1約瑟tī hiah-ê khiā伊身邊ê人ê面前忍bōe-tiâu；就hoah講，眾人tio̍h離開我出去。約瑟將伊本身hō͘兄弟認得ê時，無一人khiā tī伊ê面前。Iok-sek tī hiah-ê khiā i sin-piⁿ ê lâng ê bīn-chêng lún-bōe-tiâu; chiū hoah kóng, Chèng-lâng tio̍h lī-khui góa chhut-khì. Iok-sek chiong i pún-sin hō͘ hiaⁿ-tī jīn-tit ê sî, bô chi̍t-lâng khiā tī i ê bīn-chêng.

2伊就出聲大哭；埃及人聽見，法老ê家亦聽見。I chiū chhut-siaⁿ tōa-khàu; Ai-ki̍p lâng thiaⁿ-kìⁿ, Hoat-ló ê ke ia̍h thiaⁿ-kìⁿ.

3約瑟kā伊ê兄弟講，我是約瑟，我ê老父iáu tī-teh mah？伊ê兄弟bōe能應，因為tī伊ê面前lóng驚惶。Iok-sek kā i ê hiaⁿ-tī kóng, Góa sī Iok-sek, góa ê lāu-pē iáu tī-teh mah? I ê hiaⁿ-tī bōe-ōe ìn, in-ūi tī i ê bīn-chêng lóng kiaⁿ-hiâⁿ.

4約瑟koh kā伊ê兄弟講，請行óa來。In就óa來。伊講，我是lín ê小弟約瑟，就是lín所賣到埃及ê。Iok-sek koh kā i ê hiaⁿ-tī kóng, Chhiáⁿ kiâⁿ-óa-lâi. In chiū óa-lâi. I kóng, Góa sī lín ê sió-tī Iok-sek, chiū-sī lín só͘ bōe kàu Ai-ki̍p-ê.

5Taⁿ m̄免因為賣我到chia來憂悶，來家己怨恨；這是上帝差我事先lín來，因為beh保全性命。Taⁿ m̄-bián in-ūi bōe góa kàu chia lâi iu-būn, lâi ka-kī oàn-hūn; che sī Siōng-tè chhe góa tāi-seng lín lâi, in-ūi beh pó-choân sìⁿ-miā.

6Taⁿ tī chit所在ê飢荒已經兩年，iáu有五年，無thang種作，無thang收成。Taⁿ tī chit só͘-chāi ê ki-hng í-keng nn̄g-nî, iáu ū gō͘-nî, bô thang chèng-choh, bô thang siu-sêng.

7上帝差我事先lín來，為tio̍h beh kā lín留chhun ê種族tī世上；koh beh行伊大ê拯救，保全lín ê活命。Siōng-tè chhe góa tāi-seng lín lâi, ūi-tio̍h beh kā lín lâu chhun ê chéng-cho̍k tī sè-chiūⁿ; koh beh kiâⁿ I tōa ê chín-kiù, pó-choân lín ê oa̍h-miā.

8Án-ni看起來，差我到chia ê，m̄是lín，就是上帝；伊koh hō͘我親像法老ê父，做伊全家ê主，kap管理埃及全地。Án-ni khòaⁿ-khí-lâi, chhe góa kàu chia ê, m̄-sī lín, chiū-sī Siōng-tè; I koh hō͘ góa chhin-chhiūⁿ Hoat-ló ê pē, chòe i choân-ke ê chú, kap koán-lí Ai-ki̍p choân-tōe.

9Lín tio̍h趕緊上去我ê老父hia，kā伊講，你ê kiáⁿ約瑟án-ni講，上帝hō͘我做全埃及ê主，請落來我chia，m̄-thang延chhiân。Lín tio̍h kóaⁿ-kín chiūⁿ-khì góa ê lāu-pē hia, kā i kóng, Lí ê kiáⁿ Iok-sek án-ni kóng, Siōng-tè hō͘ góa chòe choân Ai-ki̍p ê chú, chhiáⁿ lo̍h-lâi góa chia, m̄-thang iân-chhiân.

10你kap你ê kiáⁿ你ê孫，kap牛群羊群，以及一切所有ê，lóng thang來tiàm-tī Ko-san ê地，kap我相近。Lí kap lí ê kiáⁿ lí ê sun, kap gû-kûn iûⁿ-kûn, í-ki̍p it-chhè só͘-ū-ê, lóng thang lâi tiàm tī Ko-san ê tōe, kap góa saⁿ-kūn.

11我beh tī-hia奉承你；因為iáu有五年ê飢荒，免得你，kap你ê家眷，kap一切所有ê落薄。Góa beh tī-hia hōng-sêng lí; in-ūi iáu ū gō͘ nî ê ki-hng, bián-tit lí, kap lí ê ke-koàn, kap it-chhè só͘-ū-ê lo̍h-po̍h.

12何況lín ê目睭kap我ê小弟便雅憫ê目睭lóng看見我kap lín親嘴對lín講話。Hô-hòng lín ê ba̍k-chiu kap góa ê sió-tī Piān-ngá-bín ê ba̍k-chiu lóng khòaⁿ-kìⁿ góa kap lín chhin-chhùi tùi lín kóng-ōe.

13Lín也tio̍h將我tī埃及一切ê榮光kap lín所看見ê事，lóng kā我ê老父講；koh tio̍h趕緊將我ê老父搬來我chia。Lín iā tio̍h chiong góa tī Ai-ki̍p it-chhè ê êng-kng kap lín só͘ khòaⁿ-kìⁿ ê sū, lóng kā góa ê lāu-pē kóng; koh tio̍h kóaⁿ-kín chiong góa ê lāu-pē poaⁿ-lâi góa chia.

14Tùi án-ni，約瑟仆tī伊ê小弟便雅憫ê頷頸啼哭；便雅憫也tī伊ê頷頸啼哭。Tùi án-ni Iok-sek phak tī i ê sió-tī Piān-ngá-bín ê ām-kún thî-khàu; Piān-ngá-bín iā tī i ê ām-kún thî-khàu.

15伊koh kap眾兄弟chim嘴，抱in啼哭；後來伊ê兄弟就kap伊講話。I koh kap chèng hiaⁿ-tī chim-chhùi, phō-in thî-khàu; āu-lâi i ê hiaⁿ-tī chiū kap i kóng-ōe.

16Chit-ê風聲傳到法老ê宮內，講，約瑟ê兄弟來lah。法老kap伊ê人臣lóng歡喜。Chit ê hong-siaⁿ thoân kàu Hoat-ló ê keng-lāi, kóng, Iok-sek ê hiaⁿ-tī lâi lah. Hoat-ló kap i ê jîn-sîn lóng hoaⁿ-hí.

17法老kā約瑟講，你tio̍h kā你ê兄弟講，Lín tio̍h án-ni行；將物hō͘ cheng-siⁿ載；起身去迦南地；Hoat-ló kā Iok-sek kóng, Lí tio̍h kā lí ê hiaⁿ-tī kóng, Lín tio̍h án-ni kiâⁿ; chiong mi̍h hō͘ cheng-siⁿ chài; khí-sin khì Ka-lâm tōe;

18將lín ê老父，kap lín ê家眷，lóng搬來我chia；我beh將埃及地ê好物hō͘ lín，lín亦thang食chit所在ê山珍海味。chiong lín ê lāu-pē, kap lín ê ke-koàn, lóng poaⁿ-lâi góa chia; góa beh chiong Ai-ki̍p tōe ê hó-mi̍h hō͘ lín, lín ia̍h thang chia̍h chit só͘-chāi ê san-tin hái-bī.

19Taⁿ我命令你，lín tio̍h án-ni做；tùi埃及地帶車去，將lín ê gín-á，kap bó͘，kap lín ê老父，lóng搬來。Taⁿ góa bēng-lēng lí, lín tio̍h án-ni chòe; tùi Ai-ki̍p tōe tòa chhia khì, chiong lín ê gín-á, kap bó͘, kap lín ê lāu-pē, lóng poaⁿ-lâi.

20M̄-thang看重lín家內ê物，因為埃及全地ê好物，lóng是lín ê。M̄-thang khòaⁿ-tāng lín ke-lāi ê mi̍h, in-ūi Ai-ki̍p choân-tōe ê hó-mi̍h, lóng sī lín ê.

21以色列ê眾kiáⁿ就án-ni行。約瑟照法老ê命令hō͘ in車，kap路中tio̍h用ê食物；Í-sek-lia̍t ê chèng-kiáⁿ chiū án-ni kiâⁿ. Iok-sek chiàu Hoat-ló ê bēng-lēng hō͘ in chhia, kap lō͘-tiong tio̍h ēng ê chia̍h-mi̍h;

22koh hō͘ in一人一套衣服；獨獨hō͘便雅憫銀三百，衣服五套。koh hō͘ in chi̍t-lâng chi̍t-thò i-ho̍k; to̍k-to̍k hō͘ Piān-ngá-bín gûn saⁿ-pah, i-ho̍k gō͘-thò.

23送in老父ê物，記tī下底；驢káng十隻，載埃及ê好物；驢母十隻，載五穀kap餅kap菜，hō͘ in老父路裡thang用。Sàng in lāu-pē ê mi̍h, kì tī ē-tóe; lû-káng cha̍p-chiah, chài Ai-ki̍p ê hó-mi̍h; lû-bú cha̍p-chiah, chài gō͘-kak kap piáⁿ kap chhài, hō͘ in lāu-pē lō͘-ni̍h thang ēng.

24約瑟就差伊ê兄弟tò去，in就起身；koh kā in講，Lín m̄-thang tī路裡冤家。Iok-sek chiū chhe i ê hiaⁿ-tī tò-khì, in chiū khí-sin; koh kā in kóng, Lín m̄-thang tī lō͘-ni̍h oan-ke.

25In tùi埃及上去，來到迦南地，in老父雅各hia。In tùi Ai-ki̍p chiūⁿ-khì, lâi kàu Ka-lâm tōe, in lāu-pē Ngá-kok hia.

26Kā伊講，約瑟iáu tī-teh，koh管理埃及全地。雅各心暈去，因為m̄信in ê話。Kā i kóng, Iok-sek iáu tī-teh, koh koán-lí Ai-ki̍p choân-tōe. Ngá-kok sim hūn-khì, in-ūi m̄ sìn in ê ōe.

27In就將約瑟對in所講ê話，lóng kā伊講；伊koh看見約瑟所差來beh載伊ê車，in老父雅各ê心活起來。In chiū chiong Iok-sek tùi in só͘ kóng ê ōe, lóng kā i kóng; i koh khòaⁿ-kìⁿ Iok-sek só͘ chhe-lâi beh chài i ê chhia, in lāu-pē Ngá-kok ê sim oa̍h-khí-lâi.

28以色列講，好lah；我ê kiáⁿ約瑟iáu tī-teh，thàn我iáu未死，我beh去看伊。Í-sek-lia̍t kóng, Hó lah; góa ê kiáⁿ Iok-sek iáu tī-teh, thàn góa iáu-bē sí, góa beh khì khòaⁿ-i.

1以色列帶一切所有ê，起身來到別是巴；就獻祭hō͘伊ê老父以撒ê上帝。Í-sek-lia̍t tòa it-chhè só͘-ū-ê, khí-sin lâi kàu Pia̍t-sī-pa; chiū hiàn-chè hō͘ i ê lāu-pē Í-sat ê Siōng-tè.

2暝時上帝tī異象ê中間kā以色列講，雅各ah，雅各ah。伊講，我tī-chia。Mî-sî Siōng-tè tī īⁿ-siōng ê tiong-kan kā Í-sek-lia̍t kóng, Ngá-kok ah, Ngá-kok ah. I kóng, Góa tī-chia.

3上帝講，我是上帝，就是你ê老父ê上帝；你落去埃及m̄-sái驚；因為我beh hō͘你tī-hia成做大國。Siōng-tè kóng, Góa sī Siōng-tè, chiū-sī lí ê lāu-pē ê Siōng-tè; lí lo̍h-khì Ai-ki̍p m̄-sái kiaⁿ; in-ūi Góa beh hō͘ lí tī-hia chiâⁿ-chòe tōa-kok.

4我beh kap你相kap落去埃及，我亦的確chhōa你起來；約瑟beh手hōaⁿ你ê目睭，hō͘你khoeh。Góa beh kap lí saⁿ-kap lo̍h-khì Ai-ki̍p, Góa ia̍h tek-khak chhōa lí khí-lâi; Iok-sek beh chhiú hōaⁿ lí ê ba̍k-chiu, hō͘ lí khoeh.

5雅各就tùi別是巴起身；以色列hiah-ê kiáⁿ，hō͘ in ê老父雅各，kap in ê kiáⁿ兒，in ê bó͘，lóng坐tī法老所差來beh載伊ê車。Ngá-kok chiū tùi Pia̍t-sī-pa khí-sin; Í-sek-lia̍t hiah ê kiáⁿ, hō͘ in ê lāu-pē Ngá-kok, kap in ê kiáⁿ-jî, in ê bó͘, lóng chē tī Hoat-ló só͘ chhe-lâi beh chài i ê chhia.

6雅各kap伊一切ê kiaⁿ孫，帶in ê cheng-siⁿ，以及tī迦南地所得tio̍h ê貨財，lóng到埃及。Ngá-kok kap i it-chhè ê kiáⁿ-sun, tòa in ê cheng-siⁿ, í-ki̍p tī Ka-lâm tōe só͘ tit-tio̍h ê hè-châi, lóng kàu Ai-ki̍p.

7雅各帶伊ê kiáⁿ、孫、cha-bó͘-kiáⁿ，cha-bó͘孫，kap伊一切ê後裔，lóng到埃及。Ngá-kok tòa i ê kiáⁿ, sun, cha-bó͘-kiáⁿ, cha-bó͘-sun, kap i it-chhè ê hō͘-è, lóng kàu Ai-ki̍p.

8以色列人到埃及ê，雅各kap伊ê kiáⁿ，in ê名記tī下底。雅各ê大kiáⁿ Liû-piān。Í-sek-lia̍t lâng kàu Ai-ki̍p-ê, Ngá-kok kap i ê kiáⁿ, in ê miâ kì tī ē-tóe. Ngá-kok ê tōa-kiáⁿ Liû-piān.

9Liû-piān ê kiáⁿ；Hap-lo̍k、Hoat-lō͘、Hi-su-lûn、Ka-bí。Liû-piān ê kiáⁿ; Hap-lo̍k, Hoat-lō͘, Hi-su-lûn, Ka-bí.

10西門ê kiáⁿ；Iâ-bó͘-lī、Ngá-bín、O-hat、Ngá-kun、Só-hat；iáu有迦南地ê婦人人ê kiáⁿ掃羅。Se-biān ê kiáⁿ; Iâ-bó͘-lī, Ngá-bín, O-hat, Ngá-kun, Só-hat; iáu ū Ka-lâm tōe ê hū-jîn-lâng ê kiáⁿ Sò-lô.

11利未ê kiáⁿ；Kek-sūn、Kho-hat、Bí-la̍h-lī。Lī-bī ê kiáⁿ; Kek-sūn, Kho-hat, Bí-la̍h-lī.

12猶大ê kiáⁿ；Jíⁿ、Gô-lâm、Sī-la̍h、Hoat-le̍k-su、謝拉；獨獨Jíⁿ kap Gô-lâm死tī迦南地。Hoat-le̍k-su ê kiáⁿ；Hi-su-lûn、Hap-bó͘-le̍k。Iû-tāi ê kiáⁿ; Jíⁿ, Gô-lâm, Sī-la̍h, Hoat-le̍k-su, Siā-la̍h; to̍k-to̍k Jíⁿ kap Gô-lâm sí tī Ka-lâm tōe. Hoat-le̍k-su ê kiáⁿ; Hi-su-lûn, Hap-bó͘-le̍k.

13Í-sat-ka ê kiáⁿ；Tô-la̍h、Phó͘-óa、約伯、Sin-lûn。Í-sat-ka ê kiáⁿ; Tô-la̍h, Phó͘-óa, Iok-pek, Sin-lûn.

14Se-pò͘-lûn ê kiáⁿ；Se-lia̍t、Í-lûn、Ngá-lī。Se-pò͘-lûn ê kiáⁿ; Se-lia̍t, Í-lûn, Ngá-lī.

15Chiah-ê是利亞tī Pa-tàn-a-lân kā雅各所生ê kiáⁿ；koh有伊ê cha-bó͘-kiáⁿ Tí-ná；kiaⁿ孫男女共三十三人。Chiah-ê sī Lī-a tī Pa-tàn-a-lân kā Ngá-kok só͘ siⁿ ê kiáⁿ; koh ū i ê cha-bó͘-kiáⁿ Tí-ná; kiáⁿ-sun lâm-lú kiōng saⁿ-cha̍p-saⁿ lâng.

16Ka-tek ê kiáⁿ；Sé-hui-ûn、Hap-ki、Su-nî、Í-su-pún、Í-lī、A-lô-tí、A-lia̍t-lī。Ka-tek ê kiáⁿ; Sé-hui-ûn, Hap-ki, Su-nî, Í-su-pún, Í-lī, A-lô-tí, A-lia̍t-lī.

17A-siat ê kiáⁿ；Im-ná、Ek-si-óa、Ek-si-úi、Pí-lī-a；koh in ê小妹Se-la̍h。Pí-lī-a ê kiáⁿ；Hi-piat、Má-kiat。A-siat ê kiáⁿ; Im-ná, Ek-si-óa, Ek-si-úi, Pí-lī-a; koh in ê sió-bē Se-la̍h. Pí-lī-a ê kiáⁿ; Hi-piat, Má-kiat.

18這是拉班hō͘伊ê cha-bó͘-kiáⁿ利亞ê女婢Sek-phàⁿ所生ê kiaⁿ孫；就是伊kā雅各生ê；共十六人。Che sī La̍h-pan hō͘ i ê cha-bó͘-kiáⁿ Lī-a ê lú-pī Sek-phàⁿ só͘ siⁿ ê kiáⁿ-sun; chiū-sī i kā Ngá-kok siⁿ-ê; kiōng cha̍p-la̍k lâng.

19雅各ê bó͘拉結ê kiáⁿ；約瑟kap便雅憫。Ngá-kok ê bó͘ La̍h-kiat ê kiáⁿ; Iok-sek kap Piān-ngá-bín.

20約瑟tī埃及地生Má-ná-se kap Í-hoat-liân；就是An城ê祭司，Pho-thê-hui-la̍h ê cha-bó͘-kiáⁿ，A-se-la̍p，kā約瑟生ê。Iok-sek tī Ai-ki̍p tōe siⁿ Má-ná-se kap Í-hoat-liân; chiū-sī An-siâⁿ ê chè-si, Pho-thê-hui-la̍h ê cha-bó͘-kiáⁿ, A-se-la̍p, kā Iok-sek siⁿ-ê.

21便雅憫ê kiáⁿ；Pí-la̍h、Pí-kiat、A-si̍t-pia̍t、Ki-la̍h、Nái-bān、Í-hi、Lô-si̍t、Bó͘-pêng、Hō͘-pêng、A-le̍k；Piān-ngá-bín ê kiáⁿ; Pí-la̍h, Pí-kiat, A-si̍t-pia̍t, Ki-la̍h, Nái-bān, Í-hi, Lô-si̍t, Bó͘-pêng, Hō͘-pêng, A-le̍k;

22這是拉結kā雅各所生ê kiaⁿ孫，共十四人。che sī La̍h-kiat kā Ngá-kok só͘ siⁿ ê kiáⁿ-sun, kiōng cha̍p-sì lâng.

23Tàn ê kiáⁿ，Hō͘-sin。Tàn ê kiáⁿ, Hō͘-sin.

24Ná-hut-tha-lī ê kiáⁿ；Ngá-siat、Ko͘-nî、Iâ-sek，Sī-léng；Ná-hut-tha-lī ê kiáⁿ; Ngá-siat, Ko͘-nî, Iâ-sek, Sī-léng;

25這是拉班hō͘伊ê cha-bó͘-kiáⁿ拉結ê女婢Phek-la̍h所生ê kiaⁿ孫，就是伊kā雅各所生ê；共七人。che sī La̍h-pan hō͘ i ê cha-bó͘-kiáⁿ La̍h-kiat ê lú-pī Phek-la̍h só͘ siⁿ ê kiáⁿ-sun, chiū-sī i kā Ngá-kok só͘ siⁿ-ê; kiōng chhit lâng.

26Hiah-ê kap雅各相kap到埃及ê，除伊ê新婦以外，見若tùi伊身軀所出ê，共六十六人。Hiah-ê kap Ngá-kok saⁿ-kap kàu Ai-ki̍p-ê, tû i ê sim-pū í-gōa, kìⁿ-nā tùi i sin-khu só͘ chhut-ê, kiōng la̍k-cha̍p-la̍k lâng.

27Koh有約瑟tī埃及所生ê kiáⁿ，兩個；雅各ê家來到埃及ê共七十人。Koh ū Iok-sek tī Ai-ki̍p só͘ siⁿ ê kiáⁿ, nn̄g-ê; Ngá-kok ê ke lâi kàu Ai-ki̍p-ê kiōng chhit-cha̍p lâng.

28雅各差猶大做頭去見約瑟，thang chhōa in去Ko-san；in就到Ko-san ê地。Ngá-kok chhe Iû-tāi chòe-thâu khì kìⁿ Iok-sek, thang chhōa in khì Ko-san; in chiū kàu Ko-san ê tōe.

29約瑟備辦伊ê車；去Ko-san，迎接伊ê老父以色列；到見tio̍h面，就仆tī老父ê頷頸，tī頷頸裡哭久久。Iok-sek pī-pān i ê chhia; khì Ko-san, ngiâ-chih i ê lāu-pē Í-sek-lia̍t; kàu kìⁿ-tio̍h bīn, chiū phak tī lāu-pē ê ām-kún, tī ām-kún-ni̍h khàu kú-kú.

30以色列kā約瑟講，我見tio̍h你ê面，知你iáu活teh，我taⁿ死亦甘心。Í-sek-lia̍t kā Iok-sek kóng, Góa kìⁿ-tio̍h lí ê bīn, chai lí iáu oa̍h-teh, góa taⁿ sí ia̍h kam-sim.

31約瑟kā伊ê兄弟kap老父ê家講，我beh上去通知法老，kā伊講，我ê兄弟kap我ê老父ê家，前tī迦南地ê，Taⁿ lóng來到我chia。Iok-sek kā i ê hiaⁿ-tī kap lāu-pē ê ke kóng, Góa beh chiūⁿ-khì thong-ti Hoat-ló, kā i kóng, Góa ê hiaⁿ-tī kap góa ê lāu-pē ê ke, chêng tī Ka-lâm tōe-ê, taⁿ lóng lâi kàu góa chia.

32In是牧者，因為in是飼cheng-sin ê人；in將羊群、牛群，kap一切所有ê lóng帶來。In sī bo̍k-chiá, in-ūi in sī chhī cheng-siⁿ ê lâng; in chiong iûⁿ-kûn, gû-kûn, kap it-chhè só͘-ū-ê lóng tòa-lâi.

33法老召lín ê時，若問lín講，Lín做甚麼頭路？Hoat-ló tiàu lín ê sî, nā mn̄g lín kóng, Lín chòe sím-mi̍h thâu-lō͘?

34lín tio̍h講，你ê奴僕，tùi少年到taⁿ，阮連阮ê祖公lóng是teh飼cheng-siⁿ；án-ni lín thang來khiā tī Ko-san ê地；因為見若飼cheng-siⁿ ê，lóng是埃及人所厭賤。lín tio̍h kóng, Lí ê lô͘-po̍k, tùi siàu-liân kàu-taⁿ, goán liân goán ê chó͘-kong lóng sī teh chhī cheng-siⁿ; án-ni lín thang lâi khiā tī Ko-san ê tōe; in-ūi kìⁿ-nā chhī cheng-siⁿ-ê, lóng sī Ai-ki̍p lâng só͘ iàm-chiān.

1約瑟入去kā法老講，我ê老父kap我ê兄弟帶in ê羊群、牛群，kap一切所有ê，tùi迦南地來；taⁿ tī Ko-san ê地。Iok-sek ji̍p-khì kā Hoat-ló kóng, Góa ê lāu-pē kap góa ê hiaⁿ-tī tòa in ê iûⁿ-kûn, gû-kûn, kap it-chhè só͘-ū-ê, tùi Ka-lâm tōe lâi; taⁿ tī Ko-san ê tōe.

2約瑟tùi伊ê兄弟ê中間揀五人，chhōa in去見法老。Iok-sek tùi i ê hiaⁿ-tī ê tiong-kan kéng gō͘ lâng, chhōa in khì kìⁿ Hoat-ló.

3法老問約瑟ê兄弟講，Lín做甚麼頭路？In kā法老講，你ê奴僕本身，kap阮ê祖公，lóng是顧羊ê人。Hoat-ló mn̄g Iok-sek ê hiaⁿ-tī kóng, Lín chòe sím-mi̍h thâu-lō͘? In kā Hoat-ló kóng, Lí ê lô͘-po̍k pún-sin, kap goán ê chó͘-kong, lóng sī kò͘-iûⁿ ê lâng.

4In koh kā法老講，迦南地飢荒真傷重，奴僕ê羊群無草thang食；所以阮來，是beh寄腳tī-chia；taⁿ求你容允你ê奴僕tiàm-tī Ko-san地。In koh kā Hoat-ló kóng, Ka-lâm tōe ki-hng chin siong-tiōng, lô͘-po̍k ê iûⁿ-kûn bô chháu thang chia̍h; só͘-í goán lâi, sī beh kià-kha tī-chia; taⁿ kiû lí iông-ún lí ê lô͘-po̍k tiàm tī Ko-san tōe.

5法老kā約瑟講，你ê老父kap你ê兄弟來到你chia；Hoat-ló kā Iok-sek kóng, Lí ê lāu-pē kap lí ê hiaⁿ-tī lâi kàu lí chia;

6埃及地lóng tī你ê面前；hō͘你ê老父kap你ê兄弟tòa tī國內第一好ê地；in thang tòa tī Ko-san ê地；你若知in中間khah有本事ê人，就派in管顧我ê cheng-siⁿ。Ai-ki̍p tōe lóng tī lí ê bīn-chêng; hō͘ lí ê lāu-pē kap lí ê hiaⁿ-tī tòa tī kok-lāi tē it hó ê tōe; in thang tòa tī Ko-san ê tōe; lí nā chai in tiong-kan khah ū pún-sū ê lâng, chiū phài in koán-kò͘ góa ê cheng-siⁿ.

7約瑟chhōa伊ê老父雅各入去khiā tī法老ê面前；雅各就kā法老祝福。Iok-sek chhōa i ê lāu-pē Ngá-kok ji̍p-khì khiā tī Hoat-ló ê bīn-chêng; Ngá-kok chiū kā Hoat-ló chiok-hok.

8法老問雅各講，你一生ê年日是jōa chōe ah？Hoat-ló mn̄g Ngá-kok kóng, Lí it-seng ê nî-ji̍t sī jōa chōe ah?

9雅各kā法老講，我寄腳tī世間ê年日是一百三十歲。我一生ê年日亦少，亦艱苦，m̄值tio̍h我ê列祖寄腳tī世間ê年日。Ngá-kok kā Hoat-ló kóng, góa kià-kha tī sè-kan ê nî-ji̍t sī chi̍t-pah saⁿ-cha̍p hè. Góa it-seng ê nî-ji̍t ia̍h chió, ia̍h kan-khó͘, m̄-ta̍t-tio̍h góa ê lia̍t-chó͘ kià-kha tī sè-kan ê nî-ji̍t.

10雅各koh kā法老祝福；就tùi法老ê面前出去。Ngá-kok koh kā Hoat-ló chiok-hok; chiū tùi Hoat-ló ê bīn-chêng chhut-khì.

11約瑟照法老ê命令，將埃及國第一好ê地，就是Lân-sek ê地，hō͘伊ê老父kap伊兄弟khiā起，做產業。Iok-sek chiàu Hoat-ló ê bēng-lēng, chiong Ai-ki̍p kok tē-it hó ê tōe, chiū-sī Lân-sek ê tōe, hō͘ i ê lāu-pē kap i hiaⁿ-tī khiā-khí, chòe sán-gia̍p.

12約瑟用米糧奉承伊ê老父，kap伊ê兄弟，kap伊ê老父全家；lóng照in ê人額來供給in。Iok-sek ēng bí-niû hōng-sêng i ê lāu-pē, kap i ê hiaⁿ-tī, kap i ê lāu-pē choân-ke; lóng chiàu in ê lâng-gia̍h lâi kiong-kip in.

13飢荒真傷重，全地lóng無米糧；甚至埃及地kap迦南地ê人，因為飢荒ê緣故，餓到暈去。Ki-hng chin siong-tiōng, choân-tōe lóng bô bí-niû; sīm-chì Ai-ki̍p tōe kap Ka-lâm tōe ê lâng, in-ūi ki-hng ê iân-kò͘, gō kàu hūn-khì.

14約瑟聚集埃及地kap迦南地所有ê銀，就是in tia̍h米糧ê銀；約瑟就將hiah-ê銀帶到法老ê宮。Iok-sek chū-chi̍p Ai-ki̍p tōe kap Ka-lâm tōe só͘ ū ê gûn, chiū-sī in tia̍h bí-niû ê gûn; Iok-sek chiū chiong hiah ê gûn tòa kàu Hoat-ló ê keng.

15埃及地kap迦南地ê銀lóng用了；埃及眾人lóng來見約瑟講，阮ê銀lóng用了lah，求你hō͘阮米糧；阮啥事tio̍h死tī你ê面前？Ai-ki̍p tōe kap Ka-lâm tōe ê gûn lóng ēng-liáu; Ai-ki̍p chèng-lâng lóng lâi kìⁿ Iok-sek kóng, Goán ê gûn lóng ēng-liáu lah, kiû lí hō͘ goán bí-niû; goán siáⁿ-sū tio̍h sí tī lí ê bīn-chêng?

16約瑟講，若是銀用了，lín ê cheng-siⁿ thang牽來；我為tio̍h lín ê cheng-siⁿ beh hō͘ lín米糧。Iok-sek kóng, Nā sī gûn ēng-liáu, lín ê cheng-siⁿ thang khan-lâi; góa ūi-tio̍h lín ê cheng-siⁿ beh hō͘ lín bí-niû.

17In就將cheng-siⁿ趕到約瑟hia；約瑟就用米糧換in ê馬、羊群、牛群，kap驢；hit年為tio̍h換in一切ê cheng-siⁿ，就用米糧養飼in。In chiū chiong cheng-siⁿ kóaⁿ kàu Iok-sek hia; Iok-sek chiū ēng bí-niû ōaⁿ in ê bé, iûⁿ-kûn, gû-kûn, kap lû; hit-nî ūi-tio̍h ōaⁿ in it-chhè ê cheng-siⁿ, chiū ēng bí-niû iúⁿ-chhī in.

18Hit年已經過；第二年，in koh來見約瑟，kā伊講，阮bōe瞞得我ê主，阮ê銀lóng用了，cheng-siⁿ亦lóng歸tī我ê主，阮tī我ê主ê面前，除阮ê身體kap阮ê田地以外，無chhun一項。Hit-nî í-keng kè; tē-jī nî, in koh lâi kìⁿ Iok-sek, kā i kóng, Goán bōe môa-tit góa ê chú, goán ê gûn lóng ēng-liáu, cheng-siⁿ ia̍h lóng kui tī góa ê chú, goán tī góa ê chú ê bīn-chêng, tû goán ê sin-thé kap goán ê chhân-tōe í-gōa, bô chhun chi̍t-hāng.

19阮啥事人死，地拋荒，tī你ê目睭前ah？求你用米糧買阮kap阮ê地；阮kap阮ê地做法老ê路用；koh用種子hō͘阮，hō͘阮得tio̍h活，免死，土地亦免拋荒。goán siáⁿ-sū lâng sí, tōe pha-hng, tī lí ê ba̍k-chiu-chêng ah? kiû lí ēng bí-niû bóe goán kap goán ê tōe; goán kap goán ê tōe chòe Hoat-ló ê lō͘-ēng; koh ēng chéng-chí hō͘ goán, hō͘ goán tit-tio̍h oa̍h, bián sí, thó͘-tōe ia̍h bián pha-hng.

20Tùi án-ni，約瑟為法老買埃及所有ê地；埃及人因為hō͘飢荒所逼，ta̍k人lóng賣伊ê田地；hiah-ê地就lóng歸tī法老。Tùi án-ni Iok-sek ūi Hoat-ló bóe Ai-ki̍p só͘ ū ê tōe; Ai-ki̍p lâng in-ūi hō͘ ki-hng só͘ pek, ta̍k-lâng lóng bōe i ê chhân-tōe; hiah ê tōe chiū lóng kui tī Hoat-ló.

21約瑟照chiah-ê城邑遷徙埃及ê百姓tùi埃及chit-pêng到tī hit-pêng。Iok-sek chiàu chiah ê siâⁿ-ip chhian-sóa Ai-ki̍p ê peh-sìⁿ tùi Ai-ki̍p chit-pêng kàu tī hit-pêng.

22獨獨祭司ê地法老無買伊；因為祭司有tùi法老得tio̍h定tio̍h ê糧；in食法老所hō͘ in ê糧；所以in無賣in ê地。To̍k-to̍k chè-si ê tōe Hoat-ló bô bóe-i; in-ūi chè-si ū tùi Hoat-ló tit-tio̍h tiāⁿ-tio̍h ê niû; in chia̍h Hoat-ló só͘ hō͘ in ê niû; só͘-í in bô bōe in ê tōe.

23約瑟kā百姓講，我今á日為法老買lín kap lín ê地；看ah，tī-chia有種子hō͘ lín，lín thang去作田；Iok-sek kā peh-sìⁿ kóng, Góa kin-á-ji̍t ūi Hoat-ló bóe lín kap lín ê tōe; khòaⁿ ah, tī-chia ū chéng-chí hō͘ lín, lín thang khì choh-chhân;

24到收成ê時，lín tio̍h將五份一納hō͘法老；四份歸lín，做田裡ê種子，亦做lín kap lín家內人ê食物，以及lín ê gín-á ê食物。kàu siu-sêng ê sî, lín tio̍h chiong gō͘-hūn-chi̍t la̍p hō͘ Hoat-ló; sì-hūn kui lín, chòe chhân-ni̍h ê chéng-chí, ia̍h chòe lín kap lín ke-lāi lâng ê chia̍h-mi̍h, í-ki̍p lín ê gín-á ê chia̍h-mi̍h.

25In講，你有救阮ê性命；願阮tī我ê主ê面前得tio̍h恩典，阮beh做法老ê奴僕。In kóng, Lí ū kiù goán ê sìⁿ-miā; goān goán tī góa ê chú ê bīn-chêng tit-tio̍h un-tián, goán beh chòe Hoat-ló ê lô͘-po̍k.

26Án-ni約瑟為埃及ê地，設立定tio̍h ê例，到tī今á日；法老得tio̍h五份ê一份；獨獨祭司ê地無歸法老。Án-ni Iok-sek ūi Ai-ki̍p ê tōe, siat-li̍p tiāⁿ-tio̍h ê lē, kàu tī kin-á-ji̍t; Hoat-ló tit-tio̍h gō͘-hūn ê chi̍t-hūn; to̍k-to̍k chè-si ê tōe bô kui Hoat-ló.

27以色列人khiā起埃及國，Ko-san ê地，in tī-hia建置產業，koh生湠極其chōe。Í-sek-lia̍t lâng khiā-khí Ai-ki̍p kok, Ko-san ê tōe, in tī-hia kiàn-tì sán-gia̍p, koh siⁿ-thòaⁿ ke̍k-kî chōe.

28雅各tiàm-tī埃及地十七年。雅各一生ê年日是一百四十七歲。Ngá-kok tiàm tī Ai-ki̍p tōe cha̍p-chhit nî. Ngá-kok it-seng ê nî-ji̍t sī chi̍t-pah sì-cha̍p-chhit hè.

29以色列死ê日近lah；伊就叫伊ê kiáⁿ約瑟來，kā伊講，我若tī你ê面前得tio̍h恩典，請你下手tī我ê大腿下，用慈愛kap誠實款待我；m̄-thang埋葬我tī埃及。Í-sek-lia̍t sí ê ji̍t kūn lah; i chiū kiò i ê kiáⁿ Iok-sek lâi, kā i kóng, Góa nā tī lí ê bīn-chêng tit-tio̍h un-tián, chhiáⁿ lí hē chhiú tī góa ê tōa-thúi-ē, ēng chû-ài kap sêng-si̍t khoán-thāi góa; m̄-thang bâi-chòng góa tī Ai-ki̍p.

30我kap我ê父公同睏ê時，你tio̍h將我帶出埃及，埋葬tī in埋葬ê地。約瑟講，我beh照你ê話來行。Góa kap góa ê pē-kong tâng-khùn ê sî, lí tio̍h chiong góa tòa chhut Ai-ki̍p, bâi-chòng tī in bâi-chòng ê tōe. Iok-sek kóng, Góa beh chiàu lí ê ōe lâi kiâⁿ.

31雅各講，你tio̍h對我chiù-chōa；伊就對伊chiù-chōa。Tùi án-ni，以色列óa床頭敬拜上帝。Ngá-kok kóng, Lí tio̍h tùi góa chiù-chōa; i chiū tùi i chiù-chōa. Tùi án-ni Í-sek-lia̍t óa chhn̂g-thâu kèng-pài Siōng-tè.