1做基督耶穌ê囚犯，保羅，kap兄弟提摩太，phoe寄hō͘阮所疼同tio̍h磨ê腓利門，Chòe Ki-tok Iâ-so͘ ê siû-hoān, Pó-lô, kap hiaⁿ-tī Thê-mô͘-thài, phoe kià hō͘ goán só͘ thiàⁿ tâng tio̍h-bôa ê Hui-lī-bûn,

2kap姊妹A-hui-a，以及kap我同當兵e5A-ki-pò͘，kap聚集tī你ê家ê教會；kap chí-bē A-hui-a, í-ki̍p kap góa tâng tng peng ê A-ki-pò͘, kap chū-chi̍p tī lí ê ke ê kàu-hōe;

3願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

4我常常感謝我ê上帝，tī我祈禱ê中間siàu念你；Góa siông-siông kám-siā góa ê Siōng-tè, tī góa kî-tó ê tiong-kan siàu-liām lí;

5因為聽見你ê仁愛kap你所有ê信，就是ǹg主耶穌kap顯出tī眾聖徒ê；in-ūi thiaⁿ-kìⁿ lí ê jîn-ài kap lí só͘ ū ê sìn, chiū-sī ǹg Chú Iâ-so͘ kap hián-chhut tī chèng sèng-tô͘ ê;

6願你ê信ê相通有功效，thang深知lín中間萬項ê好，來歸tī基督。goān lí ê sìn ê siong-thong ū kong-hāu, thang chhim chai lín tiong-kan bān hāng ê hó, lâi kui tī Ki-tok.

7兄弟ah，我為tio̍h你ê仁愛大歡喜，大安慰；因為聖徒ê心對你得tio̍h安歇。Hiaⁿ-tī ah, góa ūi-tio̍h lí ê jîn-ài tōa hoaⁿ-hí, tōa an-ùi; in-ūi sèng-tô͘ ê sim tùi lí tit-tio̍h an-hioh.

8所以我雖然tī基督有thang好膽將所合宜行ê吩咐你，Só͘-í góa sui-jiân tī Ki-tok ū thang hó-táⁿ chiong só͘ ha̍p-gî kiâⁿ ê hoan-hù lí,

9獨獨因為相疼ê緣故，寧可求你；我就是年老ê保羅，現今也為tio̍h基督耶穌來受關監。to̍k-to̍k in-ūi saⁿ-thiàⁿ ê iân-kò͘, lêng-khó͘ kiû lí; góa chiū-sī nî lāu ê Pó-lô, hiān-kim iā ūi-tio̍h Ki-tok Iâ-so͘ lâi siū koaiⁿ-kaⁿ.

10我為tio̍h我ê kiáⁿ，就是我tī掛鐵鍊ê時所生ê，O-nî-se-bó͘，來求你；Góa ūi-tio̍h góa ê kiáⁿ, chiū-sī góa tī kòa thih-liān ê sî só͘ siⁿ ê, O-nî-se-bó͘, lâi kiû lí;

11伊前無利益你，現今就做你我ê利益；i chêng bô lī-ek lí, hiān-kim chiū chòe lí góa ê lī-ek;

12我有差伊koh tò去你hia；chit人就是我ê心腹。góa ū chhe i koh tò-khì lí hia; chit lâng chiū-sī góa ê sim-pak.

13我本ài留伊kap我tòa，thang tī我為tio̍h福音掛鐵鍊ê時，替你服事我。Góa pún ài lâu i kap góa tòa, thang tī góa ūi-tio̍h hok-im kòa thih-liān ê sî, thòe lí ho̍k-sāi góa.

14總是未知你ê意思，我就m̄-ài做甚麼；是beh hō͘你ê好，m̄是出tī勉強，是出tī甘願。Chóng-sī bē chai lí ê ì-sù, góa chiū m̄ ài chòe sím-mi̍h; sī beh hō͘ lí ê hó, m̄ sī chhut tī bián-kióng, sī chhut tī kam-goān.

15因為伊暫時離開你，kiám-chhái是beh hō͘你thang永遠得tio̍h伊；In-ūi i chiām-sî lī-khui lí, kiám-chhái sī beh hō͘ lí thang éng-oán tit-tio̍h i;

16m̄是猶原做奴僕，是贏過奴僕，就是做所疼ê兄弟；我實在看伊做án-ni；何況伊是你家內ê人，koh是屬tī主ê，kiám無koh-khah疼伊mah?m̄ sī iû-goân chòe lô͘-po̍k, sī iâⁿ-kè lô͘-po̍k, chiū-sī chòe só͘ thiàⁿ ê hiaⁿ-tī; góa si̍t-chāi khòaⁿ i chòe án-ni; hô-hòng i sī lí ke-lāi ê lâng, koh sī sio̍k tī Chú ê, kiám bô koh khah thiàⁿ i mah?

17所以你若掠我做同伴，tio̍h接納伊，親像接納我。Só͘-í lí nā lia̍h góa chòe tâng-phōaⁿ, tio̍h chiap-la̍p i, chhin-chhiūⁿ chiap-la̍p góa.

18伊若有刻虧你，á是欠你甚麼，thang算我ê賬。I nā ū khek-khui lí, á-sī khiàm lí sím-mi̍h, thang sǹg góa ê siàu.

19我保羅親手寫，我beh坐額；免我kā你講，你所欠我ê，是你本身ê性命。Góa Pó-lô chhin-chhiú siá, góa beh chē-gia̍h; bián góa kā lí kóng, lí só͘ khiàm góa ê, sī lí pún-sin ê sìⁿ-miā.

20是lah，兄弟ah，hō͘我tī主對你得tio̍h歡喜；hō͘我ê心tī基督得tio̍h安歇。Sī lah, hiaⁿ-tī ah, hō͘ góa tī Chú tùi lí tit-tio̍h hoaⁿ-hí; hō͘ góa ê sim tī Ki-tok tit-tio̍h an-hioh.

21我已經深信你ê順thàn，就寫phoe hō͘你，因為知你所beh行ê，會過頭tī我所講ê。Góa í-keng chhim sìn lí ê sūn-thàn, chiū siá phoe hō͘ lí, in-ūi chai lí só͘ beh kiâⁿ ê, ōe kè-thâu tī góa só͘ kóng ê.

22Koh也tio̍h備辦所在hō͘我tòa；因為我ǹg望tùi lín ê祈禱，上帝beh將我賞賜lín。Koh iā tio̍h pī-pān só͘-chāi hō͘ góa tòa; in-ūi góa ǹg-bāng tùi lín ê kî-tó, Siōng-tè beh chiong góa siúⁿ-sù lín.

23Í-pa-hut，就是tī基督耶穌kap我做同關監ê，請安lí；Í-pa-hut, chiū-sī tī Ki-tok Iâ-so͘ kap góa chòe tâng koaiⁿ-kaⁿ ê, chhéng-an lí;

24kap我saⁿ-kap tio̍h磨ê馬可、A-lí-ta̍t-kó͘、Tí-má，路加也請安你。kap góa saⁿ-kap tio̍h-bôa ê Má-khó, A-lí-ta̍t-kó͘, Tí-má, Lō͘-ka iā chhéng-an lí.

25願咱ê主耶穌基督ê恩典kap lín ê神saⁿ-kap tī-teh。À-bēng。Goān lán ê Chú Iâ-so͘ Ki-tok ê un-tián kap lín ê sîn saⁿ-kap tī-teh. À-bēng.

1上帝tī在早已經託hiah-ê先知，用chōe-chōe段，chōe-chōe方法，kā列祖講；Siōng-tè tī chāi-chá í-keng thok hiah ê sian-ti, ēng chōe-chōe tōaⁿ, chōe-chōe hong-hoat, kā lia̍t-chó͘ kóng;

2taⁿ tī hiah-ê日ê路尾，託伊ê Kiáⁿ kā咱講；就是伊所設立做承接萬物ê後嗣，亦bat tùi伊來創造chiah-ê世界。taⁿ tī hiah ê ji̍t ê lō͘-bé, thok I ê Kiáⁿ kā lán kóng; chiū-sī I só͘ siat-li̍p chòe sêng-chiap bān mi̍h ê hō͘-sû, ia̍h bat tùi I lâi chhòng-chō chiah ê sè-kài.

3伊是上帝ê榮耀所發出ê光，是上帝本質ê真象，伊用伊權能ê話teh扶載萬物，已經成清潔罪ê事，就坐tī極高ê天頂，大威嚴ê ê大pêng；I sī Siōng-tè ê êng-iāu só͘ hoat-chhut ê kng, sī Siōng-tè pún-chit ê chin siōng, I ēng I koân-lêng ê ōe teh hû-chài bān mi̍h, í-keng chiâⁿ chheng-kiat chōe ê sū, chiū chē tī ke̍k koâiⁿ ê thiⁿ-téng, tōa ui-giâm ê ê tōa pêng;

4成做比chiah-ê天使khah大，合tī伊所承接ê名，比in khah尊貴。chiâⁿ-chòe pí chiah ê thiⁿ-sài khah tōa, ha̍p tī I só͘ sêng-chiap ê miâ, pí in khah chun-kùi.

5因為上帝kiám bat tùi甚麼天使講: 你就是我ê Kiáⁿ，我今á日生你？koh講， 我beh做伊ê父，伊beh做我ê Kiáⁿ。In-ūi Siōng-tè kiám bat tùi sím-mi̍h thiⁿ-sài kóng: Lí chiū-sī góa ê Kiáⁿ, Góa kin-á-ji̍t siⁿ lí?koh kóng, Góa beh chòe I ê Pē, I beh chòe góa ê Kiáⁿ.

6到伊koh chhōa大Kiáⁿ入世間ê時，就講，上帝chiah-ê天使lóng tio̍h拜伊。Kàu I koh chhōa tōa Kiáⁿ ji̍p sè-kan ê sî, chiū kóng, Siōng-tè chiah ê thiⁿ-sài lóng tio̍h pài I.

7論到天使就講: Hō͘伊ê天使做風，伊ê差用做火燄:Lūn-kàu thiⁿ-sài chiū kóng: Hō͘ I ê thiⁿ-sài chòe hong, I ê chhe-ēng chòe hé-iām:

8但是論到Kiáⁿ就講， 上帝ah，你ê座位代代tī-teh， 你ê 國權柄是正直ê權柄。nā-sī lūn-kàu Kiáⁿ chiū kóng, Siōng-tè ah, lí ê chō-ūi tāi-tāi tī-teh, Lí ê kok koân-pèng sī chèng-ti̍t ê koân-pèng.

9你ài公義，怨恨不法； 所以上帝，你ê上帝，用歡喜ê油抹你， 贏過你chiah-ê同伴。Lí ài kong-gī, oàn-hūn put-hoat; Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

10Koh講， 主ah，起頭ê時，你hē地ê地基， Chiah-ê天亦是你ê手所造ê:Koh kóng, Chú ah, khí-thâu ê sî, lí hē tōe ê tōe-ki, Chiah ê thiⁿ ia̍h sī lí ê chhiú só͘ chō ê:

11In beh滅無；獨獨你久長tī-teh: In lóng beh親像衣服漸漸舊；In beh bia̍t-bô; to̍k-to̍k lí kú-tn̂g tī-teh: In lóng beh chhin-chhiūⁿ i-ho̍k chiām-chiām kū;

12你beh將in捲起來，親像外衫， 親像衣服，in就beh變換: 獨獨你原在是án-ni，你ê歲壽無窮盡。Lí beh chiong in kńg-khí-lâi, chhin-chhiūⁿ gōa-saⁿ, Chhin-chhiūⁿ i-ho̍k, in chiū beh piàn-ōaⁿ: To̍k-to̍k lí goân-chāi sī án-ni, lí ê hè-siū bô kiông-chīn.

13上帝bat tùi tá-lo̍h一個天使講， 坐我ê大pêng， thèng候我hē你ê對敵做你ê腳踏椅？Siōng-tè bat tùi tá-lo̍h chi̍t ê thiⁿ-sài kóng, Chē góa ê tōa pêng, Thèng-hāu góa hē lí ê tùi-te̍k chòe lí ê kha-ta̍h-í?

14In kiám m̄是lóng做差用ê神，奉差來服事teh-beh得救ê人mah？In kiám m̄ sī lóng chòe chhe-ēng ê sîn, hōng-chhe lâi ho̍k-sāi teh-beh tit kiù ê lâng mah?

1所以咱tio̍h益發致意所聽見ê，驚了咱會致到溜去。Só͘-í lán tio̍h it-hoat tì-ì só͘ thiaⁿ-kìⁿ ê, kiaⁿ-liáu lán ōe tì-kàu liu-khì.

2因為tùi天使所傳ê道理，尚且是堅固，也見若干犯違逆ê tāi-chì lóng tú-tio̍h應該受ê報應；In-ūi tùi thiⁿ-sài só͘ thoân ê tō-lí, siōng-chhiáⁿ sī kian-kò͘, iā kìⁿ-nā kan-hoān ûi-ke̍h ê tāi-chì lóng tú-tio̍h eng-kai siū ê pò-èng;

3咱若忽略chiah-nih大ê拯救kiám會逃閃mah？Chit-ê拯救既然是主起頭講ê，聽見ê人干證到實實hō͘咱；lán nā hut-lio̍k chiah-ni̍h tōa ê chín-kiù kiám ōe tô-siám mah? Chit ê chín-kiù kì-jiân sī Chú khí-thâu kóng ê, thiaⁿ-kìⁿ ê lâng kan-chèng kàu si̍t-si̍t hō͘ lán;

4koh上帝用chiah-ê神蹟、奇事、ta̍k項ê權能kap聖神ê賞賜，lóng照家己ê旨意，kap in saⁿ-kap干證。koh Siōng-tè ēng chiah ê sîn-jiah, kî-sū, ta̍k hāng ê koân-lêng kap Sèng Sîn ê siúⁿ-sù, lóng chiàu ka-kī ê chí-ì, kap in saⁿ-kap kan-chèng.

5因為阮所講teh來ê世界，上帝未bat hō͘伊降服tī天使。In-ūi goán só͘ kóng teh lâi ê sè-kài Siōng-tè bē bat hō͘ i hâng-ho̍k tī thiⁿ-sài.

6獨獨有干證tī某所在ê，講， 人是甚麼，hō͘你siàu念伊？ 人ê Kiáⁿ是甚麼，hō͘你看顧伊？To̍k-to̍k ū kan-chèng tī bó͘ só͘-chāi ê, kóng, Lâng sī sím-mi̍h, hō͘ lí siàu-liām i? Lâng ê kiáⁿ sī sím-mi̍h, hō͘ lí khòaⁿ-kò͘ i?

7你hō͘伊略á khah輸天使， Koh用榮光尊貴，hō͘伊做冕旒， Koh設立伊tī你ê手所造ê ê頂面；Lí hō͘ i lio̍h-á khah-su thiⁿ-sài, Koh ēng êng-kng chun-kùi, hō͘ i chòe bián-liû, Koh siat-li̍p i tī lí ê chhiú só͘ chō ê ê téng-bīn;

8Hō͘萬物lóng降服tī伊ê腳下。　已經hō͘萬物lóng降服伊，就無chhun一項物無降服伊。總是到taⁿ咱猶未看見萬物lóng降服伊。Hō͘ bān mi̍h lóng hâng-ho̍k tī i ê kha-ē.Í-keng hō͘ bān mi̍h lóng hâng-ho̍k i, chiū bô chhun chi̍t hāng mi̍h bô hâng-ho̍k i. Chóng-sī kàu taⁿ lán iáu-bē khòaⁿ-kìⁿ bān mi̍h lóng hâng-ho̍k i.

9獨獨看見hit-ê略á khah輸天使ê耶穌，為tio̍h受死ê艱苦得tio̍h榮光尊貴做冕旒，thang tùi上帝ê恩，為tio̍h眾人受死。To̍k-to̍k khòaⁿ-kìⁿ hit ê lio̍h-á khah-su thiⁿ-sài ê Iâ-so͘, ūi-tio̍h siū sí ê kan-khó͘ tit-tio̍h êng-kng chun-kùi chòe bián-liû, thang tùi Siōng-tè ê un, ūi-tio̍h chèng lâng siū sí.

10因為萬物所為tio̍h伊，萬物所tùi伊ê，teh chhōa chōe-chōe kiáⁿ到tī榮光，就hō͘救in ê首領tùi苦難來成完全，本是合宜。In-ūi bān mi̍h só͘ ūi-tio̍h I, bān mi̍h só͘ tùi I ê, teh chhōa chōe-chōe kiáⁿ kàu tī êng-kng, chiū hō͘ kiù in ê siú-léng tùi khó͘-lān lâi chiâⁿ oân-choân, pún sī ha̍p-gî.

11因為hit-ê hō͘人成聖ê，kap hiah-ê得tio̍h成聖ê，lóng tùi一個出；所以伊稱in做兄弟無掠做見笑；In-ūi hit ê hō͘ lâng chiâⁿ sèng ê, kap hiah ê tit-tio̍h chiâⁿ sèng ê, lóng tùi chi̍t-ê chhut; só͘-í I chheng in chòe hiaⁿ-tī bô lia̍h chòe kiàn-siàu;

12講， 我beh報揚你ê名tī我ê兄弟， O-ló你tī會中。kóng, Góa beh pò-iông lí ê miâ tī góa ê hiaⁿ-tī, O-ló lí tī hōe-tiong.

13Koh講， 我beh óa靠伊。Koh講， 看ah！我kap上帝所hō͘我ê kiáⁿ兒。Koh kóng, Góa beh óa-khò I.Koh kóng, Khòaⁿ ah! góa kap Siōng-tè só͘ hō͘ góa ê kiáⁿ-jî.

14Taⁿ chiah-ê kiáⁿ兒既然相同有血肉ê體，伊本身亦平平有；beh用死來廢無有死ê權勢ê，就是魔鬼；Taⁿ chiah ê kiáⁿ-jî kì-jiân saⁿ-tâng ū huih bah ê thé, I pún-sin ia̍h pîⁿ-pîⁿ ū; beh ēng sí lâi hòe-bô ū sí ê koân-sè ê, chiū-sī Mô͘-kúi;

15亦beh hō͘一生驚畏死到親像做奴才ê，lóng得tio̍h tháu放。ia̍h beh hō͘ it-seng kiaⁿ-ùi sí kàu chhin-chhiūⁿ chòe lô͘-châi ê, lóng tit-tio̍h tháu-pàng.

16因為伊無牽救天使，是牽救亞伯拉罕ê後裔。In-ūi I bô khan-kiù thiⁿ-sài, sī khan-kiù A-pek-la̍h-hán ê hō͘-è.

17所以凡事伊tio̍h kap兄弟相同，thang tī上帝ê事做憐憫忠信ê祭司頭，因為百姓ê罪獻挽回ê祭。Só͘-í hoān sū I tio̍h kap hiaⁿ-tī saⁿ-tâng, thang tī Siōng-tè ê sū chòe lîn-bín tiong-sìn ê chè-si-thâu, in-ūi peh-sìⁿ ê chōe hiàn bán-hôe ê chè.

18因為伊已經受苦來tú-tio̍h試，就會幫贊chiah-ê受試ê人。In-ūi I í-keng siū khó͘ lâi tú-tio̍h chhì, chiū ōe pang-chān chiah ê siū chhì ê lâng.