1Chiah-ê tāi-chì了後，有人kā約瑟講，Lín老父破病lah；伊就chhōa伊兩個kiáⁿ Má-ná-se、Í-hoat-liân，相kap去。Chiah ê tāi-chì liáu-āu, ū lâng kā Iok-sek kóng, Lín lāu-pē phòa-pīⁿ lah; i chiū chhōa i nn̄g ê kiáⁿ Má-ná-se, Í-hoat-liân, saⁿ-kap khì.

2有人通知雅各講，你看，你ê kiáⁿ約瑟來beh chhē你；以色列就勉強起來，坐tī眠床。Ū lâng thong-ti Ngá-kok kóng, Lí khòaⁿ, lí ê kiáⁿ Iok-sek lâi beh chhē lí; Í-sek-lia̍t chiū bián-kióng khí-lâi, chē tī bîn-chhn̂g.

3雅各kā約瑟講，全能ê上帝bat tī迦南地ê Lō͘-su對我出現，賜福我；Ngá-kok kā Iok-sek kóng, Choân-lêng ê Siōng-tè bat tī Ka-lâm tōe ê Lō͘-su tùi góa chhut-hiān, sù-hok góa;

4kā我講，我beh hō͘你生湠chōe-chōe，成做chōe-chōe百姓；亦beh將chit-ê地賞賜你ê後裔，做永遠ê業。kā góa kóng, Góa beh hō͘ lí siⁿ-thòaⁿ chōe-chōe, chiâⁿ-chòe chōe-chōe peh-sìⁿ; ia̍h beh chiong chit ê tōe siúⁿ-sù lí ê hō͘-è, chòe éng-oán ê gia̍p.

5我未到埃及你chia ê事先，你tī埃及地所生兩個kiáⁿ，Í-hoat-liân、Má-ná-se，是我ê，親像Liû-piān西門是我ê一樣。Góa bē kàu Ai-ki̍p lí chia ê tāi-seng, lí tī Ai-ki̍p tōe só͘ siⁿ nn̄g ê kiáⁿ, Í-hoat-liân Má-ná-se, sī góa-ê, chhin-chhiūⁿ Liû-piān Se-biān sī góa-ê chi̍t-iūⁿ.

6Tī in以後，你所生ê kiáⁿ，就是你ê；in thang歸tī in兩個兄ê名下，得tio̍h業。Tī in í-āu, lí só͘ siⁿ ê kiáⁿ, chiū-sī lí ê; in thang kui tī in nn̄g ê hiaⁿ ê miâ-ē, tit-tio̍h gia̍p.

7論到我，我tùi Pa-tàn來ê時，拉結死tī我ê目睭前，tī迦南地，tī路裡ê中間，離開Í-hoat-tha iáu有一站；我就kā伊埋葬tī Í-hoat-tha ê路。(Í-hoat-tha就是伯利恆)Lūn-kàu góa, góa tùi Pa-tàn lâi ê sî, La̍h-kiat sí tī góa ê ba̍k-chiu-chêng, tī Ka-lâm tōe, tī lō͘-ni̍h ê tiong-kan, lī-khui Í-hoat-tha iáu ū chi̍t-chām; góa chiū kā i bâi-chòng tī Í-hoat-tha ê lō͘. (Í-hoat-tha chiū-sī Pek-lī-hêng)

8以色列看見約瑟兩個kiáⁿ，就講，這是是誰？Í-sek-lia̍t khòaⁿ-kìⁿ Iok-sek nn̄g ê kiáⁿ, chiū kóng, Che sī chī-chūi?

9約瑟kā in老父講，這是我ê kiáⁿ，上帝tī-chia賞賜我ê。講，請你chhōa in óa近我；我beh kā in祝福。Iok-sek kā in lāu-pē kóng, Che sī góa ê kiáⁿ, Siōng-tè tī-chia siúⁿ-sù góa-ê. Kóng, Chhiáⁿ lí chhōa in óa-kūn góa; góa beh kā in chiok-hok.

10以色列年老，目睭花bōe看見；約瑟chhōa in近óa伊ê面前，伊就kā in chim嘴抱in。Í-sek-lia̍t nî-lāu, ba̍k-chiu hoe bōe khòaⁿ-kìⁿ; Iok-sek chhōa in kūn-óa i ê bīn-chêng, i chiū kā in chim-chhùi phō in.

11以色列kā約瑟講，我無phah算會見tio̍h你ê面；taⁿ上帝koh hō͘我看tio̍h你ê kiáⁿ。Í-sek-lia̍t kā Iok-sek kóng, Góa bô phah-sǹg ōe kìⁿ-tio̍h lí ê bīn; taⁿ Siōng-tè koh hō͘ góa khòaⁿ-tio̍h lí ê kiáⁿ.

12約瑟將兩個kiáⁿ tùi伊兩個腳頭u中chhōa出來；本身就仆落地拜。Iok-sek chiong nn̄g ê kiáⁿ tùi i nn̄g ê kha-thâu-u-tiong chhōa-chhut-lâi; pún-sin chiū phak-lo̍h tōe pài.

13後來約瑟koh牽in兩個，chiàⁿ手牽Í-hoat-liân ǹg以色列ê tò手，tò手牽Má-ná-se ǹg以色列ê chiàⁿ手，chhōa in近óa伊。Āu-lâi Iok-sek koh khan in nn̄g-ê, chiàⁿ-chhiú khan Í-hoat-liân ǹg Í-sek-lia̍t ê tò-chhiú, tò-chhiú khan Má-ná-se ǹg Í-sek-lia̍t ê chiàⁿ-chhiú, chhōa in kūn-óa i.

14以色列伸chiàⁿ手hōaⁿ Í-hoat-liân ê頭殼，伊是第二個，koh phah叉用tò手hōaⁿ Má-ná-se ê頭殼，Má-ná-se本是大kiáⁿ。Í-sek-lia̍t chhun chiàⁿ-chhiú hōaⁿ Í-hoat-liân ê thâu-khak, i sī tē-jī-ê, koh phah-chhe ēng tò-chhiú hōaⁿ Má-ná-se ê thâu-khak, Má-ná-se pún sī tōa-kiáⁿ.

15伊就kā約瑟祝福講，願我ê祖亞伯拉罕，kap我ê父以撒，所行tī伊面前ê上帝，就是一生保養我到tī今á日ê上帝，I chiū kā Iok-sek chiok-hok kóng, Goān góa ê chó͘ A-pek-la̍h-hán, kap góa ê pē Í-sat, só͘ kiâⁿ tī I bīn-chêng ê Siōng-tè, chiū-sī it-seng pó-iúⁿ góa kàu tī kin-á-ji̍t ê Siōng-tè,

16救贖我脫離一切ê患難，hit-ê使者，賜福hō͘ chit兩個gín-á；願in歸tī我ê名下，kap我祖亞伯拉罕，我ê父以撒，ê名下；koh願in tī世界中生湠真chōe。kiù-sio̍k góa thoat-lī it-chhè ê hoān-lān, hit ê Sù-chiá, sù-hok hō͘ chí nn̄g ê gín-á; goān in kui tī góa ê miâ-ē, kap góa chó͘ A-pek-la̍h-hán, góa ê pē Í-sat, ê miâ-ē; koh goān in tī sè-kài-tiong siⁿ-thòaⁿ chin-chōe.

17約瑟看伊ê老父用chiàⁿ手hōaⁿ tī Í-hoat-liân ê頭殼，無歡喜；就tháⁿ伊ê老父ê手，beh tùi Í-hoat-liân ê頭殼徙到Má-ná-se ê頭殼。Iok-sek khòaⁿ i ê lāu-pē ēng chiàⁿ-chhiú hōaⁿ tī Í-hoat-liân ê thâu-khak, bô hoaⁿ-hí; chiū tháⁿ i ê lāu-pē ê chhiú, beh tùi Í-hoat-liân ê thâu-khak sóa kàu Má-ná-se ê thâu-khak.

18約瑟kā伊ê老父講，我ê父ah，m̄是án-ni；chit-ê是大kiáⁿ，求你用chiàⁿ手hōaⁿ伊ê頭殼。Iok-sek kā i ê lāu-pē kóng, Góa ê pē ah, m̄-sī án-ni; chit-ê sī tōa-kiáⁿ, kiû lí ēng chiàⁿ-chhiú hōaⁿ i ê thâu-khak.

19伊ê老父m̄-thàn講，我知，我ê kiáⁿ，我知；伊亦beh成做一族，亦beh闊大；總是伊ê小弟將來比伊khah大；伊ê小弟ê後裔beh成做chōe-chōe族。I ê lāu-pē m̄-thàn kóng, Góa chai, góa ê kiáⁿ, góa chai; i ia̍h beh chiâⁿ-chòe chi̍t-cho̍k, ia̍h beh khoah-tōa; chóng-sī i ê sió-tī chiong-lâi pí i khah-tōa; i ê sió-tī ê hō͘-è beh chiâⁿ-chòe chōe-chōe cho̍k.

20當hit日就kā in祝福講，以色列人beh kí你來祝福人講，願上帝hō͘你親像Í-hoat-liân，親像Má-ná-se一樣；tùi án-ni立Í-hoat-liân tī Má-ná-se ê事先。Tng hit-ji̍t chiū kā in chiok-hok kóng, Í-sek-lia̍t lâng beh kí lí lâi chiok-hok lâng kóng, Goān Siōng-tè hō͘ lí chhin-chhiūⁿ Í-hoat-liân, chhin-chhiūⁿ Má-ná-se chi̍t-iūⁿ; tùi án-ni li̍p Í-hoat-liân tī Má-ná-se ê tāi-seng.

21以色列koh kā約瑟講，我beh死lah；總是上帝beh kap你tī-teh，beh chhōa lín tò去lín列祖ê地。Í-sek-lia̍t koh kā Iok-sek kóng, Góa beh sí lah; chóng-sī Siōng-tè beh kap lí tī-teh, beh chhōa lín tò-khì lín lia̍t-chó͘ ê tōe.

22我前用我ê弓，我ê刀，tùi A-mô͘-lī人ê手搶來hit塊地，我taⁿ hō͘你，比你ê兄弟得tio̍h khah加。Góa chêng ēng góa ê keng, góa ê to, tùi A-mô͘-lī lâng ê chhiú chhiúⁿ-lâi hit tè-tōe, góa taⁿ hō͘ lí, pí lí ê hiaⁿ-tī tit-tio̍h khah-ke.

1雅各叫伊hiah-ê kiáⁿ來講，Lín lóng聚集，我beh將lín日後所會tú-tio̍h ê事kā lín講。Ngá-kok kiò i hiah ê kiáⁿ lâi kóng, Lín lóng chū-chi̍p, góa beh chiong lín ji̍t-āu só͘ ōe tú-tio̍h ê sū kā lín kóng.

2雅各chiah-ê kiáⁿ，lín tio̍h聚集來聽， Tio̍h聽lín老父ê話。Ngá-kok chiah ê kiáⁿ, lín tio̍h chū-chi̍p lâi thiaⁿ, Tio̍h thiaⁿ lín lāu-pē ê ōe.

3Liû-piān ah，你是我ê大kiáⁿ，我ê權勢，我ê氣力ê起頭， 威嚴ê特色ê，權能ê特色ê。Liû-piān ah, lí sī góa ê tōa-kiáⁿ, góa ê koân-sè, góa ê khùi-la̍t ê khí-thâu, Ui-giâm ê te̍k-sek-ê, koân-lêng ê te̍k-sek-ê.

4總是你親像水teh-kún，的確bōe得tio̍h居頭位； 因為你peh上lín老父ê眠床； hit時你phah lâ-sâm伊；伊peh上我ê舖。Chóng-sī lí chhin-chhiūⁿ chúi teh-kún, tek-khak bōe tit-tio̍h ku thâu-ūi; In-ūi lí peh-chiūⁿ lín lāu-pē ê bîn-chhn̂g; Hit-sî lí phah lâ-sâm i; i peh-chiūⁿ góa ê pho͘.

5西門利未是兄弟； In ê刀劍是兇惡ê器具。Se-biān Lī-bī sī hiaⁿ-tī; In ê to-kiàm sī hiong-ok ê khì-kū.

6我ê心神ah，你m̄-thang kap in同計謀； 我ê神魂ah，你m̄-thang kap in ê會眾連絡。 因為in thèng起受氣，thâi死人， Iⁿ chhut-chāi 意思割斷牛腿ê大筋。Góa ê sim-sîn ah, lí m̄-thang kap in tâng kè-bô͘; Góa ê sîn-hûn ah, lí m̄-thang kap in ê hōe-chiòng liân-lo̍k. In-ūi in thèng-khí siū-khì, thâi-sí lâng, In chhut-chāi ì-sù koah-tn̄g gû-thúi ê tōa-kun.

7In ê受氣燥暴，thang咒詛；In ê恨氣殘忍，亦是thang咒詛； 我beh分開in tī雅各家， 四散in tī以色列族。In ê siū-khì sò-pō, thang chiù-chó͘; In ê hūn-khì chân-jím, ia̍h sī thang chiù-chó͘; Góa beh pun-khui in tī Ngá-kok ke, Sì-sòaⁿ in tī Í-sek-lia̍t cho̍k.

8猶大ah，你ê兄弟beh o-ló你； 你ê手beh chhi̍h對敵ê頷頸； 你ê老父ê kiáⁿ beh仆拜tī你ê面前。Iû-tāi ah, lí ê hiaⁿ-tī beh o-ló lí; Lí ê chhiú beh chhi̍h tùi-te̍k ê ām-kún; Lí ê lāu-pē ê kiáⁿ beh phak-pài tī lí ê bīn-chêng.

9猶大是細隻獅； 我ê kiáⁿ ah，你tùi所jiàu-tio̍h ê物，就上去； 伊屈落，伊thìⁿ腳，親像獅； 亦親像母ê獅，是誰敢惹伊？Iû-tāi sī sòe-chiah sai; Góa ê kiáⁿ ah, lí tùi só͘ jiàu-tio̍h ê mi̍h, chiū chiūⁿ-khì; I khut-lo̍h, i thìⁿ-kha, chhin-chhiūⁿ sai; Ia̍h chhin-chhiūⁿ bú ê sai, chī-chūi káⁿ jiá i?

10權柄無離開猶大， 治理ê無離開伊兩支腳ê中間， 到Sī-lô來； 列邦lóng beh歸伊。Koân-pèng bô lī-khui Iû-tāi, Tī-lí-ê bô lī-khui i nn̄g ki kha ê tiong-kan, Kàu Sī-lô lâi; Lia̍t-pang lóng beh kui i.

11縛伊ê驢á tī葡萄樹， 縛伊ê驢á-kiáⁿ tī好ê葡萄樹； 用葡萄酒洗伊ê衣服， 用葡萄汁洗伊ê衣裳。Pa̍k i ê lû-á tī phû-tô-chhiū, Pa̍k i ê lû-á-kiáⁿ tī hó ê phû-tô-chhiū; Ēng phû-tô-chiú sóe i ê i-ho̍k, Ēng phû-tô-chiap sóe i ê i-chiûⁿ.

12伊ê目睭因為酒來紅， 伊ê嘴齒因為奶來白。I ê ba̍k-chiu in-ūi chiú lâi âng, I ê chhùi-khí in-ūi leng lâi pe̍h.

13Se-pò͘-lûn beh khiā起海口， Beh做拋船ê海口； 伊ê界beh到Se-tùn。Se-pò͘-lûn beh khiā-khí hái-kháu, Beh chòe pha-chûn ê hái-kháu; I ê kài beh kàu Se-tùn.

14Í-sat-ka是勇ê驢， 倒tī羊寮ê中間；Í-sat-ka sī ióng ê lû, Tó tī iûⁿ-tiâu ê tiong-kan;

15伊看安靜做好，看土地做súi； Àⁿ肩頭擔teh，成做勞苦ê奴僕。I khòaⁿ an-chēng chòe hó, khòaⁿ thó͘-tōe chòe súi; Àⁿ keng-thâu taⁿ-teh, chiâⁿ-chòe lô-khó͘ ê lô͘-po̍k.

16Tàn beh判斷伊ê百姓， 親像以色列支派ê一個。Tàn beh phòaⁿ-toàn i ê peh-sìⁿ, Chhin-chhiūⁿ Í-sek-lia̍t chi-phài ê chi̍t-ê.

17Tàn beh做路裡ê蛇， 路中ê毒蛇； 咬傷馬蹄，騎ê人hiàⁿ tùi後面落去。Tàn beh chòe lō͘-ni̍h ê chôa, Lō͘-tiong ê to̍k-chôa; Kā-siong bé-tôe, khiâ ê lâng hiàⁿ tùi āu-bīn lo̍h-khì.

18耶和華ah，我有thèng候你ê拯救。Iâ-hô-hoa ah, góa ū thèng-hāu Lí ê chín-kiù.

19Ka-tek beh hō͘軍隊追逼， 總是伊beh追逼in ê腳後tiⁿ。Ka-tek beh hō͘ kun-tūi tui-pek, Chóng-sī i beh tui-pek in ê kha-āu-tiⁿ.

20A-siat beh出好ê米糧， Koh出王所食ê好物。A-siat beh chhut hó ê bí-niû, Koh chhut ông só͘ chia̍h ê hó-mi̍h.

21Ná-hut-tha-lī是tháu放ê鹿母， 出好聽ê話。Ná-hut-tha-lī sī tháu-pàng ê lo̍k-bú, Chhut hó-thiaⁿ ê ōe.

22約瑟是gâu結果子ê樹枝； 伊ê樹枝伸出牆外。Iok-sek sī gâu kiat ké-chí ê chhiū-ki; I ê chhiū-ki chhun-chhut chhiûⁿ-gōa.

23射箭ê人大傷害伊，用箭射伊，窘迫伊；Siā-chìⁿ ê lâng tōa siong-hāi i, Ēng chìⁿ siā i, khún-pek i;

24總是伊ê弓猶原ân， 伊ê手也得tio̍h有力； 這是tùi雅各ê全能ê ê手， (Tùi這就有出牧者，以色列ê石磐) ，Chóng-sī i ê keng iû-goân ân, I ê chhiú iā tit-tio̍h ū la̍t; Che sī tùi Ngá-kok ê Choân-lêng-ê ê chhiú, (Tùi che chiū ū chhut bo̍k-chiá, Í-sek-lia̍t ê chio̍h-pôaⁿ),

25亦對你ê父ê上帝，伊beh幫贊你； Koh對hit-ê全能ê，伊beh賜福你；Beh用天頂降落ê福氣，深淵所khǹg ê福氣，以及食奶生產ê福氣，lóng beh hō͘你。Ia̍h tùi lí ê pē ê Siōng-tè, I beh pang-chān lí; Koh tùi hit ê Choân-lêng-ê, I beh sù-hok lí; Beh ēng thiⁿ-téng kàng-lo̍h ê hok-khì, Chhim-ian só͘ khǹg ê hok-khì, Í-ki̍p chia̍h-leng seng-sán ê hok-khì, lóng beh hō͘ lí.

26你ê老父所祝ê福氣， 贏過我ê父公所祝ê福氣， 直到永世代ê山嶺極頭ê邊界； Chiah-ê福氣beh降落tī約瑟ê頭殼， 臨到hit-ê kap兄弟特別ê ê頭殼頂。Lí ê lāu-pē só͘ chiok ê hok-khì, Iâⁿ-kè góa ê pē-kong só͘ chiok ê hok-khì, Ti̍t-kàu éng sè-tāi ê soaⁿ-niá ke̍k-thâu ê piⁿ-kài; Chiah ê hok-khì beh kàng-lo̍h tī Iok-sek ê thâu-khak, Lîm-kàu hit ê kap hiaⁿ-tī te̍k-pia̍t-ê ê thâu-khak-téng.

27便雅憫是gâu peh拆ê豺狼； 早起時食伊所抓tio̍h ê， Ê-hng時分伊所搶tio̍h ê。Piān-ngá-bín sī gâu peh-thiah ê chhâi-lông; Chá-khí-sî chia̍h i só͘ jiàu-tio̍h-ê, Ê-hng-sî pun i só͘ chhiúⁿ-tio̍h ê.

28這一切是以色列ê十二支派；這亦是in ê老父對in所講ê話，kā in所祝福ê；lóng是照ta̍k人ê福份，kā in祝福。Che it-chhè sī Í-sek-lia̍t ê cha̍p-jī chi-phài; che ia̍h sī in ê lāu-pē tùi in só͘ kóng ê ōe, kā in só͘ chiok-hok-ê; lóng sī chiàu ta̍k-lâng ê hok-hūn, kā in chiok-hok.

29伊koh吩咐in講，我beh tò去我ê列祖hia，lín tio̍h將我埋葬tī Hek人Í-hut-lûn 田裡ê穴，kap我ê父公siâng所在；I koh hoan-hù in kóng, Góa beh tò-khì góa ê lia̍t-chó͘ hia, lín tio̍h chiong góa bâi-chòng tī Hek-lâng Í-hut-lûn chhân-ni̍h ê hia̍t, kap góa ê pē-kong siâng só͘-chāi;

30就是tī迦南地Bān-lī ê面前，Be̍k-pí-la̍h 田裡ê穴；hit-ê 穴kap田是亞伯拉罕tùi Hek人Í-hut-lûn買做業，來做墓地ê。chiū-sī tī Ka-lâm tōe Bān-lī ê bīn-chêng, Be̍k-pí-la̍h chhân-ni̍h ê hia̍t; hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê.

31Tī-hia埋葬亞伯拉罕kap伊ê bó͘撒拉；koh tī-hia埋葬以撒kap伊ê bó͘利百加；我亦tī-hia埋葬利亞。Tī-hia bâi-chòng A-pek-la̍h-hán kap i ê bó͘ Sat-la̍h; koh tī-hia bâi-chòng Í-sat kap i ê bó͘ Lī-pek-ka; góa ia̍h tī-hia bâi-chòng Lī-a.

32Hit坵田kap hit內面ê穴，是tùi Hek人買ê。Hit khu chhân kap hit lāi-bīn ê hia̍t, sī tùi Hek-lâng bóe-ê.

33雅各吩咐伊hiah-ê kiáⁿ明白，腳kiu上床，就氣斷，tò去伊ê列祖hia。Ngá-kok hoan-hù i hiah ê kiáⁿ bêng-pe̍k, kha kiu-chiūⁿ chhn̂g, chiū khùi tn̄g, tò-khì i ê lia̍t-chó͘ hia.

1約瑟仆tī伊ê老父ê面，啼哭，chim伊。Iok-sek phak tī i ê lāu-pē ê bīn, thî-khàu, chim-i.

2約瑟吩咐伺候伊ê醫生，用香料灌伊ê老父；醫生就用香料灌以色列。Iok-sek hoan-hù su-hāu i ê i-seng, ēng hiuⁿ-liāu koàn i ê lāu-pē; i-seng chiū ēng hiuⁿ-liāu koàn Í-sek-lia̍t.

3灌身屍定tio̍h ê例tio̍h四十日；hit-ê四十日滿，koh埃及人為伊啼哭七十日。Koàn sin-si tiāⁿ-tio̍h ê lē tio̍h sì-cha̍p ji̍t; hit ê sì-cha̍p ji̍t móa, koh Ai-ki̍p lâng ūi i thî-khàu chhit-cha̍p ji̍t.

4為tio̍h伊啼哭ê日已經過，約瑟tùi法老家內ê人講，我若tī lín ê面前得tio̍h恩典，請lín通知法老，kā伊講，Ūi-tio̍h i thî-khàu ê ji̍t í-keng kè, Iok-sek tùi Hoat-ló ke-lāi ê lâng kóng, Góa nā tī lín ê bīn-chêng tit-tio̍h un-tián, chhiáⁿ lín thong-ti Hoat-ló, kā i kóng,

5我ê老父kah我chiù-chōa講，我beh死lah，你tio̍h將我埋葬tī迦南地，tī我為本身所掘ê墓；taⁿ求你准我上去埋葬我ê老父，然後我beh 倒tńg來。Góa ê lāu-pē kah góa chiù-chōa kóng, Góa beh sí lah, lí tio̍h chiong góa bâi-chòng tī Ka-lâm tōe, tī góa ūi pún-sin só͘ ku̍t ê bōng; taⁿ kiû lí chún góa chiūⁿ-khì bâi-chòng góa ê lāu-pē, jiân-āu góa beh tò-tńg-lâi.

6法老講，你thang上去埋葬你ê老父，照伊所kah你chiù ê chōa。Hoat-ló kóng, Lí thang chiūⁿ-khì bâi-chòng lí ê lāu-pē, chiàu i só͘ kah lí chiù ê chōa.

7Tùi án-ni，約瑟上去埋葬伊ê老父；kap伊相kap上去ê，有法老ê眾人臣，kap法老家內ê長老，kap埃及國眾長老。Tùi án-ni Iok-sek chiūⁿ-khì bâi-chòng i ê lāu-pē; kap i saⁿ-kap chiūⁿ-khì ê, ū Hoat-ló ê chèng jîn-sîn, kap Hoat-ló ke-lāi ê tióng-ló, kap Ai-ki̍p kok chèng tióng-ló.

8Koh有約瑟全家，kap伊hiah-ê兄弟，以及伊ê老父ê家眷；只有in ê gín-á，kap羊群、牛群，lóng留tī Ko-san地。Koh ū Iok-sek choân-ke, kap i hiah ê hiaⁿ-tī, í-ki̍p i ê lāu-pē ê ke-koàn; chí-ū in ê gín-á, kap iûⁿ-kûn gû-kûn, lóng lâu tī Ko-san tōe.

9Koh有車kap騎馬ê，hit陣ê人不止chōe。Koh ū chhia kap khiâ-bé-ê, hit-tīn ê lâng put-chí chōe.

10In到約旦河外，A-ta̍t ê五穀場，就tī-hia大啼哭，大哀傷；約瑟為tio̍h老父悲哀七日。In kàu Iok-tàn hô gōa, A-ta̍t ê gō͘-kak-tiûⁿ, chiū tī-hia tōa thî-khàu, tōa ai-siong; Iok-sek ūi-tio̍h lāu-pē pi-ai chhit-ji̍t.

11迦南地khiā起ê百姓看見A-ta̍t五穀場ê啼哭，就講，這是埃及人一場ê大啼哭；因為án-ni，hit-ê地名叫A-pek-be̍k-se，是tī約旦河外。Ka-lâm tōe khiā-khí ê peh-sìⁿ khòaⁿ-kìⁿ A-ta̍t gō͘-kak-tiûⁿ ê thî-khàu, chiū kóng, Che sī Ai-ki̍p lâng chi̍t-tiûⁿ ê tōa thî-khàu; in-ūi án-ni, hit ê tōe miâ kiò A-pek-be̍k-se, sī tī Iok-tàn hô gōa.

12雅各hiah-ê kiáⁿ就照老父所吩咐ê kā伊做；Ngá-kok hiah ê kiáⁿ chiū chiàu lāu-pē só͘ hoan-hù-ê kā i chòe;

13hiah-ê kiáⁿ將伊運到迦南地，埋葬tī Bān-lī ê頭前，Be̍k-pí-la̍h 田裡ê穴，hit-ê穴kap田是亞伯拉罕tùi Hek人Í-hut-lûn買做業，來做墓地ê。hiah ê kiáⁿ chiong i ūn kàu Ka-lâm tōe, bâi-chòng tī Bān-lī ê thâu-chêng, Be̍k-pí-la̍h chhân-ni̍h ê hia̍t, hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê.

14約瑟埋葬in老父以後，就kap眾兄弟，以及一切kap伊上去埋葬in老父ê人，lóng 倒tńg埃及。Iok-sek bâi-chòng in lāu-pē í-āu, chiū kap chèng hiaⁿ-tī, í-ki̍p it-chhè kap i chiūⁿ-khì bâi-chòng in lāu-pē ê lâng, lóng tò-tńg Ai-ki̍p.

15約瑟hiah-ê兄看in老父已經死，就講，Kiám-chhái約瑟beh怨恨咱，照咱前款待伊lóng總ê pháiⁿ，一盡報應咱。Iok-sek hiah ê hiaⁿ khòaⁿ in lāu-pē í-keng sí, chiū kóng, Kiám-chhái Iok-sek beh oàn-hūn lán, chiàu lán chêng khoán-thāi i lóng-chóng ê pháiⁿ, it-chīn pò-èng lán.

16In就託人去見約瑟講，你ê老父未死ê事先，吩咐講，In chiū thok lâng khì kìⁿ Iok-sek kóng, Lí ê lāu-pē bē sí ê tāi-seng, hoan-hù kóng,

17Lín tio̍h對約瑟án-ni講，前你chiah-ê兄pháiⁿ款待你，求你赦免in ê過失kap罪惡；taⁿ求你赦免你ê老父ê上帝ê奴僕ê過失。In對約瑟講chiah-ê話，約瑟就啼哭。Lín tio̍h tùi Iok-sek án-ni kóng, Chêng lí chiah ê hiaⁿ pháiⁿ khoán-thāi lí, kiû lí sià-bián in ê kè-sit kap chōe-ok; taⁿ kiû lí sià-bián lí ê lāu-pē ê Siōng-tè ê lô͘-po̍k ê kè-sit. In tùi Iok-sek kóng chiah ê ōe, Iok-sek chiū thî-khàu.

18伊chiah-ê兄koh來仆tī伊面前講，阮是你ê奴僕。I chiah ê hiaⁿ koh lâi phak tī i bīn-chêng kóng, Goán sī lí ê lô͘-po̍k.

19約瑟kā in講，m̄免驚；我kiám替上帝mah？Iok-sek kā in kóng, M̄-bián kiaⁿ; góa kiám thòe Siōng-tè mah?

20前lín ê意思是pháiⁿ，總是上帝ê意思是好；beh保全chōe-chōe人ê性命，親像今á日。Chêng lín ê ì-sù sī pháiⁿ, chóng-sī Siōng-tè ê ì-sù sī hó; beh pó-choân chōe-chōe lâng ê sìⁿ-miā, chhin-chhiūⁿ kin-á-ji̍t.

21Taⁿ lín m̄免驚；我beh養飼lín，kap lín ê kiáⁿ兒。Tùi án-ni，約瑟用親愛ê話安慰in。Taⁿ lín m̄-bián kiaⁿ; góa beh iúⁿ-chhī lín, kap lín ê kiáⁿ-jî. Tùi án-ni Iok-sek ēng chhin-ài ê ōe an-ùi in.

22約瑟kap in老父ê家眷lóng tiàm埃及；約瑟食百一歲。Iok-sek kap in lāu-pē ê ke-koàn lóng tiàm Ai-ki̍p; Iok-sek chia̍h pah-it hè.

23約瑟得tio̍h看見Í-hoat-liân第三代ê孫；Má-ná-se ê孫Má-kiat ê kiáⁿ，約瑟亦抱in tī腳頭u。Iok-sek tit-tio̍h khòaⁿ-kìⁿ Í-hoat-liân tē-saⁿ tāi ê sun; Má-ná-se ê sun Má-kiat ê kiáⁿ, Iok-sek ia̍h phō in tī kha-thâu-u.

24約瑟對伊ê兄弟講，我beh死lah；總是上帝的確看顧lín，chhōa lín tùi chit所在上去，到伊chiù-chōa應允hō͘亞伯拉罕、以撒、雅各ê地。Iok-sek tùi i ê hiaⁿ-tī kóng, Góa beh sí lah; chóng-sī Siōng-tè tek-khak khòaⁿ-kò͘ lín, chhōa lín tùi chit só͘-chāi chiūⁿ-khì, kàu I chiù-chōa èng-ún hō͘ A-pek-la̍h-hán, Í-sat, Ngá-kok ê tōe.

25約瑟kah以色列ê kiaⁿ孫chiù-chōa講，上帝的確照顧lín，lín tio̍h將我ê骨頭運上去。約瑟死，tú-á百一歲；人用香料kā伊灌；將伊收落棺，停tī埃及。Iok-sek kah Í-sek-lia̍t ê kiáⁿ-sun chiù-chōa kóng, Siōng-tè tek-khak chiàu-kò͘ lín, lín tio̍h chiong góa ê kut-thâu ūn-chiūⁿ-khì. Iok-sek sí, tú-á pah-it hè; lâng ēng hiuⁿ-liāu kā i koàn; chiong i siu-lo̍h koan, thêng tī Ai-ki̍p.