1有災厄ah，hō͘人流血ê城，有詭詐強暴滿滿，搶劫無soah。Ū chai-ē ah, hō͘ lâng lâu-huih ê siâⁿ, ū khúi-chà kiông-pō móa-móa, chhiúⁿ-kiap bô soah.

2有馬鞭ê聲，有車輪hū-hū哮ê聲，馬phut-phut跳，車khōng-khōng哮；Ū bé-piⁿ ê siaⁿ, ū chhia-lûn hū-hū-háu ê siaⁿ, bé phut-phut-thiàu, chhia khōng-khōng-háu;

3馬兵進前，刀劍光nà-nà，伊ê鎗燄燄sih；受thâi-ê不止chōe，身屍成大堆，身屍bōe算得，人跋倒tī死人ê頂面。bé-peng chìn-chêng, to-kiàm kng nà-nà, i ê chhiuⁿ iām-iām-sih; siū-thâi--ê put-chí chōe, sin-si chiâⁿ tōa-tui, sin-si bōe sǹg-tit, lâng poa̍h-tó tī sí-lâng ê téng-bīn.

4因為súi ê娼妓有chōe-chōe淫行，慣練做紅姨，用伊ê淫行迷惑列國，用伊ê邪術迷惑chōe-chōe族。In-ūi súi ê chhiong-ki ū chōe-chōe îm-hēng, koàn-liān chòe ang-î, ēng i ê îm-hēng bê-he̍k lia̍t-kok, ēng i ê siâ-su̍t bê-he̍k chōe-chōe cho̍k.

5萬軍ê耶和華講，看ah，我攻擊你，我beh掀你ê裙，蓋你ê面，hō͘列國看見你ê赤theh，hō͘列邦看見你ê見笑。Bān-kun ê Iâ-hô-hoa kóng, Khòaⁿ ah, Góa kong-kek lí, Góa beh hian lí ê kûn, khàm lí ê bīn, hō͘ lia̍t-kok khòaⁿ-kìⁿ lí ê chhiah-theh, hō͘ lia̍t-pang khòaⁿ-kìⁿ lí ê kiàn-siàu.

6我beh將可惡污穢ê物hiat tī你ê身上，凌辱你，hō͘人目睭看見。Góa beh chiong khó-ò͘ⁿ ù-òe ê mi̍h hiat tī lí ê sin-chiūⁿ, lêng-jio̍k lí, hō͘ lâng ba̍k-chiu khòaⁿ-kìⁿ.

7Tùi án-ni，見若看見你ê，lóng beh逃走離開你，講，尼尼微拋荒lah，有甚麼人為伊悲傷ah？我beh tùi toh-lo̍h chhē-tio̍h安慰你ê人ah？Tùi án-ni kìⁿ-nā khòaⁿ-kìⁿ lí--ê, lóng beh tô-cháu lī-khui lí, kóng, Nî-nî-bî pha-hng lah, ū sím-mi̍h lâng ūi i pi-siong ah? góa beh tùi toh-lo̍h chhē-tio̍h an-ùi lí ê lâng ah?

8你kiám有khah贏Lô-a-bûn mah？伊坐tī chiah-ê河ê中間，周圍有水，海做伊ê河溝，海做伊ê城牆。Lí kiám ū khah-iâⁿ Lô-a-bûn mah? I chē tī chiah ê hô ê tiong-kan, chiu-ûi ū chúi, hái chòe i ê hô-kau, hái chòe i ê siâⁿ-chhiûⁿ.

9Kó͘-si̍t kap埃及做伊無限量ê氣力；Hut kap Lō͘-pí是幫贊你ê。Kó͘-si̍t kap Ai-ki̍p chòe i bô hān-liōng ê khùi-la̍t; Hut kap Lō͘-pí sī pang-chān lí--ê.

10總是伊受遷徙hō͘人掠去；伊ê嬰á hō͘人siak死tī街路頭；人為tio̍h伊尊貴ê人liam-khau；伊ê大官員lóng hō͘鐵鏈縛。Chóng-sī i siū chhian-sóa hō͘ lâng lia̍h-khì; i ê eⁿ-á hō͘ lâng siak-sí tī ke-lō͘-thâu; lâng ūi-tio̍h i chun-kùi ê lâng liam-khau; i ê tōa koaⁿ-oân lóng hō͘ thih-liān pa̍k.

11你beh lim到醉，亦beh受khǹg密；koh因為閃避對敵來chhē衛所。Lí beh lim kàu chùi, ia̍h beh siū khǹg-ba̍t; koh in-ūi siám-pī tùi-te̍k lâi chhē ōe-só͘.

12你一切險要ê所在，beh親像無花果樹；有起頭熟ê無花果，一下搖伊，就ka-la̍uh tī食ê人ê嘴。Lí it-chhè hiám-iàu ê só͘-chāi, beh chhin-chhiūⁿ bû-hoa-kó chhiū; ū khí-thâu-se̍k ê bû-hoa-kó, chi̍t-ē iô i, chiū ka-la̍uh tī chia̍h ê lâng ê chhùi.

13看ah，lín中間ê百姓是親像婦人人；你境內ê門，lóng開tī對敵ê面前；火燒你ê門栱。Khòaⁿ ah, lín tiong-kan ê peh-sìⁿ sī chhin-chhiūⁿ hū-jîn-lâng; lí kéng-lāi ê mn̂g, lóng khui tī tùi-te̍k ê bīn-chêng; hé sio lí ê mn̂g-kông.

14你tio̍h chhiūⁿ水，備辦受圍困；tio̍h堅固你ê衛所；tio̍h到土窟踏土，修理磚窯。Lí tio̍h chhiūⁿ chúi, pī-pān siū ûi-khùn; tio̍h kian-kò͘ lí ê ōe-só͘; tio̍h kàu thô͘-khut ta̍h thô͘, siu-lí chng-iô.

15Tī-hia火beh燒滅你，刀beh thâi你，吞滅你親像tō͘猴；chhut-chāi你加添chōe-chōe親像tō͘猴，加添chōe-chōe親像草蜢。Tī-hia hé beh sio-bia̍t lí, to beh thâi lí, thun-bia̍t lí chhin-chhiūⁿ tō͘-kâu; chhut-chāi lí ke-thiⁿ chōe-chōe chhin-chhiūⁿ tō͘-kâu, ke-thiⁿ chōe-chōe chhin-chhiūⁿ chháu-meh.

16你加添你ê seng-lí人，khah-chōe天頂ê星；tō͘猴損害了就飛去。Lí ke-thiⁿ lí ê seng-lí-lâng, khah-chōe thiⁿ-téng ê chhiⁿ; tō͘-kâu sún-hāi-liáu chiū pe--khì.

17你ê貴族親像草蜢，你ê大官員親像kui陣ê草蜢，天氣冷ê時就歇tī籬笆，日出就飛去，人m̄知伊去toh-lo̍h。Lí ê kùi-cho̍k chhin-chhiūⁿ chháu-meh, lí ê tōa koaⁿ-oân chhin-chhiūⁿ kui-tīn ê chháu-meh, thiⁿ-khì léng ê sî chiū hioh tī lî-pa, ji̍t chhut chiū pe--khì, lâng m̄-chai i khì toh-lo̍h.

18亞述王ah，你ê牧者teh睏；你ê貴族倒teh；你ê百姓四散tī山裡，無人招集。A-su̍t ông ah, lí ê bo̍k-chiá teh khùn; lí ê kùi-cho̍k tó-teh; lí ê peh-sìⁿ sì-sòaⁿ tī soaⁿ--nih, bô lâng chio-chi̍p.

19你ê傷bōe醫得；你受phah真thiám；見若聽見你ê消息ê，beh因為你phah手；你所行ê pháiⁿ，甚麼人無tú-tio̍h？Lí ê siong bōe i--tit; lí siū phah chin-thiám; kìⁿ-nā thiaⁿ-kìⁿ lí ê siau-sit--ê, beh in-ūi lí phah-chhiú; lí só͘ kiâⁿ ê pháiⁿ, sím-mi̍h lâng bô tú-tio̍h?

1先知哈巴谷所得tio̍h ê默示。Sian-ti Hap-pa-kok só͘ tit-tio̍h ê be̍k-sī.

2耶和華ah，我喉叫，你無聽，beh到tī時ah？我因為強暴叫苦，你iáu無拯救。Iâ-hô-hoa ah, góa âu-kiò, Lí bô thiaⁿ, beh kàu tī-sî ah? góa in-ūi kiông-pō kiò-khó͘, Lí iáu bô chín-kiù.

3你啥事hō͘我看見罪惡？橫逆ê事，你啥事定定看？毀滅kap強暴tī我面前，相爭相phah lóng發起。Lí siáⁿ-sū hō͘ góa khòaⁿ-kìⁿ chōe-ok? hêng-ge̍k ê sū, Lí siáⁿ-sū tiāⁿ-tiāⁿ khòaⁿ? húi-bia̍t kap kiông-pō tī góa bīn-chêng, saⁿ-chiⁿ saⁿ-phah lóng hoat-khí.

4因為án-ni律法放鬆，無行公平；pháiⁿ人圍困義人；所以審判無正直。In-ūi án-ni lu̍t-hoat pàng-sang, bô kiâⁿ kong-pêng; pháiⁿ-lâng ûi-khùn gī-lâng; só͘-í sím-phòaⁿ bô chèng-ti̍t.

5Lín tio̍h tī列國中看來想伊；大大gông-ngia̍h；因為當lín ê日，我beh行一項事，雖然kā lín講，lín也m̄信。Lín tio̍h tī lia̍t-kok-tiong khòaⁿ lâi siūⁿ i; tōa-tōa gông-ngia̍h; in-ūi tng lín ê ji̍t, Góa beh kiâⁿ chi̍t-hāng sū, sui-jiân kā lín kóng, lín iā m̄-sìn.

6看ah，我beh興起Ka-le̍k-tí人，就是殘忍躁暴ê邦國，遍行全地，霸佔hiah-ê m̄是屬伊khiā起ê所在；Khòaⁿ ah, Góa beh heng-khí Ka-le̍k-tí lâng, chiū-sī chân-jím sò-pō ê pang-kok, piàn-kiâⁿ choân-tōe, pà-chiàm hiah-ê m̄-sī sio̍k i khiā-khí ê só͘-chāi;

7伊ê威風thang驚，判斷kap權勢，lóng出tī家己ê意思。i ê ui-hong thang kiaⁿ, phòaⁿ-toàn kap koân-sè, lóng chhut tī ka-kī ê ì-sù.

8In ê馬比豹khah緊，比ê-hng時ê豺狼khah猛；馬兵排列開闊，馬兵tùi遠遠來；in親像鷹緊緊飛beh來食。In ê bé pí pà khah-kín, pí ê-hng-sî ê chhâi-lông khah-béng; bé-peng pâi-lia̍t khui-khoah, bé-peng tùi hn̄g-hn̄g lâi; in chhin-chhiūⁿ eng kín-kín pe beh lâi chia̍h.

9In來beh行強暴；in ê面狠狠進前；聚集所掠ê人，親像沙hiah-chōe。In lâi beh kiâⁿ kiông-pō; in ê bīn hiông-hiông chìn-chêng; chū-chi̍p só͘ lia̍h ê lâng, chhin-chhiūⁿ soa hiah-chōe.

10伊藐視君王，譏刺貴族；冷笑lóng總ê衛所；起土堆來攻取伊。I biáu-sī kun-ông, ki-chhì kùi-cho̍k; léng-chhiò lóng-chóng ê ōe-só͘; khí thô͘-tui lâi kong-chhú--i.

11Tùi án-ni，伊親像風掃過去，伊經過就犯罪；掠家己ê氣力做上帝。Tùi án-ni i chhin-chhiūⁿ hong sàu kè-khì, i keng-kè chiū hoān-chōe; lia̍h ka-kī ê khùi-la̍t chòe siōng-tè.

12耶和華我ê上帝我ê聖ê ah，祢kiám m̄是tùi永遠就有mah？阮bōe致到死，耶和華ah，祢為tio̍h審判來設立伊，石磐ah，祢為tio̍h譴責來備辦伊。Iâ-hô-hoa góa ê Siōng-tè góa ê Sèng--ê ah, Lí kiám m̄-sī tùi éng-oán chiū ū mah? goán bōe tì-kàu sí, Iâ-hô-hoa ah, Lí ūi-tio̍h sím-phòaⁿ lâi siat-li̍p i, Chio̍h-pôaⁿ ah, Lí ūi-tio̍h khiàn-chek lâi pī-pān i.

13祢ê目睭清氣無beh看邪惡，無beh看橫逆，行詭詐ê，祢啥事定定看in ah？pháiⁿ人吞滅比伊khah公義ê，祢啥事靜靜ah？Lí ê ba̍k-chiu chheng-khì bô beh khòaⁿ siâ-ok, bô beh khòaⁿ hêng-ge̍k, kiâⁿ khúi-chà--ê, Lí siáⁿ-sū tiāⁿ-tiāⁿ khòaⁿ in ah? pháiⁿ-lâng thun-bia̍t pí i khah kong-gī--ê, Lí siáⁿ-sū chēng-chēng ah?

14祢啥事hō͘人親像海裡ê魚，koh親像teh sô ê蟲，無頭目管理ah？Lí siáⁿ-sū hō͘ lâng chhin-chhiūⁿ hái--nih ê hî, koh chhin-chhiūⁿ teh sô ê thâng, bô thâu-ba̍k koán-lí ah?

15伊用鉤一盡釣in，伊用網á掠in，用大網拋in；為tio̍h án-ni，伊歡喜快樂。I ēng kau it-chīn tiò--in, i ēng bāng-á lia̍h in, ēng tōa-bāng pha in; ūi-tio̍h án-ni, i hoaⁿ-hí khoài-lo̍k.

16就獻祭hō͘伊ê網á，燒香hō͘伊ê大網；因為in tùi chiah-ê得tio̍h肥súi ê份額，kap充足ê食物。Chiū hiàn-chè hō͘ i ê bāng-á, sio-hiuⁿ hō͘ i ê tōa-bāng; in-ūi in tùi chiah-ê tit-tio̍h pûi-súi ê hūn-gia̍h, kap chhiong-chiok ê chia̍h-mi̍h.

17伊kiám thang piàⁿ空伊ê網，常常thâi死列國ê人，也無保惜mah？I kiám thang piàⁿ-khang i ê bāng, siông-siông thâi-sí lia̍t-kok ê lâng, iā bô pó-sioh mah?

1我beh khiā守更樓，khiā tī營寨觀看，看祂對我講甚麼話，我thang用甚麼話來訴明。Góa beh khiā chiú-kiⁿ-lâu, khiā tī iâⁿ-chē koan-khòaⁿ, khòaⁿ I tùi góa kóng sím-mi̍h ōe, góa thang ēng sím-mi̍h ōe lâi sò͘-bêng.

2耶和華應我講，寫chit-ê默示，明明刻tī板裡，hō͘讀ê人也thang走。Iâ-hô-hoa ìn góa kóng, Siá chit ê be̍k-sī, bêng-bêng khek tī pán--ni̍h, hō͘ tha̍k ê lâng iā thang cháu.

3因為chit-ê默示iáu有定tio̍h ê期，beh緊緊結局，決斷無白賊；雖然延chhiân，iáu-kú tio̍h thèng候；因為的確會到，無koh延chhiân。In-ūi chit ê be̍k-sī iáu-ū tiāⁿ-tio̍h ê kî, beh kín-kín kiat-kio̍k, koat-toàn bô pe̍h-chha̍t; sui-jiân iân-chhiân, iáu-kú tio̍h thèng-hāu; in-ūi tek-khak ōe kàu, bô koh iân-chhiân.

4看ah，伊ê心神自高，tī伊ê內面無正直；獨獨義人beh對伊ê信來活。Khòaⁿ ah, i ê sim-sîn chū-ko, tī i ê lāi-bīn bô chèng-ti̍t; to̍k-to̍k gī-lâng beh tùi i ê sìn lâi oa̍h.

5就是欺騙ê，驕傲ê人無tiàm tī家內；開闊伊ê心所愛ê，親像陰府，亦親像死bōe能滿足，統一萬國歸伊，聚集萬百姓歸伊。Chiū-sī khi-phiàn--ê, kiau-ngō͘ ê lâng bô tiàm tī ke-lāi; khui-khoah i ê sim só͘-ài--ê, chhin-chhiūⁿ im-hú, ia̍h chhin-chhiūⁿ sí bōe-ōe móa-chiok, thóng-it bān-kok kui i, chū-chi̍p bān peh-sìⁿ kui i.

6Chiah-ê眾人kiám無beh用俗語來批評伊，用譬喻來譏刺伊，講，積聚chōe-chōe無屬家己ê財物，beh jōa久？the̍h chōe-chōe準當ê物，家己擔負，hit號人有災厄ah。Chiah-ê chèng-lâng kiám bô beh ēng sio̍k-gú lâi phoe-phêng i, ēng phì-jū lâi ki-chhì i, kóng, Chek-chū chōe-chōe bô sio̍k ka-kī ê châi-bu̍t, beh jōa-kú? the̍h chōe-chōe chún-tǹg ê mi̍h, ka-kī tam-hū, hit-hō lâng ū chai-ē ah.

7咬你ê，kiám無忽然起來，攪擾你ê，kiám無醒起來，你就beh做in所搶ê物？Kā lí--ê, kiám bô hut-jiân khí-lâi, kiáu-jiáu lí--ê, kiám bô chhíⁿ--khí-lâi, lí chiū beh chòe in só͘ chhiúⁿ ê mi̍h?

8因為你搶劫chōe-chōe國，列國中所chhun ê人也beh搶劫你；是因為你thâi人流血，tùi境內kap城市，kap其中khiā起ê人，所行強暴ê緣故。In-ūi lí chhiúⁿ-kiap chōe-chōe kok, lia̍t-kok-tiong só͘ chhun ê lâng iā beh chhiúⁿ-kiap lí; sī in-ūi lí thâi-lâng lâu-huih, tùi kéng-lāi kap siâⁿ-chhī, kap kî-tiong khiā-khí ê lâng, só͘ kiâⁿ kiông-pō ê iân-kò͘.

9為家己ê家積聚不義ê錢，beh作siū tī高ê所在，ǹg望脫離兇惡ê勢力，hit號人有災厄ah。Ūi ka-kī ê ke chek-chū put-gī ê chîⁿ, beh choh-siū tī koâiⁿ ê só͘-chāi, ǹg-bāng thoat-lī hiong-ok ê sè-le̍k, hit-hō lâng ū chai-ē ah.

10你滅chōe-chōe百姓，所計謀ê，凌辱家己ê家，koh犯罪害家己ê性命。Lí bia̍t chōe-chōe peh-sìⁿ, só͘ kè-bô͘--ê, lêng-jio̍k ka-kī ê ke, koh hoān-chōe hāi ka-kī ê sìⁿ-miā.

11壁中ê石beh喉叫，柴料中ê通樑beh應聲。Piah-tiong ê chio̍h beh âu-kiò, chhâ-liāu-tiong ê thong-niû beh ìn siaⁿ.

12用thâi人流血來起城，用罪孽設立城市ê，有災厄ah。Ēng thâi-lâng lâu-huih lâi khí siâⁿ, ēng chōe-gia̍t siat-li̍p siâⁿ-chhī--ê, ū chai-ē ah.

13看ah，眾百姓所勞碌ê hō͘火燒去，列國tio̍h磨到厭倦ê歸tī空空，kiám m̄是lóng出tī萬軍ê耶和華mah？Khòaⁿ ah, chèng peh-sìⁿ só͘ lô-lo̍k--ê hō͘ hé sio--khì, lia̍t-kok tio̍h-bôa kàu ià-siān--ê kui tī khang-khang, kiám m̄-sī lóng chhut tī bān-kun ê Iâ-hô-hoa mah?

14因為耶和華ê榮光beh hō͘全地lóng bat，親像水充滿洋海一樣。In-ūi Iâ-hô-hoa ê êng-kng beh hō͘ choân-tōe lóng bat, chhin-chhiūⁿ chúi chhiong-móa iûⁿ-hái chi̍t-iūⁿ.

15Hō͘伊ê厝邊lim，koh參猛烈ê酒hō͘伊lim到醉，thang看見伊ê下體，hit號人有災厄ah。Hō͘ i ê chhù-piⁿ lim, koh chham béng-lia̍t ê chiú hō͘ i lim kàu chùi, thang khòaⁿ-kìⁿ i ê ē-thé, hit-hō lâng ū chai-ē ah.

16你所充滿ê，是凌辱，m̄是榮光；你亦tio̍h lim，顯出是未受割禮ê；耶和華chiàⁿ手ê杯beh oa̍t-tńg來hō͘你lim，你ê凌辱beh蓋密你ê榮光。Lí só͘ chhiong-móa--ê, sī lêng-jio̍k, m̄-sī êng-kng; lí ia̍h tio̍h lim, hián-chhut sī bē siū kat-lé--ê; Iâ-hô-hoa chiàⁿ-chhiú ê poe beh oa̍t-tńg lâi hō͘ lí lim, lí ê lêng-jio̍k beh khàm-ba̍t lí ê êng-kng.

17Koh你對黎巴嫩所行ê強暴，以及殘害野獸hō͘伊驚惶ê事，lóng beh遮蓋你；是因為你thâi人，對境內城市，kap其中khiā起ê人，所行強暴ê緣故。Koh lí tùi Lī-pa-lùn só͘ kiâⁿ ê kiông-pō, í-ki̍p chân-hāi iá-siù hō͘ i kiaⁿ-hiâⁿ ê sū, lóng beh jia-khàm lí; sī in-ūi lí thâi-lâng, tùi kéng-lāi siâⁿ-chhī, kap kî-tiong khiā-khí ê lâng, só͘ kiâⁿ kiông-pō ê iân-kò͘.

18雕刻ê像有甚麼利益，chiah hō͘造伊ê人雕刻伊ah？鑄ê偶像kap假ê先生，有甚麼利益，chiah hō͘造伊ê人óa靠伊，來造啞口ê偶像ah？Tiau-khek ê siōng ū sím-mi̍h lī-ek, chiah hō͘ chō i ê lâng tiau-khek i ah? chù ê ngó͘-siōng kap ké ê sian-siⁿ, ū sím-mi̍h lī-ek, chiah hō͘ chō i ê lâng óa-khò i, lâi chō é-káu ê ngó͘-siōng ah?

19對柴頭講，Tio̍h醒；對啞口ê石頭講，起來，hit號人有災厄ah。Chit-ê kiám會教示人mah？看ah，是用金用銀包ê，伊ê內面lóng無活氣。Tùi chhâ-thâu kóng, Tio̍h chhíⁿ; tùi é-káu ê chio̍h-thâu kóng, Khí-lâi, hit-hō lâng ū chai-ē ah. Chit-ê kiám ōe kà-sī lâng mah? Khòaⁿ ah, sī ēng kim ēng gûn pau--ê, i ê lāi-bīn lóng bô oa̍h-khì.

20獨獨耶和華tī伊ê聖殿，全地tī伊ê面前lóng tio̍h靜靜。To̍k-to̍k Iâ-hô-hoa tī I ê sèng-tiān, choân-tōe tī I ê bīn-chêng lóng tio̍h chēng-chēng.