1Hit人kap伊ê bó͘夏娃同房；夏娃就懷孕生該隱，講，我tùi耶和華庇佑得tio̍h kiáⁿ。Hit-lâng kap i ê bó͘ Hā-oa tâng-pâng; Hā-oa chiū hoâi-īn siⁿ Kai-ún, kóng, Góa tùi Iâ-hô-hoa pì-iū tit-tio̍h kiáⁿ.

2Koh生伊ê小弟亞伯。亞伯是顧羊ê，該隱是作田ê。Koh siⁿ i ê sió-tī A-pek. A-pek sī kò͘-iûⁿ-ê, Kai-ún sī choh-chhân-ê.

3到日後，該隱將土產做禮物獻hō͘耶和華。Kàu ji̍t-āu, Kai-ún chiong thó͘-sán chòe lé-mi̍h hiàn hō͘ Iâ-hô-hoa.

4亞伯也將羊群中頭chiūⁿ生ê羊kap伊ê油the̍h來獻。耶和華眷顧亞伯kap伊ê禮物；A-pek iā chiong iûⁿ-kûn-tiong thâu-chiūⁿ-siⁿ ê iûⁿ kap i ê iû the̍h-lâi hiàn. Iâ-hô-hoa koàn-kò͘ A-pek kap i ê lé-mi̍h;

5總是無眷顧該隱kap伊ê禮物。該隱就大受氣，變面。chóng-sī bô koàn-kò͘ Kai-ún kap i ê lé-mi̍h. Kai-ún chiū tōa siū-khì, pìⁿ-bīn.

6耶和華對該隱講，你啥事受氣？你啥事變面？Iâ-hô-hoa tùi Kai-ún kóng, Lí siáⁿ-sū siū-khì? lí siáⁿ-sū pìⁿ-bīn?

7你若行好，kiám無得tio̍h監納？若無行好，罪孽埋伏tī門口；伊beh戀慕你，你beh管轄伊。Lí nā kiâⁿ-hó, kiám bô tit-tio̍h kàm-la̍p? nā bô kiâⁿ-hó, chōe-gia̍t bâi-ho̍k tī mn̂g-kháu; i beh loân-bō͘ lí, lí beh koán-hat i.

8該隱kā伊ê小弟講。以後in tī山裡ê時，該隱攻擊伊ê小弟亞伯，kā伊thâi死。Kai-ún kā i ê sió-tī kóng. Í-āu in tī soaⁿ-ni̍h ê sî, Kai-ún kong-kek i ê sió-tī A-pek, kā i thâi-sí.

9耶和華對該隱講，你ê小弟亞伯tī tah-lo̍h？伊講，m̄知；我kiám是顧守我ê小弟ê mah？Iâ-hô-hoa tùi Kai-ún kóng, Lí ê sió-tī A-pek tī tah-lo̍h? I kóng, M̄-chai; góa kiám-sī kò͘-siú góa ê sió-tī-ê mah?

10伊講，你有做甚麼？Lín小弟ê血ê聲tùi地裡喉叫我。I kóng, Lí ū chòe sím-mi̍h? Lín sió-tī ê huih ê siaⁿ tùi tōe-ni̍h âu-kiò Góa.

11地有開嘴對你ê手來接受lín小弟ê血，taⁿ你tùi chit-ê地受咒詛。Tōe ū khui-chhùi tùi lí ê chhiú lâi chiap-siū lín sió-tī ê huih, taⁿ lí tùi chit ê tōe siū chiù-chó͘.

12你種作，地無beh出土產hō͘你；你beh四界走，漂流地上。Lí chèng-choh, tōe bô beh chhut thó͘-sán hō͘ lí; lí beh sì-kòe cháu, phiau-liû tōe-chiūⁿ.

13該隱對耶和華講，我ê刑罰太重，過頭tī我所能當ê。Kai-ún tùi Iâ-hô-hoa kóng, Góa ê hêng-hoa̍t thài-tāng, kè-thâu tī góa só͘ ōe-tng-ê.

14你今á日趕我離開chit-ê地面，無thang tòa tī你ê面前；我四界走漂流地上；見若tú-tio̍h我ê beh thâi死我。Lí kin-á-ji̍t kóaⁿ góa lī-khui chit ê tōe-bīn, bô thang tòa tī Lí ê bīn-chêng; góa sì-kòe cháu phiau-liû tōe-chiūⁿ; kìⁿ-nā tú-tio̍h góa ê beh thâi-sí góa.

15耶和華對伊講，因為án-ni，見若thâi死該隱ê，beh受七倍ê報應。耶和華就kā該隱立一個記號，免得tú-tio̍h伊ê thâi死伊。Iâ-hô-hoa tùi i kóng, In-ūi án-ni, kìⁿ-nā thâi-sí Kai-ún ê, beh siū chhit-pē ê pò-èng. Iâ-hô-hoa chiū kā Kai-ún li̍p chi̍t ê kì-hō, bián-tit tú-tio̍h i ê thâi-sí i.

16該隱就離開耶和華ê面前，去tī伊甸ê東勢，羅得ê地，khiā起。Kai-ún chiū lī-khui Iâ-hô-hoa ê bīn-chêng, khì tī Ai-tiân ê tang-sì, Lô-tek ê tōe, khiā-khí.

17該隱kap伊ê bó͘同房；伊ê bó͘懷孕生以諾；該隱起城，就照伊ê kiáⁿ ê名稱hit-ê城ê名做以諾。Kai-ún kap i ê bó͘ tâng-pâng; i ê bó͘ hoâi-īn siⁿ Í-lo̍k; Kai-ún khí siâⁿ, chiū chiàu i ê kiáⁿ ê miâ chheng hit ê siâⁿ ê miâ chòe Í-lo̍k.

18以諾生Í-ná；Í-ná生Bí-hō͘-ngá-lī；Bí-hō͘-ngá-lī生Má-thó͘-sat-lī；Má-thó͘-sat-lī生La̍h-be̍k。Í-lo̍k siⁿ Í-ná; Í-ná siⁿ Bí-hō͘-ngá-lī; Bí-hō͘-ngá-lī siⁿ Má-thó͘-sat-lī; Má-thó͘-sat-lī siⁿ La̍h-be̍k.

19La̍h-be̍k chhōa兩個bó͘；一個名A-tāi，一個名Sé-la̍h。La̍h-be̍k chhōa nn̄g ê bó͘; chi̍t-ê miâ A-tāi, chi̍t-ê miâ Sé-la̍h.

20A-tāi生Ngá-pat；伊做khiā起布棚飼cheng-siⁿ ê人ê祖。A-tāi siⁿ Ngá-pat; i chòe khiā-khí pò͘-pîⁿ chhī cheng-siⁿ ê lâng ê chó͘.

21伊ê小弟名Iû-pat；伊是做一切彈琴pûn簫ê人ê祖。I ê sió-tī miâ Iû-pat; i sī chòe it-chhè tôaⁿ-khîm pûn-siau ê lâng ê chó͘.

22Sé-la̍h也生Thó͘-pat-kai-ún；伊就是製造ta̍k樣銅鐵利器ê；Thó͘-pat-kai-ún ê姊妹就是Ná-má。Sé-la̍h iā siⁿ Thó͘-pat-kai-ún; i chiū-sī chè-chō ta̍k-iūⁿ tâng thih lāi-khì ê; Thó͘-pat-kai-ún ê chí-bē chiū-sī Ná-má.

23La̍h-be̍k對伊兩個bó͘講： A-tāi kap Sé-la̍h ah，tio̍h聽我ê聲， La̍h-be̍k ê bó͘ ah，tio̍h致意聽我ê話； 人傷我，我thâi伊， 少年人害我，我thâi伊。La̍h-be̍k tùi i nn̄g ê bó͘ kóng: A-tāi kap Sé-la̍h ah, tio̍h thiaⁿ góa ê siaⁿ, La̍h-be̍k ê bó͘ ah, tio̍h tì-ì thiaⁿ góa ê ōe; Lâng siong góa, góa thâi i, Siàu-liân lâng hāi góa, góa thâi i.

24該隱ê伸冤若是七倍， 就La̍h-be̍k ê伸冤的確七十七倍。Kai-ún ê sin-oan nā sī chhit-pē, Chiū La̍h-be̍k ê sin-oan tek-khak chhit-cha̍p-chhit pē.

25亞當koh kap伊ê bó͘同房；伊ê bó͘生kiáⁿ，表名叫Siat；是講，上帝koh kā我設立一個kiáⁿ來替亞伯，因為該隱kā伊thâi死。A-tong koh kap i ê bó͘ tâng-pâng; i ê bó͘ siⁿ-kiáⁿ, piáu-miâ kiò Siat; sī kóng, Siōng-tè koh kā góa siat-li̍p chi̍t ê kiáⁿ lâi thòe A-pek, in-ūi Kai-ún kā i thâi-sí.

26Siat也生kiáⁿ，表名Í-lô-sū；hit時人chiah起頭求叫耶和華ê名。Siat iā siⁿ-kiáⁿ, piáu-miâ Í-lô-sū; hit-sî lâng chiah khí-thâu kiû-kiò Iâ-hô-hoa ê miâ.

1亞當ê世系記tī下底，當上帝創造人ê日，是照上帝ê款式來造伊；A-tong ê sè-hē kì tī ē-tóe. Tng Siōng-tè chhòng-chō lâng ê ji̍t, sī chiàu Siōng-tè ê khoán-sit lâi chō i;

2創造in ta-po͘ kap cha-bó͘；tī in受創造ê日，賜in福氣，稱in ê名叫人。chhòng-chō in ta-po͘ kap cha-bó͘; tī in siū chhòng-chō ê ji̍t, sù in hok-khì, chheng in ê miâ kiò Lâng.

3亞當一百三十歲生kiáⁿ照伊ê款，親像伊ê像，表名叫Siat。A-tong chi̍t-pah saⁿ-cha̍p hè siⁿ-kiáⁿ chiàu i ê khoán, chhin-chhiūⁿ i ê siōng, piáu miâ kiò Siat.

4亞當生Siat了後koh歷過八百年；其中iáu有生kiáⁿ cha-bó͘-kiáⁿ。A-tong siⁿ Siat liáu-āu koh le̍k-kè poeh-pah nî; kî-tiong iáu ū siⁿ kiáⁿ cha-bó͘-kiáⁿ.

5亞當計共享壽九百三十歲，chiah死。A-tong kè-kiōng hióng-siū káu-pah saⁿ-cha̍p hè, chiah sí.

6Siat一百連五歲，生Í-lô-sū。Siat chi̍t-pah liân gō͘ hè, siⁿ Í-lô-sū.

7Siat生Í-lô-sū ê了後iáu活八百連七年；其中有koh生kiáⁿ cha-bó͘-kiáⁿ。Siat siⁿ Í-lô-sū ê liáu-āu iáu oa̍h poeh-pah liân chhit nî; kî-tiong ū koh siⁿ kiáⁿ cha-bó͘-kiáⁿ.

8Siat計共享壽九百一十二歲，chiah死。Siat kè-kiōng hióng-siū káu-pah it-cha̍p-jī hè, chiah sí.

9Í-lô-sū九十歲，生Kai-lâm。Í-lô-sū káu-cha̍p hè, siⁿ Kai-lâm.

10Í-lô-sū生Kai-lâm ê了後iáu活八百一十五年；其中有koh生kiáⁿ cha-bó͘-kiáⁿ。Í-lô-sū siⁿ Kai-lâm ê liáu-āu iáu oa̍h poeh-pah it-cha̍p-gō͘ nî; kî-tiong ū koh siⁿ kiáⁿ cha-bó͘-kiáⁿ.

11Í-lô-sū計共享壽九百連五歲，chiah死。Í-lô-sū kè-kiōng hióng-siū káu-pah liân gō͘ hè, chiah sí.

12Kai-lâm七十歲，生Má-le̍k-lia̍t。Kai-lâm chhit-cha̍p hè, siⁿ Má-le̍k-lia̍t.

13Kai-lâm生Má-le̍k-lia̍t ê了後iáu活八百四十年；其中有koh生kiáⁿ cha-bó͘-kiáⁿ。Kai-lâm siⁿ Má-le̍k-lia̍t ê liáu-āu iáu oa̍h poeh-pah sì-cha̍p nî; kî-tiong ū koh siⁿ kiáⁿ cha-bó͘-kiáⁿ.

14Kai-lâm計共享壽九百一十歲，chiah死。Kai-lâm kè-kiōng hióng-siū káu-pah it-cha̍p hè, chiah sí.

15Má-le̍k-lia̍t六十五歲，生Ngá-lia̍t。Má-le̍k-lia̍t la̍k-cha̍p gō͘ hè, siⁿ Ngá-lia̍t.

16Má-le̍k-lia̍t生Ngá-lia̍t ê了後iáu活八百三十年；其中有koh生kiáⁿ cha-bó͘-kiáⁿ。Má-le̍k-lia̍t siⁿ Ngá-lia̍t ê liáu-āu iáu oa̍h poeh-pah saⁿ-cha̍p nî; kî-tiong ū koh siⁿ kiáⁿ cha-bó͘-kiáⁿ.

17Má-le̍k-lia̍t計共享壽八百九十五歲，chiah死。Má-le̍k-lia̍t kè-kiōng hióng-siū poeh-pah káu-cha̍p gō͘ hè, chiah sí.

18Ngá-lia̍t一百六十二歲，生以諾。Ngá-lia̍t chi̍t-pah la̍k-cha̍p jī hè, siⁿ Í-lo̍k.

19Ngá-lia̍t生以諾ê了後iáu活八百年；其中有koh生kiáⁿ cha-bó͘-kiáⁿ。Ngá-lia̍t siⁿ Í-lo̍k ê liáu-āu iáu oa̍h poeh-pah nî; kî-tiong ū koh siⁿ kiáⁿ cha-bó͘-kiáⁿ.

20Ngá-lia̍t計共享壽九百六十二歲，chiah死。Ngá-lia̍t kè-kiōng hióng-siū káu-pah la̍k-cha̍p jī hè, chiah sí.

21以諾六十五歲，生Má-thó͘-sat-la̍h。Í-lo̍k la̍k-cha̍p gō͘ hè, siⁿ Má-thó͘-sat-la̍h.

22以諾生Má-thó͘-sat-la̍h ê了後kap上帝相kap行三百年；其中有koh生kiáⁿ cha-bó͘-kiáⁿ。Í-lo̍k siⁿ Má-thó͘-sat-la̍h ê liáu-āu kap Siōng-tè saⁿ-kap kiâⁿ saⁿ-pah nî; kî-tiong ū koh siⁿ kiáⁿ cha-bó͘-kiáⁿ.

23以諾計共享壽三百六十五歲。Í-lo̍k kè-kiōng hióng-siū saⁿ-pah la̍k-cha̍p gō͘ hè.

24以諾kap上帝相kap行，上帝接伊去；伊就無tī-teh。Í-lo̍k kap Siōng-tè saⁿ-kap kiâⁿ, Siōng-tè chiap i khì; i chiū bô tī-teh.

25Má-thó͘-sat-la̍h一百八十七歲，生La̍h-be̍k。Má-thó͘-sat-la̍h chi̍t-pah poeh-cha̍p chhit hè, siⁿ La̍h-be̍k.

26Má-thó͘-sat-la̍h生La̍h-be̍k ê了後iáu活七百八十二年；其中有koh生kiáⁿ cha-bó͘-kiáⁿ。Má-thó͘-sat-la̍h siⁿ La̍h-be̍k ê liáu-āu iáu oa̍h chhit-pah poeh-cha̍p jī nî; kî-tiong ū koh siⁿ kiáⁿ cha-bó͘-kiáⁿ.

27Má-thó͘-sat-la̍h計共享壽九百六十九歲，chiah死。Má-thó͘-sat-la̍h kè-kiōng hióng-siū káu-pah la̍k-cha̍p káu hè, chiah sí.

28La̍h-be̍k一百八十二歲，生一個kiáⁿ，La̍h-be̍k chi̍t-pah poeh-cha̍p jī hè, siⁿ chi̍t ê kiáⁿ,

29表名叫挪亞，講，耶和華bat咒詛地，hō͘咱做工勞苦；taⁿ chit-ê kiáⁿ beh安慰咱。piáu-miâ kiò Ná-a, kóng, Iâ-hô-hoa bat chiù-chó͘ tōe, hō͘ lán chòe kang lô-khó͘; taⁿ chit ê kiáⁿ beh an-ùi lán.

30La̍h-be̍k生挪亞ê了後iáu活五百九十五年；其中有koh生kiáⁿ cha-bó͘-kiáⁿ。La̍h-be̍k siⁿ Ná-a ê liáu-āu iáu oa̍h gō͘-pah káu-cha̍p gō͘ nî; kî-tiong ū koh siⁿ kiáⁿ cha-bó͘-kiáⁿ.

31La̍h-be̍k計共享壽七百七十七歲，chiah死。La̍h-be̍k kè-kiōng hióng-siū chhit-pah chhit-cha̍p-chhit hè, chiah-sí.

32挪亞五百歲；生閃，含，雅弗。Ná-a gō͘-pah hè; siⁿ Siám, Hâm, Ngá-hut.

1人tī地上ná khah-chōe，也生cha-bó͘-kiáⁿ ê時，Lâng tī tōe-chiūⁿ ná khah-chōe, iā siⁿ cha-bó͘-kiáⁿ ê sî,

2上帝ê kiáⁿ看見人ê cha-bó͘-kiáⁿ súi，就照in所ài，娶in做bó͘。Siōng-tè ê kiáⁿ khòaⁿ-kìⁿ lâng ê cha-bó͘-kiáⁿ súi, chiū chiàu in só͘ ài, chhōa in chòe bó͘.

3耶和華講，人既然屬tī肉體，我ê神無beh永遠tiàm-tī in；但是in ê日子beh到一百二十年。Iâ-hô-hoa kóng, Lâng kì-jiân sio̍k tī jio̍k-thé, Góa ê Sîn bô beh éng-oán tiàm tī in; nā-sī in ê ji̍t-chí beh kàu chi̍t-pah jī-cha̍p nî.

4Tī hit時有大漢人tī地面上；後來上帝ê kiáⁿ kap人ê cha-bó͘-kiáⁿ同房，in就生kiáⁿ，就是tùi古早英雄有名聲ê人。Tī hit-sî ū tōa-hàn lâng tī tōe-bīn-chiūⁿ; āu-lâi Siōng-tè ê kiáⁿ kap lâng ê cha-bó͘-kiáⁿ tâng-pâng, in chiū siⁿ kiáⁿ, chiū-sī tùi kó͘-chá eng-hiông ū miâ-siaⁿ ê lâng.

5耶和華看見人tī地上，罪惡真大，心內所想ê念頭ta̍k日lóng是pháiⁿ。Iâ-hô-hoa khòaⁿ-kìⁿ lâng tī tōe-chiūⁿ, chōe-ok chin tōa, sim-lāi só͘ siūⁿ ê liām-thâu ta̍k-ji̍t lóng sī pháiⁿ.

6耶和華退悔伊造人tī世間；心內憂悶。Iâ-hô-hoa thè-hóe I chō lâng tī sè-kan; sim-lāi iu-būn.

7耶和華講，我beh tùi地上剿滅我所創造ê人；將人kap走獸、蟲thōa、飛鳥，lóng剿滅；因為我造in了有退悔。Iâ-hô-hoa kóng, Góa beh tùi tōe-chiūⁿ châu-bia̍t Góa só͘ chhòng-chō ê lâng; chiong lâng kap cháu-siù, thâng-thōa, pe-chiáu, lóng châu-bia̍t; in-ūi Góa chō in liáu ū thè-hóe.

8只有挪亞得tio̍h恩典tī耶和華ê面前。Chí-ū Ná-a tit-tio̍h un-tián tī Iâ-hô-hoa ê bīn-chêng.

9挪亞ê世系記tī下底，挪亞是義人；tī hit世代ê中間是完全ê人；挪亞kap上帝相kap行。Ná-a ê sè-hē kì tī ē-tóe. Ná-a sī gī-lâng; tī hit sè-tāi ê tiong-kan sī oân-choân ê lâng; Ná-a kap Siōng-tè saⁿ-kap kiâⁿ.

10挪亞生三個kiáⁿ，就是閃、含、雅弗。Ná-a siⁿ saⁿ ê kiáⁿ, chiū-sī Siám, Hâm, Ngá-hut.

11世界敗壞tī上帝ê面前；世界充滿強暴。Sè-kài pāi-hoāi tī Siōng-tè ê bīn-chêng; sè-kài chhiong-móa kiông-pō.

12上帝看世界lóng敗壞；因為見有肉體ê in tī世界ê行做lóng是敗壞。Siōng-tè khòaⁿ sè-kài lóng pāi-hoāi; in-ūi kìⁿ ū jio̍k-thé-ê in tī sè-kài ê kiâⁿ-chòe lóng sī pāi-hoāi.

13上帝tùi挪亞講，見有肉體ê我看in ê末期已經到，因為in ê強暴充滿tī世界；你看，我beh將in kap地做一下毀滅。Siōng-tè tùi Ná-a kóng, Kìⁿ ū jio̍k-thé-ê Góa khòaⁿ in ê boa̍t-kî í-keng kàu, in-ūi in ê kiông-pō chhiong-móa tī sè-kài; lí khòaⁿ, Góa beh chiong in kap tōe chòe chi̍t-ē húi-bia̍t.

14你tio̍h用松柏柴做大船，船內tio̍h隔房間，內外用瀝青油kô͘伊。Lí tio̍h ēng chhêng-peh-chhâ chòe tōa-chûn, chûn-lāi tio̍h keh pâng-keng, lāi-gōa ēng le̍k-chhiⁿ-iû kô͘ i.

15大船ê造法是án-ni：長三百肘，闊五十肘，高三十肘。Tōa-chûn ê chō-hoat sī án-ni: tn̂g saⁿ-pah tiú, khoah gō͘-cha̍p tiú, koâiⁿ saⁿ-cha̍p tiú.

16船tio̍h做窗á，高一肘；門tio̍h hē tī船邊；船tio̍h做三層，分上、中、下。Chûn tio̍h chòe thang-á, koâiⁿ chi̍t tiú; mn̂g tio̍h hē tī chûn-piⁿ; chûn tio̍h chòe saⁿ-chân, hun siōng, tiong, hā.

17你看，我，我beh hō͘大水氾濫tī地上，來毀滅天下見若有活氣ê肉體；見若tī地上ê lóng會死。Lí khòaⁿ, Góa, Góa beh hō͘ tōa chúi hoàn-lām tī tōe-chiūⁿ, lâi húi-bia̍t thiⁿ-ē kìⁿ-nā ū oa̍h-khì ê jio̍k-thé; kìⁿ-nā tī tōe-chiūⁿ-ê lóng ōe sí.

18總是我beh kap你立我ê約。你kap你ê kiáⁿ，你ê bó͘，你ê新婦，lóng tio̍h入大船。Chóng-sī Góa beh kap lí li̍p Góa ê iok. Lí kap lí ê kiáⁿ, lí ê bó͘, lí ê sim-pū, lóng tio̍h ji̍p tōa-chûn.

19見若有活氣ê肉體，ta̍k樣一對，一隻公ê，一隻母ê，你tio̍h帶in入大船，kap你相kap保全活命。Kìⁿ-nā ū oa̍h-khì ê jio̍k-thé, ta̍k-iūⁿ chi̍t-tùi, chi̍t-chiah kang-ê, chi̍t-chiah bú-ê, lí tio̍h tòa in ji̍p tōa-chûn, kap lí saⁿ-kap pó-choân oa̍h-miā.

20飛鳥各照伊ê類，cheng-siⁿ各照伊ê類，地上ê蟲thōa各照伊ê類，ta̍k樣一對beh到你hia來保全in ê活命。Pe-chiáu kok chiàu i ê lūi, cheng-siⁿ kok chiàu i ê lūi, tōe-chiūⁿ ê thâng-thōa kok chiàu i ê lūi, ta̍k-iūⁿ chi̍t-tùi beh kàu lí hia lâi pó-choân in ê oa̍h-miā.

21你tio̍h the̍h ta̍k樣ê食物積聚teh，thang做你kap in ê食物。Lí tio̍h the̍h ta̍k-iūⁿ ê chia̍h-mi̍h chek-chū-teh, thang chòe lí kap in ê chia̍h-mi̍h.

22挪亞就án-ni行；照上帝lóng總所命令ê去行。Ná-a chiū án-ni kiâⁿ; chiàu Siōng-tè lóng-chóng só͘ bēng-lēng-ê khì kiâⁿ.