1Chiah-ê tāi-chì以後，埃及王 ê酒政kap廚房得罪in ê主埃及王。Chiah ê tāi-chì í-āu, Ai-ki̍p ông ê chiú-chèng kap tû-pâng tek-chōe in ê chú Ai-ki̍p ông.

2法老受氣伊兩個人臣，就是酒政長kap廚房長，Hoat-ló siū-khì i nn̄g ê jîn-sîn, chiū-sī chiú-chèng-tiúⁿ kap tû-pâng-tiúⁿ,

3將in關tī侍衛長府內ê監，就是約瑟受關ê所在。chiong in koaiⁿ tī sī-ōe-tiúⁿ hú-lāi ê kaⁿ, chiū-sī Iok-sek siū koaiⁿ ê só͘-chāi.

4侍衛長將in交代約瑟，伊就伺候in；in就tī監內有hiah久。Sī -ōe-tiúⁿ chiong in kau-tài Iok-sek, i chiū su-hāu in; in chiū tī kaⁿ-lāi ū hiah-kú.

5受關tī監ê，埃及王ê酒政kap廚房，兩人同一暝各夢見一個夢，lóng照ta̍k-ê夢ê意義來夢。Siū-koaiⁿ tī kaⁿ-ê, Ai-ki̍p ông ê chiú-chèng kap tû-pâng, nn̄g-lâng tâng chi̍t-mî kok bāng-kìⁿ chi̍t ê bāng, lóng chiàu ta̍k ê bāng ê ì-gī lâi bāng.

6到天光，約瑟入去in hia，看見in有憂悶ê款式。Kàu thiⁿ-kng, Iok-sek ji̍p-khì in hia, khòaⁿ-kìⁿ in ū iu-būn ê khoán-sit.

7伊就問法老兩個人臣，就是kap伊平平關tī主人府內ê，講，今á日lín啥事面帶憂容？I chiū mn̄g Hoat-ló nn̄g ê jîn-sîn, chiū-sī kap i pîⁿ-pîⁿ koaiⁿ tī chú-lâng hú-lāi-ê, kóng, Kin-á-ji̍t lín siáⁿ-sū bīn tài-iu-iông?

8In kā伊講，阮ta̍k人夢見一個夢，無人thang圓。約瑟kā in講，圓夢 kiám m̄是在tī上帝mah？請lín kā我講。In kā i kóng, Goán ta̍k-lâng bāng-kìⁿ chi̍t ê bāng, bô lâng thang oân. Iok-sek kā in kóng, Oân-bāng kiám-m̄-sī chāi tī Siōng-tè mah? chhiáⁿ lín kā góa kóng.

9酒政就對約瑟排列伊ê 夢，講，我夢中看見有一叢葡萄樹tī我ê面前；Chiú-chèng chiū tùi Iok-sek pâi-lia̍t i ê bāng, kóng, Góa bāng-tiong khòaⁿ-kìⁿ ū chi̍t châng phû-tô-chhiū tī góa ê bīn-chêng;

10樹頂有三支，親像有發芽開花；伊ê葩(pha)結成熟ê葡萄。chhiū-téng ū saⁿ-ki, chhin-chhiūⁿ ū hoat-gê khui-hoe; i ê pha kiat-chiâⁿ se̍k ê phû-tô.

11法老ê杯tī我ê手內，我就the̍h葡萄，ni̍h伊tī法老ê杯內，將杯捧交法老ê手。Hoat-ló ê poe tī góa ê chhiú-lāi, góa chiū the̍h phû-tô, ni̍h i tī Hoat-ló ê poe-lāi, chiong poe phâng kau Hoat-ló ê chhiú.

12約瑟kā伊講，你ê 夢是án-ni圓；三支就是三日；Iok-sek kā i kóng, Lí ê bāng sī án-ni oân; saⁿ-ki chiū-sī saⁿ-ji̍t;

13koh三日，法老beh舉起你ê頭，復到你ê官職；法老ê酒杯beh猶原hē tī你ê手，親像前做伊ê酒政一樣。koh saⁿ-ji̍t, Hoat-ló beh kú-khí lí ê thâu, ho̍k-tò lí ê koaⁿ-chit; Hoat-ló ê chiú-poe beh iû-goân hē tī lí ê chhiú, chhin-chhiūⁿ chêng chòe i ê chiú-chèng chi̍t-iūⁿ.

14你若得志ê時，tio̍h記念我，施恩hō͘我；tī法老ê面前替我講一聲；救我出chit-ê監。Lí nā tek-chì ê sî, tio̍h kì-liām góa, si-un hō͘ góa; tī Hoat-ló ê bīn-chêng thòe góa kóng chi̍t siaⁿ; kiù góa chhut chit ê kaⁿ.

15我實在是tùi希伯來人ê地受賣來ê；我tī-chia亦無做出甚麼，hō͘ in kā我關落監。Góa si̍t-chāi sī tùi Hi-pek-lâi lâng ê tōe siū-bōe-lâi-ê; góa tī-chia ia̍h bô chòe-chhut sím-mi̍h, hō͘ in kā góa koaiⁿ-lo̍h kaⁿ.

16廚房看見夢圓了好，就kā約瑟講，我亦tī我ê夢中看，tī我ê頭殼頂有三筐pek ê餅；Tû-pâng khòaⁿ-kìⁿ bāng oân-liáu hó, chiū kā Iok-sek kóng, Góa ia̍h tī góa ê bāng-tiong khòaⁿ, tī góa ê thâu-khak-téng ū saⁿ-kheng pek ê piáⁿ;

17頂面hit有tóe法老所食ta̍k號pek ê物；有鳥來teh我頭殼頂筐內ê物。téng-bīn hit-kheng ū tóe Hoat-ló só͘ chia̍h ta̍k-hō pek ê mi̍h; ū chiáu lâi teh góa thâu-khak-téng kheng-lāi ê mi̍h.

18約瑟應伊講，你ê夢是án-ni圓；三khiak筐是三日；Iok-sek ìn i kóng, Lí ê bāng sī án-ni oân; saⁿ khia kheng sī saⁿ-ji̍t;

19koh三日，法老beh舉起你ê頭殼離開你，吊你tī柴裡；beh有飛鳥來teh你身軀ê肉。koh saⁿ-ji̍t, Hoat-ló beh kú-khí lí ê thâu-khak lī-khui lí, tiàu lí tī chhâ-ni̍h; beh ū pe-chiáu lâi teh lí sin-khu ê bah.

20到第三日，是法老ê生日，伊為眾人臣排設筵席；tī chiah-ê人臣ê中間，抬舉酒政kap廚房；Kàu tē-saⁿ ji̍t, sī Hoat-ló ê siⁿ-ji̍t, i ūi chèng jîn-sîn pâi-siat iân-sia̍h; tī chiah ê jîn-sîn ê tiong-kan, thâi-kú chiú-chèng kap tû-pâng;

21hō͘酒政長復到官職；伊猶原捧杯tī法老ê手；hō͘ chiú-chèng-tiúⁿ ho̍k-tò koaⁿ-chit; i iû-goân phâng-poe tī Hoat-ló ê chhiú;

22總是將廚房頭召起來；tú-tú照約瑟所kā in圓ê。chóng-sī chiong tû-pâng-thâu tiàu-khí-lâi; tú-tú chiàu Iok-sek só͘ kā in oân-ê.

23但是酒政長無念tio̍h約瑟，竟然bōe記得伊。Nā-sī chiú-chèng-tiúⁿ bô liām-tio̍h Iok-sek, kéng-jiân bōe-kì-tit i.

1過兩年ka-nn̂g，法老眠夢；夢見伊khiā tī河邊，Kè nn̄g-nî ka-nn̂g, Hoat-ló bîn-bāng; bāng-kìⁿ i khiā tī hô-piⁿ,

2看見七隻牛母tùi河裡起來，súi koh肥；tī蘆竹á內 teh食。khòaⁿ-kìⁿ chhit chiah gû-bú tùi hô-ni̍h khí-lâi, súi koh pûi; tī lô͘-tek-á-lāi teh chia̍h.

3tè後koh有七隻牛母tùi河裡起來，khiap-sì koh瘦；kap前hiah-ê牛同khiā tī河邊。Tè-āu koh ū chhit chiah gû-bú tùi hô-ni̍h khí-lâi, khiap-sì koh sán; kap chêng hiah ê gû tâng-khiā tī hô-piⁿ.

4Chiah-ê khiap-sì koh瘦ê牛母一盡食hit七隻súi koh肥ê牛。法老就醒。Chiah ê khiap-sì koh sán ê gû-bú it-chīn chia̍h hit chhit-chiah súi koh pûi ê gû. Hoat-ló chiū chhíⁿ.

5伊koh睏，第二pái眠夢；夢見一叢麥出七穗，phauh koh好。I koh khùn, tē-jī pái bîn-bāng; bāng-kìⁿ chi̍t châng be̍h chhut chhit-sūi, phauh koh hó.

6後來看見koh出七穗，冇冇，koh hō͘東風掃pháiⁿ。Āu-lâi khòaⁿ-kìⁿ koh chhut chhit-sūi, phàⁿ-phàⁿ, koh hō͘ tang-hong sàu-pháiⁿ.

7Chiah-ê冇ê穗吞hit七穗phauh koh飽滿ê。法老醒，chiah知是夢見。Chiah ê phàⁿ ê sūi thun hit chhit-sūi phauh koh pá-móa-ê. Hoat-ló chhíⁿ, chiah chai sī bāng-kìⁿ.

8到天光，法老心無平安；就差人召埃及所有ê術士、博士來；法老就將伊所夢見ê kā in講；in無人會kā法老圓。Kàu thiⁿ-kng, Hoat-ló sim bô pêng-an; chiū chhe lâng tiàu Ai-ki̍p só͘ ū ê su̍t-sū, phok-sū lâi; Hoat-ló chiū chiong i só͘ bāng-kìⁿ-ê kā in kóng; in bô lâng ōe kā Hoat-ló oân.

9Hit時酒政長kā法老講，我今á日記得我ê罪。Hit-sî chiú-chèng-tiúⁿ kā Hoat-ló kóng, Góa kin-á-ji̍t kì-tit góa ê chōe.

10前法老受氣人臣，將我kap廚房頭關tī侍衛長府內ê監。Chêng Hoat-ló siū-khì jîn-sîn, chiong góa kap tû-pâng-thâu koaiⁿ tī sī-ōe-tiúⁿ hú-lāi ê kaⁿ.

11我kap伊，兩人siâng hit暝有夢見，各照伊ê 夢ê意義來夢。Góa kap i, nn̄g-lâng siâng hit-mî ū bāng-kìⁿ, kok chiàu i ê bāng ê ì-gī lâi bāng.

12Tī-hia，kap阮tī-teh，有一個希伯來ê少年人，是侍衛長ê奴僕，阮kā伊講，伊就kā阮圓阮ê 夢；是照阮ta̍k人ê 夢來圓。Tī-hia, kap goán tī-teh, ū chi̍t ê Hi-pek-lâi ê siàu-liân lâng, sī sī-ōe-tiúⁿ ê lô͘-po̍k, goán kā i kóng, i chiū kā goán oân goán ê bāng; sī chiàu goán ta̍k-lâng ê bāng lâi oân.

13後來tú-tú照伊所kā阮圓ê來成；伊hō͘我復職，hit人受吊來死。Āu-lâi tú-tú chiàu i só͘ kā goán oân-ê lâi chiâⁿ; i hō͘ góa ho̍k-chit, hit-lâng siū tiàu lâi sí.

14法老就差人去召約瑟，in就緊緊chhōa伊出監；伊就剪髮，換伊ê衫，來見法老。Hoat-ló chiū chhe lâng khì tiàu Iok-sek, in chiū kín-kín chhōa i chhut-kaⁿ; i chiū chián-hoat, ōaⁿ i ê saⁿ, lâi kìⁿ Hoat-ló.

15法老kā約瑟講，我夢見一個夢，無人會圓伊；我聽見人講到你聽見夢就會圓。Hoat-ló kā Iok-sek kóng, Góa bāng-kìⁿ chi̍t ê bāng, bô lâng ōe oân-i; góa thiaⁿ-kìⁿ lâng kóng kàu lí thiaⁿ-kìⁿ bāng chiū ōe oân.

16約瑟應法老講，這m̄是在tī我；上帝beh將平安指示法老。Iok-sek ìn Hoat-ló kóng, Che m̄-sī chāi-tī góa; Siōng-tè beh chiong pêng-an chí-sī Hoat-ló.

17法老kā約瑟講，我夢見我khiā tī河邊，Hoat-ló kā Iok-sek kóng, Góa bāng-kìⁿ góa khiā tī hô-piⁿ,

18有七隻牛母tùi河裡起來，肥koh súi；tī蘆竹á內teh食；ū chhit chiah gû-bú tùi hô-ni̍h khí-lâi, pûi koh súi; tī lô͘-tek-á-lāi teh chia̍h;

19tè後koh有七隻牛母起來，nńg-chiáⁿ，真khiap-sì，koh真瘦；遍埃及地，我m̄-bat看見到chiah pháiⁿ。tè-āu koh ū chhit chiah gû-bú khí-lâi, nńg-chiáⁿ, chin khiap-sì, koh chin sán; piàn Ai-ki̍p tōe, góa m̄-bat khòaⁿ-kìⁿ kàu chiah pháiⁿ.

20Chiah-ê瘦koh khiap-sì ê牛母一盡食事先hit七隻肥ê牛母；Chiah ê sán koh khiap-sì ê gû-bú it-chīn chia̍h tāi-seng hit chhit chiah pûi ê gû-bú;

21吞落腹，iáu未看出有吞落去；hit-ê khiap-sì ê款猶原kap事先無各樣；我就醒。thun lo̍h pak, iáu-bōe khòaⁿ-chhut ū thun-lo̍h khì; hit ê khiap-sì ê khoán iû-goân kap tāi-seng bô koh-iūⁿ; góa chiū chhíⁿ.

22我tī夢中koh看見一叢麥，出七穗，飽滿koh好；Góa tī bāng-tiong koh khòaⁿ-kìⁿ chi̍t châng be̍h, chhut chhit-sūi, pá-móa koh hó;

23後來koh出七穗，枯焦(tâ)，冇冇，koh hō͘東風掃pháiⁿ；āu-lâi koh chhut chhit-sūi, ko͘-tâ, phàⁿ-phàⁿ, koh hō͘ tang-hong sàu-pháiⁿ;

24chiah-ê冇冇ê穗吞hit七穗好ê。我講hō͘術士聽，也無人會kā我解明。chiah ê phàⁿ-phàⁿ ê sūi thun hit chhit sūi hó-ê. Góa kóng hō͘ su̍t-sū thiaⁿ, iā bô lâng ōe kā góa kóe-bêng.

25約瑟kā法老講，法老ê 夢就是一個；上帝所beh行ê事，有指示法老。Iok-sek kā Hoat-ló kóng, Hoat-ló ê bāng chiū-sī chi̍t-ê; Siōng-tè só͘ beh kiâⁿ ê sū, ū chí-sī Hoat-ló.

26七隻好ê牛母是七年；七穗好ê，亦是七年；夢是一個。Chhit-chiah hó ê gû-bú sī chhit-nî; chhit-sūi hó-ê, ia̍h sī chhit-nî; bāng sī chi̍t-ê.

27Hiah-ê tè後起來ê七隻瘦koh khiap-sì ê牛母，是七年；hiah-ê 七穗空冇，koh hō͘東風掃pháiⁿ-ê，亦是七年；beh做七年ê飢荒。Hiah ê tè-āu khí-lâi ê chhit chiah sán koh khiap-sì ê gû-bú, sī chhit-nî; hiah ê chhit sūi khang-phàⁿ, koh hō͘ tang-hong sàu-pháiⁿ-ê, ia̍h sī chhit nî; beh chòe chhit nî ê ki-hng.

28上帝所beh做ê事，有顯明tī法老；這是我對法老所講ê。Siōng-tè só͘ beh chòe ê sū, ū hián-bêng tī Hoat-ló; che sī góa tùi Hoat-ló só͘ kóng-ê.

29你看，埃及遍地beh tú-tio̍h大好年冬七年；Lí khòaⁿ, Ai-ki̍p piàn-tōe beh tú-tio̍h tōa hó-nî-tang chhit-nî;

30tè後，koh beh tú-tio̍h飢荒七年；甚至tī埃及地lóng bōe記得以前ê好收；全地beh hō͘飢荒所滅；tè-āu, koh beh tú-tio̍h ki-hng chhit-nî; sīm-chì tī Ai-ki̍p tōe lóng bōe kì-tit í-chêng ê hó-siu; choân-tōe beh hō͘ ki-hng só͘ bia̍t;

31因為以後ê飢荒太傷重，就m̄知以前地方ê好收。in-ūi í-āu ê ki-hng thài siong-tiōng, chiū m̄-chai í-chêng tōe-hng ê hó-siu.

32論到法老兩pái ê眠夢，是因為上帝註定chit-ê tāi-chì，koh上帝beh緊緊成伊。Lūn-kàu Hoat-ló nn̄g pái ê bîn-bāng, sī in-ūi Siōng-tè chù-tiāⁿ chit ê tāi-chì, koh Siōng-tè beh kín-kín chiâⁿ-i.

33所以法老tio̍h揀一個有聰明，有智慧ê人，派伊治理埃及地。Só͘-í Hoat-ló tio̍h kéng chi̍t ê ū chhang-miâ, ū tì-hūi ê lâng, phài i tī-lí Ai-ki̍p tōe.

34法老tio̍h án-ni行，koh立官員管理chit-ê地；當七年好年冬ê時，埃及地所收ê，五份抽一份；Hoat-ló tio̍h án-ni kiâⁿ, koh li̍p koaⁿ-oân koán-lí chit ê tōe; tng chhit-nî hó-nî-tang ê sî, Ai-ki̍p tōe só͘-siu-ê, gō͘-hūn thiu chi̍t-hūn;

35hō͘ in tī將來ê好年冬，積聚一切ê米糧；聚集五穀，收khǹg照顧；tī ta̍k-ê城做食物，歸tī法老ê手頭。hō͘ in tī chiong-lâi ê hó-nî-tang, chek-chū it-chhè ê bí-niû; chū-chi̍p ngó͘-kok, siu-khǹg chiàu-kò͘; tī ta̍k ê siâⁿ chòe chia̍h-mi̍h, kui tī Hoat-ló ê chhiú-thâu.

36所積聚ê米糧，thang做埃及地將來七年飢荒ê路用；免得chit-ê地hō͘飢荒所滅。Só͘ chek-chū ê bí-niû, thang chòe Ai-ki̍p tōe chiong-lâi chhit-nî ki-hng ê lō͘-ēng; bián-tit chit ê tōe hō͘ ki-hng só͘ bia̍t.

37法老kap伊一切ê人臣lóng掠chit-ê tāi-chì做好。Hoat-ló kap i it-chhè ê jîn-sîn lóng lia̍h chit ê tāi-chì chòe-hó.

38法老對伊ê人臣講，咱kiám會chhē-tio̍h一個親像伊chit-ê人，有上帝ê神tī伊ê內面mah？Hoat-ló tùi i ê jîn-sîn kóng, Lán kiám ōe chhē-tio̍h chi̍t-ê chhin-chhiūⁿ i chit ê lâng, ū Siōng-tè ê sîn tī i ê lāi-bīn mah?

39法老對約瑟講，上帝已經將chit-ê tāi-chì lóng指示你，可見無人親像你有chit號ê聰明智慧。Hoat-ló tùi Iok-sek kóng, Siōng-tè í-keng chiong chit ê tāi-chì lóng chí-sī lí, khó-kiàn bô lâng chhin-chhiūⁿ lí ū chit-hō ê chhang-miâ tì-hūi.

40你thang管理我ê家；我ê百姓lóng tio̍h聽你ê話，hō͘你管理；獨獨tī寶座，我比你khah大。Lí thang koán-lí góa ê ke; góa ê peh-sìⁿ lóng tio̍h thiaⁿ lí ê ōe, hō͘ lí koán-lí; to̍k-to̍k tī pó-chō, góa pí lí khah tōa.

41法老kā約瑟講，我舉起你管轄埃及全地。Hoat-ló kā Iok-sek kóng, Góa kú-khí lí koán-hat Ai-ki̍p choân-tōe.

42法老就剝伊手裡做印ê手指，掛tī約瑟ê指頭á；kā伊穿幼苧衫；將金鍊掛tī伊ê頷頸。Hoat-ló chiū pak i chhiú-ni̍h chòe ìn ê chhiú-chí, kòa tī Iok-sek ê chńg-thâu-á; kā i chhēng iù-tōe-saⁿ; chiong kim-liān kòa tī i ê ām-kún.

43Koh hō͘約瑟坐伊ê第二pān車；開道ê叫講，跪；án-ni法老設立伊治理埃及全地。Koh hō͘ Iok-sek chē i ê tē-jī pān chhia; khui-tō-ê kiò kóng, Kūi; án-ni Hoat-ló siat-li̍p i tī-lí Ai-ki̍p choân-tōe.

44法老對約瑟講，我是法老，若無你有聲，tī埃及全地，m̄准人動腳手。Hoat-ló tùi Iok-sek kóng, Góa sī Hoat-ló, nā bô lí ū siaⁿ, tī Ai-ki̍p choân-tōe, m̄-chún lâng tāng kha-chhiú.

45法老欽賜約瑟ê名叫Sat-hoat-ná-thek Pa-lōe-a；koh將An城ê祭司Pho-thê-hui-la̍h ê cha-bó͘-kiáⁿ A-se-la̍p hō͘伊做bó͘。約瑟就出巡埃及地。Hoat-ló khim-sù Iok-sek ê miâ kiò Sat-hoat-ná-thek Pa-lōe-a; koh chiong An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p hō͘ i chòe-bó͘. Iok-sek chiū chhut-sûn Ai-ki̍p tōe.

46約瑟見埃及王法老ê時，hit年三十歲。約瑟tùi法老ê面前出去，遍行埃及全地。Iok-sek kìⁿ Ai-ki̍p ông Hoat-ló ê sî, hit-nî saⁿ-cha̍p hè. Iok-sek tùi Hoat-ló ê bīn-chêng chhut-khì, piàn kiâⁿ Ai-ki̍p choân-tōe.

47七個好年冬ê內面，地ê出產極其豐盛。Chhit-ê hó nî-tang ê lāi-bīn, tōe ê chhut-sán ke̍k-kî hong-sēng.

48約瑟聚集埃及地七個好年冬一切ê米糧；將米糧積聚tī ta̍k-ê城；周圍田地ê米糧，lóng積聚tī伊ê本城。Iok-sek chū-chi̍p Ai-ki̍p tōe chhit ê hó nî-tang it-chhè ê bí-niû; chiong bí-niû chek-chū tī ta̍k ê siâⁿ; chiu-ûi chhân-tōe ê bí-niû, lóng chek-chū tī i ê pún-siâⁿ.

49約瑟積聚五穀極chōe，親像海邊ê沙，到伊停止無算；因為算bōe了。Iok-sek chek-chū gō͘-kak ke̍k-chōe, chhin-chhiūⁿ hái-piⁿ ê soa, kàu i thêng-chí bô sǹg; in-ūi sǹg-bōe-liáu.

50飢荒ê年未到以前，An城ê祭司Pho-thê-hui-la̍h ê cha-bó͘-kiáⁿ A-se-la̍p kā約瑟生兩個kiáⁿ。Ki-hng ê nî bē-kàu í-chêng, An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p kā Iok-sek siⁿ nn̄g ê kiáⁿ.

51約瑟kā大kiáⁿ號名叫Má-ná-se；因為伊講，上帝hō͘我bōe記得我一切ê困苦，kap我ê老父ê全家。Iok-sek kā tōa kiáⁿ hō miâ kiò Má-ná-se; in-ūi i kóng, Siōng-tè hō͘ góa bōe-kì-tit góa it-chhè ê khùn-khó͘, kap góa ê lāu-pē ê choân-ke.

52伊kā第二kiáⁿ號名Í-hoat-liân；因為伊講，上帝hō͘我tī我受苦ê地方興旺。I kā tē-jī kiáⁿ hō miâ Í-hoat-liân; in-ūi i kóng, Siōng-tè hō͘ góa tī góa siū-khó͘ ê tōe-hng heng-ōng.

53埃及地七年好年冬已經圓，Ai-ki̍p tōe chhit-nî hó nî-tang í-keng oân,

54七年飢荒就來，tú-tú照約瑟所講ê；ta̍k國lóng有飢荒；獨獨埃及全地有米糧。chhit-nî ki-hng chiū lâi, tú-tú chiàu Iok-sek só͘ kóng-ê; ta̍k-kok lóng ū ki-hng; to̍k-to̍k Ai-ki̍p choân-tōe ū bí-niû.

55到埃及全地有飢荒，眾百姓對法老哀求米糧；法老對埃及ê眾人講，lín去chhē約瑟，凡若伊所講ê，lín lóng tio̍h做。Kàu Ai-ki̍p choân-tōe ū ki-hng, chèng peh-sìⁿ tùi Hoat-ló ai-kiû bí-niû; Hoat-ló tùi Ai-ki̍p ê chèng-lâng kóng, Lín khì chhē Iok-sek, hoān-nā i só͘ kóng-ê, lín lóng tio̍h chòe.

56當時飢荒遍滿天下；約瑟開ta̍k所在ê粟倉，thiò米糧hō͘埃及人；tī埃及地飢荒真傷重。Tng-sî ki-hng piàn-móa thiⁿ-ē; Iok-sek khui ta̍k só͘-chāi ê chhek-chhng, thiò bí-niû hō͘ Ai-ki̍p lâng; tī Ai-ki̍p tōe ki-hng chin siong-tiōng.

57ta̍k國ê人lóng去埃及，到約瑟hia tia̍h mí-niû；因為天下飢荒真傷重。Ta̍k-kok ê lâng lóng khì Ai-ki̍p, kàu Iok-sek hia tia̍h bí-niû; in-ūi thiⁿ-ē ki-hng chin siong-tiōng.

1雅各看見埃及有五穀，雅各就kā伊hiah-ê kiáⁿ講，Lín啥事teh相看。Ngá-kok khòaⁿ-kìⁿ Ai-ki̍p ū gō͘-kak, Ngá-kok chiū kā i hiah ê kiáⁿ kóng, Lín siáⁿ-sū teh saⁿ-khòaⁿ.

2Koh講，我聽見埃及有五穀，lín thang落去hia，為咱tia̍h淡薄，hō͘咱thang度活，免死。Koh kóng, Góa thiaⁿ-kìⁿ Ai-ki̍p ū gō͘-kak, lín thang lo̍h-khì hia, ūi lán tia̍h tām-po̍h, hō͘ lán thang tō͘-oa̍h, bián sí.

3Tùi án-ni，約瑟十個hiaⁿ lóng落埃及，去tia̍h米糧。Tùi án-ni Iok-sek cha̍p ê hiaⁿ lóng lo̍h Ai-ki̍p, khì tia̍h bí-niû.

4總是約瑟ê小弟便雅憫，雅各無差伊kap in兄相kap去；因為伊講，驚了伊tú-tio̍h害。Chóng-sī Iok-sek ê sió-tī Piān-ngá-bín, Ngá-kok bô chhe i kap in hiaⁿ saⁿ-kap khì; in-ūi i kóng, Kiaⁿ-liáu i tú-tio̍h hāi.

5來tia̍h米糧ê人ê中間，以色列hiah-ê kiáⁿ亦有來，因為迦南地亦有飢荒。Lâi tia̍h bí-niû ê lâng ê tiong-kan, Í-sek-lia̍t hiah ê kiáⁿ ia̍h ū lâi, in-ūi Ka-lâm tōe ia̍h ū ki-hng.

6當時治理埃及地ê是約瑟；thiò米糧hō͘ hit所在ê眾百姓ê，亦是伊；約瑟hiah-ê兄來，仆落地拜伊。Tng-sî tī-lí Ai-ki̍p tōe ê sī Iok-sek; thiò bí-niû hō͘ hit só͘-chāi ê chèng peh-sìⁿ-ê, ia̍h sī i; Iok-sek hiah ê hiaⁿ lâi, phak-lo̍h tōe pài i.

7約瑟看見伊hiah-ê兄，能認得，假做生份人，對in講khah嚴ê話，問in講，Lín tùi tah-lo̍h來？in講，Tùi迦南地來tia̍h米糧。Iok-sek khòaⁿ-kìⁿ i hiah ê hiaⁿ, ōe jīn-tit, ké-chòe siⁿ-hūn-lâng, tùi in kóng khah-giâm ê ōe, mn̄g in kóng, Lín tùi tah-lo̍h lâi? in kóng, Tùi Ka-lâm tōe lâi tia̍h bí-niû.

8約瑟能認得in兄，in bōe認得伊。Iok-sek ōe jīn-tit in hiaⁿ, in bōe jīn-tit i.

9約瑟記得前所夢論到in-ê hiah-ê 夢，就對in講，Lín是偵探，來探聽chit所在ê虛實。Iok-sek kì-tit chêng só͘ bāng lūn-kàu in ê hiah ê bāng, chiū tùi in kóng, Lín sī cheng-thàm, lâi thàm-thiaⁿ chit só͘-chāi ê hu-si̍t.

10In對伊講，阮ê主ah，m̄是，你ê奴僕來beh tia̍h米糧。In tùi i kóng, Goán ê chú ah, m̄-sī, lí ê lô͘-po̍k lâi beh tia̍h bí-niû.

11阮lóng是一人ê kiáⁿ，阮是老實人，你ê奴僕m̄是偵探。Goán lóng sī chi̍t-lâng ê kiáⁿ, goán sī láu-si̍t lâng, lí ê lô͘-po̍k m̄-sī cheng-thàm.

12約瑟kā in講，m̄是án-ni，lín來是beh探聽chit所在ê虛實。Iok-sek kā in kóng, M̄-sī án-ni, lín lâi sī beh thàm-thiaⁿ chit só͘-chāi ê hu-si̍t.

13In講，你ê奴僕十二個兄弟，是迦南地一個人ê kiáⁿ；第一細ê，現今tī阮老父hia；有一個無去lah。In kóng, Lí ê lô͘-po̍k cha̍p-jī ê hiaⁿ-tī, sī Ka-lâm tōe chi̍t ê lâng ê kiáⁿ; tē-it-sòe-ê, hiān-kim tī goán lāu-pē hia; ū chi̍t-ê bô-khì lah.

14約瑟kā in講，我tú-á講lín是偵探，chit-ê話實在無錯。Iok-sek kā in kóng, Góa tú-á kóng lín sī cheng-thàm, chit ê ōe si̍t-chāi bô chhò.

15我kí法老ê性命來chiù-chōa，若lín soah尾ê小弟無到chia，lín bōe得thang出chit所在；用án-ni來試驗lín ê虛實。Góa kí Hoat-ló ê sìⁿ-miā lâi chiù-chōa, nā lín soah-bé ê sió-tī bô kàu chia, lín bōe-tit-thang chhut chit só͘-chāi; ēng án-ni lâi chhì-giām lín ê hu-si̍t.

16Tio̍h差lín中間一人去chhōa lín ê小弟來，lín chiah-ê lóng tio̍h關tī-chia，證明lín ê話，知lín誠實á無；若無，我kí法老ê性命來chiù-chōa，lín一定是偵探。Tio̍h chhe lín tiong-kan chi̍t-lâng khì chhōa lín ê sió-tī lâi, lín chiah-ê lóng tio̍h koaiⁿ tī-chia, chèng-bêng lín ê ōe, chai lín sêng-si̍t á-bô; nā bô, góa kí Hoat-ló ê sìⁿ-miā lâi chiù-chōa, lín it-tēng sī cheng-thàm.

17Tùi án-ni，約瑟將in lóng關tī 監裡三日。Tùi án-ni Iok-sek chiong in lóng koaiⁿ tī Kaⁿ-ni̍h saⁿ-ji̍t.

18到第三日約瑟對in講，我敬畏上帝；lín照我ê話行，就會活。Kàu tē-saⁿ ji̍t Iok-sek tùi in kóng, Góa kèng-ùi Siōng-tè; lín chiàu góa ê ōe kiâⁿ, chiū ōe oa̍h.

19Lín若果然是老實人，lín兄弟中thang留一個縛tī lín hit監內；總是lín thang帶米糧tò去，救lín家內ê飢荒，Lín nā kó-jiân sī láu-si̍t lâng, lín hiaⁿ-tī-tiong thang lâu chi̍t-ê pa̍k tī lín hit kaⁿ-lāi; chóng-sī lín thang tòa bí-niû tò-khì, kiù lín ke-lāi ê ki-hng,

20將lín soah尾小弟chhōa來我chia；án-ni lín ê話就有憑據，lín也m̄免死。In就照án-ni行。chiong lín soah-bé sió-tī chhōa lâi góa chia; án-ni lín ê ōe chiū ū pîn-kù, lín iā m̄-bián sí. In chiū chiàu án-ni kiâⁿ.

21In相kap講，咱對tī咱ê小弟實在有罪，伊哀求咱ê時，咱看見伊心內ê艱苦，也m̄肯聽伊；所以chit場ê苦難到tī咱。In saⁿ-kap kóng, Lán tùi tī lán ê sió-tī si̍t-chāi ū chōe, i ai-kiû lán ê sî, lán khòaⁿ-kìⁿ i sim-lāi ê kan-khó͘, iā m̄-khéng thiaⁿ i; só͘-í chit-tiûⁿ ê khó͘-lān kàu tī lán.

22Liû-piān應in講，我kiám m̄是對lín講，m̄-thang害hit-ê gín-á來取罪，獨獨lín m̄聽？所以流伊ê血ê罪，對咱chiah-ê討。Liû-piān ìn in kóng, Góa kiám m̄-sī tùi lín kóng, m̄-thang hāi hit ê gín-á lâi chhú-chōe, to̍k-to̍k lín m̄-thiaⁿ? só͘-í lâu i ê huih ê chōe, tùi lán chiah-ê thó.

23In m̄知約瑟聽能曉得；因為tī in中間有用翻譯官。In m̄-chai Iok-sek thiaⁿ ōe hiáu-tit; in-ūi tī in tiong-kan ū ēng hoan-e̍k-koaⁿ.

24約瑟oa̍t-tńg身流目屎；koh oa̍t來kap in講話；就tī in中間取西門出來，tī in ê面前kā伊縛teh。Iok-sek oa̍t-tńg-sin lâu ba̍k-sái; koh oa̍t-lâi kap in kóng-ōe; chiū tī in tiong-kan chhú Se-biān chhut-lâi, tī in ê bīn-chêng kā i pa̍k-teh.

25約瑟吩咐人將五穀入tī in ê器具到滿滿，也將in ta̍k人ê銀hē tī in ê布袋內，來還in，koh用路裡ê食物hō͘ in；人就照án-ni來kā in做。Iok-sek hoan-hù lâng chiong gō͘-kak ji̍p tī in ê khì-kū kàu móa-móa, iā chiong in ta̍k-lâng ê gûn hē tī in ê pò͘-tē-lāi, lâi hêng in, koh ēng lō͘-ni̍h ê chia̍h-mi̍h hō͘ in; lâng chiū chiàu án-ni lâi kā in chòe.

26In就將五穀hō͘ in ê驢載，就離開hia去。In chiū chiong gō͘-kak hō͘ in ê lû chài, chiū lī-khui hia khì.

27到歇暝ê所在，in中間有一人tháu開伊ê布袋，beh the̍h hō͘驢食，chiah看見伊ê銀猶原tī-teh，hē tī布袋口。Kàu hioh-mî ê só͘-chāi, in tiong-kan ū chi̍t-lâng tháu-khui i ê pò͘-tē, beh the̍h hō͘ lû chia̍h, chiah khòaⁿ-kìⁿ i ê gûn iû-goân tī-teh, hē tī pò͘-tē-kháu.

28就kā伊ê兄弟講，我ê銀還倒tńg，你看，猶原tī我ê布袋內；in就驚到無心肝，ngia̍uh-ngia̍uh-chhoah，相kap講，上帝án-ni款待咱是甚麼？Chiū kā i ê hiaⁿ-tī kóng, Góa ê gûn hêng tò-tńg, lí khòaⁿ, iû-goân tī góa ê pò͘-tē-lāi; in chiū kiaⁿ kàu bô sim-koaⁿ, ngia̍uh-ngia̍uh-chhoah, saⁿ-kap kóng, Siōng-tè án-ni khoán-thāi lán sī sím-mi̍h?

29In到迦南地，到in老父雅各hia，將所tú-tio̍h ê事lóng kā伊講，講，In kàu Ka-lâm tōe, kàu in lāu-pē Ngá-kok hia, chiong só͘ tú-tio̍h ê sū lóng kā i kóng, kóng,

30Hit人，就是hit所在ê主，對阮講真嚴ê話，掠阮做hit所在ê偵探。Hit-lâng, chiū-sī hit só͘-chāi ê chú, tùi goán kóng chin giâm ê ōe, lia̍h goán chòe hit só͘-chāi ê cheng-thàm.

31阮kā伊講，阮是老實人，阮m̄是偵探，Goán kā i kóng, Goán sī láu-si̍t lâng, goán m̄-sī cheng-thàm,

32阮是十二個兄弟，是阮老父ê kiáⁿ；有一個無去，第一細ê現今kap阮老父tī迦南地。goán sī cha̍p-jī ê hiaⁿ-tī, sī goán lāu-pē ê kiáⁿ; ū chi̍t-ê bô-khì, tē-it-sòe-ê hiān-kim kap goán lāu-pē tī Ka-lâm tōe.

33Hit人，就是hit所在ê主，kā阮講，若ài hō͘我知lín是老實人，lín兄弟中thang留一個tī我chia，lín chiah-ê thang帶五穀tò去，救lín家內ê飢荒；Hit-lâng, chiū-sī hit só͘-chāi ê chú, kā goán kóng, Nā ài hō͘ góa chai lín sī láu-si̍t lâng, lín hiaⁿ-tī-tiong thang lâu chi̍t-ê tī góa chia, lín chiah-ê thang tòa gō͘-kak tò-khì, kiù lín ke-lāi ê ki-hng;

34chhōa lín soah尾ê小弟來我chia，我就知lín m̄是偵探，是老實人；án-ni我就將lín ê兄弟交hō͘ lín，lín也thang tī chit所在買賣。chhōa lín soah-bé ê sió-tī lâi góa chia, góa chiū chai lín m̄-sī cheng-thàm, sī láu-si̍t lâng; án-ni góa chiū chiong lín ê hiaⁿ-tī kau hō͘ lín, lín iā thang tī chit só͘-chāi bóe-bōe.

35後來in piàⁿ in ê布袋，無phah算，in ta̍k人ê銀包lóng tī in ê布袋內；in kap in老父看見銀包就lóng驚惶。Āu-lâi in piàⁿ in ê pò͘-tē, bô phah-sǹg, in ta̍k-lâng ê gûn-pau lóng tī in ê pò͘-tē-lāi; in kap in lāu-pē khòaⁿ-kìⁿ gûn-pau chiū lóng kiaⁿ-hiâⁿ.

36In ê老父雅各kā in講，Lín hō͘我失落我ê kiáⁿ；約瑟無去，西門也無去，lín koh beh chhōa便雅憫去；chiah-ê tāi-chì lóng是害tio̍h我。In ê lāu-pē Ngá-kok kā in kóng, Lín hō͘ góa sit-lo̍h góa ê kiáⁿ; Iok-sek bô-khì, Se-biān iā bô-khì, lín koh beh chhōa Piān-ngá-bín khì; chiah ê tāi-chì lóng sī hāi-tio̍h góa.

37Liû-piān kā伊ê老父講，我若無chhōa伊tò來交你，你thang thâi我兩個kiáⁿ；做你thang將伊交代我，我的確chhōa伊tò來交你。Liû-piān kā i ê lāu-pē kóng, Góa nā bô chhōa i tò-lâi kau lí, lí thang thâi góa nn̄g ê kiáⁿ; chòe lí thang chiong i kau-tài góa, góa tek-khak chhōa i tò-lâi kau lí.

38雅各講，我ê kiáⁿ我無beh hō͘伊kap lín去；伊ê兄已經死，只有chhun伊；伊若tī lín所行ê路tú-tio̍h陷害，he！就是lín hō͘我白頭毛悽慘落陰府。Ngá-kok kóng, Góa ê kiáⁿ góa bô beh hō͘ i kap lín khì; i ê hiaⁿ í-keng sí, chí-ū chhun i; i nā tī lín só͘ kiâⁿ ê lō͘ tú-tio̍h hām-hāi, he! chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.