1雅各kia̍h目看，看見以掃來；koh有四百人kap伊來。伊就將hiah-ê gín-á分開，交hō͘利亞，交hō͘拉結，交hō͘兩個女婢。Ngá-kok kia̍h-ba̍k khòaⁿ, khòaⁿ-kìⁿ Í-sò lâi; koh ū sì-pah lâng kap i lâi. I chiū chiong hiah ê gín-á pun-khui, kau hō͘ Lī-a, kau hō͘ La̍h-kiat, kau hō͘ nn̄g ê lú-pī.

2將女婢kap in ê kiáⁿ排tī頭前，利亞kap伊ê kiáⁿ排tī後面，拉結kap約瑟排tī路尾。Chiong lú-pī kap in ê kiáⁿ pâi tī thâu-chêng, Lī-a kap i ê kiáⁿ pâi tī āu-bīn, La̍h-kiat kap Iok-sek pâi tī lō͘-bé.

3伊本身tī in ê頭前過去，連連七pái仆tī地裡，chiah óa近伊ê兄。I pún-sin tī in ê thâu-chêng kè-khì, liân-liân chhit-pái phak tī tōe-ni̍h, chiah óa-kūn i ê hiaⁿ.

4以掃走來迎接伊，將伊抱teh，koh lám伊ê頷頸，chim伊；兩人就啼哭。Í-sò cháu-lâi ngiâ-chih i, chiong i phō-teh, koh lám i ê ām-kún, chim i; nn̄g-lâng chiū thî-khàu.

5以掃kia̍h目看見婦人人kap gín-á，就講，Chiah-ê kap你同行ê是是誰？雅各講，Chiah-ê gín-á是上帝施恩hō͘你ê奴僕ê。Í-sò kia̍h-ba̍k khòaⁿ-kìⁿ hū-jîn-lâng kap gín-á, chiū kóng, Chiah-ê kap lí tâng-kiâⁿ-ê sī chī-chūi? Ngá-kok kóng, Chiah ê gín-á sī Siōng-tè si-un hō͘ lí ê lô͘-po̍k-ê.

6Tùi hit-tia̍p，兩個女婢，kap in ê gín-á，進前來拜。Tùi hit-tia̍p nn̄g ê lú-pī, kap in ê gín-á, chìn-chêng lâi pài.

7利亞kap伊ê gín-á亦進前來拜；路尾約瑟kap拉結亦進前來拜。Lī-a kap i ê gín-á ia̍h chìn-chêng lâi pài; lō͘-bé Iok-sek kap La̍h-kiat ia̍h chìn-chêng lâi pài.

8以掃講，我所tú-tio̍h kui群 ê cheng-siⁿ，你是甚麼意思？雅各講，是beh tī我ê主ê面前得tio̍h恩典。Í-sò kóng, Góa só͘ tú-tio̍h kui-kûn ê cheng-siⁿ, lí sī sím-mi̍h ì-sù? Ngá-kok kóng, Sī beh tī góa ê chú ê bīn-chêng tit-tio̍h un-tián.

9以掃講，小弟ah，我ê已經夠額，你ê猶原歸你。Í-sò kóng, Sió-tī ah, góa-ê í-keng kàu-gia̍h, lí-ê iû-goân kui lí.

10雅各講，莫án-ni，我若tī你ê面前得tio̍h恩典，求你tùi我ê手收我ê禮物；因為我見tio̍h你ê面，親像見tio̍h上帝ê面，你亦接納我；Ngá-kok kóng, Bo̍h án-ni, góa nā tī lí ê bīn-chêng tit-tio̍h un-tián, kiû lí tùi góa ê chhiú siu góa ê lé-mi̍h; in-ūi góa kìⁿ-tio̍h lí ê bīn, chhin-chhiūⁿ kìⁿ-tio̍h Siōng-tè ê bīn, lí ia̍h chiap-la̍p góa;

11求你收我帶來hō͘你ê禮物；因為上帝恩典我，hō͘我充足；逼伊，然後收。kiû lí siu góa tòa-lâi hō͘ lí ê lé-mi̍h; in-ūi Siōng-tè un-tián góa, hō͘ góa chhiong-chiok; pek-i, jiân-āu siu.

12以掃講，咱起身來去，我做頭行。Í-sò kóng, Lán khí-sin lâi khì, góa chòe-thâu kiâⁿ.

13雅各對伊講，我ê主知chiah-ê gín-á軟chiáⁿ，牛羊亦tú-á生；若做一日趕，kui群lóng beh死。Ngá-kok tùi i kóng, góa ê chú chai chiah ê gín-á nńg-chiáⁿ, gû-iûⁿ ia̍h tú-á siⁿ; nā chòe chi̍t-ji̍t kóaⁿ, kui-kûn lóng beh sí.

14求我ê主tī奴僕ê頭前行，我beh照tī我面前kui群 cheng-siⁿ ê力量，亦照gín-á ê力量，慢慢進前，行到Se-jíⁿ，到我ê主hia。Kiû góa ê chú tī lô͘-po̍k ê thâu-chêng kiâⁿ, góa beh chiàu tī góa bīn-chêng kui-kûn cheng-siⁿ ê le̍k-liōng, ia̍h chiàu gín-á ê le̍k-liōng, bān-bān chìn-chêng, kiâⁿ kàu Se-jíⁿ, kàu góa ê chú hia.

15以掃講，容允我將tè我ê人留幾個kap你做陣。雅各講，Mih-sái án-ni？Tī我ê主ê面前得tio̍h恩典就好。Í-sò kóng, Iông-ún góa chiong tè góa ê lâng lâu kúi-ê kap lí chòe-tīn. Ngá-kok kóng, Mih-sái án-ni? tī góa ê chú ê bīn-chêng tit-tio̍h un-tián chiū hó.

16Hit日以掃起身，照原路tò去Se-jíⁿ。Hit-ji̍t Í-sò khí-sin, chiàu goân-lō͘ tò-khì Se-jíⁿ.

17雅各行到Sò͘-kat，tī-hia為本身起厝，為cheng-siⁿ搭草寮；所以名hit所在做Sò͘-kat。Ngá-kok kiâⁿ kàu Sò͘-kat, tī-hia ūi pún-sin khí-chhù, ūi cheng-siⁿ tah chháu-liâu; só͘-í miâ hit só͘-chāi chòe Sò͘-kat.

18雅各tùi Pa-tàn-a-lân tò來ê時，平安到迦南地ê示劍城；tī城ê面前搭布棚。Ngá-kok tùi Pa-tàn-a-lân tò-lâi ê sî, pêng-an kàu Ka-lâm tōe ê Sī-kiàm siâⁿ; tī siâⁿ ê bīn-chêng tah pò͘-pîⁿ.

19用一百塊銀，tùi示劍ê老父Hap-boat ê kiaⁿ孫，買伊搭布棚hit塊地；Ēng chi̍t-pah tè gûn, tùi Sī-kiàm ê lāu-pē Hap-boat ê kiáⁿ-sun, bóe i tah pò͘-pîⁿ hit tè tōe;

20tī-hia起一座壇，kā伊號名叫I-lī I-lô-i以色列。tī-hia khí chi̍t chō tôaⁿ, kā i hō miâ kiò I-lī I-lô-i Í-sek-lia̍t.

1利亞kā雅各所生ê cha-bó͘-kiáⁿ，Tí-ná，出去beh見hit所在ê cha-bó͘-gín-á。Lī-a kā Ngá-kok só͘ siⁿ ê cha-bó͘-kiáⁿ, Tí-ná, chhut-khì beh kìⁿ hit só͘-chāi ê cha-bó͘-gín-á.

2Hit所在ê bo̍k-pek Hi-bī人Hap-boat ê kiáⁿ示劍看見伊；就khiú伊，kap伊相kap睏，凌辱伊。Hit só͘-chāi ê bo̍k-pek Hi-bī lâng Hap-boat ê kiáⁿ Sī-kiàm khòaⁿ-kìⁿ i; chiū khiú-i, kap i saⁿ-kap khùn, lêng-jio̍k i.

3伊ê心戀慕雅各ê cha-bó͘-kiáⁿ Tí-ná；疼chit-ê cha-bó͘-kiáⁿ，用好話安慰伊。I ê sim loân-bō͘ Ngá-kok ê cha-bó͘-kiáⁿ Tí-ná; thiàⁿ chit ê cha-bó͘-kiáⁿ, ēng hó-ōe an-ùi i.

4示劍kā伊ê老父Hap-boat，講，求你kā我聘chit-ê cha-bó͘-gín-á做bó͘。Sī-kiàm kā i ê lāu-pē Hap-boat, kóng, Kiû lí kā góa phèng chit ê cha-bó͘-gín-á chòe-bó͘.

5雅各聽見伊phah lâ-sâm伊ê cha-bó͘-kiáⁿ Tí-ná；hit時伊hiah-ê kiáⁿ kap伊ê cheng-siⁿ tī山裡；雅各靜靜無做聲，thèng候in tò來。Ngá-kok thiaⁿ-kìⁿ i phah lâ-sâm i ê cha-bó͘-kiáⁿ Tí-ná; hit-sî i hiah ê kiáⁿ kap i ê cheng-siⁿ tī soaⁿ-ni̍h; Ngá-kok chēng-chēng bô chòe siaⁿ, thèng-hāu in tò-lâi.

6示劍ê老父，Hap-boat，出來見雅各，beh kap伊講話。Sī-kiàm ê lāu-pē, Hap-boat, chhut-lâi kìⁿ Ngá-kok, beh kap i kóng-ōe.

7雅各hiah-ê kiáⁿ聽見chit-ê tāi-chì，就tùi山裡tò來，ta̍k-ê m̄甘願，十分受氣；因為示劍tī以色列做出見笑ê tāi-chì，kap雅各ê cha-bó͘-kiáⁿ相kap睏；這本是m̄應該做ê事。Ngá-kok hiah ê kiáⁿ thiaⁿ-kìⁿ chit ê tāi-chì, chiū tùi soaⁿ-ni̍h tò-lâi, ta̍k-ê m̄ kam-goān, cha̍p-hun siū-khì; in-ūi Sī-kiàm tī Í-sek-lia̍t chòe chhut kiàn-siàu ê tāi-chì, kap Ngá-kok ê cha-bó͘-kiáⁿ saⁿ-kap khùn; che pún sī m̄ eng-kai chòe ê sū.

8Hap-boat kap in參詳講，我ê kiáⁿ示劍ê心欣慕lín ê cha-bó͘-gín-á；求lín將伊hō͘我ê kiáⁿ做bó͘。Hap-boat kap in chham-siông kóng, Góa ê kiáⁿ Sī-kiàm ê sim him-bō͘ lín ê cha-bó͘-gín-á; kiû lín chiong i hō͘ góa ê kiáⁿ chòe-bó͘.

9Lín kap阮大家結親；lín thang將lín ê cha-bó͘-kiáⁿ hō͘阮，lín亦thang娶阮ê cha-bó͘-kiáⁿ。Lín kap goán tāi-ke kiat-chhin; lín thang chiong lín ê cha-bó͘-kiáⁿ hō͘ goán, lín ia̍h thang chhōa goán ê cha-bó͘-kiáⁿ.

10Lín kap阮相kap khiā起；地tī lín ê面前，lín tòa chia khiā，做seng-lí，建置產業。Lín kap goán saⁿ-kap khiā-khí; tōe tī lín ê bīn-chêng, lín tòa chia khiā, chòe seng-lí, kiàn-tì sán-gia̍p.

11示劍對cha-bó͘-gín-á ê老父kap伊ê兄弟講，願tī你ê面前得tio̍h恩典；lín所對我講ê我beh hō͘ lín。Sī-kiàm tùi cha-bó͘-gín-á ê lāu-pē kap i ê hiaⁿ-tī kóng, Goān tī lí ê bīn-chêng tit-tio̍h un-tián; lín só͘ tùi góa kóng-ê góa beh hō͘ lín.

12chhut-chāi lín beh tùi我討jōa-chōe聘金，kap禮物，我的確照lín所講ê hō͘ lín；只有ài lín用cha-bó͘-gín-á hō͘我做bó͘。Chhut-chāi lín beh tùi góa thó jōa-chōe phèng-kim, kap lé-mi̍h, góa tek-khak chiàu lín só͘ kóng-ê hō͘ lín; chí-ū ài lín ēng cha-bó͘-gín-á hō͘ góa chòe-bó͘.

13雅各hiah-ê kiáⁿ，因為示劍phah lâ-sâm in ê小妹Tí-ná，就用奸詐ê話來應示劍，kap伊ê老父，Hap-boat，對in講，Ngá-kok hiah ê kiáⁿ, in-ūi Sī-kiàm phah lâ-sâm in ê sió-bē Tí-ná, chiū ēng kan-chà ê ōe lâi ìn Sī-kiàm, kap i ê lāu-pē, Hap-boat, tùi in kóng,

14將阮ê小妹hō͘無受割禮ê人做bó͘，這ê tāi-chì阮bōe做得；因為he是阮ê見笑。Chiong goán ê sió-bē hō͘ bô siū kat-lé ê lâng chòe-bó͘, che ê tāi-chì goán bōe-chòe-tit; in-ūi he sī goán ê kiàn-siàu.

15Lín所有ê ta-po͘人，若lóng受割禮親像阮一樣，有chí一項chiah thang應允lín；Lín só͘ ū ê ta-po͘-lâng, nā lóng siū kat-lé chhin-chhiūⁿ goán chi̍t-iūⁿ, ū chí chi̍t-hāng chiah thang èng-ún lín;

16阮就將阮ê cha-bó͘-kiáⁿ hō͘ lín，阮亦chhōa lín ê cha-bó͘-kiáⁿ；阮就kap lín相kap tòa，成做一個百姓。goán chiū chiong goán ê cha-bó͘-kiáⁿ hō͘ lín, goán ia̍h chhōa lín ê cha-bó͘-kiáⁿ; goán chiū kap lín saⁿ-kap tòa, chiâⁿ-chòe chi̍t ê peh-sìⁿ.

17設使lín m̄聽阮ê話來受割禮，阮就tòa阮ê小妹來去。Siat-sú lín m̄-thiaⁿ goán ê ōe lâi siū kat-lé, goán chiū tòa goán ê sió-bē lâi khì.

18Hap-boatkap伊ê kiáⁿ示劍，歡喜in ê話。Hap-boat kap i ê kiáⁿ Sī-kiàm, hoaⁿ-hí in ê ōe.

19Hit-ê少年人做chit-ê tāi-chì，lóng無延chhiân；因為伊疼雅各ê cha-bó͘-kiáⁿ；koh伊tī in老父ê家第一尊貴。Hit ê siàu-liân lâng chòe chit ê tāi-chì, lóng bô iân-chhiân; in-ūi i thiàⁿ Ngá-kok ê cha-bó͘-kiáⁿ; koh i tī in lāu-pē ê ke tē-it chun-kùi.

20Hap-boat，kap伊ê kiáⁿ示劍，來到本城ê門口，kā本城ê人講，Hap-boat, kap i ê kiáⁿ Sī-kiàm, lâi kàu pún-siâⁿ ê mn̂g-kháu, kā pún-siâⁿ ê lâng kóng,

21Chiah-ê人kap咱和好；m̄值tio̍h chún in tī chit-ê地khiā起，做seng-lí；koh chit-ê地亦開闊，ōe容允得in；咱thang chhōa in ê cha-bó͘-kiáⁿ做bó͘，亦thang將咱ê cha-bó͘-kiáⁿ 過hō͘ in。Chiah ê lâng kap lán hô-hó; m̄-ta̍t-tio̍h chún in tī chit ê tōe khiā-khí, chòe seng-lí; koh chit ê tōe ia̍h khui-khoah, ōe iông-ún-tit in; lán thang chhōa in ê cha-bó͘-kiáⁿ chòe-bó͘, ia̍h thang chiong lán ê cha-bó͘-kiáⁿ kè hō͘ in.

22獨獨tio̍h有一項，hiah-ê chiah beh允咱，kap咱khiā起，成做一個百姓；就是咱中間所有ê ta-po͘人lóng tio̍h受割禮，親像in受割禮一樣。To̍k-to̍k tio̍h ū chi̍t-hāng, hiah-ê chiah beh ún lán, kap lán khiā-khí, chiâⁿ-chòe chi̍t ê peh-sìⁿ; chiū-sī lán tiong-kan só͘ ū ê ta-po͘-lâng lóng tio̍h siū kat-lé, chhin-chhiūⁿ in siū kat-lé chi̍t-iūⁿ.

23伊ê牛，羊，財產，kap一切ê cheng-siⁿ，kiám無lóng歸tī咱mah？只有tioh8un2-in，in就beh kap咱tòa。I ê gû, iûⁿ, châi-sán, kap it-chhè ê cheng-siⁿ, kiám bô lóng kui tī lán mah? chí-ū tio̍h ún-in, in chiū beh kap lán tòa.

24見若tùi城門出來ê人lóng聽thàn hap-boat kap伊ê kiáⁿ示劍ê話；tùi án-ni見若tùi城門出來ê ta-po͘人lóng受割禮。Kìⁿ-nā tùi siâⁿ-mn̂g chhut-lâi ê lâng lóng thiaⁿ-thàn Hap-boat kap i ê kiáⁿ Sī-kiàm ê ōe; tùi án-ni kìⁿ-nā tùi siâⁿ-mn̂g chhut-lâi ê ta-po͘-lâng lóng siū kat-lé.

25到第三日，眾人當teh痛疼ê時，雅各兩個kiáⁿ，就是Tí-ná ê兄西門kap利未，lóng kia̍h刀，thàn人無tiuⁿ-tî，來到城內，thâi死lóng總ê ta-po͘人。Kàu tē-saⁿ ji̍t, chèng-lâng tng teh thàng-thiàⁿ ê sî, Ngá-kok nn̄g ê kiáⁿ, chiū-sī Tí-ná ê hiaⁿ Se-biān kap Lī-bī, lóng kia̍h-to, thàn lâng bô tiuⁿ-tî, lâi kàu siâⁿ-lāi, thâi-sí lóng-chóng ê ta-po͘-lâng.

26也用刀thâi死Hap-boat kap伊ê kiáⁿ示劍；chhōa tí-ná tùi示劍ê厝出來，就去。Iā ēng to thâi-sí Hap-boat kap i ê kiáⁿ Sī-kiàm; chhōa Tí-ná tùi Sī-kiàm ê chhù chhut-lâi, chiū khì.

27雅各hiah-ê kiáⁿ，為tio̍h in小妹受phah lâ-sâm，就來到受thâi ê人hia，搶劫in ê城。Ngá-kok hiah ê kiáⁿ, ūi-tio̍h in sió-bē siū phah lâ-sâm, chiū lâi kàu siū-thâi ê lâng hia, chhiúⁿ-kiap in ê siâⁿ.

28搶in ê羊群，牛群，kap驢；以及城內kap 田裡所有ê。Chhiúⁿ in ê iûⁿ-kûn, gû-kûn, kap lû; í-ki̍p siâⁿ-lāi kap chhân-ni̍h só͘ ū ê.

29Koh將in一切ê貨物錢財，一切ê gín-á kap婦人人，以及ta̍k tè厝所有ê，lóng搶，掠就去。Koh chiong in it-chhè ê hè-mi̍h chîⁿ-châi, it-chhè ê gín-á kap hū-jîn-lâng, í-ki̍p ta̍k tè chhù só͘-ū-ê, lóng chhiúⁿ, lia̍h chiū khì.

30雅各kā西門kap利未講，Lín連累我，hō͘我tī chit所在khiā起ê百姓ê中間，就是tī迦南人kap Pí-lī-sé人ê中間有臭名。Koh我ê人額少；in的確聚集來攻擊我，phah我；我kap全家ê人lóng會滅無。Ngá-kok kā Se-biān kap Lī-bī kóng, Lín liân-lūi góa, hō͘ góa tī chit só͘-chāi khiā-khí ê peh-sìⁿ ê tiong-kan, chiū-sī tī Ka-lâm lâng kap Pí-lī-sé lâng ê tiong-kan ū chhàu-miâ. Koh góa ê lâng-gia̍h chió; in tek-khak chū-chi̍p lâi kong-kek góa, phah góa; góa kap choân-ke ê lâng lóng ōe bia̍t-bô.

31In講，伊kiám thang款待阮小妹親像娼妓mah？In kóng, I kiám thang khoán-thāi goán sió-bē chhin-chhiūⁿ chhiong-ki mah?

1上帝kā雅各講，起ah，上去Pek-te̍k-lī，tòa tī-hia。Koh tio̍h tī-hia kā上帝起一座壇，就是你閃避你ê兄以掃ê面ê時，對你出現ê，hit-ê。Siōng-tè kā Ngá-kok kóng, Khí-ah, chiūⁿ-khì Pek-te̍k-lī, tòa tī-hia. Koh tio̍h tī-hia kā Siōng-tè khí chi̍t chō tôaⁿ, chiū-sī lí siám-pī lí ê hiaⁿ Í-sò ê bīn ê sî, tùi lí chhut-hiān-ê, hit-ê.

2雅各就kā全家以及一切kap伊tī-teh ê人講，Lín tio̍h除去lín中間外邦ê上帝；亦tio̍h家己清氣，換 lín ê衣裳。Ngá-kok chiū kā choân-ke í-ki̍p it-chhè kap i tī-teh ê lâng kóng, Lín tio̍h tû-khì lín tiong-kan gōa-pang ê siōng-tè; ia̍h tio̍h ka-kī chheng-khì, ōaⁿ lín ê i-chiûⁿ.

3咱tio̍h起來，上去Pek-te̍k-lī；tī-hia我beh kā上帝起一座壇，就是tī我tú-tio̍h患難ê日，允准我ê祈禱，tī我所行ê路kap我tī-teh，hit-ê。Lán tio̍h khí-lâi, chiūⁿ-khì Pek-te̍k-lī; tī-hia góa beh kā Siōng-tè khí chi̍t chō tôaⁿ, chiū-sī tī góa tú-tio̍h hoān-lān ê ji̍t, ún-chún góa ê kî-tó, tī góa só͘ kiâⁿ ê lō͘ kap góa tī-teh, hit-ê.

4In就將in手內所有異邦ê神明，kap in ê耳鉤，lóng hō͘雅各；雅各將hiah-ê tâi tī示劍hit位ê橡樹腳。In chiū chiong in chhiú-lāi só͘ ū īⁿ-pang ê sîn-bêng, kap in ê hī-kau, lóng hō͘ Ngá-kok; Ngá-kok chiong hiah-ê tâi tī Sī-kiàm hit-ūi ê siōng-chhiū-kha.

5In就起身，上帝hō͘四周圍ê城ê人lóng真驚；in就無追jip雅各ê眾kiáⁿ。In chiū khí-sin, Siōng-tè hō͘ sì-chiu-ûi ê siâⁿ ê lâng lóng chin kiaⁿ; in chiū bô tui-jip Ngá-kok ê chèng-kiáⁿ.

6雅各，以及一切kap伊做陣ê人，到迦南地ê Lō͘-su，就是Pek-te̍k-lī。Ngá-kok, í-ki̍p it-chhè kap i chòe-tīn ê lâng, kàu Ka-lâm tōe ê Lō͘-su, chiū-sī Pek-te̍k-lī.

7伊tī-hia起一座壇，就kā hit所在號名，叫I-le̍k-pek-te̍k-lī；因為伊閃避伊ê兄ê時，上帝tī-hia對伊出現。I tī-hia khí chi̍t chō tôaⁿ, chiū kā hit só͘-chāi hō-miâ, kiò I-le̍k-pek-te̍k-lī; in-ūi i siám-pī i ê hiaⁿ ê sî, Siōng-tè tī-hia tùi i chhut-hiān.

8利百加ê奶母Tí-phò-lat死；就埋葬tī Pek-te̍k-lī ê下面，橡樹腳；所以叫伊ê名A-lûn-pa-kó͘。Lī-pek-ka ê ni-bú Tí-phò-lat sí; chiū bâi-chòng tī Pek-te̍k-lī ê ē-bīn, siōng-chhiū-kha; só͘-í kiò i ê miâ A-lûn-pa-kó͘.

9雅各tui3Pa-tàn-a-lân tò來，上帝koh對伊出現，賜福hō͘ 伊。Ngá-kok tùi Pa-tàn-a-lân tò-lâi, Siōng-tè koh tùi i chhut-hiān, sù-hok hō͘ i.

10上帝koh kā伊講，你名是雅各；taⁿ以後你ê名無koh叫雅各，beh名叫以色列；就叫伊ê名以色列。Siōng-tè koh kā i kóng, Lí miâ sī Ngá-kok; taⁿ í-āu lí ê miâ bô koh kiò Ngá-kok, beh miâ kiò Í-sek-lia̍t; chiū kiò i ê miâ Í-sek-lia̍t.

11上帝koh kā伊講，我是全能ê上帝；你tio̍h生湠chōe-chōe；將來有一國，koh有chōe-chōe 國，tùi你來生，koh有君王tùi你生出。Siōng-tè koh kā i kóng, Góa sī choân-lêng ê Siōng-tè; lí tio̍h siⁿ-thòaⁿ chōe-chōe; chiong-lâi ū chi̍t-kok, koh ū chōe-chōe kok, tùi lí lâi siⁿ, koh ū kun-ông tùi lí siⁿ-chhut.

12我所hō͘亞伯拉罕kap以撒ê地，我beh hō͘你，亦beh將chit-ê地hō͘你ê後裔。Góa só͘ hō͘ A-pek-la̍h-hán kap Í-sat ê tōe, Góa beh hō͘ lí, ia̍h beh chiong chit ê tōe hō͘ lí ê hō͘-è.

13上帝就tùi kap伊講話ê所在上去。Siōng-tè chiū tùi kap i kóng-ōe ê só͘-chāi chiūⁿ-khì.

14雅各就tī上帝kap伊講話ê所在，khiā一支柱，就是石柱；tī hit頂面灌奠倒油。Ngá-kok chiū tī Siōng-tè kap i kóng-ōe ê só͘-chāi, khiā chi̍t ki thiāu, chiū-sī chio̍h-thiāu; tī hit téng-bīn koàn-tiān tò-iû.

15雅各就稱上帝kap伊講話ê所在，名做Pek-te̍k-lī。Ngá-kok chiū chheng Siōng-tè kap i kóng-ōe ê só͘-chāi, miâ chòe Pek-te̍k-lī.

16In tùi Pek-te̍k-lī起身；離開Í-hoat-tha iáu有一chām ê路；拉結得beh生臨產艱難。In tùi Pek-te̍k-lī khí-sin; lī-khui Í-hoat-tha iáu ū chi̍t chām ê lō͘; La̍h-kiat tit-beh siⁿ lîm-sán kan-lân.

17當伊艱苦生ê時，拾者對伊講，m̄免驚，你taⁿ beh koh得tio̍h一個kiáⁿ。Tng i kan-khó͘ siⁿ ê sî, khioh-chiá tùi i kóng, M̄-bián kiaⁿ, lí taⁿ beh koh tit-tio̍h chi̍t ê kiáⁿ.

18伊氣beh斷，臨終ê時，就叫伊ê kiáⁿ ê名Piān-gô-nî；伊ê老父kā伊號名便雅憫。I khùi beh tn̄g, lîm-chiong ê sî, chiū kiò i ê kiáⁿ ê miâ Piān-gô-nî; i ê lāu-pē kā i hō-miâ Piān-ngá-bín.

19拉結死，埋葬tī去Í-hoat-thâe路；Í-hoat-tha就是伯利恆。La̍h-kiat sí, bâi-chòng tī khì Í-hoat-tha ê lō͘; Í-hoat-tha chiū-sī Pek-lī-hêng.

20雅各khiā柱tī伊ê墓頂；chit-ê柱就是拉結ê墓牌；到今á日iáu tī-teh。Ngá-kok khiā thiāu tī i ê bōng-téng; chit ê thiāu chiū-sī La̍h-kiat ê bōng-pâi; kàu kin-á-ji̍t iáu tī-teh.

21以色列koh起身去，tī Í-tek-tâi 搭布棚。Í-sek-lia̍t koh khí-sin khì, tī Í-tek-tâi tah pò͘-pîⁿ.

22以色列tòa tī hit所在ê時，Liû-piān去kap伊ê老父ê細姨，Phek-la̍h，相kap睏；以色列亦聽。Í-sek-lia̍t tòa tī hit só͘-chāi ê sî, Liû-piān khì kap i ê lāu-pē ê sòe-î, Phek-la̍h, saⁿ-kap khùn; Í-sek-lia̍t ia̍h thiaⁿ.

23雅各共有十二個kiáⁿ。利亞ê kiáⁿ，就是雅各ê大kiáⁿ Liû-piān，以及西門，利未，猶大，Í-sat-ka，Se-pò͘-lûn；Ngá-kok kiōng ū cha̍p-jī ê kiáⁿ. Lī-a ê kiáⁿ, chiū-sī Ngá-kok ê tōa-kiáⁿ Liû-piān, í-ki̍p Se-biān, Lī-bī, Iû-tāi, Í-sat-ka, Se-pò͘-lûn;

24拉結ê kiáⁿ，就是約瑟，便雅憫；La̍h-kiat ê kiáⁿ, chiū-sī Iok-sek, Piān-ngá-bín;

25拉結ê女婢Phek-la̍h所生ê kiáⁿ，就是Tàn kap Ná-hut-tha-lī；La̍h-kiat ê lú-pī Phek-la̍h só͘ siⁿ ê kiáⁿ, chiū-sī Tàn kap Ná-hut-tha-lī;

26利亞ê女婢Sek-phàⁿ所生ê kiáⁿ Ka-tek，A-siat；這是雅各tī Pa-tàn-a-lân所生ê kiáⁿ。Lī-a ê lú-pī Sek-phàⁿ só͘ siⁿ ê kiáⁿ Ka-tek, A-siat; che sī Ngá-kok tī Pa-tàn-a-lân só͘ siⁿ ê kiáⁿ.

27雅各來見伊ê老父以撒tī Bān-lī，到Ki-lia̍t-a-pa，就是Hi-pek-lûn，亞伯拉罕kap以撒bat寄居ê所在。Ngá-kok lâi kìⁿ i ê lāu-pē Í-sat tī Bān-lī, kàu Ki-lia̍t-a-pa, chiū-sī Hi-pek-lûn, A-pek-la̍h-hán kap Í-sat bat kià-ku ê só͘-chāi.

28以撒享壽一百八十歲；Í-sat hióng-siū chi̍t-pah poeh-cha̍p hè;

29以撒年歲老，日子滿足，氣斷來死，tò去伊ê列祖hia；伊兩個kiáⁿ以掃，雅各，kā伊埋葬。Í-sat nî-hè lāu, ji̍t-chí móa-chiok, khùi tn̄g lâi sí, tò-khì i ê lia̍t-chó͘ hia; i nn̄g ê kiáⁿ Í-sò, Ngá-kok, kā i bâi-chòng.