1信就是所ǹg望ê ê實在，kap 未看見ê事ê憑準。Sìn chiū-sī só͘ ǹg-bāng ê ê si̍t-chāi, kap bē khòaⁿ-kìⁿ ê sū ê pîn-chún.

2因為tī chit-ê，就古早人有得tio̍h干證。In-ūi tī chit-ê, chiū kó͘-chá lâng ū tit-tio̍h kan-chèng.

3Tùi信，咱知chiah-ê世界是tùi上帝ê話來造成；án-ni所看見ê m̄是tùi能看見ê來成。Tùi sìn, lán chai chiah ê sè-kài sī tùi Siōng-tè ê ōe lâi chō-chiâⁿ; án-ni só͘ khòaⁿ-kìⁿ ê m̄ sī tùi ōe khòaⁿ-kìⁿ ê lâi chiâⁿ.

4Tùi信，亞伯獻祭hō͘上帝，比該隱khah好；tùi án-ni得tio̍h干證伊是義，就是上帝看伊ê禮物來做干證；koh tùi chit-ê信，伊死了iáu teh講話。Tùi sìn, A-pek hiàn-chè hō͘ Siōng-tè, pí Kai-ún khah hó; tùi án-ni tit-tio̍h kan-chèng i sī gī, chiū-sī Siōng-tè khòaⁿ i ê lé-mi̍h lâi chòe kan-chèng; koh tùi chit ê sìn, i sí-liáu iáu teh kóng ōe.

5Tùi信，以諾受遷徙，致到無見tio̍h死；人chhē伊bōe tio̍h，因為上帝遷徙伊；是未遷徙ê事先，有得tio̍h干證伊hō͘上帝歡喜。Tùi sìn, Í-lo̍k siū chhian-sóa, tì-kàu bô kìⁿ-tio̍h sí; lâng chhē i bōe tio̍h, in-ūi Siōng-tè chhian-sóa i; sī bē chhian-sóa ê tāi-seng, ū tit-tio̍h kan-chèng i hō͘ Siōng-tè hoaⁿ-hí.

6設使無信，就bōe會hō͘上帝歡喜；因為親近上帝ê，的確tio̍h信伊有，也是報賞hiah-ê求伊ê人。Siat-sú bô sìn, chiū bōe-ōe hō͘ Siōng-tè hoaⁿ-hí; in-ūi chhin-kūn Siōng-tè ê, tek-khak tio̍h sìn I ū, iā sī pò-siúⁿ hiah ê kiû I ê lâng.

7Tùi信，挪亞tī 未看見ê事，已經得tio̍h默示，就敬畏，來備辦大船，救伊ê家眷；tùi án-ni來定世間ê罪，koh得tio̍h承接照信ê義。Tùi sìn, Ná-a tī bē khòaⁿ-kìⁿ ê sū, í-keng tit-tio̍h be̍k-sī, chiū kèng-ùi, lâi pī-pān tōa chûn, kiù i ê ke-koàn; tùi án-ni lâi tēng sè-kan ê chōe, koh tit-tio̍h sêng-chiap chiàu sìn ê gī.

8Tùi信，亞伯拉罕受召ê時，就順命令出去，到將來beh得tio̍h做業ê地；伊出去，m̄知beh去tá-lo̍h。Tùi sìn, A-pek-la̍h-hán siū tiàu ê sî, chiū sūn bēng-lēng chhut-khì, kàu chiong-lâi beh tit-tio̍h chòe gia̍p ê tōe; i chhut-khì, m̄ chai beh khì tá-lo̍h.

9Tùi信就出外tī所應允ê地，親像tī m̄是家己ê地，khiā起tī布棚，kap以撒、雅各，就是saⁿ-kap承接同一樣ê應允ê；Tùi sìn chiū chhut-gōa tī só͘ èng-ún ê tōe, chhin-chhiūⁿ tī m̄ sī ka-kī ê tōe, khiā-khí tī pò͘-pîⁿ, kap Í-sat, Ngá-kok, chiū-sī saⁿ-kap sêng-chiap tâng chi̍t iūⁿ ê èng-ún ê;

10因為伊ǹg望有地基ê城，是上帝所經營起造ê。in-ūi i ǹg-bāng ū tōe-ki ê siâⁿ, sī Siōng-tè só͘ keng-êng khí-chō ê.

11Tùi信，撒拉，sui-bóng過生產ê年歲，iáu得tio̍h能懷孕，因為伊掠應允伊ê做信實；Tùi sìn, Sat-la̍h, sui-bóng kè seng-sán ê nî-hè, iáu tit-tio̍h ōe hoâi-īn, in-ūi i lia̍h èng-ún i ê chòe sìn-si̍t;

12所以tùi一人，koh是親像已經死ê，生湠親像天星ê chōe，親像海沙ê bōe算得。só͘-í tùi chi̍t lâng, koh sī chhin-chhiūⁿ í-keng sí ê, siⁿ-thòaⁿ chhin-chhiūⁿ thiⁿ chhiⁿ ê chōe, chhin-chhiūⁿ hái-soa ê bōe sǹg-tit.

13Chiah-ê lóng是照信來死，未bat得tio̍h所應允ê，獨獨遠遠看，歡喜來等接，koh家己認tī地上做人客，做出外ê。Chiah-ê lóng sī chiàu sìn lâi sí, bē bat tit-tio̍h só͘ èng-ún ê, to̍k-to̍k hn̄g-hn̄g khòaⁿ, hoaⁿ-hí lâi tán-chih, koh ka-kī jīn tī tōe-chiūⁿ chòe lâng-kheh, chòe chhut-gōa ê.

14因為án-ni講ê，是表明in teh chhē一個祖家。In-ūi án-ni kóng ê, sī piáu-bêng in teh chhē chi̍t ê chó͘-ke.

15In若siàu念所tùi hia出來ê地，就有thang tò去ê機會。In nā siàu-liām só͘ tùi hia chhut-lâi ê tōe, chiū ū thang tò-khì ê ki-hōe.

16總是taⁿ in欣慕koh-khah好ê，就是tī天裡ê；所以上帝稱做in ê上帝，無掠做見笑；因為已經替in備辦一個城。Chóng-sī taⁿ in him-bō͘ koh khah hó ê, chiū-sī tī thiⁿ-ni̍h ê; só͘-í Siōng-tè chheng-chòe in ê Siōng-tè, bô lia̍h-chòe kiàn-siàu; in-ūi í-keng thòe in pī-pān chi̍t ê siâⁿ.

17Tùi信，亞伯拉罕受試ê時，獻以撒；就是hit-ê承受chiah-ê應允ê獻伊獨生ê kiáⁿ；Tùi sìn, A-pek-la̍h-hán siū chhì ê sî, hiàn Í-sat; chiū-sī hit ê sêng-siū chiah ê èng-ún ê hiàn i to̍k-siⁿ ê kiáⁿ;

18bat有kā伊講，Tùi以撒生ê beh稱做你ê後裔:bat ū kā i kóng, Tùi Í-sat siⁿ ê beh chheng-chòe lí ê hō͘-è:

19因為伊掠做上帝tùi死人中能hō͘伊koh活；所以thang譬喻講得tio̍h伊tùi死倒tńg來。in-ūi i lia̍h-chòe Siōng-tè tùi sí-lâng tiong ōe hō͘ i koh-oa̍h; só͘-í thang phì-jū kóng tit-tio̍h i tùi sí tò-tńg-lâi.

20Tùi信，以撒論將來ê事祝福雅各、以掃。Tùi sìn, Í-sat lūn chiong-lâi ê sū chiok-hok Ngá-kok, Í-sò.

21Tùi信，雅各臨終ê時，kā約瑟兩個kiáⁿ祝福；òa柺á來敬拜。Tùi sìn, Ngá-kok lîm-chiong ê sî, kā Iok-sek nn̄g ê kiáⁿ chiok-hok; òa koáiⁿ-á lâi kèng-pài.

22Tùi信，約瑟臨終ê時，念tio̍h以色列ê後裔beh出埃及；koh為tio̍h伊ê骨骸來吩咐。Tùi-sìn, Iok-sek lîm-chiong ê sî, liām-tio̍h Í-sek-lia̍t ê hō͘-è beh chhut Ai-ki̍p; koh ūi-tio̍h i ê kut-hâi lâi hoan-hù.

23Tùi信，就摩西出世ê時，伊ê父母，因為看見kiáⁿ清秀，khǹg密伊三月日；亦m̄驚王ê命令。Tùi sìn, chiū Mô͘-se chhut-sì ê sî, i ê pē-bú, in-ūi khòaⁿ-kìⁿ kiáⁿ chheng-siù, khǹg-ba̍t i saⁿ ge̍h ji̍t; ia̍h m̄ kiaⁿ ông ê bēng-lēng.

24Tùi信，摩西已經長成，m̄承認做法老cha-bó͘-kiáⁿ ê kiáⁿ；Tùi sìn, Mô͘-se í-keng tióng-sêng, m̄ sêng-jīn chòe Hoat-ló cha-bó͘-kiáⁿ ê kiáⁿ;

25khah-ài kap上帝ê百姓saⁿ-kap受苦難，m̄-ài暫時享受罪惡ê快樂；khah ài kap Siōng-tè ê peh-sìⁿ saⁿ-kap siū khó͘-lān, m̄ ài chiām-sî hióng-siū chōe-ok ê khoài-lo̍k;

26掠做有份基督ê凌辱，比埃及ê財寶khah貴氣：是ǹg望報賞ê緣故。lia̍h-chòe ū hūn Ki-tok ê lêng-jio̍k, pí Ai-ki̍p ê châi-pó khah kùi-khì: sī ǹg-bāng pò-siúⁿ ê iân-kò͘.

27Tùi信，伊離開埃及，無驚王ê受氣；堅心忍耐，親像看見所bōe看見ê主。Tùi sìn, i lī-khui Ai-ki̍p, bô kiaⁿ ông ê siū-khì; kian-sim jím-nāi, chhin-chhiūⁿ khòaⁿ-kìⁿ só͘ bōe khòaⁿ-kìⁿ ê Chú.

28Tùi信，來設pôaⁿ過節，kap抹血ê禮，免得剿滅大kiáⁿ ê kha̍p-tio̍h in。Tùi sìn, lâi siat pôaⁿ-kè-choeh, kap boah huih ê lé, bián-tit châu-bia̍t tōa kiáⁿ ê kha̍p-tio̍h in.

29Tùi信，in 過紅海，親像行乾地：埃及人試行伊，就沉落去。Tùi sìn, in kè Âng-hái, chhin-chhiūⁿ kiâⁿ ta tōe: Ai-ki̍p lâng chhì kiâⁿ i, chiū tîm-lo̍h-khì.

30Tùi信，se̍h耶利哥城歷過七日，城就倒壞。Tùi sìn, se̍h Iâ-lī-ko siâⁿ le̍k-kè chhit ji̍t, siâⁿ chiū tó-hoāi.

31Tùi信，娼妓Lat-ha̍p用和平接納細作，所以無kap m̄順thàn ê人saⁿ-kap滅無。Tùi sìn, chhiong-ki Lat-ha̍p ēng hô-pêng chiap-la̍p sòe-choh, só͘-í bô kap m̄ sūn-thàn ê lâng saⁿ-kap bia̍t-bô.

32我beh koh講甚麼ah？beh講基甸、Pa-le̍k、參孫、Iâ-hut-tha；kap大衛、撒母耳，以及chiah-ê先知，就時無夠額。Góa beh koh kóng sím-mi̍h ah? beh kóng Ki-tiân, Pa-le̍k, Chham-sun, Iâ-hut-tha; kap Tāi-pi̍t, Sat-bó͘-ní, í-ki̍p chiah ê sian-ti, chiū sî bô kàu-gia̍h.

33Hiah-ê人，tùi信，thâi贏chiah-ê國，行公義，得tio̍h應允，ni̍h獅嘴，Hiah ê lâng, tùi sìn, thâi-iâⁿ chiah ê kok, kiâⁿ kong-gī, tit-tio̍h èng-ún, ni̍h sai ê chhùi,

34phah-hoa火燄，閃避利刀，弱成做強，交戰勇猛，攻破外邦ê戰陣。phah-hoa hé-iām, siám-pī lāi to, jio̍k chiâⁿ-chòe kiông, kau-chiàn ióng-béng, kong-phòa gōa-pang ê chiàn-tīn.

35有婦人人得tio̍h in ê親人tùi死koh活；亦有人受酷毒 ê刑罰，m̄願受贖；是ài得tio̍h khah好ê koh活:Ū hū-jîn-lâng tit-tio̍h in ê chhin-lâng tùi sí koh-oa̍h; ia̍h ū lâng siū khok-to̍k ê hêng-hoa̍t, m̄ goān siū sio̍k; sī ài tit-tio̍h khah hó ê koh-oa̍h:

36koh有人受戲弄、鞭phah，以及鎖鏈、關監，chiah-ê試：koh ū lâng siū hì-lāng, piⁿ-phah, í-ki̍p só-liān, koaiⁿ-kaⁿ, chiah ê chhì:

37koh有人受石頭tìm，鋸á鋸，受誘惑ê試，hō͘刀thâi死：穿綿羊、山羊ê皮，奔波ta̍k所在，tú-tio̍h sòng-hiong、患難、暴虐；koh ū lâng siū chio̍h-thâu tìm, kù-á kù, siū iú-he̍k ê chhì, hō͘ to thâi-sí: chhēng mî-iûⁿ soaⁿ-iûⁿ ê phê, phun-pho ta̍k só͘-chāi, tú-tio̍h sòng-hiong, hoān-lān, pō-gio̍k;

38有ê tī曠野，tī山嶺，tī石洞，tī地穴，四界漂流；chiah-ê人是世間bōe堪得有ê。ū-ê tī khòng-iá, tī soaⁿ-niá, tī chio̍h-tōng, tī tōe-hia̍t, sì-kè phiau-liû; chiah ê lâng sī sè-kan bōe kham-tit ū ê.

39In lóng已經tùi信得tio̍h干證，但是未bat得tio̍h所應允ê；In lóng í-keng tùi sìn tit-tio̍h kan-chèng, nā-sī bē bat tit-tio̍h só͘ èng-ún ê;

40因為上帝kā咱事先備辦koh-khah好ê事，是beh hō͘ in，若無咱，就bōe得tio̍h完全。in-ūi Siōng-tè kā lán tāi-seng pī-pān koh khah hó ê sū, sī beh hō͘ in, nā bô lán, chiū bōe tit-tio̍h oân-choân.

1已經有做干證ê到hiah-chōe，親像雲圍咱，就tio̍h放下ta̍k號ê重擔，kap快快纏絆咱ê罪，用吞忍來走所安排tī咱頭前ê路站，Í-keng ū chòe kan-chèng ê kàu hiah chōe, chhin-chhiūⁿ hûn ûi lán, chiū tio̍h pàng-hē ta̍k hō ê tāng tàⁿ, kap khoài-khoài tîⁿ-pòaⁿ lán ê chōe, ēng thun-lún lâi cháu só͘ an-pâi tī lán thâu-chêng ê lō͘-chām,

2tio̍h注神看耶穌，就是做信ê源頭kap chhiâⁿ尾ê。伊為tio̍h所安排tī伊頭前ê快樂，就無要緊凌辱，忍受十字架，taⁿ坐tī上帝寶座ê大pêng。tio̍h chù-sîn khòaⁿ Iâ-so͘, chiū-sī chòe sìn ê goân-thâu kap chhiâⁿ-bé ê. I ūi-tio̍h só͘ an-pâi tī I thâu-chêng ê khoài-lo̍k, chiū bô iàu-kín lêng-jio̍k, jím-siū si̍p-jī-kè, taⁿ chē tī Siōng-tè pó-chō ê tōa pêng.

3伊吞忍pháiⁿ人親像án-ni橫逆伊，lín tio̍h想伊，免得lín ê心失志來厭倦。I thun-lún pháiⁿ lâng chhin-chhiūⁿ án-ni hêng-ge̍k I, lín tio̍h siūⁿ I, bián-tit lín ê sim sit-chì lâi ià-siān.

4Lín kap罪惡相對敵，猶未bat抵擋到流血；Lín kap chōe-ok saⁿ tùi-te̍k, iáu-bē bat tí-tng kàu lâu huih;

5koh lín bōe記得hit-ê用理氣勸lín親像勸kiáⁿ ê話，講， 我ê kiáⁿ ah，主ê警戒莫得看輕， Hō͘伊責備，莫得失志；koh lín bōe kì-tit hit-ê ēng lí-khì khǹg lín chhin-chhiūⁿ khǹg kiáⁿ ê ōe, kóng, Góa ê kiáⁿ ah, Chú ê kéng-kài bo̍h-tit khòaⁿ-khin, Hō͘ I chek-pī, bo̍h-tit sit-chì;

6因為主所疼ê，就警戒伊； Koh凡所接納ê kiáⁿ，就用鞭phah伊。"In-ūi Chú só͘ thiàⁿ ê, chiū kéng-kài i; Koh hoān só͘ chiap-la̍p ê kiáⁿ, chiū ēng piⁿ phah i. "

7Lín teh吞忍，是做警戒ê路用；上帝款待lín親像kiáⁿ；thái-thó有kiáⁿ無hō͘老父警戒ah？Lín teh thun-lún, sī chòe kéng-kài ê lō͘-ēng; Siōng-tè khoán-thāi lín chhin-chhiūⁿ kiáⁿ; thái-thó ū kiáⁿ bô hō͘ lāu-pē kéng-kài ah?

8眾kiáⁿ所有份ê警戒，lín若無受tio̍h；就是偷生ê，m̄是kiáⁿ。Chèng kiáⁿ só͘ ū hūn ê kéng-kài lín nā bô siū-tio̍h; chiū-sī thau-siⁿ-ê, m̄ sī kiáⁿ.

9Koh咱bat有肉體ê父警戒咱，咱尚且敬畏伊；何況咱ê神ê父，kiám m̄ koh-khah tio̍h降服伊，來得tio̍h活mah？Koh lán bat ū jio̍k-thé ê pē kéng-kài lán, lán siōng-chhiáⁿ kèng-ùi i; hô-hòng lán ê sîn ê Pē, kiám m̄ koh khah tio̍h hâng-ho̍k I, lâi tit-tio̍h oa̍h mah?

10因為hiah-ê是暫時chhut-chāi家己ê意思來警戒咱；獨獨chit-ê是為tio̍h咱ê利益，hō͘咱有份tī伊ê聖潔。In-ūi hiah-ê sī chiām-sî chhut-chāi ka-kī ê ì-sù lâi kéng-kài lán; to̍k-to̍k chit-ê sī ūi-tio̍h lán ê lī-ek, hō͘ lán ū hūn tī I ê sèng-kiat.

11見若警戒ê事，tī當時照看m̄是歡喜，是憂悶；但是後來，就tī hiah-ê tùi警戒來練達ê人，結平安ê果子，就是義ê果子。Kìⁿ-nā kéng-kài ê sū, tī tng-sî chiàu-khòaⁿ m̄ sī hoaⁿ-hí, sī iu-būn; nā-sī āu-lâi, chiū tī hiah-ê tùi kéng-kài lâi liān-ta̍t ê lâng, kiat pêng-an ê ké-chí, chiū-sī gī ê ké-chí.

12所以腳酸手軟ê，lín tio̍h hō͘伊勇健；Só͘-í kha sng chhiú nńg ê, lín tio̍h hō͘ i ióng-kiāⁿ;

13為tio̍h lín ê腳備辦直直ê路，免得跛腳ê人歪chhoa̍h，反tńg hō͘伊得tio̍h醫好。ūi-tio̍h lín ê kha pī-pān ti̍t-ti̍t ê lō͘, bián-tit pái-kha ê lâng oai-chhoa̍h, hoán-tńg hō͘ i tit-tio̍h i-hó.

14Tio̍h致意kap眾人和睦，以及成聖，因為若m̄是聖無人會見tio̍h主；Tio̍h tì-ì kap chèng lâng hô-bo̍k, í-ki̍p chiâⁿ-sèng, in-ūi nā m̄ sī sèng bô lâng ōe kìⁿ-tio̍h Chú;

15亦tio̍h謹慎，驚了有人失落上帝ê恩；驚了有苦ê根發生來攪擾lín，致到chōe-chōe人bak lâ-sâm；ia̍h tio̍h kín-sīn, kiaⁿ-liáu ū lâng sit-lo̍h Siōng-tè ê un; kiaⁿ-liáu ū khó͘ ê kun hoat-siⁿ lâi kiáu-jiáu lín, tì-kàu chōe-chōe lâng bak lâ-sâm;

16驚了有淫亂ê，á是沉溺世情ê，親像以掃；伊因為一頓食賣大kiáⁿ ê業。kiaⁿ-liáu ū îm-loān ê, á-sī tîm-le̍k sè-chêng ê, chhin-chhiūⁿ Í-sò; i in-ūi chi̍t tǹg chia̍h bōe tōa kiáⁿ ê gia̍p.

17因為lín知，伊後來ài承接祝福ê時，有tú-tio̍h棄sak，因為伊chhē無反悔ê地步，雖然流目屎迫切求，亦bōe得tio̍h。In-ūi lín chai, i āu-lâi ài sêng-chiap chiok-hok ê sî, ū tú-tio̍h khì-sak, in-ūi i chhē bô hoán-hóe ê tōe-pō͘, sui-jiân lâu ba̍k-sái pek-chhiat kiû, ia̍h bōe tit-tio̍h.

18Taⁿ lín所到ê m̄是能摸得有火燄ê山，kap密雲、烏暗、大風，Taⁿ lín só͘ kàu ê m̄ sī ōe bong-tit ū hé-iām ê soaⁿ, kap ba̍t hûn, o͘-àm, tōa hong,

19號頭ê音，言語ê聲；聽見ê人求莫得koh kap in講；hō-thâu ê im, giân-gú ê siaⁿ; thiaⁿ-kìⁿ ê lâng kiû bo̍h-tit koh kap in kóng;

20因為所命令ê，in當bōe-tiâu，是講，就若走獸óa-tio̍h山，也tio̍h用石頭tìm死；in-ūi só͘ bēng-lēng ê, in tng bōe tiâu, sī kóng, Chiū nā cháu-siù óa-tio̍h soaⁿ, iā tio̍h ēng chio̍h-thâu tìm sí;

21koh所看見極其thang驚，致到摩西講，我不止驚到ngia̍uh-ngia̍uh-chhoah；koh só͘ khòaⁿ-kìⁿ ke̍k-kî thang kiaⁿ, tì-kàu Mô͘-se kóng, Góa put-chí kiaⁿ kàu ngia̍uh-ngia̍uh-chhoah;

22獨獨lín所到ê就是郇山，真活上帝ê城，天頂ê耶路撒冷，萬萬ê天使，to̍k-to̍k lín só͘ kàu ê chiū-sī Sûn-soaⁿ, chin-oa̍h Siōng-tè ê siâⁿ, thiⁿ-téng ê Iâ-lō͘-sat-léng, bān-bān ê thiⁿ-sài,

23hiah-ê有名記tī天裡ê大kiáⁿ ê聚會kap公會，審判眾人ê上帝，得tio̍h齊全ê義人ê靈魂，hiah ê ū miâ kì tī thiⁿ-ni̍h ê tōa kiáⁿ ê chū-hōe kap kong-hōe, sím-phòaⁿ chèng lâng ê Siōng-tè, tit-tio̍h chiâu-chn̂g ê gī lâng ê lêng-hûn,

24新約ê中保耶穌，kap所hiù ê血，chit-ê血所講ê比A-pek khah好。sin-iok ê tiong-pó Iâ-so͘, kap só͘ hiù ê huih, chit ê huih só͘ kóng ê pí A-pek khah hó.

25謹慎莫得拒絕tùi lín講ê。因為tī地裡來傳命令ê，若拒絕伊，尚且bōe會逃閃，何況咱違背tùi天傳命令ê ah？Kín-sīn bo̍h-tit kū-choa̍t tùi lín kóng ê. In-ūi tī tōe-ni̍h lâi thoân bēng-lēng ê, nā kū-choa̍t i, siōng-chhiáⁿ bōe-ōe tô-siám, hô-hòng lán ûi-pōe tùi thiⁿ thoân bēng-lēng ê ah?

26當時伊ê聲hō͘地振動；但是taⁿ有應允講，iáu有一pái我m̄-nā hou7te7 3搖choah，亦beh hō͘天搖choah。Tong-sî I ê siaⁿ hō͘ tōe tín-tāng; nā-sī taⁿ ū èng-ún kóng, Iáu ū chi̍t pái góa m̄ nā hō͘ tōe iô-choah, ia̍h beh hō͘ thiⁿ iô-choah.

27所講，iáu有一pái，是指明受振動ê物，就是受造ê物，beh tú-tio̍h遷徙，hō͘ hiah-ê無受振動ê長長tī-teh。Só͘ kóng, Iáu ū chi̍t pái, sī chí-bêng siū tín-tāng ê mi̍h, chiū-sī siū-chō ê mi̍h, beh tú-tio̍h chhian-sóa, hō͘ hiah ê bô siū tín-tāng ê tn̂g-tn̂g tī-teh.

28所以咱得tio̍h bōe會振動ê 國，tio̍h有恩惠，thang用虔誠敬畏來服事hō͘上帝歡喜；Só͘-í lán tit-tio̍h bōe-ōe tín-tāng ê kok, tio̍h ū un-hūi, thang ēng khiân-sêng kèng-ùi lâi ho̍k-sāi hō͘ Siōng-tè hoaⁿ-hí;

29因為咱ê上帝就是燄燄ê 火。in-ūi lán ê Siōng-tè chiū-sī iām-iām ê hé.

1兄弟ê相疼tio̍h久長。Hiaⁿ-tī ê saⁿ-thiàⁿ tio̍h kú-tn̂g.

2莫得bōe記得接待人客；因為tùi án-ni，bat有接待tio̍h天使，亦m̄知ê。Bo̍h-tit bōe kì-tit chiap-thāi lâng-kheh; in-ūi tùi án-ni, bat ū chiap-thāi-tio̍h thiⁿ-sài, ia̍h m̄ chai ê.

3Tio̍h siàu念chiah-ê受關ê，親像kap in相同關；siàu念受暴虐 ê，是lín亦有身軀。Tio̍h siàu-liām chiah ê siū koaiⁿ ê, chhin-chhiūⁿ kap in saⁿ-tâng koaiⁿ; siàu-liām siū pō-gio̍k ê, sī lín ia̍h ū seng-khu.

4婚姻人人tio̍h尊重，床無lâ-sâm；因為私通行淫ê人，上帝beh審判伊。Hun-in lâng-lâng tio̍h chun-tiōng, chhn̂g bô lâ-sâm; in-ūi su-thong kiâⁿ-îm ê lâng, Siōng-tè beh sím-phòaⁿ i.

5心志m̄-thang貪財；掠所有ê做夠額；因為上帝有講，我決斷無放sak你，決斷無離開你。Sim-chì m̄ thang tham châi; lia̍h só͘ ū ê chòe kàu-gia̍h; in-ūi Siōng-tè ū kóng, Góa koat-toàn bô pàng-sak lí, koat-toàn bô lī-khui lí.

6所以咱thang好膽講， 主就是幫贊我ê，我無beh驚惶， 人beh啥法得我ta-ôa？"Só͘-í lán thang hó-táⁿ kóng, Chú chiū-sī pang-chān góa ê, góa bô beh kiaⁿ-hiâⁿ, Lâng beh siáⁿ hoat-tit góa ta-ôa?"

7前引chhōa lín，用上帝ê道理傳hō͘ lín ê人，lín tio̍h siàu念in；看in行做ê結局，來學in ê信。Chêng ín-chhōa lín, ēng Siōng-tè ê tō-lí thoân hō͘ lín ê lâng, lín tio̍h siàu-liām in; khòaⁿ in kiâⁿ-chòe ê kiat-kio̍k, lâi o̍h in ê sìn.

8耶穌基督昨日、今á日同一樣，直到代代。Iâ-so͘ Ki-tok chā-ji̍t kin-á-ji̍t tâng chi̍t iūⁿ, ti̍t kàu tāi-tāi.

9Lín莫得hō͘ chhap雜各樣ê教所遷徙；因為心tùi恩典來堅固chiah是好；m̄是tùi hiah-ê食物；因為用工tī hiah-ê物ê，無利益。Lín bo̍h-tit hō͘ chhap-cha̍p koh-iūⁿ ê kàu só͘ chhian-sóa; in-ūi sim tùi un-tián lâi kian-kò͘ chiah sī hó; m̄ sī tùi hiah ê chia̍h-mi̍h; in-ūi ēng kang tī hiah ê mi̍h ê, bô lī-ek.

10咱有祭壇，服事tī會幕ê無權thang食伊。Lán ū chè-tôaⁿ, ho̍k-sāi tī hōe-bō͘ ê bô koân thang chia̍h i.

11因為cheng-siⁿ ê血hō͘祭司頭帶入聖所來贖罪，hiah-ê cheng-siⁿ ê身體就燒tī營外。In-ūi cheng-siⁿ ê huih hō͘ chè-si-thâu tòa ji̍p sèng-só͘ lâi sio̍k chōe, hiah ê cheng-siⁿ ê sin-thé chiū sio tī iâⁿ-gōa.

12所以耶穌因為beh用家己ê血hō͘百姓成聖，亦受苦tī城門外。Só͘-í Iâ-so͘ in-ūi beh ēng ka-kī ê huih hō͘ peh-sìⁿ chiâⁿ-sèng, ia̍h siū khó͘ tī siâⁿ mn̂g gōa.

13Án-ni咱亦tio̍h出營外來就近伊，受伊所受ê凌辱。Án-ni lán ia̍h tio̍h chhut iâⁿ gōa lâi chiū-kūn I, siū I só͘ siū ê lêng-jio̍k.

14因為tī chia咱無久長tī-teh ê城，是chhē hit-ê將來ê。In-ūi tī chia lán bô kú-tn̂g tī-teh ê siâⁿ, sī chhē hit ê chiong-lâi ê.

15所以tio̍h對耶穌常常用o-ló做祭，獻hō͘上帝；這就是承認主名ê嘴唇所結ê果子。Só͘-í tio̍h tùi Iâ-so͘ siông-siông ēng o-ló chòe chè, hiàn hō͘ Siōng-tè; che chiū-sī sêng-jīn Chú miâ ê chhùi-tûn só͘ kiat ê ké-chí.

16獨獨行好，kap相供給，lín m̄-thang bōe記得，因為chit號ê祭是上帝所歡喜ê。To̍k-to̍k kiâⁿ hó, kap saⁿ kiong-kip, lín m̄ thang bōe kì-tit, in-ūi chit hō ê chè sī Siōng-tè só͘ hoaⁿ-hí ê.

17引chhōa lín ê，lín tio̍h聽thàn順服in；因為in為tio̍h lín ê靈魂警醒，是將來tio̍h家己排列ê；lín tio̍h hō͘ in用歡喜來做，無用吐氣；因為chit-ê無利益lín。Ín-chhōa lín ê, lín tio̍h thiaⁿ-thàn sūn-ho̍k in; in-ūi in ūi-tio̍h lín ê lêng-hûn kéng-séng, sī chiong-lâi tio̍h ka-kī pâi-lia̍t ê; lín tio̍h hō͘ in ēng hoaⁿ-hí lâi chòe, bô ēng thó͘-khùi; in-ūi chit-ê bô lī-ek lín.

18Lín tio̍h替阮祈禱；阮信家己有照良心，凡事ài照正直來行。Lín tio̍h thòe goán kî-tó; goán sìn ka-kī ū chiàu liông-sim, hoān sū ài chiàu chèng-ti̍t lâi kiâⁿ.

19我益發勸lín行án-ni，hō͘我thang khah緊koh就近lín。Góa it-hoat khǹg lín kiâⁿ án-ni, hō͘ góa thang khah kín koh chiū-kūn lín.

20Taⁿ願平安ê上帝，就是bat tī永遠ê約ê血，tùi死人中chhōa羊群ê大牧者，咱ê主耶穌，koh起來，Taⁿ goān pêng-an ê Siōng-tè, chiū-sī bat tī éng-oán ê iok ê huih tùi sí-lâng tiong chhōa iûⁿ-kûn ê tōa bo̍k-chiá, lán ê Chú Iâ-so͘, koh khí-lâi,

21hō͘ lín tī ta̍k項好事完全，來行伊ê旨意，koh對耶穌基督，tī咱ê心內，行tāi-chì，得tio̍h歡喜tī伊ê面前；願榮光歸tī伊，代代無soah。À-bēng。hō͘ lín tī ta̍k hāng hó sū oân-choân, lâi kiâⁿ I ê chí-ì, koh tùi Iâ-so͘ Ki-tok, tī lán ê sim-lāi, kiâⁿ tāi-chì, tit-tio̍h hoaⁿ-hí tī I ê bīn-chêng; goān êng-kng kui tī I, tāi-tāi bô soah. À-bēng.

22兄弟ah，我寫短短ê phoe hō͘ lín；勸lín接納我勸勉ê話。Hiaⁿ-tī ah, góa siá té-té ê phoe hō͘ lín; khǹg lín chiap-la̍p góa khoàn-bián ê ōe.

23Lín tio̍h知咱ê兄弟提摩太已經得tio̍h tháu放；伊若緊緊來，我beh kap伊去見lín。Lín tio̍h chai lán ê hiaⁿ-tī Thê-mô͘-thài í-keng tit-tio̍h tháu-pàng; i nā kín-kín lâi, góa beh kap i khì kìⁿ lín.

24請lín請安chiah-ê引chhōa lín ê人kap眾聖徒。有意大利ê人請安lín。Chhiáⁿ lín chhéng-an chiah ê ín-chhōa lín ê lâng kap chèng sèng-tô͘. Ū Í-tāi-lī ê lâng chhéng-an lín.

25願恩典kap lín眾人tī-teh。À-bēng。Goān un-tián kap lín chèng-lâng tī-teh. À-bēng.