1以掃就是Í-tong，伊ê世系記tī下底。Í-sò chiū-sī Í-tong, i ê sè-hē kì tī ē-tóe.

2以掃chhōa迦南地ê cha-bó͘-gín-á做bó͘；就是Hek人Í-lûn ê cha-bó͘-kiáⁿ a-tāi，kap Hi-bī人Chè-piān ê cha-bó͘-sun，A-ná ê cha-bó͘-kiáⁿ，A-hô-lī-pa-má。Í-sò chhōa Ka-lâm tōe ê cha-bó͘-gín-á chòe-bó͘; chiū-sī Hek-lâng Í-lûn ê cha-bó͘-kiáⁿ A-tāi, kap Hi-bī lâng Chè-piān ê cha-bó͘-sun, A-ná ê cha-bó͘-kiáⁿ, A-hô-lī-pa-má.

3Koh chhōa以實瑪利ê cha-bó͘-kiáⁿ，Nî-pâi-iok ê姊妹，Pa-si̍t-boat。Koh chhōa Í-si̍t-má-lī ê cha-bó͘-kiáⁿ, Nî-pâi-iok ê chí-bē, Pa-si̍t-boat.

4A-tāi kā以掃生Í-lī-hoat；Pa-si̍t-boat生Liû-jíⁿ；A-tāi kā Í-sò siⁿ Í-lī-hoat; Pa-si̍t-boat siⁿ Liû-jíⁿ;

5A-hô-lī-pa-má生Iâ-o͘-si，Ngá-lân，Khó-la̍h；這lóng是以掃ê kiáⁿ，tī迦南地生ê。A-hô-lī-pa-má siⁿ Iâ-o͘-si, Ngá-lân, Khó-la̍h; che lóng sī Í-sò ê kiáⁿ, tī Ka-lâm tōe siⁿ-ê.

6以掃帶伊ê bó͘，kiáⁿ，cha-bó͘-kiáⁿ，kap家內lóng總ê人，以及牛，羊，kap一切ê cheng-siⁿ，一切ê財物，就是伊tī迦南地所得tio̍h-ê，去別所在，離開伊ê小弟雅各。Í-sò tòa i ê bó͘, kiáⁿ, cha-bó͘-kiáⁿ, kap ke-lāi lóng-chóng ê lâng, í-ki̍p gû, iûⁿ, kap it-chhè ê cheng-siⁿ, it-chhè ê châi-bu̍t, chiū-sī i tī Ka-lâm tōe só͘ tit-tio̍h-ê, khì pa̍t só͘-chāi, lī-khui i ê sió-tī Ngá-kok.

7因為兩人所有ê真chōe，bōe thang相kap khiā；koh因為in ê牛，羊chōe，所寄腳ê所在bōe容允得。In-ūi nn̄g-lâng só͘-ū-ê chin-chōe, bōe thang saⁿ-kap khiā; koh in-ūi in ê gû, iûⁿ chōe, só͘ kià-kha ê só͘-chāi bōe iông-ún-tit.

8Tùi án-ni以掃tòa tī Se-jíⁿ 山。以掃就是Í-tong。Tùi án-ni Í-sò tòa tī Se-jíⁿ soaⁿ. Í-sò chiū-sī Í-tong.

9以掃ê世系記tī下底：以掃就是Se-jíⁿ 山Í-tong人ê祖；Í-sò ê sè-hē kì tī ē-tóe: Í-sò chiū-sī Se-jíⁿ soaⁿ Í-tong lâng ê chó͘;

10以掃chiah-ê kiáⁿ ê名記tī下底，以掃ê bó͘ A-tāi ê kiáⁿ Í-lī-hoat，以掃ê bó͘ Pa-si̍t-boat ê kiáⁿ liû-jíⁿ。Í-sò chiah ê kiáⁿ ê miâ kì tī ē-tóe, Í-sò ê bó͘ A-tāi ê kiáⁿ Í-lī-hoat, Í-sò ê bó͘ Pa-si̍t-boat ê kiáⁿ Liû-jíⁿ.

11Í-lī-hoat ê kiáⁿ；Thê-bān，O-boat，Sé-pho，Ka-thán，Ki-la̍p-su；Í-lī-hoat ê kiáⁿ; Thê-bān, O-boat, Sé-pho, Ka-thán, Ki-la̍p-su;

12Têng-la̍p是以掃ê kiáⁿ Í-lī-hoat ê細姨，伊kā Í-lī-hoat生A-má-le̍k；這是以掃ê bó͘ A-tāi ê kiaⁿ孫。Têng-la̍p sī Í-sò ê kiáⁿ Í-lī-hoat ê sòe-î, i kā Í-lī-hoat siⁿ A-má-le̍k; che sī Í-sò ê bó͘ A-tāi ê kiáⁿ-sun.

13Liû-jíⁿ ê kiáⁿ是Ná-hap，謝拉，Sa-má，Bí-sat；chiah-ê是以掃ê bó͘ Pa-si̍t-boat ê kiaⁿ孫。Liû-jíⁿ ê kiáⁿ sī Ná-hap, Siā-la̍h, Sa-má, Bí-sat; chiah-ê sī Í-sò ê bó͘ Pa-si̍t-boat ê kiáⁿ-sun.

14以掃ê bó͘ a-河-lī-pa-má是C歲-piān ê cha-bó͘-sun，A-ná ê cha-bó͘-kiáⁿ；伊kā以掃生Iâ-o͘-si，Ngá-lân，Khó-la̍h。Í-sò ê bó͘ A-hô-lī-pa-má sī Chè-piān ê cha-bó͘-sun, A-ná ê cha-bó͘-kiáⁿ; i kā Í-sò siⁿ Iâ-o͘-si, Ngá-lân, Khó-la̍h.

15以掃ê kiáⁿ所生做族長ê，記tī下底；以掃ê大kiáⁿ Í-lī-hoat ê kiáⁿ，有Thê-bān族長，O-boat族長，Sé-pho族長，Ki-la̍p-su族長，Í-sò ê kiáⁿ só͘ siⁿ chòe cho̍k-tiúⁿ-ê, kì tī ē-tóe; Í-sò ê tōa-kiáⁿ Í-lī-hoat ê kiáⁿ, ū Thê-bān cho̍k-tiúⁿ, O-boat cho̍k-tiúⁿ, Sé-pho cho̍k-tiúⁿ, Ki-la̍p-su cho̍k-tiúⁿ,

16Khó-la̍h族長，Ka-thán族長，A-má-le̍k族長；chiah-ê是tī Í-tong地，Í-lī-hoat所生ê族長，是A-tāi ê kiaⁿ孫。Khó-la̍h cho̍k-tiúⁿ, Ka-thán cho̍k-tiúⁿ, A-má-le̍k cho̍k-tiúⁿ; chiah-ê sī tī Í-tong tōe, Í-lī-hoat só͘ siⁿ ê cho̍k-tiúⁿ, sī A-tāi ê kiáⁿ-sun.

17以掃ê kiaⁿ孫Liû-jíⁿ ê kiáⁿ，有Ná-hap族長，謝拉族長，Sa-má族長，Bí-sat族長；這是tī Í-tong地，tùi Liû-jíⁿ所出ê族長，lóng是以掃ê bó͘ Pa-si̍t-boat ê kiaⁿ孫。Í-sò ê kiáⁿ-sun Liû-jíⁿ ê kiáⁿ, ū Ná-hap cho̍k-tiúⁿ, Siā-la̍h cho̍k-tiúⁿ, Sa-má cho̍k-tiúⁿ, Bí-sat cho̍k-tiúⁿ; che sī tī Í-tong tōe, tùi Liû-jíⁿ só͘ chhut ê cho̍k-tiúⁿ, lóng sī Í-sò ê bó͘ Pa-si̍t-boat ê kiáⁿ-sun.

18以掃ê bó͘ a-河-lī-pa-má ê kiáⁿ，有Iâ-o͘-si族長，Ngá-lân族長，Khó-la̍h族長；這是tùi以掃ê bó͘，A-ná ê cha-bó͘-kiáⁿ a-河-lī-pa-má，所出ê族長。Í-sò ê bó͘ A-hô-lī-pa-má ê kiáⁿ, ū Iâ-o͘-si cho̍k-tiúⁿ, Ngá-lân cho̍k-tiúⁿ, Khó-la̍h cho̍k-tiúⁿ; che sī tùi Í-sò ê bó͘, A-ná ê cha-bó͘-kiáⁿ A-hô-lī-pa-má, só͘ chhut ê cho̍k-tiúⁿ.

19Chiah-ê是以掃ê kiaⁿ孫，koh chiah-ê是in ê族長；以掃就是Í-tong。Chiah-ê sī Í-sò ê kiáⁿ-sun, koh chiah-ê sī in ê cho̍k-tiúⁿ; Í-sò chiū-sī Í-tong.

20Hit所在ê本地人，就是河-lī人Se-jíⁿ ê kiaⁿ孫，記下底；就是Lô-tan，Sok-pa，C歲-piān，A-ná，Tí-sūn，Í-chhat，Tí-san；Hit só͘-chāi ê pún-tōe lâng, chiū-sī Hô-lī lâng Se-jíⁿ ê kiáⁿ-sun, kì ē-tóe; chiū-sī Lô-tan, Sok-pa, Chè-piān, A-ná, Tí-sūn, Í-chhat, Tí-san;

21chiah-ê是tùi Í-tong地ê Hô-lī人，Se-jíⁿ kiaⁿ孫中所出ê族長。chiah-ê sī tùi Í-tong tōe ê Hô-lī lâng, Se-jíⁿ kiáⁿ-sun-tiong só͘ chhut ê cho̍k-tiúⁿ.

22Lô-tan ê kiáⁿ是Hô-lī，Hi-bān；Lô-tan ê姊妹是Têng-la̍p。Lô-tan ê kiáⁿ sī Hô-lī, Hi-bān; Lô-tan ê chí-bē sī Têng-la̍p.

23Sok-pa ê kiáⁿ是A-le̍k-bûn，Má-ná-hat，Í-pa-lio̍k，Sī-pho，O-lâm。Sok-pa ê kiáⁿ sī A-le̍k-bûn, Má-ná-hat, Í-pa-lio̍k, Sī-pho, O-lâm.

24Chè-piān ê kiáⁿ；A-ngá，A-ná；當時teh 飼 in老父Chè-piān ê驢，tī曠野chhē-tio̍h溫泉ê，就是chit-ê A-ná。Chè-piān ê kiáⁿ; A-ngá, A-ná; tng-sî teh chhī in lāu-pē Chè-piān ê lû, tī khòng-iá chhē-tio̍h un-chôaⁿ-ê, chiū-sī chit ê A-ná.

25A-ná ê kiáⁿ是Tí-sūn；A-ná ê cha-bó͘-kiáⁿ是A-hô-lī-pa-má。A-ná ê kiáⁿ sī Tí-sūn; A-ná ê cha-bó͘-kiáⁿ sī A-hô-lī-pa-má.

26Tí-sūn ê kiáⁿ是Him-tàn，I-sī-pan，Ek-lân，Ki-lân。Tí-sūn ê kiáⁿ sī Him-tàn, I-sī-pan, Ek-lân, Ki-lân.

27Í-chhat ê kiáⁿ是Phek-hán，Sat-hoan，A-kan。Í-chhat ê kiáⁿ sī Phek-hán, Sat-hoan, A-kan.

28Tí-san ê kiáⁿ是O͘-su，A-lân。Tí-san ê kiáⁿ sī O͘-su, A-lân.

29Tùi Hô-lī人所出ê族長，記tī下底；就是Lô-tan族長，Sok-pa族長，Chè-piān族長，A-ná族長，Tùi Hô-lī lâng só͘ chhut ê cho̍k-tiúⁿ, kì tī ē-tóe; chiū-sī Lô-tan cho̍k-tiúⁿ, Sok-pa cho̍k-tiúⁿ, Chè-piān cho̍k-tiúⁿ, A-ná cho̍k-tiúⁿ,

30Tí-sūn族長，Í-chhat族長，Tí-san族長。Chiah-ê是tùi Hô-lī人所出ê族長，lóng tī Se-jíⁿ地做族長。Tí-sūn cho̍k-tiúⁿ, Í-chhat cho̍k-tiúⁿ, Tí-san cho̍k-tiúⁿ. Chiah-ê sī tùi Hô-lī lâng só͘ chhut ê cho̍k-tiúⁿ, lóng tī Se-jíⁿ tōe chòe cho̍k-tiúⁿ.

31當以色列人未有君王治理ê事先，tī Í-tong地做王來治理ê 記tī下底。Tng Í-sek-lia̍t lâng bē ū kun-ông tī-lí ê tāi-seng, tī Í-tong tōe chòe ông lâi tī-lí-ê kì tī ē-tóe.

32Pí-jíⁿ ê kiáⁿ，Pí-la̍h，tī Í-tong做王；伊ê 京城名叫Têng-hap-pa。Pí-jíⁿ ê kiáⁿ, Pí-la̍h, tī Í-tong chòe ông; i ê kiaⁿ-siâⁿ miâ kiò Têng-hap-pa.

33Pí-la̍h死了，Pho-su-la̍h人謝拉 ê kiáⁿ，Iok-pa，續接伊做王。Pí-la̍h sí-liáu, Pho-su-la̍h lâng Siā-la̍h ê kiáⁿ, Iok-pa, sòa-chiap i chòe ông.

34Iok-pa死，Thê-bān地ê人Hō͘-san續接伊做王。Iok-pa sí, Thê-bān tōe ê lâng Hō͘-san sòa-chiap i chòe ông.

35Hō͘-san死，Pí-ta̍t ê kiáⁿ，Hap-ta̍t，續接伊做王；伊就是tī Mô͘-ap地thâi贏米甸人ê。伊ê京城名叫A-bī-tek。Hō͘-san sí, Pí-ta̍t ê kiáⁿ, Hap-ta̍t, sòa-chiap i chòe ông; i chiū-sī tī Mô͘-ap tōe thâi-iâⁿ Bí-tiân lâng-ê. I ê kiaⁿ-siâⁿ miâ kiò A-bī-tek.

36Hap-ta̍t死，Má-sū-lī-ka人Song-la̍h續接伊做王。Hap-ta̍t sí, Má-sū-lī-ka lâng Song-la̍h sòa-chiap i chòe ông.

37Song-la̍h死了，河邊ê Lī-hô-pek人掃羅續接伊做王。Song-la̍h sí-liáu, Hô-piⁿ ê Lī-hô-pek lâng Sò-lô sòa-chiap i chòe ông.

38掃羅死，A-kek-pho ê kiáⁿ，Pa-le̍k-hap-lâm，續接伊做王。Sò-lô sí, A-kek-pho ê kiáⁿ, Pa-le̍k-hap-lâm, sòa-chiap i chòe ông.

39A-kek-pho ê kiáⁿ Pa-le̍k-hap-lâm死，Hap-ta̍t續接伊做王；伊ê京城名叫Pa-o͘；伊ê bó͘名叫Bí-hi-tha-piat，是Bí-sat-hap ê cha-bó͘-sun，Má-tek-lia̍t ê cha-bó͘-kiáⁿ。A-kek-pho ê kiáⁿ Pa-le̍k-hap-lâm sí, Hap-ta̍t sòa-chiap i chòe ông; i ê kiaⁿ-siâⁿ miâ-kiò Pa-o͘; i ê bó͘ miâ-kiò Bí-hi-tha-piat, sī Bí-sat-ha̍p ê cha-bó͘-sun, Má-tek-lia̍t ê cha-bó͘-kiáⁿ.

40Tùi以掃所出ê族長，照in ê宗族，所在，名字，記tī下底；就是Têng-la̍p族長，A-le̍k-óa族長，Iâ-thiap族長；Tùi Í-sò só͘ chhut ê cho̍k-tiúⁿ, chiàu in ê chong-cho̍k, só͘-chāi, miâ-jī, kì tī ē-tóe; chiū-sī Têng-la̍p cho̍k-tiúⁿ, A-le̍k-óa cho̍k-tiúⁿ, Iâ-thiap cho̍k-tiúⁿ;

41A-hô-lī-pa-má族長，Í-la̍h族長，Pí-lùn族長；A-hô-lī-pa-má cho̍k-tiúⁿ, Í-la̍h cho̍k-tiúⁿ, Pí-lùn cho̍k-tiúⁿ;

42Ki-la̍p-su族長，Thê-bān族長，Bí-pí-sat族長；Ki-la̍p-su cho̍k-tiúⁿ, Thê-bān cho̍k-tiúⁿ, Bí-pí-sat cho̍k-tiúⁿ;

43Má-ki-tia̍p族長，Í-lân族長；chiah-ê是Í-tônge族長，照In khiā起ê所在，tī所得tio̍h做業ê地。Chit-ê是Í-tong人ê祖，就是以掃。Má-ki-tia̍p cho̍k-tiúⁿ, Í-lân cho̍k-tiúⁿ; chiah-ê sī Í-tong ê cho̍k-tiúⁿ, chiàu in khiā-khí ê só͘-chāi, tī só͘ tit-tio̍h chòe-gia̍p ê tōe. Chit-ê sī Í-tong lâng ê chó͘, chiū-sī Í-sò.

1雅各khiā起迦南地，就是伊ê老父寄腳ê所在。Ngá-kok khiā-khí Ka-lâm tōe, chiū-sī i ê lāu-pē kià-kha ê só͘-chāi.

2雅各ê世系記tī下底。約瑟十七歲kap伊hiah-ê兄相kap 顧羊；伊是一個gín-á kap伊ê老父ê細姨Phek-la̍h ê kiáⁿ，Sek-phàⁿ ê kiáⁿ，常常做陣；約瑟將伊hiah-ê兄ê pháiⁿ品行kā in老父講。Ngá-kok ê sè-hē kì tī ē-tóe. Iok-sek cha̍p-chhit hè kap i hiah ê hiaⁿ saⁿ-kap kò͘ iûⁿ; i sī chi̍t ê gín-á kap i ê lāu-pē ê sòe-î Phek-la̍h ê kiáⁿ, Sek-phàⁿ ê kiáⁿ, siông-siông chòe-tīn; Iok-sek chiong i hiah ê hiaⁿ ê pháiⁿ phín-hēng kā in lāu-pē kóng.

3Taⁿ以色列疼約瑟khah贏過 tī疼伊ê眾kiáⁿ，因為約瑟是伊年老生ê；伊kā伊做一領彩色ê衫。Taⁿ Í-sek-lia̍t thiàⁿ Iok-sek khah iâⁿ-kè tī thiàⁿ i ê chèng-kiáⁿ, in-ūi Iok-sek sī i nî-lāu siⁿ-ê; i kā i chòe chi̍t niá chhái-sek ê saⁿ.

4約瑟hiah-ê兄看見老父疼約瑟，過頭tī疼in；就怨恨約瑟，bōe會kap伊講和睦ê話。Iok-sek hiah ê hiaⁿ khòaⁿ-kìⁿ lāu-pē thiàⁿ Iok-sek, kè-thâu tī thiàⁿ in; chiū oàn-hūn Iok-sek, bōe-ōe kap i kóng hô-bo̍k ê ōe.

5約瑟夢見一個夢，kā伊hiah-ê兄講；in就koh-khah怨恨伊。Iok-sek bāng-kìⁿ chi̍t ê bāng, kā i hiah ê hiaⁿ kóng; in chiū koh-khah oàn-hūn i.

6約瑟對in講，請lín聽我所夢見ê夢。Iok-sek tùi in kóng, Chhiáⁿ lín thiaⁿ góa só͘ bāng-kìⁿ ê bāng.

7咱tī園裡hâ五穀；我所hâ-ê起來khiā，lín所hâ-ê圍纍來拜我所hâ-ê。Lán tī hn̂g-ni̍h hâ gō͘-kak; góa só͘-hâ-ê khí-lâi khiā, lín só͘-hâ-ê ûi-lûi lâi pài góa só͘ hâ-ê.

8伊ê兄應講，總無你真正beh做阮ê王mah？真正beh管轄阮mah？In就為tio̍h伊ê 夢，kap伊ê話，koh-khah怨恨伊。I ê hiaⁿ ìn kóng, Chóng-bô lí chin-chiàⁿ beh chòe goán ê ông mah? chin-chiàⁿ beh koán-hat goán mah? In chiū ūi-tio̍h i ê bāng, kap i ê ōe, koh-khah oàn-hūn i.

9後來伊koh夢見一個夢，亦kā伊ê兄講，你看，我又koh夢見一個夢；有日，月，kap十一粒星teh拜我。Āu-lâi i koh bāng-kìⁿ chi̍t ê bāng, ia̍h kā i ê hiaⁿ kóng, Lí khòaⁿ, góa iū-koh bāng-kìⁿ chi̍t ê bāng; ū ji̍t, ge̍h, kap cha̍p-it lia̍p chhiⁿ teh pài góa.

10約瑟kā伊ê老父kap伊ê兄講；in老父就責備伊，講，你所夢見chit-ê 夢是怎樣？總無我kap lín老母lín兄弟，lóng beh仆teh拜你mah？Iok-sek kā i ê lāu-pē kap i ê hiaⁿ kóng; in lāu-pē chiū chek-pī i, kóng, Lí só͘ bāng-kìⁿ chit ê bāng sī cháiⁿ-iūⁿ? chóng-bô góa kap lín lāu-bú lín hiaⁿ-tī, lóng beh phak-teh pài lí mah?

11伊ê兄lóng怨妒伊；伊ê老父用chiah-ê話記tī心內。I ê hiaⁿ lóng oàn-tò͘ i; i ê lāu-pē ēng chiah ê ōe kì tī sim-lāi.

12約瑟ê兄去示劍，飼老父ê羊。Iok-sek ê hiaⁿ khì Sī-kiàm, chhī lāu-pē ê iûⁿ.

13以色列tùi約瑟講，Lín hiaⁿ kiám m̄是tī示劍飼羊mah？你來，我beh差你去in hia。Í-sek-lia̍t tùi Iok-sek kóng, Lín hiaⁿ kiám m̄-sī tī Sī-kiàm chhī iûⁿ mah? Lí lâi, góa beh chhe lí khì in hia.

14伊應講，我tī-chia。伊kā伊講，你去看lín兄有平安á無，羊群有平安á無；tò來kā我講。就差伊出Hi-pek-lûn ê山谷；伊就去到示劍。I ìn kóng, Góa tī-chia. I kā i kóng, Lí khì khòaⁿ lín hiaⁿ ū pêng-an á-bô, iûⁿ-kûn ū pêng-an á-bô; tò-lâi kā góa kóng. Chiū chhe i chhut Hi-pek-lûn ê soaⁿ-kok; i chiū khì kàu Sī-kiàm.

15有人tn̄g-tio̍h伊tī山裡迷路；就問伊講，你teh chhē甚麼？Ū lâng tn̄g-tio̍h i tī soaⁿ-ni̍h bê-lō͘; chiū mn̄g i kóng, Lí teh chhē sím-mi̍h?

16伊講，我teh chhē我ê兄；請kā我講，in tī tah-lo̍h teh飼羊。I kóng, Góa teh chhē góa ê hiaⁿ; chhiáⁿ kā góa kóng, in tī tah-lo̍h teh chhī iûⁿ.

17hit人講，In已經離開chia；因為我聽見in teh講，咱來去To-tan。約瑟就去jip伊ê兄，tú-tio̍h in tī To-tan。Hit-lâng kóng, In í-keng lī-khui chia; in-ūi góa thiaⁿ-kìⁿ in teh kóng, Lán lâi-khì To-tan. Iok-sek chiū khì jip i ê hiaⁿ, tú-tio̍h in tī To-tan.

18In遠遠看見伊，伊iáu未行到in hia，in就相kap計謀beh害死伊。In hn̄g-hn̄g khòaⁿ-kìⁿ i, i iáu-bē kiâⁿ kàu in hia, in chiū saⁿ-kap kè-bô͘ beh hāi-sí i.

19大家相kap講，你看，做夢ê來lah。Tāi-ke saⁿ-kap kóng, Lí khòaⁿ, chòe-bāng-ê lâi-lah.

20Hò͘來，taⁿ咱kā伊thâi死，hiatti7一個乾井；chiah來講有pháiⁿ-siù食伊；咱chiah看伊ê 夢將來怎樣。Hò͘-lâi, taⁿ lán kā i thâi-sí, hiat tī chi̍t ê ta-chíⁿ; chiah lâi kóng ū pháiⁿ-siù chia̍h-i; lán chiah khòaⁿ i ê bāng chiong-lâi cháiⁿ-iūⁿ.

21Liû-piān聽見，就救伊脫離in ê手；講，咱m̄-thang害伊ê性命。Liû-piān thiaⁿ-kìⁿ, chiū kiù i thoat-lī in ê chhiú; kóng, Lán m̄-thang hāi i ê sìⁿ-miā.

22Liû-piān koh對in講，M̄-thang hō͘伊流血；thang kā伊hiat tī chit-ê曠野ê乾井，m̄-thang下手害伊；意思是beh救伊脫離in ê手，hō͘伊tò去伊ê老父hia。Liû-piān koh tùi in kóng, M̄-thang hō͘ i lâu-huih; thang kā i hiat tī chit ê khòng-iá ê ta-chíⁿ, m̄-thang hē chhiú hāi i; ì-sù sī beh kiù i thoat-lī in ê chhiú, hō͘ i tò-khì i ê lāu-pē hia.

23約瑟到伊ê兄hia，hit-tia̍p in就thǹg約瑟ê外衫，就是伊身軀hit領彩色ê衫；Iok-sek kàu i ê hiaⁿ hia, hit-tia̍p in chiū thǹg Iok-sek ê gōa-saⁿ, chiū-sī i seng-khu hit-niá chhái-sek ê saⁿ;

24就掠伊，hiat落井，hit-ê井是乾ê，內面無水。chiū lia̍h i, hiat-lo̍h chíⁿ, hit ê chíⁿ sī ta-ê, lāi-bīn bô chúi.

25In坐teh食餅；kia̍h目看，看見一tīn以實瑪利人tùi Ki-lia̍t來；用駱駝背香料，乳香，沒藥，beh帶落去埃及。In chē-teh chia̍h-piáⁿ; kia̍h-ba̍k khòaⁿ, khòaⁿ-kìⁿ chi̍t-tīn Í-si̍t-má-lī lâng tùi Ki-lia̍t lâi; ēng lo̍k-tô pē hiuⁿ-liāu, jú-hiuⁿ, bu̍t-io̍h, beh tòa lo̍h-khì Ai-ki̍p.

26猶大對chiah-ê兄弟講，咱thâi死咱ê小弟，khǹg密伊ê血，有甚麼利益？Iû-tāi tùi chiah ê hiaⁿ-tī kóng, Lán thâi-sí lán ê sió-tī, khǹg-ba̍t i ê huih, ū sím-mi̍h lī-ek?

27咱來kā伊賣hō͘以實瑪利人；m̄-thang下手害伊；因為伊是咱ê小弟，咱ê骨肉。兄弟聽伊。Lán lâi kā i bōe hō͘ Í-si̍t-má-lī lâng; m̄-thang hē-chhiú hāi i; in-ūi i sī lán ê sió-tī, lán ê kut-jio̍k. Hiaⁿ-tī thiaⁿ-i.

28有hiah-ê米甸ê seng-lí人tùi hia過，伊ê兄就kā約瑟tùi井內拔起來，將伊賣hō͘以實瑪利人，得tio̍h二十個銀。Hiah-ê人就帶約瑟去埃及。Ū hiah ê Bí-tiân ê seng-lí lâng tùi hia kè, i ê hiaⁿ chiū kā Iok-sek tùi chíⁿ-lāi pu̍ih-khí-lâi, chiong i bōe hō͘ Í-si̍t-má-lī lâng, tit-tio̍h jī-cha̍p ê gûn. Hiah ê lâng chiū tòa Iok-sek khì Ai-ki̍p.

29Liû-piān 倒tńg來井邊，看見約瑟無tī井內，就拆裂家己ê衫。Liû-piān tò-tńg-lâi chíⁿ-piⁿ, khòaⁿ-kìⁿ Iok-sek bô tī chíⁿ-lāi, chiū thiah-li̍h ka-kī ê saⁿ.

30tò去小弟hia，講，Gín-á無去lah；也我nih，我beh tah-lo̍h去？Tò-khì sió-tī hia, kóng, Gín-á bô-khì lah; iā góa nih, góa beh tah-lo̍h khì?

31In就thâi一隻山羊káng，將約瑟hit領衫ùn血；In chiū thâi chi̍t chiah soaⁿ-iûⁿ-káng, chiong Iok-sek hit niá saⁿ ùn-huih;

32就差人the̍h hit領彩色ê衫去in老父hia，講，阮chhē-tio̍h chit領，請你認看是你ê kiáⁿ ê外衫á m̄是。chiū chhe lâng the̍h hit niá chhái-sek ê saⁿ khì in lāu-pē hia, kóng, Goán chhē-tio̍h chit-niá, chhiáⁿ lí jīn-khòaⁿ sī lí ê kiáⁿ ê gōa-saⁿ á m̄-sī.

33伊認得，就講，這是我ê kiáⁿ ê外衫，有pháiⁿ-siù kā-食伊；約瑟的確hō͘伊拆碎。I jīn-tit, chiū kóng, Che sī góa ê kiáⁿ ê gōa-saⁿ, ū pháiⁿ-siù kā-chia̍h-i; Iok-sek tek-khak hō͘ i thiah-chhùi.

34雅各就拆裂衫，腰hâ麻布，為伊ê kiáⁿ哀傷chōe-chōe日。Ngá-kok chiū thiah-li̍h saⁿ, io hâ môa-pò͘, ūi i ê kiáⁿ ai-siong chōe-chōe ji̍t.

35伊ê kiáⁿ kap伊ê cha-bó͘-kiáⁿ lóng起來安慰伊；伊m̄肯受安慰；講，我的確哀傷落陰府，到我ê kiáⁿ hia。伊ê老父為tio̍h伊啼哭。I ê kiáⁿ kap i ê cha-bó͘-kiáⁿ lóng khí-lâi an-ùi i; i m̄-khéng siū an-ùi; kóng, Góa tek-khak ai-siong lo̍h im-hú, kàu góa ê kiáⁿ hia. I ê lāu-pē ūi-tio̍h i thî-khàu.

36米甸人帶約瑟到埃及，將伊賣hō͘法老ê人臣，侍衛長，Pho-thê-hoat。Bí-tiân lâng tòa Iok-sek kàu Ai-ki̍p, chiong i bōe hō͘ Hoat-ló ê jîn-sîn, sī-ōe-tiúⁿ, Pho-thê-hoat.

1hit時猶大離開伊ê兄弟，落去到一個A-tō͘-lân人，名做Hi-la̍h ê家；Hit-sî Iû-tāi lī-khui i ê hiaⁿ-tī, lo̍h-khì kàu chi̍t ê A-tō͘-lân lâng, miâ chòe Hi-la̍h ê ke;

2猶大tī-hia看見一個迦南人，名叫Su-âe cha-bó͘-kiáⁿ；就chhōa伊，kap伊同房。Iû-tāi tī-hia khòaⁿ-kìⁿ chi̍t ê Ka-lâm lâng, miâ-kiò Su-a ê cha-bó͘-kiáⁿ; chiū chhōa i, kap i tâng-pâng.

3伊就懷孕生kiáⁿ；猶大就kā伊號名做Jíⁿ。I chiū hoâi-īn siⁿ-kiáⁿ; Iû-tāi chiū kā i hō miâ chòe Jíⁿ.

4伊koh懷孕生kiáⁿ；老母kā伊號名Gô-lâm。I koh hoâi-īn siⁿ-kiáⁿ; lāu-bú kā i hō miâ Gô-lâm.

5伊又koh生kiáⁿ，kā伊號名Sī-la̍h；伊生Sī-la̍h ê時，猶大tú-á tī Ki-sek。I iū-koh siⁿ-kiáⁿ, kā i hō-miâ Sī-la̍h; i siⁿ Sī-la̍h ê sî, Iû-tāi tú-á tī Ki-sek.

6猶大kā伊ê大kiáⁿ Jíⁿ娶bó͘，名叫Tha-má。Iû-tāi kā i ê tōa-kiáⁿ Jíⁿ chhōa-bó͘, miâ-kiò Tha-má.

7猶大ê大kiáⁿ Jíⁿ行pháiⁿ tī耶和華ê面前；耶和華就hō͘伊死。Iû-tāi ê tōa-kiáⁿ Jíⁿ kiâⁿ-pháiⁿ tī Iâ-hô-hoa ê bīn-chêng; Iâ-hô-hoa chiū hō͘ i sí.

8猶大kā Gô-lâm講，你tio̍h kap你ê兄嫂同房，對伊來盡你做小弟ê本份，kā你ê兄立後嗣。Iû-tāi kā Gô-lâm kóng, Lí tio̍h kap lí ê hiaⁿ-só tâng-pâng, tùi i lâi chīn lí chòe sió-tī ê pún-hūn, kā lí ê hiaⁿ li̍p hō͘-sû.

9Gô-lâm知所生ê kiáⁿ無歸tī伊家己；所以同房ê時，遺洩tī地裡，免得hō͘伊ê兄有後嗣。Gô-lâm chai só͘ siⁿ ê kiáⁿ bô kui tī i ka-kī; só͘-í tâng-pâng ê sî, ûi-siat tī tōe-ni̍h, bián-tit hō͘ i ê hiaⁿ ū hō͘-sû.

10伊ê所做，耶和華看做pháiⁿ；hō͘伊也死。I ê só͘-chòe, Iâ-hô-hoa khòaⁿ chòe pháiⁿ; hō͘ i iā sí.

11猶大心內講，驚了Sī-la̍h亦死，親像伊兩個兄一樣；就對伊ê新婦Tha-má講，你去tòa lín老父ê家守寡，thèng候我ê kiáⁿ Sī-la̍h長成。Tha-má就tò去，tòa tī in老父ê家。Iû-tāi sim-lāi kóng, Kiaⁿ-liáu Sī-la̍h ia̍h sí, chhin-chhiūⁿ i nn̄g ê hiaⁿ chi̍t-iūⁿ; chiū tùi i ê sim-pū Tha-má kóng, Lí khì tòa lín lāu-pē ê ke chiú-kóaⁿ, thèng-hāu góa ê kiáⁿ Sī-la̍h tióng-sêng. Tha-má chiū tò-khì, tòa tī in lāu-pē ê ke.

12過久久，猶大ê bó͘ Su-a ê cha-bó͘-kiáⁿ死；猶大受安慰；就kap伊ê朋友A-tō͘-lân人Hi-la̍h上去Têng-ná，到伊剪羊毛ê人hia。Kè kú-kú, Iû-tāi ê bó͘ Su-a ê cha-bó͘-kiáⁿ sí; Iû-tāi siū an-ùi; chiū kap i ê pêng-iú A-tō͘-lân lâng Hi-la̍h chiūⁿ-khì Têng-ná, kàu i chián iûⁿ-mn̂g ê lâng hia.

13有人kā Tha-má講，Lín ta-koaⁿ上去Têng-ná，剪伊ê羊ê毛。Ū lâng kā Tha-má kóng, Lín ta-koaⁿ chiūⁿ-khì Têng-ná, chián i ê iûⁿ ê mn̂g.

14Tha-má看見Sī-la̍h已經長成，iáu無chhōa伊做bó͘；就thǹg伊守寡ê衫，用帕罩面，koh moa身體；坐tī Têng-ná ê路，I-ná-ìn門口。Tha-má khòaⁿ-kìⁿ Sī-la̍h í-keng tióng-sêng, iáu bô chhōa i chòe-bó͘; chiū thǹg i chiú-kóaⁿ ê saⁿ, ēng phè tà-bīn, koh moa sin-thé; chē tī Têng-ná ê lō͘, I-ná-ìn mn̂g-kháu.

15猶大看見伊，掠做是娼妓，因為伊有罩面。Iû-tāi khòaⁿ-kìⁿ i, lia̍h-chòe sī chhiong-ki, in-ūi i ū tà-bīn.

16就oa̍t去路邊就近伊；講，來，hō͘我kap你相kap睏；因為m̄知是伊ê新婦；應講，你beh kap我睏，beh用甚麼hō͘我？Chiū oat-khì lō͘-piⁿ chiū-kūn i; kóng, Lâi, hō͘ góa kap lí saⁿ-kap khùn; in-ūi m̄-chai sī i ê sim-pū; ìn kóng, Lí beh kap góa khùn, beh ēng sím-mi̍h hō͘ góa?

17猶大講，我tùi羊群內掠一隻山羊á，寄來hō͘你。講，你beh用物hō͘我做準當，thèng候你寄來mah？Iû-tāi kóng, Góa tùi iûⁿ-kûn-lāi lia̍h chi̍t chiah soaⁿ-iûⁿ-á, kià-lâi hō͘ lí. Kóng, Lí beh ēng mi̍h hō͘ góa chòe chún-tǹg, thèng-hāu lí kià-lâi mah?

18猶大講，我tio̍h甚麼hō͘你做準當？伊就講，你ê印，你ê帶，kap你手裡ê柺á；就hō͘伊，kap伊睏；伊就tùi猶大懷孕。Iû-tāi kóng, Góa tio̍h sím-mi̍h hō͘ lí chòe chún-tǹg? I chiū kóng, Lí ê ìn, lí ê tòa, kap lí chhiú-ni̍h ê koáiⁿ-á; chiū hō͘ i, kap i khùn; i chiū tùi Iû-tāi hoâi-īn.

19Tha-má起來去；thǹg伊ê帕，猶原穿伊守寡ê衫。Tha-má khí-lâi khì; thǹg i ê phè, iû-goân chhēng i chiú-kóaⁿ ê saⁿ.

20猶大託伊ê朋友A-tō͘-lân人送一隻山羊á，beh tùi hit-ê婦人人ê手the̍h準當；chhē伊bōe tio̍h。Iû-tāi thok i ê pêng-iú A-tō͘-lân lâng sàng chi̍t chiah soaⁿ-iûⁿ-á, beh tùi hit ê hū-jîn-lâng ê chhiú the̍h chún-tǹg; chhē i bōe tio̍h.

21就問hit所在ê人講，I-ná-ìn路邊ê娼妓tī tah-lo̍h？in講，chit位無娼妓。Chiū mn̄g hit só͘-chāi ê lâng kóng, I-ná-ìn lō͘-piⁿ ê chhiong-ki tī tah-lo̍h? in kóng, chit-ūi bô chhiong-ki.

22伊tò去見猶大講，我chhē伊無；hit位ê人亦講，Chit位無娼妓。I tò-khì kìⁿ Iû-tāi kóng, Góa chhē i bô; hit-ūi ê lâng ia̍h kóng, Chit-ūi bô chhiong-ki.

23猶大講，Kù-chāi伊the̍h去，免得咱見笑；你看，我已經將chit隻山羊á送伊，你竟然chhē伊無。Iû-tāi kóng, Kù-chāi i the̍h-khì, bián-tit lán kiàn-siàu; lí khòaⁿ, góa í-keng chiong chit chiah soaⁿ-iûⁿ-á sàng i, lí kéng-jiân chhē i bô.

24約略過三月日，有人kā猶大講，你ê新婦Tha-má做娼妓；koh因為行淫，soah有身孕。猶大講，Kā伊拖出來燒。Iok-lio̍k kè saⁿ-ge̍h-ji̍t, ū lâng kā Iû-tāi kóng, Lí ê sim-pū Tha-má chòe chhiong-ki; koh in-ūi kiâⁿ-îm, sòa ū sin-īn. Iû-tāi kóng, Kā i thoa-chhut-lâi sio.

25Tha-má hō͘人拖出來ê時，就差人去見伊ê ta-koaⁿ講，Chiah-ê物是是誰 ê，我就是tùi伊來懷孕。Tha-má hō͘ lâng thoa-chhut-lâi ê sî, chiū chhe lâng khì kìⁿ i ê ta-koaⁿ kóng, Chiah ê mi̍h sī chī-chūi ê, góa chiū-sī tùi i lâi hoâi-īn.

26Koh講，請你認，看chit-ê印kap帶kap柺á是是誰 ê。猶大認得，就講，伊比我khah有義；因為我無將伊過hō͘我ê kiáⁿ Sī-la̍h；tùi hit-tia̍p猶大無koh親近伊。Koh kóng, Chhiáⁿ lí jīn, khòaⁿ chit ê ìn kap tòa kap koáiⁿ-á sī chī-chūi ê. Iû-tāi jīn-tit, chiū kóng, I pí góa khah ū-gī; in-ūi góa bô chiong i kè hō͘ góa ê kiáⁿ Sī-la̍h; tùi hit-tia̍p Iû-tāi bô koh chhin-kūn i.

27Tha-má得beh生ê時，知伊腹肚內是雙個。Tha-má tit-beh siⁿ ê sî, chai i pak-tó͘-lāi sī siang-ê.

28Teh生ê時，一個gín-á伸一支手出來；拾者the̍h紅線縛tī伊ê手講，Chit-ê是事先出ê。Teh siⁿ ê sî, chi̍t ê gín-á chhun chi̍t ki chhiú chhut-lâi; khioh-chiá the̍h âng-sòaⁿ pa̍k tī i ê chhiú kóng, Chit-ê sī tāi-seng chhut-ê.

29後來伊ê手kiu入去；第二個出世；拾者講，你啥事chông出來？chit-ê爆破是為tio̍h你；所以kā伊號名做Hoat-le̍k-su。Āu-lâi i ê chhiú kiu-ji̍p-khì; tē-jī-ê chhut-sì; khioh-chiá kóng, Lí siáⁿ-sū chông-chhut-lâi? chit ê piak-phòa sī ūi-tio̍h lí; só͘-í kā i hō-miâ chòe Hoat-le̍k-su.

30後來hit-ê，手縛紅線ê，亦生出來；就號伊ê名做謝拉。Āu-lâi hit-ê, chhiú pa̍k âng-sòaⁿ-ê, ia̍h siⁿ-chhut-lâi; chiū hō i ê miâ chòe Siā-la̍h.