1先知哈巴谷所得tio̍h ê默示。Sian-ti Hap-pa-kok só͘ tit-tio̍h ê be̍k-sī.

2耶和華ah，我喉叫，你無聽，beh到tī時ah？我因為強暴叫苦，你iáu無拯救。Iâ-hô-hoa ah, góa âu-kiò, Lí bô thiaⁿ, beh kàu tī-sî ah? góa in-ūi kiông-pō kiò-khó͘, Lí iáu bô chín-kiù.

3你啥事hō͘我看見罪惡？橫逆ê事，你啥事定定看？毀滅kap強暴tī我面前，相爭相phah lóng發起。Lí siáⁿ-sū hō͘ góa khòaⁿ-kìⁿ chōe-ok? hêng-ge̍k ê sū, Lí siáⁿ-sū tiāⁿ-tiāⁿ khòaⁿ? húi-bia̍t kap kiông-pō tī góa bīn-chêng, saⁿ-chiⁿ saⁿ-phah lóng hoat-khí.

4因為án-ni律法放鬆，無行公平；pháiⁿ人圍困義人；所以審判無正直。In-ūi án-ni lu̍t-hoat pàng-sang, bô kiâⁿ kong-pêng; pháiⁿ-lâng ûi-khùn gī-lâng; só͘-í sím-phòaⁿ bô chèng-ti̍t.

5Lín tio̍h tī列國中看來想伊；大大gông-ngia̍h；因為當lín ê日，我beh行一項事，雖然kā lín講，lín也m̄信。Lín tio̍h tī lia̍t-kok-tiong khòaⁿ lâi siūⁿ i; tōa-tōa gông-ngia̍h; in-ūi tng lín ê ji̍t, Góa beh kiâⁿ chi̍t-hāng sū, sui-jiân kā lín kóng, lín iā m̄-sìn.

6看ah，我beh興起Ka-le̍k-tí人，就是殘忍躁暴ê邦國，遍行全地，霸佔hiah-ê m̄是屬伊khiā起ê所在；Khòaⁿ ah, Góa beh heng-khí Ka-le̍k-tí lâng, chiū-sī chân-jím sò-pō ê pang-kok, piàn-kiâⁿ choân-tōe, pà-chiàm hiah-ê m̄-sī sio̍k i khiā-khí ê só͘-chāi;

7伊ê威風thang驚，判斷kap權勢，lóng出tī家己ê意思。i ê ui-hong thang kiaⁿ, phòaⁿ-toàn kap koân-sè, lóng chhut tī ka-kī ê ì-sù.

8In ê馬比豹khah緊，比ê-hng時ê豺狼khah猛；馬兵排列開闊，馬兵tùi遠遠來；in親像鷹緊緊飛beh來食。In ê bé pí pà khah-kín, pí ê-hng-sî ê chhâi-lông khah-béng; bé-peng pâi-lia̍t khui-khoah, bé-peng tùi hn̄g-hn̄g lâi; in chhin-chhiūⁿ eng kín-kín pe beh lâi chia̍h.

9In來beh行強暴；in ê面狠狠進前；聚集所掠ê人，親像沙hiah-chōe。In lâi beh kiâⁿ kiông-pō; in ê bīn hiông-hiông chìn-chêng; chū-chi̍p só͘ lia̍h ê lâng, chhin-chhiūⁿ soa hiah-chōe.

10伊藐視君王，譏刺貴族；冷笑lóng總ê衛所；起土堆來攻取伊。I biáu-sī kun-ông, ki-chhì kùi-cho̍k; léng-chhiò lóng-chóng ê ōe-só͘; khí thô͘-tui lâi kong-chhú--i.

11Tùi án-ni，伊親像風掃過去，伊經過就犯罪；掠家己ê氣力做上帝。Tùi án-ni i chhin-chhiūⁿ hong sàu kè-khì, i keng-kè chiū hoān-chōe; lia̍h ka-kī ê khùi-la̍t chòe siōng-tè.

12耶和華我ê上帝我ê聖ê ah，祢kiám m̄是tùi永遠就有mah？阮bōe致到死，耶和華ah，祢為tio̍h審判來設立伊，石磐ah，祢為tio̍h譴責來備辦伊。Iâ-hô-hoa góa ê Siōng-tè góa ê Sèng--ê ah, Lí kiám m̄-sī tùi éng-oán chiū ū mah? goán bōe tì-kàu sí, Iâ-hô-hoa ah, Lí ūi-tio̍h sím-phòaⁿ lâi siat-li̍p i, Chio̍h-pôaⁿ ah, Lí ūi-tio̍h khiàn-chek lâi pī-pān i.

13祢ê目睭清氣無beh看邪惡，無beh看橫逆，行詭詐ê，祢啥事定定看in ah？pháiⁿ人吞滅比伊khah公義ê，祢啥事靜靜ah？Lí ê ba̍k-chiu chheng-khì bô beh khòaⁿ siâ-ok, bô beh khòaⁿ hêng-ge̍k, kiâⁿ khúi-chà--ê, Lí siáⁿ-sū tiāⁿ-tiāⁿ khòaⁿ in ah? pháiⁿ-lâng thun-bia̍t pí i khah kong-gī--ê, Lí siáⁿ-sū chēng-chēng ah?

14祢啥事hō͘人親像海裡ê魚，koh親像teh sô ê蟲，無頭目管理ah？Lí siáⁿ-sū hō͘ lâng chhin-chhiūⁿ hái--nih ê hî, koh chhin-chhiūⁿ teh sô ê thâng, bô thâu-ba̍k koán-lí ah?

15伊用鉤一盡釣in，伊用網á掠in，用大網拋in；為tio̍h án-ni，伊歡喜快樂。I ēng kau it-chīn tiò--in, i ēng bāng-á lia̍h in, ēng tōa-bāng pha in; ūi-tio̍h án-ni, i hoaⁿ-hí khoài-lo̍k.

16就獻祭hō͘伊ê網á，燒香hō͘伊ê大網；因為in tùi chiah-ê得tio̍h肥súi ê份額，kap充足ê食物。Chiū hiàn-chè hō͘ i ê bāng-á, sio-hiuⁿ hō͘ i ê tōa-bāng; in-ūi in tùi chiah-ê tit-tio̍h pûi-súi ê hūn-gia̍h, kap chhiong-chiok ê chia̍h-mi̍h.

17伊kiám thang piàⁿ空伊ê網，常常thâi死列國ê人，也無保惜mah？I kiám thang piàⁿ-khang i ê bāng, siông-siông thâi-sí lia̍t-kok ê lâng, iā bô pó-sioh mah?

1我beh khiā守更樓，khiā tī營寨觀看，看祂對我講甚麼話，我thang用甚麼話來訴明。Góa beh khiā chiú-kiⁿ-lâu, khiā tī iâⁿ-chē koan-khòaⁿ, khòaⁿ I tùi góa kóng sím-mi̍h ōe, góa thang ēng sím-mi̍h ōe lâi sò͘-bêng.

2耶和華應我講，寫chit-ê默示，明明刻tī板裡，hō͘讀ê人也thang走。Iâ-hô-hoa ìn góa kóng, Siá chit ê be̍k-sī, bêng-bêng khek tī pán--ni̍h, hō͘ tha̍k ê lâng iā thang cháu.

3因為chit-ê默示iáu有定tio̍h ê期，beh緊緊結局，決斷無白賊；雖然延chhiân，iáu-kú tio̍h thèng候；因為的確會到，無koh延chhiân。In-ūi chit ê be̍k-sī iáu-ū tiāⁿ-tio̍h ê kî, beh kín-kín kiat-kio̍k, koat-toàn bô pe̍h-chha̍t; sui-jiân iân-chhiân, iáu-kú tio̍h thèng-hāu; in-ūi tek-khak ōe kàu, bô koh iân-chhiân.

4看ah，伊ê心神自高，tī伊ê內面無正直；獨獨義人beh對伊ê信來活。Khòaⁿ ah, i ê sim-sîn chū-ko, tī i ê lāi-bīn bô chèng-ti̍t; to̍k-to̍k gī-lâng beh tùi i ê sìn lâi oa̍h.

5就是欺騙ê，驕傲ê人無tiàm tī家內；開闊伊ê心所愛ê，親像陰府，亦親像死bōe能滿足，統一萬國歸伊，聚集萬百姓歸伊。Chiū-sī khi-phiàn--ê, kiau-ngō͘ ê lâng bô tiàm tī ke-lāi; khui-khoah i ê sim só͘-ài--ê, chhin-chhiūⁿ im-hú, ia̍h chhin-chhiūⁿ sí bōe-ōe móa-chiok, thóng-it bān-kok kui i, chū-chi̍p bān peh-sìⁿ kui i.

6Chiah-ê眾人kiám無beh用俗語來批評伊，用譬喻來譏刺伊，講，積聚chōe-chōe無屬家己ê財物，beh jōa久？the̍h chōe-chōe準當ê物，家己擔負，hit號人有災厄ah。Chiah-ê chèng-lâng kiám bô beh ēng sio̍k-gú lâi phoe-phêng i, ēng phì-jū lâi ki-chhì i, kóng, Chek-chū chōe-chōe bô sio̍k ka-kī ê châi-bu̍t, beh jōa-kú? the̍h chōe-chōe chún-tǹg ê mi̍h, ka-kī tam-hū, hit-hō lâng ū chai-ē ah.

7咬你ê，kiám無忽然起來，攪擾你ê，kiám無醒起來，你就beh做in所搶ê物？Kā lí--ê, kiám bô hut-jiân khí-lâi, kiáu-jiáu lí--ê, kiám bô chhíⁿ--khí-lâi, lí chiū beh chòe in só͘ chhiúⁿ ê mi̍h?

8因為你搶劫chōe-chōe國，列國中所chhun ê人也beh搶劫你；是因為你thâi人流血，tùi境內kap城市，kap其中khiā起ê人，所行強暴ê緣故。In-ūi lí chhiúⁿ-kiap chōe-chōe kok, lia̍t-kok-tiong só͘ chhun ê lâng iā beh chhiúⁿ-kiap lí; sī in-ūi lí thâi-lâng lâu-huih, tùi kéng-lāi kap siâⁿ-chhī, kap kî-tiong khiā-khí ê lâng, só͘ kiâⁿ kiông-pō ê iân-kò͘.

9為家己ê家積聚不義ê錢，beh作siū tī高ê所在，ǹg望脫離兇惡ê勢力，hit號人有災厄ah。Ūi ka-kī ê ke chek-chū put-gī ê chîⁿ, beh choh-siū tī koâiⁿ ê só͘-chāi, ǹg-bāng thoat-lī hiong-ok ê sè-le̍k, hit-hō lâng ū chai-ē ah.

10你滅chōe-chōe百姓，所計謀ê，凌辱家己ê家，koh犯罪害家己ê性命。Lí bia̍t chōe-chōe peh-sìⁿ, só͘ kè-bô͘--ê, lêng-jio̍k ka-kī ê ke, koh hoān-chōe hāi ka-kī ê sìⁿ-miā.

11壁中ê石beh喉叫，柴料中ê通樑beh應聲。Piah-tiong ê chio̍h beh âu-kiò, chhâ-liāu-tiong ê thong-niû beh ìn siaⁿ.

12用thâi人流血來起城，用罪孽設立城市ê，有災厄ah。Ēng thâi-lâng lâu-huih lâi khí siâⁿ, ēng chōe-gia̍t siat-li̍p siâⁿ-chhī--ê, ū chai-ē ah.

13看ah，眾百姓所勞碌ê hō͘火燒去，列國tio̍h磨到厭倦ê歸tī空空，kiám m̄是lóng出tī萬軍ê耶和華mah？Khòaⁿ ah, chèng peh-sìⁿ só͘ lô-lo̍k--ê hō͘ hé sio--khì, lia̍t-kok tio̍h-bôa kàu ià-siān--ê kui tī khang-khang, kiám m̄-sī lóng chhut tī bān-kun ê Iâ-hô-hoa mah?

14因為耶和華ê榮光beh hō͘全地lóng bat，親像水充滿洋海一樣。In-ūi Iâ-hô-hoa ê êng-kng beh hō͘ choân-tōe lóng bat, chhin-chhiūⁿ chúi chhiong-móa iûⁿ-hái chi̍t-iūⁿ.

15Hō͘伊ê厝邊lim，koh參猛烈ê酒hō͘伊lim到醉，thang看見伊ê下體，hit號人有災厄ah。Hō͘ i ê chhù-piⁿ lim, koh chham béng-lia̍t ê chiú hō͘ i lim kàu chùi, thang khòaⁿ-kìⁿ i ê ē-thé, hit-hō lâng ū chai-ē ah.

16你所充滿ê，是凌辱，m̄是榮光；你亦tio̍h lim，顯出是未受割禮ê；耶和華chiàⁿ手ê杯beh oa̍t-tńg來hō͘你lim，你ê凌辱beh蓋密你ê榮光。Lí só͘ chhiong-móa--ê, sī lêng-jio̍k, m̄-sī êng-kng; lí ia̍h tio̍h lim, hián-chhut sī bē siū kat-lé--ê; Iâ-hô-hoa chiàⁿ-chhiú ê poe beh oa̍t-tńg lâi hō͘ lí lim, lí ê lêng-jio̍k beh khàm-ba̍t lí ê êng-kng.

17Koh你對黎巴嫩所行ê強暴，以及殘害野獸hō͘伊驚惶ê事，lóng beh遮蓋你；是因為你thâi人，對境內城市，kap其中khiā起ê人，所行強暴ê緣故。Koh lí tùi Lī-pa-lùn só͘ kiâⁿ ê kiông-pō, í-ki̍p chân-hāi iá-siù hō͘ i kiaⁿ-hiâⁿ ê sū, lóng beh jia-khàm lí; sī in-ūi lí thâi-lâng, tùi kéng-lāi siâⁿ-chhī, kap kî-tiong khiā-khí ê lâng, só͘ kiâⁿ kiông-pō ê iân-kò͘.

18雕刻ê像有甚麼利益，chiah hō͘造伊ê人雕刻伊ah？鑄ê偶像kap假ê先生，有甚麼利益，chiah hō͘造伊ê人óa靠伊，來造啞口ê偶像ah？Tiau-khek ê siōng ū sím-mi̍h lī-ek, chiah hō͘ chō i ê lâng tiau-khek i ah? chù ê ngó͘-siōng kap ké ê sian-siⁿ, ū sím-mi̍h lī-ek, chiah hō͘ chō i ê lâng óa-khò i, lâi chō é-káu ê ngó͘-siōng ah?

19對柴頭講，Tio̍h醒；對啞口ê石頭講，起來，hit號人有災厄ah。Chit-ê kiám會教示人mah？看ah，是用金用銀包ê，伊ê內面lóng無活氣。Tùi chhâ-thâu kóng, Tio̍h chhíⁿ; tùi é-káu ê chio̍h-thâu kóng, Khí-lâi, hit-hō lâng ū chai-ē ah. Chit-ê kiám ōe kà-sī lâng mah? Khòaⁿ ah, sī ēng kim ēng gûn pau--ê, i ê lāi-bīn lóng bô oa̍h-khì.

20獨獨耶和華tī伊ê聖殿，全地tī伊ê面前lóng tio̍h靜靜。To̍k-to̍k Iâ-hô-hoa tī I ê sèng-tiān, choân-tōe tī I ê bīn-chêng lóng tio̍h chēng-chēng.

1先知哈巴谷ê祈禱，用"Si-kî-o-lo̍k"調。Sian-ti Hap-pa-kok ê kî-tó, ēng "Si-kî-o-lo̍k" tiāu.

2耶和華ah，我聽見祢ê消息就驚惶。 耶和華ah，求祢tī chiah-ê年ê中間，koh興起祢ê所做； Tī chiah-ê年ê中間顯現； Tī受氣ê時記得憐憫。Iâ-hô-hoa ah, góa thiaⁿ-kìⁿ Lí ê siau-sit chiū kiaⁿ-hiâⁿ. Iâ-hô-hoa ah, kiû Lí tī chiah ê nî ê tiong-kan, koh heng-khí Lí ê só͘-chòe; Tī chiah ê nî ê tiong-kan hián-hiān; Tī siū-khì ê sî kì-tit lîn-bín.

3上帝tùi Thê-bān來， 聖ê tùi Pa-lân山到。 [Sè-la̍h] 祂ê榮光遮蓋chiah-ê天； 祂ê名聲充滿地。Siōng-tè tùi Thê-bān lâi, Sèng--ê tùi Pa-lân soaⁿ kàu. [Sè-la̍h] I ê êng-kng jia-khàm chiah ê thiⁿ; I ê miâ-siaⁿ chhiong-móa tōe.

4祂ê燦爛親像光； Tùi祂ê手有出光線。 Tī-hia祂ê能力khǹg-teh。I ê chhàn-lān chhin-chhiūⁿ kng; Tùi I ê chhiú ū chhut kng-sòaⁿ. Tī-hia I ê lêng-le̍k khǹg-teh.

5Tī祂ê頭前有瘟疫流行， Tī祂ê後面有熱症發出。Tī I ê thâu-chêng ū un-e̍k liû-hêng, Tī I ê āu-bīn ū jia̍t-chèng hoat-chhut.

6祂khiā-teh，就量大地； 祂觀看，趕散列邦； 永遠tī-teh ê山裂開； 久長ê山嶺崩陷； 祂ê所行，tùi早以來是án-ni。I khiā-teh, chiū niû tōa-tōe; I koan-khòaⁿ, kóaⁿ-sòaⁿ lia̍t-pang; Éng-oán tī-teh ê soaⁿ li̍h-khui; Kú-tn̂g ê soaⁿ-niá pang-hām; I ê só͘-kiâⁿ, tùi chá í-lâi sī án-ni.

7我看見Kó͘-san ê布棚tú-tio̍h患難； 米甸地ê帳籬gi̍h-gi̍h-chhoah。Góa khòaⁿ-kìⁿ Kó͘-san ê pò͘-pîⁿ tú-tio̍h hoān-lān; Bí-tiân tōe ê tiùⁿ-lî gi̍h-gi̍h-chhoah.

8耶和華ah，你騎你ê馬， 坐tī你拯救ê車， kiám是無歡喜chiah-ê江， 受氣chiah-ê河， 痛恨洋海mah？Iâ-hô-hoa ah, Lí khiâ Lí ê bé, Chē tī Lí chín-kiù ê chhia, Kiám-sī bô hoaⁿ-hí chiah ê kang, Siū-khì chiah ê hô, Thòng-hūn iûⁿ-hái mah?

9祢ê弓lóng露出； 對chiah-ê支派所chiù-chōa-ê，lóng是真實ê話。 [Sè-la̍h] 祢用江河分開大地。Lí ê keng lóng lō͘-chhut; Tùi chiah ê chi-phài só͘ chiù-chōa--ê, lóng sī chin-si̍t ê ōe. [Sè-la̍h] Lí ēng kang-hô pun-khui tōa-tōe.

10山嶺看見祢，就驚惶； 大水透風經過； 深淵出伊ê聲； 大湧chhèng高。Soaⁿ-niá khòaⁿ-kìⁿ Lí, chiū kiaⁿ-hiâⁿ; Tōa-chúi thàu-hong keng-kè; Chhim-ian chhut i ê siaⁿ; Tōa-éng chhèng-koâiⁿ.

11因為祢ê箭射出光； 你ê鎗ê光炎炎sih； 日kap月停止tī伊ê位處。In-ūi Lí ê chìⁿ siā-chhut kng; Lí ê chhiuⁿ ê kng iām-iām sih; Ji̍t kap ge̍h thêng-chí tī i ê ūi-chhù.

12祢受氣來遍行地上， 祢大受氣，phah列國親像phah五穀。Lí siū-khì lâi piàn-kiâⁿ tōe-chiūⁿ, Lí tōa siū-khì, phah lia̍t-kok chhin-chhiūⁿ phah ngó͘-kok.

13祢出來beh救祢ê百姓， 拯救祢ê受抹油ê； pháiⁿ人家中ê頭目，祢phah碎伊， 露現伊ê根基到盡頭。 [Sè-la̍h]Lí chhut--lâi beh kiù Lí ê peh-sìⁿ, Chín-kiù Lí ê siū-boah-iû--ê; Pháiⁿ-lâng ke-tiong ê thâu-ba̍k, Lí phah-chhùi i, Lō͘-hiān i ê kun-ki kàu chīn-thâu. [Sè-la̍h]

14祢用伊家己ê鎗鑿透伊戰士ê頭； In來親像捲螺風，beh趕散我； In所歡喜ê，是暗靜吞食sòng-hiong人。Lí ēng i ka-kī ê chhiuⁿ chha̍k-thàu i chiàn-sū ê thâu; In lâi chhin-chhiūⁿ kńg-lê-hong, beh kóaⁿ-sòaⁿ góa; In só͘ hoaⁿ-hí--ê, sī àm-chīⁿ thun-chia̍h sòng-hiong lâng.

15祢騎馬踏tī海裡： 就是踏giâ湧ê大水。Lí khiâ-bé ta̍h tī hái--nih: Chiū-sī ta̍h giâ-éng ê tōa-chúi.

16我聽見，我ê心腸攪絞： 為tio̍h hit-ê聲，我ê嘴唇khe̍h-khe̍h-tiō； 骨骸朽壞，我tī我ê所在ngia̍uh-ngia̍uh-chhoah。 我只有恬恬thèng候災難ê日到， 侵犯境內ê百姓上來。Góa thiaⁿ-kìⁿ, góa ê sim-tn̂g kiau(**kiáu)-ká: Ūi-tio̍h hit ê siaⁿ, góa ê chhùi-tûn khe̍h-khe̍h-tiō; Kut-hâi hiú-hoāi, góa tī góa ê só͘-chāi ngia̍uh-ngia̍uh-chhoah. Góa chí-ū tiām-tiām thèng-hāu chai-lān ê ji̍t kàu, Chhim-hoān kéng-lāi ê peh-sìⁿ chiūⁿ--lâi.

17雖然無花果樹無發樣， 葡萄樹無結果子， 橄欖樹亦無收成， 田園無出五穀， tiâu內無半隻羊， 牛tiâu也無牛，Sui-jiân bû-hoa-kó chhiū bô hoat-iūⁿ, Phû-tô-chhiū bô kiat ké-chí, Kaⁿ-ná-chhiū ia̍h bô siu-sêng, Chhân-hn̂g bô chhut gō͘-kak, Tiâu-lāi bô pòaⁿ-chiah iûⁿ, Gû-tiâu iā bô gû,

18我iáu-kú beh因為耶和華來歡喜， 因為救我ê上帝來快樂。Góa iáu-kú beh in-ūi Iâ-hô-hoa lâi hoaⁿ-hí, In-ūi kiù góa ê Siōng-tè lâi khoài-lo̍k.

19主耶和華是我ê氣力； 祂hō͘我ê腳親像鹿母； Koh hō͘我行tī我高ê所在。Chú Iâ-hô-hoa sī góa ê khùi-la̍t; I hō͘ góa ê kha chhin-chhiūⁿ lo̍k-bú; Koh hō͘ góa kiâⁿ tī góa koâiⁿ ê só͘-chāi.

20Chit-ê歌交hō͘樂官，用我絲絃ê樂器來唱。Chit-ê koa kau hō͘ ga̍k-koaⁿ, ēng góa si-hiân ê ga̍k-khì lâi chhiùⁿ.