1Tāi-lī-o͘王二年，六月初一，耶和華ê話託先知哈該，傳hō͘猶大ê總督，Sat-la̍h-thiat ê kiáⁿ Só͘-lô-pa-pek，kap Iok-sat-tap ê kiáⁿ，祭司頭約書亞講，Tāi-lī-o͘ ông jī-nî, la̍k-ge̍h chhoe-it, Iâ-hô-hoa ê ōe thok sian-ti Hap-kai, thoân hō͘ Iû-tāi ê chóng-tok, Sat-la̍h-thiat ê kiáⁿ Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a kóng,

2萬軍ê耶和華祂ê話án-ni講，chit-ê百姓講，起耶和華殿ê時，hit-ê時iáu未到。Bān-kun ê Iâ-hô-hoa I ê ōe án-ni kóng, Chit ê peh-sìⁿ kóng, Khí Iâ-hô-hoa tiān ê sî hit-ê sî iáu-bē kàu.

3Hit時耶和華ê話託先知哈該i講：Hit-sî Iâ-hô-hoa ê ōe thok sian-ti Hap-kai kóng:

4Chit間殿猶原荒廢，這kiám是lín家己khiā起天花板ê厝ê時mah？Chit-keng tiān iû-goân hong-hòe, che kiám-sī lín ka-kī khiā-khí thian-hoa-pán ê chhù ê sî mah?

5Taⁿ萬軍ê耶和華án-ni講，Lín tio̍h省察lín ê所行。Taⁿ bān-kun ê Iâ-hô-hoa án-ni kóng, Lín tio̍h séng-chhat lín ê só͘-kiâⁿ.

6Lín掖種子chōe，收成少；lín食，也bōe飽；lim，也bōe止渴；穿衫，也bōe燒；得tio̍h工錢ê，用工錢hē tī破孔ê袋á。Lín iā chéng-chí chōe, siu-sêng chió; lín chia̍h, iā bōe pá; lim, iā bōe chí-khoah; chhēng-saⁿ, iā bōe sio; tit-tio̍h kang-chîⁿ--ê, ēng kang-chîⁿ hē tī phòa-khang ê tē-á.

7萬軍ê耶和華án-ni講，Lín tio̍h省察lín ê所行。Bān-kun ê Iâ-hô-hoa án-ni kóng, Lín tio̍h séng-chhat lín ê só͘-kiâⁿ.

8Lín tio̍h上山取柴料，來起 chit-ê殿；我就因為án-ni歡喜，koh得tio̍h榮光；這是耶和華講ê。Lín tio̍h chiūⁿ-soaⁿ chhú chhâ-liāu, lâi khí chit ê tiān; Góa chiū in-ūi án-ni hoaⁿ-hí, koh tit-tio̍h êng-kng; che sī Iâ-hô-hoa kóng--ê.

9Lín ǹg望得tio̍h chōe，你看，反tńg得tio̍h少；lín帶到厝ê，我就pûn hō͘伊無去；這是甚麼緣故？是因為我ê殿荒廢。lín ta̍k人緊急家己ê厝；這是萬軍ê耶和華講ê。Lín ǹg-bāng tit-tio̍h chōe, lí khòaⁿ, hoán-tńg tit-tio̍h chió; lín tòa kàu chhù--ê, Góa chiū pûn hō͘ i bô--khì; che sī sím-mi̍h iân-kò͘? sī in-ūi Góa ê tiān hong-hòe. lín ta̍k-lâng kín-kip ka-kī ê chhù; che sī bān-kun ê Iâ-hô-hoa kóng--ê.

10所以因為lín ê緣故，天就無落露水，地也無出伊ê土產。Só͘-í in-ūi lín ê iân-kò͘, thiⁿ chiū bô lo̍h lō͘-chúi, tōe iā bô chhut i ê thó͘-sán.

11我hō͘炕旱到tī土地，tī山頭，tī五穀，tī新酒，tī油，tī地上所出ê，tī人，tī cheng-siⁿ，tī人ê手tio̍h磨得tio̍h-ê。Góa hō͘ khòng-hān kàu tī thó͘-tōe, tī soaⁿ-thâu, tī gō͘-kak, tī sin-chiú, tī iû, tī tōe-chiūⁿ só͘-chhut--ê, tī lâng, tī cheng-siⁿ, tī lâng ê chhiú tio̍h-bôa tit-tio̍h--ê.

12Hit時Sat-la̍h-thiat ê kiáⁿ Só͘-lô-pa-pek，kap Iok-sat-tap ê kiáⁿ，祭司頭約書亞，kap所chhun ê百姓，lóng聽thàn in ê上帝耶和華ê聲，kap先知哈該 奉耶和華in ê上帝差伊所講ê話；百姓亦tī耶和華ê面前，存驚畏ê心。Hit-sî Sat-la̍h-thiat ê kiáⁿ Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, kap só͘ chhun ê peh-sìⁿ, lóng thiaⁿ-thàn in ê Siōng-tè Iâ-hô-hoa ê siaⁿ, kap sian-ti Hap-kai hōng Iâ-hô-hoa in ê Siōng-tè chhe i só͘ kóng ê ōe; peh-sìⁿ ia̍h tī Iâ-hô-hoa ê bīn-chêng, chûn kiaⁿ-ùi ê sim.

13耶和華ê使者哈該 ，照耶和華所命令kā百姓講，耶和華講，我kap lín tī-teh。Iâ-hô-hoa ê sù-chiá Hap-kai, chiàu Iâ-hô-hoa só͘ bēng-lēng kā peh-sìⁿ kóng, Iâ-hô-hoa kóng, Góa kap lín tī-teh.

14耶和華激動猶大ê總督，Sat-la̍h-thiat ê kiáⁿ Só͘-lô-pa-pek，ê心，kap Iok-sat-tap ê kiáⁿ，祭司頭，約書亞ê心，kap chhun ê百姓ê心，in就來tī萬軍ê耶和華in ê上帝ê殿做工。Iâ-hô-hoa kek-tōng Iû-tāi ê chóng-tok, Sat-la̍h-thiat ê kiáⁿ Só͘-lô-pa-pek, ê sim, kap Iok-sat-tap ê kiáⁿ, chè-si-thâu, Iok-su-a ê sim, kap chhun ê peh-sìⁿ ê sim, in chiū lâi tī bān-kun ê Iâ-hô-hoa in ê Siōng-tè ê tiān chòe-kang.

15這是tī Tāi-lī-o͘王二年，六月二十四日。Che sī tī Tāi-lī-o͘ ông jī-nî, la̍k-ge̍h jī-cha̍p-sì ji̍t.

1七月二十一日，耶和華ê話託先知哈該 講，Chhit-ge̍h jī-cha̍p-it ji̍t, Iâ-hô-hoa ê ōe thok sian-ti Hap-kai kóng,

2你tio̍h kā猶大ê總督Sat-la̍h-thiat ê kiáⁿ，Só͘-lô-pa-pek，kap Iok-sat-tap ê kiáⁿ，祭司頭約書亞，以及所chhun ê百姓講，Lí tio̍h kā Iû-tāi ê chóng-tok Sat-la̍h-thiat ê kiáⁿ, Só͘-lô-pa-pek, kap Iok-sat-tap ê kiáⁿ, chè-si-thâu Iok-su-a, í-ki̍p só͘ chhun ê peh-sìⁿ kóng,

3Lín中間iáu tī-teh ê人，有是誰 bat看見chit間殿從前ê榮光mah？現在lín看了怎樣ah？kiám m̄是tī lín ê目睭看親像無mah？Lín tiong-kan iáu tī-teh ê lâng, ū chī-chūi bat khòaⁿ-kìⁿ chit keng tiān chiông-chêng ê êng-kng mah? Hiān-chāi lín khòaⁿ-liáu cháiⁿ-iūⁿ ah? kiám-m̄-sī tī lín ê ba̍k-chiu khòaⁿ chhin-chhiūⁿ bô mah?

4耶和華講，Só͘-lô-pa-pek ah，你tio̍h勇敢；Iok-sat-tap ê kiáⁿ，祭司頭約書亞ah，你亦tio̍h勇敢；耶和華koh講，Chit所在ê百姓ah，lín亦tio̍h勇敢，亦tio̍h做工，因為我kap lín tī-teh；這是萬軍ê耶和華講ê。Iâ-hô-hoa kóng, Só͘-lô-pa-pek ah, lí tio̍h ióng-kám; Iok-sat-tap ê kiáⁿ, chè-si-thâu Iok-su-a ah, lí ia̍h tio̍h ióng-kám; Iâ-hô-hoa koh kóng, Chit só͘-chāi ê peh-sìⁿ ah, lín ia̍h tio̍h ióng-kám, ia̍h tio̍h chòe-kang, in-ūi Góa kap lín tī-teh; che sī bān-kun ê Iâ-hô-hoa kóng--ê.

5當lín出埃及ê時，我kap lín立約ê話，我ê神tiàm-tī lín中間；lín莫得驚。Tng lín chhut Ai-ki̍p ê sî, Góa kap lín li̍p iok ê ōe, Góa ê Sîn tiàm-tī lín tiong-kan; lín bo̍h-tit kiaⁿ.

6因為萬軍ê耶和華án-ni講，Koh無jōa久，我beh koh一pái振動天kap地kap海kap乾地。In-ūi bān-kun ê Iâ-hô-hoa án-ni kóng, Koh bô jōa-kú, Góa beh koh chi̍t-pái tín-tāng thiⁿ kap tōe kap hái kap ta-tōe.

7我beh振動萬國，萬國所欣慕ê beh來；我就hō͘榮光充滿chit間殿；這是萬軍ê耶和華講ê。Góa beh tín-tāng bān-kok, bān-kok só͘ him-bō͘--ê beh lâi; Góa chiū hō͘ êng-kng chhiong-móa chit keng tiān; che sī bān-kun ê Iâ-hô-hoa kóng--ê.

8萬軍ê耶和華講，銀是我ê，金亦是我ê。Bān-kun ê Iâ-hô-hoa kóng, Gûn sī Góa--ê, kim ia̍h sī Góa--ê.

9Chit間殿後來ê榮光，beh贏過前ê榮光；這是萬軍ê耶和華講ê；koh tī chit-ê所在，我beh賞賜平安；這是萬軍ê耶和華講ê。Chit keng tiān āu-lâi ê êng-kng, beh iâⁿ-kè chêng ê êng-kng; che sī bān-kun ê Iâ-hô-hoa kóng--ê; koh tī chit ê só͘-chāi, Góa beh siúⁿ-sù pêng-an; che sī bān-kun ê Iâ-hô-hoa kóng--ê.

10Tāi-lī-o͘王二年，九月二十四日，耶和華ê話託先知哈該講，Tāi-lī-o͘ ông jī-nî, káu ge̍h jī-cha̍p-sì ji̍t, Iâ-hô-hoa ê ōe thok sian-ti Hap-kai kóng,

11萬軍ê耶和華án-ni講，關係tī律法你thang問祭司，Bān-kun ê Iâ-hô-hoa án-ni kóng, Koan-hē tī lu̍t-hoat lí thang mn̄g chè-si,

12講，設使有人用衫á裾包聖ê肉，chit-ê衫á裾óa-tio̍h餅，á是湯，á是酒，á是油，á是別號食物，就chit-ê物成做聖mah？祭司應講，無lah。kóng, Siat-sú ū lâng ēng saⁿ-á-ku pau sèng ê bah, chit ê saⁿ-á-ku óa-tio̍h piáⁿ, á-sī thng, á-sī chiú, á-sī iû, á-sī pa̍t-hō chia̍h-mi̍h, chiū chit ê mi̍h chiâⁿ-chòe sèng mah? Chè-si ìn kóng, Bô--lah.

13哈該koh講，設使有人摸tio̍h身屍bak lâ-sâm，來óa-tio̍h chiah-ê物ê一項，chit-ê物成做污穢mah？祭司應講，成做污穢。Hap-kai koh kóng, Siat-sú ū lâng bong--tio̍h sin-si bak lâ-sâm, lâi óa-tio̍h chiah ê mi̍h ê chi̍t-hāng, chit ê mi̍h chiâⁿ-chòe ù-òe mah? Chè-si ìn kóng, Chiâⁿ-chòe ù-òe.

14哈該就應講，耶和華講，Tī我ê面前，chit-ê百姓是親像án-ni，chit-ê國也是án-ni；in ê手所做ta̍k號ê工也lóng是án-ni；in tī-chia所獻ê無清氣。Hap-kai chiū ìn kóng, Iâ-hô-hoa kóng, Tī Góa ê bīn-chêng, chit ê peh-sìⁿ sī chhin-chhiūⁿ án-ni, chit ê kok iā sī án-ni; in ê chhiú só͘ chòe ta̍k-hō ê kang iā lóng sī án-ni; in tī-chia só͘ hiàn--ê bô chheng-khì.

15Taⁿ請lín想，chit日以前，耶和華ê殿iáu未有石疊(tha̍h)tī石頂ê時；Taⁿ chhiáⁿ lín siūⁿ, chit-ji̍t í-chêng, Iâ-hô-hoa ê tiān iáu-bē ū chio̍h tha̍h tī chio̍h-téng ê sî;

16歷過hiah-ê時，人來到五穀堆，想beh得tio̍h二十斗，只有十斗；有人來到酒窟，想beh得tio̍h五十甕，只有得tio̍h二十甕。le̍k-kè hiah ê sî, lâng lâi kàu gō͘-kak-tui, siūⁿ beh tit-tio̍h jī-cha̍p táu, chí-ū cha̍p-táu; ū lâng lâi kàu chiú-khut, siūⁿ beh tit-tio̍h gō͘-cha̍p àng, chí-ū tit-tio̍h jī-cha̍p àng.

17Tī lín ê手所做一切ê工，我用枯焦、朽爛大雹phah lín，lín iáu-kú無歸ǹg我；這是耶和華講ê。Tī lín ê chhiú só͘-chòe it-chhè ê kang, Góa ēng ko͘-tâ, hiú-nōa, tōa-pha̍uh phah lín, lín iáu-kú bô kui-ǹg Góa; che sī Iâ-hô-hoa kóng--ê.

18請lín想chit日以前，tùi九月二四日建立耶和華殿ê地基ê時，lín tio̍h想伊。Chhiáⁿ lín siūⁿ chit-ji̍t í-chêng, tùi káu-ge̍h jī-sì ji̍t kiàn-li̍p Iâ-hô-hoa tiān ê tōe-ki ê sî, lín tio̍h siūⁿ i.

19粟倉iáu有種子mah？葡萄樹、無花果樹、石榴樹、橄欖樹，lóng未有結果子；tùi今á日起，我beh賜福lín。Chhek-chhng iáu ū chéng-chí mah? Phû-tô-chhiū, bû-hoa-kó-chhiū, sia̍h-liû-chhiū, kaⁿ-ná-chhiū, lóng bē ū kiat ké-chí; tùi kin-á-ji̍t khí, Góa beh sù-hok lín.

20Hit月二十四日，耶和華ê話第二pái臨到哈該 講，Hit-ge̍h jī-cha̍p-sì ji̍t, Iâ-hô-hoa ê ōe tē-jī-pái lîm-kàu Hap-kai kóng,

21你tio̍h kā猶大ê總督Só͘-lô-pa-pek講，我beh振動天kap地；Lí tio̍h kā Iû-tāi ê chóng-tok Só͘-lô-pa-pek kóng, Góa beh tín-tāng thiⁿ kap tōe;

22我beh chhia倒列國ê寶座，除滅ta̍k邦國ê勢力，亦beh chhia倒戰車kap坐車ê，馬kap馬兵lóng beh倒落去，ta̍k-ê對伊ê兄弟ê刀來死。Góa beh chhia-tó lia̍t-kok ê pó-chō, tû-bia̍t ta̍k pang-kok ê sè-le̍k, ia̍h beh chhia-tó chiàn-chhia kap chē-chhia--ê, bé kap bé-peng lóng beh tó--lo̍h-khì, ta̍k-ê tùi i ê hiaⁿ-tī ê to lâi sí.

23萬軍ê耶和華講，我ê奴僕Sat-la̍h-thiat ê kiáⁿ Só͘-lô-pa-pek ah，當hit日，我beh召你，耶和華講伊；koh我beh用你做手指印；因為我bat揀選你；這是萬軍ê耶和華講ê。Bān-kun ê Iâ-hô-hoa kóng, Góa ê lô͘-po̍k Sat-la̍h-thiat ê kiáⁿ Só͘-lô-pa-pek ah, tng hit-ji̍t, Góa beh tiàu lí, Iâ-hô-hoa kóng i; koh Góa beh ēng lí chòe chhiú-chí-ìn; in-ūi Góa bat kéng-soán lí; che sī bān-kun ê Iâ-hô-hoa kóng--ê.

1Tāi-lī-o͘二年，八月，耶和華ê話臨到E̍k-to ê孫，Pí-lī-ka ê kiáⁿ，先知撒迦利亞講：Tāi-lī-o͘ jī-nî, poeh-ge̍h, Iâ-hô-hoa ê ōe lîm-kàu E̍k-to ê sun, Pí-lī-ka ê kiáⁿ, sian-ti Sat-ka-lī-a kóng:

2耶和華bat大受氣lín ê列祖。Iâ-hô-hoa bat tōa siū-khì lín ê lia̍t-chó͘.

3所以你tio̍h kā in講，萬軍ê耶和華án-ni講，Lín tio̍h oa̍t-tńg來chhē我；萬軍ê耶和華講，我亦beh oa̍t-tńg來chhē lín；這是萬軍ê耶和華講ê。Só͘-í lí tio̍h kā in kóng, Bān-kun ê Iâ-hô-hoa án-ni kóng, Lín tio̍h oa̍t-tńg lâi chhē Góa; Bān-kun ê Iâ-hô-hoa kóng, Góa ia̍h beh oa̍t-tńg--lâi chhē lín; che sī bān-kun ê Iâ-hô-hoa kóng--ê.

4莫得學lín ê列祖，前ê先知bat叫in講，萬軍ê耶和華án-ni講，Lín tio̍h回頭離開lín ê pháiⁿ路，kap lín ê pháiⁿ所行；總是in m̄俯耳孔，也m̄聽我；這是耶和華講ê。Bo̍h-tit o̍h lín ê lia̍t-chó͘, chêng ê sian-ti bat kiò in kóng, Bān-kun ê Iâ-hô-hoa án-ni kóng, Lín tio̍h hôe-thâu lī-khui lín ê pháiⁿ-lō͘, kap lín ê pháiⁿ só͘-kiâⁿ; chóng-sī in m̄ àⁿ hī-khang, iā m̄ thiaⁿ Góa; che sī Iâ-hô-hoa kóng--ê.

5Lín ê列祖tī toh-lo̍h ah？hiah-ê先知話永遠活teh mah？Lín ê lia̍t-chó͘ tī toh-lo̍h ah? Hiah ê sian-ti ōe éng-oán oa̍h--teh mah?

6總是我ê言語，我ê律例，我所吩咐我chiah-ê奴僕先知ê，kiám無到tī lín ê列祖mah？In就回頭講，萬軍ê耶和華按算beh照咱ê所行所做，施行tī咱，祂已經照án-ni款待咱lah。Chóng-sī Góa ê giân-gú, Góa ê lu̍t-lē, Góa só͘ hoan-hù Góa chiah ê lô͘-po̍k sian-ti--ê, kiám bô kàu-tī lín ê lia̍t-chó͘ mah? In chiū hôe-thâu kóng, Bān-kun ê Iâ-hô-hoa àn-sǹg beh chiàu lán ê só͘-kiâⁿ só͘-chòe, si-hêng tī lán, I í-keng chiàu án-ni khoán-thāi lán lah.

7Tāi-lī-o͘二年十一月，就是Sè-pā-te̍k月二十四日，耶和華ê話臨到E̍k-to ê孫，Pí-lī-ka ê kiáⁿ，先知撒迦利亞講，Tāi-lī-o͘ jí-nî cha̍p-it-ge̍h, chiū-sī Sè-pā-te̍k ge̍h jī-cha̍p-sì ji̍t, Iâ-hô-hoa ê ōe lîm-kàu E̍k-to ê sun, Pí-lī-ka ê kiáⁿ, sian-ti Sat-ka-lī-a kóng,

8我暝時觀看，看ah，有一人騎赤馬khiā tī 低地kong-liam樹ê中間；tī伊ê後面，koh有赤色、黃色、白色ê馬。Góa mî--sî koan-khòaⁿ, khòaⁿ ah, ū chi̍t-lâng khiâ chhiah-bé khiā tī kē-tōe kong-liam-chhiū ê tiong-kan; tī i ê āu-bīn, koh ū chhiah-sek, n̂g-sek, pe̍h-sek ê bé.

9我講，我ê主ah，這是甚麼？Kap我講ê使者就kā我講，我beh指示你知chiah-ê是甚麼。Góa kóng, Góa ê chú ah, che sī sím-mi̍h? Kap góa kóng ê sù-chiá chiū kā góa kóng, Góa beh chí-sī lí chai chiah-ê sī sím-mi̍h.

10Hit-ê khiā tī kong-liam樹中間ê人應講，這是耶和華所差往來tī地上ê。Hit-ê khiā tī kong-liam-chhiū tiong-kan ê lâng ìn kóng, Che sī Iâ-hô-hoa só͘ chhe óng-lâi tī tōe-chiūⁿ--ê.

11In就應hit-ê khiā tī kong-liam樹中耶和華ê使者講，阮已經往來tī地上，看ah，全地安然平定。In chiū ìn hit-ê khiā tī kong-liam-chhiū-tiong Iâ-hô-hoa ê sù-chiá kóng, Goán í-keng óng-lâi tī tōe-chiūⁿ, khòaⁿ ah, choân-tōe an-jiân pîⁿ-tiāⁿ.

12Tùi án-ni，耶和華ê使者應講，萬軍ê耶和華ah，祢受氣耶路撒冷kap猶大chiah-ê城，已經七十年；祢無施憐憫beh到tī時ah？Tùi án-ni Iâ-hô-hoa ê sù-chiá ìn kóng, Bān-kun ê Iâ-hô-hoa ah, Lí siū-khì Iâ-lō͘-sat-léng kap Iû-tāi chiah ê siâⁿ, í-keng chhit-cha̍p nî; Lí bô si lîn-bín beh kàu tī-sî ah?

13耶和華就用好話，安慰ê話，應hit-ê kap我講話ê使者。Iâ-hô-hoa chiū ēng hó-ōe, an-ùi ê ōe, ìn hit-ê kap góa kóng-ōe ê sù-chiá.

14Kap我講話ê使者對我講，你tio̍h出聲講，萬軍ê耶和華án-ni講，我為tio̍h耶路撒冷，為tio̍h錫安，熱心到極。Kap góa kóng-ōe ê sù-chiá tùi góa kóng, Lí tio̍h chhut-siaⁿ kóng, Bān-kun ê Iâ-hô-hoa án-ni kóng, Góa ūi-tio̍h Iâ-lō͘-sat-léng, ūi-tio̍h Sek-an, jia̍t-sim kàu-ke̍k.

15我真受氣hiah-ê安然khiā起ê列國；因為我前只有小khóa受氣，in就加添伊ê艱苦。Góa chin siū-khì hiah-ê an-jiân khiā-khí ê lia̍t-kok; in-ūi Góa chêng chí-ū sió-khóa siū-khì, in chiū ke-thiⁿ i ê kan-khó͘.

16所以耶和華án-ni講，Taⁿ我倒tńg來耶路撒冷，施憐憫；我ê殿beh koh起tī hit中間，繩索beh牽tī耶路撒冷ê頂面；這是萬軍ê耶和華講ê。Só͘-í Iâ-hô-hoa án-ni kóng, Taⁿ Góa tò-tńg-lâi Iâ-lō͘-sat-léng, si lîn-bín; Góa ê tiān beh koh khí tī hit tiong-kan, chîn-soh beh khan tī Iâ-lō͘-sat-léng ê téng-bīn; che sī bān-kun ê Iâ-hô-hoa kóng--ê.

17你tio̍h koh出聲講，萬軍ê耶和華án-ni講，我chiah-ê城，beh koh豐盛發達；耶和華beh koh安慰錫安，koh揀選耶路撒冷。Lí tio̍h koh chhut-siaⁿ kóng, Bān-kun ê Iâ-hô-hoa án-ni kóng, Góa chiah ê siâⁿ, beh koh hong-sēng hoat-ta̍t; Iâ-hô-hoa beh koh an-ùi Sek-an, koh kéng-soán Iâ-lō͘-sat-léng.

18我kia̍h目觀看，看ah，有四支角。Góa kia̍h-ba̍k koan-khòaⁿ, khòaⁿ ah, ū sì-ki kak.

19我就問kap我講話ê使者講，Chiah-ê是甚麼？伊應我講，Chiah-ê就是phah散猶大以色列kap耶路撒冷chiah-ê角。Góa chiū mn̄g kap góa kóng-ōe ê sù-chiá kóng, Chiah-ê sī sím-mi̍h? I ìn góa kóng, Chiah-ê chiū-sī phah-sòaⁿ Iû-tāi Í-sek-lia̍t kap Iâ-lō͘-sat-léng chiah ê kak.

20耶和華koh hō͘我看見四個師傅；Iâ-hô-hoa koh hō͘ góa khòaⁿ-kìⁿ sì ê sai-hū;

21我講，In來beh做甚麼？伊應講，Hiah-ê是phah散猶大ê角，hō͘人m̄敢kia̍h頭；總是chiah-ê師傅來是beh hō͘ in驚，phah倒列國ê角，就是bat舉起in ê角攻擊猶大hō͘伊四散ê。góa kóng, In lâi beh chòe sím-mi̍h? I ìn kóng, Hiah-ê sī phah-sòaⁿ Iû-tāi ê kak, hō͘ lâng m̄-káⁿ kia̍h-thâu; chóng-sī chiah ê sai-hū lâi sī beh hō͘ in kiaⁿ, phah-tó lia̍t-kok ê kak, chiū-sī bat kú-khí in ê kak kong-kek Iû-tāi hō͘ i sì-sòaⁿ--ê.