóng, Góa ê hiaⁿ Í-sò tú-tio̍h lí ê sî, nā mn̄g lí kóng, Lí sī sím-mi̍h lâng ê? beh khì tah-lo̍h? lí thâu-chêng hiah-ê chī-chūi ê?

18你tio̍h講，是你ê奴僕雅各ê；是beh送我ê主以掃ê禮物；現在伊本身亦tī阮ê後面。lí tio̍h kóng, Sī lí ê lô͘-po̍k Ngá-kok ê; sī beh sàng góa ê chú Í-sò ê lé-mi̍h; hiān-chāi i pún-sin ia̍h tī goán ê āu-bīn.

19Koh吩咐第二第三，kap一切趕kui群cheng-siⁿ ê人，講，Lín tú-tio̍h以掃ê時，亦tio̍h照án-ni kā伊講。Koh hoan-hù tē-jī tē-saⁿ, kap it-chhè kóaⁿ kui-kûn cheng-siⁿ ê lâng, kóng, Lín tú-tio̍h Í-sò ê sî, ia̍h tio̍h chiàu án-ni kā i kóng.

20Koh lín亦tio̍h講，你ê奴僕雅各tī阮ê後面。因為雅各家己phah算講，我用tī我頭前去ê禮物來改伊ê恨；然後我見tio̍h伊ê面，kiám-chhái伊接納我。Koh lín ia̍h tio̍h kóng, Lí ê lô͘-po̍k Ngá-kok tī goán ê āu-bīn. In-ūi Ngá-kok ka-kī phah-sǹg kóng, Góa ēng tī góa thâu-chêng khì ê lé-mi̍h lâi kóe i ê hūn; jiân-āu góa kìⁿ-tio̍h i ê bīn, kiám-chhái i chiap-la̍p góa.

21Tùi án-ni，禮物先行；hit暝雅各歇tī隊中。Tùi án-ni, lé-mi̍h seng kiâⁿ; hit-mî Ngá-kok hioh tī tūi-tiong.

22伊暝時起來，chhōa伊兩個bó͘，兩個女婢，kap十一個kiáⁿ，lóng 過Ngá-po̍k ê渡頭。I mî-sî khí-lâi, chhōa i nn̄g ê bó͘, nn̄g ê lú-pī, kap cha̍p-it ê kiáⁿ, lóng kè Ngá-po̍k ê tō͘-thâu.

23事先hō͘ in過溪；凡所有ê亦hō͘ in過。Tāi-seng hō͘ in kè-khoe; hoān só͘-ū-ê ia̍h hō͘ in kè.

24只有chhun雅各家己tī-teh；有一人來kap伊相ián，到tī天phú光。Chí-ū chhun Ngá-kok ka-kī tī-teh; ū chi̍t-lâng lâi kap i saⁿ-ián, kàu tī thiⁿ-phú-kng.

25Hit人看bōe贏伊；就siàn雅各ê大腿臼；相ián ê時，雅各ê大腿臼choa̍h-tio̍h。Hit-lâng khòaⁿ bōe iâⁿ-i; chiū siàn Ngá-kok ê tōa-thúi-khū; saⁿ-ián ê sî, Ngá-kok ê tōa-thúi-khū choa̍h-tio̍h.

26Hit人講，天beh光lah，tio̍h放我去。雅各講，你若無kā我祝福，m̄放你去。Hit-lâng kóng, Thiⁿ beh kng lah, tio̍h pàng góa khì. Ngá-kok kóng, Lí nā bô kā góa chiok-hok, m̄ pàng lí khì.

27Hit人講，你名做甚麼？伊講，我名做雅各。Hit-lâng kóng, Lí miâ chòe sím-mi̍h? i kóng, Góa miâ chòe Ngá-kok.

28Hit人講，你ê名無beh koh叫雅各，beh叫做以色列；因為你kap上帝kap人鬥輸贏，lóng得tio̍h khah贏。Hit-lâng kóng, Lí ê miâ bô beh koh kiò Ngá-kok, beh kiò-chòe Í-sek-lia̍t; in-ūi lí kap Siōng-tè kap lâng tàu su-iâⁿ, lóng tit-tio̍h khah-iâⁿ.

29雅各問伊講，請將你ê名kā我講。Hit人應講，Mih-sái問我ê名？就tī-hia kā伊祝福。Ngá-kok mn̄g i kóng, Chhiáⁿ chiong lí ê miâ kā góa kóng. Hit lâng ìn kóng, Mih-sái mn̄g góa ê miâ? chiū tī-hia kā i chiok-hok.

30雅各名hit所在叫Piān-í-lī，因為講，我當頭對面見tio̍h上帝，我ê性命iáu得tio̍h保全。Ngá-kok miâ Hit só͘-chāi kiò Piān-í-lī, in-ūi kóng, Góa tng-thâu tùi-bīn kìⁿ-tio̍h Siōng-tè, góa ê sìⁿ-miā iáu tit-tio̍h pó-choân.

31日tú-á出，雅各經過Piān-í-lī；伊ê大腿已經pái。Ji̍t tú-á chhut, Ngá-kok keng-kè Piān-í-lī; i ê tōa-thúi í-keng pái.

32所以chiah-ê以色列人無食大腿頭ê筋，到tī今á日；因為hit人siàn雅各腿臼ê大筋。Só͘-í chiah ê Í-sek-lia̍t lâng bô chia̍h tōa-thúi-thâu ê kun, kàu tī kin-á-ji̍t; in-ūi hit-lâng siàn Ngá-kok thúi-khū ê tōa-kun.

1雅各kia̍h目看，看見以掃來；koh有四百人kap伊來。伊就將hiah-ê gín-á分開，交hō͘利亞，交hō͘拉結，交hō͘兩個女婢。Ngá-kok kia̍h-ba̍k khòaⁿ, khòaⁿ-kìⁿ Í-sò lâi; koh ū sì-pah lâng kap i lâi. I chiū chiong hiah ê gín-á pun-khui, kau hō͘ Lī-a, kau hō͘ La̍h-kiat, kau hō͘ nn̄g ê lú-pī.

2將女婢kap in ê kiáⁿ排tī頭前，利亞kap伊ê kiáⁿ排tī後面，拉結kap約瑟排tī路尾。Chiong lú-pī kap in ê kiáⁿ pâi tī thâu-chêng, Lī-a kap i ê kiáⁿ pâi tī āu-bīn, La̍h-kiat kap Iok-sek pâi tī lō͘-bé.

3伊本身tī in ê頭前過去，連連七pái仆tī地裡，chiah óa近伊ê兄。I pún-sin tī in ê thâu-chêng kè-khì, liân-liân chhit-pái phak tī tōe-ni̍h, chiah óa-kūn i ê hiaⁿ.

4以掃走來迎接伊，將伊抱teh，koh lám伊ê頷頸，chim伊；兩人就啼哭。Í-sò cháu-lâi ngiâ-chih i, chiong i phō-teh, koh lám i ê ām-kún, chim i; nn̄g-lâng chiū thî-khàu.

5以掃kia̍h目看見婦人人kap gín-á，就講，Chiah-ê kap你同行ê是是誰？雅各講，Chiah-ê gín-á是上帝施恩hō͘你ê奴僕ê。Í-sò kia̍h-ba̍k khòaⁿ-kìⁿ hū-jîn-lâng kap gín-á, chiū kóng, Chiah-ê kap lí tâng-kiâⁿ-ê sī chī-chūi? Ngá-kok kóng, Chiah ê gín-á sī Siōng-tè si-un hō͘ lí ê lô͘-po̍k-ê.

6Tùi hit-tia̍p，兩個女婢，kap in ê gín-á，進前來拜。Tùi hit-tia̍p nn̄g ê lú-pī, kap in ê gín-á, chìn-chêng lâi pài.

7利亞kap伊ê gín-á亦進前來拜；路尾約瑟kap拉結亦進前來拜。Lī-a kap i ê gín-á ia̍h chìn-chêng lâi pài; lō͘-bé Iok-sek kap La̍h-kiat ia̍h chìn-chêng lâi pài.

8以掃講，我所tú-tio̍h kui群 ê cheng-siⁿ，你是甚麼意思？雅各講，是beh tī我ê主ê面前得tio̍h恩典。Í-sò kóng, Góa só͘ tú-tio̍h kui-kûn ê cheng-siⁿ, lí sī sím-mi̍h ì-sù? Ngá-kok kóng, Sī beh tī góa ê chú ê bīn-chêng tit-tio̍h un-tián.

9以掃講，小弟ah，我ê已經夠額，你ê猶原歸你。Í-sò kóng, Sió-tī ah, góa-ê í-keng kàu-gia̍h, lí-ê iû-goân kui lí.

10雅各講，莫án-ni，我若tī你ê面前得tio̍h恩典，求你tùi我ê手收我ê禮物；因為我見tio̍h你ê面，親像見tio̍h上帝ê面，你亦接納我；Ngá-kok kóng, Bo̍h án-ni, góa nā tī lí ê bīn-chêng tit-tio̍h un-tián, kiû lí tùi góa ê chhiú siu góa ê lé-mi̍h; in-ūi góa kìⁿ-tio̍h lí ê bīn, chhin-chhiūⁿ kìⁿ-tio̍h Siōng-tè ê bīn, lí ia̍h chiap-la̍p góa;

11求你收我帶來hō͘你ê禮物；因為上帝恩典我，hō͘我充足；逼伊，然後收。kiû lí siu góa tòa-lâi hō͘ lí ê lé-mi̍h; in-ūi Siōng-tè un-tián góa, hō͘ góa chhiong-chiok; pek-i, jiân-āu siu.

12以掃講，咱起身來去，我做頭行。Í-sò kóng, Lán khí-sin lâi khì, góa chòe-thâu kiâⁿ.

13雅各對伊講，我ê主知chiah-ê gín-á軟chiáⁿ，牛羊亦tú-á生；若做一日趕，kui群lóng beh死。Ngá-kok tùi i kóng, góa ê chú chai chiah ê gín-á nńg-chiáⁿ, gû-iûⁿ ia̍h tú-á siⁿ; nā chòe chi̍t-ji̍t kóaⁿ, kui-kûn lóng beh sí.

14求我ê主tī奴僕ê頭前行，我beh照tī我面前kui群 cheng-siⁿ ê力量，亦照gín-á ê力量，慢慢進前，行到Se-jíⁿ，到我ê主hia。Kiû góa ê chú tī lô͘-po̍k ê thâu-chêng kiâⁿ, góa beh chiàu tī góa bīn-chêng kui-kûn cheng-siⁿ ê le̍k-liōng, ia̍h chiàu gín-á ê le̍k-liōng, bān-bān chìn-chêng, kiâⁿ kàu Se-jíⁿ, kàu góa ê chú hia.

15以掃講，容允我將tè我ê人留幾個kap你做陣。雅各講，Mih-sái án-ni？Tī我ê主ê面前得tio̍h恩典就好。Í-sò kóng, Iông-ún góa chiong tè góa ê lâng lâu kúi-ê kap lí chòe-tīn. Ngá-kok kóng, Mih-sái án-ni? tī góa ê chú ê bīn-chêng tit-tio̍h un-tián chiū hó.

16Hit日以掃起身，照原路tò去Se-jíⁿ。Hit-ji̍t Í-sò khí-sin, chiàu goân-lō͘ tò-khì Se-jíⁿ.

17雅各行到Sò͘-kat，tī-hia為本身起厝，為cheng-siⁿ搭草寮；所以名hit所在做Sò͘-kat。Ngá-kok kiâⁿ kàu Sò͘-kat, tī-hia ūi pún-sin khí-chhù, ūi cheng-siⁿ tah chháu-liâu; só͘-í miâ hit só͘-chāi chòe Sò͘-kat.

18雅各tùi Pa-tàn-a-lân tò來ê時，平安到迦南地ê示劍城；tī城ê面前搭布棚。Ngá-kok tùi Pa-tàn-a-lân tò-lâi ê sî, pêng-an kàu Ka-lâm tōe ê Sī-kiàm siâⁿ; tī siâⁿ ê bīn-chêng tah pò͘-pîⁿ.

19用一百塊銀，tùi示劍ê老父Hap-boat ê kiaⁿ孫，買伊搭布棚hit塊地；Ēng chi̍t-pah tè gûn, tùi Sī-kiàm ê lāu-pē Hap-boat ê kiáⁿ-sun, bóe i tah pò͘-pîⁿ hit tè tōe;

20tī-hia起一座壇，kā伊號名叫I-lī I-lô-i以色列。tī-hia khí chi̍t chō tôaⁿ, kā i hō miâ kiò I-lī I-lô-i Í-sek-lia̍t.

1利亞kā雅各所生ê cha-bó͘-kiáⁿ，Tí-ná，出去beh見hit所在ê cha-bó͘-gín-á。Lī-a kā Ngá-kok só͘ siⁿ ê cha-bó͘-kiáⁿ, Tí-ná, chhut-khì beh kìⁿ hit só͘-chāi ê cha-bó͘-gín-á.

2Hit所在ê bo̍k-pek Hi-bī人Hap-boat ê kiáⁿ示劍看見伊；就khiú伊，kap伊相kap睏，凌辱伊。Hit só͘-chāi ê bo̍k-pek Hi-bī lâng Hap-boat ê kiáⁿ Sī-kiàm khòaⁿ-kìⁿ i; chiū khiú-i, kap i saⁿ-kap khùn, lêng-jio̍k i.

3伊ê心戀慕雅各ê cha-bó͘-kiáⁿ Tí-ná；疼chit-ê cha-bó͘-kiáⁿ，用好話安慰伊。I ê sim loân-bō͘ Ngá-kok ê cha-bó͘-kiáⁿ Tí-ná; thiàⁿ chit ê cha-bó͘-kiáⁿ, ēng hó-ōe an-ùi i.

4示劍kā伊ê老父Hap-boat，講，求你kā我聘chit-ê cha-bó͘-gín-á做bó͘。Sī-kiàm kā i ê lāu-pē Hap-boat, kóng, Kiû lí kā góa phèng chit ê cha-bó͘-gín-á chòe-bó͘.

5雅各聽見伊phah lâ-sâm伊ê cha-bó͘-kiáⁿ Tí-ná；hit時伊hiah-ê kiáⁿ kap伊ê cheng-siⁿ tī山裡；雅各靜靜無做聲，thèng候in tò來。Ngá-kok thiaⁿ-kìⁿ i phah lâ-sâm i ê cha-bó͘-kiáⁿ Tí-ná; hit-sî i hiah ê kiáⁿ kap i ê cheng-siⁿ tī soaⁿ-ni̍h; Ngá-kok chēng-chēng bô chòe siaⁿ, thèng-hāu in tò-lâi.

6示劍ê老父，Hap-boat，出來見雅各，beh kap伊講話。Sī-kiàm ê lāu-pē, Hap-boat, chhut-lâi kìⁿ Ngá-kok, beh kap i kóng-ōe.

7雅各hiah-ê kiáⁿ聽見chit-ê tāi-chì，就tùi山裡tò來，ta̍k-ê m̄甘願，十分受氣；因為示劍tī以色列做出見笑ê tāi-chì，kap雅各ê cha-bó͘-kiáⁿ相kap睏；這本是m̄應該做ê事。Ngá-kok hiah ê kiáⁿ thiaⁿ-kìⁿ chit ê tāi-chì, chiū tùi soaⁿ-ni̍h tò-lâi, ta̍k-ê m̄ kam-goān, cha̍p-hun siū-khì; in-ūi Sī-kiàm tī Í-sek-lia̍t chòe chhut kiàn-siàu ê tāi-chì, kap Ngá-kok ê cha-bó͘-kiáⁿ saⁿ-kap khùn; che pún sī m̄ eng-kai chòe ê sū.

8Hap-boat kap in參詳講，我ê kiáⁿ示劍ê心欣慕lín ê cha-bó͘-gín-á；求lín將伊hō͘我ê kiáⁿ做bó͘。Hap-boat kap in chham-siông kóng, Góa ê kiáⁿ Sī-kiàm ê sim him-bō͘ lín ê cha-bó͘-gín-á; kiû lín chiong i hō͘ góa ê kiáⁿ chòe-bó͘.

9Lín kap阮大家結親；lín thang將lín ê cha-bó͘-kiáⁿ hō͘阮，lín亦thang娶阮ê cha-bó͘-kiáⁿ。Lín kap goán tāi-ke kiat-chhin; lín thang chiong lín ê cha-bó͘-kiáⁿ hō͘ goán, lín ia̍h thang chhōa goán ê cha-bó͘-kiáⁿ.

10Lín kap阮相kap khiā起；地tī lín ê面前，lín tòa chia khiā，做seng-lí，建置產業。Lín kap goán saⁿ-kap khiā-khí; tōe tī lín ê bīn-chêng, lín tòa chia khiā, chòe seng-lí, kiàn-tì sán-gia̍p.

11示劍對cha-bó͘-gín-á ê老父kap伊ê兄弟講，願tī你ê面前得tio̍h恩典；lín所對我講ê我beh hō͘ lín。Sī-kiàm tùi cha-bó͘-gín-á ê lāu-pē kap i ê hiaⁿ-tī kóng, Goān tī lí ê bīn-chêng tit-tio̍h un-tián; lín só͘ tùi góa kóng-ê góa beh hō͘ lín.

12chhut-chāi lín beh tùi我討jōa-chōe聘金，kap禮物，我的確照lín所講ê hō͘ lín；只有ài lín用cha-bó͘-gín-á hō͘我做bó͘。Chhut-chāi lín beh tùi góa thó jōa-chōe phèng-kim, kap lé-mi̍h, góa tek-khak chiàu lín só͘ kóng-ê hō͘ lín; chí-ū ài lín ēng cha-bó͘-gín-á hō͘ góa chòe-bó͘.

13雅各hiah-ê kiáⁿ，因為示劍phah lâ-sâm in ê小妹Tí-ná，就用奸詐ê話來應示劍，kap伊ê老父，Hap-boat，對in講，Ngá-kok hiah ê kiáⁿ, in-ūi Sī-kiàm phah lâ-sâm in ê sió-bē Tí-ná, chiū ēng kan-chà ê ōe lâi ìn Sī-kiàm, kap i ê lāu-pē, Hap-boat, tùi in kóng,

14將阮ê小妹hō͘無受割禮ê人做bó͘，這ê tāi-chì阮bōe做得；因為he是阮ê見笑。Chiong goán ê sió-bē hō͘ bô siū kat-lé ê lâng chòe-bó͘, che ê tāi-chì goán bōe-chòe-tit; in-ūi he sī goán ê kiàn-siàu.

15Lín所有ê ta-po͘人，若lóng受割禮親像阮一樣，有chí一項chiah thang應允lín；Lín só͘ ū ê ta-po͘-lâng, nā lóng siū kat-lé chhin-chhiūⁿ goán chi̍t-iūⁿ, ū chí chi̍t-hāng chiah thang èng-ún lín;

16阮就將阮ê cha-bó͘-kiáⁿ hō͘ lín，阮亦chhōa lín ê cha-bó͘-kiáⁿ；阮就kap lín相kap tòa，成做一個百姓。goán chiū chiong goán ê cha-bó͘-kiáⁿ hō͘ lín, goán ia̍h chhōa lín ê cha-bó͘-kiáⁿ; goán chiū kap lín saⁿ-kap tòa, chiâⁿ-chòe chi̍t ê peh-sìⁿ.

17設使lín m̄聽阮ê話來受割禮，阮就tòa阮ê小妹來去。Siat-sú lín m̄-thiaⁿ goán ê ōe lâi siū kat-lé, goán chiū tòa goán ê sió-bē lâi khì.

18Hap-boatkap伊ê kiáⁿ示劍，歡喜in ê話。Hap-boat kap i ê kiáⁿ Sī-kiàm, hoaⁿ-hí in ê ōe.

19Hit-ê少年人做chit-ê tāi-chì，lóng無延chhiân；因為伊疼雅各ê cha-bó͘-kiáⁿ；koh伊tī in老父ê家第一尊貴。Hit ê siàu-liân lâng chòe chit ê tāi-chì, lóng bô iân-chhiân; in-ūi i thiàⁿ Ngá-kok ê cha-bó͘-kiáⁿ; koh i tī in lāu-pē ê ke tē-it chun-kùi.

20Hap-boat，kap伊ê kiáⁿ示劍，來到本城ê門口，kā本城ê人講，Hap-boat, kap i ê kiáⁿ Sī-kiàm, lâi kàu pún-siâⁿ ê mn̂g-kháu, kā pún-siâⁿ ê lâng kóng,

21Chiah-ê人kap咱和好；m̄值tio̍h chún in tī chit-ê地khiā起，做seng-lí；koh chit-ê地亦開闊，ōe容允得in；咱thang chhōa in ê cha-bó͘-kiáⁿ做bó͘，亦thang將咱ê cha-bó͘-kiáⁿ 過hō͘ in。Chiah ê lâng kap lán hô-hó; m̄-ta̍t-tio̍h chún in tī chit ê tōe khiā-khí, chòe seng-lí; koh chit ê tōe ia̍h khui-khoah, ōe iông-ún-tit in; lán thang chhōa in ê cha-bó͘-kiáⁿ chòe-bó͘, ia̍h thang chiong lán ê cha-bó͘-kiáⁿ kè hō͘ in.

22獨獨tio̍h有一項，hiah-ê chiah beh允咱，kap咱khiā起，成做一個百姓；就是咱中間所有ê ta-po͘人lóng tio̍h受割禮，親像in受割禮一樣。To̍k-to̍k tio̍h ū chi̍t-hāng, hiah-ê chiah beh ún lán, kap lán khiā-khí, chiâⁿ-chòe chi̍t ê peh-sìⁿ; chiū-sī lán tiong-kan só͘ ū ê ta-po͘-lâng lóng tio̍h siū kat-lé, chhin-chhiūⁿ in siū kat-lé chi̍t-iūⁿ.

23伊ê牛，羊，財產，kap一切ê cheng-siⁿ，kiám無lóng歸tī咱mah？只有tioh8un2-in，in就beh kap咱tòa。I ê gû, iûⁿ, châi-sán, kap it-chhè ê cheng-siⁿ, kiám bô lóng kui tī lán mah? chí-ū tio̍h ún-in, in chiū beh kap lán tòa.

24見若tùi城門出來ê人lóng聽thàn hap-boat kap伊ê kiáⁿ示劍ê話；tùi án-ni見若tùi城門出來ê ta-po͘人lóng受割禮。Kìⁿ-nā tùi siâⁿ-mn̂g chhut-lâi ê lâng lóng thiaⁿ-thàn Hap-boat kap i ê kiáⁿ Sī-kiàm ê ōe; tùi án-ni kìⁿ-nā tùi siâⁿ-mn̂g chhut-lâi ê ta-po͘-lâng lóng siū kat-lé.

25到第三日，眾人當teh痛疼ê時，雅各兩個kiáⁿ，就是Tí-ná ê兄西門kap利未，lóng kia̍h刀，thàn人無tiuⁿ-tî，來到城內，thâi死lóng總ê ta-po͘人。Kàu tē-saⁿ ji̍t, chèng-lâng tng teh thàng-thiàⁿ ê sî, Ngá-kok nn̄g ê kiáⁿ, chiū-sī Tí-ná ê hiaⁿ Se-biān kap Lī-bī, lóng kia̍h-to, thàn lâng bô tiuⁿ-tî, lâi kàu siâⁿ-lāi, thâi-sí lóng-chóng ê ta-po͘-lâng.

26也用刀thâi死Hap-boat kap伊ê kiáⁿ示劍；chhōa tí-ná tùi示劍ê厝出來，就去。Iā ēng to thâi-sí Hap-boat kap i ê kiáⁿ Sī-kiàm; chhōa Tí-ná tùi Sī-kiàm ê chhù chhut-lâi, chiū khì.

27雅各hiah-ê kiáⁿ，為tio̍h in小妹受phah lâ-sâm，就來到受thâi ê人hia，搶劫in ê城。Ngá-kok hiah ê kiáⁿ, ūi-tio̍h in sió-bē siū phah lâ-sâm, chiū lâi kàu siū-thâi ê lâng hia, chhiúⁿ-kiap in ê siâⁿ.

28搶in ê羊群，牛群，kap驢；以及城內kap 田裡所有ê。Chhiúⁿ in ê iûⁿ-kûn, gû-kûn, kap lû; í-ki̍p siâⁿ-lāi kap chhân-ni̍h só͘ ū ê.

29Koh將in一切ê貨物錢財，一切ê gín-á kap婦人人，以及ta̍k tè厝所有ê，lóng搶，掠就去。Koh chiong in it-chhè ê hè-mi̍h chîⁿ-châi, it-chhè ê gín-á kap hū-jîn-lâng, í-ki̍p ta̍k tè chhù só͘-ū-ê, lóng chhiúⁿ, lia̍h chiū khì.

30雅各kā西門kap利未講，Lín連累我，hō͘我tī chit所在khiā起ê百姓ê中間，就是tī迦南人kap Pí-lī-sé人ê中間有臭名。Koh我ê人額少；in的確聚集來攻擊我，phah我；我kap全家ê人lóng會滅無。Ngá-kok kā Se-biān kap Lī-bī kóng, Lín liân-lūi góa, hō͘ góa tī chit só͘-chāi khiā-khí ê peh-sìⁿ ê tiong-kan, chiū-sī tī Ka-lâm lâng kap Pí-lī-sé lâng ê tiong-kan ū chhàu-miâ. Koh góa ê lâng-gia̍h chió; in tek-khak chū-chi̍p lâi kong-kek góa, phah góa; góa kap choân-ke ê lâng lóng ōe bia̍t-bô.

31In講，伊kiám thang款待阮小妹親像娼妓mah？In kóng, I kiám thang khoán-thāi goán sió-bē chhin-chhiūⁿ chhiong-ki mah?