1耶和華對挪亞講，你kap你全家lóng tio̍h入大船；因為tī chit世代ê中間我看見你tī我ê面前是義人。Iâ-hô-hoa tùi Ná-a kóng, Lí kap lí choân-ke lóng tio̍h ji̍p tōa-chûn; in-ūi tī chit sè-tāi ê tiong-kan Góa khòaⁿ-kìⁿ lí tī Góa ê bīn-chêng sī gī-lâng.

2見若清氣ê cheng-siⁿ，你tio̍h帶七隻公ê，七隻母ê；無清氣ê cheng-siⁿ，你tio̍h帶一隻公ê，一隻母ê。Kìⁿ-nā chheng-khì ê cheng-siⁿ, lí tio̍h tòa chhit-chiah kang-ê, chhit-chiah bú-ê; bô chheng-khì ê cheng-siⁿ, lí tio̍h tòa chi̍t-chiah kang-ê, chi̍t-chiah bú-ê.

3天裡ê鳥也tio̍h帶，七隻公ê，七隻母ê，thang留in ê種活tī全地。Thiⁿ-ni̍h ê chiáu iā tio̍h tòa, chhit-chiah kang-ê, chhit-chiah bú-ê, thang lâu in ê chéng oa̍h tī choân-tōe.

4因為koh過七日，我beh落雨tī地上，四十日四十暝；將我所造ta̍k號ê活物lóng tùi地上剿滅。In-ūi koh kè chhit-ji̍t, Góa beh lo̍h-hō͘ tī tōe-chiūⁿ, sì-cha̍p ji̍t sì-cha̍p mî; chiong Góa só͘ chō ta̍k-hō ê oa̍h-mi̍h lóng tùi tōe-chiūⁿ châu-bia̍t.

5挪亞就照耶和華所命令伊ê，一盡去行。Ná-a chiū chiàu Iâ-hô-hoa só͘ bēng-lēng i ê, it-chīn khì kiâⁿ.

6當大水氾濫tī地上ê時，挪亞六百歲。Tng tōa-chúi hoàn-lām tī tōe chiūⁿ ê sî, Ná-a la̍k-pah hè.

7挪亞就kap伊ê kiáⁿ，伊ê bó͘，伊ê新婦，lóng入大船，閃避大水。Ná-a chiū kap i ê kiáⁿ, i ê bó͘, i ê sim-pū, lóng ji̍p tōa-chûn, siám-pī tōa-chúi.

8清氣ê cheng-siⁿ，kap無清氣ê cheng-siⁿ，飛鳥，kap地上一切ê蟲thōa，Chheng-khì ê cheng-siⁿ, kap bô chheng-khì ê cheng-siⁿ, pe-chiáu, kap tōe-chiūⁿ it-chhè ê thâng-thōa,

9lóng一對一對，有公ê有母ê，到挪亞hia，進入大船，照上帝命令挪亞ê。lóng chi̍t-tùi chi̍t-tùi, ū kang-ê ū bú-ê, kàu Ná-a hia, chìn-ji̍p tōa-chûn, chiàu Siōng-tè bēng-lēng Ná-a ê.

10過hiah-ê七日大水氾濫tī地上。Kè hiah ê chhit-ji̍t tōa-chúi hoàn-lām tī tōe-chiūⁿ.

11當挪亞六百歲，二月十七日，hit日深淵ê水源lóng裂開，天也破隙。Tng Ná-a la̍k-pah hè, jī-ge̍h cha̍p-chhit ji̍t, hit-ji̍t chhim-ian ê chúi-goân lóng li̍h-khui, thiⁿ iā phòa-khiah.

12四十日四十暝落雨tī地面上。Sì-cha̍p ji̍t sì-cha̍p mî lo̍h-hō͘ tī tōe-bīn-chiūⁿ.

13Tú-tú hit日，挪亞kap伊ê kiáⁿ，閃、含、雅弗，kap挪亞ê bó͘，kap伊三個新婦，lóng入大船；Tú-tú hit-ji̍t Ná-a kap i ê kiáⁿ, Siám, Hâm, Ngá-hut, kap Ná-a ê bó͘, kap i saⁿ ê sim-pū, lóng ji̍p tōa-chûn;

14in kap百獸各照伊ê類，一切ê cheng-siⁿ各照伊ê類，一切sô tī地上ê蟲thōa各照伊ê類，一切有翼ê各照伊ê類，一切ê飛鳥各照伊ê類，lóng總進入大船。in kap pah-siù kok chiàu i ê lūi, it-chhè ê cheng-siⁿ kok chiàu i ê lūi, it-chhè sô tī tōe-chiūⁿ ê thâng-thōa kok chiàu i ê lūi, it-chhè ū-si̍t-ê kok chiàu i ê lūi, it-chhè ê pe-chiáu kok chiàu i ê lūi, lóng-chóng chìn-ji̍p tōa-chûn.

15見若肉體內面有活氣ê，lóng一對一對，到挪亞hia，入大船。Kìⁿ-nā jio̍k-thé lāi-bīn ū oa̍h-khì-ê, lóng chi̍t-tùi chi̍t-tùi, kàu Ná-a hia, ji̍p tōa-chûn.

16見若入大船ê，是有公有母ê肉體，照上帝所命令伊ê；耶和華就kā伊關teh。Kìⁿ-nā ji̍p tōa-chûn-ê, sī ū kang ū bú ê jio̍k-thé, chiàu Siōng-tè só͘ bēng-lēng i-ê; Iâ-hô-hoa chiū kā i koaiⁿ-teh.

17水氾濫tī地上四十日；水漲ná高，hō͘大船chhèng浮，船就離地。Chúi hoàn-lām tī tōe-chiūⁿ sì-cha̍p-ji̍t; chúi tiòng ná koâiⁿ, hō͘ tōa-chûn chhèng-phû, chûn chiū lī tōe.

18水勢真大，tī地上直直漲起來；船漂流tī水面。Chúi-sè chin-tōa, tī tōe-chiūⁿ ti̍t-ti̍t tiòng-khí-lâi; chûn phiau-liû tī chúi-bīn.

19水勢tī地上極其大；天下ê高山lóng hō͘伊淹密。Chúi-sè tī tōe-chiūⁿ ke̍k-kî tōa; thiⁿ-ē ê koâiⁿ-soaⁿ lóng hō͘ i im-ba̍t.

20水勢比山加漲高十五肘；山lóng hō͘伊淹密。Chúi-sè pí soaⁿ ke-tiòng koâiⁿ cha̍p-gō͘ tiú; soaⁿ lóng hō͘ i im-ba̍t.

21見若tī地上有肉體ê動物，就是飛鳥、cheng-siⁿ、走獸，kap一切sô tī地上ê蟲thōa，以及所有ê眾人，lóng死。Kìⁿ-nā tī tōe-chiūⁿ ū jio̍k-thé ê tōng-bu̍t, chiū-sī pe-chiáu, cheng-siⁿ, cháu-siù, kap it-chhè sô tī tōe-chiūⁿ ê thâng-thōa, í-ki̍p só͘ ū ê chèng-lâng, lóng sí.

22見若tī乾地有鼻孔喘氣ê生靈lóng死。Kìⁿ-nā tī ta-tōe ū phīⁿ-khang chhoán-khùi ê seng-lêng lóng sí.

23見若地上一切ê活物lóng剿滅；人kap cheng-siⁿ、蟲thōa，以及天中ê飛鳥，in lóng tùi地上受剿滅；只有挪亞chham hiah-ê kap伊tī船裡ê留teh。Kìⁿ-nā tōe-chiūⁿ it-chhè ê oa̍h-mi̍h lóng châu-bia̍t; lâng kap cheng-siⁿ, thâng-thōa, í-ki̍p thiⁿ-tiong ê pe-chiáu, in lóng tùi tōe-chiūⁿ siū châu-bia̍t; chí-ū Ná-a chham hiah-ê kap i tī chûn-ni̍h-ê lâu-teh.

24水勢真大tī地上，歷過一百五十日。Chúi-sè chin-tōa tī tōe-chiūⁿ, le̍k-kè chi̍t-pah gō͘-cha̍p-ji̍t.

1上帝記得挪亞，kap一切ê活物，以及kap伊tī大船一切ê cheng-siⁿ；上帝hō͘風吹地，水就漸漸消蝕。Siōng-tè kì-tit Ná-a, kap it-chhè ê oa̍h-mi̍h, í-ki̍p kap i tī tōa-chûn it-chhè ê cheng-siⁿ; Siōng-tè hō͘ hong chhe tōe, chúi chiū chiām-chiām siau-si̍h.

2深淵ê水源，kap天ê空隙，lóng關密；天裡ê雨亦soah。Chhim-ian ê chúi-goân, kap thiⁿ ê khang-khiah, lóng koaiⁿ-ba̍t; thiⁿ-ni̍h ê hō͘ ia̍h soah.

3水tùi地上直直退；一百五十日後，水就漸漸消。Chúi tùi tōe-chiūⁿ ti̍t-ti̍t thè; chi̍t-pah gō͘-cha̍p ji̍t āu, chúi chiū chiām-chiām siau.

4七月十七日，船掛(khòa)tī A-la̍h-lia̍p ê山。Chhit-ge̍h cha̍p chhit ji̍t, chûn khòa tī A-la̍h-lia̍p ê soaⁿ.

5水koh漸漸消，直直到十月。十月初一日，山頭chiah出現。Chúi koh chiām-chiām siau, ti̍t-ti̍t kàu cha̍p-ge̍h. Cha̍p-ge̍h chhoe-it ji̍t, soaⁿ-thâu chiah chhut-hiān.

6過四十日，挪亞開伊所做大船ê窗á；Kè sì-cha̍p ji̍t, Ná-a khui i só͘ chòe tōa-chûn ê thang-á;

7放一隻烏鴉出去；烏鴉飛來飛去，直直到地上ê水乾。pàng chi̍t chiah o͘-a chhut-khì; o͘-a pe-lâi pe-khì, ti̍t-ti̍t kàu tōe-chiūⁿ ê chúi ta.

8伊koh放一隻鴿á出去，beh看水tùi地上退á-bē。I koh pàng chi̍t chiah chíⁿ-á chhut-khì, beh khòaⁿ chúi tùi tōe-chiūⁿ thè á-bē.

9總是鴿á chhē無歇腳ê所在，就倒tńg來大船挪亞hia；因為遍地面iáu有水；挪亞伸手接(chih)伊，掠入大船。Chóng-sī chíⁿ-á chhē bô hioh-kha ê só͘-chāi, chiū tò-tńg lâi tōa-chûn Ná-a hia; in-ūi piàn-tōe-bīn iáu ū chúi; Ná-a chhun-chhiú chih i, lia̍h ji̍p tōa-chûn.

10伊koh thèng候七日，koh放鴿á出大船。I koh thèng-hāu chhit-ji̍t, koh pàng chíⁿ-á chhut tōa-chûn.

11到ê-hng鴿á tò來伊hia，嘴咬一葉新ê橄欖葉；挪亞chiah知水tùi地上退lah。Kàu ê-hng chíⁿ-á tò-lâi i hia, chhùi kā chi̍t-hio̍h sin ê kaⁿ-ná-hio̍h; Ná-a chiah chai chúi tùi tōe-chiūⁿ thè lah.

12伊koh thèng候七日，放鴿á出去；鴿á lóng無koh tò來。I koh thèng-hāu chhit-ji̍t, pàng chíⁿ-á chhut-khì; chíⁿ-á lóng bô koh tò-lâi.

13到挪亞六百連一歲，正月初一日，地上ê水lóng乾；挪亞就掀開大船ê蓋，來看；就看見地面已經乾。Kàu Ná-a la̍k-pah liân chi̍t hè, chiaⁿ-ge̍h chhoe-it ji̍t, tōe-chiūⁿ ê chúi lóng ta; Ná-a chiū hian-khui tōa-chûn ê kòa, lâi khòaⁿ; chiū khòaⁿ-kìⁿ tōe-bīn í-keng ta.

14二月二七日，土地lóng乾。Jī-ge̍h jī-chhit-ji̍t, thô͘-tōe lóng ta.

15上帝對挪亞講，Siōng-tè tùi Ná-a kóng,

16你kap你ê bó͘，你ê kiáⁿ，你ê新婦，lóng tio̍h出大船。Lí kap lí ê bó͘, lí ê kiáⁿ, lí ê sim-pū, lóng tio̍h chhut tōa-chûn.

17Tī你hia見有肉體ê活物，就是飛鳥、cheng-siⁿ，kap一切sô tī地上ê蟲thōa，lóng tio̍h帶in出；hō͘ in興旺tī地裡，生湠真chōe。Tī lí hia kìⁿ-ū jio̍k-thé ê oa̍h-mi̍h, chiū-sī pe-chiáu, cheng-siⁿ, kap it-chhè sô tī tōe-chiūⁿ ê thâng-thōa, lóng tio̍h tòa in chhut; hō͘ in heng-ōng tī tōe-ni̍h, siⁿ-thòaⁿ chin-chōe.

18Tùi hit-tia̍p挪亞kap伊ê kiáⁿ，伊ê bó͘，伊ê新婦，lóng出來。Tùi hit-tia̍p Ná-a kap i ê kiáⁿ, i ê bó͘, i ê sim-pū, lóng chhut-lâi.

19一切ê走獸，一切ê蟲thōa，一切ê飛鳥，見若地上所有ê動物，各照伊ê族類，亦lóng出大船。It-chhè ê cháu-siù, it-chhè ê thâng-thōa, it-chhè ê pe-chiáu, kìⁿ-nā tōe-chiūⁿ só͘ ū ê tōng-bu̍t, kok chiàu i ê cho̍k-lūi, ia̍h lóng chhut tōa-chûn.

20挪亞為tio̍h耶和華起一座壇；tùi ta̍k樣清氣ê cheng-siⁿ，ta̍k樣清氣ê飛鳥，取來獻tī壇頂做燒祭。Ná-a ūi-tio̍h Iâ-hô-hoa khí chi̍t chō tôaⁿ; tùi ta̍k-iūⁿ chheng-khì ê cheng-siⁿ, ta̍k-iūⁿ chheng-khì ê pe-chiáu, chhú lâi hiàn tī tôaⁿ-téng chòe sio-chè.

21耶和華phīⁿ伊ê芳味；耶和華心內就講，我無koh因為人ê緣故咒詛地，因為人tùi細漢ê時，心所想就pháiⁿ；我無beh照我所有行ê，koh滅各種ê活物。Iâ-hô-hoa phīⁿ i ê phang-bī; Iâ-hô-hoa sim-lāi chiū kóng, Góa bô koh in-ūi lâng ê iân-kò͘ chiù-chó͘ tōe, in-ūi lâng tùi sòe-hàn ê sî, sim só͘ siūⁿ chiū pháiⁿ; Góa bô beh chiàu Góa só͘ ū kiâⁿ-ê, koh bia̍t kok-chéng ê oa̍h-mi̍h.

22地iáu tī-teh ê時，栽種收成，寒熱、冬天、夏天、日暝，lóng無歇。Tōe iáu tī-teh ê sî, chai-chèng siu-sêng, kôaⁿ joa̍h, tang-thiⁿ, hē-thiⁿ, ji̍t mî, lóng bô hioh.

1上帝賜福挪亞，kap伊ê kiáⁿ，亦對in講，Lín tio̍h生湠chōe-chōe，充滿地上。Siōng-tè sù-hok Ná-a, kap i ê kiáⁿ, ia̍h tùi in kóng, Lín tio̍h siⁿ-thòaⁿ chōe-chōe, chhiong-móa tōe-chiūⁿ.

2見若地上ê走獸，kap天裡ê鳥，lóng beh驚lín畏lín；連地上一切ê蟲thōa，kap海裡一切ê魚，lóng交付lín ê手。Kìⁿ-nā tōe-chiūⁿ ê cháu-siù, kap thiⁿ-ni̍h ê chiáu, lóng beh kiaⁿ lín ùi lín; liân tōe-chiūⁿ it-chhè ê thâng-thōa, kap hái-ni̍h it-chhè ê hî, lóng kau-hù lín ê chhiú.

3見若活ê動物lóng做lín ê食物；chiah-ê一切我lóng hō͘ lín，親像hō͘ lín菜蔬一樣。Kìⁿ-nā oa̍h ê tōng-bu̍t lóng chòe lín ê chia̍h-mi̍h; chiah-ê it-chhè Góa lóng hō͘ lín, chhin-chhiūⁿ hō͘ lín chhài-soe chi̍t-iūⁿ.

4獨獨有活命ê肉，就是有kâⁿ血ê，lín m̄-thang食。To̍k-to̍k ū oa̍h-miā ê bah, chiū-sī ū kâⁿ-huih-ê, lín m̄-thang chia̍h.

5流lín ê血，就是流lín活命ê血ê罪，我beh討伊；我beh對各樣走獸討，亦beh對人ê手，以及ta̍k人兄弟ê手，來討人ê活命。Lâu lín ê huih, chiū-sī lâu lín oa̍h-miā ê huih ê chōe, Góa beh thó-i; Góa beh tùi kok-iūⁿ cháu-siù thó, ia̍h beh tùi lâng ê chhiú, í-ki̍p ta̍k-lâng hiaⁿ-tī ê chhiú, lâi thó lâng ê oa̍h-miā.

6見若hō͘人流血ê，人也beh hō͘伊流血；因為上帝造人，是親像伊家己ê像。Kìⁿ-nā hō͘ lâng lâu huih-ê, lâng iā beh hō͘ i lâu-huih; in-ūi Siōng-tè chō lâng, sī chhin-chhiūⁿ I ka-kī ê siōng.

7Lín tio̍h生湠chōe-chōe，tī地面上tio̍h興旺，加添真chōe。Lín tio̍h siⁿ-thòaⁿ chōe-chōe, tī tōe-bīn-chiūⁿ tio̍h heng-ōng, ke-thiⁿ chin-chōe.

8上帝kā挪亞kap伊ê kiáⁿ講，Siōng-tè kā Ná-a kap i ê kiáⁿ kóng,

9我，我kap lín以及lín ê後裔立我ê約；Góa, Góa kap lín í-ki̍p lín ê hō͘-è li̍p Góa ê iok;

10亦kap hiah-ê kap lín tī-teh一切ê活物，就是kap lín tī-teh ê飛鳥、cheng-siⁿ，一切走獸；見若tùi大船出來地上一切ê走獸立約。ia̍h kap hiah ê kap lín tī-teh it-chhè ê oa̍h-mi̍h, chiū-sī kap lín tī-teh ê pe-chiáu, cheng-siⁿ, it-chhè cháu-siù; kìⁿ-nā tùi tōa-chûn chhut-lâi tōe-chiūⁿ it-chhè ê cháu-siù li̍p-iok.

11我kap lín立我ê約；見有肉體ê，無koh hō͘大水滅無，亦無koh有大水毀壞土地。Góa kap lín li̍p Góa ê iok; kìⁿ ū jio̍k-thé ê, bô koh hō͘ tōa-chúi bia̍t-bô, ia̍h bô koh ū tōa-chúi húi-hoāi thó͘-tōe.

12上帝講，我kap lín亦kap hiah-ê kap lín tī-teh ta̍k樣ê活物所立永世代ê約，是有記號。Siōng-tè kóng, Góa kap lín ia̍h kap hiah-ê kap lín tī-teh ta̍k-iūⁿ ê oa̍h-mi̍h só͘ li̍p éng sè-tāi ê iok, sī ū kì-hō.

13我將我ê虹hē tī雲裡，thang做我kap地立約ê記號。Góa chiong Góa ê khēng hē tī hûn-ni̍h, thang chòe Góa kap tōe li̍p iok ê kì-hō.

14以後我hō͘雲起遮地ê時，beh有虹出現tī雲裡。Í-āu Góa hō͘ hûn khí jia tōe ê sî, beh ū khēng chhut-hiān tī hûn-ni̍h.

15我就記念我kap lín以及ta̍k樣有肉體ê活物所立ê約，水無koh氾濫損壞一切有肉體ê物。Góa chiū kì-liām Góa kap lín í-ki̍p ta̍k-iūⁿ ū jio̍k-thé ê oa̍h-mi̍h só͘ li̍p ê iok, chúi bô koh hoàn-lām sún-hoāi it-chhè ū jio̍k-thé ê mi̍h.

16虹beh出現tī雲裡，我beh看伊，hō͘我記念上帝kap地上ta̍k樣有肉體ê活物所立永遠ê約。Khēng beh chhut-hiān tī hûn-ni̍h, Góa beh khòaⁿ-i, hō͘ Góa kì-liām Siōng-tè kap tōe-chiūⁿ ta̍k-iūⁿ ū jio̍k-thé ê oa̍h-mi̍h só͘ li̍p éng-oán ê iok.

17上帝對挪亞講，這就是我kap地上一切有肉體ê物所立ê約ê記號。Siōng-tè tùi Ná-a kóng, Che chiū-sī Góa kap tōe-chiūⁿ it-chhè ū jio̍k-thé ê mi̍h só͘ li̍p ê iok ê kì-hō.

18挪亞ê kiáⁿ，出大船ê，就是閃，含，雅弗；含是迦南ê老父。Ná-a ê kiáⁿ, chhut tōa-chûn-ê, chiū-sī Siám, Hâm, Ngá-hut; Hâm sī Ka-lâm ê lāu-pē.

19Chí三個是挪亞ê kiáⁿ；tùi in遍滿全地。Chí saⁿ-ê sī Ná-a ê kiáⁿ; tùi in piàn-móa choân-tōe.

20挪亞起手做農夫，栽種葡萄園；Ná-a khí-chhiú chòe lông-hu, chai-chèng phû-tô-hn̂g;

21lim hit-ê酒來醉，tī布棚內thǹg-theh-theh。lim hit ê chiú lâi chùi, tī pò͘-pîⁿ-lāi thǹg-pak-theh.

22迦南ê老父，含，看in老父thǹg-theh，去外面kā in兩個兄弟講。Ka-lâm ê lāu-pē, Hâm, khòaⁿ in lāu-pē thǹg-theh, khì gōa-bīn kā in nn̄g ê hiaⁿ-tī kóng.

23閃kap雅弗the̍h一領衫，掛tī in ê肩頭；倒退行來jia老父ê thǹg-theh；in ê面ǹg出，無看去老父ê thǹg-theh。Siám kap Ngá-hut the̍h chi̍t niá saⁿ, khòa tī in ê keng-thâu; tò-thè kiâⁿ lâi jia lāu-pē ê thǹg-theh; in ê bīn ǹg-chhut, bô khòaⁿ-khì lāu-pē ê thǹg-theh.

24挪亞酒醉醒，chiah知第二kiáⁿ ê所做。Ná-a chiú-chùi chhíⁿ, chiah chai tē jī-kiáⁿ ê só͘-chòe.

25就講， 迦南tio̍h受咒詛； 伊beh做伊ê兄弟奴僕ê奴僕。Koh講，Chiū kóng, Ka-lâm tio̍h siū chiù-chó͘; I beh chòe i ê hiaⁿ-tī lô͘-po̍k ê lô͘-po̍k.Koh kóng,

26Tio̍h o-ló耶和華，閃ê上帝； 迦南做閃ê奴僕。Tio̍h o-ló Iâ-hô-hoa, Siám ê Siōng-tè; Ka-lâm chòe Siám ê lô͘-po̍k.

27願上帝hō͘雅弗發展， Hō͘伊tòa tī閃ê布棚； 迦南亦做伊ê奴僕。Goān Siōng-tè hō͘ Ngá-hut hoat-tián, Hō͘ i tòa tī Siám ê pò͘-pîⁿ; Ka-lâm ia̍h chòe i ê lô͘-po̍k.

28大水了後挪亞iáu活三百五十年。Tōa-chúi liáu-āu Ná-a iáu oa̍h saⁿ-pah gō͘-cha̍p nî.

29挪亞計共享壽九百五十歲，chiah死。Ná-a kè-kiōng hióng-siū káu-pah gō͘-cha̍p hè, chiah sí.