1Chit-ê悖逆污穢暴虐ê城有災厄ah。Chit-ê pōe-ge̍k ù-òe pō-gio̍k ê siâⁿ ū chai-ē ah.

2伊無聽thàn所對伊講ê話；無受教示；無óa靠耶和華；無親近伊ê上帝。I bô thiaⁿ-thàn só͘ tùi i kóng ê ōe; bô siū kà-sī; bô óa-khò Iâ-hô-hoa; bô chhin-kūn i ê Siōng-tè.

3伊ê貴族tī hit中間是hm̄-hm̄哮ê獅，伊ê審判官是ê-hng時ê豺狼，一點á物也無留到過早起。I ê kùi-cho̍k tī hit tiong-kan sī hm̄-hm̄-háu ê sai, i ê sím-phòaⁿ-koaⁿ sī ê-hng-sî ê chhâi-lông, chi̍t-tiám-á mi̍h iā bô lâu kàu kè chá-khí.

4伊ê先知是浮漂詭詐ê人；伊ê祭司是褻瀆聖所，解斜律法。I ê sian-ti sī phû-phiò khúi-chà ê lâng; i ê chè-si sī siat-to̍k sèng-só͘, kóe-chhoa̍h lu̍t-hoat.

5耶和華是公義ê，tiàm-tī in中間；無行不義；ta̍k早起顯出伊ê公平，無隔斷；獨獨不義ê人m̄知見笑。Iâ-hô-hoa sī kong-gī--ê, tiàm-tī in tiong-kan; bô kiâⁿ put-gī; ta̍k-chá-khí hián-chhut I ê kong-pêng, bô keh-tn̄g; to̍k-to̍k put-gī ê lâng m̄-chai kiàn-siàu.

6我已經除滅列國，in ê城樓毀壞；我hō͘ in ê街路冷靜，致到無人經過；in ê城毀滅，無人tī-teh，無人khiā起。Góa í-keng tû-bia̍t lia̍t-kok, in ê siâⁿ-lâu húi-hoāi; Góa hō͘ in ê ke-lō͘ léng-chēng, tì-kàu bô lâng keng-kè; in ê siâⁿ húi-bia̍t, bô lâng tī-teh, bô lâng khiā-khí.

7我講，你獨獨tio̍h敬畏我，tio̍h受教示，chiah hō͘伊ê厝無照我所辨理伊ê，來受除滅；總是in透早起來，家己敗壞in一切ê所行。Góa kóng, Lí to̍k-to̍k tio̍h kèng-ùi Góa, tio̍h siū kà-sī, chiah hō͘ i ê chhù bô chiàu Góa só͘ pān-lí i--ê, lâi siū tû-bia̍t; chóng-sī in thàu-chá khí-lâi, ka-kī pāi-hoāi in it-chhè ê só͘-kiâⁿ.

8耶和華講，所以lín tio̍h thèng候我，到我起來搶the̍h ê日；因為我已經定tio̍h意思，招集列國，會集列邦，將我ê受氣，就是我猛烈ê受氣，lóng piàⁿ落tī in：全地beh hō͘我大受氣ê火燒滅。Iâ-hô-hoa kóng, Só͘-í lín tio̍h thèng-hāu Góa, kàu Góa khí-lâi chhiúⁿ-the̍h ê ji̍t; in-ūi Góa í-keng tiāⁿ-tio̍h ì-sù, chio-chi̍p lia̍t-kok, hōe-chi̍p lia̍t-pang, chiong Góa ê siū-khì, chiū-sī Góa béng-lia̍t ê siū-khì, lóng piàⁿ-lo̍h tī in: choân-tōe beh hō͘ Góa tōa siū-khì ê hé sio-bia̍t.

9Hit時我beh hō͘萬百姓ê言語變做清氣，thang求叫耶和華ê名，同心一意服事祂。Hit-sî Góa beh hō͘ bān peh-sìⁿ ê giân-gú piàn-chòe chheng-khì, thang kiû-kiò Iâ-hô-hoa ê miâ, tâng-sim chi̍t-ì ho̍k-sāi I.

10祈禱我ê，就是我四散ê百姓，beh tùi Kó͘-si̍t河外來，獻禮物hō͘我。Kî-tó Góa--ê, chiū-sī Góa sì-sòaⁿ ê peh-sìⁿ, beh tùi Kó͘-si̍t hô-gōa lâi, hiàn lé-mi̍h hō͘ Góa.

11當hit日，你的確無因為你一切得罪我ê事，家己見笑，因為tī hit時我beh對你中間除去誇口驕傲ê人；你就無koh tī我ê聖山自高。Tng hit-ji̍t lí tek-khak bô in-ūi lí it-chhè tek-chōe Góa ê sū, ka-kī kiàn-siàu, in-ūi tī hit-sî Góa beh tùi lí tiong-kan tû-khì khoa-kháu kiau-ngō͘ ê lâng; lí chiū bô koh tī Góa ê sèng-soaⁿ chū-ko.

12我亦beh留困苦sòng-hiong ê百姓tī你ê中間，in beh óa靠耶和華ê名。Góa ia̍h beh lâu khùn-khó͘ sòng-hiong ê peh-sìⁿ tī lí ê tiong-kan, in beh óa-khò Iâ-hô-hoa ê miâ.

13以色列所chhun ê百姓teh-beh無行pháiⁿ，無講白賊；嘴內無詭詐ê舌；in beh 穩食穩睏，無人hō͘ in驚。Í-sek-lia̍t só͘ chhun ê peh-sìⁿ teh-beh bô kiâⁿ-pháiⁿ, bô kóng pe̍h-chha̍t; chhùi-lāi bô khúi-chà ê chi̍h; in beh ún-chia̍h ún-khùn, bô lâng hō͘ in kiaⁿ.

14錫安ê百姓ah，應該tio̍h唱歌；以色列ah，tio̍h歡喜來叫；耶路撒冷ê百姓ah，tio̍h滿心歡喜快樂。Sek-an ê peh-sìⁿ ah, eng-kai tio̍h chhiùⁿ-koa; Í-sek-lia̍t ah, tio̍h hoaⁿ-hí lâi kiò; Iâ-lō͘-sat-léng ê peh-sìⁿ ah, tio̍h móa-sim hoaⁿ-hí khoài-lo̍k.

15耶和華已經除去你ê罪案，趕出你ê對敵；以色列ê王耶和華tī你中間；你免koh驚災厄。Iâ-hô-hoa í-keng tû-khì lí ê chōe-àn, kóaⁿ-chhut lí ê tùi-te̍k; Í-sek-lia̍t ê ông Iâ-hô-hoa tī lí tiong-kan; lí bián koh kiaⁿ chai-ē.

16當hit日，beh kā耶路撒冷講，莫得驚；錫安ah，你ê手m̄-thang垂落去。Tng hit-ji̍t beh kā Iâ-lō͘-sat-léng kóng, Bo̍h-tit kiaⁿ; Sek-an ah, lí ê chhiú m̄-thang sê--lo̍h-khì.

17你ê上帝耶和華tī你ê中間，就是全能ê，拯救ê；祂beh為tio̍h歡喜你來快樂，祂beh因為疼你來靜靜，koh為tio̍h歡喜你來唱歌。Lí ê Siōng-tè Iâ-hô-hoa tī lí ê tiong-kan, chiū-sī choân-lêng--ê, chín-kiù--ê; I beh ūi-tio̍h hoaⁿ-hí lí lâi khoài-lo̍k, I beh in-ūi thiàⁿ lí lâi chēng-chēng, koh ūi-tio̍h hoaⁿ-hí lí lâi chhiùⁿ-koa.

18因為欣慕節期來憂悶ê，我beh聚集in，in是屬你ê，in擔當凌辱親像擔重擔。In-ūi him-bō͘ choeh-kî lâi iu-būn--ê, Góa beh chū-chi̍p in, in sī sio̍k lí--ê, in tam-tng lêng-jio̍k chhin-chhiūⁿ taⁿ tāng-tàⁿ.

19看ah，當hit時，我beh辦hiah-ê苦楚你ê，beh拯救跛腳ê，beh聚集受趕逐ê，hiah-ê tī全地受凌辱ê，我beh hō͘ in得tio̍h o-ló名聲。Khòaⁿ ah, tng hit-sî, Góa beh pān hiah-ê khó͘-chhó͘ lí--ê, beh chín-kiù pái-kha--ê, beh chū-chi̍p siū kóaⁿ-tio̍k--ê, hiah-ê tī choân-tōe siū lêng-jio̍k--ê, Góa beh hō͘ in tit-tio̍h o-ló miâ-siaⁿ.

20Hit時我beh hō͘ lín來，hit時我beh聚集lín；因為我hō͘ lín受掠ê人tī lín ê目前倒tńg來ê時，就beh hō͘ lín tī地上萬百姓ê中間，得tio̍h名聲o-ló；這是耶和華講ê。Hit-sî Góa beh hō͘ lín lâi, hit-sî Góa beh chū-chi̍p lín; in-ūi Góa hō͘ lín siū-lia̍h ê lâng tī lín ê ba̍k-chêng tò-tńg lâi ê sî, chiū beh hō͘ lín tī tōe-chiūⁿ bān peh-sìⁿ ê tiong-kan, tit-tio̍h miâ-siaⁿ o-ló; che sī Iâ-hô-hoa kóng--ê.

1Tāi-lī-o͘王二年，六月初一，耶和華ê話託先知哈該，傳hō͘猶大ê總督，Sat-la̍h-thiat ê kiáⁿ Só͘-lô-pa-pek，kap Iok-sat-tap ê kiáⁿ，祭司頭約書亞講，Tāi-lī-o͘ ông jī-nî, la̍k-ge̍h chhoe-it, Iâ-hô-hoa ê ōe thok sian-ti Hap-kai, thoân hō͘ Iû-tāi ê chóng-tok, Sat-la̍h-thiat ê kiáⁿ Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a kóng,

2萬軍ê耶和華祂ê話án-ni講，chit-ê百姓講，起耶和華殿ê時，hit-ê時iáu未到。Bān-kun ê Iâ-hô-hoa I ê ōe án-ni kóng, Chit ê peh-sìⁿ kóng, Khí Iâ-hô-hoa tiān ê sî hit-ê sî iáu-bē kàu.

3Hit時耶和華ê話託先知哈該i講：Hit-sî Iâ-hô-hoa ê ōe thok sian-ti Hap-kai kóng:

4Chit間殿猶原荒廢，這kiám是lín家己khiā起天花板ê厝ê時mah？Chit-keng tiān iû-goân hong-hòe, che kiám-sī lín ka-kī khiā-khí thian-hoa-pán ê chhù ê sî mah?

5Taⁿ萬軍ê耶和華án-ni講，Lín tio̍h省察lín ê所行。Taⁿ bān-kun ê Iâ-hô-hoa án-ni kóng, Lín tio̍h séng-chhat lín ê só͘-kiâⁿ.

6Lín掖種子chōe，收成少；lín食，也bōe飽；lim，也bōe止渴；穿衫，也bōe燒；得tio̍h工錢ê，用工錢hē tī破孔ê袋á。Lín iā chéng-chí chōe, siu-sêng chió; lín chia̍h, iā bōe pá; lim, iā bōe chí-khoah; chhēng-saⁿ, iā bōe sio; tit-tio̍h kang-chîⁿ--ê, ēng kang-chîⁿ hē tī phòa-khang ê tē-á.

7萬軍ê耶和華án-ni講，Lín tio̍h省察lín ê所行。Bān-kun ê Iâ-hô-hoa án-ni kóng, Lín tio̍h séng-chhat lín ê só͘-kiâⁿ.

8Lín tio̍h上山取柴料，來起 chit-ê殿；我就因為án-ni歡喜，koh得tio̍h榮光；這是耶和華講ê。Lín tio̍h chiūⁿ-soaⁿ chhú chhâ-liāu, lâi khí chit ê tiān; Góa chiū in-ūi án-ni hoaⁿ-hí, koh tit-tio̍h êng-kng; che sī Iâ-hô-hoa kóng--ê.

9Lín ǹg望得tio̍h chōe，你看，反tńg得tio̍h少；lín帶到厝ê，我就pûn hō͘伊無去；這是甚麼緣故？是因為我ê殿荒廢。lín ta̍k人緊急家己ê厝；這是萬軍ê耶和華講ê。Lín ǹg-bāng tit-tio̍h chōe, lí khòaⁿ, hoán-tńg tit-tio̍h chió; lín tòa kàu chhù--ê, Góa chiū pûn hō͘ i bô--khì; che sī sím-mi̍h iân-kò͘? sī in-ūi Góa ê tiān hong-hòe. lín ta̍k-lâng kín-kip ka-kī ê chhù; che sī bān-kun ê Iâ-hô-hoa kóng--ê.

10所以因為lín ê緣故，天就無落露水，地也無出伊ê土產。Só͘-í in-ūi lín ê iân-kò͘, thiⁿ chiū bô lo̍h lō͘-chúi, tōe iā bô chhut i ê thó͘-sán.

11我hō͘炕旱到tī土地，tī山頭，tī五穀，tī新酒，tī油，tī地上所出ê，tī人，tī cheng-siⁿ，tī人ê手tio̍h磨得tio̍h-ê。Góa hō͘ khòng-hān kàu tī thó͘-tōe, tī soaⁿ-thâu, tī gō͘-kak, tī sin-chiú, tī iû, tī tōe-chiūⁿ só͘-chhut--ê, tī lâng, tī cheng-siⁿ, tī lâng ê chhiú tio̍h-bôa tit-tio̍h--ê.

12Hit時Sat-la̍h-thiat ê kiáⁿ Só͘-lô-pa-pek，kap Iok-sat-tap ê kiáⁿ，祭司頭約書亞，kap所chhun ê百姓，lóng聽thàn in ê上帝耶和華ê聲，kap先知哈該 奉耶和華in ê上帝差伊所講ê話；百姓亦tī耶和華ê面前，存驚畏ê心。Hit-sî Sat-la̍h-thiat ê kiáⁿ Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, kap só͘ chhun ê peh-sìⁿ, lóng thiaⁿ-thàn in ê Siōng-tè Iâ-hô-hoa ê siaⁿ, kap sian-ti Hap-kai hōng Iâ-hô-hoa in ê Siōng-tè chhe i só͘ kóng ê ōe; peh-sìⁿ ia̍h tī Iâ-hô-hoa ê bīn-chêng, chûn kiaⁿ-ùi ê sim.

13耶和華ê使者哈該 ，照耶和華所命令kā百姓講，耶和華講，我kap lín tī-teh。Iâ-hô-hoa ê sù-chiá Hap-kai, chiàu Iâ-hô-hoa só͘ bēng-lēng kā peh-sìⁿ kóng, Iâ-hô-hoa kóng, Góa kap lín tī-teh.

14耶和華激動猶大ê總督，Sat-la̍h-thiat ê kiáⁿ Só͘-lô-pa-pek，ê心，kap Iok-sat-tap ê kiáⁿ，祭司頭，約書亞ê心，kap chhun ê百姓ê心，in就來tī萬軍ê耶和華in ê上帝ê殿做工。Iâ-hô-hoa kek-tōng Iû-tāi ê chóng-tok, Sat-la̍h-thiat ê kiáⁿ Só͘-lô-pa-pek, ê sim, kap Iok-sat-tap ê kiáⁿ, chè-si-thâu, Iok-su-a ê sim, kap chhun ê peh-sìⁿ ê sim, in chiū lâi tī bān-kun ê Iâ-hô-hoa in ê Siōng-tè ê tiān chòe-kang.

15這是tī Tāi-lī-o͘王二年，六月二十四日。Che sī tī Tāi-lī-o͘ ông jī-nî, la̍k-ge̍h jī-cha̍p-sì ji̍t.

1七月二十一日，耶和華ê話託先知哈該 講，Chhit-ge̍h jī-cha̍p-it ji̍t, Iâ-hô-hoa ê ōe thok sian-ti Hap-kai kóng,

2你tio̍h kā猶大ê總督Sat-la̍h-thiat ê kiáⁿ，Só͘-lô-pa-pek，kap Iok-sat-tap ê kiáⁿ，祭司頭約書亞，以及所chhun ê百姓講，Lí tio̍h kā Iû-tāi ê chóng-tok Sat-la̍h-thiat ê kiáⁿ, Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, í-ki̍p só͘ chhun ê peh-sìⁿ kóng,

3Lín中間iáu tī-teh ê人，有是誰 bat看見chit間殿從前ê榮光mah？現在lín看了怎樣ah？kiám m̄是tī lín ê目睭看親像無mah？Lín tiong-kan iáu tī-teh ê lâng, ū chī-chūi bat khòaⁿ-kìⁿ chit keng tiān chiông-chêng ê êng-kng mah? Hiān-chāi lín khòaⁿ-liáu cháiⁿ-iūⁿ ah? kiám-m̄-sī tī lín ê ba̍k-chiu khòaⁿ chhin-chhiūⁿ bô mah?

4耶和華講，Só͘-lô-pa-pek ah，你tio̍h勇敢；Iok-sat-tap ê kiáⁿ，祭司頭約書亞ah，你亦tio̍h勇敢；耶和華koh講，Chit所在ê百姓ah，lín亦tio̍h勇敢，亦tio̍h做工，因為我kap lín tī-teh；這是萬軍ê耶和華講ê。Iâ-hô-hoa kóng, Só͘-lô-pa-pek ah, lí tio̍h ióng-kám; Iok-sat-tap ê kiáⁿ, chè-si-thâu Iok-su-a ah, lí ia̍h tio̍h ióng-kám; Iâ-hô-hoa koh kóng, Chit só͘-chāi ê peh-sìⁿ ah, lín ia̍h tio̍h ióng-kám, ia̍h tio̍h chòe-kang, in-ūi Góa kap lín tī-teh; che sī bān-kun ê Iâ-hô-hoa kóng--ê.

5當lín出埃及ê時，我kap lín立約ê話，我ê神tiàm-tī lín中間；lín莫得驚。Tng lín chhut Ai-ki̍p ê sî, Góa kap lín li̍p iok ê ōe, Góa ê Sîn tiàm-tī lín tiong-kan; lín bo̍h-tit kiaⁿ.

6因為萬軍ê耶和華án-ni講，Koh無jōa久，我beh koh一pái振動天kap地kap海kap乾地。In-ūi bān-kun ê Iâ-hô-hoa án-ni kóng, Koh bô jōa-kú, Góa beh koh chi̍t-pái tín-tāng thiⁿ kap tōe kap hái kap ta-tōe.

7我beh振動萬國，萬國所欣慕ê beh來；我就hō͘榮光充滿chit間殿；這是萬軍ê耶和華講ê。Góa beh tín-tāng bān-kok, bān-kok só͘ him-bō͘--ê beh lâi; Góa chiū hō͘ êng-kng chhiong-móa chit keng tiān; che sī bān-kun ê Iâ-hô-hoa kóng--ê.

8萬軍ê耶和華講，銀是我ê，金亦是我ê。Bān-kun ê Iâ-hô-hoa kóng, Gûn sī Góa--ê, kim ia̍h sī Góa--ê.

9Chit間殿後來ê榮光，beh贏過前ê榮光；這是萬軍ê耶和華講ê；koh tī chit-ê所在，我beh賞賜平安；這是萬軍ê耶和華講ê。Chit keng tiān āu-lâi ê êng-kng, beh iâⁿ-kè chêng ê êng-kng; che sī bān-kun ê Iâ-hô-hoa kóng--ê; koh tī chit ê só͘-chāi, Góa beh siúⁿ-sù pêng-an; che sī bān-kun ê Iâ-hô-hoa kóng--ê.

10Tāi-lī-o͘王二年，九月二十四日，耶和華ê話託先知哈該講，Tāi-lī-o͘ ông jī-nî, káu ge̍h jī-cha̍p-sì ji̍t, Iâ-hô-hoa ê ōe thok sian-ti Hap-kai kóng,

11萬軍ê耶和華án-ni講，關係tī律法你thang問祭司，Bān-kun ê Iâ-hô-hoa án-ni kóng, Koan-hē tī lu̍t-hoat lí thang mn̄g chè-si,

12講，設使有人用衫á裾包聖ê肉，chit-ê衫á裾óa-tio̍h餅，á是湯，á是酒，á是油，á是別號食物，就chit-ê物成做聖mah？祭司應講，無lah。kóng, Siat-sú ū lâng ēng saⁿ-á-ku pau sèng ê bah, chit ê saⁿ-á-ku óa-tio̍h piáⁿ, á-sī thng, á-sī chiú, á-sī iû, á-sī pa̍t-hō chia̍h-mi̍h, chiū chit ê mi̍h chiâⁿ-chòe sèng mah? Chè-si ìn kóng, Bô--lah.

13哈該koh講，設使有人摸tio̍h身屍bak lâ-sâm，來óa-tio̍h chiah-ê物ê一項，chit-ê物成做污穢mah？祭司應講，成做污穢。Hap-kai koh kóng, Siat-sú ū lâng bong--tio̍h sin-si bak lâ-sâm, lâi óa-tio̍h chiah ê mi̍h ê chi̍t-hāng, chit ê mi̍h chiâⁿ-chòe ù-òe mah? Chè-si ìn kóng, Chiâⁿ-chòe ù-òe.

14哈該就應講，耶和華講，Tī我ê面前，chit-ê百姓是親像án-ni，chit-ê國也是án-ni；in ê手所做ta̍k號ê工也lóng是án-ni；in tī-chia所獻ê無清氣。Hap-kai chiū ìn kóng, Iâ-hô-hoa kóng, Tī Góa ê bīn-chêng, chit ê peh-sìⁿ sī chhin-chhiūⁿ án-ni, chit ê kok iā sī án-ni; in ê chhiú só͘ chòe ta̍k-hō ê kang iā lóng sī án-ni; in tī-chia só͘ hiàn--ê bô chheng-khì.

15Taⁿ請lín想，chit日以前，耶和華ê殿iáu未有石疊(tha̍h)tī石頂ê時；Taⁿ chhiáⁿ lín siūⁿ, chit-ji̍t í-chêng, Iâ-hô-hoa ê tiān iáu-bē ū chio̍h tha̍h tī chio̍h-téng ê sî;

16歷過hiah-ê時，人來到五穀堆，想beh得tio̍h二十斗，只有十斗；有人來到酒窟，想beh得tio̍h五十甕，只有得tio̍h二十甕。le̍k-kè hiah ê sî, lâng lâi kàu gō͘-kak-tui, siūⁿ beh tit-tio̍h jī-cha̍p táu, chí-ū cha̍p-táu; ū lâng lâi kàu chiú-khut, siūⁿ beh tit-tio̍h gō͘-cha̍p àng, chí-ū tit-tio̍h jī-cha̍p àng.

17Tī lín ê手所做一切ê工，我用枯焦、朽爛大雹phah lín，lín iáu-kú無歸ǹg我；這是耶和華講ê。Tī lín ê chhiú só͘-chòe it-chhè ê kang, Góa ēng ko͘-tâ, hiú-nōa, tōa-pha̍uh phah lín, lín iáu-kú bô kui-ǹg Góa; che sī Iâ-hô-hoa kóng--ê.

18請lín想chit日以前，tùi九月二四日建立耶和華殿ê地基ê時，lín tio̍h想伊。Chhiáⁿ lín siūⁿ chit-ji̍t í-chêng, tùi káu-ge̍h jī-sì ji̍t kiàn-li̍p Iâ-hô-hoa tiān ê tōe-ki ê sî, lín tio̍h siūⁿ i.

19粟倉iáu有種子mah？葡萄樹、無花果樹、石榴樹、橄欖樹，lóng未有結果子；tùi今á日起，我beh賜福lín。Chhek-chhng iáu ū chéng-chí mah? Phû-tô-chhiū, bû-hoa-kó-chhiū, sia̍h-liû-chhiū, kaⁿ-ná-chhiū, lóng bē ū kiat ké-chí; tùi kin-á-ji̍t khí, Góa beh sù-hok lín.

20Hit月二十四日，耶和華ê話第二pái臨到哈該 講，Hit-ge̍h jī-cha̍p-sì ji̍t, Iâ-hô-hoa ê ōe tē-jī-pái lîm-kàu Hap-kai kóng,

21你tio̍h kā猶大ê總督Só͘-lô-pa-pek講，我beh振動天kap地；Lí tio̍h kā Iû-tāi ê chóng-tok Só͘-lô-pa-pek kóng, Góa beh tín-tāng thiⁿ kap tōe;

22我beh chhia倒列國ê寶座，除滅ta̍k邦國ê勢力，亦beh chhia倒戰車kap坐車ê，馬kap馬兵lóng beh倒落去，ta̍k-ê對伊ê兄弟ê刀來死。Góa beh chhia-tó lia̍t-kok ê pó-chō, tû-bia̍t ta̍k pang-kok ê sè-le̍k, ia̍h beh chhia-tó chiàn-chhia kap chē-chhia--ê, bé kap bé-peng lóng beh tó--lo̍h-khì, ta̍k-ê tùi i ê hiaⁿ-tī ê to lâi sí.

23萬軍ê耶和華講，我ê奴僕Sat-la̍h-thiat ê kiáⁿ Só͘-lô-pa-pek ah，當hit日，我beh召你，耶和華講伊；koh我beh用你做手指印；因為我bat揀選你；這是萬軍ê耶和華講ê。Bān-kun ê Iâ-hô-hoa kóng, Góa ê lô͘-po̍k Sat-la̍h-thiat ê kiáⁿ Só͘-lô-pa-pek ah, tng hit-ji̍t, Góa beh tiàu lí, Iâ-hô-hoa kóng i; koh Góa beh ēng lí chòe chhiú-chí-ìn; in-ūi Góa bat kéng-soán lí; che sī bān-kun ê Iâ-hô-hoa kóng--ê.