1因為律法既然有將來好事ê影，無hiah-ê物ê真形；永永bōe會用ta̍k年常常teh獻相同ê祭，hō͘親近ê人得tio̍h完全。In-ūi lu̍t-hoat kì-jiân ū chiong-lâi hó sū ê iáⁿ, bô hiah ê mi̍h ê chin hêng; éng-éng bōe-ōe ēng ta̍k nî siông-siông teh hiàn saⁿ-tâng ê chè, hō͘ chhin-kūn ê lâng tit-tio̍h oân-choân.

2若是能，就獻祭ê事kiám無停soah mah？因為服事ê人一下清氣，就良心無koh知有罪。Nā sī ōe, chiū hiàn-chè ê sū kiám bô thêng-soah mah? in-ūi ho̍k-sāi ê lâng chi̍t-ē chheng-khì, chiū liông-sim bô koh chai ū chōe.

3但是tùi chiah-ê祭物是hō͘人ta̍k年記得罪。Nā-sī tùi chiah ê chè-mi̍h sī hō͘ lâng ta̍k nî kì-tit chōe.

4因為牛、羊ê血bōe會除去罪。In-ūi gû iûⁿ ê huih bōe-ōe tû-khì chōe.

5所以伊來入世間，就講， 祭祀禮物你m̄-ài， 你bat kā我備辦身軀；Só͘-í I lâi ji̍p sè-kan, chiū kóng, Chè-sū lé-mi̍h lí m̄ ài, Lí bat kā góa pī-pān sin-khu;

6燒祭kap贖罪祭，你無歡喜；Sio-chè kap sio̍k-chōe chè, lí bô hoaⁿ-hí;

7Hit時我講，你看，我來lah， 我ê事記載tī冊裡， 上帝，我來是beh行你ê旨意。Hit sî góa kóng, Lí khòaⁿ, góa lâi lah, Góa ê sū kì-chài tī chheh-ni̍h, Siōng-tè, góa lâi sī beh kiâⁿ lí ê chí-ì.

8頂面已經講，祭祀kap禮物，燒祭kap贖罪祭，你m̄-ài，亦無歡喜，(chiah-ê是照律法來獻ê)，Téng-bīn í-keng kóng, Chè-sū kap lé-mi̍h, sio-chè kap sio̍k-chōe chè, lí m̄ ài, ia̍h bô hoaⁿ-hí, (chiah-ê sī chiàu lu̍t-hoat lâi hiàn ê),

9後來講，你看，我來是beh行你ê旨意。伊是除去事先ê，beh設立tè後ê。āu-lâi kóng, Lí khòaⁿ, góa lâi sī beh kiâⁿ lí ê chí-ì. I sī tû-khì tāi-seng ê, beh siat-li̍p tè-āu ê.

10Tī chit-ê旨意，tùi耶穌基督一pái獻身軀，咱得tio̍h成聖。Tī chit ê chí-ì, tùi Iâ-so͘ Ki-tok chi̍t pái hiàn seng-khu, lán tit-tio̍h chiâⁿ sèng.

11Koh見若祭司ta̍k日khiā-teh來服事，ta̍uh-ta̍uh獻hiah-ê相同ê祭，就是永永bōe會除去罪ê；Koh kìⁿ-nā chè-si ta̍k ji̍t khiā-teh lâi ho̍k-sāi, ta̍uh-ta̍uh hiàn hiah ê saⁿ-tâng ê chè, chiū-sī éng-éng bōe-ōe tû-khì chōe ê;

12獨獨基督，既然獻一個祭到tī永遠，就坐tī上帝ê大pêng；to̍k-to̍k Ki-tok, kì-jiân hiàn chi̍t ê chè kàu tī éng-oán, chiū chē tī Siōng-tè ê tōa pêng;

13以後thèng候伊chiah-ê對敵hē做伊ê腳踏椅。í-āu thèng-hāu I chiah ê tùi-te̍k hē chòe I ê kha-ta̍h-í.

14因為伊用一pái獻祭，hō͘ chiah-ê成聖ê人永遠做完全。In-ūi I ēng chi̍t pái hiàn-chè, hō͘ chiah ê chiâⁿ-sèng ê lâng éng-oán chòe oân-choân.

15聖神kā咱做干證：因為伊已經有講，Sèng Sîn kā lán chòe kan-chèng: in-ūi I í-keng ū kóng,

16主講，Chiah-ê日了後， 我kap in所beh立ê約是chit-ê， 我beh將我ê律法hē tī in ê心， 刻tī in ê頭腦；Chú kóng, Chiah ê ji̍t liáu-āu, Góa kap in só͘ beh li̍p ê iok sī chit-ê, Góa beh chiong góa ê lu̍t-hoat hē tī in ê sim, Khek tī in ê thâu-náu;

17後來就講：「In ê罪惡，in ê不法，決斷無koh記念。」āu-lâi chiū kóng, "In ê chōe-ok, in ê put-hoat, koat-toàn bô koh kì-liām."

18Chiah-ê既然赦免，就無koh為tio̍h 罪獻祭。Chiah-ê kì-jiân sià-bián, chiū bô koh ūi-tio̍h chōe hiàn-chè.

19所以兄弟ah，咱tī耶穌ê血既然得tio̍h好膽入聖所，Só͘-í hiaⁿ-tī ah, lán tī Iâ-so͘ ê huih kì-jiân tit-tio̍h hó-táⁿ ji̍p sèng-só͘,

20tùi伊所kā咱開新kap活ê路，àn帳籬經過ê，chit-ê帳籬就是伊ê身體；tùi I só͘ kā lán khui sin kap oa̍h ê lō͘, àn tiùⁿ-lî keng-kè ê, chit ê tiùⁿ-lî chiū-sī I ê sin-thé;

21koh既然有大祭司治理上帝ê家；koh kì-jiân ū tōa chè-si tī-lí Siōng-tè ê ke;

22咱tio̍h用真實ê心，充滿ê信，心已經受hiù，免hō͘良心責備，身軀亦已經受清水洗，來親近上帝。lán tio̍h ēng chin-si̍t ê sim, chhiong-móa ê sìn, sim í-keng siū hiù bián hō͘ liông-sim chek-pī, seng-khu ia̍h í-keng siū chheng-chúi sóe, lâi chhin-kūn Siōng-tè.

23咱所ǹg望ê，已經有承認，taⁿ tio̍h堅固chit-ê承認無搖動；因為hit-ê應允咱ê是信實；Lán só͘ ǹg-bāng ê, í-keng ū sêng-jīn, taⁿ tio̍h kian-kò͘ chit ê sêng-jīn bô iô-tāng; in-ūi hit ê èng-ún lán ê sī sìn-si̍t;

24koh tio̍h大家相眷顧，來激起仁愛kap行好；koh tio̍h tāi-ke saⁿ koàn-kò͘, lâi kek-khí jîn-ài kap kiâⁿ hó;

25m̄-thang放soah lín ê聚會，親像有人慣勢án-ni，就是tio̍h相勸勉；既然看見hit日近，koh-khah tio̍h án-ni。m̄ thang pàng-soah lín ê chū-hōe, chhin-chhiūⁿ ū lâng koàiⁿ-sì án-ni, chiū-sī tio̍h saⁿ khoàn-bián; kì-jiân khòaⁿ-kìⁿ hit ji̍t kūn, koh khah tio̍h án-ni.

26因為咱已經得tio̍h真知真理，後來若甘心teh犯罪，就無koh有贖罪ê祭，In-ūi lán í-keng tit-tio̍h chin-chai chin-lí, āu-lâi nā kam-sim teh hoān-chōe, chiū bô koh ū sio̍k-chōe ê chè,

27獨獨驚惶來thèng候審判，kap beh吞滅對敵ê熱火。to̍k-to̍k kiaⁿ-hiâⁿ lâi thèng-hāu sím-phòaⁿ, kap beh thun-bia̍t tùi-te̍k ê jia̍t hé.

28棄絕摩西ê律法ê，有兩三人做干證，就hō͘伊死無憐憫:Khì-choa̍t Mô͘-se ê lu̍t-hoat ê, ū nn̄g saⁿ lâng chòe kan-chèng, chiū hō͘ i sí bô lîn-bín:

29何況thún踏上帝ê Kiáⁿ，將hō͘本身成聖ê約ê血做贖物，koh侮慢施恩ê聖神，lín想hit號人應該受ê刑罰tio̍h家jōa重ah？hô-hòng thún-ta̍h Siōng-tè ê Kiáⁿ, chiong hō͘ pún-sin chiâⁿ sèng ê iok ê huih chòe sio̍k mi̍h, koh bú-bān si un ê Sèng Sîn, lín siūⁿ hit hō lâng eng-kai siū ê hêng-hoa̍t tio̍h ke jōa tāng ah?

30因為咱知是誰有講，伸冤在我，我beh報應。In-ūi lán chai chī-chūi ū kóng, Sin-oan chāi góa, góa beh pò-èng.

31Koh講，主beh審判伊ê百姓。陷落tī真活上帝ê手，真thang驚ah！Koh kóng, Chú beh sím-phòaⁿ I ê peh-sìⁿ. Hām-lo̍h tī chin-oa̍h Siōng-tè ê chhiú, chin thang kiaⁿ ah!

32Lín tio̍h記得前得tio̍h光照了後，忍受患難ê大交戰hiah-ê日；Lín tio̍h kì-tit chêng tit-tio̍h kng chiò liáu-āu, jím-siū hoān-lān ê tōa kau-chiàn hiah ê ji̍t;

33或是受詈罵艱苦，hō͘人變弄做戲齣；á是人受chit號ê艱苦，lín亦kap伊有份。he̍k-sī siū lóe-mē kan-khó͘, hō͘ lâng pìⁿ-lāng chòe hì-chhut; á-sī lâng siū chit hō ê kan-khó͘, lín ia̍h kap i ū hūn.

34因為人tī鎖鏈ê中間，lín bat體貼伊；人搶lín ê業，lín歡喜忍受，知家己有koh-khah好久長tī-teh ê業。In-ūi lâng tī só-liān ê tiong-kan, lín bat thé-thiap i; lâng chhiúⁿ lín ê gia̍p, lín hoaⁿ-hí jím-siū, chai ka-kī ū koh khah hó kú-tn̂g tī-teh ê gia̍p.

35所以莫得棄sak lín好膽ê心，因為這有大報賞。Só͘-í bo̍h-tit khì-sak lín hó-táⁿ ê sim, in-ūi che ū tōa pò-siúⁿ.

36Lín要緊tio̍h吞忍，hō͘ lín，已經行上帝ê旨意，後來thang受所應允ê。Lín iàu-kín tio̍h thun-lún, hō͘ lín, í-keng kiâⁿ Siōng-tè ê chí-ì, āu-lâi thang siū só͘ èng-ún ê.

37因為koh tiap-á久nā-tiāⁿ， Hit-ê teh來ê beh到，伊無beh 延chhiân。In-ūi koh tiap-á-kú nā-tiāⁿ, Hit ê teh-lâi-ê beh kàu, I bô beh iân-chhiân.

38但是我ê義人beh tùi信來活: 設使伊kiu-koe̍h，我ê心無歡喜伊。Nā-sī góa ê gī lâng beh tùi sìn lâi oa̍h: Siat-sú i kiu-koe̍h, góa ê sim bô hoaⁿ-hí i.

39總是咱m̄是kiu-koe̍h，致到沉淪ê；是有信，致到靈魂得救ê。Chóng-sī lán m̄ sī kiu-koe̍h, tì-kàu tîm-lûn ê; sī ū sìn, tì-kàu lêng-hûn tit kiù ê.

1信就是所ǹg望ê ê實在，kap 未看見ê事ê憑準。Sìn chiū-sī só͘ ǹg-bāng ê ê si̍t-chāi, kap bē khòaⁿ-kìⁿ ê sū ê pîn-chún.

2因為tī chit-ê，就古早人有得tio̍h干證。In-ūi tī chit-ê, chiū kó͘-chá lâng ū tit-tio̍h kan-chèng.

3Tùi信，咱知chiah-ê世界是tùi上帝ê話來造成；án-ni所看見ê m̄是tùi能看見ê來成。Tùi sìn, lán chai chiah ê sè-kài sī tùi Siōng-tè ê ōe lâi chō-chiâⁿ; án-ni só͘ khòaⁿ-kìⁿ ê m̄ sī tùi ōe khòaⁿ-kìⁿ ê lâi chiâⁿ.

4Tùi信，亞伯獻祭hō͘上帝，比該隱khah好；tùi án-ni得tio̍h干證伊是義，就是上帝看伊ê禮物來做干證；koh tùi chit-ê信，伊死了iáu teh講話。Tùi sìn, A-pek hiàn-chè hō͘ Siōng-tè, pí Kai-ún khah hó; tùi án-ni tit-tio̍h kan-chèng i sī gī, chiū-sī Siōng-tè khòaⁿ i ê lé-mi̍h lâi chòe kan-chèng; koh tùi chit ê sìn, i sí-liáu iáu teh kóng ōe.

5Tùi信，以諾受遷徙，致到無見tio̍h死；人chhē伊bōe tio̍h，因為上帝遷徙伊；是未遷徙ê事先，有得tio̍h干證伊hō͘上帝歡喜。Tùi sìn, Í-lo̍k siū chhian-sóa, tì-kàu bô kìⁿ-tio̍h sí; lâng chhē i bōe tio̍h, in-ūi Siōng-tè chhian-sóa i; sī bē chhian-sóa ê tāi-seng, ū tit-tio̍h kan-chèng i hō͘ Siōng-tè hoaⁿ-hí.

6設使無信，就bōe會hō͘上帝歡喜；因為親近上帝ê，的確tio̍h信伊有，也是報賞hiah-ê求伊ê人。Siat-sú bô sìn, chiū bōe-ōe hō͘ Siōng-tè hoaⁿ-hí; in-ūi chhin-kūn Siōng-tè ê, tek-khak tio̍h sìn I ū, iā sī pò-siúⁿ hiah ê kiû I ê lâng.

7Tùi信，挪亞tī 未看見ê事，已經得tio̍h默示，就敬畏，來備辦大船，救伊ê家眷；tùi án-ni來定世間ê罪，koh得tio̍h承接照信ê義。Tùi sìn, Ná-a tī bē khòaⁿ-kìⁿ ê sū, í-keng tit-tio̍h be̍k-sī, chiū kèng-ùi, lâi pī-pān tōa chûn, kiù i ê ke-koàn; tùi án-ni lâi tēng sè-kan ê chōe, koh tit-tio̍h sêng-chiap chiàu sìn ê gī.

8Tùi信，亞伯拉罕受召ê時，就順命令出去，到將來beh得tio̍h做業ê地；伊出去，m̄知beh去tá-lo̍h。Tùi sìn, A-pek-la̍h-hán siū tiàu ê sî, chiū sūn bēng-lēng chhut-khì, kàu chiong-lâi beh tit-tio̍h chòe gia̍p ê tōe; i chhut-khì, m̄ chai beh khì tá-lo̍h.

9Tùi信就出外tī所應允ê地，親像tī m̄是家己ê地，khiā起tī布棚，kap以撒、雅各，就是saⁿ-kap承接同一樣ê應允ê；Tùi sìn chiū chhut-gōa tī só͘ èng-ún ê tōe, chhin-chhiūⁿ tī m̄ sī ka-kī ê tōe, khiā-khí tī pò͘-pîⁿ, kap Í-sat, Ngá-kok, chiū-sī saⁿ-kap sêng-chiap tâng chi̍t iūⁿ ê èng-ún ê;

10因為伊ǹg望有地基ê城，是上帝所經營起造ê。in-ūi i ǹg-bāng ū tōe-ki ê siâⁿ, sī Siōng-tè só͘ keng-êng khí-chō ê.

11Tùi信，撒拉，sui-bóng過生產ê年歲，iáu得tio̍h能懷孕，因為伊掠應允伊ê做信實；Tùi sìn, Sat-la̍h, sui-bóng kè seng-sán ê nî-hè, iáu tit-tio̍h ōe hoâi-īn, in-ūi i lia̍h èng-ún i ê chòe sìn-si̍t;

12所以tùi一人，koh是親像已經死ê，生湠親像天星ê chōe，親像海沙ê bōe算得。só͘-í tùi chi̍t lâng, koh sī chhin-chhiūⁿ í-keng sí ê, siⁿ-thòaⁿ chhin-chhiūⁿ thiⁿ chhiⁿ ê chōe, chhin-chhiūⁿ hái-soa ê bōe sǹg-tit.

13Chiah-ê lóng是照信來死，未bat得tio̍h所應允ê，獨獨遠遠看，歡喜來等接，koh家己認tī地上做人客，做出外ê。Chiah-ê lóng sī chiàu sìn lâi sí, bē bat tit-tio̍h só͘ èng-ún ê, to̍k-to̍k hn̄g-hn̄g khòaⁿ, hoaⁿ-hí lâi tán-chih, koh ka-kī jīn tī tōe-chiūⁿ chòe lâng-kheh, chòe chhut-gōa ê.

14因為án-ni講ê，是表明in teh chhē一個祖家。In-ūi án-ni kóng ê, sī piáu-bêng in teh chhē chi̍t ê chó͘-ke.

15In若siàu念所tùi hia出來ê地，就有thang tò去ê機會。In nā siàu-liām só͘ tùi hia chhut-lâi ê tōe, chiū ū thang tò-khì ê ki-hōe.

16總是taⁿ in欣慕koh-khah好ê，就是tī天裡ê；所以上帝稱做in ê上帝，無掠做見笑；因為已經替in備辦一個城。Chóng-sī taⁿ in him-bō͘ koh khah hó ê, chiū-sī tī thiⁿ-ni̍h ê; só͘-í Siōng-tè chheng-chòe in ê Siōng-tè, bô lia̍h-chòe kiàn-siàu; in-ūi í-keng thòe in pī-pān chi̍t ê siâⁿ.

17Tùi信，亞伯拉罕受試ê時，獻以撒；就是hit-ê承受chiah-ê應允ê獻伊獨生ê kiáⁿ；Tùi sìn, A-pek-la̍h-hán siū chhì ê sî, hiàn Í-sat; chiū-sī hit ê sêng-siū chiah ê èng-ún ê hiàn i to̍k-siⁿ ê kiáⁿ;

18bat有kā伊講，Tùi以撒生ê beh稱做你ê後裔:bat ū kā i kóng, Tùi Í-sat siⁿ ê beh chheng-chòe lí ê hō͘-è:

19因為伊掠做上帝tùi死人中能hō͘伊koh活；所以thang譬喻講得tio̍h伊tùi死倒tńg來。in-ūi i lia̍h-chòe Siōng-tè tùi sí-lâng tiong ōe hō͘ i koh-oa̍h; só͘-í thang phì-jū kóng tit-tio̍h i tùi sí tò-tńg-lâi.

20Tùi信，以撒論將來ê事祝福雅各、以掃。Tùi sìn, Í-sat lūn chiong-lâi ê sū chiok-hok Ngá-kok, Í-sò.

21Tùi信，雅各臨終ê時，kā約瑟兩個kiáⁿ祝福；òa柺á來敬拜。Tùi sìn, Ngá-kok lîm-chiong ê sî, kā Iok-sek nn̄g ê kiáⁿ chiok-hok; òa koáiⁿ-á lâi kèng-pài.

22Tùi信，約瑟臨終ê時，念tio̍h以色列ê後裔beh出埃及；koh為tio̍h伊ê骨骸來吩咐。Tùi-sìn, Iok-sek lîm-chiong ê sî, liām-tio̍h Í-sek-lia̍t ê hō͘-è beh chhut Ai-ki̍p; koh ūi-tio̍h i ê kut-hâi lâi hoan-hù.

23Tùi信，就摩西出世ê時，伊ê父母，因為看見kiáⁿ清秀，khǹg密伊三月日；亦m̄驚王ê命令。Tùi sìn, chiū Mô͘-se chhut-sì ê sî, i ê pē-bú, in-ūi khòaⁿ-kìⁿ kiáⁿ chheng-siù, khǹg-ba̍t i saⁿ ge̍h ji̍t; ia̍h m̄ kiaⁿ ông ê bēng-lēng.

24Tùi信，摩西已經長成，m̄承認做法老cha-bó͘-kiáⁿ ê kiáⁿ；Tùi sìn, Mô͘-se í-keng tióng-sêng, m̄ sêng-jīn chòe Hoat-ló cha-bó͘-kiáⁿ ê kiáⁿ;

25khah-ài kap上帝ê百姓saⁿ-kap受苦難，m̄-ài暫時享受罪惡ê快樂；khah ài kap Siōng-tè ê peh-sìⁿ saⁿ-kap siū khó͘-lān, m̄ ài chiām-sî hióng-siū chōe-ok ê khoài-lo̍k;

26掠做有份基督ê凌辱，比埃及ê財寶khah貴氣：是ǹg望報賞ê緣故。lia̍h-chòe ū hūn Ki-tok ê lêng-jio̍k, pí Ai-ki̍p ê châi-pó khah kùi-khì: sī ǹg-bāng pò-siúⁿ ê iân-kò͘.

27Tùi信，伊離開埃及，無驚王ê受氣；堅心忍耐，親像看見所bōe看見ê主。Tùi sìn, i lī-khui Ai-ki̍p, bô kiaⁿ ông ê siū-khì; kian-sim jím-nāi, chhin-chhiūⁿ khòaⁿ-kìⁿ só͘ bōe khòaⁿ-kìⁿ ê Chú.

28Tùi信，來設pôaⁿ過節，kap抹血ê禮，免得剿滅大kiáⁿ ê kha̍p-tio̍h in。Tùi sìn, lâi siat pôaⁿ-kè-choeh, kap boah huih ê lé, bián-tit châu-bia̍t tōa kiáⁿ ê kha̍p-tio̍h in.

29Tùi信，in 過紅海，親像行乾地：埃及人試行伊，就沉落去。Tùi sìn, in kè Âng-hái, chhin-chhiūⁿ kiâⁿ ta tōe: Ai-ki̍p lâng chhì kiâⁿ i, chiū tîm-lo̍h-khì.

30Tùi信，se̍h耶利哥城歷過七日，城就倒壞。Tùi sìn, se̍h Iâ-lī-ko siâⁿ le̍k-kè chhit ji̍t, siâⁿ chiū tó-hoāi.

31Tùi信，娼妓Lat-ha̍p用和平接納細作，所以無kap m̄順thàn ê人saⁿ-kap滅無。Tùi sìn, chhiong-ki Lat-ha̍p ēng hô-pêng chiap-la̍p sòe-choh, só͘-í bô kap m̄ sūn-thàn ê lâng saⁿ-kap bia̍t-bô.

32我beh koh講甚麼ah？beh講基甸、Pa-le̍k、參孫、Iâ-hut-tha；kap大衛、撒母耳，以及chiah-ê先知，就時無夠額。Góa beh koh kóng sím-mi̍h ah? beh kóng Ki-tiân, Pa-le̍k, Chham-sun, Iâ-hut-tha; kap Tāi-pi̍t, Sat-bó͘-ní, í-ki̍p chiah ê sian-ti, chiū sî bô kàu-gia̍h.

33Hiah-ê人，tùi信，thâi贏chiah-ê國，行公義，得tio̍h應允，ni̍h獅嘴，Hiah ê lâng, tùi sìn, thâi-iâⁿ chiah ê kok, kiâⁿ kong-gī, tit-tio̍h èng-ún, ni̍h sai ê chhùi,

34phah-hoa火燄，閃避利刀，弱成做強，交戰勇猛，攻破外邦ê戰陣。phah-hoa hé-iām, siám-pī lāi to, jio̍k chiâⁿ-chòe kiông, kau-chiàn ióng-béng, kong-phòa gōa-pang ê chiàn-tīn.

35有婦人人得tio̍h in ê親人tùi死koh活；亦有人受酷毒 ê刑罰，m̄願受贖；是ài得tio̍h khah好ê koh活:Ū hū-jîn-lâng tit-tio̍h in ê chhin-lâng tùi sí koh-oa̍h; ia̍h ū lâng siū khok-to̍k ê hêng-hoa̍t, m̄ goān siū sio̍k; sī ài tit-tio̍h khah hó ê koh-oa̍h:

36koh有人受戲弄、鞭phah，以及鎖鏈、關監，chiah-ê試：koh ū lâng siū hì-lāng, piⁿ-phah, í-ki̍p só-liān, koaiⁿ-kaⁿ, chiah ê chhì:

37koh有人受石頭tìm，鋸á鋸，受誘惑ê試，hō͘刀thâi死：穿綿羊、山羊ê皮，奔波ta̍k所在，tú-tio̍h sòng-hiong、患難、暴虐；koh ū lâng siū chio̍h-thâu tìm, kù-á kù, siū iú-he̍k ê chhì, hō͘ to thâi-sí: chhēng mî-iûⁿ soaⁿ-iûⁿ ê phê, phun-pho ta̍k só͘-chāi, tú-tio̍h sòng-hiong, hoān-lān, pō-gio̍k;

38有ê tī曠野，tī山嶺，tī石洞，tī地穴，四界漂流；chiah-ê人是世間bōe堪得有ê。ū-ê tī khòng-iá, tī soaⁿ-niá, tī chio̍h-tōng, tī tōe-hia̍t, sì-kè phiau-liû; chiah ê lâng sī sè-kan bōe kham-tit ū ê.

39In lóng已經tùi信得tio̍h干證，但是未bat得tio̍h所應允ê；In lóng í-keng tùi sìn tit-tio̍h kan-chèng, nā-sī bē bat tit-tio̍h só͘ èng-ún ê;

40因為上帝kā咱事先備辦koh-khah好ê事，是beh hō͘ in，若無咱，就bōe得tio̍h完全。in-ūi Siōng-tè kā lán tāi-seng pī-pān koh khah hó ê sū, sī beh hō͘ in, nā bô lán, chiū bōe tit-tio̍h oân-choân.

1已經有做干證ê到hiah-chōe，親像雲圍咱，就tio̍h放下ta̍k號ê重擔，kap快快纏絆咱ê罪，用吞忍來走所安排tī咱頭前ê路站，Í-keng ū chòe kan-chèng ê kàu hiah chōe, chhin-chhiūⁿ hûn ûi lán, chiū tio̍h pàng-hē ta̍k hō ê tāng tàⁿ, kap khoài-khoài tîⁿ-pòaⁿ lán ê chōe, ēng thun-lún lâi cháu só͘ an-pâi tī lán thâu-chêng ê lō͘-chām,

2tio̍h注神看耶穌，就是做信ê源頭kap chhiâⁿ尾ê。伊為tio̍h所安排tī伊頭前ê快樂，就無要緊凌辱，忍受十字架，taⁿ坐tī上帝寶座ê大pêng。tio̍h chù-sîn khòaⁿ Iâ-so͘, chiū-sī chòe sìn ê goân-thâu kap chhiâⁿ-bé ê. I ūi-tio̍h só͘ an-pâi tī I thâu-chêng ê khoài-lo̍k, chiū bô iàu-kín lêng-jio̍k, jím-siū si̍p-jī-kè, taⁿ chē tī Siōng-tè pó-chō ê tōa pêng.

3伊吞忍pháiⁿ人親像án-ni橫逆伊，lín tio̍h想伊，免得lín ê心失志來厭倦。I thun-lún pháiⁿ lâng chhin-chhiūⁿ án-ni hêng-ge̍k I, lín tio̍h siūⁿ I, bián-tit lín ê sim sit-chì lâi ià-siān.

4Lín kap罪惡相對敵，猶未bat抵擋到流血；Lín kap chōe-ok saⁿ tùi-te̍k, iáu-bē bat tí-tng kàu lâu huih;

5koh lín bōe記得hit-ê用理氣勸lín親像勸kiáⁿ ê話，講， 我ê kiáⁿ ah，主ê警戒莫得看輕， Hō͘伊責備，莫得失志；koh lín bōe kì-tit hit-ê ēng lí-khì khǹg lín chhin-chhiūⁿ khǹg kiáⁿ ê ōe, kóng, Góa ê kiáⁿ ah, Chú ê kéng-kài bo̍h-tit khòaⁿ-khin, Hō͘ I chek-pī, bo̍h-tit sit-chì;

6因為主所疼ê，就警戒伊； Koh凡所接納ê kiáⁿ，就用鞭phah伊。"In-ūi Chú só͘ thiàⁿ ê, chiū kéng-kài i; Koh hoān só͘ chiap-la̍p ê kiáⁿ, chiū ēng piⁿ phah i. "

7Lín teh吞忍，是做警戒ê路用；上帝款待lín親像kiáⁿ；thái-thó有kiáⁿ無hō͘老父警戒ah？Lín teh thun-lún, sī chòe kéng-kài ê lō͘-ēng; Siōng-tè khoán-thāi lín chhin-chhiūⁿ kiáⁿ; thái-thó ū kiáⁿ bô hō͘ lāu-pē kéng-kài ah?

8眾kiáⁿ所有份ê警戒，lín若無受tio̍h；就是偷生ê，m̄是kiáⁿ。Chèng kiáⁿ só͘ ū hūn ê kéng-kài lín nā bô siū-tio̍h; chiū-sī thau-siⁿ-ê, m̄ sī kiáⁿ.

9Koh咱bat有肉體ê父警戒咱，咱尚且敬畏伊；何況咱ê神ê父，kiám m̄ koh-khah tio̍h降服伊，來得tio̍h活mah？Koh lán bat ū jio̍k-thé ê pē kéng-kài lán, lán siōng-chhiáⁿ kèng-ùi i; hô-hòng lán ê sîn ê Pē, kiám m̄ koh khah tio̍h hâng-ho̍k I, lâi tit-tio̍h oa̍h mah?

10因為hiah-ê是暫時chhut-chāi家己ê意思來警戒咱；獨獨chit-ê是為tio̍h咱ê利益，hō͘咱有份tī伊ê聖潔。In-ūi hiah-ê sī chiām-sî chhut-chāi ka-kī ê ì-sù lâi kéng-kài lán; to̍k-to̍k chit-ê sī ūi-tio̍h lán ê lī-ek, hō͘ lán ū hūn tī I ê sèng-kiat.

11見若警戒ê事，tī當時照看m̄是歡喜，是憂悶；但是後來，就tī hiah-ê tùi警戒來練達ê人，結平安ê果子，就是義ê果子。Kìⁿ-nā kéng-kài ê sū, tī tng-sî chiàu-khòaⁿ m̄ sī hoaⁿ-hí, sī iu-būn; nā-sī āu-lâi, chiū tī hiah-ê tùi kéng-kài lâi liān-ta̍t ê lâng, kiat pêng-an ê ké-chí, chiū-sī gī ê ké-chí.

12所以腳酸手軟ê，lín tio̍h hō͘伊勇健；Só͘-í kha sng chhiú nńg ê, lín tio̍h hō͘ i ióng-kiāⁿ;

13為tio̍h lín ê腳備辦直直ê路，免得跛腳ê人歪chhoa̍h，反tńg hō͘伊得tio̍h醫好。ūi-tio̍h lín ê kha pī-pān ti̍t-ti̍t ê lō͘, bián-tit pái-kha ê lâng oai-chhoa̍h, hoán-tńg hō͘ i tit-tio̍h i-hó.

14Tio̍h致意kap眾人和睦，以及成聖，因為若m̄是聖無人會見tio̍h主；Tio̍h tì-ì kap chèng lâng hô-bo̍k, í-ki̍p chiâⁿ-sèng, in-ūi nā m̄ sī sèng bô lâng ōe kìⁿ-tio̍h Chú;

15亦tio̍h謹慎，驚了有人失落上帝ê恩；驚了有苦ê根發生來攪擾lín，致到chōe-chōe人bak lâ-sâm；ia̍h tio̍h kín-sīn, kiaⁿ-liáu ū lâng sit-lo̍h Siōng-tè ê un; kiaⁿ-liáu ū khó͘ ê kun hoat-siⁿ lâi kiáu-jiáu lín, tì-kàu chōe-chōe lâng bak lâ-sâm;

16驚了有淫亂ê，á是沉溺世情ê，親像以掃；伊因為一頓食賣大kiáⁿ ê業。kiaⁿ-liáu ū îm-loān ê, á-sī tîm-le̍k sè-chêng ê, chhin-chhiūⁿ Í-sò; i in-ūi chi̍t tǹg chia̍h bōe tōa kiáⁿ ê gia̍p.

17因為lín知，伊後來ài承接祝福ê時，有tú-tio̍h棄sak，因為伊chhē無反悔ê地步，雖然流目屎迫切求，亦bōe得tio̍h。In-ūi lín chai, i āu-lâi ài sêng-chiap chiok-hok ê sî, ū tú-tio̍h khì-sak, in-ūi i chhē bô hoán-hóe ê tōe-pō͘, sui-jiân lâu ba̍k-sái pek-chhiat kiû, ia̍h bōe tit-tio̍h.

18Taⁿ lín所到ê m̄是能摸得有火燄ê山，kap密雲、烏暗、大風，Taⁿ lín só͘ kàu ê m̄ sī ōe bong-tit ū hé-iām ê soaⁿ, kap ba̍t hûn, o͘-àm, tōa hong,

19號頭ê音，言語ê聲；聽見ê人求莫得koh kap in講；hō-thâu ê im, giân-gú ê siaⁿ; thiaⁿ-kìⁿ ê lâng kiû bo̍h-tit koh kap in kóng;

20因為所命令ê，in當bōe-tiâu，是講，就若走獸óa-tio̍h山，也tio̍h用石頭tìm死；in-ūi só͘ bēng-lēng ê, in tng bōe tiâu, sī kóng, Chiū nā cháu-siù óa-tio̍h soaⁿ, iā tio̍h ēng chio̍h-thâu tìm sí;

21koh所看見極其thang驚，致到摩西講，我不止驚到ngia̍uh-ngia̍uh-chhoah；koh só͘ khòaⁿ-kìⁿ ke̍k-kî thang kiaⁿ, tì-kàu Mô͘-se kóng, Góa put-chí kiaⁿ kàu ngia̍uh-ngia̍uh-chhoah;

22獨獨lín所到ê就是郇山，真活上帝ê城，天頂ê耶路撒冷，萬萬ê天使，to̍k-to̍k lín só͘ kàu ê chiū-sī Sûn-soaⁿ, chin-oa̍h Siōng-tè ê siâⁿ, thiⁿ-téng ê Iâ-lō͘-sat-léng, bān-bān ê thiⁿ-sài,

23hiah-ê有名記tī天裡ê大kiáⁿ ê聚會kap公會，審判眾人ê上帝，得tio̍h齊全ê義人ê靈魂，hiah ê ū miâ kì tī thiⁿ-ni̍h ê tōa kiáⁿ ê chū-hōe kap kong-hōe, sím-phòaⁿ chèng lâng ê Siōng-tè, tit-tio̍h chiâu-chn̂g ê gī lâng ê lêng-hûn,

24新約ê中保耶穌，kap所hiù ê血，chit-ê血所講ê比A-pek khah好。sin-iok ê tiong-pó Iâ-so͘, kap só͘ hiù ê huih, chit ê huih só͘ kóng ê pí A-pek khah hó.

25謹慎莫得拒絕tùi lín講ê。因為tī地裡來傳命令ê，若拒絕伊，尚且bōe會逃閃，何況咱違背tùi天傳命令ê ah？Kín-sīn bo̍h-tit kū-choa̍t tùi lín kóng ê. In-ūi tī tōe-ni̍h lâi thoân bēng-lēng ê, nā kū-choa̍t i, siōng-chhiáⁿ bōe-ōe tô-siám, hô-hòng lán ûi-pōe tùi thiⁿ thoân bēng-lēng ê ah?

26當時伊ê聲hō͘地振動；但是taⁿ有應允講，iáu有一pái我m̄-nā hou7te7 3搖choah，亦beh hō͘天搖choah。Tong-sî I ê siaⁿ hō͘ tōe tín-tāng; nā-sī taⁿ ū èng-ún kóng, Iáu ū chi̍t pái góa m̄ nā hō͘ tōe iô-choah, ia̍h beh hō͘ thiⁿ iô-choah.

27所講，iáu有一pái，是指明受振動ê物，就是受造ê物，beh tú-tio̍h遷徙，hō͘ hiah-ê無受振動ê長長tī-teh。Só͘ kóng, Iáu ū chi̍t pái, sī chí-bêng siū tín-tāng ê mi̍h, chiū-sī siū-chō ê mi̍h, beh tú-tio̍h chhian-sóa, hō͘ hiah ê bô siū tín-tāng ê tn̂g-tn̂g tī-teh.

28所以咱得tio̍h bōe會振動ê 國，tio̍h有恩惠，thang用虔誠敬畏來服事hō͘上帝歡喜；Só͘-í lán tit-tio̍h bōe-ōe tín-tāng ê kok, tio̍h ū un-hūi, thang ēng khiân-sêng kèng-ùi lâi ho̍k-sāi hō͘ Siōng-tè hoaⁿ-hí;

29因為咱ê上帝就是燄燄ê 火。in-ūi lán ê Siōng-tè chiū-sī iām-iām ê hé.