1雅各看見埃及有五穀，雅各就kā伊hiah-ê kiáⁿ講，Lín啥事teh相看。Ngá-kok khòaⁿ-kìⁿ Ai-ki̍p ū gō͘-kak, Ngá-kok chiū kā i hiah ê kiáⁿ kóng, Lín siáⁿ-sū teh saⁿ-khòaⁿ.

2Koh講，我聽見埃及有五穀，lín thang落去hia，為咱tia̍h淡薄，hō͘咱thang度活，免死。Koh kóng, Góa thiaⁿ-kìⁿ Ai-ki̍p ū gō͘-kak, lín thang lo̍h-khì hia, ūi lán tia̍h tām-po̍h, hō͘ lán thang tō͘-oa̍h, bián sí.

3Tùi án-ni，約瑟十個hiaⁿ lóng落埃及，去tia̍h米糧。Tùi án-ni Iok-sek cha̍p ê hiaⁿ lóng lo̍h Ai-ki̍p, khì tia̍h bí-niû.

4總是約瑟ê小弟便雅憫，雅各無差伊kap in兄相kap去；因為伊講，驚了伊tú-tio̍h害。Chóng-sī Iok-sek ê sió-tī Piān-ngá-bín, Ngá-kok bô chhe i kap in hiaⁿ saⁿ-kap khì; in-ūi i kóng, Kiaⁿ-liáu i tú-tio̍h hāi.

5來tia̍h米糧ê人ê中間，以色列hiah-ê kiáⁿ亦有來，因為迦南地亦有飢荒。Lâi tia̍h bí-niû ê lâng ê tiong-kan, Í-sek-lia̍t hiah ê kiáⁿ ia̍h ū lâi, in-ūi Ka-lâm tōe ia̍h ū ki-hng.

6當時治理埃及地ê是約瑟；thiò米糧hō͘ hit所在ê眾百姓ê，亦是伊；約瑟hiah-ê兄來，仆落地拜伊。Tng-sî tī-lí Ai-ki̍p tōe ê sī Iok-sek; thiò bí-niû hō͘ hit só͘-chāi ê chèng peh-sìⁿ-ê, ia̍h sī i; Iok-sek hiah ê hiaⁿ lâi, phak-lo̍h tōe pài i.

7約瑟看見伊hiah-ê兄，能認得，假做生份人，對in講khah嚴ê話，問in講，Lín tùi tah-lo̍h來？in講，Tùi迦南地來tia̍h米糧。Iok-sek khòaⁿ-kìⁿ i hiah ê hiaⁿ, ōe jīn-tit, ké-chòe siⁿ-hūn-lâng, tùi in kóng khah-giâm ê ōe, mn̄g in kóng, Lín tùi tah-lo̍h lâi? in kóng, Tùi Ka-lâm tōe lâi tia̍h bí-niû.

8約瑟能認得in兄，in bōe認得伊。Iok-sek ōe jīn-tit in hiaⁿ, in bōe jīn-tit i.

9約瑟記得前所夢論到in-ê hiah-ê 夢，就對in講，Lín是偵探，來探聽chit所在ê虛實。Iok-sek kì-tit chêng só͘ bāng lūn-kàu in ê hiah ê bāng, chiū tùi in kóng, Lín sī cheng-thàm, lâi thàm-thiaⁿ chit só͘-chāi ê hu-si̍t.

10In對伊講，阮ê主ah，m̄是，你ê奴僕來beh tia̍h米糧。In tùi i kóng, Goán ê chú ah, m̄-sī, lí ê lô͘-po̍k lâi beh tia̍h bí-niû.

11阮lóng是一人ê kiáⁿ，阮是老實人，你ê奴僕m̄是偵探。Goán lóng sī chi̍t-lâng ê kiáⁿ, goán sī láu-si̍t lâng, lí ê lô͘-po̍k m̄-sī cheng-thàm.

12約瑟kā in講，m̄是án-ni，lín來是beh探聽chit所在ê虛實。Iok-sek kā in kóng, M̄-sī án-ni, lín lâi sī beh thàm-thiaⁿ chit só͘-chāi ê hu-si̍t.

13In講，你ê奴僕十二個兄弟，是迦南地一個人ê kiáⁿ；第一細ê，現今tī阮老父hia；有一個無去lah。In kóng, Lí ê lô͘-po̍k cha̍p-jī ê hiaⁿ-tī, sī Ka-lâm tōe chi̍t ê lâng ê kiáⁿ; tē-it-sòe-ê, hiān-kim tī goán lāu-pē hia; ū chi̍t-ê bô-khì lah.

14約瑟kā in講，我tú-á講lín是偵探，chit-ê話實在無錯。Iok-sek kā in kóng, Góa tú-á kóng lín sī cheng-thàm, chit ê ōe si̍t-chāi bô chhò.

15我kí法老ê性命來chiù-chōa，若lín soah尾ê小弟無到chia，lín bōe得thang出chit所在；用án-ni來試驗lín ê虛實。Góa kí Hoat-ló ê sìⁿ-miā lâi chiù-chōa, nā lín soah-bé ê sió-tī bô kàu chia, lín bōe-tit-thang chhut chit só͘-chāi; ēng án-ni lâi chhì-giām lín ê hu-si̍t.

16Tio̍h差lín中間一人去chhōa lín ê小弟來，lín chiah-ê lóng tio̍h關tī-chia，證明lín ê話，知lín誠實á無；若無，我kí法老ê性命來chiù-chōa，lín一定是偵探。Tio̍h chhe lín tiong-kan chi̍t-lâng khì chhōa lín ê sió-tī lâi, lín chiah-ê lóng tio̍h koaiⁿ tī-chia, chèng-bêng lín ê ōe, chai lín sêng-si̍t á-bô; nā bô, góa kí Hoat-ló ê sìⁿ-miā lâi chiù-chōa, lín it-tēng sī cheng-thàm.

17Tùi án-ni，約瑟將in lóng關tī 監裡三日。Tùi án-ni Iok-sek chiong in lóng koaiⁿ tī Kaⁿ-ni̍h saⁿ-ji̍t.

18到第三日約瑟對in講，我敬畏上帝；lín照我ê話行，就會活。Kàu tē-saⁿ ji̍t Iok-sek tùi in kóng, Góa kèng-ùi Siōng-tè; lín chiàu góa ê ōe kiâⁿ, chiū ōe oa̍h.

19Lín若果然是老實人，lín兄弟中thang留一個縛tī lín hit監內；總是lín thang帶米糧tò去，救lín家內ê飢荒，Lín nā kó-jiân sī láu-si̍t lâng, lín hiaⁿ-tī-tiong thang lâu chi̍t-ê pa̍k tī lín hit kaⁿ-lāi; chóng-sī lín thang tòa bí-niû tò-khì, kiù lín ke-lāi ê ki-hng,

20將lín soah尾小弟chhōa來我chia；án-ni lín ê話就有憑據，lín也m̄免死。In就照án-ni行。chiong lín soah-bé sió-tī chhōa lâi góa chia; án-ni lín ê ōe chiū ū pîn-kù, lín iā m̄-bián sí. In chiū chiàu án-ni kiâⁿ.

21In相kap講，咱對tī咱ê小弟實在有罪，伊哀求咱ê時，咱看見伊心內ê艱苦，也m̄肯聽伊；所以chit場ê苦難到tī咱。In saⁿ-kap kóng, Lán tùi tī lán ê sió-tī si̍t-chāi ū chōe, i ai-kiû lán ê sî, lán khòaⁿ-kìⁿ i sim-lāi ê kan-khó͘, iā m̄-khéng thiaⁿ i; só͘-í chit-tiûⁿ ê khó͘-lān kàu tī lán.

22Liû-piān應in講，我kiám m̄是對lín講，m̄-thang害hit-ê gín-á來取罪，獨獨lín m̄聽？所以流伊ê血ê罪，對咱chiah-ê討。Liû-piān ìn in kóng, Góa kiám m̄-sī tùi lín kóng, m̄-thang hāi hit ê gín-á lâi chhú-chōe, to̍k-to̍k lín m̄-thiaⁿ? só͘-í lâu i ê huih ê chōe, tùi lán chiah-ê thó.

23In m̄知約瑟聽能曉得；因為tī in中間有用翻譯官。In m̄-chai Iok-sek thiaⁿ ōe hiáu-tit; in-ūi tī in tiong-kan ū ēng hoan-e̍k-koaⁿ.

24約瑟oa̍t-tńg身流目屎；koh oa̍t來kap in講話；就tī in中間取西門出來，tī in ê面前kā伊縛teh。Iok-sek oa̍t-tńg-sin lâu ba̍k-sái; koh oa̍t-lâi kap in kóng-ōe; chiū tī in tiong-kan chhú Se-biān chhut-lâi, tī in ê bīn-chêng kā i pa̍k-teh.

25約瑟吩咐人將五穀入tī in ê器具到滿滿，也將in ta̍k人ê銀hē tī in ê布袋內，來還in，koh用路裡ê食物hō͘ in；人就照án-ni來kā in做。Iok-sek hoan-hù lâng chiong gō͘-kak ji̍p tī in ê khì-kū kàu móa-móa, iā chiong in ta̍k-lâng ê gûn hē tī in ê pò͘-tē-lāi, lâi hêng in, koh ēng lō͘-ni̍h ê chia̍h-mi̍h hō͘ in; lâng chiū chiàu án-ni lâi kā in chòe.

26In就將五穀hō͘ in ê驢載，就離開hia去。In chiū chiong gō͘-kak hō͘ in ê lû chài, chiū lī-khui hia khì.

27到歇暝ê所在，in中間有一人tháu開伊ê布袋，beh the̍h hō͘驢食，chiah看見伊ê銀猶原tī-teh，hē tī布袋口。Kàu hioh-mî ê só͘-chāi, in tiong-kan ū chi̍t-lâng tháu-khui i ê pò͘-tē, beh the̍h hō͘ lû chia̍h, chiah khòaⁿ-kìⁿ i ê gûn iû-goân tī-teh, hē tī pò͘-tē-kháu.

28就kā伊ê兄弟講，我ê銀還倒tńg，你看，猶原tī我ê布袋內；in就驚到無心肝，ngia̍uh-ngia̍uh-chhoah，相kap講，上帝án-ni款待咱是甚麼？Chiū kā i ê hiaⁿ-tī kóng, Góa ê gûn hêng tò-tńg, lí khòaⁿ, iû-goân tī góa ê pò͘-tē-lāi; in chiū kiaⁿ kàu bô sim-koaⁿ, ngia̍uh-ngia̍uh-chhoah, saⁿ-kap kóng, Siōng-tè án-ni khoán-thāi lán sī sím-mi̍h?

29In到迦南地，到in老父雅各hia，將所tú-tio̍h ê事lóng kā伊講，講，In kàu Ka-lâm tōe, kàu in lāu-pē Ngá-kok hia, chiong só͘ tú-tio̍h ê sū lóng kā i kóng, kóng,

30Hit人，就是hit所在ê主，對阮講真嚴ê話，掠阮做hit所在ê偵探。Hit-lâng, chiū-sī hit só͘-chāi ê chú, tùi goán kóng chin giâm ê ōe, lia̍h goán chòe hit só͘-chāi ê cheng-thàm.

31阮kā伊講，阮是老實人，阮m̄是偵探，Goán kā i kóng, Goán sī láu-si̍t lâng, goán m̄-sī cheng-thàm,

32阮是十二個兄弟，是阮老父ê kiáⁿ；有一個無去，第一細ê現今kap阮老父tī迦南地。goán sī cha̍p-jī ê hiaⁿ-tī, sī goán lāu-pē ê kiáⁿ; ū chi̍t-ê bô-khì, tē-it-sòe-ê hiān-kim kap goán lāu-pē tī Ka-lâm tōe.

33Hit人，就是hit所在ê主，kā阮講，若ài hō͘我知lín是老實人，lín兄弟中thang留一個tī我chia，lín chiah-ê thang帶五穀tò去，救lín家內ê飢荒；Hit-lâng, chiū-sī hit só͘-chāi ê chú, kā goán kóng, Nā ài hō͘ góa chai lín sī láu-si̍t lâng, lín hiaⁿ-tī-tiong thang lâu chi̍t-ê tī góa chia, lín chiah-ê thang tòa gō͘-kak tò-khì, kiù lín ke-lāi ê ki-hng;

34chhōa lín soah尾ê小弟來我chia，我就知lín m̄是偵探，是老實人；án-ni我就將lín ê兄弟交hō͘ lín，lín也thang tī chit所在買賣。chhōa lín soah-bé ê sió-tī lâi góa chia, góa chiū chai lín m̄-sī cheng-thàm, sī láu-si̍t lâng; án-ni góa chiū chiong lín ê hiaⁿ-tī kau hō͘ lín, lín iā thang tī chit só͘-chāi bóe-bōe.

35後來in piàⁿ in ê布袋，無phah算，in ta̍k人ê銀包lóng tī in ê布袋內；in kap in老父看見銀包就lóng驚惶。Āu-lâi in piàⁿ in ê pò͘-tē, bô phah-sǹg, in ta̍k-lâng ê gûn-pau lóng tī in ê pò͘-tē-lāi; in kap in lāu-pē khòaⁿ-kìⁿ gûn-pau chiū lóng kiaⁿ-hiâⁿ.

36In ê老父雅各kā in講，Lín hō͘我失落我ê kiáⁿ；約瑟無去，西門也無去，lín koh beh chhōa便雅憫去；chiah-ê tāi-chì lóng是害tio̍h我。In ê lāu-pē Ngá-kok kā in kóng, Lín hō͘ góa sit-lo̍h góa ê kiáⁿ; Iok-sek bô-khì, Se-biān iā bô-khì, lín koh beh chhōa Piān-ngá-bín khì; chiah ê tāi-chì lóng sī hāi-tio̍h góa.

37Liû-piān kā伊ê老父講，我若無chhōa伊tò來交你，你thang thâi我兩個kiáⁿ；做你thang將伊交代我，我的確chhōa伊tò來交你。Liû-piān kā i ê lāu-pē kóng, Góa nā bô chhōa i tò-lâi kau lí, lí thang thâi góa nn̄g ê kiáⁿ; chòe lí thang chiong i kau-tài góa, góa tek-khak chhōa i tò-lâi kau lí.

38雅各講，我ê kiáⁿ我無beh hō͘伊kap lín去；伊ê兄已經死，只有chhun伊；伊若tī lín所行ê路tú-tio̍h陷害，he！就是lín hō͘我白頭毛悽慘落陰府。Ngá-kok kóng, Góa ê kiáⁿ góa bô beh hō͘ i kap lín khì; i ê hiaⁿ í-keng sí, chí-ū chhun i; i nā tī lín só͘ kiâⁿ ê lō͘ tú-tio̍h hām-hāi, he! chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.

1Hit所在飢荒真大。Hit só͘-chāi ki-hng chin-tōa.

2In tùi埃及帶來ê五穀已經食了，in老父kā in講，Lín koh去kā咱tia̍h淡薄米糧來。In tùi Ai-ki̍p tòa-lâi ê gō͘-kak í-keng chia̍h-liáu, in lāu-pē kā in kóng, Lín koh khì kā lán tia̍h tām-po̍h bí-niû lâi.

3猶大應伊講，Hit人切切吩咐阮講，Lín小弟若無kap lín相kap來，lín就bōe得tio̍h見我ê面。Iû-tāi ìn i kóng, Hit-lâng chhiat-chhiat hoan-hù goán kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn.

4你（Lín）若差阮小弟kap阮相kap去，阮就落去，kā你tia̍h米糧。Lí(Lín) nā chhe goán sió-tī kap goán saⁿ-kap khì, goán chiū lo̍h-khì, kā lí tia̍h bí-niû.

5你若m̄差伊去，阮就m̄落去；因為hit人kā阮講，Lín小弟若無kap lín相kap來，lín就bōe得tio̍h見我ê面。Lí nā m̄ chhe i khì, goán chiū m̄ lo̍h-khì; in-ūi hit-lâng kā goán kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn.

6以色列講，Lín啥事án-ni害我，kā hit人講lín iáu有小弟ah？Í-sek-lia̍t kóng, Lín siáⁿ-sū án-ni hāi góa, kā hit-lâng kóng lín iáu ū sió-tī ah?

7In應講，Hit人致意問阮kap阮親族ê tāi-chì講，Lín老父iáu tī-teh無？lín iáu有兄弟無？阮照伊所問ê kā伊講；阮thái-thó會知伊beh講，Tio̍h帶lín小弟落來？In ìn kóng, Hit-lâng tì-ì mn̄g goán kap goán chhin-cho̍k ê tāi-chì kóng, Lín lāu-pē iáu tī-teh bô? lín iáu ū hiaⁿ-tī bô? goán chiàu i só͘ mn̄g-ê kā i kóng; goán thái-thó ōe chai i beh kóng, Tio̍h tòa lín sió-tī lo̍h-lâi?

8猶大koh kā伊ê老父以色列講，你差gín-á kap我去，阮就起身去，thang hō͘阮kap你，以及阮ê gín-á，得tio̍h活，免死。Iû-tāi koh kā i ê lāu-pē Í-sek-lia̍t kóng, Lí chhe gín-á kap góa khì, goán chiū khí-sin khì, thang hō͘ goán kap lí, í-ki̍p goán ê gín-á, tit-tio̍h oa̍h, bián sí.

9我kā伊保，你thang對我討；我若無chhōa伊tò來，khiā tī你ê面前，我願一生擔當罪。Góa kā i pó, lí thang tùi góa thó; góa nā bô chhōa i tò-lâi, khiā tī lí ê bīn-chêng, góa goān it-seng tam-tng chōe.

10咱若m̄是有延chhiân，已經第二pái tò來lah。Lán nā m̄-sī ū iân-chhiân, í-keng tē-jī-pái tò-lâi lah.

11In老父以色列對in講，若是án-ni，lín就tio̍h án-ni做；thang取chit所在第一好ê土產，乳香淡薄，蜂蜜淡薄，以及香料、沒藥、榧子、杏仁，lóng收tī器具內；帶去送hit人。In lāu-pē Í-sek-lia̍t tùi in kóng, Nā sī án-ni, lín chiū tio̍h án-ni chòe; thang chhú chit só͘-chāi tē-it hó ê thó͘-sán, jú-hiuⁿ tām-po̍h, phang-bi̍t tām-po̍h, í-ki̍p hiuⁿ-liāu, bu̍t-io̍h, húi-chí, hēng-jîn, lóng siu tī khì-kū lāi; tòa-khì sàng hit-lâng.

12Koh tio̍h帶銀重倍，亦tio̍h將lín布袋口，伊還lín ê銀，帶倒tńg去hō͘伊；hit-ê kiám-chhái是失錯；Koh tio̍h tòa gûn têng-pē, ia̍h tio̍h chiong lín pò͘-tē-kháu, i hêng lín ê gûn, tòa tò-tńg khì hō͘-i; hit-ê kiám-chhái sī sit-chhò;

13亦chhōa lín小弟起身，去koh見hit人。ia̍h chhōa lín sió-tī khí-sin, khì koh kìⁿ hit-lâng.

14獨獨願全能ê上帝hō͘ lín tī hit人ê面前得tio̍h憐憫；將lín hit-ê兄弟kap便雅憫交lín；我若失落我ê kiáⁿ，亦tio̍h hō͘伊失落就是。To̍k-to̍k goān choân-lêng ê Siōng-tè hō͘ lín tī hit-lâng ê bīn-chêng tit-tio̍h lîn-bín; chiong lín hit ê hiaⁿ-tī kap Piān-ngá-bín kau lín; góa nā sit-lo̍h góa ê kiáⁿ, ia̍h tio̍h hō͘ i sit-lo̍h chiū-sī.

15Tùi hit-tia̍p，in帶hiah-ê禮物，亦帶銀重倍，koh chhōa便雅憫，起身落去埃及；khiā tī約瑟ê面前。Tùi hit-tia̍p in tòa hiah ê lé-mi̍h, ia̍h tòa gûn têng-pē, koh chhōa Piān-ngá-bín, khí-sin lo̍h-khì Ai-ki̍p; khiā tī Iok-sek ê bīn-chêng.

16約瑟看見便雅憫kap in相kap來，就對管家ê講，Chhōa chiah-ê人去厝內，thâi cheng-siⁿ，備辦筵席；因為日晝，chiah-ê人beh kap我相kap食。Iok-sek khòaⁿ-kìⁿ Piān-ngá-bín kap in saⁿ-kap lâi, chiū tùi koán-ke-ê kóng, Chhōa chiah ê lâng khì chhù-lāi, thâi cheng-siⁿ, pī-pān iân-sia̍h; in-ūi ji̍t-tàu, chiah ê lâng beh kap góa saⁿ-kap chia̍h.

17Hit人就照約瑟ê話去行；chhōa in hiah-ê人入約瑟ê厝。Hit-lâng chiū chiàu Iok-sek ê ōe khì kiâⁿ; chhōa in hiah ê lâng ji̍p Iok-sek ê chhù.

18Hiah-ê人，因為hō͘伊chhōa到約瑟ê厝，就驚惶；講，Chhōa咱到chia，的確是因為頭一pái還咱tī布袋內ê銀，beh chhē咱ê孔縫，下手害咱，強強掠咱做奴僕，搶咱ê驢。Hiah ê lâng, in-ūi hō͘ i chhōa kàu Iok-sek ê chhù, chiū kiaⁿ-hiâⁿ; kóng, Chhōa lán kàu chia, tek-khak sī in-ūi thâu-chi̍t-pái hêng lán tī pò͘-tē-lāi ê gûn, beh chhē lán ê khang-phāng, hē chhiú hāi lán, kiông-kiông lia̍h lán chòe lô͘-po̍k, chhiúⁿ lán ê lû.

19In就óa近約瑟ê管家ê，tī厝門口kap伊講話，In chiū óa-kūn Iok-sek ê koán-ke-ê, tī chhù-mn̂g-kháu kap i kóng-ōe,

20講，我ê主ah，阮頭pái落來，實在是beh tia̍h米糧；kóng, Góa ê chú ah, goán thâu-pái lo̍h-lâi, si̍t-chāi sī beh tia̍h bí-niû;

21後來到歇暝ê所在，開阮ê布袋，無phah算，阮ta̍k人ê銀足數猶原tī ta̍k人ê布袋口；taⁿ阮有koh帶來；阮另外有koh帶銀beh來tia̍h米糧；āu-lâi kàu hioh-mî ê só͘-chāi, khui goán ê pò͘-tē, bô phah-sǹg, goán ta̍k-lâng ê gûn chiok-sò͘ iû-goân tī ta̍k-lâng ê pò͘-tē-kháu; taⁿ goán ū koh tòa-lâi; goán lēng-gōa ū koh tòa gûn beh lâi tia̍h bí-niû;

22阮m̄知是誰將阮ê銀hē tī阮ê布袋內。goán m̄-chai chī-chūi chiong goán ê gûn hē tī goán ê pò͘-tē-lāi.

23管家ê講，做lín安心，免驚；是lín ê上帝，kap lín老父ê上帝，賞賜lín財寶tī lín ê布袋內；lín ê銀我已經收了。就chhōa西門出來hō͘ in。Koán-ke-ê kóng, Chòe lín an-sim, bián kiaⁿ; sī lín ê Siōng-tè, kap lín lāu-pē ê Siōng-tè, siúⁿ-sù lín châi-pó tī lín ê pò͘-tē-lāi; lín ê gûn góa í-keng siu-liáu. Chiū chhōa Se-biān chhut-lâi hō͘ in.

24Hit人就chhōa hiah-ê人入約瑟ê厝，捧水hō͘ in，in就洗腳；koh the̍h草料飼in ê驢。Hit-lâng chiū chhōa hiah ê lâng ji̍p Iok-sek ê chhù, phâng chúi hō͘ in, in chiū sóe kha; koh the̍h chháu-liāu chhī in ê lû.

25In就備辦hiah-ê禮物，thèng候約瑟日晝tò來；因為in聽見beh tī-hia食。In chiū pī-pān hiah ê lé-mi̍h, thèng-hāu Iok-sek ji̍t-tàu tò-lâi; in-ūi in thiaⁿ-kìⁿ beh tī-hia chia̍h.

26約瑟tò來到厝，in就將所帶來ê禮物the̍h入厝送伊；koh仆tī地裡拜伊。Iok-sek tò-lâi kàu chhù, in chiū chiong só͘ tòa-lâi ê lé-mi̍h the̍h ji̍p chhù sàng-i; koh phak tī tōe-ni̍h pài i.

27約瑟問in平安；koh講，Lín ê老父，就是lín所講hit-ê老人，平安mah？伊iáu tī-teh mah？Iok-sek mn̄g in pêng-an; koh kóng, Lín ê lāu-pē, chiū-sī lín só͘ kóng hit ê lāu-lâng, pêng-an mah? i iáu tī-teh mah?

28In應講，你ê奴僕，阮ê老父，平安，伊iáu tī-teh；in就àⁿ頭拜伊。In ìn kóng, Lí ê lô͘-po̍k, goán ê lāu-pē, pêng-an, i iáu tī-teh; in chiū àⁿ-thâu pài i.

29約瑟kia̍h目看見伊同母ê小弟，便雅憫；就講，你所kā我講soah尾小弟，是chit-ê mah？Koh講，細kiáⁿ，願上帝施恩hō͘你。Iok-sek kia̍h-ba̍k khòaⁿ-kìⁿ i tâng-bú ê sió-tī, Piān-ngá-bín; chiū kóng, Lí só͘ kā góa kóng soah-bé sió-tī, sī chit-ê mah? Koh kóng, Sòe-kiáⁿ, goān Siōng-tè si-un hō͘ lí.

30約瑟疼小弟ê情大受激動；就趕緊chhē一位thang啼哭；入伊ê房間啼哭；Iok-sek thiàⁿ sió-tī ê chêng tōa siū kek-tōng; chiū kóaⁿ-kín chhē chi̍t-ūi thang thî-khàu; ji̍p i ê pâng-keng thî-khàu;

31後來洗面出來，勉強忍teh；吩咐開桌。āu-lâi sóe-bīn chhut-lâi, bián-kióng lún-teh; hoan-hù khui-toh.

32In就為約瑟另外排一塊桌，為hiah-ê人koh排一塊，亦為kap約瑟相kap食ê埃及人另外排一塊；因為埃及人bōe-thang kap希伯來人相kap食，這是埃及人所厭惡。In chiū ūi Iok-sek lēng-gōa pâi chi̍t tè toh, ūi hiah ê lâng koh pâi chi̍t tè, ia̍h ūi kap Iok-sek saⁿ-kap chia̍h ê Ai-ki̍p lâng lēng-gōa pâi chi̍t-tè; in-ūi Ai-ki̍p lâng bōe thang kap Hi-pek-lâi lâng saⁿ-kap chia̍h, che sī Ai-ki̍p lâng só͘ iàm-ò͘ⁿ.

33Hiah-ê人坐tī伊ê面前，大細照in年歲ê次序；hiah-ê人大家gông-ngia̍h。Hiah ê lâng chē tī i ê bīn-chêng, tōa-sòe chiàu in nî-hè ê chhù-sū; hiah ê lâng tāi-ke gông-ngia̍h.

34約瑟將伊面前ê食物，分hō͘ in；獨獨便雅憫所得tio̍h-ê，比別人五倍chōe；in就lim酒，kap約瑟相kap宴樂。Iok-sek chiong i bīn-chêng ê chia̍h-mi̍h, pun hō͘ in; to̍k-to̍k Piān-ngá-bín só͘ tit-tio̍h-ê, pí pa̍t-lâng gō͘-pē chōe; in chiū lim chiú, kap Iok-sek saⁿ-kap iàn-lo̍k.

1約瑟吩咐管家ê講，將米糧入滿chiah-ê人ê布袋，盡in所能帶ê；koh將ta̍k人ê銀lok tī伊ê布袋口。Iok-sek hoan-hù koán-ke-ê kóng, chiong bí-niû ji̍p móa chiah ê lâng ê pò͘-tē, chīn in só͘ ōe tòa-ê; koh chiong ta̍k-lâng ê gûn lok tī i ê pò͘-tē-kháu.

2亦將我ê杯，就是hit塊銀杯，hē tī少年ê ê布袋口；伊tia̍h五穀ê銀亦續hē-teh。管家ê就照約瑟所講ê話去行。Ia̍h chiong góa ê poe, chiū-sī hit tè gûn-poe, hē tī siàu-liân-ê ê pò͘-tē-kháu; i tia̍h gō͘-kak ê gûn ia̍h sòa hē-teh. Koán-ke-ê chiū chiàu Iok-sek só͘ kóng ê ōe khì kiâⁿ.

3天一下光，就差hiah-ê人kap in ê驢去。Thiⁿ chi̍t-ē kng, chiū chhe hiah ê lâng kap in ê lû khì.

4In出城行無jōa遠，約瑟kā管家ê講，起來，去追jip hiah-ê人，追tio̍h，就kā in講，Lín啥事用pháiⁿ報好ah？In chhut siâⁿ kiâⁿ bô jōa-hn̄g, Iok-sek kā koán-ke-ê kóng, Khí-lâi, khì tui-jip hiah ê lâng, tui-tio̍h, chiū kā in kóng, Lín siáⁿ-sū ēng pháiⁿ pò hó ah?

5這kiám m̄是我ê主人lim酒ê杯mah？Kiám m̄是伊占卜teh用ê mah？Lín án-ni做是pháiⁿ。Che kiám m̄-sī góa ê chú-lâng lim-chiú ê poe mah? Kiám m̄-sī i chiam-pok teh ēng-ê mah? lín án-ni chòe sī pháiⁿ.

6管家ê追tio̍h in，將chiah-ê話kā in講。Koán-ke-ê tui-tio̍h in, chiong chiah ê ōe kā in kóng.

7In應講，我ê主啥事講chit號話？你ê奴僕斷斷無做chit號事。In ìn kóng, Góa ê chú siáⁿ-sū kóng chit hō ōe? lí ê lô͘-po̍k toàn-toàn bô chòe chit-hō sū.

8你看，阮前tī布袋口所看見ê銀，尚且tùi迦南地帶來還你；阮thái-thó會對你主人ê家偷the̍h金銀ah？Lí khòaⁿ, goán chêng tī pò͘-tē-kháu só͘ khòaⁿ-kìⁿ ê gûn, siōng-chhiáⁿ tùi Ka-lâm tōe tòa-lâi hêng lí; goán thái-thó ōe tùi lí chú-lâng ê ke thau-the̍h kim-gûn ah?

9你ê奴僕ê中間，無論tī甚麼人hia chhiau-tio̍h，就hō͘伊死，阮亦beh做我ê主人ê奴僕。Lí ê lô͘-po̍k ê tiong-kan, bô-lūn tī sím-mi̍h lâng hia chhiau-tio̍h, chiū hō͘ i sí, goán ia̍h beh chòe góa ê chú-lâng ê lô͘-po̍k.

10管家ê講，Taⁿ就照lín ê話行；tī甚麼人hia chhiau-tio̍h，hit人就做我ê奴僕；其餘ê lóng無罪。Koán-ke-ê kóng, Taⁿ chiū chiàu lín ê ōe kiâⁿ; tī sím-mi̍h lâng hia chhiau-tio̍h, hit-lâng chiū chòe góa ê lô͘-po̍k; kî-û-ê lóng bô chōe.

11Tùi hit-tia̍p，in ta̍k人趕緊將布袋卸tī土腳，ta̍k人tháu開in ê布袋。Tùi hit-tia̍p in ta̍k-lâng kóaⁿ-kín chiong pò͘-tē sià tī thô͘-kha, ta̍k-lâng tháu-khui in ê pò͘-tē.

12管家ê就chhiau，tùi大ê 起，到細ê止；hit-ê杯竟然tī便雅憫ê布袋內chhiau-tio̍h。Koán-ke-ê chiū chhiau, tùi tōa-ê khí, kàu sòe-ê chí; hit ê poe kéng-jiân tī Piān-ngá-bín ê pò͘-tē-lāi chhiau-tio̍h.

13In就拆裂in ê衫，ta̍k人將in ê物hō͘驢載，tò去城內。In chiū thiah-li̍h in ê saⁿ, ta̍k-lâng chiong in ê mi̍h hō͘ lû chài, tò-khì siâⁿ-lāi.

14猶大kap伊ê兄弟到約瑟ê厝，約瑟iáu tī-hia，in就tī伊ê面前仆落地。Iû-tāi kap i ê hiaⁿ-tī kàu Iok-sek ê chhù, Iok-sek iáu tī-hia, in chiū tī i ê bīn-chêng phak-lo̍h tōe.

15約瑟kā in講，Lín所做ê是甚麼事？lín kiám m̄知，親像我chit號ê人會占卜mah？Iok-sek kā in kóng, Lín só͘-chòe-ê sī sím-mi̍h sū? lín kiám m̄-chai, chhin-chhiūⁿ góa chit-hō ê lâng ōe chiam-pok mah?

16猶大講，阮對我ê主beh講甚麼？iáu有啥話thang講？阮thái會家己訴明ah？上帝已經查出你ê奴僕ê罪過，阮kap hit-ê tī伊ê手chhiau tio̍h杯ê，lóng是我ê主ê奴僕。Iû-tāi kóng, Goán tùi góa ê chú beh kóng sím-mi̍h? iáu ū siáⁿ ōe thang kóng? goán thái ōe ka-kī sò͘-bêng ah? Siōng-tè í-keng cha-chhut lí ê lô͘-po̍k ê chōe-kòa, goán kap hit-ê tī i ê chhiú chhiau tio̍h poe-ê, lóng sī góa ê chú ê lô͘-po̍k.

17約瑟講，我斷斷無beh án-ni做；tī甚麼人ê手chhiau tio̍h杯，hit人就tio̍h做我ê奴僕；lín chiah-ê thang平安上去lín老父hia。Iok-sek kóng, Góa toàn-toàn bô beh án-ni chòe; Tī sím-mi̍h lâng ê chhiú chhiau tio̍h poe, hit-lâng chiū tio̍h chòe góa ê lô͘-po̍k; lín chiah-ê thang pêng-an chiūⁿ khì lín lāu-pē hia.

18猶大óa近伊講，我ê主ah，求你容允你ê奴僕講一句話hō͘我ê主聽，莫得受氣你ê奴僕；因為你kap法老一樣。Iû-tāi óa-kūn i kóng, Góa ê chú ah, kiû lí iông-ún lí ê lô͘-po̍k kóng chi̍t-kù-ōe hō͘ góa ê chú thiaⁿ, bo̍h-tit siū-khì lí ê lô͘-po̍k; in-ūi lí kap Hoat-ló chi̍t-iūⁿ.

19我ê主bat問你chiah-ê奴僕講，Lín有老父，有兄弟無？Góa ê chú bat mn̄g lí chiah ê lô͘-po̍k kóng, Lín ū lāu-pē, ū hiaⁿ-tī bô?

20阮kā我ê主講，阮有老父，已經年老；iáu有伊年老所生一個soah尾kiáⁿ；伊ê兄已經死，伊ê老母kan-ta放伊一個，koh伊ê老父真疼伊。Goán kā góa ê chú kóng, Goán ū lāu-pē, í-keng nî-lāu; iáu ū i nî-lāu só͘ siⁿ chi̍t ê soah-bé kiáⁿ; i ê hiaⁿ í-keng sí, i ê lāu-bú kan-ta pàng i chi̍t-ê, koh i ê lāu-pē chin thiàⁿ-i.

21你kā你ê奴僕講，Chhōa伊落來我chia，hō͘我親目看見伊。Lí kā lí ê lô͘-po̍k kóng, Chhōa i lo̍h-lâi góa chia, hō͘ góa chhin-ba̍k khòaⁿ-kìⁿ i.

22阮kā我ê主講，Gín-á bōe會離開伊ê老父；若離開伊ê老父，老父的確死。Goán kā góa ê chú kóng, Gín-á bōe-ōe lī-khui i ê lāu-pē; nā lī-khui i ê lāu-pē, lāu-pē tek-khak sí.

23你kā你ê奴僕講，Lín ê soah尾小弟若無kap lín相kap落來，lín就bōe得koh見我ê面。Lí kā lí ê lô͘-po̍k kóng, Lín ê soah-bé sió-tī nā bô kap lín saⁿ-kap lo̍h-lâi, lín chiū bōe-tit koh kìⁿ góa ê bīn.

24阮上 到你ê奴僕，阮老父hia，就將我ê主ê話kā伊講。Goán chiūⁿ kàu lí ê lô͘-po̍k, goán lāu-pē hia, chiū chiong góa ê chú ê ōe kā i kóng.

25阮ê老父講，Lín koh去kā咱tia̍h淡薄米糧來。Goán ê lāu-pē kóng, Lín koh khì kā lán tia̍h tām-po̍h bí-niû lâi.

26阮就講，阮bōe會落去；阮ê soah尾小弟若kap阮相kap去，阮就beh落去；因為soah尾小弟若無kap阮相kap去，阮的確bōe得見hit人ê面。Goán chiū kóng, Goán bōe-ōe lo̍h-khì; goán ê soah-bé sió-tī nā kap goán saⁿ-kap khì, goán chiū beh lo̍h-khì; in-ūi soah-bé sió-tī nā bô kap goán saⁿ-kap khì, goán tek-khak bōe-tit kìⁿ hit-lâng ê bīn.

27你ê奴僕，我ê老父，kā阮講，lín知我ê bó͘ kā我生兩個kiáⁿ；Lí ê lô͘-po̍k, góa ê lāu-pē, kā goán kóng, Lín chai góa ê bó͘ kā góa siⁿ nn̄g ê kiáⁿ;

28一個離開我出去，我講伊的確是hō͘野獸拆碎；到taⁿ我iáu m̄-bat看見；chi̍t-ê lī-khui góa chhut-khì, góa kóng i tek-khak sī hō͘ iá-siù thiah-chhùi; kàu-taⁿ góa iáu m̄-bat khòaⁿ-kìⁿ;

29Taⁿ lín koh將chit-ê chhōa去，離開我；若伊tú-tio̍h陷害，就是lín hō͘我白頭毛悽慘落陰府。taⁿ lín koh chiong chit-ê chhōa-khì, lī-khui góa; nā i tú-tio̍h hām-hāi, chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.

30阮老父ê性命kap chit-ê gín-á ê性命生相連；taⁿ我tò去你ê奴僕我ê老父hia；若gín-á無kap阮相kap tī-teh，阮ê老父看無gín-á，伊就的確死，Goán lāu-pē ê sìⁿ-miā kap chit ê gín-á ê sìⁿ-miā siⁿ saⁿ-liân; taⁿ góa tò-khì lí ê lô͘-po̍k góa ê lāu-pē hia; nā gín-á bô kap goán saⁿ-kap tī-teh, goán ê lāu-pē khòaⁿ bô gín-á, i chiū tek-khak sí,

31這就是阮hō͘你ê奴僕，阮ê老父，白頭毛悽慘落陰府。che chiū-sī goán hō͘ lí ê lô͘-po̍k, goán ê lāu-pē, pe̍h-thâu-mn̂g chhiⁿ-chhám lo̍h im-hú.

32因為你ê奴僕bat對我ê老父保chit-ê gín-á，講，我若無chhōa伊tò來交你，我願tī老父ê面前一生擔當罪。In-ūi lí ê lô͘-po̍k bat tùi góa ê lāu-pē pó chit ê gín-á, kóng, Góa nā bô chhōa i tò-lâi kau lí, góa goān tī lāu-pē ê bīn-chêng it-seng tam-tng chōe.

33Taⁿ求你容允你ê奴僕tiàm-teh，替chit-ê gín-á做我ê主ê奴僕；hō͘ gín-á kap伊hiah-ê兄相kap上去。Taⁿ kiû lí iông-ún lí ê lô͘-po̍k tiàm-teh, thòe chit ê gín-á chòe góa ê chú ê lô͘-po̍k; hō͘ gín-á kap i hiah ê hiaⁿ saⁿ-kap chiūⁿ-khì.

34若gín-á無kap我相kap去，我thái-thó能上去見我ê老父ah？驚了我看見阮老父所tú-tio̍h ê災禍。Nā gín-á bô kap góa saⁿ-kap khì, góa thái-thó ōe chiūⁿ-khì kìⁿ góa ê lāu-pē ah? kiaⁿ-liáu góa khòaⁿ-kìⁿ goán lāu-pē só͘ tú-tio̍h ê chai-ē.